ဂွံဆဵုဝါတ်လောန် ဝၚ်မခတောန်
ညးတီပရူဝၚ်မခတောန် အောန်လောန်ရောၚ် သၠေဟ်ကေတ်ရ၊ "ကတဵုဒှ်ဍုၚ်လဵု ကၠာအိုတ်ရော၊ ခေတ်လောန်ကၠုၚ် ဗၞတ်လလအ်လဵု မူဂကူလဵုမွဲ ရပ်စပ်စကာကၠုၚ် မခတောန်ရော၊ နူတမ်ကဝ်တေံရ သ္ပတမ်ရပ်စပ်ကၠုၚ်ဟာ" ရဴသာ်ဝွံ ညးလ္ၚဵုချပ်ဒၟံၚ်ရ၊ ခမဳကဵုခမဳကီု ရဲမၚ်သဳကီု ချပ်ဂၞန်ညးသ္ကအ်ဂှ် ကေၚ်မိၚ်ကၠုၚ်ရ။
ညးချူလိက်ဝွံ ၜိုတ်သၟဟ်ရထပမာန် ဂၠာဲလ္ၚတ်စမ်ၜတ်ရံၚ်တုဲ ဂွံညာတ်ကေတ် သွဟ်ဍာံတအ်ဂှ်ရ၊ ကလိလောန်ကၠုၚ်တုဲ အတိက် ၄၀၀၀ သၞာံ ပြၚ်တေံသ္ပတမ်ကတဵုဒှ်ကၠုၚ် ပ္ဍဲဒေသကြုၚ်အိန္ဒု တွဵုရး အိန္ဒိယတေံရ၊ ဂကူ အာရဳယာန် မံၚ်ဒၟံၚ်ပ္ဍဲဒေသဌာန်တအ်ဂှ် ဒဒှ်ရ ရပ်စပ်စကာကၠုၚ်ကီု၊ ကၠာကျာ်ဂေါတမ ဟွံကတဵုဒှ်ဏီ ဗၞတ် ၂၀၀၀ သၞာံတေံဒဒှ်ရ ကတဵုဒှ်နွံပြကဋ်ကၠုၚ်ကီု၊ ဂွံညာတ်ကေတ် သက်သဳသာဓက ခိုၚ်ခိုၚ်ကၠိုက်ကၠိုက် ပ္ဍဲပြကိုဟ် သက္ကဋပူရာမ် နာဂရဳပူရာမ်-မချူခၞမ်လဝ် ဝၚ်ခေတ်တအ်ဂှ်ရ။
နူအခိၚ်လဵု စိုပ်ကၠုၚ်ဍုၚ်မည် ဗမာဝွံရောဟီုမ္ဂး ဃောအသိၚ်ဇြဟတ် ဍုၚ်တဂံၚ်ကဵုဍုၚ်ဗကာံ ခိုဟ်ဒၟံၚ်တေံဂှ် မခတောန်ဝွံ လုပ်စိုပ်ကၠုၚ် ဍုၚ်ပိုယ်ဏအ်ရောၚ်ဂှ် ဒးဟီုဂးတဴရ၊ ပ္ဍဲအခိၚ်ဂှ် ဍုၚ်အိန္ဒိယကဵု ဍုၚ်မည်ဗမာပိုယ်ဂှ် ကွတ်ပညာ ယေန်သၞာၚ်၊ ကွတ်ပညာသုခုမကီု၊ ပရေၚ်သာသနာကီု သၞဴရဴဒှ်ဒၟံၚ်မွဲဗစပ်ဓဝ်ဂှ် ထံက်ကဵု ရာဇာဝၚ်တုဲ ဍာံပြဨကန်ရ သာ်ဝွံ ခယျကေတ်မာန်ရ။
ပ္ဍဲပိဋကတ်ပိ ကေုာံနိကာယ်မသုန်ဂှ် စပ်ကဵု ပရူမခတောန်တုဲ ပါဠိကျာ်တွံလဝ် နွံဒၟံၚ်ကဵုဟာ သာ်ဝွံသၟာန်မ္ဂး ဟွံမွဲသ္ဒးသှ်ကဵုရ။
မခတောန် ကော်ဂးမာလာ[ပလေဝ်ဒါန် | ပလေဝ်ဒါန် တမ်ကၞက်]
ဒၞာဲဌာန်ဒေသ မခတောန်ကတဵုဒှ်ကၠုၚ် နကဵုဂလာန်ကောန်ညးဍုၚ်အိန္ဒိယတအ်မ္ဂး မခတောန်ဂှ် မာလာကော်ခဴစရ၊ ဂလာန်မပ္တံကဵု အရေဝ် ဟိန္ဒူ၊ အရေဝ်ဂေါရက္ခာ ၊ အရေဝ်အူရဒူ အရေဝ်ပါန်ဂျာပ် အရေဝ်ဗၚ်ဂါလဳတအ်လေဝ် သီုဖအိုတ်ကော်ခဴစဒၟံၚ် မခတောန်ဂှ် မာလာအိုတ်ရ။
ပိုဒ်မာလာ နွံဒၟံၚ်ပ္ဍဲပြကိုဟ်ကၞပ်ပါဠိဂှ် ကဴကီု၊ ဇုက်လွာကီု လၟေၚ်တၞောဝ်ကီု တွံတဴရ၊ ထံက်ရၚ်ကဵုဝၚ် ထ္ၜးလဝ်တအ်ဂှ်တုဲ မခတောန်ကီု တွံတဴရ၊ ဇၟန်ကဴ (ကဝးကဴ) တန်ဒှ်ဟွံမာန်၊ မခတောန်သ္ဒးဒှ်ရောၚ်။
မခတောန်ဂှ် ကၠာကျာ်ဟွံဒှ် ဗၞတ် ၂၀၀၀ သၞာံပြၚ်တေံ သ္ပတမ်ကတဵုဒှ်တိုန်ကၠုၚ် နူကြုၚ်ၜဳအိန္ဒု တွဵုရးအိန္ဒိယတေံရောၚ်ဂှ် ဝၚ်မခတောန် ပရူပရာဆေၚ်စပ် နှောဲဒၟံၚ်ကဵု မပ္တံသာ်ဝွံရောၚ် သမ္တီညိ။