ဂွံဒုၚ်ခဳကဵုဘဝဒဒိုက်မာန်ဟီုဂှ်
ဂဗဆဵုဒဒိုက်လေဝ် စိုတ်ဓါတ်လ္ပစှ်ေ စိုတ်ဓါတ်လ္ပလီု ဆဵုတသိုက်လေဝ် လ္ပမိပ်စိုတ် စိုတ်လ္ပသၠုၚ်ဇကုဇကု ဂွံမံၚ်စေဝ်လ္ဒောဝ်မာန်ဂှ် ပ္ဍဲဇကုသ္ဘဴဓဝ်ဓမ္မနွံဟေၚ် ထိၚ်ဒဝ်လဝ်မာန်ရ။
စိုတ်ဂှ်ထိၚ်လဝ်ကဵုသ္ဘဴဓဝ်ကျာ်မာန်မ္ဂး ဒုၚ်အဘဳလောကဓဝ်ခိုဟ် ပရေံမာန်ရ၊သ္ဘဴဓဝ် အလောဘ ကဵုမာန်နွံမ္ဂး ထိၚ်ဒဝ်လောဘမာန်ရ၊ သ္ဘဴဓဝ် အဒေါသ လေပ်ဆာန်ဍူ ညးတၞဟ်မာန်နွံမ္ဂး ထိၚ်ဒဝ် ဒေါသမာန်ရ။
ကလိဂွံဘဝတုဲမ္ဂး ဒဒိုက်တသိုက် ခိုဟ်ပရေံဟွံဆဵုလေဝ် ဒးဆဵုဂှ် ဒှ်သ္ဘဴလောကဓဝ်သ္ဂးရ၊ ခိုဟ်မွဲလ္စုတ် ပရေံမွဲလ္စုတ် ဒးဒှ်ဍာံဍာံရ၊ ကာလဇီုကပိုက်လောကဓဝ်ပရေံဂှ် ညံၚ်ဘဝဟွံလီုဂှ် ဒးထိၚ်ကဵုသ္ဘဴဓဝ်ရ။
ညးလ္ၚဵုဒှ်တသိုက်ဘဝ ဒးဒုၚ်ဒဒိုက်ယဲဝေဒနာ ညးလ္ၚဵုဘဝ ဒိုက်ဝါတ် ယဲဝေဒနာဟွံမွဲ ညးလ္ၚဵုနွံကဵု ပွဳပွိုၚ်ကောန်ဇာတ်ညးလ္ၚဵု ဒးသာဲနူသမာဘာကောန်ဇာတ် လ္တူစၚ်ဇာတ်ဘဝ ထ္ၜးမံၚ် ဇာတ်တၞဟ်တၞဟ်ရ။
ဆဵုဂဗဒဒိုက် ဒုၚ်ခဳမာန်၊ ဒှ်တသိုက်မ္ဂး ထိၚ်ဘဝဟွံမာန်ဂှ် မၞိဟ်နွံဂၠိုၚ်ရ၊ မပ္တံဗက်အလိုက်ကာမ အိန်ထံၚ်ပြးဆာဲ ကောန်ဇာတ်လီုလာ်ရ၊မၞိဟ်မၚ်မွဲလဝ် ဓဝ်နွံဂှ် ဒှ်မၞိဟ်ဒုၚ်ခဳကဵု လောကဓဝ် ခိုဟ်ပရေံမာန်ရ။
မၞိဟ်တံဂှ်ဒးဗ္ဒကဵုဓဝ်ဘာသာရ၊ ဓဝ်ဘာသာဂှ် ဒှ်ဓဝ်ပလေဝ်စရိုတ်မၞိဟ်တံရ၊ ဂကူမန်တံ ဗ္ဒကဵုဓဝ်ကျာ်ဂၠိုၚ်ရ၊ သွက်မၞိဟ်တံ ဒှ်ဓဝ်ပလေဝ် ဘဝဍာံဍာံဂှ် ကျာ်တွံထ္ၜးလဝ် ဂၠံၚ်ဓဝ်ဝိပဿနာနွံရ။
ကြက်ရှ်ဓဝ်ကျာ်ဂှ် ဒှ်ဓဝ်ဝိပဿနာရ၊ ဆဂးလ္တူဓဝ်ကျာ်မဒှ်ရှ် ကြက်ဂှ် ဂကူမန်တံ ဒ္ဂေတ်လ္ၚတ်လဝ်အောန်တုဲ ဘဝဒးဒုၚ်လေၚ်ဆောံ မံၚ်ကဵုဓဝ်လောက (၈) သာ်ဏံဂၠိုၚ်ရ။
ဂွံဒှ်ဒဒိုက် ဂွံဒှ်တသိုက် ဂွံဆာန် ဂွံက္ဍုဟ် ဂွံကောံ ဂွံပြးတံဂှ် ဒှ်ကၠုၚ်နူသ္ဘဴဍေံကဵုဍေံ၊ အခိၚ်ဍေံဒှ်စိုပ်မ္ဂး ဒးဒှ်ဖ္အိုတ်ရ၊ အ္စာမၞိဟ်တၠ အစောန် ဒၞါတာကဵု သ္ဘဴဒှ် သ္ဘဴလီု ဟွံမွဲ။
သ္ဘဴဂမ္တဴဂမ္တာန်မံၚ်ပ္ဍဲစိုတ် ဂွံၜိုဟ်သြိုဟ်လလံအာမာန်ဂှ် သ္ဘဴဓဝ်တာဟေၚ် ဖန်ဖက်ကဵုမာန်ရ၊ မၞိဟ်ဒ္ဂေတ်လ္ၚတ် မၚ်မွဲလဝ်ဓဝ်ဓမ္မပေၚ်တံ ဒုၚ်ခဳလောကဓဝ်မာန်ရ၊ ဂမ္တဴဂမ္တာန်စိုတ်ဂှ် ဒှ်ကၠုၚ်နူသောက စံၚ်တူရ ဂွံမာန်သောက စံၚ်တူဂှ် ဓမ္မမွဲဟေၚ်ရ။
သ္ဘဴလောကဂှ် ဒှ်သ္တဴဒှ်ကဵုလီုရောၚ် တီလဝ်ကၠးကၠးမ္ဂး ကာလဍေံဒှ်လေဝ်ဟွံမိပ်စိုတ် ကာလဍေံလီုလေဝ်ဟွံအောန်စိုတ် ဖျေံဓမ္မတာမာန်ရ၊ ပ္ဍဲဇကုဓဝ်နွံမ္ဂး ဖိုလ်ဒှ်ကၠုၚ်ဂှ်ဒုၚ်မာန်ရ၊ ဟိုတ်နွံဖိုလ်နွံရ။
ဇၟာပ်ဆဵုဂဗလ္ပာ်ပရေံအေၚ်ဒုၚ်ဟွံမာန် ဒှ်မံၚ်ဒဒိုက် အောန်မံၚ်စိုတ်တံဂှ် ပ္ဍဲဇကုညးဓဝ်ဓမ္မဟွံမွဲရ၊ နကဵုဇြဟတ်ၜိုန်ဒုၚ်ခဳမံၚ်ကဵု လောကဓဝ်ကီုလေဝ် ဂၠံစိုတ်ၜိုဟ်သြိုဟ်ဂှ် ကၠိဂွံမာန်ရ၊ ပၟတ်ဒေါသ တူသဠာန်မံၚ် ပ္ဍဲကောန်တၟံဂှ် ဒးဒုၚ်စသိုၚ်မံၚ်ရ။
မၞိဟ်ဟွံဗ္ဒဗ္ဒဲါကဵုဓဝ်ဘာသာမွဲဂှ် တုပဟကဵုကၠံသွဝ်ဟွံမွဲကဵုဒပ်ဒၞးလဝ်ကီုရ၊ ဝိဝါဒလညာတ်ပါ်ဒကး အစောဲအလာံဗၠေတ်မှာလုပ်ဂွံတုဲ စိုတ်ဟွံဗိုန်ခိုၚ် ဗၠေတ်ဍာံရုဲဟွဲဒးဒးဆောံလေၚ်အာဘဝမာန်ရ။
"လောကဿဖုဿဓမ္မေဟိစိတ္တံယဿနကမ္မတိ" ပတှ်ေဓဝ်ဓမ္မ ကျာ်တြဲဂေါတမဍာံစၟတ်မ္ဂး ဆဵုဂဗလောကဓဝ်လေဝ် စိုတ်ဟွံချဳကသဳစိုတ်ဓါတ် ဟွံလီုလာ်ရ၊ မိက်ဂွံပလေဝ်စိုတ်စရိုဟ်မ္ဂး ဒ္ဂေတ်မၚ်မွဲဓဝ်ကျာ်ညိ။
ကဂှ်ဒးမံၚ်ပ္ဍဲဍာ်ရ ကတဵုဍာ်စာ်စ္ဍးညးသ္ကံဟွံဂွံ မၞိဟ်ဂှ်ဒးဒှ် ပ္ဍဲလောကမၞိဟ်ရ၊ မၞိဟ်ကဵုလောက ပြးညးသ္ကံဟွံဂွံ လောကဂှ် နွံကဵု ဒဒိုက်တသိုက် သီုၜါရဲရ၊ လ္ဆောဝ်ဒှ်ဒဒိုက် လ္ဆောဝ်ဒှ်တသိုက်ရ။
တီကၠိုဟ်သ္ဘဴလောကမ္ဂး သောက ဗျာပါဒအောန်ရ၊ ဒုၚ်ခဳကဵုဒဒိုက်မာန်ရ၊ မၞိဟ်ဒုၚ်ခဳဘဲ လောကမာန်ဂှ် ဘဝဟွံဆောဲလေၚ်ရ၊ စိုတ်ယှုက်ထုဲ သုၚ်အရက်သုရာ စိုတ်ယှုက်ထုဲ ကၠောန်ထောံရောဟ်ရောဟ်ဂှ် ဒှ်မၞိဟ်ဒးကျဘဝရ၊ ဘဝဂှ် ဒးပလေဝ်တုဲဟေၚ် ကျေဝ်မာန်။
ရံၚ်နကဵုမတ်ညာဏ် မတ်သ္ဘဴဓဝ်မ္ဂး ဒးဆဵုဒဒိုက်တသိုက်ဂှ် ဟွံတၟေၚ်မွဲသာ်ရ၊ သွက်ဒးအောန်စိုတ် မိပ်စိုတ်လေဝ်ဟွံမွဲရ၊ လၟုဟ်ဒှ်လၟုဟ်လီုအာရ၊ ဒိုက်တုဲသိုက်သိုက်တုဲ ဒိုက်ပၠန်ရ၊ မုသက်ဒးဒှ်ဂမ္တဴစိုတ်ဟွံသေၚ်ရ။
ဓဝ်ကျာ်တြဲဂှ် ဖျာ်ပ္တိတ်ဒဒိုက် ဒှ်မံၚ်ပ္ဍဲမၞိဟ်တံရ၊ ပ္ဍဲသန္တာန်စိုတ် မၞိဟ်တံပၟတ်တူတူသၠာန်မံၚ်နွံ(၁၀)ဗွဝ်ရ၊ သွက်ဂွံဖ္အိုတ်ဗွဝ်ပၟတ်ပ္ဍဲဇကုဂှ် ဗ္ဒကဵုဓဝ်ကျာ်ပေၚ်ၚ်ညိ။
တၠပညာဂၠးတိ ကၠုၚ်ဂ္ဇံမံၚ်ဓဝ် ကၠုၚ်ပၟဝ်မံၚ်ဝိဿနာ ပ္ဍဲကၟိန်ဍုၚ်ဗၟာဏံ သွက်ဂွံသြိုဟ်ပၠိုတ်ပၟတ် (၁၀) ဗွဝ် မဂဵုသၟာန်မံၚ် ပ္ဍဲစိုတ်ဖ္အိုတ်ရ၊ ပတှ်ေကဵု ဟွံပတှ်ေဟေၚ် တၟေၚ်အာရ။
နကဵုမတ်ဓမ္မ သ္ၚဳရံၚ်လောက သ္ၚဳရံၚ်ဘဝမ္ဂး သွက်ဒးဒုၚ်ကျကဵုလောကဟွံမွဲရ၊ အောန်စိုတ်မိပ်မြဟ်စိုတ်သက်ဒးဒှ်ဟွံမွဲရ ဒှ်မ္ဂး သွက်ဂွံပၠိုတ်ဗၜိုတ်ဂှ် ဓမ္မဓဝ်နွံမံၚ်ရ၊ မၞိဟ်ဟွံမံၚ်ကဵုဓဝ်ဂှ် ဗက်အလိုက်စိုတ်တုဲ ဒှ်မံၚ်ဍိက်ခန္ဓ ဗီုစိုတ်ဒှ်ကၠောန်ဗက်ဖ္အိုတ်။
က္ဍိုပ်သ္ကိုပ်ဘာသာဂှ် ခုတ်လဝ်ယၟုကျာ်ဖ္အိုတ်ရ၊ ပၞောဝ်ကျာ်ဂမၠိုၚ် ကျာ်တွံထ္ၜးဒုဟ်ဒဒိုက်ဝဋ္ဋ်သံသာဂှ် နွံဆကျာ်ဒုၚ်ယၟုဂေါတမမွဲရ၊ ဂကူဗုဒ္ဓဘာသာဂှ် ဒှ်ဂကူဖေက်ဒဒိုက်ဝဋ္ဋ်သံသာ ဆဂး၊ စပ်ကဵုကမၠောန် လဟဵုပရေၚ်စွံစိုတ်ဂှ် ဒှ်ဟလိုၚ်မံၚ် ဒဒိုက်ဝဋ္ဋ် သံသာဏောၚ်။
သ္ဘဴဓဝ်အနတ္တဂှ် ပ္ဍဲဓဝ်ကျာ်ဂေါတမမွဲဟေၚ်မၞုံရ၊ ပိုဲဂဗဆဵုကျာ်တုဲ ဖိုလ်ရှ်ဓဝ်ကျာ် ဒုၚ်စသိုၚ်ဟွံလေပ်မ္ဂး ဒှ်စာၚ်ခြးမံၚ် ဗွဝ်ထဝ် ဗွဝ်သြန်ရ။
လမျီုနွံမ္ဂး ဒးဆဵုဒဒိုက်စိုတ်ဖ္အိုတ်ရ၊ချိုတ်တုဲဒးဒှ်ပၠန် အရာဘဝဒှ်တၟိဂှ် ခိုဟ်ဟာပရေံဟာ တန်မံၚ်ပ္ဍဲကမၠောန်မၞိဟ်ဂှ်ကၠောန်လဝ်ရ၊ ချိုတ်တုဲဟွံဒှ် ချိုတ်တုဲဘဝအိုတ်ဟီုဂး၊ ဒဵုလဟဵုကွေတ်ဝါဒဗၠေတ်တ်မွဲရ သ္ဘဴလောကဂှ် ချိုတ်တုဲဒးဒှ်ပၠန်ရောၚ်
။
✍ကျာ်ဇၞော်အ္စာမဟာထေရ်ပါလိတ
