ညးဆက်ဆောံကဵုပစ္စုပ္ပန်
ဟွံရံၚ်မၞိဟ် ရံၚ်ကမၠောန်မၞိဟ်
ဟွံရံၚ်ဒုဟ် ရံၚ်လ္ပာ်ဂုဏ်
ဒဒှ်အတိက်ဟွံညာတ် ရံၚ်ဂုဏ်နွံပ္ဍဲပစ္စုပ္ပန်
မၞိဟ်ရံၚ်ပစ္စုပ္ပန်တပ်ပ်ဂှ် ကျာ်တြဲဂေါတမမွဲရ။ ဂကောံမၞိဟ်ပတှေ် ညးလေဝ် ညးကဵုရံၚ်ပစ္စုပ္ပန်တပ်ပ်ရ။ အတိက်ဒှ်ကၠုၚ်တုဲ ကလေၚ်ရံၚ်ဟွံညာတ်ဂှ် လ္ပကလေၚ်ချပ်၊ အနာဂတ် ဟွံဒှ်ဏီ ရံၚ်ဟွံညာတ်ဂှ် သ္ၚဳရံၚ်ဒဵုညာတ်သ္ဘဴပရမတ်ညိ။
ဗီုဇောတိကသေဌဳ ရံၚ်ပစ္စုပ္ပန်တပ်ပ်ရ။ ကောန်ညးမၞုံယၟု မၚ်ဗၠာဲကာလဂှ် ဗီုဒ္ဂေတ်မိမ မုဟွံသ္ပဗက် ဘာလေဝ်ဟွံတိုန် ကျာ်လေဝ် ဟွံလ္ၚောဝ် ဓရ်လေဝ် ဟွံကလၚ်ရ။ ၜိုန်ဂှ်လေဝ် ဟွံညာတ်ဒုဟ်ကောန် သွက်ကောန်ဇကု ဒှ်တသိုက်ဟေၚ် ချပ်မံၚ်ရိုဟ်တ္ၚဲရ။ မၚ်ဗၠာဲကာလ မၞုံပၟိက်မံၚ်ကဵုသြန်ဂှ် အပါမဒှ်သေဌဳကၠိုဟ်ကေတ်တုဲ "ယွံကောန် ယဝ်ကောန် အာဘာ မၚ်သဳမ္ဂး အဲကဵုသြန်မွဲကသာပ်" ဖအောဝ်ကဵုအာဘာရ။ မာံကာလ မၞုံပၟိက်ကဵုသြန်တုဲ အာဘာရ။ နူဂှ် ယဝ်ကလၚ်ဓရ် သမ္တီဒးမွဲပိုဒ်မ္ဂး အဲသြန်မွဲလ္ၚီ၊ မာံကာလ နွံပၟိက်ကဵုသြန် ဂစာန်ကလၚ်ဓရ် ဂွံသမ္တီဒးမာန် အြကာကလၚ်ဓရ်ဂှ် မာံကာလ ဒှ်အာသောတာပန်ရ။
ရံၚ်ပစ္စပ္ပုန်တပ်ပ်လေပ်မ္ဂး မၞိဟ်တအ် သၞဝဲအောန်စှေ်မာန်ရ။ သမ္တီလဝ် တၚ်ဟွံပြေစိုတ်လ္တူမၞိဟ်မွဲလ္ပာ်နွံတုဲ မၞိဟ်ကဵုမၞိဟ် ဒှ်ကၠုၚ်သၞတုဲ ဒက်ကၠုၚ်ဝဲညးသ္ကအ်ရ။ ရံၚ်အတိက်မ္ဂး မၞိဟ်ဗၠးဒုဟ်ဟွံမွဲ ဟွံမွဲကဵုဒုဟ်ဟွံမွဲရ။ မၞိဟ်မွဲမွဲ ဒုဟ်ဂၠိုၚ်ကဵုအောန် နွံမံၚ်ဖအိုတ်ရ။ ကျာ်မဟာကရုဏာလေဝ် မၞိဟ်ဟွံဇြုၚ်သ္ဍိုက်တအ် ပ္တိုန်မံၚ်ဒုဟ်ဏီရ။
"ရံၚ်ပစ္စုပ္ပန် ညာတ်ဂုဏ်၊ ရံၚ်အတိက် ညာတ်ဒုဟ်"[ပလေဝ်ဒါန် | ပလေဝ်ဒါန် တမ်ကၞက်]
အတိက်ပူဂဵုဏအ် မုဒှ်ကျာ်ဟွံရံၚ် ဒးထ္ၜးဒဒှ်ဗဗၞးရာဓ ဗၞးဝွံပတှေ်ကွေဝ်ဗြဟ္မတုဲ ဟီုဍဵုဍိုက်လဝ်ဝါဒကျာ် နွံဂၠိုၚ်ကဵုဝါရ။ကာလ အာယုက်ဇၞော်ဗျူထဴ ညးဗ္စဖျုၚ်ဒုၚ်ကဵုဍာ်ဟွံမွဲတုဲ ကၠုၚ်ဗ္ဒဘာလေံကျာ် အာစပုၚ် မသှ်ေနူဗဗေၚ်ရ။ ကၠောန်ၜိုတ်ပတုဲမံၚ်ဝတ် လ္တူသၚ်တအ်ကီုလေဝ် သၚ်တအ်ဟွံညာတ်ဂုဏ် ညာတ်မံၚ်ဒုဟ် ဘဝဗျူဒးအာတ်စပုၚ်ဘာရ။ ကျာ်သ္ၚဳရံၚ် ဘဝဗဗၞးရာဓ ပစ္စုပ္ပန်တပ်ပ်မ္ဂး ပါရမဳသွက်ဂွံဒှ်တၠအရှန်နွံ ညာတ်ရ။ သွက်ဂွံလလောၚ်တြး ဗၞးရာဓတုဲ ကျာ်ကော်ကောံဓရီုသၚ်တအ်ရ။ ပ္ဍဲဂှ် မှာထေရ်သာရိပိုတ် ပါမံၚ်ရ။ ယွံ ခမဳတအ် ညးဂှ်တီဂုဏ် လ္တူဗျူဇရာဗၞးရာဓနွံရော ကျာ်သၟာန်တုဲ ကာလဂှ် မှာထေရ်သာရိပိုတ် တီဂုဏ်ဗဗၞးရာဓရောၚ် ဂြၚ်ပ္တီတိုန်ရ။ ယွံတီပိုန်ကျာ် မွဲအခိၚ်တေံ အဲဍိုက်စဴပိဏ္ဍပါတ်ပ္ဍဲရာဇာဂြိုဟ် စိုပ်ဂတမုက်ဗဗၞးရာဓတုဲ ညးကေၚ်လံၚ်လဝ် ပိဏ္ဍပါတ်မွဲဇန်ရကျာ်။ သ္ပဟိုတ်ကဵု ဂုဏ်ဏအ်တုဲ အဲဍိုက်ဂၠဲါဗဗေၚ်သ္ၚာ သွက်ဗဗၞးရာဓဂွံသ္ပခမဳရ။
ပ္ဍဲသာသနာကျာ် ညးမသ္ပခမဳ နကဵုဉာတ္တိစတုတ္ထကမ်ဂှ် ဗဗၞးရာဓ ဂွံသ္ပခမဳကၠာအိုတ်ရ။ ဉာတ္တိစတုတ္ထကမ်စဒှ်ကၠုၚ်နူခမဳရာဓ ဟီုဂးမံၚ်အိုတ်ရ။ ဒုဟ်အတိက်ဗဗၞးရာဓ ကျာ်ဟွံရံၚ် ကျာ်ရံၚ်ဒဒှ်ပစ္စုပ္ပန်ဗဗၞးရာဓ ပါရမဳဒှ်တၠအရှန်နွံတုဲ သွက်ဂွံလုပ်စိုပ်ပ္ဍဲသာသနာ ဂွံဗၠးစောဒနာခမဳဂမၠိုၚ်ဂှ် ကဵုဂၠဲါဂုဏ်ဗဗၞးရာဓ ကေၚ်ကၠောန်လဝ်တုဲ ၜိုန်ဒှ်ပုၚ်မွဲဇန်ဍောတ်ကီုလေဝ် မှာထေရ်သာရိပိုတ် တီဂုဏ်ညးတုဲ သ္ပကဵုခမဳပ္ဍဲသာသနာကျာ်ရ။ သ္ပအစာံကဵုခန်လ္ၚတ်ဏအ်တုဲ မၞိဟ်ဟွံဒှ်ဂုဏ်ကုပိုယ်မၞိဟ်ဟွံမွဲရ။ ဗၞတ်ဗဗွဲထေက်ကြိုက်မၞိဟ်ကဵုမၞိဟ် ကေၚ်ပတုဲလဝ် ဂုဏ်ညးသ္ကအ်နွံဖအိုတ်ရ။ထေက်ကဵုဒးဖအောန်ကၠေံပွမဟီုပတိုန်ဒုဟ်ရေၚ်သ္ကအ် တၚ်ဟွံပြေစိုတ် ညးမွဲကေုာံညးမွဲရ၊ အဓိကမိက်ဂွံဟီုဂှ် အတိက်ပူဂဵုဏအ်မုဒှ်ကၠုၚ်ဂှ် လ္ပရံၚ်သ္ၚဳ ပစ္စုပ္ပန်ပူဂိုလ်ဏအ် မုဒှ်မာန် ချပ်ကဵုဂၠိုၚ်ညိ။
ညးမဆက်ဆောံကဵု ပစ္စုပ္ပန်ဇေတ်တ်[ပလေဝ်ဒါန် | ပလေဝ်ဒါန် တမ်ကၞက်]
ညးမဆက်ဆောံကဵု ပစ္စုပ္ပန်ဇေတ်တ်ဂှ် ဒှ်ညးဟွံပါ်ကဆံၚ်မၞိဟ်ရ။ ကျာ်တြဲဂှ် ဒှ်ညးဟွံပါ်ကဆံၚ်မၞိဟ်ရ။ ရံၚ်ပရေၚ်မၞိဟ်စေအ်အ်မ္ဂး ပါ်မံၚ်ကဆံၚ်မၞိဟ်သၟးဂွံဆဵုဂၠိုၚ်ရ။ တၠပညာကဵု တၠပညာလေဝ် ပါ်ကဆံၚ်ညးသကအ်နွံရ။ သမၠီုကဵုသမၠီုလေဝ် ပါ်ကဆံၚ်ညးသ္ကအ်နွံရ။ ရံၚ်ပရေၚ်အတိက်ပူဂိုလ်မ္ဂး ဟွံဗၠးဒုဟ်ရ။ ရံၚ်ပစ္စုပ္ပန်တပ်ပ်မ္ဂး ညးပတုဲလဝ်ဂုဏ်ကဵုအဲ အဲပတုဲလဝ်ဂုဏ်ကဵုညး နွံပေၚ်မံၚ်ရ။ စလဝ်ပုၚ်ညးမွဲလၟံက် သုၚ်လဝ်ဍာ်ညးမွဲဗြံက်မ္ဂး ဒှ်ညးတၠဂုဏ်ဇကုရ။
ညးမကဵုလဝ်အရီုဗၚ် မၚ်မွဲလဝ် နကဵုကာယနကဵုပါၚ်ဂှ် ဒှ်ညးတၠဂုဏ် ပွမရီုဗၚ်ဂှ် ဒှ်ဓရ်မဒှ်ဂုဏ် သာ်ဝွံ သမ္တီညိ။ ကဵုလဝ်အရီုဗၚ်စသုၚ် ဗိုက်လတက် မံၚ်စံၚ်၊ ကဵုလဝ်အရီုဗၚ် ပရေၚ်ထတ်ယုတ် ရီုဗၚ်လဝ် ပရေၚ်ပညာ ပရေၚ်ပိုန်ဒြပ် မပ္တံသာ်ဝွံ ဓရ်မဒှ်ဂုဏ်နွံဂၠိုၚ်ကဵုဂကူရ။ သရုပ်တုဲဟီုမ္ဂး ဓရ်မဒှ်ဂုဏ် ညးတၠဂုဏ် ညးကဵုညးကေတ် ညးမကဵုအာရီုဗၚ်ဂှ် ညးကဵုညးတၠးဂုဏ်ကော်စတုဲ လောကမၞိဟ်တအ်ဝွံ ညးကဵုတၠဂုဏ်လေဝ် နွံတၞဟ်ဟ်ရ။ တၠဂုဏ်ဂှ် ဒှ်ညးမလုပ်ကဵုတုဲ ညးမဒုၚ်ဂိုၚ်ကေတ်ဂှ် ဒှ်ညးကေတ်ရ။
သဘာဝ ပြဝလိုက်မ္ဂး ကေတ်မ္ဂးဒးကလေၚ်ပြေဂုဏ်ရောၚ်၊ ကေတ်မ္ဂး ဒးကလေၚ်လေဲပၠန်ရောၚ်၊ ညးမတီကေတ်သ္ဘဴသာ်ဝွံဂှ် ဒှ်ညးကလေၚ်တီဂုဏ်ညးတၞဟ်ရ။ မၞိဟ်မလေပ်တီဂုဏ်ညးတၞဟ်ဂှ် ဒှ်မၞိဟ်နွံအောန်လောန်ရ။ ဗီုမှာထေရ်သာရိပိုတ်တီဂုဏ်ဗဗၞးရာဓဂှ် မၞိဟ်နွံအောန်လောန်ရ။ ဓရ်မဒှ်ဂုဏ် ကဵု ညးတၠဂုဏ် ပါ်ပဲါလေပ်မ္ဂး အရာဒးပြေဂုဏ်ဂှ် ဟွံဝါတ်ရ။ မၞိဟ်မွဲကဵုမွဲ ဟွံမွဲကဵုဂုဏ်ညးသကအ်မ္ဂး ဒှ်ဟွံမာန်သက်က်ရ။ ဟိုတ်ဂှ်ရ ဓရ်မဒှ်ဂုဏ်ဂှ် ဒးတီလဝ်ထေက်ရောၚ်။ ညးဒှ်တၠဂုဏ်ဂှ် ဒှ်တၠဂုဏ်ရောၚ် ဒးတီလဝ်ထေက်ရ။ ဟွံတီမ္ဂး ဒှ်ညးမဒေက်ဂုဏ်ညး အတညူပူဂိုလ် သ္ဂးရ။ ဒှ်ညးဒးဂိဘဝမွဲရ။ မၞိဟ်ဟွံတီဂုဏ်ဂှ် ပ္ဍဲလောကမၞိဟ် ဒှ်မၞိဟ်ကဆံၚ်သဝ်အိုတ်ရ။ ပစ္စုပ္ပန်လေဝ် ဟွံခိုဟ် အနာဂတ်လေဝ် ဟွံဇၞော်မောဝ်ရ။ ပကောံပိုန်ဒြပ်မ္ဂး မုဟွံဍိုက်ပေၚ်ရ။
ဒဒိုက်စ ဒဒိုက်သုၚ် မံၚ်စံၚ်ဒိုတ်ဝါတ်တုဲ စိုတ်တပ်တး ခိုဟ်ကဵုတသိုက် ကဵုမၞိဟ်တအ်ဟွံမာန်တုဲ စိုတ်လဳဠာန်ၚံက်စၞာဲ ပ္ဍဵုပ္ဍိုက်ပြိုက်ဂစိုတ်ညးဂမၠိုၚ်ဟေၚ် ပေၚ်က္ဍဟ်မံၚ်ပ္ဍဲသြိုဟ်ရ။ ဒးစွံသတိဇၞော်ဇၞော်ရ။ မၞိဟ်ရီုဗၚ်ကဵုလဝ်ဇကုဂှ် ဝိုတ်တၠိၚ်ဂုဏ်ညးဟွံထေက်ရ။
ညးရံၚ်ပစ္စုပ္ပန်တပ်ပ်[ပလေဝ်ဒါန် | ပလေဝ်ဒါန် တမ်ကၞက်]
ကျာ်တြဲရံၚ်ပစ္စုပ္ပန်တပ်တပ် လ္တူမၞိဟ်၊ ဒြပ်မွဲမွဲ ကဵုရီုဗၚ်ညးတၞဟ်ဟွံမာန်မ္ဂး နကဵုမေတ္တာစိုတ်ကဵုဗ္စိုပ်ညိ။ ညာတ်အာမၞိဟ်မွဲမွဲမ္ဂး ညးဝွံ ကဵုဂွံဒှ်တသိုက်စိုတ်၊ တသိုက်ကာယ ကဵုစာ်စ္ဍးအာနူဒဒိုက်အလုံအိုတ်သီုညိ သာ်ဝွံ ဒးညာတ်လ္တူမၞိဟ် လ္တူသတ်တအ်ရ။ ဥပမာ- ကျာ်တြဲ ညာတ်အာမၞိဟ်မွဲ စမံၚ်အသုဘအိက်မ္ဂး လ္တူမၞိဟ်ဂှ် ပါရမဳဂွံဓရ်နွံမ္ဂး မၞိဟ်ဂှ် စမံၚ်အိက် ကျာ်ဟွံရံၚ်တုဲ ကျာ်ပြာပ်အာ ဇရေၚ်ညးဂှ် တွံထ္ၜးကဵုဓရ်ရ။ မၞိဟ်ဂှ် မိၚ်ဓရ်ကျာ်တုဲ တိတ်ဗၠးနူဒဒိုက်ဝဋ် သံသာမာန်ရ။ အတိက်မၞိဟ်ဂှ် ကျာ်တြဲဟွံရံၚ်ရ။
မိမအ္စာပိုယ် ကာလဒှ်မၞိဟ်ဒ္ဂေတ်လီုလေဝ် ဒှ်လေပ်ရ။ ကာလဒှ်ညးကွေတ်ဂတးလေဝ် ဒှ်မာန်ရ။ ဒဒှ်သာ်ဏအ်ဂှ် ဒှ်တာလျိုၚ်ညးဏောၚ်၊ ဟွံဆေၚ်စပ်ကဵု ညးရော်ဂုဏ် ပ္တုဲဂုဏ်ရ။ သွက်ဒးပြေဂုဏ်ဟေၚ် ဒှ်တာလျိုၚ် ကောန်၊ ကောန်ကွးတအ်ရ။
ပစ္စုပ္ပန်တပ်ပ် ယဝ်ရံၚ်မ္ဂး ဒုဟ်ဂှ်ဒုဟ်ရ။ ဂုဏ်ဂှ် ဂုဏ်ရ။ ဂုဏ်ဂှ် ရံၚ်လ္ပာ်ဒုဟ်၊ ဒုဟ်ဂှ် ရံၚ်လ္ပာ်ဂုဏ် သာ်ဝွံ ဒှ်ဟွံထေက်ရ။ သဘဴမၞိဟ်တအ်ဗွဲမဂၠိုၚ် အထေၚ်ဇၞော်ကဵုဇကုသၟးဂၠိုၚ် အစောန်စရာဲ ဇကုဟာ အစောန်စရာဲမိမအ္စာဟာ ဒဵုကၠးစိုတ်ပါ်ပဲါလဝ်ဟွံမွဲရ။ အ္စာလွဳယဲ ယဲဂှ်ဗၠးအာတုဲ အစောန်စရာဲခိုဟ်ဟာ အစောန်စရာဲအ္စာခိုဟ်ဟာ မၞိဟ်တအ်ဟွံပါ်ပဲါရ။ မၞိဟ်ဗွဲမဂၠိုၚ် ကေတ်ယၟုဒယှ်တှ်ဇကုဂၠိုၚ်ရ။ ဟွံရံၚ်ပစ္စုပ္ပန်တပ်ပ်တုဲ ညးပါ်ပဲါကဵုအဲ အဲပါ်ပဲါဟီုပ္တိုန်ဒုဟ်ကဵုညးရ။ ဟိုတ်ဂှ်ရ လောကမၞိဟ်တအ် ဒှ်လောကထုဲထံၚ်မံၚ် ပြဿနာဒဒိုက်မၞိဟ်တအ်ရ။
ဆက်ဆောံကဵုပစ္စုပ္ပန် ဇေတ်တ်လေပ်မ္ဂး[ပလေဝ်ဒါန် | ပလေဝ်ဒါန် တမ်ကၞက်]
ဆက်ဆောံကဵုပစ္စုပ္ပန် ဇေတ်ဇေတ်လေပ်မ္ဂး ပရေၚ်ပါ်ပဲါ၊ ပရေၚ်ပါ်ကဆံၚ် ဒဟီုထမံက်ဒုဟ်ညးသ္ကအ်အိုတ်အာမာန်ရ။ မိက်ဂွံကဵုရံၚ်ပစ္စပ္ပန်တပ်ပ်ရ။ မၞိဟ်ဂှ် လ္ပရံၚ် ရံၚ်ကမၠောန်မ္ဂး မၞိဟ်ခိုဟ် မၞိဟ်ပရေံ ရုဲဒးရ။ ကမၠောန်မၞိဟ်ကၠောန် ကဵုသ္ဂုတ်သွတ်မၞိဟ်ဂှ်ရ။ အရေဝ်ခိုဟ် ကမၠောန်ဟွံခိုဟ် လေပ်ပညာ ဖိုလ်ကမၠောန်ဟွံခိုဟ် သ္ပမံၚ်က္ဍိုပ်သ္ကိုပ် ဖိုလ်ကမၠောန်ဟွံခိုဟ်သာ်ဝွံ ညာတ်ကၠုၚ်ကဆံၚ်မၞိဟ်ဂှ်မာန်ရ။
မၞိဟ်ဟွံခိုဟ်ဂှ် အတိုၚ်ဓရ်တွံလဝ် "အသေဝနာ စ ဗာလာနံ" ဒးဝေၚ်ပဲါထောံ နူသ္ၚောဲသ္ၚောဲရ။ လ္ပလုပ်ဗ္ဒနိဿဲ ဒးဂိုတ်ဂစာန်ပဲါဒဴရောၚ် မိက်ဂွံကဵုကသပ်ရ။