နမော ဗုဒ္ဓဂါယာ သိဒ္ဓံ ရတနတ္တယပဏာမ ကေုာံ ပတ္တနာ
နမော ဗုဒ္ဓါယ သိဒ္ဓံ
ရတနာတ္တယပဏာမ - ကေုာံ - ပတ္တနာ
ဗုဒ္ဓဓမ္မ၊သံဃံဂုဏံ။မိကဵုမၜါ၊ အာစရိယံ။ ဂုဏ်အနန္တ၊ပၠအသချေႅယျံ။ ပိုၚ်ခြာဟွံမာန်၊ ဥာဏ်အတုလံ။ဗှ်ဗၞုဟ်တုဲလေဝ်၊ ဝန္နေဝန္ဒံ။ အဲလ္ၚောဝ်ရှ်ေသှ်ေ၊ ဖျေံက္ဍိုပ်သိသံ။ ဟီုဂးစပၠန်၊ ပဥ္စဂုဏံ။ ဂုဏ်ကျာ်မွဲဂှ်၊ တွံလဝ်ဗုဒ္ဓံ။ ဒ္စိတ်သာ်ဒးရး၊ဂးအရဟံ။ ဘဂဝါကၞောတ်၊ မၞးဖ္ဍောတ်စမ်ရံၚ်။ ဂုဏ်ဓဝ်နွံတြဴ၊အဟောသုခံ။ ဒှ်တသိုခ်လောန်၊ ညောန်နိဗ္ဗာနံ။ မဂ်ဖိုလ်ထပ်စုတ်၊ ထ္ၜုတ်လောကုတ္တရ။ ဂုဏ်သၚ်ဒ္စိတ်၊ လ္အိတ်အနန္တံ။လ္တူက္ဍိုပ်ပြဲ၊ အဝဲအဂ္ဂံ။ အဲဃဵုစွံလဝ်၊ ဗၠးဓဝ်ဒုက္ခံ။ လၟိုန်တ္ၚဲနိစ္စံ၊
အဟံဝန္ဒာ။
ယိုက်ဂုဏ်မသုန်၊ လတုန်ဂၠိုၚ်ဝါ။ ဂွံပၟဝ်ပၠန်ဂှ်၊ ဒှ်ဘာဝနာ။ ဟိုတ်နူကုသိုလ်၊ ကဵုဂွံလာပ်မြာ။ ဒုဟ်ပ္ဍဲခန္ဓ၊ သဗ္ဗရောဂါ။ မ္ၚးအန္တရာယ်၊ ဟာဲသတ်ယုတ်မာ် သတြုသၞဝဲ၊ယဲဝေဒနာ။ ကဵုဂွံလာဲလေၚ်၊ ပၠေၚ်ထောံရိုဟ်ဝါ။ မုက်မတ်ယးတၟး၊ပျးညံၚ်စန္ဒာ။ အတိုၚ်ကသပ်၊ ချပ်ပ္ဍဲမနောဒွါ။ ကဵုဍိုက်ပေၚ်စိ၊ညိပယောၚ်ယာ။ ရိုဟ်ဒဒှ်တ္ၚဲ၊ အဲရာဒနာ။ ဂကူဟွံဖံက်၊မန်သက်သက်ဗ္ဂာ။ အဲခမဳမန်၊ ဆီနန်ရာဇာ။ဃောကတ်လိက်မြာ၊ဗၟာယုတ်စံၚ်ကွာန်။
ယွံကလောတအ်၊ တၟအ်မိတ်ဇြဟာန်။ လိက်ဝွံအဲဆန်ဗ္ကန်ဂလာန်။ ဗၟာဂစိုတ်မန်၊လ္ၚုလ္ၚန်သီုကွာန်။လရိုအ်ယာံမံၚ်၊ပလံၚ်သုသာန်။ သမ္တီဒဵုဗျု။ ဣဝွံနိဒါန်။လကႅာလိက်ဗွဟ်၊ဗှ်နကဵုဥာဏ်။နွံဂုဏ်ဂၠိုၚ်ဂး၊ ရးမန်ပိဌာန်။ဂွံတီညးအဲ၊ မွဲဟွံဒးသၟာန်။လောန်ကၠုၚ်လအ်လ၊ ဘဝထုဲကြာန်။ လ္ၚီပိကၠံဂှ်၊ ထပှ်ရေၚ်ကာန်။(၁၃၀၇) ဗတိုက်စဵုဒၞါ၊ ဗၟာဂျပါန်။ မိက်ဂွံအံၚ်ဇၞး၊ ဒးဝေၚ်ပေဲါပၞာန်။ရခေၚ်,ကရေၚ်၊ ကချေၚ်မွဲဟာန်။ မန်ပိုယ်မွဲဂှ်၊ လုပ်ဒှ်ကောန်ပၞာန်။ ၃၀၀၀-ပိလ္ၚီပေၚ်ကၠုၚ်၊ ဒုၚ်ဒဝ်ပြိုၚ်ပ္ကန်။ နူတိဟွံစွံ၊ဗက်ထောံဂျပါန်။ဂကူအရိုၚ်၊ပိုၚ်ဍုၚ်ပိုၚ်ကွာန်။ဒှ်ဘဲကပ်ကၞောဝ်၊ ကၠောဝ်ဗျဵုသွံရာန်။ညံၚ်တိရစ္ဆာန်၊ဂျပါန်အယုတ်။
ဍုၚ်ကွာန်ရုသံၚ်၊ ပၠံၚ်ၜးဒှ်လုတ်။ ဒဒိုက်ရုန်မဵု၊ ဂွံဆဵုညာတ်စုတ်။ ညံၚ်လဒးလဴဂျိ၊ ဂိစိုတ်ၜဝ်ဇုတ်။ ကမၠတ်ဒမၠ၊ မတာအယုတ်။ပေၚ်ဍုၚ်ပေၚ်ကွာန်၊ ဂၠံၚ်ဍာန်ခဗုတ်။ ကွာ်ကွာ်ဂေတ်ဂေတ်၊ ကွေတ်ညးအယုတ်။ ဗျုဗျုကၟာဲကၟာဲ၊ ဗၠာဲဗၠာဲဝုတ်ဝုတ်။ဗတိုက်ကေတ်ဒြပ်၊ ပပ်ပဳလက်စုတ်။ ပ္ဍဲခေတ်ဂျပါန်၊ဒါန်ညးသကုတ်။ အောန်အောန်ဒးကဵု၊ ကုသိုလ်လဟုတ်။ စသုၚ်လေဝ်ဂြက်၊ညးလက်ညးပျုတ်။နူဂှ်လောန်အာ၊ သာ်လွာပြိုတ်ဘုတ်။ဝးကအ်သုၚ်ဆီ၊ ဒှ်လၞီညးခုတ်။ဗော်ဗၟာအယုတ်၊ ကွိုက်စုတ်ပိုယ်မန်။
သက္ကရာဇ်ဍုၚ်၊ ကၠုၚ်စိုပ်ကြပ်ညန်။လ္ၚီပိကၠံထပှ်၊ (၁၃၀၇)ပိုယ်လေဝ်သၟဟ်သၟန်။ ဗက်ဂၠာဲကသပ်၊ ဗက်ချပ်မွဲဂၞန်။ဒဴဘဝဍိက်၊မိက်ဂွဲဍုၚ်မန်။တြံၚ်လဝ်စိုတ်ဓါတ်၊ညာတ်တိုန်ဆီနန်။ပံက်ဂကောံဗက်၊ ဒယှ်ေဒွက်မန်။ညးအဲဂွံမိၚ်၊ သိၚ်လ္ၚုလ္ၚန်။ဝုတ်ဝုတ်ဗၠာဲဗၠာဲ၊ စိုတ်နာဲဆီနန်။ ပေၚ်ကၟိုဟ်ဗ္ကေတ်ဍာဲ၊ ဂဲါကေတ်ဍုၚ်မန်။ဍိုက်ပေၚ်ကသပ်၊ ချပ်ခိုဟ်မွဲဂၞန်။ ဝုတ်ဗၠာဲကညာ၊ညဳသာသၟဟ်သၟန်။ နူဍိက်ယုတ်ဗၟာ၊ ဝါဝွံဆိုက်ညန်။ဂွံဗၠးချပ်ဂၞန်၊ ပိုယ်မန်ညဳသာ။
ယွံကလောတအ်၊ တၟအ်ညးအဲကၠာ။သမ္တီလဝ်ညိ၊ ဝါဒိတမၠာ။ပံက်ဂကောံမွဲ၊ဗွဲယၟုဝေါဟာ။ဗော်မန်ဂးပ္ညုၚ်၊ကောန်ဍုၚ်အရၚ်ကၠာ။ ဂးနာဲဖိုဝ်ချိုဝ်၊ နွံကဵုပညာ။ဒှ်ဥက္ကဌ၊ ညးသ္ပအ္စာ။ပံက်ပ္ဍဲဍုၚ်လ္ဂုၚ်၊ ညးဒုၚ်သ္ဇိုၚ်ကၠာ။သွက်ပိုယ်ဂွံကၠောန်၊ကမၠောန်ကေၚ်ကာ။ လ္ၚီပိကၠံထပှ်၊ (၁၃၀၇) သၞာံဂှ်သေၚ်ဟာ။ဂကောံဒှ်ကၠုၚ်၊ ဂွံဍုၚ်လောဲသွာ။သွက်ဂွံသဳကၠဳ၊ ခမဳလေဝ်ပါ။ ကျာ်ဇၞော်မွဲရ၊ ကုသလကၠာ။(ဘာကျာ်သြဳမန်၊ ဆီနန်ဟံသာ။)ဘာယေတာယှေ၊ ဒေသမန်လွာ။ဒှ်နွံပိုန်ပၠန်၊သွက်မန်သေၚ်ဟာ။ပံက်ဂကောံပြဲ၊ပ္ဍဲဘာဂှ်ကၠာ။ နူဍုၚ်စိုပ်ကွာန်၊ဌာန်ရးခန်လွာ။ ဗော်မန်ပေၚ်ကိုဝ်၊ ကောန်ၜိုပ်ဟံသာ။ပဲါပုၚ်ပဲါပုၚ်၊ ဂံါကၠုၚ်ကွာ်အာ။ကဆံၚ်ဇိုၚ်တဲ၊ ရဲဝုတ်ကညာ။ စိုတ်ထတ်လောန်ကာဲ၊သၟတ်ဗၠာဲလေဝ်ပါ။ ကရေဲကညာၚ်၊ ရမ္သာၚ်ဝါစာ၊ ဍုၚ်ပိုယ်ကဵုပိုယ်၊ဟိုဲဗၟာမိစ္ဆာ။ကဵုဟွံကဵုဟာ၊ တဲၜါပစဝ်။
နွံကဵုစရာဲ၊ ဝုတ်ဗၠာၜိုပ်ထဝ်။ ရမ္ဘာၚ်ကရီု၊ကြီုဒဵုတမ္ညဝ်။ဂကူမန်ဟေအ်၊ ကၠေံမံက်ဂတဝ်။ဗရုဂမြိၚ်၊ မိၚ်ဒးအမ်သဝ်။သၟတ်ဝုတ်ဗၠာဲမန်၊ ဆီနန်နွံဗဝ်။ညာတ်ရာဇဝၚ်၊ ရပ်ဇြၚ်ချူလဝ်။ဗတိုက်ကေတ်ဍုၚ်၊ ဒုၚ်ပြိုၚ်ပတဝ်။ ညိဟွံဖေက်ဗၟာ၊ ကြဵုဇာတမ္ညဝ်။ ခေတ်သၟတ်ညးကော်၊ ဗော်မန်ၜိုပ်ထဝ်။ဇၟာပ်ကွာန်ပေၚ်သူ၊ လတူကဵုသၟဝ်။ စန်ဒက်ညဳသာ၊တဲၜါပစဝ်။ကလိုက်ကၟဵုပြဟ်၊ ဒှ်မွဲဂးလဝ်။မန်ပိုယ်ကေတ်ဍုၚ်၊လ္ပကၠုၚ်ဆေဝ်ဒဝ်။ဝုတ်ဗၠာဲၜိုပ်ထဝ်၊ ချူလဝ်မၞုဟ်ဇြၚ်။
အလုံမန်တအ်၊တၟအ်ညးရီုဗၚ်။ ဍောတ်ဇၞော်ဟွံရုဲ၊ဒုဲကၟာဲဟွဲမၚ်။ ယဝ်သၞုၚ်စိုပ်၊ကုတ်က္ဍိုပ်ကဵုဇြၚ်။ ခေတ်သၟတ်ကတဵု၊ ဖိုလ်ဍုၚ်အရၚ်။ ကွာန်မန်ထအု၊ နရုဆီလၚ်။ဆီဨကရာဇ်၊ညာတ်ရာဇဝၚ်။ဇၟာပ်ဂကူမန်၊ဆီနန်ဍာဲဂြၚ်။ညးညးအဲအဲ၊မွဲဟွံဘိၚ်ဘၚ်။ စန်ဒက်ဂကောံ၊အစောံဂမြၚ်။ဥာဏ်အာဂတ၊ ပၠတရဴပ္ဍဲဝၚ်။ဒှ်ဇြဟတ်ဇၞော်၊ ဗော်မန်အရၚ်။ ကၠိုဟ်ယးကၠိုဟ်တ္ၚဲ၊ မၚ်မွဲရီုဗၚ်။ညးဂံၚ်အဲဂံၚ်၊ တုပ်ညံၚ်စိၚ်ဒြၚ်။ရပ်မၞုဟ်ရပ်ဇြၚ်၊မၚ်သၞသတြု။
ဒှ်ဂုဏ်ညာတ်ကြက်၊ အကွက်ဇကု။ ဂၠိုၚ်တ္ၚဲဂိတု၊ ပြုပြေၚ်စဳဇန်။ မွဲသၞာံလောန်အာ၊ ၜါသၞာံစိုပ်ပၠန်။ လုံရးဍုၚ်ကွာန်၊ထုဲကြာန်လီၜန်။ဃောချဳဂရာၚ်၊ ရမ္သာၚ်မှာဇန်။ကွာန်လ္ၚဵုလီုလာ်၊ညးဗာ်အဲပန်။ ကောန်ပၞာန်ကၠဵုဗၟာ၊ ဝါဂြိုပ်ဂေတ်လန်။ တုပ်သတ်အဟိုတ်၊စိုတ်ဍေံဓဇန်။လကိုတ်ယက္ခ၊ ညံၚ်ရဴကၠဗြန်။အခေါၚ်မန်အဵု၊ စဵုဒၞဲါဂၠိုၚ်သန်။ ဂကူအလီ၊ ဆီဍေံကၠိခန်။ မန်တအ်ဟွံဒိုအ်၊ ညံၚ်ဂွံဒးဖန်။ ကၠောန်အကြာသၞ၊ သ္ပဒုဟ်ကဵုဒဏ်။ ၜုၚ်တက်ကၠေၚ်ဒက်၊ ဍေံလက်ဗကန်။ ဟာဲမန်တမြအ်၊ၝတအ်ကၠောန်ပၠန်။ၝောံမၞိဟ်ကောန်ၚာ်၊ပိုယ်ဗာ်ပိုယ်ပန်။သမ္တီလဝ်ပၠန်၊ တန်ပ္ဍဲဒဒိုက်။
ယွံကလောပိုယ်၊ ဟိုဲညးဍုၚ်လိုက်။ ပျဲပျာံနာနာ၊ ဗၟာအဒိုဟ်ဂွိုက်။ဂွံတီလဴထ္ၜး၊ကၠးတုဲဂွံကွိုက်။လ္ၚီပိကၠံဒ္စံါ၊သၞာံထေက်ကြိုက်။(၁၃၀၈) မြေက္ကသဵုလ္အိတ်၊ ဒ္စိတ်မံက်ဟီုယိုက်။ကွာန်ပ္ၚဂးပြဲ၊ ပ္ဍဲဘာဗလိုက်။ ကျာ်ဇၞော်အ္စာလေဝ်၊ မှာထေရ်ညးသ္ဍိုက်။ သဳလတေဇ၊ ခရှ်ညောန်ဆိုက်။ ကောံကၠုၚ်ကလၚ်၊ပၚ်မှိၚ်သိုက်သိုက်။ကၠောန်သဳကၠဳဇၞော်၊ ဗော်မန်ဂွိုအ်ဗၠိုက်။အစာတအ်ဂှ်၊ ဒှ်က္ဍိုပ်ယိုက်ဒိုက်။ ကောန်ဍုၚ်ရးကွာန်၊ ညးဆာန်အဲသ္ဍိုက်။အစာဖိုဝ်ချိုဝ်၊ ကွဵုဍုၚ်တှ်ေကွိုက်။ဍုၚ်မန်ပိုယ်ကေတ်၊ ပိုတ်ထေတ်ဟီုစိုတ်။ ဒှ်ညးဇၞော်ပၠန်၊ မှာဇန်တအ်ဖျိုက်။ ဥက္ကဌဗော်၊ ညးကော်ထေက်ကြိုက်။ နာဲအံၚ်ထောန်ကီု၊ဟီုတီအခိုက်။တြုံတြုံဗြဴဗြဴ၊ နှဴရဴကွာ်တိုက်။ကၠုၚ်သဘၚ်ပြဲ၊ပ္ဍဲဘာဗလိုက်။ဗျုရပ်ဒစုန်၊ ကုန်ကုန်ကိုက်ကိုက်။ မိပ်စိုတ်ဂၠိုၚ်နဲ၊ညးလောဲညးဒိုက်။ ဍုၚ်မန်ဒးကဵု၊ ဟွံကဵုဒးကွိုက်။ပ္ဍဲဘာဗလိုက်၊ဂရိုက်ဂရာၚ်။
ဍုၚ်မန်ဍုၚ်အဲ၊ ညးမွဲမွဲပါၚ်။ နော်နာဲလဇု၊ဗရုကညာၚ်။ဍုၚ်မန်ဍုၚ်ပိုယ်၊ ဟိုဲဟေရမ္ဘာၚ်။ ကၟာတ်ရောဟွံမာန်၊ ဂစာန်ပံက်ပါၚ်။ နွံမံၚ်ပြာကတ်၊ လိက်ပတ်ယေန်သၞာၚ်။ မန်မွဲဂကူ၊လ္တူတဴကဴရောၚ်။ ယးတၟးဂဵုမံၚ်၊ ညံၚ်ပၟတ်ပၞာၚ်။ဗၟာတအ်ဟွံညာတ်၊ ကၟာတ်မတ်ကၟာတ်ပါၚ်။ ဂၠာဲဒုဟ်ဟီုပျုတ်၊ ကုတ်တမ်ဝးကၞာၚ်။ အခေါၚ်မန်အဵု၊ စဵုဒၞါလဝ်ကၟာၚ်။ ညိရောကွဵုကၠောန်၊အောန်ဂၠိုၚ်ဝိုတ်ကၠာၚ်။ ပလီုအိုတ်အး၊ ထ္ၜးဒုဟ်ပံက်ပါၚ်။ မန်ပိုယ်စိုတ်ဂံၚ်၊ ညံၚ်ပသဲဍာၚ်။ ကရေဲကညာၚ်၊ ရမ္သာၚ်ညးတအ်။
ကွာန်မန်ကွာန်ပ္ၚ၊ သ္ပညံၚ်တိုၚ်တၟအ်။ ညးကောံကၠာအိုတ်၊ဖျေံစိုယ်ဗိုန်ဇၟအ်။ ကၠောန်ကမၠောန်ဍုၚ်၊ ဒုၚ်ဘဲဒုၚ်ဒွအ်။
သမ္တီလဝ်ကီု၊ ဟီုပ္ဍဲလိက်ဏအ်။ဆီနာဲဆီနန်၊ ဗော်မန်မွဲသ္ကအ်။အာတ်ဍုၚ်ရောကွဵု၊ဟာဲကၠဵုတမြအ်။ လုံရးခရိုၚ်၊ ပွိုၚ်ဍုၚ်ဗၟာတအ်။ ဍေံသ္ပဒုဟ်ဇၞော်၊ ပ္ဍဲဗော်မန်ဏအ်။ ဗက်ရပ်ဍဵုဍိုက်၊ ပြိုက်ထံၚ်ဗိုန်ဇၟအ်။ သ္ၚိစာတ်ခရိုၚ်၊ ကြိုၚ်လဝ်မန်တအ်။ ပျဲပျာံရုန်မဵု၊ အဵုကၠဵုတမြအ်။ ဗၟာဟေၚ်ဒှ်ဇၞော်၊ ပိုၚ်ဗာ်သ္ကအ်။ အခေါၚ်မန်အဵု၊ စဵုဒၞါဟွံပၠအ်။ ပဲါနူရပ်ပြိုက်၊ ဂၠိုက်ဂၠာဲတေံဏအ်။ က္ဍိုပ်သ္ကိုပ်မန်၊ချပ်ဂၞန်ရၚ်သ္ကအ်။ဆာန်ယဲဣတ၊ ယဝ်ရသာသ္ပအ်။ဟွံဒးဒးချိုတ်၊အိုတ်သီုသ္ကအ်ဍေံသီကေတ်ဟေၚ်၊ ပြေၚ်ဂၠဴတိကၠအ်။ ချပ်တိုန်သာ်ဏအ်၊ တၟအ်မန်ဂမၠိုၚ်။
ယွံကလောပိုယ်၊ ဟိုဲဗော်နာံမြိုၚ်။ သမ္တီကဵုဗတ်၊ ထကတ်ကဵုခိုၚ်။ဗၟာယုတ်မံၚ်
လ္တူ၊ဂကူအရိုၚ်။ဍဵုဍိုက်ပျဲမန်၊ ဆီနန်ကွဵုဂၠိုၚ်။သ္ပလဝ်ဍိက်ပၠက်၊ ပိုယ်ကၠက်ဂျိုၚ်ဂျိုၚ်။အခေါၚ်ဟွံမွဲ၊ညးအဲရပ်ကြိုၚ်။ အကြာဒဒိုက်၊ ယိုက်မုက်ယာဇိုၚ်ကၠောန်ပ္ဍဲသၞောဝ်၊ လဆောဝ်ကၠုၚ်ဗိုၚ်။ ဗၟာယုတ်ပပ်၊ ရပ်ပိုယ်သီဂိုၚ်။တွဵုရးဍုၚ်ဏအ်၊ တၟအ်ညးအိုတ်ဇိုၚ်။ ကၠာဟွံဗၠးၜး၊ လဴထ္ၜးဂၠိုၚ်ဂၠိုၚ်။လ္ၚီပိကၠံဒ္စိတ်၊ နိမိတ်ဒှ်တိုၚ်။ (၁၃၀၉) ရးဇြာကၟာဝက်၊ကြက်မန်ခိုၚ်ခိုၚ်။ ဘတ်ပိမံက်ကၠာ၊ ဗြဲကျာဟွံပြိုၚ်။ သဘၚ်သဳကၠဳ၊ခမဳဒှ်တိုၚ်။ပုရိသာဒ်ဇၞော်၊ ဗော်သွးနာံမြိုၚ်။ ညးကၠောန်ဗ္ဒဟ်၊ ခရှ်လေဝ်ဂၠိုၚ်။ မၞိဟ်ပန်ဠက်ပြၚ်၊ ကလၚ်ဟွံကွိုၚ်။ အာတ်ဍုၚ်အီဂြိုၚ်၊ ယာဇိုၚ်တက်တဲ။
သဘၚ်သဳကၠဳ၊ ခမဳနွံဇဲ။ နူဍုၚ်လ္ဂုၚ်၊ ကၠုၚ်သ္ပနိဿဲ။ညးအာဂတ၊ ပၠတရဴဖဲ။ အ္စာဖိုဝ်ချိုဝ်၊နွံကဵုဓဇတ်ဇဲ။ဒှ်ဥက္ကဋ္ဌ၊ညးသ္ပဗလဲ။ နာဲထဝ်အးကီု၊ သီုနာဲမှူပြဲ။အ္စာဖိုဝ်စိၚ်၊ မိၚ်ဟာဒေံၝဲ။ ညးတအ်ဒှ်က္ဍိုပ်၊ သ္ကိုပ်မန်ဇာသဲ။ သဳကၠဳဇၞော်ဝွံ၊ ဗျုဗျဂၠိုၚ်ရဲ။ ကၠုၚ်ကဵုဇြဟတ်၊ စိုတ်ထတ်ဂၠံၚ်ပ္ဍဲ။တြုံတြုံဗြဴဗြဴ၊မွဲဂၞဴဒေံၝဲ။ အာတ်ဍုၚ်မန်ဏး၊ ကေမ်ထ္ၜးသတ်တဲ။ရးဇြာကၟာဝက်၊တက်ကၞာဗၠးဗြဲ။ သဳကၠဳထတ်စောံ၊ ကောံဓရီုပြဲ။ မန်ကေတ်ဍုၚ်မန်၊ ကြပ်ညန်ဆဵုဘဲ။ လအ်ညိဗၟာပျဲ၊ ရဲမန်စိုပ်ကပ်။
ၜိုန်ကၠောန်ပ္ဍဲသၞောဝ်၊ လဆောဝ်ဒးရပ်။ ဂကူဗာလ၊ ဝါဒယုတ်ပပ်။ဗၟာမၞိဟ်အရိုၚ်၊ ဂၠိုၚ်ကဵုဗော်ဒပ်။ ပ္ကောံလဝ်ဗိုလ်ပၞာန်၊ ဂွံမာန်ဂၠာဲချပ်။ ဃောကလိုက်ကၟဵု၊ ဖိုလ်ဍုၚ်ညောန်ကြပ်။လ္ၚီပိကၠံဒ္စိတ်၊ နိမိတ်ဆက်ကပ်။ (၁၃၀၉) ဂိတုပုဟ်ခိုဟ်၊ ၜိုဟ်ဂံက်ဒဇပ်။ ဍေံသ္ပဆဆဵု၊ ဍဵုဍိုက်ယုတ်ပပ်။ ဗော်မန်တအ်ကၠာ၊ လအာဇပ်ဍပ်။ ဖေက်ဍေံတအ်ရပ်၊ ကသပ်စိုပ်သ္ကီု။
ဆာန်ဂကူလောန်၊ ကၠောန်အာလေဝ်ဒးဗီု။ မၚ်မွဲလမျီု၊ဇူဒီုဂြိုပ်ဂၞိၚ်။
ယွံကလောတအ်၊ တၟအ်ညးပၚ်မှိၚ်။ လ္ၚီပိကၠံဒ္စိတ်၊ (၁၃၀၉) ချပ်ဃိတ်ဂၠိၚ်ဂၠိၚ်။ နာဲဘလောန်ဂှ်၊ ဒှ်ဇၞော်ဂွံမိၚ်။ပ္ဍဲဍုၚ်မတ်မလီု၊ ဒးဗီုရောၚ်ဆိၚ်။ ဇြပ်ကျာ်အသုက်၊ ညာတ်မုက်ရေၚ်ဗျိၚ်။သဘၚ်သဳကၠဳ၊ ခမဳခရှ်အိၚ်။ ကောံတုဲအာတ်ဍုၚ် ဟီုကၠုၚ်ဂွံမိၚ်။ က္ဍိုပ်သ္ကိုပ်မန်ဂှ်၊ ဒှ်တိုန်ဂဝိၚ်။လၟုဟ်နွံသ္ကဲ၊ ပ္ဍဲဌာန်ဂြိုပ်ဂၞိၚ်။ ကၠောန်ကမၠောန်ဆက်၊ သွက်ဂကူဗျိၚ်။ ဃောကွာန်ရုသံၚ်၊ မၞိဟ်မံၚ်ရောညိၚ်။ ချဳဂရာၚ်လောန်၊ ကၠောန်ပၠန်ဒးဂွိၚ်။ လ္ၚီပိကၠံစှ်၊ (၁၃၁၀) သၟဟ်ကဵုအခိၚ်။ ပဌမဒ္ဂိုန်၊ ဗြဲဗိုန်ကျာသိၚ်။ ၜါမံက်ဟီုဂိုတ်၊ ဟွံဝိုတ်ဟွံတၠိၚ်။ နာဲဖိုဝ်ချိုဝ်ကီု၊သီုနာဲဖိုဝ်စိၚ်။ နာဲအံၚ်ထောန်-ဆာဲ၊ နာဲသာန်လှာၚ်မိၚ်။ ညးပန်မွဲစွံ၊ ကၠောံဍုၚ်သေံဗျိၚ်။ အာဒက်မိတ်ပြဲ၊ ရဲမန်ဂိုတ်ဂွိၚ်။ ဍုၚ်သေံၜၚ်ကံက်၊ လံက်ဗၟံက်ပၚ်မှိၚ်။ ဒုၚ်ဒဒိုက်ဆက်၊ ၜက်ဝါဂြိုပ်ဂၞိၚ်။ ကေတ်အရီုဗၚ်၊ ဂွံနၚ်ပိုယ်မိၚ်။ ကၠောန်သွက်ဂကူ၊စံၚ်တူဒးဂွိၚ်။ တိက်ရောဟွံသၠိၚ်၊ အသိၚ်ဇြဟာန်။
ညးဇၞော်မန်ပန်၊ စွံပၠန်ဂလာန်။ ကမၠောန်တုဲဒှ်၊ ပြဟ်ဂိုတ်ဂစာန်။ ဟွံလအ်ဗွဲကြဴ၊ စဴကၠုၚ်စိုပ်ကွာန်။ လုံရးဍုၚ်ဏအ်၊ဒွအ်ဘဲထုဲကြာန်။ ဗၟာထံၚ်ပရိုၚ်၊ ဂိုၚ်လဝ်ဂလာန်။ ဗက်ဂၠာဲမန်တအ်၊ တၟအ်ရးဍုၚ်ကွာန်။ မိၚ်သ္ပဂဗုတ်၊ စုတ်ဒုဟ်ကြာန်ကြာန်။အဝဵုဗၠေတ်ဗၠေတ်၊ ကေတ်ဇၞးကေတ်မာန်။ ဂစိုတ်မန်ကၠာ၊ စကာဒပ်ပၞာန်။ ဗၟာယုတ်ပပ်ပဳ၊ ကၠဵုကဳပေၚ်ဍာန်။ ညးက္ဍိုပ်သ္ကိုပ်မန်၊ ဆီနန်ခက်ဗာန်။ ဒဴရောၚ်ဗၠးချိုတ်၊ ဟိုတ်ဂှ်လ္ပသၟာန်။အံၚ်ထောန်,ဖိုဝ်စိၚ်၊ ဂြိုပ်ဂၞိၚ်ပဝ်ယာန်။ ဒဴတိတ်နူကွာန်၊ ဟိုတ်ဆာန်ဂကူ။
မံၚ်ပ္ဍဲဂြိုပ်ဂၞိၚ်၊ လဟိၚ်ပေၚ်သူ။ ဂွံဇြဟတ်ဂး၊ ဗၠးဓဝ်စံၚ်တူ။ ဒးပံက်ဂကောံ၊ အစောံဂကူ။ ဗော်ပၠတရဴ၊ ကော်ခဴစဂွံသၟူ။ဍုၚ်မန်ထပ်စုတ်၊ ခုတ်ယၟုလ္တူ။ညံၚ်တြၚ်ဗိုန်သွံ၊ ကၠောန်စွံလေအ်သၞူ။ ဒှ်တိုန်ဒပ်ပၞာန်၊ ဂွံမာန်တူရူ။ မန်တအ်ရပ်လွဟ်၊ဂွံတီရှ်သၟူ။ ဗၟာဗက်ဂၠာဲသၟာန်၊စံၚ်ကွာန်သ္ၚိတူ။ မန်သှ်ေဂြိပ်ဒဴ၊ ရဴဂစေံပူ။ ကရေဲကညာၚ်၊ရမ္သၚ်ဂကူ။ သၟိၚ်ဗၠာဲၜိုပ်ထဝ်၊ပဝ်ယာန်ပွဳပွူ။ ဂြိုပ်ဂၞိၚ်တူရူ၊ ပေၚ်သဴထအု။
အလဵုသဳဗၟာ၊ ရိုဟ်ဝါမတ်ဂၠု။ ဂလိုၚ်ဒေါသ၊ မောဟဒမၠု။အဝိဇ္ဇာပျဲ၊ ဆီပ္ဍဲနရု။စကာဒပ်ပၞာန်၊စံၚ်ကွာန်ယက်ဂၠု။သ္ၚိမန်တူအိုတ်၊ စိုတ်လီုစိုတ်လ္ၚု။ ညာတ်ဒှ်ဗဟေက်၊ ဖေက်ဗၟာဂြုဂြု။ၜိုန်အောပ်ဗလေတ်၊ ဟွံဗၠေတ်တီယၟု။ ညာတ်တုဲဍေံကော်၊နော်နာဲဗျုဗျု။ဘပဠကီု၊ သီုၜုၚ်ဂဒု။ ဆဵုမန်ပၠိုၚ်ပၠိုၚ်၊ ဗိုၚ်ပန်ဗရု။လ္ၚဵုချိုတ်ခရံၚ်၊ တုပ်ညံၚ်ရဴဆု။ တြုံတြုံဗြဴဗြဴ၊ ဂြိပ်ဒဴဒထအု။ အဵုမိသော်က္ဍိုပ်၊ စိုပ်ဂြိုပ်ဌာန်လ္ၚု။ဟွံသေၚ်အရဳ၊ ခမဳဘိက္ခု။ဂြိပ်ဒဴသီုကွး၊ ဗၠးၜးမစ္စု။မန်ဒှ်ဒဒိုက်၊ဗၟာကွိုက်ဟီုဗြု။ကရေဝ်ကရောတ်၊ ဗြဲမတ်ဂူဂၠု။ လရိုအ်သိၚ်သာ၊ယာံအာဂြုဂြု။ဗၟာယုတ်စံၚ်ကွာန်၊ သ္ၚိဌာန်ပိုယ်လ္ၚု။ သှ်ေပတေၚ်ဗု၊ ယက်ဂၠုတူဂြောတ်။
ယွံကလောတအ်၊တၟအ်ညးဇၞော်ဍောတ်။ အဲလဴကလၚ်၊ ပၚ်မှိၚ်စဳပေါတ်။ လ္ၚီပိကၠံစှ်၊ သၞာံဂှ်ဒးပၟတ်။ (၁၃၁၀) ဖဝ်ရဂိုန်စိ၊ ပိမံက်ဒှ်ဗၞတ်။ ဗၟာယုတ်စံၚ်ကွာန်၊ သ္ၚိဌာန်တူဂြောတ်။ ကၟာဝက်ကၠာတဲ၊ ဒးဘဲတူပၟတ်။ သ္ၚိမွဲလ္ၚီပြၚ်၊ တၟးဖၠၚ်တူဂြောတ်။ပ္ဍဲဘာပၠန်သွံ၊ ကၠုၚ်စွံကပေါတ်။ ဂွံဗၠးစံၚ်ပၠေၚ်၊ ဖေက်လေၚ်စိုပ်ကၞောတ်။ လ္ၚဵုယာံဂတေဝ်၊ လ္ၚဵုကရေဝ်ကရောတ်။ ကွာန်တူၚုၚ်ၚ၊ ဟောံဇြမွဲသၞောတ်။ ဗၟာယုတ်ရပ်ပျဲ၊ ဖေက်ဘဲထအောတ်။ညာတ်ဒးသိၚ်သာ၊ ချပ်အာစိုတ်ဍောတ်။ ဗက်စံၚ်ဗက်ပန်၊ ဓဇန်အိုတ်ကၞောတ်။ ကၟာဝက်တူဂြောတ်၊ၚုၚ်ဇြောတ်ဗန်က္ၜံၚ်။
ကွာန်လဵုသၟတ်နွံ၊ အလုံဗက်စံၚ်။ ဗၟာဂၠာဲဂဗုတ်၊ ယုတ်လောန်ချပ်ရံၚ်၊ ကၠအ်သတ်ဘာဒဵု၊ ဃဵုအာဗက်စံၚ်။ ဍေံထေၚ်သာ်ဏအ်၊ သၟတ်တအ်နွံမံၚ်။ ဘာကျာ်ဇၞော်ဂှ်၊ စိုတ်ပြဟ်တဲဂံၚ်။ဂွံလေၚ်ဒးသ္ပ၊ ဆနွံဗက်စံၚ်။ လိက်ပိဋကတ်၊ ပေၚ်က္ဍတ်နွံမံၚ်။ကျာ်ထွာဲကျာ်ဍောတ်၊ ကပေါတ်သံၚ်ဗြံၚ်။ ဂွံအိုတ်ဂွံလေၚ်၊ ဍေံပၠေၚ်ဍေံစံၚ်။ဗၟာဗၟုဲယုတ်ပပ်၊ ဟွံချပ်ဟွံရံၚ်။ ဍေံထေဲလဟုက်၊ သာ်မုက်လှာဲပြံၚ်။ ဗၟာသတ်အဟိုတ်၊ စိုတ်ဍေံမ္ၚိုဟ်ကြံၚ်။ဒေါသရုန်မဵု၊ ဒလဵုခၞံၚ်။ အလုံဘာမွဲ၊ ညးအဲတဲဂံၚ်။ ဍေံပၠေၚ်ဍေံစံၚ်၊ ဂဵုမံၚ်ဝူဝူ။
သၚ်ပ္ဍဲဘာဂြိုပ်၊ သ္ပဗ္ဒိုပ်ဇၞူ။ ဍေံရောဟွံသၟာန်၊ ညိဟွံဆာန်ဍူ။ ဗၟာကြမ်ဓဇန်၊ စိုတ်ပၠန်ဟွံလ္ဂူ။ စံၚ်ဘာစံၚ်ကျာ်၊ ကွာ်ဂံါတဆူ။ အရက်လုပ်ဗုၚ်၊ သုၚ်လဝ်ဗၜူ။ စံၚ်သ္ၚိစံၚ်ကွာန်၊ စံၚ်ဌာန်ဇြပ်ဇၞူ၊ ခမဳခရှ်၊ ဒှ်ယာံဓဇူ။ ကၠအ်သတ်တံၚ်ပိုအ်၊ ပၟတ်ကၠောံဝူဝူ၊ ပ္ၚဘာဗလိုက်၊ ကွိုက်ညံၚ်ဗြဲဂူ။ သီုပန်သီုစံၚ်၊ ဂံၚ်ဂုဏ်ဗၜူ။ ဘာဇၞော်ကြုက်ပိ၊ သ္ၚိၝဲအမူ။ စံၚ်ထောံအိုတ်အး၊ သှ်ေချးဂွိုအ်ဇူ။ ကတဴတ္ၚဲကၠာ၊ ကျာပိုက်ဝူဝူ။ ဗၟာမၞိဟ်အရိုၚ်၊ဂြိုၚ်မံၚ်ရူရူ၊ ညိဟွံဆာန်ဍူ၊ ဂကူပြေၚ်ဂၠဴ။
ယွံကလောတအ်၊ တၟအ်ဇန်တြုံဗြဴ။ ဒဒှ်အိုတ်သီု၊ ဒးဟီုဒးလဴ။ နာဲနုအၜတ်၊ သတ်ညံၚ်ပြေၚ်ဂၠဴ။ ဗၟာအဒိုဟ်ဂွိုက်၊ကွိုက်မန်ဂြိပ်ဒဴ။ ဗက်ဒဳထဍေၚ်၊ ညံၚ်ပြေၚ်ညံၚ်ဂၠဴ။ ဍုၚ်မန်ရောကွဵု၊ ကဵုလွဟ်ကမ်လဴ။ က္ဍိုပ်သ္ကိုပ်မန်၊ ထောန်မိုၚ်ဂြိပ်ဒဴ။ နူကွာန်ကအ်ဍောတ်၊ မှောတ်ဂြိုပ်တြုံဗြဴ။ ဂကူမန်တအ်၊တၟအ်ညးဂြိုပ်ဒဴ။တံၚ်ပရၚ်လၟိုၚ်၊ဂၠိုၚ်ကဵုကောန်ဂၞဴ။ဍုၚ်ရေဝ်တၟအ်ကၞေၚ်၊ ဟွံဝေၚ်တြုံဗြဴ။ခမဳသၚ်လ္ၚဵု၊ ဃဵုညးရဴဂဴ။ ပ္ဍဲဘာညးလျုၚ်၊ ဒုၚ်သ္ပပူဇဴ၊ တိတ်ဂြိုပ်ပေက်ဒဴ၊ ညးလဴညးဟီု။
ဗၟာဗၟုဲဒှ်ဇၞော်၊ ဗော်သၟိၚ်သမၠီု။ ထဍေၚ်မန်တအ်၊ တၟအ်ကွာန်အိုတ်သီု။ လကျာ်ရောဗၠး၊ ဒးဂြိုပ်ဒဴကီု။ ဟိုတ်ဆာန်ဂကူ၊ ဘာတူညးဟီု။ထောံဒၞာဲဒၟံၚ်၊ ဟွံရံၚ်သမၠီု။ က္ဍုဟ်မၠေအ်ဗၟာလောန်၊ လက်ဒေါန်တုဲကြီု။ ကွာန်မန်ဂမၠိုၚ်၊ ဍေံဗိုၚ်ပလီု။ ဂစိုတ်စံၚ်ပျဲ၊ ဆဵုဘဲသတီု။ တဝ်ကၞဴ,ကွာန်ယိုက်၊ သ္ဍိုက်မန်ညးဟီု။မုဟ်ဟေဲ,ဝါဍောတ်၊ မွဲသၞောတ်ကရီု။ မုဟ်ဒဵု,မုဟ်နာၚ်၊ ပံက်ပါၚ်ဂိုတ်ကြီု။ မုဟ်ဒုန်,ကလအ်၊ မန်တအ်ဟွံဓီု။ ကၟာမဵုဒှ်တမ်၊ ကၠောန်ခၞံလဝ်ကီု။ မန်တ္ကအ်ခၟိုၚ်၊ၜဳဗိုၚ်ဂိုတ်ဟီု။ဆာန်ဂကူအဴ၊ ကြဴဒဴအိုတ်သီု။ မန်သှ်ေသ္ပဒုဟ်၊ ဣၚုဟ်ဍေံကြီု။ ဗၟာယုတ်သမၠီု၊ ဍေံပ္ကီုကဵုဘဲ။
ဍုၚ်ပံၚ်,ဇိုၚ်ကျာ်၊ အလှာ်ၜဳသၠဲ။ ဝါကပိုဟ်,သၠာတ်၊ ညာတ်မန်ဒှ်ရဲ။ ကုန်ပ္ကဴ,ဝါဂျဳ၊ သ္ၚိဣစဳဗၠဲ။ ဖေက်ဗၟာဂြိပ်ဒဴ၊ ဟွံလဴကဵုၝဲ။ မန်တအ်ရပ်လွဟ်၊ ဒှ်ကၠုၚ်သ္ကအ်တဲ။ ဂွံဗၠးလမျီု၊ ရီုဗၚ်ဖဲဖဲ။ ဒပပၞာန်လေဝ်ဇၞော်၊ ဗော်မန်တိသၠဲ။ ပိုၚ်ဂြိုပ်ပိုၚ်ဆု၊ၜိုန်လ္ၚုဗၠးဘဲ။ စိုတ်ဓါတ်တမြံၚ်၊ကြံၚ်ဗီုပသဲ။ ဗတိုက်ကေတ်ဍုၚ်၊ ကဵုတှ်ေဒုၚ်တဲ။ မန်/ဗၟာစိ၊ ညံၚ်ကၞိကဵုဗ္ဂဲ။ ပိုယ်မန်ဖျေံစိုတ်၊ ချိုတ်ဟွံသ္ပရဲ။ သ္ဂံၚ်ပၞာန်မန်တအ်၊ ဟွံပၠအ်သီုဇဲ။ ချဳဂရာၚ်မံၚ်၊ တုပ်ညံၚ်ကျာဗြဲ။ ဗော်မန်ဗၠးၜး၊ ပၠန်ဂတးပြဲ။ ဍုၚ်မန်ကဵုမန်၊ နန်ထဝ်တိဗၠဲ။ ကရေဲကညာၚ်၊ ရမ္သာၚ်ဇာသဲ။ အလဵုသဳဗၟာ၊ ဝါဒပြိုက်ပျဲ။ မိၚ်တုဲကဵုဘဲ၊ ပ္ဍဲမ္ၚးသီုၜါ။
ရးဇြာကၟာဝက်၊ ဆက်တုဲလဴဏာ။ ရပ်လွဟ်ပန်ဘ၊ ရာဇကောန်တာ။ နာဲမွဲဂးမြာ၊ ဟလာဟံသာ။ ဒှ်သ္ကိုပ်မန်၊ ဆီနန်သီုၜါ။ မံၚ်ပ္ဍဲဂြိုပ်ဂွိုၚ်၊ ဂၠိုၚ်သၞာံအခါ။ဗတိုက်ကေတ်ဍုၚ်၊ဒုၚ်ဘဲညဳသာ။ သ္ဂံၚ်ပၞာန်မန်တအ်၊ တၟအ်ညးအဲကၠာ။ ထောံသ္ၚိထောံကွာန်၊ ဝေၚ်ပၞာန်သေၚ်ဟာ။ သ္ကိုပ်ပိုယ်မန်ဂျ၊ ရာဇကောန်တာ။ သွက်ဂကူဏး၊ သၠးလမျီုကၠာ။ ကောန်သ္ဂံၚ်ဍာံ၊ဂၠိုၚ်သၞာံအခါ။ လုပ်ပေဲါဗ္တိုက်၊ လိုက်ဝွံပြာကာ။ ချိုတ်ကဵုဂျိုၚ်ဂှ်၊ ဒှ်ဓမ္မတာ။ ဟလာဟံသာ၊ လောန်စဴအာရ။
ယွံကလောပိုယ်၊ ဟိုဲဗော်ဝံသ။ ပ္ဍဲဂြိုပ်ပေၚ်သူ၊ ဂကူမည။ဗတိုက်ကေတ်ဍုၚ်၊ ဒုင်ဒဒိုက်ရ။ ရဲသ္ဂံၚ်ပိုယ်မန်၊ ဆီနန်စိုတ်တၠ။သွက်ဂကူဏး၊ သၠးဇဳဝိတ။ဟလာဟံသာ၊ အကြာဘဲသၞ။ပ္ဍဲကွာန်ဝါဗိုၚ်၊ ဂွံပရိုၚ်ရ။ ဗၟာညာတ်စုတ်ပၠန်၊ ဓဇန်ညံၚ်ကၠ။ဗတိုက်ကြတ်ဒၞါ၊ ဟလာဒးကျ။ သ္ကိုပ်မန်ပိုယ်ဂှ်၊ ပြဟ်ဂလုဲရ။သွက်ဂကူပ္ညုၚ်၊ ဍုၚ်ရာမည။ သၠာဲကဵုလမျီု၊ လီုဇဳဝိတ။ ချူပတိုန်ပြဲ၊ ပ္ဍဲဝၚ်ကွိုက်သၞ။ သ္ဂံၚ်မန်ဂမၠိုၚ်၊ၜိုန်ဂျိုၚ်ဟိဏ္ဏ။ အဝဲလီုလာ်၊ စာ်ထောၚ်ကာယ၊ ဇိုၚ်ပိုတ်တဲကဝ်၊ ဒှ်ဗွဝ်ဒုက္ခ။ ဆာန်မန်ဍာံပြ၊ ဆဵုသၞညာတ်ဘဲ။
ဂွံတီဒးဟီု၊ သီုစိုတ်ဂိပ္ဍဲ။ ကွာန်မန်ဂၠိုၚ်ရဲ၊ ဒးဘဲနူဗၟာ။
ကၞောတ်ၜဳဇိုၚ်သြၚ်၊ ထဝ်ပၠၚ်,ကြုၚ်ဘာ။ ကဒေါ,ကအ်နှာတ်၊စိုတ်ဓါတ်ရာဇာ။ဘာထဝ်,ကအ်လှာ၊ သ္ၚိကျာ,ဒူရာ။ကအ်ဗိန်,ကအ်ပံက်,ဏံၚ်စံက်ဒေါဝ်ဝါ။ သၞေဟ်သြောံ,ဝါဗိုၚ်၊ ကအ်ပလိုၚ်မြာ။ ကအ်ဂဵု,ကြေဝ်ဏာ၊ကွာန်လှာ,ဝါဘာ။ဆုကၠ,ကျာ်မြဟ်၊ ပှ်လှ်ဂြိုပ်ဝါ။တၟအ်ဗြဴဇိုၚ်ဍာန်၊ ကွာန်စဴဂလာ။ယံၚ်ဒၚ်,သၞေဟ်ဗ္ဒဝ်၊ အ ၜဝ်,ခေါဇာ။ ကာန်နဳ,ကအ်ကျာ်၊ အလှာ်,ကွာန်ဘာ။ ကအ်ဒုန်,ကအ်ပၞဟ်၊အကၠဟ်,ဝက်ဒါ။ ကွာန်ပ္ၚ,ၝောံဒိုၚ်၊ တ္ကအ်ခၟိုၚ်ပြောဲဇွာ။ ကွာန်ၚာၚ်,သၞေဟ်ဍုၚ်၊ ကွာန်ကြုၚ်အညာ။ ကအ်ကြုက်,ကအ်ပၞဴ၊ ဝါကွဴဒဵုဒၞါ။ ကအ်ဇြဲ၊ကအ်သိုခ်၊ ပိုန်ဘိုက်သ္အဳဗ္ဂာ။ ဝါဂၠံၚ်,အံၚ်ခေဝ်၊သာံလှေဝ်ဗၠဲဂွါ။နာၚ်သၠုၚ်,လေအ်တက်၊ ကၟာဝက်ရးဇြာ။ ကအ်ခိုက်,မယာန်၊ကွာန်ကအ်ခမာ။ပြာန်ဍေၚ်,ဒဵုကြေၚ်၊ သၞေဟ်ခရေၚ်မြာ။ကွာန်သက်,သၞေဟ်ကိုၚ်၊ ကွာန်လိုၚ်နာနာ။ ကွာန်မန်ဂမၠိုၚ်၊ ပြိုၚ်ကဵုဗော်ဗၟာ။ ကေတ်ဍုၚ်ရပ်လွဟ်၊သၟဟ်မနောဒွါ။ တီညာတ်ဆီနန်၊ သၚ်မန်ပ္ဍဲဘာ။ အာတ်ဍုၚ်ဂၠိုၚ်ဝါ၊ဗၟာတအ်ဟွံကဵု။
ဆီမန်ဍာဲဇေတ်၊ ခေတ်သၟတ်ၚုဟ်
က္တဵု။ဗရုကညာၚ်၊ရမ္သာၚ်ကြဵုကြဵု။သ္ကိုပ်မန်ဂမၠိုၚ်၊ဂျိုၚ်ချိုတ်နွံတွဵု။ သ္ဂံၚ်လေဝ်နဲဂှ်၊တုပ်သၟဟ်ဂွံဖိုလ်။ ဗၟာထဍေၚ်ပန်၊ ဂေတ်လန်ပယျဵု၊ ဍုၚ်တေံကွာန်ဏအ်၊ သၟတ်တအ်ၚုဟ်က္တဵု။ ဗက်ရပ်ဗက်ဂၠာဲ၊သ္ၚာဲကိတ်ညံၚ်ကၠဵု။ ကွာန်ဖအံက်ဗျိၚ်၊ မိၚ်တုဲလဴကဵု။ နာဲစာန်ဒူ-ရ၊ ပၠတြဴဟိုတ်ဖိုလ်။ ဒှ်သ္ကိုပ်မန်၊ ဆီနန်ၚုဟ်က္တဵု။ဇြဟတ်ရဲဗော်၊ဇၞော်မံၚ်တွဵုဟွံပြဵု။ ဃောအာဃောကၠုၚ်၊ဒုၚ်ကေတ်ဒုၚ်ကဵု။ဒးသၠာဲလမျီု၊လီုဂွံကုသိုလ်။ဗၟာတအ်ကမၠက်၊ ရိုဟ်ကၞက်ဟွံကၟဵု။သွက်ဂကူဍုၚ်၊ ဒုၚ်ချိုတ်ဂွံဖိုလ်။ နွံပ္ဍဲဝၚ်ရ၊ ဟွံကျသာ်လဵု။ဂွံတုလဴကဵု၊ ကွဵုကၠေံပုဟ်ရဲ။
ဗၟာအဒိုဟ်ဂွိုက်၊ ဍဵုဍိုက်လောန်တဲ။ လအ်ညိမွဲအံၚ်၊တုပ်ညံၚ်ဒှ်ရဲ။ အခေါၚ်ဗၠးၜး၊ သၠးဒုဟ်ဟွံပျဲ။ သမ္မတဗၟာ၊ဝါဒတံၚ်ဂြဲ။ လလောၚ်တြးဏာ၊တုပ်ညံၚ်ကျာဗြဲ။ ဗော်မန်ရပ်လွဟ်၊ ပရှ်ဇိုၚ်တဲ။ လညာတ်လေဝ်တုပ်၊ မိက်လုပ်ကၠုၚ်ပ္ဍဲ။ရုဲမာဲအမာတ်၊ ဂွံညာတ်ပရဲ။ ဂှ်ရောၚ်ဂွံဍုၚ်၊ ဟီုပ္ညုၚ်နဲကဲ။လှေအ်လှန်ဟီုခိုဟ်၊ ၜိုဟ်သြိုဟ်ဗၠးဝဲ။ ဗော်မန်သ္ကိုပ်တအ်၊ တ္ၚဲဏအ်ဒုၚ်တဲ။ ယဝ်လုပ်ဖျေံလွဟ်၊ ဒှ်မိတ်ဒှ်ရဲ။ ဗၟာတအ်လီမန်၊ ညောန်စိုပ်လုပ်ပ္ဍဲ။ တိတ်ဂြိုပ်ရပ်လွဟ်၊ စှ်သၞာံစှ်ဗြဲ။မန်ပ္တေဟ်ဗၟာ၊ ခက်ဇာဒးပျဲ။မွဲတ္ၚဲဆဵုဘဲ၊ ရဲမန်လုပ်ကၠုၚ်။
ပိုၚ်ခြာတ္ၚဲကၞာတ်၊ သက္ကရာဇ်။လ္ၚီပိကၠံမာ၊ ၜါစှော်ယဵုဒုၚ် (၁၃၂၀) ဒုတိယဒ္ဂိုန်၊ ဗြဲဗိုန်ကျာသၠုၚ်။ မသုန်မံက်ဂှ်၊ ဖျေံလွဟ်လုပ်ကၠုၚ်။ဗော်မန်ဂြိုၚ်အီ၊ မၞိဟ်လ္ၚီစိုပ်ရုၚ်။ နာဲအံၚ်ထောန်ရ၊ သ္ပက္ဍိုပ်လုပ်ကၠုၚ်။ရပ်လံၚ်ပြောဲဇွာ၊ ဗၟာယုတ်ဒုၚ်တၠုၚ်။ အဵုသၟိၚ်ၜိုပ်ထဝ်၊ ပဝ်စဴလုပ်ဍုၚ်။ ထောံဌာန်ဂြိုပ်ဂၞိၚ်၊မိၚ်ကော်စိုတ်လျုၚ်။ မိပ်ဇြိပ်အီဂြိုၚ်၊ ပြိုၚ်ဂဇအ်ခုၚ်။ ဗော်မန်တအ်ရ၊ ဝိုတ်သွဝိုတ်ပုၚ်။ ပတှ်ေမွဲဝါ၊ဗၟာယုတ်ကဵုဍုၚ်။မန်တအ်လုပ်ကၠုၚ်၊ဂွံဍုၚ်ရောၚ်ဂး။
ယွံကလောပိုယ်၊ ဟိုဲမန်ကွာန်ရး။ ဂွံတီလဴကဵု၊ ဒှ်ဖိုလ်ရမၞး။ နာဲနုအၜတ်၊ကၠတ်လီမန်ဂး။ဟွံလအ်ဆဵုဘဲ၊ အပ္ဍဲကဵုမ္ၚး။ပြယာဲဗၟာ၊ဝါဒကေတ်ဇၞး။ လ္ၚီပိကၠံမာ၊ ၜါစှော်မွဲဂး။ (၁၃၂၁)မာ်စှ်မံက်ဆာဲ၊ ကံက်မာဲလုံရး။ မန်တအ်လုပ်ပြိုၚ်၊ ကျဂၠိုၚ်ညာတ်ဒး။ ဂွံအမာတ်ဇၞော်၊ တော်ရံၚ်ညိမၞး။ ဖိုဝ်ချိုဝ်,အံၚ်ထောန်၊ ကောန်မန်မွဲဂၠး။ နာဲဖိုဝ်စိၚ်ပၠ၊ ပိရညးဂး။ စှ်ပွိုၚ်ဍုၚ်၊ဒုၚ်ရုဲပြးဇး။ ဘိုၚ်ရီုဘိုၚ်တွံ၊ ဒှ်ဒုဟ်ရောဗၠး။မာံၜံက်မာဲလီ၊ တီသီုဍုၚ်ရ။ မန်ပိဂွံဇၞး၊ ဒးဂိုတ်ဒးဘိုၚ်။
ဆီနန်ဟွံကြဳ၊ ခမဳပၠိုၚ်ပၠိုၚ်။ဂွံဇၞးရုဲမာဲ၊ဂၠာဲတွံဂၠာဲဘိုၚ်။မာဲပၞုက်မာဲလီ၊ ဍေံသီဍေံပိုၚ်။ဗၟာယုတ်သတ်ဂျိ၊ ရိရိရိုၚ်ရိုၚ်။အနုဒှ်ဇၞော်၊ဗော်ဍုၚ်ဂမၠိုၚ်။အမာတ်မန်ပိ၊ တိရးဟွံပိုၚ်။လအ်ညိမွဲဗီု၊ လီုလာ်သီုဂိုၚ်။နေဝေန်ဗိုလ်ပၞာန်၊ကေတ်မာန်ချိုတ်ဂျိုၚ်၊သီကေတ်အာဏာ၊မာယာဒှ်တိုၚ်။ပြယာဲလှေအ်လှန်၊ ဓဇန်ဟွံဂြိုၚ်။ ဍုၚ်မန်ရောဂွိုအ်၊ဂွံဆဂွံဂျိုၚ်။နာဲအံၚ်ထောန်ကွေံ၊ ဍေံရပ်ဍေံကြိုၚ်။အလဵုသဳတြေံ၊ သေံဗၟာဂမၠိုၚ်။နေဝေန်ဒှ်ဗိုလ်၊ လ္ၚဵုရပ်လ္ၚဵုဗိုၚ်။မန်သုၚ်ခရိုၚ်၊ ဍေံကြိုၚ်ၚုၚ်ၚ။
ပၞာန်သီအဝဵု၊ ဗိုလ်ပၞာန်ဗာလ။ လ္ၚီပိကၠံမာ၊ ၜါစှော်ပိဂျ။(၁၃၂၃) မာ်စှ်စွေက်ဝွံ၊ ဗ္တံဂၠုဂၠ။နေဝေန်ဒှ်သ္ကိုပ်၊ ကောန်ၜိုပ်သ္ၚိတ်ဇြ။သော်ပြဟ်သၞေၚ်ကဝ်၊ ပဝ်လုပ်ဒှ်ဇွ၊ ဍုၚ်မန်ရောဂွိုအ်၊ဂွံဒုဟ်လအ်လ။နာဲဆာန်မန်ကီု၊ သီုနလ္လာဂျ။လအ်ဂွံဂြိပ်ဒဴ၊ လဴဟွံဂဗ။ ဗၟာရပ်ဂျိုၚ်ဂျိုၚ်၊ ကြိုၚ်လဝ်လအ်လ။ ညံၚ်ဒးကမ်ဂျိ၊သီုဂိသီုဂွ။မန်သှ်ေဂြိပ်ဒဴ၊ လဴစရောဂွ။ ဗၠးနူသ္ၚိစာတ်၊ စိုတ်ဓါတ်ဍိုန်လျ။ လ္ၚဵုဂှ်ဒဴၜး၊ သၠးထောံမိမ။ စိုပ်ဂြိုပ်ဒမၠု၊ စိုတ်လ္ၚုသ္ၚိတ်ဇြ။ လအ်ညိဂွံလွဟ်၊ ဒှ်ဓဝ်မာန။ ဗော်မန်မံက်ကၠုၚ်၊ ကေတ်ဍုၚ်ရာဇ။ ဒးအလီကီု၊ သီုဂိသီုဂွ။ဗိုလ်ပၞာန်ဗာလ၊ ဝါဒဗော်မွဲ။
နလ္လာ,အံၚ်ထောန်၊ ဆာန်မန်တီနဲ။ ရပ်ကြိုၚ်လအ်လ၊ဂွသီုညးအဲ။ ဒးအလီဗၟာ၊ ခက်ဇာဂၠိုၚ်တ္ၚဲ။လအ်ညိဗၠးစဴ၊ ကြဴချပ်ဗဗွဲ။ ဒးတိတ်ဂြိုပ်ကၠာ၊ နလ္လာညးမွဲ။ဒှ်က္ဍိုပ်သ္ကိုပ်၊ၜိုပ်ထဝ်ယာနဲ။တေံနာဲအံၚ်ထောန်၊လောန်စဴတတ္ၚဲ။စုတိပြံၚ်အာ၊သိၚ်သာညးအဲ။ချိုတ်ပ္ဍဲဓနက်၊က္ဍန်ဂြက်ဂၠိုၚ်ဘဲ။ပ္တေဟ်သၞလုပ်ကၠုၚ်၊ကေတ်ဍုၚ်ဗဗွဲ။ဗီုချိၚ်ဟွံဒှ်၊ ကှ်စှ်ေရိုဟ်တ္ၚဲ။ဗိုလ်ပၞာန်နေဝေန်၊ ထၞေန်စပ်ဂၠိုၚ်နဲ။သီကေတ်အာဏာ၊မေတ္တာဟွံမွဲ။ အိုတ်သီုညးအဲ၊ ရိုဟ်တ္ၚဲက္ဍန်ဂြက်။
နေဝေန်ဒှ်ဇၞော်၊ ဗော်သတ်နရက်။ နအဝဵုပၞာန်၊ပိုၚ်ကွာန်ဍုၚ်ဂြက်။ သာန်ယုမွဲဂှ်၊ ဒှ်ရဲမွဲဗွက်။ဂွံအလဵုသဳ၊ ပိုၚ်ပြဳသဳဗက်။ပရေၚ်ဍုၚ်ကွာန်၊ပၞာန်တအ်က္ၜေဟ်လက်။ ပလီုထောံရ၊ သ္ပဒုဟ်ဇြိုဟ်နက်။ မန်နွံအပ္ဍဲ၊ ပျဲပျာံကၠေၚ်ဒက်။ဂွံဗၠးဂြိပ်ဒဴ၊ကောန်ဗြဴဍံၚ်ဗက်။ တိတ်လုပ်တိတ်ပၠန်၊ ၜါလန်ဂၠောဲဇက်။ မိပ်ပ္ဍဲဂြိုပ်ဂၞိၚ်၊ ဗၠးသၟိၚ်နရက်။ ကၠာတေံဟွံလုပ်၊ တုပ်ညံၚ်ထိၚ်ဒက်။နာဲဘလောန်ဂး၊ ဟွံဒးဗၠိုက်နက်။ နာဲယှိုဲကျေန်ကော်၊ ဒှ်ဗော်ဗၠးဒွက်။ နာဲကြုၚ်ထဝ်ဟီု၊ ဟွံဟီုဗၟက်။ ဗၠးသတ်နရက်၊ ထိၚ်ဒက်မန်တအ်။
ယွံကလောပိုယ်၊ဟိုဲမန်မွဲသ္ကအ်။ ဂွံတီလဴကဵု၊ ဒှ်ဖိုလ်ဗိုန်ဇၟအ်။ နေဝေန်သာန်ယု၊ယၟုက္ဍိုပ်ဗၟာတအ်။ ဒပ်ပၞာန်ဂမၠိုၚ်၊ ပိုၚ်လဝ်ဍုၚ်ဏအ်။ ပေၚ်စှ်ၜါသၞာံ၊ပယာံဟွံပၠအ်။ က္ဍန်ဂြက်ဇဳဂၠံၚ်၊ ပၠံၚ်ၜးတေံဏအ်။ ဗက်သီဗၞိက်တိုက်၊ ဍိုက်ယာန်ဂဇအ်။လောဘဖအဴ၊ ထဴသီတုကၠအ်။ လုံကောန်ရးဍုၚ်၊ ဒုၚ်ပျဲရေက်ကအ်။ ပၞာန်ဂွံအဝဵု၊ညံၚ်ကၠဵုကြအ်ကြအ်။ ဗက်ကိတ်ဗက်ကဳ၊ သ္ၚဳဒြပ်ညးတ္ၚအ်။ဓဇန်လောန်ကာဲ၊ ဟာဲကၠဵုတမြအ်။စှ်ၜါသၞာံဏအ်၊ ဝးကအ်သုၚ်ဆီ။
နူဂှ်သၠာဲပြံၚ်၊ ညံၚ်ဒးအလီ။ လ္ပာ်တမ်ဏအ်သွံ၊ စွံလဝ်မွဲလ္ၚီ။ ပိပိမသုန်၊ သၞာံတုန်ဂေါဝ်မြီ။ (၁၃၃၅) မြေက္ကသဵုအဴ၊ တြဴစွေက်ကြအ်ဆီ။ ဍုၚ်ရးဟွံပဲါ၊ ရုဲမာဲအလီ။ ပၞာန်အပ်အဝဵု၊လ္ၚဵုမိပ်ဂြိုၚ်အီ။ လလအ်ကဵုပြဟ်၊ မွဲတ္ၚဲဒှ်လၞီ။ သမ္မတလေဝ်၊နေဝေန်ကြအ်ဆီ။ မန်ညံၚ်ဂွံသၠေက်၊ ဍေံပေက်ဟဇီ။ မိၚ်ဒးၚုၚ်ၚ၊ ဂွဂွဗြီဗြီ။ ရုဲမာဲအလီ၊ ဒှ်လၞီရိုဟ်တ္ၚဲ။
သၞာံလ္တူဂှ်၊ ဟီုသှ်ဗဗွဲ။ဂိတုပုဟ်ကၠာ၊ ဖါမံက်စှ်မွဲ၊ ကဵုဍုၚ်မန်ရ၊ သ္ပလဝ်စၟတ်တ္ၚဲ။ နေဝေန်,သာန်ယု၊ ဂးယၟုညးအဲ။ဒှ်အလဵုအသဳ၊ ပိုၚ်ပြဳဂၠိုၚ်နဲ။ ဍာံဂှ်ဟွံကေတ်၊ဗၠေတ်ရောၚ်ဗဗွဲ။ကဵုဍုၚ်မန်ဂှ်၊ ရှ်ညိဟွံမွဲ။ဂကူဂွံကၠေံ၊ လှေအ်လှန်ဂၠိုၚ်နဲ။ ဍုၚ်မန်ဍုၚ်ပၠက်၊ ခိုဟ်သွက်ညးမွဲ။ ဍုၚ်မန်ဍုၚ်ဍိက်၊ လိက်မန်ကၠေံဟဲ။ ညိရောဟွံတၟေၚ်၊ ဒးထောၚ်ညးအဲ။ ညးဂဇအ်ခုၚ်၊ ပေၚ်ဗုၚ်ရိုဟ်တ္ၚဲ။ မန်ဍိက်ဗၟာ၊ ယာမုက်ဒုၚ်နဲ။ အခေါၚ်ဖန်ဖက်၊ ကၠက်အာဍုၚ်မွဲ။ ဍုၚ်ဟွံဗဗွဲ၊ တုပ်နဲကောန်ဍိက်။
ရဲမန်ဒုၚ်ဂိ၊ ညိဟွံမွဲပၟိက်။
အခေါၚ်အဝဵု၊စဵုဇာစဵုနှိက်၊ကၠောန်ပၠန်ဒှ်လုတ်၊ စုတ်ထံၚ်စုတ်ထိက်။ ဂကူဟွံသၠုၚ်၊ ဍုၚ်မန်ဍုၚ်ဍိက်။မန်ကေတ်ဟွံကဵု၊ သ္ပလဝ်ကၠဵုကၠိုက်။မန်ဟွံကေတ်ဂှ်၊ဒှ်မန်ခိုဟ်ပိက်။ မန်ညးဂရိုဟ်၊မန်ဒိုဟ်မန်ကၞိက်။မန်ဏအ်ရောၚ်ကဵု၊ ဂွံဖဵုဒှ်ဍိက်။ မန်ဒုၚ်ဒဒိုက် သီုကွိုက်သီုထၞိက်။ဍုၚ်မန်ပိုယ်ကဵု၊ ညးလဵုရောဘိက်။ မန်ရဲနေဝေန်၊ ဒက်ဂြေန်စတိတ်။စၚ်ခဗာဲကၠာ။ စကာဒုၚ်ဇိက်။ မန်ဏအ်သ္ပဇၞော်၊ ညးကော်ညးဘိက်။ဗီုပြၚ်ဍုၚ်လၟုဟ်၊ ဒုဟ်ဟွံဗၠးဍိက်။ သွက်ဂကူမန်၊ဗ္တောန်ကဵုဗှ်လိက်။ ရၚ်တၠုၚ်ဟွံမာန်၊ ကွာန်ပိုယ်နွံပၟိက်။ဍုၚ်ပၠက်ဍုၚ်ဍိက်၊ လိက်ပတ်ကၠေံအိုတ်။
ဗၟာကဵုဍုၚ်မန်၊ လ္ၚုလ္ၚန်ပ္ဍဲစိုတ်။ အခေါၚ်ဟွံမွဲ၊ တုပ်နဲဍာ်ချိုတ်။ ဒၞာဲချပ်ဒၞာဲက္ဍန်၊ဒၞာဲဖန်တမ်ပိုတ်။ လိက်ဟွံကဵုဗ္တောန်၊ မန်တအ်ကၠက်အိုတ်။ ဍုၚ်မန်ကှ်ကှ်၊ ရှ်ဍေံဖျိုတ်ဖျိုတ်။ ဟွံဍောတ်ရရော၊ကောဒေံဖျေံစိုတ်။ စှ်သၞာံပြၚ်ပြၚ်၊ဍိုက်က္ၜၚ်ဘုတ်ပြိုတ်။ဝးကအ်သုၚ်ဆီ၊ ဒှ်လၞီညံၚ်ချိုတ်။ ဆဵုဒှ်ဗဟေက်၊ ဒးဖေက်လကိုတ်။ ဍုၚ်ဍိက်ဍုၚ်ပၠက်၊မန်ကၠက်အာဲပိုတ်။ ၜိုန်ရဂျိုၚ်မံၚ်၊ ညံၚ်မၞိဟ်ချိုတ်ချိုတ်။ ဗၟာၚိတ်လဝ်မန်၊ ဆီနန်လေဝ်ပၠိုတ်။ ၜိုန်ပေၚ်ကၠံသၞာံ၊ ဟွံဍာံညာတ်ဟိုတ်။ ခိုဟ်သွက်ညးမွဲ၊ နဲဝွံဖျေံစိုတ်။ ဂကူပိုယ်ကၠေံ၊ ကမၠေအ်ဂစိုတ်။ အခေါၚ်လေဝ်အိုတ်၊ မန်ချိုတ်လၟုဟ်ရ။
နေဝေန်,သာန်ယု၊ ဂးယၟုဍာံပြ။လအ်ညိမွဲအံၚ်၊ ပြံၚ်သၠာဲထောံရ။ သာန်ယုမွဲဂှ်၊ ဒှ်သမ္မတ။ အဝဵုလေဝ်ဇၞော်၊ ဗော်မဆလ။နေဝေန်မွဲဂှ်၊ဒှ်ဥက္ကဋ္ဌ။ဂၠိုၚ်ကဵုတ္ၚဲသၞာံ၊ ပယျာံကာလ။ အုပ်ဓုပ်ဍုၚ်ရး၊ ဇၞးညးဟွံကျ။ ပတှ်ေဒပ်ပၞာန်၊ဂွံမာန်ကဵုသ္ပ။ သာ်စကြိုဟ်ကြိုဟ်၊လဟိုယ်ယက္ခ။ ဒဒိုက်ရုန်မဵု၊ဒးဆဵုဘဲသၞ။ ဍုၚ်ပိုယ်ဒှ်ကၞောဝ်၊ ကၠောဝ်ဗျဵုပုၚ်သွ။ပၠံၚ်သ္ၚုပၠံၚ်သြောံ၊ကေတ်ထောံအိုတ်ရ။ မွဲသၞာံတေၚ်တိုန်၊ စိုန်ကိုန်နာံကၠ။ ဖေက်မံၚ်ဂြုဂြု၊ဗျုဍောတ်ဒှ်စၞ။ စသုၚ်က္ဍန်ဂြက်၊ နရက်ရောက။ သၚ်ကဵုခရှ်၊စၟဟ်တ္ၚဲကာလ။ ဒှ်ဒဒိုက်စိုတ်၊ ဟိုတ်မၞိဟ်ပါပ။ ယုတ်မာဟိဏ္ဏ၊ညးတၠအဝဵု။
ယွံကလောတအ်၊ တၟအ်ညးဂွံဆဵု။ ဗက်ကေတ်ဗက်ပၠံၚ်၊ကြံၚ်မ္ၚိုဟ်ရိုန်မဵု။ ဓဇန်လောန်ကာဲ၊ ဂၠာဲထ္ၜးအဝဵု။ လ္ၚီပိကၠံပၠန်၊ပန်စှော်ဒ္စံါအဵု။ (၁၃၄၈) သၞာံဏအ်တေၚ်အိုတ်၊စိုတ်ဒေါသဂဵု။ဒးမုက်ကလော်၊ ဗော်ဍေံရုန်မဵု။ လုံလုၚ်ရးဌာန်၊ ဇၟာပ်ကွာန်ဂွံဆဵု။ပံက်ဟၚ်ကေတ်သြောံ၊ ဗဝ်စွံသၠုၚ်ဒဵု။နေဝေန်သာန်ယု၊ မတ်ဂၠုဒှ်ဗိုလ်။ ဖျေံအသမ်ရ၊ ညးတၠအဝဵု။ လောဘဒေါသ၊ မောဟဓလဵု။ ပၟတ်ပိလုပ်စံၚ်၊ ဗက်ပၠံၚ်ဗက်ဍဵု။ ပိုယ်ရဲသၟာဗ္ၚ၊ ဂဗကၠောဝ်ဗျဵု။ ဒးပၠောပ်သြောံဒေၚ်၊ ဆေၚ်ဖျာအဝဵု။ ကဵုဟွံမာန်ရပ်၊ ပပ်ပဳဓလဵု။ဟွံမွဲဓဝ်မ္ၚဵု၊ ဍဵုဍိုက်ပျဲပျာံ။
အုပ်ဓုပ်မှာဇန်၊ပွိုၚ်ပန်စှော်သၞာံ။ ဒဒိုလ်ဗြံၚ်ဗြံၚ်၊ ညံၚ်လုပ်ပါၚ်ကျာံ။ဍဵုဍိုက်လောန်စိ၊ ညံၚ်ကၞိဒးတာံ။ ဒဒိုက်ဂၠိုၚ်နဲ၊ရိုဟ်တ္ၚဲရိုဟ်သၞာံ။ ဂြက်ဂြက်က္ဍန်က္ဍန်၊ ပ္ဍဲပန်စှော်ဒ္စံါ။ ဂိဓဇောတ်လောန်၊ ကၠောန်လဝ်ဟွံဍာံ။ ဂြက်လ္တူဂြက်၊ သီုလက်ပျဲပျာံ။နေဝေန်သာန်ယု၊ လုကဴပွိုၚ်သၞာံ။ ဒှ်ဇၞော်ညးပၠန်၊ ဓဇန်လောန်သ္ဍာံ။ ဒယာံကသဝ်၊ သ္ပလဝ်ပတ္တာံ။ တုပ်ညံၚ်ဍိက်ဂၠုဲ၊ ဟွံရုဲပယျာံ။ ဒဒိုက်စိုပ်သိဒ်၊ လ္အိတ်ဂးသၞာံ။ ဆဵုကပ်ဘဲဒဏ်၊ သၞာံပန်စှော်ဒ္စံါ။ ညံၚ်ကၞိဒးတာံ၊ပါၚ်ကျာံဂးလဝ်။
နေဝေန်သာန်ယု၊ ယၟုဍေံတမ္ညဝ်။ ဂကောံညးကော်၊စွံဗော်မွဲဓဝ်။ပခိုၚ်ဒပ်ပၞာန်၊ ဂွံမာန်ဆေဝ်ဒဝ်။ ရန်ကဵုသပုန်၊ရုန်မဵီပတဝ်။ထပိုတ်ပန်ဂြက်၊ဗက်ကၠောန်ဗက်ဒဝ်။အုပ်ဓုပ်ပိုၚ်ဍုၚ်၊ ဂွံကၠုၚ်သြန်ထဝ်။သီပၠံၚ်ဒြပ်ညး၊ တ္ၚဲယးပၠိုတ်သဝ်။ တၟေၚ်တိုန်ရိုဟ်သၞာံ၊ ပယျာံဂးလဝ်။ စသုၚ်က္ဍန်ဂြက်၊ညးလက်နွံဗဝ်။ သီုယာဲသီုကောန်၊ ကသောန်ကသဝ်။ က္ဍန်ဂြက်ဇဳဂၠံၚ်၊ ညံၚ်ကကြိုၚ်လဝ်။ ညာတ်ဗဃ်ဗဟေက်၊ ဖေက်ညံၚ်ဂၞိၚ်ကဝ်။ရဲသၟာဗ္ၚ၊ ဗက်ဘဆေဝ်ဒဝ်။ ဟွံကဵုသြောံ-ရပ်၊ သီုဒြပ်သြန်ထဝ်။ တိဗ္ၚကၠအ်သွဝ်၊ ဂွံလဝ်ပၠံၚ်ကေတ်။
ဓဇန်လောန်ကာဲ၊ ဟာဲသိုဝ်ယှေဝ်လေတ်။ ရာန်မွဲမွဲကၠာ၊လုပ်ဖျာဒးၜေတ်။ ကၠောဝ်ဗျဵုလုံဍုၚ်၊ဒှ်ကၠုၚ်ပ္ဍဲခေတ်။သၞာံဏအ်ဂြက်အိုတ်၊ စိုတ်မၞိဟ်ကၠိၚေက်။ ဂွံစဒးဂွံ၊ သြောံပိုယ်ဗလေတ်။ဇွောံမဟွံရုံ၊ နွံမံၚ်သီကေတ်။ဒမၠဍုၚ်ကွာန်၊ သ္ပမာန်ဂၠံၚ်ဗၠေတ်။ပံက်ဟံၚ်တုဲယိုက်၊ ဗတိုက်ပၠံၚ်ကေတ်။ ဗုဒ္ဓဘာသာ၊ ပြာကတ်ပ္ဍဲခေတ်။ ညးထံက်ပၚ်အောန်၊ဂြက်လောန်ပိုတ်ထေတ်။ထပိုယ်ခမဳ၊မၚ်သဳဂွံဝေတ်။ ဗက်ပရိယတ်၊ ကတ်လိက်ဂွံဒ္ဂေတ်။သၚ်သီုဖအိုတ်၊ သ္ပစိုတ်ရံၚ်ဂေတ်။ ဍေံဂၠာဲသ္ပဒုဟ်၊ က္ဍုဟ်ဟီုသရေတ်။သြောံကျာ်သြောံသၚ်၊ ထံက်ပၚ်ဓနေတ်။ လောဘစံၚ်ဂြဟ်၊ ဣဂှ်သီကေတ်။သြောံဘာရောဗၠး၊ ဟီုဂးရံၚ်ဂေတ်။နေဝေန်သာန်ယု၊ ဂွံယၟုပ္ဍဲခေတ်။ ဗုဒ္ဓဘသာ၊မွဲၜါရောဇေတ်။ကၠောန်မံၚ်ဗၠေတ်ဗၠေတ်၊ ပ္ဍဲခေတ်လောကဳ။
ယွံကလောတအ်၊ တ္ၚဲဏအ်ရံၚ်သ္ၚဳ။နေဝေန်သာန်ယု၊ဂွံယၟုပပ်ပဳ။သၟာကမၠောန်တအ်၊ တၟအ်ညးနွံဇဳ။ကပေါတ်အပြောံ၊ ကောံပ္ဍဲသေဌဳ။ သြန်နွံရာန်ကြိုၚ်၊ ၚုဟ်ဂၠိုၚ်တိုန်ဇဳ။က္ဍၚ်လ္တူက္ဍၚ်၊ အကၚ်ပပ်ပဳ။ ကၟာတ်စဵုဒၞာ၊ ဝါဂြိုပ်ဂၠံၚ်ၜဳ။ ကၠက်ရောၚ်ပထေၚ်၊ ၜိုန်ဍေံပြေၚ်လွဳ။ရဲသၟာဗ္ၚ၊ ဘဝကၠၚ်ဟဳ။ ဂွံသြောံဍေံကေတ်၊ၜိုန်ဍေံပြေၚ်လွဳ။ ရဲသၟာဗ္ၚ၊ ဘဝကၠၚ်ဟဳ။ ဂွံသြောံဍေံကေတ်၊ရပ်တ္ၚေက်ကွဵုချဳ။ ဂရတ်ရဲဗ္ၚ၊ လောဘဍာ်ဒဳ။ ဗက်ဍဵုဗက်ဍိုက်၊ လပိုက်ဖြဳဖြဳ။ ပိုယ်သၚ်ခရှ်၊ ဒှ်ဘုံလောကဳ။ ဒဒိုက်စဵုဗိုၚ်၊ ဂၠိုၚ်ကဵုနာဍဳ။စိုတ်လီုညးအဲ၊ မွဲဟွံရံၚ်သ္ၚဳ။ ဂိဓဇောတ်ဂး၊ ဒးယာံဟဳဟဳ။ ဘဝကျဍေံ၊ ကွေံဟာဂံၚ်ချဳ။ ၜိုန်ရက္ဍန်ဂြက်၊ ဍေံဗက်ဍေံဒဳ။ တိတ်ဂြိုပ်ဟွံမာန်၊ ဆာန်ဖုန်ဂိုဟ်ဂၞဳ။ ခေတ်ဏအ်ပပ်ပဳ၊ ရံၚ်သ္ၚဳအိုတ်ညိ။
ဂကူယက္ခ၊ ပါပဒိဋ္ဌိ။ ဒှ်ဇၞော်ပိုၚ်ဍုၚ်၊ ဂွံနၚ်နိဓိ။ သီကေတ်ဒြပ်ညး၊ ယးလၟုဟ်ပိုယ်ဂိ။ မှာဇန်တြုံဗြဴ၊ ညံၚ်ဒးလဴဂျိ။သာသနာဟုတ်၊ ဆုတ်စှ်ေဗိုန်ဂၠိ။ သၚ်တအ်ဒှ်ကၞောဝ်၊ ကၠောဝ်စသတ်ဝိ။ ခရှ်ဒးကပ်၊ ဒြပ်အိုတ်လက်ဗျိ။ သြောံဘာသြောံသၚ်၊ ထံက်ပၚ်လဝ်ညိ။ သီကေတ်ပိုၚ်ပိုၚ်၊ ရယုၚ်ရိုၚ်ရိရိ။ ဍေံတအ်ဍဵုဍိုက်၊ ဒဒိုက်ဖိဖိ။ ဒုၚ်မာန်ဒုၚ်အာ၊ ၜါကောန်ကဵုမိ။ ရမ္သာၚ်ဍေံကြံၚ်၊ မ္ၚိုဟ်မံၚ်ဒမၠိ။ တုပ်ညးၜုၚ်တက်၊ ထၞက်လဝ်ကဵုရိ။ဂကူယက္ခ၊ ပါပဒိဋ္ဌိ။ ချပ်ရံၚ်စိုတ်ဂိ၊ ရိုၚ်ရိပြာကတ်။
ပ္ဍဲကဵုသၞာံဏအ်၊ တၟအ်ညးကှ်ဇတ်။ ဂကူသမၠီု၊ ဍေံဟီုဂရတ်။ ကဵုဟွံကဵုဟာ၊ အာဏာလေဝ်ထတ်။ ဗတိုက်ပၠံၚ်သြောံ၊ဍေံစွံပေၚ်က္ဍဟ်။ ကောန်ဍုၚ်ကောန်ကွာန်၊ ဟွံမာန်အိုတ်ဓတ်။မွဲဟွံဂံၚ်ကွိုက်၊ ဍိုက်လုပ်ဂဗတ်။ညံၚ်ဂၠဴဖေက်ကၠာ၊ ကဖေက်ဍာ်ဇေတ်။ ဖျေံကမ်ရဟာ၊ ဗ္စာဟွံဗတ်။ ဗီုပြၚ်ဍေံလၟုဟ်၊ ညးက္ဍုဟ်ပေၚ်က္ဍဟ်။ ၜိုန်ဂှ်ဟွံဂံၚ်၊ ညံၚ်ညးအိုတ်ဓတ်။ ဗန်တဲဒေၚ်ၚုၚ်၊မၚ်ဒုၚ်ဍေံဗျတ်။ မွဲတ္ၚဲသၚ်အောန်၊ ဗတောန်လိက်ပတ်။ ထံက်ပၚ်ဍိုန်မံၚ်၊ ဂၠံၚ်ပရိယတ်။ ပစ္စယ်ပန်ကှ်၊ ဂွိုအ်ဗှ်ဂွိုအ်ကေတ်။ဟွံလအ်ရမၞး၊ ဒးထောံလိက်ခတ်။ ရှ်ပိဋကတ်၊ ဇတ်ကၠေံညောန်ကြပ်။
နေဝေန်သာန်ယု၊ ယၟုဍေံယုတ်ပပ်။ ဂွံလဝ်အဝဵု၊ ဒှ်ဗိုလ်ပၠံၚ်ဒြပ်။ ပွိုၚ်ပန်စှော်သၞာံ၊ ညာတ်ဍေံဘဲကပ်။ ဆဵုတုဲဆဵုတဴ၊ ကြဴဆဵုညောန်ကြပ်။ မှာဇန်တြုံဗြဴ၊ ညံၚ်ဂၠဴဇေတပ်။ ဗ္ဂန်စကာ၊အာဏာဂိုၚ်ရပ်။လုံရးဍုၚ်ကွာန်၊ဌာန်သ္ၚောဲညောန်ကြပ်။ဂျိုၚ်ဖိုဟ်တုပ်ချိုတ်၊အိုတ်မံၚ်ကသပ်။ မူပရောမာန်၊ပၞာန်ဍေံပေၚ်ဒပ်။ ဒဒိုက်ခေတ်ဏအ်၊ နာဲတအ်ဗက်ချပ်။သၚ်ကဵုသၚ်ကၠာ၊ ၜါဒှ်မွဲမှပ်။ ညံၚ်ကောန်မွဲဂၞဴ၊ ဇဴစိုဟဗာန်ခြပ်။ ညဳသာဇၞးရ၊ သၞဟွံဂံၚ်ကြပ်။ ခရှ်တအ်ကီု၊ သီုမေတ္တာစပ်။ ဆာန်ဂကူတုပ်၊ လုပ်ကသိုၚ်တပ်။ မန်ကဵုမန်ညဳ၊ ချဳရောၚ်ဗၠးကပ်။ ဗၟာမၞိဟ်ယုတ်ပပ်၊ ချပ်တုဲဒဴၜး။
ယွံကလောတအ်၊ တၟအ်ညးရးကး။ နူဘဝဍိက်၊မိက်ဂွံဗၠးၜး။ ပဂိုဟ်ဍုၚ်ကွာန်၊ သ္ၚိဌာန်ဒးသၠး။ ဍောတ်ဇၞော်ဒှ်သ္ကအ်။တၟအ်ညးအဲဏး။ ခမဳထောံဘာ၊ အ္စာထောံကွး။ မိမထောံကောန်၊ ကမၠောန်ထောံပြး။ သံယောဇိုန်ပိုတ်၊ စိုတ်ဏအ်ကေတ်ဏး။ မှာဇန်တြုံဗြဴ၊ ဒးဒးၜဴၜဴ။ ဘဝပိုယ်သွံ၊ သွက်ဂွံသၠးပွး။ကျာ်ဇၞော်ကောန်နာဲ၊ ဂြိပ်ပဲါထောံကွး။ ဒြပ်ရတ်ဥဿုံ၊ဆနွံဒးသၠး။ ကလောတအ်ဟိုဲ၊ ပိယ်ဒးဒဴၜး။ က္ဍန်ဂြက်လောန်တဲ၊ ပ္ဍဲဓနက်ပး။ ညံၚ်ပိုယ်ဂွံဗၠး၊ ဒးဒဴစာ်စ္ဍး။ မိပ်ဗီုကၠဵုကၠိုက်၊ ဍိက်ပၠက်ရောၚ်ဏး။ ပိုယ်ကသေအ်ကၟဝ်၊ ဆဝ်မ္ၚုဟ်လဴပျး။ ကဵုဖေက်သမ္ၚာတ်၊ ညာတ်ဒုဟ်ကဵုကၠး။ ပိုယ်တိတ်ချိုတ်မ္ၚး၊ ဗၠးဒွက်ဗၠးပး။ ဒဴစိုအ်ရဏး၊ တြးဏာဟီုဗ္ကန်။
ဟွံပစဗၞိက်၊ လိက်ဝွံအဲဆန်။ ပွိုၚ်သၞာံဍေံဂှ်၊ စှ်ဝါကေတ်ပန်။ ပရူအိုတ်သီု၊ ဟီုတုဲချူဇန်။ မွဲအာယုက်ခေတ်၊ ဂြက်ၜေတ်လီၜန်။ ဗၟာသတ်အယုတ်၊ လုတ်ဒုဟ်ဂၠိုၚ်သန်။ ဟွံမွဲမေတ္တာ၊လ္တူမှာဇန်။လောဘလောန်ကာဲ၊ ဗက်ဂၠာဲထဝ်သြန်။ ဒြပ်ညးသီကေတ်၊ ဗၠေတ်နူဓဝ်ပၠန်။ ဗြဟ္မဇဵုသွံ၊ ထောံကၠေံပဲါခၠန်။ ပိုယ်အိုတ်ကသပ်၊ ဒၞာဲချပ်ဒၞာဲက္ဍန်။ဗၟာစိုတ်သ္ဂံၚ်၊ တုပ်ညံၚ်ကၠဗြန်။ဗက်သ္ၚာဲဗက်ၚိတ်၊ ကိတ်စပိုယ်ပၠန်။ ဂိုဟ်ဆာန်ဒကာ၊ လအ်အာကၠေံဗ္ဒန်။ လိက်ပတ်လေဝ်ဗၠိုက်၊ ဒဒိုက်ဇၞော်သန်။ ဂကူလေဝ်တၞီ၊ တီဟာနဲဂြန်။ ကလောတအ်ဟိုဲ၊ ပိုယ်ပကောံဇန်။နူဘဝဍိက်၊မိက်ဗၠးဨကန်။ သံယောဇိုန်အိုတ်၊ ထပိုတ်ထောံပၠန်။ ဂြိုပ်တေံပြဲသန်၊ အဲဟီုဗ္ကန်လဝ်။
ဗၟာတြုံဗြဴ၊ ဒဴထောံမွဲကဝ်။ မၞးတအ်လ္ပပံၚ်၊ သ္ပပွံၚ်ဆေဝ်ဒဝ်။ ဂကူအယုတ်၊ ညးခုတ်ဟီုလဝ်။ ရုပ်သာ်ကျေဝ်ၜတ်၊ ဗတ်ဖျေံလံက်ထဝ်။ ရုပ်ရဴဒးလံၚ်၊ ညံၚ်အဆေဝ်သွဝ်။ဒြပ်နွံဒယှ်၊ ကဵုဒှ်ဂးလဝ်။ ဂကူဗၟာဍာံ၊ သၞာံသံဝစ္ဆဝ်။ နာဲတအ်လ္ပကေတ်၊ ဝေတ်စိုတ်ကဵုဓဝ်။ ပသၠိုက်ဇကု၊သတြုတမ်ကဝ်။ဂကူအယုတ်၊ ခဲါဒုတ်တမ္ညဝ်။ ဝေၚ်ပဲါကဵုမာန်၊ လ္ပဆာန်ဇအ်သဝ်။ဗၟာမၞိဟ်အရိုၚ်၊ ပွိုၚ်မွဲဠက်ကဝ်။ မွဲဍုၚ်မွဲကွာန်၊ မွဲဌာန်မွဲဂဝ်။ မွဲသ္ၚိမွဲကၞဳ၊ မွဲကၞဳမွဲသ္ကဝ်။ မွဲဖုန်မွဲသ္ဍဳ၊ မွဲဂၞဳမွဲဝဝ်။ မာံမိလ္ပပံၚ်၊ ရံၚ်အှော်ယာဲဂဝ်။ ယဝ်ပံၚ်လဟုတ်၊ ပိုယ်ယုတ်ပိုယ်သဝ်။အဲဟီုဗ္ကန်လဝ်၊ နွံဗဝ်ဗွဲကြဴ။
ဗၟာယုတ်ဍဵုဍိုက်၊ ဗၠိုက်စှ်ေဖြဴဖြဴ။ တမ်ပိုတ်ကၞာၚ်ကဝ်၊ ဟွံမွဲဇဝ်ပ္ကဴ။ ဍုၚ်မန်ကှ်ကှ်၊ ရှ်ညံၚ်သတ်ပၞဴ။ညိဟွံကြောံဍာတ်၊ စိုတ်ဓါတ်ထုဲနှဴ။ မန်ဒုၚ်ဍိက်ဗၟာ၊ ခက်ဇာမိပ်တဴ။ ဒှ်ဥက္ကဋ္ဌ ၊ခယျစိုပ်တြဴ။ ကေတ်ဒၞာဲဂ္ဇအ်ခုၚ်၊ ပေၚ်ဗုၚ်အီစဴ။ သွက်ဇကုဗော်၊ ဇၞော်တိုန်သဴသဴ။ စမိပ်တိက်ဖဲ၊ ရဲပၠက်ဍေံအဴ။ သွက်ဂကူကၠာ၊ တၟာဒဳအချဴ။ ညိဟွံမွဲရ၊ သ္ပလဝ်တိုၚ်ပ္ကဴ။ ဂကူမန်ဗၠိုက်၊ ကြိုက်ကဵုဒှ်တဴ။အ ခေါၚ်လိက်ပတ်၊ ကေတ်ဗတောန်အဴ။ လၟုဟ်ဂတကီု၊ သီုကဵုကၠာကြဴ။ ဟွံမွဲလးလး၊ ညာတ်ဒးလက်ဆဴ။ ဍုၚ်မန်တၟးသောၚ်၊ ညံၚ်ပၞာၚ်ကၠေၚ်သ္ဍဴ။ ဟွံဂဵုသှ်ေတဴ၊ အဴမန်တၞီဗၠိုက်။
ယွံကလောတအ်၊ တၟအ်ညးဍုၚ်လိုက်။ရိုဟ်သၞာံရိုဟ်ဝါ၊ ဗၟာတအ်ဍဵုဍိုက်။ ဂကူမန်ကွေံ၊ ဍေံကဵုတၞီဗၠိုက်။ ဂွံကၠက်ဂၠာဲရံၚ်၊ ဗက်ဆံၚ်ဗက်ကွိုက်။ တေံလကျာ်ဗၟာ၊ ဝါဒဍဵုဍိုက်။ကွဵုသွဟ်လိက်မန်၊ ဆီနန်ပိုယ်ဗၠိုက်။ဂၠံၚ်သာသနာ၊ ပြာကတ်ပ္ဍဲလိုက်။ ဂရတ်ဇဳသာ်၊ လကျာ်ဒိုဟ်ဂွိုက်။ ဍုၚ်မန်ဍုၚ်ဍိက်၊လိက်ပတ်ဒးဗၠိုက်။ ဍုၚ်မန်ဍုၚ်ပၠက်၊ မန်ကၠက်တိုက်ရိုက်။လေၚ်ရနာဲတအ်၊ တၟအ်ညးဒှ်ဒဒိုက်။ က္ဍန်ဂြက်ဂၠိုၚ်နဲ၊ ဟွံမွဲတသိုခ်။ပိုယ်ဒးရပ်လွဟ်၊ ပြဟ်ပြဟ်ဒးဗ္တိုက်။ ဂွံဇၞးဘိုၚ်ပၠိုက်၊ ကွိုက်ကဵုဇြၚ်သၞာ်။
ဗၟာဂြုဲဂြုတ်၊ ယုတ်သီုလကျာ်။ သၚ်မန်ဂမၠိုၚ်၊ဂၠိုၚ်မံၚ်လီုလာ်။ လ္ၚဵုသွဟ်/ဟွံသွဟ်၊ ဒှ်ၜါလ္ပာ်။ သၚ်မန်ဟွံညဳ၊ ချဳတိုန်ဂြိုဟ်ယာ်။ ဗၟာတအ်ထေၚ်ဗၠေတ်၊ ကေတ်ဒုဟ်ဂၠိုၚ်သာ်။သာသနာမန်၊ ကြပ်ညန်လီုလာ်။ ဟိုတ်နူဗၟာ၊ ဝါဒဂျိနာ်။ ဗီုပြၚ်ကၠောန်ခၞံ၊ ကြံကြသ္အဵုသ္အာ်။ သၞောတ်သွဟ်လိက်၊ ဒှ်ပၟိက်လကျာ်။သၚ်ဗၟာယုတ်၊ ဟီုပျုတ်ဂၠိုၚ်သာ်။ ရပ်လွဟ်မြပၠန်၊ ဒးပန်ဒးဗာ်။ထပက်ကဵုမၞုဟ်၊ လၟုဟ်ရပ်ဇြၚ်သၞာ်။ ပေဲါဂစိုတ်ဂှ်၊ ဆီဒှ်ညံၚ်ဍာ်။ သတီုလဝ်ဂြိုဟ်၊ စိုတ်မ္ၚိုဟ်ရပ်သၞာ်။ဒးပန်ဒးဗာ်၊ စိုပ်ဍာ်ကမၠက်။
ဂကူဗၟာဆံၚ်၊ ညံၚ်ဍေံဂွံကၠက်။ လွဟ်ဂတာပ်ခေတ်၊ ကေတ်နၚ်ကိုဋ်ဠက်။ မန်ပိုယ်ဂမၠိုၚ်၊ ဂၠိုၚ်ကဵုၝောံကၟက်။ဝုတ်ဝုတ်ဗၠာဲဗၠာဲ၊ ကၟာဲကၟာၜက်ၜက်။ ခမဳသၚ်မန်၊ ဆီနန်သက်သက်။ပညာလေဝ်ဂၠိုၚ်၊ဒှ်တိုၚ်ဒှ်ကြက်၊ဃောနွံဇြဟတ်၊ စိုတ်ထတ်တဴတက်။ဂကူမန်ဍာံ၊ သၞာံလ္ပကဵုၜက်။ ရပ်လွဟ်ဗ္တိုက်၊ ကွိုက်ဒဵုဍေံကၠက်။ဒးဒုၚ်လအ်လ၊ ဘဝဍိက်ပၠက်။ ချိုတ်မိၚ်မံၚ်ဟာ၊ထေၚ်အာဝိပက်။ ဂွံဗၠးနူဍိက်၊ မိက်ကဵုတဴတက်။ ဗ္တိုက်ရနွံ၊ အလုံဒှ်သွက်။ ဂြိုပ်ဇၞော်မိပ်ကွေံ၊ ဍေံဒှ်ရိုဟ်ကၞက်။ သီုၝောံသီုကၟက်၊ဆက်တိတ်အိုတ်ညိအဴ။ ။
(ဝၚ်မန်ပစ္စုပ္ပန်)
(ချူ)➲ဗညာဗၠာဲ✍