နဲကဲခိုဟ်ခိုဟ်ဂိုၚ်စွံလဝ်ပ္ဍဲက္ဍဟ်ပိုဲ
နဲကဲခိုဟ်ခိုဟ်ဂိုၚ်စွံလဝ်ပ္ဍဲက္ဍဟ်ပိုဲ
နိဒါန်လိက်
ကၠေၚ်က္ဍဟ်ပိုဲမၞိဟ်ဏံဂှ် ဒှ်ဒၞာဲဂိုၚ်ဒေပ်အရာနာနာသွက်ဘဝခိုဟ်မွဲတုဲ အခိၚ်ဘဝသုၚ်စောဲစကာမ္ဂးတှ်ေ တိုက်ရိုက်တံၚ်ပ္တိတ်စကာကမၠောန်ဂွံဓဝါဲဂှ်မာန်လောဲလောဲသွာသွာကီုရ၊ ဟိုတ်ဒှ်သာ်တုဲ ပ္ဍဲကဵုကၠေၚ်က္ဍဟ်မုပိုဲတအ်ဒးဂိုၚ်စွံလဝ်ရောဂှ်ဒှ်အဓိကသွက်ဘဝပိုဲတအ်မာန်ရ၊ ယဝ်ပိုဲတံဂိုၚ်စွံလဝ်ပရေံပရေံဂၠိုၚ်တှ်ေ ဘဝပိုဲဏံလေဝ် နဲကဲသုၚ်စောဲဘဝသှ်ပ္တိတ်ပလးပြသၞာနာနာလၟေၚ်တ္ၚဲဂှ်လေဝ်ဟွံလောဲသွာရ၊ ယဝ်ပိုဲတံဂိုၚ်ပ္ကောံစွံလဝ်ဗဟုသုတခိုဟ်ခိုဟ်တၟေၚ်တၟေၚ်ဗီုဂတာပ်အခေတ်ဂၠိုၚ်တှ်ေ ပ္ဍဲအရာသုၚ်စောဲစကာသှ်ပြသၞာပ္ဍဲဘဝပိုဲတံဏံလေဝ် သုၚ်စောဲစကာပြေပြံၚ်ပ္ဍဲဘဝပိုဲတံကီုရ၊ ဟိုတ်ဂှ်ရတှ်ေ ကၠေၚ်က္ဍဟ်မွဲအဓိကသွက်ဘဝပစ္စုပ္ပန်တ္ၚဲဏံသၟးဟွံသေၚ်တုဲ သွက်ဘဝအနာဂတ်ဂတတေံလေဝ်နွံၚုဟ်မးသက်ဟီုဟွံမွယ်ရ၊ ဇၟာပ်ညးအဲလေဝ် ပ္ဍဲကဵုက္ဍဟ်ပိုဲတံဏံဂှ် ထေက်ကဵုမူဒးဂိုၚ်သမ္တီကေတ်ခိုဟ်အိုတ်ဂှ်တှ်ေ ဆက်ဗှ်လ္ၚတ်ဗ္စာရဏာအာအိုတ်ညိအဴ ။
လုပ်ဗှ်ဖျုန်လိက်အိုတ်စိုအ် −−−−
ကၠေၚ်က္ဍဟ်ပိုဲမၞိဟ်ဏံဂှ် ဂွံဒုၚ်ဂိုၚ်ကေတ်အရာနာနာနူကဵုလတေၚ်စုတ်လုက်ဆက်စဠောံဍောတ်ဍောတ်သောဲသောဲဗွဲမဂၠိုၚ်ရိုဟ်လၟိဟ်ဟွံမာန်တံဂှ်ဟီုတှ်ေ၊ (မတ်ၜါ)အရီုပွမဆဵုညာတ်၊ (ကတောဝ်ၜါ)အရီုဂွံမိၚ်ရမျှာၚ်၊ (မုဟ်)အရီုပွမဂွံဒုၚ်ကေတ်ကျာ၊ (ကောန်လတာ်)အရီုဂွံတီကေတ်ရှ်သာ၊ (တဲကေုာံစၞာံဇကု)အရီုပွမစုက်လုက်ဏံတုဲ ပရေၚ်ပရောနာနာပြသၞာနာနာဖဵုနာနာပ္ဍဲဘဝပိုဲမၞိဟ်တံဏံလေဝ်မံက်ထ္ၜးကၠုၚ်ရုပ်ရဴနာနာမာန်အိုတ်ရ၊ ယဝ်ရပိုဲမၞိဟ်တံဂွံဒုၚ်ကေတ်အရီုမသုန်သာ်ဏံတုဲ လတေၚ်တံဂှ်လေဝ်ပလံၚ်ဗစိုပ်ဏာကဵုပ္ဍဲကၠေၚ်က္ဍဟ်တေံဂိုၚ်စွံသမ္တီလဝ်ခိုဟ်ခိုဟ်မွဲဒၞာဲကီုတုဲ အရီုမသုန်တံဏံလေဝ်အခိၚ်ဟွံရုဲမွဲသာ်ယဝ်ပိုဲတံကော်စကာသုၚ်စောဲမ္ဂးတှ်ေဂွံကၠုၚ်ဗီုအၚာပ်စိုတ်ပိုဲမၞိဟ်တံမာန်လောဲလောဲသွာသွာကီုရ၊ လဆောဝ်တှ်ေၜိုန်ရပိုဲတံဟွံကော်အရီုတံဏံကီုလေဝ်ဍေံမံက်တိတ်ကၠုၚ်ကေတ်ကေတ်အတိုၚ်သဘာဝဍေံရ။
ညံၚ်ရဴဒွက်ကလၚ်ခိုဟ်ပ္ဍဲပူဂဵုတံဂှ်ကီု သွက်ညးလ္ၚဵုတံဂှ်ဒှ်ဒွက်ပရေၚ်ကျဆာန်မွဲတုဲ ကလၚ်အခိၚ်လဵုလေဝ်ဂွံဒုၚ်စသိုၚ်ဍာ်ရမတ်ဇွောဝ်အခိၚ်ဟွံရုဲလေဝ်နွံကၠုၚ်ရ၊ သွက်ညးလ္ၚဵုတံဂှ်လေဝ် ဒွက်ကလၚ်ခိုဟ်ဒးစိုတ်ဂၠိုၚ်အိုတ်ဂှ်လေဝ် ညံၚ်ရဴဒွက်သွက်ဘဝဒှ်ဒွက်အၚာပ်စိုတ်ပူဂဵုဂှ်တုဲ အခိၚ်မိၚ်ဂွံကလၚ်ဒွက်တံဂှ်တှ်ေဂွံတသိုက်စိုတ်မိပ်လဟိၚ်ပ္ဍဲစိုတ်တေံကွေံကွေံတုဲ ညးတၞဟ်ကော်လေဝ်ဟွံမိပ်အာတုဲကလၚ်စဵုကဵုဒွက်ဏံအိုတ်မှအာရ။
နူတမ်မူလစပ္တံပွမကူချပ်ကၠေၚ်က္ဍဟ်ဂွံကၠောန်ကမၠောန်မာန်ဟီုဂှ်တှ်ေ ဒးကၠုၚ်နူပိုဲတံကၠဟ်ဂိုၚ်စွံလဝ်ပ္ဍဲကၠေၚ်က္ဍဟ်ပိုဲနူကၠာကၠာအိုတ်တေံကီုရ၊ ယဝ်ရပိုဲမၞိဟ်တံဂိုၚ်စွံလဝ်ပရေၚ်ပရေံပရေံအရာဖဵုဟွံမွယ်တံဂှ်အာကပှ်ဂိုၚ်စွံလဝ်ဇၟာပ်တ္ၚဲဏောၚ်တှ်ေ အိုတ်ကၞောတ်ဟေၚ်ပ္ဍဲကဵုကၠေၚ်က္ဍဟ်ပိုဲဏံဂှ်လေဝ်နွံဆပရေၚ်ပရေံပရေံဟွံဒှ်ဖဵုတံပေၚ်မံၚ်ပ္ဍဲကၠေၚ်က္ဍဟ်ပိုဲတံတုဲ ဘဝပိုဲဏံဂှ်လေဝ်အေဲဇြကှ်ကၠုၚ်သိုက်သိုက်မာန်ရ၊ ညံၚ်ရဴကဵု(ကောန်ပျူတာ)ဒးလဝ်(ဗွိုၚ်ရာတ်သ်)ကီုတုဲ တုပ်ကဵုကၠေၚ်က္ဍဟ်ပိုဲမၞိဟ်တံဒးလဝ်(ဗွိုၚ်ရာတ်သ်)မွဲပေၚ်ပေၚ်တုဲ သွက်ဂွံကဵုဖဵုကဵုဘဝပိုဲလၟေၚ်လၟေၚ်တ္ၚဲမာန်ရ၊ ပိုဲတံပတေဟ်ကၠုၚ်ဒၟံၚ်ဗၠေတ်ဗၠေတ်အတိုၚ်မွဲဘဝ၊ ပိုဲတံထ္ၜးကၠုၚ်ဒၟံၚ်ရုပ်ရဴဗၠေတ်ဗၠေတ်အတိုၚ်မွဲဘဝဟီုဂှ် ဟိုတ်နူကဵုဒ္ဂေတ်ပွဓဝ်ပတေဟ်ပိုဲဏံမွဲဟေၚ်တုဲ ယဝ်ရပရေၚ်ပရာမွဲမွဲဍေံမံက်က္တဵုဒှ်ကၠုၚ်ပ္ဍဲဘဝပိုဲတံဂှ်တှ်ေ ခိုဟ်ကီုပရေံကီုဟီုဂှ်ပိုဲတံလ္ပဂၠာဲထ္ၜးဒုဟ်ဟီုအာပေၚ်ပြးအရာပိုဲတံဟွံဆဵုတံဂှ်ညိ၊ အရာပိုဲတံဟွံဆဵုဟွံညာတ်ဂှ်လ္ပဟီုဂၠာဲဒုဟ်ပေၚ်ပြးတုဲ ဗွဲစၟတ်ပိုဲတံဒးဆဵုကေတ်ဒုဟ်ပိုဲဏံအိုတ်ညိ။
ညံၚ်ရဴမၞိဟ်ၜါဂှ်သုၚ်စောဲဘဝလၟေၚ်လၟေၚ်တ္ၚဲလေဝ်ကြပ်တုပ်မံၚ်ညးသ္ကံတုဲတၞဟ်ခြာအာညိညကီုရ၊ မၞိဟ်မာံ(ၜ)ဂှ်ညးတေံက္တဵုနူဂယျးကၠာဟွံဂွံအာကမၠောန်ဏီဂှ်တှ်ေ ညးတေံကလၚ်ဒွက်သပ္ပါဲသပ္ပါဲပရေၚ်ဆာန်ပရေၚ်ဘဝတုဲလဟိၚ်စိုတ်၊ မၞိဟ်မာံ(ၝ)ဂှ်ပၠန်တှ်ေ ညးတေံက္တဵုနူဂယျးကၠာဟွံဂွံအာကမၠောန်ဏီဂှ်တှ်ေ ညးတေံပံက်ဗဵုရုပ်ဒမျိုၚ်(ဗဳဒဳယိုဝ်)မပ္တံကဵုဗဳဒဳယိုဝ်ကလော် ဗဳဒဳယိုဝ်ဆေၚ်စပ်ကဵုသၟာဂစိုတ်မၞိဟ်သီုကဵုဗဳဒဳယိုဝ်နဲကဲကမၠတ်လီဠာန်တံကီုရ၊ ဘဝပ္ဍဲမၞိဟ်ၜါဏံဂှ်တှ်ေတၞဟ်ခြာအာသာ်လဵုဂှ်တှ်ေဂၠာဲသွဟ်ဟွံဆဵုကၠးကွေံကွေံရ၊ လဆောဝ်တှ်ေတၞဟ်ခြာဟွံတၞဟ်ခြာလေဝ်ဒှ်မာန်တုဲ တိုန်တဴကဵုအစောံစရာဲပ္ဍဲကဵုပူဂဵုတံၜါဂှ်ရ၊ ဆဂးဂှ်တှ်ေ ဗွဲစၟတ်ဨကန်တအရာဂိုၚ်စွံလဝ်ပ္ဍဲကဵုကၠေၚ်က္ဍဟ်တံလၟေၚ်လၟေၚ်တ္ၚဲအရာခိုဟ်ခိုဟ်တံဂှ်တှ်ေ မၞိဟ်မာံ(ၜ)ဂှ်ဟေၚ်ဂွံဂိုၚ်ဒေပ်စွံလဝ်ပ္ဍဲကၠေၚ်က္ဍဟ်ဂၠိုၚ်နူကဵုမၞိဟ်မာံ(ၝ)ဂှ်ရ၊ လပါ်မၞိဟ်မာံ(ၝ)ဂှ်လေဝ်သုၚ်စောဲဘဝအတိုၚ်ပကတိလၟေၚ်လၟေၚ်တ္ၚဲယဝ်ရစိုတ်ညးတေံပကတိမ္ဂးတှ်ေ၊ ပ္ဍဲကဵုမာံ(ၝ)သတိလီုအခိၚ်လဵုဂှ်တှ်ေ ညးတေံတံၚ်ဂြဲပ္တိတ်ကေတ်နၚ်အရီုမ္ၚိုဟ်ကြံၚ်ဂိုၚ်စွံလဝ်ပ္ဍဲကၠေၚ်က္ဍဟ်တံမာန်လောဲလောဲသွာသွာရ။ (အုပ်ကၠေံနိဂီုဆဝွံကၠာရ) ။
နိဿဲ
ကၠုၚ်နူပရေၚ်ဆဵုဂဗလၟေၚ်လၟေၚ်တ္ၚဲပူဂဵု ။