ပညာမွဲဟေၚ် ရေၚ်တၠုၚ်
Y<Pပညာမွဲဟေၚ် ရေၚ်တၠုၚ်ကဵုဘဝP<Y
✍ရာမည-ဝါန်ၛာဲ✍(ချူ)
မၞိဟ်ပိုဲမံၚ်ပ္ဍဲလောကဏံဝွံ မၞိဟ်လဵုဟွံဟီု ဂကူလဵုဟွံဟီုတသိုက်ဟေၚ် နွံပၟိက်ကၠုၚ်ဇၟာပ်ဇၟာပ်ဘဝမိက်ဂွံခိုဖအိုတ်ရ ၜိုန်ဒှ်သာ်ဂှ်ကီုလေဝ် မၞိဟ်ဗွဲမဂၠိုၚ် အာဍိုက်ဖံၚ်ဒှ်မံၚ်ကၠောဝ်ဍာ်အိုတ်ရ။ "ချပ်နန် ဂွံတာဲ ချပ်နာဲဂွံဍိက် သၟိက်ဂၠာဲတသိုခ်သ္ဂောံဆဵုဒဒိုက်အိုတ်ရ။"
ထံက်ရံၚ်ကဵုဂလာန်လ္တူဂှ်တုဲ ပိုဲဂကူမန်တံလေဝ် မုဟိုတ်ဒးဒှ်ဒၟံၚ်ဘဝဍိက်ပၠက်ဍိက်ဂၠုဲဒးဂ္ဇံသဝ် ဖျဝ်လဝ်မုက်မတ် ဖဍောတ်လဝ်ရမျာၚ် အကြာဂကူညးတၞဟ်သ္အာၚ်ရော ဟီုတှ်ေ ဟိုတ်နူကဵုပရေၚ်ပညာ က္ဆံၚ်သဝ်လောန်မဒှ်ရ။ ဘဝပိုဲဂကူပိုဲ ညံၚ်က္ဆံၚ်ဂွံသၠုၚ်တိုန်မာန်ဒးနွံပၟိက်ကဵုပညာရ။ ဇၟောဝ်မၞိဟ်ပညာဍိုက်ပေၚ်မှ သ္ဂောံရေၚ်တၠုၚ်ဖန်ဗဒှ်ကဵု ပရေၚ်ဘဝမၞးမာန် ပ္ဍဲလ္တူဂၠးတိဏံ ပိုဲမၞိဟ်ဂမၠိုၚ်မံၚ်ဒၟံၚ်လၟုဟ်ဂှ် စကာဒၟံၚ်ပညာရ ပ္ဍဲလ္တူဂၠးတိဏံ ပိုဲမၞိဟ်ဂမၠိုၚ်မံၚ်ဒၟံၚ်လၟုဟ်ဂှ် စကာဒၟံၚ်ပညာရ ဟွံသေၚ်ဟာ၊ ၇" ပညာဟွံမွဲ နဲတိပြၚ်ၜဳ" တိပြၚ်ၜဳဂှ် ချောဲတံတိုန်ၜတ် ရံၚ်ကျေဝ်ဂေါဝ် လုပ်မတ်တဴဗွဲမလောန်ရ ဆဂး ကာလလပှ်တက်ကၠုၚ် နကဵုအသိၚ် ဗွဲမသ္ကာတ်မြဟ်မ္ဂး ဗဗတ်ဇီုဒးတုဲ မ္ဒးသရိုဟ် လာ်စှ်ေအာအိုတ်ရ။ ပိုယ်မၞိဟ်တံလေဝ် ယဝ်ရပညာဟွံမွဲ မွဲသာ်မ္ဂး အခိၚ်ကာလ ဂဗဆဵုဒးတၚ်ဝါတ်ဂါတ်မမိက်ကဵုမွဲမွဲမ္ဂး ဍေံဂွံသောၚ်အာ ပြဟ်ပြဟ်မာန်ဂှ် ဟွံလောဲကဵုကုမၞးရ။
အခိၚ်လၟုဟ် မိမညးဍုၚ်ကွာန်လ္ၚဵုတံဟီု ကတ်ဒၟံၚ်ပညာဂှ် ဂွံစဒၟံၚ်ဂုဏ်ကီုဟာ ကၠောန်သွက်ဂကူဂှ် မုရှ်သာနွံရော။အရေဝ်ဗီုဗီုတံဏံဂှ် ဒှ်ကၠုၚ်ပ္ဍဲကုပူဂဵုဟွံမွဲကဵုပညာ ပူဂဵုဟွံဂတာပ်ခေတ်တံမဒှ်ရ။
အခိၚ်ဂကူမန်တံတဵုဂူကၠောန် သြောံဍိုက်ဒၟံၚ် ကွဳဂၠဴတေံဂှ် ဂကူဂျပါန် အမေရိကာန် ဂျာမနဳတံ ဒးကၠောန်စၞ အေၚ်ပုၚ်ဒးဗပေၚ်ဗုၚ် သီုဒဒိုက်ဂှ် အခိၚ်လၟုဟ်ဂကူဂျပန် အမေရိကာန်ဂျာမဏဳတံ သီုကဵုဟွံဂွံဇျာန်မွဲသာ် ဗၠိုက်တိကလာၚ်အကးစကာဓါတ်ဍိုက် ဓါတ်ကျာ ဓါတ်ပၟတ် လေပ်ဂှ် မန်ပိုဲတဵုဂူကၠောန်သြောံ ဍိုက်ဒၟံၚ်ကွဳဂၠဴဖိုဟ်ရ။ ဂကူမန်တံဂှ် မိက်ဂွံဂံက်ကပိုက်ပၞိက် မိက်ဂွံက္တဴ ၜံၚ်ပၟတ် သၞောတ်အခိုက်တြေံဂှ် ဟွံကၠဟ်ဏီရ၊ မုဟိုတ်ရောဟီုတှ်ေ ဂကူမန် တံဂှ် ပရေၚ်ပညာ ဍိုန်လျအာမဒှ်ရ။ ဂကူမန်တံဂှ် ကမၠောန်ဂွံစဂတမတ်မှကၠောန် စိုတ်ဟွံလျုၚ်ကဵုပရေၚ်ပညာ သွက်ဂၠံၚ်တရဴဂကူဂွံဇၞော်မောဝ်ဂှ်လေဝ် ချပ်ဟွံဒးမွဲသာ် ညာတ်ဒၟံၚ်ပရေၚ်ပိုန်ဒြပ် သွက်ဇကုမွဲဓဝ်တုဲ ညာတ်ညး ကၠောန်ပရေၚ်ဂကူ သီုဟွံမွဲတဴကဵုပိုန်ဒြပ်ဂှ်လေဝ်က္ဍုဟ် ဂကူမန်တံမ္ဒးတၞီဗၠိုက်အာရ။
လောန်ကၠုၚ်မွဲအခိၚ်တေံ ဂကူမန်တံ ဒှ်ဂကူပြဲ ဂကူဨကရာဇ်တုဲ ပ္ဍဲအရာလိက်ပတ်ယေန်သၞာၚ်ဂှ်လေဝ်ဇၞော်မောဝ်တဴတက် ဗွဲမလောန်ဂှ် သ္ဂောံတီကေတ်ရ အခိၚ်ညးတၞဟ်ဂှ်မွဲသာ် ရံၚ်အာတၞောဝ်ဒ တောဝ်ဂကူလေဝ်ဒှ်ဒၟံၚ် တၞောဝ်ဒတောဝ်ဂကူဨကရာဇ်ပြဲဖိုဟ်ဂှ် ဍေံဒှ်ကၠုၚ်ၜိုတ်က္ဆံၚ် ဏံမာန် ထေက်ကဵုသ္ဒးအောန်စိုတ်ကွေံရ။ မုဟိုတ်ဂွံက္တဵုဒှ်ကၠုၚ်ဗီုဏံဂှ်ရော။ ဟိုတ်နူကဵု ပရေၚ်ပညာ ဍိုန်လျအာ ဟိုတ်နူကဵုသၠုၚ် လဝ်မာနအထေၚ်သောဲကဵုဂကူဇကု ညးမွဲကဵုမွဲ ဟိုတ်နူကဵုဟွံညဳသာမဒှ်ရ။ ပ္ဍဲအရာမဂၠာဲကွတ်ကတ်ပညာဂှ် ဒးဖဍိုန်ဖျဝ်လေဝ် မာနညံၚ်ရဴတမၠၚ်လအာတ် ဒးစွံစိုတ်ညံၚ် တၠပညာသဵုကရေတဳတံရ၊ တၠပညာသဵုကရေတဳဂှ် ဇၟာပ်မၞိဟ်ဒှ်အ္စာအဲဖအိုတ်ရ။ စွံစိုတ် ဗီုဏံတုဲ ကတ်ကၠုၚ်ပညာနူဇရေၚ် ညးမဂၠေၚ်ချောဲ နူညးမဇိၚ်ဒၞပ်တံတုဲ ဂွံဒှ်ကၠုၚ်တၠပညာ ယၟုဒယှ်တှ်ပြာကတ်တဴ လ္တူဂၠးတိတုဲ ဇၟာပ်မၞိဟ်သ္ဒးသ္ပအဲပရဲရ။
ဟိုတ်ဂှ်ရ ပိုဲဂကူမန်တံလေဝ် စွံစိုတ်တၠပညာသဵုကရေတဳဂှ်တုဲ ကတ်တဴပညာမ္ဂး ပညာဇၞော်မောဝ်တဴတက်ကၠုၚ်ဟေၚ်ရ။ က္ဆံၚဘဝပိုယ်လေဝ်ခိုဟ်ကၠုၚ်ရ။ ပူဂဵုလ္ၚဵုလေပ်ပညာညိည ကလိဂွံလဝ်ပိုန်ဒြပ်ဍိုက်ပေၚ်တုဲ ကမၠောန်တာလျိုၚ် သွက်ဂကူလေဝ် ဟွံယိုက်ဂၠေၚ်မွဲသာ် သွက်ဇကုမွဲဓဝ် သိုၚ်လဝ်သ္ၚိတိုက်ဗကၜတ်တုဲ တရဴထောံစး ဟွံဂတးရံၚ်လ္ပာ်ဂကူ ဂကူဇကုဂှ် ဒှ်ဒၟံၚ်ဘဝဍိက် ဒှကဇိက်မံၚ်ကဵု ညးတၞဟ် ဒးဖျဝ် လဝ်မုက်မတ် ညံၚ်က ဟွံမွဲကဵုဍာ် ကောန်ဟွံမွဲကဵုမိမ ဒးပ္ဒဗ္ဒာဲကဵုဂၠံသြိုဟ်ညးတၞဟ် သီုဟွံမွဲတဴကဵုအလံၚ်မွဲသာ်ဂှက ဇကုမွဲဒှ်တသိုက်တုဲ လ္ပာ်ဂကူဂှ် မုဒှ်ဒှ် ဟွံစွံရှ်လ္တူ ဂကူဇကုအထေၚ်ဇၞော်မံၚ်ကဵု ဂကူညးတၞဟ် ကလေၚ်ပ္ဍဵုပ္ဍိုက်ဒၟံၚ်ဂကူဇကု ဗီုဏံဂှ်လေဝ် ဂကူမန်ပိုဲ ဂွံဇၞော်မောဝ် တဴတက်တိုန်အာဂှ် ဍေံက္တဵုဗဒှ် ကဵုဟွံမာန်ရ။
ဘဝပိုဲ ကဆံၚ်ဘဝဂကူပိုဲ ညံၚ်ဂွံတတ်ထပါ်မံက်ဂတဝ်ကၠုၚ် အကြာဂကူညးတၞဟ်မာန်ဂှ် မုပိုဲစွံတၚ်အဓိကရော၊ ပညာမွဲဟေၚ်ရေၚ်တၠုၚ်ဒတုဲဖဵုကဵု ဘဝပိုဲမၞိဟ်မာန်အိုတ်ရ။ ဟိုတ်ဂှ်ရ ပိုဲဂကူမန်တံလေဝ် ယဝ်ကဵုဒၟံၚ်ဇြဟတ်ကဵုပရေၚ်ပညာ ဂိုတ်ဂ္စာန်ကၠောန်ဒၟံၚ် ပရေၚ်ဂကူမ္ဂးတှ်ေ ပိုဲသ္ဒးဂ္ဇအ်သဝ်ဖျဝ်မုက်မတ် ဒးဖ္ဍောတ်လဝ် ရမျာၚ်အကြာ ဂကူညးတၞဟ် လၟုဟ်ဂှ် ဍေံဒှ်ကၠုၚ်ဟွံမာန်ရ လောန်ကၠုၚ်တုဲဂှ် လ္ပဟီုဏီရ သ္ပပ္တံနူပိုဲမၞိဟ်သၟတ်ခေတ်တၟိဏံတုဲ ဘဝပိုဲက္ဆံၚ်ဘဝဂကူပိုဲညံၚ် သ္ဂောံမံက်ဂတဝ်ကၠုၚ် အကြာဂကူညးတၞဟ်မာန် ညံၚ်သ္ဂောံဂတာပ်ခေတ်မာန်ဂှ် သ္ဒးပ္တိတ်ဇြဟတ်တုဲ ကၠောန်ကိစ္စသွက်ဇကုအိုဿီုဂှ် ညံၚ်သ္ဂောံပြေမာန်ဒးဂ္စာန်ရေၚ်တၠုၚ်ရ။
ပိုဲကောန်ဂကူခေတ်တၟိဏံ လေဝ်စွံၚုဟ်မး လ္တူဂကူတုဲ ညံၚ်ဂကူ ဇကုသ္ဂောံယာက္ဍိုပ် သ္ဂောံပၚ်မုက်အကြာညးတၞဟ်မာန်ဂှ် "ဒ္ဂေတ်ဗၠေတ်ဂှကပဲါ ကွေတ်ခိုဟ်ဂှ်ဂၠာဲ စိုတ်ဆာန်ဂှ်ကေတ် "စွံတၚ်အဓိကဗီုဏံတုဲ ဂိုတ်ဂ္စာန်လွဳအာဍာံမ္ဂး ခြာဟွံလအ်တိုၚ်ပ္ကဴရန်တၟံလဝ်ဂှ် သ္ဒးစိုပ်မာန်ရ။
ဟိုတ်ဂှ်ရ ယွံဂကူမန်တံ ဂကူပိုဲလေဝ် ညံၚ်က္ဆံၚ်သ္ဂောံသၠုၚ် ဘဝပိုယ်လေဝ် ညံၚ်က္ဆံၚ်သ္ဂောံကၠုၚ် ဂွံနွံကၠုၚ်ကဵုရှ်သာ ပ္ဍဲဂကူဂှ် ဒှ်တာလျိုၚ်ပိုဟ်ကောန်ဂကူတံတုဲ ညံၚ်သ္ဂောံဂတာပ်ခေတ်ဂှ် ဒးဂ္စာန်ၜေတ်ကၠောန်တဴရ။ နွံပၟိက်ကဵုတသိုက် ဂွံဆဵုဒဒိုက်ဂှ် ဒှ်ကၠုၚ်သာ်လဵုရော က္ဆံၚ်ဘဝဂကူမန်တံ ညံၚ်သ္ဂောံသၠုၚ်တိုန်မာန် ဂိုတ်ဂ္စာန်တဴ နကဵု ပရေၚ်ပညာရ။ ကုပူဂဵုဟွံမွဲတဴကဵုပညာဂှ် ဒှ်ညးမကၟာတ်လဒဵုလဝ်မတ်ကီုရ။ ဂၠံၚ်တရဴသွက်ဂကူသွက်ဇကုမၞးဂှ် သ္ဂောံဇၞော်မောဝ်တဴတက် တိုန်အာပၠန်ဂှ် ရံၚ်ဟွံညာတ်သက်က် ကောန်ဂကူမန်တံ ညံၚ်သ္ဂောံဂွံကၠုၚ် ဂွံမံက်ဂတဝ်တိုန်မာန်ဂှ် ဘဝနာဲဂွံသၠုၚ် နာဲဟေၚ်ဒုၚ်ဒဒိုက်စှ်ေ ကေတ်စိုတ်သာ်ဏံတုဲ ညံၚ်ဘဝပိုဲ ဂွံယးတၟးမာန် ဟိုတ်ဂှ်ရ ပိုဲကောန်ဂကူမန်တံ ဒုၚ်ဒဒိုက်တုဲ ကတ်ဗ္တောန်အာလိက်မန်ကတ်အာ ပညာညဳညဳသာသာအိုတ်စိုအ်။