ပရေင်နာနာသာ်
သ္ဂုတ်သွာတ်ကောံဓရီုဇၞော်ပရေၚ်ဂကူမန်ဂှ် မုလေဝ်ဓမံက်ရုပ်ရဴဟွံမာန်ဏီ
ပ္ဍဲပေဲါကောံဓရီုဇၞော်ပရေၚ်ဂကူမန် သၞာံ ၂၀၁၃ လးဖျေံလဝ်တၚ်သ္ဂုတ်သွာတ် (၅) တၚ်ဂှ် စၟတ်တ္ၚဲ (September 2}}
.svg)
ပ္ဍဲပေဲါကောံဓရီုဇၞော်ပရေၚ်ဂကူမန် သၞာံ ၂၀၁၃ လးဖျေံလဝ်တၚ်သ္ဂုတ်သွာတ် (၅) တၚ်ဂှ် စၟတ်တ္ၚဲ (September 28) ဏံမ္ဂး ပေၚ်ကၠုၚ်မွဲသၞာံကီုလေဝ် သ္ဂုတ်သွာတ်ဖျေံလဝ်တအ်ဂှ် မွဲတၚ်လေဝ် ဓမံက်ရုပ်ရဴ ဟွံမာန်ဏီရောၚ် ဂွံတီကေတ်ရ။ သွက်ဂွံဓမံက်ရုပ်ရဴ တၚ်သ္ဂုတ်သွာတ်ကၠာအိုတ် သၞာံ ၂၀၁၄ မံက်ဏံ ညံၚ်ဂွံကၠောန်အာ သဘၚ်သဳကၠဳ ဇၞော်ကောန်ဂကူမန် မွဲရောၚ်ဟီုဂှ် ကောံဓရီုဇၞော်တုဲ ခြာဟွံလအ်ဂှ် ညးစၞးနူဗော်ပရေၚ်ဍုၚ်ကွာန် (၃) ဗော် ဂှ်ကီု၊ ညးစၞးနူဂကောံနာနာတအ် သ္ပကောံဓရီုတုဲ ထပ်ပံက်ပ္တိုန် ကမ္မတဳ ကၠောန်ဗဒှ်သဘၚ်သဳကၠဳဇၞော် ကောန်ဂကူမန် ပ္ဍဲဇြပ်မန်ဍုၚ်မတ်မလီုရ။
“လၟုဟ်ဂှ် ဍေံခက်အာကဵု ကိစ္စသွာၚ်ဗော်တအ်ရ၊ သွာၚ်ဗော်ပိုဲဂှ် ကေတ်လဝ်တၚ်တုပ်စိုတ်ကဵု ဗော်ဍုၚ် မန်တၟိဂှ် ဗော် (၂) ဗော် ဏံရ က္ဍိုက်ပ်တုဲ ကၠောန်အာရောၚ်၊ ဆဂး လၟုဟ်ဂှ်တှေ် ခက်မံၚ်ကဵု ဗော် MNP ပိုဲပၠန်ရ၊ သဘၚ်သဳကၠဳဗော် ၂၀၁၅ ဂျာန်နဝါရဳတေံတုဲမှ ကိစ္စ သဘၚ်သဳကၠဳဂှ် ဂွံချပ်ရောၚ်” သာ်ဏံ အ္စာသဝ်နာဲဟံၚ်ဍုၚ် ဟီုရ။
ကာလ ဗော် (၂) ဗော်ဂှ် ဂ္ဇံကောံဓရီုမ္ဂး ပ္ဍဲကမ္မတဳကၠောန်ဗဒှ် သဘၚ်သဳကၠဳဇၞော်ကောန်ဂကူမန်ဂှ် သွာၚ်လဵုပါထေက်၊ ဂကောံလဵုပါထေက်ဂှ် လေဝ် ချပ်အာတုဲ၊ သွာၚ်ကမၠောန် တၚ်သ္ဂုတ်သွာတ်တၞဟ်ဟ် တအ်ဂှ် ကြက်ဍေံဂှ် စပ္တံနူသၞောဝ် (၂၀၀၈) ဂှ်ကီု၊ တၚ်တၞဟ်ဟ်တအ်ဂှ် ပ္ဍဲကဵု သဘၚ်သဳကၠဳဇၞော် ကောန် ဂကူမန်ဂှ်မ္ဂး ထပ်သဳကၠဳအာရောၚ်ဂှ်လေဝ် အ္စာသဝ်နာဲဟံၚ်ဍုၚ် ထပ်သောၚ်က္လးကဵုရ။ “နကဵုစၞးကမ္မတဳကၠောန်ဗဒှ် ကောံဓရီုဇၞော်တြေံတေံရဟီု နကဵုစၞးဗော်ဂှ် ဟွံဟီုရ၊ ဗော် (၂) ဗော်ရ က္ဍိုက်ပ်တုဲ ကၠောန်အာရောၚ်ဟီုဂှ် အလဵု သဳကၠဳလဝ်ကီု ဗီုလဵုဖျေံလဝ်နွံဂှ် ပိုဲဟွံတီလဝ်ပုဟ်၊ သဘၚ်သဳကၠဳဇၞော်ဂှ် မၚ်ကဵုသဘၚ်သဳကၠဳ ဗော်ကောန်ဂကူမန်တုဲမှ ကၠောန်ရောၚ်ဟီုဂှ် ဍေံ လအ်အာရောၚ်၊ အကာဲအရာ ကောန်ဂကူပိုဲတ္ၚဲဏံ မုဒှ်မံၚ်၊ ပိုဲဒးသ္ၚဳဂၠိပ်လ္တူဂှ်တုဲတှေ် ၝဒးကၠောန်ထေက်ဂှ် ဒးကၠောန်အာရ၊ တၚ်သ္ဂုတ်သွာတ် တအ်ဂှ်တှေ် ကော်ပကောံညးသ္ကအ် ဂကောံနာနာတအ်တုဲတှေ် တၚ်လဵု ဆေၚ်ကဵု ဗော်လဵု၊ ဂကောံလဵု ဒးဓမံက်ရုပ်ရဴဂှ်တှေ် ဒးဆက်ဓမံက် အာရုပ်ရဴထေက်၊ စိုတ်အဲတှေ် ဗော် (၃) ဂှ် ဟွံရုမ်ဂပ်ပုဟ်၊ သီုကဵုဂကောံမဟာဇန်တအ် ဒးကေတ်လျိုၚ်တုဲ ဒးဓမံက်အာရောၚ် အဲစွံလဝ်စိုတ် သာ်ဂှ် ဒဵုတ္ၚဲဏံဖိုဟ်ရ” သာ်ဝွံ ညးအုပ်ကာနာနာ ကမ္မတဳကၠောန်ဗဒှ် ကောံဓရီုဇၞော်ပရေၚ်ဂကူမန် (တြေံ) ဗော်ဒဳမဵုကရေဇြဳအလုံရးမန် နာဲအံက်သာ ဟီုရ။ ကမ္မတဳကၠောန်ဗဒှ်ကောံဓရီုဂှ် နူကဵုဗော်ဒဳမဵုကရေဇြဳအလုံရးမန်တအ် ဒစဵုဒစးတုဲ ဒးဒေံါဇူလဝ် မွဲချိုန်ခဏရ၊ ဗော်( ၃) ဗော်ဂှ် ကလေၚ်ဂ္ဇံ ကောံဓရီုတုဲမှ ကမ္မတဳပံက်လဝ်ဂှ် ဒှ်ဒတန်ဟာ၊ ထပ်ပံက်တၟိဟာဂှ် ကလေၚ်ချပ်သဳကၠဳပၠန်ရောၚ် သာ်ဏံ တုပ်လဝ်စိုတ် အလန်လက္ကရဴ အိုတ်နွံရ။ ဖျေံလဝ်သကုတ်သွာတ် နူကဵုကောံဓရီုဇၞော်ဂှ် ၂၀၁၄ မံက်မ္ဂး သွက်ဂွံဆက်ကၠောန်အာ သဘၚ်သဳကၠဳဇၞော် ကောန်ဂကူမန်နွံတုဲ သွာၚ်ဂကောံ မဟာန်ဇန်နာနာတအ် ကၠောန်သ္ပကၠုၚ်ကောံဓရီုဇၞော် ဂကောံညး ကဵုညး သီုကဵုရုဲစှ် ချပ်ဇန်လဝ် ညးစၞးသွက်ဂွံတိုန် သဘၚ်သဳကၠဳဇၞော်ဂှ်ကီု၊ ချပ်ဇန်ပလေဝ်ပလေတ်လဝ် လိက်ကၞပ်/လိက်စံၚ် သွက်ဂွံပ္တိုန်ထ္ၜး ပ္ဍဲကဵုသဘၚ်သဳကၠဳဇၞော်ဂှ် နွံရ။ “မၚ်ကဵုသဘၚ်သဳကၠဳဗော်ဂှ်တုဲမှတှေ် လဇုဲလေဝ်ဟီုဂွံလေဝ်၊ နကဵုဗော်ပိုဲဂှ် ပ္ဍဲကဵုကောံဓရီု ကေၚ်ကာလက္ကရဴဏံ ဖျေံလဝ်နွံမံၚ် စပ်ကဵုပရေၚ် ကမၠောန် ကောံဓရီုဇၞော်ဂှ်တှေ် နကဵု MAU သွက်ဂွံဂ္ဇံဂှ် စၞောန်လဝ်ကဵု ဗွိုၚ်မ္ၚးဍုၚ်တအ် တုဲမံၚ်ရရောၚ်၊ အဲခယျကေတ်တှေ် ခြာဟွံလအ် MAU ဂ္ဇံတုဲတှေ် သွဟ်မွဲမွဲဗီု ဍေံဒးတိတ်ရောၚ် အဲစှေ်စိုတ်ရ” သာ်ဏံ ဒုသ္ကိုပ်ဗိုလ်ဇၞော် -လျိုၚ်ဖောအ်ဗြေဝ် အပ္ဍဲဍုၚ်ဗော်ဍုၚ်မန်တၟိ နာဲMသိုက်ဆာန် ဟီုရ။ “လ္ပာ်ဗော်ပရေၚ်ဍုၚ်ကွာန်တအ်ဂှ် မုလေဝ်ဟွံမိက်ဟီုရ၊ ဆဂးဂှ် ပံၚ်တုဲကၠောန်အာညးသ္ကအ် မွဲစွံဂွံတှေ် ဍေံခိုဟ်အိုတ်ရ၊ အပ္ဍဲဂှ် ဂကောံမဟာ ဇန်တအ်လေဝ် ဒးပါလုပ်ထေက်၊ စပ်ကဵုတၚ်သ္ဂုတ်သွာတ်ဂှ် ရုပ်ရဴ ဍေံဂွံမံက်ဂှ်တှေ် ကမ္မတဳကၠောန်ဗဒှ် ကောံဓရီုဇၞော်တြေံတေံရ ကေတ် လျိုၚ်တုဲတှေ် ကော်ပကောံ ဂကောံမဟာဇန်တအ်တုဲ ဒးချပ်စ သွက်ဂွံဓမံက်ကမၠောန် တၚ်သ္ဂုတ်သွာတ်တအ်ဂှ်တှေ် ဒးရးဂၠိုၚ်ရောၚ်” သာ်ဏံ ကမ္မတဳကၠောန်ဗဒှ်ကောံဓရီုဇၞော် စၞးဂကောံမဟာဇန်သွာၚ်သၟတ် နာဲတဝ်ပၞးအံၚ် ဟီုရ။ တၚ်သ္ဂုတ်သွာတ်ကောံဓရီုဇၞော်ပရေၚ်ဂကူမန် တုပ်စိုတ်ဖျေံလဝ်ဂမၠိုၚ်ဂှ်ဝွံ သၞာံ ၂၀၁၄ မံက်မ္ဂး သွက်ဂွံကၠောန်သဘၚ်သဳကၠဳဇၞော် ကောန်ဂကူ မန်ကီု၊ အလုံကောန်ဂကူမန်သ္ဂောံဂွံညဳသာ ဒှ်မွဲဇြဟတ်ဂှ် ဒက်ပ္တန်အာ ပရေၚ်ညဳသၟဟ်ညးသ္ကံကီု၊ သွက်ဂွံဒက်ပ္တန်အာ ကၟိန်ဍုၚ်ၜိုဟ်လလမ်ဍာ် ဇမၠိၚ်မာန်ကီု၊ နကဵုအလဵုအသဳ ဒးလလောၚ်တြးကဵု စပ်ကဵုပရေၚ်ဒေံါပန်ပှော် ဗွဲမကၠးဖ္ဍးဂှ်ကီု၊ သွက်ဂွံကၠောန်အာ သဘၚ် သဳကၠဳဇၞော် ညံၚ်ရဴ ဗေန်လုၚ်ဂှ်ကီု၊ ကၟိန်ဍုၚ်ဖေဝ်ဒရေဝ်ဇေတ်တ် ညံၚ်ဂွံမံက်ဂတဝ်ဂှ် သ္ဇိုၚ်သၞောဝ်ဥပဒေတၟိ ချူအာရောၚ် (ဝါ) သ္ဇိုၚ်သၞောဝ်ဥပဒေ (၂၀၀၈) ဂှ် ချူပလေဝ်အာဂှ်ကီု သာ်ဝွံ ဖျေံတုပ်လဝ်စိုတ်ရ။