ပရောမန် လောန်ကၠုၚ်တုဲ
ဇၟာပ်ကောန်မန် ဒးတီလဝ်ထေက်
ပရောမန် လောန်ကၠုၚ်တုဲ
ပလုမ်နိဒါန် ဂလာန်ဆက်မိတ်
လောန်ကၠုၚ်အတိက် မိက်တီညးအဲ၊ ညးဇၞော်တမၠာ အ္စာကဝိပြဲ၊ ယဝ်ဟွံချူသီ ဟွံတီညးအဲ၊ ယဝ်ညးဟိုတ်မာဲ ဟွံဆာန်အာဲမွဲ၊ ပိုဲတအ်ညးအဲ ဟၟဲအခေါၚ်တီ။
လိက်သၟတ်ဝွံပြဲ ညးအဲပၞုက်သီ၊ လောန်ၜိုတ်စှ်သၞာံ ပယာံကၠိုဟ်တီ၊ အဲဍိက်ဆဵုညာတ် အာတ်ဗှ်သီုလၞီ၊ ဗှ်တုဲတီအိုတ် စိုတ်ချဳကတဴဆီ၊ တီကၠုၚ်အာဲကၟာဲ ဂၠာဲကၠုၚ်တၞောဝ်ဆီ၊ ပ္ဍဲစိုတ်ဒှ်လၞီ ဆီဆဝ်မ္ၚုဟ်ကၠုၚ်။
ပိုဲဂကူမန် ကောန်နန်ကောန်ဍုၚ်၊ လောန်မွဲအခိၚ် လဟိၚ်နန်ဍုၚ်၊ တီကၠုၚ်သာ်ဏအ် ရန်တၟံလှုၚ်ကၠုၚ်၊ သွက်မန်ဂွံတီ ဆီလလဴကၠုၚ်၊ ထပ်တက်တရး လဴထ္ၜးစုၚ်စုၚ်၊ ဂွံတီလျိုၚ်ဍုၚ် ဒုၚ်ဍောၚ်ပတိုန်ထ္ၜး။
ကောန်မန်ဟံသာ ၀ၚ်တမၠာတၟး၊ ဂၠိုၚ်မိၚ်ညာတ်ရ သုတယးတၟး၊ ဆီတၠဂွံဍာဲ စိုတ်နာဲဂွံယး၊ ဂွံဗၠးဘဲဍိက် ကော်ဘိက်ပ္ညုၚ်ထ္ၜး၊ ဂွံဍိုက်ပေၚ်ပၟိက် မိက်ကဵုဒးရး၊ ရန်တၟံပြဲသ္အး ပတိုန်ထ္ၜးဏာရောၚ်။
နမော တဿ ဘဂဝတော အရဟတော သမ္မာသမ္ဗုဒ္ဓဿ။
နမော တဿ ပဏာမလိက်ပတ်၊ ဗုဒ္ဓဓမ္မ သီုသံဃရတ်၊ အဲဍိက်ရှ်ေသှ်ေ ဖျေံက္ဍိုပ််ပဝတ်၊ အိန်ဗြီုယီုမာ ဒေဝါဂၠိုၚ်ဗၞတ်၊ နွံဂၠိုၚ်ပြးဇး ဂးဗဟုဝစ်၊ မိကဵုမၜါ အာစာဇၞော်သွတ်၊ ကဝိပန်ဌာန် ညာဏ်ညံၚ်သၞာ်ရတ်၊ ဂုဏ်ညးတအ်ဂှ် ဒှ်ဗဇ္ဇဗတ်၊ အတိက်လေဝ်ကီု သီုအနာဂတ်၊ အဲဍိက်ပဝတ် ပ္ဍဲပစ္စုပ္ပန်။
ဖျေံက္ဍိုပ်စိန်ဝုန် ယိုက်လဝ်ဂုဏ်ပၠန်၊ ဖဵုအဲရဴဂဴ ဇဴထပှ်တန်၊ ကမ္မကိုရ်စိ ပိစှော်ၜါပၠန်၊ ဝေဒနာတုန် ၜါဣသုန်ဗ္ဂန်၊ ပရိုက်ဥပ္ပဒြဴ စှ်တြဴတန်၊ အန္တရာယ်စှ် ဒဏ်စှ်မွဲဒွန်၊ အိုတ်ကပ်ပိကီု သီုဝဲမသုန်တန်၊ ဂြိုဟ်ပါပပၠန် သီုဒဏ်အန္တရာယ်။
အိုဿီုယဲဗော် ကလော်တာဲဗြာဲ၊ ဗၟုဲဘုတ်ပြိုတ် အိုဿီုသရာဲ၊ ပရိစ္ဆေဒ ဘဝဇၟာပ်ဒၞာဲ၊ သၞနိမိတ်သၞဲ ကဵုဍေံသ္ၚောဲသာဲ၊ ဘဲသၟိၚ်ဍာ်ပၟတ် ကမၠတ်စိုတ်စၞာဲ၊ ကဵုဍေံပြးဆာဲ ပဲါဒဴအာညိ။
ယိုက်ဂုဏ်တုဲပၠန် ဆန်ဗဒှ်လိက်စိ၊ ညးမဒှ်ကၠာ အာစာကဝိ၊ တံၚ်ပိုအ်ရးဇြာ ကွာန်ဂှ်ဇာတိ၊ အဲမာံတောံကၠာ အာစာကဝိ၊ ညာဏ်ဒှ်မြမောဝ် လ္ၚောဝ်ရးမန်ပိ၊ အာယုဒဳဃာ လာဘသုခိ၊ လာဘ်ကဵုစိုပ်ကၠုၚ် ညံၚ်နုၚ်နိဓိ၊ အာယုက်ကဵုဂၠိၚ် ညံၚ်သၟိၚ်နာဲမိ၊ ဂွံဒှ်မြမောဝ် ဒေါဝ်ရးမန်ပိ၊ ဝၚ်တြေံတြဟ် ဆန်ဗဒှ်တၟိ၊ ဂကူမန်ကၠာ ဂွံတီအာညိ၊ ဗမာပျဲလဝ် ညံၚ်ကဝ်အဂ္ဂိ၊ တူဂြောတ်ဂဵုဒၟံၚ် ညံၚ်ကဵုပ္တေၚ်ဂျိ၊ သွက်မန်ဂွံတီ တၞီစှ်ေဖိဖိ၊ တီတုဲသတိုတ် စွံစိုတ်ကဵုဂိ၊ ညံၚ်ဂွံချပ်မာန် ဂစာန်တိုန်ညိညိ၊ ညးအဲပဝိုတ် ဂိုတ်ကဵုဗိုန်ဂၠိ၊ မန်ပိုဲဗၠိုက်မံၚ် ဘိုၚ်ဟံၚ်အိုတ်ညိ၊ ယဝ်ဟံၚ်ဂွံကၠာ လာဘသုခိ၊ လာဘ်ဂွံစိုပ်ကၠုၚ် ညံၚ်နုၚ်နိဓိ၊ အာယုက်ဂွံဂၠိၚ် ညံၚ်သၟိၚ်နာဲမိ၊ ဇဲယသိဒ္ဓိ ကဵုဒှ်ညိမန်။
မၞိဟ်ဒေဝတဴ ကလောသ္ၚောဲညန်၊ တၞောဝ်ဂကူစိ ဇာတိပိုဲမန်၊ တဆိပ်ၜိုပ်ကၠာ ဟံသာထဝ်သောန်၊ ရာဇာဝၚ်တၞံ တမၠာလအ်လောန်၊ နူသၟိၚ်ပိုဲမန် စှ်ေနူနန်ထဝ်။
ဍုၚ်ဟံသာဟေၚ် ညးတၟေၚ်ဂွံလဝ်၊ ၜိုပ်ကျအာမြာ် သြိုဟ်ပါ်သၞေၚ်ကဝ်၊ ပြာသာဒ်ရတ်ထ္ၜိုၚ် က္ဍိုၚ်ဗ္တာၚ်နန်ထဝ်၊ ဘုတ်ဘာသီုသ္ၚိ တိဍာ်ကၠအ်သွဝ်၊ ဍုၚ်ဗဂေါကၠာ တၟာမဗဒဝ်၊ ဟွံသှ်ေလေၚ်အိုတ် ဟိုတ်ဝဲတမ်ကဝ်၊ သာ်ဝွံဆတ္တဝ် ပြာကဋ်လဝ်ရောၚ်၊ သမ္တီပယောၚ် မွဲတောၚ်ချူဇန်။
နူရာဇာဝၚ် ရံၚ်ကေတ်နၚ်ဂြန်၊ ပ္ဍဲဇာတာထဝ် ပလဝ်ကိုန်ခန်၊ သ္ၚဳဂၠိပ်တုဲပၠန် ဆန်ပမၚ်ဇေန်၊ ဘာသာမန်အဴ ကြဴဂွံဆက်ဆေန်၊ ကလောမိတ်စှ် တုဲဂွံဗှ်ပ္ဍေန်၊ ပလိက်မၚ်ဇေန် အဲလွဳဟေန်ဆာဲ။
ဍုၚ်ဗဂေါကီု ဗီုပြၚ်ဇၟာပ်ဒၞာဲ၊ ပရောပိုဲမန် ကောန်ယာံကဵုယာဲ၊ မိယာံကဵုကောန် အောန်စိုတ်ဇၟာပ်ဒၞာဲ၊ ဝုတ်ယာံကဵုဗၠာဲ ဆာန်တုဲသာဲအာ။
တၞောဝ်ရာဇာဝၚ် အိုတ်လၚ်ကတာ၊ ဂကူမည ဝံသပိုဲကၠာ၊ ဒှ်ဍိက်ဗၟာရ သဗ္ဗကေၚ်ကာ၊ ဒှ်ဒဒိုက်လၞီ ကြအ်ဆီသိၚ်သာ၊ အတိက်တမၠာ နူကၠာတေံဂှ်။
ဒဒိုက်ပိုဲမန် ဇၞော်လောန်သ္ကာတ်မြဟ်၊ ဒးချိုတ်ဘဲပၟတ် တူဂြောတ်ဟေၚ်ဟဟ်၊ လေၚ်သီုဂြပ်ရတ် ပိဋကတ်သၟဟ်၊ လေၚ်သၟိၚ်နာဲတၠ မသထပှ်၊ လေၚ်ဍုၚ်လေၚ်ကွာန် လေၚ်ဌာန်ဒိုဟ်စှ်၊ ပိုဲလေဲခၠေဝ်သှ် ဂတှ်ဝိပက်။
ဂွံတီညာတ်ရ ဂတမွဲအဆက်၊ ဒှ်စိတ္တညာဏ် ဂလာန်ဒှ်ကြက်၊ ကောန်ဇာတ်ဗွဲကြဴ စဴစေက်သှ်ေၜက်၊ ဂွံတီညးအဲ မွဲၜါအဆက်၊ လိက်နွံဂွံဗှ် မန်စှ်ကိုဋ်လက်၊ ပရောပိုဲဟေၚ် ဗီုတၟေၚ်ဒးကၠက်၊ ဗၟာသတ်အဟိုတ် ဂစိုတ်ကမၠက်၊ ပလဝ်ရိုဟ်ကၞက် ဨကဂ္ဂတာ။
ရာဇာဝၚ်ရ နူသၠပတ်ကၠာ၊ ပမၚ်ဇေန်ပ္ညုၚ် ဍုၚ်မန်ဟံသာ၊ အဲချူဗဒှ် ဂွံဗှ်သေၚ်ဟာ၊ ပရူခပ်သီ ဂွံတီလောဲသွာ၊ ချူကှ်ေပိုဒ်ဗျဉ် ဆန္ဒလၚ်္ကာ၊ ဗီုပိုဲဒှ်ကၠုၚ် ဍုၚ်မန်ဟံသာ၊ သ္ဂောံစေန်ဆက်အာ ပြာကဋ်လဝ်ရောၚ်။
မၞးတအ်ကလၚ် ပၚ်မှိၚ်မွဲတောၚ်၊ ထံၚ်လဝ်သောတ စိုတ်ပကဵုယောၚ်၊ မညဘာသာ မေတ္တာအခေါၚ်၊ ဆာန်ဂကူရောၚ် ဟီုလဴသောၚ်ထ္ၜး။
ဟိုဲတၞောဝ်မည ဝံသဗော်သွး၊ ဂကူပိုဲကၠာ ညဳသာသၟဟ်တး၊ ဟွံဒးလီုလာ် ဟွံပါ်ဒကး၊ ဍိက်ကဵုတၠနာဲ ဟွံဒးသာဲပြး၊ ပၚ်မှိၚ်ညိဏး ယွံကွးကဝိမန်။
အတိက်တေံကၠာ တမၠာလအ်လောန်၊ ဟံသာဝတဳ ဍုၚ်ကျာ်သြဳမန်၊ သၟိၚ်ဨကရာဇ် သီုအမာတ်ဝေါန်၊ မၞိဟ်မွဲဍုၚ်ကွာန် ဇၟာပ်ဌာန်သ္ၚောဲညန်၊ သကိုပ်ပၞာန်ဂှ် ဟိုတ်ဟွံသၟန်သၟန်၊ ညးရောဒးဗီု ဒးလီုလ္ၚုလ္ၚန်၊ ဟံသာဍုၚ်မန် နန်ထဝ်က္ဍိုၚ်ဗ္တာၚ်။
ဒးထောံကၠေံသ္ကဲ လုပ်တဲညးသ္အာၚ်၊ သၟိၚ်ဒဴဗညာ ရာဇာတြုံသာၚ်၊ ကတဴကတာန်မံၚ် ညံၚ်ၜိုဟ်ကဵုကၠာၚ်၊ ဒးထောံကၠေံဂအာၚ် ကၟာၚ်ဍုၚ်ဒေါဝ်ဝါ။
ဂၠုက်ရာပ်ဂၠုက်အုပ် ဒဴလုပ်ဒျူဒျာ၊ ဍိုက်ဂွံဂၠုၚ်က္ၜၚ် ကြၚ်ဒေါဝ်ဂၚ်္ဂါ၊ သၟိၚ်ဨကရာဇ် အမာတ်ဒဴဗညာ၊ ဝံသဒတောဝ် တၞောဝ်မန်ရာဇာ၊ ဖေက်ဘဲအနိၚ် ဝပ်သၟိၚ်ဗမာ၊ မန်ပိုဲဒဴပၞာန် ထောံကွာန်ဂွံဝါ၊ ဂြိပ်ဒဴထောံဗၟာ ပ္ၚောံဒျူဒျာရောၚ်။
သာ်ဝွံမွဲတောၚ် ဟွံယောၚ်ဒှ်ဍာံ၊ ဍုၚ်ဗဂေါဝွံ လ္ၚုလုံဒိုဟ်ဒ္စာံ၊ တၞောဝ်ပိုဲမည ညံၚ်ကဒဴကျာံ၊ သ္ပကာဝရာံ သၞာံဂှ်လအိတ်။
ကၞိရောၚ်ဒးဘဲ ဗဂဲရပ်ကိတ်၊ သက္ကရာဇ်ဍုၚ် ကၠုၚ်စိုပ်လအိတ်၊ လ္ၚီကၠံဟီုတွံ ကဵုစှ်ဒစိတ်၊ (၁၁၁၉)၊ မန်ကျဗမာ ရာဇာတၞောဝ်သိတ်၊ တၞောဝ်မညပြဲ စိုပ်ဘဲဍာ်ဒ္စိတ်၊ ပ္ဍဲဇမ္ဗုဒိပ် ဂြိပ်ဒဴဗၟာၚိတ်၊ တိုန်ဒဵုကၠၛာ် စှ်ေဍာ်ကျာံကိတ်၊ ညံၚ်သာ်ဂှ်ကၠာ ပမာလအိတ်၊ ညံၚ်သာ်ဂှ်လေဝ် သရေနိမိတ်၊ မန်ဒးထောံဍုၚ် သုၚ်ဝိပရိတ်၊ ဆၚ်ဒဴနူနန် ယောန်အာသ္ၚိတ်သ္ၚိတ်၊ လုပ်အာဂြိုပ်ဂၞိၚ် ပ္ဍဲကြာစိၚ်သိတ်၊ ဂၠိုၚ်သၞဝဳဝဲ ဂၠိုၚ်ဘဲလအိတ်၊ ဒးအေၚ်ပုၚ်ဍာ် ကွာ်အာမံၚ်သ္ၚိတ်၊ ဒဒိုက်စိုပ်သိတ် လ္အိတ်ပိုတ်သကုတ်။
ဍုၚ်ဟံသာရော ဗဂေါညးခုတ်၊ လုပ်တဲဗမာ ရာဇာအယုတ်၊ ဂးအံၚ်ဇေယျ စိုတ်ညံၚ်ကၠဂြုတ်၊ တၞောဝ်ၜိုပ်ထဝ်ကွေံ ဍေံရပ်ပြဟ်ဍုတ်၊ ဂၠာဲဒုဟ်ဂၠိုၚ်နယ် ဂၠာဲစောဲဂဗုတ်၊ လဟုက်ထေဲထုတ် စုတ်ဒုဟ်ကဵုမန်။
သၟိၚ်ဗမာလေဝ် ဨကရာဇ်ဝေါန်၊ ညံၚ်ကလော်ကြုက် မုက်ညုဓညောန်၊ ဍေံဂွံအဝဵု ဍဵုဍိုက်ပျဲလောန်၊ ခမဳသၚ်မန် ဆိုက်ညောန်သ္ၚောဲသာဲ။
ကဵုကော်နၚ်ကၠာ ဗလးဏာသရာဲ၊ ကၠုၚ်စိုပ်ဆတ္တဝ် ပ္ကောံလဝ်မွဲဒၞာဲ၊ ညာတ်ဒှ်ဒေါသ ညံၚ်ကၠရပ်သ္ၚာဲ၊ ဟွံမွဲမေတ္တာ အာဏာလောန်ကာဲ၊ မုက်အံၚ်ဇေယျ ဒေါသဗ္ကေတ်ဍာဲ၊ မၚ်မွဲဓုတၚ် သၚ်ခမဳဗၠာဲ၊ ဒးအလီရ ဗၟာပပြယာဲ၊ စိုတ်ဍေံယုတ်စၞာဲ ဥပဲါအဟိုတ်။
ကေတ်စိၚ်ဂြၚ်ဗိုန် ကဵုလိုန်ဂစိုတ်၊ နကဵုလွဟ်ပၠန် ပန်ဗာ်ဖအိုတ်၊ ပျဲပျာံၜုၚ်တက် ထၞက်ကဵုရိပိုတ်၊ ဒးဒုၚ်ပယျဲ ဘဲကမ်ဒးချိုတ်၊ ဗုၚ်လိုက်ကအ်ပိုတ် ချိုတ်ၜိၚ်မံၚ်ဆီ။
ကွးသၚ်အရဳ ခၟဳမန်ပိလ္ၚီ၊ (၃၀၀၀) စုတိစဴသွဝ် သီုကဵုဓရ်လၞီ၊ ဒးဒုၚ်ကၠုၚ်ပၠန် ဘဲဒဏ်ကၠံလ္ၚီ၊ သာ်ဝွံခပ်သီ သမ္တီလဝ်ညိ။
ဣတ္ထဳဗြဴမန် သီုဂဝ်သန္ဓိ၊ ပ္ဍဲဗော်ရာဇာ ဗမာဒိဋ္ဌိ၊ ပန်ဗာ်ထပက် ၜုၚ်တက်ကဵုရိ၊ ညာတ်ဒှ်ဗဟေက် ဖေက်ဖေက်ဂိဂိ၊ နရိုအ်ယာံဟာဲ ဗက်ဂၠာဲကော်မိ၊ ဗမာတဲဂံၚ် ညံၚ်နာ်သတ်ဂျိ၊ ညှာတာရောမွဲ ဂၠိုၚ်နဲလက်ဗျိ၊ ပန်ဗာ်ထပက် ၜုၚ်တက်ကဵုရိ၊ ဗြဴသီုသန္ဓိ အိုတ်ဇဳဝိတ။
မၞိဟ်ထပှ်လ္ၚီ တီကၠးဍာံပြ၊ (၇၀၀၀)၊ ဂကူပိုဲကၠာ ဘာသာမည၊ အဆက်သၟိၚ်ပိုတ် အိုတ်တၞောဝ်ဝံသ၊ ညံၚ်ဂွံကၠက််အာ ဘာသာပိုဲပၠ၊ ဗမာစိုတ်စၞာဲ ဍေံဗက်ဂၠာဲသၞ၊ ကောန်ၚာ်တြုံရ ပမံၚ်ကွးဘာ။
ဍေံဒဳနၚ်သ္ကဲ ညံၚ်ဂၠဴပ္ဍဲဝါ၊ ဗာ်ထပက်ပန် ပ္ကီုဒဏ်နာနာ၊ ဆီဇွောဝ်ဒှ်ဍာ် ကောန်ၚာ်ကွးဘာ၊ ဗုၚ်လိုက်ကအ်ပိုတ် ချိုတ်တပ်လောတ်လ္ၚာ၊ ပဲါရောဟွံဗၠး ဒးဘဲလွဟ်ဗၟာ၊ ဗာ်ထပက်ပန် ကဵုဒဏ်နာနာ၊ အသံရာဇာ ဗမာအလီ။
ဂစိုတ်ထောံပၠန် သၟတ်မန်မသုန်လ္ၚီ၊ (၅၀၀၀)၊ ဒးဘဲလမျီု ဗီုၜိၚ်မံၚ်ဆီ၊ ဒဒိုက်လက်ဆ ဟွံကကၠံလ္ၚီ၊ ဟိုတ်နူဗမာ ကွးဘာဒှ်လၞီ၊ လိက်နွံဂွံတီ ခပ်သီဒဒှ်။
ဆဏအ်ရောသေၚ် တၟေၚ်တိုန်နူဂှ်၊ ကောန်ၚာ်သၟတ်မန် ဆဒှ်ကောန်တှ်၊ အံၚ်ၚေဝ်နရိုအ် ဂွံဆဗက်ဂြဟ်၊ မုသာ်ရောကၠိုဟ် ဂၠုက်သြိုဟ်ဖဴတှ်၊ ကောန်သၟတ်တြဴလ္ၚီ ဗက်သီကေတ်ပြဟ်၊ ပ္ကောံလဝ်တုဲပၠန် ဟွံတန်ချပ်ဗှ်၊ ဂစိုတ်ထောံသၟဟ် ကဵုလွဟ်ဗၞုဟ်ဇြၚ်။
သုသာန်ကောန်ၚာ် ဆီဒှ်ဍာ်ဝၚ်၊ ဇွမန်ပြးမံၚ် တုပ်ညံၚ်ခွးဂၚ်၊ ဂၠိုၚ်ကဵုလက်ကိုဋ် ချိုတ်မွဲသဘၚ်၊ ဂးအံၚ်ဇေယျ တၠလွဟ်ဗၞုဟ်ဇြၚ်၊ ဓဇန်လောန်ကာဲ ဂၠာဲပကောံနၚ်၊ ဗမာအယုတ် ကုတ်ထောံဂၠိုၚ်ဂၠၚ်၊ ကောန်တှ်ကောန်သၟတ် လောတ်လောချိုတ်လၞၚ်၊ ဆီဒှ်ၜဳဂၚ် ဘိၚ်ဘၚ်လောန်ကၠာ။
ဂကူပိုဲမန် ဂဏန်သၚ်္ချာ၊ အဃောဂှ်ရ ဆမန်ချိုတ်အာ ပ္ဍဲဍုၚ်ဟံသာ ၜါလက်မွဲလ္ၚီ၊ ရာဖာဝၚ်ထၟိက် လိက်နွံဂွံတီ၊ ဆဗၞတ်ဂှ်ဟေၚ် တုဲဟွံသေၚ်ဏီ၊ ဗၟာဗက်ဂစိုတ် လက်ကိုဋ်ကၠံလ္ၚီ၊ အလုံဍုၚ်မွဲ ရိုဟ်တ္ၚဲဗက်လီ၊ အသံအာဏာ စကာဗက်သီ၊ မန်ပိုဲကြအ်ဆီ ဒးဆဵုလၞီဇၞော်။
မညဘာသာ ပ္ဍဲအကြာဂရော်၊ အနုဒိုဟ်သ္တိုတ် ပလိုတ်ဗမံက်၊ ဒိုဟ်ဥတ္တရ ဒက္ခိဏဗော်၊ ပ္ဍဲဒိုဟ််ပန်ဟာ ဒ္စာံဌာန်ညးကော်၊ ဍေံဗက်ဂၠာဲအာ အကြာဂရော်၊ ဒဴလေဝ်ဟွံဗၠး ဒးစိုပ်ဘဲဇၞော်၊ ဆမန်နွံကၠာ ဍေံအာဗက်ကော်၊ ဍေံရပ်နၚ်တုဲ ဟွံရုဲဍောတ်ဇၞော်၊ တြုံဗြဴဝုတ်ဗၠာဲ သီုကၟာဲဍေံကော်၊ ဒိုက်သိုက်ဟွံရော် ဍေံဗက်ကော်ဖ္အိုတ်။
တၟော်မၞိဟ်ရောတီ ကၠံလ္ၚီလက်ကိုဋ်၊ အံၚ်ဇေယျဝွံ သၟိၚ်ဒုစရိုတ်၊ မောဟဒွိဟိုတ် စိုတ်ညံၚ်ဂျိနာ်၊ အိုတ်ဂကူမန် ၝောံမၞိဟ်ကောန်ၚာ်၊ အကြာဍုၚ်ကွာန် ဌာန်ၜဳပ္ဍဲဍာ်၊ ဍေံဗက်သ္ၚဳဂၠာဲ ဇၟာပ်တာဲဇၟာပ်ရာ်၊ ပ္ဍဲသ္ၚိဂြိုပ်ဝါ ဘုတ်ဘာသီကျာ်၊ ဆနွံဗက်ဂၠာဲ ဒၞာဲဂၠိုၚ်ဇဳသာ်၊ ဗမာအရိုၚ် ဒှ်သၟိၚ်ပိုၚ်သၞာ်၊ ဒဳပ္ကောံနၚ်မန် လက်ဒေါန်သ္အဵုသ္အာ်၊ စိုတ်ဍေံမ္ၚိုလ်ကြံၚ် တုပ်ညံၚ်ဂျိနာ်၊ ပါၚ်စက်လတာ် ကွာ်လ္ဇုဲဗာ်ထောံ။
မန်ဖေက်ဍေံစိ စိုတ်ညံၚ်တိက္လောံ၊ ညံၚ်ဂၠဴသ္ကံရ ဖေက်တၠဍေံသွံ၊ ဇၟာပ်ဒိုဟ်ဇဳကၠောံ ဍောတ်ဇၞော်ကြောံဇြာဲ။
ဗဂဳလထဴ နှဴသီုမာဲမာဲ၊ ကောန်ၚာ်ညးခုတ် ဝုတ်ဝုတ်ဗၠာဲဗၠာဲ၊ ကောန်ဍောတ်ဂွံဆဵု လ္ၚဵုမဴတှ်ယာဲ၊ ဗျုဗျုဗျဗျ မိမနော်နာဲ၊ တဲရပ်ဒစုန် ရုန်ရုန်ဂါဲဂါဲ၊ လှုၚ်သဝ်ဂၠိုၚ်စွံ ကြောံကြောံဇြာဲဇြာဲ၊ ဗမာဒဳနၚ် ဒေါသလၚ်ဍာဲ၊ ထေဲပၞောတ်လောန်ကာဲ အသံနာဲစာ။
မုက်မတ်ကှ်ဇြ ဘယလောန်အာ၊ ဖေက်ဟွံဂံၚ်ကျောဝ် လၚ်ဇွောဝ်ပူဆာ၊ ဒးယာံဓဇူ ဗ္ဂူဗြဲမတ်ၜါ၊ ဂၠိုၚ်ဘဲပရိုက် ဂၠိုၚ်ဒဒိုက်သၞာ၊ ဆဵုဒးရေၚ်သ္ကံ ပ္ဍဲဒၞာဲဏအ်ကၠာ၊ ယာံကရေဝ်ကရောတ် ဂစောတ်သိၚ်သာ၊ ဗၟာပကောံနၚ် ရပ်ဇြၚ်တဲၜါ၊ အသံသၟိၚ်ကၠာ ယာံဗက်အာဍေံ။
နရိုအ်မံၚ်သေဲသေဲ ကရေဲညံၚ်ချေံ၊ ဗမာဗစာ ရပ်ဏာတုဲကွေံ၊ ညံၚ်ညးဗက်ချေံ ဍေံဒဳပၠောပ်စာတ်။
ပိုဲမန်တမၠာ ဍုၚ်ဟံသာကၞာတ်၊ ကိုဋ်လက်ကၠံလ္ၚီ ဟွံတီလောဲဝါတ်၊ ပါၚ်ဟီုတဲချဳ ဍေံဒဳပၠောပ်စာတ်၊ ၜုၚ်တက်ဒှ်တမ် အသံလေဝ်သ္ကာတ်၊ အိုတ်မန်ခပ်သီ ဒှ်လၞီဂွံညာတ်၊ မွဲစာတ်ပေၚ်ထာတ် ပ္ဍဲစာတ်က္ဍန်ဂြက်။
ပါၚ်တရၚ်စာတ် ဍေံကၟာတ်ကၠေၚ်ဒက်၊ ကဝဲကသအ်ပၠန် (မန်ကော် − ကောန်ပၞော်) သီုကဵုဂွန်ဒက်၊ ဂကူပိုဲကၠာ ခါညာတ်ဒးဗက်၊ ညးမွဲရောရီု ယီုပၠန်သြိုဟ်ဂြက်၊ ဒှ်လၞီသောက မောဟညံၚ်ယက်၊ နရိုအ်ယာံဒၟံၚ် ညံၚ်ဍုၚ်နရက်၊ ဍိက်ရာဇာဝတ် ကြံကြထတ်မြက်၊ ဍေံမိၚ်စုတ်ဗက် လက်ဗျိပၠုတ်မန်။
ဂကူပိုဲကွေံ မိၚ်ဍေံဗျိဒေါန်၊ သြိုဟ်ညံၚ်ကဵုဖာဲ ယာဲယာံကဵုကောန်၊ ဒဒိုက်ကၠံလ္ၚီ လၞီဂၠိုၚ်လောန်၊ ကြိုၚ်လဝ်ပ္ဍဲစာတ် ကၟာတ်လဝ်ကၟောန်ကၟောန်၊ ဗၟာသတ်အယုတ် စိုတ်အုတ်လက်ဒေါန်၊ ဒေါသဂဵုမံၚ် ညံၚ်ကၠကဟောန်၊ ဂကူပိုဲလေၚ် ပၠေၚ်ထောံရောအောန်၊ ဓရ်လၞီဂၠိုၚ်လောန် ကောန်ကဵုမိမ။
သမ္ဘာယာံအဵု ကဵုတၠသ္ၚိပၠ၊ ဗြဲမတ်ၜါပြိုဟ် ဂတီုဒါတ်သြိုဟ်ရ၊ တြုံတၠသ္ၚိ သာမိဘာဂ၊ ညာတ်မိတ်သမ္ဘာ ဖေက်ဘဲရာဇ၊ ဍာ်ရမတ်ဍုက် မုက်ညံၚ်ပ္ကဴဇြ၊ သောကစံၚ်ပၠေၚ် ပေၚ်ဟဒယ၊ ပ္ဍဲကဵုသ္ၚိစာတ် ပါတ်လုံခန္ဓ၊ လၞီဇၞော်ဂိ စိုတ်ဂျိနာဂ၊ ညးဒှ်ဗဴလ ဇုဇသဳမူ။
ညာတ်စဴကၟိန်ယာံ ယွာံဟွံတီဇၟူ၊ ဍာ်ရမတ်ပြဟ် ထဏှ်ဓဇူ၊ အလုံစာတ်အဵု ဂဵုမံၚ်ဝူဝူ၊ ညံၚ်ဂိတုဘဒ် ကျာထတ်ဗြဲဂူ၊ ဒှ်လၞီဂၠိၚ်သ္ၚောဲ ဟွံမွဲကဵုဇၞူ၊ ဒးယာံဓဇူ ဆာန်ဍူကောန်စဴ။
သဳမူကဵုကၟိန် ယာံထုဲဂၠိန်နှဴ၊ ယာံမံၚ်ပ္ဍဲစာတ် ကအ်အာတ်ပါၚ်ဠဴ၊ ယာံမံၚ်သေဲသေဲ ကရေဲက္ညာၚ်တဴ၊ ဒုၚ်ဂုဏ်ဟွံဂွံ နရိုအ်အာတ်စဴ၊ ဗမာဒိုဟ်ဂွိုက် ဍဵုဍိုက်ဗွဲကြဴ၊ ဒဒိုက်ဗြံၚ်ဗြံၚ် စံၚ်စာတ်ကတဴ၊ ဗြဴမိတၠကောန် မိန်လဝ်ကောန်ဂၞဴ၊ မိန်ဗမဴတှ် ပါၚ်ဂှ်ယာံတဴ၊ ကောန်ဍောတ်ရောတီ အီကဵုမိဂၞဴ၊ မိညာတ်ဒးဗက် ဂြက်တိုန်သြိုဟ်အဴ၊ ကောန်ဍောတ်ဂှ်မိန် ကောန်ဇၞော်ဂၠိန်နှဴ၊ ကောန်ဇၞော်ဂှ်ယာံ မိလေဝ်ယာံတဴ၊ တြုံကဵုသမ္ဘာ ယာမုက်ဗွဲကြဴ၊ ဂၠိုၚ်ကဵုယွာံ ဒေံယာံကဵုကော၊ ကၟိန်ကဵုနော်တြ ဗဴကဵုလထဴ၊ ဒေံယာံကဵုၝဲ စိုတ်ပ္ဍဲသၠာန်က္တဴ၊ ထုဲၜန်ယှုက်မံၚ် ညံက်ဆံက်စန်နှဴ၊ ညံၚ်ၚဴတမ်သၞာံ ယာံမံၚ်သဴသဴ၊ ညံၚ်ဗြုဂဂဵု ဗြုသဓဵုတဴ၊ အနုဒိုဟ်ရော ယာံတဴဖဳဒွါ။
ပိုဲမန်ဗျုဇၞော် လုပ်ဗော်ဇရာ၊ ဂွိၚ်ဖေက်တၠိၚ်ဒိုဟ် ရိုဟ်ရေၚ်နာနာ၊ ဟိုဲလေဝ်ဣတ လေၚ်ရမွဲဝါ၊ ပိုဲဒးကၠက်ဂကူ ဂုဏ်နူဗမာ၊ ပိုဲဒးဒုၚ်ပၠန် ဘဲဒဏ်နာနာ၊ စံၚ်ဂစိုတ်ပြဟ် ခဠာတ်ဒှ်ဝါ၊ ပ္ဍဲကဵုစာတ်ဗၟာ ဘဲရာဇာအနိၚ်။
ပိုဲချိုတ်တူဂြောတ် ပ္ဍဲပၟတ်စာတ်သၟိၚ်၊ ဒးသ္ကန်ကလိ စုတိသီုဂဝိၚ်၊ ရမျာၚ်ထတ်ကၠာ ယာံပြာကဋ်ပၟိၚ်၊ ဗမာပၟၚ်ထံၚ် မၚ်မံၚ်စာတ်သွိၚ်၊ တြုံဗြဴဗျုထဴ ယာံတဴမံၚ်ဗျိၚ်၊ ကၠာဍေံဟွံစံၚ် ပၟၚ်ထံၚ်ဂွံမိၚ်၊ ဗီုယာံမံၚ်ကွေံ ဍေံလဴကဵုသၟိၚ်၊ ဗၟာအံၚ်ဇေယျ တၠနန်ယာန်စိၚ်၊ ဒေါသဇၞော်တိုန် မွဲချိုန်ဂွံမိၚ်၊ ဍေံဟွံချပ်ဗ္စာ ကရုဏာဟွံဂွိၚ်၊ အပိုၚ်အနိၚ် ဍေံဖျေံပၟိၚ်ဟေၚ်။
ဗၟာအံၚ်ဇေယျ ပပိုဲဗီုပြေၚ်၊ ဍေံစတ်ကဵုပသဲ သ္ကဲပိုဲဗွဲလၟေၚ်၊ ဂကူညံၚ်ဂွံယုတ် ဍေံဂၠာဲစုတ်ပၠေၚ်၊ ပၠီုကျာ်သြဳကၠာ ဘာသာမန်ဟေၚ်၊ ပိုဲတၞောဝ်မည ဍေံကော်ဣတလေၚ်၊ ဇၟာပ်ဇၟာပ်စာတ်ဟေၚ် ကွာ်ရေၚ်ဗက်ဗဵု။
တက်တဲဂေတ်ရ ပဝေၚ်စရဵု၊ ဣတလေၚ် ဣတလေၚ် ပိုဲရပၠေၚ်ကဵု၊ ဍေံဖအဴဂေတ်ကွေံ မ္ၚးစာတ်ဂှ်အဵု၊ မန်ဘဝဍိက် ဒှ်ကၠိက်ဒှ်ကၠဵု၊ ကျညးယုတ်မတ် ညံၚ်ပ္ကောတ်ဒးထပဵု၊ ညံၚ်ဂၠုၚ်က္ၜၚ်ဗြမ် ကမ်အကုသိုလ်၊ လၚ်ဇွောဝ်ကၠၚ်ပြဵု ပ္ဍဲကဵုသ္ၚိစာတ်။
ဗၟာသတ်အဟိုတ် စိုတ်ဍေံသကာတ်၊ ဍေံပြိုတ်စုတ်လေဝ် ဂဥုဲသေနာတ်၊ ရဲသၟိၚ်ရာဇာ ဗၟာဗာဇ္ဇခါတ်၊ ဍေံစံၚ်ပၠေၚ်အဵု ကဵုအဂ္ဂိဓာတ်၊ သၞပၟတ်ဂဵုဍာဲ တူဂၠိုက်ဂၠာဲသ္ကာတ်၊ ကၠံလ္ၚီလက်ကိုဋ် ချိုတ်အိုတ်သီုစာတ်၊ ဗဂေါလ္ၚုလ္ၚန် ပိုဲမန်ဂွံညာတ်၊ လုံဍုၚ်ကွာန်ရး ဒးဖေက်သမ္ၚာတ်၊ ချိုတ်ဂုဏ်ပယျဲ ပ္ဍဲစိုတ်ဒှ်ဝါတ်၊ သီုဂကူလေၚ် ဂြောတ်မံၚ်ပေၚ်စာတ်၊ ဖျုန်ဇုတ်စၞာံဂှ် ဒှ်အာပ္တေၚ်ဓာတ်၊ ပိုဲမန်ဒးညာတ် သမ္ၚာတ်စိုတ်ကွေံဏး။
ပ္ဍဲဍုၚ်ဗဂေါ အဃောဂှ်သၟး၊ ဒစိတ်စာတ်သွံ စံၚ်ထောံကၠးကၠး၊ ဍေံစံၚ်ပၠေၚ်မန် အောန်စိုတ်ကွေံဏး၊ ဗြဲမတ်စရိုဟ် တသိုဟ်တဟး၊ ဆဝွံရောသေၚ် ပထေၚ်မၞိဟ်သၟး၊ ဗၟာစိုတ်ဟွံပြေ အံၚ်ဇေယျဏး၊ ပါဲနူမၞိဟ်ဟေၚ် တၟေၚ်နူဂှ်မ္ဂး ကပေါတ်မန်ကွေံ ဍေံဗက်ဂၠာဲသၟာန်။
ပ္ဍဲအကြာၜဳကြုၚ် အလုံဍုၚ်ကွာန်၊ ကၠအ်သွဝ်တိဗ္ၚ ဇွောံမပိုန်ဟာန်၊ ဘုတ်ဘာဒေါဝ်ဍုၚ် ဇြပ်သီုရုၚ်ဒါန်၊ သီဥပုသ်ကၠာ ရုၚ်ဖျာသ္ၚိဌာန်၊ သ္ၚိသွာၚ်ဒိုဟ်ပန် ဒဒန်ဂၠံၚ်ဍာန်၊ ဆကပေါတ်မန် ကၠောန်လဝ်မဒါန်၊ ဂိုဟ်မံၚ်ဟာနာဲ ဍေံဟွံဂၠာဲသၟာန်၊ ဗမာတအ်သွံ စံၚ်ထောံကြာန်ကြာန်၊ နန်ထဝ်သ္ၚိကၠတ် ဒြပ်ရတ်ပိုန်ဟာန်၊ ဂၠိုၚ်လောန်သတိုတ် ရိုဟ်အိုတ်ရောမာန်၊ တမ်ဂြန်ကိုန်ဆန် အၚ်ယန်ကွေံကြာန်၊ ဗေဒၚ်ပန်ဗော် ဗိုတ်ဇၞော်ပကာန်၊ ဓရ်ပိဋကတ် လိက်ဇၟာပ်ဌာန်၊ သိဒ္ဓိဗလ သဗ္ဗထုဲကြာန်၊ ဗၟာအယုတ်တအ် တၟံဍုၚ်တၟံကွာန်၊ စံၚ်ထောံသီုဘာ ဝါဒဒပ်ပၞာန်၊ ဂြန်ဂဥုဲဒဗျ ရောဂနိဒါန်၊ စံၚ်လိက်စံၚ်ကျာ် လီုလာ်ထုဲထၞာန်၊ ဂၠာဲဂွံဗက်စံၚ် ကမၠက်ဂၠံၚ်ဍာန်၊ ဍဵုဍိုက်ပိုဲမန် ဂၠိုၚ်လောန်ကွေံကြာန်၊ ယွံဗော်အဟော ကလောမန်ဆာန်၊ ဒဒှ်ဟိုတ်ဖဵု သမ္တီကဵုမာန်၊ ဗကတ်လဝ်ညိ ပ္ဍဲကဵုဝိညာဏ်၊ ဂိုတ်လွဳညိမန် ညံၚ်ဂွံနန်ယာန်၊ ဒဵုစိုပ်နိဗ္ဗာန် ဆာန်ဂကူအိုတ်ညိ။
ဍေံစံၚ်ဂျိုၚ်ဂျိုၚ် ပ္ဍဲက္တိုၚ်အဂ္ဂိ၊ ပိုဲဂကူမန် ညံၚ်ကောန်မွဲမိ၊ ဍေံပၠေၚ်ဂကူ တူအိုတ်ဇဳဝိ၊ ညံၚ်ဒးစိန်ဂၠက် နရက်ကုမ္ဘိ၊ စိုတ်ပဟဲပြဟ် လွဟ်လံက်လဝ်ဂျိ၊ သွက်ဒှ်ရာဇာ ရာဒနာညိ၊ ဇၞးရောၚ်စိုတ်ဟဲ ဇဲယသိဒ္ဓိ၊ ဒးချပ်ဒၟံၚ်လၟိုန် စိုတ်ကဵုဗိုန်ဂၠိ၊ ဗီုဗၟာဓဇန် ပၠန်တဲဂိဂိ၊ ဍေံပျဲလဝ်စိ ပဝိုတ်ညိမန်။
ရာဇာမူလ ဝံသတၠအစောန်၊ တၞောဝ်ဨကရာဇ် သီုအမာတ်ဝေါန်၊ ဗိန္ဒောဟောရာ ပညာဇၞော်လောန်၊ သကိုပ်ပၞာန်ရ ညးတၠအစောန်၊ ဒဴထောံနူနန် ယောန်လုပ်ဒျူဒျာ။
ဂိုၚ်သမ္တီရ ပဝိုတ်ပြောဲဇွာ၊ ဒဒိုက်မန်ဂှ် ဒှ်နူဗမာ၊ ပၠောတ်စာတ်တုဲစံၚ် ခဠာတ်ညံၚ်ဝါ၊ ပန်ဗာ်ဂစိုတ် လေၚ်အိုတ်နာနာ၊ ဂကူအယုတ် စံၚ်ဘုတ်စံၚ်ဘာ၊ ဒဒိုက်ပိုဲဂှ် ဒှ်ကၠုၚ်နူဗၟာ၊ ချူစွံလိက်ပြဲ ပ္ဍဲသၠရိုတ်တာ၊ ဒု−သု− မၚ်္ဂလ ပ္ဍဲဘဒ္ဒကၠာ၊ ဂိုၚ်သမ္တီလဝ် ဓရ်သတိပမှာ၊ ဂကူမည ဂတဏအ်ကၠာ၊ ယွံဗၠာဲမန်တအ် တၟံညးအဲမာ၊ မန်ကတဵုတၟိကၠာ ပဝိုတ်မှာတဴ။
နူဂှ်သေၚ်ဟာ အခါဗွဲကြဴ၊ ဆမန်သှ်ေကွေံ ပြးဇးဂြိပ်ဒဴ၊ ပ္ဍဲဂြိုပ်ဇၞော်ဟေၚ် ဇရေၚ်ၜဳကြုၚ်အဴ၊ ကၠောန်ဂွံသြောံဇွောံ ကအ်ဂွံဒုၚ်တဴ၊ သိုၚ်သ္ၚိတက်တာဲ ဗြဴကၟာဲလထဴ၊ မံၚ်လအ်ညိပၠန် ဗၟာဗက်လန်နှဴ၊ ပ္ဍဲသက္ကရာဇ် လောကဓာတ်ရော၊ လ္ၚီကၠံပိစှော် ပန်ဂှ်ပံၚ်နှဴ၊ (၁၁၃၄) ၊ ဗမာဂွံလဝ် နန်ထဝ်ဍိုၚ်ပ္ကဴ၊ ရးမန်ပိအဴ ကတဴက္တာန်ရောၚ်။
သမ္တီပယောၚ် သောၚ်သောၚ်ပံက်ပါၚ်၊ ဂကူမန်ရ ညံၚ်ကပ္ဍဲကၠာၚ်၊ ကတဴက္တာန်အဵု ကဵုမံၚ်ရမျာၚ်၊ ဗညာစိၚ်ကၠာ အာထောံဍုၚ်ဂြာၚ်၊ က္ဍိုပ်သကိုပ်မန် နန်ထဝ်က္ဍိုၚ်ဗ္တာၚ်၊ ဒးထောံကၠေံဂအာၚ် အောပ်ညံၚ်စာၚ်ဂြိုပ်။
ပိုဲမန်သေၚ်ဟာ ဗြဲမတ်ၜါရိုပ်၊ ပ္ဍဲတွဵုမုဟ်ရး ဒးပဂဒိုပ်၊ သက္ကရာဇ်ဍုၚ် ရိုဟ်အာကၠုၚ်စိုပ်၊ မွဲလ္ၚီကၠံကိုပ် စိုပ်မသုန်ဣသုန်၊ (၁၁၅၅)။
ဆမန်သှ်ေအဴ မံၚ်ရောစိန်ဝုန်၊ ဒဴလုပ်ဒျူဒျာ ထောံဂြိုပ်ဝါတုန်၊ မွဲလ္ၚီကၠံအဴ တြဴစှော်ဟီုပ္ဍုန်၊ (၁၁၆၀) ဆမန်သှ်ေမံၚ် ညံၚ်ကဵုစၟဂြုန်၊ လုပ်ဒျူဒျာတုန် လ္ၚုသုန်ဒေၚ်ၚုၚ်။
သမ္တီလဝ်ရ စိုတ်လ္ပဇြုၚ်၊ ဖေက်အံၚ်ဇေယျ ညးတၠပိုၚ်ဍုၚ်၊ လ္ၚဵုဂှ်ကွာ်တိုက် ဍိုက်က္ၜၚ်ဍိုက်ဂၠုၚ်၊ မန်ပိုဲဒဴဗၟာ ဂြိုပ်ဝါတိသၠုၚ်၊ နွံမွဲဂလာန် ညာဏ်ပသရုၚ်၊ စိုပ်သက္ကရာဇ် ပိုၚ်ကၞာတ်လဝ်ပ္ညုၚ်၊ လ္ၚီကၠံဟီုတွံ ထပှ်စှော်စုတ်ကၠုၚ်၊ (၁၁၇၀) ၊ ရးမန်ပိကၠာ ဟံသာလဂုၚ်၊ ဗၟာစိုတ်အဂွိုက် ဂးၝကျိုက်ဠုၚ်၊ ဍေံဍိုက်ကအ်စိၚ် ပသၟိၚ်ပိုၚ်ဍုၚ်၊ ဍဵုဍိုက်မန်ပ္ညုၚ် ဒုၚ်ဒဝ်ရောမာန်။
ဟွံမွဲဂဗုတ် ဂၠာဲစုတ်ဂလာန်၊ သ္ၚိလံက်ထပဵု ကဵုဒဏ်စုတ်ဒါဏ်၊ ပ္ဍဲဍုၚ်ပ္ဍဲရး မ္ဒးကတဴက္တာန်၊ ဗၟာစိုတ်အဂွိုက် ကျိုက်ဠုၚ်ပမာန်၊ ဗက်ကၠောန်ဗၠေတ်ဗၠေတ် ကေတ်ဇၞးကေတ်မာန်၊ မန်ပိုဲၚုၚ်ၚ ဘဝကျပၞာန်၊ တုပ်ညံၚ်ပၟတ်ဖဴ ကတဴကတာန်၊ အရေဝ်ဂလာန် သ္ၚိဌာန်ဂမြိၚ်။
ဆမန်သှ်ေမံၚ် ညံၚ်ဂွံယုတ်သွိၚ်၊ ဖေၚ်ပူက္ဍိုပ်ကၠာ ပြာကဋ်ဂွံမိၚ်၊ အသံရာဇာ ဗမာဒှ်သၟိၚ်၊ ပ္တုပ်ကဵုဂၞိန်ကွေံ ဍေံကဵုကော်ထၟိၚ်၊ မန်ပိုဲဂွံယုတ် ဍေံဂၠာဲစုတ်ပၟိၚ်၊ ဒေါသလဟုက် မုက်ဍေံညံၚ်ဂြိၚ်၊ ဍေံဖျေံအမိၚ် ဂွံမိၚ်ကေတ်ကီု။
ယဝ်ညာတ်မၞိဟ်ကော် ဍောတ်ဇၞော်ပဟီု၊ ယဝ်မိၚ်ဒးမ္ဂး ထဗးထၞိက်ပ္ကီု၊ တပ်ဒဏ်ကဵုဘဲ ဂြဲကၠေၚ်တက်တ္ၚီု၊ စန်ဇိုၚ်ကၠေၚ်တဲ စဲပ္ဍဲတ္ၚဲကီု၊ ဆဂှ်ဟွံသေၚ် တၟေၚ်ဂၠိုၚ်ကဵုဗီု၊ ဂလာန်က္ၜဴပါၚ် လာၚ်မုက်ခွါကီု၊ အသံသၟိၚ်ဗၟာ ရာဇာသမၠီု၊ ဗီုမန်ဂွံယုတ် ဍေံဂၠာဲစုတ်ဟီု၊ ညံၚ်ဂွံဟိဏ္ဏ မညအိုဿီု၊ ဍေံရောၚ်ပလီု ကဵုပိုဲဟီုစုတ်။
ကောန်ၚာ်တြုံဗြဴ အနုဘဴမခုတ်၊ ဂကူမန်ဂှ် ဒှ်မၞိဟ်ဂွံယုတ်၊ ဝေါဟာဥပါဲ ကဵုကၞာဲဒးစုတ်၊ ဗဂေတ်ထောံပၠန် ပိလ္တုန်ဟွံသ္ကုတ်၊ ဂကူမန်ကၠာ ပညာဂွံယုတ်၊ မိကောန်ၚာ်ကွေံ ဇံၚ်နးညးစုတ်၊ သၠးသန္ဓိကောန် မန်ပိုဲဂွံယုတ်၊ ညံၚ်ကွိုန်ဂွံလဟုတ် ဇံၚ်နးစုတ်ညိ။
ဍေံကဵုတက်မံၚ် လ္တူဇံၚ်အဂ္ဂိ၊ ဂလာန်ဂှ်ကၠာ ခါဟွံစၟတ်ညိ၊ ဗမာသ္ပဝဲ ဍေံပျဲဓဇောတ်ဂိ၊ ကောန်ၚာ်တှ်ကွေံ ဍေံကၟာတ်မတ်စိ၊ ဟွံကဵုမဴတှ် ပါၚ်ကှ်ဖိဖိ၊ အိုတ်ဇိုၚ်တဲမာ ကၠာဟွံချိုတ်ညိ၊ ယာံဍေံဒးဘဲ ဒှ်ယဲဗျာဓိ၊ ကောန်ဂၞဴဂှ်စိ မိဂွံဆဵုကၠာ။
ကောန်ၚာ်သၟတ်ပြဲ လောန်မွဲအခါ၊ ပိုဲဂကူမန် ယဝ်ကၠောန်ဇာတာ၊ ညံၚ်ကၠိုက်လ္ၚေၚ်ရ ဟိဏ္ဏယုတ်မာ၊ နဒုန်ကၞုၚ်ကၟေၚ် အေၚ်အှ်လောန်အာ၊ ကဵုဂကူမန် ကၠောန်ပဇာတာ၊ အသံရာဇာ ဗမာဗစာ၊ ပြဝေဏဳတၞံ ဝါဒတမၠာ၊ သၠရိုတ်သၠတာ ကၠောန်ဇာတာရ။
ဗမာတအ်အဵု ယဝ်ဍေံဆဵုပၠ၊ ကဟုက်ကဟောန် ကောန်သီုယာဲဣတ၊ စန်ဇိုၚ်တဲပ္ညဳ ဖုံပၠဳမိဠှ၊ ကော်အသုဘဟေၚ် အုဲအေၚ်ပသ၊ ပၠေဲစဲတ္ၚဲကၠာ အကြာဂြိုပ်ဝါဗ္ၚ၊ ကၠာဟွံချိုတ်ညိ သှ်ေဇဳဝိတ၊ တုဲဍေံဗလးဖျဴ ကြဴတပ်ဒဏ်ရ၊ ဗမာစိုတ်သၠုၚ် ကၠုၚ်ပိုၚ်ပိုဲပၠ၊ ဍေံဓဇန်လောန် ပျဲပိုဲမည၊ ညံၚ်လကိုဟ်ပရမ် ကုမ္ဘဏ်ယက္ခ၊ ဗၟာသတ်အဟိုတ် စိုတ်နာ်စိုတ်ကၠ၊ ဂၠိုၚ်ကဵုပယျဲ ပျဲပိုဲမန်ရ၊ ဂကူပိုဲမန်အဴ ဗွဲကြဴဂတ၊ လၟုဟ်ပစ္စက္ခာ သွက်ရာမည၊ မိၚ်လိက်ဝွံပၠန် ပ္တန်လဝ်စိတ္တ၊ ပၠံၚ်ဍုၚ်ဗက်အာဲ လှာဲကဵုဇဳဝ၊ ဒၞာဲချပ်ဒၞာဲဂွ ပဝိုတ်ဒညဟေၚ်။
ဒးစှ်ေနူနန် ကောန်ဗြဴယိုက်လေၚ်၊ မိုၚ်သဝ်နာမ ဗမာယခေၚ်၊ ဒဏ်ရာဇာဝတ် ဇြဟတ်စိၚ်ဟေၚ်၊ ကြောံကၠေၚ်ကျေဝ်ဂေါဝ် ဗဵုလ္ၚောဝ်ဍိုက်ပေၚ်၊ ပ္ဍဲရးမည ပသၟိၚ်ဍေံပၠေၚ်၊ ဍဵုဍိုက်ပိုဲမန် ဓဇန်လောန်စိုပ်လေၚ်၊ ပွိုၚ်မွဲသၞာံကၠာ အခါလဵုဟွံဝေၚ်၊ ဍေံပၠေၚ်ပိုဲဟေၚ် ဟွံသေၚ်ပျဲပျာံ။
ပ္ဍဲသက္ကရာဇ် ဂွံညာတ်ဍာံဍာံ၊ သပ်ၜါအေက်ၜါ ဟွံမှာဒှ်သၞာံ၊ (၁၁၇၇)၊ ကၠံလ္ၚီလက်ကိုဋ် အိုတ်မန်မွဲဂွါံ၊ ဘဲသၟိၚ်ရာဇာ ဖေက်ဗမာဒါံ၊ ဂွိၚ်ဂွိၚ်ယံၚ်ယံၚ် ညံၚ်ကၞိဒးတာံ၊ ပါဲတဲဗမာ လုပ်ဒျူဒျာသ္ဍာံ၊ သမ္တီပဝိုတ် ဟိုတ်ဍေံပျဲပျာံ၊ ဖေက်ဗၟာအိုတ်ရ က−လုပ်ပါၚ်ကျာံ၊ တုပ်ညံၚ်သာ်ဂှ် သၟဟ်ကဵုပယာံ၊ ဗွဲကြဴတုန်သ္အး အတးလောန်ၜက်သၞာံ၊ လ္ၚီကၠံဟီုတွံ ထပှ်စှော်ဒ္စာံ၊ (၁၁၇၈) သၟိၚ်ဒါဝေါန်သ္ဍာံ နာံနာမအဴ။
သီုဗိုလ်ပၞာန်ရ ထအုဒှ်တဴ၊ ဇက်လုပ်ဒျူဒျာ အဝိဇ္ဇာပၠော၊ ယိုက်လဝ်ဇၞောဝ်မာန် ဝေၚ်ပၞာန်ဒှ်ဆဴ၊ ဍေံဗက်လုပ်ပၠန် လီၜန်ဗက်နှဴ၊ ပန်ဗာ်ဗက်ဗ္တိုက် လိုက်ဍုၚ်သေံအဴ၊ ပ္ဍဲသက္ကရာဇ် လောကဓာတ်ရော၊ လ္ၚီကၠံဂှ်တုန် ထပှ်ဣသုန်နှဴ၊ (၁၁၇၅)၊ ရးမန်ပိအဴ က္တဴက္တာန်ရိၚ်က္တၚ်။
ဥတုပိကီု ကသီုကညၚ်၊ သြောံသ္ၚုသၞေဝ်သွ ဖျုန်ကၚုဟ်က္ဍၚ်၊ က္ဍၚ်ဇဳဒှ်ကၞောဝ် ကၠောဝ်ဗျဵုတဟၚ်၊ ဝတ်ဓမ္မတာ သံသာဍာ်ဂၚ်၊ ဖျာတိုက်ကွဳပ္ညုၚ် ဖျာဂၠုၚ်ဖျာက္ၜၚ်၊ ၚုဟ်မးအနဳ အိုတ်ဇၟာပ်ဇဳက္ဍၚ်၊ ဒှ်ဂ္ညိဂ္ညန်အဵု အလဵုဍေံကၠောန်နၚ်၊ ပ္တိုန်ၚုဟ်မးက္ဍၚ် ကၠောန်နၚ်ဒကေဝ်နှိမ်။
ကၠောန်သၠဒကေဝ် အလေဝ်ဍေံဟွံတီ၊ လောဘလောန်ကာဲ ဆာဲညာဏ်အလီ၊ ပၠောပ်သၠဒကေဝ် ကေဝ်တုဲဍေံသီ၊ ဟီုလဝ်အရေဝ် ၚုဟ်အလေဝ်နှီ၊ လျိုၚ်ညဳသတိုတ် တုပ်စိုတ်ဂြိုၚ်အီ၊ ပြဝသာ်ဂှ် ဟွံဒှ်ဗၞိက်အလီ၊ ပ္ဍဲကဵုရးမန် ကမၠောန်ကၠံလ္ၚီ၊ ကေဝ်ကေတ်ကဵုနှိမ် ဂွံတီတၟော်ရော်။
ပ္ဍဲသက္ကရာဇ် သဟာတ်စိုတ်ဇၞော်၊ ထအုကမြဴ စိုတ်ကတဴသၞော်၊ ဗမာအရိုၚ် ဒှ်သၟိၚ်ပိုၚ်ဗော်၊ စိုတ်ဍေံမ္ၚိုဟ်ကြံၚ် ညံၚ်ဘုတ်ကလော်၊ ဗမာနာံဗ္ဂဲ ပျဲမန်ဂၠာဲကော်၊ ဂွံတုဲဒဳဏာ အကြာဂရော်၊ နာံကၞိဂှ်မန် ဆီနန်တော်တော်၊ ဗဂဲရပ်ကိတ် သ္ၚာဲၚိတ်ကြော်ကြော်၊ မန်ကဵုဗၟာရ သၞကဝ်ညးကော်၊ ယဝ်ရဒးတၟော် တော်ညိတီတဴ။
ကၞိကဵုဗဂဲ ဒှ်ဝဲထုဲနှဴ၊ စိုပ်ကၠုၚ်ပၠန်သွံ ဟွံလအ်ဗွဲကြဴ၊ လ္ၚီကဵုကၠံဂှ် ထပှ်စှော်တြဴ၊ (၁၁၇၆) ၊ သၟိၚ်ပိုဲမန်တုန် သပုန်သှ်က္တဴ၊ ကလိုက်ကတဵု ကဵုစိုတ်ဗက်ထဴ၊ မံၚ်စံၚ်ဟွံမာန် ဟိုတ်ဍုၚ်ကွာန်က္တဴ၊ ထအုကမြဴ စိုတ်ကတဴသၞော်။
နူတြိကုမ္ဘုၚ် လဂုၚ်ဍုၚ်ဇၞော်၊ ထောံကၠေံကျာ်လေဝ် စေတဳဓာတ်သော်၊ ပ္ၚောံလုပ်ဍုၚ်သေံ တိတြေံဒှ်ဆော်၊ ဒဴလုပ်ဗြိုဟ်ဗြိုဟ် ပုဗ္ဗဒိုဟ်ဗၟံက်၊ ဍာ်ရမတ်တော်တော် မန်ဗော်စံၚ်တူ။
ဒှ်ဍိက်ညးကီု လေၚ်သီုဂကူ၊ ပိုဲမန်ကွေံကြာန် ညံၚ်ပၞာန်အသူ၊ ဒးဒုၚ်ဍဵုဍိုက် စိုတ်ဂၠိုက်ကတဴ၊ ဗမာတအ်ပၠန် ပ္တန်ၚုဟ်မးအဲ၊ မၞိက်ရတ်ဂကူ ဝိပူရဿာ။
ဇာတိကုလ မညၜိုပ်ကၠာ၊ မဒးထောံလဝ် နန်ထဝ်ဟံသာ၊ ဍုၚ်ဗဂေါလီု စွံဗီုပမာ၊ လ္ၚုလ္ၚန်တဴဒၟံၚ် ညံၚ်ဂြိုပ်အၚ်လှာ၊ ဗမာစံၚ်ပၠေၚ် ဒှ်ပ္တေၚ်သေၚ်ဟာ၊ ဘာတူကျာ်ပိုတ် မန်ချိုတ်သိၚ်သာ၊ သှ်ေပတေၚ်ချး သၟးသုသာန်ကၠာ၊ ထောံဍုၚ်ထောံနန် မန်တအ်ဒဴအာ၊ ချပ်စိုပ်သိၚ်သာ အခါယောၚ်ယာ။
မန်ပိုဲဒးချိုတ် ဟိုတ်နူဗမာ၊ မဒးထောံလဝ် နန်ထဝ်ဗၠဲဂွါ၊ လီုဒၟံၚ်အပၠိတ် ပေၚ်ဒစိတ်ဝါ၊ ဒၞာဲသန္ထာန်တြေံ ဍုၚ်သေံဒျူဒျာ၊ အာပနိဿဲ ပရဲပြောဲဇွာ၊ မန်ဒးယာဲဓဇူ ဟိုတ်နူဗမာ၊ ဗွဲအဝိဇ္ဇာ ဂလာဗက်အာဲ။
ဟိုတ်ဂွံတိုပ်လဝ် ထးထဝ်ဂဵုဍာဲ၊ ဣတ္ထဳရာဇာ သ္ဂောံမြာဒှ်နာဲ၊ ဍုၚ်မန်ဗမာ ဗၠဲဂွါရာၚ်ဆာဲ၊ ဂလာပသၟိၚ် သိုက်သၠိၚ်ပ္ဍဲအာဲ၊ ပိုၚ်ရးနိဂီု ဇူဒီုဒှ်နာဲ၊ ဟံသာသဓီု မတ်မလီုဆာဲ၊ ဍုၚ်မတ္တမ ဒေသဇၟာပ်ဒၞာဲ၊ (ဍုၚ်မုဟ်တၟံ တေံဏံဇၟာပ်ဒၞာဲ)၊ ဒယှ်လောန်ကာဲ နာဲညးပိုၚ်တဴ။
ပတမ်နူဂ်ှ ဍုၚ်မြဟ်ကွေံအဴ၊ လအ်လလောန်သန် ဒတန်ဗွဲကြဴ၊ ဂလာမုက်ဗု ညံၚ်ကၞုဗျုထဴ၊ လ္ၚီကၠံတုဲသ္ဍာံ ဒစာံစှော်တြဴ၊ သက္ကရာဇ်ဍုၚ် ကၠုၚ်ခုတ်လဝ်အဴ၊ ဒဒှ်ခပ်သီ တီတုဲအီစဴ၊ စိုပ်ဍုၚ်တေံအဴ မံၚ်တဴဒၞာဲဂှ်။
ပ္ဍဲသက္ကရာဇ် ဟီုကၞာတ်ဒဒှ်၊ မွဲလ္ၚီကၠံသ္ဍာံ ဒ္စာံအဋ္ဌသၟဟ်၊ (၁၁၈၈)၊ ပ္တန်မတ်မလီုရ ဒေသဒဒှ်၊ လ္ၚီၜါကၠံပၠန် ပန်စှော်ထပှ်၊ သၟိၚ်အၚ်ဝပ္ညဳ ဒဳဗဝ်ဒယှ်၊ ဍေံရပ်ဏာသ္ဍာံ ပ္ဍဲကဵုသၞာံဂှ်၊ လ္ၚီပိကၠံပိ ယုတ္တိဒဒှ်၊ ကြုက်ဂျပါန်ဂှ် ဒှ်သၟိၚ်ပိသၞာံ။
ဍုၚ်ပိုဲမန်ဝွံ လ္ၚုလုံဒိုဟ်ဒ္စာံ၊ ညးတၞဟ်ပိုၚ်အဵု ဒဵုကဵုလၟုဟ်သ္ဍာံ၊ ဗမာဒှ်ဇၞော် ပိုၚ်ဗော်သံက်စၞာံ၊ မန်ပိုဲဒးကျ ကလုပ်ပါၚ်ကျာံ၊ ဘဝဍိက်ပၠက် ၜုၚ်တက်ပျဲပျာံ၊ သမ္တီလဝ်ရ သ္ပလဝ်ပတ္တာံ၊ ဗမာအရိုၚ် ပိုၚ်မန်ဍာံဍာံ၊ ဘဝဍိက်ဂၠုဲ ထုဲလအ်ပယာံ၊ ဂကူပိုဲမန် လအ်လောန်ကဵုသၞာံ၊ လ္ၚုလ္ၚန်သုန်ဂြာံ ဟွံတီအိုတ်ဟာ။
ယွံလေဝ်မန်တအ် လ္ပသပအ်သာ၊ ဍုၚ်ကွာန်ပိုဲဂှ် ညးတၞဟ်ဂွံဏာ၊ ဗၟာတအ်ပိုၚ်မန် လအ်လောန်အခါ၊ ပိုဲဒးဒုၚ်ပျဲ ဘယ်ညးတၞဟ်ကၠာ၊ ဂၠိုၚ်ဂိတုသၞာံ ပယာံအခါ၊ လၟုဟ်ဂွံတီရ စိုတ်ပသ္ပံသာ၊ ညံၚ်ဂွံတိတ်ဗၠး နူဍိက်ညးကၠာ၊ ညံၚ်ဂွံဒှ်နာဲ ဂၠာဲဂစာန်အာ၊ ညးကီုအဲကီု ပြီုလွဳပရာ၊ ဆီတၠဆီနာဲ ဝုတ်ဗၠာဲကညာ၊ သမ္တီပမှာ ချပ်ဗစာညိ၊ ရာဇာဝၚ်အာဒိ ကေတ်ကၠာညိအဴ။ ။
− ပ္ဍဲသက္ကရာဇ် သာသနာ ၂၅၃၁ − သၞာံ၊ သက္ကရာဇ်ဍုၚ် ၁၃၄၉ သၞာံ၊ ဂိတုဇှ်ေ (၂) မံက်၊ တ္ၚဲစန်ဂှ် ကလေၚ်ချူလဟဵုလဝ်တၟိရောၚ်။
အ္စာကဝိ ဗညာဗၠာဲ ကွာန်ကၟာဝက် ၊ ရးဇြာ
သွက်ဂွံလ္ၚတ် စၟတ်သမ္တီခိုဟ်
၁။ ဗမာအံၚ်ဇေယျဂှ် ကဵုစိၚ် လိုန်ဂစိုတ်ထောံ ခၟဳသၚ်ပိုဲမန် ပ္ဍဲဍုၚ်ဗဂေါ ပိလ္ၚီ (၃၀၀၀) ဇကု။
၂။ ဂစိုတ်ထောံ သၟတ်ဗြဴမန် မၞုံကဵုဂဝ်ဂၞဴဂှ် ထပှ်လ္ၚီ (၇၀၀၀) ။
၃။ ဂစိုတ်ထောံ ကွးဘာသၟတ်မန် ကောန်ၚာ်ဗြဴဂှ် မသုန်လ္ၚီ (၅၀၀၀)။
၄။ ဂစိုတ်ထောံကောန်ၚာ် ကောန်တှ်သၟးဂှ် တြဴလ္ၚီ (၆၀၀၀)။
၅။ ဂစိုတ်ထောံဂကူမန် ပ္ဍဲဍုၚ်ဗဂေါအပံၚ် လၟိဟ်ၜါလက်ကဵုမွဲလ္ၚီ (၂၁၀၀၀)။
၆။ ကၠောန်စာတ်ဇၞော် ဒစိတ်စာတ် ဒဳပၠောပ်ဏာတုဲ စံၚ်ဂစိုတ်ထောံမန် လၟိဟ်ဂၞန်သၚ်္ချာ မဟာလက်ကိုဋ် မဒှ်ရောၚ်။
၇။ ပ္ဍဲသၞာံ ၁၁၁၇ ဂှ် ဗၟာအံၚ်ဇေယျ သီဂွံဍုၚ်လ္ဂုၚ်တုဲ ဂစိုတ်ထောံ ခမဳသၚ်ပိုဲမန် (စံၚ်ဂစိုတ်) ထောံလၟိဟ် ပိလ္ၚီ (၃၀၀၀) ဇကု၊ ဒၞာဲဂှ် ဒှ်အာတကအ်တုဲ "တကအ်သ္ၚာ" မန်ပိုဲ ကော်ခဴစရောၚ်။
ဂလာန်ဗကန်
ယွံကလောမန် ဆီနန်စိုတ်နာဲ၊ အဲဗကန်လဝ် ဒဵုကဝ်တူပြာဲ၊ သမ္တီပဝိုတ် ပၠောပ်စိုတ်ညိနာဲ၊ ဗၟာအံၚ်ဇေယျ ယက္ခမတ်ဍာဲ၊ ယုတ်လတူယုတ် ညံၚ်ဘုတ်သရာဲ၊ လကိုဟ်ကုမ္ဘဏ် ကၠဗြန်တာဲဗြာဲ၊ ညာတ်မန်ဗက်ၚိတ် ဗက်ကိတ်ဗက်သ္ၚာဲ၊ အံၚ်ဇေယျပၠန် ဓဇန်လောန်ကာဲ၊ စံၚ်ဂစိုတ်မန် ပိုၚ်နန်လက်ယာဲ၊ လက်ကိုဋ်သၚ်ဃဲ ပ္ဍဲစာတ်ဂဵုဍာဲ၊ ဂစိုတ်လဝ်မန် ဂဏန်ပဂၠာဲ၊ ဍေံဓဇန်လောန် ကောန်ဍုၚ်ဗြဴကၟာဲ၊ ဍုၚ်ဗဂေါလီု ဗီုကဝ်တူလာဲ၊ သမ္တီညိနာဲ ဂၠာဲရံၚ်ပ္ဍဲဝၚ်။
အံၚ်ဇေယျကွေံ တုပ်ချေံဂွံဂြၚ်၊ မေတ္တာလေဝ်ကှ် ဓရ်စှ်ဟွံမၚ်၊ ဒှ်သၟိၚ်အယုတ် ကုတ်ပန်ဒၚ်ဒၚ်၊ ဗက်ဂေတ်ပၠဒပ် ရပ်လွဟ်ဗၞုဟ်ဇြၚ်၊ ပန်ဗာ်ထပက် ကမၠက်မန်ဒဳနၚ်၊ ပၠောပ်စာတ်စံၚ်ဗဵု ပၟတ်ဂဵုဍာဲဂြၚ်၊ သီုၜုၚ်သီုတက် ထပက်ကဵုဗၞုဟ်ဇြၚ်၊ ခၟဳသၚ်ခရှ် ဆီဒှ်ဍာ်ဝၚ်၊ ဟဳဟဳဇွောဝ်ဇွောဝ် ညံၚ်ဇၟောဝ်ဍာ်ဂၚ်၊ ၜိၚ်ဆီဍာ်ဝၚ် ဂၚ်္ဂါဆီမန်။
ယွံကလောတအ် ဒွံဘဲဆိုက်ညန်၊ ဂၠိုၚ်ကဵုပရိုက် ဒဒိုက်ပိုဲမန်၊ ဗၟာအံၚ်ဇေယျ တၠတိပိုၚ်နန်၊ နူဍုၚ်ဗြဴကၟာဲ ဂၠာဲသၞကဵုမန်၊ စိုပ်ဗဂေါကၠာ ဟံသာလ္ၚလ္ၚန်၊ ပျဲပျာံဍဵုဍိုက် ဗတိုက်ဍုၚ်မန်၊ ဇၞးတုဲအီဂြိုၚ် ပိုၚ်တိပိုၚ်နန်၊ ဗမာအယုတ် ကုတ်ဗာ်လဝ်မန်၊ ရိုဟ်ဒးညိဟာ သၚ်္ချာဂဏန်၊ ဂစိုတ်လဝ်မန် ဆိုက်ညန်သၚ်ဃဲ။
ဂကူမန်ကွေံ ဍေံၜုၚ်တက်ပျဲ၊ ကောန်တှ်ကောန်ၚာ် ဗက်ထ္ပက်ဖဲဖဲ၊ ဗြဴမန်သန္ဓိ မိတၠအဝဲ၊ ဂဝ်ဂၞဴဂွံပြဵု ကဵုစိၚ်လိုန်သ္ကဲ၊ စိၚ်လိုန်ဂစိုတ် ချိုတ်မတ်လၜဲ၊ ပြံၚ်ဘဝဟေၚ် ဟွံသေၚ်ဂုဏ်ယဲ၊ ဗၟာအံၚ်ဇေယျ ညးတၠကွတ်တဲ၊ ပိုၚ်ဍုၚ်ဟံသာ မေတ္တာလေဝ်ဟဲ၊ ဂစိုတ်လဝ်မန် ဂၞန်အသၚ်ဃဲ၊ စာတ်ဇၞော်ဒစိတ် တိတ်ရိုဟ်သကဲ၊ စံၚ်ဂစိုတ်သွံ နရိုအ်ကအ်လှဲ၊ ရမျာၚ်ဟောကၠံၚ် ညံၚ်ဂဂဵုဗြဲ၊ ဖေက်ဂၟံက်လောန်တဲ ဘယ်ဗၟာအယုတ်။
ယွံဂကူမန် ဍုန်နန်လဟုတ်၊ ဗမာစံၚ်ပၠေၚ် လေၚ်ဘာလေၚ်ဘုတ်၊ လေၚ်သ္ၚိလေၚ်ကွာန် လေၚ်ဌာန်ညးခုတ်၊ လေၚ်သၟိၚ်ဍုၚ်နန် ဂကူမန်သ္ကုတ်၊ ရပ်ဇြၚ်ရပ်သၞာ် ဗာ်ဗာ်ကုတ်ကုတ်၊ ပန်ပန်စံၚ်စံၚ် ယက်ညံၚ်ထအုတ်၊ ဗၟာအံၚ်ဇေယျ ပသၟိၚ်အယုတ်၊ သမ္တီညိနာဲ ဗၠာဲဗၠာဲဝုတ်ဝုတ်၊ မန်ပိုဲခေတ်လၟုဟ် မ္ၚုဟ်စိုတ်ကြံၚ်ဂြုတ်၊ ချပ်ညိရိုဟ်ဝါ ဗမာအယုတ်၊ ဒးကလေၚ်တဲ ကဵုဘဲပဆုတ်၊ ဒးပန်ဗာ်ကုတ် ချိုတ်ထုတ်ဖေက်ဟာ။ ။
နမော တဿ ဘဂဝတော အရဟတော သမ္မာသမ္ဗုဒ္ဓဿ။
လ္ၚောဝ်ရတ်ပိ ကေုာံ ရာဒနာမိက်
ဗုဒ္ဓဓမ္မ သံဃဂုဏံ၊ မိကဵုမၜါ အာစရိယံ၊ ဂုဏ်အနန္တ အသၚ်္ချေယျံ၊ ပိုၚ်ခြာရောမာန် ညာဏ်အတုလံ၊ ဗှ်ဗၞုဟ်တုဲလေဝ် ၀န္ဒေဝန္ဒံ၊ အဲလ္ၚောဝ်ရှ်ေသှ်ေ ဖျေံက္ဍိုပ်သဳသံ၊ ဟီုဂးစပၠန် ပဉ္စဂုဏံ၊ ဂုဏ်ကျာ်မွဲဂှ် တဝှ်ဗုဒ္ဓံ၊ ဒစိတ်ဒးရး ဂးအရဟံ၊ ဘဂဝါကၞောတ် ဖဍောတ်ချပ်ရံၚ်၊ ဂုဏ်ဓရ်နွံတြဴ အဟောသုခံ၊ ဒှ်တသိုခ်လောန် ညန်နိဗ္ဗာနံ၊ မဂ်ဖိုလ်ထပ်စုတ် လောကုတ္တရံ၊ ဂုဏ်သၚ်ဒစိတ် လ္အိတ်အနန္တံ၊ လတူက္ဍိုပ်ပြဲ အဝယ်အဂ္ဂံ၊ အဲယဵုစွံလဝ် ဗၠးဓရ်ဒုက္ခံ၊ လၟိုန်တ္ၚဲနိစ္စံ အဟံဝန္ဒာ။
ယိုက်ဂုဏ်မသုန် လတုန်ဂၠိုၚ်ဝါ၊ ဂွံပၟဝ်ပၠန်ဂှ် ဒှ်ဘာဝနာ၊ ဟိုတ်နူကုသိုလ် ကဵုဂွံလာဘ်မြာ၊ ဒုဟ်ပ္ဍဲခန္ဓ သဗ္ဗရောဂါ၊ မ္ၚးအန္တရာယ် ဟာဲသတ်ယုတ်မာ၊ သတြုသၞဝဲ ယဲဝေဒနာ၊ ကဵုဂွံလာဲလေၚ် ပၠေၚ်ထောံရိုဟ်ဝါ၊ မုက်မတ်ယးတၟး ပျးညံၚ်စန္ဒာ၊ အတိုၚ်ကသပ် ချပ်မနောဒွါ၊ ကဵုဍိုက်ပေၚ်စိ ညိပယောၚ်ယာ၊ ရိုဟ်ဒဒှ်တ္ၚဲ အဲရာဒနာ၊ ဂကူဟွံဖက် ကၟာဝက်ရးဇြာ၊ အဲခမဳမည် ဆီနန်ရာဇာ၊ ဃောနွံပ္ဍဲဘာ ဗၟာတအ်စံၚ်ကွာန်။
ယွံကလောတအ် တၟံမိတ်ဇြဟာန်၊ လိက်ဝွံအဲဆန် ဗကန်ဂလာန်၊ ဗၟာဂစိုတ်မန် လ္ၚုလ္ၚန်သီုကွာန်၊ နရိုအ်ယာံမံၚ် ပလံၚ်သုသာန်၊ သမ္တီဒဵုဗျု ဣဝွံနိဒါန်၊ လၚ်္ကာလိက်ဗွဟ် ဗှ်နကဵုညာဏ်၊ နွံဂုဏ်ဂၠိုၚ်ဂး ရးမန်ပိဌာန်၊ ဂွံတီညးအဲ မွဲရောဒးသၟာန်၊ လောန်ကၠုၚ်လအ်လ ဂဗထုဲကြာန်၊ လ္ၚီပိကၠံဂှ် ထပှ်ရေၚ်ကာန်၊ (၁၃၀၇)၊ ဗတိုက်စဵုဒၞာ ဗမာဂျပါန်၊ မိက်ဂွံအံၚ်ဇၞး ဒးဝေၚ်ပေါဲပၞာန်၊ ယခေၚ် ကရေၚ် ကချေၚ်မွဲဟာန်၊ မန်ပိုဲမွဲဂှ် လုပ်ဒှ်ကောန်ပၞာန်၊ ပိလ္ၚီပေၚ်ကၠုၚ် ဒုၚ်ပန်ဒုၚ်ဂါန်၊ နူတိဟွံစွံ ဗက်ထောံဂျပါန်၊ ဂကူအရိုၚ် ပိုၚ်ဍုၚ်ပိုၚ်ကွာန်၊ ဒှ်ကပ်ဘဲကၞောဝ် ကၠောဝ်ဗျဵုသွံရာန်၊ ညံၚ်တိရစ္ဆာန် ဂျပါန်အယုတ်။
ဍုၚ်ကွာန်ရုသံၚ် ပၠံၚ်ၜးဒှ်လုတ်၊ ဒဒိုက်ရုန်မဵု ဂွံဆဵုညာတ်စုတ်၊ ညံၚ်ဒးလဴဂျိ ဂိစိုပ်ၜဝ်ဇုတ်၊ ကမၠတ်ဒမၠ မတာအယုတ်၊ ပေၚ်ဍုၚ်ပေၚ်ကွာန် ဂၠံၚ်ဍာန်ခဗုတ်၊ ကွာ်ကွာ်ဂေတ်ဂေတ် ကွေတ်ညးအယုတ်၊ ဗျုဗျုမာဲမာဲ ဗၠာဲဗၠာဲဝုတ်ဝုတ်၊ ဗတိုက်ကေတ်ဒြပ် ပပ်ပဳလက်စုတ်၊ ပ္ဍဲခေတ်ဂျပါန် ဒါန်ညးသကုတ်၊ အောန်အောန်ဒးကဵု ကုသိုလ်လဟုတ်၊ စသုၚ်လေဝ်ဂြက် ညးလက်ညးပျုတ်၊ နူဂှ်လောန်အာ သာ်လွာပြိုတ်ဘုတ်၊ ဝးကအ်သုၚ်ဆီ ဒှ်လၞီညးခုတ်၊ ဗမာအယုတ် ကွိုက်စုတ်ပိုဲမန်။
သက္ကရာဇ်ဍုၚ် ကၠုၚ်စိုပ်ဆိုက်ညန်၊ လ္ၚီပိကၠံထပှ် ပိုဲလေဝ်သၟဟ်သၟန်၊ ဗက်ဂၠာဲကသပ် ဗက်ချပ်မွဲဂၞန်၊ ဒဴဘဝဍိက် မိက်ဂွံဍုၚ်မန်၊ တြံၚ်လဝ်စိုတ်ဓာတ် ညာတ်တိုန်ဆီနန်၊ ပံက်ဂကောံဗက် ဒယှ်ေဒွက်မန်၊ ညးအဲဂွံမိၚ် သိၚ်သာလ္ၚုလ္ၚန်၊ ဝုတ်ဝုတ်ဗၠာဲဗၠာဲ စိုတ်နာဲဆီနန်၊ ပေၚ်ကၟိုဟ်ဍာဲဇေတ် ကေတ်ဏောၚ်ဍုၚ်မန်၊ ဍိုက်ပေၚ်ကသပ်ချပ်ခိုဟ်မွဲဂၞန်၊ ဝုတ်ဗၠာဲကညာ ညဳသာသၟဟ်သၟန်၊ နူဍိက်ဗမာ ဝါဝွံဆိုက်ညန်၊ ဂွံဗၠးချပ်ဂၞန် မန်တအ်ညဳသာ။
ယွံကလောတအ် တၟံညးအဲကၠာ၊ သမ္တီလဝ်ညိ ဝါဒိတမၠာ၊ ပံက်ဂကောံမွဲ ဗွဲယၟုဝေါဟာ၊ ဗော်မန်ဂးပ္ညုၚ် ကောန်ဍုၚ်အရၚ်ကၠာ၊ ဂးနာဲဖဝ်ချဵု နွံကဵုပညာ၊ ဒှ်ဥက္ကဌ ညးပအာစာ၊ ပံက်ပ္ဍဲလဂုၚ် ဒုၚ်သဇိုၚ်ကၠာ၊ သွက်ပိုဲဂွဴကၠောန် ကမၠောန်ကေၚ်ကာ၊ လ္ၚီပိကၠံထပှ် သၞာံဂှ်သေၚ်ဟာ၊ (၁၃၀၇) ၊ ဂကောံဒှ်ကၠုၚ် ဂွံကၠုၚ်လောဲသွာ၊ သွက်ဂွံစၚ်ခြၚ် သၚ်တအ်လေဝ်ပါ၊ ကျာ်ဇၞော်မွဲရ ကုသလကၠာ၊ ဘာယျေတာယှေ ဒေသခန်လွာ၊ ဒှ်နွံပိုန်ပၠန် သွက်မန်သေၚ်ဟာ၊ ပံက်ဂကောံပြဲ ပ္ဍဲဘာဂှ်ကၠာ၊ နူဍုၚ်စိုပ်ကွာန် ဌာန်ရးခန်လွာ၊ ဗော်မန်ပေၚ်ကိုပ် သၟိၚ်ၜိုပ်ဟံသာ၊ ပဲါပုၚ်ပါဲပုၚ် ဂံါကၠုၚ်ကွာ်အာ၊ တဆံၚ်ဇိုၚ်တဲ ရဲဝုတ်ကညာ၊ ဇြဟတ်လောန်ကာဲ သၟတ်ဗၠာဲလေဝ်ပါ၊ ကရေဲကညာၚ် ရမျာၚ်ဝါစာ၊ ဍုၚ်ပိုဲကဵုပိုဲ ဟိုဲဗၟာမိစ္ဆာ၊ ကဵုဟွံကဵုဟာ တဲၜါပစဝ်။
နွံကဵုစရာဲ ဝုတ်ဗၠာဲၜိုပ်ထဝ်၊ ရမျာၚ်ကရီု ကြီုဒဵုတမ္ညဝ်၊ ဂကူမန်ဟေံ ကၠေံမံက်ဂတဝ်၊ ဗရုဂမြိၚ် မိၚ်ဒးအမ်သဝ်၊ သၟတ်ဝုတ်ဗၠာဲမန် ဆီနန်နွံဗဝ်၊ ညာတ်ရာဇာဝၚ် ရပ်ဇြၚ်ချူလဝ်၊ ဗတိုက်ကေတ်ဍုၚ် ဒုၚ်ပြိုၚ်ပတဝ်၊ ဟွံဖေက်ဗမာ ကြဵုဇာတမ္ညဝ်၊ ခေတ်သၟတ်ညးကော် ဗော်မန်ၜိုပ်ထဝ်၊ ဇၟာပ်ကွာန်ပေၚ်သူ လတူကဵုသၟဝ်၊ စန်ဒက်ညဳသာ တဲၜါပစဝ်၊ ကလိုက်ကၟဵုပြဟ် ဒှ်မွဲဂးလဝ်၊ မန်ပိုဲကေတ်ဍုၚ် ပကၠုၚ်ဆေဝ်ဒဝ်၊ ဝုတ်ဗၠာဲၜိုပ်ထဝ် ချူလဝ်ဗၞုဟ်ဇြၚ်။
အလုံမန်တအ် တၟံညးရီုဗၚ်၊ ဍောတ်ဇၞော်ဟွံရုဲ ဒုဲကၟာဲဟွံမၚ်၊ ယဝ်သၞကၠုၚ်စိုပ် ကုတ်က္ဍိုပ်ကဵုဇြၚ်၊ ခေတ်သၟတ်ကတဵု ဖဵုဍုၚ်အရၚ်၊ ကွာန်မန်ထအု နရုဆီလၚ်၊ စိုတ်ဨကရာဇ် ညာတ်ရာဇာဝၚ်၊ ဇၟာပ်ဂကူမန် ဆီနန်ဍာဲဂြၚ်၊ ညးညးအဲအဲ မွဲဟွံဘိၚ်ဘၚ်၊ စန်ဒက်ပကောံ အစောံဂမြၚ်၊ ညာဏ်အာဂတ ပၠတရဴလုပ်ဝၚ်၊ ဒှ်ဇြဟတ်ဇၞော် ဗော်မန်အရၚ်၊ ကၠိုဟ်ယးကၠိုဟ်တ္ၚဲ မၚ်မွဲရီုဗၚ်၊ ညးဂံၚ်အဲဂံၚ် တုပ်ညံၚ်စိၚ်ဂြၚ်၊ ရပ်ဗၞုဟ်ရပ်ဇြၚ် မၚ်သၞသတြု။
ဒှ်ဂုဏ်ညာတ်ကြက် အကွက်ဇကု၊ ဂၠိုၚ်တ္ၚဲဂိတု ပြုပြေၚ်စဳဇန်၊ မွဲသၞာံလောန်အာ ၜါသၞာံစိုပ်ပၠန်၊ လုံရးဍုၚ်ကွာန် ထုဲကြာန်လီၜန်၊ ဃောချဳဂရာၚ် ရမျာၚ်မှာဇန်၊ ကွာန်လ္ၚဵုလီုလာ် ညးဗာ်အဲပန်၊ ကောန်ပၞာန်ဗမာ ဝါဂြိုပ်ဂေတ်လန်၊ တုပ်သတ်အဟိုတ် စိုတ်ဍေံဓဇန်၊ လကိုဟ်ယက္ခ ညံၚ်ကၠညံၚ်ဗြန်၊ အခေါၚ်မန်အဵု စဵုဒၞာဂၠိုၚ်သန်၊ ဂကူအလီ ဆီဍေံကၠိခန်၊ မန်တအ်ဟွံဒိုအ် ညံၚ်ဂွံဒးဖန်၊ ကၠောန်အကြာသၞ ပဒုဟ်ကဵုဒဏ်၊ ၜုၚ်တက်ကၠေၚ်ဒက် ဍေံလက်ဗကန်၊ ဟာဲမန်တမြအ် ၝတအ်ကၠောန်ပၠန်၊ ၝောံမၞိဟ်ကောန်ၚာ် ပိုဲဗာ်ပိုဲပန်၊ သမ္တီလဝ်ပၠန် တန်ပ္ဍဲဒဒိုက်။
ယွံကလောပိုဲ ဟိုဲညးဍုၚ်လိုက်၊ ပျဲပျာံနာနာ ဗၟာအဒိုဟ်ဂွိုက်၊ ဂွံတီလဴထ္ၜး ကၠးတုဲဂွံကွိုက်၊ လ္ၚီပိကၠံဒ္စာံ သၞာံဂှ်ထေက်ကြိုက်၊ (၁၃၀၈) ၊ မြေက္ကသဵုလ္အိတ် ဒ္စိတ်မံက်ဟီုယိုက်၊ ကွာန်ပ္ၚဂးပြဲ ပ္ဍဲဘာပလိုက်၊ ကျာ်ဇၞော်အာစာ မှာထေရ်ညးသ္ဍိုက်၊ သဳလတေဇ နာမညးဖျိုက်၊ သဘၚ်သဳကၠဳ ခၟဳသၚ်ပေၚ်တိုက်၊ မွဲလက်ပြၚ်ဒှ် ခရှ်ညန်ဆိုက်၊ ကောံကၠုၚ်ကလၚ် ပၚ်မှိၚ်သိုက်သိုက်၊ ကၠောန်သဳကၠဳဇၞော် ဗော်မန်ဂွိုအ်ဗၠိုက်၊ အာစာတၠဂှ် ဒှ်က္ဍိုပ်ယိုက်ဒိုက်၊ ကောန်ဍုၚ်ရးကွာန် ညးဆာန်အဲသ္ဍိုက်၊ အာစာဖဝ်ချိုဝ် ကွဵုဍုၚ်တှ်ေကွိုက်၊ ဍုၚ်မန်ပိုဲကေတ် ပိုတ်ထေတ်ဟီုစိုက်၊ ဒဵုညးဇၞော်ပၠန် မှာဇန်တအ်ဖျိုက်၊ ဥက္ကဌဗော် ညးကော်ထေက်ကြိုက်၊ နာဲအံၚ်ထောန်ကီု ဟီုတီအခိုက်၊ တြုံတြုံဗြဴဗြဴ သၞဴရဴကွာ်တိုက်၊ ကၠုၚ်သဘၚ်ပြဲ ပ္ဍဲဘာပလိုက်၊ ဗျုရပ်ဒစုန် ကုန်ကုန်ကိုက်ကိုက်၊ မိပ်စိုတ်ဂၠိုၚ်နဲ ညးလောဲညးဒိုက်၊ ဍုၚ်မန်ဒးကဵု ဟွံကွဵုတှ်ေကွိုက်၊ ပ္ဍဲဘာပလိုက် ဂရိုက်ဂရာၚ်။
ဍုၚ်မန်ဍုၚ်အဲ ညးမွဲမွဲပါၚ်၊ နော်နာဲလဇု ဗရုကညာၚ်၊ ဍုၚ်မန်ဍုၚ်ပိုဲ ဟိုဲဟေရမျာၚ်၊ ကၟာတ်ရောဟွံမာန် ဂစာန်ပံက်ပါၚ်၊ နွံမံၚ်ပြာကဋ် လိက်ပတ်ယေန်သၞာၚ်၊ မၚ်မွဲဂကူ လ္တူတိကဴရာၚ်၊ ယးတၟးဂဵုမံၚ် ညံၚ်ရဴပၟတ်ပၞာၚ်၊ ဗၟာတအ်ဟွံညာတ် မာတ်မတ်မာတ်ပါၚ်၊ ဂၠာဲဒုဟ်ပလုတ် ကုတ်တမ်ဝးကၞာၚ်၊ အခေါၚ်မန်အဵု စဵုဒၞာဲလဝ်ကၟာၚ်၊ ညိရောကွဵုကၠောန် အောန်ဂၠိုၚ်ဝိုၚ်ကၠာၚ်၊ ပလီုအိုတ်အး ထ္ၜးဒုဟ်ပံက်ပါၚ်၊ မန်ပိုဲဂံၚ်ဂံၚ် စိုတ်ညံၚ်ပသဲက္ဍာၚ်၊ ကရေဲကညာၚ် ရမျာၚ်ညးတအ်။
ကွာန်မန်ကွာန်ပ္ၚ ပညံၚ်တိုၚ်တၟံ၊ ညးကောံကၠာအိုတ် ဖျေံစိုတ်ဗိုန်ဇၟံ၊ ကၠောန်ကမၠောန်ဍုၚ် ဒုၚ်ဘဲဒုၚ်ဒွံ၊ သမ္တီလဝ်ကီု ဟီုပ္ဍဲလိက်ဏအ်၊ ဆီနာဲဆီမန် ဗော်မန်မွဲသ္ကအ်၊ အာတ်ဍုၚ်ရောကွဵု ဒေကၠဵုတမြအ်၊ လုံရးခရိုၚ် ပွိုၚ်ဗမာတအ်၊ ဍေံပဒုဟ်ဇၞော် ပ္ဍဲဗော်မန်ဏအ်၊ ဗက်ရပ်ဍဵုဍိုက် ပြိုက်ထံၚ်ဗိုန်ဇၟံ၊ သ္ၚိစာတ်ခရိုၚ် ကြိုၚ်လဝ်မန်တအ်၊ ပျဲပျာံရုန်မဵု အဵုကၠဵုတြမအ်၊ ဗမာဒှ်ဇၞော် ပိုၚ်ဗော်သကအ်၊ အခေါၚ်မန်အဵု စဵုဒၞာဟွံပၠအ်၊ ပါဲနူရပ်ပြိုက် ဂၠိုက်ဂၠာဲတေံဏအ်၊ က္ဍိုပ်သကိုပ်မန် ချပ်ဂၞန်ရေၚ်သ္ကအ်၊ ဆာန်ယာဲဣတ ယဝ်ရသာသ္ပအ်၊ ဟွံဒဴဒးချိုတ် အိုတ်သီုသကအ်၊ ဍေံသီကေတ်ဟေၚ် ပြေၚ်ဂၠဴတိကၠအ်၊ ချပ်တိုန်သာ်ဏအ် တၟံမန်ဂမၠိုၚ်။
ယွံကလောပိုဲ ဟိုဲဗော်နာံမြိုၚ်၊ သမ္တီကဵုဗတ် ထကတ်ခိုၚ်ခိုၚ်၊ ဗၟာမံၚ်လတူ ဂကူအရိုၚ်၊ ဍဵုဍိုက်ပျဲမန် ဆီနန်ကွဵုဂၠိုၚ်၊ သ္ပလဝ်ဍိက်ပၠက် ပိုဲကၠက်ဂျိုၚ်ဂျိုၚ်၊ အခေါၚ်ဟွံမွဲ ညးအဲရပ်ကြိုၚ်၊ အကြာဒဒိုက် ယိုက်မုက်ယာဇိုၚ်၊ ၜိုန်ကၠောန်ပ္ဍဲသၞောဝ် လဆောဝ်ကၠုၚ်ဗိုၚ်၊ ဗမာယုတ်ပပ် ရပ်ပိုဲသီဂိုၚ်၊ တွဵုရးဍုၚ်ဏအ် တၟံညးအိုတ်ဇိုၚ်၊ ကၠာဟွံသၠးပွ: လဴထ္ၜးဂၠိုၚ်ဂၠိုၚ်၊ လ္ၚီပိကၠံဒ္စိတ် နိမိတ်ဒှ်တိုၚ်၊ (၁၃၀၉) ရးဇြာကၟာဝက် ကြက်မန်ခိုၚ်ခိုၚ်၊ ဘဒ်ပိမံက်ကၠာ ဗြဲကျာလုပ်ပြိုၚ်၊ သဘၚ်သဳကၠဳ ခမဳဒှ်တိုၚ်၊ ပရိသာတ်ဇၞော် ဗော်မန်နာံမြိုၚ်၊ ညးကၠောန်ဗဒှ် ခရှ်လေဝ်ဂၠိုၚ်၊ မၞိဟ်ပန်လက်ပြၚ် ကလၚ်ဟွံကွိုၚ်၊ အာတ်ဍုၚ်အီဂြိုၚ် ယာဇိုၚ်ကဵုတဲ။
သဘၚ်သဳကၠဳ ခၟဳသၚ်ပရဲ၊ နူဍုၚ်လဂုၚ် စှ်ေကၠုၚ်နိဿဲ၊ ညးအာဂတ ပၠတရဴဖဲဖဲ၊ အာစာဖဝ်ချိုဝ် နွံကဵုဓတ်ဇဲ၊ ဒှ်ဥက္ကဌ ညးသ္ပဗလဲ၊ နာဲထဝ်အးကီု သီုနာဲမှူပြဲ၊ အာစာဖဝ်စိၚ် မိၚ်ဟာဒေံၝဲ၊ ညးတအ်ဒှ်က္ဍိုပ် သကိုပ်ဇာသဲ၊ သဳကၠဳဇၞော်ဝွံ ဗျုဗျဂၠိုၚ်ရဲ၊ ကၠုၚ်ကဵုဇြဟတ် စိုတ်ထတ်ဂၠံပ္ဍဲ၊ တြုံတြုံဗြဴဗြဴ မွဲဂၞဴဒေံၝဲ၊ အာတ်ဍုၚ်မန်ဏး ထ္ၜးကေမ်သတ်တဲ၊ ရးဇြာကၟာဝက် တက်ကၞာဗၠးဗြဲ၊ သဳကၠဳထတ်စောံ ကောံဓရီုပြဲ၊ မန်ကေတ်ဍုၚ်မန် ညန်ကဵုဆဵုဘဲ၊ လအ်ညိဗၟာပျဲ ရဲမန်စိုပ်ကပ်။
ၜိုန်ကၠောန်ပ္ဍဲသၞောဝ် လဆောဝ်ဍေံရပ်၊ ဂကူဗာလ ဝါဒယုတ်ပပ်၊ ဗမာအရိုၚ် ဂၠိုၚ်ကဵုဗော်ဒပ်၊ ပကောံလဝ်ပၞာန် ဂွံမာန်ဂၠာဲချပ်၊ ဃောကလိုက်ကၟဵု ဖဵုဍုၚ်ညန်ကြပ်၊ လ္ၚီပိကၠံဒ္စိတ် နိမိတ်ဆက်စပ်၊ ဂိတုပုဟ််ခိုဟ် ၜိုဟ်ဂံက်ဒဇပ်၊ ဍေံသ္ပဆဆဵု ဍဵုဍိုက်ယုတ်ပပ်၊ ဗော်မန်တအ်ကၠာ လအာဇပ်ဍပ်၊ ဖေက်ဍေံတအ်ရပ် ကသပ်ခိုဟ်စိုန်သ္ကီု၊ ဆာန်ဂကူလောန် ကၠောန်လေဝ်ဒးဗီု၊ မၚ်မွဲလမျီု ဇူဒီုဂြိုပ်ဂၞိၚ်။
ယွံကလောတအ် တၟံညးပၚ်မှိၚ်၊ လ္ၚီပိကၠံဒ္စိတ် ချပ်ဃိတ်ဂၠိၚ်ဂၠိၚ်၊ နာဲဘလောန်ဂှ် ဒှ်ဇၞော်ဂွံမိၚ်၊ ပ္ဍဲဍုၚ်မတ်မလီု ဒးဗီုရောၚ်ဆိၚ်၊ ဇြပ်ကျာ်အသုက် ညာတ်မုက်ရေၚ်ဗျိၚ်၊ သဘၚ်သဳကၠဳ ခၟဳခရှ်အိၚ်၊ ကောံတုဲအာတ်ဍုၚ် ဟီုကၠုၚ်ဂွံမိၚ်၊ ညးဇၞော်မန်ဂှ် ဒှ်တိုန်ဂဝိၚ်၊ လၟုဟ်နွံသကဲ ပ္ဍဲဌာန်ဂြိုပ်ဂၞိၚ်၊ ကၠောန်ကမၠောန်ဆက် သွက်ဂကူဗျိၚ်၊ ဃောကွာန်ရုသံၚ် မၞိဟ်မံၚ်ရောညိၚ်၊ ချဳဂရာၚ်လောန် ကၠောန်ပၠန်ဒးဂွိၚ်၊ လ္ၚီပိကၠံစှ် သၟဟ်ကဵုအခိၚ်၊ ပထမဒ္ဂိုန် ဗြဲဗိုန်ကြဳသိၚ်၊ ၜါမံက်ဟီုဂိုတ် ဟွံဝိုတ်ဟွံတၠိၚ်၊ နာဲဖဝ်ချိုဝ်ကီု သီုနာဲဖဝ်စိၚ်၊ နာဲအံၚ်ထောန်ကၠာ သာလှာဂွံမိၚ်၊ ညးပန်မွဲစွံ ကၠောံဍုၚ်သေံဗျိၚ်၊ အာဒက်မိတ်ပြဲ ရဲမန်ဂိုတ်ဂွိၚ်၊ ဍုၚ်သေံက္ၜၚ်ကံက် လံက်ဗၟံက်ပၚ်မှိၚ်၊ ဒုၚ်ဒဒိုက်ဆက် ၜက်ဝါဂြိုပ်ဂၞိၚ်၊ ကေတ်အရီုဗၚ် ဂွံနၚ်ပိုဲမိၚ်၊ ကၠောန်သွက်ဂကူ စံၚ်တူဒးဂွိၚ်၊ တိက်ရောဟွံသၠိၚ် အသိၚ်ဇြဟာန်။
ညးဇၞော်မန်ပန် စွံပၠန်ဂလာန်၊ ကလောန်တုဲဒှ် ပြဟ်ဂိုတ်ဂစာန်၊ ဟွံလအ်ဗွဲကြဴ စဴကၠုၚ်စိုပ်ကွာန်၊ လုံရးဍုၚ်ဏအ် ဒွံဘဲထုဲကြာန်၊ ဗၟာထံၚ်ပရိုၚ် ဂိုၚ်လဝ်ဂလာန်၊ ဗက်ဂၠာဲမန်တအ် တၟံရးဍုၚ်ကွာန်၊ မိၚ်ပဂဗုတ် စုတ်ဒုဟ်ကြာန်ကြာန်၊ အဝဵုဗၠေတ်ဗၠေတ် ကေတ်ဇၞးကေတ်မာန်၊ ဂစိုတ်မန်ကၠာ စကာဒပ်ပၞာန်၊ ဗမာပပ်ပဳ ကၠဵုကဳပေၚ်ဍာန်၊ က္ဍိုပ်သကိုပ်မန် ဆီနန်ခက်ဗာန်၊ ဒဴရောၚ်ဗၠးချိုတ် ဟိုတ်ဂှ်ပသၟာန်၊ အံၚ်ထောန်ဖဝ်စိၚ် ဂြိုပ်ဂၞိၚ်ပဝ်ယာန်၊ ဒဴတိတ်နူကွာန် ဟိုတ်ဆာန်ဂကူ။
မံၚ်ပ္ဍဲဂြိုပ်ဂၞိၚ် လဟိၚ်ပေၚ်သူ၊ ဂွံဇြဟတ်ဂး ဗၠးဓရ်စံၚ်တူ၊ ဒးပံက်ဂကောံ အစောံဂကူ၊ ဗော်ပၠတရဴ ကော်ခဴဂွံသၟူ၊ ဍုၚ်မန်ထဝ်စုတ် ခုတ်ယၟုလတူ၊ ညံၚ်တြၚ်ဗိုန်သွံ ကၠောန်စွံလေံသၞူ၊ ဒှ်တိုန်ဒပ်ပၞာန် ဂွံမာန်လတူ၊ မန်တအ်ရပ်လွဟ် ဂွံရှ်တီသၟူ၊ ဗၟာဗက်ဂၠာဲသၟာန် စံၚ်ကွာန်သ္ၚိတူ၊ မန်သှ်ေဂြိပ်ဒဴ ရဴဂစေံပူ၊ ကရေဲကညာၚ် ရမျာၚ်ဂကူ၊ သၟိၚ်ဗၠာဲၜိုပ်ထဝ် ပဝ်ယာန်ပွဳပွူ၊ ဂြိုပ်ဂၞိၚ်တူရူ ပေၚ်သူထအု။
အလဵုသဳဗၟာ ရိုဟ်ဝါမတ်ဂၠု၊ ဂလိုၚ်ဒေါသ မောဟဒမၠု၊ အဝိဇ္ဇာပျဲ ဆီပ္ဍဲနရု၊ စကာဒပ်ပၞာန် စံၚ်ကွာန်ယက်ဂၠု၊ သ္ၚိမန်တူအိုတ် စိုတ်လီုစိုတ်လ္ၚု၊ ညာတ်ဒှ်ဗဟေက် ဖေက်ဗၟာဟွံဗြု၊ ၜိုန်အောပ်ဗလေတ်၊ ဟွံဗၠေတ်တီယၟု၊ ညာတ်တုဲဍေံကော် နော်နာဲဗျုဗျု၊ ဘပဠကီု သီုၜုၚ်ဂဒု၊ ဆဵုမန်ပၠိုၚ်ပၠိုၚ် ဗိုၚ်ပန်ဗရု၊ လ္ၚဵုချိုတ်ခရံၚ် တုပ်ညံၚ်တၞံဆု၊ တြုံတြုံဗြဴဗြဴ ဂြိပ်ဒဴထအု၊ အဵုမိသော်က္ဍိုပ် စိုပ်ဂြိုပ်ဌာန်လ္ၚု၊ ဟွံသေၚ်အရဳ ခမဳဘိက္ခု၊ ဂြိပ်ဒဴသီုကွး ဗၠးၜးမစ္စု၊ မန်ဒှ်ဒဒိုက် ဗၟာကွိုက်ဟီုဗြု၊ ကရေဝ်ကရောတ် ဗြဲမတ်ဂူဂၠု၊ နရိုအ်သိၚ်သာ ယာံအာဂြုဂြု၊ ဗၟာတအ်စံၚ်ကွာန် သ္ၚိဌာန်ပိုဲလ္ၚု၊ သှ်ေဆပ္တေၚ်ဗု ယက်ဂၠုတူဂြောတ်။
ယွံကလောတအ် တၟံညးဇၞော်ဍောတ်၊ အဲလဴကလၚ် ပၚ်မှိၚ်စဳပေါတ်၊ လ္ၚီပိကၠံစှ် သၞာံဂှ်ဒးပၟတ်၊ ဖဝ်ရဂိုန်စိ ပိမံက်ဒှ်ဗၞတ်၊ ဗၟာတအ်စံၚ်ကွာန် သ္ၚိဌာန်တူဂြောတ်၊ ကၟာဝက်ကၠာတဲ ဒးဘဲတူပၟတ်၊ သ္ၚိမွဲလ္ၚီပြၚ် တၟးဖၠၚ်တူဂြောတ်၊ ပ္ဍဲဘာပၠန်သွံ ကၠုၚ်စွံကပေါတ်၊ ဂွံဗၠးစံၚ်ပၠေၚ် ဖေက်လေၚ်စိုပ်ကၞောတ်၊ လ္ၚဵုယာံဂတေဝ် ကရေဝ်ကရောတ်၊ ကွာန်တူၚုၚ်ၚ ဟောံဇြမွဲသၞောတ်၊ ဗၟာတအ်ရပ်ပျဲ ဖေက်ဘဲထအောတ်၊ ညာတ်ဒးသိၚ်သာ ချပ်အာစိုတ်ဍောတ်၊ ဗမာသမၠီု အိုတ်သီုသ္ၚိသၟတ်၊ ဗက်စံၚ်ဗက်ပန် ဓဇန်စိုပ်ကၞောတ်၊ ကၟာဝက်တူဂြောတ် ၚုၚ်ဇြောတ်ဗန်က္ၜံၚ်။
ကွာန်လဵုသၟတ်နွံ အလုံဗက်စံၚ်၊ ဗၟာဂၠာဲဂဗုတ် ယုတ်လောန်ချပ်ရံၚ်၊ ကၠံသတ်ဘာဒဵု ဃဵုအာဗက်စံၚ်၊ ဍေံထေၚ်သာ်ဏအ် သၟတ်တအ်နွံမံၚ်၊ ဘာကျာ်ဇၞော်ဂှ် စိုပ်ပြဟ်တဲဂံၚ်၊ ဂွံလေၚ်ဒးသ္ပ ဆနွံဗက်စံၚ်၊ လိက်ပိဋကတ် ပေၚ်ဍတ်နွံမံၚ်၊ ကျာ်ထွာဲဇၞော်ဍောတ် ကပေါတ်သံၚ်ဗြံၚ်၊ ဂွံအိုတ်ဂွံလေၚ် ဍေံပၠေၚ်ဍေံစံၚ်၊ ဗမာယုတ်ပပ် ဟွံချပ်ဟွံရံၚ်၊ ဍေံထေဲလဟုက် သာ်မုက်လှာဲပြံၚ်၊ ဗၟာသတ်အဟိုတ် စိုတ်ဍေံမ္ၚိုဟ်ကြံၚ်၊ ဒေါသရုန်မဵု ဓလဵုခဏံၚ်၊ အလုံဘာမွဲ ညးအဲတဲဂံၚ်၊ ဍေံပၠေၚ်ဍေံစံၚ် ဂဵုမံၚ်ဝူဝူ။
သၚ်ပ္ဍဲဘာဂြိုပ် ပဗဒိုပ်ဇၞူ၊ ဍေံရောဟွံသၟာန် ညိဟွံဆာန်ဍူ၊ ဗမာဓဇန် စိုတ်ပၠန်ဟွံလ္ဂူ၊ စံၚ်ဘာစံၚ်ကျာ် ကွာ်ဂံါတဆူ၊ အရက်လုပ်ဗုၚ် သုၚ်လဝ်ဗၜူ၊ စံၚ်သ္ၚိစံၚ်ကွာန် စံၚ်ဌာန်ဇြပ်ဇၞူ၊ ခမဳခရှ် ဒှ်ယာံဓဇူ၊ ကၠံသတ်တံၚ်ပိုအ် ပၟတ်ကၠောံဝူဝူ၊ ပ္ၚဘာပလိုက် ကွိုက်ညံၚ်ဗြဲဂူ၊ သီုပန်သီုစံၚ် ဂံၚ်ဂုဏ်ဗၜူ၊ ဘာဇၞော်ကြုက်ပိ သ္ၚိၝဲအမူ၊ စံၚ်ထောံအိုတ်တး သှ်ေချးဂွိုအ်ဇူ၊ ကတဴတ္ၚဲကၠာ ကျာပိုက်ဝူဝူ၊ ဗမာအရိုၚ် ဂြိုၚ်မံၚ်ရူရူ၊ ညိရောဆာန်ဍူ ဂကူပြေၚ်ဂၠဴ။
ယွံကလောတအ် တၟံဇန်တြုံဗြဴ၊ ဒဒှ်ခပ်သီ ဂွံတီဒးလဴ၊ နာဲဏု အၜတ် သတ်ညံၚ်ပြေၚ်ဂၠဴ၊ ဗၟာအဒိုဟ်ဂွိုက် ကွိုက်မန်ဂြိပ်ဒဴ၊ ဗက်ဒဳထဍေၚ် ညံၚ်ပြေၚ်ညံၚ်ဂၠဴ၊ ဍုၚ်မန်ရောကွဵု ကဵုလွဟ်ကံလဴ၊ က္ဍိုပ်သကိုပ်မန် ထောန်မိုၚ်ဂြိပ်ဒဴ၊ နူကွာန်ကအ်ဍောတ် မှတ်ဂြိုပ်တြုံဗြဴ၊ ဂကူမန်တအ် တၟံညးဂြိပ်ဒဴ၊ တံၚ်ပရၚ်လၟိုၚ် ဂၠိုၚ်ကဵုကောန်ဂၞဴ၊ ဍုၚ်ရေဝ်တၟံကၞေၚ် ဟွံဝေၚ်တြုံဗြဴ၊ ခမဳသၚ်လ္ၚဵု ဃဵုညးရဴဂဴ၊ ပ္ဍဲဘာညးလျုၚ် ဒုၚ်သ္ပပူဇဴ၊ တိတ်ဂြိုပ်ပေက်ဒဴ ညးလဴညးဟီု။
ဗမာဒှ်ဇၞော် ဗော်သၟိၚ်သမၠီု၊ ထဍေၚ်မန်တအ် တၟံကွာန်အိုဿီု၊ လကျာ်ရောဗၠး ဒးဂြိပ်ဒဴကီု၊ ဟိုတ်ဆာန်ဂကူ ဘာတူညးဟီု၊ ဒးထောံဒၞာဲဒၟံၚ် ဟွံရံၚ်သမၠီု၊ က္ဍုဟ်ဗမာလောန် လက်ဒေါန်တုဲကြီု၊ ကွာန်မန်ဂမၠိုၚ် ဍေံဗိုၚ်ပလီု၊ ဂစိုတ်စံၚ်ပျဲ ဆဵုဘဲသတီု၊ တဝ်ကၞဴကွာန်ယိုက် သ္ဍိုက်မန်ညးဟီု၊ မဟေဲဝါဍောတ် မွဲသၞောတ်ကရီု၊ မုဟ်ဒဵုမုဟ်နာၚ် ပံက်ပါၚ်ဂိုတ်ကြီု၊ ကၟာမဵုဒှ်တမ် ကၠောန်ခၞံလဝ်ကီု၊ မန်တကအ်ခၟိုၚ် ဂၠိုၚ်ကဵုဂိုတ်ဟီု၊ ဆာန်ဂကူအဴ ကြဴဒဴအိုဿီု၊ မန်သှ်ေပဒုဟ် ဣၚုဟ်ဍေံကြီု၊ ဗမာသမၠီု ပကီုကဵုဘဲ။
ဍုၚ်ပံၚ် ဇိုၚ်ကျာ် အလှာ်ၜဳသၠဲ၊ ဝါကပိုဟ် ခၠာတ် ညာတ်မန်ဒှ်ရဲ၊ ဖေက်ဗၟာဂြိပ်ဒဴ ဟွံလဴကဵုၝဲ၊ မန်တအ်ရပ်လွဟ် ဒှ်ကၠုၚ်သကအ်တဲ၊ ဂွံဗၠးလမျီု ရီုဗၚ်ဖဲဖဲ၊ ဒပ်ပၞာန်လေဝ်ဇၞော် ဗော်မန်တိသၠဲ၊ ပိုၚ်ဂြိုပ်ပိုၚ်ဆု ၜိုန်လ္ၚုဗၠးဘဲ၊ စိုတ်ဓာတ်တမြံၚ် ကြံၚ်ဗီုပသဲ၊ ဗတိုက်ကေတ်ဍုၚ် ကဵုတှ်ေဒုၚ်တဲ၊ မန်ဗမာစိ ကၞိကဵုဗဂဲ၊ မံၚ်မွဲစွံဂှ် ဒှ်သၞဝဳဝဲ၊ ဗမာယုတ်လောန် အောန်ဓရ်ကျာ်တြဲ၊ မန်ပိုဲဖျေံစိုတ် ချိုတ်ဟွံသ္ပရဲ၊ သဂံၚ်မန်တအ် ဟွံပၠအ်သီုဇဲ၊ ချဳဂရာၚ်မံၚ် တုပ်ညံၚ်ကျာဗြဲ၊ ဗော်မန်ဗၠးၜး ပၠန်ဂတးပြဲ၊ ဍုၚ်မန်ကဵုမန် နန်ထဝ်တိဗၠဲ၊ ကရေဲကညာၚ် ရမျာၚ်ဇာသဲ၊ အလဵုသဳဗၟာ ဝါဒပြိုက်ပျဲ၊ မိၚ်တုဲကဵုဘဲ ပ္ဍဲမ္ၚးသီုၜါ။
ရးဇြာကၟာဝက် ဆက်တုဲလဴဏာ၊ ရပ်လွဟ်ပန်ဗ ရာဇကောန်တာ၊ နာ်မွဲဂးမြာ ဟလာဟံသာ၊ ဒှ်သကိုပ်မန် ဆီနန်သီုၜါ၊ မံၚ်ပ္ဍဲဂြိုပ်ဂၞိၚ် ဂၠိၚ်သၞာံအခါ၊ ဗတိုက်ကေတ်ဍုၚ် ဒုၚ်တဲညဳသာ၊ သဂံၚ်မန်တအ် တၟံညးအဲကၠာ၊ ထောံသ္ၚိထောံကွာန် ဝေၚ်ပၞာန်သေၚ်ဟာ၊ သကိုပ်မန်ဂျ ရာဇကောန်တာ၊ သွက်ဂကူဏး သၠးလမျီုကၠာ၊ ကောန်သဂံၚ်ဍာံ ဂၠိုၚ်သၞာံအခါ၊ လုပ်ပေဲါဗတိုက် လိုက်ဝွံပြာထာ၊ ချိုတ်ကဵုဂျိုၚ်ဂှ် ဒှ်ဓမ္မတာ၊ ဟလာဟံသာ လောန်စဴအာရ။
ယွံကလောတအ် တၟံဗော်ဝံသ၊ ပ္ဍဲဂြိုပ်ပေၚ်သူ ဂကူမည၊ ဗတိုက်ကေတ်ဍုၚ် ဒုၚ်ဒဒိုက်ရ၊ ရဲသဂံၚ်မန် ဆီနန်ဍာံပြ၊ သွက်ဂကူဏး သၠးဇဳဝိတ၊ ဟလာဟံသာ အကြာဘဲသၞ၊ ပ္ဍဲကွာန်ဒဵုဗိုၚ် ဂွံပရိုၚ်ရ၊ ဗၟာညာတ်စုတ်ပၠန် ဓဇန်ညံၚ်ကၠ၊ ဗတိုက်ကြတ်ဒၞာ ဟလာဒးကျ၊ သ္ကိုပ်မန်ပိုဲဂှ် ပြဟ်လလုဲအာရ၊ သွက်ဂကူပ္ညုၚ် ဍုၚ်ရာမည၊ သၠာဲကဵုလမျီု လီုဇဳဝိတ၊ ချူပတိုန်ပြဲ ပ္ဍဲဝၚ်ကွိုက်သၞ၊ သ္ဂံၚ်မန်ဂမၠိုၚ် ၜိုန်ဂျိုၚ်ဟိဏ္ဏ၊ အဝဲလီုလာ် စာ်ထောၚ်ကာယ၊ ဇိုၚ်ပိုတ်တဲကဝ် ဒှ်ဗွဝ်ဒုက္ခ၊ ဆာန်မန်ဍာံပြ ဆဵုသၞညာတ်ဘဲ။
ဂွံတီဒးဟီု သီုစိုတ်ဂိပ္ဍဲ၊ ကွာန်မန်ဂၠိုၚ်ရဲ ဒးဘဲနူဗၟာ၊ ကၞောတ်ၜဳဇိုၚ်သြၚ် ထဝ်ပၠၚ်ကြုၚ်ဘာ၊ ကဒဵုကအ်နှာတ် စိုတ်ဓာတ်ရာဇာ၊ ကံဗိန်ကံပံက် ဖအံက်ကံဂၟာ၊ သၞေဟ်သြောံဒဵုဗိုၚ် ကံပလိုၚ်မြာ၊ ကံဂဵုကြေဝ်ဏာ ကွာန်လှာရးဇြာ၊ ဆုကၠကျာ်မြဟ် ပှ်လှ်ဂြိုပ်ဝါ၊ တၟံဗြဴဇိုၚ်ဍာန် ကွာန်စဴဂလာ၊ ယာံဒံၚ်သၞေဟ်ဗ္ဒဝ် အၜဝ်ခေါဇာ၊ ကွာန်မန်ဂမၠိုၚ် ပြိုၚ်ကဵုဗော်ဗၟာ၊ ကေတ်ဍုၚ်ရပ်လွဟ် သၟဟ်မနောဒွါ၊ တီညာတ်ဆီနန် သၚ်မန်ပ္ဍဲဘာ၊ အာတ်ဍုၚ်ဂၠိုၚ်ဝါ ဗၟာတအ်ဟွံကဵု။
ဆီနန်ဍာဲဇေတ် ခေတ်သၟတ်ကတဵု၊ ဗရုကညာၚ် ရမျာၚ်ကြဵုကြဵု၊ သ္ကိုပ်မန်ဂမၠိုၚ် ဂျိုၚ်ချိုတ်နွံတွဵု၊ သ္ဂံၚ်လေဝ်နဲဂှ် တုပ်သၟဟ်ဂွံဖဵု၊ ဗၟာထဍေၚ်ပန် ဂေတ်လန်ပယျဵု၊ ဍုၚ်တေံကွာန်ဏအ် တၟံမန်ကတဵု၊ ဗက်ရပ်ဗက်ဂၠာဲ သ္ၚာဲကိတ်ညံၚ်ကၠဵု၊ ကွာန်ဖအံက်ဗျိၚ် မိၚ်တုဲလဴကဵု၊ နာဲစာန်ဒူရ ပၠတရဴဟိုတ်ဖဵု၊ ဒှ်သကိုပ်မန် ဆီနန်ကတဵု၊ ဇြဟတ်ရဲဗော် ဇၞော်မံၚ်ဟွံပြဵု၊ ဃောအာဃောကၠုၚ် ဒုၚ်ကေတ်ဒုၚ်ကဵု၊ ဒးသၠာဲလမျီု လီုဂွံကုသိုလ်၊ ဗၟာတအ်ကမၠက် ရိုဟ်ကၞက်ဟွံကၟဵု၊ သွက်ဂကူဍုၚ် ဒုၚ်ချိုတ်ဂွံဖဵု၊ နွံပ္ဍဲဝၚ်ရ ဟွံကျသာ်လဵု၊ ဂွံတီလဴကဵု ကွဵုကၠေံပုဟ်ရဲ။
ဗၟာအဒိုဟ်ဂွိုက် ဍဵုဍိုက်လောန်တဲ၊ လအ်ညိမွဲအံၚ် တုပ်ညံၚ်ဒှ်ရဲ၊ အခေါၚ်ဗၠးၜး သၠးဒုဟ်ဟွံပျဲ၊ သမ္မတဗၟာ ဝါဒတံၚ်ဂြဲ၊ လလောၚ်တြးဏာ တုပ်ညံၚ်ကျာဗြဲ၊ ဗော်မန်ရပ်လွဟ် ပရှ်ဇိုၚ်တဲ၊ လညာတ်လေဝ်တုပ် မိက်လုပ်ကၠုၚ်ပ္ဍဲ၊ ရုဲမာဲအမာတ် ဂွံညာတ်ပရဲ၊ ဂှ်ရောၚ်ဂွံဍုၚ် ဟီုပ္ညုၚ်နဲကဲ၊ လှေံလှန်ဟီုခိုဟ် ၜိုဟ်သြိုဟ်ဗၠးဝဲ၊ ဗော်မန်သ္ကိုပ်တအ် တ္ၚဲဏအ်ဒုၚ်တဲ၊ ယာံလုပ်ဖျေံလွဟ် ဒှ်မိတ်ဒှ်ရဲ၊ ဗၟာတအ်လီမန် ညန်စိုပ်လုပ်ပ္ဍဲ၊ တိတ်ဂြိုပ်ရပ်လွဟ် စှ်သၞာံစှ်ဗြဲ၊ နူပတှ်ေဗၟာ ခက်ဇာဒးပျဲ၊ မွဲတ္ၚဲဆဵုတဲ ရဲမန်လုပ်ကၠုၚ်။
ပိုၚ်ခြာတ္ၚဲကၞာတ် သက္ကရာဇ်ဍုၚ်၊ လ္ၚီပိကၠံမာ ၜါစှော်ယဵုဒုၚ်၊ ဒုတိယဒ္ဂိုန် ဗြဲဗိုန်ကျာသၠုၚ်၊ မသုန်မံက်ဂှ် ဖျေံလွဟ်လုပ်ကၠုၚ်၊ ဗော်မန်ဂြိုၚ်အီ မၞိဟ်လ္ၚီစိုပ်ဍုၚ်၊ နာဲအံၚ်ထောန်ရ ပက္ဍိုပ်လုပ်ကၠုၚ်၊ ရပ်လံၚ်ပြောဲဇွာ ဗမာဒုၚ်တၠုၚ်၊ အဵုသၟိၚ်ၜိုပ်ထဝ် ပဝ်စဴလုပ်ဍုၚ်၊ ထောံဌာန်ဂြိုပ်ဂၞိၚ် မိၚ်ကော်စိုတ်လျုၚ်၊ မိပ်ဇြိပ်အီဂြိုၚ် ပြိုၚ်ဂဇအ်ခုၚ်၊ ဗော်မန်တအ်ရ ဝိုတ်သွဝိုတ်ပုၚ်၊ ပတှ်ေမွဲဝါ ဗၟာတအ်ကဵုဍုၚ်၊ မန်တအ်လုပ်ကၠုၚ် ဂွံဍုၚ်ရောၚ်ဂး။
ယွံကလောပိုဲ ဟိုဲမန်ကွာန်ရး၊ ဂွံတီလဴကဵု ဒှ်ဖဵုရမၞး၊ နာဲဏုအၜတ် ကၠတ်လီမန်ဂ:၊ ဟွံလအ်ဆဵုဘဲ ပ္ဍဲကဵုမ္ၚး၊ ပြယာယ်ဗမာ ဝါဒကေတ်ဇၞး၊ လ္ၚီပိကၠံမာ ၜါစှော်မွဲဂး၊ မာ်စှ်မံက်ဆာဲ ကံက်မာဲလုံရး၊ မန်တအ်လုပ်ပြိုၚ် ကျဂၠိုၚ်ညာတ်ဒး၊ ဂွံအမာတ်ဇၞော် တော်ရံၚ်ညိမၞး၊ ဖဝ်ချိုဝ်အံၚ်ထောန် ကောန်မန်မွဲဂၠး၊ နာဲဖဝ်စိၚ်ပၠ ပိရညးဂး၊ စှ်ပွိုၚ်ဍုၚ် ဒုၚ်ရုဲပြးဇး၊ ကျထပှ်ပၠန် ဟွံတန်ၚုဟ်မး၊ သၚ်ခမဳဗၠာဲ ကံက်မာဲဂွံဇၞး၊ ဘိုၚ်ရီုဘိုၚ်တွဟ် ဒှ်ဒုဟ်ရောဗၠး၊ မာဲၜံက်မာဲလီ တီသီုဍုၚ်ရး၊ မန်ပိဂွံဇၞး ဒးဂိုတ်ဒးဘိုၚ်။
ဆီနန်ဟွံကြဳ ခမဳပၠိုၚ်ပၠိုၚ်၊ ဂွံဇၞးရုဲမာဲ ဂၠာဲသွဟ်ဂၠာဲဘိုၚ်၊ မာဲပၞုက်မာဲလီ ဍေံသီဍေံပိုၚ်၊ ဗမာသတ်ဂျိ ရိရိရိုၚ်ရိုၚ်၊ နာဲဏုဒှ်ဇၞော် ဗော်ဍုၚ်ဂမၠိုၚ်၊ အမာတ်မန်ပိ တိရးဟွံပိုၚ််၊ လအ်ညိမွဲဗီု လီုလာ်သီဂိုၚ်၊ နေဝေန်ဗိုလ်ပၞာန် ကေတ်မာန်ချိုတ်ဂျိုၚ်၊ သီကေတ်အာဏာ မာယာဒှ်တိုၚ်၊ ပြယာဲလှေံလှန် ဓဇန်ဟွံဂြိုၚ်၊ ဍုၚ်မန်ရောဂွိုအ် ဂွံဆဗၠးဂျိုၚ်၊ နာဲအံၚ်ထောန်ကွေံ ဍေံရပ်ဍေံကြိုၚ်၊ အလဵုသဳတြေံ သေံဗၟာဂမၠိုၚ်၊ နေဝေန်ဒှ်ဗိုလ် လ္ၚဵုရပ်လ္ၚဵုဗိုၚ်၊ မန်လုပ်ခရိုၚ် ဍေံကြိုၚ်ၚုၚ်ၚ။
သၞာံသီအဝဵု ဗိုလ်ပၞာန်ဗာလ၊ လ္ၚီပိကၠံမာ ၜါစှော်ပိဂျ၊ (၁၃၂၃)၊ မာ်စှ်စွေက်ဝွံ ဗတမ်ဂၠုဂၠ၊ နေဝေန်ဒှ်သ္ကိုပ် ကောန်ၜိုပ်သ္ၚိတ်ဇြ၊ သော်ပြဟ်သၞေၚ်ကဝ် ပဝ်လုပ်ဒှ်ဇွ၊ ဍုၚ်မန်ရောဂွိုအ် ဂွံဒုဟ်လအ်လ၊ နာဲဆာန်မန်ကီု သီုနလ္လာဂျ၊ လအ်ဂွံဂြိပ်ဒဴ လဴဟွံထဗ၊ ဗၟာရပ်ဂျိုၚ်ဂျိုၚ် ကြိုၚ်ထံၚ်လအ်လ၊ ညံၚ်ဒးကံဂျိ သီုဂိသီုဂွ၊ မန်သှ်ေဂြိပ်ဒဴ လဴစရောဂွ၊ ဗၠးနူသ္ၚိစာတ် စိုတ်ဓာတ်ဍိုန်လျ၊ လ္ၚဵုဂှ်ဒဴၜး သၠးထောံမိမ၊ စိုပ်ဂြိုပ်ဒမၠု၊ စိုတ်လ္ၚုသ္ၚိတ်ဇြ၊ လအ်ညိဂွံလွဟ် ဒှ်ဓရ်မာန၊ ဗော်မန်မံက်ကၠုၚ် ကေတ်ဍုၚ်ရာဇ၊ ဒးအလီကီု သီုဂိသီုဂွ၊ ဗိုလ်ပၞာန်ဗာလ၊ ဝါဒဗော်မွဲ။
နလ္လာအံၚ်ထောန် ဆာန်မန်တီနဲ၊ ရပ်ကြိုၚ်လအ်လ ဂွသီုညးအဲ၊ ဒးအလီဗၟာ ခက်ဇာဂၠိုၚ်တ္ၚဲ၊ လအ်ညိဗၠးစဴ ကြဴချပ်ဗဗွဲ၊ ဒဴတိတ်ဂြိုပ်ကၠာ နလ္လာညးမွဲ၊ ဒှ်က္ဍိုပ်သကိုပ် ၜိုပ်ထဝ်ယာနဲ၊ တေံနာဲအံၚ်ထောန် လောန်စဴတတ္ၚဲ၊ စုတိပြံၚ်အာ သိၚ်သာညးအဲ၊ ချိုတ်မ္ၚးဓနက် ဍန်ဂြက်ဟွံမွဲ၊ ပတှ်ေလုပ်ကၠုၚ် ကေတ်ဍုၚ်ဗဗွဲ၊ ဗီုဆိၚ်ဟွံဒှ် ကှ်စှ်ေရိုဟ်တ္ၚဲ၊ ဗိုလ်ပၞာန်နေဝေန် ထၞေန်စပ်ဂၠိုၚ်နဲ၊ သီကေတ်အာဏာ မေတ္တာရောမွဲ၊ အိုဿီုညးအဲ ရိုဟ်တ္ၚဲက္ဍန်ဂြက်။
နေဝေန်ဒှ်ဇၞော် ဗော်သတ်နရက်၊ နအဝဵုပၞာန် ပိုၚ်ကွာန်ဍုၚ်ဂြက်၊ သာန်ယုမွဲဂှ် ဒှ်ရဲဗွက်၊ ဂွံအလဵုသဳ ပိုၚ်ပြဳသီဗက်၊ ပရေၚ်ဍုၚ်ကွာန် ပၞာန်တအ်တ္ၜေဟ်လက်၊ ပလီုထောံရ ပဒုဟ်ဇြိုဟ်နက်၊ မန်နွံအပ္ဍဲ ပျဲပျာံကၠေၚ်ဒက်၊ ဂွံဗၠးဂြိပ်ဒဴ ကောန်ဗြဴဍံၚ်ဗက်၊ တိတ်လုပ်တိတ်ပၠန် ၜါလန်ဂၠောဲဇက်၊ မိပ်ပ္ဍဲဂြိုပ်ဂၞိၚ် ဗၠးသၟိၚ်နရက်၊ ကၠာတေံဟွံလုပ် တုပ်ညးထိၚ်ဒက်၊ နာဲဘလောန်ဂး ဟွံဒးဗၠိုက်နက်၊ နာဲယှိုဲကျေန်ကော် ဒှ်ဗော်ဗၠးဒွက်၊ နာဲကြုၚ်ထဝ်ကီု ဟွံဟီုဗမက်၊ ဗၠးသတ်နရက် ထိၚ်ဒက်မန်တအ်။
ယွံကလောပိုဲ ဟိုဲမန်မွဲသ္ကံ၊ ဂွံတီလဴကဵု ဒှ်ဖဵုဗိုန်ဇၟံ၊ နေဝေန်သာန်ယု ယၟုဗမာတအ်၊ ဗော်ပၞာန်ဂမၠိုၚ်် ပိုၚ်လဝ်ဍုၚ်ဏအ်၊ ပေၚ်စှ်ၜါသၞာံ ပယာံဟွံပၠအ်၊ ဍန်ဂြက်ဇဳဂၠံၚ် ပၠံၚ်ၜးတေံဏအ်၊ ဗက်သီဗၞိက်တိုက် ဍိုက်ယာန်ဂဇအ်၊ လောဘဖအဴ ထဴသီတိကၠအ်၊ လုံကောန်ရးဍုၚ် ဒုၚ်ပျဲရေက်ကအ်၊ ပၞာန်ဂွံအဝဵု ညံၚ်ကၠဵုြကအ်ကြအ်၊ ဗက်ကိတ်ဗက်ကဳ သ္ၚဳဂြက်ညးတ္ၚအ်၊ ဓဇန်လောန်ကာဲ ဟာဲကၠဵုတမြအ်၊ စှ်ၜါသၞာံဏအ် ဝးကအ်သုၚ်ဆီ။
နူဂှ်လှာဲပြံၚ် ညံၚ်ဒးအလီ၊ လပါ်တမ်သွံ စွံလဝ်မွဲလ္ၚီ၊ ပိပိမသုန် သၞာံတုန်ဂေါဝ်မြီ၊ (၁၃၃၅)၊ မြေက္ကသဵုအဴ တြဴစွေက်ကြအ်ဆီ၊ ဍုၚ်ရးဟွံပဲါ ရုဲမာဲအလီ၊ ပၞာန်အပ်အဝဵု လ္ၚဵုမိပ်ဂြိုၚ်အီ၊ လလအ်ကဵုပြဟ် မွဲတ္ၚဲဒှ်လၞီ၊ သမ္မတလေဝ် နေဝေန်ကြအ်ဆီ၊ မန်ညံၚ်ဂွံသၠေက် ဍေံပေက်ဟဇီ၊ မိၚ်ဒးၚုၚ်ၚ ဂွဂွဗြီဗြီ၊ ရုဲမာဲအလီ ဒှ်လၞီရိုဟ်တ္ၚဲ။
သၞာံလတူဂှ် ဟီုသှ်ဗဗွဲ၊ ဂိတုပုဟ်ကၠာ ဖာမံက်စှ်မွဲ၊ ကဵုဍုၚ်မန်ရ ပစၟတ်လဝ်တ္ၚဲ၊ နေဝေန်သာန်ယု ဂးယၟုညးအဲ၊ ဒှ်အလဵုသဳ ပိုၚ်ပြဳဂၠိုၚ်နဲ၊ ဍာံဂှ်ဟွံကေတ် ဗၠေတ်ရောၚ်ဗဗွဲ၊ ကဵုဍုၚ်မန်ဂှ် ရှ်ညိဟွံမွဲ၊ ဂကူဂွံကၠေံ လှေံလှန်ဂၠိုၚ်နဲ၊ ဍုၚ်မန်ဍုၚ်ပၠက် ခိုဟ်သွက်ညးအဲ၊ ဍုၚ်မန်ဍုၚ်ဍိက် ရပ်ဇိက်ရိုဟ်တ္ၚဲ၊ ညိရောဟွံတၟေၚ် ဒးထေၚ်ညးအဲ၊ ညးဂဇအ်ခုၚ် ပေၚ်ဗုၚ်ရိုဟ်တ္ၚဲ၊ မန်ဍိက်ဗမာ ယာမုက်ဒုၚ်နဲ၊ အခေါၚ်မန်ကၠက် သွက်ဇကုမွဲ၊ ဍုၚ်ဟွံဗဗွဲ တုပ်နဲကောန်ဍိက်။
ရဲမန်ဒုၚ်ဂိ ညိဟွံမွဲပၟိက်၊ အခေါၚ်အဝဵု စဵုဇာစဵုနှိက်၊ ကၠောန်ပၠန်ဒှ်လုတ် စုတ်ထံၚ်စုတ်ထိက်၊ ဂကူဟွံသၠုၚ် ဍုၚ်မန်ဍုၚ်ဍိက်၊ မန်ကေတ်ဟွံကဵု ပလဝ်ကၠဵုကၠိက်၊ မန်ဟွံကေတ်ရ ပလဝ်ခိုဟ်ပိက်၊ မန်ညးဂရိုဟ် မန်ဒိုဟ်မန်ကၞိက်၊ မန်ဏအ်ရောၚ်ကဵု ဂွံဖဵုဒှ်ဍိက်၊ မန်ဒုၚ်ဒဒိုက် သီုကွိုက်သီုထၞိက်၊ ဍုၚ်မန်ပိုဲကဵု ညးလဵုရောဘိက်၊ မန်ရဲနေဝေန် ဒက်ဂြေန်စတိက်၊ စၚ်ခမာဲကၠာ စကာရပ်ဇိက်၊ မန်ဏအ်ပဇၞော် ညးကော်ညးဘိက်၊ ဗီုပြၚ်ဍုၚ်လၟုဟ် ဒုဟ်ဟွံဗၠးဍိက်၊ သွက်ဂကူမန် ဗတောန်ဗှ်လိက်၊ ရေၚ်တၠုၚ်ဟွံမာန် ကွာန်ပိုဲနွံပၟိက်၊ ဍုၚ်ပၠက်ဍုၚ်ဍိက် လိက်ပတ်ကၠေံအိုတ်။
ဗၟာကဵုဍုၚ်မန် လ္ၚုလ္ၚန်ပ္ဍဲစိုတ်၊ အခေါၚ်ဟွံမွဲ တုပ်နဲဍာ်ချိုတ်၊ ဒၞာဲချပ်ဒၞာဲဍန် ဒၞာဲဖန်တမ်ပိုတ်၊ လိက်ဟွံဗတောန် မန်တအ်ကၠက်အိုတ်၊ ဍုၚ်မန်ကှ်ကှ် ရှ်ဍေံဖျိုတ်ဖျိုတ်၊ ဟွံဍာတ်ရသော ကောဒေံဖျေံစိုတ်၊ စှ်သၞာံပြၚ်ပြၚ် ဍိက်က္ၜၚ်ဘုတ်ပြိုတ်၊ ဝးကအ်သုၚ်ဆီ ဒှ်လၞီညံၚ်ချိုတ်၊ ကၠောန်ဆဵုဗဟေက် ဒးဖေက်လကိုတ်၊ ဍုၚ်ဍိက်ဍုၚ်ပၠက် မန်ကၠက်အာဲပိုတ်၊ ၜိုန်ရဂျိုၚ်မံၚ် ညံၚ်မၞိဟ်ချိုတ်ချိုတ်၊ ဗၟာၚိတ်လဝ်မန် ဆီနန်လေဝ်ပၠိုတ်၊ ၜိုန်ပၠေၚ်ကၠံသၞာံ ဟွံဍာံညာတ်ဟိုတ်၊ ခိုဟ်သွက်ညးမွဲ နဲဝွံဖျေံစိုတ်၊ ဂကူပိုဲကၠေံ ကမၠေံဂစိုတ်၊ အခေါၚ်လေဝ်အိုတ် မန်ချိုတ်လၟုဟ်ရ။
နေဝေန်သာန်ယု ဂးယၟုဍာံပြ၊ လအ်ညိမွဲအံၚ် ပြံၚ်လှာဲထောံရ၊ ၝသာန်ယုဂှ် ဒှ်သမ္မတ၊ အဝဵုလေဝ်ဇၞော် ဗော်မဆလ၊ နေဝေန်မွဲဂှ် ဒှ်ဥက္ကဌ၊ ဂၠိုၚ်ကဵုတ္ၚဲသၞာံ ပယာံကာလ၊ အုပ်ဓုပ်ဍုၚ်ရး ဇၞးညးဟွံကျ၊ ပတှ်ေဒပ်ပၞာန် ဂွံမာန်ကဵုသ္ပ၊ သာ်စကြိုဟ်ကြိုဟ် လကိုဟ်ယက္ခ၊ ဒဒိုက်ရုန်မဵု ဒးဆဵုဘဲသၞ၊ ဍုၚ်ပိုဲဒှ်ကၞောဝ် ကၠောဝ်ဗျဵုပုၚ်သွ၊ ပၠံၚ်သ္ၚုပၠံၚ်သြောံ ကေတ်ထောံအိုတ်ရ၊ မွဲသၞာံတေၚ်တိုန် စိုပ်ကိုန်နာံကၠ၊ ဖေက်မံၚ်ဂြုဂြု ဗျုဍောတ်ဒှ်စၞ၊ စသုၚ်ဍန်ဂြက် နရက်ရောက၊ သၚ်ကဵုခရှ် စၟဟ်တ္ၚဲကာလ၊ ဒှ်ဒဒိုက်စိုတ် ဟိုတ်မၞိဟ်ပါပ၊ ယုတ်မာဟိဏ္ဏ ညးတၠအဝဵု။
ယွံကလောတအ် တၟံညးဂွံဆဵု၊ ဗက်ကေတ်ဗက်ပၠံၚ် ကြံၚ်မ္ၚိုဟ်ရုန်မဵု၊ ဓဇန်လောန်ကာဲ ဂၠာဲထ္ၜးအဝဵု၊ လ္ၚီပိကၠံပၠန် ပန်စှော်ဒ္စာံအဵု၊ (၁၃၄၈) ၊ သၞာံဏအ်တေၚ်အိုတ် စိုတ်ဒေါသဂဵု၊ ဒးမုက်ကလော် ဗော်ဍေံရုန်မဵု၊ လုံဍုၚ်ရးဌာန် ဇၟာပ်ကွာန်ဂွံဆဵု၊ ပံက်ဟၚ်ကေတ်သြောံ ဗဝ်စွံသၠုၚ်ဒဵု၊ နေဝေန်သာန်ယု မတ်ဂၠုဒှ်ဗိုလ်၊ ဖျေံအသံရ ညးတၠအဝဵု၊ လောဘဒေါသ မောဟဍာဲဂဵု၊ ပၟတ်ပိလုပ်စံၚ် ဗက်ပၠံၚ်ဗက်ဍဵု၊ ပိုဲရဲသၟာဗ္ၚ ဂဗကၠောဝ်ဗျဵု၊ ဒးပၠောပ်သြောံဒေၚ် ဆေၚ်ဖျာအဝဵု၊ ကဵုဟွံမာန်ရပ် ပပ်ပဳဓလဵု၊ ဟွံမွဲဓရ်မ္ၚဵု ဍဵုဍိုက်ပျဲပျာံ။
အုပ်ဓုပ်မှာဇန် ပွိုၚ်ပန်စှော်သၞာံ၊ ဒဒိုက်ဗြံၚ်ဗြံၚ် ညံၚ်လုပ်ပါၚ်ကျာံ၊ ဍဵုဍိုက်လောန်စိ တုပ်ကၞိဒးတာံ၊ ဒဒိုက်ဂၠိုၚ်နဲ ရိုဟ်တ္ၚဲရိုဟ်သၞာံ၊ ဂြက်ဂြက်ဍန်ဍန် ပန်စှော်ဒစာံ၊ ဂိဓဇောတ်လောန် ကၠောန်လေဝ်ဟွံဍာံ၊ ဂြက်လတူဂြက် သီုလက်ပျဲပျာံ၊ နေဝေန်သာန်ယု လုကဴဂၠိုၚ်သၞာံ၊ ဒှ်ညးဇော်ပၠန် ဓဇန်လောန်သ္ဍာံ၊ ဒးယာံတသဝ် ပလဝ်ပတ္တာံ၊ တုပ်ညံၚ်ဍိက်ဂၠုဲ ဟွံရုဲပယာံ၊ ဒဒိုက်စိုပ်သိတ် လအိတ်ဂးသၞာံ၊ ဆဵုကပ်ဘဲဒဏ် သၞာံပန်စှော် ဒ္စာံ၊ ညံၚ်ကၞိဒးတာံ ပါၚ်ကျာံဂးလဝ်။
နေဝေန်သာန်ယု ယၟုဍေံတမ္ညဝ်၊ ဂကောံညးကော် စွံဗော်မွဲဓဝ်၊ ပခိုၚ််ဒပ်ပၞာန် ဂွံမာန်ဆေဝ်ဒဝ်၊ ရန်ကဵုသပုန် ရုန်မဵုပတဝ်၊ ထပိုတ်ပန်ဂြက် ဗက်ကၠောန်ဗက်ဒဝ်၊ အုပ်ဓုပ်ပိုၚ်ဍုၚ် ဂွံကၠုၚ်သြန်ထဝ်၊ သီပၠံၚ်ဒြပ်ညး တ္ၚဲယးပၠိုတ်သဝ်၊ တၟေၚ်တိုန်ရိုဟ်သၞာံ ပယာံဂးလဝ်၊ စသုၚ်ဍန်ဂြက် ညးလက်နွံဗဝ်၊ သီုယာဲသီုကောန် တသောန်တသဝ်၊ ဍန်ဂြက်ဇဳဂၠံၚ် ညံၚ်ကကြိုၚ်လဝ်၊ ညာတ်ဒှ်ဗဟေက် ဖေက်ညံၚ်ဂၞိၚ်ကဝ်၊ ရဲသၟာဝါဗ္ၚ ဗက်ဘဆေဝ်ဒဝ်၊ ဟွံကဵုသြောံရပ် သီဒြပ်သြန်ထဝ်၊ တီဗ္ၚကၠအ်သွဝ် သီလဝ်ဍေံကေတ်။
ဓဇန်လောန်ကာဲ ဟာဲယှိုဲယှေဝ်လေတ်၊ ရာန်မွဲမွဲကၠာ လုပ်ဖျာဒးၜေတ်၊ ကၠောဝ်ဗျဵုလုံဍုၚ် ဒှ်ကၠုၚ်ပ္ဍဲခေတ်၊ သၞာံဏအ်ဂြက်အိုတ် စိုတ်မၞိဟ်ကၠိၚေတ်၊ ဂွံစဒးစွံ သြောံပိုဲဗလေတ်၊ ဇွောံမရောရုံ နွံမံၚ်သီကေတ်၊ ဒမၠဍုၚ်ကွာန် ပမာန်ဂၠံၚ်ဗၠေတ်၊ ပံက်ဟၚ်တုဲယိုက် ဗတိုက်ပၠံၚ်ကေတ်၊ ဗုဒ္ဓဘာသာ ပြာကဋ်ပ္ဍဲခေတ်၊ ညးထံက်ပၚ်အောန် ဂြက်လောန်ပိုတ်ထေတ်၊ ထပိုဲခမဳ မၚ်သဳဂွံဝေတ်၊ ဗက်ပရိယတ် ကတ်လ္ၚတ်လိက်ဒ္ဂေတ်၊ အလုံသၚ်မွဲ ရိုဟ်တ္ၚဲရံၚ်ဂေတ်၊ ဍေံဂၠာဲပဒုဟ် ဍုဟ်ဟီုသရေတ်၊ သြောံကျာ်သြောံသၚ် ထံက်ပၚ်ဓနေတ်၊ လောဘစံၚ်ဂြဟ် ဣဂှ်လေဝ်သီကေတ်၊ သြောံဘာရောဗၠး ဟီုဂးရံၚ်ဂေတ်၊ နေဝေန်သာန်ယု ဂွံယၟုပ္ဍဲခေတ်၊ ဗုဒ္ဓဘာသာ မွဲၜါရောဇေတ်၊ ကၠောန်မံၚ်ဗၠေတ်ဗၠေတ် ပ္ဍဲခေတ်လောကဳ။
ယွံကလောတအ် တ္ၚဲဏအ်ရံၚ်သ္ၚဳ၊ နေဝေန်သာန်ယု ဂွံယၟုပပ်ပဳ၊ သၟာကမၠောန်တအ် တၟံညးနွံဇဳ၊ ကပေါတ်အပြောံ ကောံပ္ဍဲသေဌဳ၊ သြန်နွံရာန်ကြိုၚ် ၚုဟ်ဂၠိုၚ်တိုန်ဇဳ၊ ဍၚ်လတူဍၚ် အကၚ်ပပ်ပဳ၊ ကၟာတ်စဵုတာဒၞာ ဝါဂြိုပ်ဂၠံၚ်ဇဳ၊ ကၠက်ရောၚ်ပထေၚ် ၜိုန်ဍေံပြေၚ်လွဳ၊ ညးရဲသၟာဗ္ၚ ဘဝကၠၚ်ဟဳ၊ ဂွံသြောံဍေံကေတ် ရပ်တ္ၚေတ်ဟွံချဳ၊ ဂရတ်ရဲဗ္ၚ လောဘဍာ်ဒဳ၊ ဗက်ဍဵုဗက်ဍိုက် လပိုက်ဖြဳဖြဳ၊ ပိုဲသၚ်ခရှ် ဒှ်ဘုံလောကဳ၊ ဒဒိုက်စဵုဗိုၚ် ဂၠိုၚ်ကဵုနာဍဳ၊ စိုတ်လီုညးအဲ မွဲဟွံဂံၚ်သ္ၚဳ၊ ဂိဓဇောတ်ဂး ဒးယာံဟဳဟဳ၊ ဘဝကျဍေံ ကွေံဟာဂံၚ်ချဳ၊ ၜိုန်ရဍန်ဂြက် ဍေံဗက်ဍေံဒဳ၊ တိတ်ဂြိုပ်ဟွံမာန် ဆာန်ဖုန်ဂိုဟ်ဂၞဳ၊ ခေတ်ဏအ်ပပ်ပဳ သ္ၚဳရံၚ်အိုတ်ညိ။
ဂကူယက္ခ ပါပဒိဋ္ဌိ၊ ဒှ်ဇၞော်ပိုၚ်ဍုၚ် ဂွံနုၚ်နိဓိ၊ သီကေတ်ဒြပ်ညး ယးလၟုဟ်ပိုဲဂိ၊ မှာဇန်တြုံဗြဴ ညံၚ်ဒးလဴဂျိ၊ သာသနာဟုတ် ဆုတ်စှ်ေဗိုန်ဂၠိ၊ သၚ်တအ်ဒှ်ကၞောဝ် ကၠောဝ်စသတ်ဝိ၊ ခရှ်ဒးကပ် ဒြပ်အိုတ်လက်ဗျိ၊ သြောံဘာသြောံသၚ် ထံက်ပၚ်လဝ်ညိ၊ သီကေတ်ပိုၚ်ပိုၚ် ရိုၚ်ရိုၚ်ရိရိ၊ ဍေံတအ်ဍဵုဍိုက် ဒဒိုက်ဖိဖိ၊ ဒုၚ်မာန်ဒုၚ်အာ ၜါကောန်ကဵုမိ၊ ရမျာၚ်ဍေံကြံၚ် မ္ၚိုဟ်မံၚ်ဒမၠိ၊ တုပ်ညးၜုၚ်တက် ထၞက်လဝ်ကဵုရိ၊ ဂကူယက္ခ ပါပဒိဋ္ဌိ၊ ချပ်ရံၚ်စိုတ်ဂိ ရိုၚ်ရိပြာကဋ်။
ပ္ဍဲကဵုသၞာံဏအ် တၟံညးကှ်ဇတ်၊ ဂကူသမၠီု ဍေံဟီုဂရတ်၊ ကဵုဟွံကဵုဟာ အာဏာလေဝ်ထတ်၊ ဗတိုက်ပၠံၚ်သြောံ ဍေံစွံပေၚ်ဍတ်၊ ကောန်ဍုၚ်ကောန်ကွာန် ဟွံမာန်အိုတ်ဓတ်၊ မွဲရောဂံၚ်ကွိုက် ဍိုက်လုပ်ဂဗတ်၊ ညံၚ်ဂၠဴဖေက်ကၠ ကဖေက်ဍာ်ဇတ်၊ ဖျေံကမ်ရဟာ ဗစာဟွံဗတ်၊ ဗီုပြၚ်ဍေံလၟုဟ် ညးက္ဍုဟ်ပေၚ်ဍတ်၊ ၜိုန်ဂှ်ဟွံဂံၚ် ညံၚ်ညးအိုတ်ဓတ်၊ ဗန်တဲဒေၚ်ၚုၚ် မၚ်ဒုၚ်ဍေံဗျတ်၊ မွဲတ္ၚဲသၚ်အောန် ဗတောန်လိက်ပတ်၊ ထံၚ်ပၚ်ဍိုန်မံၚ် ဂၠံၚ်ပရိယတ်၊ ပစ္စယ်ပန်ကှ် ဂွိုအ်ဗှ်ဂွိုအ်ကတ်၊ ဟွံလအ်ရမၞး ဒးထောံလိက်ပတ်၊ ရှ်ပိဋကတ် ဇတ်ကၠေံဆိုက်ကြပ်။
နေဝေန်သာန်ယု ယၟုဍေံယုတ်ပပ်၊ ဂွံလဝ်အဝဵု ဒှ်ဗိုလ်ပၠံၚ်ဒြပ်၊ ပွိုၚ်ပန်စှော်သၞာံ ညာတ်ဍာံဘဲကပ်၊ ဆဵုတုဲဆဵုတဴ ကြဴဆဵုညန်ကြပ်၊ မှာဇန်တြုံဗြဴ ညံၚ်ဂၠဴဇဵုတပ်၊ ဗဂပ်စကာ အာဏာဂိုၚ်ရပ်၊ လုံရးဍုၚ်ကွာန် ဌာန်သ္ၚောဲဆိုက်ကြပ်၊ ဂျိုၚ်ဖိုဟ််တုပ်ချိုတ် အိုတ်မံၚ်ကသပ်၊ မူပရောမာန် ပၞာန်ဍေံပေၚ်ဒပ်၊ ဒဒိုက်ခေတ်ဏအ် နာဲတအ်ဗက်ချပ်၊ သၚ်ကဵုသၚ်ကၠာ ၜါဒှ်မွဲမှပ်၊ ညံၚ်ကောန်မွဲဂၞဴ ဇဴစိုတ်ဗာန်ခြပ်၊ ညဳသာဇၞးရ သၞဟွံဂံၚ်ကြပ်၊ ခရှ်တအ်ကီု သီုမေတ္တာစပ်၊ ဆာန်ဂကူတုပ် လုပ်မွဲကသပ်၊ မန်ကဵုမန်ညဳ ချဳရောၚ်ဗၠးကပ်၊ ဗမာယုတ်ပပ် ချပ်တုပ်ဒဴၜး။
ယွံကလောတအ် တၟံညးရးကး၊ နူဘဝဍိက် မိက်ဗၠးဒဴၜး၊ ပဂိုဟ်ဍုၚ်ကွာန် သ္ၚိဌာန်ဒးသၠး၊ ဍောတ်ဇၞော်ဒှ် သ္ကံ တၟံညးအဲဏး၊ ခမဳထောံဘာ အာစာထောံကွး၊ မိမထောံကောန် ကလောန်ထောံပြး၊ သံယောဇိုန်ပိုတ် စိုတ်ဏအ်ကေတ်ဏး၊ မှာဇန်တြုံဗြဴ ဒးဒဴဒးၜး၊ ဘဝပိုဲသွံ ဂွံဂွံသၠးပွး၊ ကျာ်ဇၞော်ကောန်နာဲ ဂြိပ်ပဲါထောံကွး၊ ဒြပ်ရတ်ဥဿုံ ဆနွံဒးသၠး၊ ကောလတအ်ဟိုဲ ပိုဲဒးဒဴၜး၊ က္ဍန်ဂြက်လောန်တဲ ပ္ဍဲဓနက်ပး၊ ညံၚ်ပိုဲဂွံဗၠး ဒးဒဴစာ်စ္ဍး၊ မိပ်ဗီုကၠဵုကၠိက် ဍိက်ဗၟာရောၚ်ဏး၊ ပိုဲကသေအ်ကၟဝ် ဆဝ်ပ္ၚုဟ်လဴပျး၊ ကဵုဖေက်သမ္ၚာတ် ညာတ်ဒုဟ်ကဵုကၠး၊ ပိုဲတိတ်ချိုတ်မ္ၚး ဗၠးဒွက်ဗၠးပး၊ ဒဴစိုအ်ရဏး တြးဏာဗကန်။
ဟွံပစဗၞိက် လိက်ဝွံအဲဆန်၊ ပွိုၚ်သၞာံဍေံဂှ် စှ်ဝါကေတ်ပန်၊ ပရူခပ်သီ ဂွံတီချူဇန်၊ မွဲအာယုက်ခေတ် ဂြက်ၜေတ်လီၜန်၊ ဗမာအယုတ် လုတ်ဒုဟ်ဂၠိုၚ်သန်၊ ဟွံမွဲမေတ္တာ လတူမှာဇန်၊ လောဘလောန်ကာဲ ဗက်ဂၠာဲထဝ်သြန်၊ ဒြပ်ညးသီကေတ် ဗၠေတ်နူဓရ်ပန်၊ ဗြဟ္မဇဵုသွံ ထောံကၠေံပါဲခၠန်၊ ပိုဲအိုတ်ကသပ် ဒၞာဲချပ်ဒၞာဲဍန်၊ ဗၟာစိုတ်သဂံၚ် တုပ်ညံၚ်ကၠဗြန်၊ ဗက်သ္ၚာဲဗက်ၚိတ် ကိတ်စပိုဲပၠန်၊ ဂိုတ်ဆာန်ဒကာ လအ်အာကၠေံဗ္ဒန်၊ လိက်ပတ်လေဝ်ဗၠိုက် ဒဒိုက်ဇၞော်သန်၊ ဂကူလေဝ်တၞီ တီဟာနဲဂြန်၊ ကလောတအ်ဟိုဲ ပိုဲပကောံဇန်၊ နူဘဝဍိက် မိက်ဗၠးဨကန်၊ သံယောဇိုန်အိုတ် ထပိုတ်ထောံပၠန်၊ ဂြိုပ်တေံပြဲသန် အဲဗကန်လဝ်။
ဗမာတြုံဗြဴ ဒဴထောံမွဲကဝ်၊ မၞးတအ်ပပံၚ် ယာဲၜံၚ်ဆေဝ်ဒဝ်၊ ဂကူအယုတ် ညးခုတ်ဟီုလဝ်၊ ရုပ်သာ်ကျေဝ်ၜတ် ဗတ်ဖျေံလံက်ထဝ်၊ ရုပ်ရဴဒးလံၚ် ညံၚ်အဆေဝ်သွဝ်၊ ဒြပ်နွံဒယှ် ကဵုဒှ်ဂးလဝ်၊ ဂကူဗၟာံဍာံ သၞာံသံဝစ္ဆဝ်၊ နာဲတအ်ပကေတ် ဝေတ်စိုတ်ကဵုဓဝ်၊ ပသၠိုက်ဇကု သတြုတမ်ကဝ်၊ ဂကူအယုတ် ခဲါဒုတ်ဂးလဝ်၊ ဝေၚ်ပါဲကဵုမာန် ဆာန်မံၚ်အမ်သဝ်၊ ဗမာအရိုၚ် ပွိုၚ်မွဲလက်ကဝ်၊ မွဲဍုၚ်မွဲကွာန် မွဲဌာန်မွဲဂဝ်၊ မွဲသ္ၚိမွဲကၞဳ မွဲကၟဳမွဲသ္ကဝ်၊ မွဲဖုန်မွဲသ္ဍဳ မွဲဂၞဳမွဲဝဝ်၊ မာံမိလ္ပပံၚ် ရံၚ်အှော်ယာဲဂဝ်၊ ယဝ်ရပံၚ်စုတ် ပိုဲလေဝ်ယုတ်သဝ်၊ အဲဗကန်လဝ် နွံဗဝ်ဗွဲကြဴ။
ဗမာဍဵုဍိုက် ဗၠိုက်စှ်ေဖြဴဖြဴ၊ တမ်ပိုတ်ကၞာၚ်ကဝ် ဟွံမွဲဇဝ်ပ္ကဴ၊ ဍုၚ်မန်ကှ်ကှ် ရှ်ညံၚ်သတ်ပၞဴ၊ ညိဟွံကြောံဍာတ် စိုတ်ဓာတ်ထုဲသၞဴ၊ မန်ဍိက်ဗမာ ဒးဇာမိပ်တဴ၊ ဒှ်ဥက္ကဌ ခယျစိုပ်တရဴ၊ ကေတ်ဒၞာဲဂွံခုၚ် ပေၚ်ဗုၚ်အီစဴ၊ သွက်ဇကုဗော် ဇၞော်တိုန်သဴသဴ၊ စမိပ်တိက်ဖဲ ရဲပၠက်ဍေံအဴ၊ သွက်ဂကူကၠာ တၟာဒဳအချဴ၊ ညိဟွံမွဲရ ပလဝ်တိုၚ်ကဴ၊ ဂကူမန်ဗၠိုက် ကြိုက်ကဵုဒှ်တဴ၊ အခေါၚ်လိက်ပတ် ကတ်ဗတောန်အဴ၊ လၟုဟ်ဂတကီု သီုကဵုကၠာကြဴ၊ ဟွံမွဲလးလး ညးဒးလက်ဆဴ၊ ဍုၚ်မန်တၟးသာၚ် ညံၚ်ပၞာၚ်ကၠေၚ်သ္ဍဴ၊ ဟွံဂဵုရာၚ်ကဴ အဴမန်တၞီဗၠိုက်။
ယွံကလောတအ် တၟံညးဍုၚ်လိုက်၊ ရိုဟ်သၞာံဂၠိုၚ်ဝါ ဗၟာတအ်ဍဵုဍိုက်၊ ဂကူမန်ကွေံ ဍေံကဵုတၞီဗၠိုက်၊ ဂွံကၠက်ဂၠာဲရံၚ် ဗက်ဆံၚ်ဗက်ကွိုက်၊ တေံလကျာ်ဗၟာ ဝါဒဍဵုဍိုက်၊ ကွဵုသှ်လိက်မန် ဆီနန်ပိုဲဗၠိုက်၊ ဂၠံၚ်သာသနာ ပြာကဋ်ပ္ဍဲလိုက်၊ ဂရတ်ဇဳသာ် လကျာ်ဒိုဟ်ဂွိုက်၊ ၜိုန်မန်ဂွံဍုၚ် ဒးဒုၚ်ဒဒိုက်၊ ဍုၚ်မန်ဍုၚ်ဍိက် လိက်ပတ်လေဝ်ဗၠိုက်၊ ဍုၚ်မန်ဍုၚ်ပၠက် မန်ကၠက်တိုက်ရိုက်၊ လေၚ်ရနာဲတအ် တၟံညးဒးဠိုက်၊ ဍန်ဂြက်ဂၠိုၚ်နဲ ဟွံမွဲတသိုခ်၊ ပိုဲဒးရပ်လွဟ် ပြဟ်ဒးဗတိုက်၊ ဂွံဇၞးဘိုက်ပၠိုက် ကွိုက်ကဵုဇြၚ်သၞာ်။
ဗမာဂြုဲဂြုတ် ယုတ်သီုလကျာ်၊ သၚ်မန်ဂမၠိုၚ် ဂၠိုၚ်မံၚ်လီုလာ်၊ လ္ၚဵုသွဟ်ဟွံသွဟ် ဒှ်ၜါလပါ်၊ သၚ်မန်ဟွံညဳ ချဳတိုန်ဂြိုဟ်ယာ်၊ ဗၟာတအ်ထေၚ်ဗၠေတ် ကေတ်ဒုဟ်ဂၠိုၚ်သာ်၊ သာသနာမန် ညန်ကဵုလီုလာ်၊ ဟိုတ်နူဗမာ ဝါဒဂျိနာ်၊ ဗီုပြေၚ်ကၠောန်ခၞံ ကြံကြသ္အဵုသ္အာ်၊ သၞောတ်သၟာန်သွဟ်လိက် ဒှ်ပၟိက်လကျာ်၊ သၚ်ဗၟာလေဝ်ယုတ် ဟီုပျုတ်ဂၠိုၚ်သာ်၊ ရပ်လွဟ်မြပၠန် ဒးပန်ဒးဗာ်၊ ထပက်ကဵုဗၞုဟ် လၟုဟ်ရပ်ဇြၚ်သၞာ်၊ ပေဲါဂစိုတ်ဂှ် ဆီဒှ်ညံၚ်ဍာ်၊ သတီုလဝ်ဂြိုဟ် စိုတ်မ္ၚိုဟ်ရပ်သၞာ်၊ ဒးပန်ဒးဗာ် စိုပ်ဍာ်ကမၠက်။
ဂကူဗၟာဆံၚ် ညံၚ်ဍေံဂွံကၠက်၊ လွဟ်ဂတာပ်ခေတ် ကေတ်နၚ်ကိုဋ်လက်၊ မန်ပိုဲဂမၠိုၚ် ဂၠိုက်ကဵုၝောံကၟက်၊ ဝုတ်ဝုတ်ဗၠာဲဗၠာဲ ကၟာဲကၟာဲၜက်ၜက်၊ ခမဳသၚ်မန် ဆီနန်သက်သက်၊ ပညာလေဝ်ဂၠိုၚ် ဒှ်တိုၚ်ဒှ်ကြက်၊ ဃောနွံဇြဟတ် စိုတ်ထတ်တဴတက်၊ ဂကူမန်ဍာံ သၞာံပကဵုၜက်၊ ရပ်လွဟ်ဗတိုက် ကွိုက်ဒဵုဍေံကၠက်၊ ဒးဒုၚ်လအ်လ ဘဝဍိက်ပၠက်၊ ချိုတ်မိပ်မံၚ်ဟာ ထေၚ်အာဝိပက်၊ ဂွံဗၠးနူဍိက် မိက်ကဵုတဴတက်၊ ဗတိုက်ရနွံ အလုံဒှ်သွက်၊ ဂြိုပ်ဇၞော်မိပ်ကွေံ ဍေံဒှ်ရိုဟ်ကၞက်၊ သီုၝောံသီုကၟက် ဆက်တိတ်အိုတ်ညိ။
− ၁၃၀၄−သၞာံ၊ ဂိတုမာ်အိုတ် ချူဇန် စိုပ်ဒတုဲတုဲ
၁၃၆၅−သၞာံ၊ ထပ်လဟဵုလဝ်တၟိပၠန်တုဲ
ပတိုန်လဝ်စက် ကမ်ပျူတာ ရောၚ်။
၁၃၈၂−သၞာံ၊ ဂိတုမြေက္ကသိုရ် (၁၂) စွေက် ၊ မန်မန် (ရာမည) ပတိုန်စုတ်လဝ်ကဵု ပ္ဍဲဝဳကဳပဳဒဳယာ မန်ဏအ်ရောၚ်။
မိက်ဂွံတီအာဲ ဂၠာဲရံၚ်ဝၚ်အတိက် ဝၚ်အတိက်ဟွံရံၚ် ဆီပြံၚ်ဒှ်ဍိက်။
နိဿဲ
[ပလေဝ်ဒါန် | ပလေဝ်ဒါန် တမ်ကၞက်]လိက်ကဗျ − မာံတောအ် လိက်အုပ်မၞုံယၟု (ပရောမန် လောန်ကၠုၚ်တုဲ)