ပရေၚ်ထတ်ယုက်ဂှ်စွံအဓိကညိ
ပရေၚ်ထတ်ယုက်ဂှ်စွံအဓိကညိ
လုပ်ဗှ်ဖျုန်လိက်အိုတ်စိုအ်၊
ဥပမာဥပမေယျဟီုဂှ်တှ်ေ ယဝ်ရပိုဲမၞိဟ်တံဒှ်မံၚ်ခန္ဓကၟာ ခန္ဓမွဲမၞိဟ်နွံၜါနာဲကကဵုနာဲခသာ်ဏံဗွဲတုန်၊ ယဝ်အခါရနာဲကဒှ်ကောဇၞော်အာဒၞာဲလဵုလေဝ် ဒေံမွဲဆက်တောဲမံၚ်နာဲခဂှ်လေဝ် ဒးဗက်တောဲဍံၚ်အာကဵုကောဇကုနာဲကဂှ်ဇၟာပ်ဒၞာဲရ၊ ယဝ်ရနာဲကမုစဖျေဏာကီုလေဝ်တှ်ေ နာဲခဒေံဂှ်ဂွံစတုပ်တုပ်ကီုရ ဟိုတ်နူခန္ဓမွဲတုပ်တုပ်မဒှ်ရ၊ ယဝ်ရနာဲကစဏာစၞစနွံကဵုဓါတ်ခိုဟ်မ္ဂးတှ်ေလေဝ် နာဲခဂှ်လေဝ်ဂွံကၠုၚ်ဓါတ်ခိုဟ်ခိုဟ်တုပ်တုပ်ကီုရ၊ ယဝ်ရနာဲကဝေၚ်ပရေၚ်ထတ်ယုက်မ္ဂးတှ်ေ နာဲခဂှ်လေဝ်ပရေၚ်ထတ်ယုက်ခိုဟ်ကၠုၚ်ကီုရ၊ ယဝ်ရနာဲကသုၚ်အရက်သုရာစၞဗ္ၜူဗ္ၜူဂဥုဲတံမ္ဂးတှ်ေ နာဲခဂှ်လေဝ်ဇီုကပိုက်ကီုတုဲဗ္ၜးဓလူအာကီုတုဲ ပရေၚ်ထတ်ယုက်သဝ်ကၠုၚ်ကီုရ။
ပ္ဍဲကဵုအခိၚ်နာဲခညးမဒှ်ဒေံဂှ်ပရေၚ်ထတ်ယုက်ပရေံကၠုၚ်ဏောၚ်တှ်ေ နာဲခဂှ်လေဝ်ဒးချိုတ်အာကီုရ၊ တုဲတှ်ေ ပိုဲဏံညးမဒှ်ကောဏံဂှ်လေဝ်ဒးဗက်ချိုတ်အာကဵုဒေံဇကုတုပ်တုပ်ကီုရ ဟိုတ်နူကဵုပိုဲဏံဒှ်မံၚ်မွဲခန္ဓဟွံသေၚ်ဟာ၊ အိုတ်ကၞောတ်ဏောၚ်ဟီုဂှ်တှ်ေ ပရေၚ်ထတ်ယုက်ခိုဟ်ဏံဂှ်သြန်နွံမံၚ်ကီုလေဝ်ကလေၚ်ရာန်ကေတ်ဟွံလောဲဂှ်လဇုဲအာယျဏောၚ်။
ညးလ္ၚဵုတံဂှ်စောန်ပ္ဍဲအရာကၠောန်ကမၠောန်ဂၠာဲသြန်ကီုရ၊ ဆဂး ညးတံဝိုတ်သတိဟွံစွံအဓိကကဵုပရေၚ်ထတ်ယုက်ညးတံအိုတ်တုဲ မိပ်မံၚ်ကဵုကမၠောန်ဂၠာဲသြန်သၟးတုဲ ပကောံဂိုၚ်ဒေပ်ဂွံသြန်ပေၚ်ကဠာကီုလေဝ် အိုတ်ကၞောတ်ဂှ်ဟေၚ်ဒးကဵုထောံခရိတ်အ္စာဂဥုဲတံဖအိုတ်ရ၊ ယဝ်ရဒှ်သာ်ဏံဏောၚ်တှ်ေ မုပရောပိုဲတံဒးဂၠာဲသြန်ဂၠိုၚ်ဂၠိုၚ်ဂှ်အိုတ်ရော? လ္ပဝိုတ်ထောံအိုတ်ညိဂှ် ပရေၚ်ထတ်ယုက်ပိုဲဏံဂှ်စွံလၟေၚ်မွဲတွဵုညိ။
ပ္ဍဲကဵုပစ္စုပ္ပန်တ္ၚဲဏံလေဝ် စၞစနာနာလုပ်ကၠုၚ်ပ္ဍဲဘဝပိုဲမၞိဟ်တံအိုတ်တုဲ မပ္တံကဵုၜံက်အရက်သုရာဂဥုဲၜူမာဲနာနာသာ်တံဒှ်ကၠုၚ်စၞစဂတာပ်အခေတ်ညးတံကော်ဂးအိုတ်ရ၊ စၞစသာ်ဏံဒှ်တဴဂျိမွဲဟွံဒှ်ဖဵုကဵုပရေၚ်ထတ်ယုက်ပိုဲဏံတီကၠးမံၚ်တုဲ သာ်ဏံလေဝ်ပိုဲမၞိဟ်တံဗွဲမဂၠိုၚ်ဗက်ပြိုၚ်ပ္ကာန်ဂစာန်ရာန်စကာမံၚ်အိုတ်ရ၊ အိုတ်ကၞောတ်ဟေၚ် လတေၚ်ကၠေၚ်က္ဍဟ်ပိုဲဏံလီုလာ်စာ်ထောၚ်ဟွံကၠောန်ကမၠောန်အတိုၚ်သဘာဝဍေံဏောၚ်တှ်ေ ရုပ်သာ်ကျေဝ်ပိုဲဂွံလဝ်ဏံဂှ်လေဝ်ဒးချိုတ်အာမာန်လောဲလောဲရ၊ ကုသဵုဇၞော်အိုတ်ပ္ဍဲဘဝပိုဲမၞိဟ်ဏံဂှ်တှ်ေ ပရေၚ်ထတ်ယုက်မွဲယဝ်ခိုဟ်ဏောၚ်တှ်ေ ဣဏံညးတၠကုသဵုဇၞော်အိုတ်မဒှ်ရ။
အုပ်ကၠေံနိဂီုတုဲဆဝွံကၠာရအဴ ။