ပလေဝ်စိုတ် စရိုတ်ညိ
ပလေဝ်စိုတ် စရိုတ်ညိ
လောကမၞိဟ်ဘဝမၞိဟ် ရံၚ်ဗဵုနကဵုမတ်မၞုံကဵုပညာမ္ဂး ပေၚ်ကၞာတ်မံၚ်ကဵု ဒဒိုက်ဒုက္ခနာနာ ဒှ်လီုမံၚ်ဟွံဇူဒီု ထုဲထံၚ်နှဴရဴမံၚ်ကဵုသ္ဘဴဒးချိုတ် ဒးဂျိုၚ်လၟိုန်ရ။
ပ္ဍဲဘဝမွဲဘဝဏံ စိုတ်ဟွံဒှ်တသိုက်ဂှ် ပရေံနူမၞိဟ်ဟွံဒှ် တသိုက်ဏီရ၊ ဇမၠိၚ်အာယုက်မၞိဟ်ဂှ် လံမံၚ်ဟွံသေၚ် ဂွံမံၚ် မွဲခဏဍောတ်ဓဝ်ရ၊ ပ္ဍဲအခိၚ်ဂွံမံၚ်အာယုက်ဂၠေံဂၠေံဏံ ယဝ်ဒှ်မၞိဟ်စွံလဝ်စိုတ် ပရေံယုတ်သဝ်မ္ဂး ဖိုလ်ကလိဂွံဘဝမၞိဟ်ၚုဟ်မးဟွံမွဲရ။
စိုတ်ကျေဝ်မ္ဂး ရုပ်လေဝ်ကျေဝ် စိုတ်ဆာဲမ္ဂး ရုပ်လေဝ်ကေဝ် ဇြုၚ်ထတ်မြက်ရ၊ စိုတ်ခိုဟ်ဗုအးမ္ဂး ဒၞါတာကဵုဘဲယဲဝေဒနာ မာန်ရ၊ ပလေဝ်ကမၠောန်မာန် မ္ဂး ဟွံသေၚ် သာ်ဂှ် ညံၚ်ကမၠောန်ကံ ဂွံခိုဟ်ပလေဝ်ကဵုမာန်မ္ဂး စိုတ်လေဝ် ခိုဟ်မာန်ကီုရ၊ ကမၠောန်ခိုဟ် စိုတ်ခိုဟ် ဒှ်မာန်ရ။
မၞိဟ်ဟွံမိက်ဒုၚကကမျကဵုလောကမ္ဂး ပလေဝ်စိုတ်ကဵုမာန်ညိ၊ စိုတ် ရိစိုတ်ရိုၚ် စိုတ်ဒိုဟ်ဓီု စိုတ်ယုတ်မာတံ လ္ပကဵုဍိုက်ဂွံဘဝဇကုညိ၊ ဟိုတ် နူစိုတ်တုဲ ယၟုမၞိဟ်သမၠီု သပ္ပုရိုဟ်ပါ်ခြာအာရ။
စိုတ်ဂှ်ဒးပလေဝ်ကဵုဓဝ်သတိရ၊ ဂွံတန်ကြန်မံၚ်လ္ပာ်ခိုဟ်မာန်ဂှ် သမာဓိရ၊ မၞိဟ်ပစၚ်လဝ်အာရီုလ္ပာ်ခိုဟ်ဂှ် ဒှ်မၞိဟ်ပလေဝ်စိုတ်ရ၊ စိုတ်ခိုဟ်ဂှ်ဍေံဟွံသ္ပအာရီုလ္ပာ်ပရေံယုတ်သဝ်ရ။
စိုတ်ဂှ်သ္ဘဴဍေံ ၜိုဟ်လလံဇြုၚ်ကေဝ်မံၚ်ရောၚ်၊ ဟိုတ်နူသ္ဘဴ လောကဒေါသနှဴရဴလုပ်တုဲ ဍေံကၠိခန်အာရ၊ ပလေဝ်စိုတ်မ္ဂး ဒးစပလေဝ်နူမပ္တံ လောဘဒေါသနဒိဌိရ၊ ဟိုတ်နူဓဝ်စေတသိက်တုဲ စိုတ်တံဒးကၠိၚေတ်ကၠုၚ်ရ။
အိန်ထံၚ်လီုလာ် ကၠောန်ပိုန်ဒြပ် ဟွံဇၞော်မောဝ်၊ ကတ်သွဟ်ဟွံကလိ ဂွံဖိုလ်၊ ပံၚ်ဖက် ဆက်ဆောံ ဟွံပြေပြံၚ်ဂှ် ဒှ်ပွဂၠံစိုတ်ဟွံမိပ်ဖ္အိုတ်ရ၊ စိုတ်လီုမ္ဂး ကမၠောန်မၞိဟ်ဂှ်လေဝ် လီုဗက်အာကီုရ။
ကမၠောန်ဇကုဟွံမိက်ကၠောန်ဒးကၠောန်လေဝ် စိုတ်ဒှ်ဒဒိုက် တရဴဟွံမိက်အာဇကုဒးအာလေဝ်စိုတ်ဒှ်ဒဒိုက်၊ ဂဗဆဵုဒဒိုက်စိုတ် သာ်ဏံမ္ဂး ပလေဝ်ထောံစိုတ်တံဂှ်ညိ ကၠောန်စိုတ်မိပ်ပ်ညိ။
ပွမကၠောန်ဇကုဟွံဒှ်တသိုက်စိုတ်ဂှ် နူကၠာဟွံကၠောန်ဏီ ဒစးဒုၚ်တုဲကဵုတီလဝ်ကၠးကၠးညိ၊ မုဒှ်ဒးကၠောန်ကမၠောန်ဏံ စိုတ်ဟွံမိပ်ရော၊ ဒးတီလဝ်ဟိုတ်ဍေံကၠာရောၚ်၊ ဟိုတ်ဍာံမံၚ်ရ ဇကုဟွံမိက်ကၠောန် မ္ဂး စိုတ်ဂှ်ဒးပလေဝ်ဍေံရ။
ကမၠောန်ဇြိုၚ် ဟွံမိက်ကၠောန် ပရဲဟွံမွဲ ဟွံမိက်ကၠောန်ဂှ် ဒှ်စိုတ် ရဲဗက်သာ(အချောၚ်းသမားစိတ်)ရ ၊ စိုတ်ရဲဗက်သာတံဂှ် ဒှ်စိုတ်ယုတ်သဝ်မွဲရ။လ္ပာ်ပရေံဟွံကၠောန်ဂှ် ဒှ်သ္ဘဴစိုတ်ခိုဟ်ရ။
စိုတ်ဒှ်ဒဒိုက်ဂှ် ဇကုမွဲဟေၚ်ဒးဒုၚ်ရ၊ စိုတ်ဂှ်ပလေဝ်ထောံမာန်မ္ဂး ဇကုဒှ်တသိုက်ရ၊ ပိုန်ဒြပ်လီု ဒှ်ဒဒိုက်စိုတ်မ္ဂး ညံၚ်ပိုန်ဒြပ် ဟွံလီုလာ်ဂှ် မၚ်မွဲစိုတ်ညိ သဘဴစိုတ်ဂှ် လ္တူအာရီုခိုဟ် ဍေံဟွံမံၚ် ဍေံဟွံမိပ် လ္ပာ်အာရီု ပရေံဟေၚ် ဍေံမိပ်လဟိၚ်ရ။
ရဲပၟဝ်ဓဝ်ဝိပဿနာဂှ် ဒှ်ရဲပလေဝ်စိုတ်ရ၊ စိုတ်ပြးမံၚ်အာရီုမ္ဂးဂှ် ညးဟခေါၚ်စွံလဝ် မွဲဒၞဲါတုဲ ပိုဲကေတ်ဂှ် ကဵုစိုတ်ဒှ်ဗက်ရ၊ စိုတ် ဍေံတန်မွဲဒၞဲါမ္ဂး ပလေဝ်ဂွံရ။
ပလေဝ်စိုတ်မ္ဂး ကမၠောန်ခိုဟ်ဂှ် ကၠောန်ဗက်၊ ဂလာန်ခိုဟ်ဂှ် ဟီုကသပ်ခိုဟ်ဆာဲဂှ် ချပ် ဒှ်ညးပလေဝ်စိုတ်မွဲရ၊ မၞိဟ်ပလေဝ်လဝ်စိုတ်ဂှ် ရံၚ်ဗွဲမ္ၚးလေဝ် ဆီသောဲမံၚ်ရောၚ်။
ဆဵုညာတ်ပရေၚ်ယှုက်ထုဲမွဲမွဲ စိုတ်ယှုက်ထုဲကွေံယဝ်ဖျေံကၠေံစိုတ်ဂှ်မ္ဂး သာတုဲစိုတိယှုက်ထုဲဏီရ၊ သ္ဘဴဍေံဂှ်ဍေံဒးဒှ်ရ ဖျေံကၠေံစိုတ်သာ်ဏံမာန်မ္ဂး စိုတ်ယှုက်ထုဲဟွံမွဲရ။
မၞိဟ်ၚံက်စၞာဲ မၞိဟ်လီလာန် အတိုၚ်ဟီုဟွံကၠောန်တံဂှ် ဒှ်မၞိဟ်ဟွံပလေဝ်လဝ်စိုတ်ရ၊ ဒုၚ်ဂိမာန် လ္ဂူတပ်တး ဆဵုညးဒှ်ဒဒိုက်လေပ် ဆာန်ဍူတံဂှ် ဒှ်မၞိဟ်ပလေဝ်လဝ်စိုတ်ရ။
ဆဵုညာတ်ညးခိုဟ်နူဇကု မိပ်စိုတ်အိုဟ်တၟိုဟ် ဆဵုညးသၠုၚ်ညးလေပ် ညးလောဲလ္တူဇကုမိပ်စိုတ် မၞုံကဵုဝတ်ရှ်ေသှ်ေရဴဂဴ လေဝ်ရီုဗၚ်ထံက်ပၚ်ညးဒိုက်ဝါတ်တံဂှ် ဒှ်ညးပလေဝ်စိုတ်မာန်ဖ္အိုတ်ရ။
‘‘ အတ္တသမ္မာပဏိမိ ’’ ဒှ်မၞိဟ်မွဲမွဲမ္ဂး ဒးသှ်ပတဴလဝ် ဇကု ဒးဒးရးရး ဒးစွံပ္တန်စိုတ်ခိုဟ်ဟ်ကျေဝ်ကျေဝ် ဒးမၚ်မွဲဒ္ဂေတ်သိက္ခာမၞိဟ် ဍိုက်က်ပေၚ်ၚ် လက္ချန်ဍာ်ဒကေဝ်ဏံဂွံပေၚ်မာန် ဒးပလေဝ်လဝ်စိုတ် ဇကုကၠာရောၚ်။
မၞိဟ်စိုတ်ခိုဟ်ပြဲတံဂှ် ကၠောန်ကမၠောန်လေဝ်ကမၠောန်ခိုဟ်ဟ်ရ ကၠောန် မံၚ်တန်တဴလေဝ်ဒၞဲါဟွံမွဲကဵုဒုဟ်ဒဏ်ရမံၚ်၊ ပံၚ်ကဵုမၞိဟ်လေဝ် မၞိဟ်ခိုဟ် မၞိဟ်ဍိုဟ်ရံၚ် မၞိဟ်တီအခိုက်အလိုက်မၞိဟ်တံဂှ် ဒှ်မၞိဟ် ပလေဝ်စိုတ်ရ။
ခိုဟ်တီတုဲဟွံဂိုၚ်ကေတ် ဒ္ဂေတ်ဗက်ဟွံမာန်ဂှ် ဟိုတ်နူဟွံ ပလေဝ်လဝ်စိုတ် ပလေဝ်လဝ်စိုတ်နွံမ္ဂး လ္ပာ်ပရေံဒှ်ဒုဟ်မုဟွံကၠောန်ရ၊ မၞိဟ်စိုတ်ခိုဟ်ဂှ် ညးရှ်ေသှ်ေဗုဒ္ဓဘာသာတံ ကော်စပူဂိုလ်သပ္ပုရိုဟ်ရ
‘‘ သပ္ပုရိုဟ်ဂှ် ပလေဝ်စိုတ် ခိုဟ်နူတၠပညာတံ ဏီရ ’’
ကေတ်တသိုက်မ္ဂး စိုတ်ဂွံတသိုက်ဂှ် လွဳၜံၚ်လဝ်ကၠာ မၞိဟ်ဗွဲမဂၠိုၚ်ဂှ် လွဳၜံၚ်လဝ်စိုတ်ဒှ်ဒဒိုက်ဖ္အိုတ်ရ။
ကျာ်ဇၞော်အ္စာမဟာထေရ်ပါလိတ