ပါရမဳ (၁၀)၊ ပါရမဳ (၃၀)

ဒါနပါရမဳ
သဳလပါရမဳ
နိက္ခမပါရမဳ
ပညာပါရမဳ
ဝဳရိယပါရမဳ
ခန္တဳပါရမဳ
သစ္စာပါရမဳ
အဓိဋ္ဌာပါရမဳ
မေတ္တာပါရမဳ
ဥပေက္ခာပါရမဳ။

သာမညပါရမဳ - သ္အာၚ်နူခန္ဓကာယဇကုတုဲ ပွမသၠးပွးကဵုဒါန်။
ဥပပါရမဳ - ပွမသၠးပွးကဵုဒါန် မပ္တံကဵုအဝဲဇိုၚ်တဲက္တောဝ်မုဟ်။
ပရမတ္ထပါရမဳ - ပွမသၠးပွးကဵုဒါန်လမျီုဇကု။ (ပါရမဳစှ်ပၟဝ်ကဵု ပါရမဳ(၃)သာ်ဝွံတုဲ တိတ်ဒှ်အာပါရမဳပိစှော်ရောင်)။

ပါရမဳ(၁၀)၊ ပါရမဳ(၃၀) ဗွဲတြး

၁။ ဒါနပါရမဳ

သ္အာၚ်ာအာနူခန္ဓကာယဇကုတုဲ ပွမသၠးပွးကဵုဒါန် မပ္တံကဵုပိုန်ဂြပ်, အရပ်အရာတုဲ၊ သမ္ဘာကောန်ဇာတ်အလုံအိုဿီု။

ဒါနဥပပါရမဳ

ပွမသၠးပွးကဵုဒါန်အဝဲဇိုၚ်တဲ မပ္တံက္တောဝ်မုဟ်အိုဿီု။

ဒါနပရမတ္ထပါရမဳ

ပွမသၠးပွးကဵုဒါန် လမျီုဇကုဇကု၊ (ညံၚ်ရဴ-သသပဏ္ဍိတဇာတ်၊ သၟိၚ်ဗ္တာဲကဵုဒါန်ဖျုန်ဇကု, ကဵုဒါန်လမျီု၊ သၟိၚ်သိဝိ-ဂၠံက်မတ်ကဵုဒါန်၊ သၟိၚ်ဝေဿန္တရ် ကဵုဒါန်ကောန်သမ္ဘာ)။

၂။ သဳလပါရမဳ

ဟွံရန်ကဵုပိုန်ဒြပ် အရပ်အရာမပ္တံကောန်ဇာတ်သမ္ဘာတုဲ၊ ပွမထိင်ဒက်မင်မွဲဓရ်သဳလဇကုဇကု။

သဳလဥပပါရမဳ

သီုဟွံရန်ကဵု အဝယ်ခန္ဓကာယဇကု မပ္တံကဵုက္တောဝ်မုဟ်တုဲ၊ ပွမထိင်ဒက်မင်မွဲဓရ်သဳလဇကုဇကု။

သဳလပရမတ္ထပါရမဳ

ၜိုန်ရစပ်ကၠုၚ်ကဵုလမျီုကီုလေဝ် ဟွံရိုဟ်ကဵုလမျီု၊ သၠးလမျီုဇကုဇကုတုဲ၊ ပွမမၚ်မွဲထိၚ်ဒက်လဝ်သဳလဇကုဇကု ညံၚ်ရဴဟွံဂွံလီုလာ်။ (ညံၚ်ရဴ-ကောန်သၟိၚ်အလဳနသတ္တု ဒုၚ်စၞးမအံက်ကဵုလကိုဟ်စ)။

၃။ နေက္ခမပါရမဳ

ပိုန်ဒြပ်အရပ်အရာ မပ္တံကဵုကောန်တြုံ, ကောန်ဗြဴ, သမ္ဘာအိုဿီုတံဂှ် သၠးထောံကၠေံအိုတ်တုဲ၊ ပွမပ္တိတ်ဇြဟတ်လွဳပရာ ညံၚ်ရဴဂွံတိတ်ဗၠးအာ နူဂြိုပ်ဇၞော်တဏှာမတွံဂး ကိလေသ။

နေက္ခမဥပပါရမဳ

ၜိုန်ရဒးသၠးထောံကၠေံ မပ္တံအဝယ်ဇိုင်တဲက္တောဝ်မုဟ်ဇကုကီုလေဝ် ပွမပ္တိတ်ဇြဟတ်လွဳပရာညံၚ်ရဴဂွံတိတ်ဗၠးအာနူဂြိုပ်ဇၞော်တဏှာ မတွံဂးကိလေသ။

နေက္ခမပရမတ္ထပါရမဳ

ၜိုန်ရဒးသၠးထောံကၠေံလမျီုဇကုဇကုကီုလေဝ် ပွမပ္တိတ်ဇြဟတ်လွဳပရာ ညံၚ်ရဴဂွံတိတ်ဗၠးအာနူဂြိုပ်ဇၞော်တဏှာ မတွံဂးကိလေသ။ (ညံၚ်ရဴ-ကောန်သၟိၚ်အယောဃရ-သၟိၚ်မအံက်ဂွိၚ်ဖေက်လကိုဟ်စတုဲ၊ ခြိုင်စွံလဝ်ပ္ဍဲခရိုင်ပသဲ အာယုက်(၁၆)သၞာံ ဂွံသံဝေဂတုဲ တိတ်ဂြိုပ်သ္ပခမဳရသိ)။

၄။ ပညာပါရမဳ

သ္အာၚ်အာနူခန္ဓကာယဇကုတုဲ ပ္ဍဲအရာမ္ဒးဖျေံသ္ဂုတ်သွာတ်ဗၠေတ်ဒးဂမၠိုၚ် ဝတ္ထုပိုန်ဒြပ်, အရပ်အရာအိုဿီု မပ္တံကဵုကောန်တြုံ, ကောန်ဗြဴ, သမ္ဘာတံဂှ် ဟွံစွံပဓာနတုဲ ပွမပိုင်ခြာဖျေံသ္ဂုတ်သွာမာန်။

ပညာဥပပါရမဳ

ဟွံရန်ကဵုအဝယ်ခန္ဓကာယဇကု မပ္တံဇိုၚ်တဲက္တောဝ်မုဟ်တုဲ အရာမ္ဒးဖျေံသ္ဂုတ်သွာတ်ဗၠေတ်ဒးဂမၠိုၚ် ပွမပိုၚ်ခြာဖျေံသ္ဂုတ်သွာတ်မာန်။

ပညာပရမတ္ထပါရမဳ

သီုဟွံရိုဟ်လၟိဟ်ကဵု လမျီုဇကု အရာမ္ဒးဖျေံသ္ဂုတ်သွာဗၠေတ်ဒးဂမၠိုၚ် ပွမပိုင်ခြာဖျေံသ္ဂုတ်သွာမာန်။ (ညံင်ရဴ-ဇာတ်မဟောသဓတၠပညာ)။

၅။ ဝဳရိယပါရမဳ

သ္အာၚ်အာနူခန္ဓကာယဇကုတုဲ ဟွံရန်ကဵုဝတ္ထုပိုန်ဒြပ်, အရပ်အရာအိုဿီု မပ္တံကဵုကောန်တြုံ, ကောန်ဗြဴ, သမ္ဘာတံဂှ်တုဲ ပွမလွဳပရာပ္တိတ်ဇြဟတ်ကဵုဓရ်။

ဝဳရိယဥပပါရမဳ

ဟွံရန်ကဵုခန္ဓကာယဇကု မပ္တံဇိုၚ်တဲမုဟ်က္တောဝ်တုဲ၊ ပွမလွဳပရာပ္တိတ်ဇြဟတ်ကဵုဓရ်။

ဝဳရိယပရမတ္ထပါရမဳ

ဟွံရန်ကဵုလမျီုဇကုဇကုတုဲ ပွမလွဳပရာပ္တိတ်ဇြဟတ်ကဵုဓရ်။ (ညံၚ်ရဴ-ဇာတ်မဟာဇနက မၞုံကဵုလွဳမဇၞော်လောန်)။

၆။ ခန္တဳပါရမဳ

သ္အာၚ်နူခန္ဓကာယဇကုတုဲ ဝတ္ထုပိုန်ဒြပ်, အရပ်အရာအိုဿီု မပ္တံကဵုကောန်တြုံ, ကောန်ဗြဴ, သမ္ဘာတံဂှ် ၜိုန်ရသၞသတြုကၠုၚ်ပ္ဍဵပ္ဍိုက်, ဗ္တိုက်ပၠံၚ်ၜးဏာကီုလေဝ် ဟွံမွဲကဵုက္လေင်ပၠန်ဂတး, ဟွံမွဲကဵုထေဲပၞတ်, ဟွံမွဲကဵုပွမကလေင်ဒက်ဝဲတဲကြုတ်၊ အေင်ဒုင်တုဲ သ္ပဒတဴရ။

ခန္တဳဥပပါရမဳ

မပ္တံကဵုခန္ဓကာယအဝယ်ဇိုၚ်တဲ က္တောဝ်မုဟ်၊ ၜိုန်ရသၞးသတြုဂမၠိုၚ် ကၠုၚ်သ္ပပ္ဍဵုပ္ဍိုက်, ကဵုဒဒိုက်ၜုၚ်တက်ပျဲပျာံကီုလေဝ် ဟွံမွဲကဵုက္လေင်ပၠန်ဂတး, ဟွံမွဲကဵုထေဲပၞတ်, ဟွံမွဲကဵုပွမက္လေင်ဒက်ဝဲဒတဲကြုတ်၊ အေင်ဒုင်တုဲ သ္ပဒတဴရ။

ခန္တဳပရမတ္ထပါရမဳ

ၜိုန်ရသၞသတြုဂမၠိုၚ် ကၠုၚ်ပ္ဍဵုပ္ဍိုက်ပြိုက်ဂစိုတ်လမျီုဇကုကီုလေဝ် ဟွံမွဲကဵုက္လေင်ပၠန်ဂတး, ဟွံမွဲကဵုထေဲပၞတ်, ဟွံမွဲကဵုပွမက္လေင်ဒက်ဝဲဒတဲကြုတ်၊ အေင်ဒုင်တုဲ သ္ပဒတဴရ။ (ညံၚ်ရဴ-ဇာတ်ရသိခန္တဳဝါဒဳ၊ ဇာတ်သၟိၚ််ကၞုဲ ဟံၚ်ပ္တိုန်ဗၞးနူဇြဟ်)။

၇။ သစ္စပါရမဳ

သ္အာၚ်အာနူခန္ဓကာယဇကုဇကုတုဲ ဟွံရန်ကဵုဝတ္ထုပိုန်ဒြပ် မပ္တံကဵုကောန်တြုံ, ကောန်ဗြဴ, သမ္ဘာတံဂှ်တုဲ ပွမဒ္တူဒလာင်လပါ်ဓရ်ဍာံ။

သစ္စဥပပါရမဳ

ဟွံရန်ကဵုအဝယ်ခန္ဓကာယဇကုဇကုတုဲ ပွမဒ္တူဒလာၚ်လပါ်ဓရ်ဍာံ။

သစ္စပရမတ္ထပါရမဳ

ၜိုန်လမျီုဇကု ဒးအာစိုပ်ဘဲပ္ဍဵုပ္ဍိုက်, ဒးဒုင်ပြိုက်ဂစိုတ်မာန်ကီုလေဝ် ပွမဒတူဒလာင်လပါ်ဓရ်ဍာံ။ (ညံင်ရဴ-ဇာတ်ပေါရိသာဒ သၟိၚ်မဟာသုတသောမ)။

၈။ အဓိဋ္ဌာနပါရမဳ

သ္အာၚ်အာနူခန္ဓကာယဇကုဇကုတုဲ သီုဟွံရန်ကဵုဝတ္ထုပိုန်ဒြပ်အရပ်အရာအိုဿီု မပ္တံကဵုကောန်တြုံ, ကောန်ဗြဴ, သမ္ဘာတံမွဲသာ် ပွမသှ်ပ္တဴလဝ် အဓိဋ္ဌာန်ဇကုမဖျေံလဝ် ဗွဲမခိုင်ဗိုန်။

အဓိဋ္ဌာနဥပပါရမဳ

သီုဟွံရန်ကဵုအဝယ်ခန္ဓကာယဇကုမွဲသာ် ပွမသှ်ပ္တဴလဝ်အဓိဋ္ဌာန်ဇကု မဖျေံလဝ်ဗွဲမခိုင်ဗိုန်။

အဓိဋ္ဌာနပရမတ္ထပါရမဳ

ၜိုန်ဒးအာစိုပ်ဘဲလမျီု ပွမသှ်ပ္တဴလဝ် အဓိဋ္ဌာန်ဇကုမဖျေံလဝ် ဗွဲမခိုင်ဗိုန်။ (ညံင်ရဴ-ဇာတ်တေမဳ ကောန်သၟိၚ်ဗောဓိသတ်တေမဳ)။

၉။ မေတ္တာပါရမဳ

ဍေံမသ္အာၚ်အာနူအဝယ်ခန္ဓကာယဇကုတုဲ ဝတ္ထုပိုန်ဒြပ်, အရပ်အရာအိုဿီု သ္ပပ္တံနူကောန်တြုံ, ကောန်ဗြဴ, သမ္ဘာတံဂှ် ၜိုန်ရသၞသတြုကၠုၚ်ပ္ဍဵုပ္ဍိုက်, ပြိုက်ပျဲပျာံကီုလေဝ် ဟွံက္လေင်ပၠန်ဂတး, ဟွံထေဲပၞတ်, ဟွံကလေင်ဒက်ဝဲတဲကြုတ် သှ်ပ္တဴလဝ်ဓရ်မေတ္တာစိုတ်တုဲ တန်တဴရ။

မေတ္တာဥပပါရမဳ

သၞသတြုဂမၠိုၚ် ၜိုန်ရကၠုၚ်ပ္ဍဵုပ္ဍိုက်ပြိုက်ပျဲပျာံ မပ္တံအဝယ်ခန္ဓကာယဇကုကီုလေဝ် ဟွံက္လေင်ပၠန်ဂတး, ဟွံထေဲပၞတ်, ဟွံက္လေင်ဒက်ဝဲဒတဲကြုတ် သှ်ပ္တဴလဝ်ဓရ်မေတ္တာစိုတ်တုဲ တန်တဴရ။

မေတ္တာပရမတ္ထပါရမဳ

သၞသတြုဂမၠိုၚ် ၜိုန်ရကၠုၚ်ပ္ဍဵုပ္ဍိုက် ပြိုက်ပျဲပျာံလမျီုဇကုကီုလေဝ် ဟွံကလေင်ပၠန်ဂတး, ဟွံထေဲပၞတ်, ဟွံက္လေင်သ္ပပွဒက်ဝဲဒတဲကြုတ် သှ်ပ္တဴလဝ်မေတ္တာစိုတ်တုဲ တန်တဴရ။ (ညံၚ်ရဴ-ဇာတ်သုဝဏ္ဏသာမ်)။

၁၀။ ဥပေက္ခာပါရမဳ

သ္အာၚ်အာနူအဝယ်ခန္ဓကာယဇကုတုဲ လ္တူပိုန်ဒြပ်, အရပ်အရာအိုဿီု မပ္တံကဵုကောန်တြုံ, ကောန်ဗြဴ, သမ္ဘာတံဂှ် ကုမိတ်သဟာဲ မၞုံပၟိက်ကၠုၚ်ဒ္တုဲဖဵုဂှ်လေဝ်ကီု, ကုသၞသတြုဟွံမွဲပၟိက်ကၠုၚ်ဒ္တုဲဖဵုဂှ်လေဝ်ကီု လ္တူညးဂမၠိုၚ်တံဂှ် ဓရ်ပွမ္ဒးက္ဍုဟ်, ပွမ္ဒးသ္ဍိုက်ဆာန်တံဂှ် ညံင်ရဴဟွံမွဲတဴကဵု ပွမတၟေင်မွဲသာ် စွံလဝ်စိုတ်ဗွဲမဇ္ဇျဟ်တုဲဒၟံၚ်တန်တဴရ။

ဥပေက္ခာဥပပါရမဳ

ကုသၞသတြုမပ္ဍဵုပ္ဍိုက်ကၠုၚ် လ္တူအဝယ်ခန္ဓကာယဇကုကီု၊ ကုမိဿဟာဲမၞုံပၟိက်ကၠုၚ်ဒ္တုဲဖဵုလ္တူဇကုတံကီု လ္တူညးဂမၠိုၚ်တံဂှ် ဓရ်ပွမဒးက္ဍုဟ်, ပွမ္ဒးသ္ဍိုက်ဆာန်တံဂှ် ညံၚ်ရဴဟွံမွဲတဴကဵု ပွမတၟေင်မွဲသာ် စွံလဝ်စိုတ်ဗွဲမဇ္ဇျဟ်တုဲ ဒၟံၚ်တန်တဴရ။

ဥပေက္ခာပရမတ္ထပါရမဳ

ၜိုန်ရသၞသတြုဂမၠိုၚ် ပ္ဍဵုပ္ဍိုက်ပြိုက်ဂစိုတ်လမျီုဇကုကီု၊ ကုမိတ်သဟာဲမၞုံပၟိက်ကၠုၚ်ဒ္တုဲဖဵုလ္တူဇကုတံကီု၊ လ္တူညးဂမၠိုၚ်တံဂှ် ဓရ်ပွမ္ဒးက္ဍုဟ်, ပွမ္ဒးသ္ဍိုက်ဆာန်တံဂှ် ညံၚ်ရဴဟွံမွဲတဴကဵုပွမတၟေင်မွဲသာ် စွံလဝ်စိုတ်ဗွဲမဇ္ဇျဟ်တုဲဒၟံၚ်တန်တဴရ။ (ညံၚ်ရဴ-ဇာတ်လောမဟံသ၊ သၠးကၠေံဒြပ်ရတ်အိုဿီုတုဲ သ္ပခမဳရသိမ္ဂး ဖေက်ညးသ္အာင်လျုင်ဇြုင်သ္ဍိုက်တုဲ နကဵုဗွိုက်လ္တက်မွဲဂတှ်ေ ဗိုက်လ္တက်တုဲ ဂ္ၚေင်တဴရ၊ ညးသ္အာၚ်ထေင်တမြအ်တုဲ ပ္ဍဵုပ္ဍိုက်ပရိုက်ပျဲပျာံ သ္ပစရဵု, ခါ်ချဟ်, ကဵုဒွဵုဒွိုက်လေဝ်ဟွံထေဲပၞတ်)။