ပါလိတ၊ ကျာ်ဇၞော်ဘာတိုက်တၟိ ဍုင်ကၟာဝက်
| ကျာ်ဇၞော်အစာ ပါလိတ မဟာထေရ် | |
|---|---|
 ဗီုသၞိင်ရုပ် ကျာ်ဇၞော်အစာ ပါလိတ မဟာထေရ် | |
| သၠးဂၠံဂဝ် |
မာံမည်ထဝ် နဝ်ဝေမ်ဗါ ၂၇၊ ၁၉၂၄ ကၟာဝက်၊ အရာပ်ထံင်ဘုတ် |
| စုတိ | နဝ်ဝေမ်ဗါ ၂၂၊ ၂၀၂၁ (အာယုက် ၉၆) |
| ဂကူ | ဂကူမန် |
| ကဆံင်ပညာ | ဓမ္မာစရိယ |
| သၞာံချဳဓရာင် | နူသၞာံ ၜိုတ် ၁၃၀၀ |
| မဒယှ်တဴ | နကဵုအစာကဝိဇၞော် |
| ချဳဓရာင် | ချဳဓရာင် သွက်ဂကူမန် ဂွံဗၠးၜး |
| အံက် | နာဲခရေဲ၊ မိဣထဲ |
| ဂယိုင်လမျီု | နွံပိုန် ဘာတိုက်တၟိ၊ ဍုင်ကၟာဝက် |
ကျာ်ဇၞော်အစာ မှာထေရ် ပါလိတ ယၟုမြဟ်တဴ နဒဒှ် အာဇာနဲလိက်ပတ်မန်ဝွံ ချူခၞံကၠုင် လိက်ပြကိုဟ် လၟိဟ်ကၠံကၞပ်ပြင်၊ ချူကၠုင် လိက်ပရေင်၊ လိက်ဒွက်၊ လိက်ကဗျလင်္ကာ မရိုဟ်လၟိဟ်ဟွံမာန်တုဲ ရံင်ဗီုဇၟန်လိက်ညး၊ ဒြဟတ်ကၞေဟ်ညးကီု သီုကဵုလၟိဟ်လိက်ကၞပ် ညးမပတိတ်ကၠုင်ကီုမ္ဂး ညးဝွံ ပ္ဍဲခေတ်ပစ္စုပ္ပန်ဏအ် ဒှ်အစာကဝိမန်ဇၞော်အိုတ်မွဲလေဝ် ညးဂမၠိုင် ဟီုထိုင်သးဒၟံင်အိုတ်ကီုရ၊၊ ပါဲနူ ခၞံပြကိုဟ် မချူလိက်တုဲ ကမၠောန်လိက်ပတ်မန်ဂွံဇၞော်မောဝ်၊ အခေါင်ဇာတိဂကူမန် ညံင်မန်တအ် ဂွံဖန်ကေတ်မာန်ဂှ်လေဝ် နကဵုနဲကဲနာနာ မွဲကရောမ် ကုညးမဆာန်ဂကူမန်တအ်ဂှ် ဂိုတ်ဂစာန် ကၠောန်ကၠုင် နူဘဝသင်သၟတ် စဵုကဵု လအိတ်အဝဲရ။
ပထမအဝဲ
[ပလေဝ်ဒါန် | ပလေဝ်ဒါန် တမ်ကၞက်]အစာကဝိမန်ဇၞော် မှာထေရ်ပါလိတ နကဵုယၟု နာဲမည်ထဝ်ဝွံ ကတဵုဒှ်မၞိဟ် ပ္ဍဲသက္ကရာဇ်ဍုင် ၁၂၈၆ ဂိတုမြေက္ကသဵု ၂ မံက် (၁၉၂၄ နဝ်ဝေမ်ဗါ ၂၇)တ္ၚဲဗြဴဗ္တိ ပ္ဍဲအခိင်ဗ္တံသ္ဂာ မအံက် နာဲခရေဲ မိအံက် မိဣထဲ ပ္ဍဲအရာပ်ထံင်ဘုတ် ကွာန်ကၟာဝက်၊ ပွိုင်ဍုင်မုဟ်ဍုင်ရ၊၊ ပၞောဝ်ကဵု ကောဒေအ် မသုန်တၠ(မာံမည်ထဝ်၊ မာံကောန်ဆာန်၊ မာံလှဖေ၊ မာံစာန်သိုင်၊ မိင္ၚိုဲထုင်) ဂှ် ညးဒှ် ကောဇၞော်အိုတ်တုဲ ဒေအ်တြုဟ်နွံပိ ဒေအ်ဗြဴ နွံမွဲရ၊၊ ဒေအ်ညး မာံကောန်ဆာန်ဂှ် ဂွံအာယုက် ၂ သၞာံဂှ် စုတိအာရ။ နူဍောတ်တ် အဝဲမံင်ဘာဂွံ အာမံင် ဘာတန်အလဵုအသဳ မဒှ်ဘာ မၞုံဗဒါဲဘာတိုက်တၟိ ကွာန်ကၟာဝက်ဂှ် ဂွံအံင်ကေတ် ပန်တန်တုဲ မိမညး အာပအပ်ညး ဘာလကျာ် ပ္ဍဲဘာဗၠိုင်လၟု မဒှ်ဘာ အဇုကျာ်ညး မဒှ်ဒၟံင် ကျာ်ဇၞော်ရ၊၊ ကလိဂွံအယုက် ၁၅ သၞာံ (၁၃၀၁၊ ဂိတုပုဟ်ၜါမံက်) ပထပိုဲ ပ္ဍဲဘာတိုက်တၟိ ဇရေင်ကျာ်ဇၞော်အစာ စန္ဒောဘာသာတုဲ ကလိဂွံ ယၟု ထပိုဲပါလ၊၊ ပထပိုဲ ဂွံပိဝှ်၊၊ သ္ၚိမိမညးတအ်ဂှ် ဟိုတ်နူ နွံဒၟံင် ပ္ဍဲဓယံက်ဂြိုပ် ကၞောဝ်ၜဳ/ကြုင် ပ္ဍဲဗဒါဲ ဘာဗၠိုင်လၟုဂှ်တုဲ အပါညး နာဲခရေဲ ဒှ်ယဲ အစာသဝ်မန်တအ် မကော်စ ယဲဇွဟ်ကၞောဝ်ၜဳရ၊၊ ဟိုတ်နူမအံက်ယဲ ဒေအ်တအ်လေဝ် ဍောတ်မံင် ဇကုမဒှ်ကောဂၠု ဒးကေတ်တာလျိုင် ဒၞာဲအပါ ပ္ဍဲကမၠောန်ဗ္ၚ ကမၠောန်ဂူတုဲ ဒးရာံတိတ် နူဘဝထပိုဲ၊၊ စိုပ်သၞာ ၁၃၀၈ အပါကလိဂွံအယုက် ၄၀ ဒးစုတိအာ နကဵုယဲဇွဟ်ဂှ်ရ၊၊ ဒေအ်တအ်လေဝ် ဇၞော်တိုန် ဗလးစဂွံ၊ ကၠောန်စမာန်ဂှ် မာံမည်ထဝ် ကလိဂွံအယုက် ၂၂ ဂှ် လုပ်ပခမဳ ပ္ဍဲဘာတိုက်တၟိ ဂွံယၟု ခမဳ နာဲပါလိတ ရ၊၊
ဘဝကတ်လိက်
[ပလေဝ်ဒါန် | ပလေဝ်ဒါန် တမ်ကၞက်]နာဲပါလိတ ပဒတဴ ပ္ဍဲဘာတိုက်တၟိပန်ဝှ်တုဲ အာကတ်လိက် ပ္ဍဲဖအံက် ဘာဂြိုပ် ဇရေင် ကျာ်ဇၞော်စန္ဒိမာတုဲ လုပ်သှ်လိက် တန်မူလ၊ တန်ဍောတ်၊ တန်ဒေါဝ် အံင်ဇၟာပ်သၞာံ ပ္ဍဲသၞာံ ၁၃၁၈ ဂှ် ဂွံအံင်ဇၞးကေတ် တန်ဇၞော် နူဘာဂြိုပ်ဂှ်တုဲ ပြံင်အာမံင် ဇရေင် ကွာန်ဂဒေါံ (ကဒဵု) ဘာသုသာန် မွဲလစုတ်တုဲ ပ္ဍဲသၞာံဂှ်ရ ပြံင်အာပဒတဴ ပ္ဍဲဘာကျာ်သြဳမန် ဍုင်လ္ဂုင် လုပ်သွဟ်လိက် တန်ဓမ္မာစရိယ ပ္ဍဲသၞာံ ၁၃၂၀ ဂှ်ဂွံအံင်ဇၞးကေတ်အဋ္ဌကထာ၊၊
ပရေင်ချဳဓရာင် သွက်ဂကူ သွက်လိက်ပတ်
[ပလေဝ်ဒါန် | ပလေဝ်ဒါန် တမ်ကၞက်]ပ္ဍဲအခိင် မပဒတဴဒၟံင် ပ္ဍဲဘာကျာ်သြဳမန်ဂှ်ဟေင် ပရေင်ချဳဓရာင် ပရေင်ဍုင်ကွာန် သွက်အခေါင်ဂကူမန်ဂှ်လေဝ် ဇၞော်တိုန်မံင်တုဲ လပါ်ညးဍုင်ကွာန်တအ်ဂှ် ပသကိုပ်သကကဵု အစာဇၞော် နာဲဖဝ်ချဵု တုဲ ဒက်ပတန်ပတိုန် ဗော်မန်ကောန်ဍုင်အရင်၊ လပါ်သင်တအ်ဂှ် ဂကောံခမဳမည်ဟိတဂဝေသဳ အလုံတွဵုရးဍုင်မည်ဂှ် မံက်ဂတဝ်ကၠုင်တုဲ ပ္ဍဲဂကောံဂှ် နဒဒှ် ဒုဥက္ကဌကီု နဒဒှ်ဟိတဓရ (ညးရေင်တၠုင်ဖဵု)ကီု ယိုက်ဂၠေင် ချဳဓရာင်ကၠုင် ပရေင်ဂကူ ဗွဲမဇၞော်ကဵုဒြဟတ်ရ၊၊ ပါဲနူဂှ်ပၠန် ပ္ဍဲ ဗော်ပၠတြဴဍုင်မန်၊ ဒပ်ပံင်ကောံညဳသာညးဍုင်မန်၊ ကမ္မတဳဗမံက်ဍုင်မန်တအ်ဂှ် နဒဒှ်လပါ်သင် ချဳဓရာင်ကၠုင်ရ၊၊ စိုပ်သၞာံ ၁၃၂၃ ဗိုလ်နေဝေန် သီကေတ်အဝဵုဍုင် နူဥူနုတုဲ ဂကောံပရေင်ဍုင်ကွာန် အလုံမွဲဍုင်မန်ဗၟာဂှ် ဒးဒုင်ဒေါအ်ဇူထောအ် သီုဖအိုတ်ရ၊၊ ခမဳဗၠာဲ နာဲပါလိတ လေဝ် ကလေင်စဴကၠုင် ပဒတဴ ပ္ဍဲဇရေင်ဌာန်တွိုပ်သုက်ဇကု ဇရေင်ကွာန်ကၟာဝက် ပ္ဍဲဘာတိုက်တၟိရ၊၊
ပ္ဍဲသၞာံ ၁၃၃၆ ဂှ် ညးတအ် ဒက်ပတန် ဂကောံသင်ဓမံက်ပတိုန်လိက်ပတ်မည်ဂှ် တၠဂုန်အစာ နာဲပါလိတ ယိုက်ဂၠေင်ဓလေင် ဟိတဓရ၊ ကျာ်ဇၞော်အစာသိင်္ဃ ဘာက္ၜင်ထဝ် ဍုင်မတ်မလီု ဒှ်ဥက္ကဌ ပ္ဍဲဂကောံဂှ်ရ၊၊ အဓိက ပရေင်ကမၠောန်ဂကောံဂှ် ညးတအ် ပတိတ်လိက်ကၞပ်မဂ္ဂဇြေန် မကဵုလဝ်ယၟု လိက်ဂတာပ်ခေတ် ရ၊၊ လိက်ဂှ် ဟိုတ်နူဒးပတိုန် ဒးကေတ်အခေါင် ပ္ဍဲအလဵုအသဳတုဲ မွဲသၞာံ ဆမွဲကၞပ်ဟေင် ပတိတ်မာန်ရ၊၊ ပ္ဍဲသၞာံမရနုက်ကဵုပိဂှ် နကဵုဂကောံဂှ် အာတ်မိက်လဝ် အလဵုအသဳ သွက်အခေါင်ဂကူမန်လေဝ်နွံ၊ တုဲပၠန် တၠဂုန်အစာပါလိတဂှ် ဒှ်မၞိဟ်ဆက်စၠောအ်ကဵု ဗော်ဍုင်မန်တၟိ မဒှ်ဗော်မတဝ်စၞေဟ် နကဵုလွဟ် သွက်ဗၠးၜးဂကူမန်ကီု၊ ပ္ဍဲလိက်ဂတာပ်ခေတ်တအ်ဂှ်လေဝ် ဟီုဂးလဝ် လတူတၠအဝဵုပၞာန်ဗၟာ ဂိဂိဓဇောတ်ဓဇောတ်ကီုတုဲ ပ္ဍဲသၞာံ ၁၃၄၀ ဂိတုစဲ ၄ စွေက် တ္ၚဲဗုဒ္ဓဝါ ဗ္တံ ၉ နာဍဳပြင်င်ဂှ် ဒပ်ပၞာန်ဗၟာ နူမုဟ်ဍုင် မဂၠိုင်ကဵုလၟိဟ် ကၠုင်ရပ်ဏာ တၠဂုန်အစာပါလိတ သီုကဵု သီဏာ လိက်နာနာသာ် နူဘာညးရ၊၊ ညးမဒှ် ဥက္ကဌ ဂကောံ ကျာ်ဇၞော်အစာသိင်္ဃလေဝ် တၠအဝဵုတအ် တံင်ရပ်ဏာတုဲ သီုညးၜါဂှ် ဒးဒုင်ဖျေဟ်ထံင်တုဲ ဒးပဒတဴဒဂိုန်ဝှ် ပ္ဍဲထံင်မတ်မလီု ပွိုင်ၜါသၞာံပြင်င်တုဲ စိုပ် သၞာံ ၁၃၄၂ ဂိတုဇှ်ေဂှ် ညးတအ် သီုၜါဇကု ဂွံဗၠးတိတ်ကၠုင် နူထံင်ဂှ်ရ၊၊
စိုပ်သၞာံ ၁၃၅၁ ဂိတုခ္ဍဲသဳ ၁၄ မံက် တ္ၚဲအၚာဂှ် ညးမဒှ်ကျာ်ဇၞော်အစာတၠ ဘာတိုက်တၟိ မှာထေရ်ဥပါလိ စဴအာသွဝ်တုဲ တၠဂုန်အစာပါလိတ ဒးဒုင်ယိုက်ဂၠေင် ဓလေင်ကျာ်ဇၞော် ပ္ဍဲဘာတိုက်တၟိဂှ်ရ၊၊ စပ်ကဵုဒၞာဲဏအ်တုဲ မြဴသာ်ဝွံ ကျာ်ဇၞော်မချူလဝ် ပ္ဍဲလိက် မွဲဘဝသံသာညး ＂ၜိုန်ရ သၟိင်တ္ၚဲပၠိုတ် လျးအိုတ်အာကီုလေဝ် သၟိင်ဂိတု ပကင်ရင်လဝ် လျးလ္ၚီ လတ်တိုန် နူဒဵုယုဂန္ဓဝ် မံက်ဂတဝ်တိုန် နူက္ဍဟ်ဒဵုယုဂန္ဓဝ်ပၠန်ရ＂ဇကုညး ညးပတောအ်ၜတ်လဝ် ကဵုသၟိင်ဂိတု မၞုံကဵုလျးလ္ၚီဂှ် ဂွံဆဵုရ၊၊ ကာလဂှ် ညးကလိဂွံ ၄၃ ဝှ်ရ၊၊
ကျာ်ဇၞော်အစာပါလိတဝွံ ပါဲနူကမၠောန်ခၞံလိက်၊ ကမၠောန်ဂကူ လိက်ပတ် ဘာသာ သာသနာမန်တုဲ ပရေင်ကမၠောန်ဍုင်ကွာန် ဂွံသာယျာလေဝ် မွဲစွံကဵု ကျာ်ဇၞော်အစာအိန္ဒက ဘာလွဳမာန်ထဝ် ကွာန်ကၟာဝက်ကီု၊ က္ဍိုပ်သကိုပ်ဂကူမန်နာနာကီု ယိုက်ဂၠေင်ကၠောန်ကၠုင် ပရေင်ဂကူနာနာသာ် စဵုကဵု မစိုပ်အဝဲဗျုအာယုက် ၉၃ ရလေဝ် ဟွံဒေါအ် ဟွံဇူ ဆက်ချူ ဆက်ကၠောန်ဒၟံင် သွက်ဂကူမန် သွက်လိက်ပတ်မန်ဖိုဟ်ရ၊၊
သြိုင်ခၞံတိုက်ဗွဟ်လိက်
[ပလေဝ်ဒါန် | ပလေဝ်ဒါန် တမ်ကၞက်]ခမဳသင်မန် ညးမပတဴ ဍုင်သေံမွဲဇကု မၞုံယၟု ဗာကုလ၊ ညးကွာန်တအ် မကော်ညး တၠဂုန်သေံဂှ် ဂွံဗှ် ဂွံလ္ၚတ်ကေတ် လိက်ပတ်ကျာ်ဇၞော်မချူလဝ်၊ ကၠိုဟ်ညာတ်ကေတ် စိုတ်ဓါတ် စေတနာ ကျာ်ဇၞော်အစာ မှာထေရ်ပါလိတ လတူဂကူမန်တုဲ သဒ္ဓါစေတနာကတဵုဒှ် မိက်ဂွံရော်ဂုဏ်ကျာ်ဇၞော်တုဲ ခမဳဗာကုလဂှ် ပြာပ်ကၠုင် ပဒတဴဒဂိုန်ဝှ် ပ္ဍဲဘာတိုက်တၟိ ဇရေင်ကျာ်ဇၞော်တုဲ ချပ်ဂၞန် ကုကောန်ဂကူမန် ဗွဲတၟေင် ရဲဍုင်ကွာန်ဝက်ရးဇြာတအ် ဒုင်သဇိုင် ပဝိသေသ ကုယၟုနာမကျာ်ဇၞော် ပါလိတ တုဲ ဒးသြိုင်ခၞံဗဒှ် တိုက်ဗွဟ်လိက် ကေုာံ တိုက်ထ္ၜးပျးလိက်ပတ်မန်တြေံတြဟ်မွဲ ထေက်တန်ရောင် စှ်ေစိုတ်တုဲ ဒက်လဝ် ကမ္မတဳသြိုင်ခၞံ တိုက်ဗွဟ်လိက်မှာထေရ်ပါလိတ ကေုာံ တိုက်ထ္ၜးပျးလိက်ပတ်မန်တြေံတြဟ်မွဲ ပ္ဍဲအရှာံဘာတိုက်တၟိ / ဘာဓါတ်ကျာ် ပ္ဍဲဍုင်ကၟာဝက်ဂှ်ရ၊၊
လအိတ်ဘဝ
[ပလေဝ်ဒါန် | ပလေဝ်ဒါန် တမ်ကၞက်]ပ္ဍဲသၞာံ ၂၀၂၁ ဂိတုနဝ်ဝေမ်ဗါ ၂၂ အခိင်ဂယး ၀၆:၃၁ စုတိက္ညစဴအာသွဝ် ပ္ဍဲ ဘာတိုက်တၟိ ဍုင်ကၟာဝက် ရးဇြာရ။
လိက်ကၞပ် မပ္တိတ်လဝ်ဂမၠိုင်
[ပလေဝ်ဒါန် | ပလေဝ်ဒါန် တမ်ကၞက်]| လၟေင် | ယၟုလိက် | သၞာံမချူ | သၞာံမပ္တိတ် | လၟိဟ်ကၞပ် |
| ၁ | ဗညာဓရာံ မွဲဟာန်ကေုာံ ပြကိုဟ်မှာထေရ်ဂမ္ပတိ | ၁၃၂၂ | ၁၃၂၃ | ၁၀၀၀ |
| ၂ | ဝင်ဓါတ်ကျာ်ဣသိယဵု ခေတ်တၟိ | ၁၃၃၉ | ၁၃၄၀ | ၂၀၀၀ |
| ၃ | ပြကိုဟ်တြာဲလိက်တၟအ်ကလျာဏဳ | ၁၃၂၈ | ၁၃၄၆ | ၂၀၀၀ |
| ၄ | စရာဲမ္ၚဵုပိစှ်ောဒစာံ ပရိုတ်ဇၞော်စှ်ၜါခဏ် | ၁၃၄၇ | ၁၃၄၈ | ၂၀၀၀ |
| ၅ | လင်္ကာလ္ၚောဝ်ကျာ် ထပှ်ဌာန ကဵု ဇၞးမ္ၚးဒစာံသာ် | ၁၃၄၈ | ၁၃၄၈ | ၂၀၀၀ |
| ၆ | ရာဇာဝင်သၟိင်မည် ရာဇာဓိရာဇ် ကၞပ်မွဲ | ၁၃၅၀ | ၁၃၅၁ | ၁၀၀၀ |
| ၇ | သၟတ်ဗြဴမည် မိတၠထဝ် ကဵု ဂုဏ်ကျာ်ဒစိတ် | ၁၃၅၂ | ၁၃၅၂ | ၂၀၀၀ |
| ၈ | ပြကိုဟ်ဝင်ဓါတ်ကျာ်ဇြာ ကျာ်တၟံ ခေတ်တၟိ | ၁၃၅၁ | ၁၃၅၄ | ၁၀၀၀ |
| ၉ | ရာဇာဝင်မည်ပိပွိုင်ဍုင် ဒုင်ယၟုရာမ | ၁၃၅၅ | ၁၃၅၅ | ၁၀၀၀ |
| ၁၀ | ပြကိုဟ်ဗောဓိသတ် ကဵု ဒေဝဒတ် | ၁၃၅၄ | ၁၃၅၅ | ၁၀၀၀ |
| ၁၁ | ရာဇာဝင် မိသာသနာ ကဵု ဒကာကျာ်မြဟ် | ၁၃၅၅ | ၁၃၅၆ | ၂၀၀၀ |
| ၁၂ | ပြကိုဟ်ဝင်သာသနာ သာသနာစိုပ်ဍုင်မည်စှ်ၜါဝါ | ၁၃၂၈ | ၁၃၅၇ | ၁၀၀၀ |
| ၁၃ | လိက်သ္ကံတဲ ပၠတြဴမဇ္ဇျိမဒေသ ဌာနကျာ်ဒှ် | ၁၃၅၇ | ၁၃၅၇ | ၁၀၀၀ |
| ၁၄ | ဗီုဨကရာဇ်မည် တၠညးရာဓိရာဇ် | ၁၃၅၈ | ၁၃၅၈ | ၂၀၀၀ |
| ၁၅ | ပြကိုဟ်ဝင်သာသနာမည် အလုံတွဵုရာမည | ၁၃၅၈ | ၁၃၅၈ | ၁၀၀၀ |
| ၁၆ | လိက်လင်္ကာအာတ်ဓဝ် | ၁၃၅၈-၆၀ ပိဝါ | ၃၀၀၀ | |
| ၁၇ | က္ဍိုပ်သ္ကိုပ်မည် ကဵု သဘင်ရတ်ထဝ် | ၁၃၅၈ | ၁၃၅၈ | ၂၀၀၀ |
| ၁၈ | ဗီုဨကရာဇ်မည် တၠညးရာဇာဓိရာဇ် ကၞပ်ၜါ | ၁၃၅၈ | ၁၃၅၉ | ၁၀၀၀ |
| ၁၉ | ကျာ်စေတဳလ္ဂုင် ဍုင်မည်တြေံ မည် အင်ကလိက် | ၁၃၅၉ | ၁၃၅၉ | ၂၀၀၀ |
| ၂၀ | ပရူအ္စာကဝိအာဇာနဲ ခမဳမည် မွဲဇကု | ၁၂၅၉ | ၁၃၅၉ | ၂၀၀၀ |
| ၂၁ | ဝင်ဨကရာဇ်မည်ဂမၠိုင် ဂွံလဝ်ပယျးဒိုဟ်ကျာ် | ၁၃၅၉ | ၁၃၅၉ | ၂၀၀၀ |
| ၂၂ | သၟတ်ဗြဴမည် မိတၠထဝ် ကဵု ဂုဏ်ကျာ်ဒစိတ် (အလန်ဒုတိယ) | ၁၃၅၂ | ၁၃၆၀ | ၂၀၀၀ |
| ၂၃ | ဝင်ဓါတ်ကျာ်ဣသိယဵု ခေတ်တၟိ (အလန်ဒုတိယ) | ၁၃၃၉ | ၁၃၆၀ | ၂၀၀၀ |
| ၂၄ | လိက်ကၞပ်ခေတ်ပိုဲ ကဵု ပရေင်ပိုန်ဂြပ် | ၁၃၂၉ | ၁၃၆၁ | ၃၀၀၀ |
| ၂၅ | ပြကိုဟ်ဇာတ်ဝတ္ထုတၠပါရမဳဂမၠိုင် | ၁၃၆၀ | ၁၃၆၁ | ၂၀၀၀ |
| ၂၆ | လိက်ဝင် ဂကောံခမဳမည် ဟိတဂဝေသဳ | ၁၃၁၈-၆၀ | ၁၃၆၁ | ၁၀၀၀ |
| ၂၇ | လိက်ကၞပ်စၟတ်သမ္တီ သဘင်ရတ်ဗိုတ် | ၁၃၆၀ | ၁၃၆၁ | ၁၀၀၀ |
| ၂၈ | ပါဠိအရထ ပရိုတ်ဇၞော်စှ်ၜါခဏ် | ၁၃၆၁ | ၁၃၆၁ | ၂၀၀၀ |
| ၂၉ | အတ္ထုပ္ပတ္တိ ပရူဒဒှ် ကျာ်ဇၞော်အ္စာတၠ စန္ဒောဘာသ | ၁၃၃၆ | ၁၃၆၁ | ၅၀၀ |
| ၃၀ | သရာဲပၞာန်မည် ဗညာလ္ဂန်အိန် | ၁၃၅၈ | ၁၃၆၁ | ၂၀၀၀ |
| ၃၁ | ပြကိုဟ်ဝင်ဓါတ်ကျာ်ဇြာ ကျာ်တၟံ ခေတ်တၟိ (အလန်ဒုတိယ) | ၁၃၆၀ | ၁၃၆၃ | ၁၀၀၀ |
| ၃၂ | ပြကိုဟ်ဇာတ်ဝတ္ထုတိၚိတ်ဂမၠိုင် | ၁၃၆၂ | ၁၃၆၃ | ၁၀၀၀ |
| ၃၃ | သဘင်ရတ်ဓါတ်ကျာ်၊ ဘာတိုက်တၟိ | ၁၃၆၂ | ၁၃၆၃ | ၁၀၀၀ |
| ၃၄ | လိက်ဝင်တ္ၚဲကောန်ဂကူမန် အတိက်ကဵု ပစ္စုပ္ပန် | ၁၃၆၃ | ၁၃၆၃ | ၁၀၀၀ |
| ၃၅ | ဝင်ဨကရာဇ်မည် သၟိင်ဥက္ကလာပ | ၁၃၅၉ | ၁၃၆၃ | ၂၀၀၀ |
| ၃၆ | လိက်ဝင်ဓါတ်ကျာ်စေတဳအံသဝ် | ၁၃၆၃ | ၁၃၆၄ | ၁၀၀၀ |
| ၃၇ | လိက်ကၞပ်စၟတ်သမ္တီ သဘင်ရတ်သြန် မဟာဒုက် | ၁၃၆၃ | ၁၃၆၄ | ၅၀၀ |
| ၃၈ | သၟီမနုဟဝ် ကဵု ဘဝဍိက် ဍုင်ဗကာံ | ၁၃၆၅ | ၁၃၆၅ | ၁၀၀၀ |
| ၃၉ | ၜိုပ်ထဝ်မည် (မန်) | ၁၃၆၅ | ၁၃၆၅ | ၁၀၀၀ |
| ၄၀ | ပြကိုဟ်အပါယ်ပန် သ္ၚိပုထုဇန်တြေံ | ၁၃၆၅ | ၁၃၆၅ | ၁၅၀၀ |
| ၄၁ | မွဲဘဝသံသာ - မာံမည်ထဝ် ကဵု ဘာဗၠိုင်လၟု |
နိဿဲ
[ပလေဝ်ဒါန် | ပလေဝ်ဒါန် တမ်ကၞက်]ကျာ်ဇၞော်အစာပါလိတ၊ မွဲဘဝသံသာ - မာံမည်ထဝ် ကဵု ဘာဗၠိုင်လၟု