ပုညကြိယာဝတ္ထု(၁၀)သာ်

1. ဒါန
2. သဳလ
3. ဘာဝနာ
4. အပစာယန
5. ဝေယျာဝစ္စ
6. ပတ္တိဒါန
7. ပတ္တာနုမောဒါန
8. ဓမ္မဿဝန
9. ဓမ္မဒေသနာ
10. ဒိဋ္ဌိဇုကမ္မ - မဒှ်ရ။

အဓိပ္ပါယ်ပုညကြိယာဝတ္ထု(၁၀)သာ်

1. ဒါန - ပွမသၠးပွးကဵုဒါန်ပိုန်ဒြပ်အရပ်အရာတၞဟ်တၞဟ်သာ်။
2. သဳလ - ပွမဒ္ဂေတ်မင်မွဲကာယပါင်စိုတ်-သဳ(၅), သဳ(၈), သဳ(၉)။
3. ဘာဝနာ - ပွမဇၞော်ပၟဝ်တဴ မပ္တံကဵုဥပါဒါနက္ခန္ဓ(၅)ပြကာဂမၠိုၚ်။
4. အပစာယန - ပွမသ္ပရှ်ေသှ်ေရဴဂဴ ပ္ဍဲဂုဏ်အနန္တ(၅)ပြကာဂမၠိုၚ်။
5. ဝေယျာဝစ္စ - ပွမပ္တုဲဝတ်ဇၞော်ဝတ်သၟတ် လ္တူအနန္တဂုဏ်ဂမၠိုၚ်။
6. ပတ္တိဒါန - စရၚ်ဓရ်ကုသဵုဇကုမကၠောန်လဝ် ပွမဇိုန်ပိုန်ကဵုသတ္တံ။
7. ပတ္တာနုမောဒန - ပွမဒုၚ်သာဓု မိပ်စိုတ်ကုသဵုညးမွဲသ္အာၚ်။
8. ဓမ္မဿဝန - ပွမက္လၚ်ပၚ်မှိၚ်ဓရ်၊ ပွမတက်ကျာပရောဓရ်။
9. ဓမ္မဒေသနာ - ဗၞတ်မသၟဟ်အစောံ ပွမဟီုတွံ, စၞောန်ထ္ၜးကဵုဓရ်။
10. ဒိဋ္ဌိဇုကမ္မ - ပွမဒုၚ်ဂိုၚ်ကေတ် ကွေတ်မဍာံစၟတ်။

ပုညကြိယာဝတ္ထု(၁၀)သာ် ပံၚ်ခ္ဍန်ကၠေံမ္ဂး နွံတဴ(၃)သာ်

ပတ္တိဒါန, ပတ္တာမောဒန - ပါလုပ်အပ္ဍဲ "ဒါန"ရ။

အပစာယန, ဝေယျာဝစ္စ - ပါလုပ်အပ္ဍဲ "သဳလ"ရ။

ဓမ္မဿဝန, ဓမ္မဒေသနာ, ဒိဋ္ဌိဇုကမ္မ - ပါလုပ်အပ္ဍဲ "ဘာဝနာ"ရ။

ဖဵုဒါန၊ သဳလ၊ ဘာဝနာ (ဝါ) ဖဵုပုညကြိယာဝတ္ထု (၁၀)သာ်

ဖဵုဂွံသၠးပွးဒါန, ပတ္တိဒါန, ပတ္တာနုမောဒန ကုသဵုဂမၠိုၚ်။

ပတ္တိဒါန ကေုာံ ပတ္တာနုမောဒနဂှ် ဟိုတ်နူတၞီလုပ်ပ္ဍဲကဵုဒါနဂှ်ရ၊ က္လိဂွံဖဵုလေဝ် တုပ်ကဵုဒါနကုသဵုရ။ ဖဵုဒါနကုသဵု(၅)သာ် -

1. မၞုံကဵုအာယုက်မဂၠိၚ်။
2. မၞုံကဵုရုပ်သာ်စရာဲကျာ်သြဳ။
3. ဍိုက်ပေင်ကဵုတသိုက်စိုတ်, တသိုက်ကာယၜါပြကာ။
4. ဍိုက်ပေင်ကဵုတွဳဝါရနာံမြိုၚ်, ကောန်ကွး, ကောန်ရဲတဲခွာ။
5. ဍိုက်ပေင်ကဵုပၟိက်စိုတ်, ဂွံတဴအလဵုအသဳအရာဗွဲမဂၠိုၚ်။

ဖဵုဂွံဒ္ဂေတ်သဳလ, အပစာယန, ဝေယျာဝစ္စကုသဵုဂမၠိုၚ်။

အပစာန, ဝေယျာဝစ္စဂှ် ဟိုတ်နူတၞီပါလုပ်ပ္ဍဲကဵုသဳလဂှ်ရ၊ ကလိဂွံဖဵုလေဝ် တုပ်ကဵုသဳလကုသဵုရ။ ဖဵုသဳလ(၅)သာ် -

1. ပွမဂၠာဲသ္ၚဳတဴပိုန်ဒြပ် ဗွဲမဗဗွဲဓရ်မ္ဂး ကလိဂွံပိုန်ဒြပ်လောဲသွာ။
2. ပွမၞုံကဵုပရိုၚ်ဂုဏ်မြမောဝ်ဒယှ်တှ် နူပန်ဒိုဟ်ဒ္စါံကၠၚ်။
3. ကာလမဒးပြာပ်လုပ်လဒေါဝ်ပုရိသာတ်ပန်မ္ဂး ဟွံမွဲကဵုပွမဒးရောံဓညဂွံဒစိုင်, ဂံင်လုပ်ဗွဲမဂံင်သ္ကာ။
4. ညောန်ကြပ်ကဵုမ္ဒးစုတိမ္ဂး ဟိုတ်နူနိမိတ်ခိုဟ်တၟးပြာကတ်ကၠုၚ်ဂှ်ရ ပွမဂွံစုတိသီုဟွံဝိဝိၚ်ဟိုတ်မာဲ။
5. စုတိတုဲ ပွမဂွံအာက္တဵုဒှ် ပ္ဍဲဘုံသွဝ်(၆)ဘုံ မပြဲပြဲရောင်။

ဟိုတ်ဂှ်ရ ဖဵုအပစာယန, ဝေယျာဝစ္စ(၅)ပြကာလေဝ်ဒှ်ရ။

ဖဵုဂွံဇၞော်ပၟဝ်ဘာဝနာကုသဵု ကေုာံ ဓမ္မဿဝန, ဒိဋ္ဌိဇုကမ္မဂမၠိုၚ်

ဓမ္မဿဝန, ဓမ္မဒေသနာ, ဒိဋ္ဌိဇုကမ္မတံဂှ် ဟိုတ်နူမတၞီပါလုပ်အပ္ဍဲဘာဝနာစိ ဘာဝနာကုသဵုဟေင် မဒှ်ရ။ ဘာဝနာကုသဵုမ္ဂးဂှ် -

1. သမထ ဘာဝနာကုသဵု။
2. ဝိပဿနာ ဘာဝနာကုသဵု နွံ(၂)ပြကာရ။

သမထဘာဝနာကုသဵုဍိုက်ပေင်တဴမ္ဂး ပ္ဍဲဘုံဗြီုမၞုံတဴကဵုအာယုက် လုကဴမဟာကပ်ဂမၠိုၚ်ဂှ် ကလိဂွံအာက္တဵုဒှ်တုဲ ဒုၚ်စသိုၚ်တသိုက်ဗြီုရ။

ဝိပဿနာဘာဝနာကုသဵုဍိုက်ပေင်တဴမ္ဂး ကလိဂွံအာစိုပ်ဒဒှ်ပူဂဵုအရဳဂမၠိုၚ်ရ၊ ယဝ်အာစိုပ်ပူဂဵု​သောတာပန်မ္ဂး ဗၞတ်(၇)ဘဝ၊ ဒုၚ်စသိုၚ်ဒဒိုက်ဗျု, ယဲ, ချိုတ် ဒဒိုက်ဝဋ်သံသာတုဲ အာစိုပ်နိဗ္ဗာန်ရ။ ယဝ်အာစိုပ်ဒဒှ်ပူဂဵုသကဒါဂါမ်မ္ဂး ဗၞတ်(၂)ဘဝ ဒုၚ်စသိုၚ်ဒဒိုက်ဗျု, ယဲ, ချိုတ် ဒဒိုက်ဝဋ်သံသာတုဲ အာစိုပ်နိဗ္ဗာန်ရ။ ယဝ်အာစိုပ်ဒဒှ်ပူဂဵုအနာဂါမ်မ္ဂး ပ္ဍဲဘုံမၞိဟ်ဘုံသွဝ်မတ္ၜန်တ္ၜောဲတဴကဵုဒဒိုက်ဂမၠိုၚ်ဂှ် သီုကဵုဟွံဒးက္တဵုဒှ်တုဲ ကလိဂွံအာက္တဵုဒှ်ပ္ဍဲဘုံဗြီု စဴအာပရိနိဗ္ဗာန်ရောင်။ ယဝ်အာစိုပ်ဒဒှ်ပူဂဵုတၠအရှန်မ္ဂး ပ္ဍဲဘဝဝွံဟေင် လ္အိတ်အာယုက် မတွံဂးတသိုက်သန္တိသုခ စဴအာစိုပ်ဍုၚ်ဇၞော်နိဗ္ဗာန်ရ။

ပတ္တိဒါနကုသဵု ဖဵုဇကုမကၠောန်ပ္တုဲလဝ်ဂမၠိုၚ် ပွမပါ်ပရအ်ဇိုန်ပိုန်ကဵုညးသ္အာၚ်မ္ဂးဂှ် အိုတ်အာ, ယအ်အာရောင်ဟွံမွဲရ။ ဥပမာ-ယြဴၚ်ပူဂဵုမွဲ ဗွဲကိုပ်ကၠာ စံၚ်ဗဂဵုဍေန်လဝ်ပၟတ်တိုၚ်သ္ဍဴ(ပၞာၚ်သ္ဍဴ)ရ။ ပၟတ်တိုၚ်သ္ဍဴ နူကဵုလ္ၚီတေံ ၜိုန်ရကၠုၚ်စံၚ်ဍေန်စၠောံဏာကီုလေဝ် ညံင်ရဴပၟတ်တိုၚ်သ္ဍဴကိုပ်ကၠာမွဲဂှ် ဟွံမွဲကဵုပွမယအ်, ဟွံမွဲကဵုပွမအိုတ်အာကီု၊ အတိုၚ်ပကတိဟေင် ဂဵုတၟးခၠၚ်တဴဒၟံၚ်ရ။ ပဵုတုဲလျးပၟတ်တိုၚ်သ္ဍဴဂမၠိုၚ် တၟးပြာကတ်အိုတ်ရ။