ပ္တိတ်ထောံပၟတ်သောကနူဇကုညိ
စံၚ်တူပူဆာမံၚ် ပ္ဍဲစိုတ်ဂှ် သောကသ္ဂးရ၊ လောဘ,ဒေါသ,မောဟ လုပ်စိုပ်ကၠုၚ်မ္ဂး ပၟတ်သောက စံၚ်ပၠေၚ်မၞိဟ်တုဲ ၚုဟ်မးဘဝမၞိဟ် ကၠေံအိုတ်အာမာန်ရ၊ သောကဂှ် ဖိုလ်သွက်ဘဝ ဂွံဇၞော်သၠုၚ် ကၠေံအိုတ်အာမာန်ရ၊ သောကဂှ် ဖိုလ်သွက်ဘဝ ဂွံဇၞော်သၠုၚ် မုဍေံဖန်ကဵု ဟွံမာန်ရ၊ သောကဂၠိုၚ်ခ္ဍၚ် ဘဝကျဟောံ ကျဗြမ်ပ္ဍဲလောကဂၠိုၚ်ခ္ဍၚ်ရ။
ဗီုဇကုကေတ် ဗီုဇကုမိက်ဂွံကဵုဒှ် ကာလဟွံကလိဂွံမ္ဂး စံၚ်တူပူဆာ ကၠံစိုပ်ဟွံမိပ် ဓဝ်သောကမံက်ကၠုၚ်ရ။စံၚ်တူဂၠိုၚ်မ္ဂး စိုတ်ဓါတ်ဒုၚ်ကမျ ကဵုလောကမံက်ကၠုၚ်ရ။
မၞိဟ်မွဲ ဓဝ်သောက ဒှ်ကၠုၚ်မ္ဂး လက်ကြဴဍေံဒေါသမောဟတံ ဒှ်ကၠုၚ်ကီုရ၊ သောကဍိုက်ဂွံလ္တူမၞိဟ်မ္ဂး ရုပ်ခန္ဓ ကာယကီု၊ စိုတ်ဓါတ် ပရေၚ်ထတ်ယုက်ကီု လီုအာဖ္အိုတ်ဒှ်ဂွံရ၊ မၞိဟ်ဓဝ်သတိဇၞော်ညာဏ် သမ္တီဂၠိုၚ်၊ တော်ချပ်ဗ္စာဒးမ္ဂး ဝေၚ်ပဲါကၠေံ သောကမာန်ရ။
ရပ်စပ်သြန် ဟွံသၠဲလး ပိုန်ဒြပ်အောန်လေဝ် လ္ပဒှ်စံၚ်တူ သောကညိ ချပ် ကၠောန်ကမၠောန်မ္ဂး သောကစံၚ်တူ ကၠေံအာမာန်ရ၊ဂိုတ်ဂစာန် ကၠောန်ကမၠောန်ညိ၊ ဒှ်သောက ဂွံၚုၚ်မံၚ်ဂှ် ဒှ်ညးပၠေၚ်အခိၚ်ဖ္အိုတ်အခိၚ်မွဲရ၊ သာတုဲ ဓဝ်သောက စံၚ်တူဂၠိုၚ်ကၠုၚ်ရ။
လောကမၞိဟ်ဂှ် သၚ်္ခါရလောက ကျာ်တွံလဝ်နွံတုဲ အခိၚ်လဵုစိုပ်မ္ဂး ဒးလီု၊ လီုတုဲဒှ်ပၠန် အခိၚ်ဍေံဒးလီုဂှ် လ္ပဒှ်ဓဝ်သောကညိ၊ မၞိဟ်ကၠိုဟ်လဝ် သ္ဘဴလောကနွံမ္ဂး ဟွံဒးဒုၚ်ဘဲဒဏ်သောကရ၊ အခိၚ်ပၟိက်ဇကု ဟွံဍိုက်ပေၚ် ယဝ်ဓဝ်သတိနွံဂၠိုၚ်မ္ဂး သောကဟွံဒှ်ရ၊ ဟိုတ်ဂှ်ရ ဘဝမၞိဟ်ဂှ် မံၚ်ကဵုဓဝ်သတိလၟိုန်ညိ။
ဒုဟ်သောကဂှ် တုပ်ကဵုဂျိဇြုံဇာတ်ရောၚ်၊ ဖျေံလဝ်စိုတ်ကဵုမာန်ညိ၊သောကလ္ၚဵုဍေံဒှ်ကၠုၚ်ဂှ် အလဵုဇကုတီကေတ်မာန်တုဲ သောက လ္ၚဵုအလဵုဇကုတီကေတ်ဟွံမာန်နွံကီုရောၚ်၊ အခိၚ်ဂှ်လွဳမံၚ် အသောကတုဲ ကျဗြမ်ဘဝဒှ်မာန်ရ။
ရုပ်ဝတ္ထု မံက်မံၚ် ပ္ဍဲခေတ်တဴတက်ဏံ ဖန်ဗဒှ်လဝ် သွက်သောကဂွံဂၠိုၚ်ဖ္အိုတ်ရ၊ ညးတၞဟ် ဂွံသ္ပတၠပိုၚ်ပြဳ ဇကုဟွံဂွံမ္ဂး စံၚ်တူသောက ဒှ်ကၠုၚ်မာန်ရ၊ သ္ပလဝ်တၠရုပ်ေတ္ထု တၟေၚ်ဂၠိုၚ်ခ္ဍၚ် သောကစံၚ်တူ ဂၠိုၚ်ခ္ဍၚ်ရ၊မၞိဟ်ဒုၚ်လဝ်ကမျကဵု ရုပ်ဝတ္ထုလောကဂှ် ဂၠံစိုတ်ၜိုဟ်သြိုဟ် ဝေၚ်ပဲါကၠေံသောကမာန်ရ။
သောကဒှ်မ္ဂး ဥပါဒါန်အစောဲလာံလေဝ် ပါကၠုၚ်ပၠန်ရ၊ ဥပါဒါန်လေဝ် ဒှ်သ္ဘဴဓဝ်ကဵုဒဒိုက်မၞိဟ်တံကီုရ၊ အစောဲဥပါဒါနက ဒှ်ကၠုၚ်မ္ဂး ၜိုန်ဒှ်တၠပညာကီုလေဝ် သတိဗၠးအာတုဲ ဒးဒုၚ်ဘဲဒဏ်ဥပါဒါန်ရ၊ ဒးစိုတ်ဂှ် လောဘရ၊ လ္တူဂှ်ထပ်စောဲလာံပၠန်မ္ဂး ဥပါဒါန်ရ၊ သၠးပ္တိတ်နူဇကု ဟွံမာန်ဂှ် တဏှာရ။
မိက်ဂွံပလေဝ်လွဳသောကဏံမ္ဂး ဒးဗှ်ကဵုလိခ် ထ္ၜးဒုဟ်သောကဂၠိုၚ်ၚ်ရောၚ် ဒးကလၚ်ပါ်ပဲါဓဝ် ကျာ်တွံလဝ်ဂၠိုၚ်ၚ်ရောၚ်၊ ဒးကၠောန်ကမၠောန်ဂၠိုၚ်ၚ်မ္ဂး သောကအိုတ်အာမာန်ရ၊ ပ္ဍဲဂကူဗုဒ္ဓဘာသာ နယ်ပဲါကၠေံ ဒေါသခိုဟ်အိုတ်ဂှ် နွံမံၚ်ပေၚ်ၚ်ရ၊ နဲပၟဝ်ဓဝ်ဝိပဿနာ,ပၟဝ်ဓဝ် ပညိၚ်စိုတ်ရ။
စိုတ်ပိုဲဏံ ဍေံဂွံအာရီု ဝိပဿနာမ္ဂး ဍေံညိၚ်တန်အာရ၊ ဍေံတန်ညိၚ်မ္ဂးဟေၚ် ဒှ်စိုတ်သ္အးဇ္ၚး ဗုကေဝ်ကၠုၚ်ရ၊ အခိၚ်စိုတ်ဗုကေဝ်ဂှ် လောဘ ဒေါသ မောဟ မာန သောက ဟွံမွဲရ၊ ဝိပဿနာ နဲကဲ ဗၜိုဟ်စိုတ်ဂှ် နွံမံၚ် ပ္ဍဲဂကူဗုဒ္ဓဘာသာ မွဲဟေၚ်ရ၊ ဂကောံညးဂၠးတံ မိက်ဂွံဗၜိုဟ်စိုတ်တုဲ လၟုဟ် ကၠုၚ်ပၟဝ်မံၚ် ဓဝ်ဝိပဿနာ ပ္ဍဲဍုၚ်ပိုဲဏံရ။
မၞိဟ်စိုတ်စေတနာဟွံဍာံစၟတ်တံဂှ် ဟိုတ်နူသောကဂၠိုၚ်မံၚ်ရ၊ချပ်မံၚ်လ္ပာ်ဇကုဂှ် လ္ပာ်ဇကုသာတွဵုမ္ဂး ပ္ဍဲမၞိဟ်ဂှ် သောကဂၠိုၚ်မံၚ်ရ၊ ပိုန်ဒြပ်ဂှ် အခိၚ်ကၠိဂွံထေက်ဟေၚ် ကလိဂွံမာန်ရ၊ နွံပၟိက်ဂၠိုၚ်ၚ်လေဝ် ဗၞတ်ဂွံထေက်ဟေၚ် ကလိဂွံမာန်ရ၊ ကၠိဂွံလဝ်ဘဝမၞိဟ်မပြဲဝွံ လ္ပကဵုဒှ် အာဍိက်ပၠက်သောကညိ။
ဆန္ဒပြဟ် သောကလောန်ၜက်လေဝ် ပိုန်ဒြပ်ဆောံလေၚ်မာန်မံၚ်ကီုရောၚ်၊ ဝေၚ်ကၠေံဓဝ်သောကတုဲ နကဵုက္ဍဟ်ၜိုဟ်ဟ်ချပ်ဖန်ဗဒှ်ကမၠောန်တၟိတၟိလၟိုန်ညိ၊ လ္ပဝိုတ်ထောံ ကာလ ဒေသ ဂယောဂတုဲ ညံၚ်ဂွံပြိုၚ်ကဵုလောက နကဵုကမၠောန်ဂှ် ပ္တိတ်ဇြဟတ်မ္ဂး သောကစံၚ်တူ ကၠေံအာမာန်ရ။
သောကမၞိဟ်ဂှ် ပါ်ခြာပ္တိတ်ညးသ္ကံဟွံဂွံရ၊ မၞိဟ်ဗွဲမဂၠိုၚ် ဒးဒုၚ်မံၚ်ဘဲယဲသောက ဏံရ၊ ဟိုတ်နူ စံၚ်တူသောကဇၞော်တုဲ လ္ၚဵုဒက်ဂစိုတ်ဏံ လ္ၚဵုသုၚ်ထောံဂဥုဲဂျိနွံရ၊ သောကဍိုက်ဂွံလ္တူတုဲ လမျီုဂိုဟ်ဆာန်ဂှ် ဂစိုတ်ထောံမာန်ဏီရ။
မၞိဟ်ဟွံဒုၚ်တဲကဵုသောကမ္ဂး သောကလုပ်ကၠုၚ်ဟွံမာန်ရ၊ ညံၚ်ရဴကၟုဲပၠုၚ် ကၠုၚ်ဝေၚ်သ္ၚိဇကု ဇကုဟွံဒုၚ်တၠုၚ်မ္ဂး ကၟုဲပၠုၚ်ဂှ် ဒးကလေၚ်စဴအာရ၊ သောကဂၠိုၚ် တိက်ဟွံသၠိၚ်၊ စဟွံစှ်ေ ယဝ်ဒှ်ကၠုၚ် ပၠောပ်အာရီုကဵု ဓဝ်ကျာ်တြဲမာန်မ္ဂး သောက ပၠိုတ်အာမာန်ရ။
ပိုန်ဒြပ်ဂၠိုၚ်တုဲ ရပ်စပ် သုၚ်စောဲပိုန်ဒြပ် ဟွံလုပ်မ္ဂး သောကစံၚ်တူဂၠိုၚ်ကၠုၚ်ရ၊ ပိုန်ဒြပ်ဂှ် ဒှ်သ္ဘဴဓဝ်သၚ်္ခါရတုဲ နူကၠာဍေံဟွံဟီု ဟွံအိုတ်ဏီ ဂိုတ်ဂစာန်ကၠောန် သွက်ဒ္တုဲဖိုလ်မၞိဟ်ညိ၊ အခိၚ်ဂၠဲါဂွံသြန်လောဲဂှ် သၠးကဵုဂၠိုၚ်ဂၠိုၚ်ညိ၊ သၠးကဵုဂှ် ဒှ်ဇွောံမ သွက်ဘဝ အနာဂတ်ရ။
မၞိဟ်သောကစံၚ်တူဂၠိုၚ်ဂှ် ဝိုတ်တၠိၚ်ဂၠံၚ်တြဴဘဝ အနာဂတ်ရ၊ ဒြပ်ဂၠိုၚ် သၠးကဵုမာန်မ္ဂး ဇၞးသောကရ၊ ဒြပ်ဂၠိုၚ် သအေတ်သပါန်မ္ဂး သာတုဲဒှ်သောကဂၠိုၚ်ရ၊ ပိုန်ဒြပ် ဂွံဒှ်ဇွောံမအနာဂတ်ဂှ် ဒးသၠးကဵုလဝ် ဟေၚ်ရ။
မၞိဟ်ပတှ်ေတုဲ သောက နွံမံၚ်ဖ္အိုတ်ရ၊ ဆဂး ပလေဝ်မာနက ကဵုဟွံမာန် တၟေၚ်အာညးသ္ကံရ၊ သောကစံၚ်တူမိက်ဂွံကဵုအောန်ပ္ဍဲဇကု မ္ဂး ကလၚ်ဂလာန်တၠပညာတံညိ၊ ဂစာန်ဂၠဲါဗဟုသုတညိ။
မိဿဟာဲခိုဟ်ဂှ် ဂၠဲါပံၚ်ညိ၊ မၞိဟ်ပတဝ်ဂၠိၚ် ကဵုပညာဂှ် သ္ပအစောံညိ၊လောကဝွံ ဂဗဆဵုမၞိဟ်ပတဝ်ဂၠံၚ်ဍာံမ္ဂး အရာအိုဿီု ကလိဂွံတၚ်ရန်တၟံဘဝဖ္အိုတ်ရ။
✍ကျာ်ဇၞော်အ္စာမဟာထေရ်ပါလိတ
