ပြကိုဟ်လၚ်္ကာဗုဒ္ဓဝၚ်
ညံၚ်ကောန်ဂကူမန် ဗုဒ္ဓဘာသာဂမၠိုၚ်
သ္ဂောံတီကေတ် ပရူဗုဒ္ဓဝၚ်ကျာ်တြဲဂေါတမ
ကျာ်ဇၞော်အ္စာတၠ အစွောံ ချူဆန်လဝ်
* ပြကိုဟ်လၚ်္ကာဗုဒ္ဓဝၚ် ကျာ်တြဲဂေါတမ
(က) ဂလာန်-နိဒါန်
[ပလေဝ်ဒါန် | ပလေဝ်ဒါန် တမ်ကၞက်]အဲဇၞော်အာရ၊ မောဟဂၠိုၚ်သန်။ ဟီုကၠာဝိုတ်ကြဴ၊ ဟီုကြဴဝိုတ်ပၠန်။ ထပှ်စှော်ပိ၊ အာယုက်ဂ္ညိပ္တန်။ ပ္ဍဲစိုတ်ဟွံမြဟ်၊
လိက်လၞုဟ်ဆန်။ ပါရမဳကျာ်၊ လွဳဂၠိုၚ်သာ်ပၠန်။ သၟိက်ကဵုတီအိုတ်၊ တၟံစိုတ်ဇန်။ ဗှ်ကုသဵုပၠန်၊ တုဲဒးဆန်ရောၚ်။ ။
(ယွံကောန်ဂကူညးမဆာန်လိက်ပတ်မန် ဆာန်ဂကူမန်တံ ဗီုကျာ်ဇၞော်အ္စာအစွောံ ဆာန်လိက်ပတ် ဆာန်ဂကူဂှ် ဗှ်ဗၞုဟ်ကဵုဂွံအိုတ်ညိ၊ ၜိုန်ဂွံအာယုက်ထပှ်စှော်သၞာံပြၚ်ကီုလေဝ် လွဳဟွံထောအ် ပ္ၚောအ်စိုတ်ကုသဵု၊ သွက်ဂကူဗွဲကြဴရောၚ် ဟွံသေၚ်ဟာ ကောန်ဂကူတံတီတုဲ ဂုဏ်ကျာ်ဇၞော်အစွောံ ဗီုနွံမေတ္တာလ္တူပိုဲဂှ် ဒဵုကဝ်တဴလ္ပဝိုတ်ညိ၊ ပိုဲလေဝ်ဗွဲဗၞတ်သၟဟ်ရထမာန် သွက်ကောန်ဂကူဗွဲကြဴ ဂွံတီညာတ်အာဂၠံၚ်ခိုဟ်ဂၠံၚ်ပြဲ ပြကိုဟ်မွဲမွဲ၊ လိက်မွဲမွဲအုပ် ညံၚ်ဂွံတက်တြးပ္တိတ်မာန် ဂိုတ်ဂစာန်ညိ၊ လိက်ပြကိုဟ်ညးတၞဟ် တက်တြးပ္တိတ်လဝ်တံဂှ်လေဝ် ကဵုဒြဟတ်ရာန်ဗှ်အိုတ်ညိ။)
၁။ သတ္တံဟဳမံၚ်၊ ပ္ဍဲဂၚ်သံသာ ကဵုဂွံဟံၚ်ဏာ နူသံသာညိ။
၂။ သစ္စပန်ခုတ်၊ နွံစၟတ်ယုတ္တိ၊ ယာံအဲဂွံဂြၚ်၊ ဇၟာပ်တၚ်ဖိဖိ၊ ဓရ်သစ္စပန်၊ ပြဲသန်ဒမၠိ၊ အိုတ်သတ်ဇၟာပ်ကၠၚ်၊ ကဵုဂွံဂြၚ်ညိ။
၃။ နူဒဒိုက်ကၠာ၊ သံသာယုတ္တိ၊ ယာံအဲလ္အိတ်၊ ဗၠးတိတ်ဒမၠိ၊ သတ်ပ္ဍဲသံသာ၊ ဒဒိုက်ပါမြိ၊ ကဵုဂွံဗၠးဖျဴ၊ နိဗ္ဗာန်တြဴညိ ။ ။ ။
( ဗီုကျာ်တြဲဆာန်ဍူပိုဲသတ္တံ ပ္တံကၠုၚ်လတ်ပါရမဳ စွံစိုတ်ကရုဏာလ္တူပိုဲသတ္တံ အတိုၚ်ပိတၚ် နွံပ္ဍဲဂလာန်လၚ်္ကာဝွံရ။ တီကေတ်ပရေၚ်မေတ္တာကျာ်တြဲတုဲ ကျာ်ဂှ်-ဂိုတ်သ္ပစ္ၜုဲစ္ၜော် ရှ်ေသှ်ေအိုတ်ညိ။ ဓရ်ကျာ်တြဲဂှ် ဂိုတ်ကတ်ဗ္တောန် ဒ္ဂိုန်ဒ္ဂေတ် မၚ်မွဲအိုတ်ညိ။ သၚ်ကောန်ကျာ်တြဲဂှ် ဂိုတ်ရဴဂဴ ယိုက်ဒိုက်ထံက်ပၚ် ပစ္စယ်ပန်အိုတ်ညိ ။ )
( ဂလာန်အာတ်အခေါၚ် . . . . .
ယွံကောန်ဂကူမန်တံ လိက်လၚ်္ကာဗုဒ္ဓဝၚ်ကျာ်တြဲဂေါတမဝွံ ကျာ်ဇၞော်အစွောံ ဗၞတ်၂၀၀-သၞာံပြၚ် ဃောဍုၚ်ဟံသာဝတဳ(ဗဂေါ)ခိုဟ်စတေံ ညးချူဆန်လဝ်ရ။ လိက်ဝွံပ္ဍဲဍုၚ်သေံ(ဒျောဒျာ)တေံ ပ္တိုန်စက်တက်လဝ်မွဲဝါ၊ ဂွံမိၚ်ဂွံတီကေတ်ရ။ လၟုဟ်ဝွံ လိက်တံဂှ် ဟွံဆဵုဟွံညာတ်ရ။ ပ္ဍဲကောန်ဂကူတံ လိက်ဟီုကၠုၚ်တုဲဝွံ ယဝ်နွံမ္ဂး သ္ပဓရ်မေတ္တာတုဲ ကဵုပရိုၚ်ညိ။ ဟွံသေၚ််ဂှ် သၠးကဵုဒါန်မ္ဂး တၚ်ဂုဏ်ဗွဲတၟေၚ်ရ။ ကြဴဒၞာဲယောၚ်ယာ ဂွံပလေဝ်ဗပေၚ်စုတ်ရ။ လိက်လၟုဟ်ဝွံ ချူစလောအ်လဝ်အဆက်က်တုဲ ဒၞာဲယောၚ်ယာ၊ ဒၞာဲဟွံပေၚ်နွံမ္ဂး သၠးအခေါၚ်အိုတ်ညိအဴ ။ )
နာဲကလျာဏ ဖအံက် ဘာတိုက်တၟိ
(ခ) ပဏာမ
[ပလေဝ်ဒါန် | ပလေဝ်ဒါန် တမ်ကၞက်]ပဏာမ - ပဋိဉာည် - နိဒါန်
နမော တဿ ဘဂဝတော အရဟတော သမ္မာသမ္ဗုဒ္ဓဿ။
လယုၚ်စေတၞာ၊ သဒ္ဓါစရိုတ်၊ တဲပပၞာၚ်ထဝ်၊ အၚဝ်ၝောံကိုတ်၊ ပ္ဍုန်လဝ်လ္တူကၞေၚ်၊ ဟွံဗၠေၚ်တသိုတ်၊ ကျာ်ဓရ်သၚ်သ္ကဲ၊ ရတ်ပိပြဲအိုတ်။ အဲလ္ၚောဝ်ကၠာ သီုသာဘာသိုတ် ဖိုလ်လ္ၚောဝ်အဲ ရတ်ပိပြဲသ္ကိုတ်၊ အန္တရာဲဆက်၊ စှ်လက်လ္ၚီကိုတ်၊ ကဵုလာဲလေၚ်အိုတ်၊ ကဵုပၠိုတ်ဟောမ်ညိ၊ ပြဲဂုဏ်အဆတ်၊ တိုၚ်ဂုဏ်ရတ်ပိ လ္ၚောဝ်တုဲအဴ ဗွဲကြဴဒမၠိ အဲပြေၚ်လဝ်ညိ သိဒ္ဓိဝါကျ တိုၚ်လၟေၚ်ကာပၠန် လၟေၚ်ဆန္ဒ လိက်မဟီုပ္ညန် ပ္ဍဲရးမည ပ္ဍဲရးဒေသ ဟံသာဝတဳ . . . ။
ယမုလိက်ကၠာ ပတမ်ပါရမဳ ကဝိဆန္ဒ နာမခုတ်ပ္ညဳ ပ္ဍဲဂကောံသၚ် တူသဒၚ်ဂြဳ အသွောအ်နာမ ဌာနဘောဂဳ တန်လဝ်သက်လက် ဗီုအိန်တက္ခဳ ကဵုဂွံတီရော ဇၟာပ်ဇန်လောကဳ တၞံပါရမဳ လိက်ခုတ်ပ္ညဳရောၚ်။ ( ပ္ဍဲတောၚ်ဗုဒ္ဓဝၚ်၊ တၚ်ယၟုတၟိ၊ ကလၚ်လဝ်ညိ၊ ဒမၠိလ္ပကဵုမှာ။ )
လိက််ဝွံဆန်ဗ္ဒဟ်၊ တိုၚ်တဝှ်ဂုဏ် သက္ကရာဇ်တုန်၊ ဟီုပ္ဍုန်စၟတ်သၞာံ လ္ၚီကၠံတုန်ဂှ် ပိစှော်ဒစာံ ကထိုန်ဟီုလံက် ဗွဲမံက်ဒစာံ တ္ၚဲသိုက်ပြဲဗာံ စၟတ်သၞာံဗိုန်က္ဍန် ကာလဂှ်ယး လိက်ဝွံညးဆန် မုဒၞာဲဌာန ဒေသဒတန် လိက််ဝွံတုန်ပၠန် ညးမဆန်လဝ် ဟံသာဝတဳ မြုကျာ်ဩဳထဝ် ရးဟံသာဝတၞံ ကွာန်ပအမ်လဝ် ကွာန်ဆက်တိတ်ရ နာမခုတ်လဝ် ကွာန်အခေါၚ်ထဝ် ခုတ််လဝ်ဗတ်မည် ဗတ်ဗမာဟေၚ် ယှိုဲကျေန်ခုတ်ပ္တန် မၞိဟ်ပ္ဍဲကွာန်ဂှ် သဒ္ဓါသၟဟ်န် သ္ဍိုက်ရတ််ပိလောန် စိုတ်ဟွံစောန်ကၠိ ဍာ်ဇိုၚ်သၚ်သၟတ် ပုၚ်ဝတ်ဒမၠိ တောမ်ပလံၚ်သၟတ် ဒဵုဌာန်ရတ်ပိ ရိုဟ်တ္ၚဲဟွံပိုတ် အိုတ်တမအ်သ္ၚိ ဂယးသဝ်တ္ၚဲ စိုတ်ဇြုၚ်ပြဲဂၠိ . . . ။
ပဉ္စသဳလာ နွံပ္ဍဲဒွါပိ တြုံသဒ္ဓါအဴ ဗြဴနွံဟိရိ ဇြပ်ဓရ်မွဲဂ္ညိ နကြိသိုၚ်လဝ် လာထဝ်ဂဵုခၠၚ် ဒေန်ဗတၚ်ထဝ် ပဏၚ်တွံဓရ် လျးထဝ်ဍာဲဂဵု အၚောဝ်ရေၚ်တၚ် လျးခၠၚ်လဟဵု ဇြပ်ဓရ်ပဏၚ် ပြဲသၚ်တၚ်ဃဵု ပယာံသဝ်တ္ၚဲ ပၚ်မှိၚ်ဓရ်အဵု ကျိုၚ်ကျဝ်ညံၚ်ပေါဲ ဇက်ဂၠောဲတသဵု ဝုတ် ဗၠာဲ ဗျုထဴ တြုံ၊ဗြဴတဝဵု တိတ်ပၚ်မှိၚ်ဓရ် တွဳဗဝ်တသဵု ထမုတ်ပ္ကဴဝတ် ကၞတ်ကုသိုလ် ရိုဟ်တ္ၚဲတဝဵု ကုသိုလ်ပလွဳ . . . ။
ဂိတုဝှ်ပြဲ ဗပေၚ်တ္ၚဲသဳ စံၚ်ပၞာၚ််ရေၚ်ပ္ကဴ သ္ဍဴဂဵုတမဳ မွဲစွေက်သ္ကဲ ဗပေၚ်တ္ၚဲသဳ ဓာပ်ဆာပ်ဖမ်မံၚ် လဒုကၠံၚ်သ္အဳ ရေၚ်ဇၞောဝ်ဍောၚ်ပ္ကဴ ပူဇဴစေတဳ စိုပ်ကထိုန်သ္ကဲ တ္ၚဲတိၚ်တ္ၚဲသဳ မွဲစွေက်ပြဲ ပိတ္ၚဲအနဳ စံၚ်ပၞာၚ်ရေၚ်ပ္ကဴ ပူဇဴစေတဳ စိုပ်ဂိမှန္တ ခုဇ္ဇရာသဳ ကၠောံမိတ်အနဳ သၚ်ကြာန်ပ္ညဳလဝ် ကြာပ်သၞာံအတး ဍုၚ်ရးတမ္ညဝ် ရုပ်ကျာ်အနဳ ခၞံစေတဳထဝ် က္ဍိုၚ်ဇၞောဝ်သံက်ဗျာံ အလာမ်သဝဝ် ဍောၚ်ပ္ကဴထဝ်ဗျာၚ် ရေၚ်လဗာၚ်လဝ် ဓာပ်ဆာၚ်ဖမ်မံၚ် ဗြုကၠံၚ်ဆမ္ညဝ် ပိတ္ၚဲဆတ္တဝ် ရေၚ်လဝ်စေတဳ ရုပ်ကျာ်ရေၚ်လဝ် လျးထဝ်ဖျဳဖျဳ ကျာ်ဒတဴကျဝ် လျးညံၚ်ထဝ်ဏှဳ စှ်ဒစာံဟတ် ဒးဗၞတ်လောကဳ ဗဝ်ကျာ်ဗတဳ မ္ၚးၜဳဂျ ဍာ်ဇြုၚ်ခၠၚ်သန် ကၠေၚ်ကၠန်ဟွံက ဗတဳသာ်ဩန် သဳဒန္တရ၊ ဌာန်သုဝဏ္ဏ ပုဗ္ဗတအဴ ဒက္ခိဏပ္ညုၚ် ကြုၚ်ထဝ်အပၠဴ သၚ်ဗတဳတၟအ် ဍာ်ဒွအ်ကမြဴ ဗတဳသာ်ဩန် ဗုတ္ၜန်တ္ၜောဲတဴ . . . ။
ကြုၚ်ဒက္ခိဏာ သၟဝ်ကျာဂြိုပ်ပ္ကဴ ကိဟ်ဍောၚ်ဓိတာန် ဇဝ်ဍောၚ်ပြာန်ပ္ကဴ မၠဵုဍံက်စမ္ပါ သဂါဂ္ညိဂၠဴ ဂၠိုၚ်သန်တၞံပ္ကဴ ရာၚ်တဴလျးဂဵု ဗမံက်ဌာန်ဘာ ဗျိၚ်အာဂြိုပ်ဒဵု ဓာတ်သော်သဝှဝ် စေတဳထဝ်ဂဵု ဇရေၚ်ဂြိုပ်ယာန် ဒှ်ဌာန်မ္ၚဵု ဌာန်စေတဳမြဟ် သတးတဴက္ဍဟ်ဒဵု ကိဟ်ပြာန်ဇက်ဇက်ဂၞု တၞံဆုလှဵုလှဵု ပဏဟ်တနေၚ် ကြုက်တၟေၚ်ဂၠံက်သတဵု မ္ၚူတမုဟ် မရာၚ်ဍုဟ်ဂဵု ကြုၚ်ထဝ်သိၚ်ဃဵု ဍုဟ်ဂဵုမောဝ်မာ . . . ။
တၞံကသဵုပ္ကဴ ရာၚ်တဴဍောၚ်ဗ္ဂာ လအ်ဇြကမၠံက် ဇိုန်ဍံက်စမ္ပာ ပ္ကဴပြာၚ်ပဏာ် ပ္ကဴဂၠာ်စမ္ပာ မၠဵုၜုန်တာရိက် သဘိက်စမ္ၚာ ဓလာဲထဝ်ဩန် ပ္ကဴကဏ္ဏကာ ဇုက်ဂၞုဗဗုၚ် ဂမုၚ်ရာၚ်ဗ္ဂာ ထိုၚ်ဘိမ္မရာ မှောဝ်ဇဴဩဳဩဳ တလိုန်ဒြဝ်သၞေၚ် ဗျိၚ်တရေၚ်ဖဳ တဝ်သွဝ်သဂါ၊ ဍောၚ်မၠဵုမာလဳ နန္ဒလဳယန် ကြေၚ်ဗန္ဓဇဳ ထေဝဝ်အနာၚ် ဂၞဲစာၚ်အနဳ ပ္ကဴသာရဖဳ ဍောၚ်ဇဳသွာ သာဲအဒါယ်တ္ၜန် ဂၠာဲဇာပ်ဂန္ဓာ လဒုဒြဝ်သၞေၚ် ဗယာပ်သ္ဇေၚ်ၜါ ဂဇေပ်နိဇ္ဇ ဂန္ဓမာလာ လအ်ဇြမျီုတ္ၜၚ် မ္ၚဵုက္ၜၚ်လညာ ပၠိုဟ်ဍောၚ်ရာၚ်ဗ္ဂါ မွဲသာလမေၚ် ထ္ၜူထိုၚ်ထဝ် တလိုန်ဒြဝ်သၞေၚ် အသုက်ရာၚ်ဂၠု ဇုက်ဂၞုဓဇေၚ် ဍံက်ဆာၚ်သ္ဇၚ်ထောဲ လပေါဲအံၚ်ရေၚ် ဂၠိုၚ်ကဵုပ္ကဴဟေၚ် ဖဳတရေၚ်ဆာဲ . . . ။
ထိုၚ်ဘမ္မရာ မှောဝ်ဇဴလောန်ကာဲ တလိုၚ်သၞေၚ်ဖူ လောန်ထောန်တ္ၜူမာဲ ဂစေံဂြိုပ်တအ် တာန်ကအ်အိုက်အာဲ စာၚ်ကၠိုက်စာၚ်ဍေဝ် ဂြဴဂတေဝ်ကွာဲ ကွဴသာရိကာ ကြဵုဇာလောန်ကာဲ တ္ၚေက်ထဝ်တ္ၚေက်ဂြၚ် ကြေၚ်ကြၚ်ဗြုၚာဲ ဂစေံဇၟာပ်ဒၞာဲ မိပ်စိုတ်ကာဲကဝ် လဏေၚ်စက်စာန် ဗြုတာန်သအဝ် လလောၚ်စလာၚ် စာၚ်ဍေဝ်မြာ်ထဝ် . . . ။
ဂြိုပ်ဗျိၚ်သဝှဝ် ဗိုၚ်လဝ်စေတဳ စေတဳအသၟဝ် လျးထဝ်ဖျဳဖျဳ ဓာတ်သော်သွိၚ် ကျာ်သၟိၚ်ခမဳ အံသဝ်ကျာ်ဩဳ စေတဳပြမ သမၠုၚ်ကျာပ္ညဳ စေတဳကြုၚ်လှ ဍာ်ဒွအ်သလံၚ် သာ်အရံၚ်မြ ယၟုနာမ မူလဒတန် ဇြပ်သီဂေါဝ်ဂၠိ ရုပ်ကျာ်ထိတ္ၜန် သာမယျအဴ တြုံဗြဴမှာဇန် ပြာပ်အာသဳကၠဳ ဓါတ်စေတဳပၠန် က္ဍိုၚ်ထဝ်ဂ္ညိ အလာမ်ထိတ္ၜန် ဍောၚ်ပ္ကဴအသဝ် ရေၚ်လဝ်ဒိုဟ်ပန် ဓာပ်ဆာၚ်လဒု ဖမ်မံၚ်ဗြုလောန် လ္ၚောဝ်သဳကၠဳ စေတဳဇၟာပ်တန် ဗမံက်ဌာန်ပ္ညဳ စေတဳပြဲသန် . . . ။
ဒိုဟ်ပလိုတ်ပၠန် ၜဳသဳဒန္တ ကျာံဇြဟ်သပါ ၜိၚ်သောၚ်ဗဂါဂျ ပ္ဍဲဍာ်ဂၠိုၚ်သၟတ် ဗဝဝ်မစ္ဆ ကတၟေၚ်ဂၠိုၚ်ဂျ ၜိၚ်ဂျတလာဲ ကပဍေၚ်ကီု ဣဗီုကဆာဲ ကဗၞာံလံက်လာ် ကကၠာ်လမာဲ သကအ်လနန် ၜိၚ်လောန်သာဲသာဲ ကအလုဲလာဲ ကချောဲပဏဟ် ကဗၠိက်ကကြၚ် သီုကဂြၚ်ဗှ် လတီုကပြိုၚ် ခဗာတ်ဂျိုၚ်သ္ၚဟ် ခေါလဗာတ်စိ ကပၠိကပၠာဲ ကက္ဍိုၚ်ဇၞောဝ်သၟတ် ကကၠဴမတ်ဍာဲ ကဒက်ကအေက် ကမြေက်မွဲဒၞာဲ ပကိုၚ်ကချုဲ စပ်စၚုဲၚာဲ ကဗဂေါၚ်ၜိၚ်သာဲ ကရောန်ဂၠာဲဩၚ် ကမွဲဇၞော်ဂျ ဂးကဂဗံၚ် ကက္ဍတ်ပၠေအ်ဒံၚ် ကဆံၚ်ဒဂး ကတေဝ်ကဍာ် ဂၠိုၚ်သာ်ၜိၚ်နး ကပြေၚ်ဇၞော်ကၠး ဂးကဝံလု သံၚ်ၚ်ရုရု ဗီုကကၠုၚ်ၜိၚ် ၚုဲဇၞော်သၠိုက်ခြပ် ရပ်သ္ဇၚ်ဇမၠိၚ် ကၞုဟ်ဒွိကၠဴခုတ် အရုတ်လဗိၚ် . . . ။
ကၠဟ်သာ်ဒိုၚ်ကီု မံၚ်တဴသီုဒွန် ကၟအ်အသီ ဗမက်လဳၜန် ဂစေံဇၟာပ်တန် လဳၜန်ချံက်ချာ ကၠဟ်ဇြုံကၠဟ်က္ၜၚ် ပါကဟံသာ ပံက်ကွာ်ဇၚ်မံၚ် ဗြုကၠံၚ်ဟောဒြာ ၜိုပ်ၜၚ်အဒါ မြာ်ခလာဒၟံၚ်သၟဟ် ဂစေံဂမၠိုၚ် ဝေၚ်ဂြိုၚ်လတှ် စေအ်ဏေအ်ယဝါံ ရာဂါံသၟဟ်ဟ် ဇၟာပ်အခိုဟ်ဂှ် ဒက်ဒန်ဗှ်အာ ဗဍာန်အပြံက် ဂိုန်လစံက်လှာ ဂိုန်တၠိန်စံၚ် ဣန္ဒဝံသာ ဂိုန်ၜိုပ်ၜၚ်ဗ္ၚ သတ္တဓရာ ဂိုန်ဝေါသဒ္ဒ ဝံသနာနာ ယဝါံမေရာ ဒွါတလာဲမှုဲ ညံၚ်အက္ကရ အဝ်ဇဂဟုဲ ဇၟာပ်အခိုက်တၟုဲ ဒက်ဒေါန်ထုဲတ္ၜန် ဇၟာပ်ဂစေံဂှ် ဝေၚ်ဂြိုၚ်သၟဟ်န် ဂစေံတၜဳ လဗးသဳဒန် . . . ။
ပလိုတ်ဂှ်ပၠန် ဆိုက်ညန်ဌာန်ဘာ ဗမံက်ကွာန်မာ ဌာန်ဘာမံၚ်ဂျ အစာသၚ်လေဝ် ဂုဏ်ဝိသေသ စရာဲရုပ်သၟတ် စိုန်သ္ကီုမတ္တ လကတ်ဇြိုၚ်ဗု ဗီုကၞုဒ ဗ္တာၚ်သ္အးဂ္ညိဂၠဴ က္ၜတ်သဴကာယ ညံၚ်အိန်ဒက္ခဳ နွံဝဳရိယ ကျာ်ဩဳသၟဳသၟပ် အိန်ရဳကပ္ပ ပမဝ်မံၚ်ကၠာ ဘာဝနာဂျ မွဲမွဲတ္ၚဲကၠာ ပန်ပန်ကာလ စိုတ်ဇြုၚ်သ္ဍိုက်ဖဳ ဍိုက်ပေၚ်သဳလ ဂပ်ဝ်သ္ဍိုက်ပၠန် သၟိၚ်သဳမည ဂၠိုၚ်ကတ်ဗတောန် ပြဲလောန်ဂုဏ ဒှ်တဴဂနၚ် တ္ၜန်တ္ၜောဲသံဃ ဌာန်ဘာမူလ ဒေသဒတန် ဗတဳပေၚ်သဴ ဒှ်ဇနူဇန် အရှာံညံၚ်ဒိပ် သ္ဂီုကၠီုမိပ်သန် တၞံဆုသတပ်သတိၚ် ရေၚ်ဗျိၚ်တရန် ဂစေံဂြိုပ်ပၠန် ဂၠိုၚ်သန်ဗြုၚာဲ စာၚ်ဍေဝ်မြာ်ထဝ် ဗီုဂတဝ်သာဲ ဂြဴအေစလာၚ် ရှ်ရမျာၚ်ဆာဲ ဂစေံဇၟာပ်ဒၞာဲ အိုက်အာဲလဳၜန် မိပ်သိပ်လောန်ထောန် သန်ဌာန်ဝွံပၠန် . . . ။
ပ္ဍဲကာလဂှ် ဗဒှ်လဝ်ဇၟန် မိပ်သိပ်ကွေံကြာန် ဌာန်နူဒတန် ပ္ဍဲဘာဂှ်သအး လိက်ဝွံညးဆန် မူဟိုတ်ဖဵုတၟုဲ ညးညာတ်တုဲပၠန် လိက်ဝွံမွဲတန် ညးမဆန်ရော လမေၚ်ဂလာန် ညးသၟာန်ထောထော ဂလာန်စၟတ်ရော ညးစောဒနာ . . . ။
"သတ်ဂၚေၚ်မံၚ် ပ္ဍဲခြိုၚ်သံသာ ဟိုတ်နူလောဘ ဒေါသမောဟာ ဒးပတုဲလဝ်ဆက် ဝိပက်ဂၠိုၚ်ဝါ ချိုတ်စှ်ေဒးဟေၚ် နရက်သေၚ်ဟာ ကၠံကဝ်လ္ၚီကဝ် မွဲလက်ကဝ်မာ ပမတ်သလံၚ် ဂဵုမံၚ်ဖြာဖြာ ဂပိုတ်ဂပိိုၚ် ဒဒိုက်ဂၠိုၚ်ရာ ပမၚ်နရက် ထပက်ကၠိုဟ်သ္ကာ နူပါၚ်စာဲဏာ ကၠိုဟ်အာလတက် ဂပိုတ်လီၜန် မတ်ဗလန်လ္ၚက် ကၠဵုတမာစိၚ် ကိတ်သွိၚ်ထမက် ကြုတ်ပူလၜက် ကိတ်ထမက်ပျဲ ကြေတ်ကြေတ်ဟာဲစ ကၠဵုပဝဳဝဲ ဇကုကြဳကြဳ ညံၚ်ဆုရဳရဲ" . . . ။
နိဒါန် တုဲဆဝွံရ ။ ။ ။
၁။ ထ္ၜးဓမ္မတာဗောဓိသတ်
[ပလေဝ်ဒါန် | ပလေဝ်ဒါန် တမ်ကၞက်]ပိုဲဟီုကဵုဗျိၚ် မၞးပၚ်မှိၚ်ဂျ ဗောဓိသတ်ပၠန် စှ်ေတန်ဂဗ္ဘ နပညာဓဝ် ဓမ္မတာမွဲ ဝွံနဲအသဝ် ယာံရတန်ဂဝ် ဂတလဝ်မုက် ဟီုဟွံပဏုက် ဟွံဒလုက်ညိ ဒလာဲလဝ်အဵု ဇုတ်ဂတဵုဂ္ညိ ထဝါဲမံၚ်ဂျ ဂတမုက်မိ ဝွံဓမ္မတာ မွဲကၠာယုတ္တိ လံက်ဒတဴဂ္ညိ မိသၠ:ဂဝ် ဝွံဓမ္မတာ မပိုၚ််ခြာလဝ် ဇရေၚ်ဂြိုပ်သအး မိသၠးဂဝ် ဓမ္မတာမွဲ ဒှ်နဲအသဝ် ဗောဓိသတ်ဂး ယာံသၠးဂဝ် ယာတ်ဒိပ်ဇာထဝ် ဗြီုဒုၚ်လဝ်ကၠာ ပတုံဇိုန်တဲခိုဟ် ဗွဲဒိုဟ်သၟဝ်ကျာ သ္ၚဳဒိုဟ်ပန်သ္ကဲ ကြီုမွဲဂါထာ သာ်ဝွံမွဲတၞံ ဒှ်ဓမ္မတာ တိတ်ဝေၚ်ဂြိုပ်မှာ ဟွံဂွံခြာခၠန် လအာပြဲသိတ် ညာတ်နိမိတ်ပန် ဝွံဓမ္မတာ ဟွံဂွံခြာခၠန် ကောန်တြုံမွဲဂှ် က္တဵုဒှ်တုဲပၠန် တိတ်ပခမဳ ပလွဳဇၟအ်ကၟန် ဝွံဓမ္မတာ ဟွံခြာမွဲတန် သ္ၚောံသ္ၚာတုဲ ဟွံခၠုဲခၠန် ဒုက္ခစာရဳ ပလွဳဇၟာပ်တန် ဓမ္မတာပၠန် ဝွံမွဲကန်ကီု ပရိကံဓရ် ပၟဝ်ဩီုဩီု အနာပါနာ ဗှ်ကျာ်ဣဝီု ဓမ္မတာသ္ကဲ ဣဝွံမွဲဗီု ဗပေက်ကၠေံသတိုတ် ပၞာန်မာအိုဿီု တုဲဒှ်ကျာ်ဗိုန် ဣဒ္ဓိစိုန်သ္ကီု ဝွံဓမ္မတာမွဲ ဟွံခြာဒဝီု . . . . ။
ဗောဓိသတ်ကီု ဗၞတ်ကြီုကြ အသာဓာအဴ ညာဏ်တရဴဂျ ဒသဗလ ညာဏ်စှ်ဌာန ဥေယျဓရ်တုန် မသုန်သာ်ဂျ ဝွံဓမ္မတာ မွဲစၟတ်ဌာန ဒၟံၚ်ဇရေၚ်ခိုဟ် ဆုပလိုဟ်ဂျ ပ္ဍဲပဏၚ်ဂျသ္ကဲ ထပှ်တ္ၚဲရ ဒက်ထဝါဲဂျ သ္ၚိတ်ဇြတန်တဴ ဓမ္မတာမွဲ ဂုဏ်ပြဲသဘဴ ဘာဇေတဝန် မတန်ဒၟံၚ်တဴ မွဲဓမ္မတာ ဟွံဆောတ်မှာအဴ ဗြီုအာတ်ဓရ်သၟဟ် တုဲတွံဓရ်အဴ ဓမ္မတာမွဲ ဟီုသ္ကဲလဝ်တဴ ပ္ဍဲဣသိအဴ တဴပတ္တနာ ဌာန်ဣသိကၠာ မီဂဒါယ ကျာ်တွံဓရ်ဆက် ဓမ္မစက်ဂျ ဓမ္မတာမွဲ ဂုဏ်ပြဲအဂ္ဂ ကော်ခမဳဖျာ် ဗပေၚ်မာ်ဂျ ပါတိမုက်သအး ကျာ်ထ္ၜးရ ဗွဲဓမ္မတာ မွဲသဘာဝ အာတွံဓရ်သအး ကဵုညးတုဲဂျ ကဵုကွးကမၠောန် စဴတွံပၠန်ရ ဓမ္မတာဂျ ဝွံမွဲပခၠန် ဍုၚ်သာရဝှ် တရၚ်ဂှ်ညန် ပၠပါဋိဟာ ကျာ်နာဲသာဇန် ဓမ္မတာမွဲ ဝွံဗွဲခမ်ဍန် . . . . ။
ထပှ်ဝှ်ပၠန် ဒဂိုန်ညန်ဍုၚ်သွဝ် ခၠေဝ်ဂုဏ်မိဂှ် ကျာ်တိုန်တွံဓရ် ဓမ္မတာမွဲ တိတ်ဟီုသ္ကဲလဝ် ကျာ်တြဲတွံဓရ် စှ်ေနူဍုၚ်သွဝ်ဂှ် ပါၚ်တြၚ်ပညုၚ် ဇရေၚ်ဍုၚ်ဂှ် သၚ်္ကဿကီု နာဂဵုဟီုတွံ စလှစေတဳ ပ္တုံဇိုၚ်ပ္ညဳသၟဟ် ဝွံမွဲသေၚ်ဟာ ဓမ္မတာမြဟ် ဖလတုန်သၟဟ် သမာပတ်ဂှ် သွိုန်ဗပိုန်သၟဟ် ဇၟာပ်ကျာ်ဂှ်မာ သာ်ဝွံမွဲတၞံ ဒှ်ဓမ္မတာ မၞိဟ်ဒေဝတဴကၞာတ် ပူရိသာတ်ၜါ သ္ၚဳဒၟံၚ်ဟွံခြာ ဂွံအာမဂ်ဖိုလ် ဓမ္မတာမွဲ မပြဲတၚ်ဃဵု ခမဳတံဂ္ညိ ဗ္ဒဟ်ဟိုတ်မိကိုရ် ဓဝ်ကျာ်အမြဵု တွံကဵုဆတ္တဝ် သိက္ခာပိုဒ်တၟပ် ကျာ်တြဲပ္ညပ်လဝ် ဝွံဓမ္မတာ မွဲပိုၚ်ခြာက္ဍဝ် က္တဵုဒဒှ်သၟတ် အတိက်ဆတ္တဝ် ဇာတ်အတိက်ဂှ် ကျာ်တြဲတွံလဝ် ဓမ္မတာဝတ် မွဲဟီုဆတ္တဝ် ဒေါဝ်ဗနဳသၟတ် ကလောဆတ္တဝ် တွံဗုဒ္ဓဝၚ် ဟွံခၠၚ်သဍဝ် ဝွံဓမ္မတာ မွဲပိုၚ်ခြာလဝ် ကောံခမဳရ ဂန္တုကဍဝ် ဂလာန်ဆတ္တဝ် ဟီုလဝ်ပ္တုန်ဖအာ သာ်ဝွံမွဲတၞံ ဒှ်ဓမ္မတာ ညးနိမန်သၟဟ် ဒဂိုန်ဝှ်တုဲမာ ကာလအာတၟုဲ ပ္တီညးတုဲအာ ဝွံဓမ္မတာ ကျာ်တမၠာပ္ညဳ . . . . ။
မွဲမွဲတ္ၚဲရ တော်ဆပိုၚ်ပြဳ ပ္ဍဲကိစ္စကျာ် မသုန်သာ်ပ္ညဳ နူဂယးတဴဖဳ ဂၠာဲသ္ၚဳအာဟာ စေၚ်တွံဓရ်ကၠာ ဟံၚ်ပြာ်မှာဇန် ဂၠုတွံဓရ်ပ္ညဳ ကဵုခမဳပၠန် သ္ဂာတ္ၚဲပကာန် တြးညာဏ်တ္ၜန် ဆိုက်ယးမွဲတန် သတၚ်ညိပၠန် မွဲမွဲတ္ၚဲဖျာ် မသုန်သာ်ဂျ ကိစ္စကျာ််သတိုတ် တုပ်အိုတ်သဗ္ဗ ဝွံဓမ္မတာ မွဲဟေၚ်ဌာန ပပြဘိုဂ်တုန် ကြီုဖျုန်စုန္ဒ နိဗ္ဗာန်စဴဂျ ဗုဒ္ဓနာဲသာ သာ်ဝွံမွဲတၞံ ဒှ်ဓမ္မတာ သမာဓိပၠန် သဳလပညာ ဂြၚ်ဓရ်ကွေံကြာန် စၞေဟ်ပၞာန်မာ ဟံၚ်သတ်တုဲအဴ နိဗ္ဗာန်စဴအာ တၟံကျာ်ဟေၚ် တုပ်အိုတ်သေၚ်ဟာ သာ်ဝွံဟွံမှာ ဓမ္မတာကီု ဓမ္မတာသတိုတ် ပိစှော်အိုဿီု တၟံကျာ်ကီု တုပ်သီုဖအိုတ် နူဗုဒ္ဓဝၚ် တွံနၚ်ဟွံဖိုတ် ညံၚ်ဖျောန်လဝ်ပၠန် ညံၚ်ဇမန်ဗိုတ် ကောန်ဂကူတံ အိုတ်ဇၟအ်စရိုတ် ပ္ဍေန်လဝ်ပ္ဍဲစိုတ် လ္ပဝိုတ်ညိ . . . . ။
၂။ ထ္ၜးသရုပ်ပါရမဳစှ် ပိစှော်
[ပလေဝ်ဒါန် | ပလေဝ်ဒါန် တမ်ကၞက်]ဗောဓိသတ္တ ပဂ္ဂသဳရိ ပါရမဳဂ္ညိ ဒှ်သ္ၚိကျာ်ဩဳ ပ္တုဲကၠုၚ်သက်သက် ဗီုအိန်ဒက္ခဳ ပညာဓိက လွဳဝဳရိယ တုဲပသစ္စ အဓိဌာန တုဲရခန္တဳ တုဲဒးမေတ္တာ ဥပေက္ခာပ္ညဳ မှာဗောဓိသတ် ကၞတ်အသဝ် ပါရမဳစှ် ပ္တုဲကၠုၚ်သၟဟ်ဓဝ် . . . . ။
ဒသဥပ ပါရမဳယော ဒါန်အဝဲကၠာ ကောန်သမ္ဘာရော၊ ဝွံလေဝ်စှ်ပ္ညဳ ပါရမဳယော ဒသမွဲသၟတ် ကၞောတ်ယောသော ပါရမတ္ထ ပါရမဳယော လမျီုလောန်လောန် ကဵုဒါန်ထောထော သာ်ဝွံစှ်ကီု ပိစွံသီုအဴ သမတိံသ ပါရမဳယော ပါရမဳတြုံ ပိစှော်ယောသော ပ္တုဲဒါန်အနဳ ခုတ်ပ္ညဳနာမ ရိုဟ်ဟွံမာန်ရော ဂၠိုၚ်အဴဒါန ဒှ်ရသိဟာန် ကဵုဒါကုကၠ ဒှ်ဗတာဲအဵု ကဵုဒါန်လမ ဒှ်နာရဇိ ကဵုဒါန်ဇဳဝ ရတနရော ဂးပဇ္ဇောတ သၠ:ကၠေံလမျီု ဇဳဝိကီုဂျ ပါရမဳသၟတ် ပါရမတ္ထ ပဉ္စမဟာ ပရိစာဂ မှာဗောဓိသတ် တြုံပြမတ္ထ ပါရမဳဂျ ဝွံဒါနတုန် . . . . ။
ထ္ၜးဒါနပါရမဳ
[ပလေဝ်ဒါန် | ပလေဝ်ဒါန် တမ်ကၞက်]ဒါနဆက်တ္ၜဝ် ပ္တုဲလဝ်ဟွံခၠန် ကြီီုဒါနဂှ် ဟီုတွံမွဲတန် ဒါန်ပုၚ်ဒါန်ဍာ် ဒါန်သၠာ်ထဝ်ဩန် ဒါန်ဇဗၠသွတ် ဒါန်ဝတ်ဇဟန် ဒါန်ဇၞောဝ်ဒါန်က္ဍိုၚ် ကမၠိုၚ်ဒဒန် ဒါန်မွဲဇၞော်သန် ဒက်ပ္တန်စေတဳ ဒါန်သိုၚ်ဘာတုန် ဒါန်ဖုန်သဍဳ ဒါန်ပြဲတၟေၚ်သာ် ဒက်ကျာ်ဗတဳ ဒါန်သကဝ်ဂၞဳ ကျာ််ဩဳလောန်သန် ဒါန်ကၟာဗျာပ် ကမၠိုၚ်ဇၟာပ်တန် ဒါန်ကွာၚ်စၞ ဒါန်တုမ်သွဗျန် တးၚးဂၠံၚ်ဍာန် သဗာန်ဇၟာပ်တန် ဖိုလ်ဇၞော်က္ဍၚ်သန် ၜှ်ဇန်ဍောၚ်ပ္ကဴ ဇံၚ်ဒေန်သဝါန် ပ္တုဲဒါန်ကြက်လှဴ ဒါန်ပံၚ်သကူ ဇၞော်သန်နုဘဴ က္ဍိုၚ်လ္ၚီဇၞောဝ်လ္ၚီ ပၞာၚ်လ္ၚီစံၚ်သ္ဍဴ ဒါန်ဗြာတ်ဒါန်ၜဴ ဒါန်သတ်ဗြဴမြဟ် ဒါန်ဂအဳပၠန် ဒါန်ပညန်သၟဟ် ရာၚ်ဓနေၚ် သတ်ဂၠံက်တၟေၚ်တၟဟ် ဒါန်လကိုန်လှာ သတ်သွာဒကှ် ဒါန်သတ်ကြုက်ဂှ် ပဏဟ်လဳမဴ ဒါန်ယိုဟ်သတ်ဆု ဒါန်ယာဂုအဴ ဒါန်သတ္တဟ ယာမဍာ်က္ၜဴ ကြုက်ကြေၚ်ဗြာတ်ဂျ ဗၚ်ယပနဴ ဒါန်ဍာ်သာဲအဴ ပ္တုဲတဴဟွံခြာ ဒန်တၚ်လာဲပ္ကာန် သီဒါန်သဂြာ ဒါန်ကၟဟ်တၞဟ်သာ် တွံသီကျာ်ဘာ ဍာ်သွုၚ်ဇိုၚ်သၚ် ဖိုလ်ပြဲက္ဍၚ်ကၠာ ဒါန်ယာတ်ပၞာၚ်တိုၚ် သပိုၚ်သ္ၚာ ဒါန်ကောန်မဆာန် သီုဒါန်သမ္ဘာမဆာန် ဒါန်အဝဲဟေၚ် လမျီုသေၚ်ဟာ မှာဗောဓိသတ် တြုံကၞတ်သာ ဒသစှ်မာ ပါရမဳယော ဒသမွဲသၟတ် ကၞတ်ယောသော ကဵုဒါန်ဒြပ်သ္အး သၠ:ထောံထောထော ဝွံဒါနပ္ညဳ ပါရမဳယျော . . . . ။
ထ္ၜးသဳလပါရမဳ
[ပလေဝ်ဒါန် | ပလေဝ်ဒါန် တမ်ကၞက်]သဳလဟီုပ္ညဳ ပါရမဳပၠန် ဂးသဳမသုန် နွံဂုဏ်သေသာတ် ညးမွဲဂးမှာ ပါဏာတိပါတ် ဒးဂစိုတ်သၟတ် လမျီုသတ်ကၞာတ် ချိုတ်စှ်ေစိန်ဂၠက် နရက်ဇမ်ကာတ်် ဒစာံစှော်ကဝ် ဟီုလဝ်ခပ်ပြာတ် နူနရက်ကၞာတ် ခပ်ပြာတ်ဗၠးအာ က္တဵုဒှ်ပြိုတ်တၞံ မသုန်ကၠံဝါ ဍာ်ဟွံဂွံသုၚ် ကၠောဝ်ပုၚ်သကှ်အာ မသုန်ကၠံဝါ ပေၚ်အာတုဲဂျ ဗၠးနူပြိုတ်ဂှ် တုဲအာဒှ်က မသုန်ကၠံဝါ တမ္ၚာတအ်စ မသုန်ကၠံဝါ ဗၠးအာနူက ဒှ်ဒြာဲညးစ မသုန်ကၠံဝါ မသုန်ကၠံဝါ ဒှ်က္ၜိုၚ်သေၚ်ဟာ နူက္ၜိုၚ်ဂှ်မာ ချိုတ်အာတုဲသၟတ် မသုန်ကၠံအဵု ပြေၚ်အာက္တဵုဒှ် မသုန်ကၠံဝါ ကၠဵုကွာန်ခါဂှ် မသုန်ကၠံနး ကၠဵုဂြိုပ်ဒးဒှ် ဗၠးနူကၠဵုဂှ် ကၠဵုဒှ်မၞိဟ်ဂ္ညိ အာယုက်ဂၠေံပၠန် ဟွံတန်ထဳတိ ဘဝတ္ၜန်တ္ၜောဲ ဝိပက်နဲဂျိ ဒုသ်သာ်ဝွံဂၠိ ပါဏာတိပါတ် . . . . ။
အဒိန္နာဂး ကၠတ်ဒြပ်ညးကၞာတ် ကၠတ်စခပ်ပြာတ် ဂၞိန်ယာတ်ဂၠိုၚ်တန် ညးဟွံကဵုသတိုတ် နပါၚ်စိိုတ်ပၠန် ပၠံၚ်ၜးကေတ်သၟတ် ဒှ်ကၠတ်ဇၟာပ်တန် အနိၚ်ဆတ္တဝ် ဂိုၚ်ကေတ်ထဝ်ဩန် ပပၞာန်ဒမၠ ဘပၠံၚ်စပၠန် ဒှ်ကမၠတ်ဇၞော် ကျာ်ကော်ဂကန် သၞောဝ်စနာဲအဵု စသဳဖဵုပၠန် ဒှ်ကၠတ်စဆက် နရက်တန်န် ညးကၠတ်စပၠန် ကျာ်ဂကန်လဝ် ဝဳသတိသၟတ် ကပ္ပဆတ္တဝ် ဒးနရက်ကြောဟ် ဗၞတ်ၜါစှော်ကဝ် ၜါစှော်ကဝ်သၟတ် ဗၠးတုဲဆတ္တဝ် ဒိုက်ဒိန်ဇြာဲဇြေဟ် လောန်ထောန်ကာဲကဝ် ညးဍုဟ်လောန်ဗၞတ် ကၚ်ဇတ်တသဝ် ဒုဟ်ကမၠတ်ဓရ် ဆတ္တဝ်ယုတ်မာ အဒိန္နာဟေၚ် ကျာ်တွံသေၚ်ဟာ . . . . ။
ကာမေသုတၞံ ကၠတ်ကောန်သမ္ဘာ ကာမေသုတၟပ် တိသကပ္ပါ ဒးနရက်ဓဝ် ပိစှော်ကဝ်ကၠာ ဗၠးနူနရက် မသက္ကုခြာ ဒးဒှ်ဗြဴတၞံ မသုန်ကၠံဝါ ဒးဒှ်ခမၞုဲ သာံဒုဲဂှ်မာ မသုန်ကၠံကၠာ တက်အာဂတ မသုန်ကၠံဝါ ယဲတၞီပါပ အိုတ်တၟံညးက္ဍုဟ် စဍးထောံဗျ ခါဲဒုတ်သာလ သ္ဒိုၚ်သ္ဒကတောဝ်ၜါ ဒးဒှ်ခပ်ကြံ မသုန်ကၠံဝါ သာ်ဝွံဒှ်တၞံ ကၠတ်ကောန်သမ္ဘာ . . . . ။
မုသာအိုဿီု ယဝ်ဒးဟီုအာ ဒွါဒသတၟပ် နိရကပ္ပါ စှ်ၜါကဝ်ဟေၚ် နရက်သေၚ်ဟာ နူနရက်မှာ ဗၠးအာမွဲတန် ပါၚ်မသမ်အုဲ ၚေက်ပြဟ်ထုဲတ္ၜန် ဟီုဟွံကၠးအဴ ဓလိုအ်တဴပၠန် သ္ဒိုဟ်သ္ဒီုညာဏ်သိၚ် ဝိဝိၚ်တန်န် ဟီုညးဟွံပ္တေဟ် ယုတ်မာကွေံသန် ဣဝွံဒှ်ပၠန် လက်သဏ်မုသာ . . . . ။
ယဝ်ညးမွဲပ္ညုၚ် သုၚ်ဒးသုရာ ဒစာံကဝ်ကွေံ နရက်ဒွံမှာ တူလာဲသလိုက် နရက်ပြိုက်ဖာ ဇတဝ်ခြိက်က် ဖ္အိက်ဖ္အိက်ဟီုအာ ဗၠးနရက်မှာ ဒှ်ယက္ခပၠန် ဒှ်အာကလော် မတ်ဇၞော်ဒလန် ဗုၚ်ဇၞော်ဂဗှ်ေ ၚေက်ဂၞေဟ်ဒညန် မသုန်ကၠံဝါ ဒှ်ဟွံခြာခၠန် မသုန်ကၠံဇၟအ် ဒှ်ကၠဵုကြအ်ပၠန် ဒှ်မၞိဟ်ဇၟာပ်တန် ကြအ်ပၠန်ဂၠိုၚ်ဝါ ဍာ်ပါၚ်ဒဇူ ကြအ်ဒးလ္ၚုအာ ဒတုက်ကၠိက်ဇၟအ် တမြအ်ယုတ်မာ ဒှ်တြအ်တၞံ မသုန်ကၠံဝါ သာ်ဝွံသေၚ်ဟာ ဒုဟ်သုရာကၞာတ် . . . . ။
မှာဗောဓိသတ် လောန်ဗၞတ်သေသာတ် သဳလခပ်ပြာပ် သာ်ဗျာပ်ပြမ ဂၠိုၚ်ဘဝပ္ညဳ ဒ္ဂေတ်ဓရ်သဳလ ကာလဂှ်သၟတ် ဘူရိဒတ္တ သဳလဂိုဟ်သန် ဟွံရိုဟ်ခန္ဓ ဒှ်သၟိၚ်နာ်ကၠာ သၚ်္ခပါလ ဒ္ဂေတ်သဳလကီု သၟဟ်လမျီုရ ဗိုန်တဴသဳသၟတ် ဗွဲပြမတ္ထ ညံၚ်ဂစေံပ္ညဳ ကိကဳမူလ ဂိုဟ်ခမာဲကီု သၟဟ်လမျီုရ ညံၚ်ၜိုပ်ထဝ်ရ မဂိုဟ်သၠသၞေၚ် မၚ်မွဲသၞေၚ်ကီု သၟဟ်လမျီုဟေၚ် ညံၚ်ဒြာဲထဝ်ဂျ သော်ဗ္တရေၚ် ပ္ဍဲဂြိုပ်ဇၞော်ဂေၚ် ဂၚေၚ်ဝေၚ်လန် သော်ဗ္တပ္ညုၚ် မွဲတၞုၚ်ပၠန်် ယာံဂြဲဒးသၟတ် ဇုက်ကၟတ်ဟန် ဟွံရုန်ဟွံဂပိုတ် ဒဵုအိုတ်သ္ကန် လမျီုဟွံရိုဟ် သော်ထဝ်ဂိုဟ်သန် ဗောဓိသတ်သၟတ် ပမာဂှ်ပၠန် ဂိုဟ်သဳလသန် ဇၟအ်ကၟန်ကဵုလွဳ ညံၚ်ဒှ်ကျာ်သၟတ် ဟံၚ်သတ်လောကဳ ညံၚ်သ္ဂောံသၟုက်ဟာန် နိဗ္ဗာန်ကျာ်ဩဳ ဗောဓိသတ်ပြဲ ဒ္ဂေတ်ဒၟံၚ်ပ္ဍဲသဳ ဝွံသဳလပ္ညဳ ပါရမဳရောၚ်အဴ . . . . ။
ထ္ၜးနိက္ခမပါရမဳ
[ပလေဝ်ဒါန် | ပလေဝ်ဒါန် တမ်ကၞက်]နိက္ခမသၟတ် ပြာကတ်ဂၠိုၚ်တောၚ် ဗ္စာရဏာရောၚ် မွဲတောၚ်အနဳ ကျာ်တံတမၠာ ပ္တံပါရမဳ ဒုဟ်သ္ၚိကၟိန်ကၠာ ဒုဟ်အာဂနဳ သံသာညံၚ်ကၞက် ဗီုအိန်ဒက္ခဳ ဓရ်အဝိဇ္ဇာ ပၠေၚ်ပါရမဳ ဇၟာပ်သတ်ကၠံမွဲ ဂေတ်ဂေၚ်ဂၠောဲပ္ညဳ ဒှ်ချိုတ်ဒှ်ချိုတ် ဟွံဖိုတ်အနဳ ဒိုက်ဖဳတဝဳ ဂၠိုၚ်ဝိတဲသၞ ဇကုပအဵု ကဵုဇကုရ ညးဟွံဂွံပ ဇကုပဟေၚ် အကုသဵုဂှ် စိုတ်ပပ်တၟဟ်တၟေၚ် လောဘဒေါသ မောဟစဳရေၚ် ပျုတ်လမျီုညး ပျဲပျာံညးဟေၚ် သၟိက်ဂွံဒြပ်ညး လောဘသတးရေၚ် လက်ဖာညးဟေၚ် စန်ဒက်ကၠေၚ်ညး တသိၚ်စုတ်ကွေံ ဟီုတ္ၜေဟ်သ္ကာတ်ဂး ပဝမုတ်ဂး ဟိုတ်မပဒး ဟိုတ်လောဘရော ဒေါသမောဟ ကြံကြအဵုဇိုတ် ညံၚ်ဟွံချိုတ်ရ . . . . ။
ဂိတုတ္ၚဲဂျ ဟွံလအ်ပြကာ မာရဏကီု သၟိၚ်ယီုဂြဲဏာ ပမၚ်နရက် ၜုၚ်တက်ဟောဒြာ ဒဒိုက်နာနာ ညိဟွံခြာဒၚ် ရပ်လေံတဏဟ် ဍေံရပ်ဗၞုဟ်ဇြၚ် ကြံကြဂြိုဟ်က္ဍၚ် ပၟၚ်နရက် စန်ကၠေၚ်ဒက်ကီု တၚီုထပက် ပသဲဍာဲဍာဲ စာဲစုတ်ပါၚ်ဗက် ပ္ဍဲပါၚ်တူအဵု ကၠိုဟ်ဒဵုလတက် ဍေံဂြဲဏာပၠန် ဍေံကၠေၚ်စန်ဒက် ထောံဖျေံလဗာၚ် ပ္ဍဲကၠာၚ်နရက် တူဂဵုဂမြံၚ် တၞမ်မံၚ်ခြက်က် ဒးဒုၚ်နရက် ဂၠိုၚ်သၞာံလက်ကိုတ် လအ်လောန်သက်လက် ဝဳပက်ဟွံအိုတ် ဗၠးနူနရက် ဒးဝဳပက်ပြိုတ် ဇကုတူလာဲ ဇြေဟ်ဇြာဲဂၠိုၚ်ဂိုတ် ညံၚ်ဟွံဂွံသုၚ် ကၠောဝ်ပုၚ်ဂပိုတ် ဇြာဲဖျိုဟ်ဂဂတး စံၚ်တူလျးပၠိုတ် ဒးဒုၚ်တၞံ ဟိုတ်ကံဟွံအိုတ် ကျာ်လောန်အာဗက် စှ်လက်လ္ၚီကိုတ် ဟိုတ်ဝဳပက်တၞံ ဟိုတ်ကံဟွံအိုတ် ဟွံဂတာပ်ဗက် ကျာ်လ္ၚီလက်ကိုတ် လောဘဒေါသ ဂုဏ်မောဟစိုတ် ၜိုန်မိၚ်ညးတွံ ဓရ်သၟဟ်အမြိုတ် ကျာ်ဟွံလ္ၚောဝ် ဓရ်ဟွံပၠောပ်စိုတ် ရာဂပၠေၚ်ညး ချပ်တဴလျးပၠိုတ် ဟိုတ်အာရီဂှ် နရက်ဒှ်ပြိုတ် ဒးဒုၚ်တုဲအိုတ် ဝဳပက်စိုတ်ရောၚ် . . . . ။
ကာမဂုဏ်ဂွိုၚ် ထုဲကြာန်ဂၠိုၚ်တောၚ် ဟိုတ်အာရီုရောၚ် စိုတ်သလောၚ်ဂျ သာသၞာအဴ ၜိုန်နွံတဴရ ညိဟွံရံၚ်သ္ၚဳ စေတဳဗုဒ္ဓ ညးပၚ်မှိၚ်ဓရ် မိၚ်တမ္ညဝ်ဂျ ညိဟွံပၚ်မှိၚ် ဟွံသၠိၚ်စိတ္တ ဟွံရှ်ေသှ်ေပ္ညဳ သၚ်အရဳယျ ကျာ်ဓရ်သၚ်ရ ဟွံပနိဿဲ ဟွံပ္တုဲလဝ်အဵု ကုသဵုမွဲမွဲ ခမုတ်ဇဟန် တွံပါၚ်ကျာ်တြဲ ဟွံတွံၚးပ္ညဳ ဟွံကသဳတဲ ပ္ဍဲကုသဵုဂှ် ပၠိုတ်ဂၠုမတ်ၜါ ဖဳဒွါပှ်လှ် မ္ၚးဇိုၚ်ကၠာ စက္ကဝါဂှ် လျးဂိတုတ္ၚဲ ဟွံမွဲလ္ၚဟ် ဂၠုဒၟံၚ်ဆတ္တဝ် တွဵုကဝ်သၟဟ် ဒတုံဍာ်ဂျိ ဖိဖိတ္ၚဟ်ဟ်၊ ကြကောတ်လာဲအာ ဟွံခြာလ္ၚဟ် ကံဟွံအိုတ်ဟေၚ် ပရေၚ်ကံသၟဟ် က္တဵုဒှ်ပြိုတ်အဵု တဝဵုကဝ်ဂှ် ဍာ်ဟွံဂွံသုၚ် ကၠောဝ်ပုၚ်ဇြာဲသကှ် ဒးဒှ်ပြိုတ်ဂှ် မဒးဒှ်ရောၚ် . . . . ။
သတ္တံဂမၠိုၚ် အာရီုဂၠိုၚ်တောၚ် ထ္ၜူမာဲသလောၚ် တုပ်ဂၠောၚ်တမြအ် ရုပ်ဗဝဝ်ဇွ ခန္ဓပိုဲဏံ ပညံၚ်ဟွံချိုတ် အဵုဇိုတ်ဆအ်လအ် တုပ်ညံၚ်တမြအ် စိုတ်ဟွံဇၟအ်ပြံက် တမြအ်ဒၟံၚ်ဟာန် ပ္ဍဲသဗာန်ခြံက် ဍာ်အသုဘ ညးပသဂြံက် အမ်အုဲညံၚ်ဖြံက် ပသလံက်လေတ် ဇကုအလုံ ဍေံဗၠိုပ်ဟုံကေတ် ယာတ်သၟာက်ခန်ပြံက် လမ်စံက်ဗကေတ် လုံဇကုအဵု ဍေံဗိုၚ်ပူရေတ် လကံက်ဂြၚ်ဗံက် ချောဲဆံက်လၟောဝ်လၟေတ် ကျိုၚ်ကျဝ်ပူရေတ် ညာတ်ကေတ်ဂေါဝ်ဂါ ဇုက်ဂၞိၚ်ခါဲဗန် ဇမန်နာနာ ပွပလေဝ်ပလာ ကျိုၚ်လှာအဵုဇိုတ် ပ္ဍဲစိုတ်မဒှ် ညံၚ်ရှ်အမြိုတ် ကြအ်ဟွံမာန်စိုတ် ဒှ်အိုတ်ဇၟာပ်ရ . . . . ။
ဇန်ဂမၠိုၚ်ဟေၚ် နဲဂှ်သေၚ်ဟာ ဟွံဗစာရဏာ ပိုၚ်ခြာတော်ဆ ခန္ဓဇကု နုၚ်အသုဘ ယာတ်ဖေဝ်ယာတ်တ္ၜၚ်၊ ကေတ်နၚ်ဗြံက်ဗြ လစိန်ဂြၚ်ဗြံက် လကံက်ထဝ်ဂျ စလန်အဂၠဴ ဟုံနှဴဗြံက်ဗြ ကျိုၚ်ကျဝ်လဝ်ဗာၚ် ကဵုပါၚ်ဟဟ ကျိုၚ်ကျဝ်တုဲကီု ပ္ဍဲစိုတ်ကြီုကြ ညးမသတုပ်အဲ ညိဟွံမွဲရ ပ္ဍဲစိုတ်ကြီုသ္ဂဝ် သၠုၚ်လဝ်မာန လဟီုပြဝ ဟွံဒညညှာ ပ္ဍဲမချိုတ်ဂှ် ဟွံဗှ်သၞာ ပညံၚ်ဟွံချိုတ် ပ္ဍဲစိုတ်ကြဵုဇာ ကာလတဴဟေၚ် ဇံၚ်ယဲသေၚ်ဟာ သၟၚ်ချိုတ်တဝိုၚ် မတ်ဒှ်ဇိုၚ်ဇာ လတာ်ဂၠေံအာ ဟီုခြာပှ်လှ် ဒဇပ်ဒတဝ် တသဝ်တဴဂှ် ကြီုကြလ္ၚဟ် ပဒှ်ညိဟာ ဆပံက်ပါၚ်ဟေၚ် ဟွံမာန်သေၚ်ဟာ ကြီုဟွံမာန်သွံ သၟိၚ်ယီုဂွံဏာ ပမၚ်နရက် ၜုၚ်တက်ဟောဂြာ ဒဒိုက်နာနာ ညိဟွံခြာဒၚ် သီုမသ္ကာတ်မြဟ် ရပ်လွဟ်ဗၞဟ်ဇြၚ် ကြံကြဂြိုဟ်က္ဍၚ် ပမၚ်နရက် စန်ကၠေၚ်ဒက်ကီု တ္ၚီုထပက် ဗၞုဟ်ဂဵုဍာဲဍာဲ စာဲစုတ်ပါၚ်ဗက် နူပါၚ်တုန်အဵု ကၠိုဟ်ဒဵုလတက် ထောံဖျေံလဗာၚ် ပ္ဍဲကၠာၚ်နရက် တူဂဵုဂမြံၚ် တၞမ်ခြက်က် ဒးဒုၚ်နရက် ဂၠိုၚ်သၞာံလက်ကိုတ် လံလောန်သက်လက် ဝိပက်ဟွံအိုတ် တူတဴဟွံဖိုတ် လျးပၠိုတ်သေၚ်ဟာ . . . .။
ဟိုတ်နူဒမာ ဂုဏ်ရူပါရီု မဒးစဳရေၚ် ရိုဟ်တ္ၚဲသေၚ်ပ္ၚီု ကလောန်ကိစ္စ ဗျာပါရသတီု ဂူဗ္ၚကၠအ်သွဝ် တဵုလဝ်အိုဿီု ပြေၚ်ဂၠဴကွဳတီု ဗ္ၜေံသီုကၠဵု ကၠိက်အဒါသာၚ် သီုစာၚ်ပယဵု လတူသၟဝ်အဵု စေံၜဵုနုၚ်ကၠံက် ဇုက်ၜဝ်ဇုက်ကာန် လမာန်သီုဆံက် လောန်ကၠိတ်ကဍၚ် ဒုၚ်လဝ်လဗံက် ထမာဲပုၚ်ပ္ညဳ လမဳဒၞံက်ယံက် အစောန်အပြံက် ဒ္ၚောဝ်ၜက်လက်ဟတ် ဓမုၚ်ယန်ကၠာ ကသာဝိုၚ်ဟတ် တဏာဲနကွေံ ကရှ်ေကလတ် နုၚ်ဓရဳကၠာ ဓရပြာကတ် တအဳရိမံၚ် ဇံၚ်သဝါန်သၟတ် ဖုန်ဂၞဳသကဝ် လးဒေပ်လဝ်တဍာတ် တလှာဗအ်န တုံဂွိုၚ်တလှတ် ကၠာၚ်အၚ်ကၠာၚ်မှာဲ နုၚ်ထမာဲဗောတ် ဂၠုၚ်ဖံၚ်တွဵုနတ် မုဲကွာန်မတ်ထ မြပံၚ်ၜုန်ဂၞိၚ် တၞိၚ်သဗ္ဗ တုက်ဍာ်ယာ်သြောံ ရိုဟ်တ္ၚဲဂွံစ သ္ၚိကၟိန်ရဴလ္ၚ တော်ဆဟွံမာန် ဒးစဳရေၚ်သ္ကဲ ရိုဟ်တ္ၚဲဒါန်ဒါန် က္တဴစံၚ်ပ္ဍဲစိုတ် ပၠိုတ်ဟွံဂွံမာန် နိက္ခမကိုပ် တိတ်ဒၟံၚ်ဂြိပ်ယာန် ဂွံပခမဳ ပ္ကီုလွဳကွေံကြာန် ဂွံပၟဝ်တၞံ ဓရ်ကမ္မဌာန် ဂွံလမိဟ်ကၠာ အပ္ပနာၛာန် နိက္ခမပ္ကာန် ဒှ်ကျာ်မာန်ရောၚ် . . . .။
ထ္ၜးပညာပါရမဳ
[ပလေဝ်ဒါန် | ပလေဝ်ဒါန် တမ်ကၞက်]နိက္ခမ္မသ္ကဲ ဟီုတုဲမွဲတောၚ် ပညာတွံရောၚ် အခေါၚ်ကျာ်သြဳ ပိုဲဟီုပျးညိ ယုတ္တိအနဳ ညာဏဟီုခုတ် သမ္ပယုတ်ပ္ညဳ စှ်ၜါအနဳ ခုတ်ပ္ညဳမဟဂ္ဂုတ် လောကုတ္တဵုသၟဟ် မဂ်ဖဵုဂှ်မာ ပိဣသုန်အဴ ပကောံဖဴစှ်ၜါ ပန်စှော်ထပှ် စိုတ်တွံပညာ ပညာတီဟေၚ် နိဗ္ဗာန်သေၚ်ဟာ နိဗ္ဗာန်အမြိုတ် ပ္ဍဲစိုတ်မှောဝ်ဇဴ စိုတ်လမောဝ်အာ ဒှ်ပညာရောၚ် မွဲသာ်တီပၠန် သစ္စပန်ဂၠောၚ် သစ္စပန်သ္ကဲ စှ်ေစိုတ်မွဲတောၚ် တီသစ္စကၠာ ဂးပညာရောၚ် . . . ။
သမၠီုဂးဂှ် သာ်ဒှ်အသောၚ် နိဗ္ဗာန်မွဲတောၚ် ဟီုကဵုရောၚ်သၟတ် ဟွံကလၚ်ရ ညိဟွံပဗၞတ် နိဗ္ဗာန်အဆတ် ညံၚ်ကဵုရတ်ဗိုတ် ကျာ်တြဲဟီုတွံ ညံၚ်ရှ်အမြိုတ် ညံၚ်အမ္မဝှ် ဂၠုဒှ်ပ္ဍဲစိုတ် ညံၚ်ဗတံအဴ ပၟတ်သ္ဍဴပၠိုတ် ဂၠုစေက်ဒၟံၚ်ကီု ပ္ဍဲမတ်သီုဖအိုတ် ပမာသာ်ဂှ် သမၠီုဒှ်ဟိုတ် စမၠီုသီုဖအိုတ် ဟွံစှ်ေစိုတ်ညိ . . . ။
ပမာမွဲခုတ် ဂၠာဲနၚ်ယုတ္တိ ကမၠတ်စှ်ၜါ ကွာ်အာဒမၠိ ရပ်တဲဂၠောဲဖိ ဒမၠိကွာ်အာ လဆောဝ်ဂွံဍာန် သဗာန်ပြဲဖာ နတသိုက်ဟေၚ် အာတဴသေၚ်ဟာ လဆောဝ်မှာရာ လုပ်အာခြုံဗက် ဇလဂြဲရော လောတ်လောဗတက် လဆောဝ်အာဂှ် ဒှ်ဇြဟ်သက်လက် လောတ်လောဗတက် က္ဍိုပ်ပါ်သက်ကၞေၚ် လဆောဝ်ဒတုံ ကမၠိုၚ်ခြုံရေၚ် လ္ၚဵုဂှ်သကဲ ချိုတ်အာဗွဲလၟေၚ် လ္ၚဵုသၟေဟ်ဟေၚ် ကွာ်ဂေတ်ဗၠေၚ်သၟ လဆောဝ်ဆဵုခြုံ ဇြုံကိတ်ချိုတ်သ္ဒ လဆောဝ်ဆဵုသၞ ကၠကိတ်စဟေၚ် လ္ၚဵုဂွံစိုပ် ဗဒိုပ်ဌာန်တၟေၚ် လ္ၚဵုဂှ်ဟေၚ် ဟွံစိုပ်သေၚ်ဟာ သီုဒဒိုက်ပ္ညုၚ် ကြၚ်ကၠုၚ်ကြၚ်အာ အကုသဵုစိုတ် အိုဿီုစှ်ၜါ တုပ်ကမၠတ်မာ စှ်ၜါဂှ်ကီု ဟုဲဒးဟွံဖိုတ် ဗၠးဒုသ်အိုဿီု ကုသဵုပတုဲလဝ် ဂွံစိုပ်သွဝ်ဗြီု လဆောဝ်ဂှ်လီု ဟုဲလုပ်ကီုဟေၚ် သရာံပါပ်ကွေံ ဟွံဂွံစှ်ေဟေၚ် ပဝမုတ်ရ မဒးပတေၚ် ပ္ဍဲလိုက်ဝွံပၠန် ဒးစန်ဒက်ကၠေၚ် သရာံပါပ်ဟေၚ် ဟွံဝေၚ်ပ္တုဲဒၟံၚ် ချိုတ်ဒးနရက် တူဂၠက်သလံၚ် ပမတ်ဒဟဵု ဂမြံၚ်ဂဵုကၠံၚ် တူတဴဗြံၚ်ၚ် ဟွံမွဲသ္ဍံၚ်သွာ ဗွဲပမာဟေၚ် သမၠီုသေၚ်ဟာ . . . ။
တလပညာ ပမာမတ်ယး ဖဵုဟိုတ်ပြဲယုတ် တီကေတ်မုတ်ဒွး ပ္ဍဲလိုက်ဝွံသိုက် ပလိုက်လှဲလး သစ္စပန်သ္အး တီကေတ်လးလေၚ် စှ်ေပ္ဍဲစိုတ်ပၠန် သစ္စပန်ဟေၚ် နိဗ္ဗာန်အမြိုတ် ပၠိုတ်စိုတ်သေၚ်လေၚ် သဘဴဓရ်ဟေၚ် အိုဿီုသေၚ်ဟာ ပညာပြာကတ် ဗောဓိသတ္တာ ပိုဲဟီုနၚ်ရ သမ္တီပမှာ အာယုက်ဝွံဂှ် ထပှ်အခါ သှ်သၟာန်ဟေၚ် သၟီတၟေၚ်တမၠာ ဣဝွံပညာ ဒှ်ပါရမဳ သုဝဏ္ဏကၠာ ကုမ္မာခုတ်ပ္ညဳ ထပှ်သၞာံကိုပ် အာယုက်စိုပ်ဖဳ သှ်သၟာန်အဴ ဒေဝတဴပ္ညဳ ဒှ်အာဒါသ မုက္ခအနဳ အမှုပန်ဇဳ ဗကန်ပ္ညဳစှ် ဂွံသှ်ကဵုသ္အး သၟာန်ညးဂှ် ဝိဓူရပ္ညဳ ပိုန်ဇၞော်ကြဳဇှ် အမှုသၟီပန် ဇၞော်သန်လ္ၚဟ် သှ်ကၠေံအိုဿီု ညံၚ်ဗီုအတှ် မှုဟ်သဓဂှ် ဒှ်ကောန်သေဌဳ ပညာဂဵုမြဟ် ဒယှ်သ္အဳ ဒဵုဍုၚ်သွဝ်ဗြီု ဒယှ်ကီုဖဳ မှာဗောဓိသတ် တြုံကၞတ်လွဳ ဝွံပညာပ္ညဳ ပါရမဳရောၚ်အဴ . . . ။
ထ္ၜးဝဳရိယပါရမဳ
[ပလေဝ်ဒါန် | ပလေဝ်ဒါန် တမ်ကၞက်]ဝဳရိယပြဲ ဟီုပၠန်မွဲတောၚ် ဗောဓိသတ်ရောၚ် လွဳဂၠောၚ်ပြမှ အတိက်တေံဂှ် ဒှ်ဂစေံသၞ ကောံဂစေံဗြဴ သၟဟ်န်တဴရ သကဲသြၚ်ဂၚ် ဆုနွံက္ဍၚ်ပြ ပ္ဍဲဆုဂှ်ရ ဒၟံၚ်ဂျသၟဟ်န် တုဲဂစေံဗြဴ ဂဝ်ဂၞဴကၠုၚ်တန် ကောန်တြုံမွဲသွံ က္တဵုဒှ်ဟွံခၠန် သၞေၚ်တိုန်ဂ္ညိဂၞဴ ဗဵုလ္ၚောဝ်တဴပၠန် ကောန်ဂှ်သ္ဍိုက်သ္ဍန် ပူဗန်ဂၠက်သ္ဍဴ ဆိုက်ကဵုသၞေၚ်ကြံၚ် ပ္ဍဲမဒၟံၚ်တဴ လဗိုတ်က္တဵုဒှ် လပှ်သဴသဴ ကောန်ဍောတ်ဂှ်အဴ ဒးအဆဴကျာ ပ္ဍဲဂၚ်ဂှ်ကွေံ ဒတုံစှ်ေအာ ဂစေံဗြဴပ္ညဳ ယာံတဴဖဳဒွါ တုဲဂစေံဗြဴ ယာံတဴလ္ၚာပ်လ္ၚာ တုဲဂစေံကၟက် မသက္ကုခြာ ပဝ်စှ်ေဍာ်ဗိုန် ဟွံဂွံဇြိုန်ညှာ သာတ်ဍာ်ဂၚ်္ဂါ နသၞေၚ်ၜါဂှ် စိုတ်ဇၞော်လောန်အဴ လွဳဇၞော်တဴသၟဟ် သၞာအိန်အဴ ချဳတဴလတှ် ပရုပ်မၞိဟ်ကီု ကၠုၚ်ဟီုလဖှ် ယွံဂစေံသၞ နာဲပတၟေၚ်တၟဟ် ဇကုနာဲသ္ကဲ ဍောတ်မွဲ ပှ်လှ် ဂၚ်ဇၞော်လောန်ဗၞတ် သာတ်ဇတ်ဇကှ် နသၞေၚ်ၜါဂှ် ဂၚ်သကှ်မာန်ဟာ . . . ။
ဂစေံမိၚ်ဗိုန် ဟီုတိုန်ဟွံညှာ ယွံမၞိဟ်လၞုဟ် ပကၠုၚ်လုတ်စာ မၞးပကၠုၚ်ဟီု ပပၠီုကေၚ်ကာ ကာလလမျီု အိုန်သ္ကန်လီုအာ ကာလဂှ်ပ္ညဳ ထောံလွဳပရာ နွံတဴလမျီု သ္ကန်ဟွံလီုမှာ ထောံလွဳအိုဿီု ဒှ်တြုံကီုဟာ တလအဲမှာ အောန်လွဳခါဂှ် ပကၠုၚ်ဆေဝ်တာ စဴအာသ္ၚိပြဟ် ဗဇ္ဇဗတ်ကၟိန် ဟီုကဵုအိန်ဂှ် . . . ။
သၟိၚ်အိန်မိၚ်ဒေမ် ပါၚ်ဂစေံသၟဟ် ထိုၚ်သးဟွံဖိုတ် ပ္ဍဲစိုတ်သ္ဂေတ်သွဟ် လွဳတြုံအသဝ် ပကၚ်ရၚ်ဓရ်စှ် ပလီုကၠေံမှာ ဟွံမာန်ခါဂှ် ဇၞော်ကြဳဇှ်က္ဍၚ် ဂွံဒှ်ကျာ်တြဲ ဟွံဆောတ်မွဲတၚ် သၟိၚ်အိန်ချပ်ဂေတ် ကောန်ဒးကေတ်နၚ် ကောန်တြုံပြဲက္ဍၚ် ကော်နၚ်ကဵုပ္ညဳ ဂွံကောန်မွဲတဲ စိုတ်ဟဲဒ္ၚဳဒ္ၚဳ . . . ။
ဗောဓိသတ်အဵု ဟိုတ်နွံကဵုလွဳ ကြဴဒှ်ကျာ်စၟတ် ဂွံဟံၚ်သတ်ပ္ညဳ ဝဳရိယမှာ ဝွံပါရမဳ ဗောဓိသတ်ပ္ညဳ ဂၠိုၚ်ဝဳရိယ ကာလဂှ်ခုတ် မှာဘုတ္တရ မိပ္ဍိုက်သြိုဟ်အဴ ၜိၚ်တဴလျလျ ထပှ်တ္ၚဲတၞံ လွဳတဴကြံကြ ဒှ်မှာဇနက် ၜိၚ်ဗက်တဴဂျ လွဳဟွံဖေက်စ ဟွံရိုဟ်ခန္ဓ ထပှ်တ္ၚဲအဴ ၜိၚ်တဴလျလျ ဍာ်ဟွံမွဲဗျာၚ် ကဵုကၞာၚ်ကဝ သွက်ဂွံဗလဲ ဟွံမွဲညိည စိုတ်အိန်ဒက္ခဳ ပလွဳကြံကြ ဝွံပါရမဳ ဒှ်ဝဳရိယ ဗောဓိသတ် ဗွဲပြမတ္ထ ဝွံဝဳရိယ တိတ်ဟီုပၠရောၚ် . . . ။
ထ္ၜးသစ္စပါရမဳ
[ပလေဝ်ဒါန် | ပလေဝ်ဒါန် တမ်ကၞက်]သစ္စပန်ကီု တိတ်ဟီုမွဲတောၚ် ဒှ်ကကၠရောၚ် မွဲတောၚ်သစ္စ ဒှ်ဂစေံဒဂူ အဃိုတ်မူလ ဂုဏ်သစ္စအဴ ပြာကတ်တဴရ သၟိၚ်သုတ္တကီု (သုတသောမ) ကၠေံလမျီုရ မုသာအိုဿီု ဟွံဟီုညိည သစ္စဟီုစၟတ် ဒှ်ဓရ်သစ္စ မုသာတမုန် ဟွံသၟဟ်တုန်ရ ဟွံမွဲသစ္စ ပွမုသာ မုသာဂၠိုၚ်ဟေၚ် ပိုန်ဟုတ်သေၚ်ဟာ အာယုက်ဟုတ်ပြဟ် ကျာ်တွံလဝ်ကၠာ ညးမဒှ်ရော ယဝ်စောတနာ သၟိၚ်စေတဳယ တေဇပြာထာ ဗွဲလ္တူကျာ ကလာၚ်အာဒှ် မြမောဝ်ပါၚ်ဆာဲ မောဝ်တမာဲပြဟ် ဒေဝတဴဂှ် ညဳသၟဟ်ညးပန် ရပ်သၞာ်လဝိၚ် မၚ်မွဲသၟိၚ်ပၠန် နွံမွဲတ္ၚဲကၞာတ် သီုအမာတ်ပန် သၟာန်သၟိၚ်မွဲတန် ပ္ဍဲဒေန်နန်မြ ယွံတလတိ ဘူမိပါလ ကောန်ဨကရာဇ် နာဲပြာသာဒ်မြ ကောဒေံမူလ ဗွဲစၟတ်သဘဴ ဟီုကဵုညိအဴ ဗွဲကြဴအနဳ နွံပ္ညဳဆန္ဒ ကောန်ဇၞော်တိုန်ပၠန် ဆာန်အောန်ပြမ ကောန်ဍောတ်ဂှ်ရ ဇြဟာန်မဂၠိုၚ် ကောန်ဍောတ်ဂှ်ရော ပကောဒဝိုၚ် ကောန်ဇၞော်ပယိုၚ် ဒဝိုၚ်တိတ်ဟီု မုသာအဆတ် ဟွံဒှ်စၟတ်ကီု ဟွံစၟတ်ဒးဟီု သစ္စလီုအာ ရပ်သၞာ်ဒေဝတဴ ကလာၚ်ဒဴအာ ကလာၚ်လ္တူကျာ ဟွံမာန်ခါဂှ် ဒတုံစှ်ေတိ တိၚိတ်ပါ်သၟဟ် စှ်ေဒးနရက် တူဂၠက်ပှ်လှ် ဟီုဟွံစၟတ်ရ သစ္စလီုဂှ် အာယုက်ဟုတ်အာ ပိုန်ဟုတ်အာသၟဟ် သၟိၚ်စေတဳဂှ် မ္ဒးဒှ်ပ္ညဳ . . . ။
မှာဗောဓိသတ် တြုံကၞတ်လွဳ လဟီုညံၚ်ကၞက် ဗီုအိန်ဒက္ခဳ နွံကဵုသစ္စ ပြမတ္ထပ္ညဳ သၟိၚ်မွဲနွံရ သစ္စဝါဒ တိသုန္ဓရဳ မၚ်မွဲဆေဝ်ဒဝ် ပ္ဍဲဓရ်သစ္စ ဗိုန်စၟတ်ပလဝ် ကျာလေဝ်ပိုက်ဓဝ် ဗြဲဓဝ်လောန်ကာဲ ရှ်တိအသဝ် ဗီုဗတဝ်သာဲ ဂၠးလတူဗိုန် ဂတဝ်တိုန်ၚာဲ ရှ်တိအသဝ် ယာံဂတဝ်ဆာဲ ဩောံသ္ၚုဇၟာပ်ဒၞာဲ နွံဆာဲကဵုရှ် ယာံစတုဲသွံ ဓာတ်ပန်ဂွံသၟဟ် ယဲဒးစ္ဍးသိၚ် အာယုက်ဂၠိၚ်တွံ သတ်ဆုရိုဟ်ဆု ကမတ်ဆုဂှ် စနွံကဵုရှ် ယာံဗဒှ်ဂဥုဲ ယဲဒိုက်နွံကိုပ် ဗၠးစိုပ်ဒတုဲ ဍာ်ပ္ဍဲတိဂှ် သုၚ်ဒှ်ဂဥုဲ ဓာတ်ပန်သၟဟ်တုဲ ဂဥုဲစိုတ်သ္ကီု ယဝ်သၟိၚ်မွဲရ ဓရ်သစ္စလီု ဗြဲကျာအိုဿီု ဟွံဓဝ်ကီုရ ရှ်တိဗၠိုက်သၟဟ် ထပှ်ဟတ်ဂျ ပုၚ်ဍာ်မူလ သဗ္ဗလီုပ္ညဳ ယဲဒိုက်ဂၠိုၚ်သန် ဇၟာပ်ဇန်လောကဳ အာယုက်သတ္တံမှာ ဂၠေံအာအနဳ မှာဗောဓိသတ် တြုံကၞတ်လွဳ သစ္စဒှ်ကၞက် ဗီုအိန်ဒက္ခဳ ဝွံသစ္စပ္ညဳ ဒှ်ပါရမဳရောၚ် . . . ။
ထ္ၜးအဓိဌာနပါရမဳ
[ပလေဝ်ဒါန် | ပလေဝ်ဒါန် တမ်ကၞက်]အဓိဌာန ဂတမွဲတောၚ် ဗောဓိသတ်ရောၚ် နွံဂၠောၚ်ကြဳဇှ် ဒှ်ကောန်သၟိၚ်ဓု သုဓနုဂှ် ဗက်အာစိုပ်ပ္ညဳ ဍုၚ်ဟရဳဂှ် မနောဟာရဳ သၟိၚ်ခါမ်သဳဂှ် သုဓနုတၞံ သၟိက်စံထဍဟ် နွံတၟံမွဲသၟဟ် ဇၞော်ဂှ်လောန်လာန် ဗၞတ်မၞိဟ်သလိုက် မွဲလက်ကိုတ်မာန် သၟိၚ်ခါံသဳတၞံ ကဵုယိုက်စံကာန် ဗောဓိသတ်ဂ္ညိ ပအဓိဌာန် အဲဒှ်ကျာ်စၟတ် အနာဂတ်ဟာန် တၟံဝွံဇၞော်က္ဍၚ် ကဵုအဲပၚ်မာန် နကြဳဇှ်ပကာန် တၞံဒါန်တမၠာ ပၚ်ပတိုန်မ္ဂး တၟံဂှ်ဒးသာ တ္ၚိုန်ဝေၚ်ပညုၚ် ကွာ်ကၠုၚ်ကွာ်အာ ခနှောဝ်လ္ၚီကိုတ် ညာတ်အိုတ်ဟောဒြာ အသဝ်လောန်ထောန် ယွံကောန်နာဲသာ ဒြီုဒြီုလဒု ကဵုသာဓုကာ သၟိၚ်ခါံသဳပြဲ တက်တဲကြဵုဇာ ဩကောန်အသဝ် ဒကောၚ်ထဝ်ဏှာ ဇမ္ဗုဒိပ်သ္ကဲ တြုံဟွံမွဲၜါ သ္ဍိုက်လောန်ပ္ညဳ ကၚ်ဇတ်ဖဳဒွါ ကောန်ဗြဴအသဝ် ဒကောၚ်ထဝ်ဏှာ ထပ်တဲညးၜါ ဇိုန်ကဵုခါဂှ် မနောဟရဳ ရုပ်ကျာ်ဩဳမြဟ် ကဵုသုဓနု ကောန်နာဲမြုသၟဟ် သီုညးၜါဂှ် သိုက်သၟဟ်မွဲဂၞဳ ဟိုတ်ကြဳဇှ်ပ္ကာန် အဓိဌာန်ပ္ညဳ ဗောဓိသတ်ပ္ညဳ ပ္တံပါရမဳ အဓိဌာန်ပ္ညဳ ဒှ်ပါရမဳရောၚ် . . . ။
ကာလဂှ်ပ္ညဳ မှာတေမဳယ ဒှ်ဗၠာဲမူလ ကျေဝ်လှာရုပ္ပါ တုပ်နာဲသွဝ်ၜါ သာ်လှာသဘဴ အာယုက်ပေၚ်အဴ စှ်တြဴသၞာံ ညးစံမေခု ကဵုမာတုဂါမ် ဝုတ်စှ်သုန်သၞာံ ဂေါဝ်ဗျာံကျာ်ဩဳ စရာဲအယော သၞံၚ်ရောဟိဏဳ ဗတံဂၠုတုန် သတိက်ပ္ဍဲဖုန်ဂၞဳ စံၜတ်မံၚ်ဗျာံ စှ်သၞာံအနဳ ဗြဴဂၠိုၚ်သန် ရိုဟ်တ္ၚဲပလွဳ ဗောဓိသတ်ပ္ကာန် အဓိဌာန်ပ္ညဳ အဲသ္ဒဟ်ကျာ်စၟတ် ပြာ်သတ်လောကဳ စိုတ်အိန်ဒက္ခဳ ပကဵုချဳပ္ကာန် လွဳအဲအိုဿီု ပကဵုမာန်ညိ ဗောဓိသတ်ဂ္ညိ ပအဓိဌာန် ဟိုတ်ကြဳဇှ်ပ္ကာန် အဓိဌာန်ပ္ညဳ စိုတ်ဗိုန်သက်လက် ဗိုန်အိန်ဒက္ခဳ ဗောဓိသတ်လေဝ် ပ္ဍဲဒှ်တေမဳ အဓိဌာန်အဴ ဍိုက်ပၚ်တဴလွဳ တုဲဂွံဒှ်ဂ္ညိ ရသိကျာ်ဩဳ ဒှ်ခမဳပ္ကာန် ဂွံၛာန်လောကဳ သၟိၚ်ကၠံမွဲက္ဍိုၚ် ဒးတိတ်ဗိုၚ်သ္အဳ သၟိၚ်ဖအိုတ်ဂှ် ဂွံဒှ်ခမဳ ဂွံၛာန်လောကဳ အိုဿီုညဳသာ စုတိတုဲကီု ဍုၚ်ဗြီုဟွံမှာ ကြဴဒှ်ကျာ်စၟတ် ပြာ်သတ်သံသာ အဓိဌာနာ ဝွံပါရမဳ ဗောဓိသတ်အဵု ဟိုတ်နွံကဵုလွဳ အဓိဌာန်ဗက် စိုတ်အိန်ဒက္ခဳ အဓိဌာန်ပ္ညဳ ဒှ်ပါရမဳရောၚ် . . . ။
ထ္ၜးခန္တဳပါရမဳ
[ပလေဝ်ဒါန် | ပလေဝ်ဒါန် တမ်ကၞက်]ခန္တဳအေၚ်ပြဲ ဂးကဵုမွဲတောၚ် ပတုဲဒါန်ရောၚ် ဣသိဟွံယောၚ် ပ္ဍဲဂၠောၚ်ဥဒျာဉ် ဒက်ထဝါဲဓရ် ပၟဝ်ဒၟံၚ်ၛာန် သၟိၚ်တလာဗု တိတ်ဝေၚ်ဥဒျာဉ် စိုပ်ဥဒျာဉ်တုဲ ဗမူထုဲကြာန် တူထဝါဲဗြဴ သတိက်လှိၚ်တဴဟာန် ကမၠောၚ်ဂမၠိုၚ် ဂေတ်ကြိုၚ်ဂေတ်ဟာန် ရေတ်ဝေၚ်ဥဒျာဉ် စိုပ်ဌာန်ဣသိ ကမၠောၚ်သၟိၚ်ဓရ် အာတ်ဓရ်ဒမၠိ အာတ်ကဵုဒါန်ညိ ရသိတွံဓရ် ကမၠောၚ်ဂမၠိုၚ် ကလၚ်ဗိုၚ်သ္ကဝ် ပ္ဍဲဂှ်သၟိၚ်စၟတ် ၚုဟ်တိုန်ဆတ္တဝ် သၟာန်ဂၠာဲတမ္ညဝ် တုဲဓရ်သောသော အိုတ်ဇၟာပ်တြုံဗြဴ မူဒၞာဲတူရော ယွံကျာ်ဂမျိုၚ် ပၞာၚ်တိုၚ်အဂ္ဂေါ ကမၠောန်တံရော သီုဩဆတ္တဝ် ညာတ်ရသိဗျိၚ် အာတ်ပၚ်မှိၚ်ဓရ် ရသိသၟတ် တွံကဵုဆတ္တဝ် ကမၠောန်တံအသဝ် ပၚ်မှိၚ်ဓရ်ရောၚ်အဴ . . . ။
သၟိၚ်ဂွံမိၚ်ရ ဒေါသဂၠိုၚ်တောၚ် ညံၚ်ပၟတ်ဂှ် ဒဟဵုဖောၚ်ဖောၚ် အာကဵုရသိ စိုပ်ညိမွဲတောၚ် ဗာတ်ဇခါတ်ရောၚ် ဟွံယောၚ်ကော်နၚ် ကဵုရေတ်ဆတ္တဝ် ကတောၚ်ၜါကလၚ် တုဲသၟာန်မွဲတဲ ရသိပြဲက္ဍၚ် မူဒဂေတ်မွဲ ဟီုအဲကလၚ် . . . ။
ခန္တဳအေၚ်ကၠာ မှာရာဇဝၚ် ရသိဟီုအဵု ထေဲဒဟဵုက္ဍၚ် ကဵုရေတ်ကၠေံမုဟ် တီတဏဟ်ဂြၚ် မူဒဂေတ်ကီု ဟီုအဲကလၚ် . . . ။
ယွံသၟိၚ်မပြဲ ခန္တီမွဲတၚ် မပြဲလောန်က္ဍၚ် ရနာဲပၚ်မှိၚ် မိၚ်ရသိဟီု ထေဲသီုဝိဝိၚ် ကဵုဒကုတ်ကၠေံကၠာ သီုတဲၜါဗျိၚ် မူဒဂေတ်ပြဲ ဟီုညိအဲမိၚ် . . . ။
မူဒဂေတ်မွဲ မပြဲအဂ္ဂ လအေၚ်ခန္တဳ ဒှ်ကျာ်ဩဳရ ရသိတုန်ကၠာ ဟီုကဵုရာဇာ သီုဒေါသကၠာ က္တဵုစဴအာရ သီုမေတ္တာပ္ညဳ ရသိတဳလ သ္ၚဳဒၟံၚ်ရ ဆသၟိၚ်မအာ ရသိညာတ်ဒၟံၚ် သၟိၚ်ဂှ်ထံၚ်ထာ ဗဒန်မတ်ဟေၚ် ရသိသေၚ်ဟာ သိပ်တိဖာဲအာ တိၚိတ်ဏယပၠန် စှ်ေဒးနရက် တူဂၠက်ထညန် ပမတ်သလံၚ် ဂဵုမံၚ်တန်တန် ဍာ်ပသဲပၠန် ဂဵုတ္ၜန်တ္ၜောဲတဴ သၟိၚ်ကလာဗု ဇကုဒြဴဒြဴ တူမံၚ်ဆတ္တဝ် တွဵုကဝ်ရောၚ်အဴ . . . ။
မှာဗောဓိသတ် တြုံကၞတ်ဘဴ ရသိတုန်အဴ စုတိစဴကီု ၜးအတ္တဘဴ ဂွံစဴသွဝ်ဗြီု ကြဴဒှ်ကျာ်စၟတ် ပြာ်သတ်အိုတ်သီု ဗောဓိသတ်ကီု သီုမသတီုလွဳ ဒှ်ရသိပၠန် လအေၚ်ခန္တဳ ဟွံဂွံထေဲကၠာ သီုမေတ္တာပ္ညဳ ဣဝွံခန္တဳ ဒှ်ပါရမဳရောၚ် . . . ။
ထ္ၜးမေတ္တာပါရမဳ
[ပလေဝ်ဒါန် | ပလေဝ်ဒါန် တမ်ကၞက်]ဓရ်မေတ္တာသ္ကဲ တွံကဵုမွဲတောၚ် ယဝ်ညးမွဲရောၚ် နွံဂၠံၚ်မေတ္တာ ဂုဏ်မေတ္တာဟေၚ် စှ်မွဲသေၚ်ဟာ လှိၚ်သိုက်ၚုဟ်သိုက် မၞိဟ်သိုက်သုခါ ကၠော်သ္ဍိုက်အာ လွဟ်ၚာဲခြာခၠန် စိုတ်မေတ္တာသွိုန် ပါတ်တိုန်ဗိုန်ကညန် ပမတ်စရောဲ ဟွံတဴမွဲတန် ဂျိဟွံတန်ပၠန် စိုတ်တန်ကြန်သ္ကီု ဒေဝတဴပြဲ ဒးမၚ်မွဲကီု စိုတ်မေတ္တာပ္ညုၚ် ချိုတ်ဂွံဍုၚ်ဗြီု ဂုဏ်သာ်ဝွံကီု စိုန်သ္ကီူမေတ္တာ မှာဗောဓိသတ် တြုံကၞတ်သာ ဒဵုဒှ်ကျာ်ကၠာ ပ္တံပါရမဳ ပၠေၚ်ကၠေံလွဟ်မှာ ဂုဏ်မေတ္တာပ္ညဳ ဇၞးစိၚ်ကလော် ဇၞော်ဗော်ဝဳရဳ ဂုဏ်မေတ္တာသ္အး ကျာ်တြဲဇၞးဇဳ သာ်ဝွံမေတ္တာ ဒှ်ပါရမဳရောၚ် . . . ။
ထ္ၜးဥပေက္ခာပါရမဳ
[ပလေဝ်ဒါန် | ပလေဝ်ဒါန် တမ်ကၞက်]ဥပေက္ခာကီု ဂၠာဲဟီုအနဳ ညံၚ်သၟိၚ်ၜိုပ်ကၠာ သုဝဏ္ဏာပ္ညဳ ဟွံဒှ်သုခဳ ဒုက္ခဳဟွံဒှ် ဥပေက္ခာဟေၚ် ဒေါဝ်ၜါရေၚ်သၟဟ် တသိုက်ဟွံဒှ် ဟွံဒးဒဒိုက် ကြာဒဒိုက်မှာ ဒှ်ကြာတသိုက် စိုတ်ကျာ်နာဲလိုက် ဟွံသ္ဍိုက်ဟွံမၠိ ချပ်ဗ္စာရဏာ ပိုၚ်ခြာဂၠိၚ်ဂၠေံ ဟွံဆာန်ဟွံမၠေံ ဟွံစေံနေံသွဟ် ပမာမွဲကီု ဂၠာဲဟီုလဖှ် ညံၚ်သာရထဳ မစဝ်ကွဳဂှ် ဂၠဴၜါဗဂန်ကၞပ် တဝ်တၞပ်လ္ၚဟ် ဂၠဴဆဵုဂၠံၚ်ဗိုန် လ္ဂူလၟိုန်သၟဟ် ဓရ်ဥပေက္ခာ တုပ်ပမာဂှ် သတ်မတဴမှာ ပ္ဍဲသံသာသၟဟ် နူသံသာဂှ် ဗၠးသၟဟ်ယောသော နူဒဒိုက်ဂျိ ဗၠးညိခိုဟ်ရော သာ်ဝွံစိုတ်ဂှ် မဒှ်ထောထော မှာဗောဓိသတ် ကၞတ်အယော ပါရမဳယော ထောထောပလွဳ သီုဥပေက္ခာ စှ်ပါရမဳ ကွေံစိုတ်ပလွဳ အိန်တက္ခဳရောၚ် . . .။
၃။ ထ္ၜးဗောဓိသတ် ဒှ်သၟိၚ်ဝေသန္တဝ်
[ပလေဝ်ဒါန် | ပလေဝ်ဒါန် တမ်ကၞက်]ပါရမဳစှ် တွံတုဲမွဲတောၚ် ပ္တံကၠုၚ်ဖောၚ်ဖောၚ် စိုတ်ဟွံယောၚ်က္ဍဝ် ဂၠိုၚ်ဘဝအဵု ဂၠိုၚ်တွဵုကဝ် ရိုဟ်ဟွံမာန်ရ ဒါနပ္တုဲလဝ် စိုပ်ကဝ်ဝွံရ ဒှ်ဘဒြကဝ် အာဒိဆတ္တဝ် ပ္ဍဲကဝ်ဝွံရ က္တဵုဒှ်သၟိၚ်ပၠန် မှာသမန္တ ပထမဂ္ညိ အာဒိကပ္ပ တုဲဆၚ်ကၠုၚ်ပၠန် တၞောဝ်သာမန္တ လၟိဟ်ဘဝ တၞောဝ်ရာဇက္ဍဝ် ဂၠိုၚ်ဘဝပၠန် စိုပ်ဝေသန္တဝ် ဝေသန္တဝ်တၟပ် ကြက်ဒြပ်ပေၚ်ဗဝ် ဒယိုန်ပ္တိတ်သၟတ် ပ္တုဲကၠုၚ်ဆတ္တဝ် စိၚ်ဂွုသွဝ် အၚဝ်ထာၚ်ကိုန် စိၚ်ဗတာၚ်သွံ ကဵုဒါန်ဟွံဇြိုၚ် ကောန်ၜါလပိုန် ညံၚ်ဒတိုန်ထဝ် သမ္ဘာမွဲသ္အး ညံၚ်ဂၠးသ္ဂဝ် ကဵုဒါန်တုဲပ္ညဳ တိချဳဇတဝ် မှာသမှိတ်ဗြု လဒုကာဲကဝ် ဇၞော်သန်အသဝ် တမ္ညဝ်ဒဵုဗြီု သာဓုကာအဵု လဒုကြဵုကြီု ဗၞတ်အာယုက်ကီု အိန်သ္ဂီုဗြံက်ဗြ ပိုန်မၞိဟ်ဒဝိုၚ် စသိုၚ်တုဲဂျ အာယုက်သၞုဲ အိုတ်အာတုဲရ . . . ။
၄။ ထ္ၜးဗောဓိသတ် ဒှ်ဒေဝတဴသွဝ်တုသိတာပူ
[ပလေဝ်ဒါန် | ပလေဝ်ဒါန် တမ်ကၞက်]စုတိတိုန်ဒ္ဂူ ဍုၚ်သွဝ်မူလ တုဿိတာပူ ဂွံဇူတိုန်ဂျ သန္တုဿိတာ ဒေဝါရာဇ ဂွံယၟုသၟတ် ဗောဓိသတ္တ ပ္ဍဲဍုၚ်သွဝ်အဴ တန်တဴလံလ အာယုက်သွဝ်ရ တော်ဆသက်လက် ပန်လ္ၚီသၞာံဓဝ် အာယုက်သွဝ်ဆက် ဗၞတ်အာယုက်မၞိဟ် ကေတ်လမိဟ်ဗက် ထပှ်ကိုတ်ရော တြဴစှော်လက် ပိုန်ဒိပ်သိပ်နက် ရတ်အနဂ္ဃ ဗောဓိသတ်အဴ စသိုၚ်တဴရ။ သၟိၚ်ဝေသန္တဝ် နူစဴသွဝ်ဂျ ကမြဴကျာ်ဒှ် ဒယှ်က္ဍၚ်ပြ ညံၚ်ဂွံကၠောာယး တမံညးရ . . . ။
ဍုၚ်တေံမွဲဂှ် ကျာ်တြဲတွံဂျ ဂးတ္ၚဲကံလှ ဂြိပ်ထသလှံၚ် အာဗဵုကျာ်သၟတ် ဂြိပ်ဂအောတ်ဒၟံၚ် သတ်လိုက်တံသၟတ် ဟီုဂအောတ်ကၠံၚ် တမြဴဒၟံၚ်အဵု ဒဵုဒမံၚ်သွဝ် လုံဍုၚ်သွဝ်ဂှ် ဒယှ်တမ္ညဝ် စိုတ်ချဳလမောဝ် ဒေဝတဴသွဝ်ဂျ အာတ်အခေါၚ်သၟတ် ဗောဓိသတ်ရ ဗောဓိသတ်ဗော် သ္ၚဳတိုန်တော်ဆ ပဉ္စဌာနော သြလောကာန ဌာန်မသုန်တၟုဲ သ္ၚဳဗိုန်တုဲရ ကဵုအခေါၚ်ပၠ နာဲဒေဝပိ ကဵုအခေါၚ်တုဲ ဟွံသဏုဲဂ္ညိ . . .။
၅။ ထ္ၜးဗောဓိသတ် တန်ဂဝ်မိ
[ပလေဝ်ဒါန် | ပလေဝ်ဒါန် တမ်ကၞက်]စုတိနူသွဝ် စှ်ေတန်ဂဝ်မိ တန်ဂဝ်အလုံ တြုံနာဲဘုံပိ ဒိုဟ်စှ်ကၠံၚ်ဖဳ မြဟ်ကသဳတိ ဇၞော်သန်ဣဒ္ဓိ ဘုံပိကမြဴ လုံသွဝ်ဗြီုအိုတ် ဖျေံစိုတ်ရဴဂဴ ပ္ကဴဒိပ်ပေၚ်သဴ ဒြာတ်ပပူဇဴ စတုမရာဇ် ပန်ကၞာတ်မၚ်တဴ ရပ်သၞာ်ဒိုဟ်ပန် မၚ်ဗိုန်ကညန်အဴ လ္တူဒေန်ယာန် သၟဝ်ဖဍာန်ပ္ကဴ ကပ္ပိလဝှ် ဍုၚ်ဂှ်မြဟ်တဴ သုဒ္ဓေါဒန သၟိၚ်မကြက်လှဴ ပ္ကၚ်ရၚ်ဍုၚ်ဂှ် ဒယှ်ညံၚ်သ္ဍဴ မိဗောဓိသတ် ဒှ်ကၞတ်ဗြဴ သိရဳမာယာ ခုတ်နာမအဴ ထဝါဲမံၚ်တဴ ပ္ဍဲဂၞဴမိဂှ် ရုပ်ဂေါဝ်ဍိုက်ပေၚ် ညံၚ်ဗီုကၠေၚ်သွဟ် ညံၚ်ရုပ်ပ္တန်လဝ် ပ္ဍဲဒ္ၚောဝ်သၟဟ် မိဂွံညာတ်ကၠာ ရုပ်ကောန်ခါဂှ် ကောန်ဂွံညာတ်ညိ ရုပ်မိလ္ၚဟ် ဗၞတ်ဂိတုဂှ် ပေၚ်စှ်လမိုန် . . .။
၆။ ထ္ၜးဗောဓိသတ် သၠးဂဝ်မိ
[ပလေဝ်ဒါန် | ပလေဝ်ဒါန် တမ်ကၞက်]ဥဒျာန်ကျာ်သြဳ ဂြိုပ်ဗနဳဝိုန် မိကၞတ်ဗြဴ တိတ်စိုပ်တဴဗိုန် ရပ်ကၞာၚ်ရုက္ခ ဗြဴတလပိုန် တဲဇွိကမေံ ဗန်ကံဒေံကီု မြိုတ်ဇဇိုက်တွိုန် လက်သိၚ်တိုန်ဒး တ္ၚဲသိုက်ဆတ္တဝ် ဂၠံဂဝ်သလး သၟိၚ်အိန်ဒုၚ်လဝ် ဇာထဝ်မသတး တုဲသၟိၚ်ဝၚ်ပန် စၞာံဗြန်မသ္အး ဗြီုဒုၚ်ယာတ်ဂွု ဒုကုကရး ဗြဴကၞတ်ညး မသ္အးလက်သန် ဒတဴဒၟံၚ်ကၞာတ် သီုဂ္ညိဂ္ညာတ်ပၠန် မှာဗောဓိသတ် တြုံကၞတ်ဇန် သလးဂဝ်ကွေံ ဂါမ်စှ်ေတန်တန် လိုန်ဇာထဝ်ပ္ၚာံ တ္ၚဲလိုန်စၞာံဗြန် တုဲစှ်ေလိုန်ပၠန် ယာတ်ဒတန်ဗြီု ထပှ်လမာ် ဂါံကွာ်အာကီု စဏောန်တဲသ္အး ကော်ထ္ၜးကြီု ဒေါဝ်ဗနဳကၟိန် ဒေဝတဴအိန်ဗြီု ထၜးကရီု ညံၚ်ဗီုသဳဟ ကၞတ်ဂကူ တြုံအတုလ မၞိဟ်အိန်ဗြီုရော ကၞောတ်လောက ညးသတုပ်အဲမွဲ သ္အာၚ်ဟွံမွဲရ . . . ။
ညံၚ်ကေသရာ ကြီုကွာ်အာရ ဂၚေၚ်တဴရ ညိညဟွံမွဲ ညံၚ်ဒ္ၚောဝ်ထဝ် ပေါတ်လဝ်သ္အးတုဲ ဗီုရုပ်ခၠၚ်သ္အး တြုံညးမပြဲ ကုသဵုတမၠာ ဟွံအိုတ်သွာဟဲ နူအာကာသ ဍာ်ဒိပ်မပြဲ ဇွောဝ်စှ်ေမွဲတဲ မောဝ်ပ္ဍးယဩ ဗလိုပ်ဖုံကၠာ တြုံမှာအဂ္ဂ ပ္ဍဲကၟဝ်စက် ရတ်အနဂ္ဃ သတိက်လဝ်ဆတ္တဝ် ပ္တန်လဝ်ကာယ တုဲဇက်စဴဒ္ဂူ နန်ထဝ်မူလ ဒေါဝ်ဗနဳသၟတ် ပိုန်ဟာန်ယဿ . . . ။
၇။ ထ္ၜးဗောဓိသတ် ပြေၚ်ဝိဝါဟ
[ပလေဝ်ဒါန် | ပလေဝ်ဒါန် တမ်ကၞက်]ဗဗွဲလၟေၚ်ကၠာ ဇၞော်အာလျလျ အာယုက်ပေၚ်အဴ စှ်တရဴရ ဂကောမ်ဘိမာ ပြေၚ်ဝိဝါဟ စသိုၚ်ဘောဂ သီုတေဇဂ္ညိ သိုက်လှိၚ်ဒၟံၚ်ကၞာတ် တူပြာသာဒ်ပိ ၜါစှော်ဒစိတ် အာယုက်တိတ်ဂၠိ တိတ်ဝေၚ်ဥဒျာန် သေဟာန်ဖိဖိ ညာတ်နိမိတ်ပန် စိုပ်နန်ဂညိ ရာဟုလခုတ် ဒှ်မၞိဟ်ယုတ္တိ နာဲပြာသာတ်ပိ နကြိချပ်မွဲ သဍိုက်ပ္ဍဲကောန် လောန်ထောန်မပြဲ ဍေံဝွံသေၚ်ဟာ ကၞတ်ဇာပသဲ တၞံအဝိဇ္ဇာ သံသာဂၠိၚ်သ္ၚောဲ ၜါစှော်ဒစိတ် လအိတ်သၞာံပြဲ အာရီုဟွံဖဲ နိဿဲလောဘ . . . ။
၈။ ထ္ၜးဗောဓိသတ် ဒဴတိတ်ဂြိုပ်
[ပလေဝ်ဒါန် | ပလေဝ်ဒါန် တမ်ကၞက်]ဒးဂၠက်ဒၟံၚ်ပၠန် လနဳခန္ဓ အဲတိတ်ဒှ်ပ္ညဳ ခမဳပြဲရ ချပ်ဗ္စာရဏာ ပိုၚ်ခြာတော်ဆ သၟိက်ဂွံယိုက်အဴ ကောန်ရာဟုလ ဖေက်ဂၞကျာ်ပၠန် ၚုဟ်အာပၠန်ရ ကြဴတဲမွဲတန် ဂွံညာတ်ပၠန်ရ ဂးတုဲပ္ၚုဟ်ဆန် ချေံကဏ္ဍက ချေံသၟိၚ်တလ သီုတေဇအဴ ချေံကၞတ်ဂကူ ထတ်စောန်နုဘဴ ဒက်ဗိုန်ဇၟံခိုၚ် ပ္တီနာဲက္ဍိုၚ်ပ္ကဴ ဒက်ချေံတုဲအဴ ရသ္ဍဴလိုက်ဗာ မြိုတ်ဓဇိုက်ပၠန် ပြဲသန်အခါ ဍိုက်ချေံလအိတ် ဒ္ၚဳဒဴတိတ်အာ အိုတ်ဒေဝတဴ ဗက်ကြဴသ္အဳဗဂါ သ္ဍဴလ္ၚီရပ်ဏာ တမးအာဂျ သၟိၚ်မာစှ်ေကၠုၚ် နူဍုၚ်ဒေဝ သၟိၚ်မာဆတ္တဝ် ဟီုဆေဝ်ဒဝ်ရ ယွံညးပြဲသၟတ် မှာသိဒ္ဓတ္တ ဌာန်ပြာသာတ်ပ္ကဴ ကလေၚ်စဴရ ပိတ္ၚဲဂတ တေဇအသဝ် ရတ်ထပှ်သၟတ် ကၠုၚ်စိုပ်ဆတ္တဝ် နာဲပိုဲသက်လက် ဒှ်စက္ကဝဝ် ဂွံပိုၚ်တကံပန် ပိုန်ဒတန်ကဝ် သၟိၚ်မာဆေဝ်ဒဝ် တြုံအသဝ်ဗြီု တြုံမပြဲဗော် သာ်ဝွံကော်ပ္ညဳ ဟိုယ်မာအရေဝ် မဆေဝ်ပလီု ညံၚ်ဒှ်ကျာ်သၟတ် ဟံၚ်သတ်အိုဿီု အဲသ္ပလွဳကီု လ္ပပလီုရ ဂးတုဲမှတ်ဇု ကြုၚ်အနုမ တ္ၚဲယးတုဲသၟတ် ကၠောံကြုၚ်ဂှ်ရ အာဌာန်ဒၟံၚ်ပ္ညဳ တူဗတဳဂျ ကယိုၚ်အိုတ်ပၠန် ပအပ်ကဵုခန္ဓ ဗက်ဖျဴဆန်ရ တလက္ဍိုၚ်ပ္ကဴ ကဏ္ဍကပ္ညပ် ပ္ဍဲစိုတ်ချပ်တဴ နာဲပိုဲဝွံဟေၚ် ဟွံကလေၚ်စဴ ဒိုက်စိုတ်စောန်လောန် စိုတ်ကၠၚ်ကၠောန်တဴ သ္ၚဳလောတ်စှ်ေအဴ ချိုတ်တုဲဲစဴသွဝ် ဒှ်ဒေဝတဴ တြုံသ္ဍဴအသဝ် ပိုန်ဒိပ်ခပ်ပြာတ် တူပြာသာတ်ထဝ် ကဏ္ဍကသၟတ် ဒှ်ဟေၚ်ဆတ္တဝ် . . . ။
၉။ ထ္ၜးဗောဓိသတ် တတ်သော်ဝန်ဇာတာ
[ပလေဝ်ဒါန် | ပလေဝ်ဒါန် တမ်ကၞက်]မှာစက္ကဝဝ် တြုံလွဝ်ပိုန် တတ်ဝန်ဇာတာ တူကျာ်ဗိုတ်ပ္တိုန် ကဵုဒလာၚ်ထဝ် အိန်ဒုၚ်လဝ်ဗိုန် တိုန်ဒက်လဝ် စေတဳထဝ်ကွိုန် ပိစှော်လမိုန် ကွိုန်ယောဇနာ စောဠာမူဏိ သိဒ္ဓိပြာထာ စေတဳထဝ်ဟေၚ် ပ္တိုန်လဝ်သေၚ်ဟာ ဃဋိမှာဗြီု စိုန်သ္ကီုပြာဒညာ ပရိက္ခရာ ဒစာံနာမ ဖျေံဇိုန်ကဵုသၟတ် ဗောဓိသတ္တာ ၜးယာတ်သၠောံကၠာ သ္ၚာပြမ တၚ်သကိုပ်သၟတ် တမာဲပတ္တ အဓိဌာန်ရ ယာတ်ဒုဿဟေၚ် ဗိုတ်ပ္တိုန်ဏာသွံ ဗြီုဂွံသေၚ်လေၚ် ဗြီုတိုန်ဒက်လဝ် စေတဳထဝ်ရေၚ် ယောဇနာဟေၚ် ၜါစှော်ရေၚ်ပ္ညဳ တ္ၚဲစန်မူလ နန်ဒဒိတ္ထဳ . . . ။
ဗောဓိသတ်ဂျ ဂွံဒှ်ခမဳ ဂြိုပ်ကြုက်အနဳ အနုပိယ ဒၟံၚ်တဴဒၞာဲဂှ် ထပှ်တ္ၚဲဂျ ရာဇာဂြိုပ်ကိုပ် တုဲအာစိုပ်ရ စဴပိဏ္ဍပါတ် ဂၚေၚ်အာတ်စ ဗိမ္ဗိသာပ္ညုၚ် ဇိုန်ကဵုဍုၚ်ဂျ စိုတ်ညိဟွံလဝ် ဆေဝ်ဒဝ်ပြမ တုဲပ္ၚောံအာ ဌာန်အာဠာရ ဂိုၚ်ကေတ်လ္ၚတ် သမာပတ်ဂျ တုဲပြာပ်အာလေဝ် ဥဒျာန်ဝေလ ဌာန်သ္အးဂှ်စိ လှိၚ်စိတ္တဇဴ ဒုက္ခစရိ ဒဒိုက်ဂ္ညိဂၠဴ တြဴသၞာံသၟတ် လွဳကၚ်ဇတ်တဴ အိန်တိၚ်ထဏ ပတိုန်စိတ္တဇဴ ပဉ္စဝဝ်ဂး မသုန်စ္ဍးဒဴ တြုံဒယှ်အဴ သီုသ္ဍဴပညာ လ္ပအ်မသုန် ဇၞော်ဂုဏ်ပြထာ လ္ပအ်ဝွံဟေၚ် ဒှ်ကျာ်သေၚ်ဟာ ချပ်ပ္ဍဲစိုတ်အဵု ယးတုဲက္တဵုအာ စိုပ်တၞံဇြဲကၠာ အဇ္ဇပါလ ဗဗေၚ်တၞံကီု တွဵုဗြီုမူလ ဗွဲဓမ္မတာ ဒ္ၚဳကၠေံအာရ . . . ။
၁၀။ ထ္ၜးဗောဓိသတ် ဒုၚ်ပုၚ်ပၟန်သုဇာတာ
[ပလေဝ်ဒါန် | ပလေဝ်ဒါန် တမ်ကၞက်]ဒုၚ်ပမန်ကၠာ ဗြဴသုဇာတာ နိရဉ္ဇရာ ဩၚ်ကြုၚ်ဌာန ရပ်ထးထဝ်သွံ ပ္ၚောံအာရ ဟုံဍာ်တုဲဗိုန် ကလေၚ်တိုန်ရ ပန်စှော်ဒစိတ် တွံပတိတ်မူလ ပမန်ဂှ်ရ ကဵုဗိုန်ဆဖဲ ကဵုဗိုန်တုဲအဴ ဒ္ၚဳစှ်ေတြဴတဲ အဓိဌာန်သ္အး တြုံညးမပြဲ အဲဝွံလမာ် ယဝ်သဒှ်ကျာ်တြဲ ထးထဝ်ဝွံမွဲ ထောံပ္ဍဲဇမောဝ် ကဵုဒစးတိုန် ပကဵုဇြိုၚ်သ္ဍဝ် အဓိဌာန်သၟတ် ထောံထးဆတ္တဝ် ထးဗြုဂမြၚ် ဒေါဝ်ဂၚ်တမ္ညဝ် ဂြိပ်ဒစးတိုန် တူဇွိုန်ဇမဝ် ညးလွဳမာန်ဂျ နာဲကုလဓရ် ဂၠုက်စှ်ေအာသၟဝ် ထးထဝ်ကျာ်ပိ လယတ်ထးထဝ် တမ္ညဝ်ဖိဖိ နာ်ကာဠမှာ ၚုဟ်အာဒမၠိ လမုဟ်ကျာ်ဒှ် တဝှ်တိုန်ဖိဖိ သတိက်ဟွံဖဲညိ နာ်ဟီုဗျိတဴ ညာတ်နိမိတ်သၟတ် ထးထဝ်ဂှ်အဴ အဲဒှ်ကျာ်ကီု မိပ်စိုတ်ကြီတဴ . . . ။
၁၁။ ထ္ၜးဗောဓိသတ် ဒုၚ်ဒါန်ချောဲကၟတ်
[ပလေဝ်ဒါန် | ပလေဝ်ဒါန် တမ်ကၞက်]ထောံကြုၚ်ဂ္ညိ မှတ်ဗောဓိပ္ကဴ ဆဵုဒိုက်ဂတ်ဟေၚ် ကၟတ်ဂၠေၚ်ဖျဴ ကုသဵုစိုတ်အဴ ဖ္အောဝ်လဴဒုက္ခ ဒစာံကေံသၟတ် ကၟတ်ဂှ်ဂျ ဂိုၚ်ကဵုဒါန်ပြဟ် ကၟတ်ဂှ်ရ ဂွံကၟတ်ဆာဲ မၚ်ဗၠာဲသောတ္ထိ မှတ်ဌာန်ဗောဓိ ပဏှ်ေတိဂျ စိုပ်ပဏှ်ေတိ ဗောဓိမူလ ဒၞာဲဒၟံၚ်ဂျ ဗုဒ္ဓတမၠာ ကၟတ်မၚ်ဗၠာဲ ဂေါဝ်ဆာဲဆတ္တဝ် လရုဖျေံရ လးပသနာ တုဲပၞၚ်ရတ် စှ်ပန်ဟတ်ကၠာ သတးကဵုတိဟေၚ် က္တဵုဒှ်သေၚ်ဟာ ကၟတ်ဂှ်မာ စိစောန်ပြာကတ် ညံၚ်ပါန်ခဳချူ ထဝ်အူတဏတ် ဒေါဝ်ပၞၚ်ဂ္ညိ မှာဗောဓိသတ် ဒက်ထဝါဲဂျ ဗီုသဳဟရတ် တၞံဗောဓိပ္ညုၚ် သမၠုၚ်ကၠံဟတ် သၠုၚ်ဂှ်ဗိုန် ကၠုတ်တိုန်အဆတ် မှာဗောဓိသတ် တြုံကၞတ်ဉာဏ် ဒေဝတဴကၠံၚ် ပေၚ်ဂၠက်ဒၟံဝဳဟာန် အိန်ကြီုလဒု ကဏုသၚ်ယာန် လလောၚ်ကွေံကြာန် ဗရုဌာန်သ္အဝ် ပဉ္စသိက္ခ တိၚ်တဏုထဝ် သၟိၚ်သုယာမာ တုဿိတာသွဝ် သဳကၠဳသွိၚ် လွိၚ်ပၞိက်ထဝ် မှာဗြီုဂမၠိုၚ် ရပ်က္ဍိုၚ်ဗိုၚ်သ္အဝ် နာ်ဒၟံၚ်သွိၚ် သီုသၟိၚ်သ္ပဝ် စှ်လ္ၚီတုန်ကၠာ စက္ကဝါက္ဍဝ် အိုတ်ဒေဝတဴ ရပ်ပ္ကဴမြမောဝ် သာဓုကာသၟတ် ဒြီုဒြီုဆတ္တဝ် ဝုတ်ဒိုဟ်ရေၚ်ဗဝ် ပဏၚ်ထဝ်ယာန် . . . ။
၁၂။ ထ္ၜးဗောဓိသတ် ဇၞးပၞာန်မာ
[ပလေဝ်ဒါန် | ပလေဝ်ဒါန် တမ်ကၞက်]သၟိၚ်မာဟိန်ဏ ဇက်ကၠုၚ်ပပၞာန် ၜါဣသုန်ကၠာ ယောဇနာပကာန် ဗိုလ်မာဂၠိုၚ်က္ဍၚ် ဗိုၚ်ပၞၚ်ယာန် ညံၚ်ပၟတ်ကဝ် စံၚ်ပၠေၚ်ကဝ်ဟာန် ဂၠုသကိုပ်ဗ္ဒန် ဒိုဟ်ပန်ဇၟာပ်ဌာန် ဂၠိုၚ်ကဵုဗဵုပၞာန် ရိုဟ်ဟွံမာန်အဴ အိန်စမဳညာတ် သမ္ၚာတ်ဒြဴဒြဴ ထောံကဏုသၚ် လိၚ်လဴဂြိပ်ဒဴ ဗြီုဖေက်မတ်ဂၠု ဇကုဒမြဴ ညံၚ်ဆုရဳရဲ ပ္ဍဲစိုတ်ဒြဴဒြဴ လဖဝထောံက္ဍိုၚ် ကဵုဇိုၚ်ဒြိပ်ဒဴ သၟိၚ်နာ်ကနှဝ် သပဝ်ဓနဴ လ္ၚီစက္ကဝါ အိုတ်မှာဒေဝတဴ ဖေက်ပၞာန်မာအိုတ် ပေက်သကိုပ်ဒဴ ဟွံကလေၚ်သာၚ် လဟီုပါၚ်တၟဴ ဖေက်ချဴလရု ဇကုဒမြဴ ဟွံဖေက်ဒၟံၚ်တဴ အံက်ရာဟုလ သက်ကဵုကလော ဨကကောဝ ဒုၚ်ပဝိုၚ်မာ ပၞာန်ဒမိတ်ပါပ ဇကုမွဲသွံ ညိဟွံဒည မာဒမိက်စဒဲ ဗဂူဖျေံဗြဲရ ဗြဲလဗိုတ်ဇၞော် ဒေါမ်ကဝ်ဗြော်ဂျ ဗြဲဍာ်ဇၞော်ကၠာ တဏဟ်တၟာန ဗဂူဖျေံဗိုန်ဇၟံ ဗြဲတၟံလတ ဗြဲဗၞုဟ်ဗြဲဇြၚ် ဗဂူဖျေံက္ဍၚ်ပြ ဗြဲဇလပ္ညဳ ဗြဲဗတဳဂျ ဗြဲသလိုက်ပေၚ်ဂၠု ဗြဲဗဗုလ္ၚ ဗြဲဒမၠုရ ကြံကြဗဂူတဴ ဗြဲမာဗဂူဖျေံ ဒစိတ်သာ်ရော စိုပ်ဇနးမာ ဒှ်အာပ္ကဴသြဴ ဗတိုက်ကျာ်ပ္ကာန် ဟွံမာန်တုဲအဴ ဂတးပန်လဴ ညံၚ်ရဴဗတ်သၟ မွဲလက်ကိုတ်ဇၟံ ဂတးကြံကြ စိုပ်ကျာ်တြဲအဴ ဒှ်ဍောၚ်ပ္ကဴဂျ တုဲထေဝ်နၚ်ဗြံက် ကံက်ဇၞော်စက်ကြ ယာံစက်ဂှ်အာ တူအာကာသ စှ်ၜါယေက်ပ္တိတ် ဗွဲဝိတ္ထာရ ဗြဲဟွံဂူဗျာံ စှ်ၜါသၞာံဂျ သိန္နရာဇာ ယာံရထေဝ်ဏာ သိန္နရာတ်သၟတ် ဒးဒကုတ်အာ ကြံကြထတ်မြက် ဣဒ္ဓိစက်မာ စိုပ်ကျာ်တြဲအဴ ဒှ်အာပ္ကဴသွာ မသက္ကုဟိုတ် ကသပ်အိုတ်အာ ပၞောတ်ပူဆာ သၟိၚ်မာကော်တဴ ဟာဲဗဵုအဲပ္ညဳ ရပ်သိဒ္ဓတ္တ ကုဒန်စန်နး ပကဵုဗၠးရ ကော်ဟီုဂမြံ ရမျာၚ်ကြံကြ ဟွံဂံၚ်ဆိုက်သၟတ် ဗောဓိသတ်ဂျ ကြီဇှ်မေတ္တာ တြုံပြဲညာဏ သၟိၚ်မာမွဲကၠာ လဝ်ကဵုဒှ်အာ မာမွဲလက်ကိုတ် ဗဂါစက္ကဝါဂျ ကဵုကၠုၚ်သၚ်ဃံၚ် ဗိုၚ်ရီုကြံကြ ဘဲမာသ္ကဲ ဇၞးဟွံမွဲရ တုဲမာသမၠီု ဒ္ၚဳကော်ဟီုရ . . . ။
ယွံသၟိၚ်ခမဳ နာဲသိဒ္ဓတ္တ ပဏၚ်ဝွံသ္ကဲ ပဏၚ်သိဒ္ဓတ္တ မံၚ်ဂျတဴရော ဟာဲမာသမၠီု ပကၠုၚ်ဟီုစော ဒါန်အဲပ္တုဲရော ဂၠိုၚ်တဴဘဝ ပါရမဳစှ် ကျာ်ဗနုဟ်ရ ဟိုယ်သဳလအဲ မပြဲအဂ္ဂ ပၞာန်မာဂၠိုၚ်သန် ဟွံတီနန္တ ဗိုၚ်ဟုပ်ဂမြံ ဗရုကြံကြ နဓရ်သဳလ ဟွံမာန်ရဟာ . . . ။
ယွံကျာ်ဂမျိုၚ် ပၞာၚ်တိုၚ်လိုက်ဗာ ကာလဒှ်ကၠာ ဘူရိနာဂ သဳလဗိုန်သ္ကဲ သဇိုၚ်အဲရ ပၞာန်မာဂမြံၚ် သ္ကာတ်သာဲကြံကြ ညံၚ်သၟိၚ်အသူ ပၞာန်အတူလ ဗြုဂမြံ ဂအောတ်ကြံကြ အဲဍိက်သဳလ ဟွံမာန်ရအဴ . . . ။
ယွံနိက္ခမ္မ တေဇကြက်လှဴ ပၞာန်မာဝွံအဴ ဗျိၚ်တဴထိမြိ ဗိုၚ်လဝ်အဲပ္ညဳ ဟုတ်တဝဳဖိ လလောၚ်ဂအောတ် ပေၚ်က္ဍတ်ထိမြိ နိက္ခမပ္ညဳ ပမာန်ညိဟာ . . . ။
ကျာ်ဂမျိုၚ် ပၞာၚ်တိုၚ်လိုက်ဗာ ကာလဒှ်ကၠာ သၟိၚ်မှာနာဲမိ ထောံကၠေံသ္ၚိကၟိန် ဗိုန်လၟိုန်ထဳတိ သဇိုၚ်အဲဇၞးရ လောဘဂညိ လၟုဟ်သေၚ်ဟာ ပၞာန်မာဒိဌိ ပေၚ်က္ဍတ်ထိမိ သိဒ္ဓိက္ဍၚ်ပြ ပၞာန်မာဂမၠိုၚ် ကၠုၚ်ဗိုၚ်တဳလ လလောၚ်ဂအောတ် တိညံၚ်ဗတ်သၟ အဲဍိက်နိက္ခ ပဟွံမာန်ရအဴ . . . ။
တုဲသမ္ဗုဒ္ဓါ ကော်ပညာကြဴ ယွံပညာအဲ မပြဲနုဘဴ ပၞာန်မာဝွံအဴ ဇၞော်တဴကြဳဇှ် လလောၚ်သဇိုၚ် ကြီုကြကြဵုဇာ မၞးပညာဟေၚ် တီနဲတၟေၚ်တၟဟ် ဗပေက်ကၠေံပြဟ် ညိမူဒှ်ရော . . . ။
ယွံကျာ်ဂမျိုၚ် ပၞၚ်တိုၚ်အဂ္ဂေါ ကာလဒှ်ရော မဟောသဓ ပ္တုဲသၞောတ်ဇၟာပ်တၟပ် ဗၠးဒုဟ်သဗ္ဗ သှ်သၟာန်အဴ ဒေဝတဴဂျ ဇၞးစောရမဏိ နဲသိဒ္ဓိက အဲပညာရ တီနဲယျဟေၚ် ပၞာန်မာနွံသၟဟ် ကဵုလွဟ်တၟေၚ် ညံၚ်ပၟတ်ကဝ် ပၠေၚ်ကဝ်သေၚ်လေၚ် သဇိုၚ်အဲဟေၚ် ရဟွံသေၚ်ဟာ . . . ။
ကျာ်တြဲမိၚ်ကီု ပညာဟီုတဴ ဝဳရိယအဴ ကျာ်ကော်တဴရ ဟိုယ်ပါရမဳ နာဲဝဳရိယ ပၞာန်မာဝွံဂှ် ကြဳဇှ်ကြံကြ ဗိုၚ်ဟုပ်လဝ်အဲ ညံၚ်နဲစက္က နာဲဝဳရိယ ထောံအဲရဟာ . . . ။
ယွံကျာ်ဂမျိုၚ် ပၞာၚ်တိုၚ်လိုက်ဗာ မတုဲတမၠာ ဒှ်မှာဇနက် ပ္ဍဲလ္ဒေါဝ်ဂၚ်ကီု က္ၜၚ်လီုလၜက် ထပှ်တ္ၚဲအဴ ၜိၚ်တဴသက်လက် လွဳညးဟွံဖက် ဗီုအိန်ဒက္ခဳ ဂွံသြၚ်တုဲဂှ် ကြဴဒှ်ခမဳ ပ္ဍဲဝဳရိယ ဟိညတ်အဲပလွဳ ကြံၚ်ဍုဟ်အနဳ ပါရမဳတၟေၚ် လွဳတေံမွဲတဲ သဇိုၚ်အဲဟေၚ် ပၞာန်မာဝွံဂ္ညိ နွံဣဒ္ဓိတၟေၚ် သဇိုၚ်အဲဟေၚ် ဟွံသေၚ်ရအဴ . . . ။
ကျာ်တြဲကော်ပ္ညဳ ခန္တဳကြက်လှဴ နာဲခန္တဳအဴ ဟီုတဴဒ္ၚဳဒ္ၚဳ ယွံကျာ်ဂမျိုၚ် ပၞာၚ်တိုၚ်လောကဳ အတိက်တေံရ ခုတ်နာမပ္ညဳ ဒှ်ရသိပၠန် ခန္တဳဝါဒ သၟိၚ်ကလာဗု ယၟုခုတ်ပညဳ ထေဲတုဲအနဳ ကုတ်ပ္ညဳဇိုၚ်တဲ ရေက်ကၠေံကတောဝ်မုဟ် သာ်ဂှ်သၟိၚ်ပျဲ ဟွံထေဲညိအဴ အေၚ်တဴဗွဲလၟေၚ် ဇၞးလအေၚ်ပြဲ သဇိုၚ်အဲဟေၚ် လၟုဟ်ဝွံမာ ဗဵုသ္အဳဗဂါရေၚ် ညံၚ်ကျာလေၚ်ကဝ် ဒေါမ်တမဝ်ဗၠေၚ် သဓီုနာရာတ် ကြံကြသ္ကာတ်တၟေၚ် သဇိုၚ်အဲဟေၚ် ဟွံသေၚ်ရအဴ . . . ။
ကျာ်တြဲမိၚ်ပ္ညဳ ပါၚ်ခန္တဳအဴ မေတ္တာကြက်လှဴ နုဘဴဒါန်ဂျ အဵုမၞးမေတ္တာ သီုကဵုဒါန ပၞာန်မာသၚ်ဃံ သ္ကာတ်သာဲကြံကြ ပါရမဳသ္အာၚ် ကဵုပါၚ်ကယျ မၞးတံညးၜါ မေတ္တာဒါန ညာတ်ဗဵုပၞာန်မာ လၚ်သ္ကာကြံကြ ကဵုပါၚ်ကမျ ဟီုပၠန်ရဟာ . . . ။
ယွံကျာ်ဂမျိုၚ် ပၞာၚ်တိုၚ်လိုက်ဗာ ညံၚ်ကေသရာ ပိုဲညးၜါသၟတ် ပၞာန်မာဗိုၚ်သ္အဳ သီုကဵုကြဳဇှ် သၟိၚ်မာဒမြိုဟ် ကမြဴဒိုဟ်စှ် ပိုဲတွံအရဳ ဇၞော်သန်ကြဳဇှ် ဗျာံတဲထဍဟ် ပေက်ပှ်လှ်အာ မူယဿပတ် ဗဵုဒြဟတ်မာ ဍေံကၠုၚ်ဒယီု ဍေံကၠုၚ်ကြဵုဇာ ဍေံကၠုၚ်ဗိုၚ်ရီု ဒုၚ်တဲကီုဟာ ယွံဇၞးမာ နာဲသာက္ဍိုၚ်ပ္ကဴ ပၞာန်မာသမၠီု ကၠုၚ်ကြီုတဴရ လဝ်ကၠုၚ်ပလှ်ေ လဝ်ဍေံကမြဴ သဇိုၚ်ပိုဲရ ပဂွိၚ်ရအဴ . . . ။
ဒှ်ကျာ်ပြာထာ ဇၞးမာတုဲပ္ညဳ ပလ္လၚ်အနဳ ပိုဲဟီုပ္ညဳလဝ် သတးကဵုတိပ္ညုၚ် ညိဟွံသၠုၚ်သဝ် ဇမၠိၚ်အဆတ် စှ်ပန်ဟတ်ဓတ် ဒိုဟ်ဨသာန်ဂ္ညိ ဗောဓိဇြဲထဝ် ပလ္လၚ်အဆတ် ကၠုတ်တိုန်ကျဝ်တဴ ခရာဗောဓိ ပလ္လၚ်ဂ္ညိဂၠဴ ပန်ဟတ်မွဲက္ဍ ခရာရအဴ သၠုၚ်ဗောဓိတၞံ ဂေါဝ်ဂ္ညိဂၠဴ မသုန်စှော်ဟတ် စိုပ်ကၞာၚ်ၜတ်သဴ ဒဵုကၞတ်ဂှ် ကၠံဟတ်ဒှ်တဴ ဗွိုက်တၞံသ္ကဲ ပန်စှော်မွဲအဴ လမိဟ်ဟတ်အဵု ဟီုကဵုဆဴဆဴ ထပှ်တ္ၚဲအဴ ကျာ်သ္ဍဴလိုက်ဗာ တူပလ္လၚ်ဟေၚ် ဒၟံၚ်တဴသေၚ်ဟာ . . . ။
ဒေဝတဴသၞေၚ် က္တဵုဒှ်သေၚ်ဟာ ဟွံဒှ်ကျာ်ဟာ တၞောဝ်နာဲသာကျ တီသလှ်ေအဴ ဒေဝတဴရ ကလာၚ်တိုန်အာ တူအာကာသ ပဋိဟာခုတ် မှာသမ္ဗုဒ္ဓ စၚ်ကြံသရုပ် ရုပ်လျးပြမှ ညံၚ်ကျာ်ပေၚ်အာ တူအာကာသ ဒှ်ပ္ဍဲမတ်အဴ ဒေဝတဴရ တုဲဗၠးသၚ်ကာ အိုတ်မှာဒေဝ . . . ။
မိၚ်တုဲဒဝိုၚ် ကျာ်နာဲက္ဍိုၚ်ပ္ကဴ ဗလးဏာအဴ လွဟ်သ္ဍဴမေတ္တာ ကျာ်တြဲကော်ရ ဟိုယ်ဒေဝမာ အတိက်သီုဂၟံၚ် ဂၚေၚ်သံသာ ဒါနိထဝ်သြန်ကီု သီုကောန်သမ္ဘာ သပါတဲသတုံဇွိ ဒါန်ဇဳဝိတာ ကၞိပ်ပြဲဖာ ၝောံကိုတ်ခါဂှ် ဒါန်အဲဂၠိုၚ်သၟဟ် ဒါန်ဂှ်ပြာထာ ညံၚ်ဇမောဝ်ဂၚ် ဍာ်ပလၚ်ကာ ပိုဲသုန္ဓရဳ သက်သဳတမၠာ စရိုဟ်ပ္တီမၞး ဝိုတ်အာသ္ဂးဟာ ယာံဇၞးမာ ပံက်ပါၚ်ခါဂှ် တိသုန္ဓရဳ သက်သဳဒါန်သၟဟ် ဗြုသဓီုသာၚ် ကဵုပါၚ်သတှ် ညံၚ်ဂတးလ္ၚီ ဗြီုခြီုဒိုဟ်စှ် ကမြေတ်ဂေတ်ကြီု ဗြုသဓီုမြဟ် ဂမြာၚ်လတှ် ညံၚ်တလှ်ဗြမ် သၠုၚ်သၠုၚ်သဝ်သဝ် ဇတဝ်ခြံၚ်ခြံၚ် အာကာသဂၠု တိဗြုဂမြံၚ် မာမိၚ်အသံ လွဟ်ကံကျာ်တြဲ သ္ၚာတ်ဒရဴ ဒှ်တဴတူယဲ ဇတဝ်ခြဳခြဳ ညံၚ်ဆုရဳရေဲ စိၚ်ချေံက္ဍိုပ်တိ ဣဒ္ဓိကျာ်တြဲ ဝေၚ်စိၚ်စနူ ဂြိပ်ဇကုမွဲ မာဖေက်လောန်တုဲ ပ္ဍဲစိုတ်ဒြဴဒြဴ ဟွံဂံၚ်ကလာၚ် ဂြိပ်ဒစေၚ်စဴ ယာံသၟိၚ်မာဟၚ် ဖေက်ကလေၚ်စဴ ဗဵုဂမၠိုၚ်အဴ ဒှ်တဴလ္ၚာပ်လ္ၚာ ဖေက်ကဝ်လဒု ဒိုဟ်ပန်ဂၠုအာ ပြးချာဲဂြိပ်ဖူ တူတိတူကျာ ဒေဝတဴၜက် လုံစက္ကဝါ မိၚ်ပြိုၚ်မာ ကျအာကျာ်ဓရ် . . . ။
ဒေဝတဴလအဝ် ပအသဝ်တဴ သြ-သၟိၚ်အရှန် ဇၞော်သန်နုဘဴ ကျာ်ကောန်လိုက်ဗာ ဇၞးမာဒေဝတဴ ဟး-ကျာ်ဂမျိုၚ် တလ-က္ဍိုၚ်ပ္ကဴ ပ္တောံၜတ်ပြိုၚ်ပ္ကာန် ဟွံမာန်သွံအဴ သၟိၚ်နာ်သပဝ် ဂန္ဓဝ်ဒေဝတဴ မၞိဟ်နက္ကဘဴ ကမြဴအိန်ဗြီု ပိစှော်မွဲဘုံ အိုဿီုလုံဍုၚ် ဆစှ်လ္ၚီကၞာတ် လောကဓါတ်ကီု နူတိဒဵုဗြီု ကော်ဟီုဂအတ် ကနှဝ်ဂန္ဓဝ် နာ်သပဝ်ကြတ် အိန်ဗြီုဒေဝတဴ ကၠုၚ်ကောံနှဴသၟတ် ဝုတ်ဒိုဟ်ကျာ်တြဲ တူယဲပေၚ်က္ဍတ် သဳကၠဳဒၟံၚ်ခုတ် မှာဗုဒ္ဓရတ် ပဏၚ်ပြာကတ် ဇၞော်ဒြဟတ်အဴ ကာလကဝ်တန် ကၠာအိုတ်တန်တဴ ကာလကဝ်တူ ဌာန်ဂှ်တူကြဴ ဌာန်ပဏၚ်ဂှ် ဇၞေယ်ကြဳဇှ်အဴ ဒက်ဒၟံၚ်ထဝါဲ ကျာ်နာဲက္ဍိုၚ်ပ္ကဴ အဝိဇ္ဇာအဴ နှဴပစ္စယာ ဖဍောတ်ကျာ်တြဲ အာဒိတဲကၠာ ဖလှာၚ်ယးဟေၚ် ဂွံဒှ်သေၚ်ဟာ ဂွံဂြၚ်ဓရ်ဖျာ် ဒှ်ကျာ်တုဲမာ ကြီုပ္ဍဲစိုတ်ရ အနေကဇာ . . . ။
ချိုန်ခၞဇၞးမာ ဒှ်ကျာ်ခါဂှ် ရုကျာပိုတ်က္တဵု တိသဓဵုမြဟ် ပိစှော်ၜါအဵု နိမိတ်က္တဵုဒှ် ပိစှော်ၜါတိတ် ညာတ်နိမိတ်ဂှ် ကသဳတိသၟတ် ဇၞော်ဒြဟတ်ဂှ် ဗာတ်ဝိုၚ်ဗာတ်စၞာံ သြေဲကျာံတံဂှ် ဟွံဘက်သဍဟ် ဗြုသၟဟ်တလိုန် ဏံၚ်ဏောတ်ဏံၚ်ဏောတ် ဗြုဂအောတ်တိုန် ပိၚ်မၚ်ဒဂိုန် ကလိုန်သဒ္ဒ ပၠဳပၠေၚ်တိၚ်ဒေၚ် ဗြုကရေၚ်ဂျ ပေၚ်သဏောဲဆက် တလိုန်ဝါကျ တေဝ်တေဝ်-ကဝ်ကဝ် ဗြုဂအဝ်ဂျ ဒိၚ်ဒိၚ်ဂအောတ် ဖမ်ကြဵုသဒ္ဒ ဖောၚ်ဖောၚ်လဒု ဗရုကြီုကြ ဍေဝ်ချပ်ဍေဝ်ချပ် ဆာၚ်သရပ်ဂျ တုက်တုၚ်တုက်တုၚ် ဖံဗြုကၠုၚ်ကၠုၚ်ရ ရေဝ်တေဝ်-ရေဝ်တေဝ် ပေဝ်ဒြဝ်လုံလ ပုၚ်ပုပုၚ်ပု ဗရုကြံကြ ဗြုဗက်ဍေံရ တေဇဇၞော်ကၠး တသိၚ်ဒွက်ဒွံ ယဲအိုတ်ဂွံဗၠး ဂၠုဂွံညာတ်သွိၚ် သ္ဍိုၚ်ဂွံမိၚ်သ္အး ကြအ်ဗၠးညံၚ်သိတ် ရတ်ဂဵုပတိတ်လျး ကၠဴကတေဝ်ကော် ဒကာန်သော်လး ဝေန်ကွာ်သလး ကွေန်ပၠးတဲ က္ၜၚ်ပေါဟ်အာကွေံ စိုပ်သၞေဟ်မပြဲ နရက်ဒစာံ ပၠိုတ်သ္ဍာံမွဲတဲ နရက်ဂၠုဒၟံၚ် လယးညံၚ်တ္ၚဲ ဍာ်ပဏုၚ်ပၠန် ရှ်သာလောန်တဲ ပ္ကဴသတ်ဆုနး ဂိတုလျးတဲ ကျာပိုတ်သဝဲ ကတဴတ္ၚဲလောန်အာ ဂစေံဂမၠိုၚ် ဂြဴပြိုၚ်ကြဵုဇာ နာ်ဗဂူနၚ်ဗြဲ ဗျဵုထၚ်ဟဲအာ သတ်ဝေရိအဵု နွံကဵုမေတ္တာ သ္ဍိုက်မၠိုက်သာဓါ ဒှ်အာမ္ၚဵု ၜိုန်ကၠကဵုဒြာဲ ဗ္တာဲကဵုကၠဵု စာၚ်ကဵုဗၜဵု ဗဂေါဝ်ကဵုဇြုံ ကၞိကဵုဗဂဲ လီဗတဲစုံ နာ်သပဝ်ဘုံ ဒၟံၚ်စုံသ္ဍိုက်မၠိုက် ခဍာ်သ္ဍိုက်ဟာန် ရေၚ်ကာန်ကၠၚ်ဟိုက် ကွသၠုၚ်သယး ကုန်လးဒၟံၚ်ဆိုက် ပုၚ်ကွာၚ်ဖဲနး ပြိုတ်ဗၠးဒဒိုက် သတ်ဂမၠိုၚ်သွံ အိုဿီုဂွံသိုက် ဒေဝတဴရိုက် ပ္ကဴဒိပ်ဖြိုက်ဖာ စှ်ဒိုဟ်ဇၟာပ်ဒၞာဲ မောဝ်တမာဲအာ ဒြာတ်ပူဇဴသ္အး ကျာ်ဇၞးမာ ဝွံနိမိတ်မြာ ပိစှော်ၜါဇဳ . . . ။
ဒှ်ကျာ်ပြာထာ ဇၞးမာတုဲပ္ညဳ ပလ္လၚ်အနဳ ပိုဲဟီုပ္ညဳလဝ် သတးကဵုတိပ္ညုၚ် ညိဟွံသၠုၚ်သဝ် ဇမၠိၚ်အဆတ် စှ်ပန်ဟတ်ဓတ် ဒိုဟ်ဨသာန်ဂ္ညိ ဗောဓိဇြဲထဝ် ပလ္လၚ်အဆတ် ကၠုတ်တိုန်ကျဝ်တဴ ခရာဗောဓိ ပလ္လၚ်ဂ္ညိဂၠဴ ပန်ဟတ်မွဲက္ဍ ခရာရအဴ သၠုၚ်ဗောဓိတၞံ ဂေါဝ်ဂ္ညိဂၠဴ မသုန်စှော်ဟတ် စိုပ်ကၞာၚ်ၜတ်သဴ ဒဵုကၞတ်ဂှ် ကၠံဟတ်ဒှ်တဴ ဗွိုက်တၞံသ္ကဲ ပန်စှော်မွဲအဴ လမိဟ်ဟတ်အဵု ဟီုကဵုဆဴဆဴ ထပှ်တ္ၚဲအဴ ကျာ်သ္ဍဴလိုက်ဗာ တူပလ္လၚ်ဟေၚ် ဒၟံၚ်တဴသေၚ်ဟာ . . . ။
ဒေဝတဴသၞေၚ် က္တဵုဒှ်သေၚ်ဟာ ဟွံဒှ်ကျာ်ဟာ တၞောဝ်နာဲသာကျ တီသလှ်ေအဴ ဒေဝတဴရ ကလာၚ်တိုန်အာ တူအာကာသ ပဋိဟာခုတ် မှာသမ္ဗုဒ္ဓ စၚ်ကြံသရုပ် ရုပ်လျးပြမှ ညံၚ်ကျာ်ပေၚ်အာ တူအာကာသ ဒှ်ပ္ဍဲမတ်အဴ ဒေဝတဴရ တုဲဗၠးသၚ်ကာ အိုတ်မှာဒေဝ . . . ။
၁၃။ ထ္ၜးကျာ်တြဲတန်တဴထပှ်ဌာန
[ပလေဝ်ဒါန် | ပလေဝ်ဒါန် တမ်ကၞက်]နူအာကာသ ပၠန်စှ်ေရရဴ ဒိုဟ်ဨသာန်ဂှ် ထပှ်တ္ၚဲအဴ ဗဵုဒၟံၚ်ဗောဓိ ကျေဝ်ဂဝ်ဂ္ညိဂၠဴ ဟွံလၜဲအဴ မတ်ရဴကၠေၚ်သွဟ် အနိမိဿ စတဴဌာန်ဂှ် ဒိုဟ်သၟဝ်ကျာသၟဟ် ပလ္လၚ်ဂှ်အဴ ဌာန်စၚ်ကြံရတ် ပြာကတ်နုဘဴ ထပှ်တ္ၚဲတၞံ ကျာ်စၚ်ကြံအဴ ဒိုဟ်ဗာယပ်သၟတ် ပလ္လၚ်ရတ်အဴ ဌာန်ဂှ်သ္ၚိကၠတ် ဂပ်ဝ်ၜတ်သဴ ထပှ်တ္ၚဲအဴ ဒၟံၚ်တဴအနဳ ရတနရတ် ဗွဲစၟတ်ဟီုပ္ညဳ ဗၟံက်ပလ္လၚ်ပြဲ ပ္ဍဲက္ဍၚ်ကျာ်ဩဳ အဇ္ဇပါလ ဗြဲဂျဒၟံၚ်သ္အဳ ထပှ်တ္ၚဲပ္ညဳ ဒၟံၚ်သ္ၚဳဂျ စိုပ်အဂၞဲတၟိန် မုစလိန္ဒ ကျာ်ဂဇံစၟတ် မွဲသတ္တဟ သၠုၚ်ကျာပလ္လၚ် ဌာန်မၚ်္ဂလ ဗပိုန်ဇရာ အာယတန ထပှ်တ္ၚဲရ မံၚ်ဂျသဝဝ် ကျာ်တဳလပိုန် နှဴကသိုဏ်ဓရ် ဌာန်ထပှ်စွံ တန်ဒၟံၚ်ဟွံက္ဍဝ် ပန်စှော်ဒစိတ် လအိတ်အသဝ် ကျာ်တြုံအသဝ် တန်ဒၟံၚ်အဝ်ဇ ဟွံကေတ်အာဟာ ဒ္ၚိန်ကာယ . . . ။
နူပလ္လၚ်ဂ္ညိ ကဵုဗောဓိဂျ စဍးနူတၞံ စှ်မၚ်လံၚ်ရ ဌာန်ဂှ်ဟီုပ္တိတ် အနိမိဿ စှ်သုန်မၚ်လံၚ် ဌာန်စၚ်ကြံဂျ ပန်စှော်မၚ်လံၚ် သ္ၚိရတ်ကြံကြ အဇ္ဇပါလ ဒွတ္တိံသဓဝ် ပိစှော်ယါသၟတ် မၚ်လံၚ်ဆတ္တဝ် မုစလိန္ဒ စှ်သုန်ပၠလဝ် မသုန်ဣသုန် မၚ်လံၚ်ဂုဏ်က္ဍဝ် ဂွံဌာန်ရာဇာ ယတနဓရ် နူဗောဓိသတ် စဍးဆတ္တဝ် ကျာ်တြုံအသဝ် ဒ္ဂေတ်ဒၟံၚ်ဓရ်အဵု အေၚ်ဂတှ်ေက္ဍဝ် တလတၚ်ဃဵု ဂစွံအသဝ် အိန်နာဲသွဝ်အဵု ဍာ်သကသၠ တလတၚ်ဃဵု နာဲမြုကမိန် ဒုၚ်ဗဂိန်ကဵု ဂစွံမ္ၚဵု တွဵုအိန်မာဃ ကျာ်တြဲဂၜမ် လဒမ်ကာယ . . . ။
၁၄။ ထ္ၜးတပူတဗဝ် ကောန်ဂကူမန်ၜါကဵုဒါန်ကွာၚ်နာဍူပုၚ်ပၟန်ဍာ်သာဲ ကုကျာ်တြဲ
[ပလေဝ်ဒါန် | ပလေဝ်ဒါန် တမ်ကၞက်]ခဏဂှ်သ္ကဲ ကျာ်တြဲမံၚ်ဂျ ကောန်ဗၞိက်ၜါ ဒါန်တမၠာရ သၟိက်ကဵုဒှ်ကၠာ ဒကာဗုဒ္ဓ အာစိုပ်ကျာ်ရ တြုံတၠပိုန် နာဍူပြဲသန် ပမန်သာဲဗိုန် ပရာပ်နၚ်သွံ ဗဂိန်ကဵုဟွံဇြိုန် ဗဗေၚ်ဟွံမွဲ ကျာ်တြဲချပ်တိုန် သၟိၚ်ဝၚ်ပန်ဗိုန် တီတိုန်မွဲတဲ ဗဗေၚ်တၟံပၠန် သီုန်သၟဟ်တဲ သီုပန်ဂေါဝ်သာ် ဗဂိန်ကဵုကျာ်တြဲ ကျာ်ဂိုၚ်ထပ်ပၠန် သၟဟ်သၟန်ဒှ်မွဲ ကျာ်ဒုၚ်မွဲတဲ ဘောဇိုန်ပြဲဖာ ဒါန်ကောန်မန်ဂ္ညိ ဍုၚ်တြိကုမ္ဗာ ကျာ်ကဵုပိုန်ဟေၚ် ဒဵုဖဲသေၚ်ဟာ . . .
၁၅။ ထ္ၜးတပူတဗဝ် ဂွံနၚ်ဓါတ်သော် ၈-တၞုၚ်
[ပလေဝ်ဒါန် | ပလေဝ်ဒါန် တမ်ကၞက်]ကောန်ဗၞိက်ၜါ သဒ္ဓါသေသာတ် ယဵုသမိတ်တဲ ဒိုဟ်ကျာ်တြဲကၞာတ် အာတ်ဂိုၚ်ကေတ်ဓါတ် စဴကၞာတ်ဌာန်လ္ဂုၚ် ကျာ်ဇၞးမာ ဗ္စာရဏာပ္ညုၚ် ကျာ်တြဲညဳညောတ် သပေါတ်သမၠုၚ် ဂွံဓါတ်သော်ဗျာံ ဒစာံတၞုၚ် ကျာ်ဗဂိန်ကဵုသ္အး ကောန်မန်ရးလ္ဂုၚ် ညးၜါကဵုဒုၚ် ဖျဴနၚ်လ္ဂုၚ်ရ ကောဖုဿဂ္ညိ ဒေံဘလ္လိက သီုကောဒေံၜါ ကျာ်ခုတ်နာမ စဴစိုပ်လ္ဂုၚ်ရ ဓါတ်တၠဳဓရ် ပ္ဍဲဒဵုသိၚ်ဃုတ် ပ္တန်ထၜုတ်လဝ် ဒဵုလၟုဟ်သၟတ် တန်ဒၟံၚ်ဆတ္တဝ် ။
၁၆။ ထ္ၜးကျာ်တြဲဒဂိုန်ဝှ်
[ပလေဝ်ဒါန် | ပလေဝ်ဒါန် တမ်ကၞက်]ကြီုဓါတ်အသဝ် တွံလဝ်တုဲပ္ညဳ ဂွံဒှ်ကျာ်တြဲ တြုံလွုဲကျာ်ဩဳ မွဲဝှ်ဒ္ဂိုန်ဟာန် ဗာရာန်ဏသဳ ရာဇာဂြိုဟ်ဂှ် ပန်ဝှ်အနဳ မသုန်ဝှ်ကၠာ ဒ္ဂိုန်ဝေသာလဳ တရဴဝှ်ရ မကုလပ္ညဳ ထပှ်ဝှ်အနဳ ကျာ်တဳလဓရ် ရော်ဂုဏ်မိပ္ညုၚ် ဒ္ဂိုန်ပ္ဍဲဍုၚ်သွဝ် ဘဂ္ဂရးသၟတ် ဒစာံဆတ္တဝ် ကောသမ္ဗဳကျဝ် ဒစိတ်လဝ်သ္ကဲ စှ်ဝှ်ဒမၠိ ဂြိုပ်ပါလိလဲ လစဗြဟ္မ စိုပ်ရစှ်မွဲ စှ်ၜါကျာ်တြဲ ပ္ဍဲဝေရဉ္ဇ စှ်ပိဝှ်ပ္ညဳ တၟံစာလိယျ ဍုၚ်သာရဝှ် စှ်ပန်ဂှ်ဂျ စိုပ်စှ်သုတ်ဝှ် ကပ္ပိလဝှ်ရ ကျာ်ဒ္ဂိုန်ပၠန် ဇေတဝန်န စှ်တြဴဂျ ဒ္ဂိုန်အာဠဝဳ စှ်ထပှ်ရ မေဃဝတဳ ရာဇာဂြိုဟ် စှ်ဒစာံဂ္ညိ တၟံစာလိယ စှ်ဒစိတ်ဂျ မေဃဝန်တုန် နူစှ်ဒစိတ် တိတ်ဟီုတွံပ္ညုန် လၟေၚ်ဝှ်ကၠာ ဒှ်ၜါဣသုန် တြဴဝှ်တုန် နွံဂုဏ်ပြဲဖာ တုဲကလေၚ်သၟဟ် သာရဝှ်သ္ဍာံ ထောံဇေတဝန် စိုပ်ပၠန်ပယျာံ ကျာ်ဒဂိုန်မာ ဘာပုဗ္ဗာရာံ ဒးပယျာံပၠန် ကျာ်တြဲတုန်လေဝ် စိုပ်ဇေတဝန် ကၞတ်တဲသွိၚ် ကျာ်သၟိၚ်အရှန် ဂၚေၚ်တဴကၠာ ဟံၚ်ပြာ်မှာဇန် ကျာ်သၟိၚ်အရှန် ဂၚေၚ်လန်ဇဳ အာယုက်စိုပ်ဗျာံ ဒစာံစှော်ပ္ညဳ ပန်ဣသုန်ဝှ် ပေၚ်သၟဟ်အနဳ ။
၁၇။ ထ္ၜးကျာ်တြဲသ္ပပရိနိဗ္ဗာန်
[ပလေဝ်ဒါန် | ပလေဝ်ဒါန် တမ်ကၞက်]ကျာ်သၟိၚ်ခမဳ အိန်ရဳစိုန်သ္ကီု အိုတ်လမေၚ်ဒွါ စဂ္ဂတာလီု ကံတမၠာကီု ဆန်လီုလၜက် အာယုက်ဒကုတ် ဒဲသ္ကုတ်သက်လက် တိုၚ်ဒေါမ်ဓါတ်ပြိုဝ် ဇာတာမဵုဆက် ကြိယၚ်လၜက် နဝၚ်ဆက်ဗၠတ် အာယုက်ပဏာံ စဴစိုပ်သာံပတ် ပါပဍိက်လက် ဂြိုဟ်ပြက်လယတ် ဒုဟ်ဇၞော်ဒြဟတ် ကျာ်ကၞတ်ဘဴ ဍုၚ်ပါဝကိုပ် ကျာ်အာစိုပ်အဴ ဓမာတ်ထဝ်ရ စုန္ဒကြက်လှဴ သၟိက်ဖာပ်ကျာ်ပၠန် ဒ္ၚဳနိမန်ဖျဴ တ္ၚဲယးတုဲအဴ ကျာ်သ္ဍဴသၟိၚ်ဓရ် သီုလျးတရဴ ဇက်တဴအဝှဝ် လျးရုပ်ဂဵုခၠၚ် ညံၚ်ၜိုပ်က္ၜၚ်ထဝ် ကျာ်တဳလဓရ် တြုံလမောဝ်ဇန် စိုပ်သ္ၚိဆတ္တဝ် ဓမာတ်ထဝ်ပၠန် ဖျုန်သုက္ကရ စဳရေၚ်သွဗျန် ဖျုန်ဂှ်စုတ်ခိုဟ် ဍာ်တှ်ယိုဟ်တ္ၜန် ဇိပ်ဂၠိပ်လောန်သန် ရှ်သာလောန်တဲ စုတ်ဗဗေၚ်သာ် ဗဗေၚ်ကျာ်တြဲ စဳရေၚ်လောန်ဗၞတ် ဒါန်ကၞတ်တဲ သုက္ကရဂှ် အတိက်ဒှ်ဝဲ ကျာ်ကဵုပိုန်ဖဲ ဒါန်ပြဲဒယှ် ကဵုပိုန်တုဲရ ပ္ဍဲခဏဂှ် ဆီကအ်လအိတ် ဇွောဝ်တိတ်ထဏဟ်။
ဒါန်သုဇာတာ ကိုပ်ကၠာတေံဂှ် ကဵုပိုန်တုဲဒှ် တ္ၚဲဂှ်ဂွံၛာန် ဂွံပဏၚ်ဗက် ဂြၚ်မဂ္ဂညာဏ် ဂွံခၠေဝ်ရော်ဂ္ညိ ဂုဏ်မိကွေံကြာန် ဒှ်အဂ္ဂဒါန် ပြဲလောန်လာန်ရ ဒါန်စုန်ဝွံသၟတ် ကၞတ်ဒါန်ဂျ ဂွံစိုပ်သေၚ်ဟာ ဍုၚ်နိဗ္ဗာန ဍုၚ်နိဗ္ဗာန်သၟတ် ကၞတ်သုခ ဒါန်ကၞတ်တဲ ဟွံမွဲဂတ ဒါန်ၜါဝွံဂှ် ဒါန်တုပ်သၟဟ်ဂျ ကျာ်တြဲတွံဂး ထိုၚ်သးလဝ်ရ။
မှာသမ္ဗုဒ္ဓ အဂ္ဂပညာ ကဵုပိုန်တုဲပ္ညဳ ဒ္ၚဳဂံါသုဲအာ ကၠေံဌာန်ဂှ်ကၠာ စိုတ်ဟွံသွာၜိုဟ် ယဲဂၞဴတဟး ညံၚ်ဍာ်ညးသ္ကိုဟ် မတ်ေဂတ်သဝဲ ဇိုၚ်တဲသရိုဟ် သၟိပ်ဂတဝ်ၜိုဟ် ဂၞဴသရိုဟ်အာ လမောၚ်သ္ၚဳဍုက် လီုမုက္ခဝါ နူဍုၚ်ပါဝ ကျာ်ဂတအာ ခုတ်သနာရာံ ဌာန်ရာံနညာ သၟတ်ပ္ၚောံအာ နာဲသာကျာ်တြဲ စဍးဍုၚ်ၜါ ပိဝါဇမ္ၚောဲ နူယးဆတ္တဴ ဗၞတ်တရဴတ္ၚဲ ဒစာံစှော်ဝါ ဂၞဴအာလောန်တဲ ဂၞဴသ္ကဟ်ကဝဲ ကျာ်တြဲဍောၚ်သန် အာယုက်ဒဲလီု ယဲကၠုၚ်ပ္ကီုဒန် တၟောၚ်ဩိုဟ်သဗ စိုတ်ရဟွံတန် ဝါလီုအရေဝ် ထောံတေဇဝန် တမောၚ်တန်တန် ဒြဟတ်အောန်တဲ ကအ်သ္ကဟ်ထၚ်ဍာ် သဗဩိုဟ်ကျာ်တြဲ ကော်အာနန္ဒ သီုတေဇပြဲ အဵုအာနန္ဒ ကညညံၚ်မွဲ ကၞတ်တဲသွံ ဒေံပထောံအဲ ဍာ်နာဲၜိုဟ်သ္ဇုၚ် မကၠုၚ်ဗရဲ ဒေံကၠောန်ဝဳဝတ် ဝါဝွံကၞတ်တဲ ကောမွဲဒေံမွဲ ဟွံမွဲကလော ပ္ဍဲဌာန်လ္ၚု ဒေံဇုကဵုကောါ ဟွံမွဲသဳနော် ကၠၚ်ဗော်ကလော အဲကဵုအာနန္ဒ ဒေံကဵုကော ဆတ္ၚဲဝွံရော ဒေညာတ်ကောကီု ယးဂတသတိုတ် ကောအိုတ်လမျီု။
အာနန်မိၚ်ကီု လဟိုကျာ်သၟတ် လၞီလၞာ်ဍာ်ဇွောဝ်ရမတ် သဗဩိုဟ်ဒေၚ်သၠၚ် လၞီကၚ်ဇတ် ပ္ဍဲစိုပ်ဗှ်ရိုဟ် ဖျုန်ဂြိုဟ်တတ်တ် ရမတ်ဗြိုဟ်ဟ် ညဴၚ်ဩိုဟ်ဗြဲရတ် ဟး ဗုဒ္ဓရတ် ပဗတ်ဒေံသ္ပ သ္ၚောဲနကလော ဨကကောဝ ထောံကၠေံဒေံရော ပသာ်ကောသ္ပ။
မှာသမ္ဗုဒ္ဓ အဂ္ဂပညာ တၟောၚ်သ္ၚဳဍုက် လီုမုက္ခဝါ ပ္တိတ်ဒြဟတ်အဵု ဒ္ၚဳဒ္ၚဳက္တဵုအာ အာနန်ဗက်ကြဴ ဂါမ်တဴညှာညှာ ကျာ်ဂမျိုၚ်ပၠန် တလပညာ ကိုပ်တေံနာဲသာ ဒၞာဲအညံၚ်သ္ဍဴ ကွးသတုံကွးဇွိ သိဒ္ဓိကြက်လှဴ ဝါကၞတ်တဴတဲ နန္ဒမွဲအဴ မှာသာရီပိိုတ် သကန်ပၠိုတ်ကြဴ မှာမောဂ္ဂလာန် နိဗ္ဗာန်ကညစဴ မှာဗုဒ္ဓရတ် ဒွံဥပတ်ဒြဴ အာနန်မွဲအဴ ဂွံဗက်ကြဴရ ကျာ်အာစိုပ်ဗက် ကြုၚ်ကက္ကုဓ အဲဍောၚ်ၜိုတ်သန်ရအာနန္ဒ သကိုပ်ဆတ္တဝ် လးလဝ်ညိရ သကိုပ်အဆတ် ပပိသၞတ်ဂျ အာနန်လးသၞက် သၟဝ်တၞံရုက္ခ သ္ကဲသတုံအဴ ကျာ်သတိက်တဴရ ကျာ်တၠပိုန် ဍောၚ်တိုန်သ္ပာတ်သဗ ယဝီုထတ်ထတ် မုတ်မတ်သ္ၚိတ်ဇြ ကအ်ကှ်လၞာ် ထၚ်ဍာ်ဩိုဟ်သဗ ကျာ်ကော်ပၠန် အဵုအာနန္ဒ ဍာ်သ္ဇုၚ်ထ္ၜိုဟ်က္ဍၚ် တုက်နၚ်ညိရ မိၚ်ဗက်အာနန္ဒ သီုထသပါ စှ်ေတုက်ဍာ်ဂ္ညိ ဍာ်ကြုၚ်ကၠိအာ ဍာ်လုပ်ဗဗေၚ် သ္ဇုၚ်ပၠန်သေၚ်ဟာ အာနန်ပ္တီသ္အး ကျာ်ဇၞးမာ။
၁၈။ ထ္ၜးဝိပက်နူအတိက်
[ပလေဝ်ဒါန် | ပလေဝ်ဒါန် တမ်ကၞက်]ယွံသမ္ဗုဒ္ဓ နာဲသာက္ဍိုၚ်ပ္ကဴ ဍာ်ကြုၚ်ဂှ်ပၠန် သဳိုက်ကၠိခန်အဴ စိုပ်ဗဗေၚ်ဂှ် သ္ဇုၚ်ပၠန်ဒှ်တဴ ဟိုတ်ဖဵုသာ်ဂှ် မဒှ်ရောၚ်အဴ။
ယွံအာနန္ဒ ဝိပက်ရအဴ အတိက်တေံပၠန် အဲဒှ်ကောန်ဂၠဴ မၞိဟ်ဒဳဏာအဴ ၝောံဂၠဴကွာ်အာ စိုပ်ကြုၚ်မွဲအဴ ကောန်ဂၠဴစှ်ေကၠာ ကောန်ဂၠဴလိုန်ဂ္ညိ ဍာ်ဂှ်ကၠိအာ ဍာ်ကၠိဂှ်မာ မိဒးဇၟာသုၚ် အတိက်ဝိပက် လမုဟ်ဗက်ကၠုၚ် အဲကလံသတိုတ် ပ္ဍဲစိုတ်အေၚ်ဒုၚ် ဂွံလံပ္ညုၚ် ဍာ်ဂှ်ဇြုၚ်တဴ ကျာ်ဂွံသုၚ်သၟဟ် ဍာ်ဂှ်ဆဴဆဴ ဒ္ၚဳကျာ်ဟှီပၠန် ကဵုအာနန်အဴ။
ယွံထေရ်အာနန် ဇၟာပ်ဇန်တြုံဗြဴ ဝိပက်သဘဴ ဒးဒုၚ်တဴဂျ မှာထေရ်အာနန် သၟာန်ကျာ်ပၠန်ရ။
ယွံကျာ်ဂမျိုၚ် ပၞာၚ်တိုၚ်လောက ဝိပက်ကဵုကၠိက် အတိက်မူလ မူကျာ်ဂမျိုၚ် နာဲက္ဍိုၚ်သ္ဒးပ။
ယွံအာနန္ဒ ကၠိက်ဝွံရဟာ အတိက်တေံဟေၚ် ဒှ်ကၠိက်သေၚ်ဟာ နူကၠိက်ချိုတ်အာ ဒှ်ယက္ခပၠန် ခသၟိၚ်ဗဳဩဴ လွဵုဂွံစဴတန် ဗရာန္နသဳ ဒၟံၚ်တသဳညန် ရပ်စပိုၚ်ပိုၚ် မၞိဟ်ချိုတ်ဂၠိုၚ်သန် သၟိၚ်ကဵုလန်ဗျာပ် ဂၠာဲမၞိဟ်ဇၟာပ်တန် ကဵုရပ်လက်ဗန် ပ္ကီုဒန်ယက္ခ ဗောဓိသတ်ဒှ် ကာလဂှ်ဂျ ဒှ်ကောန်ဗြဴကၟာဲ ဂၠာဲအှော်လှာဲစ မိဗောဓိသတ် တီကောန်ထတ်ဂျ ထဝ်လ္ၚီဆတ္တဝ် ဒ္ၚဳဂိုၚ်လဝ်ရ ဗၠာဲသၟိၚ်မူလ အာဂျပ္တီသၟိၚ် ဗောဒိသတ်အဴ ဂၠေၚ်အှော်စဴသွိၚ် ဒဒှ်မိအဵု ဒုၚ်ပါၚ်ကဵုသၟိၚ် စိုပ်သ္ၚိသက်သထောံ မိဟီုဂွံမိၚ် အိုဟ်တၟိုဟ်သတိုတ် ပ္ဍဲစိုတ်အီနှိၚ် ကွာ်အာသွိၚ်ၚ် စိုပ်ပေဲါသၟိၚ်အဴ ကလော်အပၠေံ အေန်တချေံတဴ ညးမွဲဟွံဂံၚ် ဗဵုကၠံၚ်တမှဴ မှာဗောဓိသတ် တြုံကၞတ်ဘဴ တီကလော်အဴ တုဲချပ်တဴကွေံ သမၞိၚ်အဲဂး ဟွံကဵုဒးဍေံ ချပ်တုဲသဘဴ တ္ၚဲကတဴရပ်ကွေံ စးကၠေံကံဍေံ ချိုတ်ဂဗှ်ေသ္ဒ ကၠာကလော်သတိုတ် ဟွံချိုတ်မူလ ဒက်ဝဲဆတ္တဝ် ဍေံဟီုလဝ်ရ ဗှ်ေဒှ်ကျာ်စၟတ် အနာဂတ်ဂတ စဖျုန်အဲသတိုတ် ကဵုဒးချိုတ်သ္ဒ ဝဳဝဲယက္ခ ဘဝဂၠိုၚ်တောၚ် ဝဳပက်ဗက်ကၠုၚ် အဲဒးဒုၚ်ရောၚ်။
ဆဂှ်ဟွံသေၚ် အဴတၟေၚ်ဂၠိုၚ်တောၚ် အတိက်တေံရောၚ် မွဲတောၚ်ဟီုပ္ညဳ အဲဒှ်သၟိၚ်ယာန် ဗရာန္နသဳ ၜါစှော်သၞာံပြိုၚ် ဒှ်သၟိၚ်ဂျိုၚ်ဖဳ ဗြဴစရာဲဍုၚ် မွဲပ္ညုၚ်အနဳ အဲဖ္အောဝ်ညးသတိုတ် ကဵုဂစိုတ်ပ္ညဳ ဘဝအနဳ ဟိုပ္ညဳဝိပက် ချိုတ်နူဂှ်ယး စှ်ေဒးနရက် ဒစာံစှော်လ္ၚီ သၞာံတၞီဂၠက် ဗၠးနရက်အဵု ကုသဵုဍံၚ်ဗက် ဂွံသွဝ်သက်လက် အာယုက်ဆက်ပ္ညဳ လ္ၚီသၞာံဒိပ်ဗက် တ္ၜန်တ္ၜောဲဆက်ဖဳ နူဍုၚ်သွဝ်ဂှ် စှ်ေဒှ်တေမဳ ဝိပက်အနဳ ဒဒိုက်သ္အဳရေၚ် စှ်တြဴသၞာံ ဒိုက်ဂြၚ်သေၚ်လေၚ် ဒးဒုၚ်တဴဟေၚ် ဝိပက်သေၚ်ဟာ။
ဆဂှ်ဟွံသေၚ် အဴတၟေၚ်တမၠာ ပဗၞိက်ကၠာ ပ္ကီုဝါဏိဇ္ဇ သၟဝ်ဇြုံမွဲပ္ညုၚ် အဴတၟေၚ်တမၠာ ပဗၞိက်ကၠာ ပ္ကီုဝါဏိဇ္ဇ သၟဝ်ခြုံမွဲပ်ညုၚ် ထောံဟာပ်ပုၚ်သွ ကောန်ဂစေံမွဲ သီုသပါဲဂျ ၝောံဍေံဒၟံၚ်သၟုက် သၟဝ်တၞံရုက္ခ ဒးယက်ဘဲရ ပဝ်ကမြဴဒဴ ဝိပက်ဂှ်ပ္ညုၚ် ဗက်ကၠုၚ်ဗွဲကြဴဒှ် မှာဇနက် က္ၜၚ်ဗြမ်ၜက်တဴ ပှ်လှ်ခြာဒၚ် နူကောန်က္ၜၚ်အဴ ဝိပက်ဗွဲကြဴ ဒးတဴသေၚ်ဟာ။
ဆဂှ်ဟွံသေၚ် အဴတၟေၚ်တမၠာ ကာလမွဲဝါ ဒှ်ဂမာဂၠဴ ကောန်စိၚ်ဂြိုပ်ကၟက် ညာတ်ဗက်ဆဴဆဴ ထပက်စုတ်ဒး ကဵုကောန်သးအဴ ဝိပက်ဂှ်ပ္ညုၚ် ဗက်ကၠုၚ်ဗွဲကြဴ ညးတ္ၚီုဒးအဵု ကဵုကောန်သးအဲ ဂၠိုၚ်ဘဝပ္ညုၚ် ဘဲဒးဒုၚ်တဴ ဒှ်ကောန်သၟိၚ်အဴ ဘဝကြဴတၟေၚ် ကလော်ဂြိုပ်မွဲ သံၚ်လံၚ်အဲဟေၚ် ပဳဠိယက္ခ နာမစုၚ်ပြေၚ် ကလော်ဂှ်ဟေၚ် သံၚ်အဲသေၚ်ဟာ။
ဆဂှ်ဟွံသေၚ် အဴတၟေၚ်တမၠာ အဲနွံသေၚ်ဟာ ပညာစဳခၞ က္တဵုဒှ်မၞိဟ်ရော မဟောသဓ စၞေဟ်ပၞာန်သၟတ် ကဵုကေဝဋ်ဂျ ရပ်ဂတက်ဟေၚ် ဂရိတ်ကၞေၚ်ဩ ဗိုတ်ဏာသ္ကဲစ္ဍး ကေဝဋ်ဒးကျ စနှေတ်ဂှ်ရော ဟိုတ်ဒှ်ဒေါသ ချိုတ်ဂှ်ကၠာ ဒှ်နာ်နာဂ ဒှ်ဘူရိဒတ် နွံသၟတ်သဳလ လၟာဲပျဲပၠန် ဂၠိုၚ်သန်ဒုက္ခာ ကြဴနွံဒှ်ရ စန္ဒကုမ္မာ မၞးမွဲရ ဂးလက္ခဏာ ဍေံစံၚ်ယတ်ဟေၚ် ကဵုအဲသေၚ်ဟာ တၞံမှတ်သဓ ဘဝတမၠာ ဝိပက်ဂှ်ဟေၚ် ဒးဒုၚ်သေၚ်ဟာ။
ဆဂှ်ဟွံသေၚ် တၟေၚ်ဂၠိုၚ်ရာ အတိက်တမၠာ ဒှ်ကုမ္မာရ ရပ်ဗ္တကဏှဲ ဒဟုဲဝေၚ်ဂျ ဟိုတ်ဝိပက်ဂှ် ဒှ်ဝိဓူရ ကလော်မွဲတုန် အပုဏ္ဏက ဍေံဒက်ဂၞိၚ်ရ ကဵုဗတချေံ ပ္ဍဲဇြဟ်လဂေါဝ် အဲဍေံသောဝ်ဂျ ဒဒိုက်ဇၞော်အဴ ဒးဒုၚ်တဴကွေံ ဝိပက်ကမေဟ် ဗၠးမွဲလှ်ေဟာ။
ဆဂှ်ဟွံသေၚ် နွံတၟေၚ်ဂၠိုၚ်ရာ အဲဒှ်သၟိၚ်ကၠာ ဗြဟ္မာဒတ္တ ဗက်ဗဒဴကၠေံသ္ကဲ ဣသိမွဲရ ဣသိဖေက်အဴ အာသ္ၚောဲဌာန မသုန်ကၠံရ ဘဝတမၠာ အဲဒးဗက်ဟေၚ် ဝိပက်သေၚ်ဟာ အဲဒှ်သၟိၚ်ဂ္ညိ သိဝိရာဇာ ညးဗက်ကၠေံပ္ညုၚ် နူဍုၚ်စ္ဍးအာ ဒှ်သၟိၚ်မွဲဓဝ် ဝေသန္တဝ်ကၠာ ညးဗက်ကၠေံဟေၚ် နူဍုၚ်သေၚ်ဟာ ယွံအာနန္ဒ ဘဝတမၠာ အဲဒးဒုၚ်ဟေၚ် ဝိပက်သေၚ်ဟာ။
ဆဂှ်ဟွံသေၚ် အဴတၟေၚ်ဂၠိုၚ်ရာ အဲဒှ်ပံက်ကၠာ တမၠာတေံရ နူဘဝပံက် ၜိၚ်ၜံက်စက ဝိပက်ဂှ်သၟတ် ကၞတ်ဘဝ ဇာတသတြု ယၟုရာဇ ပတှ်ေဂလာန်သၟတ် ဒေဝဒတ္တ ဖ္အောဝ်သမာတ္ၚ ကဵုပဒဏ်အဲ ကဵုလွဳသတိုတ် ပန်ဂစိုတ်အဲ ဝိပက်ဂှ်ပ္ညုၚ် ဗက်ကၠုၚ်မွဲတဲ ဒှ်တဴဝဳဝဲ ကဵုအဲသေၚ်ဟာ။
ဆဂှ်ဟွံသေၚ် အဴတၟေၚ်ဂၠိုၚ်ရဴ ဍုၚ်မွဲတမၠာ အာဒိမူလ အဲဒှ်သၟိၚ်ရ အောန်ကဵုညာဏ ပ္ဍဲဂှ်ညာတ်စုတ် စေကဗုဒ္ဓ အဲဒးဟီုပ္ညဳ ဗျံက်ဝေၚ်တဳလ လပံက်လမာဲ ဒုဟ်နွံသၟာဲသၟ ပ္ဍဲမာတုဂါမ် ဟီုဗျာံဗျံက်ဂျ ဒုဟ်ခမဳရ ဟိုတ်ဟီုရပ္ညဳ စှ်ေဒးနရက် ဂၠိုၚ်သၞာံၜက်ဖဳ ကၠုၚ်ဒှ်ကျာ်အဴ ကၞတ်ဘဴပ္ညဳ ဝိပက်ဂှ်ပ္ညုၚ် ဗက်ကၠုၚ်အနဳ ပဟိုတ်ဂှ်တုန် ဗြဴသုန္ဓရဳ ညးဍုၚ်တ္ၜေဟ်အဲ ရိုဟ်တ္ၚဲတြဳတြဳ ဝိပက်ကြံၚ်ဍုဟ် ဒုၚ်ဒုဟ်ခမဳ ဒးဒုၚ်တဴပ္ညဳ ဝိပက်သေၚ်ဟာ။
ဆဂှ်ဟွံသေၚ် ဒုဟ်တၟေၚ်ဂၠိုၚ်ရာ ကွးကျာ်တမၠာ အဘိဘူမွဲ ပ္ဍဲခမဳကွေံ အဲတ္ၜေံကရေဲ ပ္ဍဲမာတုဂါမ် ဟီုဂြာံဒုဟ်သ္ကဲ ဝိပက်အဲ ဒးဘဲနရက် ဂၠိုၚ်လ္ၚီသၞာံကၟိန် ဒးစှ်ေစိန်ဂၠက် ၜိုန်ဒှ်ကျာ်ပ္ညုၚ် ဒးဒုၚ်ဝိပက် စိဉ္စမာဏဴ သၟိၚ်ဂၞဴသ္အဳဂၠက် အဲလုတ်ကဵုဍေံ ဗိုၚ်ဟီုတ္ၜေဟ်လက် ယွံအာနန္ဒ ဂုဏ်ပါၚ်ပဗက် ဒးဒုၚ်နရက် ဝိပက်သေၚ်ဟာ။
ဆဂှ်ဟွံသေၚ် အဴတၟေၚ်တမၠာ အဲဒှ်အာစာ ပါတိမောက္ခ မသုန်ကၠံပ္ညဳ ကွးတဝဳဂျ ညာတ်ဣသိမွဲ စိုတ်အဲဟိန်ဏ အဲဒးဟီုဗျိ ဣသိမူလ ဣသိဒေပ်ဗြဴ တုဲစဴအာတ်စ ဟိုတ်အဲဒးဟီု တ္ၜေဟ်လက်ကီုရ အ္စာသီုကွး ဟီုတ္ၜေဟ်ဒးမ ဝိပက်ဟွံဗၠး နရက်ဒးကြ ကွးအတိက်တၞံ မသုန်ကၠံရ ကၠုၚ်ဒှ်ခမဳ ကွးအဲစဳခၠ ကၞတ်ဘဝဂှ် ဒှ်ကျာ်ရရဴ ဟိုတ်နူဘဴပ္ညဳ သုန္ဓရဳအဴ အာစာတဳပ္ညုၚ် ကဵုၜုၚ်ဍောတ်ဗြဴ ဇိုၚ်ကၟာၚ်ပၠန် ဇေတွန်အဴ ကဵုတိုပ်လဝ်ရ သၟဝ်ဇမြပ္ကဴ အ္စာတဳကွေံ တုဲဟီုတ္ၜေဟ်တဴ ဂေါတမနှဴ ကောံဍောတ်ဗြဴပ္ညဳ ဖေက်ဒုဟ်ဂှ်ကၠာ မံက်အာအနဳ မသုန်ကၠံဒွး ဖအောဝ်ကွးခမဳ ကဵုဂစိုတ်တုန် ဗြဴသုန္ဓရဳ ဇိုၚ်ကၟာၚ်ပၠန် ဇေတဝန်ပ္ညဳ တိုပ်လဝ်အနဳ သုန္ဓရဳရောၚ် ဣၚုဟ်တီသ္ကဲ ဂးတုဲမွဲတောၚ် ကဵုညးဍုၚ်ဂွိုၚ် မဂၠိုၚ်အသောၚ် ကဵုဟီုဂရိုဟ် ဇၟာပ်ဒိုဟ်လလောၚ် သီုကွးအဲတၞံ မသုန်ကၠံရောၚ် ဝိပက်မွဲတောၚ် ဟွံဂွံယောၚ်ခြာ ယွံအာနန္ဒ ဘဝတမၠာ အဲဒးတ္ၜေဟ်ဟေၚ် သီုကွးသေၚ်ဟာ။
ဆဂှ်ဟွံသေၚ် ဘဴတၟေၚ်တမၠာ အဲကောန်မၞိဟ်ကၠာ ဒှ်ကုမ္မာရ ဝေၚ်တဴကွေံကြာန် ပ္ဍဲသဗာန်ဂျ ညာတ်ခမဳခုတ် စေကဗုဒ္ဓ ရပ်ကဝေက်ကၠာ ဗိုတ်ထေၚ်ဏာရ ဒွံဒးဇိုၚ်ခုတ် စေကဗုဒ္ဓ ဇိုၚ်ဒှ်ဩဴကၠာ ဆီတိတ်အာရ ယွံအာနန္ဒ ဝိပက်ပဝဲ ဝိပက်ဂှ်ပ္ညုၚ် ဗက်ကၠုၚ်မွဲတဲ ဒေဝဒတ်အဵု ပၠောတၟံကဵုအဲ ဒးၝောံဇိုၚ်ပ္ဍူ ဂိလောန်တဴယဲ စိုပ်အဲသေၚ်ဟာ။
ဆဂှ်ဟွံသေၚ် ဘဴတၟေၚ်တမၠာ အဲဒှ်အာစာ ပါတိမောက္ခ ဍိုက်စိၚ်ညာတ်ခုတ် ပစ္စေဗုဒ္ဓ ဗတိုက်လဴဏာ စိၚ်မာတၚ်္ဂ စေကဗုဒ္ဓ ကလာၚ်အာဂျ ဝိပက်ဂှ်ပ္ညုၚ် ဒးဒုၚ်တာဝ ဒေဝဒတ္တ ကၠုၚ်ပဝဳဝဲ ဖအောဝ်ဂမှာစိၚ် သွိၚ်ဗတိုက်အဲ နာဠာဂိရိ စိၚ်ဣဒ္ဓိပြဲ ဗလးနၚ်ပ္ညုၚ် ဂးဟီုကၠုၚ်ဩဝိပက်ဝဳဝဲ စိုပ်အဲသေၚ်ဟာ။
ဆဂှ်ဟွံသေၚ် ဒုဟ်တၟေၚ်ဂၠိုၚ်ရာ မတုဲတေံမှာ ဒုဟ်ဖာတသိုက် အတိက်တေံကၠာ ဒှ်သၟိၚ်ပြဲသတိုတ် တြုံမွဲမ္ဂး အဲဒးဂစိုတ် နလွဟ်သ္ကေက်က္ဍၚ် စာကခၠၚ်အိုတ် ချိုတ်ဒးနရက် တူဂၠက်ဂပိုတ် ဝိပက်တော်ဂိုတ် ဟွံအိုတ်ဂၠိုၚ်သာ် ပ္ဍဲသဘဴလၟုဟ် အဲကၠုၚ်ဒှ်ကျာ် တၟံဒေဝဒတ် ဒိဖဍတ်ပါ် ဒွံၝောံဇိုၚ်ကၠာ ဍူအာလမာ် ဇဳဝကအဵု စာကၠေံကဵုသၞာ် ဝိပက်လမာ် ၜိုန်ဒှ်ကျာ်မာ ဒဴဟွံဗၠးဟေၚ် ဒးဒုၚ်သေၚ်ဟာ။
ဆဂှ်ဟွံသေၚ် ဒုဟ်တၟေၚ်တမၠာ အဲဒှ်ကောန်ကၠာ တမ္ၚာဗ္ၚဂး ထံၚ်ပါမ်ဇာဂျ ၜုၚ်က္ဍိုပ်ကနး ဝိပက်မ္ဂး အပါယ်ဒးအာ လၟုဟ်မ္ဂးဂှ် ဒှ်ကျာ်ဇၞးမာ က္ဍိုပ်အဲအယိုၚ် ဂိတဴဂၠိုၚ်ဝါ ၜိုန်အဲမ္ဂး ဒှ်ကျာ်ဇၞးမာ ဝိပက်အိုဿီု ဆဂှ်ကီုဟာ။
အတိက်တမၠာ ဒှ်မှာဖုဿ ခမဳမွဲကွေံ အဲဟီုတ္ၜေဟ်ရ ခမဳစတိက် ဗနိက်ဟွံပ ပုၚ်သွပြဲအဵု ဟွံကြိုက်ကဵုစ ပုၚ်သ္ၚုယာဗိုန် ထေက်ကဵုပိုန်ရ ဟိုတ်ဒးဟီုဗျိ ဂလာန်ညိည ဒှ်ကျာ်တုဲပၠန် ပ္ဍဲဝေဉ္ဇ ပုၚ်သ္ၚုယာကွေံ အဲကျာ်ဒးစ ယွံအာနန္ဒ ဘဝတမၠာ ခမဳပြဲဂ္ညိ ဒးဟီုဗျိမှာ အပါဲပန်ပျိုၚ် ဒးဒုၚ်ဂၠိုၚ်ရာ ဝိပက်ကြဴဟေၚ် ဒးပၠန်သေၚ်ဟာ။
ဆဂှ်ဟွံသေၚ် ဒုဟ်တၟေၚ်တမၠာ အဲဒှ်သေၚ်ဟာ သၟာလက်ဗန် လေပ်ပြဟ်စောန်ထတ် ဇကုသွတ်လောန် သဘၚ်ဇၞော်ၜိုဟ် ကမြဴဒိုဟ်ပန် နူကွာန်သ္အာၚ်ဆက် ကၠုၚ်ရပ်လက်ဗန် သမာမွဲပၠန် လက်ဗန်စဳကၠး နူကွာန်သ္အာၚ်အဴ ကၠုၚ်အေန်တဴယး မှာဗောဓိသတ် တြုံကၞတ်ညး တိတ်ရပ်သဝိုက် လပိုက်ဖျေံစး ဂၞိၚ်ဍေံညးဝး လစှ်ေလၚာ ယွံအာနန္ဒ ဘဝတမၠာ ဟိုတ်ဝိပက်ဂှ် လၟုဟ်ဝွံမာ ဂၞိၚ်အဲကျာ်ဟေၚ် ဂိတဴသေၚ်ဟာ။
ဆဂှ်ဟွံသေၚ် ဒုဟ်တၟေၚ်ဂၠိုၚ်ရာ မတုဲတမၠာ အဲဒှ်အ္စာသဝ် သေဌဳမွဲသၟတ် ကောန်ယဲဆတ္တဝ် တုဲသေဌဳအဵု ဟီုကဵုအ္စာသဝ် ဝဳကောန်အဲပၠန် ဗၠးကဵုဩန်ထဝ် သာ်ဝွံတုဲကီု သေဌဳဟီုလဝ် ကောန်သေဌဳသၟတ် ဝဳဗၠးဆတ္တဝ် သေဌဳဓဇန် ဟွံကဵုဩန်ထဝ် အဲအစာသဝ် တၟေၚ်ချပ်ခဝ်အာ စုတ်ဂဥုဲပ္ညဳ ကောန်သေဌဳကၠာ ဆီကံဇွောဝ်တြး ဒဵုဒးချိုတ်အာ ဟိုတ်ဝိပက်ဂှ် လၟုဟ်ဝွံမာ စနိမန်ကၞာတ် စုန်ဓမာတ်ကၠာ ဆီကံအဲဟေၚ် ဇွောဝ်တိတ်သေၚ်ဟာ ဝွံဝိပက်ရ ဘဝတမၠာ။
ဆဂှ်ဟွံသေၚ် ဒုဟ်တၟေၚ်ဂၠိုၚ်ရာ ပ္ဍဲကျာ်တြဲကၠာ မှာကဿပ အဲဗမၞးဂ္ညိ ဇောတိပါလ မိၚ်ညးသ္အာၚ်ဂး ဟီုထိုၚ်သးဂျ ထပှ်တ္ၚဲသၟတ် လွဳစိုပ်သစ္စ ဒုက္ခစာရဳ ဇတ်တဳလ ဂွံဒှ်ကျာ်ပၠန် သ္ဇိုၚ်သန်ပြမ ညးထိုၚ်သးသၟတ် ကျာ်ကဿပ အဲဗမၞးဂ္ညိ ဇောတိပါလ ဒ္ၚဳကြီုတိုန်ရ ဟွံဒညညှာ ထပှ်တ္ၚဲဂှ် ပဒယှ်ဟာ ဒုက္ခစာရဳ အဲလွဳပရာ တရဴသၞာံဟေၚ် ပမာန်သေၚ်ဟာ ဟိုတ်ဝိပက်ပ္ညဳ ဒုဟ်ဝစဳဒွါ တရဴသၞာံဟေၚ် ဒးဒုၚ်သေၚ်ဟာ ဝိပက်မ္ဂး ဒဴဟွံဗၠးကၠာ။
ဆဂှ်ဟွံသေၚ် ဒုဟ်တၟေၚ်ဂၠိုၚ်ရာ ဍုၚ်မွဲတမၠာ သာရဝှ်ဂျ အဲဒှ်သၟိၚ်ဂ္ညိ သမ္ဘိမုတ္တ မာဝွံဒှ်ကၠာ သၟိၚ်ဗာဟုဏ ကလိၚ်ကရး ဍုၚ်ဂးနာမ သၟိၚ်ဗာဟုဏ ဇက်ကၠုၚ်ပပၞာန် ဗတိုက်အဲသွံ ဗတိုက်ဟွံမာန် သီုဗဵုလဗး ပေက်ပြးတခါန် ဗောဓိသတ်အဴ ဗက်ဗ္ဒဴကွေံကြာန် ဆရးဇကု သီစုတ်ကာန် ရးညးပၠေဝ်ပၠေတ် ဟွံကေတ်သာန်န် မာဂၠိုၚ်ဂလာန် ပပၞာန်ကဵုအဲ ဒဵုလၟုဟ်ပ္ညဳ ဍေံပဝဳဝဲ။
ကြဴမွဲတဲအဵု မာထေဲကဵုအဲ ကာလရာန်ဖံက် လီလကံက်တဲ ဒမာထးထဝ် မာဒက်လဝ်ဝဲ ဒဵုဒှ်ကျာ်တြဲ ဒက်ဝဲပပၞာန် ဟိုတ်မေတ္တာသၟဟ် ဟိုတ်ကြဳဇှ်ဒါန် မာပေက်ဇၟာပ်ဒိုဟ် မာဂြိုဟ်ဟွံမာန် ဟိုတ်ကၠုၚ်ပပၞာန် ဂြိုဟ်ကာန်ကျာ်တြဲ ကြဴစုတိဓရ် နူသွဝ်မွဲတဲ လောဟကုမ္ဘိ နုၚ်တိပသဲ တူလှောမ်သဏာန် ဂိကတာန်လောန်ကာဲ ဟိုတ်ဂြိုဟ်ကဵုအဲ ကျာ်တြဲဂးမာ မာဒးဒုၚ်ဟေၚ် နရက်သေၚ်ဟာ။
ဒေဝဒတ်မွဲ စိုတ်ဟွံပြဲဖာ ပလွဳပရာ ဒိပ်စိုတ်ပါပ သၟိက်ဂစိုတ်အဲ ကျာ်တြဲမူလ အဲသက်ကဵုဒုဟ် နၚ်ဒုဟ်ပသၞ ဒးအဝိက်တၟပ် တွဵုကပ္ပ ကာလတိၚိတ် သှ်ပတဴစိတ္တ လ္ၚောဝ်ထိုၚ်သး ဂုဏ်ကျာ်သ္ဂးရ ဟိုတ်ဂွံလ္ၚောဝ်ဖျာ် ကျာ်တြဲမူလ ဟိုတ်ဂွံပပ္ညဳ ခမဳကီုရ ထဝ်ဒေဝဒတ် ဒြပ်ရတ်ညိည ဂွံပူဇဴလ္ဂူ ကျာ်တြဲမူလ ကြဳဇှ်ဇိုန်ကဵု ဖဵုဂှ်ကီုရ ဒေဝဒတ်သၟဟ် ဖဵုဂှ်မူလ နူအဝိက်ရ တေဇဗၠးအာ အနန္တပ္ညပ် နရက်ကပ္ပ ဗၠးနူနရက် မသက္ကုခြာ ဂွံဒှ်ဂတ စေကဗုဒ္ဓါ စေကဗုတ်ဟေၚ် ဂွံဒှ်သေၚ်ဟာ ယွံလေဝ်အာနန် ဇၟာပ်ဇန်လိုက်ဗာ ဂွံပထုဲလဝ်အဵု ကုသဵုဍံၚ်သွာ သရာံပါပ်မာ ဟွံညှာဒးပ ပ္ဍဲဘဲနရက် ဒးဂၠက်မံၚ်ရ ဝိပက်ဝဳဝဲ ကျာ်တြဲမူလ ကျာ်တြဲတွံပၠန် ကဵုအာနန္ဒ။
ပ္ဍဲမေခုဂှ် သၟိၚ်ဓရ်ကုသ ကုသအလန် ဒှ်သၟိၚ်တန်ဂျ ယာတ်ဗပိုက်ဂ္ညိ သိၚ်္ဃနိက မွဲစုံဗဂိန်သ္ကဲ ကဵုကျာ်တြဲရ ဆယာတ်မွဲပ္ညုုၚ် ကျာ်တြဲဒုၚ်ဂျ မွဲစုံကဵုပၠန် ထေရ်အာနန္ဒ သၟိၚ်အာလောန်ညိ ယာတ်ဝိသေသ အာနန်ဂြောပ်ဖျာ် ကျာ်တုဲပၠန်ရ လျးကျာ်တြဲဂျ လျးယာတ်ပၠထီု လုံဂြိုပ်သလံၚ် ဂဵုမံၚ်ဍီုဍီု ညံၚ်ညးဂြောပ်လဝ် လျးထဝ်အိုဿီု ကျာ်ဂေါဝ်လောန်လာန် ပ္တောအ်ဟွံမာန်ကီု ကျာ်ဂေါဝ်လောန်သတိုတ် ပိဝါအိုဿီု ဒှ်ကျာ်အာဒိ ဂေါဝ်လောန်စိစီု သၠောမ်ယာတ်ဂှ်ပၠန် ဂေါဝ်လောန်သန်ကီု ကာလစဴဟာန် နိဗ္ဗာန်ဍီုဍီု ကျာ်ဂေါဝ်က္ဍဝ်က္ဍီု ဝိပါကကီုရ ကျာ်ထၚ်ဍာ်ပၠန် ဟီုကဵုအာနန္ဒ အာနန်ကဵုဍာ် ကျာ်တြဲသုၚ်ရ ညံၚ်သ္ကိုဟ်ဍာ်ကၠာ ဂၞဴအာကြံကြ ချပ်ဗ္စာရဏာ ပိုၚ်ခြာတော်ဆ အနိစ္စရော သန္ထာန်ရောဂ ရုပ္ပက္ခခန္ဓ ဍေံလေပ်ဇြလီု။
၁၉။ ထ္ၜးသံဝေဂ သွက်ဂွံဗစာရဏာ
[ပလေဝ်ဒါန် | ပလေဝ်ဒါန် တမ်ကၞက်]ပူဂဵုလ္ၚဵု အောန်ကဵုကုသဵုကီု ပ္ဍဲဂဝ်ဂၞဴမိ ဒးစုတိလီု လ္ၚဵုဟွံသ္ၚောဲ ပိပန်တ္ၚဲကီု ဂွံဒှ်မၞိဟ်တုဲ စဴဒှ်ဂၠုဲယီု လ္ၚဵုဂြိုၚ်ဒှ် မဲဒှ်ပ္အီုပ္အီု သၟိၚ်ယီုကေတ်ဏာ စုတိအာကီု လ္ၚဵုဂေါဝ်ဂါ ဂမာဍီုဍီု စုတိသဏုဲ စဴဒှ်ဂၠုဲယီု လ္ၚဵုဒိၚ်ဏၚ် ယာဲဆာန်က္ဍၚ်က္ဍီု ယာဲဆာန်ဟွံဖဲ ဒးလုပ်တဲယီု လ္ၚဵုစောတ်စောတ် သပေါတ်ဂၠာဲဟီု သၟိၚ်ယီုတံၚ်ဏာ မ္ဒးခြာဒွီု သတ္တံသဘဴ တြုံဗြဴအိုဿီု ဒဒှ်ဂၠုဲယီု အိုဿီုသေၚ်ဟာ လ္ၚဵုဝုတ်ဗၠာဲ စရာဲဂေါဝ်ဂါ ယီုဟွံသဘာ် တံၚ်သတာ်ဏာ ဃောမဝေၚ်ဂြိုၚ် ဃောမကျိုၚ်လှာ ဃောမဆအ်လအ် ဂၠာဲသ္ကအ်ဇွာ မဒးလုပ်တဲ ဘဲမစ္စုမာ မိမဆာန်ရော ကောဒေံမွဲၜါ ဒးလုပ်တဲကီု ယီုတံၚ်ဂြဲဏာ ယာံတဴသ္ၚံသ္ၚံ ဗတံသဂါ လၞီဂၠိုၚ်သာ် သြိုဟ်ညံၚ်ပါ်အာ လ္ၚဵုဒှ်ဗၠာဲ ဃောဂၠာဲပြောဲဇွာ ဃောဂေါဝ်ပၠေဝ်ပၠေတ် ယီုတံၚ်ကေတ်ကေတ်ဏာ ပြောဲဇွာဂိုဟ်က္ဍၚ် မိမသၚ်ကာ ဒှ်လၞီဂၠိုက် ပ္ဍဲလိုက်ဝွံမာ ညးလ္ၚဵုသကဲ ဂွံကောန်မွဲၜါ ဃောမဆာန်လောန် ပ္ဍဲကောန်သမ္ဘာ အနိၚ်သီုဂၟံၚ် သၟိၚ်ယီုတံၚ်ဏာ သြ- အနိစ္စ ခန္ဓယုတ်မာ ဟွံဂၠိသေၚ်ဟာ လအာပါဠိ ဇကုဝွံပၠန် ဍေံဟွံတန်ဂၠိ ဒဒိုက်ရောၚ်ဂၠိုၚ် ဒဝိုၚ်ဖိဖိ ခန္ဓဝွံညိ ညံၚ်သ္ၚိလမ္ၚု သြ- အနိစ္စ ဘဝဇကု ဘဲသၟိၚ်မစ္စု နဲဝွံချပ်အာ ဒှ်ဗွဝ်ဇွ ခန္ဓယုတ်မာ ညိဟွံမွဲဂုဏ် ဒုဟ်တုန်ဂၠိုၚ်ရာ ကျာ်ဇဇၞးမာ ချပ်ပိုၚ်ခြာသတိုတ် ပ္ဍဲမချပ်ဒါန် ယဲရာန်သ္ကိုတ် ဣဒ္ဓိဒြဟတ် တောအ်ၜတ်တော်ဂိုဟ် အိန်ဗြီုဒေဝ မၞိဟ်ဒးကျအိုတ် ခါမထဍိၚ် ပၞာန်သၟိၚ်ဂစိုတ် ဒြဟတ်ဟောမ်ပၠိုတ် ဒဴအိုတ်သက်လက် သီုလျးတရဴ ဒုၚ်တဴဝိပက် ဝိပက်ပတုဲလဝ် ဍေံကြတ်သ္ဂဝ်ဗက် ၜိုန်ကျာ်သၟိၚ်ဓရ် ဍေံဂပဝ်ဆက် သတ္တံသ္အဳဂၠက် ပ္ဍဲဒွက်သံသာ ဝိပက်ဆတ္တဝ် ပ္တုဲလဝ်ဂၠိုၚ်ရာ ဇၟာပ်ဘဝသၟတ် ဍေံကြတ်သ္ဂဝ်ကၠာ ကုသဵုဂၠိုၚ်သ္အး နရက်ဗၠးအာ ဝိပက်ကွေံကြာန် ဒဴဗၠးမာန်ဟာ ဟိုတ်ဂှ်ပိုဲညး နဂၠးပညာ ချပ်ဗ္စာရဏာ လအာဂၠိၚ်သ္ၚောဲ ဝိဝဲဝိပက် ယာံဆက်တ္ၜန်တ္ၜောဲ လအိတ်စ္ဍး ဟွံဗၠးလောဲလောဲ ဒဵုကျာ်ဂမျိုၚ် တလက္ဍိုၚ်ဗၠဲ စိုပ်နိဗ္ဗာန်သ္အး ဂှ်ရောၚ်ဗၠးဝဲ တီတုဲမၞးတံ တၟံညးအဲ ကဵုဝေၚ်ဒဴသ္ၚောဲ ဝဳဝဲသေၚ်ဟာ . . . ။
နူဂှ်မူလ ကျာ်တြဲက္တဵုအာ ၜါဣသုန်ဝါ ဇူအာလျလျ သိုက်က်ဂါမ်အာ ဒိုက်သန်ကာယ ပယာံသန်ၛာဲ သဝ်တ္ၚဲကာလ ခုတ်သဏာရာမ် ပဏာံဒေသ မှာသမ္ဗုဒ္ဓ စိုပ်အာရတုန် တြုံမှာအသဝ် ကျာ်ဗွဝ်ဂုဏ် ယဲဂၞဴမဵုရုန် ဖဍုန်ဒုက္ခ ဒဒိုက်ဗုဒ္ဓ သာကျလၟာ် ညံၚ်ညးသ္ကိုဟ်ဍာ် ဂၞဴကျာ်မအာ ဟီုကဵုအာနန် လးပတန်သၞာ လ္တူဇံၚ်ထဝ် ဒေန်သၟိၚ်မူလာ ပ္ဍဲဥဒျာန်ဟေၚ် အံၚ်ရေၚ်ရုက္ခာ သၟဟ်န်ညဳသာ သၞာသိပ်ခိုဟ် အာနန်လးအဵု သီုကဵုဗြိုဟ်ဟ် ဗွဲဒိုဟ်သၟဝ်ကျာ သတၚ်ဏာခိုဟ် ဇကုဟွံဇၟိပ် ကၞိပ်ကျာ်ဖျိုဟ် ပလက်သီုသီု ယဝီုသကိုဟ် အာနန်ဗှ်ရိုဟ် ဖျုန်ဂြိုဟ်သောန်န် ကျာ်တြဲသတၚ်တုဲ ဒ္ၚဳသုဲဂကန် . . . ။
ယွံခမဳတံ စိုတ်ကဵုဇၟအ်ကၟန် သိက္ခာပိုတ်အဲ ညံၚ်ဗၠဲဇမန် ပဟိုတ်မှာဲဇြိုန် မၚ်မွဲဗိုန်က္ညန် နွံကဵုလွဳသၟဟ် ဂွံဒှ်အရှန် ဍုၚ်နိဗ္ဗာန်အဴ
တုဲဂွံစဴတန် တဝှ်ကျာ်တြဲ ညံၚ်ဗၠဲဇမန် နူဂှ်ကျာ်ပၠန် အာဒိပ္တန်ကၠာ အဝိဇ္ဇာသၟတ် နှဴပစ္စယော ဣဝွံဓရ်ဂ္ညိ အဘိဓရ်မာ ပိဋကတ်ဟေၚ် ဒှ်ဒေါဝ်သေၚ်ဟာ ဓရ်ကၞတ်မာ ဗုဒ္ဓါဟီုဖျန် . . . ။
ယွံခမဳတံ စိုတ်ကဵုဇၟအ်ဇၟန် အပ္ပမာဒ ပဟိုတ်မာဲပၠန် ကမ္မဌာန်ဂှ် ဂွံဒှ်အရှန် ဘာဝနာသွိုန် သၟတ်လွဳဗိုန်ကညန် ဝွံကၞတ်တဲ ကျာ်တြဲဂကန် ဂတဂှ်ကီု ကျာ်ဟွံဟီုပၠန် ကျာ်ကလိသ္ကန် ဆိုက်ညန်ကဵုယး ကျာ်တြဲစဴဟာန် နိဗ္ဗာန်တုဲသ္အး အာနန်မၠာ်ရံၚ် သြိုဟ်ညံၚ်ဒကး တသိုက်တဟး ဇၟာပ်ညးဂၠိုၚ်သာ် . . . ။
၂၀။ ထ္ၜးအာနန်ရိုဟ်ရေၚ်ဂုဏ်ကျာ်
[ပလေဝ်ဒါန် | ပလေဝ်ဒါန် တမ်ကၞက်]တိပိုန်အာနန် ဗှ်ဂကန်ကျာ် ရမတ်စှ်ေဇွောဝ် ညံၚ်ဇမောဝ်ဍာ် ဂမ်တဴဇန်ပ္ညဳ ခမဳကောန်ကျာ် ရမတ်ဗြိုဟ်ဟ် ဖျုန်ဂြိုဟ်ညံၚ်ပါ် သ္ဇိုၚ်သန်သွံကျာ် တၚ်ဒွာ်ဇၟာပ်စွံ ပၞာၚ်တိုၚ်လိုက်ဗာ ပၠိုတ်အာရသွံ လျးတ္ၚဲပညာ ခၠၚ်အာဇၟာပ်စွံ တ္ၚဲဝွံဗဒန် ပၠိုတ်အာပၠန်သွံ ဟး ပၞာၚ်တိုၚ်ထဝ် လျးဂပဝ်ကၠောံ လျးဓရ်ပညာ ခၠၚ်အာဇၟာပ်စွံ တ္ၚဲဝွံစာ်ခြာ ပၠိုတ်အာရသွံ ဟး ကျာ်ဂမျိုၚ် ပၞာၚ်တိုၚ်သ္ဇက်ပ္တောံ တ္ကံပန်လောန်ကၠောံ ညးသ္ဇက်ပ္တောံပ္ကာန် အဲဍိက်နန္ဒ ဒှ်ဒေံဇြဟာန် ကာလမံၚ်ခိုဟ် ဂွံဟီုရိုဟ်ဌာန် ဂွံဂၠာဲသှ်ၜး တၚ်ဒွးဂလာန် ဒၞာဲဟွံတီသွံ ဒေံဂွံဂၠာဲသၟာန် လၟုဟ်ဝွံအဴ ကောစဴနိဗ္ဗာန် ပဒေံဂွံသၟာန် ကောဇြဟာန်ရော . . . ။
၂၁။ ထ္ၜးကွးကျာ်ကၠာကဵု-ကွးကျာ်လက်ကြဴ
[ပလေဝ်ဒါန် | ပလေဝ်ဒါန် တမ်ကၞက်]ဒဒှ်ခပ်သီ သၟိက်တီယောသော ကျာ်ဒှ်ကျာ်ရော အယောဇၟာပ်တောၚ် ကောဏ္ဍညမာ ဂွံဓရ်ကၠာရောၚ် အတိက်တေံသွံ ဂၞဴသြောဲၜတ်ဖောၚ် သံက်ကေတ်ဟွံဖိုတ် ထၞက်ဍိုက်လှောၚ် နှဴဍာ်တှ်ပြဲ သဂြာမွဲတောၚ် တုမ်စိန်ဟွံယောၚ် မွဲတောၚ်ကွေံကြာန် ကျာ်ဝိပဿိ နကြိကဵုဒါန် တုဲရာဒနာ ကောဏ္ဍညပၠန် ဒှ်အရှန်ကၠာ ဒေံသမ္ၚေဟ်သၟတ် ဒှ်သုဘဒ္ဒါ ကာလပၠောပ်ဟေၚ် ပ္ဍဲဂြာၚ်သေၚ်ဟာ ကဵုဒါန်ကျာ်ဂ္ညိ ဝိပဿနာ ဟိုတ်ကဵုဒါန်မာ ကြဴဒှ်အာရောၚ် ဆဵုကျာ်တြဲပ္ကာန် စဴနိဗ္ဗာန်ဂၠောၚ် သုဘဒ်ဒှ်ပ္ညဳ ခမဳမွဲတောၚ် ဂွံဒှ်အရှန် တြဴညးပၠန်ရောၚ် . . . ။
၂၂။ ထ္ၜးလၟေၚ်ဂိတုပသာ်ပေၚ်
[ပလေဝ်ဒါန် | ပလေဝ်ဒါန် တမ်ကၞက်]ကျာ်ဒှ်မၞိဟ်သ္ကဲ သၟိက်တီမွဲတောၚ် ဗပေၚ်ပသာ် တ္ၚဲသိုက်တွာ်သောၚ် ဝိသာခါသွံ နက်သတ်ဟွံယောၚ် လက်သိၚ်သက်သၟိဟ် ကျာ်ဒှ်မၞိဟ်ရောၚ် ကျာ်ဒှ်မွဲတောၚ် လလောၚ်ပြာထာ ပသာ်ပေၚ်စုတ် တ္ၚဲဗုဒ္ဓဝါ ဒှ်ကျာ်ဆတ္တဝ် ဂြၚ်ဓရ်ပြာထာ စဴနိဗ္ဗာန်ဂှ် ပဒှ်သာ်လွာ ပသာ်ပေၚ်ကၠာ ဗုဒ္ဓဝါအဴ ဝိသာခါသၟတ် နက်သတ်ကြက်လှဴ ပထမတွိုန် အရှိုဏ်တိုန်အဴ ကျာ်စုတိသၟတ် ၜးအတ္တဘဴ ကျာ်နာဲက္ဍိုၚ်ပ္ကဴ နိဗ္ဗာန်စဴအာ . . . ။
၂၃။ ထ္ၜးအဓိကိုရ်က္တဵုဒှ်
[ပလေဝ်ဒါန် | ပလေဝ်ဒါန် တမ်ကၞက်]ချိုန်စုတိဂး ကျာ်ဇဇၞးမာ မိကိုရ်ဇၞော်ဟေၚ် က္တဵုဒှ်သေၚ်ဟာ တိဗြုသဓီု လလောၚ်ကြဵုဇာ ဂမြဴမံၚ်ကၠာ ရုကျာပိုတ်က္တဵု လဗိုတ်တမ္ညဝ် ဆုဒုန်ကဝ်ပြဵု ဂြိၚ်ဂြိၚ်ဂြံဂြံ အသံဂဂဵု လပိုက်တိဂၠု ဒိုဟ်ပန်ဗြုကြဵု လျးတ္ၚဲသုတ်သာၚ် သမန်ရာၚ်ဂဵု ဂြံၚ်ဂြံၚ်ဗလး ဂတးပန်ကြဵု ဒးဆုကဝ်လာ် ဒးဒုန်လာ်ပြဵု အလန်လေဲပၠ ကၠုၚ်ဘဂဂဵု လလဳဗတဲ ဂြိပ်သဲလဟဵု ဗရုဂဂဵု ဗြုကြဵုဂအီ မတ်ဗြဲကလောအ် အကးဒေါအ်သ္ၚီ ဒေဝတဴသွံ အိိန်ဗြီုဂွံတီ ပ္ဍဲစိုတ်ဂၠိုက်သ္ၚီ လၞီလၚ်ဇွောဝ် နနုဘဴရ ကျာ်တဳလဓရ် ဒေဝတဴကီု ကော်ဟီုကဵုသွဝ် နူသွဝ်ကော်ဟီု ဒဵုဗြီုတမ်ညဝ် သိန္နရာဇ်ဇၞော် လၜေါ်ညံၚ်ကဝ် တၟံဩန်တၟံထဝ် ညံၚ်ကဝ်ဒေါမ်လက် လပှ်ဒေါဝ်ဂၚ် ဒွံဩၚ်လဟတ် ဂြိၚ်ဂြိၚ်ဂြံၚ်ဂြံၚ် အသံဂမ်အိုတ် လွိၚ်သွိၚ်ဆက် သမန်လက်သတ် မိကဵုလောန်ဗၞတ် အိုတ်သတ်ဇၟာပ်ရာ တက်ဩိုဟ်ဂဟး ဂိုဟ်ဇမၞးမာ မၞိဟ်လလောၚ်သ္အဳ ယာံတဴဖဳဒွါ ဒေၚ်သၠၚ်လ္ၚာပ်လ္ၚာ ထသပါသၟတ် တက်ဩိုဟ်ယဵုတဲ ဗဂူတဴဗြဲမတ် ယောဂဳဝိုတ်ထိုၚ် ဒစုန်က္ဍိုၚ်ရတ် ဒေဝတဴတံ ယာံကြအ်ဥမတ် အိန်ယာံလၚ်ဇွောဝ် ဗြီုယာံဒဝ်မတ် ဒေါမ်သ္ၚဳဒၚ်သၠၚ် လၞီကၚ်ဇတ် ယဝါမ်ဟွံသ္ကုတ် ဂိုဟ်ဗုဒ္ဓရတ် လၞီလောန်ဗၞတ် ဗြိုဟ်ဗြိုဟ်မတ်ၜါ။
၂၄။ ထ္ၜးပူဇဴဇွကျာ်တြဲ
[ပလေဝ်ဒါန် | ပလေဝ်ဒါန် တမ်ကၞက်]အိုတ်ဘုမ္မိဂှ် ဒယှ်ကမြဴ မၞိဟ်ဒေဝတဴ ပူဇဴဩန်ထဝ် လ္ၚဵုစံၚ်သ္ဍဴ ဓုပ်သ္ဍဴမြမောဝ် လ္ၚဵုရာဂါမ် တိၚ်ကျာံစံၚ်ဂြဝ် လ္ၚဵုဂှ်လှ်ေ ဒယှ်ေကာဲကဝ် ဆာၚ်မံၚ်ကမြံၚ် လဒုဖမ်ထဝ် ဝေၚ်ဂြိုၚ်တမ္ညဝ် ပူဇဴထဝ်ဩန် က္ဍိုၚ်ထဝ်ဇၞောဝ်ထဝ် ဂၠိုၚ်ဗဝ်သ္အၚ်သန် လစိန်ဗိုတ်ပြဲ သီုဗၠဲဇမန် မၞိဟ်ထဝ်ဩန် ဂၠိုၚ်သန်သၠုဲသၠာ် ဗိုတ်မြတုန်ရော မတ်လောဟိတာ် ပူဇဴဂၠိုၚ်ဒွါ် သ္ၚာသာ်ဩန် တိပိုန်အာနန် သီသန်ဂြောပ်လဝ် လဟဵုဍာဲဂြၚ် လျးခၠၚ်ဂပဝ် ဗီုဇုက်လလဳ ဗစဳတၟံထဝ် ဂေါဝ်လောန်တၟေၚ်သာ် ရုပ်ကျာ်အသဝ်။
၂၅။ ထ္ၜးမှာထေရ်အာနန်ယာံရိုဟ်ရေၚ်
[ပလေဝ်ဒါန် | ပလေဝ်ဒါန် တမ်ကၞက်]ထေရ်အာနန္ဒ ဟောံဇြကာဲကဝ် ယာံဗန်ဇိုၚ်ရ ကျာ်တဳလဓရ် ကရောတ်သအဝ် ကာဲကဝ်လောန်သန် ဟး ကျာ်ဂမျိုၚ် ပၞာၚ်တိုၚ်တ္ကအ်ပန် ကောဒဴထောံကၠေံ အဲဒေံအာနန် ဒေံဟွံမွဲသၞိၚ် ယွံသၟိၚ်အရှန် ပကောရံၚ်ဗဵု ဒေံကၠၚ်ပြဵုလောန် အဵုကျာ်ဂမျိုၚ် တၠက္ဍိုၚ်ဩန် ကၠေံဇေတဝန် သန်ထာန်နိဂြော ကၠေံဌာန်ဂ္ညိ ဗောဓိရုက္ခော ဌာန်ရညရော ကလောဒေံအောန် ပသ္ဂောံဂ္ညိလဝ် ပြာသာတ်ထဝ်ဩန် ပသ္ဂောံဓုပ်သ္ဍဴ အဂၠဴစၠန် ပသ္ဂောံဂ္ညိဂၠဴ ဍောၚ်ပ္ကဴဇမန် ပသ္ဂောံကၠတ်ထဝ် ရေၚ်လဝ်ဒိုဟ်ပန် ပသ္ဂောံအှော်ပၠန် ကြက်စၠန်ၜါ ဥဒျာန်ဝွံပၠန် ဒေါဝ်ဂြိုပ်ရညာ ဌာန်ဝွံအောန်တဴ ပူဇဴသကာ ဌာန်ဝွံအောန်သၟတ် ညးတၠသဒ္ဓါ ကောဂၠုအိုတ်သ္ကန် ဒေါဝ်ရညဝါ ကောဂၠုသၟိက်ဗဵု ကၠၚ်ပြဵုဒေံဟာ။
အဵုသမ္ဗုဒ္ဓါ ကၞတ်ရာဇဝၚ် ဒဒှ်လၞီ ခပ်သီဒေၚ်သၠၚ် ဗှ်ကလောမွဲ ဟွံမွဲလၚ်လၚ် ညံၚ်ညးဗြံၜဳ သွးဟဳဒေါဝ်ဂၚ် ညံၚ်ညးဗြမ်က္ၜၚ် ဒေါဝ်ဂၚ်ဗဂပ် ညံၚ်ညးဗြမ်တၟပ် သ္ဒိုဟ်လဗပ်က္ဍၚ် ညံၚ်ညးဗြမ်က္ၜၚ် သၞေဟ်ဩၚ်ဟွံစိုပ် ဒေံတုပ်ပမာ ထေရ်နန်ကၠာကပ် ကျာ်အတုလံ ပကောမံၚ်ကၞပ် သီုလျးတရဴ ဂဵုတဴဖြပ်ပ် ဟွံချပ်ဂနန် ကောပၠန်သတိက်ကၞပ် ဒဒိုက်တသိုက် ဗြုလိုက်ဟွံချပ် ဒေံဒွံလၞီ ခပ်သီဂၠိုၚ်ထပ် ပကောသတိက်ကၞပ် ဟွံက္တဵုချပ်ရော။
အဵုသမ္ဗုဒ္ဓါ ကညက္တဵုရကော မၞိဟ်ဒုက္ခရော အာတ်စဟောဒြာ နူပၠိုတ်သတိက်ဟေၚ် ဒဵုယးသေၚ်ဟာ ဍေံဟွံချပ်ဂွိၚ် တ္ၚဲသၠိၚ်အာ ညးဒိုက်တံမာ တက်ပိခါဂှ် စိုပ်ဇမၞော်သၠိၚ် သတိက်သၠိၚ်လ္ၚုဟ် ခမဳကေတ်ခေန် သှ်ၛာဲပ္ဍေန်ပ္ဍဟ် သတိက်ပ္ဍဲတက်ၜါ သ္ဂါတ္ၚဲသၟဟ် သၟိၚ်တံဂမၠိုၚ် ကိစ္စဂၠိုၚ်ရာ သ္ဂါတ္ၚဲပၠန် တက်မွဲညောန်သၟဟ် ဨကရာဇ်ဂှ် လ္ၚုဟ်သတိက်တဴ ညးဂမၠိုၚ်သၟဟ် သာ်ဂှ်သတိက်တဴ ကျာ်ဂမျိုၚ်အဴ သၠိၚ်တဴသ္ၚဳ ဟွံၚုဟ်သွိၚ် ယွံ သၟိၚ်ခမဳ။
အဵုကျာ်ဂမျိုၚ် ပၞာၚ်တိုၚ်လောကဳ ကွးသၟိၚ်ခမဳ အရဳဂၠိုၚ်သန် သာရိပိုတ်မွဲ ပညာပြဲလောန် မောဂ္ဂလာန်ဂှ် ဣဒ္ဓိသၟဟ်န် ကောဏ္ဍညသၟဟ် ဂွံဒှ်အရှန် သဳဝလိပၠန် ပူဇဴတ္ၜန်တ္ၜောဲ မှာဥပ္ပလိ ပ္ကၚ်ရၚ်ဝိနဲ မှာကစ္စာဲပၠန် ရုပ်ဂေါဝ်လောန်တဲ ပ္ကၚ်ရၚ်ဒဝိုၚ် သဒ္ဓါဂၠိုၚ်နဲ ကဿပမွဲ ခုတၚ်ပြဲဂျ ခတ်ဒိပ်ဟီုခုတ် အနုရုဒ္ဓ ကွးအိုဿီုပၠန် ဒှ်အရှန်ရ အဲဍိက်ဒေံပၠန် ထေရ်အာနန္ဒ ဟွံသာဲခြာပ္ညဳ ဗက်ကြဴတဳလ ကၠောန်ၜတ်လွဳလွတ် ကၚ်ဇတ်ယဲဩ အရှန်မူလ ဟွံဂွံဒှ်ဏီ ကောကၠေံဒေံသွံ ဒေံဟွံဂွံတီ ဟး ကျာ်ဂမျိုၚ် ပၞာၚ်တိုၚ်ထဝ်လ္ၚီ ဟးဗုဒ္ဓရတ် ကၞတ်သမ္တီ ဒေဲဒှ်လၞီ ဒေါအ်သ္ၚီဟောံဇြ အဲအာနန်ပ္ညဳ ဗက်ကြဴတဳလ ဒဒိုၚ်ဂၠိုၚ်ခုတ် ဖဴသမ္ဗုဒ္ဓ ဒှ်ကွးအဟံ နူတၞံမူလ ဓရ်ပြဲအဂ္ဂ ဇိုန်ကဵုရကော ။
အဵုသမ္ဗုဒ္ဓ ပကၞပ်မံၚ်ရော အဲဒေံအာနန္ဒော လုတ်စိုတ်ကောဟာ မူဒေံအာနန် အောန်ဝါသနာ မူဒေံအောန်ဒါန် ကောဟွံဆာန်ကၠာ အဵု သမ္ဗုဒ္ဓါ တြုံမှာအရဳ အဵု ကောဂၠုအဲ မပြဲကျာ်ဩဳ အဵု ကောသော်က္ဍိုပ် တြုံသ္ကိုပ်လွဳ ဒဒှ်ကောအဴ နိဗ္ဗာန်ဒဴပ္ညဳ ဒေံဟွံမွဲသၞိၚ် သွံသၟိၚ်အရဳ အဵု ဗုဒ္ဓရတ် ကၞတ်ကျာ်ဩဳ စိုပ်ကၠုၚ်ဝွံပ္ညဳ မုဟ်ဍုၚ်ကြဳတဴ ဍုၚ်သွတ်တူရူ အောန်ကဵုပူဇဴ လၚုလၚောန် လောန်သန်သွံအဴ။
၂၆။ ထ္ၜးဍုၚ်ဇၞော်ဒှ်စှ်တရဴ
[ပလေဝ်ဒါန် | ပလေဝ်ဒါန် တမ်ကၞက်]ဍုၚ်စှ်တရဴ နွံတဴဒေသ သေဌဳဂၠိုၚ်သန် ဟွံတီနန္တ ဗာရာန္နသဳ ကောသမ္ဗဳဂျ ကပ္ပိလဝှ် ဍုၚ်တွံပါဝ တက္ကသဵုဂျ ကလိၚ်ကရး ရာဇာဂြိုဟ်ပ္ညဳ ဗဝသာလဳပျး သာရဝှ်ခုတ် ဇေတုတ္တရး မကုလဂး တုဲဒးမတ္ထဵု ပါတလိကၠာ စမ္ပါနာဂဵု ကလိၚ်ဇပူ ဂၠိုၚ်ဇနူဗဵု သၚ်္ကဿအဵု နာဂဵုဒှ်ကြဴ စှ်တရဴဗော် ဍုၚ်ဇၞော်ဂ္ညိဂၠဴ ဗတ်နာဲဗောဓိ သ္ကန်ကလိအဴ ဂၠိုၚ်ကဵုဗနဳ ခမဳတြုံဗြဴ ယိုက်ဇွလှဲလး ကျာ်လျးတရဴ ဂၠိုၚ်အိုတ်သ္ကန်အဴ တရဴမုဟ်ရး ဌာန်ဝွံအောန်လောန် ကဠောဗော်သွး ဌာန်ဝွံအောန်တဲ ပ္ဍဲကွ:ဇမၞး ကောကၠုၚ်သ္ကန် ပစ္စန္တရး အဵု-သမ္ဗုဒ္ဓ ကျာ်တလလျး ပ္ဍဲသန္ထာန်ညး ဒေံမွဲဒးကၠုၚ် ဒေံဂၠိုၚ်လ္ၚာပ်လ္ၚာ ယွံရာဇာဝၚ် . . .။
အဵု-သမ္ဗုဒ္ဓ ကျာ်အ္စာသၚ် တလသၟိၚ်သၟပ် ပဟွံချပ်ဂြၚ် ကဵုဒေံဇွောဝ်လၚ် ဗဵုနိသၚ်ရော . . .။
အဵုကျာ်ဂမျိုၚ် ပၞာၚ်တိုၚ်အဂ္ဂေါ ထောံဗော်သွးရော ကဠောမဆာန် ထောံပဏိဟ်တိ ဗောဓိဇြဲယာန် ထောံပၞၚ်ထဝ် စဴဒ္ၚောဝ်နိဗ္ဗာန် ရးညးဍုၚ်ကွာန် ပဥဒျာန်ပ္ကဴ လ္တူဇံၚ်မောဝ် ပဒေန်ထဝ်အဴ သတိက်ကၞပ်မံၚ်ရော က္တဵုရကောဂၞဴ ဌာန်ဝွံအောန်ပ္ညဳ ခမဳတြုံဗြဴ ကပ္ပိလဝှ် ဍုၚ်ဂဵုမြဟ်တဴ ဍုၚ်တေံမြဟ်ဂ္ညိ ဌာန်မိမဂၞဴ . . .။
အဵု-ကျာ်ဂမျိုၚ် ပၞာၚ်တိုၚ်လောက အဲအာနန္ဒ ဂြံၚ်ဂြလၚု ကဠောအောန်တဲ ဒေံမွဲဇကု ဒေံယာံမံၚ်ရော တံဇိုၚ်ကောဇု သိက်ဒေံပဒး ကောဂၠုဟးကောဂၠု ဒေံဂၠိုၚ်ပြဵုခေါဲ ဒေံမွဲဇကု ဒေံချပ်ဟွံမာန် ဒှ်ဌာန်လၚု က္တဵုရကောဂၠု ဒေံလ္ၚုသန် ညံၚ်ပိုဲစဴအာ ဘာဇေတဝန် ဌာန်တေံသၟိၚ်သၚ် ရာၚ်ဆာဲက္ဍၚ်သန် ဒေံမွဲဇကု မ္ဒးလ္ၚုလ္ၚောန် ပ္ဍဲဂြိုပ်ဥဒျာန် သန္ထာန်ကၠဗြန် တၞံဆုတပ်ဗျိၚ် မၚ်သၟိၚ်အရှန် . . . ။
ဟး ဂြိုပ်ဓဇန် ပ္ကဴတ္ၜန်တသဵု ကမောံဗ္ဒဟ်ဍောၚ် ဇဝ်တကောၚ်မ္ၚဵု အံၚ်ရေၚ်အနာၚ် ပၠးထာၚ်ရာၚ်ဂဵု အဲထေရ်အာနနန် မာတ်ကောသ္ကန်ပြဵု မၞးတံရာၚ်ဂဵု ပစရှ်ဟာ . . .။
ဟး ဓိထာန်မၠဵု ရာၚ်တသဵုဗဂါ မာတ်အဲလ္ၚပ်လ္ၚာ ကြာတၞံမၞးတံ မၞးတံထီုဗး မောဝ်ပ္ဍးသိပ်ဇၟအ် ရာၚ်ဆာဲဆအ်လအ် ဗဵုအဲကြအ်ဟာ . . .။
ဟး ဂမုၚ်ဆု ဇုက်ဂၞုစမ္ပါ ပံက်ထာၚ်ရာၚ်ဗဂါ မှောဝ်ဇာကၚ်ဇတ် လဝိၚ်ကၞာၚ်သာဲ အမြာဲလောန်ဗၞတ် မာတ်အဲယုတ်မတ် ပမွဲသွတ်ဟာ . . .။
ဟး တၞံအသုက် မၠဵုဇုက်စမ္ပါ ဍောၚ်ကဵုဍောၚ်ဗဂါ ရာၚ်အာရဳရဳ ပံက်ထာၚ်ရာၚ်တဴ ညံၚ်ရဴညးသ္အဳ မာတ်အဲဒေါမ်သ္ၚီ မၞးဂြိုၚ်အီဟာ . . .။
ဟး သရဖဳ မာလဳသဂါ မၞးတံကြဵုဇာ သဂါအရေဝ် မာတ်အဲဟောံဇြ စိုတ်ညိဟွံကေဝ် မၞးတံဂရာၚ်ကျေဝ် ပံက်အရေဝ်ဟာ . . . ။
ဟး ဗၠိုၚ်ကသံက် ဇိုၚ်ဍံက်စမ္ပါ မာတ်အဲပူဆာ ယာံအာသ္ၚအ်သ္ၚအ် မၞးတံသၟိက်တီ လနီဍိုန်ကြီု စကာအသံ ကၠုၚ်ဍံက်စံဟာ . . .။
ဟး ၜုန်နရိက် သဘိက်ရေၚ်ဗဂါ မၞးတံညးၜါ ရပ်ဏာၜုန်ဇၞိက် မာတ်အဲယာံကီု ယဝီုသမ္ဘိက် ရပ်နၚ်ၜုန်ဇၞိက် ကၠုၚ်ဟီုဘိက်ဟာ . . .။
ဟး ဂနေၚ်ထဝ် ဍံက်ဆာၚ်မှောဝ်ဇဴ မာတ်သမ္ဗုဒ္ဓါ စုတိအာဗျာၚ် သၟိက်ကဵုသ္ဂီုရောၚ် လလောၚ်လစာၚ် တက်ထဍေဝ်ဗျာၚ် ဍံက်ဆာၚ်အဲဟာ . . .။
ဟး ဍောၚ်သဇၚ်ထောဲ သပေါဲရာၚ်ဗဂါ မၞးတံမှောဝ်ဇာ ဍောၚ်ၜါသောဲသောဲ သဘၚ်ကျာ်ပၠန် မၞိဟ်ဂၠိုၚ်တ္ၜန်တ္ၜောဲ ညးဍုၚ်သဇၚ်ထောဲ ကၠုၚ်ဗဵုပေါဲဟာ ဒလာၚ်ထဝ်ဩန် ဂန္ဓမာလာ ပြာၚ်ဍောၚ်ရေၚ်ဗဂါ ရာၚ်ဂေါဝ်ဂါတဴ မာတ်ကျာ်တြဲသၟတ် နိဗ္ဗာန်စၟတ်စဴ ထဝ်ဩန်ဍောၚ်ပ္ကဴ နၚ်ပူဇဴဟာ . . .။
အာနန္ဒမွဲ တူယဲလ္ၚာပ်လ္ၚာ ရိုဟ်ရေၚ်ယာံအာ ပူဆာနရာတ် ညာတ်တၞံဆုဗျိၚ် ဒမြိၚ်မံၚ်ကၞာတ် ရိုဟ်ရေၚ်ကဵုဆု ယၟုသေသာတ် ဒၞာဲညာတ်အိုဿီု ဂၠာဲဟီုနရာတ် တၞံဆုခပ်ပြာတ် သေသာတ်ဂၠိုၚ်ဩ ညာတ်ရီုဂဒီု ကော်ဟီုထောထော ပိုဲရီုဂဒီု မၞးမံၚ်သီုဆော အဲခြာကလော ကဵုကောမွဲဒွီု ယာံတဴပူဆာ မတ်ၜါသီုသီု ပဟွံချပ်ရီု ဗိုၚ်ဂဒီုရော ကၞုဲယာံဆုပြိုမ် ဂတဴဂြိုမ်မြော မၞးတံနွံရော သၠအယောသတီု အဲဟိုတ်ကောဂၞဴ ယာံတဴသီုသီု မၞးတံဗဵုဂြိုမ် ဟွံယာံဂြိုမ်ရော . . .။
ကဠတ်လကီု ဂဗိုၚ်စီုမြော ကျာ်အိုတ်သ္ကန်ရော ကဠောခြာဒွီု အောန်ဇွောံမသတိုတ် ညာတ်တဴအိုဿီု မွဲကလတ်ကီု ဟွံဗိုၚ်ပြီုရော ဗၠိုၚ်ကဵုက္ၜန် ဆုပၠန်မဂ္ဂေါ ဒေံကျာ်ဟီုရော ကောဟွံဂွိၚ်ဟာ ဒေံမွဲကၠၚ်ဟဳ ယာံတဴဖဳဒွါ အဵုဇၞးမာ ဟွံပၠန်ဟာကော . . .။
ဗပုၚ်ဗပေၚ် တၞံကြေၚ်မြော ဝေၚ်သဘၚ်ကော မၞိဟ်ဟောကၠုၚ်ရ ပုၚ်ကွာၚ်ခပ်သီ ဟွံတီနန္တ စဴပေၚ်ပုၚ်သွ ဂၠိုၚ်သန်ရကော တၞံပ္ကဴလှက်ပၠုဲ တၞံလၚ်ထုဲမြော ဝေၚ်သဘၚ်ကော မၞိဟ်လမောက္ၜန် ဒေါဝ်ဒမြိုမ်ဆု ကောဇုသတိက်တန် လက်ပၠုဲလက်ဗန် လၚ်သ္ကာသန်ကော တၞံသန်ဇြဲထဝ် ကၞာၚ်လမောဝ်မြော ကြာတၞံရုက္ခော ကောကၠုၚ်အိုတ်သ္ကန် ညးကၠုၚ်ယိုက်သွိၚ် ဇွသၟိၚ်အရှန် တဠာထဝ်ဩန် ဂၠိုၚ်သန်ရကော . . .။
ကြုက်ထဝ်ကြုက်သၠာ အမ္ဗာရုက္ခော ဒမြိုမ်ဆုရော ကောကၠုၚ်အိုတ်သ္ကန် သဘၚ်ဂြိၚ်ဂြိၚ် ဇွသၟိၚ်အရှန် ဇၞောဝ်ထဝ်ဇၞောဝ်ဩန် ဂၠိုၚ်လောန်ရကော ဆုပၞာၚ်မံၚ်ဂျ ထဏထဝ်မြော ကြာတၞံရုက္ခော ကောကၠုၚ်စဴသွဝ် ဂမြိၚ်ဂမြံၚ် ဗာတ်ဖမ်တမ္ညဝ် ပၞာၚ်ပ္ကဴထဝ် ပေၚ်ဗဝ်ရကော . . .။
ဗနိပ်ဂိမှောန် ဒဒန်ရုက္ခော မှာအက္ကုရော ဗုဒ္ဓေါထဝ်ဗျိၚ် ဗဟူဂန္ဓာ ဘိမ္မရာကွိၚ် သဘၚ်ဂြိၚ်ဂြိၚ် ဟွံမိၚ်ဟာကော . . .။
ထေအာနန္ဒ ၚုၚ်ၚစိတ္တော မှာသကုဏော ပက္ခောထဝ်ဗျိၚ် ဂစေံတမ္ညဝ် ဗြုဂအဝ်ကွိၚ် ပူဇဴသွိၚ် ကျာ်သၟိၚ်လိုက်ဗာ မၞးတံညးၜါ ရပ်ဏာၜုန်ဇၞိက် ဂစေံကွဴပၠန် စိုပ်ဃောသန်ၛာ ကောပိုဲပအာ စဴကၠာအဲဟီု အာနန်မိၚ်ရော ကွဴကော်ကောဟီု ကောမၞးအိုဿီု စုတိကီုဟာ ဂစေံလိုက်ထောဝ် ဗြုကြီုမှောဝ်ဇာ အာနန်မိၚ်ကၠာ ဖဳဒွါကော်ဟီု အဲမွဲတူယဲ ကောမွဲခြာဒွီု မာတ်အဲစိုတ်လီု မၞးဗြုကြီုဟာ . . .။
ဟး ကြဝိတ်ကြီု ဗဂီုပူပါ ရိုဟ်တ္ၚဲဟွံခြာ သန်ၛာသဝ်တ္ၚဲ တ္ၚဲဝွံမၞးတံ ဟွံပြီုကအ်မွဲ မၞးတံတူယဲ ညံၚ်အဲကီုဟာ . . .။
၂၇။ ထ္ၜးမှာဇန်ဂမၠိုၚ်ယာံရိုဟ်ရေၚ်
[ပလေဝ်ဒါန် | ပလေဝ်ဒါန် တမ်ကၞက်]မှာဇန်ဂမၠိုၚ် မိၚ်ပရိုၚ်အဴ ကျာ်နာဲက္ဍိုၚ်ပ္ကဴ လောန်စဴနိဗ္ဗာန် မိၚ်ပရိုၚ်ပ္ညုၚ် အိုတ်ဇၟာပ်ဍုၚ်ကွာန် တက်သြိုဟ်တဟး အိုတ်ညးဇၟာပ်ဌာန် ပၚ်ယဵုတဲၜါ ထသ္ပာကြာန် ကျာ်တဳလညာဏ် နွံဌာန်ဒဒိုက် ဒးစုတိပ္ညုၚ် ထောံကၠေံဍုၚ်လိုက် ဟး ဆုစၠန် ပြဲသန်ညးသ္ဍိုက် ပၟတ်ဂြိုပ်ရ ဟွံပဇမိုက် စံၚ်ပြောံပလိုက် တူဂၠိုက်လၟော ဆုသၟာဲသၟ သီုဇွဂၞိၚ် သီုသမူပၟတ် သၚဳမတ်နွံရော အံသဝ်တၟံသိန် ဒၟံၚ်အိန်ဒေါ ကျာလေၚ်ကဝ်ရော အိုတ်ပၠောကဝ်ဗ္ဒောမ် ဆုဒုန်တနမ် တကမ်အပြောမ် မူကျာအပြောမ် စုမ်မုက်နွံရော . . .။
ဟး ကျာ်ဂမျိုၚ် ပၞာၚ်တိုၚ်အဂ္ဂေါ သၟိၚ်ဂစိုတ်ရော ပဆောကေတ်ဏာ လုပ်သကေံသၟတ် တဲမစ္စုမှာ ပိုဲသတ်ဂမၠိုၚ် ပ္ဍဲခြိုၚ်သံသာ ဒြဟတ်ညာဏ်အောန် သဓီုပညာ သၟိၚ်ဂစိုတ်ပ္ညဳ သ္ၚဳမုက်နွံဟာ ဂးတုဲဇန်တံ ယာံကြအ်ပူဆာ . . .။
၂၈။ ထ္ၜးအိန်ဒေဝတဴဂမၠိုၚ်ယာံရိုဟ်ရေၚ်
[ပလေဝ်ဒါန် | ပလေဝ်ဒါန် တမ်ကၞက်]ဒေဝတဴကၠာ အာကာသဇဵု သွဝ်တရဴကီု ဍုၚ်ဗြီုတွဵု မွဲလက်ကိုတ်ကၠာ စက္ကဝါအဵု ဒေဝတဴတံ ယာံကြအ်သဓဵု တက်သြိုဟ်သာံသာံ လလေၚ်ယာံကြဵု တိဗြုသဓဵု ကဵုသာဓုကာ သတ်ဇိုၚ်ပန်ကီု သီုသတ်ဇိုၚ်ၜါ တၞံဆုဍိုပ်ဍဴ ဍောၚ်ပ္ကဴနာနာ သတ်ဆုဗျိၚ်ဆက် ဍုဟ်ဂၠက်သ္အဳဗ္ဂါ ပူဇဴကျာ်ဟေၚ် အိုဿီုသေၚ်ဟာ စုတိစိုတ်ဂှ် ပၠိုတ်အိုတ်သၟဟ်ကာန် ဒှ်ကျာ်စဴဟာန် ဍုၚ်နိဗ္ဗာန်ရ ဇန်စုတိအိုတ် အဗျာကြိုတ်ဂျ စိုတ်ဂှ်မေခု ဇန်စုတိရ ကျာ်နာဲဘုံပိ ယာံစုတိလျ စက္ကဝါလှ အနန္တမှာ ကၠုၚ်ကောံသ္အဳဂၠက် ပေၚ်စက္ကဝါ စက္ကဝါဏံ သီုတကံပန် က္ဍန်ဂြက်ပေၚ်ဗဂါ ကၠုၚ်အာဟွံဂွံ ရပ်နၚ်ပ္ကဴဂေါဝ် မြမောဝ်သ္ဇက်ထောံ ဒေဝတဴစုံ ဒၟံၚ်အုံကလောအ် ဒၞာဲဒေဝတဴပ္ညုၚ် ကၠုၚ်ကြဴညးသွံ စတ်လုပ်ဟွံဂွံ သ္အဳထွောမ်ဗဂါ ဆပ္ကဴဒိပ်ဟေၚ် ဗိုတ်ပၠောပ်သေၚ်ဟာ ဇကုဒၟံၚ်ဂၠက် ဇိုၚ်စက္ကဝါ မုက်ကဵုမုက်ၜါ ပေၚ်က္ဍတ်ဗဂါဂျ ပၞးကဵုပၞးဒွံ ရေၚ်သ္ကံသတပ်သတေၚ် ၜိုန်ကျာ်တြဲညး တၠလျးတၟေၚ် ရာဂဒေါသ မောဟစ္ဍးဝေၚ် ဟွံဂွံဗၠးဟေၚ် ဂစိုတ်သေၚ်ဟာ သတ္တံဂၠက်ဒၟံၚ် ပ္ဍဲခြိုၚ်သံသာ နူဂစိုတ်ဏံ သ္ဂောံဗၠးနွံဟာ ဂးတုဲဂြီုဂြီု အိန်ဗြီုဒေဝါ ယာံတဴဖဳဒွါ ကဵုနာဲမှာဇန် . . .။
၂၉။ ထ္ၜးပြုပြေၚ်ဇွကျာ်တြဲ
[ပလေဝ်ဒါန် | ပလေဝ်ဒါန် တမ်ကၞက်]သၟိၚ်မူလာတံ စဳရေၚ်ဇၟအ်ကၟန် တောဝ်ချဵုမွဲထပ် ယာတ်မွဲထပ်ဗဂန် တုဲဒက်ပူလဝ် ကဵုဇုက်ထဝ်ပၠန် ယာတ်ဂြောပ်ဂှ်သတိုတ် ၚုဟ်မွဲကိုတ်တန် မသုန်ကၠံထပ် ယာတ်ထပ်ဂြောပ်ပၠန် ကဵုဇုက်ဂၠးထဝ် ပူလဝ်ဗိုန်က္ညန် မသုန်ကၠံပၠန် ထပ်ဗဂန်ဇုက်ထဝ် တၠထဝ်စွံ ပၠောပ်ဇွစွံလဝ် ထပှ်တ္ၚဲသၟတ် ဒှ်တဴဆတ္တဝ် ဒိုဟ်သၟဝ်ကျာသၟတ် ကေတ်ဏာချပ်လဝ် ဂ္ညိဂ္ညာတ်ကျိုၚ်ကျဝ် ကဵုပါၚ်အဝ်ဇ ညးဒိုက်ကောန်သၟိၚ် ပၚ်ဒလိၚ်ရ ညံၚ်ဗီုတိပ္ညဳ သုန္ဓရဳဂျ ကသဳဟွံမာန် နူဌာန်မူလ မၞိဟ်ကၠံလ္ၚီကိုတ် ဍောၚ်ၜိုတ်ယဲသြ ပ္ဍဲဂှ်သၟာန်ခုတ် ထေအနုရုဒ္ဓ ထေဟီုတိုန်ရ ကာလဂှ်ရောၚ် . . .။
ယွံသၟိၚ်ဂမၠိုၚ် မပိုၚ်နန်ဂၠောၚ် နအနုဘဴ ဒေဝတဴ နူဗၟံက်ဍုၚ်ဟာန် ပ္ဍဲဥဒျာန်ရောၚ် သၟိၚ်မူလသ္ကဲ ဒက်သော်မွဲတောၚ် ဥဒျာန်ဂှ်အဴ ရာၚ်ဆာဲတဴရောၚ် ဇွကျာ်မွဲတောၚ် ဟွံယောၚ်ဌာန သၟိက်ကဵုစံၚ်သၟဟ် ဥဒျာန်ဂှ်ရ ဒေဝတဴအိုတ် ဖျေံစိုတ်သဗ္ဗ ဟိုတ်ဂှ်တုဲခုတ် ဇွသမ္ဗုဒ္ဓ ယိုက်ဟွံမာန်သၟဟ် ဟိုတ်ဂှ်ရ သၟိၚ်တံမိၚ်ဂျ နုရဒ္ဓဟီု တီတုဲဟိုတ်ဖဵု ဇၟာပ်သၟိၚ်အိုဿီု ကဵုစဳရေၚ်ပ္ကာန် သဗာန်ဒြီုဒြီု . . .။
အပ္ဍဲဍုၚ်သ္အး မ္ၚးဍုၚ်ကီု သတးသၟဟ်ဓရီု ဗီုမုက်ဖံ သြိုဟ်သဗာန်ဂှ် ၜါစှော်မၚ်လံၚ် တိဗကေတ်ဖျေံ လေတ်စုတ်စေအ်နှေအ် မြမောဝ်ပေၚ်သူ လေပ်ထပ်နူတၞံ လ္တူလးပ္တံ တၞံဒကဝ်သ္ၚေအ် ဒကဝ်ဂလုံ လ္တူဘုံစေအ် ဂလုံလးလဝ် လတူဒကဝ်သ္ၚေအ် ယာတ်ဗဝ်ပေက်စေအ် ယာတ်လးလမေအ် ပေၚ်စေအ်သက်လက် ယာတ်လးဂှ်ပြဲ ၚုဟ်ထဝ်မွဲလက် လတူယာတ်သိပ် ပ္ကဴဒေပ်ပေၚ်ဂၠက် ဗၞတ်သြိုဟ်ဆာဲ မောဝ်တမှာဲဆက် ရာဲဓမာတ်က္ဍဝ် ရေၚ်လဝ်သက်လက် ပ္ကဴဇမန်ၜက် ပေၚ်ဂၠက်သွဝ် ဗြာတ်က္ၜဴဗြဴတာ ကွက်ရေၚ်ဗဂါလဝ် ကာဲကရာံပၠန် အလာံသြန်ထဝ် က္ဍိုၚ်ဇၞောဝ်ဂ္ညိဂၠဴ ဓုပ်သ္ဍဴမြမောဝ် ပ္ကဴဒေပ်တၟေၚ် ဂၠိုၚ်သာ်ရေၚ်လဝ် ဖံစိန်ဖံဟဝ် ဖံထဝ်လဒု ဖံအလဵုဗဵု ကြီုကြဵုထဥ အိုတ်ဇန်လိုက်ဗာ ကဵုပါၚ်သာဓု ဖံဒေဝတဴ ကဵုလဴလဒု လလောၚ်ထဥ လဒုကြဵုဇာ အနန္တဂၠက် ပေၚ်စက္ကဝါ ဒေဝတဴသ္ၚောံ ကၠုၚ်ကောံတုဲမာ တွိၚ်တွိုက်သဓဵု လလောၚ်ကြဵုဇာ ညံၚ်အသံခုတ် မှာသမုဒြာ သဘၚ်ဇၞော်ကၠာ ဇွမှာအရဳ ယိုက်ဒလိၚ်ဏာ ကွာ်အာဒ္ၚဳဒ္ၚဳ အာစိုပ်သ္ၚိကၠာ မလ္လိကာပ္ညဳ အိန်ရဳပြဲဖာ ဗန္ဓုလဂ္ညိ ကောန်ပိစှော်ၜါ နူစုတိအာ ပသာဓန ယာတ်မဒိပ်လဝ် လျးထဝ်ခနှ လျးဂဵုခၠၚ်ဂ္ညိ ညံၚ်သူရိယ တၟေၚ်ယာတ်ဂှ် ပဒှ်ဒေသ ရုပ်စိၚ်ကလာၚ် ဒြၚ်သာၚ်ခနှ ရုပ်က္ၜၚ်ရုပ်ဒြာဲ ရုပ်ဗတာဲကၠ ဂၠဴမၚ်သိတ်စိၚ် ကၠိက်ကလိၚ်ဂျ ပြေၚ်ဂၠဴသဳဟ ကၞုဲကၠမၚ်ဂဝ် ဒဝါပြိပ်ယန် ဗၜဵုလန်သ္ဂဝ် ဒကောတ်ဒကုဲ လစေၚ်ထုဲဗဝ် သၟိၚ်ဇာဒိသိုၚ် သီုဂွိုၚ်ဂိုဟ်ထဝ် သၟိၚ်နာ်သ္ပဝ် ကနှဝ်ယက္ခ လကိုဟ်ဓနှဴ ဗဳသြဴဒေဝ ကၞုဟ်လဒုဗိ ဍာပ်ဂွိစၚ်ဝၚ် ဇၚ်မှံၚ်ဂေါဝ်ကျေဝ် ၜိုပ်မေၜိုပ်ၜၚ် . . .။
ကြဝိတ်ဂေါဝ်က္ဍၚ် ကြေဲမြာ်လၚ်သ္ကာ ကၠၚ်ဟိုတ်ခဍိ ကွဴသာရိကာ ကြေဲလိုက်ထောဝ်ကၠီု ဗဂီုဂံက်ဂါ သဝ်ရိကာ် ခဍာ်ပူပါ ကၠဟ်သာ်အဒါ ဂံက်ဂါဗဂီု တြုံဂေါဝ်ဗြဴဂံက် တ္ၚေက်ပရံက်ကၠီု ကျာံထဝ်ကကြၚ် ရုပ်ဂေါဝ်က္ဍၚ်ပ္ဍီု ဍေဝ်ထဝ်ဒေါံပ္ဍီု ရုပ်ထဝ်ကြီုဂျ ရုပ်တၟေၚ်ဂၠိုၚ်သန် ဟွံတီနန္တ ၚုဟ်ထဝ်မွဲကိုတ် ယာတ်သတိုတ်ပြမှ ဒ္ၚဳစှ်ေဂြောပ်စုတ် ဇွသမ္ဗုဒ္ဓ လျးဂဵုသၠံၚ် သီုလျးအရံၚ်ဂျ . . .။
၃၀။ ထ္ၜးဂၞကျာ်မလ္လိကာ ယာံကဵုဇွကျာ်
[ပလေဝ်ဒါန် | ပလေဝ်ဒါန် တမ်ကၞက်]မလ္လိကာရ မိအဂ္ဂပြဲ တဲညံၚ်ပၞာၚ်ထဝ် ပၚ်ယဵုလတ်တဴ ရမျာၚ်လလောၚ် နနဲဍောၚ်ပ္ကဴ ယာံဇွကျာ်တြဲ တူယဲဂၠက်သ္ဍာံ အဵုကျာ်ဂမျိုၚ် တလက္ဍိုၚ်ပ္ကဴ ဗန္ဓုလအဴ ဗတ်နွံဖဴအဲ ဇွကျာ်ဂမျိုၚ် တၠက္ဍိုၚ်ဗၠဲ သဘၚ်လောန်တဲ သတီဟဲရောၚ်အဴ။
ဟးကျာ်ဂမျိုၚ် ပၞာၚ်တိုၚ်အဲဗြ ဗန္ဓုလအဴ မတ်မၞုံတဴသၟတ် ကောန်ပိစှော်ပိၜါ စောမ်ပါဒြဟတ် ပိစှော်ပိလ္ၚီ ဗဵုဟွံတီဗၞတ် ဂွံယိုက်ဏာခုတ် ဇွဗုဒ္ဓရတ် အဲဍိက်ဗြဴဂး ဟွံဒးယုတ်မတ် ဂၠောဲဖဍောဲသ္အဳ ကျာ်သြဳလောန်ဗၞတ် ဇွဗုဒ္ဓရတ် ပြာကတ်ရအဴ။
ယွံ-ကျာ်ဂမျိုၚ် ပၞာၚ်တိုၚ်ကောန်ဗြဴ ကျာ်နာဲက္ဍိုၚ်ပ္ကဴ လောန်စဴနိဗ္ဗာန် အဲဍိက်ဗြဴသတိုတ် ဒိုက်စိုတ်လောန်လာန် ဗှ်ဗန္ဓုုလ တြုံတိက္ခညာဏ် ဗှ်ကောန်လအိတ် ဗှ်မိဇြဟာန် ဗှ်နာဲဗောဓိ စဴဍုၚ်နိဗ္ဗာန် ဒၞာဲဗှ်ဇၟာပ်ဒိုဟ် ဖျုန်ဂြိုဟ်သၠာန် အဵုကျာ်ဂမျိုၚ် ပၞာၚ်တိုၚ်အဂ္ဂေါ မှာသမ္ဗုဒ္ဓေါ ထောံကလောဂၞဴ ကၠုၚ်စိုပ်ထမိက် ဍုၚ်ပိုဲဍိက်အဴ ကျာ်နာဲက္ဍိုၚ်ပ္ကဴ လောန်စဴနိဗ္ဗာန် အဲမလ္လိကာ ကောန်မှာဇြဟာန် ဒဒှ်အံက်ကိုပ် ကၠုၚ်စိုပ်ဥဒျာန် ဒဒှ်အံက်ပၠန် ယဲဂၠိုၚ်လောန်လာန် ဒဒှ်အံက်ဂၞဴ စဴဍုၚ်နိဗ္ဗာန်။
ကောန်ဗြဴခပ်သီ ဟွံတီကွေံကြာန် ပအောန်စိုတ်ညိ ရဗောဓိယာန် ဇွတဳလၛာန် ဇမၞးပၞာန်မာ စိုပ်ဒေါဝ်သ္ၚိအဲ ဇက်ဂြဲဟွံအာ ဒဒှ်ကျာ်တြဲ ညာတ်မုက်အဲမာ ထေရ်နုရုဒ္ဓ ဟီုစတုဲကၠာ ညးပတီအဲဟေၚ် ဂွံတီသေၚ်ဟာ ဒဒှ်အံက်ဂၞဴ နိဗ္ဗာန်စဴအာ မိၚ်ဗက်ဖျုန်ဂြိုဟ် က္ဍန်သြိုဟ်သပါ တိၚ်လောတ်စှ်ေကၠာ သ္ၚဳအာခပ်သီ ဒိုဟ်ကၠၚ်သဘဴ ကောန်ဗြဴဟွံတီ ဂုဏ်အံက်တ္ၚဲဏံ ကောန်ကြအ်လၞီ။
ဟးကျာ်ဂမျိုၚ် ပၞာၚ်တိုၚ်ထဝ်လ္ၚီ တ္ၚဲဏံခပ်သီ ကောန်ဗြဴရတီ ကောန်ဗြဴစိုပ်စုတ် ပၞာၚ်တိုၚ်ကောန်ဗြဴ နိဗ္ဗာန်လောန်စဴ အံက်ဂၞဴဓဇန် ဗၞတ်မွဲပါၚ်သွံ အံက်ဟွံဂကန် မူကောန်သြုတ်ဩာၚ် ရမျာၚ်လဝေါၚ်စန် မူလုတ်တၟေၚ်သာ် စးပါၚ်ကျာ်ဂန် မူပြဝအဴ ကောန်ဗြဴလုလောန် အဵုကျာ်ဂမျိုၚ် ပၞာၚ်တိုၚ်တကံပန် ကောန်ကော်သွိၚ် အဵုသၟိၚ်အရှန် က္တဵုဟီုပလန် မွဲပါၚ်ပၠန်ညိ။
ဟး ကျာ်ဂန်အဲ မပြဲဣဒ္ဓိ ဒှ်ကျာ်အာဒိ ဒမၠိပြာထာ ပဉ္စဝဝ်ဂျ မသုန်ပြကာ ဂွံဓရ်ပြဲသန် ဒှ်အရှန်ကၠာ ကောန်သေဌဳရ ယသကုမ္မာ ကောံယသကၠာ ဗော်သွာဂၠိုၚ်သန် ကောန်သေဌဳတုန် မသုန်စှော်ပန် သီုဖအိုတ်ဂှ် ဂွံဒှ်အရှန် ကောန်သၟိၚ်တုန်ရ အဂ္ဂိယပၠန် ပိစှော်သၟဟ်န် ဒှ်အရှန်ဂျ ဣသိတုန်လေ ဥရုဝေလ သီုကွးလ္ၚီဆက် အရှအဂ္ဂ နန္ဒမွဲပ္ညဳ ကောန်သဳမွဲရ သီုရာဟုလ ကောန်မကျာ်ဂန် ဗော်သွးတြုံဂှ် ဂွံဒှ်အရှန် ကၟိန်ကျာ်တြဲအဵု ဥပဵုလဝန် တံဇိုၚ်ကျာ်သမဟ် ဂွံဒှ်အရှန် ဗြဴဝိသာခါ ဒှ်သောတာပန် ညးတံတေံဂှ် ဂွံဓရ်သၟဟ်န် အံက်မေတ္တာအောန် ဓဇန်ကဵုအဲ အံက်ဟွံကဵုလဝ် လွဵုဓရ်မပြဲ ။ (ဂၞကျာ်မလ္လိကာဝွံ ဒှ်ပူဂဵုသောတာပန်ရောၚ်)
ဟးကျာ်သၟိၚ်ဓရ် ပၞာၚ်တိုၚ်ထဝ်အဲ ပရာဲအံက်ဆာန် ကောန်ဇြဟာန်မွဲ ကၠေဝ်မတ်လၞီ ကြအ်ဟွံတီဟဲ ကၠေဝ်မတ်ကြအ်သ္ဒိုဟ် ယာံမံၚ်ရိုဟ်တ္ၚဲ ကၠေဝ်မတ်စံၚ်တူ ဘိၚ်ဘၚ်တူယဲ အံက်ဇိုၚ်ကဵုအဲ ကောန်မွဲဒးကၠၚ် အဵုသမ္ဗုဒ္ဓါ တၞောဝ်ရာဇာဝၚ် က္တဵုဗဵုလၞီ ကောန်သၟိၚ်ဘိၚ်ဘၚ် ဒဒှ်ကောန်ဗြဴ ဒှ်တဴဇွောဝ်လၚ် ဒဒှ်ကြအ်ဖူ ကောန်စံၚ်တူက္ဍၚ် ဒဒှ်ကြအ်သ္ဒိုဟ် ကောန်ဝိုတ်ဒိုဟ်သၠၚ် ကျာ်ဂန်သတိက်ကၞပ် ပဟွံချပ်ဂြၚ် မအံက်သၟိၚ်သၚ် ဗဵုကောန်ကၠၚ်ရော ။
၃၁။ ထ္ၜးဂၞကျာ်မလ္လိကာ ရာဒနာမိက်
[ပလေဝ်ဒါန် | ပလေဝ်ဒါန် တမ်ကၞက်]ဗြဴမလ္လိကာ ဖဳဒွါစိတ္တော အဵုသမ္ဗုဒ္ဓေါ ယာံလဝ်ကၟဝ် ကလအ်ပူဇဴ ရတ်ပ္ကဴထဝ် တုဲမလ္လိကာ ပတ္ထနာလဝ် ဖဵုအဲဍိက်ဗြဴ ပူဇဴယာတ်ထဝ် ဒၞာဲအဲဍိက်ဗြဴသၟတ် က္တဵုဒှ်ဆတ္တဝ် အပေါတ်ကယျိုၚ် ၜိုန်ဟွံကျိုၚ်ကျဝ် ညံၚ်ကျိုၚ်ဆတ္တဝ် အမ်သဝ်ဇၞော်ကၠး ကဵုဂေါဝ်တဴသၟတ် ဒှ်ပ္ဍဲမတ်ညး သာ်ဝွံသေၚ်ဟာ ပတ္တနာသ္အး။
ဟီုဇီုဒးရး ဇွညးမပြဲ ဒးဒလိၚ်ဏာ သီုကဵုၛာဩဲ အမာတ်မွဲသွာ ယိုက်သာတလဲ တနာတ္ကံပၠန် ဂပ်ဝ်လောန်တဲ လျးဂဵုသမၠာ် အရံၚ်သာ်ဗၠဲ ကမၠံဇန်ဂျ ကွက်ဇန်သၠဇြဲ ဒးကျာလဗိုတ် ညံၚ်ဗဗြိုတ်ဗၠဲ ဇၞော်သန်ၛာဩဲ တူယဲတၟေၚ်သာ် မၞိက်ဗၠဲအဵု ဒှ်တွဵုသၟိၚ်နာ် လလဳကလိတ် ရတ်ဒစိတ်သာ် ဂန္ဓဝ်မပြေၚ် အှော်ရေၚ်လမာ် အှော်ကြက်စလန် ဂကူပန်သာ် က္ဍိုၚ်ထဝ်ဂ္ညိ မတ်လောဟိတာ် ဂဝ်ပ္ဍိုက်ကျာ် လၞာ်သက်လှက် လျးထဝ်အလုံ ပ္ဍာန်ဘုံစက် တၞာဲသာ်သန် နဳလာဇန်ကွက် ဂေါမုတ်သက်လက် အနက္ဃအဴ ပ္ကဴကၞတ်ကွိုန် ကရိုန်အပၠဴ လစတ်လစတ် ရတ်ကဵုရတ်နှဴ ညံၚ်လွဳမာန် ပၠေဝ်ယာန်ဒေဝတဴ ကဵုပါၚ်သာဓု ထဥကမြဴ ပလံၚ်ဏာပြဲ ဇွကျာ်တြဲအဴ။
ဆုဟွံသေၚ်သတ် ဒးသတ်ပူဇဴ ဆုဟွံသေၚ်ကဴ ဒးကဴပ္တိတ်ဇဝ် ကၞာၚ်သၠဂေါဝ် သ္ဇုၚ်တၞုၚ်ကၟဝ် ပပူဇဴဂျ ကျာ်တဳလဓရ် . . . ။
သၟိၚ်အိန်ခမြၚ် ကနုသၚ်ထဝ် မှာဗြီုဂမၠိုၚ် ပြာၚ်က္ဍိုၚ်ထဝ် ဒေဝတဴတ္ၜန် ဗကဩန်ထဝ် ကဵုပါၚ်သာဓု ထဥတမ္ညဝ် ဇွတဳလဓရ် ဗျိၚ်သဝဝ်အာ တိတ်တြၚ်ဟေဝ် ဗမံက်သေၚ်ဟာ စိုပ်ဥဒျာန်ပ္ညဳ မံၚ်တဴသအဳဗဂါ ပ္ကဴအံၚ်ရေၚ်ပ္ဍး ဗြော်လးဗဳသတာ အိန်ဗြိုန်ဒေဝါ မၞိဟ်ဗဂါသွဝ် လလောၚ်ထဥ လဒုတမ္ညဝ် ဆုကြက်စလန် ဂၠိုၚ်တ္ၜန်တ္ၜောဲဗဝ် ဒစိတ်သာ်မၠန် စၠန်သာ်ထဝ် မောဝ်တမှာဲပ္ဍး ညံၚ်ထီုပးလဝ် နူဟေမဝန် ဂြိုပ်ဒတန်ကဝ် ဒေဝတဴသၞၚ် ကေတ်နၚ်ဗဝ်သ္အဝ် အိန်ပဗဳသ္ကဝ် ဗဒှ်လဝ်တာန်ဆံၚ် ကြက်စလန်စိ ဗဒှ်သ္ၚိကၞံၚ် အှော်စလန်ဗဝ် ရပ်ထဝ်ဍာဲဒၟံၚ် ကၠၚ်ဒေဝတဴ မောဝ်ကမဴကၠံၚ် စုတ်လဝ်တၠာ ဇွမှာသမ္ဗုဒ္ဓံ ညံၚ်ၜိုပ်ၜၚ်ထဝ် သာၚ်ဂတဝ်ဒၟံၚ် ဂကူထဝ်အဴ ဒှ်တရဴဂၠံၚ် ထဝ်ဒေဝတဴ လျးဂဵုညံၚ်သၞံၚ် တူတလာဆံၚ် ဒကိုပ်ဒၟံၚ်ဂျ ဘုံမသိုန်ပၠန် ဂကူပန်ရ ဒေဝတဴခုတ် ကၠုၚ်သ္ကိုဟ်စုတ်ဂျ ဂကူပန်ဗျာံ ကုံကမာန်ရ စလန်ဂကူ ဒစိတ်မူလ နူဟေမဝန် ဒတန်ကပ္ပ ကေတ်နၚ်စုတ်ရ ဇွဇမၞးမာ မောဝ်ပ္ဍးတမာဲ အမြာဲဂန္ဓာ ပတိုန်သ္ၚိကၞံၚ် ဗိုၚ်စံၚ်ဖဳဒွါ ညိစံၚ်ဟွံတူ ဒှ်တဴပူဆာ . . . ။
ကုမ္ဘန်သပဝ် ခနှောဝ်နာဂါ မၞိဟ်ဂမၠိုၚ်ကီု အိန်ဗြီုဒေဝါ ကၠေံစိုတ်စံၚ်ခုတ် ဇွသမ္ဗုဒ္ဓါ စံၚ်ဟွံတူသ္အး ဇွဇမၞးမာ တုဲသၟာန်တိုန်ကၠာ ထေမှာရုဒ္ဓ နုရုဒ္ဓဗိုန် ဒ္ၚဳဟီုတိုန်ရ ယွံသၟိၚ်ဂမၠိုၚ် မပိုၚ်နန်မြ ကွးဇၞော်သၟတ် မှာကဿပ ဟွံစိုပ်ဏီရ ပမတ်ဒၟံၚ်ဂျ ဇွကျာ်ဟွံတူ ဟိုတ်ဂှ်မူလ ညးဂမၠိုၚ်ရ လဇဒၟံၚ်ကြဴ အ္စာတဳမွဲကောံ ဖဴဂှ်နွံတဴ အာဇဳဝက နာမခုတ်တဴ သ္ဂန်ဂၞိၚ်ဒတူ ဗီုနှဴသဘၚ် ဒဵုဩိုဟ်ထပ်ဗဝ် ပ္ကဴဒိပ်မောဝ်က္ဍၚ် ပူဇဴကျာ်ကီု အိန်ဗြီုကေတ်နၚ် ကိုန်ဒိပ်ဇၞော်က္ဍၚ် ဟွံဂြၚ်ဒၟံၚ်ဂျ ပဍာန်တုဲပ္ညုၚ် စဴဍုၚ်ပါဝ . . . ။
၃၂။ ထ္ၜးမှာထေရ်ကဿပ ဆဵုတဳအာဇဳဝက
[ပလေဝ်ဒါန် | ပလေဝ်ဒါန် တမ်ကၞက်]တ္ၚဲဂှ်သၟတ် မှာကဿပ နူဍုၚ်ပါဝ တဳလတွာ်ဂါံ သၟတ်ပ္ၚောအ်အာ ခုတ်သနာရာံ ဂကောံကွးတၞံ မသုန်ကၠံသ္ဍာံ ဇူဒၟံၚ်သံဃံ သၟဝ်တၞံရုက္ခံ ဇဳဝကပ္ညုၚ် ကွာ်ကၠုၚ်ဂဝါံ ပ္ကဴဒိပ်ပုပ်ဖာံ ဆတ္တာံပြာၚ်ဂျ ညာတ်ပ္ကဴဂှ်သတိုတ် ချပ်ပ္ဍဲစိုတ်ရ ပ္ကဴဒိပ်ဂှ်လေဝ် ပ္ကဴဝိသေသ ကာလကျာ်တြဲ ဒှ်မွဲကာလ ကာလစဴဟာန် ဍုၚ်နိဗ္ဗာန်ရ အိန်ဗြီုဒေဝတဴ ပူဇဴဗုဒ္ဓ ပ္ကဴဝိသေသ စိုပ်ဗုဒ္ဓရောၚ် . . . ။
ချပ်ပ္ဍဲစိုတ်သ္ကဲ သၟာန်တဳမွဲတောၚ် ယွံဇဳဝက ပုပ္ဖက္ဍိုၚ်ဂၠောၚ် ကျာ်တြဲပိုဲရောၚ် မွဲတောၚ်ယောသော ပရိုၚ်ကျာ်ဂ္ညိ သာ်ဒှ်ညိရော ယဵုတဲလၟော လ္ၚောဝ်တုဲ ရော ထောထောဟီုရ . . .။
ယွံမပြဲသၟတ် မှာကဿပ အ္စာမၞးရော မှာဂေါတမ စဴအာကွေံကြာန် နိဗ္ဗာန်တုဲရ ကၠုၚ်နူဂယးဇၟအ် စဴစိုပ်ဏအ်ရ ကျာ်ဂေါတမ ကာလနွံသွံ ညံၚ်စိုတ်ပိုဲရ သၟိက်ပဟွံဂွံ လၟုဟ်ဝွံတုဲ ညံၚ်စိုတ်ပိုဲသွံ သက်ကဵုသ္ဂောံ ပိုဲမဂွံပ ညးမဟီုသ္ကဲ ဟွံမွဲမွဲရ မိၚ်ဂလာန်သၟတ် ခမဳသုဘဒ္ဒ ညံၚ်မှိၚ်ဗၞုဟ်ခုတ် တ္ၚီုစုတ်ရ ဒှ်ပ္ဍဲစိုတ်သၟတ် မှာကဿ . . .။
၃၃။ ထ္ၜးမှာထေရ်ကဿပ လ္ၚောဝ်ဇိုၚ်ကျာ်တြဲ
[ပလေဝ်ဒါန် | ပလေဝ်ဒါန် တမ်ကၞက်]ဒလောံဗတောန် ကွးဒုၚ်ဝေါန်ရ မှာကဿပ သီုကွးက္ညအာ စိုပ်သ္ၚိကနံၚ် မၞိဟ်ကၠံၚ်ဟောဒြာ ကွာ်လုပ်သုဿာန် သန်ဌာန်တလာ ဂပဝ်သတုံခုတ် စိုပ်ဇိုၚ်ဗုဒ္ဓါ ဒတဴဒၟံၚ်ကၠာ သီုၛာသြဲယျ ပသဇိုၚ်ဟာန် အဘိညာဏ်ဂျ တုဲပတ္တနာ ရာဒနာရ ဂၠးဇိုၚ်ကျာ်တြဲ စက်ၜါပြဲဂျ ကဵုတိတ်ကၠုၚ်ညိ တန်ပ္ဍဲသိသ အဓိဌာန်ရ ကဿပပ္ညဳ ဂၠးဇိုၚ်ကျာ်ပ္ညုၚ် တိတ်ကၠုၚ်ဒ္ၚဳဒ္ၚဳ ကဿပအဵု ရပ်ယဵုလဝ်ပ္ညဳ ကၠံဒစာံအဵု ရုပ်ဗဵုဗစဳ ဗၞုတ်သ္ၚိကၠတ်ပၠန် ပ္ကဴနန်ဒသြဳ စက်ကြောန်ယာတ်ပြဲ ပုၚ်ဗမွဲပ္ညဳ စရာၚ်ပြာသာတ် လျးရစာတ်ချဳ တြိုန်ထဝ်သၟတ် သေတဆတ္တဳ သၞာ်မၞိက်ထဝ်ပ္ညဳ ၝောံကိုတ်ထဳတိ ရုပ်ဗဗေၚ်ပၠန် ဇမန်မနဳ ဥပဵုပိသၟတ် ဒကှ်ၜါဂ္ညိ နုၚ်ကၠာၚ်ထဝ်ခုတ် မှာသမုတ်ဒြဳ သိန္နရာဇာ စက္ကဝါပ္ညဳ ဂိတုတ္ၚဲမြိ နက်သတ်ဂ္ညိရောၚ် တ္ကံပန်အဆတ် တ္ကံသၟတ်သတေၚ် စက္ကဝဝ်ခၠၚ် ကဏုသၚ်ဟေၚ် ကြုၚ်ဇၞော်ဒယှ် ဂၚ်ထပှ်ရေၚ် ရုပ်ဂပဝ်ဟေၚ် ကျာံဇၞော်ရေၚ်ကြတ် သရေၚ်ထဝ်ဂျ မၞိက်ဗတသတ် တၟံကေလာသ သဳဟကၠသၟတ် စိၚ်ချေံၜါဓဝ် နာ်သပဝ်ကြတ် ဂြိုပ်ဨရာပိုန် ဂၠဴကၟက်ဍိုန်ၜတ် ကမၚ်ဂဝ်သၟတ် ကွတ်ရတ်မုက်ပန် အဆေဝ်သွဝ်အဵု ဂၠဴၝောံကဵုကောန် ခနှောဝ်တြုံဗြဴ ကြဝိတ်ကွဴလန် မြာ်ကြေဲဗျိၚ်ဆက် စက္ကဝဝ်ပၠန် စေတ်ကဝေတ်ဂျ ဇဳဝဇဳဝန် သွဝ်တရဴတန် ပြဲသန်ကျာ်သြဳ ဗြီုစှ်တရဴ လျးညံၚ်ရဴနှဳ . . .။
စက်ၜါဂေါဝ်မြီ ဇရာလ္ၚီပ္ညဳ ရုပ်ကၠံဒစာံ ပြဗာမ်ကျာ်သြဳ ဂၠးဇိုၚ်အရဳ ကျာ်သြဳပြမ ကဿပအဵဵု ရပ်ယဵုလဝ်ရ မသုန်ကၠံသၟတ် ကွးကဿပ မၞိဟ်ဂမၠိုၚ်အဴ ဗဵုတဴလျလျ ဂစေအ်ဂစောတ် တက်သြိုဟ်လောတ်ထ လျးဂဵုအာဒိ ညံၚ်သူရိယ မၞိဟ်ဒေဝတဴ တြုံဗြဴသဗ္ဗ ဂွံညာတ်အိုတ်ရ ဇိုၚ်တဳလဓရ် လ္ၚောဝ်တုဲအဴ ပတဴအမ်သဝ် ဟးကျာ်ဂမျိုၚ် ရုပ်ပၞာၚ်ထဝ် ဂၠးးဇိုၚ်အၚဝ် လျးထဝ်ဗြံၚ်ၚ် ပသ္ဂောံယဵုညိ တူဘုံသိသံ စက်ၜါဂေါဝ်မြီ ဇရာလ္ၚီဆံၚ် ကၠံဒစာံအဵု ရုပ်ဂဵုသလံၚ် ဂဵုတဴဗြံၚ်ၚ် လျးအရံၚ်ထဝ် ပဂွံယဵုသွိၚ် ညိရောသၟိၚ်ဓရ် . . .။
အိုတ်ဇန်ဇၟာပ်ဒၞာဲ နရာတ်ကာဲကဝ် ဂစေအ်ဂစောတ် ရေဝ်ရောတ်သ္အဝ် တက်သြိုဟ်ဒၚ်လှၚ် ယဵုတဲလေၚ်ဇွောဝ် ဂဒုံသြိုဟ် ဂြိုဟ်ညံၚ်တဝ် တက်တဲတာတ်တ် ရေဝ်ရာတ်သ္အဝ် ဂိုဟ်ကျာ်ဂမျိုၚ် ရုပ်ပၞာၚ်တိုၚ်ထဝ် ဂၠးဇိုၚ်ၜါအဵု လျးဂဵုသွဝ် မှာကဿပ ယဵုထ္ၜလဝ် ဗလးတုဲသၟတ် လုပ်အာဆတ္တဝ် ယာတ်ဂဝဳကၠာ သီုတလာထဝ် ဟွံကၠိုဟ်ထောၚ်ညိ ပက္ကတိက္ဍဝ် ထပှ်တ္ၚဲဓဝ် ဗဒှ်လဝ်သဘၚ် တူသ္ၚိကနံၚ် လျးသၠံၚ်ဂြၚ် စံၚ်ဇွဟွံတူ မၞိဟ်ပူဆာက္ဍၚ် ဒေဝတဴသၟိၚ် မၞိဟ်တံဘိၚ်ဘၚ် ဗိုၚ်ကလံသွိၚ် ဇွကျာ်သၟိၚ်သၚ် . . .။
၃၄။ ထ္ၜးမှာထေရ်ကဿပ ရာဒနာမိက်စံၚ်ဗဂဵုဓါတ်
[ပလေဝ်ဒါန် | ပလေဝ်ဒါန် တမ်ကၞက်]မှာကဿပ တလဓုတၚ် ပတ္တနာက္ဍၚ် ဓာတ်ဂဵုခၠၚ်တိုၚ် တေဇောကျာ်တြဲ လျးနဲအရှိုဏ် တေဇောကျာ်အဵု လစးဂဵုတိုန် အိုတ်ဇၟာပ်ဍောၚ်ပ္ကဴ ရာၚ်ပူဇဴတိုန် ပၟတ်ဂဵုတိုန် ညံၚ်ဍောၚ်ပ္ကဴ ထိုၚ်သာဲအဒါဲ ဂၠာဲဇာပ်ထပှ် နူဟေမဝန် ဂစေံတ္ၜန်စဴ ဒေါဝ်ပၟတ်ဓဝ် တက်သၞေၚ်အဝ်ဂြဴ သၞေၚ်ဟွံတူသွံ ညိဟွံကတဴ ပၟတ်ဓါတ်အဵု လျးဂဵုတဴ ဍာ်တူတိသွိုန် ပတိုဟ်တိုန်နး ဍာ်ဗရဲသတိုတ် ပၟတ်ပၠိုတ်သအး ယာတ်ဂဝဳအဴ နွံတဴသမ်တး ယာတ်မလ္လိကာ ဟွံတူအာယး . . .။
၃၅။ ထ္ၜးဓါတ်ကျာ်တြဲ
[ပလေဝ်ဒါန် | ပလေဝ်ဒါန် တမ်ကၞက်]ဓာတ်ဂၞေဟ်ပန်ဗျိၚ် ဓာတ်ဂြၚ်ကၞိၚ်ၜါ သီုဓာတ်ဗြံက်ဟေၚ် ထပှ်သေၚ်ဟာ ဓာတ်ထပှ်ကီု ဟွံဂွံလီုအာ ဓာတ်သၟေဟ်တံဂှ် ပဒှ်သာ်လွာ ဓာတ်ဇၞော်လောန်ပြဲ ၜဲမုဂ်မာသ ဓာတ်ဒေါဝ်မေခု ဒကုတ်သ္ၚုဂျ ဓာတ်သွတ်အိုဿီု မရာဲဟီုပၠ ဓာတ်သမ္ဗုဒ္ဓ ဗၞတ်ပမာဏ။
သာ်အရံၚ်ဂှ် ဟီုတွံဂတ ဓာတ်ဇၞော်ဟီုလဝ် ညံၚ်သာ်ထဝ်ရ ဓာတ်ဒေါဝ်မူလ အဇသာ်ဗၠဲ ဓာတ်မသွတ်ကီု သာ်မၠဵုဟီုသ္ကဲ ဝွံတၟေၚ်သာ် ဇကုကျာ်တြဲ။
သၟိၚ်မူလာအဴ စှ်တရဴတ္ၚဲ ဖာပ်သၚ်ကဵုဒါန် ပ္ဍဲသုသာန်ပြဲ သဗာန်ဓာတ်သ္ကဲ ညံၚ်နဲကၠာကီု ဂညိလလဴ က္ဍိုပ်ဍဴသ္ဂီု ယိုက်ဓာတ်တုဲအဴ ဝေၚ်တဴဂြီုဂြို စိုပ်နန်တုဲကၞာတ် ပ္တိုန်လဝ်ဓာတ်ကီု သာ်ဝွံချပ်လေဝ် ဒေဝတဴသတီု ယဵုကေတ်ဖျဴကၞာတ် သီုဓာတ်ဂြိုဂြီု ဒ္ၚဳစိုပ်ကၠုၚ်ရ ဒေဝနန်ကီု။
တူပြာသာတ်ထဝ် ပ္တန်လဝ်စဳစီု တရၚ်အိုဿီု စဳစီုဇၟံကၟန် ဂတဝ်တက်ဖျိန် ဓဗိုန်တန်န် ဝေၚ်ပေါဲသဘၚ် ဂၠိုၚ်ဂၠၚ်ထုဲတ္ၜန် ဝေၚ်ပေါဲအလုံ အိုဿီုဒိုဟ်ပန် တုဲပၞာန်စိၚ်ဟေၚ် မွဲထပ်ေရၚ်ဗဂန် ပၞာန်ချေံလၟေၚ် မွဲထပ်ရေၚ်ပၠန် တုဲဒးပၞာန်ကွဳ မွဲထပ်သ္အဳတ္ၜန် ပၞာန်တိုက်ပိထပ် သၠိုက်ခြပ်ဇၟအ် တရဴထပ်ပၠန် ပၞာန်တ္ၜန်တ္ၜောဲဂျ တရဴထပ်ဟာန် ပၞာန်မ္ၚးရ ရေၚ်လဝ်ကမံက် အမၠံက်ပြမ မ္ၚးအမၠံက်မဳ ဖံက်ကံတ္ၚ မ္ၚးဖဳဖံက် သေနာတ်ပြံက်ရ ဖေက်ညးတသိုၚ် ဓာတ်ဂၠိုၚ်မူလ မၚ်မွဲဗိုန်က္ဍၚ် ဝေၚ်သဘၚ်ရ ထပှ်တ္ၚဲပ္ညုၚ် ပၞာန်စိုပ်ကၠုၚ်ရ ဇာတသတြု လဒုကြံကြ သီုဒြဟတ်ဗဵု ဇက်ခဵုကၠုၚ်ရ သၟိၚ်ဝေသာလဳ ဇက်သ္အဳကၠုၚ်ရ ကပ္ပိလဝှ် သီုလွဟ်ကြံကြ ဗဵုအနန္တ ကြံကြကြဵုဇာ သၟိၚ်မူလာပ္ညဳ ဗဵုဂျသ္အဳဗဂါ ဗဵုနာဲပၠန်မာ ရးသၟိၚ်ရာမ ဇက်ထပ်တမိ သၟိၚ်ကောလိယျ သၟိၚ်ပါဝပၠန် ဗဵုအနန္တ သၟိၚ်ထပှ်က္ဍိုၚ် ဟုပ်ကၠုၚ်ဗိုၚ်ဂျ ကၠုၚ်တသိုၚ်ရ ဓာတ်တဳလပိုန် ပ္ဍဲခုတ်သာသၞာ ဗၞးအ္စာဒြီု တိုန်တူဒဵုဇၞော် ဒ္ၚဳကော်တိုန် . . .။
၃၆။ ထ္ၜးအ္စာဒြောန ပါ်ပရအ်ဓါတ်
[ပလေဝ်ဒါန် | ပလေဝ်ဒါန် တမ်ကၞက်]ဗမၞးအ္စာဒြီု ဒ္ၚဳကော်တိုန်ရ ယွံကွးအဲသၟိၚ် မၞးပၚ်မှိၚ်ရ ခမာခန္တဳ ပါၚ်ကျာ်တဳလ လအေၚ်ပြဲသန် ဖဵုအနန္တ ဂွံအေၚ်ပ္ဍဲလိုက် တသိုက်စိတ္တ ၜးအတ္တဘဴ စဴဍုၚ်သွဝ်ရ ပ္တန်ကၠေံစိတ္တ တေဇပညာ အဲအာစာဟေၚ် ဗမၞးသေၚ်ဟာ အဲပရံကွာဲ ဓာတ်ကျာ်နာဲသာ ညံၚ်ဂွံဓာတ်ဇဳ ညံၚ်သၟဟ်ညဳသာ မၞးတံအေၚ်ကၠာ မိၚ်ရဟာရာဇ သၟိၚ်ဂမၠိုၚ်ရော မိၚ်ပါၚ်ဒြောန ပါၚ်အ္စာဂး ပိုဲဒးကေတ်စ ယဝ်ညးမွဲကွေံ စးပါၚ်မိမ စးပါၚ်အ္စာ မဟာဒုက္ခ မၞိဟ်ဒိုဟ်ဟိန မၞိဟ်ယုဒ္ဓအဴ ပါၚ်အ္စာအဴ ပိုဲဍိက်ယဵုတဴ ဂးတုဲဆတ္တဝ် လ္ၚောဝ်ရဴဂဴ ဗမၞးဒြောန သီုတေဇအဴ ပ္တိတ်ဏာဓာတ်အဴ အပၠဴဗဵုပၞာန် သၟိၚ်ဂမၠိုၚ်သ္ကဲ ကၠုၚ်ကောံမွဲဟာန် ဗမၞးပံက်ဓာတ် သေသာတ်ကွေံကြာန် လျးဓာတ်ဗဗဝ် ညံၚ်ထဝ်သာန်သာန် လျးဓာတ်သၞာန် ဗဵုပၞာန်ညာတ်အိုတ် ညာတ်တုဲတသိ သီုဝဳထိစိုတ် ဟး-ကျာ်ဂမျိုၚ် ပၞာၚ်တိုၚ်ၝောံကိုတ် ကာလဂျိုၚ်တဴ ရုပ်ဂေါဝ်တဴသတိုတ် လၟုဟ်စဴဟာန် နိဗ္ဗာန်အမြိုတ် လျးဓာတ်တူရူ ထဝ်အုုရကိုတ် ဟး-ကျာ်ဂေါဝ်မြီ လျးဟွံတီပၠိုတ် ဂးတုဲဒြီုဒြီု ယာံတဴသီုဖအိုတ် ဗမၞးပံက်မွဲ ဓာတ်ကျာ်တြဲသတိုတ် ဂၞေဟ်သတုံဟွံဖိုတ် လတူအိုတ်ဂျ ဗမၞးလဝ်ဗျိၚ် လ္တူထၟိၚ်ရ ဂၞေဟ်သတုံသၟဝ်ဂ္ညိ တိုပ်တိမူလ ဗမၞးလိုန်လဝ် သက်သဍဝ်ဂျ သၠိုၚ်ထဝ်မွဲရ မွဲသတုံဆဗၞတ် တုံနာလဳသ္ကဲ ဗၞတ်မွဲတလတ် သၟိၚ်ဒစာံက္ဍိုၚ် ဒစာံသၠိုၚ်ရတ် သူကဵုသၠိုၚ်ထဝ် ဂွံအိုတ်ဓဝ်သၟတ် ပရံအိုတ်သ္အး ဗမၞးအဆတ် . . .။
ဓာတ်လတူက္ဍိုပ်သၟတ် ဂၠာံရံၚ်ဆတ္တဝ် အိန်ကၠတ်ပ္တိုန်ဏာ ဌာပနာလဝ် ဓာတ်ပ္ဍဲတိသၟတ် လိုန်လဝ်ဆတ္တဝ် နာ်ကၠတ်ကေတ်ပ္ညုၚ် ဖျေံဍုၚ်နာ်သၟဝ် ဗမၞးတုဲခဝ် သၠိုၚ်ထဝ်သၟး ဒဒှ်ကၠေံသၟတ် ဟွံပြာကတ်သ္အး ဟွံဂံၚ်ဟီုစ ဟိုတ်ဟွံကဵုညး သၠိုၚ်ထဝ်သူကၞာတ် ဒှ်ဓာတ်ဗမၞး . . .။
သၟိၚ်မောလိယျ ကၠုၚ်လက်ကြဴညး ကြက်စလန်ဂး ဆချးဂှ်ပ္ညဳ ဂွံကေတ်ဖျဴပၠန် ဒက်ပ္တန်စေတဳ မွဲသာ်တုန်သ္ကဲ ကျာ်တြဲပၠန်ဂၞဳ ဍုၚ်သၟတ်ပ္ညဳ ခုတ်သၞာရာံ ကၠုၚ်စုတိအဴ နိဗ္ဗာန်စဴဗျာံ မူဟိုတ်မယာံ ညာတ်ပယာံရော ဂုဏ်ဟိုတ်ပိကၞာတ် ကျာ်ညာတ်ထောထော ပရအ်ဓာတ်ရော ဗမၞးဒြောန ပၞာန်ဟွံဂွံဒှ် စမှ်ကာလ ဟိုတ်သုဘပၠန် ဒှ်အရှန်ဂျ သၟိက်တွံဓရ်သၟတ် သုဒဿန ဟိုတ်ပိစွံရ ဗုဒ္ဓအရဳ ခုတ်သၞာရာံ ဌာနာံဂှ်ပ္ညဳ ကျာ်စုတိသွိၚ် ရောၚ်သၟိၚ်ခမဳ ဂွံတုဲသွိၚ် ဓာတ်သၟိၚ်အရဳ . . .။
ဇာတသတြု ဍုၚ်ဇကုပ္ညဳ ဓာတ်မွဲသၠိုၚ်ထဝ် ပ္တန်လဝ်စေတဳ စေတဳမွဲကၠာ ဍုၚ်ဝေသာလဳ ဓာတ်မွဲသၠိုၚ်ထဝ် ပ္တန်လဝ်အနဳ ကပ္ပိလဝှ် ဗဒှ်စေတဳ မွဲသၠိုၚ်ထဝ်အဵု ဓာတ်ဂဵုတမဳ မွဲသၠိုၚ်ထဝ်ကၠာ သၟိၚ်မောလာပ္ညဳ ဒက်ပ္တန်စေတဳ ဓာတ်စဳသဝဝ် ဍုၚ်ရာမဂွိုၚ် ဓာတ်မွဲသၠိုၚ်ထဝ် သၟိၚ်ရာမပၠန် စေတဳပ္တန်လဝ် ဝတ္ထုဒိပ္ပ ဍုၚ်အဇသွဝ် ဒက်စေတဳဂွိုၚ် ဓာတ်မွဲသၠိုၚ်ထဝ် မွဲသၠိုၚ်ထဝ်ဂျ ဓာတ်တဳလဓရ် ဍုၚ်ပါဝဆက် စေတဳဒက်လဝ် ခုတ်သနာရာံ ရာဇာံသၟိၚ်ဓရ် စေတဳအသဝ် ဒက်ပ္တန်လဝ်ရ စေတဳဒစာံ ဍုၚ်ဒစာံဂျ ကၠုၚ်စိုပ်ကြဴရော သၟိိၚ်မောလိယျ ချးစလန်ရော ဂေါသိတာ အုဲဂိုၚ်ဏာပ္ညဳ ဒက်စေတဳဂျ ဗမၞးဒြောန တၠသၠိုၚ်ထဝ် သၠိုၚ်ထဝ်သူစၞာတ် စေတဳကၞာတ်လဝ် စေတဳဇၞော်သၟတ် ဍုၚ်ဇၞော်ဆတ္တဝ် . . .။
၃၇။ ထ္ၜးဌာန်ဒတန်ဓါတ်ကျာ်
[ပလေဝ်ဒါန် | ပလေဝ်ဒါန် တမ်ကၞက်]ဓာတ်ၚေက်မွဲကီု ပန်စှော်ဟီုလဝ် သော်ဇကုသတိုတ် ဒစာံကိုတ်ဓဝ် သော်က္ဍိုပ်အိုတ် ဒစိတ်ကိုတ်ဓဝ် ဒေဝတဴသတိုတ် အိုဿီုဆတ္တဝ် ဌာပနာလဝ် သက်ကဍဝ်ဂျ ဓာတ်ဂၞေဟ်ပန်ဓဝ် ဟီုလဝ်ဂတ ဂၞေဟ်သတုံလတူသွိၚ် တာဝတိၚ်သာ ဂၞေဟ်သတုံသၟဝ်ကၠာ ဍုၚ်နာ်နာဂ ဂၞေဟ်ဇွိလ္တူဂျ ဂန္ဓရအဵု ဓာတ်ဂၞေဟ်သၟဝ်ပ္ညုၚ် တဴဍုၚ်သိၚ်ဃဵု သ္ၚာဗဗေၚ် ဒစုန်ပြေၚ်အဵု သီုသပိုၚ်ဂျ ဍုၚ်ကုဿအဵု တမာဲဂဒိုအ် အဘိုအ်ဟီုကဵု ဍုၚ်သိလဝ နွံဂျတွဵု ကာယဗန်အဵု ဍုၚ်အဵုဟီုခုတ် . . .။
ပ္ဍဲဍုၚ်မွဲကၠာ ပါတာလိပုတ် သၞုက်ကျာ်ဗုဒ္ဓါ ဍုၚ်စမ္ပာခုတ် သော်အုံနလုံ ဇမၞးတုံစုတ် သာရဝှ်ခုတ် ထၜုတ်စေတဳ သ္ကိုပ်ကျာ်ကီု တဴဍုၚ်ဗြီုပ္ညဳ ဇမိုတ်တဲလဝ် ဍုၚ်သွဝ်အနဳ ယာတ်ဇမိုတ်ဇိုၚ် ကျာ်ဂမျိုၚ်ပ္ညဳ ဍုၚ်ပါသန ပ္တန်ဂျစေတဳ သၞာကျာ်ဗိုန် နိသိဒိုန်ပ္ညဳ အဝန်တိရး ဒက်ပျးစေတဳ ဇဵုဗၞုတ်ပညဳ ဒက်စေတဳရ ပရန်တရး ဟီုပျးလဝ်ရ ဒကောမ်ဗၞုတ် ဟီုခုတ်ဒေသ ဍုၚ်မိတ္ထဵုဒဂူ နွံတဴမူလ ဒမကရိုဏ် တိပိုန်ဗုဒ္ဓ တဴပ္ဍဲဍုၚ်လေဝ် ဒေဝဟဏ နိၚ်တၞိၚ်ဂျ ဌာနဟီုကဵု ပ္ဍဲဍုၚ်ဣန္ဒ ပတ်တနာဂဵု ဓာတ်သၟေဟ်နူဂှ် သွဂ်ဒှ်ကုသဵု ရးတၟေၚ်ဆတ္တဝ် ညးပ္တန်လဝ်အဵု . . .။
၃၈။ ခဏ်လ္ၚောဝ်ကျာ် နိဂီုရာဒနာမိက်
[ပလေဝ်ဒါန် | ပလေဝ်ဒါန် တမ်ကၞက်]ဓာတ်သီုဖအိုတ် တီတုဲဟိုတ်ဖဵု လတူကၞေၚ်အဵု အဲဍိက်ယဵုလဝ် အဲလ္ၚောဝ် ဓာတ်တဳလဓရ် ဖဵုလ္ၚောဝ်အဲ ကျာ်တြဲအသဝ် အန္တရာဲသၟတ် အိုဿီုဆတ္တဝ် ညံၚ်ဍာ်အသဝ် တူခဝ်သၠကြဴ ဟွံစိုပ်ဒမၠိ ထေနန်ညိအဴ။
ဆာဲပြးသက်သၟေဟ် ဟွံသှ်ေသဘဴ ညံၚ်သာ်ဂှ်အဴ တုပ်တဴမူလ ဒုဟ်ကဵုပါဲအာ ဂၚ်မြာဂတ နွံကဵုသဒ္ဓါ သဳလစာဂ ကဵုဂွံပ္တုဲဂျ ဒါနကျာ်ဩဳ ကြဳဇှ်ဒါန်ဂှ် ပိုန်ဟာန်မြဟ်သ္အဳ ပိုန်ဒိပ်ဗဝ်တ္ၜန် ထဝ်ဩန်တွဳ စိုပ်သွဝ်ပ္ညဳ တွဳဗဝ်သအဵု ပြာသာတ်ထဝ်ဂြၚ် ဒေန်ဗတၚ်ဂဵု ပုၚ်ဒိပ်ဍာ်ဒိပ် ယာတ်ဒိပ်ဗဝ်သ္အဝ် သၞေက်ထဝ်ပ္ကဴထဝ် လစိန်ထဝ်ဂဵု တသိုက်က္ဍန်သွဵု တၚ်ဃဵုကၞတ် ပိုန်ဒိပ်ဒဝိုၚ် စအိုတ်ဂအတ် ပိုန်ဒေဝတဴ နုဘဴကၞတ် စသိုၚ်တုဲကၠာ နုဘဴပြာကတ် ဆဵုကျာ်တြဲမှာ ဗွဲအနာဂတ် မိၚ်ဓရ်ကျာ်ကီု ဂွံကြီုဂအတ် မဂ်ဖဵုပန်မြာ ဒယှ်ပြာကတ် တသိုက်လောန်ဗၞတ် တိုၚ်အမှတ်စိုတ် ဇာတိဇရာ ဗျာဓိဟောံပၠိုတ် မာရဏဇဴ ဖေက်ဒဴလကိုတ် ယိုက်စနန်တဲ ဗၠးဘဲဂစိုတ် ဍုၚ်ဇၞော်နိဗ္ဗာန် ဌာန်ပြဲအမြိုတ် စသိုၚ်အဵုဇိုတ် ၜိုဟ်စိုတ်ရဟိုယ်။
၁၃၃၈-ဂိတုကထိုန် ၉ စွေက် တ္ၚဲအဒိုတ် ချူကှ်ေစိုပ်ဒတုဲရ - နာဲကလျာဏ
- ဂလာန်ဒုၚ်ဂုဏ်
ယွံညးဆာန်လိခ်ပတ်ဘာသာမန်တံ ပ္ဍဲပြကိုဟ်လၚ်္ကာဗုဒ္ဓဝၚ်ဝွံ ဟိုတ်နူမအက္ခဝ် ဟွံဍိုက်ပေၚ်ဏီတုဲ မပ္တံသတိုတ်-ဗဂန်-ဗဂါဒှ်တံ မ္ဒးပါ်ပရးလဝ်ဂှ် အေၚ်ဒုၚ်ညိ။
၃၉။ ထ္ၜးကဝ်ကဵုကျာ်တြဲ ၂၄-ဇကု
[ပလေဝ်ဒါန် | ပလေဝ်ဒါန် တမ်ကၞက်]- ပရူပရာပြကိုဟ်ဗုဒ္ဓဝၚ် ဂွံက္တဵုဒှ်ကၠုၚ်
ပ္ဍဲခန်လွာဍုၚ်ပိုဲမန် ဒၞာဲဒတန်သာသနာ မတန်တဴကိုပ်ကၠာဝွံ ပြကိုဟ်ဝၚ်ဂမၠိုၚ် မပ္တံဗုဒ္ဓဝၚ် ဒဳပဝၚ် မဟာဝၚ် ရာဇဝၚ် မၞုံတဴဗွဲမဂၠိုၚ်ရ ပၞောဝ်ကဵုဝၚ်ဂမၠိုၚ်ဂှ် သွက်ပိုဲကောန်ဂကူမန် ဗုဒ္ဓဘာသာတံ ပြကိုဟ်ဗုဒ္ဓဝၚ်မွဲဟေၚ် ဗွဲတၟေၚ်ကိစ္စဇၞော်လောန် အဓိပ္ပါယ်ဗုဒ္ဓဝၚ်ဂှ်လေဝ် သ္ဒးတီကေတ်ထေက်ကြိုက်ကွေံရ။
အဓိပ္ပါယ်ဗုဒ္ဓဝၚ်ဂှ် ဒှ်ဂလာန်မဆက်ဆေန်ကၠုၚ် နူဘာသာပါဠိမ္ဂး ဗုဒ္ဓဝံသရ ဗုဒ္ဓ-ကျာ်တြဲ ဝံသ-တၞောဝ်ဒတောဝ် ဗုဒ္ဓဝံသ ပြကိုဟ်ပါဠိပါၚ်ကျာ်တြဲ တွံလဝ်ပရူပရာ လၟေၚ်တၞောဝ်ဒတောဝ်ကျာ်တြဲ-သာ်ဝွံဂွံအဓိပ္ပါယ်ရ။ ။
ဟိုတ်နူပြကိုဟ်ဗုဒ္ဓဝၚ်မဒှ်တဝှ် ပါဠိပါၚ်ကျာ်တြဲ က္တဵုဒှ်ပြာကတ်ကၠုၚ်တုဲ ကောန်ဂကူမန် ဗုဒ္ဓဘာသာဂမၠိုၚ်လေဝ် ဓရ်သဒ္ဓါ-ပတေဟ်ကမ်ဖဵုမဇၞော်ကဵုဒြဟတ် က္တဵုဒှ်ကၠုၚ်အိုတ်ရ ဒတုဲမြမောဝ်တသိုက်လောကဳ လောက္ကုတ္တိုရ်ဂၠိုၚ်ကဵုသာ်လေဝ် ကလိဂွံအိုတ်ရ ဂွံဒှ်ကျာ်မွဲဇကု ဗၞတ်ဂလိုၚ်လဵု ဒးဒုၚ်ဒဒိုက်လေဝ် ဂွံတီကေတ်အိုတ်ရ။ ။
ပြကိုဟ်ဗုဒ္ဓဝၚ် ဂွံက္တဵုဒှ်ကၠုၚ် ကျာ်တြဲဂွံတွံထ္ၜးကဵုပိုဲ ဂွံကလၚ်ပၚ်မှိၚ် ဂွံတီညာတ်အာ ဗီုလၟုဟ်ဝွံမာန်ဂှ် ပိုဲသ္ဒးထိုၚ်သး ပူဂဵုအာတ်အခေါၚ်ကုနာဲပိုဲ မှာထေရ်သာရိပိုတ် ညးမကလိဂွံတဆိပ်အရာပညာပြဲအိုတ် ထေက်ကွေံရောၚ်။
၁။ ပရောဗုဒ္ဓဝၚ်တုန်
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲဂေါတမပိုဲ ကလိဂွံပၞၚ်ရတ် သၟဝ်တၞံဇြဲဗောဓိ ဂွံအံၚ်ဇၞးကေတ်သၟိၚ်မာ ဂွံဂြၚ်တီကေတ်ဓရ်သစ္စပန်တုဲ တွံပၟိၚ်ဓရ်ဓမ္မစက် လုပ်ပထမဒ္ဂိုန် ပ္ဍဲဂြိုပ်မိဂဒါဝိုန်ရ နူဂှ်ဂၚေၚ်ဒေသစာရဳ အတိုၚ်လၟေၚ်ဂလာန် ဒုၚ်လဝ်ဝန်ကဵုသၟိၚ်ဗိမ္ဗိသာရ ညးတၠဍုၚ်ရာဇာဂြိုဟ် က္ညအာပဒတဴဒၟံၚ် ပ္ဍဲဍုၚ်ရာဇဂြိုဟ်ရ။
သၟိၚ်မအံက်သုဒ္ဓေါဒန ညးတၠဍုၚ်ကပ္ပိလဝှ်လေဝ် သ္ဂောံမိၚ်ပရိုၚ် ဒဒှ်ကောန်ဇကု သိဒ္ဓတ္တကုမာက္တဵုဒှ်ကျာ်တြဲ ညးဟၟဲကဵုပတောအ်ၜတ်တုဲ ၜိုန်နွံပၟိက် မိက်ဂွံဆဵုဗဵုလ္ၚောဝ်တဴ ဗွဲမလောန်ကီုလေဝ် အေၚ်လဒမ်မာန်မံၚ်ဏီရ။ လံညိအေၚ်လဒမ်ဟွံမာန်တုဲ ဗလးဏာအမာတ်ဒစိတ် ကေုာံ ဗဵုလဗးလ္ၚီလ္ၚီ ဗွဲလၟေၚ်ၚ်ကီုလေဝ် ညးနွဲရောဟွံကလေၚ်စဴ သ္ပခမဳဗရေၚ်ကျာ်တြဲ ဒှ်အာတၠအရှန်သီုညးဖအိုတ်ရ။
ဟိုတ်နူအမာတ်ဗလးဏာတံ ဟွံကလေၚ်စဴစိုပ်မွဲတုဲ သၟိၚ်မအံက်သုဒ္ဓေါဒန စိုတ်စံၚ်တူဗွဲမလေောန်တုဲ ကော်အမာတ် ကာဠုဒါယိ ညးမက္တဵုဒှ်မၞိဟ်ကရောမ်ကျာ်တြဲ ဟီုလဴကဵုပရူပရာဒဒှ် အမာတ်ဗလးဏာတံ ဟွံကလေၚ်စဴမွဲကီု ပရူပရာစိုတ်ဇကုစံၚ်တူဒၟံၚ် ဗွဲမလောန်ဂှ်ကီု ဟီုထ္ၜးကဵုရ။ တုဲပၠန်
ယွံကောန်အမာတ် ကာဠုဒါယိ တၠအဲအာစိုပ်ဇရေၚ်ကျာ်တြဲတုဲ ပရူပရာဒဒှ်အဲသၟိၚ်မအံက်ဗ်သၞာကောန်ကျာ်ကီု ပရူပရာဂွံကညစဴကၠုၚ်ဍုၚ်မိတိမကီု ဩဝ်-ဟီုဂရၚ်ပတီညိသာ်ဝွံ ထပ်ဖအောဝ်စကာပၠန်ရ။
အမာတ်ကာဠုဒါယိ သ္ဂောံမိၚ်အသံပါၚ်သၟိၚ်ဇၞော် မိပ်စိုတ်အဵုဇိုတ်ဗွဲမလောန်တုဲ သာ်ဝွံလ္ၚောဝ်ပ္တီပၠန်ရ။
ယွံသၟိၚ်ဇၞော်မပြဲ အခေါၚ်အဲဍိက်အမာတ် သွက်သ္ဂောံပခမဳ ပ္ဍဲဇရေၚ်ကျာ်တြဲ ယဝ်မရာဇ်ကဵုအခေါၚ်မ္ဂး အတိုၚ်ပၟိက်ဂၞပ်စိုတ်တၠတိဇၞော် သွက်ဂွံနိမန်က္ညဖျဴနၚ် ကျာ်တြဲပ္ဍဲဍုၚ်မိတိမဂှ် အဲဍိက်ကေတ်လျိုၚ် ဒုၚ်သ္ဇိုၚ်ဍိုက်က်ပေၚ်ၚ်ရအဴ။
သၟိၚ်ဇၞော်ဂွံမိၚ်ဂလာန်အမာတ်ကာဠုဒါယိဂရၚ်ပ္တီတုဲ ယွံကောန် ကိစ္စသွက်ဂွံအာနိမန်က္ညနၚ်ကျာ်တြဲဂှ်ဟေၚ် စဳရေၚ်ညိ အတိုၚ်ပၟိက်ဂၞပ်စိုတ်ကောန်-မိက်ဂွံသ္ပခမဳမ္ဂးသ္ပညိ။ ဆန္ဒဂၞပ်စိုတ်အဲ ညံၚ်သ္ဂောံဍိုက်ပေၚ်ဂှ် ရေၚ်တၠုၚ်ညိသာ်ဝွံဟီုတိုန်ရ။
အမာတ်ကာဠုဒါယိ ကလိဂွံအခေါၚ်နူသၟိၚ်ဇၞော်တုဲ ပွဳပွိုၚ်ကေတ်ဗဵုလဗးလ္ၚီ တိတ်အာ သွက်သ္ဂောံက္ညနိမန်ကျာ်တြဲရ။
၂။ ဗီုကာဠုဒါယိထေရ် နိမန်ကျာ်တြဲ။
[ပလေဝ်ဒါန် | ပလေဝ်ဒါန် တမ်ကၞက်]အမာတ်ကာဠုဒါယိ စိုပ်အာဘာကျာ်တြဲတေံဂှ် ဂွံဆဵုညာတ်ကေတ်အမာတ်ဇၞော်ဒစိတ်-ကေုာံ ဗဵုလဗးဒစိတ်လ္ၚီ သ္ပခမဳတုဲ ဒှ်အာတၠအရှန် သီုဖအိုတ်ဂှ်ရ။ အမာတ်ကာဠုဒါယိ ကေုာံဗဵုလဗးလ္ၚီလေဝ် ဂွံမိၚ်ကေတ်တဝှ်ဓရ်ကျာ်တြဲတုဲ သ္ပခမဳ ဂွံဒှ်တၠအရှန်ဖအိုတ်ကီုရ။ နူဘဝအမာတ်ဂှ် ကၠောံစိုပ်အာဘဝဇာတ် တၠအရှန်မပြဲတုဲ သွက်ဂွံနိမန်က္ညဖျဴကျာ်တြဲဂှ် သ္ပကၠေံမဇ္ၛဟ် မၚ်ဒၟံၚ်အခိၚ်အခါဒးရး ဟွံလုပ်ဂရၚ်ပ္တီကျာ်တြဲပြဟ်ဟ်ဏီရ။
စိုပ်တ္ၚဲဂိတုဖဝ်ရဂိုန်ပေၚ် အခိၚ်ရာသဳဥတုတြေံ ပြံၚ်စိုပ်ဥတုရာသဳတၟိဂှ် မှာထေရ်ကာဠုဒါယိ ပြာပ်လုပ်ဇရေၚ်ကျာ်တြဲတုဲ ယွံတၠဳပိုန်ကျာ်တြဲ သၟိၚ်မအံက်တၠဳပိုန် ညးတၠဍုၚ်ကပ္ပိလဝှ်တေံဂှ် နွံပၟိက်မိက်ဂွံဗဵုလ္ၚောဝ် ကလၚ်ဓရ်တၠဳပိုန်ဗွဲမလောန်ရအဴ အခိၚ်အခါလၟုဟ်ဝွံ ဒှ်အခိၚ်ရာသဳဥတုဒးရး တၞးဆုတြေံပြဟ်ဒတုံတိ တၞးဆုတၟိလေဝ်ဃောဍိုပ်ဍဴ ဟွံကတဴဟွံဂံက် ဒးအခိၚ်ကွာ်တရဴဇမ္ၚောဲခိုဟ်ဗွဲမလောန်ရောၚ်အဴသာ်ဝွံ နိမန်ကျာ်တြဲရ။
ကျာ်တြဲလေဝ် သ္ပဟိုတ်ကဵုဂလာန်နိမန် မှာထေရ်ကာဠုဒါယိတုဲ ပွဳပွိုၚ်ကေတ် ခမဳတၠအရှန်ၜါလက်-ခမဳကောန်အၚ်္ဂရးကဵုမဂဓရးမွဲလက် ခမဳကောန်ဍုၚ်ကပ္ပိလဝှ်မွဲလက် နူဍုၚ်ရာဇဂြိုဟ် ဒဵုစိုပ်ဍုၚ်ကပ္ပိလဝှ် တရဴမၞုံဗၞတ်၆၀-ယောဇနာ မွဲတ္ၚဲမွဲယောဇနာဗွဲလၟေၚ်ၚ် က္ညကွာ်အာပွိုၚ်ၜါဂိတု က္ညစိုပ်ဍုၚ်ကပ္ပိလဝှ်ရ။
ကျာ်တြဲက္ညစိုပ်အာဍုၚ်ကပ္ပိလဝှ် လုပ်ပဒတဴဒၟံၚ် ပ္ဍဲဘာနိဂြောဓရာံ ညးမဒှ်ကလောဂမၠိုၚ် သိုၚ်ခၞံဗဒှ်လဝ် ပ္ဍဲကၠံပ္ကဴဥဒျာန်ကောန်သၟိၚ် နိဂြောဓတေံရ။ ကလောကျာ်တြဲ ကောန်ညးသာကျဝၚ်ဂမၠိုၚ် ဂွံမိၚ်ပရိုၚ်ကျာ်တြဲက္ညစိုပ်ကၠုၚ်တုဲ ရပ်ကေတ်ပ္ကဴသဴ မြမောဝ်တၞဟ်ဟ်သာ် ဂၠောဲတိတ်အာကၠံပ္ကဴဥဒျာန်တေံ ဂြုဂြုဂြီုဂြီုအိုတ်ရ ကောန်ညးသာကျဝၚ် မၞုံအာယုက်ဍောတ်နူကျာ်တြဲတံဂှ် ၜိုန်လ္ၚောဝ်ေဖျံက္ဍိုပ် ပဝတ်ကဵုကျာ်တြဲကီုလေဝ် ကောန်ညးသာကျဝၚ် မၞုံအာယုက်ဇၞော်နူကျာ်တြဲတံဂှ် မံၚ်ဒၟံၚ်လက်ကြဴမၞိဟ်ဍောတ်တ်တံတုဲ ဟွံလ္ၚောဝ်ဖျေံက္ဍိုပ်ပဝတ်ကဵုကျာ်တြဲအိုတ်ရ။
ကာလဂှ် ကျာ်တြဲချပ်တိုန်မြဴသာ်ဝွံရ ဂကူသၟိၚ်သာကျဝၚ်ဂမၠိုၚ်ဝွံ ပြဝမလ္ၚောဝ် ဖျေံက္ဍိုပ်ပဝတ်ဝွံ ဟွံမိက်သ္ပအိုတ်ရ ဓရ်မာနဇၞော်တကွေံေရာၚ်သွံ ဣဒ္ဓိအနုဘဴအဲကျာ် သ္ဒးထ္ၜးကဵုညးတံထေက်ရ သာ်ဝွံပၠောပ်စိုတ် သၟိက်မိက်ဂွံဗဂူဗြဲရတ် ဓရ်မပြဲတုဲ ကျာ်တြဲနိမိတ်ဗဒှ် ဂၠံၚ်စၚ်ကြံၚ်ရတ်မွဲ လတူအာကာသ ဗွဲဇမၠိၚ်ဍေံ စဵုစိုပ်သၟန်စက္ကဝါတေံ ကျာ်တြဲကွာ်အာကွာ်ကၠုၚ် ပ္ဍဲလ္တူစၚ်ကြံၚ်ရတ်ဂှ်တုဲ တွံပၟိၚ်ဓမ္မဒေသနာ ဗွဲမဗဗွဲကဵု ပၟိက်စရိုတ်သတ္တံရ။
အခိၚ်ဂှ် မှာထေရ်သာရိပိုတ် မဒှ်ကွးသတုံကျာ်တြဲ ဃောပဒတဴဒၟံၚ်ပ္ဍဲလ္တူဒဵုဂိဇ္ၛကုတ် သာ်ဝွံချပ်တိုန်ရ ပ္ဍဲအခိၚ်ကျာ်တြဲ မဗဂူဗြဲရတ်ဓရ်မပြဲ လ္တူပၞၚ်ရတ်ကွာ်စၚ်ကြံၚ် နွံဒၟံၚ်လ္တူဂၠးအာကာသ သီုမပွဳပွိုၚ်လဝ် နကဵုဂကောမ်အိန်ဗြီု ဒေဝတဴမဂၠိုၚ် အလုံစှ်လ္ၚီစက္ကဝါဝွံ ယဝ်အဲသ္ဂောံအာတ်အခေါၚ် သကဵုတွံထ္ၜးစဳပျးကဵု ဗုဒ္ဓဝံသ-ဗုဒ္ဓဝၚ်မစၞောန်ထ္ၜး ဂုဏ်ပရဲပရူပရာကျာ်တြဲ ဍိုက်ဍိုက်ပေၚ်ၚ်မ္ဂး ဒးရးသန်ရ။
၃။ ဗီုကျာ်တြဲ တွံထ္ၜးဗုဒ္ဓဝၚ်
[ပလေဝ်ဒါန် | ပလေဝ်ဒါန် တမ်ကၞက်]ချိုန်ခဏချပ်တုဲဂှ် မှာထေရ်ပွဳပွိုၚ်ကေတ် ကောန်ကွးခမဳ-၅၀၀-က္ညကလာၚ်အာ ဌာန်ဒၟံၚ်ကျာ်တြဲမၞုံ ပ္ဍဲဘာနိဂြောဓရာမ် ဇရေၚ်ဍုၚ်ကပ္ပိလဝှ်တေံရ။ အခိၚ်မှာထေရ်သာရိပိုတ် စိုပ်ကၠုၚ်ဂှ် ကျာ်တြဲလေဝ် ဃောတွံထ္ၜးမံၚ်ဓရ် မစပ်ကဵုဂလာန်သစ္စပန် လက္ခဏယာန်-၃ လ္တူအာကာသ ကဵုမၞိဟ်ဒေဝတဴအိန်ဗြီု ဂမၠိုၚ်ရ။ မှာထေရ်ပူကၠေံသ္ၚာ ပၚ်သၟိပ်တဲ ယဵုထ္ၜဏာလ္ပာ်ကျာ်တြဲနွံတေံတုဲ ယွံတၠဳပိုန်ကျာ်တြဲ တဝှ်ဓမ္မဒေသနာဗုဒ္ဓဝံသ-ဗုဒ္ဓဝၚ် မစၞောန်ထ္ၜးဂုဏ်ပရဲ ကျာ်တြဲဍိုက်ဍိုက်ပေၚ်ပေၚ်ဂှ် ဩဝ်က္ညတွံပၟိၚ် လၟိၚ်ထ္ၜးကဵုဓမ္မဒေသနာညိကျာ်သာ်ဝွံလ္ၚောဝ်ပ္တီရ။
ကျာ်တြဲလေဝ် ဃောမပဒတဴဒၟံၚ် ပ္ဍဲလ္တူစၚ်ကြံၚ်ရတ် မနိမိတ်ဗဒှ်လဝ် လ္တူအာကာသဂှ်ဟေၚ် သ္ပဟိုတ်ကဵုဂလာန်မှာထေရ်သာရိပိုတ် အာတ်အခေါၚ်ညံၚ်သဂွံဒှ် ဒတုဲဖဵုမြမောဝ် မၞိဟ်ဒေဝတဴအိန်ဗြီုတံတုဲ နကဵုပုဗ္ဗေနိဝါသဉာဏ် တွံထ္ၜးစွံပ္တန်လဝ် ဓမ္မဒေသနာ ဗုဒ္ဓဝၚ်ဝွံရ။
ပ္တံနူအခိၚ်တွံထ္ၜးလဝ် ဗုဒ္ဓဝၚ်ဂှ်တုဲ သာသနာကျာ်တြဲ ဂဵုလဟဵုဒယှ်တှ် မံက်ဂတဝ်ပြာကတ်ကၠုၚ် ပ္ဍဲလိုက်ဝွံ ဗၞဳအဝဏ်သၟိၚ်ဂိတု တ္ၚဲကီုရောၚ်မိဂ္ဂး။ ။ ။
၄။ ပရူပရာဂကူကဝ် ကျာ်တြဲက္တဵုဒှ်။
[ပလေဝ်ဒါန် | ပလေဝ်ဒါန် တမ်ကၞက်]ပ္ဍဲပြကိုဟ်ဗုဒ္ဓဝၚ်ဝွံ သွက်ဂွံစၟတ်သမ္တီကေတ် အပိုၚ်အခြာ ဂကူကဝ်ကဵုကျာ်တြဲက္တဵုဒှ် ထေက်ကြိုက်လောန်ရ ဟိုတ်တုန်-ပ္ဍဲဂလာန်ဗောဓိသတ်ပိုဲ ဗပေၚ်ကၠုၚ်ပါရမဳ သွက်ဂွံက္တဵုဒှ်ကျာ် ပန်အသၚ်ဃဲကဵုပရဲမွဲလက်ကဝ်ကီု ဗီုရာဒနာမိက်လဝ် သွက်ဂွံကျာ် ပ္ဍဲဇရေၚ်ကျာ်တြဲ ၂၄-ဇကုဂမၠိုၚ်ကီု ပ္ဍဲဂကူကဝ်လဵု ကျာ်တြဲမူစိက္တဵုဒှ် ပ္ဍဲဂကူကဝ်လဵု ကျာ်တြဲဟွံက္တဵုဒှ်ကီုတံဂှ် ပိုဲကောန်ဂကူမန်ဗုဒ္ဓဘာသာဂမၠိုၚ် သ္ဒးဂိုၚ်စၟတ်လဝ်ထေက်ကွေံရောၚ်။ တီကေတ်ဗၞတ်လလံအခိၚ် ဂွံဒှ်ကျာ်တုဲ သဒ္ဓါလျုၚ်ပတေဟ် ပ္ဍဲကျာ်ဂၠိုၚ်ကၠုၚ်ရောၚ်။
- ဟိုတ်ဂှ်ရ ကဝ်မ္ဂးဂှ်
၁။ သာရကဝ်မွဲ
၂။ မဏ္ဍကဝ်မွဲ
၃။ ဝရကဝ်မွဲ
၄။ သာရမဏ္ဍကဝ်မွဲ
၅။ ဘဒ္ဒကဝ်မွဲ
၆။ သုညကဝ်မွဲ
ရဴဝွံနွံ ၆-သာ်ရ ပၞောဝ်ကဵုကဝ် ၆သာ်ဂှ်။
၁။ ပ္ဍဲသာရကဝ်ဂှ် ကျာ်တြဲမွဲဇကုဟေၚ် က္တဵုဒှ်ရ။
၂။ ပ္ဍဲမဏ္ဍကဝ်ဂှ် ကျာ်တြဲၜါဇကုဟေၚ် က္တဵုဒှ်ရ။
၃။ ပ္ဍဲဝရကဝ်ဂှ် ကျာ်တြဲပိဇကုဟေၚ် က္တဵုဒှ်ရ။
၄။ ပ္ဍဲသာရမဏ္ဍကဝ်ဂှ် ကျာ်တြဲပန်ဇကုဟေၚ် က္တဵုဒှ်ရ။
၅။ ပ္ဍဲဘဒ္ဒကဝ်ဂှ် ကျာ်တြဲမသုန်ဇကုဟေၚ် က္တဵုဒှ်ရ။
၆။ ပ္ဍဲသုညကဝ်ဂှ် ကျာ်တြဲမွဲဇကုလေဝ် ဟွံက္တဵုဒှ်ရ။
(ပ္ဍဲသုညကဝ် ဗၞတ်သၟိၚ်စက္ကဝဝ် ပစ္စေကဗုတ် တၠအရှန်လေဝ် ဟွံက္တဵုဒှ်ရ။)
- ကဗျလၚ်္ကာ
၁။ မွဲဓဝ်သာရ - ၜါမဏ္ဍ - ပိဝရသေၚ်ဟာ။
၂။ သာရမဏ္ဍ - ပန်ဓဝ်ရ - ဘဒ္ဒ ၅- သေၚ်ဟာ။
၃။ ဇကုမွဲဓဝ် - ဟွံဒှ်ကျဝ် - သုညကဝ်သေၚ်ဟာ။
၄။ ကဝ်တရဴသာ် - တွံပါၚ်ကျာ် - ဟံၚ်ပြာ်လဝ်သေၚ်ဟာ။
နူဘဒ္ဒကဝ်ဝွံ ကလေၚ်ရိုဟ်စှ်ေအာ အပ္ဍဲပန်အသၚ်ဃယ်ပရဲမွဲလက်ကဝ်ဝွံ လၟိဟ်ကျာ်တြဲက္တဵုဒှ် ကေုာံ ဂကူကဝ်ဂမၠိုၚ်ဂှ် ဂတဝွံ နကဵုလၟေၚ်သ္ၚိအၚ်ထ္ၜးကဵုရ။ ပ္ဍဲဂကူကဝ်ကျာ်တြဲက္တဵုဒှ်တံဂှ် ခေတ်ကျာ်တြဲဂေါတမပိုဲ ကလိဂွံနိယတပျးဒိုဟ်ရ။
- ပန်-အသၚ်ဃယ်ကဝ်မ္ဂးဂှ်တုန်။
၁။ အကြာကျာ်တြဲဲဒိပၚ်ကိုရ်ကဵုကျာ်တြဲကောဏ္ဍညဂှ် ဒှ်မွဲအသၚ်ဃယ်ကဝ် အကြာကျာ်ၜါဇကုဝွံ သုညကဝ်က္တဵုဒှ်ဗွဲမဂၠိုၚ် ရိုဟ်လၟိဟ်ဟွံမာန်ရ။ အကြာကျာ်ၜါဇကု အခိၚ်ကာလမဂၠိၚ်သ္ၚောဲဝွံ ဒှ်ဂကူ(သေလအသၚ်ဃယ်ကဝ်)မ္ဂးရ။
၂။ အကြာကျာ်တြဲကောဏ္ဍညကဵု ကျာ်တြဲမၚ်္ဂလဂှ် ဒှ်မွဲအသၚ်ဃယ်ကဝ်။ အကြာကျာ်ၜါဇကုဝွံ သုညကဝ်က္တဵုဒှ်ဗွဲမဂၠိုၚ် ရိုဟ်လၟိဟ်ဟွံမာန်ရ။ ကျာ်တြဲၜါဇကု အခိၚ်ကာမဂၠိၚ်သ္ၚောဲဝွံ ဒှ်ဂကု(ဘာသအသၚ်ဃယ်ကဝ်)မ္ဂးရ။
၃။ အကြာကျာ်တြဲသောဘိတကဵု ကျာ်တြဲအနောမဒဿဳဂှ် ဒှ်မွဲအသၚ်ဃယ်ကဝ်။ အကြာကျာ်ၜါဇကုဝွံ သုညကဝ်က္တဵုဒှ်ဗွဲမဂၠိုၚ် ရိုဟ်လၟိဟ်ဟွံမာန်ရ။ ကျာ်တြဲၜါဇကု အခိၚ်ကာမဂၠိၚ်သ္ၚောဲဝွံ ဒှ်ဂကု(ဇယအသၚ်ဃယ်ကဝ်)မ္ဂးရ။
၄။ အကြာကျာ်တြဲနာရဒကဵု ကျာ်တြဲပဒုမုတ္တိုရ်ဂှ် ဒှ်မွဲအသၚ်ဃယ်ကဝ်။ အကြာကျာ်ၜါဇကုဝွံ သုညကဝ်က္တဵုဒှ်ဗွဲမဂၠိုၚ် ရိုဟ်လၟိဟ်ဟွံမာန်ရ။ ကျာ်တြဲၜါဇကု အခိၚ်ကာမဂၠိၚ်သ္ၚောဲဝွံ ဒှ်ဂကု(ရုစိရအသၚ်ဃယ်ကဝ်)မ္ဂးရ။
- ကဗျလၚ်္ကာ မွဲအသၚ်ဃယ်တုန်။
မွဲသၚ်ဃယ်ကၠာ - - ဗၞတ်ပမာဏ။
လၟိဟ်ဍေံဂှ် - - ကျာ်တြဲတွံရ။
လုံဗမ္ဗုဒိပ် - - လ္အိတ်ဝဿန။
ဗြဲဒဂူတဴရ - - ပကဵုဍေံသ္ဂုတ်။
ဗတံတ္ၚဲ - - ဟွံမွဲဖလုတ်။
ဗဂူမံၚ်အနဳ - - ကြဳဇှ်ဗဂူအာ။
လမိဟ်မဗြဲ - - ဟွံသၟေဟ်လောဲခြာ။
မွဲသၚ်ဃယ်ဟေၚ် - - ယုတ္တိသေၚ်ဟာ . . . .။
- သ္ၚိအၚ်ဂကူသဝ်ကဵုကျာ်တြဲ
ဂကူကဝ် လၟိဟ်ကျာ်တြဲ
၁။ ကျာ်တြဲကဏှၚ်္ကရ။
* ဂကူသာရမဏ္ဍကဝ် ၂။ ကျာ်တြဲမေဓၚ်္ကရ။
ကြဴနူဂှ်သေလသၚ်ဃယ်ကဝ်သုန် ၃။ ကျာ်တြဲသာရဏၚ်္ကရ။
၄။ ကျာ်တြဲဒဳပၚ်္ကရ။
* ဂကူသာရကဝ် ကြဴနူဂှ် ဘာသအသၚ်ဃယ်ကဝ်သုန် ၁။ ကျာ်တြဲကောဏ္ဍည။
၁။ ကျာ်တြဲမၚ်္ဂလ။
* ဂကူသာရမဏ္ဍကဝ် ၂။ ကျာ်တြဲသုမန။
ကြဴနူဂှ်ဇယအသၚ်ဃယ်ကဝ်သုန် ၃။ ကျာ်တြဲရေဝတ။
၄။ ကျာ်တြဲသောဘိတ။
၁။ ကျာ်တြဲအနောမဒဿဳ။ * ဂကူဝရကဝ် ၂။ ကျာ်တြဲပဒုမုတ္တိုရ်။ ကြဴနူဂှ်ရုစိရအသၚ်ဃယ်ကဝ်သုန် ၃။ ကျာ်တြဲနာရဒ။
ဂကူသာရကဝ် ကြဴနူဂှ် ၇၀၀၀၀-ကဝ်သုန်။ ၁။ ကျာ်တြဲပဒုမုတ္တိုရ်။ (လ္တူမွဲကိုဋ်ကဝ်)
* ဂကူမဏ္ဍကဝ် ၁။ ကျာ်တြဲသုမေဓ။ ကြဴနူဂှ် ၂၈၂၀၀-ကဝ်သုန် ၂။ ကျာ်တြဲသုဇာတ။ (လ္တူပိလက်ကဝ်)
၁။ ကျာ်တြဲပိယဒဿဳ။ * ဂကူဝရကဝ် ၂။ ကျာ်တြဲအတ္ထဒဿဳ။ ကြဴနူဂှ် ၁၉၀၅-ကဝ်သုန် ၃။ ကျာ်တြဲဓမ္မဒဿဳ။ (လ္တူ ၁၈၀၀-ကဝ်)
ဂကူသာရကဝ် ကြဴနူဂှ် ၁-ကဝ်သုန်။ ၁။ ကျာ်တြဲသိဒ္ဓတ္တ။ (လ္တူ ၉၄-ကဝ်)
* ဂကူမဏ္ဍကဝ် ၁။ ကျာ်တြဲတိဿ။ ကဝ်သုန်ဟွံမွဲ ၂။ ကျာ်တြဲဖုဿ။ (လ္တူ ၉၂-ကဝ်)
* ဂကူမဏ္ဍကဝ် ၁။ ကျာ်တြဲသိခဳ။ ကြဴနူဂှ် ၉၂-ကဝ်သုန် ၂။ ကျာ်တြဲဝေဿဘူ။ (လ္တူ ၃၁-ကဝ်)
၁။ ကျာ်တြဲကကုသန်။
* ဂကူဘဒ္ဒကဝ် ၂။ ကျာ်တြဲကောဏာဂီု။
ကျာ်တြဲ ၅-ဇကုက္တဵုဒှ် ၃။ ကျာ်တြဲကဿပ။
၄။ ကျာ်တြဲဂေါတမ။ လၟုဟ်
၅။ ကျာ်တြဲမေတ္တေယျ။ ဂတဏံ
(ဟွံဟီုဂး ခရှ်-ခမဳ-သာမဏဳ ညးမဒှ်ကောန်မန်ဗုဒ္ဓဘာသာဂမၠိုၚ် သွက်ဂွံတီကေတ် ပရူဗုဒ္ဓဝၚ်ကျာ်တြဲမက္တဵုဒှ် အပ္ဍဲပန်အသၚ်ဃယ် ပရဲမွဲလက်ကဝ် မဒှ်ခေတ််နိယတ ပျးဒိုဟ်ဗောဓိသတ် ကျာ်တြဲဂေါတမပိုဲဂှ် ကိစ္စဇၞော်ဒၟံၚ်တုဲ ပ္တံနူကျာ်တြဲဒိပၚ်ကိုရ် ဗုဒ္ဓဝၚ်ကျာ်တြဲ ၂၄-ဇကုဂတဝွံ ကြက်ချူထ္ၜးကဵုဗွဲခဍန်ရောၚ်)
၄၀။ ထ္ၜးဗုဒ္ဓဝၚ်ကျာ်တြဲ ၂၄-ဇကု ဗွဲခဍန်
[ပလေဝ်ဒါန် | ပလေဝ်ဒါန် တမ်ကၞက်]၁။ ဗုဒ္ဓဝၚ်ကျာ်တြဲ ဒိပၚ်္ကရ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ပ္ဍဲဘဒ္ဒကဝ်ဝွံ ကလေၚ်ရိုဟ်စှ်ေအာ ဗွဲပဋိလုံ ပ္ဍဲပန်အသၚ်ဃယ်ပရဲမွဲလက်ကဝ် စိုပ်သာရမဏ္ဍကဝ်တေံမ္ဂး ကျာ်တြဲတဏှၚ်္ကရ၊ ကျာ်တြဲမေဓၚ်္ကရ ကျာ်တြဲသရဏၚ်္ကရ ကျာ်တြဲဒိပၚ်္ကရ ပန်ဇကုက္တဵုဒှ်ပ္ဍဲလိုက်ဝွံရ ပၞောဝ်ကဵုကျာ်တြဲပန်ဇကုတံဂှ် ဗွဲလၟေၚ်ၚ်က္ညစဴအာနိဗ္ဗာန် ပိဇကုတုဲ ပ္ဍဲဒတန်အာယုက်သတ္တံမွဲကိုတ်ဂှ် ကျာ်တြဲဒိပၚ်္ကရ က္တဵုဒှ်ပ္ဍဲလက်ဝွံရ။
ဍုၚ်ကျာ်တြဲက္တဵုဒှ်ဂှ် . . . ဒှ်ဍုၚ်ရမ္မဝတဳ။
မအံက်ကျာ်တြဲဂှ် . . . ဒှ်သၟိၚ်ဇၞော်သုဒေဝ။
မိကျာ်တြဲဂှ် . . . ဒှ်ဂၞကျာ်ဇၞော်သုမေဓ။
ဂၞကျာ်ကၠာဟွံဒှ်ကျာ်ဂှ် . . . ဒှ်ဂၞကျာ်ပဒုမာဒေဝဳ။
ကောန်ဂၠုဂှ် . . . ဒှ်ဥသဘက္ခန္ဓ။
ကွးခမဳတြုံသတုံဂှ် . . . ဒှ်သုမၚ်္ဂလထေရ်။
ကွးခမဳတြုံဇွိဂှ် . . . ဒှ်တိဿထေရ်။
ခမဳကၠောန်ၜိုတ်ဂှ် . . . ဒှ်သာကေတထေရ်။
ကွးခမဳဗြဴသတုံဂှ် . . . ဒှ်နန္ဒာထေရဳ။
ကွးခမဳဗြဴဇွိဂှ် . . . ဒှ်သုနန္ဒာထေရဳ။
ဒကာတြုံကၠောန်ၜိုတ်ၜါဂှ် - ဒှ်တပုဿကဵုဘလ္လိက။
ဒကာဗြဴကၠောန်ၜိုတ်ၜါဂှ် - ဒှ်သိရိမာကဵုသောဏာ။
သၠုၚ်ကျာ်တြဲဂှ် - ဒှ်-၈၀-ဟတ်။
အာယုက်ကျာ်တြဲဂှ် - ဒှ်မွဲကိုတ်။
ဒ္ဂေတ်ဒုက္ကရစရိယာ - ဒှ်ပွိုၚ်-၁၀-ဂိတု။
ဆုဒလာဲကျာ်တြဲဂှ် - ဒှ်တၞံဇြဲသုံ။
(ဟီုလဝ်အာယုက်ကျာ်တြဲဒိပၚ်ကိုရ် မွဲကိုတ်ကီုလေဝ် ဗွဲဓမ္မတာကျာ်တြဲ ဒတန်အာယုက်ဂှ် သ္ပမသုန်ဂအုံ သှ်ေပန်ဂအုံ ဒှ်အာယုက်ကျာ်တံရ။ အာယုက်ကျာ်တြဲဒိပၚ်ကိုရ် ဒှ်ဒစာံလက်ဟေၚ် သမ္တီညိ။ အပိုၚ်အခြာအာယုက်ကျာ်သ္အာၚ်တံလေဝ် နယ်ဝွံ ဂိုၚ်သမ္တီကေတ်ညိ။)
*ဗီုဗောဓိသတ်ပိုဲ ဂွံပျးဒိုဟ် ဒှ်ရသိသုမေဓ
အခိၚ်ကျာ်တြဲဒိပၚ်ကိုရ်ကတဵုဒှ်ဂှ် ဗောဓိသတ်ပိုဲက္တဵုဒှ် ပ္ဍဲဂကူသမ္ၚေဟ် ဗမၞးမွဲမၞုံယၟုသုမေဓရ။ ကြဴဝွံ ဂွံဓရ်သံဝေဂ သၠးပိုန်ဟာန် တိတ်ပခမဳရသိ ဟွံလံကလိဂွံၛာန် ကၠောန်ဂၠံၚ်ဍာန် ဇကုသ္ပဒဒန်ကဵုကျာ်တြဲကွာ် ကျာ်တြဲညာတ်ကေတ် နကဵုအနာဂတံသရဉာဏ်တုဲ သာ်ဝွံကဵုပျးဒိုဟ်ရ။
ပဿထ ဣမံတာပသံ၊ ဇဋိလံ ဥဂ္ဂတာပနံ။ အပရိမေယျေ ဣတောကပ္ပေ၊ ဗုဒ္ဓေါ လောကေ ဘဝိဿတိ။
အရထတုန် . . .။ ဘိက္ခဝေ ၊ ယွံခမဳတံ ညးဖေက်ဘဲသံသာ သၟိက်လသာထောံရုပ်နာံတံ။ တုမှေ၊ ၚ်မၞးတံညးမဂၚေၚ်ဒၟံၚ် ပ္ဍဲဝဲခၞံသံသာ ဇဋိလံ၊ ဍေံမၞံကဵုတသော်ဝန်ဇာတာ မစန်ဒက်လဝ် မၞုံသာ်ညံၚ်သၞေၚ်တိုၚ်သာဲ။ ဥဂ္ဂတာပနံ၊ ဍေံမၞုံဒ္ဂေတ် မဝေတ်လဝ်ဇကု သီုမအေၚ်သတှ်ေလဝ်။ ဣမံတာပသံ၊ န်တၠရသိမတိက်သတၚ်ဒၟံၚ် ပ္ဍဲသၠိုက်သရာံ မၞုံဂလာန်ဍာတ်ကြောံ တၠဳပိုန်တံ က္ညကွာ်ကၠေံအာ လ္တူအဲဍိက်ညိဂွံ။ ပဿထ၊ ဩဝ်သ္ၚဳရံၚ်နကဵုဂၠံစက္ခုပသာဒအိုတ်ညိ။ အယံတာပသော၊ ၚ်တၠရသိမၞုံစရိုတ်စိုတ်ဓါတ် ဍိုန်ဍောတ်ဝွံ ဣတော၊ နူသာရမဏ္ဍကဝ် ဒဒန်ကျာ်တြဲပန်ဇကုက္တဵုဒှ်ဝွံ။ အပရိမေယျေ၊ ဖျေဲဂၞန်သၚ်္ချာလအာဂလိုၚ်ဝွံ ဂလိုၚ်တေံရိုဟ်ဟွံမာန် ဍေံမဂၠိုၚ်လောန်လာန်။ ကပ္ပေ၊ ပ္ဍဲဘဒ္ဒကဝ်ဒဒန်ကျာ်တြဲမသုန်ဇကု မက္တဵုဒှ်လၟိဟ်ကဝ်ပၠန် ပန်အသၚ်ဃယ်ပရဲမွဲလက်တေံ။ လောကေ၊ ပ္ဍဲဘုံပိကလိဂွံယၟုလောကဓာတ်။ ဗုဒ္ဓေါ၊ ၚ်ကျာ်အတုလဂေါတမမ္ဂးယၟု။ ဘဝိဿတိ၊ ကြက်က္တဵုဒှ် ဒယှ်တမ္ညဝ်ကမြဴဒိုဟ်စှ် ညးဩွံတုပ်သၟဟ်မွဲရောၚ်။ ။ ။
အဓိပ္ပါယ်တုန် . . .။ “ယွံခမဳတံ တၠရသိသုမေဓဝွံ ပ္ဍဲပန်အသၚ်ဃယ်ပရဲမွဲလက်ကဝ် ကလိလောန်တုဲ ပ္ဍဲဘဒ္ဒကဝ်တေံ ကြက်က္တဵုဒှ်မၞိဟ်ပ္ဍဲဂကူသၟိၚ် မအံက်သုဒ္ဓေါဒန မိမဟာမာယာ ညးမဂွံအလဵုအသဳ ပိုၚ်ပြဳဍုၚ်ကပ္ပိလဝှ် စိုပ်အခိၚ်အခါ ဒဴတိတ်ဂြိုပ် ဂွံဒှ်ကျာ်မွဲမၞုံယၟု ဂေါတမ-ဒယှ်တဴပ္ဍဲလိုက်ဝွံရ။ ကွးတြုံအဂ္ဂသာဝကသတုံ-ဇွိတံဂှ် ဒှ်မှာထေရ်သာရိပိုတ်ကဵုမှာထေရ်မဟာမောဂ္ဂလာန်တုဲ ကွးကၠောန်ၜိုတ်ဂှ် ဒှ်မှာထေရ်အာနန်။ ကွးဗြဴအဂ္ဂသာဝိကသတုံ-ဇွိတံဂှ် ဒှ်ခေမာထေရဳကဵုဥပ္ပလဝဏ္ဏာထေရဳ၊ ဆုဒလာဲကျာ်ဂှ် ဒှ်တၞံဇြဲသုံရ” နမပ္တံမြဴသာ်ဝွံ ဟီုထ္ၜးကဵုပျးဒိုဟ်ရ။
ရသိသုမေဓ မိၚ်ဂလာန်ကျာ်တြဲပျးဒိုဟ်တုဲ မိပ်စိုတ်ဗွဲမလောန် နကဵုတရဴအာကာသ ကလာၚ်စဴအာဂြိုပ်ဟေမဝန် ဌာန်ဒတန်ဇကုရောၚ်။ ။ ။
ဗုဒ္ဓဝၚ်ကျာ်တြဲ ဒိပၚ်ကိုရ်တုဲရ ။ ။ ။
၂။ ဗုဒ္ဓဝၚ်ကျာ်တြဲ ကောဏ္ဍည (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]သာရမဏ္ဍကဝ် မဒှ်ဒတန်ကျာ်တြဲ ဒိပၚ်ကိုရ်က္တဵုဒှ်ဂှ် ဗွဲဓမ္မတာတူလေၚ်အာတုဲ ၜိုန်ကဝ်တၟိကလေၚ်တန်ကီုလေဝ် လုကဴမွဲအသၚ်ဃယ်ကဝ် ကဝ်သုန်၊ ကျာ်ဟွံက္တဵုဒှ်ရ။ ကြဴဝွံ ကာလစိုပ်သာရကဝ် ဒတန်အာယုက်သတ္တံ စိုပ်အခိၚ်မွဲလက်သၞာံဂှ် ကျာ်တြဲကောဏ္ဍညမွဲဇကုဓဝ် ကတဵုဒှ်ပ္ဍဲလိုက်ဝွံရ။
ဍုၚ်ဂှ် - ဒှ်ဍုၚ်ရမ္မဝတဳ။
မအံက်ဂှ် - ဒှ်သၟိၚ်ဇၞော်သုနန္ဒ။
မိကျာ်ဂန်ဂှ် - ဒှ်ဂၞကျာ်ဇၞော်သုဇာတာ။
ဂၞကျာ်ဂှ် - ဒှ်ဂၞကျာ်ရုစိဒေဝဳ။
ကောန်ဂၠုဂှ် - ဒှ်ဝိဇာတသေန။
ကွးခမဳတြုံသတုံဇွိၜါ - ဘဒ္ဒထေရ်ကဵုသုဘဒ္ဒထေရ်။
ကွးကၠောန်ၜိုတ်ဂှ် - ဒှ်အနုရုဒ္ဓထေရ်။
ကွးခမဳဗြဴသတုံဇွိၜါ - တိဿာထေရဳကဵုဥပ္ပတိဿာထေရဳ။
ဒကာတြုံကၠောန်ၜိုတ်ၜါ - သောဏကဵုဥပသောဏ။
ဒကာဗြဴကၠောန်ၜိုတ်ၜါ - နန္ဒာကဵုသိရိမာ။
သၠုၚ်ကျာ်တြဲ - ဒှ် ၈၀ ဟတ်။
အာယုက်ကျာ်တြဲဒှ်မွဲလက်။ (မွဲလဟုတ်လေဝ်ဟီု)
ဒ္ဂေတ်ဒုက္ကရစရိယာဂှ် ဒှ်ပွိုၚ် ၁၀ ဂိတု။
ဆုဒလာဲကျာ်တြဲဂှ် - ဒှ်တၞံဂြၚ်အေက်။
*ဗီုဗောဓိသတ်ပိုဲ ဂွံပျးဒှ်သၟိၚ်စက္ကဝဝ်ဝိဇိတာဝဳ။
အခိၚ်ကျာ်တြဲကောဏ္ဍည က္တဵုဒှ်ဗောဓိသတ်ပိုဲ ဒှ်သၟိၚ်စက္ကဝဝ်မၞုံယၟု ဝိဇိတာဝဳ ပ္ဍဲဍုၚ်မၞုံယၟု စန္ဒဝတဳရ။ ကြဴဝွံ သၟိၚ်စက္ကဝဝ်ဝွံ သ္ဂောံဗဵုလ္ၚောဝ် သ္ဂောံကလၚ်ပၚ်မှိၚ်ဓရ်ကျာ်တြဲတုဲ ဓရ်သဒ္ဓါစေတနာ က္တဵုဒှ်ဇၞော်ကဵုဒြဟတ် ကဵုဒါန်မပ္တံသ္ပိုၚ်သ္ၚာရ။ ဖာပ်သၚ်ပိဏ္ဍပါတ်ကုကျာ်တြဲ ကေုာံ ကွးသာဝကဂမၠိုၚ်ရ။ ကျာ်တြဲရံၚ်နကဵုအနာဂတံသဉာဏ်တုဲ သာ်ဝွံပျးကဵုဒိုဟ်ရ။
အနာဂတေ ဂေါတမောနာမ ဗုဒ္ဓေါဘဝိဿတိ။
အယံရာဇာ၊ ၚ်သၟိၚ်စက်ကဝဝ်မၞုံယၟုဝိဇိတာဝဳ နွံဓရ်သဒ္ဓါမလျုၚ် ကေဝ်ဇြုၚ်လောန်ဝွံ။ အနာဂတေ၊ ပ္ဍဲဘဒ္ဒကဝ််ဂတတေံ။ ဂေါတမောနာမ၊ တၠဳဂဒ္ဒမၞုံယၟုဂေါတမ မဒှ်တၞောဝ်ကောန်သာကျဝၚ်။ ဗုဒ္ဓေါ၊ ၚ်ကျာ်တြဲမဂြၚ်တီဓရ်သစ္စပန်။ ဘဝိဿတိ၊ ကြက်က္တဵုဒှ်ဗွဲစၟတ်ဨကန်ရောၚ်။
“ယွံခမဳတံ သၟိၚ်စက္ကဝဝ်ဝွံ ဂတဏံ ပ္ဍဲဘဒ္ဒကဝ်တေံ ကြက်သ္ဂောံဒှ်ကျာ်သဗ္ဗညု ဂွံယၟုဂေါတမ ဂြၚ်ဓရ်အိုဿီုညံၚ်ရဴအဲကျာ်လၟုဟ် ဍာံစၟတ်ရ။”
ဗောဓိသတ်သၟိၚ်စက္ကဝဝ် ဂွံမိၚ်ဂလာန်ပျးဒိုဟ်ကျာ်တြဲတုဲ ပိုန်ဟာန်ယဿပတ်တံဂှ် ညံၚ်ရဴသၟိက်ဟန်ဗန်ကီု ပၠောပ်စိုတ်သၠးကဵုကောန်ဇာတ်တုဲ တိတ်ပခမဳ လေပ်ပိဋကတ်ပိ ကလိဂွံၛာန် စုတိစိုပ်ဍုၚ်ဗြီုရောၚ်။ ။ ။
- ဗုဒ္ဒဝၚ်ကျာ်တြဲ ကောဏ္ဍညတုဲရ။ ။ ။
၃။ ဗုဒ္ဓဝၚ်ကျာ်တြဲ မၚ်္ဂလ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲကောဏ္ဍည ပွိုၚ်မွဲလက်သၞာံ ဗဂေတ်ဖံဓရ်အမ္မရိုတ် ပ္ဍဲလိုက်တွံတုဲ အတိုၚ်သဘဴဓရ်လောက စာ်စ္ဍးဟွံမာန် သ္ပပရိနိဗ္ဗာန်ရ။ ကျာ်တြဲသ္ပပရိနိဗ္ဗာန်တုဲ ကဝ်လေဝ်လဟုတ်စှ်ေသိုက်က်တုဲ တူလေၚ်အာ၊ ကဝ်ဝွံ ကဝ်တၟိ ကလေၚ်တန်ပၠန်ရ။ ၜိုန်ကဝ်တန်လေဝ် လုကဴမွဲအသၚ်ဃယ်ကဝ် ဒှ်သုညကဝ် ကျာ်ဟွံက္တဵုဒှ်။ ကြဴဝွံ စိုပ်သာရမဏ္ဍကဝ်မွဲဂှ် ကျာ်တြဲမၚ်္ဂလ၊ ကျာ်တြဲသုမန၊ ကျာ်တြဲရေဝတ၊ ကျာ်တြဲသောဘိတ၊ ပန်ဇကုက္တဵုဒှ် ပ္ဍဲလိုက်ဝွံ ဗွဲလၟေၚ်ၚ်အိုတ်ရ။ ကာလစိုပ်ဒတန်အာယုက်သတ္တံ ၉-လက်ဂှ် ဗောဓိသတ်အလံၚ်ကျာ်တြဲမၚ်္ဂလ စုတိစှ်ေကၠုၚ်နူဍုၚ်သွဝ်တုဿိတာပူ က္တဵုဒှ်မၞိဟ်ပ္ဍဲဍုၚ်လိုက်ဝွံရ။
ဍုၚ်ဂှ် - ဍုၚ်ဥတ္တရ။
မအံက်ဂှ် - ဒှ်သၟိၚ်ဇၞော် ဥတ္တရ။
မိကျာ်ဂန်ဂှ် - ဒှ်ဂၞကျာ်ဇၞော် ဥတ္တရာဒေဝဳရ။
ဂၞကျာ်ဂှ် - ဒှ်ဂၞကျာ်ယသဒေဝဳ။
ကောန်ဂၠုဂှ် - ဒှ်သဳလဝ။
ကွးခမဳတြုံသတုံဇွိၜါ - သုဒေဝထေရ်ကဵုဓမ္မသေနထေရ်။
ကွးကၠောန်ၜိုတ်ဂှ် - ဒှ်ပါလိတထေရ်။
ကွးခမဳဗြဴသတုံဇွိၜါ - သိဝလာထေရဳကဵုအသောကာထေရဳ။
ဒကာတြုံကၠောန်ၜိုတ်ၜါ - နန္ဒကဵုဝိသခ။
ဒကာဗြဴကၠောန်ၜိုတ်ၜါ - အနုလာကဵုသုတနာ။
သၠုၚ်ကျာ်တြဲ - ဒှ် ၈၀ ဟတ်။
အာယုက်ကျာ်တြဲဒှ် ၈-လက်။ (၈-လဟုတ်လေဝ်ဟီု)
ဒ္ဂေတ်ဒုက္ကရစရိယာဂှ် ဒှ်ပွိုၚ် ၈ ဂိတု။
ဆုဒလာဲကျာ်တြဲဂှ် - ဒှ်တၞံအဂၞု။
ကျာ်တြဲမၚ်္ဂလဝွံ မၞုံဂုဏ်ဣဒ္ဓိအနုဘဴတၟေၚ်လောန်သန်ရ။ ကျာ်တြဲတၞဟ်သ္အာၚ်ဂမၠိုၚ် မၞုံလျးပကတိလောန် အိုတ်ဗၞတ် ၁၂-ယောဇနာ၊ အောန်အိုတ်ဗၞတ်မွဲဖိဟ် ကျာ်တြဲမၚ်္ဂလဝွံ နူဘဝၜတ်ၜတ်တေံ ဒှ်ခမဳမွဲဘဝ လျုၚ်ဇြုၚ်သ္ဍိုက်ကျာ်စေတဳလောန်ဗၞတ် ပူယာတ် ဖဍုက်ကၠေၚ်ဇကု ဟိုတ်သ္ဂောံသ္ပပူဇဴလဝ် ကျာ်စေတဳကီု၊ ကာလစိုပ်ကၞောတ်ဘဝ ညံၚ်သၟိၚ်ဝေသန္တဝ်ကီု ဂွံကဵုဒါန်ကောန်ၜါ ကုလကိုဟ်မွဲမၞုံယၟု ခါရဒဌိက လကိုဟ်ဂှ်ဂွံကောန်ၚာ်ၜါဂှ်တုဲ ဍေံကိတ်စကောန်ဇကုဆီပြးဍေၚ်၊ စေတနာဟွံလီု သီုမမိပ်တဴစိုတ် ဟိုတ်သ္ဂောံရာဒနာမိက်လဝ်ကီု၊ ကာလဒှ်ကျာ် တၟေၚ်နူကျာ်တၞဟ်သ္အာၚ် လျးစှ်လ္ၚီစက္ကဝါဟွံသ္ကုတ် ဂဵုတၟးမံၚ်လၟိုန်ရ။ မပ္တံဘုတ်ဘာ သ္ၚိဌာန် ဂြိုပ်ဂၞိၚ် ဆုဒုန်တံလေဝ် တုပ်ပမာညံၚ်ရဴကွိၚ်ဂြောပ်လဝ်ထဝ်ဂတှ်ေကီု၊ လျးတိတ်ဒၟံၚ်ဖျေဲဖျေဲဖျဴဖျဴလၟိုန်ရ။
ပ္တံနူအခိၚ်ကျာ်တြဲမၚ်္ဂလက္တဵုဒှ်တုဲ ဂိတု တ္ၚဲ သၞံၚ်နက်သတ်တံဂှ် ဗၞတ်လျး ဟွံယးတၟးဟေၚ် ဟွံသေၚ်ဏီ။ အပိုၚ်အခြာဣဝွံတ္ၚဲရ။ ဣဝွံ ဗ္တံရဂှ်လေဝ် ဟွံပြာကတ်ရ။ အခိၚ်ဂယးဂှ် ဒးစၟတ်သမ္တီ နကဵုရမျာၚ်စာၚ်ဂြဴ ဂစေံဂြဴရ။ အခိၚ်သဝ်တ္ၚဲဂှ် ဒးစၟတ်သမ္တီနကဵုခၟောံပ္ကဴတံတုဲ ဂွံတီအခိၚ်ရ။ မၞိဟ်ဂမၠိုၚ်လေဝ် အာကၠုၚ်ကီု ကၠောန်ကမၠောန်ကီု၊ နကဵုလျးကျာ်တြဲဂှ်ဟေၚ် အာကၠုၚ် ကၠောန်ကမၠောန်ကေၚ်ကာအိုတ်ရ။
*ဗီုဗောဓိသတ်ပိုဲ ဂွံပျးဒိုဟ်ဒှ်ဗမၞးသုရုစိ
ဗောဓိသတ်ပိုဲလေဝ် ပ္တံနူအခိၚ်ကလိဂွံနိယတပျးဒိုဟ် ဇရေၚ်ကျာတြဲဒိပၚ်ကိုရ်တုဲ ဂေတ်ဂၚေၚ်တဴသံသာ လုကဴအဓာန်ကာလမလံလရ။ ပ္ဍဲလက်ထက်ကျာ်တြဲမၚ်္ဂလဂှ် ကၠုၚ်က္တဵုဒှ်ပ္ဍဲဂကူသမ္ၚေဟ် ဗမၞးမွဲမၞုံယၟုသုရုစိရ။ ကြဴဝွံသ္ဂောံဗဵုလ္ၚောဝ်ကျာ် သ္ဂောံကလၚ်ဓရ်ကျာ်တြဲ သဒ္ဓါစေတနာဇၞော်ကဵုဒြဟတ် က္၁ဵုဒှ်ရ။ ကဵုဒါန်ဖာပ်သၚ်ပိဏ္ဍပါတ် ကျာ်တြဲ ကေုာံ ခမဳသာဝကမွဲကိုတ်၊ သၠ:ကဵုဒါန်မပ္တံ သပိုၚ်သ္ၚာနာနာသာ်ရ။
ကျာ်တြဲတွံဓရ် ဓမ္မဒေသနာပိဏ္ဍပါတ်တုဲ သ္ၚဳရံၚ်အနာဂတံသဉာဏ်ရ။ “ဗမၞးဝွံ ဂတဏံဒှ်ကျာ် ကလိဂွံသဗ္ဗညုတဉာဏ် ညံၚ်ရဴအဲကီုသွံ တီတုဲ ယွံဒကာညးတၠသဒ္ဓါ မၞုံယၟုသုရုစိ တၠအဲဂတဏံပ္ဍဲဘဒ္ဒကဝ် မၞုံကၞောတ်ပန်အသၚ်ဃယ်ပရဲမွဲလက်ကဝ်တေံ ကြက်သ္ဂောံဒှ်ကျာ်မွဲဇကု ဗွဲယၟုဂေါတမ မဂြၚ်တီကေတ်ဓရ်အိုဿီု ညံၚ်ရဴအဲကျာ်ကီု ဗွဲဨကန်ရောၚ်။” နဂလာန်မပ္တံမြဴသာ်ဝွံ ကဵုနိယတပျးဒိုဟ်ရောၚ်။
ဗောဓိသတ်ဂွံမိၚ်ကေတ် ဂလာန်ကျာ်တြဲဂှ်တုဲ တုပ်နၚ်တ္ၚဲယးဂွံဒှ်ကျာ်ရ မိပ်စိုတ်ဗွဲမလောန် ပိုန်ဟာန်ကောန်သမ္ဘာ သၠးပွးကၠေံတုဲ တိတ်သ္ပခမဳ လေပ်ပိဋကတ်ပိ ကလိဂွံၛာန် စုတိစိုပ်ဍုၚ်ဗြီုရောၚ်။
- ဗုဒ္ဓဝၚ်ကျာ်တြဲမၚ်္ဂလတုဲရ။
၄။ ဗုဒ္ဓဝၚ်ကျာ်တြဲ သုမန (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲမၚ်္ဂလသ္ပပရိနိဗ္ဗာန်တုဲ ဟိုတ်သတ္တံဟွံမၚ်မွဲဓရ် ဗွဲလၟေၚ်ၚ်အာယုက်သတ္တံ ဟုတ်စှ်ေကၠုၚ်စိုပ်အာယုက်စှ်သၞာံ နူအာယုက်စှ်သၞာံဂှ် ဟိုတ်သတ္တံမၚ်မွဲဓရ် ဇၞော်မောဝ်တိုန်စိုပ် အာယုက်မွဲအသၚ်ဃယ်၊ နူအာယုက်မွဲအသၚ်ဃယ်ဂှ် ဟိုတ်သတ္တံဟွံမၚ်မွဲဓရ်ပၠန်တုဲ ဟုတ်စှ်ေကၠုၚ်စိုပ်အာယုက် ၉-လက်ဂှ် ကျာ်တြဲသုမန က္တဵုဒှ်ပ္ဍဲလိုက်ဝွံရ။
ဍုၚ်ဂှ် - ဒှ်ဍုၚ်မေခလ။
မအံက်ဂှ် - ဒှ်သၟိၚ်ဇၞော် သုဒတ္တ။
မိကျာ်ဂန်ဂှ် - ဒှ်ဂၞကျာ်ဇၞော် သၟိၚ်သဳိရိမာ။
ဂၞကျာ်ဂှ် - ဒှ်ဂၞကျာ် ဝဋံသိကာဒေဝဳ။
ကောန်ဂၠုဂှ် - ဒှ်အနုပမ။
ကွးခမဳတြုံသတုံဇွိၜါ - သရဏထေရ်ကဵုဘဝိတတ္တထေရ်။
ကွးကၠောန်ၜိုတ်ဂှ် - ဒှ်ဥတေနထေရ်။
ကွးခမဳဗြဴသတုံဇွိၜါ - သောဏာထေရဳကဵုဥပသောဏာထေရဳ။
ဒကာတြုံကၠောန်ၜိုတ်ၜါ - ဥပ္ပဝရုဏကဵုသရဏ။
ဒကာဗြဴကၠောန်ၜိုတ်ၜါ - လာစာကဵုဥပလာစာ။
သၠုၚ်ကျာ်တြဲ - ဒှ် ၉၀ ဟတ်။
အာယုက်ကျာ်တြဲဒှ် ၉-လက်။ (၉-လဟုတ်လေဝ်ဟီု)
ဒ္ဂေတ်ဒုက္ကရစရိယာဂှ် ဒှ်ပွိုၚ် ၁၀ ဂိတု။
ဆုဒလာဲကျာ်တြဲဂှ် - ဒှ်တၞံအဂၞု။
*ဗီုဗောဓိသတ်ပိုဲ ဂွံပျးဒိုဟ် ဒှ်သၟိၚ်နာ်အတုလ။
ကာလကျာ်တြဲသုမနက္တဵုဒှ်ဂှ် ဗောဓိသတ်ပိုဲလေဝ် ဒှ်သၟိၚ်နာ်မၞုံယၟုအတုလရ။ ကြဴဝွံ မိၚ်ပရိုၚ်ကျာ်တြဲက္တဵုဒှ်တုဲ ကော်နၚ်ကလောနာ်ဂမၠိုၚ် သ္ပပူဇဴကျာ်တြဲ နကဵုဗရုကွိၚ်ကွိုက်နာနာသာ်ရ။ ကဵုဒါန်ယာတ်ကၟဝ် ဂိုၚ်ကေတ်သရဏဂုဏ်ပိ ကျာ် ဓရ် သၚ် လျုၚ်ဇြုၚ်သ္ဍိုက်ကျာ်တြဲဗွဲမလောန်ရ။ ကျာ်တြဲသုမနသ္ၚဳရံၚ်နကဵု အနာဂတံသဉာဏ်တုဲ သၟိၚ်နာ်ဝွံ ဂတဏံ က္တဵုဒှ်ကျာ်သဗ္ဗညု ဂြၚ်တီဓရ်အိုဿီု ညံၚ်အဲကီုသွံ တီကေတ်တုဲ ကဵုပျးဒိုဟ်မြဴသာ်ဝွံရ။
ယွံခမဳတံ သၟိၚ်နာ်အတုလဝွံ ဂတဏံ ပ္ဍဲလ္တူပန်အသၚ်ဃယ်ကဝ်ပရဲမွဲလက် ဘဒ္ဒကဝ်တေံ ကြက်ဂွံက္တဵုဒှ်ကျာ်သဗ္ဗညုဗွဲစၟတ်ရ။ ဂလာန်မပ္တံမြဴသာ်ဝွံ ကဵုပျးဒိုဟ်ရောၚ်။ သၟိၚ်နာ်မိပ်စိုတ်ဗွဲမလောန် ကလေၚ်စှ်ေစိုပ်အာဍုၚ်နာ်တေံပၠန်ရောၚ်။
၅။ ဗုဒ္ဓဝၚ်ကျာ်တြဲ ရေဝတ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲသုမနပေၚ်အာယုက် ၉-လက်တုဲ သ္ပပရိနိဗ္ဗာန်ရ။ နူတန်အာယုက် ၉-လက်ဂှ် ဟုတ်စှ်ေကၠုၚ် စိုပ်အာယုက်စှ်သၞာံ ဇၞော်မောဝ်တိုန်အာ စိုပ်မွဲအသၚ်ဃယ် နူတန်အာယုက်မွဲအသၚ်ဃယ်ဂှ် စိုပ်ဒတန်အာယုက်သတ္တံ ၆-လက်ပၠန်ဂှ် ကျာ်တြဲရေဝတ က္တဵုဒှ်ပ္ဍဲလိုက်ဝွံရ။
ဍုၚ်ဂှ် - ဒှ်ဍုၚ်သုဓညဝတဳ။
မအံက်ဂှ်- ဒှ်သၟိၚ်ဇၞော်ဝိပုလ။
မိကျာ်ဂန်ဂှ် - ဒှ်ဂၞကျာ်ဇၞော် ဝိပုလာဒေဝဳ။
ဂၞကျာ်ဂှ်-ဒှ်ဂၞကျာ် သုဒဿနာ။
ကောန်ဂၠုဂှ် - ဒှ်ဝရုဏ။
ခမဳတြုံသတုံဇွိၜါ- ဝရုဏထေရ်ကဵုဗြဟ္မဒေဝထေရ်။
ခမဳကၠောန်ၜိုတ်ဂှ်- ဒှ်သမ္ဘဝထေရ်။
ခမဳဗြဴသတုံဇွိၜါ- ဘဒ္ဒါထေရဳကဵုသုဘဒ္ဒါထေရဳ။
(ဒကာတြုံဗြဴကၠောန်ၜိုတ် ဟွံပြာကတ်)
သၠုၚ်ကျာ်တြဲ ဒှ်၈၀-ဟတ်။
အာယုက်ကျာ်တြဲ -ဒှ်၆-လက် (၆-လဟုတ်လေဝ်ဟီု)။
ဒ္ဂေတ်ဒုက္ကရစရိယာ -ဒှ်ပွိုၚ် ၇-ဂိတု။
ဆုဒလာဲကျာ်တြဲ - ဒှ်တၞံအဂၞု။
(လျးကျာ်တြဲဝွံ ပ္ဍဲပွိုၚ်ဌာန်မွဲယောဇနာ တၟးဒၟံၚ်ရ။)
*ဗီုဗောဓိသတ်ပိုဲ ဂွံပျးဒိုဟ် ဒှ်ဗမၞးအတိဒေဝ။
ပ္ဍဲအခိၚ်ကာလကျာ်ကျာ်တြဲရေဝတက္တဵုဒှ်ဂှ် ဗောဓိသတ်ပိုဲ က္တဵုဒှ်ပ္ဍဲဂကူသမ္ၚေဟ် ဗမၞးမွဲမၞုယၟုအတိဒေဝ ပ္ဍဲဍုၚ်ရမ္မဝတဳရ။ မိၚ်ပရိုၚ်ဂုဏ်ကျာ်တြဲတုဲ အာစိုပ်ဇရေၚ်ကျာ်တြဲ လ္ၚောဝ်အကြီုဂုဏ်သဳလ သမာဓိ ပညာကျာ်တြဲ နကဵုလ္ၚီဂါထာ ကဵုဒါန်သ္ၚာကုကျာ်တြဲ မထေက်ၚုဟ်မးထဝ်လ္ၚီကသာပ် လျုၚ်ဇြုၚ်သ္ဍိုက်ကျာ်တြဲဗွဲမလောန်ရ။ ကျာ်တြဲသ္ၚဳရံၚ်ဗမၞးဝွံ နကဵုအနာဂတံသဉာဏ်တုဲ သာ်ဝွံ ကဵုပျးဒိုဟ်ရ။
“ယွံခမဳတံ ဗမၞးအတိဒေဝမဒှ်ကောန်ဍုုၚ်ရမ္မဝတဳဝွံ ဗွဲဂုဏ်ညးတၞဟ်ပြိုၚ်ပ္ကာန်ဟွံမာန် ဒယှ်တှ်တဴ စဵုစိုပ်ဘဝဂ်ရောၚ်။ ဂတဝွံ ကြက်သဂွံဒှ်ကျာ် သဗ္ဗညုမွဲဇကု ဗွဲယၟုဂေါတမ ညံၚ်ရဴအဲကီု ဗွဲစၟတ်ဨကန်ရ။” ဂလာန်မပ္တံမြဴသာ်ဝွံ ကဵုပျးဒိုဟ်ရ။
ဗောဓိသတ်မိၚ်ဂလာန် ပျးဒိုဟ်ကျာ်တြဲရေဝတဂှ်တုဲ မိပ်တဴစိုတ်ဗွဲမလောန် ဟွံဂွံဟိုတ်မှာဲ ဂိုတ်ဂၠာဲဗပေၚ်ပါရမဳ မပ္တံဒါနသဳလ စဵုစိုပ်လအိတ်အာယုက်၊ စုတိနူဘဝဂှ် အာက္တဵုဒှ်ပ္ဍဲဍုၚ်သွဝ်ရောၚ်။
- ဗုဒ္ဓဝၚ်ကျာ်တြဲရေဝတတုဲရ။
၆။ ဗုဒ္ဓဝၚ်ကျာ်တြဲ သောဘိတ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲရေဝတလေဝ် အတိုၚ်သဘဴဓရ်သၚ်္ခါရပြုပြေၚ်ဂှ် ကလိလောန်ဟွံမာန် က္ညစဴဌာန်နိဗ္ဗာန်တုဲ အာယုက်သတ္တံလေဝ် ဟုတ်စှ်ေသိုက်က် စိုပ်အာယုက်စှ်သၞာံ နူဂှ်ဟိုတ်နူသတ္တံ မၚ်မွဲဓရ်ပၠန်တုဲ ဇၞော်မောဝ်တိုန်အာ စိုပ်အာယုက်မွဲအသၚ်ဃယ် နူဂှ် ဟိုတ်နူသတ္တံဟွံမၚ်မွဲဓရ်တုဲ ကလေၚ်ဟုတ်စှ်ေ စိုပ်ဒတန်အာယုက်သတ္တံ ၉-လက်ဂှ် ကျာ်တြဲသောဘိတ က္တဵုဒှ်ပ္ဍဲလိုက်ဝွံရ။
ဍုၚ်ဂှ် - ဒှ်ဍုၚ်သုဓမ္မ။
မအံက်ဂှ်- ဒှ်သၟိၚ်ဇၞော်သုဓမ္မ။
မိကျာ်ဂန်ဂှ် - ဒှ်ဂၞကျာ်ဇၞော် မခိလာဒေဝဳ။
ဂၞကျာ်ဂှ်-ဒှ်ဂၞကျာ် - ။
ကောန်ဂၠုဂှ် - ဒှ်သဳဟကုမာရ။
ခမဳတြုံသတုံဇွိၜါ- အသမထေရ်ကဵုသုနေတ္တထေရ်။
ခမဳကၠောန်ၜိုတ်ဂှ်- ဒှ်အနောမထေရ်။
ခမဳဗြဴသတုံဇွိၜါ- နကုလာထေရဳကဵုသုဇာတာထေရဳ။
ဒကာတြုံကၠောန်ၜိုတ် - ဒှ်သၟိၚ်ဇယဖသန။
(ဒကာဗြဴကၠောန်ၜိုတ် ဟွံပြာကတ်)
သၠုၚ်ကျာ်တြဲ ဒှ် ၅၈-ဟတ်။
အာယုက်ကျာ်တြဲ -ဒှ် ၉-လက်။
ဒ္ဂေတ်ဒုက္ကရစရိယာ -ဒှ်ပွိုၚ် ၇-တ္ၚဲ။
ဆုဒလာဲကျာ်တြဲ - ဒှ်တၞံအဂၞု။
*ဗီုဗောဓိသတ်ပိုဲ ဂွံပျးဒိုဟ် ဒှ်ဗမၞးသုဇာတ။
လက်ထက်ကျာ်တြဲသောဘိတဂှ် ဗောဓိသတ်ပိုဲ က္တဵုဒှ်ပ္ဍဲဂကူသမ္ၚေဟ် ဗမၞးမွဲမၞုံယၟုသုဇာတပ္ဍဲရမ္မဝတဳရ။ ဒးကာလမွဲတ္ၚဲ ဗမၞးဂွံကလၚ်ပၚ်မှိၚ်ဓရ်ကျာ်တြဲတုဲ စိုတ်လျုၚ်ဇြုၚ်သ္ဍိုက်ဗွဲမလောန် ပြာပ်အာဇရေၚ်ကျာ်တြဲ ဂိုၚ်ကေတ်သရဏဂုဏ်ပိ ဖာပ်ပိဏ္ဍပါတ်ကျာ်တြဲ ကေုာံ ကွးသာဝကဂမၠိုၚ် လုကဴမွဲဝှ်ပိဂိတုရ။ ကျာ်တြဲလေဝ် သ္ၚဳရံၚ်နကဵုအနာဂတံသဉာဏ်တုဲ တီကေတ်ပါရမဳဗောဓိသတ်တုဲ ဟီုထ္ၜးကဵုပျးဒိုဟ်မြဴသာ်ဝွံရ။
“ယွံခမဳတံ သမ္ၚေဟ်သုဇာတဝွံ ဒှ်ပူဂဵုသာမညအပြောမ်ဟွံသေၚ် ဒှ်ပူဂဵုတၟေၚ် အလံၚ်ကျာ်ဟံၚ်ပြာ်သတ္တံရောၚ်။ ပ္ဍဲဘဒ္ဒကဝ်ဂတတေံ ကြက်က္တဵုကျာ်မွဲဇကု ဗွဲယၟုဂေါတမ ဂြၚ်တီဓရ် ညံၚ်ရဴအဲကျာ်ကီုရောၚ်။”
ဗောဓိသတ် ဂွံမိၚ်ကေတ်ဂလာန်ပျးဒိုဟ်ကျာ်တြဲတုဲ မိပ်စိုတ်ဗွဲမလောန် ထပ်ဂိုတ်ကၠောန်ပြဝကုသိုလ် မပ္တံဒါန သဳလဂၠိုၚ်ဂၠၚ် မၚ်မွဲသာသနာ ထံက်ပၚ်သာသနာ စဵုစိုပ်လ္အိတ်အာယုက်ရောၚ်။
- ဗုဒ္ဓဝၚ်ကျာ်တြဲ သောဘိတတုဲရ။
၇။ ဗုဒ္ဓဝၚ်ကျာ်တြဲ အနောမဒဿဳ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲသောဘိတ က္ညစဴအာနိဗ္ဗာန်တုဲ လုကဴမွဲပသၚ်ဃယ်ကဝ် ကဝ်သုန် ကျာ်တြဲဟွံက္တဵုဒှ်သက်က်ရ။ ကြဴဝွံ စိုပ်ဝရကဝ်မွဲဂှ် ကျာ်ပိဇကု ကျာ်တြဲအနောမဒဿဳ ကျာ်တြဲပဒုမ ကျာ်တြဲနာရာဒ၊ က္တဵုဒှ်ကၠုၚ်ပ္ဍဲလိုက်ဝွံ ဗွဲလၟေၚ်ၚ်ရ။ ပၞောဝ်ကျာ်ပိဇကုဂှ် အလံၚ်ကျာ်အနောမဒဿဳ ပါရမဳ ၁၆-အသၚ်ဃၚ်ဃယ်ပရဲမွဲလက်ကဝ် ဍိုက်ပေၚ်ကၠုၚ်တုဲ ပ္ဍဲစိုပ်ဒတန်အာယုက်သတ္တံ ၁-လက်ဂှ် က္တဵုဒှ်ပ္ဍဲလိုက်ဝွံရ။
ဍုၚ်ဂှ် - ဒှ်ဍုၚ်စန္ဒဝတဳ။
မအံက်ဂှ်- ဒှ်သၟိၚ်ဇၞော်ယသဝါ။
မိကျာ်ဂန်ဂှ် - ဒှ်ဂၞကျာ်ဇၞော် ယသောဓရာဒေဝဳ။
ဂၞကျာ်ဂှ်-ဒှ်ဂၞကျာ် - သိရိမာယာဒေဝဳ။
ကောန်ဂၠုဂှ် - ဒှ်ဥပဝါန။
ခမဳတြုံသတုံဇွိၜါ- နိသဘထေရ်ကဵုအနောမထေရ်။
ခမဳကၠောန်ၜိုတ်ဂှ်- ဒှ်ဝရုဏထေရ်။
ခမဳဗြဴသတုံဇွိၜါ- သုန္ဒရဳထေရဳကဵုသုမနာထေရဳ။
ဒကာတြုံကၠောန်ၜိုတ် - ဒှ်သၟိၚ်ဓမ္မိက။
(ဒကာဗြဴကၠောန်ၜိုတ် ဟွံပြာကတ်)
သၠုၚ်ကျာ်တြဲ ဒှ် ၅၈-ဟတ်။
အာယုက်ကျာ်တြဲ -ဒှ် ၁-လက်။
ဒ္ဂေတ်ဒုက္ကရစရိယာ -ဒှ်ပွိုၚ် ၁၀-ဂိတု။
ဆုဒလာဲကျာ်တြဲ - ဒှ်တၞံကၠောၚ်။
*ဗီုဗောဓိသတ်ပိုဲ ဂွံပျးဒိုဟ် ဒှ်သ္ကိုပ်ပၞာန်လကိုဟ်။
လက်ထက်ကျာ်တြဲ အနောမဒဿဳဝွံ ဗောဓိသတ်ပိုဲ ဟိုတ်ကမ်ကုသိုလ်ဍိုန်လျတုဲ ဒးအာက္တဵုဒှ် ပ္ဍဲဘဝလကိုဟ်၊ ဒှ်သ္ကိုပ်ပၞာန်လကိုဟ် ပိုၚ်ပြဳလဝ်ဗဵုလဗး လကိုဟ်စှ်ကိုတ်ရ။ ဒးကာလမွဲတ္ၚဲ မိၚ်ပရိုၚ်ဂုဏ်ကျာ်နိမိတ်ဗဒှ်လဝ် ကၞာထးရတ်မွဲ နိမန်က္ညနၚ်ကျာ်တြဲ ကေုာံ ခမဳဂမၠိုၚ် ဖာပ်သၚ်ကလၚ်ဓရ် ဗၞတ်ထပှ်တ္ၚဲ စိုတ်စေတနာ လျုၚ်ဇြုၚ်သ္ဍိုက်ဗွဲမလောန်ရ။ ကျာ်တြဲသ္ၚဳရံၚ်နကဵုအနာဂတံသဉာဏ် တီကေတ်ဒဒှ်လကိုဟ်ဝွံ ဒှ်ညးတၠပါရမဳတုဲ “ယွံခမဳတံ သ္ကိုပ်ပၞာန်လကိုဟ်ဝွံ ဂတဏံပ္ဍဲလအိတ်ဘဒ္ဒကဝ်တေံ ကြက်က္တဵုဒှ်ကျာ်မွဲဇကု ဗွဲယၟုဂေါတမညံၚ်ရဴအဲကျာ်ကီုရောၚ်။” သာ်ဝွံ ကဵုပျးဒိုဟ်ရ။ လကိုဟ်ဂှ် မိၚ်ဂလာန်ပျးဒိုဟ်ကျာ်တြဲတုဲ မိပ်စိုတ်ဗွဲမလောန် ထပ်ဂိုတ်လွဳပြဝကုသိုလ်ပၠန်ရောၚ်။
- ဗုဒ္ဓဝၚ်ကျာ်တြဲ အနောမဒဿဳတုဲရ။
၈။ ဗုဒ္ဓဝၚ်ကျာ်တြဲ ပဒုမ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲအနောမဒဿဳ သ္ပပရိနိဗ္ဗာန်တုဲ အာယုက်သတ္တံဟုတ်စှ်ေ စိုပ်စှ်သၞာံ နူဂှ်ဇၞော်မောဝ်တိုန် အာစိုပ်မွဲအသၚ်ဃယ် နူဂှ်ဟုတ်စှ်ေ စိုပ်ဒတန်အာယုက်သတ္တံမွဲလက်ဂှ် အလံၚ်ကျာ်တြဲပဒုမ ပါရမဳကြံၚ်ဍုဟ်တုဲ စုတိစှ်ေနူသွဝ်တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်ဍုၚ်စမ္မက။
မအံက်ဂှ် - ဒှ်သၟိၚ်ဇၞော် အသမ။
မိကျာ်ဂန်ဂှ် - ဒှ်ဂၞကျာ်ဇၞော်အသမဒေဝဳ။
ဂၞကျာ်ဂှ် - ဒှ်ဥတ္တရာဒေဝဳ။
ကောန်ဂၠုဂှ် - ဒှ်ရမ္မ။
ကွးခမဳတြုံသတုံဇွိၜါ - သာလထေရ်ကဵုဥပသာလထေရ်။
ခမဳကၠောန်ၜိုတ်ဂှ် - ဒှ်ဝရုဏထေရ်။
ကွးခမဳဗြဴသတုံဇွိၜါ - ရာဓာထေရဳကဵုသုရာဓာထေရဳ။
ဒကာတြုံကၠောန်ၜိုတ်ၜါ - ဒှ်ဘိယျကဵုအသမ။
ဒကာဗြဴကၠောန်ၜိုတ်ၜါ - ဒှ်ရုစဳကဵုနန္ဒရာမာ။
သၠုၚ်ကျာ်တြဲ - ဒှ် ၅၈-ဟတ်။
အာယုက်ကျာ်တြဲ - ဒှ်မွဲလက်။
ဒ္ဂေတ်ဒုက္ကရစရိယာ - ဒှ်ပွိုၚ် ၈-ဂိတု။
ဆုဒလာဲကျာ်တြဲ - ဒှ်တၞံဆုဂြၚ်အေက်။
*ဗီုဗောဓိသတ်ပိုဲဂွံပျးဒိုဟ် ဒှ်သၟိၚ်ဇာဒိသိုၚ်။
ပ္ဍဲလက်ထက်ဂှ် ဗောဓိသတ်ပိုဲဒှ်ဂကူဇာဒိသိုၚ် ဒှ်သၟိၚ်ဇာဒိသိုၚ်ရ။ ဒးကာလမွဲတ္ၚဲ ဂွံကဵုညာတ်ကေတ် ကျာ်တြဲပဒုမ ဃောဒ္ဂိုန်ဝှ်လုပ်စနိရောဓသမာပတ် ပ္ဍဲဂြိုပ်ဂှ် စိုတ်လျုၚ်သ္ဍိုက်ဗွဲမလောန် လုကဴထပှ်တ္ၚဲ ဟွံဂၠာဲစစၞ ဗဵုလ္ၚောဝ်ဒၟံၚ် မၚ်ဒၟံၚ်ကျာ်တြဲရ။ ကျာ်တြဲတီကေတ်ဒဒှ်ဂှ်တုဲ သာ်ဝွံကဵုပျးဒိုဟ်ရ။ “ယွံခမဳတံ သၟိၚ်ဇာဒိသိုၚ်ဝွံ ဂတဏံပ္ဍဲဘဒ္ဒကဝ်တေံ ကြက်ဂွံဒှ်ကျာ်မွဲဇကု ဗွဲယၟုဂေါတမ ဂွံဟံၚ်ဖျဴဏာသတ္တံ ညံၚ်အဲကျာ်ကီုရောၚ်။” သၟိၚ်ဇာဒိသိုၚ်မိၚ်တုဲ မိပ်စိုတ်ဗွဲမလောန်ရောၚ်။
- ဗုဒ္ဓဝၚ်ကျာ်တြဲ ပဒုမတုဲရ။
၉။ ဗုဒ္ဓဝၚ်ကျာ်တြဲ နာရဒ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲပဒုမ သ္ပပရိနိဗ္ဗာန်တုဲ သာသနာလေဝ်ကၠေံဗ္ဒန်အာ၊ နူအာယုက်သတ္တံ မွဲလက်ဂှ်ဟုတ်စှ်ေစိုပ်စှ်သၞာံ နူဂှ်မောဝ်တိုန် စိုပ်မွဲအသၚ်ဃယ် နူဂှ်ဟုတ်စှ်ေစိုပ်ဒတန်အာယုက်သတ္တံ မွဲကိုတ်ပၠန်ဂှ် အလံၚ်ကျာ်နာရဒ စုတိစှ်ေနူဍုၚ်သွဝ် တုဿိတာပူတုဲ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်ဓညဝတဳ။
မအံက်ဂှ် - ဒှ်သၟိၚ်ဇၞော် သုဒေဝ။
မိကျာ်ဂန်ဂှ် - ဒှ်ဂၞကျာ်ဇၞော်အနောမာဒေဝဳ။
ဂၞကျာ်ဂှ် - ဒှ်ဂၞကျာ် ဝိဇိတသေနာ။
ကောန်ဂၠုဂှ် - ဒှ်နန္ဒုတ္တရ။
ကွးခမဳတြုံသတုံဇွိၜါ - ဘဒ္ဒသာလထေရ်ကဵုဇိနမိတ္တထေရ်။
ခမဳကၠောန်ၜိုတ်ဂှ် - ဒှ်ဝါသိဌထေရ်။
ကွးခမဳဗြဴသတုံဇွိၜါ - ဥတ္တရာထေရဳကဵုဖဂ္ဂုနဳထေရဳ။
ဒကာတြုံကၠောန်ၜိုတ်ၜါ - ဥဂ္ဂရိန္ဒကဵုဝသဘ။
ဒကာဗြဴကၠောန်ၜိုတ်ၜါ - ဒှ်ဣန္ဒာဝရဳကဵုဝဏ္ဍဳ။
သၠုၚ်ကျာ်တြဲ - ဒှ် ၈၀-ဟတ်။
အာယုက်ကျာ်တြဲ - ဒှ် ၉-လက်။ (၉-လဟုတ်လေဝ်ဟီု)
ဒ္ဂေတ်ဒုက္ကရစရိယာ - ဒှ်ပွိုၚ် ၇-တ္ၚဲ။
ဆုဒလာဲကျာ်တြဲ - ဒှ်တၞံဆုဂြၚ်အေက်။
*ဗီုဗောဓိသတ်ပိုဲဂွံပျးဒိုဟ် ဒှ်ရသိ။
ပ္ဍဲလက်ထက်ဂှ် ဗောဓိသတ်ပိုဲဒှ်တၠရသိ ကလိဂွံၛာန် ပဒတဴဒၟံၚ် ပ္ဍဲဂြိုပ်ဟေမဝန်တံရ။ ကျာ်တြဲနာရဒ စွံဓရ်မေတ္တာလ္တူရသိဗောဓိသတ်တုဲ ပွဳပွိုၚ်ကေတ်ခမဳတၠအရှန် ဒ္စာံစှော်ကိုတ် ကေုာံ ဥပ္ပးအနာဂါမ်ကၠံကိုတ် ဂၚေၚ်ဒေသစာရဳ က္ညအာဒၞာဲဒၟံၚ်ဗောဓိသတ်တေံရ။ ဗောဓိသတ်သ္ဂောံဗဵုလ္ၚောဝ်ကျာ် သ္ဂောံကလၚ်ဓရ် မိပ်တဴစိုတ်ဗွဲမလောန် ဒုၚ်နၚ်ပိဏ္ဍပါတ် စၞအာဟာရဘောဇိုန် နူတ္ကံဥတ္တရဂုရုနကဵုဣဒ္ဓိ ဖာပ်ဗ္စကျာ်တြဲ ကေုာံ ကွးသာဝကဂမၠိုၚ် လုကဴထပှ်တ္ၚဲရ။ ကျာ်တြဲနာရဒ သ္ၚဳနကဵုအနာဂတံသဉာဏ်တုဲ သာ်ဝွံကဵုပျးဒိုဟ်ရ။
“ယွံခမဳတံ တၠရသိဝွံ ဂတဏံပ္ဍဲဘဒ္ဒကဝ်တေံ ကြက်ဂွံဒှ်ကျာ်သဗ္ဗညု ဗွဲယၟုဂေါတမ မဂြၚ်တီကေတ်ဓရ်သစ္စပန် ညံၚ်ရဴအဲကျာ်လၟုဟ်ဝွံကီုရောၚ်။” တၠရသိဗောဓိသတ် ဂွံမိၚ်ကေတ်ဂလာန်ဂှ် မိပ်စိုတ်ဗွဲမလောန် ဂိုတ်ကၠောန်ကုသိုလ်မဂၠိုၚ် စုတိနူဂှ် အာက္တဵုဒှ်ပ္ဍဲဍုၚ်ဗြီုတေံရောၚ်။
- ဗုဒ္ဓဝၚ်ကျာ်တြဲ နာရဒတုဲရ။
၁၀။ ဗုဒ္ဓဝၚ်ကျာ်တြဲ ပဒုမုတ္တရ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲနာရဒ က္ညစဴအာနိဗ္ဗာန်တုဲ ဝရကဝ်ဂှ် ဗွဲလၟေၚ်ဓမ္မတာဓရ်သၚ်္ခါရ ဟုတ်စှ်ေလီုတူအာရ။ ကြဴဝွံ လုကဴမွဲအသၚ်ဃယ်ကဝ် ကဝ်သုန်ကျာ်ဟွံက္တဵုဒှ်ရ။ ကြဴနူဂှ်ပၠန် သာရကဝ်မွဲ က္တဵုဒှ်ကၠုၚ်ရ။ ပ္ဍဲသာရကဝ်ဂှ် ပ္ဍဲဒတန်အာယုက်သတ္တံမွဲကိုတ် အလံၚ်ကျာ်ပဒုမုတ္တရ စုတိစှ်ေကၠုၚ်နူဍုၚ်သွဝ် တုဿိတာပူတုဲ က္တဵုဒှ်မၞိဟ်ပ္ဍဲဍုၚ်လိုက်ဝွံရ။
ဍုၚ်ဂှ် - ဒှ်ဍုၚ်ဟံသာဝတဳ။
မအံက်ဂှ် - ဒှ်သၟိၚ်ဇၞော် အနန္ဒ။
မိကျာ်ဂန်ဂှ် - ဒှ်ဂၞကျာ်ဇၞော်သုဇာတာဒေဝဳ။
ဂၞကျာ်ဂှ် - ဒှ်ဂၞကျာ် ဝသုဒတ္တာဒေဝဳ။
ကောန်ဂၠုဂှ် - ဒှ်ဥတ္တရ။
ကွးခမဳတြုံသတုံဇွိၜါ - ဒေဝလထေရ်ကဵုသုဇာတထေရ်။
ခမဳကၠောန်ၜိုတ်ဂှ် - ဒှ်သုမနထေရ်။
ကွးခမဳဗြဴသတုံဇွိၜါ - အမိတ္တာထေရဳကဵုအသမာထေရဳ။
ဒကာတြုံကၠောန်ၜိုတ်ၜါ - ဒှ်ပိတိဏ္ဏကဵုတိဿ။
ဒကာဗြဴကၠောန်ၜိုတ်ၜါ - ဒှ်ဟဌာကဵုဝိစိတ္တ။
သၠုၚ်ကျာ်တြဲ - ဒှ် ၅၈-ဟတ်။
အာယုက်ကျာ်တြဲ - ဒှ် မွဲကိုတ်။ (မွဲလက်လေဝ်ဟီု)
ဒ္ဂေတ်ဒုက္ကရစရိယာ - ဒှ်ပွိုၚ် ၇-တ္ၚဲ။
ဆုဒလာဲကျာ်တြဲ - ဒှ်တၞံပၞာၚ်သေံ။
*ဗီုဗောဓိသတ်ပိုဲဂွံပျးဒိုဟ် ဒှ်သမ္ၚေဟ်ဇဋိလ။
လက်ထက်ကျာ်တြဲပဒုမုတ္တိုရ် ဗောဓိသတ်ပိုဲက္တဵုဒှ်သေဌဳဇၞော်မွဲ မၞုံယၟုဇဋိလ မၞုံကဵုကြက်ဒြပ်မဂၠိုၚ် ဒးကာလမွဲတ္ၚဲ က္ညဖျဴနၚ်ကျာ် ကေုာံ ခမဳသၚ်ကွးဂမၠိုၚ် ကဵုဒါန်ပိဏ္ဍပါတ်နာနာသာ် သီုသ္ပိုၚ်သ္ၚာရ။ ကျာ်တြဲသ္ၚဳရံၚ်နကဵုအနာဂတံသဉာဏ်တုဲ သာ်ဝွံကဵုပျးဒိုဟ်ရ။
“ယွံခမဳတံ သေဌဳဇၞော်ဝွံ ဂဝဏံပ္ဍဲဘဒ္ဒကဝ်တေံ ကြက်ဂွံဒှ်ကျာ်သဗ္ဗညု ဗွဲယၟုဂေါတမ ညံၚ်ရဴအဲကီုရောၚ်။” သေဌဳမိၚ်တုဲမိပ်စိုတ်ဗွဲမလောန် ထပ်ကၠောန်ကုသိုလ်ပၠန်ရောၚ်။
- ဗုဒ္ဓဝၚ်ကျာ်တြဲ ပဒုမုတ္တိုရ်တုဲရ။
၁၁။ ဗုဒ္ဓဝၚ်ကျာ်တြဲ သုမေဓ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]သာရကဝ် ကျာ်တြဲပဒုမုတ္တိုရ်က္တဵုဒှ်ဂှ် တူအာတုဲ ကြဴဝွံ ထပှ်လက်ကဝ်သုန်ကျာ်တြဲဟွံက္တဵုဒှ်ရ။ ကြဴဝွံ မဏ္ဍကဝ်မွဲ က္တဵုဒှ်ကၠုၚ်ရ။ ပ္ဍဲကဝ်ဂှ်ကျာ်တြဲၜါဇကု ကျာ်တြဲသုမေဓမွဲ ကျာ်တြဲသုဇာတမွဲ က္တဵုဒှ်ကၠုၚ်ဗွဲလၟေၚ်ၚ်ရ။ ပၞောဝ်ကျာ်တြဲၜါဇကုဂှ် ပ္ဍဲဒတန်အာယုက်သတ္တံ ၉-လက်ဂှ် အလံၚ်ကျာ်တြဲသုမေဓ ပါရမဳကြံၚ်ဍုဟ်ဍိုက်ပေၚ်တုဲ စုတိစှ်ေသွဝ်တညဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်သုဒဿန။
မအံက်ဂှ် - ဒှ်သၟိၚ်ဇၞော် သုဒတ္တ။
မိကျာ်ဂန်ဂှ် - ဒှ်ဂၞကျာ်ဇၞော်သုဒတ္တာဒေဝဳ။
ဂၞကျာ်ဂှ် - ဒှ်ဂၞကျာ် သုမနာဒေဝဳ။
ကောန်ဂၠုဂှ် - ဒှ်ပုနဗ္ဗသုမိတ္တ။
ကွးခမဳတြုံသတုံဇွိၜါ - သရဏထေရ်ကဵုသဗ္ဗကာထေရ်။
ခမဳကၠောန်ၜိုတ်ဂှ် - ဒှ်သာဂရထေရ်။
ကွးခမဳဗြဴသတုံဇွိၜါ - ရာမထေရဳကဵုသုရာမာထေရဳ။
ဒကာတြုံကၠောန်ၜိုတ်ၜါ - ဥရုဝေလကဵုယသဝါ။
ဒကာဗြဴကၠောန်ၜိုတ်ၜါ - ဒှ်ယသောဓရာကဵုသိရိမာ။
သၠုၚ်ကျာ်တြဲ - ဒှ် ၈၀-ဟတ်။
အာယုက်ကျာ်တြဲ - ဒှ် ၉-လက်။ (၉-လဟုတ်လေဝ်ဟီု)
ဒ္ဂေတ်ဒုက္ကရစရိယာ - ဒှ်ပွိုၚ် ၁၅-တ္ၚဲ။
ဆုဒလာဲကျာ်တြဲ - ဒှ်တၞံသၠီ။
*ဗီုဗောဓိသတ်ပိုဲဂွံပျးဒိုဟ် ဒှ်ဗမၞးဥတ္တရ။
ပ္ဍဲလက်ထက်ကျာ်တြဲသုမေဓဂှ် ဗောဓိသတ်ပိုဲက္တဵုဒှ်မၞိဟ် ပ္ဍဲဂကူသမ္ၚေဟ် မၞုံကဵုကြက်ဒြပ်မဂၠိုၚ်ဗၞတ် ၈၀-ကိုတ် ယၟုဥတ္တရ ဒယှ်တှ်တဴဗွဲမလောန်ရ။ ဒးကာလမွဲတ္ၚဲ သမ္ၚေဟ်ဥတ္တရသ္ဂောံမိၚ်ပရိုၚ်ကျာ်တြဲ တိတ်ဗဵုလ္ၚောဝ်ကလၚ်ဓရ် သဒ္ဓါစေတနာဇၞော်ကဵုဒြဟတ်က္တဵုဒှ် နိမန်ကျာ် ကေုာံ ကွးသာဝကဂမၠိုၚ် ဖာပ်သၚ်ကဵုဒါန် ကပေါတ်ဝတ္ထုပရိက္ခရာ မပ္တံသပိုၚ်သ္ၚာဗွဲမဂၠိုၚ်ဂၠၚ်ရ။ ကြဴဝွံ သၠးကၠေံဒြပ် သၠးကၠေံကောန်သမ္ဘာ တိတ်ပခမဳပ္ဍဲသာသနာကျာ်ရ။ ကာလဂှ် ကျာ်တြဲသ္ၚဳရံၚ်သမ္ၚေဟ်ဂှ် နကဵုအနာဂတံသဉာဏ်တုဲ သာ်ဝွံကဵုပျးဒိုဟ်ရ။
“ယွံခမဳတံ သမ္ၚေဟ်ဝွံ ဂတဏံပ္ဍဲဘဒ္ဒကဝ်တေံ ကြက်ဂွံဒှ်ကျာ်သဗ္ဗညုမွဲ ဗွဲယၟုဂေါတမ မဂြၚ်တီဓရ်သစ္စပန် ညံၚ်ရဴအဲကျာ်ကီုရောၚ်။” သမ္ၚေဟ်ဂှ် ဂွံမိၚ်ကေတ်ဂလာန်ပျးဒိုဟ်ကျာ်တြဲဂှ် မိပ်စိုတ်ဗွဲမလောန်ရ။ ပြဝကုသိုလ် ထပ်ဂိုတ်လွဳဂစာန် စဵုစိုပ်လအိတ်အာယုက်ရောၚ်။
- ဗုဒ္ဓဝၚ်ကျာ်တြဲ သုမေဓတုဲရ။
၁၂။ ဗုဒ္ဓဝၚ်ကျာ်တြဲ သုဇာတ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲသုမေဓ ကေုာံ ကွးသာဝကဂမၠိုၚ် လုကဴ ၉-လက်သၞာံ တွံပၟိၚ်ဓရ်အမြိုတ်တုဲ က္ညစဴအာနိဗ္ဗာန်အိုတ်ရ။ အာယုက်သတ္တံလေတ် နူ ၉-လက်သၞာံဂှ် ဟုတ်စိုပ်အာစှ်သၞာံ နူဂှ်ဇၞော်မောဝ်တိုန်အာ စိုပ်အာယုက်မွဲအသၚ်ဃယ်၊ နူဂှ်ဟုတ်စှ်ေစိုပ် ဒတန်အာယုက်သတ္တံ ၉-လက်သၞာံပၠန်ဂှ် အလံၚ်ကျာ်သုဇာတ ပါရမဳကြံၚ်ဍုဟ်ဍိုက်ပေၚ်ကၠုၚ်တုဲ စုတိစှ်ေနူသွဝ် ဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်ဍုၚ်သုမၚ်္ဂလ။
မအံက်ဂှ် - ဒှ်သၟိၚ်ဇၞော်ဥဂ္ဂတ။
မိကျာ်ဂန်ဂှ် - ဒှ်ဂၞကျာ်ဇၞော်ပဘာဝတဳ။
ဂၞကျာ်ဂှ် - ဒှ်သိရိနန္ဒ။
ကောန်ဂၠုဂှ် - ဒှ်ဥပသေန။
ကွးခမဳတြုံသတုံဇွိၜါ - သုဒဿနထေရ်ကဵုသုဒေဝထေရ်။
ခမဳကၠောန်ၜိုတ်ဂှ် - ဒှ်နာရဒထေရ်။
ကွးခမဳဗြဴသတုံဇွိၜါ - နာဂါထေရဳကဵုနာဂါသမာလာထေရဳ။
ဒကာတြုံကၠောန်ၜိုတ်ၜါ - သုဒတ္တကဵုစိတ္တ။
ဒကာဗြဴကၠောန်ၜိုတ်ၜါ - သုဘဒ္ဒါကဵုပဒုမာ။
သၠုၚ်ကျာ်တြဲ - ၅၀-ဟတ်။
အာယုက်ကျာ်တြဲ ဒှ် ၉-လက် (၉- လဟုတ်လေဝ်ဟီု)
ဒ္ဂေတ်ဒုက္ကရစရိယာ - ဒှ်ပွိုၚ် ၉-ဂိတု။
ဆုဒလာဲကျာ်တြဲ - တၞံဒုန်ဇလ။
*ဗီုဗောဓိသတ်ပိုဲဂွံပျးဒိုဟ် ဒှ်သၟိၚ်စက္ကဝဝ်။
ပ္ဍဲလက်ထက်ကျာ်တြဲသုဇာတဂှ် ဗောဓိသတ်ပိုဲက္တဵုဒှ်သၟိိၚ်စက္ကဝဝ် ပိုၚ်ပြဳတ္ကံပန်ရ။ မိၚ်ပရိုၚ်ကျာ်တြဲသုဇာာတက္တဵုဒှ် ပြာပ်အာဇရေၚ်ကျာ်တြဲတုဲ သ္ဂောံဗဵုလ္ၚောဝ် သ္ဂောံမိၚ်ဓရ် တီကေတ်ဒုဟ်ကာဂုဏ်ရ။ သၠးကဵုဒါန်ဗွဲမဂၠိုၚ်ရ။ ကြဴဝွံ တိတ်ပခမဳတမ်ဇိုၚ်ကျာ်တြဲရ။ ကျာ်တြဲလေဝ်သ္ၚဳရံၚ်နကဵုအနာဂတံသဉာဏ် တီကေတ်ဒဒှ်ပါရမဳဂှ်တုဲ သာ်ဝွံကဵုပျးဒိုဟ်ရ။
“ယွံခမဳတံ သၟိၚ်စက္ကဝဝ်ဝွံ ဂတဏံပ္ဍဲဘဒ္ဒကဝ်တေံ ကြက်က္တဵုဒှ်ကျာ်သဗ္ဗညုမွဲဇကု ဗွဲယၟုဂေါတမ ဂြၚ်တီကေတ်ဓရ်အိုဿီု ညံၚ်ရဴအဲကီုရောၚ်။ ဗောဓိသတ်သၟိၚ်စက္ကဝဝ် ဒှ်ခမဳတုဲပၟဝ်ဓရ် ဂွံၛာန် စုတိစိုပ်ဍုၚ်ဗြီုရောၚ်။”
*ဗုဒ္ဓဝၚ်ကျာ်တြဲ သုဇာတတုဲရ။
၁၃။ ဗုဒ္ဓဝၚ်ကျာ်တြဲ ပိယဒဿဳ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]နူဘဒ္ဒကဝ်ဝွံ ကလေၚ်ရိုဟ်စှ်ေအာ ပ္ဍဲကဝ်မရနုက်ကဵု (၁၈၀၀)ကဝ်တေံ ဝရကဝ်မွဲ က္တဵုဒှ်ရ။ ပ္ဍဲဝရကဝ်ဂှ် ကျာ်တြဲပိဇကု ကျာ်တြဲပဳယဒဿဳမွဲ၊ ကျာ်တြဲအတ္ထဒဿဳမွဲ၊ ကျာ်တြဲဓမ္မဒဿဳမွဲ၊ ဗွဲလၟေၚ်ၚ်က္တဵုဒှ်ရ။ ပၞောဝ်ကဵုကျာ်ပိဇကုဂှ် ကျာ်တြဲပဳယဒဿဳမွဲ ပ္ဍဲဒတန်အာယုက်သတ္တံ ၉-လက်ဂှ် စှ်ေကၠုၚ်နူဍုၚ်သွဝ် တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်သုဓည။
မအံက်ဂှ် - ဒှ်သၟိၚ်ဇၞော်သုဒတ္တ။
မိကျာ်ဂန်ဂှ် - ဒှ်ဂၞကျာ်ဇၞော်စန္ဒာဒေဝဳ။
ဂၞကျာ်ဂှ် - ဒှ်ဝိမလာဒေဝဳ။
ကောန်ဂၠုဂှ် - ဒှ်ကဉ္စနဝေလ။
ကွးခမဳတြုံသတုံဇွိၜါ - ပါလိတထေရ်ကဵုသဗ္ဗဒဿဳထေရ်။
ခမဳကၠောန်ၜိုတ်ဂှ် - ဒှ်သောဘိတထေရ်။
ကွးခမဳဗြဴသတုံဇွိၜါ - သုဇာတာထေရဳကဵုဓမ္မဒိန္နာထေရဳ။
ဒကာတြုံကၠောန်ၜိုတ်ၜါ - သန္ဓကကဵုဓမ္မက။
ဒကာဗြဴကၠောန်ၜိုတ်ၜါ - ဝိသာခါကဵုဓမ္မဒိန္နာ။
သၠုၚ်ကျာ်တြဲ - ၈၀-ဟတ်။
အာယုက်ကျာ်တြဲ ဒှ် ၉-လက် (၉- လဟုတ်လေဝ်ဟီု)
ဒ္ဂေတ်ဒုက္ကရစရိယာ - ဒှ်ပွိုၚ် ၆-ဂိတု။
ဆုဒလာဲကျာ်တြဲ - တၞံကၠောၚ်။
*ဗီုဗောဓိသတ်ပိုဲဂွံပျးဒိုဟ် ဒှ်ဗမၞးကဿပ။
ပ္ဍဲလက်ထက်ကျာ်တြဲ ပဳယဒဿဳဂှ် ဗောဓိသတ်ပိုဲ က္တဵုဒှ်ပ္ဍဲဂကူသမ္ၚေဟ် ဗမၞးမၞုံယၟုကဿပရ။ ဂွံဗဵုလ္ၚောဝ် ဂွံကလၚ်ဓရ်ကျာ်တြဲတုဲ သဒ္ဓါစေတနာက္တဵုဒှ်ဗွဲမလောန် သၠးဒြပ်ကဵုဒါန်ရ။ ထံက်ပၚ်သာသနာရ။ ကျာ်တြဲတီတုဲ ကဵုပျးဒိုဟ် ဗောဓိသတ်မိၚ်ဂလာန်ပျးဒိုဟ်တုဲ မိပ်စိုတ်ဗွဲမလောန် ကၠောန်ပြဝကုသိုလ် စဵုလအိတ်လမျီုရောၚ်။
*ဗုဒ္ဓဝၚ်ကျာ်တြဲ ပဳယဒဿဳတုဲရ။
၁၄။ ဗုဒ္ဓဝၚ်ကျာ်တြဲ အတ္ထဒဿဳ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲပဳယဒဿဳ သ္ပပရိနိဗ္ဗာန်တုဲ ပ္ဍဲဝရကဝ်ဂှ်ဟေၚ် အာယုက်သတ္တံနူမွဲလက်ဂှ် ဟုတ်စှ်ေစိုပ်စှ်သၞာံ နူဂှ်ဇၞော်မောဝ်တိုန်အာ စိုပ်အာယုက်သတ္တံမွဲအသၚ်ဃယ် နူဂှ်ဟုတ်စှ်ေစိုပ် ဒတန်အာယုက်သတ္တံမွဲကိုတ် ကာလဂှ် အလံၚ်ကျာ်တြဲအတ္ထဒဿဳ စုတိစှ်ေနူဍုၚ်သွဝ်တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်သောဘဏ။
မအံက်ဂှ် - ဒှ်သၟိၚ်ဇၞော်သာဂရ။
မိကျာ်ဂန်ဂှ် - ဒှ်ဂၞကျာ်ဇၞော်သုဒဿနာ။
ဂၞကျာ်ဂှ် - ဒှ်ဝိသခါဒေဝဳ။
ကောန်ဂၠုဂှ် - ဒှ်သေလ။
ကွးခမဳတြုံသတုံဇွိၜါ - သန္တထေရ်ကဵုဥပသန္တထေရ်။
ခမဳကၠောန်ၜိုတ်ဂှ် - ဒှ်အဘယထေရ်။
ကွးခမဳဗြဴသတုံဇွိၜါ - ဓမ္မာထေရဳကဵုသုဓမ္မာထေရဳ။
ဒကာတြုံကၠောန်ၜိုတ်ၜါ - နကုလကဵုနိသဘ။
ဒကာဗြဴကၠောန်ၜိုတ်ၜါ - မဏိလာကဵုသုနန္ဒာ။
သၠုၚ်ကျာ်တြဲ - ၈၀-ဟတ်။
အာယုက်ကျာ်တြဲ ဒှ်မွဲကိုတ် (မွဲလက်လေဝ်ဟီု)
ဒ္ဂေတ်ဒုက္ကရစရိယာ - ဒှ်ပွိုၚ် ၈-ဂိတု။
ဆုဒလာဲကျာ်တြဲ - ဒှ်တၞံစမ္ပါ (ပ္ၚာလေဝ်ဟီု)။
*ဗီုဗောဓိသတ်ပိုဲဂွံပျးဒိုဟ် ဒှ်ရသိသုသဳမ။
ကိုပ်ကၠာကျာ်တြဲအတ္ထဒဿဳ ဟွံဒှ်ကျာ်ဏီဂှ် ဗောဓိသတ်ပိုဲက္တဵုဒှ်မၞိဟ် ပ္ဍဲဂကူသမ္ၚေဟ် မၞုံကြက်ဒြပ်မဂၠိုၚ် မၞုံယၟုသုသဳမ ဒယှ်တှ်တဴဗွဲမလောန်ရ။ ဒးကာလမွဲတ္ၚဲ ဗောဓိသတ် ဂွံဗဵုလ္ၚောဝ် ဂွံမိၚ်ဓရ် တီကေတ်ဒုဟ်ကာမဂုဏ် သၠးဒြပ် သၠးကောန်သမ္ဘာ တိတ်ပခမဳရသိ ပ္ဍဲဂြိုပ်ဟေမဝန် ဒုၚ်စသိုၚ်ဒၟံၚ်တသိုက်လောကဳၛာန်ရ။ ကြဴဝွံ ဒးကာလမွဲတ္ၚဲ ကျာ်တြဲဂၚေၚ်ဒေသစာရဳ က္ညကၠုၚ်ဍုၚ်သုဒဿနရ။ ရသိဗောဓိသတ်လေဝ် ဂွံဗဵုလ္ၚောဝ် ဂွံကလၚ်ဓရ်ကျာ်တြဲတုဲ လျုၚ်ဇြုၚ်သ္ဍိုက်ဗွဲမလောန် တိုန်အာဍုၚ်သွဝ်တာဝတိံ ကေတ်ဖျေံပ္ကဴဒိပ်တၞဟ်ဟ်သာ် မပ္တံပ္ကဴဗပေၚ်ပါဒက ကၠုၚ်သ္ပပူဇဴကျာ်ရ။ ကျာ်တြဲသ္ၚဳရံၚ်နကဵုအနာဂတံသဉာဏ် တီကေတ်ပါရမဳဗောဓိသတ်တုဲ ကဵုပျးဒိုဟ် ဂ“တဏံပ္ဍဲဘဒ္ဒကဝ်တေံ ဂွံဒှ်ကျာ်သဗ္ဗညု ဗွဲယၟုဂေါတမ ဍာံစၟတ်ရ။” ဗောဓိသတ်မိၚ်ဂလာန်ပျးဒိုဟ်တုဲ မိပ်စိုတ်ဗွဲမလောန်ရောၚ်။
*ဗုဒ္ဓဝၚ်ကျာ်တြဲ အတ္ထဒဿဳတုဲရ။
၁၅။ ဗုဒ္ဓဝၚ်ကျာ်တြဲ ဓမ္မဒဿဳ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲအတ္ထဒဿဳ သ္ပပရိနိဗ္ဗာန်တုဲ အာယုက်သတ္တံဟုတ်စှ်ေစိုပ်စှ်သၞာံ နူဂှ်ဇၞော်မောဝ်တိုန်အာ စိုပ်အာယုက်သတ္တံမွဲအသၚ်ဃယ်၊ နူဂှ်ဟုတ်စှ်ေစိုပ် ဒတန်အာယုက်သတ္တံမွဲကိုတ်သၞာံဂှ် အလံၚ်ကျာ်တြဲဓမ္မဒဿဳ စုတိစှ်ေနူဍုၚ်သွဝ်တုဿိတာပူတုဲ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်သရဏ။
မအံက်ဂှ် - ဒှ်သၟိၚ်ဇၞော်သရဏ။
မိကျာ်ဂန်ဂှ် - ဒှ်ဂၞကျာ်ဇၞော်သုနန္ဒာဒေဝဳ။
ဂၞကျာ်ဂှ် - ဒှ်ဝိစိကောဠိ။
ကောန်ဂၠုဂှ် - ဒှ်ပုညဝဍ္ဎန။
ကွးခမဳတြုံသတုံဇွိၜါ - ပဒုမထေရ်ကဵုဖုဿထေရ်။
ခမဳကၠောန်ၜိုတ်ဂှ် - ဒှ်သုနေတ္တထေရ်။
ကွးခမဳဗြဴသတုံဇွိၜါ - ခေမာထေရဳကဵုသစ္စနာမာထေရဳ။
ဒကာတြုံကၠောန်ၜိုတ်ၜါ - သုဘဒ္ဒကဵုကဋိဿဟ။
ဒကာဗြဴကၠောန်ၜိုတ်ၜါ - သာဠိယာကဵုသုနန္ဒာကဠိယာ။
သၠုၚ်ကျာ်တြဲ - ၈၀-ဟတ်။
အာယုက်ကျာ်တြဲ ဒှ်မွဲကိုတ် (မွဲလက်လေဝ်ဟီု)
ဒ္ဂေတ်ဒုက္ကရစရိယာ - ဒှ်ပွိုၚ် ၇-တ္ၚဲ။
ဆုဒလာဲကျာ်တြဲ - ဒှ်တၞံဗလာဲဍာ်။
*ဗီုဗောဓိသတ်ပိုဲဂွံပျးဒိုဟ် ဒှ်သၟိၚ်အိန်။
ပ္ဍဲလက်ထက်ကျာ်တြဲ ဓမ္မဒဿဳဂှ် ဗောဓိသတ်ပိုဲ က္တဵုဒှ်သၟိၚ်အိန် ပိုၚ်ပြဳစၟိန်သွဝ်ၜါ မိၚ်ပရိုၚ်ကျာ်တြဲက္တဵုဒှ်စှ်ေကၠုၚ် ပ္ဍဲဍုၚ်လိုက်ဝွံ သ္ပပူဇဴပ္ကဴဒိပ်နာနာသာ်ရ။ ကောန်အဆေဝ်သွဝ်ဂမၠိုၚ်လေဝ် ကဵုသ္ပပူဇဴကျာ် နကဵုကွိၚ်ကွိုက်နာနာသာ်ရ။ ကျာ်တြဲတီကေတ်ပါရမဳသၟိၚ်အိန်တုဲ ကဵုပျးဒိုဟ် “ဂတဏံ ကြက်က္တဵုဒှ်ကျာ်သဗ္ဗညု ဗွဲယၟုဂေါတမ မဂြၚ်တီဓရ် ညံၚ်ရဴအဲကီုရ။” သၟိၚ်အိန်မိၚ်ဂလာန်ပျးဒိုဟ်တုဲ မိပ်စိုတ်ဗွဲမလောန် ကလေၚ်စဴအာဍုၚ်သွဝ်ပၠန်ရောၚ်။
*ဗုဒ္ဓဝၚ်ကျာ်တြဲ ဓမ္မဒဿဳတုဲရ။
၁၆။ ဗုဒ္ဓဝၚ်ကျာ်တြဲ သိဒ္ဓတ္တ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲဓမ္မဒဿဳ သ္ပပရိနိဗ္ဗာန်တုဲ ကဝ်လေဝ်ဟုတ်စှ်ေသိုက်က် စိုပ်ကၞောတ်ကဝ်တူရ။ ကဝ်တူတုဲ ကြဴဝွံ ကဝ်တၟိကလေၚ်တန်ကီုလေဝ် ကျာ်တြဲဟွံဒှ် ဒှ်သုညကဝ် ဗၞတ်(၁၀၇၅)ကဝ်ရ။ နူဘဒ္ဒကဝ်ဝွံ က္လေၚ်ရိုဟ်စှ်ေအာ ပ္ဍဲကဝ်မရနုက်ကဵု ၉၄-ကဝ် သာရကဝ်မွဲ က္တဵုဒှ်ရ။ ပ္ဍဲကဝ်ဂှ် ပ္ဍဲဒတန်အာယုက်သတ္တံ မွဲလက် အလံၚ်ကျာ်သိဒ္ဓတ္တ စုတိစှ်ေသွဝ်တညဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်ဝေဘာရ။
မအံက်ဂှ် - ဒှ်သၟိၚ်ဇၞော် ဥဒေန။
မိကျာ်ဂန်ဂှ် - ဒှ်ဂၞကျာ်ဇၞော်သုဖဿာ။
ဂၞကျာ်ဂှ် - ဒှ်ဂၞကျာ် သောမနဿာဒေဝဳ။
ကောန်ဂၠုဂှ် - ဒှ်အနုပမာ။
ကွးခမဳတြုံသတုံဇွိၜါ - သမ္ဗလထေရ်ကဵုသုမိတ္တထေရ်။
ခမဳကၠောန်ၜိုတ်ဂှ် - ဒှ်ရေဝတထေရ်။
ကွးခမဳဗြဴသတုံဇွိၜါ - သဳလာထေရဳကဵုသုရာမာထေရဳ။
ဒကာတြုံကၠောန်ၜိုတ်ၜါ - သုပ္ပိယကဵုသမုဒ္ဒ။
ဒကာဗြဴကၠောန်ၜိုတ်ၜါ - ဒှ်ရမာကဵုသုရမာ။
သၠုၚ်ကျာ်တြဲ - ဒှ် ၆၀-ဟတ်။
အာယုက်ကျာ်တြဲ - ဒှ်မွဲလက်။ (မွဲလဟုတ်လေဝ်ဟီု)
ဒ္ဂေတ်ဒုက္ကရစရိယာ - ဒှ်ပွိုၚ် ၁၀-ဂိတု။
ဆုဒလာဲကျာ်တြဲ - ဒှ်တၞံပ္ကဴပၠုဲ။ (တၞံဗပေၚ်လေဝ်ဟီုရ)
*ဗီုဗောဓိသတ်ပိုဲဂွံပျးဒိုဟ် ဒှ်ရသိမၚ်္ဂလ။
ကၠကျာ်တြဲသိဒ္ဓတ္တ ဟွံက္တဵုဒှ်ဏီဂှ် ဗောဓိသတ်ပိုဲက္တဵုဒှ်မၞိဟ် ပ္ဍဲဂကူသမ္ၚေဟ် မၞုံယၟုမၚ်္ဂလရ။ လေပ်ဗိုတ်ပိဗေဒၚ်ပန် အာယုက်ဇၞော်ဂွံဓရ်သံဝေဂ သၠးထောံပိုန်ဟာန် ကောန်သမ္ဘာတုဲ တိတ်ပခမဳရသိ ပ္ဍဲဂြိုပ်ဟေမဝန် ကလိဂွံအဘိဉာဏ်သမာပတ် ကလာၚ်ဍာန်အာကာသ မၚ်စၟဳဒၟံၚ်အခိၚ်ကျာ်တြဲက္တဵုဒှ်ရ။
ဒးကာလမွဲတ္ၚဲ ရသိမၚ်္ဂလဂွံဗဵုလ္ၚောဝ်ကျာ် ဂွံကလၚ်ဓရ်ကျာ်တုဲ စိုတ်လျုၚ်သ္ဍိုက်ဗွဲမလောန် ကလာၚ်အာကေတ်နၚ် သတ်ကြေၚ်ဇမ္ဗုရှ် ဇိုၚ်ဒဵုသိန္နရာဇ် ပြာပ်ကၠုၚ်ကဵုဒါန်ကုကျာ် ကေုာံ ကွးသာဝကဂမၠိုၚ် ဒစိတ်ကိုတ်ရ။ ကျာ်တြဲညာတ်ကေတ်သဒ္ဓါစေတနာတၠရသိ သ္ၚဳရံၚ်နကဵုအနာဂတံသဉာဏ် ကဵုပျးဒိုဟ်ရ။ ရသိမၚ်္ဂလလေဝ် ဂွံမိၚ်ကေတ်ဂလာန်ပျးဒိုဟ်တုဲ မိပ်စိုတ်ဗွဲမလောန် ဂိုတ်ဂစာန်ကုသိုလ် လအိတ်အာယုက် ချိုတ်စုတိ စိုပ်ဍုၚ်ဗြီုရောၚ်။
- ဗုဒ္ဓဝၚ်ကျာ်တြဲ သိဒ္ဓတ္တတုဲရ။
၁၇။ ဗုဒ္ဓဝၚ်ကျာ်တြဲ တိဿ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲသိဒ္ဓတ္တ သ္ပပရိနိဗ္ဗာန်တုဲ ကဝ်ဂှ်တူအာရ။ ကြဴနူဂှ် သုညကဝ်မွဲ နူဘဒ္ဒကဝ်ဝွံ ကလေၚ်ရိုဟ်အာပ္ဍဲမဏ္ဍကဝ် မရနုက်ကဵု ၉၂-ကဝ်တေံ ကျာ်တြဲၜါဇကု ကျာ်တြဲတိဿမွဲ ကျာ်တြဲဖုဿမွဲ က္တဵုဒှ်ဗွဲလၟေၚ်ၚ်ရ။ ပၞောဝ်ကျာ်တြဲ ၂-ဇကုဂှ် ပ္ဍဲဒတန်အာယုက်သတ္တံ မွဲကိုတ်ဂှ် အလံၚ်ကျာ်တိဿ စုတိစှ်ေနူဍုၚ်သွဝ်တုဿိတာပူတုဲ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်ခေမက။
မအံက်ဂှ် - ဒှ်သၟိၚ်ဇၞော် ဇနသန္ဓ။
မိကျာ်ဂန်ဂှ် - ဒှ်ဂၞကျာ်ဇၞော် ပဒုမာဒေဝဳ။
ဂၞကျာ်ဂှ် - ဒှ်ဂၞကျာ် သုဘဒ္ဒါဒေဝဳ။
ကောန်ဂၠုဂှ် - ဒှ်အာနန္ဒ။
ကွးခမဳတြုံသတုံဇွိၜါ - ဗြဟ္မဒေဝထေရ်ကဵုဥဒယထေရ်။
ခမဳကၠောန်ၜိုတ်ၜါ - ဒှ်မၚ်္ဂလထေရ်။
ကွးခမဳဗြဴသတုံဇွိၜါ - ဖုဿာထေရဳကဵုသုဒတ္တာထေရဳ။
ဒကာတြုံကၠောန်ၜိုတ်ၜါ ဒှ်သမ္ဗလကဵုသိရိမာ။
ဒကာဗြဴကၠောန်ၜိုတ်ၜါ -ဒှ်ကိသာဂေါတမဳကဵုဥပသေနာ။
သၠုၚ်ကျာ်တြဲဂှ် - ဒှ် ၆၀-ဟတ်။
အာယုက်ကျာ်တြဲဂှ် - ဒှ်မွဲကိုတ် (မွဲလက်လေဝ်ဟီု)
ဒ္ဂေတ်ဒုက္ကရစရိယာဂှ် - ဒှ်ပွိုၚ် ၈-ဂိတု။
ဆုဒလာဲကျာ်တြဲ - ဒှ်တၞံနာဍူ။
*ဗီုဗောဓိသတ်ပိုဲဂွံပျးဒိုဟ် ဒှ်ရသိသုဇာတ။
ကၠာကျာ်တြဲတိဿဟွံက္တဵုဒှ်ဏီ ဗောဓိသတ်ပိုဲဒှ်သၟိၚ်မွဲ မၞုံယၟုသုဇာတ ပ္ကၚ်ရၚ်ကၟိန်ဍုၚ်ယသဝတဳရ။ ဇၞော်တိုန်တုဲ ကောန်သမ္ဘာကေုာံ ပိုန်ဟာန်ကၟိန်နန်ထဝ်အိုဿီုတံဂှ် ညံၚ်ဍာ်ဂစှ် ချောဲကှ်ကှ်ဟွံထၞေန်စပ် သၠးထောံတုဲ တိတ်ပခမဳရသိ ပ္ဍဲဂြိုပ်ဇၞော်ဌာန်လ္ၚုရ။ ကြဴဝွံ ကလိၛာန်သမာပတ် ဒယှ်တှ်ကမြဴတဴဒိုဟ်စှ်ရ။ ကြဴဝွံ မိၚ်ပရိုၚ်ကျာ်တြဲတိဿ က္တဵုဒှ်တုဲ ပြာပ်အာဇရေၚ်ကျာ်တြဲ ဂွံဗဵုလ္ၚောဝ် ဂွံမိၚ်ဓရ်ကျာ်တုဲ သဒ္ဓါစေတနာက္တဵုဒှ်ဗွဲမလောန် တိုန်အာဍုၚ်သွဝ်တာဝတိံ လုပ်အာကၠံပ္ကဴဥဒျာန် စိတ္တလတာ ၜှ်ပလှ်ကေတ်ပ္ကဴဒိပ်နာနာသာ် မပ္တံဒကှ်ဒိပ် ပါဒကဒိပ် စှ်ေကၠုၚ်သ္ပပူဇဴကျာ်တြဲရ။ ကျာ်သ္ၚဳရံၚ် ပါရမဳရသိဝွံတုဲ “ယွံခမဳတံ ရသိဝွံ ဂတဏံပ္ဍဲဘဒ္ဒကဝ် မရနုက်ကဵု ၉၂ တေံ ကြက်က္တဵုဒှ်ကျာ်ဂေါတမ မဂြၚ်တီဓရ် ညံၚ်ရဴအဲကီုရ။” သာ်ဝွံကဵုပျးဒိုဟ်ရ။ ရသိလေဝ် ဂွံမိၚ်ကေတ်ဂလာန်ပျးဒိုဟ်ဂှ်တုဲ မိပ်စိုတ်ဗွဲမလောန် ကၠောန်ကုသိုလ်မဂၠိုၚ် စုတိစိုပ်ဍုၚ်ဗြီုရောၚ်။
*ဗုဒ္ဓဝၚ်ကျာ်တြဲ တိဿတုဲရ။
၁၈။ ဗုဒ္ဓဝၚ်ကျာ်တြဲ ဖုဿ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]၁၈။ ကျာ်တြဲတိဿသ္ပပရိနိဗ္ဗာန်တုဲ အာယုတ်သတ္တံဟုတ်စှ်ေစိုပ်စှ်သၞာံ နူဂှ်ဇၞော်မောဝ်တိုန်စိုပ်မွဲအသၚ်ဃယ် နူဂှ်ဟုတ်စှ်ေစိုပ် အာယုက် ၉-လက်ရ။ ကာလဂှ် အလံၚ်ကျာ်တြဲဖုဿ ပါရမဳဍိုက်ပေၚ်တုဲ စုတိစှ်ေနူသွဝ် တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်ကာသိ။
မအံက်ဂှ် - ဒှ်သၟိၚ်ဇၞော် ဇယသေန။
မိကျာ်ဂန်ဂှ် - ဒှ်ဂၞကျာ်ဇၞော် သိရိမာ။
ဂၞကျာ်ဂှ် - ဒှ်ဂၞကျာ် ကိသာဂေါတမဳ။
ကောန်ဂၠုဂှ် - ဒှ်အနုပမ။
ခမဳတြုံသတုံဇွိၜါ - သုရက္ခိတထေရ်ကဵုဓမ္မသေနထေရ်။
ကွးခမဳကၠောန်ၜိုတ် - ဒှ်သဘိယထေရ်။
ကွးခမဳဗြဴသတုံဇွိၜါ - စာလာထေရဳကဵုဥပစာလာထေရဳ။
ဒကာတြုံကၠောန်ၜိုတ်ၜါ - ဓနဉ္စယကဵု ဝိသာခ။
ဒကာဗြဴကၠောန်ၜိုတ်ၜါ - ပဒုမာကဵုနာဂ။
သၠုၚ်ကျာ်တြဲ - ၅၈-ဟတ်။
အာယုက်ကျာ်တြဲ ဒှ် ၉-လက် (၉-လဟုတ်လေဝ်ဟီု)။
ဒ္ဂေတ်ဒုက္ကရစရိယာဂှ် - ဒှ်ပွိုၚ် ၆-ဂိတု။
ဆုဒလာဲကျာ်တြဲ - ဒှ်တၞံဂမောဝ်။ (တၞံဂစွံလေဝ်ဟီု)
*ဗီုဗောဓိသတ်ပိုဲဂွံပျးဒိုဟ် ဒှ်သၟိၚ်ဇိဝိတာဝဳ။
ပ္ဍဲကာလကျာ်တြဲဖုဿက္တဵုဒှ်ဂှ် ဗောဓိသတ်ပိုဲ က္တဵုဒှ်သၟိၚ်မွဲမၞုံယၟု ဇိဝိတာဝဳ ပ္ကၚ်ရၚ်ဍုၚ်အရိန္ဒမရ။ ကြဴဝွံ ဂွံဗဵုလ္ၚာဝ် ဂွံကလၚ်ဓရ်ကျာ် သဒ္ဓါစေတနာ ပါ်ကၠုတ်တိုန် ကောန်သမ္ဘာပိုန်ဟာန် ဒြပ်ရတ်သၠးထောံကၠေံတုဲ တိတ်ပခမဳပ္ဍဲတမ်ဇိုၚ်ကျာ် လေပ်ပိဋကတ် ဒယှ်တှ်ကမြဴဒိုဟ်စှ် ကျာ်ကဵုပျးဒိုဟ် သွက်ဂွံဒှ်ကျာ်ဂတ ပ္ဍဲဘဒ္ဒကဝ်တေံရောၚ်။ ။ ။
*ဗုဒ္ဓဝၚ်ကျာ်တြဲဖုဿ တုဲရ။
၁၉။ ဗုဒ္ဓဝၚ်ကျာ်တြဲ ဝိပဿဳ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကဝ်ကျာ်တြဲတိဿ ဖုဿၜါဇကု က္တဵုဒှ်ဂှ် တူလေၚ်အာတုဲ ကြဴဝွံ ကဝ်တၟိမွဲ က္တဵုဒှ်ပၠန်ရ။ ကာလဒတန်အာယုက်သတ္တံ ဒစာံလက်ဂှ် အလံၚ်ကျာ်တြဲဝိပဿဳ ပါရမဳဍိုက်ပေၚ်တုဲ စုတိစှ်ေနူသွဝ် တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။ ဍုၚ်ဂှ် - ဒှ်ဗန္ဓုမတဳ။
မအံက်ဂှ် - ဒှ်သၟိၚ်ဇၞော် ဗန္ဓုမာ။
မိကျာ်ဂန်ဂှ် - ဒှ်ဂၞကျာ်ဇၞော် ဗန္ဓုမတဳ။
ဂၞကျာ်ဂှ် - ဒှ်ဂၞကျာ် ဒှ်သုဒဿာဒေဝဳ။
ကောန်ဂၠုဂှ် - ဒှ်သမဝတ္တက္ခန္ဓ။
ကွးခမဳတြုံသတုံဇွိၜါ - ခဏ္ဍထေရ်ကဵုတိဿထေရ်။
ကွးခမဳကၠောန်ၜိုတ် - ဒှ်အသောကထေရ်။
ကွးခမဳဗြဴသတုံဇွိၜါ - စန္ဒာထေရဳကဵုစန္ဒမိတ္တာထေရဳ။
ဒကာတြုံကၠောန်ၜိုတ်ၜါ - ပုနဗ္ဗသုမိတ္တကဵုနာဂ။
ဒကာဗြဴကၠောန်ၜိုတ်ၜါ - သိရိမာကဵုဥတ္တရာ။
သၠုၚ်ကျာ်တြဲ - ၈၀-ဟတ်။
အာယုက်ကျာ်တြဲ ဒှ် ၈-လက် (၈-လဟုတ်လေဝ်ဟီု)။
ဒ္ဂေတ်ဒုက္ကရစရိယာဂှ် - ဒှ်ပွိုၚ် ၈-ဂိတု။
ဆုဒလာဲကျာ်တြဲ - ဒှ်တၞံကွေဲ။ (ရမ္မာလေဝ်ဟီု)
*ဗီုဗောဓိသတ်ပိုဲဂွံပျးဒိုဟ် ဒှ်သၟိၚ်နာ်အတုလ။
ပ္ဍဲကာလကျာ်တြဲဝိပဿဳက္တဵုဒှ်ဂှ် ဗောဓိသတ်ပိုဲ ဟိုတ်ကုသိုလ်ဍိုန်လျတုဲ က္တဵုဒှ်ဂကူနာ် မၞုံယၟုအတုလ မၞုံဣဒ္ဓိအနုဘဴ မဇၞော်ရ။ မိၚ်ပရိုၚ်ကျာ်တြဲက္တဵုဒှ် ပြာပ်အာတမ်ဇိုၚ်ကျာ် ဂွံဗဵုလ္ၚာဝ် ဂွံကလၚ်ပၚ်မှိၚ်ဓရ်တုဲ ဓရ်သဒ္ဓါစေတနာက္တဵုဒှ် နိမိတ်ဗဒှ် ကၞာထးရတ်ဇၞော်မွဲ က္ညနၚ်ကျာ် ကေုာံ ခမဳကွးသာဝကဂမၠိုၚ် ဖာပ်သၚ်လုကဴထပှ်တ္ၚဲရ။ ဂကောံနာ်ဂမၠိိုၚ် ကဵုသ္ပပူဇဴကျာ် နကဵုကွိၚ်ကွိုက်ရ။ ဆဂှ်ဟွံသေၚ်ဏီ၊ ဂတဵုရတ် ပၞၚ်ဓရ်၊ မစဳလဝ်မတ်မၞိက် ပ္တန်ၚုဟ်မးဟွံမာန်မွဲဂှ်လေဝ် သ္ပပူဇဴကျာ်တြဲရ။ ကျာ်တြဲသ္ၚဳရံၚ်ပါရမဳကုသဵု သၟိၚ်နာ်ဝွံတုဲ “ယွံခမဳတံ သၟိၚ်နာ်ဝွံ ဂတဏံကြက်ဂွံဒှ်ကျာ်သဗ္ဗညု ဗွဲယၟုဂေါတမ မဂြၚ်တီဓရ်သစ္စပန်ညံၚ်ရဴအဲ ပ္ဍဲဘဒ္ဒကဝ်တေံ ဍာံစၟတ်ရ။” သာ်ဝွံကဵုပျးဒိုဟ်ရ။ သၟိၚ်နာ်မိၚ်ဂလာန်ပျးဒိုဟ်ကျာ်တုဲ မိပ်စိုတ်ဗွဲမလောန်ရောၚ် ။ ။ ။
*ဗုဒ္ဓဝၚ်ကျာ်တြဲဝိပဿဳ တုဲရ။
၂၀။ ဗုဒ္ဓဝၚ်ကျာ်တြဲ သိခဳ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲဝိပဿဳ သ္ပပရိနိဗ္ဗာန်တုဲ ကဝ်တူတုဲ လုကဴ ၅၉-ကဝ်သုန်ဒၟံၚ် ကျာ်ဟွံက္တဵုဒှ်ရ။ ကြဴဝွံ စိုပ်ကၠုၚ် ၃၁-ကဝ် ပ္ဍဲမဏ္ဍကဝ်မွဲဂှ် ကျာ်တြဲ ၂-ဇကု ကျာ်တြဲသိခဳမွဲ ကျာ်တြဲဝေဿဘူမွဲ က္တဵုဒှ်ရ။ ပၞောဝ်ကျာ် ၂-ဇကုဂှ် အလံၚ်ကျာ်တြဲ သိခဳ ပ္ဍဲဒတန်အာယုက်သတ္တံ ၇-လက်ဂှ် စုတိစှ်ေနူသွဝ် တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။ ဍုၚ်ဂှ် - ဒှ်အရုဏဝတဳ။
မအံက်ဂှ် - ဒှ်သၟိၚ်ဇၞော် အရုဏဝန္တ။
မိကျာ်ဂန်ဂှ် - ဒှ်ဂၞကျာ်ဇၞော် ပဘာဝတဳ။
ဂၞကျာ်ဂှ် - ဒှ်ဂၞကျာ် ဒှ်သဗ္ဗကာမာ။
ကောန်ဂၠုဂှ် - ဒှ်အတုလ။
ကွးခမဳတြုံသတုံဇွိၜါ - အဘိဘူထေရ်ကဵုသမ္ဘဝထေရ်။
ကွးခမဳကၠောန်ၜိုတ် - ဒှ်ခေမၚ်္ကရထေရ်။
ကွးခမဳဗြဴသတုံဇွိၜါ - သခိလာထေရဳကဵုပဒုမာထေရဳ။
ဒကာတြုံကၠောန်ၜိုတ်ၜါ - သိရိဝဍ္ဎကဵုစန္ဒ။
ဒကာဗြဴကၠောန်ၜိုတ်ၜါ - စိတ္တာကဵုသုဂုတ္တာ။
သၠုၚ်ကျာ်တြဲ - ၇၀-ဟတ်။
အာယုက်ကျာ်တြဲ ဒှ် ၇-လက် (၇-လဟုတ်လေဝ်ဟီု)။
ဒ္ဂေတ်ဒုက္ကရစရိယာဂှ် - ဒှ်ပွိုၚ် ၈-ဂိတု။
ဆုဒလာဲကျာ်တြဲ - ဒှ်တၞံကြုက်ဗ္တာၚ်။
*ဗီုဗောဓိသတ်ပိုဲဂွံပျးဒိုဟ် ဒှ်သၟိၚ်အရိန္ဒမ။
ကာလကျာ်တြဲသိခဳက္တဵုဒှ်ဂှ် ဗောဓိသတ်ပိုဲ ဒှ်သၟိၚ်မွဲ မၞုံယၟုအရန္ဒမ ပ္ကၚ်ရၚ်ဍုၚ်ပရိဘုတ္တ-ရ။ ဒးကာလမွဲတ္ၚဲ ကျာ်တြဲ ကေုာံ ခမဳကွးသာဝကဂမၠိုၚ် ဂ္ၚေၚ်ဒေသစာရဳ က္ညကၠုၚ်ဍုၚ် ပရိဘုတ္တ-ရ။ ဗောဓိသတ် ဂွံဗဵုလ္ၚောဝ် ဂွံကလၚ်ဓရ်ကျာ်တုဲ သဒ္ဓါစေတနာဇၞော်ကဵုဒြဟတ် က္တဵုဒှ်ရ။ လုကဴထပှ်တ္ၚဲဖာပ်သၚ်ရ။ ပ္ဍဲတ္ၚဲစရိုဟ်ဍာ်ဂှ် ယာတ်သ္ၚာ မပ္တံယာတ်သုတ်ခေါမရး သၠးကဵုဒါန် သၟိၚ်စိၚ်မ္ၚဵုဆဒ္ဒန်ဂှ်လေဝ် ညံၚ်ဂွံဒှ်ကပ္ပိယဝတ္ထု ကဵုဒါန်ရ။ ကျာ်တြဲသ္ၚဳရံၚ်နကဵုအနာဂတံသဉာဏ်တုဲ “ယွံခမဳတံ ဂတဏံ ပ္ဍဲ ၃၁-ကဝ် ကြက်ဂွံဒှ်ကျာ်သဗ္ဗညု ဗွဲယၟုဂေါတမ မဂြၚ်တီဓရ်သစ္စပန်ညံၚ်ရဴအဲကီုရောၚ်။” သာ်ဝွံကဵုပျးဒိုဟ်ရောၚ်။
*ဗုဒ္ဓဝၚ်ကျာ်တြဲသိခဳ တုဲရ။
၂၁။ ဗုဒ္ဓဝၚ်ကျာ်တြဲ ဝေဿဘူ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲသိခဳ သ္ပပရိနိဗ္ဗာန်တုဲ နူအာယုက်သတ္တံ ၇-လက်ဂှ် ဟုတ်စှ်ေစိုပ်စှ်သၞာံ နူဂှ်ဇၞော်မောဝ်တိုန် စိုပ်မွဲအသၚ်ဃယ်၊ နူဂှ်ဟုတ်စှ်ေ စိုပ်ဒတန်အာယုက်သတ္တံ ၆-လက်ရ။ ကာလဂှ် အလံၚ်ကျာ်ဝေဿဘူ စုတိစှ်ေနူသွဝ် တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်အနောမ။
မအံက်ဂှ် - ဒှ်သၟိၚ်ဇၞော် သုပ္ပတဳတ။
မိကျာ်ဂန်ဂှ် - ဒှ်ဂၞကျာ်ဇၞော် ယသဝတဳ။
ဂၞကျာ်ဂှ် - ဒှ်ဂၞကျာ် ဒှ်သုစိတ္တာဒေဝဳ။
ကောန်ဂၠုဂှ် - ဒှ်သုပ္ပဗုဒ္ဓ။
ကွးခမဳတြုံသတုံဇွိၜါ - သောဏထေရ်ကဵုဥတ္တရထေရ်။
ကွးခမဳကၠောန်ၜိုတ် - ဒှ်ဥပသန္တထေရ်။
ကွးခမဳဗြဴသတုံဇွိၜါ - ရာမာထေရဳကဵုသမလာထေရဳ။
ဒကာတြုံကၠောန်ၜိုတ်ၜါ - သောတ္ထိကကဵုရမ္မ။
ဒကာဗြဴကၠောန်ၜိုတ်ၜါ - ဂေါတမဳကဵုသိရိမာ။
သၠုၚ်ကျာ်တြဲ - ၆၀-ဟတ်။
အာယုက်ကျာ်တြဲ ဒှ် ၆-လက် (၆-လဟုတ်လေဝ်ဟီု)။
ဒ္ဂေတ်ဒုက္ကရစရိယာဂှ် - ဒှ်ပွိုၚ် ၆-ဂိတု။
ဆုဒလာဲကျာ်တြဲ - ဒှ်တၞံအံၚ်ရေၚ်။
*ဗီုဗောဓိသတ်ပိုဲဂွံပျးဒိုဟ် ဒှ်သၟိၚ်သုဒဿန။
ပ္ဍဲလက်ထက်ကျာ်တြဲတေဿဘူက္တဵုဒှ်ဂှ် ဗောဓိသတ်ပိုဲ ဒှ်သၟိၚ်မွဲ မၞုံယၟုသုဒဿန ပ္ကၚ်ရၚ်ဍုၚ်သရဘ-ရ။ ဒးကာလမွဲတ္ၚဲ ကျာ်တြဲ ကေုာံ ခမဳကွးသာဝကဂမၠိုၚ် က္ညကၠုၚ်ဍုၚ် သရဘတုဲ သၟိၚ်ဂွံဗဵုလ္ၚောဝ် ဂွံကလၚ်ဓရ်ကျာ်တုဲ သဒ္ဓါစေတနာက္တဵုဒှ် ကဵုဒါန်ဖာပ်သၚ် သၠးဒြပ်ကဵုဒါန် ဟွံတီဗၞတ်တွဵု ဂၠိုၚ်ဂၠၚ်လောန်ရ။ ဗ္ဒါဲဍုၚ်သရဘ ခၞံဘာဂန္ဓကုဋဳ သၠးကဵုဒါန်ကုကျာ်တြဲရ။ ကၞောတ်တဲ သၠးကၠေံကောန်သမ္ဘာ ပိုန်ဟာန်ဖအိုတ်တုဲ တိတ်ပခမဳ ပ္ဍဲဇရေၚ်တမ်ဇိုၚ်ကျာ်ရ။ ယိုက်ဂၠေၚ်သာသနာ လေပ်ပိဋကတ် ဒယှ်တှ်တဴဗွဲမလောန် ကျာ်တြဲသ္ၚဳရံၚ်နကဵုအနာဂတံသဉာဏ်တုဲ “ယွံခမဳတံ သၟိၚ်ဝွံ ဂတဏံ ပ္ဍဲဘဒ္ဒကဝ်တေံ ကြက်ဂွံဒှ်ကျာ်သဗ္ဗညု ဗွဲယၟုဂေါတမ မဂြၚ်တီဓရ်သစ္စပန်ညံၚ်ရဴအဲကီု ဍာံစၟတ်ရ။” သာ်ဝွံကဵုပျးဒိုဟ်ရောၚ်။
*ဗုဒ္ဓဝၚ်ကျာ်တြဲဝေဿဘူ တုဲရ။
၂၂။ ဗုဒ္ဓဝၚ်ကျာ်တြဲ ကကုသန္ဓ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]မဏ္ဍကဝ် ဒတန်ကျာ်တြဲသိခဳ ကျာ်တြဲဝေဿဘူ ၜါဇကု က္တဵုဒှ်ဂှ် တူအာရ။ ကြဴနူဂှ် ပွိုၚ် ၂၉-ကဝ် ဒှ်သုညကဝ် ကျာ်ဟွံက္တဵုဒှ်ရ။ စိုပ်ကၠုၚ်ဘဒ္ဒကဝ်ပိုဲ လၟုဟ်ဝွံရ။ ပၞောဝ်ကဝ်ဂမၠိုၚ် ၆-သာ်ဂှ် ကဝ်ဝွံ ဟိုတ်ကျာ်တြဲက္တဵုဒှ် မသုန်ဇကုဂၠိုၚ်အိုတ် ပြဲအိုတ်တုဲ (ဘဒ္ဒကဝ်) မကော်ခဴစရ။ ပ္ဍဲဘဒ္ဒကဝ်ဝွံ စိုပ်ဒတန်အာယုက်သတ္တံပန်ဂှ် အလံၚ်ကျာ်တြဲ ကကုသန် စုတိစှ်ေနူသွဝ် တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်ခေမဝတဳ။
မအံက်ဂှ် - ဒှ်အ္စာပြောဟိတ် ဗမၞးအဂ္ဂိဒတ္တ။
မိကျာ်ဂန်ဂှ် - ဒှ်သမ္ဘာအ္စာပြောဟိတ် ဝိသခါ။
ဂၞကျာ်ဂှ် - ဒှ်ဂၞကျာ် ဒှ်ရောစိနဳ။
ကောန်ဂၠုဂှ် - ဒှ်ဥတ္တရ။
ကွးခမဳတြုံသတုံဇွိၜါ - ဝိဓူရထေရ်ကဵုသဉ္ဇဳဝထေရ်။
ကွးခမဳကၠောန်ၜိုတ် - ဒှ်ဗုဒ္ဓိဇထေရ်။
ကွးခမဳဗြဴသတုံဇွိၜါ - သာမာထေရဳကဵုစမ္ပကာထေရဳ။
ဒကာတြုံကၠောန်ၜိုတ်ၜါ - အစ္စုတကဵုသုမန။
ဒကာဗြဴကၠောန်ၜိုတ်ၜါ - နန္ဒာကဵုသုနန္ဒာ။
သၠုၚ်ကျာ်တြဲ - ၄၀-ဟတ်။
အာယုက်ကျာ်တြဲ ဒှ် ၄-လက် (၄-လဟုတ်လေဝ်ဟီု)။
ဒ္ဂေတ်ဒုက္ကရစရိယာဂှ် - ဒှ်ပွိုၚ် ၈-ဂိတု။
ဆုဒလာဲကျာ်တြဲ - ဒှ်တၞံဆုဓိဌာန်။
*ဗီုဗောဓိသတ်ပိုဲဂွံပျးဒိုဟ် ဒှ်သၟိၚ်ခေမ။
ပ္ဍဲအခိၚ်ကျာ်တြဲကကုသန်က္တဵုဒှ်ဂှ် ဗောဓိသတ်ပိုဲ ပါရမဳဍိုက်ပေၚ်ကၠုၚ်တုဲ ကၠုၚ်က္တဵုဒှ်ဂကူသၟိၚ် ဒှ်သၟိၚ်မၞုံယၟုမေခ-ရ။ သၟိၚ်ဝွံ နွံပိုန်ဣဒ္ဓိ ဒယှ်တှ် ကမြဴဒိုဟ်စှ်ရ။ ဒးကာလမွဲတ္ၚဲ ပြာပ်အာဇရေၚ်ကျာ်တြဲ ဂွံဗဵုလ္ၚောဝ် ဂွံကလၚ်ဓရ်ကျာ်တုဲ သဒ္ဓါစေတနာက္တဵုဒှ်ဗွဲမလောန် နိမန်ကျာ် ကေုာံ ကွးသာဝက ဖာပ်သၚ် ကဵုဒါန်သ္ပိုၚ်သ္ၚာ ပရိက္ခဒစာံ ဂဥုဲ စိုပ်ကၞောတ်တဲ သၠးကၠေံကောန်သမ္ဘာ ပိုန်ဟာန်အိုဿီုတုဲ တိတ်ပခမဳ ပ္ဍဲဇရေၚ်ကျာ်ရ။ ကျာ်တြဲသ္ၚဳရံၚ် ဗောဓိသတ်တုဲ “ယွံခမဳတံ ခမဳဝွံ ပ္ဍဲဘဒ္ဒကဝ်ဝွံဟေၚ် ကြက်ဂွံဒှ်ကျာ်သဗ္ဗညု ဗွဲယၟုဂေါတမ မဂြၚ်တီဓရ်သစ္စပန်ညံၚ်ရဴအဲကီုရ။ သာ်ဝွံကဵုပျးဒိုဟ်ရ။” ဗောဓိသတ်မိၚ်ဂလာန်ပျးဒိုဟ်တုဲမိပ်စိုတ် စိုပ်ကၞောတ်ရောၚ်။
*ဗုဒ္ဓဝၚ်ကျာ်တြဲကကုသန် တုဲရ။
၂၃။ ဗုဒ္ဓဝၚ်ကျာ်တြဲ ကောနာဂမန (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲကကုသန် သ္ပပရိနိဗ္ဗာန်တုဲ အာယုက်သတ္တံ နူပန်လက်ဂှ် ဟုတ်စှ်ေစိုပ်စှ်သၞာံ နူဂှ်ဇၞော်မောဝ်တိုန် စိုပ်မွဲအသၚ်ဃယ်၊ နူဂှ်ဟုတ်စှ်ေ စိုပ်ဒတန်အာယုက်သတ္တံ ၃-လက်ဂှ် အလံၚ်ကျာ်ကောနာဂီု စုတိစှ်ေနူသွဝ် တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်ဘောဂဝတဳ။
မအံက်ဂှ် - ဒှ်ဗမၞးယညဒတ္တ။
မိကျာ်ဂန်ဂှ် - ဒှ်ဗမၞးဗြဴဥတ္တရာ။
သမ္ဘာဂှ် - ဒှ်ယၟုရုစိဂတ္တာ။
ကောန်ဂၠုဂှ် - ဒှ်သတ္တဝါဟ။
ကွးခမဳတြုံသတုံဇွိၜါ - ဘိယျောထေရ်ကဵုဥတ္တရထေရ်။
ကွးခမဳကၠောန်ၜိုတ် - ဒှ်သောတ္ထိဇထေရ်။
ကွးခမဳဗြဴသတုံဇွိၜါ - သမုဒ္ဒါထေရဳကဵုဥတ္တရာထေရဳ။
ဒကာတြုံကၠောန်ၜိုတ်ၜါ - ဥဂ္ဂကဵုသောနဒေဝ။
ဒကာဗြဴကၠောန်ၜိုတ်ၜါ - သဳဝလာကဵုသာမာ။
သၠုၚ်ကျာ်တြဲ - ၃၀-ဟတ်။
အာယုက်ကျာ်တြဲ ဒှ် ၃-လက် (၃-လဟုတ်လေဝ်ဟီု)။
ဒ္ဂေတ်ဒုက္ကရစရိယာဂှ် - ဒှ်ပွိုၚ် ၆-ဂိတု။
ဆုဒလာဲကျာ်တြဲ - ဒှ်တၞံဝိဍာ်။
*ဗီုဗောဓိသတ်ပိုဲဂွံပျးဒိုဟ် ဒှ်သၟိၚ်ပဗ္ဗတ။
ပ္ဍဲလက်ထက်ကျာ်တြဲကောနာဂီုဂှ် ဗောဓိသတ်ပိုဲ ပါရမဳဍိုက်ပေၚ်ကၠုၚ်တုဲ ဒှ်သၟိၚ်မၞုံယၟုပဗ္ဗတ ပ္ကၚ်ရၚ်ဍုၚ်မိတ္ထိုရ် ဒးကာလမွဲတ္ၚဲ ကျာ်တြဲ ကေုာံ ကွးသာဝကဂမၠိုၚ် ဂၚေၚ်ဒေသစာရဳ က္ညစိုပ်ကၠုၚ် ဍုၚ်မိတ္ထိုရ်-ရ။ ဗောဓိသတ် ပြာပ်အာဇရေၚ်ကျာ် နိမန်ဖာပ်သၚ် လုကဴထပှ်တ္ၚဲ ကဵုဒါန်ယာတ်သ္ပိုၚ်သ္ၚာ ထေက်ၚုဟ်မးမဂၠိုၚ်ရ။ တြဲသ္ၚဳရံၚ်ပါရမဳသၟိၚ်တုဲ သာ်ဝွံကဵုပျးဒိုဟ်ရ။ “ယွံခမဳတံ သၟိၚ်ဝွံ ပ္ဍဲဘဒ္ဒကဝ်ဝွံဟေၚ် ကြက်ဂွံဒှ်ကျာ်သဗ္ဗညု ဗွဲယၟုဂေါတမ မဂြၚ်တီဓရ်သစ္စပန်ညံၚ်ရဴအဲကီုရောၚ်။” ဗောဓိသတ်မိၚ်တုဲ မိပ်စိုတ်ဗွဲမလောန်ရောၚ်။
*ဗုဒ္ဓဝၚ်ကျာ်တြဲကောနာဂီု တုဲရ။
၂၄။ ဗုဒ္ဓဝၚ်ကျာ်တြဲ ကဿပ (ဗွဲခဍန်)
[ပလေဝ်ဒါန် | ပလေဝ်ဒါန် တမ်ကၞက်]ကျာ်တြဲကောနာဂီု သ္ပပရိနိဗ္ဗာန်တုဲ အာယုက်သတ္တံ ဟုတ်စှ်ေစိုပ်စှ်သၞာံ နူဂှ်ဇၞော်မောဝ်တိုန် စိုပ်မွဲအသၚ်ဃယ်၊ နူဂှ်ဟုတ်စှ်ေ စိုပ်ဒတန်အာယုက်သတ္တံ ၜါလက်သၞာံဂှ် အလံၚ်ကျာ်တြဲ ကဿပ စုတိစှ်ေနူသွဝ် တုဿိတာပူ က္တဵုဒှ်မၞိဟ်ပ္ဍဲလိုက်ဝွံရ။
ဍုၚ်ဂှ် - ဒှ်ဍုၚ်ဗာရဏသဳ။
မအံက်ဂှ် - ဒှ်ဗမၞးဗြဟ္မဒတ္တ။
မိကျာ်ဂန်ဂှ် - ဒှ်ဗမၞးဗြဴဓနဝတဳ။
သမ္ဘာဂှ် - ဒှ်ဂၞကျာ် ဒှ်သုနန္ဒာ။
ကောန်ဂၠုဂှ် - ဒှ်ဇိဝိတသေန။
ကွးခမဳတြုံသတုံဇွိၜါ - တိဿထေရ်ကဵုဘာရဒွါဇထေရ်။
ကွးခမဳကၠောန်ၜိုတ် - ဒှ်သဗ္ဗမိတ္တထေရ်။
ကွးခမဳဗြဴသတုံဇွိၜါ - အနုဠာထေရဳကဵုဥရုဝေလာထေရဳ။
ဒကာတြုံကၠောန်ၜိုတ်ၜါ - သုမၚ်္ဂလကဵုဃဋိကာရ။
ဒကာဗြဴကၠောန်ၜိုတ်ၜါ - ဝိဇိကသေနာကဵုဘဒြာ။
သၠုၚ်ကျာ်တြဲ - ၂၀-ဟတ်။
အာယုက်ကျာ်တြဲ ဒှ် ၂-လက် (၂-လဟုတ်လေဝ်ဟီု)။
ဒ္ဂေတ်ဒုက္ကရစရိယာဂှ် - ဒှ်ပွိုၚ် ၇-တ္ၚဲ။
ဆုဒလာဲကျာ်တြဲ - ဒှ်တၞံဇြဲတောန်။
*ဗီုဗောဓိသတ်ပိုဲဂွံပျးဒိုဟ် ဒှ်ဗမၞးဇောတိပါလ။
ပ္ဍဲအခိၚ်ကျာ်တြဲကဿပ က္တဵုဒှ်ဂှ် ဗောဓိသတ်က္တဵုဒှ် ပ္ဍဲဂကူဗမၞးမွဲ မၞုံယၟုဗဇာတိပါလ နွံကြက်ဒြပ်မဂၠိုၚ် ပ္ဍဲကွာန်ရးနိဂီု ဝေဟဠိၚ်္ဂတေံရ။ ဘဝဗောဓိသတ်ပိုဲ ဉာဏ်ပညာလဝ်ဇၞော် ပိုန်ဒြပ်လေဝ်ဂၠိုၚ် ဂကူလေဝ်သၠုၚ်လောန်တုဲ ဇာတိမာန် ဓနမာန် ပညာမာန်သၠုၚ်တဴဗွဲမလောန်ရ။ ကျာ်တြဲ ညးတေံဟွံသ္ပစ္ၜုဲစ္ၜော် ဟွံဗဵုလ္ၚောဝ် ဟွံရှ်ေသှ်ေတုဲ ပဒၟံၚ်စ္ၜုဲစ္ၜော်ကဵုဗြီု ဒေဝတဴဗဳသၞု မဆက်ဆေန်ကၠုၚ် နူတၞောဝ်ဇုဇတံဂှ်ရ။ ဟိုတ်နူမိဿဟာဲ အ္စာသၟာလၟာန်နုၚ်မၞုံယၟုဃဋိကာရ ညးမဒှ်အနာဂါမ် ပ္ညုၚ်ထ္ၜးဂၠံၚ်တရဴခိုဟ်တုဲ စိုပ်အာဇရေၚ်ကျာ် ဂွံဗဵုလ္ၚောဝ် ဂွံကလၚ်ဓရ်ကျာ်တုဲ မၚ်ဗၠာဲဇောတိပါလ စိုတ်လျုၚ်ဇြုၚ်သ္ဍိုက် ရတ်ပိဗွဲမလောန် အာတ်အခေါၚ်သ္ပခမဳတမ်ဇိုၚ်ကျာ်တြဲရ။
ဗောဓိသတ်ဒှ်ခမဳတုဲ ပၟဝ်ဓရ် ကတ်ပရိယတ္တိ ဒယှ်တှ်ကမြဴဒိုဟ်စှ်ရ။ ကာလဂှ် ကျာ်တြဲသ္ၚဳရံၚ်ပါရမဳနကဵုအနာဂတံသဉာဏ်တုဲ “ယွံခမဳတံ ခမဳဝွံ ပ္ဍဲဘဒ္ဒကဝ်ဝွံဟေၚ် ကြက်ဂွံဒှ်ကျာ်သဗ္ဗညု ဗွဲယၟုဂေါတမ မဂြၚ်တီဓရ်သစ္စပန်ညံၚ်ရဴအဲကီုရ။” သာ်ဝွံကဵုပျးဒိုဟ်ရောၚ်။
*ဗုဒ္ဓဝၚ်ကျာ်တြဲကကုသန် တုဲရ။
*ဗုဒ္ဓဝၚ်ကျာ်တြဲ ၂၄-ဇကု ဗွဲခဍန် တုဲဆဝွံရောၚ် ။ ။ ။
၄၁။ ထ္ၜးလၚ်္ကာနိဂိုမ်
[ပလေဝ်ဒါန် | ပလေဝ်ဒါန် တမ်ကၞက်]ပါရမဳသ္ကဲ အာဒိမွဲတောၚ် ချပ်ပ္ဍဲစိုတ်ဂွိုၚ် ကဝ်ဂၠိုၚ်တော်ဆ ထပှ်သၚ်ဃဲ ဟီုသကဲဂျ ဆဵုကျာ်တြဲဗော် လၟိဟ်တော်ဆ မွဲလက်ခပ်သီ ၜါဣသုန်လ္ၚီဂျ ပတံကျာ်လေဝ် ဗြဟ္မဒေဝ ပ္တိတ်ပါၚ်တုဲရ တော်ဆဒမၠိ ဒစိတ်သၚ်ဃဲ ဟီုသ္ကဲဂ္ညိ ဆဵုဒးကျာ်တြဲ ပိလက်ထဲမြိ ဒစာံစှော်ထပှ် လ္ၚီတွံယုတ္တိ ဆဵုကျာ်တြဲဂ္ညိ သိဒ္ဓိက္ဍၚ်ပြ ပ္တံကျာ်ရော မှာပေါရဏ။ ပေါရဏရော မှာဂေါတမ သီုဒွါပိကၠာ ပ္တုဲကၠုၚ်ဒါန ပန်အသၚ်ဃဲ ဟီုသ္ကဲဂ္ညိ ဆဵုကျာ်တြဲပၠန် ၜါစှော်ပန်ရ ပ္တံကျာ်အဵု ဒိပၚ်ကိုရ်ဂျ ပျးကၠုၚ်ဒိုဟ်သၟတ် ဗောဓိသတ္တ ဝွံဗွဲခမၞန် ဟီုဖျန်ကဵုရောၚ်။ ။ ။
(ဂလာန်ဗကန်
-ဗောဓိသတ် ပညာဓိကဂှ် သ္ဒးပတံပါရမဳ ပန်အသၚ်ဃဲ ပရဲမွဲလက်ကဝ်
-ဗောဓိသတ်သဒ္ဓါဓိကဂှ် သ္ဒးပ္တံပါရမဳ ဒစာံအသၚ်ဃဲပရဲမွဲလက်ကဝ်
-ဗောဓိသတ် ဝိရိယာဓိကဂှ် သ္ဒးပ္တံပါရမဳ စှ်တြဴအသၚ်ဃဲပရဲမွဲလက်ကဝ်ရသာ်ဝွံသမ္တီညိ။)
ကျာ်ဇၞော်အစွောံ ကေုာံ သတ်တန်တဴ-၃၁-ဘုံ ဩဝ်ကဵုဒှ်တသိုက်ညိ. . .။
နာဲကလျာဏ (ဓမ္မစရိယ)ဖအံက်ဘာတိုက်တၟိ ၁၃၅၂-ဖဝ်ရဂိုန်။
- ကျောဝ်ညိလိခ်မန် - ဂွံစောန်တောတက်။
- ဆက်ကဵုလမျီု - ရီုဗၚ်ဂကူ။
- လိခ်ပတ်ဂကူ - လ္တူတိဏံရ။
- ပကဵုဂွံကၠက် - ကဵုဆက်ဆေန်ညိအဴ။ ။ ။
၄၂။ ဂုဏ်ဖိုလ်ဂွံပသ္ဇိုၚ်ကဵုရတ်ပိ
[ပလေဝ်ဒါန် | ပလေဝ်ဒါန် တမ်ကၞက်]၁။ ဘဝပစ္စုပ္ပန်ဝွံ တုပ်ကေုာံဂဥုဲဒိပ် မလေပ်ပၠေၚ် ကၠေံပရိုက်ဘယ်
၂။ တုပ် ကေုာံ မန် ယန်ဂါထာ ဥုံသွ: မၞုံ ကဵု ဣဒ္ဓိအနုဘဴ
၃။ တုပ် ကေုာံ စက်ယန္တရာ ဇၞော် မၞုံကဵုအသဝ် တၟေၚ်တၟဟ်
၄။ ဘဝပရလိုက် အာယုက်အိုတ်ချိုတ် အာမ္ဂး ညံၚ်ညးတိက်သၠိၚ် ၚုဟ်တိုန် ဂွံက္တဵုဒှ်ပ္ဍဲဍုၚ်သွဝ်မာန်
၅။တသိုက်အဆက်က် မၞိဟ်ကဵုသွဝ် ဂၚေၚ်အာ ကၞောတ်တဲနိဗ္ဗာန်ကလိဂွံမာန်
-မိက်တီပရဲ လိခ်ဝွံ ပလဝ်သ္ကံတဲညိ။ ။ ။
နိဿဲ
[ပလေဝ်ဒါန် | ပလေဝ်ဒါန် တမ်ကၞက်]ညံၚ်ကောန်ဂကူမန် ဗုဒ္ဓဘာသာဂမၠိုၚ််
သ္ဂောံတီကေတ် ပရူဗုဒ္ဓဝၚ်ကျာ်တြဲဂေါတမ
ကျာ်ဇၞော်အ္စာတၠ အစွောံ ချူဆန်လဝ်
* ပြကိုဟ်လၚ်္ကာဗုဒ္ဓဝၚ် ကျာ်တြဲဂေါတမ
(ကေုာံ ဗုဒ္ဓဝၚ်ကျာ်တြဲ ၂၄-ဗွဲခဍန်)
တၠဂုဏ်အ္စာ နာဲကလျာဏ (ဓမ္မစရိယ) ချူဇန်လဝ်ရောၚ် ။ ။ ။
၁၃၅၂ သၞာံ။ ဂိတုဖဝ်ရဂိုန် ၁၃-မံက်။
လၟိဟ်အုပ် (၁၅၀၀) တက်တြးလဝ်ရ။
တက်ပ္ဍဵုဗီိုက််မန် (ဩသရပုတ္တ) ကွာန်ဖအံက် ဘာတိုက်တၟိ။