ပြကိုဟ်သၠပတ်အဓာန်မသုန် ကေုာံ ပြကိုဟ်အနာဂတာဝၚ်

နူ ဝဳကဳပဳဒဳယာ

ပြကိုဟ်သၠပတ်အဓါန်မသုန် ကေုာံ ပြကိုဟ်အနာဂတာဝၚ် လိက်ဝွံကျာ်ဇၞော်အ္စာတၠဘဒ္ဒန္တဥတ္တမာရမ္ဘထေရ်ဘာဝင်္ကဝိဝေကာရာမ ထက်တက်တြးလဝ် နကဵုနယ်ကယ်ပ္ဍဵုဗီု လိက်ခေတ်တၟိ ပ္ဍဲသက္ကရာဇ်သာသနာ ၂၅၄၂ သၞာံ သက္ကရာဇ်ဍုၚ် ၁၃၆၁ သၞာံ သက္ကရာဇ်ခရေတ် ၁၉၉၉ သၞာံဂှ်ရ ဒတုဲဖဵုသွက်ဓမ္မဒါနရောၚ် နိဗ္ဗာနပစ္စယောဟောတု

ပြကိုဟ်သၠပတ်အဓာန်မသုန်[ပလေဝ်ဒါန် | ပလေဝ်ဒါန် တမ်ကၞက်]

နိဒါန်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကဝ်ဏံဝွံ ခုတ်ယၟုပၠန်၊ ဂးဘဒြကဝ် ဂၠိုၚ်ဗွဝ်ဂုဏ်၊ ကတဵုဒှ်မွဲတဲ ကျာ်တြဲမသုန်၊ ကက္ကုသန်ရော ကောနာဂီုပ္ဍုန် ကျာ်ကဿပ ဂေါတမတုန်၊ အရဳယျမွဲ ဇၞော်ဇာသဳဂုဏ်၊ ကျာ်ပန်လောန်စဴ မွဲသှ်ေတဴတုန်၊ ကဝ်ဝွံဇၞော်ဂုဏ် ပုညခေတ္တ၊ ပ္ဍဲတကံပိုဲဝွံ ဇမ္ဗုဒိပ္ပ၊ ပ္ဍဲသာသနာမှာဂေါတမ ကျာ်ကလောတ္ၚဲ နဲအဒိတျ၊ ဒှ်အ္စာဗြီုတိဘုမ္မိက သ္ဂေဟ်ဥာဏ်စရာဲ နာဲသာဇိန ပကၚ်ရၚ်လဝ်ရ၊ ဓရ်နဝခန် ဂုဏ်ဓရ်အမြိုတ် ဖျုၚ်လဝ်စိုတ်ဇန် ဟံၚ်ဖျဴနိဗ္ဗာန် ဌာန်ဒိပ်ဒတန် ဂွံဗၠးဒမၠိ နူဇာတိပန် လၟိဟ်သင်္ချာဒှ်ၜါစှော်ပန် ဟံၚ်ဏာသတ်ပၠန် နန်ထဝ်နိဗ္ဗာန် သတ်ဆသၟေဟ်ဂှ် ဒှ်အာန်ထၞာန် သၟိက်ဂွံပတိုန်ဇကု မြုထဝ်နိဗ္ဗာန် သွက်ဂွံသလဲ ဟွံမွဲဂလာန် တဝှ်ဗုဒ္ဓဂမ္ဘိရညာဏ် ပသလဲပ္ကာန် သ္ဂောံတီမာန်ရောၚ် တဝှ်ကျာ်တြဲမွဲတဲဟွံယောၚ် သ္ဂောံဆဵုကေတ်ကၠာ သာသနာရောၚ် ဂွံမိၚ်ဂွံညာတ် သုဇ္ဇာတ်မွဲတောၚ် ဟီုပျးလဝ်ရောၚ် ညံၚ်ဍောၚ်ပုပ္ဖာ ဂွံလဟဵုပၠန် မန်ပိဘာသာ ဒှ်ညးမပြဲ တီနဲဓမ္မာ နွံဒကာမွဲ ပ္ဍဲကွာန်ခ္ဍးကၠာ နာဲဗဟာန်ရ တၠပညာ သၟိက်ကဵုဒါန်စိ သၠပတ်သေၚ်ဟာ ကဵုအခေါၚ်ကၠာ ရာဒနာရ ယွံအ္စာအဲ ညာဏ်သၠဲတိက္ခ မၞိဟ်ဂမၠိုၚ်အဴ တဴပ္ဍဲလောက ညးကီုအဲကီု သီုဖ္အိုတ်ရ ရာဒနာအဵု အိုတ်ဂွံဆဵုပၠ ဗီုဒယှ်တှ်သၟတ် အနာဂတ်ဂတ သွက်ဂွံတီလောဲ ဗွဲသင်္ခေပ သၠပတ်လုပ်ဝၚ် ပြကိုဟ်တၟေၚ်ဂျ သွက်တီဇဳသာ် ကျာ်အရဳယျ ခၞံကဵုညိရ အာတ်ပါၚ်အခေါၚ် ။


ပ္ဍဲဂှ်အဲကၠာ ချပ်အာမွဲတောၚ် ယွံနာဲဗဟာန် အဲဂစာန်ရောၚ် ဂွံဒိပ်ဂၠိပ်ပြဲ နဲကဲဟွံယောၚ် ကျာ်အရဳယျ ဒှ်ဂတရောၚ် သွက်ဘာသာမန် အဲရန်တၟံရောၚ် ဂွံပ္ဍေန်ဂွံဗှ် ဟီုတွံမွဲတောၚ် အဲခၞံရောၚ် ဂၠေါၚ်အနာဂတာ ယွံကလောတံ တၟံညးအဲကၠာ ပြကိုဟ်ဝွံဂှ် ဒှ်မန်ဘာသာ ခမဳခရှ်ပြဲ ပ္ဍဲသာသနာ လုတ်တလးညိ ပဗျိလက်ဖာ ဒေပ်စိုတ်အသဝ် ဖျေံဓရ်မေတ္တာ ရီုဗၚ်ဍံၚ်သွာ ဖျေံမေတ္တာညိ


အဲနွံပိုန်ရ မညဘာသာ ဃောပဒတဴဟေၚ် ဝင်္ကသေၚ်ဟာ ဒက်ကျာ်သိုၚ်ဘုတ် ဟွံဖလုတ်အာ ဃောမကၠောန်ဂှ် သၟဟ်ဝတ္ထုကၠာ သွက်တက်လိခ်ပၠန် မညဘာသာ ဂွံတီအဓါန်မသုန် နွံဂုဏ်ဇၞော်ကၠာ သွက်ဂွံဒှ်မ္ၚဵု ပ္ဍဵုဗီုစက်မာ ပူဂဵုမန္ဒ ဟီုဂးသေၚ်ဟာ ဂွံယးတၟး ဟီုစဳပျးဏာ ကဵုတီကေတ်ဟေၚ် ဝေၚ်ကျာ်အရဳယျာ နူသၠပတ်မာ ဂိုၚ်ကေတ်နၚ်ကၠာ သွက်ဇန်တြုံဗြဴ ဗွဲအနာဂတာ ခၞံဗဒှ်ရ ဓမ္မဒါန်ရောၚ် ။


(၁) စၞောန်ထ္ၜးပဏာမလ္ၚောဝ်ကျာ်[ပလေဝ်ဒါန် | ပလေဝ်ဒါန် တမ်ကၞက်]

  • နမော တဿ ဘဂဝတော အရဟတော သမ္မာသမ္ဗုဒ္ဓဿ

တိဏ္ဏဝိဟာရဘောဂဟံ သံသာဇနဿအတ္တာနံ မေတ္တေယျသတ္တဇာတကံ ကရိဿာမိယထာရဟံ


တိဏ္ဏဝိဟာရဘောဂဟံ ၚ် အဲနွံပိုန်ဘာအသွောံတုန်ဂှ် သံသာဇနဿအတ္တာနံ တၞဟ်နသကဵုဒှ်ဒတုဲမြမောဝ် သတ္တံမတဴပ္ဍဲသံသာဝွံဂှ် မေတ္တေယျသတ္တဇာတကံန် ကတဵုဒှ်သုတ်ဇာတ်ကျာ်တြဲအရဳယျမေတ္တေယျမဒှ်ဂတဂှ် ယထာရဟံအယာံမာတ်မထေက်ကြိုက်ကဵုညာဏ်အဲဂှ် ကရိဿာမိ ပ္ဍံအဲခၞံညိအဴ


မူသၟိက်ဂး အဓိပါဲဂါထာတုန်ပၠန်ရော အဲနွံပိုန်ဘာသွောံ သၟိက်ဂွံစိုပ်ဍုၚ်ဇၞော်နိဗ္ဗာန် လၟေၚ်တဝှ်ဂလာန်အကြီုမေတ္တေယျသုတ် မကတဵုဒှ်ဂတဂှ် တၞဟ်နဒတုဲမြမောဝ် ဇန်တံမတဴပ္ဍဲသံသာ လၟေၚ်အဓါန်မသုန်ဂှ် အဲပညဳပညပ်လဝ် သွက်ကောန်ဂကူမန်ပိုဲတံညးဂမၠိုၚ် ဂွံတီညိဂးတုဲ

(၂) စၞောန်ထ္ၜးဝတ္တပန်သာ်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲဇရေၚ်ကဝ်ဂှ် တိတ်ဒှ်စှ်သာ်တုဲ သံဝတ္တော သံဝတ္တာ ဝိဝတ္တထာယိ ဝိဝတ္တာယိ ဣဝွံ ဝတ္တပန်သာ်ရ "နူကဝ်မတန်ဒၟံၚ်တုဲ ဒဵုကဝ်မတဴဂှ် မွဲဝတ္တရ" ဆမတဴဒၟံၚ်တုဲ ဒဵုဗြဲမဂူဂှ် ဒှ်မွဲဝတ္တပၠန်ရ" ဆဗြဲမဂူဒၟံၚ်ဂှ် ဒဵုဍာ်မတၟိုဟ်တိုန်အာ ဒဵုကဵုဍုၚ်ဗြီုတေံလေဝ် ဒှ်မွဲဝတ္တပၠန်ရ" နူဂှ်ဗြဲဍးဟဲအာတုဲ ဍာ်ဇတ်စှ်ေအာအိုတ် ဒဵုကဵုတိတၟံတကံမကတဵုဒှ်ပၠန်ဂှ် ဒှ်မွဲဝတ္တပၠန်ရ" သီုပန်ဝတ္တဂှ် ဒှ်မွဲမဟာကဝ်ရ နူကဝ်မတန် ဒဵုကဝ်မတဴပၠန်ဂှ် တြဴစှော်ပန်အန္တရကပ်ရ" မွဲအန္တရကပ်မ္ဂးဂှ် အယုက်သတ္တံနူစှ်သၞာံ မောဝ်တိုန်အာ ဒဵုကဵုမွဲသၚ်ဃဲ နူမွဲသၚ်ဃဲဂှ် ယုတ်စှ်ေအာဒဵုစှ်သၞာံ ဣဝွံ မဒှ်မွဲအန္တရကပ်ရ"

(၃) စၞောန်ထ္ၜးယုဂ္ဂပန်သာ်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲအယုက်သတ္တံ ဒှ်စှ်သၞာံဂှ် ဒှ်ယုဂ္ဂပန်ရ ပသာ်ယုဂ္ဂပန်ပၠန်တုန်ရော

(က) သတ္တာယုဂ္ဂ

(ခ) တြိတာယုဂ္ဂ

(ဂ) ဒွါရယုဂ္ဂ

(ဃ) ကာလယုဂ္ဂ ဣဝွံ ယုဂ္ဂပန်သာ်ရ

အယုက်သတ္တံ နူမွဲအသၚ်ဃဲဂှ် ကၠံသၞာံမွဲသၞာံယုတ်စှ်ေအာ ဒဵုကဵုမအာစိုပ်မွဲလက်သၞာံဂှ် သတ္တာယုဂ္ဂမ္ဂးယၟုရ နူမွဲလက်သၞာံဂှ် ကၠံသၞာံမွဲသၞာံ ယုတ်စှ်ေအာပၠန် ဒဵုကဵုမအာစိုပ် အယုက်သတ္တံလၞီသၞာံဂှ် တြိတာယုဂ္ဂမ္ဂးယၟုရ နူအယုက်သတ္တံလၞီသၞာံဂှ် ကၠံသၞာံမွဲသၞာံ ယုတ်စှ်ေအာပၠန် ဒဵုကဵုမအာစိုပ်ကၠံသၞာံဂှ် ဒွါရယုဂ္ဂမ္ဂးယၟုရ နူအယုက်သတ္တံကၠံသၞာံဂှ် မယုတ်စှ်ေအာပၠန် ဒဵုကဵုမအာစိုပ် အယုက်သတ္တံစှ်သၞာံဂှ် ကာလယုဂ္ဂ မ္ဂးယၟုရ ကာလဇၞော်မောဝ်တိုန်အာပၠန်ဂှ်လေဝ် ညံၚ်နဲသာ်ဂှ်ကီုရ ကၠံသၞာံမွဲသၞာံ ဇၞော်မောဝ်တိုန်အာရ ဣဝွံ မဒှ်ယုဂ္ဂပန်ရ

(၄) စၞောန်ထ္ၜးပရေၚ်ကဝ်ဗွဲခမၞောန်[ပလေဝ်ဒါန် | ပလေဝ်ဒါန် တမ်ကၞက်]

ကဝ်ပိုဲဝွံဂှ် နူကဝ်မတန်တုဲ လုကဴ (၁၂) အန္တရကပ်မတန်တုဲ ကျာ်တြဲကက္ကုသန် မကတဵုဒှ်ရ နူဂှ် စှ်အန္တရကပ်ပၠန်တုဲ ကျာ်တြဲကောနာဂီု မကတဵုဒှ်ပၠန်ရ နူကျာ်တြဲကောနာဂီုဂှ် စှ်အန္တရကပ်ပၠန်တုဲ ကျာ်တြဲကဿပ မကတဵုဒှ်ပၠန်ရ နူကျာ်တြဲကဿပ စှ်အန္တရကပ်ပၠန်တုဲ ကျာ်တြဲမှာဂေါတမ မကတဵုဒှ်ပၠန်ရ နူကျာ်တြဲပိုဲ မှာဂေါတမဂှ် စှ်အန္တရကပ်ပၠန်တုဲ ကျာ်တြဲအရဳယျမေတ္တေယျ မကတဵုဒှ်ပၠန်ရ ကျာ်တြဲ အရဳယျမေတ္တေယျ မကတဵုဒှ်ပၠန်တုဲ (၁၂) အန္တရကပ်ဂတပၠန်ဂှ် ကဝ်ဇၞော်ပိုဲဝွံ တူလေၚ်အာရ ဣဝွံ ပရေၚ်ကဝ်ဗွဲခမၞောန် တုဲဆဝွံရ

(၅) စၞောန်ထ္ၜးမှာထေရ်အနန်အာတ်လွဵုကျာ်တြဲဒ္စါံသာ်[ပလေဝ်ဒါန် | ပလေဝ်ဒါန် တမ်ကၞက်]

နွံကာလမွဲတ္ၚဲ မှာထေရ်အနန် အာတ်လွဵုကဵုကျာ်တြဲ ဒ္စါံသာ်ရ ပၞောဝ်လွဵုဒ္စါံသာ်ဂှ်တုန် ပတိက္ခေပပန် အာယာစနပန် ဒှ်ဒ္စါံရ ပတိက္ခေပပန်မ္ဂးဂှ် လွဵုမဆေဝ်ဒဝ်ရ အာယာစနပန်မ္ဂးဂှ် လွဵုမအာတ်ကေတ်အခေါၚ်

(က) ညးမ္ဂးလွဵုဆေဝ်ဒဝ်ပန်သာ်ဂှ်ရော

(၁) ပ္ဍဲဂန္ဓကုဋဳဂကောံသဗ္ဗညု လ္ပကဵုအဲသတိက်ညိ

(၂) သ္ၚာသဗ္ဗညုလတက်တုဲ လ္ပကဵုအဲဒးလတက်ညိ

(၃) ပိဏ္ဍပါတ်ဂကောံသဗ္ဗညု မကဵုပိုန်တုဲဂှ် လ္ပကဵုအဲဒးကဵုညိ

(၄) သဗ္ဗညု မအာကဵုပိုန်နိမန်ညးဂှ် လ္ပအဲဍိက်ဒးဆန်ၜန်ညိ

ဣဝွံ လွဵုဆေဝ်ဒဝ်ပန်သာ်ရ


(ခ) ညးမ္ဂးလွဵုအာတ်အခေါၚ် ပန်သာ်ဂှ်ရော

(က) ဇၟာပ်ဒၞါဲသဗ္ဗညု မအာတွံဓရ်ကဵုညးဂှ် က္လေၚ်စဴကၠုၚ်တုဲ တွံပၟိၚ်ကဵုအဲဍိက်ညိ

(၂) ယြဴညးမွဲ သၟိက်ပ္တီသဗ္ဗညု ကၠုၚ်စိုပ်အဲဍိက်တုဲ အဲဍိက်လ္ၚောဝ်ပ္တီသဗ္ဗညုဂှ် ဗွဲမပြဟ်ဟၚ် သဗ္ဗညုကဵုအခေါၚ်ကဵုအဲဍိက်ညိ

(၃) ယြဴညးမွဲ သၟိက်က္လၚ်ပၚ်မှိၚ်ဓရ် ကၠုၚ်စိုပ်အဲဍိက်တုဲ အဲဍိက်ပ္တီပြဟ်ဟေၚ် သဗ္ဗညုတွံကဵုညးညိ

(၄) သၟာန်မွဲ အဲဍိက်သၟိက်မိက်ဂွံတီ အဲဍိက်သၟာန်သဗ္ဗညုဂှ် ဗွဲမပြဟ် သဗ္ဗညုသွဟ်ကဵုအဲဍိက်ညိ

ရဴသာ်ဝွံ အာယာစနပန်သာ် မှာထေရ်အနန် အာတ်လွဵုကဵုကျာ်တြဲ ဒ္စါံသာ်ဂှ် တုဲဆဝွံရ

(၆) စၞောန်ထ္ၜးမှာထေရ်အနန်သၟာန်ကျာ်တြဲအနန္တပန်သာ်[ပလေဝ်ဒါန် | ပလေဝ်ဒါန် တမ်ကၞက်]

(မှာထေရ်အနန် သၟာန်ကျာ်တြဲ အနန္တပန်သာ် )

နွံကာလမွဲတ္ၚဲ ပ္ဍဲဘာဇေတဝန် လၟေၚ်အနန္တပန်ဂှ် မှာထေရ်အနန် သၟာန်ကျာ်တြဲရ ယွံသဗ္ဗညု ညးမ္ဂးအနန္တပန်သာ်ဂှ်ရော ယွံအနန် ဗုဒ္ဓညာဏံအနန္တံ အကာသံအနန္တံ စက္ကဝါလံအနန္တံ သတ္တာနိကာယောအနန္တော ဣဝွံ အနန္တပန်ရ


ဗုဒ္ဓညာဏံအနန္တံမ္ဂးဂှ် ညာဏ်ကျာ် မဟွံတီဗၞတ်တွဵုရ အကာသံအနန္တံမ္ဂးဂှ် အကာသ မဟွံတီဗၞတ်တွဵုရ စက္ကဝါလံအနန္တံမ္ဂးဂှ် စက္ကဝါ မဟွံတီဗၞတ်တွဵုရ သတ္တနိကာယောအနန္တောမ္ဂးဂှ် ဂကောံသတ္တံဂမၠိုၚ်ဂှ်လေဝ် ဟွံတီဗၞတ်တွဵုရ လၟိဟ်သတ္တံဂမၠိုၚ်ဂှ် ၜတ်ကၞာတ်ဟွံမာန်ရ အကာသတွဵုဟွံမာန်မ္ဂးဂှ် ပသၟးရော တိသုန္ဓရဳ မၞုံသတီုၜါလက်ယောဇနာကဵုပန်လဟုတ်ပြဲဂှ် ယြဴတြုံတၠဣဓိမွဲ ဖါဲကၠေံတိဝွံတုဲ တၟံဇၞော်မွဲတၟာသ္ၚိကၠတ်ဂှ် နူကဵုတဲ သကဵုထောံဒတုံဂတာတေံမ္ဂးဂှ် တၟံဇၞော်ဂှ် စှ်ေဒၟံၚ်ဗ္တံတ္ၚဲဟွံသကုတ်ရ မုရဴကာလမွဲ တၟံဂှ်မဒေါံပၠန်ဂှ် ဟၟဲရ လ္တူပိုဲဝွံကီု သၟဝ်ဂတာတိတေံကီု ဒှ်ဒၟံၚ်အကာသဖ္အိုတ်ရအနန် ဟိုတ်ဂှ်ရ အကာသံအနန္တံ အကာသတွဵုဟွံမာန်မ္ဂးရောၚ် စက္ကဝါလံအနန္တံမ္ဂးဂှ် တကံပန်သိန္နရာဇ်မွဲ မဒှ်စက္ကဝါဝုတ်ဒိုဟ် စက္ကဝါပိုဲဝွံဂှ် နွံဒၟံၚ်စှ်လ္ၚီစက္ကဝါ ဂကောံစက္ကဝါပိုဲဝွံ တူမွဲတ္ၚဲတန်မွဲတ္ၚဲ တုပ်သၟဟ်ရ ဟိုတ်ဂှ်ရ ဇာတိခေတ်မ္ဂးရ မ္ၚးနူဇာတိခေတ်ဂှ် နွံမွဲလက်ကိုဋ်စက္ကဝါပၠန် အနက်ခေတ်မ္ဂးရ မ္ၚးနူအနက်ခေတ်ဂှ် ဝိသာယျခေတ်မ္ဂး အနန္တစက္ကဝါမ္ဂးရ ရိုဟ်လၟိဟ်ဗၞတ်တွဵုဟွံမာန်ရ ၜတ်ကၞာတ်ပိုၚ်ခြာဟွံမာန်ရ

(၇) စၞောန်ထ္ၜးခဏ်မှာထေရ်အနန်ဗက်အာကျာ်တြဲ[ပလေဝ်ဒါန် | ပလေဝ်ဒါန် တမ်ကၞက်]

ယွံအနန် သၟိက်တီဗၞတ်စက္ကဝါမ္ဂးဂှ် ညံၚ်သအာအဖဝ်အဲကျာ်ညိ အဲကျာ်ထ္ၜးကဵုရ ကျာ်သ္ဂးတုဲ နကဵုဣဓိကျာ်တြဲဂှ် မှာထေရ်အနန် ကလာၚ်ဗက်အာရ အာစိုပ်စက္ကဝါမွဲတုဲ ကျာ်သီုအနန် ဒတူဒေါံမံၚ်တုဲ ကျာ်တြဲသၟာန်အနန်ရ

ယွံအနန် နူစက္ကဝါမကၠုၚ်တုဲတေံ ဒဵုကဵုစိုပ်စက္ကဝါဝွံဂှ် မမွဲစိလလအ်ဒှ်ရော မွဲမွဲစက္ကဝါ လၟိဟ်စက္ကဝါမွဲစိသဒှ်ရော ကျာ်တြဲသၟာန်အနန်ရ

ယွံသဗ္ဗညု ဆမွဲဒမြိပ်မတ် မွဲခဍတ်တဲသဒှ်ရ ပြဟ်လောန်အာစက္ကဝါဂှ်လေဝ် အဲဍိက်သတီဟွံဒးရကျာ်အနန်ဂး


ယွံအနန် ဆမွဲဒမြိပ်မတ် မွဲခဍတ်တဲကီု ပိုဲကၠုၚ်လၟုဟ်ဝွံဂှ် ဗၞတ်လၟိဟ်စက္ကဝါ ဟွံတီကဵုဗၞတ်တုဲရအနန် စက္ကဝါဗွဲဒိုဟ်ဗၟံက်ဂတနူဝွံဂှ် ရိုဟ်လၟိဟ်တွဵုဟွံမာန်ရအနန် ဆစက္ကဝါဗွဲဒိုဟ်ဗၟံက်ဝွံဂှ် ရိုဟ်လၟိဟ်တွဵုအယုက်သာသနာအဲကျာ် (၅)လ္ၚီသၞာံဂှ်သကဵုဒှ် ညံၚ်သာ်ပိုဲကၠုၚ်လၟုဟ်ဝွံဂှ်မ္ဂး အာဟွံတီအိုတ်ရအနန် ဟိုတ်ဂှ်ရ စက္ကဝါလံအနန္တံမ္ဂးရ

ပ္ဍဲစက္ကဝါမဟွံတီဗၞတ်တွဵုတံဂှ် သတ္တံနွံပေၚ်ဒၟံၚ်ညံၚ်စက္ကဝါပိုဲဖ္အိုတ်ရအနန် ဟိုတ်ဒှ်သာ်ဂှ်ရ သတ္တနိကာယော အနန္တော သတ္တံဂမၠိုၚ်ဂှ်လေဝ် ရိုဟ်လၟိဟ်တွဵုဟွံမာန်ကီုရ ကျာ်တံဟံၚ်ဖျဴဏာသတ္တံ ဟွံတီအိုတ်ရအနန်

ယွံသဗ္ဗညု အိုဿီုအနန္တစက္ကဝါဂှ် သဗ္ဗညုဂွံအာစိုပ်ကီုရဟာကျာ် ယွံအနန် အယုက်သာသနာအဲကျာ် (၅)လ္ၚီသၞာံဂှ် ညံၚ်ပြဟ်အဲကဵုအနန် မကၠုၚ်လၟုဟ်ဝွံဂှ် စက္ကဝါဗွဲဒိုဟ်ဗၟံက်မွဲဒိုဟ်ဂှ်လေဝ် အာဟွံအိုတ်ရ အဲဂှ်လေဝ်ဟီုကဵုအနန်တုဲရသေၚ်ဟာ စက္ကဝါသီုပန်ဒိုဟ်ဝွံဂှ် ညံၚ်သာ်ဝွံရအနန် စက္ကဝါတံဂှ် ဇကုအဲကျာ်ဟွံစိုပ်ရ ဓရ်မဟာကရုဏာအဲဗယာပ် မေတ္တာအဲ အာစိုပ်အိုတ်ရအနန်


ယွံသဗ္ဗညု ပၞောဝ်စက္ကဝါဂမၠိုၚ်ဂှ် မုရဴစက္ကဝါမွဲ မဒှ်လ္ဒေါဝ်ရောကျာ် ယွံအနန် ပြာသာဒ်မွဲဂှ် ဒယိုၚ်အတှ်ပန်ဒိုဟ် ပတူလဝ်တုဲ မုဒၞါဲညးပ္ဍုန်ဓုပ်ပြကာရောအနန် ယွံသဗ္ဗညု ပ္ဍဲလ္ဒေါဝ်အတှ်ပန်ဂှ် ညးပ္ဍုန်ဓုပ်ပြကာရကျာ် ညံၚ်သာ်ဂှ်ကီုရအနန် စက္ကဝါပိုဲပန်ဒိုဟ်ဝွံဂှ် ညံၚ်ဒယိုၚ်အတှ်ဂှ်ကီုရ စက္ကဝါပိုဲဝွံ ညံၚ်ဓုပ်ပြကာဂမၠိုၚ်တေံဂှ်ကီုရ မုဟိုတ်ရော ပ္ဍဲစက္ကဝါသ္အာၚ်တေံဂှ် သွဝ်တြဴဘုံလေဝ်နွံ ဗြီုစှ်တြဴဘုံလေဝ်နွံ ပူဂဵုသုဒ္ဓါဝါသ စက္ကဝါတေံဟၟဲ ပ္ဍဲစက္ကဝါပိုဲဝွံဂှ် ဗြီုသုဒ္ဓါဝါသ(၅)ဘုံလေဝ်နွံ ပူဂဵုအနာဂါံကဵုအရှန်လေဝ်နွံ ပ္ဍဲစက္ကဝါသ္အာၚ်တေံဂှ် ဗောဓိသတ်,ကျာ်,အရှန်,ပစ္စေဂဗုတ် သၟိၚ်စက္ကဝဝ်ဟၟဲ ပ္ဍဲစက္ကဝါပိုဲဝွံဂှ် ကျာ်အရှန် ပစ္စေဂဗုတ် သၟိၚ်စက္ကဝဝ် မနွံရောၚ် စက္ကဝါပိုဲဝွံ ပၞောဝ်တကံပန်ဂှ် ပ္ဍဲတကံပိတေံလေဝ် ကျာ် အရှန် ပစ္စေဂဗုတ် ဟွံဒှ်ကီု သတ္တံ ပ္ဍဲတကံဇမ္ဗုဒိပ်မွဲကီု ကျာ် အရှန် ပစ္စေဂဗုတ် သၟိၚ်စက္ကဝဝ် မဒှ်ရောၚ် ဟိုတ်ဒှ်သာ်ဂှ်ရ စက္ကဝါပိုဲဝွံ မဒှ်ဓုပ်ပြကာဂမၠိုၚ်ရောၚ်အနန်


ယွံသဗ္ဗညု ပ္ဍဲစက္ကဝါဂမၠိုၚ်တေံဂှ် မုရဴပူဂဵုမွဲ သတ္တံဂမၠိုၚ် မဂွံပပြာကတ် ဗွဲဂုန်ဝိသေသရောကျာ် ယွံအနန် ပူဂဵုမၞုံကဵုညာန်ဇျှာန်လောကဳတံဂှ်လေဝ် နွံကီုရ ပူဂဵုတံဂှ် ညးမပြာကတ် ဗွဲဝိသေသရအနန်

ယွံသဗ္ဗညု ဗတဳဂၚ်အောန်အာ ကျာ်လောန်စဴအာနိဗ္ဗာန် ဂၠိုၚ်လောန်သန်ရ သဗ္ဗညုမ္ဂးဂှ် ကျာ်မွဲမွဲဟံၚ်ဖျဴဏာသတ္တံ မူစိဂလိုၚ်လဵုရောကျာ် ယွံအနန် ကျာ်မွဲမွဲဟံၚ်ဖျဴဏာသတ္တံ ၜါစှော်ပန်အသၚ်ဃဲကဵုတြဴစှော်လက်ကိုဋ်ပရဲရအနန်

ယွံသဗ္ဗညု မွဲအသၚ်ဃဲမ္ဂးဂှ် မူစိရိုဟ်လၟိဟ်ဗၞတ်သဒှ်ရောကျာ် ယွံအနန် အလုံဇမ္ဗုဒိပ်ဝွံ ဗြဲမဂူဖျေံမွဲဝှ်ပိဂိတု ဗ္တံတ္ၚဲလ္ပကဵုဍး လ္ပကဵုသ္ကုတ် လ္ပကဵုသိၚ်သာဲ လၟိဟ်မဗြဲဂှ် ဒှ်မွဲအသၚ်ဃဲရအနန်


ယွံသဗ္ဗညု ကျာ်စဴနိဗ္ဗာန်လေဝ် ဗ္တဳဂၚ်အောန်အာ ကျာ်စဴနိဗ္ဗာန်ဂၠိုၚ်လောန် သဗ္ဗညုမ္ဂးဂှ် ကျာ်မွဲမွဲဟံၚ်သတ္တံဂှ်လေဝ် ၜါစှော်ပန်အသၚ်ဃဲကဵုတြဴစှော်လက်ကိုဋ်ပရဲရောၚ် သဗ္ဗညုမ္ဂး သတ္တံဂှ် မုပဍေံဟွံအာ မုပဍေံဟွံခလံက်ယုတ်အာ ပ္ဍဲဝွံရောကျာ် ယွံအနန် ကၟာမွဲဂှ် ဇမၠိၚ်အနာံပန်ကၠၚ်ဓဝ် မွဲမွဲတလၚ် ဗၞတ်မွဲယောဇနာ ဍာ်ပေၚ်ကၠေံဒၟံၚ်ရ ပ္ဍဲလ္ဒေါဝ်ကၟာဂှ် ကၠံကၠံသၞာံ မွဲဗြံက်ကီုကဵုတုက်ဂိုၚ်ကေတ်ဂှ် ဍာ်လ္ဒေါဝ်ကၟာ ဒၞါဲဍေံမကဵုတုက်ကေတ်ဂှ် ဍေံခလံက်မံၚ်ကီုဟာအနန် ကျာ်သၟာန်ရ ယွံသဗ္ဗညု ဍာ်ဝုတ်ဒိုဟ်ဂှ် ဍေံဇွောဝ်လုပ်ကၠုၚ်ပၠန်ရ ဒၞါဲညးမတုက်ဂှ် ဟွံခလံက်ရကျာ် ယွံအနန် ပၟာညံၚ်သာ်ဂှ်ကီုရ သတ္တံမတဴပ္ဍဲစက္ကဝါပိုဲဝွံဂှ် ကျာ်တံဟံၚ်ဖျဴနိဗ္ဗာန်တုဲ သတ္တံမတဴပ္ဍဲစက္ကဝါသ္အာၚ်တေံဂှ် မဟွံတီကဵုဗၞတ်တွဵုတေံဂှ် ဍေံတံပတုဲကုသဵုကဵုဒါန်တုဲ ဍေံတံရာဒနာမိက်တုဲ ဍေံတံကၠုၚ်ကတဵုဒှ် ပ္ဍဲစက္ကဝါဝွံရအနန် ဟိုတ်ဂှ်ရ သတ္တနိကာယောအနန္တောမ္ဂးရောၚ်


ယွံသဗ္ဗညု သတ်ပ္ဍဲစက္ကဝါသ္အာၚ်တေံဂှ် ဍေံပတုဲကုသဵုကဵုဒါန်တုဲ ဍေံရာဒနာမိက်တုဲ ဍေံတံကၠုၚ်ကတဵုဒှ် ပ္ဍဲစက္ကဝါဝွံရ ပ္ဍဲစက္ကဝါဝွံဂှ် ဟွံဒးအာကတဵုဒှ် စက္ကဝါသ္အာၚ်တေံကီုဟာကျာ် ယွံအနန် ကၠာကဝ်ဟွံတဴမွဲလက်သၞာံဂှ် ဒေဝတဴပၟၚ်လိုက် လောကပါလတံကီု မှာဗြီုတံကီု လတက်ယာတ်ဖေၚ်ဗကေတ် တိတ်ပၠဇကုတုဲ စှ်ေဂတေဝ်ယာံတဴရ ယွံမၞးတံဟိုဲ ဂတဝွံကဝ်တဴရ လၟေၚ်ဓမ္မတာကဝ်ရ သတ်အဇလဒိတ္ထိ ဒိတ္ထိဍေံဗိုန် မသက္ကုကသဳဂှ် ပူဂဵုတံဂှ် ဗၠးနူနရက်ဟွံမာန်တုဲ ဍေံမကၠောံဒုၚ်နရက် ပ္ဍဲစက္ကဝါသ္အာၚ်တေံရ ပူဂဵုတံဂှ်လေဝ် လေပ်ဒးအာကီုရအနန် ပူဂဵုတံဂှ် အဇလဒိတ္ထိမ္ဂးရ ပူဂဵုဒိတ္ထိဗိုန် ပူဂဵုဟွံရှ်ေသှ်ေကျာ် ဟွံရှ်ေသှ်ေဓရ် ဟွံရှ်ေသှ်ေသၚ် ဟွံရှ်ေသှ်ေမိမအ္စာဥပဇ္ဇျာဲ ကုသဵုဟၟဲ သရာံပါပ်ဟၟဲဍေံဂး သွဝ်ဟၟဲနရက်ဟၟဲဍေံတံဂးရ ဍေံတံပလီုကျာ်ဘုတ်ဘာ ဍေံတံဒြိုဟ်ကဵုခမဳသၚ် ပူဂဵုတံဂှ် ဒှ်အဇလဒိတ္ထိရ ပူဂဵုတံဂှ် သရာံပါပ်ဝိပက်ဍေံ ဟွံပေၚ်လၟိဟ်ကဝ်ဏီတုဲ ကာလကဝ်တူဂှ် ဍေံမကၠောံဒုၚ်နရက် ပ္ဍဲစက္ကဝါသ္အာၚ်တေံကီု ပူဂဵုရှ်ေသှ်ေကျာ်ဓရ်သၚ် ရှ်ေသှ်ေရတ်ပိပြကာ မိမအ္စာဥပဇ္ၛာဲတံဂှ် လံဂွံအာစိုပ်ဍုၚ်ဇၞော်နိဗ္ဗာန်ဂှ် မ္ဒးကၠောံအာစက္ကဝါသ္အာၚ်ပၠန်မ္ဂးဂှ် ဟၟဲသက်က်ရအနန်


ယွံသဗ္ဗညု သတ္တံမပတုဲကုသဵုကဵုဒါန်ဂှ် ပသာ်မပတုဲဒါန်တုဲ ကဵုကုသဵုဂှ် မဂွံဇၞော်မောဝ်ညိရောကျာ် ယွံအနန် ကျာ်ကေုာံသၚ် ကဵုဒါန်မ္ဂးဂှ် ဖဵုဒါန်ဂှ်ဇၞော်မောဝ်လောန် ပိုၚ်ခြာပတောံၜတ်ဟွံမာန်အနန် ကျာ်ဂးတုဲ ပရိုၚ်ဂလာန်ဂှ် ဂၞကျာ်ပဇာပတိဂေါတမဳ မဒှ်သဳကျာ်တြဲဂှ် ဂွံမိၚ်ကေတ်တုဲ သာ်ဝွံ ဂၞကျာ်ပဇာပတိဂေါတမဳ ချပ်ရ

(၈) စၞောန်ထ္ၜးခဏ်ဂၞကျာ်ပဇာပတိဂေါတမဳကဵုဒါန်သ္ၚာထဝ်[ပလေဝ်ဒါန် | ပလေဝ်ဒါန် တမ်ကၞက်]

ဇကုကျာ်တြဲမတုပ်တဴ ညံၚ်ရဴသာ်ထဝ်ဂှ် သ္ၚာမတုပ်တဴညံၚ်ရဴသာ်ထဝ်ဂှ် အဲစဳရေၚ်ပကီုလွဳတုဲ ကျာ်တြဲလတက်ညိဂးတုဲ ကြာၚ်ကေတ်ထဝ်နိက် စုတ်ဗပေၚ်ကၠာၚ်ထဝ်တုဲ ဂၞကျာ်ပအဓိဌာန်ရာဒနာမိက်တုဲ တလုတ်မတောဝ်ပ္ဍဲကၠာၚ်ထဝ်ဂှ်ရ နကြဳဇှ်ဒြဟတ်ကုသဵုစိုတ်အဓိဌာန်ဂှ် ပ္ဍဲချိုန်ခဏဟေၚ်မတောဝ်ဂှ် ကၠုတ်တိုန်ဗက် ကတဵုဒှ်ပ္ကဴသတ် ဒှ်အာထဝ်ပ္ဍဲခဏဂှ် ဂၞကျာ်ၜှ်ဂိုၚ်ကေတ်တုဲ ဒစာ်ပိုဟ်ပန်ကၠေၚ်ကွာဒရာဒလုၚ်တုတ်တုဲ ဗဒှ်သ္ၚာမတုပ်သၟဟ်တဴ ညံၚ်ရဴဂၠးထဝ်ကီု ပ္ဍဲတ္ၚဲဂှ် ဒှ်တ္ၚဲသဳဗပေၚ်ကထိုန် ဂၞကျာ်ယဵုကေတ်ဏာသ္ၚာၜါသွဝ်ဂှ်တုဲ ပတိတ်ဏာစိုပ်တံဇိုၚ်ကျာ်တြဲတုဲ သ္ၚာမွဲဗဂိန်ကဵုကျာ် သ္ၚာမွဲဗဂိန်ကဵုသၚ်ဂမၠိုၚ် ပ္ဍဲကာလဂှ် မှာထေရ်သာရိပိုတ်ဟွံဂံၚ်ဒုၚ်ဗဂိန် မှာထေရ်မောဂ္ဂလာန်ဟွံဂံၚ်ဒုၚ်ဗဂိန် အသဳတိသာဝက တၠအရှန်ၜါလက်ဟွံဂံၚ်ဒုၚ်ဗဂိန် သ္ၚာသာ်ထဝ်ဂှ် ခမဳဍောတ်မွဲ ကောန်သၟိၚ်အဇာတသတြု အဇိတထေရ်ဂးယၟု မဒုၚ်ဗဂိန်သ္ၚာသာ်ထဝ်ဂှ်ရ။

(၉) စၞောန်ထ္ၜးခဏ်ခမဳဂမၠိုၚ်ဟီုစန်စာပရောအဇိတထေရ်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကာလဂှ် ခမဳဂမၠိုၚ်ဝွံ ဟီုစန်စာတဴအိုတ်ရ ဗီုလဵုမဟီုရော ယွံနာဲပိုဲခမဳတံညးဂမၠိုၚ် မပ္တံမှာထေရ်သာရိပိုတ် မှာထေရ်မောဂ္ဂလာန် အသဳတိသာဝက တၠအရှန် ၜါလက်ဂှ်လေဝ် ဟွံဂံၚ်ဒုၚ်ဗဂိန် သ္ၚာသာ်ထဝ်ဂှ် အဇိတထေရ်ခမဳဍောတ်မွဲ မဂွံဒုၚ်ဗဂိန်သ္ၚာသာ်ထဝ်ဝွံဂှ် အသဝ်ကွေံရောၚ်သွံ ခမဳဂမၠိုၚ်စန်စာအိုတ်ရ ကျာ်တြဲမိၚ်တုဲ သၟာန်တိုန်ခမဳဂမၠိုၚ်ရ ယွံခမဳတံ မဒၟံၚ်မွဲဟာန်ပ္ဍဲဌာန်ဝွံဂှ် မုရဴဂလာန်မွဲ မကတဵုဗဒှ်ဒၟံၚ်ရော ယွံသဗ္ဗညု ခမဳဍောတ်ဝွံ မဂံၚ်ဒုၚ်ဗဂိန်သ္ၚာသာ်ထဝ်ဝွံဂှ် ပိုဲဍိက်တံ မဟီုစန်စာရောၚ်ကျာ် ယွံခမဳတံ ခမဳဍောတ်အဇိတထေရ်ဝွံဂှ် မဒှ်လလဲအဲဂတဝွံရောၚ်ဂးတုဲ ကျာ်တြဲကၞပ်သ္ၚောံဒၟံၚ်ရ ပ္ဍဲကာလဂှ် ခမဳဂမၠိုၚ် အာတ်ပၚ်မှိၚ်ဇာတ်အတိက်တုဲ ကျာ်တြဲတွံကဵုခမဳဂမၠိုၚ်ရ။

(၁၀) စၞောန်ထ္ၜးခဏ်ကျာ်တြဲတွံဓရ်ကဵုခမဳဂမၠိုၚ်ဇာတ်အတိက်[ပလေဝ်ဒါန် | ပလေဝ်ဒါန် တမ်ကၞက်]

ဘိက္ခဝေ ယွံလေဝ်ကောန်အဲကျာ်ခမဳတံ ပ္ဍဲကာလအတိက်တေံ နွံကွာန်မွဲဂှ် လတ္ထိယဝါဂးယၟုရ ပ္ဍဲကာလဂှ် ဗောဓိသတ် ဒှ်ဂကူဗမၞး ဗြဟ္မကုမ္မာဂးယၟုရ လေပ်ဗိုတ်ပိဗေဒၚ်ပန် ပကတ်ကွးမသုန်ကၠံ ကွးတံဂှ်လေဝ် လေပ်အိုတ်တုဲ စိုတ်သဒ္ဓါပါတ်တိုန်တုဲ ဗောဓိသတ်တိတ်အာ ပခမဳရသိရ ကွးမသုန်ကၠံဂှ်လေဝ် တိတ်အာပခမဳရသိ ဂကောံဗောဓိသတ်ကီုရ ကာလဂှ် ဗောဓိသတ်အရဳယျမေတ္တေယျဂှ် ဒှ်ကွးဇၞော်ဗောဓိသတ်ဟေၚ် နွံပ္ဍဲကာလမွဲတ္ၚဲဗောဓိသတ်ကဵုကွးဇၞော်ဂှ် ဂၠါဲသတ်ဆုစၞ ဆဵုညာတ်ဒးကၠၝောံမွဲ ဍေံဒတုံကမၠိုၚ်ဒၞိဟ်တုဲ ဍေံစှ်ေအာစကောန်ရ ဍေံနွံပၟိက် သၟိက်မိက်ဂွံစကောန်ဍေံ ဍေံကမြဴတဴရ ဗောဓိသတ်ညာတ်တုဲ ဂွံတိုန်သံဝေဂရ ဓဝ်လောဘဝွံ ဇၞော်သန်သွံ ကောန်ဍေံ ဍေံသၟိက်မိက်ဂွံစသ္ဂးတုဲ ကွးဇၞော်ဗောဓိသတ်ဂှ် ကဵုအာဂၠါဲဖျုန်အၚးဇာဒိသိုၚ်ဟဝ်ကၠိုၚ် ဂွံကဵုဒါန်ကဵုကၠစရ လလံကွးမကၠုၚ်စိုပ်ဂှ် ဗောဓိသတ်ရာဒနာမိက် သၟိက်ဂွံဒှ်ကျာ်ပ္ဍဲစိုတ်တုဲ ထောံပတုံဖျေံဇကုပ္ဍဲကမၠိုၚ် ဒုၚ်ဗ္စစၞကၠၝောံဂှ်ရ။


ကွးဇၞော်ဗောဓိသတ်က္လေၚ်စိုပ်ကၠုၚ်တုဲ ဖျုန်ဂှ်လေဝ်ကေတ်ဟွံဂွံ ညာတ်အ္စာဒုၚ်ဗ္စစၞကၠဂှ်တုဲ သဒ္ဓါပါတ်တိုန်ပၠန်ရ အာဗၠိုပ်ဟုံဍာ်သ္အးကၠေံလနေၚ်ပဠက်မသ္အးၚးတုဲ ရာဒနာမိက်ဒဒှ်ကျာ်တုဲ ထောံပဒတုံဖျေံဇကု ဒုၚ်ဗ္စစၞကၠၝောံဂှ်ကီုရ ဟိုတ်အဲမကဵုဒါန်ကၠာဂှ်ရ အဲမဒှ်ကျာ်ကၠာရောၚ် ကွးဇၞော်အဲမကဵုဒါန်ကဵုကၠၝောံဂှ် မကၠုၚ်ဒှ်အဇိတထေရ် ခမဳဍောတ်ဝွံဂှ် မဒှ်ကျာ်အရဳယျမေတ္တေယျဂတတေံရောၚ် ခမဳတံ " ယွံခမဳတံ အဲသ္ပပရိနိဗ္ဗာန်တုဲ သာသနာအဲမသုန်လ္ၚီသၞာံ ကလိလောန်အာတုဲ လၟေၚ်အန္တရကပ် မမောဝ်တိုန်အာ မယုတ်စှ်ေအာတံဂှ် ကလိလောန်အာတုဲ ကာလအယုက်မၞိဟ် မဒှ်မွဲလက်သၞာံဂှ် ကာလဂှ် အဇိတထေရ်ဝွံ ဂွံဒှ်ကျာ်အရဳယျမေတ္တေယျ ကျာ်တြဲသ္ဂးရ


အဇိတထေရ်ဝွံ ဂွံမိၚ်တွံပါၚ်ကျာ်တြဲ မသ္ဂောံဒှ်ကျာ်ရမ္ဂးဂှ် ညံၚ်မသ္ဂောံဒှ်ကျာ်တ္ၚဲယးဂတကီု မဒှ်ပ္ဍဲစိုတ်တုဲ ယာတ်သ္ၚာသာ်ထဝ်ဂှ် အာဗဂိန်ကဵုဒါန်ကဵုကျာ်တြဲပၠန်ရ ပ္ဍဲချိုန်ခဏဂှ် ခမဳဂမၠိုၚ် မဂွံမိၚ်ကေတ်ပရိုၚ် ခမဳအဇိတထေရ် မသ္ဂောံဒှ်ကျာ်အရဳယျမေတ္တေယျဂတဂှ် သီုခမဳဂမၠိုၚ် လလောၚ်လဒု ဒုၚ်ကဵုတဴသာဓုကာအိုတ်ရ ဒေဝတဴဂမၠိုၚ် အလုံစှ်လ္ၚီစက္ကဝါဂှ်တုန်လေဝ် ကၠုၚ်အပ်ပပူဇဴဒြပ်ရတ်ထပှ်ပြကာဂှ် ညံၚ်ရဴဗကကီုဒှ်တုဲ ဒုၚ်သာဓုကာဇၞော်ကဵုဒြဟတ်ရ ဟိုတ်သာဓုကာမဇၞော်ကဵုဒြဟတ်ဂှ်ရ အာဒိံသု စိုန်မၞိဟ်ဒေဝတဴဂမၠိုၚ် ကဵုတဴသာဓုကာ လလောၚ်ဂအတ်တဴ နူတိဒဵုဍုၚ်ဗြီု ကာလဂှ်အိုတ်ရ ပ္ဍဲကာလဂှ် တိသုန္ဓရဳ မၞုံသတီုၜါဠက်ယောဇနာကဵုပန်လဟုတ်ပရဲဂှ် ချဳသရပ်ဒဇပ်ဒတဝ် ဂရိုက်ဂရာၚ် ကၞုက်ကၞာဲလလောၚ်ထဥလဒု ကြီုကြဵုကဵုတဴ သာဓုကာ ဂြုဂြုဂြီုဂြီုအိုတ်ရ ဍာ်ဂၚ်မှာသၟိတ်ဇမ္ဗုဒိပ် သွဝ်တရဴဗြီုစှ်တရဴ တၟံသိန္နရာတ်ညံၚ်မဒေါံကဝ် ပြာသာဒ်ဝေဒယန္တဝ် ညံၚ်မကၟိုၚ် သ္ဒောံကဝ်အာကီု အသဝ်ဇၞော်ကဵုဒြဟတ်ဟေၚ် မကတဵုဒှ် ပ္ဍဲကာလဂှ်ရ မိဂ္ဂး။

(၁၁) စၞောန်ထ္ၜးခဏ်မှာထေရ်အနန်သၟာန်ကျာ်တြဲ[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကာလဂှ် မှာထေရ်အနန် သ္ၚေဝ်ရံၚ်မုက္ခကျာ်တြဲ မတုပ်တဴညံၚ်ရဴဂိတုပေၚ်ဂှ်ဒှ်တုဲ က္ၜံၚ်ထံက်ကလဵု ယဵုသၟိပ်တဲတုဲ သၟာန်တိုန်ကျာ်တြဲရ

ယွံသဗ္ဗညု သဗ္ဗညုပကၠေံပရိနိဗ္ဗာန်တုဲ အဇိတထေရ်လေဝ် ဟွံဂတာပ်ဒှ်ကျာ်အရဳယျမေတ္တေယျဏီ ပ္ဍဲအကြာဂှ် ပသာ်မဒှ်ကဵုခမဳတံဂမၠိုၚ်ရောကျာ် မှာထေရ်အနန် သၟာန်ရ ကျာ်တြဲမိၚ်ဂလာန်မှာထေရ်အနန်တုဲ သီုကဵုလျးတရဴဂဵုတဴဗြံၚ်ဗြံၚ် မဟဂွံခြာသ္ကုတ်ဖလုတ်ဂှ်ဒှ်တုဲ ကျာ်တြဲတွံကဵုမှာထေရ်အနန် သီုသၚ်ဂမၠိုၚ် လ္ဒေါဝ်မၞိဟ်ဒေဝတဴဂမၠိုၚ်အိုဿီုရ ယွံအနန် အယုက်အဲကျာ်ပေၚ်ဒ္စါံစှော်သၞာံ ဝှ်အဲလေဝ်ပေၚ် ပန်ဣသုန်ဝှ်တုဲ ပ္ဍဲဍုၚ်ခုတ်သနာရာံ ပ္ဍဲဗပေၚ်ပသာ်ဂှ် အဲသ္ပပရိနိဗ္ဗာန်ရ အဲသ္ပပရိနိဗ္ဗာန်တုဲ အဓါန်မသုန်ကတဵုဒှ်ရ။

(၁၂) စၞောန်ထ္ၜးပရောပရာအဓါန်မသုန်[ပလေဝ်ဒါန် | ပလေဝ်ဒါန် တမ်ကၞက်]

  • ပရောအဓါန်မသုန် ညးမ္ဂးအဓါန်မသုန်ဂှ်ရော

(က) အဓိဂါမအန္တရအဓါန်ဂှ်မွဲ

(ခ) ပတိပတ္တိအန္တရအဓါန်ဂှ်မွဲ

(ဂ) ပရိယတ္တိအန္တရအဓါန်ဂှ်မွဲ

(ဃ) လိင်္ဂအန္တရအဓါန်ဂှ်မွဲ

(ၚ) ဓါတုအန္တရအဓါန်ဂှ်မွဲ ဣဝွံ အဓါန်မသုန်ရ။


အဲသ္ပပရိနိဗ္ဗာန်ပန်ဂိတုလောန်အာတုဲ ပ္ဍဲဍုၚ်ရာဇာဂြိုဟ် သၟိၚ်အဇာတသတြု မပကၚ်ရၚ်ပသၟိၚ်ဂဇအ်နန် ကာလဂှ် သ္ပပဓါန်ကဵုမှာထေရ်ကဿပတုဲ ပတိုန်လဝ်ပဌမသံဂါယန သုတ္တန္တပိဋကတ်ဂှ် ပသ္ဇိုၚ်ကဵုမှာထေရ်အနန် ဝိနယပိဋကတ်ဂှ် ပသ္ဇိုၚ်ကဵုဥပလိထေရ် အဘိဓမ္မပိဋကတ်ဂှ် ပသ္ဇိုၚ်ကဵု မှာထေရ်ကဿပရ မှာထေရ်ကဿပ မဒှ်ဇမၞော်ဂိုန် ဂကောံတၠအရှန်မသုန်ကၠံ လုကဴပန်ဂိတုဇန်သတပ် ဖ္ဍောတ်ပတိုန်ပါၚ်ပိဋကတ်ပိရ ပဌမသံဂါယနတုဲရ နူပဌမသံဂါယနဂှ် ရိုဟ်အာပေၚ်ကၠံစှ်ဒ္စါံသၞာံတုဲ ပ္ဍဲဇရေၚ်ဍုၚ်ဝေသာလဳ သၟိၚ်ကလာသောက မပကၚ်ရၚ်ဍုၚ် ပသၟိၚ်ဂဇအ်နန်ဂှ် သ္ပပဓါန်ကဵုမှာထေရ်ယသတုဲ ခမဳညးဒ္စါံပြာကတ်လောန်တုဲ သာဠထေရ်မွဲ ခုဒ္ဒသောဘိတထေရ်မွဲ ဝါသဘထေရ်မွဲ ရေဝတထေရ်မွဲ သမ္ဘူတထေရ်မွဲ သုမ္မဏထေရ်မွဲ မှာထေရ်ၜါဟွံပြာကတ်ပ္ဍဲသၠပတ်ဏံ ဣဝွံ မှာထေရ်ဒ္စါံရ ပၞောဝ်ညးဒ္စါံဂှ် ယသထေရ်မွဲရောၚ် ကၠေံစိုတ်ကတဵုဗဒှ်ရ မှာထေရ်ရေဝတမွဲ လေပ်ဇန်သတပ်လဝ်ပိဋကတ်ပိ ဒုတိယသံဂါယန ထပှ်ဂိတုသ္အးတုဲရ


နူဒုတိယသံဂါယနဂှ် ရိုဟ်အာဒဵုစိုပ်ၜါကၠံသၞာံတုဲ ပ္ဍဲပါတလိပုတ် သၟိၚ်အသောကဓမ္မရာဇာ မပကၚ်ရၚ်ဍုၚ် ပသၟိၚ်ဂဇအ်နန် သ္ပပဓါန်ကဵုမှာထေရ်မုဂ္ဂလပုတ္တတုဲ ကေုာံ တၠအရှန်လ္ၚီဂွံဇန်သတပ်လဝ်ပိဋကတ်ပိ ပ္ဍဲတတိယသံဓါယန ဒ္စိတ်ဂိတုတုဲသ္အးရ နူတတိယသံဂါယနဂှ် ရိုဟ်အာစှ်သုန်သၞာံတုဲ ခမဳဗြဴသံဃမေတ္တာ ဒှ်ကောန် သၟိၚ်အသောကဓမ္မရာဇာဂှ် ဒဒှ်သံဃထေရ် ကာလဂှ် ကၞာၚ်ဗောဓိသာခါဗွဲဒိုဟ်သတုံဂှ် ကေတ်ကလောံဏာဍုၚ်သိၚ်ဃဵုရ သၟိၚ်အဘယဒုတ္ထဂါမိဏိ ပသၟိၚ်ပကၚ်ရၚ်မၚ်မွဲ ယိုက်ဒိုက်ထံက်ပၚ်သာသနာ ပ္ဍဲဍုၚ်သိၚ်ဃဵု သာသနာရာၚ်ဆာဲဂဵုလဟဵုတဴဗွဲမလောန်ရ။


နူဂှ်ရိုဟ်အာပန်စှော်သၞာံဂတဂှ် ဓါတ်ဂၞေဟ်အဲလ္ပါ်သတုံဗွဲသၟဝ်ဂှ် ဟေမာလာဒေဝဳကဵုဒတ္တကုမ္မာ မစၠောံဏာဍုၚ်သိၚ်ဃဵုရ နူဂှ်ရိုဟ်အာမသုန်ကၠံသၞာံပၠန်တုဲ ပ္ဍဲဍုၚ်သာဂလနာဂဵုဂှ် သၟိၚ်မေလိုန်ကတဵုဒှ်ရ သၟိၚ်သၟာန်ညးတုဲ အလုံဂတာဇမ္ဗုဒိပ်ဝွံ ညးသွဟ်ဟွံမာန်မွဲရ ဒဵုတၠအရှန်မွဲလက်ကီု ကဵုသွဟ်ဟွံမာန်မွဲရ ပ္ဍဲကာလဂှ် ခမဳမွဲဂှ် ဂွံမွဲဝှ် နာဂသေဏဂးယၟုရ သၟာန်သၟိၚ်ဂှ်အိုဿီု ခမဳဂှ်မသွဟ်ကၠေံဖ္အိုတ်ရ ကျာ်တြဲသ္ဂးရ နူကဵုသာသနာအဲကျာ်မအာစိုပ်လ္ၚီသၞာံဂှ် ကောန်အဲကျာ်ဂမၠိုၚ် ဇၞော်ပၟဝ်ဘာဝနာတုဲ မကလိဂွံမဂ်ဖဵုအိုတ်ရ နူကဵုသာသနာအဲကျာ် လ္ၚီသၞာံဂှ်ကလိလောန်အာတုဲ ဂါံတိုန်သာသနာအဲကျာ်ၜါလ္ၚီသၞာံဂှ် ပတိပတ္တိအဓါန်မ္ဂးရ ခမဳကောန်အဲကျာ် နွံကဵုပတိပတ်ခမဳဂှ် ဗိုန်ဇၟံဒၟံၚ်ဏီရ ဓုတၚ်စှ်ပိမဒှ်ကွေတ် ဒ္ဂေတ်ပတိပတ်ခမဳဂှ်လေဝ် ဆမထေက်ကြိုက်ဂှ် ခမဳကောန်အဲကျာ်ဂမၠိုၚ် ဒ္ဂေတ်ဗက်မၚ်မွဲတဴဏီရ ပ္ဍဲကာလဂှ် ခမဳတံဇၞော်ပၟဝ်ဘာဝနာ ဒဵုလအိတ်လမျီု မသ္ပတဴလွဳပရာကီု ကိစ္စဂွံမဂ်ဖဵုဂှ်ဟၟဲရ တရံၚ်လဍုဟ်ကုသဵုပါရမဳဂှ် ဒှ်တဴရ။


သာသနာအဲကျာ် ၜါလ္ၚီသၞာံကလိလောန်အာတုဲ ဂါံတိုန်သာသနာအဲကျာ် ပိလ္ၚီသၞာံပၠန်ဂှ် ပတိပတ္တိဗဒန်အာတုဲ ပရိယတ္တိအန္တရအဓါန်ဂှ် မဒှ်ပၠန်ရ ကာလဂှ် ပတိပတ်ကောန်ခမဳအဲကျာ်တံဂှ် သြိၚ်သြာဲလှဲလှာဲအာရ ဟွံဗိုန်ဟွံညန်အောန်တဴကဵုပတိပတ်ရ ဓုတၚ်စှ်ပိဂှ်လေဝ် ခမဳကောန်အဲကျာ်တံ ဟွံလ္ၚတ်ရ ခါရကောန်ခမဳအဲကျာ်ဂမၠိုၚ် မစဴသ္ၚိဒါယကာတံဂှ် ဟီုဂလာန်ချံက်ချာ ဂြိုၚ်ဝေၚ်ကဵုဒါယကာတံရ ခါရဒါယကာတံ မကၠုၚ်စိုပ်ဘာဂှ်လေဝ် ကလာန်ရာဇာကထာ တိရိစ္ဆာနကထာတံဂှ် မဟီုဇီုအိုတ်ရ ခမဳအဲကောန်အဲကျာ်ဂမၠိုၚ် က္ညစဴသ္ၚိဂှ် ဂွံကောန်ဒါယကာတုဲ မိန်ယိုက်ကေတ်သၞေံသၞဴတဴအိုတ်ရ ဆဂှ်ဟွံသေၚ်တုန် ၜိုန်ဟဂွံဗျု ဟဂွံယဲကီု ဍိုက်ကွဳဍိုက်သရေၚ် ပအသေဝ်အဟာန် ညံၚ်အသေဝ်အဟာန်သၟိၚ်ကီု ခမဳကောန်အဲကျာ်ဂမၠိုၚ် မသ္ပရ ကာလဂှ် ကတ်ဗ္တောန်အောန်အာရ ပၞောဝ်အာပတ်ထပှ်ဘုံဂှ် ဆအယာံမာတ်အာပတ်ပရာတ်ညိကီု ခမဳကောန်အဲကျာ်ဂမၠိုၚ် မမၚ်မွဲတဴအိုတ်ရ အိုတ်ခမဳကောန်အဲကျာ်ဂမၠိုၚ် မပဍိက်သကအ်စိၚ် ချေံ ပြေၚ် ဂၠဴအိုတ်ရ ခမဳကောန်အဲကျာ်လ္ၚဵုတံဂှ် ပတၠသြောံသ္ၚု တိဗ္ၚက ခံက်သြန်ထဝ်ဗွဲမဂွံအိုတ်ရ ကာလဂှ် ခမဳကောန်အဲကျာ်ဂမၠိုၚ် ဒးအာအပါဲဂၠိုၚ်ရအနန်၊ ဆဂှ်ဟွံသေၚ်ပၠန်တုန် ခမဳကောန်အဲကျာ်လ္ၚဵုလ္ၚဵုတံဂှ် ဂွံသြောံသ္ၚုထဝ်သြန်ဂၠိုၚ်တုဲ ဓရ်တွံအဲကျာ်မပြဲပြဲဂှ် ၜိုန်ညးဟွံက္လၚ်ပၚ်မှိၚ်ကီုလေဝ် ကြိုၚ်အာဂၠါဲတွံတွံဓရ်ကဵုညး အကြာဍုၚ်အကြာကွာန် ဌာန်အကြာသြော်အကြာအၚ် အကြာဗ္ၚတံအိုတ်ရ ဆဂှ်ဟွံသေၚ်ပၠန်တုန် ဓရ်တဝှ်အဲကျာ်တြဲဂှ် ကတဵုဗဒှ်ဂွက်စက်တုဲ သုၚ်စအရက်သိတုဲ ဒယှ်ေလှ်ေတဴအကြာဍုၚ်အကြာကွာန် အကြာသြော်အကြာပေါဲအိုတ်ရအနန်


ယွံတၠဳမၞုံကုပိုန်ကျာ် ပ္ဍဲကာလဂှ် ဒါယကာတံ မကဵုဒါန်ကဵုခမဳတံဂှ် နွံကဵုဖဵုကီုဟာကျာ်

ယွံအနန် ဟိုတ်မဒှ်တဴ ပ္ဍဲသာသနာအဲကျာ်ဂှ်ရ ဒါန်ဂှ်အနန္တဖဵု တွဵုဒနက်ဟွံမာန်ဏီရအနန် ကျာ်တြဲသ္ဂး


ယွံအနန် ပ္ဍဲကာလဂှ် သၟိၚ်ဨကရာဇ်ကီုလေဝ် ဟၟဲဓရ်စှ်ပြကာရ ဂလိုၚ်လဝ်လောဘ ထဝ်သြန်ဓဇန်သဟာဲ သာဲကၠေၚ်ဒက်တက်ၜုၚ်ညးတုဲ ဂိုၚ်ကေတ်ထဝ်သြန် ဟွံတန်ကဵုဗဗွဲဓရ်ရ ဟိုတ်နူဨကရာဇ် ဟွံတန်တဴပ္ဍဲဓရ်တုဲ ဥပ္ပရာဇာလေဝ် ဟွံတန်တဴပ္ဍဲဓရ်ကီုရ ဥပ္ပရာဇာဟွံတန်တဴပ္ဍဲဓရ်တုဲ အမာတ်ဒဴဗညာသေဏာပတိတံဂှ်လေဝ် ဟွံတန်တဴပ္ဍဲဓရ်ကီုရ အမာတ်ဒဴဗညာသေဏာပတိတံဂှ် ဟွံတန်တဴပ္ဍဲဓရ်တုဲ ပၟၚ်ဍုၚ်ပၟၚ်ကွာန် တၠညးဍုၚ်ကွာန်တံဂှ်လေဝ် ဟွံတန်တဴပ္ဍဲဓရ်အိုတ်ရ ဟိုတ်နူညးဂမၠိုၚ် မဟဂွံတန်တဴပ္ဍဲဓရ်တုဲဂှ် ကျာဝတ္ထဳပိုက်ဟွံဓဝ်ယာ တွာ်သၟိၚ်ဂိတု သၟိၚ်တ္ၚဲဂှ်လေဝ် ဟိုတ်နူကျာဓမ္မတာကဝ် မဗ္ဂေတ်ဏာရောၚ် ကျာဂှ်ဟွံဓဝ်ယာတုဲ သၟိၚ်ဂိတုသၟိၚ်တ္ၚဲတံဂှ် တွာ်ဟွံဓဝ်ယာကီုရ ဗြဲလေဝ် ဂူဟွံဓဝ်ယာကီုရ ဟိုတ်ဗြဲဂူဟွံဓဝ်ယာတုဲဂှ်ရ ရှ်တိတၞီဗၠိုက်စှ်ေအာ ၜါစှော်ဟတ်ရ ဟိုတ်ရှ်တိမတၞီဗၠိုက်စှ်ေအာ ၜါစှော်ဟတ်ဂှ်တုဲ ရိုဟ်ဆု သကောဝ်ဆု ကၞာၚ်ဆုတၞးဆုအိုဿီုတံကီု သြောံသ္ၚုအိုဿီုတံဂှ်ကီု ရှ်ဍေံအောန်စှ်ေအာတုဲ သတ္တံမစဒးဂှ် ဓါတ်လီုပြဵုအာတုဲ ယဲဒိုက်ဂၠိုၚ် အယုက်သတ္တံဂှ်လေဝ် ဂၠေံအာအိုတ်ရအနန် ဟိုတ်နူသၟိၚ်ဟွံတဴပ္ဍဲဓရ်ဂှ်ရ ဍုၚ်ရးကတဴကတာန်ဂၠိုၚ် သတ္တံလေဝ် လောဘ ဒေါသ မောဟဂၠိုၚ်တုဲ စုတိဒးအာအပါဲပန်ဂၠိုၚ်ဗွဝ် ဍုၚ်သွဝ်လ္ၚုအာရအနန်။


ခမဳကောန်အဲကျာ်ဂမၠိုၚ်လေဝ် နွံကဵုဒေါသဂၠိုၚ် မာနသၠုၚ် တိုန်သ္ၚိသၟိၚ်တိုန်ရုၚ်စာ အာဟွံညှာဒည ကာလဂှ် ဓရ်ပိဋကတ်အဲကျာ် ဝိနဲသုတ် အဘိဓရ်ပိပြကာဂှ် ခမဳကောန်အဲကျာ်ဂမၠိုၚ် ဟွံဒ္ဂေတ်ဗက်ရ ပ္ဍဲဒ္ဂေတ်သၟိၚ် အယောၚ်အလာသၟိၚ်တံဂှ် ခမဳကောန်အဲကျာ်ဂမၠိုၚ် မဒ္ဂေတ်ဗက်ဗွဲမ ဗဗွဲယိုက်ဒိုက်အာအိုတ်ရ ဟိုတ်နူခမဳကောန်အဲကျာ်ဂမၠိုၚ် ဟွံဒ္ဂေတ်ဗက်အာ လ္ပါ်ဒ္ဂေတ်ခမဳဂှ်ရ လ္ပါ်ကတ်ဗ္တောန်တံဂှ် မ္ဒးလ္ၚုအာအိုတ်ရ ဓရ်ပိဋကတ်အဲကျာ်ဂှ်လေဝ် ညးဟၟဲပၟိက်ရ ညးဟွံယိုက်ဒိုက်အိုတ်ရ ညးဟွံကတ်လ္ၚတ်ဗ္တောန်ရအနန်။


ကာလဂှ် ဓရ်ပိဋကတ်အဲကျာ် ဟုတ်စှ်ေအာဗွဲမလောန်ရ ပၞောဝ်ပိဋကတ်ပိဂှ် အဘိဓရ်မွဲ ဟုတ်အာကၠာရ ပၞောဝ်အဘိဓရ်ထပှ်ကၞပ်ဂှ် ပဌာန်တရဴဟုတ်အာကၠာအိုတ်ရ နူပဌာန်တရဴဟုတ်အာတုဲ မဗဗွဲလၟေၚ်လၟေၚ်ဟေၚ် ဒဵုကဵုဓမ္မသၚ်ဃဏဳဂှ် မဟုတ်စှ်ေအာရ အဘိဓရ်ကၠေံဗ္ဒန်အာကၠာတုဲ ဆသုတ်ကဵုဝိနဲ ခမဳကောန်အဲကျာ် မကတ်လ္ၚတ်ရ လံညိဂှ် ဝိနဲကၠေံဗ္ဒန်အာပၠန်တုဲ ဆလၟေၚ်သုတ်ဇာတ်မသုန်ကၠံဂှ်ညိကီု ခမဳကောန်အဲကျာ်ဂမၠိုၚ် မကတ်လ္ၚတ်ရ လံညိသုတ်ဇာတ်တံဂှ် ကၠေံဗ္ဒန်အာပၠန်တုဲ ဆသဳစှ်ဟေၚ် ခမဳကောန်အဲကျာ်ဂမၠိုၚ် မမၚ်မွဲတဴရ လံညိ သဳစှ်ဂှ်ကၠေံဗ္ဒန်အာပၠန်တုဲ သြသရဏဂမနပိကီု ခမဳကောန်အဲကျာ်ဂမၠိုၚ် မမၚ်မွဲတဴရ လံညိ သြသရဏဂမနပိဂှ် ကၠေံဗ္ဒန်အာပၠန်တုဲ ဆသဳဒ္စါံကီု ခမဳကောန်အဲကျာ်ဂမၠိုၚ် မမၚ်မွဲတဴရ လံညိ သဳဒ္စါံဂှ် ကၠေံဗ္ဒန်အာပၠန်တုဲ ဆသဳမသုန် ခမဳကောန်အဲကျာ်ဂမၠိုၚ် မမၚ်မွဲတဴရ လံညိ သဳမသုန်ဂှ် ကၠေံဗ္ဒန်အာပၠန်တုဲ ဆသရဏဂမနပိကီု ခမဳကောန်အဲကျာ်ဂမၠိုၚ် မမၚ်မွဲတဴအိုတ်ရ လံညိ ဆသရဏဂမနပိဂှ် ကၠေံဗ္ဒန်အာပၠန်တုဲ ပရိယတ္တိအန္တရဝါယတိ ပိဋကတ်ပိဂှ် ကၠေံဗ္ဒန်အာအိုတ်ရ ညးဖ္ဍောတ်ဒးဂှ် ဟၟဲသက်က်ရ တဝှ်ပိဋကတ်အဲကျာ် ကၠေံဗ္ဒန်အာအိုတ်တုဲ ပ္ဍဲကာလဂှ် ညံၚ်စက်သၟိၚ်ဂိတုသၟိၚ်တ္ၚဲ မကၠေံဗ္ဒန်အာကဵုသတ္တံဂမၠိုၚ်ဂှ်ကီုရ ပရိယတ္တိအန္တရအဓါန်ဂှ် ကၠေံဗ္ဒန်အာတုဲ ဂါံတိုန်သာသနာအဲကျာ် ပန်လ္ၚီဂှ် ဒှ်လိင်္ဂအန္တရအဓါန်


လိင်္ဂအန္တရအဓါန်မ္ဂးဂှ် ကတ်ဗ္တောန်ပ္ဍေန်ပ္ဍဟ် ဟၟဲသက်က်ရ ဆအယောၚ်အလာခမဳညိကီု မၞုံရသ္ၚာၜါထပ်ဂှ် သ္ဇိုၚ်အာဂးတုဲ ယာတ်ဖ္ဍိုပ်ကေတ်ပန်ဒိုဟ်ဂှ် ဖျောန်သကောဝ်ဇြဲသုံတုဲ မလတက်ရ ဗဗေၚ်တိဂှ်သ္ဇိုၚ်အာဂးတုဲ ဗဗေၚ်ဂၞဴလဵုဂှ် ပကၚ်ရၚ်ရ လံညိ ယာတ်မဖျောန်လဝ်သကောဝ်ဇြဲသုံဂှ် ဟွံလအ် ဆတောဝ်မဖျောန်ကေတ်ဍာ်မိတ်ထပှ်တောဝ်ဂှ် ဒက်စုတ်ပ္ဍဲကံတဲၜါတုဲ လတက်ယာတ်ပါက္ကတိရ ထ္ၜဗဗေၚ်ဂၞဴလဵုတုဲ မ္ဒးဂ္ၚေၚ်ပိဏ္ဍပါတ်ရ နွံတဴကဵုသမ္ဘာရ ဆမကးသော်ညိကီု မဂွံတီကေတ်ဒဒှ်ခမဳရ ဍေံတံအာဗက်စသတ် မပ္တံကဵုဒြာဲမၚ်ၜိုၚ်ပှ် ညံၚ်ရဴခရှ်ကီုရ ဒါယကာတံနွံပၟိက် သၟိက်မိက်ဂွံသ္ပကုသဵုကဵုဒါန်ညိဂးတုဲ စဳရေၚ်လဝ်ပုၚ် ကွာၚ် စၞဘောဇိုန်တုဲ မ္ဒးတိတ်ကၠုၚ်ဘာရ အ္စာမစဴကၠုၚ်နူဂြိုပ် မအာဗက်ဒၟံၚ်ၜိုၚ် ပှ် ဒြာဲမၚ်ဂှ် ဒါယကာတံ မမၚ်ဒၟံၚ်အ္စာမစိုပ်ကၠုၚ်နူဂြိုပ်တုဲ မဂွံကဵုဒါန်ပုၚ်ကွာၚ် စၞဘောဇိုန်တံဂှ်ရ ယွံတၠဳပိုန်မၞုံကုပိုန်ကျာ် ဒါယကာတံ ကဵုဒါန်ပိဏ္ဍပါတ်တံဂှ် မုစိဗၞတ်မဂွံဒုၚ်စဖဵုအနိသံသဂှ်ရောကျာ် ယွံအနန် ဟိုတ်မဒှ်ပ္ဍဲသာသနာအဲကျာ်ဂှ်ရ မွဲအသၚ်ဃဲဟေၚ် မဂွံဒုၚ်စဖဵုရ ကျာ်တြဲသ္ဂးရ လိင်္ဂအန္တရကပ်အဓါန်ဂှ်လောန်အာတုဲ ဂါံတိုန်သာသနာမသုန်လ္ၚီသၞာံဂှ် ဒးဓါတုအန္တရအဓါန် မသှ်ေဒၟံၚ်ရ။


ပ္ဍဲစေတဳရုပ်ကျာ်ဂၠံဓါတ်တံဂှ် ဇန်တံလျုၚ်ဇြုၚ်သ္ဍိုက်တုဲ ဗၞတ်ပုၚ်မွဲဇန်ချောဲမွဲကေမ်ကီု ဗ္တဳမွဲကဠတ် ဗၞတ်ကဴမွဲဍောၚ်ကီု သ္ဂောံပပူဇဴမ္ဂး ဇန်တံဂွံဗၠးအပါဲတုဲ ဂွံအာစိုပ်ဍုၚ်သွဝ်ဟေၚ်ရ ကြဴဝွံ လံအာ ပေၚ်အာမသုန်လ္ၚီသၞာံတုဲ ဗၞတ်ပုၚ်မွဲဇန်ချောဲမွဲကေမ် ဇဗၠုမွဲသွတ်ကဴမွဲဍောၚ်ကီု ညးမဂွံကၠုၚ်သ္ပပူဇဴ ဟၟဲသက်က်ရ ကာလဂှ် အိုတ်ဓါတ်အဲကျာ်ဂမၠိုၚ် နွံပ္ဍဲဇမ္ဗုဒိပ်ဝွံကီု မတဴပ္ဍဲတကံသိၚ်ဃဵုကီု ပ္ဍဲဍုၚ်သွဝ်ကီု ပ္ဍဲဍုၚ်ဗြီုကီု သီုဓါတ်ဖအိုတ်တံဂှ် ထောံကၠေံဌာန်ဒၟံၚ်ဇကုတုဲ ပ္ၚောံအာဌာန်ဗောဓိပၞေဟ်တေံအိုတ်ရ ဓါတ်အဲကျာ်ကောံသၟဟ်အိုတ်တုဲ ကတဵုဗဒှ်ဗုဒ္ဓနိမိတ်မွဲ အတိုၚ်ဇမၞော်သၠုၚ်ကျာ်စှ်ၜါဟတ်ဂှ် သီုလျးအရံၚ်တရဴ သီုရုပ်အသဳတိ ကွးသာဝက သီုရုပ်မှာထေရ်သာရိပိုတ် မှာထေရ်မောဂ္ဂလာန် မှာထေရ်အနန် ရုပ်သၟိၚ်မအံက်အဲသိရိသုဒ္ဓေါဓန မိအဲသိရိမာယာ သဳအဲကျာ်ပဇာပတိဂေါတမဳ ရုပ်ဂၞကျာ်ဘိမ္မာယသောဓရာ ရုပ်ကောန်အဲကျာ်ရာဟုလ ရုပ်ခမဳဗြဴခေမာ ရုပ်ဥပဵုလဝန် ရုပ်အရှန်ဗြဴၜါလ္ၚီ ရုပ်အရှန်တြုံထပှ်လ္ၚီ စဴကောံသၟဟ်သၟန် တန်ဒၟံၚ်ပ္ဍဲဗောဓိဂှ်အိုတ်တုဲ ဗုဒ္ဓနိမိတ်အဲကျာ် ပၠလျးတရဴသာ်ရ အိုတ်အလုံဒေဝတဴ ပ္ဍဲဂြိုပ်ဟေမဝန်ဂမၠိုၚ်ဂှ် တိတ်ကၠုၚ်တုဲ ကဵုတဴသာဓုကာ ညံၚ်စၞးဇကုအဲကျာ်ဂမျိုၚ်နွံကီု အိုတ်ကဵုဒေဝတဴတံညးဂမၠိုၚ် ဒြပ်ရတ်နက္ဃတံဂှ် သ္ပဗကတုဲ ဒြာတ်သ္ပပူဇဴ ဗုဒ္ဓရုပ်ဂှ်ရ ဗုဒ္ဓနိမိတ်ဂှ် တွံဓရ်ကဵုဒေဝတဴဂမၠိုၚ်ရ နူအဘိဓမ္မသၚ်ဃဏဳ ဗုဒ္ဓနိမိတ်တွံရ ဒေဝတဴတံမြာကလိဂွံတသိုက်ဂၠိုၚ်သန်ရ ဒဵုထပှ်တ္ၚဲတုဲ ဗုဒ္ဓနိမိတ်ဂှ် ကၠေံဗ္ဒန်အာရ ပ္ဍဲကာလဂှ် အလုံဂတာဇမ္ဗုဒိပ် စှ်လ္ၚီလောကဓါတ်ဝွံဂှ် မသ္ဂောံညာတ်စေတဳကၠံဓါတ်ဂှ်လဝ်ကၠာရ ဆဗၞတ်ဍိုတ်တၟာသၠဗဒဝ်ညိကီုလေဝ် ဟၟဲသက်က်ရ ပ္ဍဲကာလဂှ် သာသနာအဲကျာ် ကၠေံဗ္ဒန်အာအိုတ်သ္အးရ ဣဝွံ ဓါတုအန္တရကပ်အဓါန်


ပ္ဍဲကာလဂှ် တၠဳပိုန်မှာထေရ်အနန် မှာထေရ်သာရိပိုတ် မဒှ်ဒကိုပ်ပၞာန်ဓရ် လ္ၚောဝ်အာတ်ပၚ်မှိၚ်ဓရ် ကတဵုဗဒှ်ကျာ်မေတ္တေယျမဒှ်ဂတဂှ်ပၠန်ရ ကျာ်တြဲမိၚ်တုဲ သ္ဂးကဵုမှာထေရ်သာရိပိုတ်ရ ယွံဒကိုပ်ပၞာန်ဓရ် အဲကျာ်သ္ပပရိနိဗ္ဗာန်တုဲ အဓါန်မသုန်ဂှ် ကၠေံဗ္ဒန်အာတုဲ နူဂှ်အယုက်မၞိဟ် မလဟုတ်စှ်ေအာဗွဲလၟေၚ်လၟေၚ် ဒဵုကဵုမအာစိုပ်စှ်သၞာံရ ဒှ်တြုံမသုန်သၞာံ ဒှ်ဗြဴပန်သၞာံ အယုက်မၞိဟ်တြဴသၞာံဂှ် ဂွံပတၠကောန်စဴရ ကောန်ဍေံတံဂှ် ကွက်သရေၚ်ကဵုတၞံဂြၚ်ဗ္ၜေံရ ပေၚ်အယုက်စှ်သၞာံ ဗျုချိုတ်အာရ ပ္ဍဲကာလဂှ် မိကဵုကောန် ကောကဵုဒေံ တြုံကဵုဗြဴ ဟွံဝေၚ်ပါဲရၚ်သကအ်ရ ညံၚ်သတ်တိရစ္ဆာန်ရ။

(၁၃) စၞောန်ထ္ၜးပရောဒုဗ္ဘိက္ခအန္တရကပ်၊ တၞောဝ်ဇၞော်က္တဵုဒှ်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကာလဂှ် ဒုဗ္ဘိက္ခအန္တရကပ်တၞောဝ်ဇၞော် ဍေံကတဵုဒှ်ရ သတ္တံရာဂက္ဍၚ် ချိုတ်အာတုဲ ကတဵုဒှ်ပြိုတ်ဖအိုတ်ရ ဂတဂှ်ရာဂန္တရကပ် ကတဵုဒှ်ယဲပါပဵုတုဲ သတ္တံမောဟက္ဍၚ်ချိုတ်အာ ကတဵုဒှ်တိရစ္ဆာန်ဖအိုတ်ရ ဂတဂှ် ယုဂ္ဂအန္တရကပ် ကတဵုဒှ်ပၠန်ရ သတ္တံဂမၠိုၚ် ဒေါသက္ဍၚ် ဍေံရပ်ကေတ်ဗၞုဟ်သၠသြောံတံဂှ်တုဲ ကတဵုအာသ္ဇၚ်ဗၞုဟ်ကောန်အသးဖအိုတ်တုဲ ဍေံတံဂစိုတ်ညးသ္ကံအိုတ်ရ သတ္တံဒေါသက္ဍၚ်လောန်ဂှ် ချိုတ်အာတုဲ ဒးစှ်ေနရက်သီုဖအိုတ်ရ အလုံတကံဇမ္ဗုမွဲ ဇွမၞိဟ်ပေၚ်ဒၟံၚ်ဖအိုတ်ရ ညးလ္ၚဵုမၞုံကဵုပညာတုဲ ဒဴဂစိုတ်လုပ်အာပ္ဍဲဂြိုပ် အောပ်ဗ္ဒဒၟံၚ်ရ ကြဴဝွံ ဗြဲဇၞော်ဗဂူဖျေံဏာတုဲ ဍာ်ပေၚ်ဒၟံၚ်အိုတ်ရ ဇွသတ္တံ အလုံဂတာဇမ္ဗုဒိပ်မွဲ ဟဳတိတ်အာပ္ဍဲမှာသၟိတ်ဖအိုတ်ရ ဇွသတ္တံဂှ်သ္အးအိုတ်တုဲ ဗြဲဗ္တဳညံၚ်သာ်ထဝ် ညံၚ်သာ်သြန်တံဂှ် ဗဂူဖျေံဏာဗၞတ်ထပှ်တာဟေၚ် ဗွဝ်ဗ္တဳတံဂှ်သၠုၚ်တိုန်အာတုဲ ဂတနူဂှ် ဗြဲရတ်ထဝ် ဗြဲရတ်သြန် ဗဂူလဝ်ပေၚ်က္ဍတ်ဒၟံၚ် ပ္ဍဲတကံဇမ္ဗုဒိပ်မွဲရ ဂတဂှ်ပၠန် ဗြဲသြောံဗြဲသ္ၚု သၠိုၚ်ထးလစိန်ဗၠဲဂွါ ဗဂူဖျေံပၠန်ရ ဂတဂှ်ပၠန် ဗြဲပုၚ်သွကွာၚ်စၞ ဗဂူဖျေံပၠန်ရ မၞိဟ်တၠပညာဖေက်ဘဲဂစိုတ်တုဲ မလုပ်အာဂြိုပ်ဂၞိၚ်တံဂှ် တိတ်ကၠုၚ်အိုတ်တုဲ ညာတ်ဒးပုၚ်သွကွာၚ်စၞဘောဇိုန်တံဂှ် စဟာပ်ဖဲလဲ ပဟဲကၠေံဗျဵုတဟၚ်တံဂှ်တုဲ သမာဓိဍေံတန်ကြန်အာတုဲ ပညာဍေံတံဂွံအခေါၚ်တုဲ ဍေံတံချပ်ဗ္စာရဏာတဴအိုတ်ရ။


ဟိုတ်ပိုဲမအောန်ကဵုဓရ် လောဘဒေါသ မောဟမာနတုဲ ပိုဲဒဴပါဲဂစိုတ်လုပ်အာ အောပ်ဗ္ဒဒၟံၚ်ပ္ဍဲဂြိုပ်ဂၞိၚ်ဂှ်တုဲ ပိုဲဂွံဗၠးတိတ်အာနူဘဲသၟိၚ်ဂစိုတ် ပိုဲဂွံဂျိုၚ်တဴလမျီုရောၚ် ဟွံသေၚ်ဟာဂးတုဲ ဗွဝ်ဒြပ်ရတ်လစိန်ဗၠဲဂွါတံဂှ် ဍေံတံဗဝ်လဝ်တုဲ ဍေံတံဗ္စာရဏာတဴအိုတ်ရ ကဠောပိုဲညးဂမၠိုၚ်တံဂှ် ဟိုတ်ဍေံတံဂြိုဟ်စာဓဇန်သဟာသဳတုဲ ဍေံတံချိုတ်အာအိုတ်ရ ဟိုတ်ပိုဲမအောန်တဴကဵု လောဘ ဒေါသ မောဟမာနတုဲ ပိုဲဟွံပြိုက်ဂစိုတ်လမျီုညးဂှ်ရ ပိုဲဟွံပျဲပျာံညးတုဲ ဗွဝ်ဒြပ်ရတ်အနက္ဃဂမၠိုၚ် မဟွံတီကဵုဗၞတ်တွဵု မကတဵုဗဒှ်ကဵုပိုဲရောၚ်သွံ ကဠောပိုဲမစုတိချိုတ်အာဂှ် ဟွံဗိုန်ဒှ်အနိစ္စကွေံရောၚ်သွံ ဗွဝ်ခန္ဓဏံဝွံ ဟွံဗိုန်ဂၠိကွေံရောၚ်သွံ ရဴသာ်ဝွံ ဍေံတံဗ္စာရဏာတိုန်သီုညးဖအိုတ်ရ ဟိုတ်ဍေံတံပၟဝ်တိုန်ဓရ် အနိစ္စကမ္မဌာန်ဂှ်ရ အယုက်သတ္တံမောဝ်တိုန်အာ နူစှ်သၞာံဂှ် ကၠံသၞာံမွဲသၞာံ မောဝ်တိုန်အာ ဒဵုမွဲအသၚ်ဃဲဟေၚ်ရ။


ကာလဂှ် အယုက်ပိုဲမၞိဟ် ဒှ်မွဲအသၚ်ဃဲဂှ်တုဲ သာ်ဝွံ ဍေံတံဟီုတိုန်အနိစ္စမ္ဂးဂှ် ဍေံဟွံဗိုန်ဂၠိထိ တိတန်ကြန်ကွေံရောၚ် အယုက်ညးမအောန်ဂှ် ညးမဟီုအနိစ္စရောၚ် လၟုဟ်ဂှ်လေဝ် အယုက်ပိုဲဂၠိၚ်မွဲအသၚ်ဃဲရောၚ် မုပပိုဲဟီုဝေၚ်အနိစ္စရော ဍေံတံဂးပၠန်တုဲ စိုတ်ဍေံတံဟိုတ်ဗၠေတ်မှာအာ ဍေံဟွံဗှ်သၞာ ဓရ်အနိစ္စဂှ်ပၠန်ရ ဟိုတ်ဍေံတံဟွံဗ္စာရဏာကဵုဓရ်အနိစ္စဂှ်ပၠန်တုဲ အယုက်ဍေံတံမ္ဒးဟုတ်စှ်ေအာ ကၠံသၞာံမွဲသၞာံဂှ် ဟုတ်စှ်ေအာတုဲ ကာလဂှ် အယုက်သတ္တံ အာစိုပ်မွဲလက်သၞာံဂှ် ဗြဲဂူဓဝ်ယာတုဲ တိဂတဝ်တိုန်အလုံတကံဇမ္ဗုဒိပ်မွဲဂှ် တိသတးဒှ်ညံၚ်မုက်ဖံ ဒဵုဇြဟ်ခလံက်ဂနက် စရိုၚ်ဇလဟၟဲရ တိသတးညံၚ်မုက်ဖံရ ပ္ဍဲကာလဂှ် အလုံဂတာဇမ္ဗုဒိပ်ဝွံဂှ် တြုံညံၚ်ဒေဝတဴဗြဴညံၚ်အဆေဝ်သွဝ် မဒှ်ကီုရ ဍိုက်ပေၚ်လ္ၚီသၞာံတုဲ မပသၞက်ကရောဲထပ်တဲရ ကာလဂှ် ကမၠတ်ဒမၠ ဟၟဲသက်က်ရ သေက်ဇဵုဒှ်ဂဗုတ်ဂလာန် ဟွံမွဲရ။

(၁၄) စၞောန်ထ္ၜးခဏ်ကျာ်တြဲအရဳယျမေတ္တေယျက္တဵုဒှ်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကာလဂှ် ကျာ်တြဲအရဳယျမေတ္တေယျ မကတဵုဒှ်ရ ပ္ဍဲဍုၚ်ကေတုမတဳဂှ် ကျာ်တြဲအရဳယျမေတ္တေယျဒှ်ရ ဇမၠိၚ်ဍုၚ်ဂှ် (၁၆၀) ယောဇနာ လၞၚ်ဍုၚ်ဂှ် (၇၀) ယောဇနာ ပ္ဍဲပါၚ်တြၚ်ဍုၚ်ပန်ဒိုဟ်ဂှ် တၞံဆုကဝ်လဗဗြိုက်ပန်တၞံ ကတဵုဒှ်ရ ကၟာၚ်ဍုၚ်ဂှ် မတၟုဲတဴနရတ်(၇)ထပ် ထၜိုၚ်ကၟာၚ်ဍုၚ်ဂှ် မတၟုဲတဴနရတ်(၇)ထပ် ဝုတ်ဒိုဟ်ကၟာၚ်ဍုၚ်ဂှ် မတၟုဲတဴနတာရတ်(၇)ထပ် မဗျိၚ်ဒရိၚ်ဒၟံၚ်တဴရ။


ပ္ဍဲဍုၚ်ဂှ် ကၟာလစရတ်မွဲ မကတဵုဒှ်ရ ဍာ်ဇြုၚ်ကေဝ်ၜိုဟ် မိပ်ဇြိပ်မောဝ်ပ္ဍးတဴရ ပ္ဍဲသြၚ်လစဂှ် မတၟုဲတဴနဗတဳသာ်သြန် မၞုံတဴကဵုဍောၚ်ဒကှ်မသုန် သွာၜါရာၚ်ဆာဲတဴရ ပ္ဍဲလ္ဒေါဝ်ဍုၚ်ဝွံဂှ် ပြာသာဒ်ထဝ် မကတဵုဒှ်ကၠုၚ်မွဲတုဲ ပြာသာဒ်ထဝ်ဂှ်(၇)ဘုံ နွံသၠုၚ်ၜါယေက် ဇမၞော်(၅၀)ယေက် သၟိၚ်စက္ကဝဝ်မဂွံပကၚ်ရၚ်လဝ် ရတ်ထပှ်ပြကာဂှ် သၠိၚ်တဴနတသိုက်မပြဲပြဲရ။


သဘဴဗောဓိသတ်ကျာ်တံဂှ် ကာလဗဗၞးလ္ၚောဝ်သၟိၚ်ဂှ် ကတဵုဒှ်ပ္ဍဲဂကူသၟိၚ်ရ ကာလသၟိၚ်ဒးလ္ၚောဝ်ဗဗၞးဂှ် ကတဵုဒှ်ပ္ဍဲဂကူဗဗၞးရ ပ္ဍဲကာလဂှ် ဗဗၞးပြောဟိတ်အ္စာသၟိၚ်စက္ကဝဝ်ဂှ် မၞုံတဴကဵုသ္ဂေဟ်သွဟ်ပိုန်ဟာန် ဇၞော်ကဵုဒြဟတ်လောန် ပိုန်ဟာန်ညံၚ်ရဴဂၠးတိသုန္ဓရဳကီုရ၊ ယၟုဗဗၞးဂှ် သုဗြဟ္မဒေဝဂးယၟု မၞိဟ်ဗြဴဂှ်ဗြဟ္မဝတဳဂးယၟု ဗောဓိသတ်စုတိစှ်ေကၠုၚ် နူဍုၚ်သွဝ်တုဿိတာပူဂှ် ပ္ဍဲဂဝ်ဂၞဴဗၞးဗြဴဂှ် တန်ပဋိသန္ဓိရ အိုတ်ဒေဝတဴဂမၠိုၚ် ဒးမၚ်မွဲလဝ်ဂဝ်ဂၞဴဂှ် ဒဵုကဵုအာစိုပ်ပေၚ်စှ်ဂိတုတုဲ ကတဵုဒှ်မၞိဟ်ရ ပ္ဍဲကာလဂှ် အိုတ်ဂတာအလုံတကံဇမ္ဗုဒိပ်မွဲ နိမိတ်(၃၂)သာ် ကတဵုဒှ်ကၠုၚ်အိုတ်ရ ကြဴဝွံ ဇၞော်တိုန်အာတုဲ ဗောဓိသတ်တန်ဒၟံၚ်လ္တူပြာသာဒ်ပိရ။

(၁၅) စၞောန်ထ္ၜးပြာသာဒ်ပိသာ်[ပလေဝ်ဒါန် | ပလေဝ်ဒါန် တမ်ကၞက်]

  • ထ္ၜးပြာသာဒ်ပိသာ် ညးမ္ဂးပြာသာဒ်ပိဂှ်ရော

(၁) သိရိဝဍ္ဎဂးပြာသာဒ်မွဲ

(၂) စန္ဒနဂးပြာသာဒ်မွဲ

(၃) မှာပဏာဒဂး ပြာသာဒ်မွဲ ဣဝွံ ပြာသာဒ်ပိရ

ပြာသာဒ်ပိဝွံဂှ် တုပ်သၟဟ်ဆေဝ်ရေဝ်ဒၟံၚ် ညံၚ်ကဵုပြာသာဒ်ဝေဒယန္တဝ်ကီုရ ပ္ဍဲပြာသာဒ်ပိဝွံဂှ် ဗောဓိသတ်တန်ဒၟံၚ်လၟိုန်ရ ဂၞကျာ်ဗောဓိသတ် စန္ဒမုက္ခဳဝွံ ကောန်တြုံဝဍ္ဎနကုမ္မာ ကမၠောန်(၈၀)လ္ၚီ ပ္ဍဲဍုၚ်ကေတုမတဳ ကာလဂှ် ဒှ်ဒၟံၚ်ညံၚ်ရဴကၟိန်ဍုၚ်သွဝ်တာဝတိံကီုရ အလုံဂတာဇမ္ဗုဒိပ်မွဲ တိသတးညံၚ်ရဴမုက်ဖံကီုရ စရိုၚ်ဇလဟၟဲသက်သက်ရ မၞိဟ်မကတဵုဒှ်ပ္ဍဲဍုၚ်ကေတုမတဳဂှ် ဒှ်သတ်တၠကုသဵုဖအိုတ်ရ သြောံကာလဂှ် သတ်တိုန်ဒှ်သ္ၚုဖအိုတ်ရ သတ်သ္ၚုတံဂှ် နွံဗၞတ်တၟာခပဳရောၚ် ဆဗၞတ်မွဲတရေက် စုတ်ပ္ဍဲထၟာဲဍုန်လဝ်လ္တူမၞိက်ပိတုဲ လျးမၞိက်ဂဵုတိုန် ဒှ်မတောံပုၚ်ရ လျးမၞိက်ပၠိုတ်တုဲ ဒှ်ပုၚ်မစိန်ရ ဂိုၚ်စုတ်ပ္ဍဲထးထဝ်တုဲ မပပြဘိုက်ရ ကိစ္စမဒးဂၠါဲအမာဲကဖျုန်ဂှ် ဟွံမွဲသက်သက်ရ


ကာလဂှ် ကိစ္စမ္ဒးပဗၞိက်ဇိက်ဗ္ၚတဵုလွဳတံဂှ် ဟွံမွဲရ သၟိက်ဂွံဂၠိက်ယာတ် ထဝ်သြန်လစိန် သၞေက်လိုန်လကံက် ဂြၚ်ဗံက်စၞေဟ်လက်ကြာပ်တံဂှ်တုန်လေဝ် အာၜှ်ပလှ်ကေတ် ပ္ဍဲတၞံဆုကဝ်လဗဗြိုက်တံဂှ်ရ ကာလဂှ် တြုံညံၚ်ကောန်ဒေဝတဴ ဗြဴညံၚ်ရဴအဆေဝ်သွဝ် ပတၠရုပ်သာ်ညံၚ်ရဴထဝ်ထမၞိက်ကီု သတ္တံမ္ဒးဒိုက်ဒိန်ကာဲကၞာဲစံၚ်တူ တသိုဟ်တဟးဟွံမွဲရ ယဲဒိုက်သ္ဍက်သရိုဟ် သ္ဍက်တၞီသၞာန် တုတ်ထပြၚ်ဏဳခါဲဒုတ် တသံက်ခလာကၠက်ခဍဴ ဝေန်တဝေန်ဂၠေံဂံက်ခဍဴ ကုန်ကွလမေန်သြောန် ဟွံမွဲသက်က်ရ ဒဵုဖအးအိက်ရုဲ ဟွံမွဲသက်သက်ရ ဇကုညံၚ်အရံၚ်သာ်ထဝ်ရ အိုတ်ကဵုဇမၞော်တကံဇမ္ဗုဒိပ်မွဲ သၟဟ်ညံၚ်ရဴဍုၚ်ဗြီုရ သတ္တံဂတာပ်ကျာ်တြဲ အရဳယျမေတ္တေယျဂှ် ရိုဟ်ဟ်ဒဒှ်တ္ၚဲမ္ဂး ပတုဲကေၚ်ကာစရၚ်ဓရ်ကုသဵုဝွံရ ဆမပတုဲကုသဵုကဵုဒါန် ဆမဝေၚ်ပေါဲသ္ဘၚ်သက်သက်ရ ညးမဂတာပ်ကျာ်တြဲ အရဳယျမေတ္တေယျဂှ် ဒှ်သတ်တၠပိုန်ဖအိုတ်ရ။


ဗောဓိသတ် အရဳယျမေတ္တေယျဂှ် လ္တူပြာသာဒ်ပိ တန်ဒၟံၚ်ပ္ဍဲသၞာတသိုက် ဂကောံဂၞကျာ်စန္ဒမုက္ခဳဂှ်ရ စိုပ်အယုက်ဒ္စါံလ္ၚီသၞာံ တိတ်အာဝေၚ်ဂြိုပ်ဥဒျာန်တုဲ ညာတ်ဒးနိမိတ်ပန်သာ် ဂွံဓရ်သံဝေဂတုဲ က္လေၚ်စဴစိုပ်နန် နွံပၟိက်သၟိက်မိက်ဂွံပခမဳရ နအနုဘဴဗောဓိသတ် ပြာသာဒ်မှာပဏာဒစက္ကဝဝ် မတဴပ္ဍဲမှာသၟိတ်ဂှ် ကလာၚ်တိုန်ကၠုၚ်ရ ဗောဓိသတ်တန်ဒၟံၚ်ပ္ဍဲပြာသာဒ်တုဲ ဒေဝတဴလ္ၚီစက္ကဝါတံဂှ် ရပ်ကေတ်ပ္ကဴဒိပ်တုဲ ကၠုၚ်ပပူဇဴဗောဓိသတ်အိုတ်ရ ညးဗၞိက်တံဂမၠိုၚ် ရပ်နၚ်ပ္ကဴမြမောဝ်တုဲ ကၠုၚ်ပပူဇဴဗောဓိသတ်အိုတ်ရ ညးဂၟံၚ်ဂမၠိုၚ် ရပ်သၞာ်တုဲမၚ်မွဲတဴရ ဂၞကျာ်စန္ဒမုက္ခဳသီုကမၠောၚ်ဂမၠိုၚ် နွံဗၞတ်ဒ္စါံစှော်လ္ၚီ သီုဒေဝတဴဗြဴဂမၠိုၚ် ရပ်နၚ်သၠိုၚ်ထဝ် စုတ်ဗပေၚ်လဝ်မြမောဝ်ဒိပ်တုဲ ကၠုၚ်ပပူဇဴဗောဓိသတ်အိုတ်ရ သၟိၚ်ကသူမၚ်မွဲတဴဝုတ်ဒိုဟ်ပြာသာဒ်ရ သၟိၚ်နာ်ဂမၠိုၚ် ကၠုၚ်သ္ပပူဇဴမၞိက်အနက္ဃရတ်ရ သၟိၚ်သ္ပဝ်ဂမၠိုၚ် ကၠုၚ်သ္ပပူဇဴမာလာဒိပ်တံရ ကဏောဝ်ဂန္ဓဝ် ကွိၚ်ဒိပ်ဒယှ်ေလှ်ေကွာဲ ကၠုၚ်သ္ပပူဇဴအိုတ်ရ အိုဿီုညးစှ်ဒိုဟ် တွဳဗွိုၚ်လဝ်ဗောဓိသတ်တုဲ ဍိုက်အာယာန်ပြာသာဒ်မှာပဏာဒတုဲ ကလာၚ်အာလ္တူအာကာသရ။


ဗမၞးမလေပ်ဗိုတ်ပိဗေဒၚ်ပန် ဒ္စါံစှော်လ္ၚီဂှ်လေဝ် ကလာၚ်ဗက်အာအိုတ်ကီုရ ဗြီုရပ်က္ဍိုၚ်ဗ္တာၚ်ပိစှော်ယောဇနာ ဗဒဝ်အာရ သၟိၚ်အိန်ရပ်ကၞုသၚ်ဝိဇုကရပိကတုဲ ဗဂိုဟ်ဗက်အာရ သၟိၚ်မာယာတုဿိတာတံညးဂမၠိုၚ်ဂှ်လေဝ် ရပ်ပၞိက်ထဝ်တုဲ ပိုက်လွိၚ်အာရ ဒေဝတဴပဉ္စသိက္ခ ရပ်ဏာထဏထဝ်တုဲ တိၚ်သ္ပပူဇဴကွိၚ်ဒိပ်ဂှ်ရ ဗောဓိသတ်ပလိုဟ်ဆုဇုက်ဂၞု သၠုၚ်(၁၂၀)ဟတ် မဒှ်ဆုပလိုဟ်ဂမြၚ်ကျာ်ရ ပ္ဍဲကာလဂှ် ပရိက္ခရာသ္ၚာနူဒတန်ကဝ် မှာဗြီုမဒေပ်စွံလဝ် ပ္ဍဲထိုက်ဒကှ်ဂှ် ဗြီုဖျေံဏာဗဂိန်ကဵုဗောဓိသတ်တုဲ ဗိုက်သပိုၚ်ဒက်သ္ၚာတၚ်သ္ကိုပ် တၟာဲကေတ်ဗဗေၚ်တုဲ ပဒုက္ခစရိယထပှ်တ္ၚဲရ စဴဒုၚ်ဒါန်ပုၚ်ပၟန်ဂၞကျာ်စန္ဒမုက္ခဳရ ဂွံပုၚ်ပၟန်ဂၞကျာ်စန္ဒမုက္ခဳတုဲ ကျာ်တြဲမကဵုပိုန်ရ


ပ္ဍဲသၟတ်တၞံဆုဇုက်ဂၞု မဒှ်ဂမြၚ်ကျာ်ဂှ် ဂွံဒှ်ကျာ်ဂြၚ်ဓရ်ရ မုက္ခဝါကျာ်မတုပ်တဴညံၚ်ဒ္ၚဝ်ထဝ် သၠုၚ်ကျာ်(၈၀)ဟတ် သာံဒံၚ်လျးအုံနလုံ(၅)ဟတ် ပ္ဍဲကာလမဂါံကွာ်အာဂှ် ဍောၚ်ပ္ကဴဒကှ်ၜါဍောၚ် ရာၚ်ဒုၚ်ဇိုၚ်ကျာ်သဗ္ဗညုရ ထာၚ်ဒကှ်ဇၞော်ဂှ်(၃၀)ဟတ် ထာၚ်ဒကှ်သၟတ်ဂှ်(၂၀)ဟတ် ကျာ်သဗ္ဗညုရာၚ်ဆာဲတဴ ပ္ဍဲဒေါဝ်ဗၞဳကျာ်သြဳဗွဝ်ပိုန် ပ္ဍဲဒေါဝ်သ္ဍဲဟာန်မၞိဟ် ဒေဝတဴအိန်ဗြီုဂမၠိုၚ် အလုံစှ်လ္ၚီစက္ကဝါ လျးကျာ်တြဲဗျာပ်အာဗွဲလ္တူ ဒဵုကဵုဍုၚ်ဗြီု ဗွဲသၟဝ်ဒဵုနရက်အဝိက်ရ ပ္ဍဲဂၠးတိဝွံဂှ် ဒဵုကဵုအာစိုပ်ကၟာၚ်စက္ကဝါဟေၚ် ယးတၟးဒၟံၚ်ဟွံတီဗ္တံတ္ၚဲရ ဆသတိက် စာၚ်ဂြဴပကဴရာၚ် မဂွံတီဗတံ တ္ၚဲပၠိုတ်ရ


ကာလကျာ်တြဲတွံဓရ်ဓမ္မစက်ဂှ် မၞိဟ်ဒေဝတဴမွဲလက်ကိုဋ် မဂွံက္လၚ်ဂှ်ရ ယွံခမဳတံ ပူဂဵုမွဲ သၟိက်ဂတာပ်ကျာ်တြဲ အရဳယျမေတ္တေယျရသဒှ်မ္ဂး ဝတ္ထုဗဗွဲဓရ်ဂှ်ကလိဂွံတုဲ မှတ်ပတုဲကုသဵုကဵုဒါန် လ္ပဝိဝိၚ်လ္ပဟိုတ်မာဲ လ္ပဂစိုတ်သတ် လ္ပကၠတ်ဒြပ်ညးနွံကဵုတၠ လ္ပဝဵုမတ်ကၠတ်ကောန်သမ္ဘာညးညိ၊ ဂလာန်မုသာလ္ပဟီုညိ လ္ပသုၚ်စစၞဗ္ၜူသုရာအိုတ်ညိ ဒးကာလတ္ၚဲသဳ ဒ္စါံမံက်ဒ္စါံစွေက် ဗပေၚ် အာံမဝှ်တံဂှ် မၞးတံမှတ်ဒဂိုန်ကေတ်ဓရ်သဳလအိုတ်ညိ မှတ်က္လၚ်ပၚ်မှိၚ်ဓရ်လၟိုန်အိုတ်ညိ သ္ဂောံဂတာပ်ကျာ်တြဲ အရဳယျမေတ္တေယျရ ယြဴပူဂဵုမွဲ ဂစိုတ်လမျီုသတ် ဂိုၚ်ကၠတ်ကေတ်ဒြပ်ညးနွံကဵုတၠ ပလီုကောန်သမ္ဘာညး ဟီုဂလာန်မုသာ ပူဂဵုမ္ဒးသုၚ်စစၞဗ္ၜူအရက်သုရာ ဒဵုတွဵုလမျီုအိုတ် ပူဂဵုတံဂှ် ဟဂွံဂတာပ်ကျာ်တြဲ အရဳယျမေတ္တေယျရ။


ပူဂဵုဂစိုတ်မိ ပူဂဵုဂစိုတ်မ ပူဂဵုဂစိုတ်တၠအရှန် ပူဂဵုပတိတ်ဆီဇိုၚ်ကျာ် ပူဂဵုပါ်ထ္ကးသၚ် ပူဂဵုမသုန်တံဂှ် ဒးနရက်ပဉ္စနန္တရိက်ရောၚ် ပူဂဵုတံဂှ် ဟွံဂတာပ်ကျာ်တြဲ အရဳယျမေတ္တေယျရ ဟိုတ်ဒှ်သာ်ဂှ်ရ တၠပညာတံ ဂွံမိၚ်ဂွံတီကေတ်သာ်ဝွံတုဲ ပွမုတ်တံဂှ်ကဵုစ္ဍး ပွဒွးမှတ်ဒ္ဂေတ်ဗက်ညိ၊ ဒါန သဳလ ဘာဝနာ မဒှ်ကြက်ဂှ် မှတ်ပၟဝ်ဂလိုၚ်လဝ် ဓရ်တွံပါၚ်ကျာ်တြဲဂှ်လေဝ် မှတ်က္လၚ်ပၚ်မှိၚ် စေတဳ ရုပ်ကျာ်ဂှ်လေဝ် မှတ်လ္ၚောဝ်တးၚး ဂိုၚ်ကၟတ်ချောဲအုဲဟန်ဗန် ဇန်ပ္ကဴသ္ပပူဇဴကျာ် သ္ပပူဇဴဓရ် သွပပူဇဴသၚ် မၚ်မွဲဓရ်သဳလ ဗဝ်ကျာ်ဗ္တဳ ယာံသ္ဂောံပကီုလွဳပရာသာ်ဝွံတုဲ ၜးနူဘဝအတ္တဘဴမၞိဟ်စုတိ သီုမဟဂွံဝိဝိၚ်ဟိုတ်မာဲဂှ် သ္ဂောံတိုန်စသိုၚ်သိုက်သၠိၚ် ပ္ဍဲဍုၚ်သွဝ်တေံတုဲ ယာံဂွံအာစိုပ်ဍုၚ်သွဝ်မ္ဂး စသိုၚ်ပိုန်ဒိပ်ဒယှ်တှ်ဖဲလဲတုဲ ကြဴတဲသ္ဂောံဂတာပ်ကျာ်တြဲ အရဳယျမေတ္တေယျ ဟွံဆောတ်ရ၊ တၠဳမၞုံကုပိုန်ကျာ်တြဲ တၠမဟာကရုဏာလဝ်စိုတ်တုဲ သြဝ်မတွံပၟိၚ်လဝ်ကဵု ခမဳသၚ်တံညးဂမၠိုၚ် သီုမှာဇန်တြုံဗြဴတံရောၚ်မိဂ္ဂး။

(၁၆) စၞောန်ထ္ၜးအုပ်ကၠေံနိဂီု[ပလေဝ်ဒါန် | ပလေဝ်ဒါန် တမ်ကၞက်]

  • အုပ်ကၠေံနိဂီု

အနိစ္စဂှ် နူဂယးပြဟ် ထပှ်လတုန်

သဝ်တ္ၚဲဟီုပ္ဍုန် ဒုက္ခတုန်ကၠာ ၜါစှော်ပၟဝ်

အနတ္တမှာ သဂါဗတံ မသုန်ကၠံဓရ်

ယဝ်သ္ဂောံပၟဝ် ဍုၚ်သွဝ်စိုပ်သ္အး နရက်ဗၠးတုန်


ဂဥုဲဒစာံ ကေဝ်ဗျာံလဝ်တုဲ ဟုဲပပိစွံ

မွဲဗတံစွံ ပိပိကဠောံ ယဝ်သ္ဂောံထိုအ်ၚိတ်

နရက်လေဝ်သြာဲ အပါဲလေဝ်စ္ဍး ဝိဝဲဗၠးတိတ်

ယဝ်သ္ဂောံၚိတ် ဂဥုဲသိတ်ဇျာန် သွဝ်နိဗ္ဗာန်ရောၚ်


ပြကိုဟ်သၠပတ်အဓါန်မသုန် အာစိုပ်ဒတုဲရ ။ ။ ဒိပုအာ . .

ပြကိုဟ်အနာဂတာဝၚ်[ပလေဝ်ဒါန် | ပလေဝ်ဒါန် တမ်ကၞက်]

စၞောန်ထ္ၜးနိဒါန်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကဝ်ဏံဝွံ ခုတ်ယၟုပၠန်၊ ဂးဘဒြကဝ် ဂၠိုၚ်ဗွဝ်ဂုဏ်၊ ကတဵုဒှ်မွဲတဲ ကျာ်တြဲမသုန်၊ ကက္ကုသန်ရော ကောနာဂီုပ္ဍုန် ကျာ်ကဿပ ဂေါတမတုန်၊ အရဳယျမွဲ ဇၞော်ဇာသဳဂုဏ်၊ ကျာ်ပန်လောန်စဴ မွဲသှ်ေတဴတုန်၊ ကဝ်ဝွံဇၞော်ဂုဏ် ပုညခေတ္တ၊ ပ္ဍဲတကံပိုဲဝွံ ဇမ္ဗုဒိပ္ပ၊ ပ္ဍဲသာသနာမှာဂေါတမ ကျာ်ကလောတ္ၚဲ နဲအဒိတျ၊ ဒှ်အ္စာဗြီုတိဘုမ္မိက သ္ဂေဟ်ဥာဏ်စရာဲ နာဲသာဇိန ပကၚ်ရၚ်လဝ်ရ၊ ဓရ်နဝခန် ဂုဏ်ဓရ်အမြိုတ် ဖျုၚ်လဝ်စိုတ်ဇန် ဟံၚ်ဖျဴနိဗ္ဗာန် ဌာန်ဒိပ်ဒတန် ဂွံဗၠးဒမၠိ နူဇာတိပန် လၟိဟ်သင်္ချာဒှ်ၜါစှော်ပန် ဟံၚ်ဏာသတ်ပၠန် နန်ထဝ်နိဗ္ဗာန် သတ်ဆသၟေဟ်ဂှ် ဒှ်အာန်ထၞာန် သၟိက်ဂွံပတိုန်ဇကု မြုထဝ်နိဗ္ဗာန် သွက်ဂွံသလဲ ဟွံမွဲဂလာန် တဝှ်ဗုဒ္ဓဂမ္ဘိရညာဏ် ပသလဲပ္ကာန် သ္ဂောံတီမာန်ရောၚ် တဝှ်ကျာ်တြဲမွဲတဲဟွံယောၚ် သ္ဂောံဆဵုကေတ်ကၠာ သာသနာရောၚ် ဂွံမိၚ်ဂွံညာတ် သုဇ္ဇာတ်မွဲတောၚ် ဟီုပျးလဝ်ရောၚ် ညံၚ်ဍောၚ်ပုပ္ဖာ ဂွံလဟဵုပၠန် မန်ပိဘာသာ ဒှ်ညးမပြဲ တီနဲဓမ္မာ

(၁)စၞောန်ထ္ၜးပဏာမလ္ၚောဝ်ရတ်ပိ[ပလေဝ်ဒါန် | ပလေဝ်ဒါန် တမ်ကၞက်]

  • နမော တဿ ဘဂဝတော အရဟတော သမ္မာသမ္ဗုဒ္ဓဿ

  • ပဏာမ

ဝတ္ထုတ္တယံ နမဿိတွာ စိတြံဝါ စာယလိင်္ကိတံ ကဿံသောတူန မတ္ထာယ အနာဂတာစ ဝံသဟံ


အရထ ။ ။ အဟံ၊ ၚ်ဂကောံခန္ဓပဉ္စကသမူဟ ပညပ်ပြဲ အဲခမဳမွဲဇကု မၞုံယၟုရလောသဳရိ ဝတ္ထုတ္တယံ န်ကျာ်ဓရ်သၚ်စိ ရတ်ပိပြကာ ဒယှ်တှ်ပြာကတ် ကၞောတ်အထောတ်မပြဲ နမဿိတွာနမာမိ တဲဝွံဟေၚ်လ္တူဂၠးကၞေၚ်မွဲ ဗွဲမရှ်ေသှ်ေဖျေံက္ဍိုပ်ရဴဂဴ ဇဴစိုတ်လၟောဝ် ပ္ဍံလ္ၚောဝ်ဗွဲမရှ်ေသှ်ေရဴဂဴရလေဝ်အဴ။


နမဿိတွာ၊ဇဴစိုတ်လၟောဝ် လ္ၚောဝ်ဗွဲမရှ်ေသှ်ေရဴဂဴကၠာတုဲ သောတူနံ၊ဒဒက်တဴကဵုကောန်ဂကူပၠန် သောတဇန်ရမညဘာသာ အတ္ထာယ၊တၞဟ်နဖဵုဂွံရံၚ်သ္ၚဳ ကတ်လ္ၚတ်ဗှ်ဖ္ဍောတ်အာအဆက်ဆက် သွက်ဂွံစၟတ်သမ္တီ စိတြံဝါစာယလိင်္ကိတံ၊ဍေံမဂပ်ဝ်ဂညိဂညာတ်လဝ် နကဵုဂလာန်မစိစောန်လောန် အနာဂတာစဝံသဟံ၊န်ပြကိုဟ်မွဲမၞုံယၟု အနာဂတာဝၚ် လၟေၚ်ဗောဓိသတ်စှ် သွက်ဂွံကတဵုဒှ်ကျာ်အနာဂတ်ဂတ တဝှ်ကျာ်တြဲ အရဳယျမေတ္တေယျမွဲ မပြာကတ်လောန် ( ဝံသဂှ် နိဂ္ဂဟိတ်ဇိုတ်လဝ် ) ကဿံကရိဿာမိ၊ ဂၠါဲသ္ၚဳနဲကဲ ပ္ဍဲအ္စာနွံညာဏ် ဂလာန်ဗိုန်ဗတ်မချပ်လဝ်ပ္ဍဲစိုတ်ပၠန် ဇန်ပကောံနၚ်ရ နကဵုညာဏ်စက္ခုဟေၚ် ကြက်ခၞံချူပြုပြေၚ်ကဵုရ။

(၂)ခဏ်ကျာ်တြဲပျးဒိုဟ်ဗောဓိသတ်စှ်[ပလေဝ်ဒါန် | ပလေဝ်ဒါန် တမ်ကၞက်]

ဥတ္တမော မေတ္တေယျောရာမော ပဿေနဒဳ ကောသလော အဘိဘူဒဳဃသောနဳစ စဏ္ဍနိစ သုဘော တောဒေယျဗြဟ္မဏော နာဠာဂိရိ ပလလေယော ဗောဓိသတ္တာ အနုက္ကမေန သမ္ဗောဓိံ လဘန္တိ အနာဂတေ ။ ။ အရထ ။ ။ ဥတ္တမော တၠဳလဂှ်ဒမပြဲ မေတ္တေယျောစ၊ ကျာ်တြဲမၞုံယၟု အရဳယျမေတ္တေယျကီု ရာမောစ၊ သၟိၚ်ရာမကီု ပဿေနဒဳကောသလောစ၊ သၟိၚ်ပဿေနဒဳကောသလကီု (ဝါ) သၟိၚ်ပဿိုန်ကီု အဘိဘူစ၊ သၟိၚ်ဒေဝတဴအဘိဘူကီု ဒဳဃသောနိစ၊ သၟိၚ်ဒေဝတဴအသူရိၚ် မၞုံယၟုဒဳဃသောနိကီု စဏ္ဍနဳစ၊ ဗမၞးစဏ္ဍနဳကီု သုဘောစ၊ မၚ်ဗၠာဲသုဘကီု တောဒေယျဗြဟ္မဏောစ၊ဗမၞးတောဒေယျကီု ( တောဒေယျလေဝ်ပါဌ်နွံ ) နာဠာဂိရိစ၊ စိၚ်နာဠာဂိရိကီု ပလလေယောစ၊ စိၚ်ပလလေယကီု (ဝါ) စိၚ်ပလိလယ်ကီု ဣမေဒသ၊ ဍေံမၞုံဗၞတ်စှ်အိုတ် ဗောဓိသတ္တော၊ၚ်တြုံဗောဓိသတ်ဂမၠိုၚ် အနုက္ကမေန၊ ဗွဲလၟေၚ် အနာဂတေ၊ ပ္ဍဲကာလအနာဂတ်ကြက်ကတဵုဒှ်ဂတ သမ္ဗောဓိံ၊ န်ဓရ်သစ္စပန် လဘန္တိ၊ ပ္ဍံကလိဂွံဂြၚ်တီအိုတ်ရ ဣတိ၊ ရဴသာ်ဝွံ ဗျာကာသိ၊ စိန်ပျးလဝ်ဒိုဟ်ရ။

(၃)ခဏ်ဗောဓိသတ်အဇိတသ္ပခမဳ[ပလေဝ်ဒါန် | ပလေဝ်ဒါန် တမ်ကၞက်]

လောကဝိဒူသယမ္ဘူ အထောဋ်ကၞောတ်တိုက်ပိတဴ ပြဲနူလ္တူမၞိဟ်ဒေဝတဴဂမၠိုၚ်ဂှ် ဒှ်ကျာ်တြဲဂေါတမပိုဲတုဲ နကဵုအိန်ရိယာပိုတ်ပန် တန်တဴဒၟံၚ်ပ္ဍဲဍုၚ်ရာဇာဂြိုဟ် ပ္ဍဲဘာဝေဠုဝန်ရ ပ္ဍဲအခါကာလမတန်တဴဒၟံၚ် ပ္ဍဲဘာဝေဠုဝန် နကဵုအိန်ရိယာပိုတ်ပန်ဂှ် ဗောဓိသတ်အလံၚ်ကျာ်တြဲ အရဳယျမၞုံယၟုအဇိတဂှ် သ္ပဟိုတ်ကဵုသၟိၚ်အဇာတသတြုတုဲ ကၠုၚ်တန်ပဋိသန္ဓိ ပ္ဍဲဂၠံဂဝ်ဂၞကျာ်ဇၞော်သၟိၚ်ဂှ် မၞုံယၟုကဉ္စနဒေဝဳတုဲ ပေၚ်စှ်ဂိတုဟေၚ် သၠးပဋိသန္ဓိရ။

ကုကောန်သၟိၚ်ဂှ် မၞုံယၟုအဇိတ ဗွဲဝေါဟာရပညပ် ခုတ်ခဴစရ ကောန်သၟိၚ်အဇိတဂှ်ပၠန်တုန် ဍိုက်ပေၚ်တဴကေုာံတွဳဝါရယဿပတ် ကောန်သၟိၚ်ဗၞတ်မသုန်ကၠံရ ကာလမအာစိုပ်အဝဲအယုက် မရနုက်ကဵုစှ်တြဴသၞာံဂှ် မအံက်သၟိၚ်ဇၞော်အဇာတသတြုဂှ် ဒုၚ်ကေတ်အာဲတၟာဲ တဳလမၞုံကုပိုန်ကျာ်တြဲရသ္ဂးတုဲ သီုကဵုတွဳဗွိုၚ်ကေတ် ဂကောံကောန်သၟိၚ်မသုန်ကၠံတုဲ နကဵုဍာ်ယာမကာလိက မပ္တံကဵုပိဏ္ဍပါတ် အဟာရဘောဇိုန်တၞဟ်ဟ်သာ်ကီု ဝတ္ထုသွက်ဂွံကဵုဒါန် မပ္တံကဵုယာတ်အုပ်တဴ ပၠးဂၠးဗွဲမဂၠိုၚ်ကီု ကဵုရေၚ်တၠုၚ်ဏာတုဲ ဂၠံၚ်ဍာန်သဗာန်တြဴ သွက်ဂွံပြာပ်အာဘာဝေဠုဝန်ဂှ် ကဵုဂ္ညိဂ္ညာတ်တုဲ သီုကဵုမပွဳဗွိုၚ်ကေတ် ပၞာန်စိၚ်ပၞာန်ချေံ ပၞာန်ကွဳပၞာန်တိုက် အမာတ်သေဌဳသမ္ၚေဟ် ဗမၞးဂမၠိုၚ်တုဲ ကော်ဂွံကောန်သၟိၚ်အဇိတဂှ်တုဲ ပြာအာဘာဝေဠုဝန်ရ။

ကောန်သၟိၚ်အဇိတသ္ပခမဳ ပ္ဍဲဇရေၚ်တဳလမၞုံကုပိုန်ကျာ်တြဲတုဲ ဍိုက်ပေၚ်တဴကေုာံဂုဏ် မပ္တံသမာဓိပညာဂှ်ဒှ်တုဲ အဇိတထေရ်ယၟုပြာကတ်တဴရ တဳလမၞုံကုပိုန်ကျာ်တြဲတုန် ကော်ဂွံအဇိတထေရ်ဂှ်တုဲ နူဍုၚ်ရာဇာဂြိုဟ်ဂှ် က္ညအာဍုၚ်ကပ္ပိလဝှ်တုဲ နကဵုအိန်ရိယာပိုတ်ပန် တန်တဴဒၟံၚ်ပ္ဍဲဘာနိဂြောဓါရာံရ။

(၄)ခဏ်ဂၞကျာ်ဂေါတမဳ သဳဒေံမိကျာ်တုတ်သ္ၚာထဝ်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကာလမသ္ပဒတဴဒၟံၚ် ပ္ဍဲဘာနိဂြောဓါရာံဂှ် ဂၞကျာ်ပဇာပတိဂေါတမဳ လ္ၚပ်စိုတ်သၟိက်ဂွံကဵုဒါန်သ္ၚာထဝ် ကုတဳလပိုန်မၞုံကုပိုန်ကျာ်တြဲ ဗွဲသဒ္ဓါလျုၚ်ဇြုၚ်သ္ဍိုက်တုဲ ကဵုကၠောန်ကၠာၚ်ထဝ်သာ်ဗကေတ်တုဲ နကဵုထၞိက်ကြကောတ်ထဝ်ဂှ် ဖုဲဏှဴရဴနကဵုတိတုဲ ကဵုစုတ်ပ္ဍဲကၠာၚ်ထဝ်ဂှ်တုဲ ရပ်ဂိုၚ်ကေတ်မတောဝ်နကဵုတဲတုဲ သ္ပအဓိဌာန်ရ။

တၞံတောဝ်ထဝ်သၟတ် ကဵုကၠုတ်ပါ်တိုန်ညိ ရဴသာ်ဝွံ သ္ပအဓိဌာန်တုဲ တဵုစုတ်ပ္ဍဲကၠာၚ်ထဝ်ဂှ်တုဲ လၟေၚ်ဝိသေသ တၞံတောဝ်ထဝ်ကၠုတ်တိုန်ရ ပ္ကဴဍေံဂှ်တုန် တုပ်ကေုာံပ္ကဴမၠဵုရ (ဗမာ-မဟာလှေကာပွၚ့်နှၚ့်တူ၏)သတ်ဍေံဂှ်ပၠန်တုန် တုပ်ကေုာံသာ်မၞိက်ဒဝါန်ရ။

ဂၞကျာ်ပဇာပတိဂေါတမဳတုန် တၞံတောဝ်ဂှ် ဇၞော်မောဝ်ကတဵုဗဒှ်သတ်ပ္ကဴတုဲဂးကီုရ နကဵုတဲဂှ်ၜှ်ပလှ်ကေတ်တုဲ သီုမစုတ်လဝ် ပ္ဍဲကဵုနပ္ကဴထဝ်တုဲ နကဵုတဲဇကုဟေၚ် ရပ်ဂိုၚ်ကေတ်တုဲ ပိုဟ်ဖ္ဍိုတ်ရ ပိုဟ်ဖ္ဍိုတ်ကဵုဒှ်တောဝ်ချဵုတုဲ ထၟူထၟောံလဝ်ရ ကၠေၚ်တောဝ်ထဝ်ဂှ်ဗွဲမဒးရး ဍိုန်ဍောတ်ဇိပ်ဂၠိပ်တံဂှ်တုဲ ( ကဵုဖာပ်ဗ္စ ) ကဵုစမပ္တံပုၚ်ဍာ်ယာမ ဍာ်သာဲတၚ်လာဲ ကၠေၚ်သွဟ်ရ ဂ္ညိဂ္ညာတ်ကျိုၚ်ကျဝ်ကေတ်ကယျိုၚ်ကယျဝ် ဗွဲမ္ဒးရးတုဲ ဇြပ်ရုၚ်ယန်သေဝ်ဂှ် သီုကဵုမကဵုကြုဲစုတ်လဝ်မြမောဝ် ကြက်စၠန် စွံပတိုန်လဝ်မၞိဟ်ပၟၚ်ပၟဲ မဗိုန်ဗတ်တုဲ ကဵုတုတ်တဴရ ယာတ်မွဲဂတှ်ေတုဲအာရ ဇမၠိၚ်ဍေံဂှ် စှ်ပန်ဟတ်ရ အနာံဍေံတုန် ဒှ်ထပှ်ဟတ်ရ ညံၚ်ရဴညးစပ်စုတ်လဝ် ထဝ်သက်သက်ကီုဒှ်တဴရ။

ယာတ်တၞဟ်မွဲဂတှ်ေပၠန်ဂှ်လေဝ် တုပ်နဲသာ်ဂှ်ကီုရ ယာတ်မွဲလ္ၚဝ်ဂှ် စုတ်လဝ်အပ္ဍဲကြောတ်မၞိက်တုဲ ထီုပးလဝ်ပ္ကဴသြဴ မြမောဝ်ဗွဲမဂၠိုၚ် ရပ်ဂိုၚ်ကေတ်နကဵုတဲတုဲ ကြောတ်မၞိက်မစုတ်သ္ၚာထဝ်ဂှ် ယဵုစုတ်ပ္ဍဲလ္တူက္ဍိုပ်ဇကုတုဲ ဝတ္ထုသွက်ဂွံကဵုဒါန်ဗွဲမဂၠိုၚ် မပ္တံပိဏ္ဍပါတ်အဟာရဘောဇိုန်ကီု ရေၚ်တၠုၚ်တုဲ သီုကဵုမရပ်ဏာပ္ကဴသြဴမြမောဝ် ဇၞောဝ်အလာံရာဲတံၚ်ခေါန် တွဳဗွိုၚ်ကေတ် ကောန်သၟိၚ်သာကျဝၚ် တြုံဗြဴဂမၠိုၚ်တုဲ ပြာပ်အာဘာနိဂြောဓါရာံရ တဳလမၞုံကုပိုန်ကျာ်တြဲတုန်လေဝ် သၟးညံၚ်ရဴဗၞဳအဝန် သၟိၚ်ဂိတုဗၠာဲ မပွဳဗွိုၚ်လဝ်ဂကောံ သၟန်သၞံၚ်နက်သတ်ဂမၠိုၚ်တုဲ မမံက်တိတ်ကၠုၚ်ကီု သီုကဵုမပွဳဗွိုၚ်လဝ် ဂကောံဘိက္ခုသၚ်ဂမၠိုၚ် ဗလးဒၟံၚ်လျးတြဴသာ်တုဲ ဂဇအ်တန်ဒၟံၚ် ပ္ဍဲလ္တူသၞာထဝ်ဂှ်ရ။

(၅)ခဏ်ဂၞကျာ်ဂေါတမဳ ကဵုဒါန်သ္ၚာထဝ်[ပလေဝ်ဒါန် | ပလေဝ်ဒါန် တမ်ကၞက်]

ဂၞကျာ်ဂေါတမဳတုန် ပ္ဍဲဌာန်ဇရေၚ်တဳလမၞုံကုပိုန်ကျာ်တြဲ ဟွံသ္ၚောဲဟွံညန် နလ္ၚောဝ်မသုန်ပြကာဂှ် လ္ၚောဝ်တုဲ ဂဇအ်တန်ဒၟံၚ်ရ ဂၞကျာ်ဂေါတမဳ ညာတ်ဒးစၠးစရာဲတဳလမၞုံကုပိုန်ကျာ်တြဲတုဲ ပံက်ပ္တိတ်ကြောတ်မၞိက်ဂှ်တုဲ သ္ၚာထဝ်မွဲလ္ၚဝ်ဂှ်ရပ်ကေတ်တုဲ ဂရၚ်ပ္တီတိုန်ကျာ်တြဲရ ယွံတဳလမၞုံကုပိုန်ကျာ်တြဲ မဍိုက်ပေၚ်တဴကေုာံပိုန်တြဴပြကာ အဲဍိက်ရန်တၟံကဵုတဳလပိုန်တုဲ သ္ၚာထဝ်ဝွံ နတဲအဲဍိက် ကၠောန်လဝ်ဗွဲမသ္အးဇ္ၚး တတ်လဝ်ဗွဲမဒးရးရ။


တဳလပိုန်စွံဓရ်ကရုဏာ ဆာန်ဍူအဲဍိက်တုဲ သ္ၚာထဝ်ဝွံ သြဝ်ကညဒုၚ်ဒါန်ညိကျာ် ရဴသာ်ဝွံ အာတ်အခေါၚ်ရ သ္ၚာမွဲဂတှ်ေဂှ် ကျာ်တြဲဒုၚ်ကေတ်ရ သ္ၚာမွဲဂတှ်ေဂှ် သြဝ်တၠအဲပြာပ်အာကဵုဒါန်ကုသၚ်ညိ သာ်ဝွံ ကျာ်တြဲသ္ဂးရ ဂၞကျာ်ဂေါတမဳလေဝ် ဒုၚ်ဝန်ဂလာန်တဳလမၞုံကုပိုန်ကျာ်တြဲတုဲ သ္ၚာထဝ်မွဲဂတှ်ေဂှ် ပြာပ်အာကဵုဒါန်ကုတဳလပိုန်သၚ်ဂမၠိုၚ်ရ မှာထေရ်ဒ္စါံစှော်ဂမၠိုၚ်ကီု ခမဳသ္အာၚ်ဂမၠိုၚ်ကီု ညးမွဲလေဝ် ဟွံဂံၚ်ဒုၚ်ကေတ်အိုတ်ရ။


ပ္ဍဲကာလဂှ် မှာထေရ်အဇိတ မဒှ်အလံၚ်ကျာ်တြဲ အရဳယျမေတ္တေယျဂှ် ဂဇအ်တန်ဒၟံၚ် ပ္ဍဲလ္ဒေါဝ်ခမဳဂမၠိုၚ်တုဲ ချပ်တဴရ ကျာ်တြဲမ္ဂးဂှ်တုန် မမိက်ဂွံကဵုဖဵုဂၠိုၚ်ကဵုဂၞကျာ်ဂေါတမဳတုဲ မသ္ဂးရ ရဴသာ်ဝွံပၠောပ်စိုတ်တုဲ တြုံမပြဲ မဒှ်အလံၚ်ကျာ်တြဲအရဳယျ ဟဂွံရောံဓည ဟဂွံဖေက်ဂွညှာတာ ညံၚ်ရဴသၟိၚ်ကေသာရာဇာဒိသိုၚ်ကီု ယာတ်မတုပ်ကေုာံသာ်ထဝ်ဂှ် ဒုၚ်ဂိုၚ်ကေတ်ရ။


ပ္ဍဲကာလဂှ် ပရိသာတ်ခမဳဂမၠိုၚ် ဗရုရမျာၚ်ရုသံၚ်ကောလံ ကောလကတဵုဒှ်ကၞုက်ကၞာဲတုဲ အသဳတိသာဝက မှာထေရ်ဒ္စါံစှော်ဂမၠိုၚ်ကီု ခမဳသ္အာၚ်ဂမၠိုၚ်ကီု သ္ၚာထဝ်မဟဂံၚ်ဒုၚ်ဂိုၚ်ကေတ်ဂှ် ခမဳအညတြမွဲဇကု ဂိုၚ်ဒုၚ်ကေတ်ရ ရဴသာ်ဝွံ ရုရုသံၚ်သံၚ်ဂလာန်မကြံၚ်မ္ၚိုဟ် ဟီုဂရိုဟ်ညာန်တဴအိုတ်ရ ဂလာန်ဂှ် ကျာ်တြဲမိၚ်တုဲ သဘဴဓမ္မတာကျာ်မ္ဂးဂှ် ရံၚ်သ္ၚဳတဴဂကောံပရိသာတ်လၟိုန်ရ။


ကျာ်တြဲညာတ်ခမဳတံဟီုဂရိုဟ်ဒၟံၚ်သာ်ဂှ်တုဲ ကြက်အဲပၠေၚ်ကၠေံသၠေဟ်ပၟာ ညးဂမၠိုၚ်အိုဿီုရ ရဴဝွံပၠောပ်စိုတ်တုဲ သ္ဂးတိုန်ကဵုခမဳဂမၠိုၚ်ရ ယွံခမဳတံညးဂမၠိုၚ် ခမဳဝွံ နဂလာန်မ္ဂးအညတြလ္ပဟီုအိုတ်ညိ ခမဳဝွံ သာမညခမဳဟွံသေၚ် တြုံဗောဓိသတ်ရောၚ် ဒှ်ညးမပြဲ မရနုက်ဗပေၚ်လဝ်ပါရမဳစှ်ရောၚ် ညံၚ်ရဴသၟိၚ်တ္ၚဲ သၟိၚ်ဂိတု မတ်ဗြဲမဂြောပ်ဗ္ဒန်လဝ်ကီု ညံၚ်ပၟတ်လ္ၚပတေၚ် ဗဗုမထုပ်လဝ်ကီု ဍိုက်ပေၚ်တဴကေုာံမနုဿလိင်္ဂဂှ်ဒှ်တုဲ ပ္ဍဲကာလကြဴအနာဂတ်ဂတ ကြက်ဒှ်ကျာ်တြဲအရဳယျမေတ္တေယျရ ရဴသာ်ဝွံ ကျာ်တြဲသ္ဂးရ။

(၆)ခဏ်မှာထေရ်အဇိတ ကေတ်နၚ်ဗဗေၚ်တုဲရာဒနာမိက်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကာလဂှ် ကျာ်တြဲကော်မှာထေရ်အနန်ရ ယွံအနန် ဗဗေၚ်တၟံအဲဂှ် အာကေတ်နၚ်ညိ ရဴဝွံသ္ဂးရ မှာထေရ်အနန်ပၠန်တုန်လေဝ် ဗဗေၚ်တၟံသာ်မၞိက်ဒဝါန် မၞုံကဵုစရိတ်ပန်တန် မိန်ဒေဝတဴဇၞော်ပန် မကဵုလဝ်ဒါန်ဂှ် ကေတ်နၚ်တုဲ ဗဂိန်ကဵုကျာ်တြဲ ဗဗေၚ်တၟံသာ်မၞိက်ဒဝါန်ဂှ်ရ။

(၇)ခဏ်မှာထေရ်အဇိတ စဵုသၠဖ္ဍာန်သ္ၚာထဝ်[ပလေဝ်ဒါန် | ပလေဝ်ဒါန် တမ်ကၞက်]

ကျာ်တြဲလေဝ် ဗဗေၚ်တၟံသာ်မၞိက်ဒဝါန်ဂှ်ပၠန် ပတိုန်ဖ္ဍုန်လဝ်ပ္ဍဲလ္တူဂတာတဲတုဲ ဗလးဏာပ္ဍဲအာကာသရ ဗဗေၚ်ဂှ် ဓလီုဖ္ဍိုက်အာဂၠံတိုက်စက္ကဝါ ဟွံတီကဵုဗၞတ်တွဵုတုဲ ကျာ်တြဲသ္ဂးကဵုခမဳဂမၠိုၚ်ရ ယွံခမဳတံ ဗဗေၚ်တၟံအဲကျာ်ဗလးဏာဂှ် မဟာထေရ် အသဳတိသာဝကဒ္စါံစှော်ဂမၠိုၚ်ကီု ခမဳဂမၠိုၚ် သ္အာၚ်နူဂှ်ကီု အာဂိုၚ်ကေတ်နၚ်ညိ ရဴဝွံဖအောဝ်ဏာရ။


အယာံမာတ်ညးမမိက်ကဵုမွဲမွဲကီုလေဝ် တၞဟ်နရေၚ်တၠုၚ်ဂိုၚ်နၚ်ဗဗေၚ်ဂှ် ဟွံသၟဟ်ရထရ ကျာ်တြဲကော်မှာထေရ်အဇိတတုဲ ယွံအဇိတ ဗဗေၚ်အဲမဗလးဏာဂှ် အာဂိုၚ်ကေတ်နၚ်ညိ ရဴဝွံ ကျာ်တြဲဖအောဝ်ဗလးဏာ မှာထေရ်အဇိတ မှာထေရ်အဇိတလေဝ် ဒုၚ်ဝန်တုဲပြာပ်အာဂးကီုရ မွဲချိုန်ခဏဟေၚ် ရေၚ်တၠုၚ်နၚ်ဗဗေၚ်ဂှ်တုဲ စိုပ်ကၠုၚ်ရ ပ္ဍဲကာလဂှ် မှာထေရ်အဇိတတုန်လေဝ် သ္ၚာထဝ်ဇကုမကလိဂွံလဝ်ဂှ် ပ္ဍဲလ္တူဇံၚ်ကျာ်တြဲမပဒတဴဂှ် စဵုသၠဖ္ဍာန်တုဲ ကဵုဒါန်ရ ကာလမကဵုဒါန်တုဲဂှ် သာ်ဝွံ ရာဒနာမိက်ရ ယွံတဳလပိုန် ဖဵုကုသဵုအဲဍိက် မဂွံဒက်စဵုသၠဖ္ဍာန်ကဵုဒါန် ကဵုတဳလမၞုံကုပိုန်ကျာ်တြဲလၟုဟ်ဝွံဂှ် ပ္ဍဲကာလအဲဍိက်ကတဵုဒှ်ကျာ်တေံဂှ် သၠဖ္ဍာန်ဗွဲမရာၚ်ဆာဲစိစောန် မၞုံဗၞတ်(၁၂)ယောဇနာ သီုကဵုဂ္ညိဂ္ညာတ် ကယျိုၚ်ကယျဝ်မတၟုဲတဴ နကဵုပ္ကဴထဝ်ပ္ကဴသြန် ပ္ကဴသိလ္လာပ္ကဴဗၠဲ မတၟုဲတဴနကဵုရတ်ထပှ်ပြကာ ကဵုဂွံဒှ်ကုအဲဍိက်ညိကျာ် ရဴသာ်ဝွံ ရာဒနာမိက်တုဲ နလ္ၚောဝ်မဆိုက်ဗ္ဒက်မသုန်ပြကာ လ္ၚောဝ်တဳလမၞုံကုပိုန်ကျာ်တြဲတုဲ ဂဇအ်တန်ဒၟံၚ် ပ္ဍဲဌာန်မွဲမဗၠးဒုဟ်တြဴသာ်ရ။


ကျာ်တြဲလေဝ် သ္ပကာဂအီရ ပ္ဍဲကာလဂှ် မှာထေရ်အာနန္ဒ ဒှ်ဓမ္မတာဘဏ္ဍကာရိက ဒလိုက်ကတဵုနူသၞာတုဲ သီုကဵုမပၚ်တဲလ္ၚောဝ်ဒၟံၚ်တုဲ ယွံတဳလပိုန် ဟိုတ်မသ္ပကာဂအီဂှ် ဟီုတွံကုအဲဍိက်ညိကျာ် ရဴဝွံ အာတ်အခေါၚ်ရ ကျာ်တြဲတုန်လေဝ် ညံၚ်ရဴမပံက်ပ္တိတ်ကြောတ်ထဝ် မစုတ်လဝ်ကြကောတ်မြမောဝ်ကီု သီုကဵုမဟီုလၟိၚ်ပ္တိတ်ဏာ ကဵုမိၚ်အာ ဒဵုကဵုစိုပ်လ္အိတ် ပရိသာတ်ဂမၠိုၚ်တုဲ အာနန္ဒ ၊ ယွံအနန် ခမဳမၞုံယၟုအဇိတဂှ် ပ္ဍဲဘဒ္ဒြကဝ်ဝွံဟေၚ် ကြက်ကတဵုဒှ် ကျာ်တြဲအရဳယျမေတ္တေယျရောၚ် ရဴသာ်ဝွံ ပျးလဝ်ဒိုဟ်တုဲ လုပ်စအရဟတ္တဖဵုရ နကြိဒလိုက်ကတဵုတိတ် နူအရဟတ္တဖဵုတုဲ ပ္ဍဲကာလဂှ် မှာထေရ်သာရိပိုတ် မစိုန်ဒှ်တဴသကိုပ်ပၞာန်ဓရ် တီကေတ်ပၟိက်စိုတ်ခမဳဂမၠိုၚ်တုဲ သီုကဵုမပၚ်ခၠံသၟိပ်တဲလ္ၚောဝ် ကျာ်တြဲဗွဲမရှ်ေသှ်ေရဴဂဴတုဲ ဂရၚ်ပ္တီတိုန်ရ။


ယွံတဳလပိုန် ခမဳအဇိတဝွံ မုရဴပ္ဍဲကာလမွဲ မုရဴနအကာရမွဲ ကြက်ကတဵုဒှ် ကျာ်တြဲအရဳယျမေတ္တေယျရောကျာ် သ္ပဟိုတ်ကဵုဓရ်ကရုဏာ ဆာန်ဍူတုဲ သြဝ်ဟီုတွံကုအဲဍိက်ညိကျာ် ရဴသာ်ဝွံ အာတ်ပၚ်မှိၚ်ဓရ် ဇာတ်ကျာ်တြဲအရဳယျရ။

(၈)ခဏ်ကျာ်တွံအနာဂတာဝၚ်ကုမှာထေရ်သာရိပိုတ်[ပလေဝ်ဒါန် | ပလေဝ်ဒါန် တမ်ကၞက်]

မှာထေရ်သာရိပိုတ် အာတ်အခေါၚ်တုဲ ကျာ်တြဲတွံ ပြကိုဟ်အနာဂတာဝၚ် ကုမှာထေရ်သာရိပိုတ်ရ ကျာ်တြဲအရဳယျမေတ္တေယျဂှ် မုရဴပ္ဍဲကာလမွဲ မကတဵုဒှ်ကျာ်ရောမ္ဂးဂှ်တုန် ယွံသာရိပိုတ် အဲကျာ်သ္ပရိနိဗ္ဗာန်ကလိလောန်အာတုဲ ကာလလံညိပၠန်ဂှ် နပွမကၠေံဗ္ဒန်မသုန်ပြကာဂှ် ကြက်ကၠေံဗ္ဒန်ရ ( အဓါန်မသုန်လေဝ်ဂးရ )။

(၉)ခဏ်အဓါန်မသုန်ဗီုကၠေံဗ္ဒန်အာမသုန်သာ်[ပလေဝ်ဒါန် | ပလေဝ်ဒါန် တမ်ကၞက်]

(ပ္ဍဲဂလာန်မ္ဂး အဓါန်မသုန်ဗီုကၠေံဗ္ဒန်အာ ကြက်ဟီုတွံကဵုဂတဏံဂှ် အတိုၚ်မကၠုၚ် ပ္ဍဲသၠပတ်အဓါန်မသုန် အ္စာပိုဲမန်မချူခၞံလဝ် ပ္ဍဲသၠရိုတ်တာကီု အတိုၚ်မကၠုၚ်ပ္ဍဲပြကိုဟ်အနာဂတာဝၚ် အ္စာဗၟာတံမချူခၞံဗဒှ်လဝ်ဂှ်ကီု ဒၞါဲမဒှ်ရုဲစှ် ချူကံက်နုက်ကေတ်လဝ်ရောၚ်)

  • ဗီုအဓါန်မသုန်ကတဵုဒှ်

အဲကျာ်သ္ပပရိနိဗ္ဗာန်တုဲဟေၚ် လံညိ အဓါန်မသုန်မကတဵုဒှ်ရ ( ကၠေံဗ္ဒန်မသုန်သာ်လေဝ်ဂး )

  • ညးမ္ဂးအဓါန်မသုန်ဂှ်ရော

(၁) အဓိဂမအန္တရအဓါန် မဂ်ဖဵု ကၠေံဗ္ဒန်အာဂှ်မွဲ

(၂) ပဋိပတ္တိအန္တရအဓါန် ပဋိပတ်ဒ္ဂေတ်လ္ၚတ် ကၠေံဗ္ဒန်အာဂှ်မွဲ

(၃) ပရိယတ္တိအန္တရအဓါန် ပရိယတ္တိပိဋကတ်ပိ ကၠေံဗ္ဒန်အာဂှ်မွဲ

(၄) လိင်္ဂအန္တရအဓါန် အယောၚ်အလာသဏ္ဌာန်ခမဳသၚ်တံ ကၠေံဗ္ဒန်အာဂှ်မွဲ

(၅) ဓါတုအန္တရအဓါန် အိုတ်ဓါတ်ကျာ်အိုဿီု မကၠေံဗ္ဒန်အာဂှ်မွဲ

ဣဝွံ ကၠေံဗ္ဒန် အဓါန်မသုန်ရ

(၁) အဓိဂါမအန္တရအဓါန်

တၠအရှန်မဍိုက်ပေၚ်တဴ ကေုာံ ပဋိသမ္ဘိဒါပန်ကၠေံဗ္ဒန် ယွံသာရိပိုတ် အဲကျာ်သ္ပပရိနိဗ္ဗာန်တုဲ ကလိလောန်အာလ္ၚီသၞာံမ္ဂး ခမဳ ကေုာံ ကွးအဲကျာ်တံညးဂမၠိုၚ် ၜိုန်ဇၞော်ပၟဝ်ကမ္မဌာန်လေဝ် ဒဒှ်တၠအရှန်မဍိုက်ပေၚ်တဴ ကေုာံ ပဋိသမ္ဘိဒါပန်ဂှ် ဟွံကလိဂွံရောၚ် ( မဂ်ဖဵုကၠေံဗ္ဒန် ) ပ္ဍဲကာလကြဴနူဂှ် သောတာပတ္တိဖဵု သကဒါဂါမိဖဵု အနဂါမိဖဵုဟေၚ် ကလိဂွံမာန်ရောၚ် အဓိဂါမအန္တရအဓါန် တုဲရ။


(၂) ပဋိပတ္တိအန္တရအဓါန်

အဓိဂါမအန္တရအဓါန်ဂှ်လောန်အာတုဲ ကြဴနူဂှ် ပဋိပတ္တိအန္တရအဓါန် ကတဵုဒှ်ပၠန်ရ ခါကာလအာစိုပ် ပဋိပတ္တိအန္တရအဓါန်ဂှ် ပသာ်မဒှ်ကဵုသတ္တံပၠန်တုန်ရော ခမဳကောန်အဲကျာ်တံညးဂမၠိုၚ် မဒှ်ခမဳ ကာလဂှ် ဓရ်မဂ် ဓရ်ဖဵုဂှ် ဟွံကလိဂွံရ ဆမဒ္ဂေတ်လ္ၚတ်ပဋိပတ်အဲဟေၚ် သွိုန်ဗပိုန်တဴရ ဒါယကာဥပးဇန်တြုံဗြဴတံညးဂမၠိုၚ် မဂွံကဵုဒါန်ကုခမဳတံဂှ် ဖဵုဒါန်ဂှ် ဟွံတီကဵုဗၞတ်တွဵုဟေၚ် ကလိဂွံရ ကာလခမဳတံ မမၚ်မွဲဒ္ဂေတ်လ္ၚတ်ပဋိပတ်ဂှ် သိက္ခာပိုတ်ဂမၠိုၚ်အိုဿီုဂှ် မၚ်မွဲဟွံမာန် ဆပရာတ်ပန်မဒှ်လအိတ် အိုတ်ဂှ်ဟေၚ် ကြက်မၚ်မွဲတဴအိုတ်ရ ကာလခမဳတံ မမၚ်မွဲ ပါရာဇိကပန်ဂှ်လေဝ် တန်တဴလုကဴလၞီသၞာံရ ပ္ဍဲကာလဂှ် ခမဳမွဲ မဒှ်လအိတ်အာစိုပ်လၞီ သဳလမလီုလာ် မအာစိုပ်ဂစိုတ် လဟုတ်လမျီုအိုတ်ရ ကာလဂှ် မဒှ်ပဋိပတ္တိအန္တရအဓါန်ရ ပဋိပတ္တိအန္တရအဓါန် တုဲရ။


(၃) ပရိယတ္တိအန္တရအဓါန်

ပဋိပတ္တိအန္တရအဓါန်ဂှ် အိုတ်အာတုဲ ပရိယတ္တိအန္တရအဓါန် ကတဵုဒှ်ပၠန်ရ ပရိယတ္တိကၠေံဗ္ဒန်မ္ဂးဂှ်တုန် လဟုတ်ယုတ်စှ်ေအာသိုက်က် လံညိပၠန်တုဲ ဂကူသၟိၚ်မယုတ်မာ ဟွံမၚ်မွဲဓရ်စှ် ကြက်ကတဵုဒှ်ရ သၟိၚ်ဟွံမၚ်မွဲဓရ်မ္ဂး အမာတ်သ္ကိုပ်ပၞာန်ဇၞော်ဂမၠိုၚ်လေဝ် ဟွံမၚ်မွဲဓရ်ကီုရ အမာတ်ပၞာန်ဇၞော်ဟွံမၚ်မွဲဓရ်မ္ဂး ညးဍုၚ်ရးဇၞးပိုတ်နဂီုဂမၠိုၚ်လေဝ် ဟွံမၚ်မွဲဓရ်ကီုရ ပ္ဍဲကာလဂှ် ဗြဲဂူဟွံဒးရးသာ်ဂှ်မ္ဂး သြောံၜဲဟွံခိုဟ်ရ သြောံၜဲဟွံခိုဟ်မ္ဂး ဒါယကာဂမၠိုၚ် တၞဟ်နကဵုဒါန်ပစ္စယ် ဟွံသၟဟ်ရထရ ဒါယကာတံ ကဵုဒါန်ပစ္စယ် ဟွံသၟဟ်ရထရသာ်ဂှ်မ္ဂး ခမဳတံ ဟွံကလိဂွံပစ္စယ်ဒါန်ရ ခမဳတံ ဟွံကလိဂွံပစ္စယ်ဒါန်သာ်ဂှ်မ္ဂး ပွမယိုက်ဒိုက်ထံက်ပၚ်သၚ်ရိုဟ် ကုကောန်ကွးဂမၠိုၚ်ဂှ် ဟွံသ္ပအိုတ်ရ ကြဴနူဂှ် လံညိပၠန်တုဲ ပရိယတ္တိမတွံဂး ပိဋကတ်ပိ လဟုတ်ယုတ်စှ်ေအာရ။


(ပၞောဝ်ပိဋကတ်ပိဂှ် ပြကိုဟ်ပဌာန်မွဲ ဗွဲကိုပ်ကၠာ ကြက်ကၠေံဗ္ဒန်အာရ ကြဴနူဂှ် ပြကိုဟ်ယမိက်ကၠေံဗ္ဒန်အာရ ကြဴနူဂှ် ကထာဝတ္ထု ၊ကြဴနူဂှ် ပုဂ္ဂလပညပ် ၊ကြဴနူဂှ် ဓါတုကထာ ၊ကြဴနူဂှ် ပြကိုဟ်ဝိဘၚ် ၊ကြဴနူဂှ် ပြကိုဟ်ဓမ္မသင်္ဂဏဳ ကြက်ကၠေံဗ္ဒန်အာရ ဆဓရ်သုတ်ဝိနဲခမဳတံ မၚ်မွဲတဴအိုတ်ရ လံညိပၠန် ဝိနဲလေဝ် ခမဳတံ ဟွံမၚ်မွဲပၠန်ရ လံညိပၠန်တုဲ ဆဓရ်သုတ်ညိကီု ခမဳတံ မၚ်မွဲတဴအိုတ်ရ သုတ်ဂှ်ဗ္ဒန်အာပၠန်တုဲ သဳစှ်မၚ်မွဲတဴရ ၊ လံညိ ဆသဳဒ္စါံ ၊လံညိ သဳမသုန် ၊ လံညိ ဆသရဏဂမနပိ မၚ်မွဲတဴအိုတ်ရ ၊လံညိ ဆသရဏဂမနပိဂှ် ဗ္ဒန်အာပၠန်တုဲ ဆနမောဗုဒ္ဓါယျညိကီု ညးမွဲမဟီုတွံဓရ်ဟၟဲရ ဓရ်အဲကျာ်ကၠေံဗ္ဒန်အာတုဲ သၟးညံၚ်ရဴသၟိၚ်ဂိတု သၟိၚ်တ္ၚဲ မပၠိုတ်စှ်ေအာ ဗွဲဒိုဟ်ပလိုတ်တေံကီု ပိဋကတ်ပိ ပရိယတ္တိ ကၠေံဗ္ဒန်အာအိုတ်ရ ပ္ဍဲကာလဂှ် မဒှ်ပရိယတ္တိအန္တရအဓါန်ရ ဂလာန်ဝွံ ကၠုၚ်နူသၠပတ်အဓါန်မသုန် အ္စာမန်တံ မချူခၞံလဝ် နူတမၠာတေံရောၚ်)

  • မွဲနဲ ဗီုပရိယတ္တိကၠေံဗ္ဒန်ကၠုၚ် ပ္ဍဲလိခ်ဗၟာ

ပရိယတ္တိလဟုတ်ယုတ်စှ်ေအာတုဲ ပြကိုဟ်ပဌာန်ဇၞော်မွဲ ဗွဲကိုပ်ကၠာ ကၠေံဗ္ဒန်အာရ ကြဴနူဂှ် ပြကိုဟ်ယမိက်ကၠေံဗ္ဒန်အာရ ကြဴနူဂှ် ပိဋကတ်ပိ ကြက်ကၠေံဗ္ဒန်အာရ ကြဴနူဂှ် အင်္ဂုတ္တရနိကာယ် ၊ကြဴနူဂှ် ကထာဝတ္ထု ကြဴနူဂှ် ပုဂ္ဂလပညပ် ၊ကြဴနူဂှ် ပြကိုဟ်ဝိဘၚ် ၊ကြဴနူဂှ် မဇ္ဇျိမနိကာယ် ၊ခုဒ္ဒကနိကာယ် ၊ဒဳဃနိကာယ် ၊ကြက်ကၠေံဗ္ဒန်အာရ ကြဴနူဂှ် ဇာတ်ဝေဿန္တဝ် ကၠေံဗ္ဒန်အာရ ကြဴနူဂှ် အပဏ္ဏကဇာတ်ဂမၠိုၚ် ကြက်ကၠေံဗ္ဒန်အာအိုတ်ရ ဂါထာပန်ပိုဒ် မၞုံတဴဏီရ ကာလကြဴနူဂှ်ပၠန်တုန် သၟိၚ်မွဲမၞုံကဵုဓရ်သဒ္ဓါ လျုၚ်ဇြုၚ်သ္ဍိုက်တုဲ သန်လ္ၚီကသာပ် ပတိုန်လ္တူကွိုတ်စိၚ်တုဲ ဓရ်တဝှ်တဳလမၞုံကုပိုန်ကျာ်တြဲ ပန်ပိုဒ်ပန်ဂါထာ ညးမဟီုတွံမာန်ဂှ် ဆဵုဟေၚ် သန်လ္ၚီကသာပ်ဝွံ ကဵုဂိုၚ်ကေတ်ညိ ရဴသာ်ဝွံ ကဵုလန်ဂေတ်ဂၠါဲ အာမုဟ်ဍုၚ်ပန်ဒိုဟ်ရ ၜိုန်ကဵုလန်ဂေတ်ဂၠါဲ အာသာ်ဂှ်ကီုလေဝ် ညးမဟီုတွံဓရ်မာန်ဂှ် ဟွံကလိဂွံရ ဒြပ်ဂှ် ဒးက္လေၚ်ပၠောပ်ကၠေံဒၞါဲဍေံပၠန်ရ ပ္ဍဲကာလဂှ် ပရိယတ္တိ ကၠေံဗ္ဒန်မ္ဂးယၟုရ ပရိယတ္တိအန္တရအဓါန် တုဲဆဝွံရ။


(၄) လိင်္ဂအန္တရအဓါန်

ပရိယတ္တိအန္တရအဓါန်ဂှ် အိုတ်အာတုဲ လိင်္ဂအန္တရအဓါန် ကတဵုဒှ်ပၠန်ရ ပသာ်ရော ပ္ဍဲကာလကြဴနူ ပရိယတ္တိအန္တရအဓါန်ဂှ် ခမဳတံညးဂမၠိုၚ် နသ္ၚာမဖျောန်လဝ် ဍာ်လွံက်ဗစိုတ်ဗ္စးဂှ် မုဖဵုမၞုံရော ရဴဝွံ ပၠောပ်စိုတ်တုဲ ဇိၚ်ကေတ်ယာတ်မွဲဍ မွဲမိဟ်တုဲ ပ္ဍဲသော်က္ဍိုပ်ကီု ပ္ဍဲကံကီု ပ္ဍဲကံတဲကီု ကဵုဒက်ပစပ်စုတ်တုဲ မြိမြန်တဴကောန်သမ္ဘာအိုတ်ရ ကာလကြဴနူဂှ် ညးမသ္ပပွမြိမြန်ကာန်သမ္ဘာ ပွမကူဗၞိက်ဇိက်ရာန်တံဂှ် သ္ပတုဲ မၞုံကဵုသ္ၚာမဒက်လဝ် ပ္ဍဲကံတဲဂှ် သ္ပတုဲ ဒါယကာမကဵုဒါန်ဂမၠိုၚ် ရန်တၟံကဵုသ္ၚာတဳလမၞုံကုပိုန်ကျာ်တြဲတုဲ ကဵုဒါန်ကဵုညးတံဂှ်ရ ဖဵုကုသဵုညးမဂွံကဵုဒါန်တံဂှ် ကလိဂွံဖဵုရိုဟ်လၟိဟ်ဂၞန်ဟွံမာန်ရ ယွံကောန်သ္ဍိုက်သာရိပိုတ် အဲကျာ်တွံရ ကာလကြဴနူဂှ်ပၠန် နကဵုသ္ၚာဝွံ မုဖဵုမၞုံရောသ္ဂးသာ်ဂှ်တုဲ ဗိုတ်ကၠဟ်သၠးထောံကၠေံ ပ္ဍဲလ္တူခြုံဂြိုပ်အိုတ်ရ ယွံသာရိပိုတ် ဣဝွံဟေၚ် သဏ္ဌာန်ခမဳသၚ်တံ ကၠေံဗ္ဒန်မ္ဂးယၟုရ လိင်္ဂအန္တရအဓါန် တုဲရ။


(၅) ဓါတုအန္တရအဓါန်

သာသနာအဲကျာ် ပေၚ်မသုန်လ္ၚီသၞာံသာ်ဂှ်တုဲ ဟွံကလိဂွံပူဇဴသက္ကာရတုဲ ကြက်ပြာပ်အာဌာန် မကလိဂွံပူဇဴသက္ကရရ ဓါတ်အဲကျာ်ဂှ် ပ္ဍဲဍုၚ်မၞိဟ် ဍုၚ်သွဝ် ဍုၚ်နာ် မၞုံတဴရ အိုတ်ကဵုဓါတ်ကျာ်မၞုံဒၟံၚ် ပ္ဍဲဌာန်တံဂှ်တံဂှ် က္ညပြံၚ်အာတုဲ ပ္ဍဲပလိုဟ်မဟာဗောဓိဇြဲထဝ်ဂှ်ဟေၚ် အာကောံဓရီုဗွဝ်ဖအုံဒၟံၚ်တုဲ နိမိတ်ဗဒှ်အယောၚ်အလာ သဏ္ဌာန်ရုပ်အဲကျာ်တုဲ ပၠယမက ပါဋိဟာရ ပ္ဍဲကာလဂှ် မၞိဟ်ပက္ကတိ ညးမမိက်ကဵုမွဲမွဲ အာစိုပ်ဟွံမာန်ရ ဒေဝတဴဗြီု စှ်လ္ၚီစက္ကဝါဂမၠိုၚ် ပြာပ်ကၠုၚ်ကောံမွဲဟာန် ပ္ဍဲဌာန်ဂှ်တုဲ ပ္ဍဲတ္ၚဲဝွံ ဓါတ်ကျာ်နာဲညးတၠလျးတြဴ က္ညစဴနိဗ္ဗာန်ရ ပ္ဍဲတ္ၚဲဝွံ သာသနာကျာ်ဒးဟုတ်ဗ္ဒန်အာရ ပတွဵုနူတ္ၚဲဝွံတုဲ လိုက်ဝွံ ဒှ်တဴဒမၠုဇၞော်ရ သာ်ဝွံဂးတုဲ လောန်နူကျာ်တြဲသ္ပပရိနိဗ္ဗာန် ပ္ဍဲဍုၚ်ခုဿနာရာံဟွံက ဒေဝတဴတံ ကတဵုဒှ်ဓရ်ကရုဏာဗွဲမလောန် ပါဲကၠေံဒေဝတဴ အနာဂါံကဵုတၠအရှန်တုဲ အိုတ်ကဵုဒေဝတဴဂမၠိုၚ်တံဂှ် တၞဟ်နတန်တဴ သဘဴပက္ကတိဇကုဟွံသၟဟ်ရထ ၊မ္ဒးဂတေဝ်ယာံ ဇွောဝ်တဴဍာ်ရမတ်ရ ပ္ဍဲကာလဂှ် ဗုဒ္ဓနိမိတ် ဗလးလျးတြဴသာ်တုဲ ဟီုတွံဓရ်ရ ဂကောံဒေဝတဴဗြီုဂမၠိုၚ်တုန် ဂွံမိၚ်ဓရ်ကျာ်တုဲ ဗၞတ်မွဲဠက်ကိုဋ် ဂွံသုၚ်ရှ်ဓရ်အမြိုတ် တိတ်ဗၠးနူဒဒိုက်ဝတ်ရ ပူဇဴသကာဇၞော်ကဵုဇြဟတ် ဒေဝတဴတံ သ္ပပူဇဴရ ပ္ဍဲကာလဂှ် နူကဵုသရိရဓါတ်ဂှ် ပၟတ်တေဇောဓါတ်ကတဵုဒှ်တုဲ စံၚ်ကၠေံဓါတ်ကျာ်ရ ယြဴဗၞတ်မွဲ ဓါတ်တၟာမရာဲကီု နွံတဴဏီရ ဗၞတ်ဂှ်ဂၠောၚ်ပၟတ်နွံတဴ ဟဂွံပၠိုတ်ရ ဒဵုကဵုသရိရဓါတ်တံဂှ် အိုတ်သ္အးအာဗွဲမသက္ကုသၟိဟ်တုဲ ဂၠောၚ်ပၟတ်ဂှ်လေဝ် ပၠိုတ်အာရ ပတွဵုနူဂှ်တုဲ သာသနာကျာ်ဟၟဲရ လိုက်ဝွံ ဒှ်တဴဒမၠုဇၞော်ရ ဣဝွံမ္ဂး ဓါတုအန္တရအဓါန်ရ ၊ဓါတုအန္တရအဓါန် တုဲရ။

(၁၀)ခေတ်ကာလအာယုက်မၞိဟ်စှ်သၞာံ[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကာလဂှ် သာသနာအဲကျာ်အိုတ်အာတုဲ လိုက်ဝွံ ဒှ်တဴဒမၠုဇၞော်ကဵုဇြဟတ်တုဲ သတ္တံဂမၠိုၚ် ပတုဲတဴပွသရာံပါပ်အိုတ်ရ အယုက်မၞိဟ်ဂမၠိုၚ် လဟုတ်ယုတ်စှ်ေကၠုၚ်ရ အယုက်မၞိဟ်လဟုတ်စှ်ေဂှ် ကၠံသၞာံ ဒ္စိတ်စှော်သၞာံ ဒ္စါံစှော်သၞာံ ထပှ်စှော်သၞာံ တြဴစှော်သၞာံ ဗွဲအတိုၚ်လၟေၚ် လဟုတ်ယုတ်စှ်ေကၠုၚ်တုဲ စဵုကဵုစိုပ်အယုက်စှ်သၞာံရ။


(သွက်ပိုဲညးဂမၠိုၚ် ဂွံဂိုၚ်သမ္တီ ပ္ဍဲခေတ်ကာလအယုက်မၞိဟ်စှ်သၞာံ ဗီုကတဵုဒှ်ဒၟံၚ် ပ္ဍဲလောကဏံဂှ် အတိုၚ်မကၠုၚ်ပ္ဍဲသုတ် ပါထေယျပါဠိကျာ်တြဲတွံလဝ်ဂှ် အဲချူတြးကဵုညိပၠန်ရ)

ဘဝိဿံတိဘိက္ခဝေသောမယော ၊ယံဣမေသံမနုဿနံ ၊ဒသဝဿာယုကာ ပုတ္တာ ၊ဘဝိဿန္တိ ။ဒသဝဿာယုကေသု ၊ဘိက္ခဝေ မနုဿေသု ပဉ္စဝဿိ ကာကုမာရိကာအလံပတေယျာ ဘဝိဿန္တိ ။သုတ်ပါထေယျ ။


ဘိက္ခဝေ၊ ယွံခမဳဂမၠိုၚ် ။ ဣမေသံမနုဿာနံ၊ ဒဒက်တဴကဵုမၞိဟ်ဒေဝတဴဂမၠိုၚ် ။ ဒသဝဿာယုကာ၊ ဍေံမၞုံအယုက်စှ်သၞာံအိုတ် ။ ပုတ္တာ၊ ၚ်ကောန်ဂမၠိုၚ် ။ ယံယသ္မိံကာလေ၊ ယြဴပ္ဍဲကာလမွဲ ။ ဘဝဿန္တိ၊ ကြက်ဒှ်အိုတ်ရ ။ ဘိက္ခဝေ၊ ယွံခမဳဂမၠိုၚ် ။ ဒသဝဿာယုကေသု၊ ဍေံမၞုံဗၞတ်အယုက်စှ်သၞာံအိုတ်။ မနုဿေသု၊ ပၞောဝ်ကဵုမၞိဟ်ဂမၠိုၚ် (ပ္ဍဲလေဝ်ဂွံ ) မွဲနဲတုန် မနုဿေသု၊ ၚ်မၞိဟ်ဂမၠိုၚ် ဒသဝဿာယုကေသု၊ နကြဳဂွံမံၚ်အယုက်စှ်သၞာံတုဲနေဝ် ။ ပဉ္စဝဿိကာ၊ ဍေံမၞုံအယုက်မသုန်သၞာံ ၊ ကုမာရိကာ၊ ၚ်သၟတ်ဗြဴဂမၠိုၚ် ။ အလံပတေယျာ၊ ၚ်မထေက်တၞဟ်နကဵုစတြုံတၠသ္ၚိ ။ ဘဝိဿန္တိ၊ ကြက်ဒှ်အိုတ်ရ ။ သောသမယော၊ ၚ်ကာလဂှ် ။ ဘဝိဿန္တိ၊ ကြက်ဒှ်အိုတ်ရ။


ယွံခမဳဂမၠိုၚ် ကောန်မၞိဟ်ခေတ်အယုက်စှ်သၞာံဂမၠိုၚ်ဂှ် ယြဴကာလမွဲ ကြက်ကတဵုဒှ်ရ မၞိဟ်မကတဵုဒှ်ခေတ်အယုက်စှ်သၞာံဂှ် သၟတ်ဗြဴအယုက်မသုန်သၞာံ ထေက်ကဵုသ္ပမ္ၚဵုသၞက်ကရောဲ ထပ်တဲကဵုစတြုံတၠသ္ၚိရ ကာလသာမယျဂှ် ဒှ်ခေတ်ကာလအယုက်မၞိဟ်စှ်သၞာံရ မွဲလှ်ေပၠန် အယုက်တြဴသၞာံ ထပှ်သၞာံ ကတဵုဗဒှ်ကောန်စဴစေက်အိုတ်ရ မၞိဟ်ဂမၠိုၚ် ကာလဂွံမံၚ်ခေတ်အယုက်စှ်သၞာံဂှ် ရှ်သာမပြဲပြဲ တြဴသာ်တံဂှ် ကြက်ကၠေံဗ္ဒန်အာရ ညးမ္ဂးရှ်မပြဲတြဴသာ်ဂှ်ရော သပ္ပိ ၊ကၠေၚ်သွဟ် ။နဝနဳတံ ၊ကၠေၚ်တၟိ ၊တေလံ ၊ ကၠေၚ် ။ မဓု ၊ ဍာ်သာဲ ။ပါဏိတံ ၊တၚ်လာဲ ။ လောဏံ ၊ ၜဵု ။ ဣဝွံ ရှ်တြဴသာ်ရ ရှ်တြဴသာ်အိုဿီုဝွံ ကၠေံဗ္ဒန်အိုတ်ရ


ယွံခမဳတံ ပ္ဍဲမၞိဟ်အယုက်စှ်သၞာံဂမၠိုၚ်တံဂှ် ပၞောဝ်စၞဘောဇိုန်ဂမၠိုၚ် ပုၚ်သွစၞၜဵုဂှ် ဒှ်ဘောဇိုန်မပြဲရ ယွံခမဳတံ မၞိဟ်ကာလမအာစိုပ်ခေတ်အယုက်စှ်သၞာံဂှ် ဓရ်ကုသလကမ္မပထစှ် ဗွဲပကရအိုဿီု ကြက်ကၠေံဗ္ဒန်အာအိုတ်ရ ဓရ်ကုသလကမ္မပထစှ် ပြာကတ်တဴဗွဲမလောန်ရ မၞိဟ်အယုက်စှ်သၞာံတံဂှ် အယာံမာတ်ယၟုမ္ဂး စရၚ်ဓရ်ကုသဵုကီုလေဝ် ဟွံတီအိုတ်ရ ပွမပတုဲစရၚ်ဓရ်ကုသဵုဂှ် မုသက်ဂးနွံရော ဟွံပတုဲကုသဵုသက်က်ရ


  • ပ္ဍဲကာလဂှ် ဗီုလဵုသတ္တံ ကတဵုဒှ်အာပၠန်ရော

ယွံခမဳတံ ပၞောဝ်ကဵုမၞိဟ်ဂွံမံၚ် အယုက်စှ်သၞာံဂမၠိုၚ်တံဂှ် ယြဴမၞိဟ်ဂမၠိုၚ်မွဲ ဟွံဒ္ဂေတ်လ္ၚတ်ဗွဲမ္ဒးရး ပ္ဍဲမိမခမဳဗမၞးဂမၠိုၚ်ရ ဟွံသ္ပရှ်ေသှ်ေရဴဂဴညးဇၞော် ပ္ဍဲဂကူတံဂှ်ရ မၞိဟ်ဒ္ဂေတ်ဟွံဒးရး ပ္ဍဲမိမခမဳဗမၞး ဟွံရှ်ေသှ်ေရဴဂဴညးဇၞော်တံဂှ် ထေက်သ္ပပူဇဴရ ထေက်ကဵုဟီုထိုၚ်သးရ။


  • (ဗီုခေတ်အယုက်မၞိဟ်စှ်သၞာံ ယုတ်မာ)

ဒသဝဿာယုကေသု ဘိက္ခဝေ မနုဿေသု နဘဝိဿတိ မာတာတိဝါ မာတုစ္ဆာတိဝါ မာတုလာနဳတိဝါ အာစရိယဘရိယာဝါ ဂရူနံဒါရောတိဝါ သံဘေဒံလော ကောဘဝိဿတိ ယထာအဇာဠကာ ကုက္ကုဋာ သူကရာ သောဏာသိင်္ဂလာ ။ သုတ်ပါထေယျ

အရထ ။ ။ ဘိက္ခဝေ ယွံခမဳဂမၠိုၚ် မနုဿေသု ၚ်မၞိဟ်ဂမၠိုၚ် ဒသဝဿာယုကေသု နကြဳဂွံမံၚ်အယုက်စှ်သၞာံတုဲနေဝ် မာတာတိဝါ ၚ်အယာံမာတ်မစၟတ်သမ္တီဂးမိကီု နဘဝိဿတိ ကြက်ဟွံဒှ်ရ မာတုစ္ဆာတိဝါ ၚ်အယာံမာတ် မစၟတ်သမ္တီဂး သဳဒေံမိကီု နဘဝိဿတိ ကြက်ဟွံဒှ်ရ မာတုလာနဳတိဝါ ၚ်အယာံမာတ် မစၟတ်သမ္တီဂး သမ္ဘာအမူကီု အာစရိယဘရိယာဝါ ၚ်အယာံမာတ် သမ္တီဂး သမ္ဘာအ္စာမပကတ်ကဵုကွတ်ပညာကီု ဂရူနံ ဒဒက်တဴကဵုညးမပ္တံ အမူအနာဲကီု ဒါရာတိဝါ ၚ်အယာံမာတ် မစၟတ်သမ္တီဂး သမ္ဘာကီု နဘဝိဿတိ ကြက်ဟွံဒှ်ရ။ လောကော ၚ်ဂကောံသတ္တံ သမ္ဘေဒံ န်ပွမနှဴရဴတ္ၜန်တ္ၜောဲတဴ ။ ဘဝိဿတိ အာပဇ္ဇိဿတိ ကြက်အာစိုပ်ရ ယထာကိံ ၊မုရဴသတ်သာ်လဵုမဒှ်ရော ။ အဇေဠကာစ၊ ၚ်ဗ္ၜေံသဵုဂမၠိုၚ်ကီု ကုက္ကုဋာ၊ၚ်စာၚ်ဂမၠိုၚ်ကီု ။ သူကရာစ၊ ၚ်ကၠိက်ဂမၠိုၚ်ကီု ။ သောဏောစ၊ ၚ်ကၠဵုကွာန်ဂမၠိုၚ်ကီု။ သိင်္ဂလာစ၊ ၚ်ကၠဵုဂြိုပ်ဂမၠိုၚ်ကီု။ သမ္ဘေဒံ ၊န်ပွမနှဴရဴတ္ၜန်တ္ၜောဲတဴ။ အာပဇ္ဇန္တိယထာ၊ ညံၚ်ရဴမအာစိုပ်ကီုရောၚ်။


အဓိပါယ် ။ ။ ယွံခမဳဂမၠိုၚ် မၞိဟ်မဂွံမံၚ်ခေတ်အယုက်စှ်သၞာံဂှ် မိဇကု အယာံမာတ်မစၟတ်သမ္တီဂးကီုလေဝ် ဟွံဒှ်ရ သဳဒေံမိဇကုဂှ်လေဝ် ဟွံစၟတ်သမ္တီသဳဒေံမိရ သမ္ဘာအမူဇကုဂှ်လေဝ် ဟွံစၟတ်သမ္တီသမ္ဘာအမူရ သမ္ဘာအ္စာ မပကတ်ကဵုကွတ်ပညာဂှ်လေဝ် ဟွံစၟတ်သမ္တီသမ္ဘာအ္စာရ သမ္ဘာညးမပ္တံ အမူအနာဲဇကုတံဂှ်လေဝ် ဟွံစၟတ်သမ္တီသမ္ဘာအမူအနာဲရ ဂကောံသတ္တံဂမၠိုၚ် အာစိုပ်နှဴရဴတ္ၜန်တ္ၜောဲတဴအိုတ်ရ ဥပမာညံၚ်ရဴသတ်သာ်လဵု မတုပ်ပၠန်တုန်ရော ညံၚ်ရဴအဟိုတ် သတ်တိရစ္ဆာန် ဗ္ၜေံ သဵု ကၠဵု ကၠိက် စာၚ်ဂမၠိုၚ် အာစိုပ်ဏှဴရဴတ္ၜန်တ္ၜောဲတဴကီုရောၚ် ဂကောံသတ္တံဂမၠိုၚ် ဏှဴရဴတ္ၜန်တ္ၜောဲတဴ ကေုာံ ရၚ်သ္ကံအိုတ်ရ။

ယွံခမဳဂမၠိုၚ် မၞိဟ်ခေတ်ကာလ မဂွံမံၚ်အယုက်စှ်သၞာံဂမၠိုၚ် သတ္တံဂမၠိုၚ်ဂှ် ပ္ဍဲညးမွဲကေုာံညးမွဲ ပၞောတ်ဒေါသဗွဲသကာတ်မြဟ် ကတဵုဒှ်ပြာကတ်ရ ပွမဒက်ဝဲသၞသတြု ဗွဲမသကာတ်မြဟ် ပွမမှာဒုဟ်နကဵုဂၠံစိုတ် ဗွဲမသကာတ်မြဟ် ပွမမၞုံကဵုစိုတ် မမိက်ဂွံပြိုက်ဂစိုတ် ဗွဲမသကာတ်မြဟ် ကတဵုဒှ်ပြာကတ်ရ ပ္ဍဲအဃာတ ဗွဲမသ္ကေတ်သကာသ္ကာတ်မြဟ် ကတဵုဒှ်ပြာကတ်ဂှ် မုရဴပ္ဍဲညးမွဲမကတဵုဒှ်ရော ယဝ်ရသၟာန်မ္ဂး ပ္ဍဲကောန်ကဵုမိ ပ္ဍဲမိကဵုကောန် ပ္ဍဲကောန်ကဵုအပါ ပ္ဍဲအပါကဵုကောန် ပ္ဍဲဒေံဗြဴကဵုကော ပ္ဍဲကောကဵုဒေံဗြဴ ထေဲပၞောတ်ဒက်ဝဲပ္ဍဲဂၠံစိတ္တာ မှာဒုဟ်လောန် ဗၞတ်မၞုံကဵုစိုတ် သၟိက်ဂွံပြိုက်ဂစိုတ် ဗွဲမသကာတ်မြဟ်လောန်ဗၞတ်ဂှ် ကတဵုဒှ်ပြာကတ်ရ မုဥပမာမတုပ်ပၠန်တုန်ရော ယွံခမဳတံ လၟတံညာတ်သတ်ဇိုၚ်ပန် ၜိုၚ် ပှ် ဒြာဲ မၚ်တံဂှ်တုဲ ပၞောတ်ဒေါသဒက်ဝဲ ပသၞသတြု မှာဒုဟ်နကဵုဂၠံစိုတ် သၟိက်ဂွံပြိုက်ဂစိုတ် ဗွဲမသ္ကေက်သ္ကာသ္ကာတ်မြဟ် ညံၚ်ရဴမကတဵုဒှ်ပြာကတ်ကီု တုပ်တဴညံၚ်ရဴသာ်ဂှ်ကီုရ။


ယွံခမဳတံ မၞိဟ်ခေတ်ကာလ မဂွံမံၚ်အယုက်စှ်သၞာံတံဂှ် သတ္တံဂှ် ပ္ဍဲညးမွဲကေုာံညးမွဲ ပၞောတ်ဒေါသဒက်ဝဲမှာဒုဟ်ပ္ဍဲဂၠံစိုတ် သၟိက်ဂွံပြိုက်ဂစိုတ် ဗွဲမသ္ကာတ်မြဟ် ကတဵုဒှ်ပြာကတ်ရ ပ္ဍဲကောန်ကဵုမိ ပ္ဍဲမိကဵုကောန် ပ္ဍဲကောန်ကဵုအပါ ပ္ဍဲအပါကဵုကောန် ပ္ဍဲဒေံဗြဴကဵုကော ပ္ဍဲကောကဵုဒေံဗြဴ ထေဲပၞောတ်ဒက်ဝဲ မှာဒုဟ်ပ္ဍဲဂၠံစိုတ် သၟိက်ဂွံပြိုက်ဂစိုတ် ဗွဲမသ္ကာတ်မြဟ် ကတဵုဒှ်ပြာကတ်ရ။

(၁၁)ကောန်ဒေဝတဴဝိသုကမ္မ စှ်ေဟီုဒလောံဗ္တောန်[ပလေဝ်ဒါန် | ပလေဝ်ဒါန် တမ်ကၞက်]

  • ပ္ဍဲကာလဂှ် ကပ်ပိသာ် ကတဵုဒှ်ရ

(၁) ဒုဗ္ဘိက္ခန္တရကပ္ပ အန္တရာဲကပ် ပွမကၠောဝ်ဗျဵု

(၂) ရောဂန္တရကပ္ပ အန္တရာဲကပ် ပွမကတဵုဒှ်ယဲ

(၃) သတ္တန္တရကပ္ပ အန္တရာဲကပ် လွဟ်လက်နက်

ရဴဝွံ အန္တရာဲကပ် ပိသာ်ကတဵုဒှ်ရ

(၁) ပွမ္ဒးပကာဂစိုတ် နကဵုအန္တရာဲကပ် ပွမကၠောဝ်ဗျဵုဂှ် ဗွဲမဂၠိုၚ်ကတဵုဒှ် ပ္ဍဲဘုံပြိုတ်အိုတ်ရ

(၂) ညးမ္ဒးပကာဂစိုတ် နကဵုအန္တရာဲကပ်ယဲဂှ် ဗွဲမဂၠိုၚ်ကတဵုဒှ် ပ္ဍဲဍုၚ်သွဝ်အိုတ်ရ

(၃) ညးမ္ဒးပကာဂစိုတ် နကဵုအန္တရာဲကပ်လွဟ်လက်နက်ဂှ် ဗွဲမဂၠိုၚ်ကတဵုဒှ် ပ္ဍဲဍုၚ်နရက်အိုတ်ရ


ဂလာန်ဝွံ ပ္ဍဲသုတ်ပါထေယျပါဠိ အဌကထာရောၚ် ယွံသာရိပိုတ် ပ္ဍဲကာလဂှ် မၞိဟ်ဂမၠိုၚ် ဝိဝိၚ်ဟိုတ်မာဲတဴဗွဲမလောန်ရ ကောန်ဒေဝတဴဝိသုကုမ္မာ ကြက်စှ်ေဟီုဒၠေါံဗ္တောန်ရ ပသာ်ဒေဝတဴဝိကုမ္မာ မဟီုဒၠေါံဗ္တောန်ရော ယွံမၞိဟ်ဂမၠိုၚ် ပတွဵုနူတ္ၚဲဝွံတုဲ စဵုကဵုဗၞတ်ထပှ်တ္ၚဲ ဂတမၞိဟ်ဂမၠိုၚ် ညးမွဲကေုာံညးမွဲ နမစၟတ်သမ္တီလဝ် က္ၜိုၚ် ပှ် ဒြာဲ မၚ် ကေုာံ ရၚ်သ္ကံတုဲ ကြက်ဗာ်ထပက် ပြိုက်ဂစိုတ်တံ ကေုာံ ရၚ်သ္ကံအိုတ်ရ ရဴသာ်ဝွံ သီုကဵုဍာ်ရမတ်ဇွောဝ်ဓဇူ ဇိုတ်တဴဍာ်ရမတ်နကဵုယာတ်ဍောတ်တုဲ ဟီုဒၠေါံဗ္တောန်ရ။

ညးမၞုံပၟိက် သၟိက်ဂွံတိတ်ဗၠးနူဘဲဂစိုတ်တံဂှ် ဂိုၚ်ကေတ်စၞ သွက်စဗၞတ်ထပှ်တ္ၚဲတုဲ ဆညးမွဲဓဝ်ဟေၚ် ပ္ဍဲအကြာဒဵုဗၚ်ဇြဟ် ညးမွဲလေဝ်လ္ပကဵုဂွံဆဵု သြဝ်အာအောပ်ဗ္ဒဒၟံၚ်အိုတ်ညိ ပေၚ်ထပှ်တ္ၚဲတုဲဟေၚ် ဂေတ်က္လေၚ်ကၠုၚ်အိုတ်ညိ ရဴသာ်ဝွံ ကောန်ဒေဝတဴဝိသုကုမ္မာ စှ်ေဟီုဒၠေါံဗ္တောန်ရ။

(၁၂)ညးမၞုံကဵုပညာပါဲဘဲဂစိုတ်တုဲအောပ်ဗ္ဒ[ပလေဝ်ဒါန် | ပလေဝ်ဒါန် တမ်ကၞက်]

ညးလ္ၚဵုဂမၠိုၚ်တံဂှ်လေဝ် ဂလာန်မၚ်ဗၠာဲဏံ မဟီုတွံ ကြက်ဒှ်စၟတ်ဍာံပြရ ရဴသာ်ဝွံ ပၠောပ်စိုတ်တုဲ ညးမၞုံကဵုပညာဂမၠိုၚ်တံဂှ် ဂိုၚ်ကေတ်စၞ သွက်စဗၞတ်ထပှ်တ္ၚဲတုဲ အာအောပ်ဗ္ဒဒၟံၚ်အိုတ်ရ ပ္ဍဲကာလဂှ် သတ္တံဂမၠိုၚ်ဂှ် ညးမွဲကေုာံညးမွဲ စၟတ်သမ္တီဒြာဲမၚ်အိုတ်ရ ပ္ဍဲတဲညးတံဂှ် လွဟ်လက်နက်ဗွဲမသ္ကေတ်သ္ကာ ကတဵုဒှ်ပြာကတ်အိုတ်ရ ဗီုလွဟ်ကတဵုဒှ်ဂှ်တုန် ညးဂမၠိုၚ်တံဂှ် ဗွဲတွဵုမယုတ် ဂိုၚ်ကေတ်သၠဆုချောဲကၟတ် မမိက်ကဵုမွဲမွဲ အယာံမာတ်မထၟတ်ဒွံ နကဵုတဲဇကုတုဲ ကြက်ကတဵုဒှ်တိုန်လွဟ်လက်နက်ဟေၚ်ရ ။ ပဂွံတီရော

တဏှာနိ သတ္ထာနိဟတ္ထေသု ပါတုဘဝိဿန္တဳတိ တေသံကိရဟတ္ထေန ဖုဌမတ္တံယံကိဉ္စိ အန္တမသော တိဏပဏ္ဏံ ဥပါဒါယ အာဝုဓမေဝ ဘဝိဿတိ အဌကထာသုတ်ပါထေယျ ။

အရထ ။ ။ တဏှာနိ သတ္ထာနိဟတ္ထေသု ပါတုဘဝိဿန္တဳတိ၊ ၚ်ပိုတ်မ္ဂး ။ တဏှာနိ သတ္ထာနိဟတ္ထေသု ပါတုဘဝိဿန္တဳတိဂှ်တုန် တေသံသန္တာနံ၊ ဒဒက်တဴကဵုသတ္တံဂမၠိုၚ်ဂှ် ဟတ္ထေန၊ နကဵုတဲ ။ ဖုဌမတ္တံ၊ ဍေံအယာံမာတ်မထၟတ်ဒွံ။ ယံကိဉ္စိ၊ ဍေံမမိက်ကဵုမွဲမွဲ ။ အန္တမသော၊ ဗွဲတွဵုမယုတ် ။ တိဏပဏ္ဏံ၊ န်သၠဆုချောဲကၟတ် ။ ဥပါဒါယ၊ ဂိုၚ်ကေတ်တုဲ (ဝါ) သ္ပတဴတုဲ ။ အာဝုဓမေဝ၊ ၚ်လွဟ်လက်နက်ဟေၚ် ။ ဘဝိဿတိ၊ ကြက်ဒှ်ရ။

ညးဂမၠိုၚ်တံဂှ် နကဵုလွဟ်လက်နက် ဗွဲမသ္ကေတ်သ္ကာဂှ် ရပ်ဂိုၚ်ကေတ်တုဲ ဣဝွံတုန် သတ်ဇိုၚ်ပန်မတွံဂး က္ၜိုၚ်ဒြာဲရ ရဴသာ်ဝွံ မၞိဟ်ကဵုမၞိဟ်ဂှ် စၟတ်သမ္တီက္ၜိုၚ်ဒြာဲတုဲ ဗက်ဗာ်ဂစိုတ်တဴရေၚ်သ္ကံတုဲ ဖျုန်ဆီဇုတ်တံဂှ် ပေၚ်ဗြော်တဴပ္ဍဲဂၠးတိရ ပေၚ်ထပှ်တ္ၚဲတုဲ ကြဴနူဂှ် ဗြဲဇၞော်ဂူစှ်ေကၠုၚ်တုဲ ဖျုန်ဆီဇုတ်တံဂှ် ဟဳအာအိုတ်ရ ကြဴနူဂှ်ပၠန်တုန် ဗြဲဂၠိက်ယာတ်ဗ္ဂူဖျေံပၠန်ရ ညးမအောပ်ဗ္ဒမံၚ် ပ္ဍဲဌာန်တံဂှ်တံဂှ် ကလိလောန်အာထပှ်တ္ၚဲတုဲ ယောန်တိတ်ကၠုၚ် နူကဵုရာပ်ခြုံ ချောဲကၟတ် ခြုံဂြိုဟ် ခြုံတၞံဆုတုဲကီု တိတ်ကၠုၚ်နူသြၚ်ကြုၚ်မွဲလပါ် သ္ဇိုၚ်သ္ဂောံကၠောံအာ နူကဵုဂၠုၚ်မာန်တုဲကီု တိတ်ကၠုၚ်နူကဵုအကြာဒဵု အကြာစောဝ် အကြာလ္ဂေါဝ်ဗၚ်ဇြဟ်တံဂှ်တုဲ ညးမွဲကေုာံညးမွဲ ဆဵုညာတ်ရၚ်သ္ကံတုဲ ညးမွဲကေုာံညးမွဲ ဗန်ကံတုဲ ဂိုၚ်ကေတ်သဘဴမတုပ်သၟဟ်အိုတ်ရ ကဵုသ္ဂုတ်သွာတ်တဴ ကေုာံ ရၚ်သ္ကံအိုတ်ရ။

(၁၃)အပိုၚ်အခြာအာယုက်သတ္တံဇၞော်မောဝ်တိုန်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကာလဂှ် ညးမတိတ်ကၠုၚ် နူဌာန်မအောပ်ဗ္ဒတုဲ မဒၟံၚ်တဴတံဂှ် ပွမမၚ်မွဲဓရ်သဳလ ပွမ္ဒးရးဂှ်သ္ပတဴအိုတ်ရ ပ္ဍဲကာလဂှ် အယုက်သတ္တံ က္လေၚ်မောဝ်တိုန်ပၠန်ရ ကောန်ညးမဂွံမံၚ်အယုက်စှ်သၞာံဂှ် ဂွံမံၚ်အယုက်ၜါစှော်သၞာံရ ကောန်ညးမဂွံမံၚ်အယုက်ၜါစှော်သၞာံဂှ် ဂွံမံၚ်အယုက်ပန်စှော်သၞာံရ ကောန်ညးမဂွံမံၚ်အယုက်ပန်စှော်သၞာံဂှ် ဂွံမံၚ်အယုက်ဒ္စါံစှော်သၞာံရ အယုက်ညးတံဂှ်လေဝ် မောဝ်တိုန်အာ ဗွဲအတိုၚ်လၟေၚ်တုဲ စဵုကဵုမွဲအသၚ်ဃဲ ရိုဟ်လၟိဟ်ဂၞန်ဟွံမာန် မောဝ်တိုန်အာတုဲ ဆစရၚ်ဓရ်ကုသဵုဟေၚ် ပတုဲတဴအိုတ်ရ။


ပ္ဍဲကာလဂှ် မၞိဟ်ဂမၠိုၚ် အယုက်ဂၠိၚ်လောန်အာတုဲ ဒဒိုက်မ္ဂးဂှ် ဗီုသာ်လဵုရော ဣၚုဟ်ဟွံတီသက်က်ရ ဟိုတ်နူ ဟွံတီကေတ်ဒဒိုက်တံဂှ်တုဲ အယုက်မၞိဟ်တံဂှ် က္လေၚ်လဟုတ်စှ်ေကၠုၚ်ပၠန်ရ နူကဵုအယုက်သတ္တံမွဲအသၚ်ဃဲဂှ် ကၠံသၞာံမွဲသၞာံ လဟုတ်စှ်ေယအ်ကၠုၚ်တုဲ စိုပ်အယုက်သတ္တံမွဲလက်သၞာံရ ( မွဲလက်သၞာံဂှ် ကၠံလ္ၚီသၞာံ ) ကေတ်သင်္ချာဂၞန်မ္ဂး မွဲကိုဋ်သၞာံရ ပ္ဍဲကာလဂှ် မၞိဟ်ဂမၠိုၚ် မၞိဟ်ဗြဴလေဝ်တုပ်ကဵုဒေဝတဴဗြဴရ မၞိဟ်တြုံလေဝ်တုပ် ကေုာံ ဒေဝတဴတြုံရ တြုံဗြဴတံဂှ်တံဂှ် သ္ပမ္ၚဵုထပ်တဲ သၞက်ကရောဲအိုတ်ရောၚ် ( အတိုၚ်မကၠုၚ်ပ္ဍဲသုတ်ပါထေယျဂှ် အယုက်သတ္တံ ဒ္စါံစှော်လ္ၚီသၞာံ သၟတ်ဗြဴ ။ ( ဝါ ) သၟတ်ဝုတ်အယုက်မသုန်ကၠံသၞာံဂှ် သ္ပမ္ၚဵုထပ်တဲ ကဵုစတြုံတၠသ္ၚိရ )။

(၁၄)ခဏ်ပရူဍုၚ်ကေတုမတဳ သၟိၚ်စက္ကဝဝ်သၚ်္ခ[ပလေဝ်ဒါန် | ပလေဝ်ဒါန် တမ်ကၞက်]

သီုကဵုမဝေၚ်တဴသ္ဘၚ်ရာၚ်ဆာဲသပ္ပါဲလောန်တုဲ ညံၚ်ရဴဍုၚ်သွဝ်ကီု မၞုံတဴရ ဗြဲပၠန်တုန်လေဝ် စှ်တ္ၚဲမွဲဝါပါ်ဂိတုမွဲဝါ ပယျာံသ္ဂာဗ္တံ ဟံၚ်ပတိုန်ကဵုသြဇာရှ်တိတုဲ မဂူတဴရ ပ္ဍဲကာလဂှ် အန္တရာဲပိသာ်မၞုံတဴရ

  • အန္တရာဲပိသာ်မ္ဂးဂှ်တုန်

(၁) ဣစ္ဆာ ၊ ယဲလ္ၚပ်သၟိက်မိက်ဂွံစပုၚ်ဂှ်မွဲ

(၂) အနသန ၊ ယဲမကတဵုဒှ်ကုညးမစပုၚ်တုဲဂှ် ပွမလၞုဟ်ဒကုဲ ပွမဗ္ၜူတဴကၠေၚ်ပုၚ်ဂှ်မွဲ

(၃) ဇရာ ။ ယဲပါကဋဇရာမတွံဂး ပွမ္ဒးဗျုအာစိုပ်အဝဲ မပ္တံကဵုသော်ဗု ၚေက်ပြဟ်ဂှ်မွဲ


ဆယဲပိသာ်ဂမၠိုၚ်ဝွံဟေၚ် ကတဵုဒှ်ပြာကတ်ရ ယဲသ္အာၚ်နူယဲပိသာ်ဂှ် ဟၟဲရ ယွံသာရိပိုတ် ။ ပ္ဍဲကာလဂှ် တကံဇမ္ဗုဒိပ်ဝွံ ဍိုက်ပေၚ်တဴရ ဖဲသ္အဳတဴရ ကွာန်နိဂီုဇၞးပိုတ်ဂမၠိုၚ်ကီု ဍုၚ်သၟိၚ်မပဒတဴဂမၠိုၚ်ကီု ခရာဇမ္ၚောဲဍေံ မွဲစာၚ်ပဝ်ဒတုံရ ညန်ကြပ်တဴရၚ်သ္ကံရ တကံဇမ္ဗုဒိပ်ဝွံ မၞိဟ်ဂမၠိုၚ် ပေၚ်က္ဍတ်တဴ မသကုခြာရ မုဥပမာမတုပ်ရော ဂြိကပိုဟ်ကီု ဂြိုပ်ချောဲကီု နကဵုတၞံကပိုဟ်တၞံချောဲတံဂှ် သၟးညံၚ်မပေၚ်က္ဍတ်ကၠေတ်တဴကီုရောၚ် ပ္ဍဲကာလဂှ် ဍုၚ်ဗာရဏသဳမကော်ခဴစလၟုဟ်ဂှ် ယၟုပြံၚ်လှာဲအာတုဲ ဍုၚ်သၟိၚ်တံမပဒတဴမၞုံယၟု ကေတုမတဳကော်ခဴစရ အယံဗာရဏသဳ ကေတုမတဳနာရာဇဌာနဳ သဝိဿတိ ။ ပါဠိသုတ်ပါထေယျ ။


ဍုၚ်ကေတုမတဳဂှ် မၞုံဇမၠိၚ်ၜါစှော်ယောဇနာ အနာံထပှ်ယောဇနာမဒှ်ရ ပ္ဍဲဍုၚ်ကေတုမတဳဂှ် သၟိၚ်စက္ကဝဝ်မၞုံယၟုသင်္ခ မမၚ်မွဲဓရ် ပသၟိၚ်ဗွဲဓရ် ဂွံအလဵုအသဳ ပ္ဍဲတကံပန်မၞုံလအိတ်ဍေံ မှာသၟိတ်ဇၞော်ပန် ဟွံဒးတဝ်စၞေဟ်ပၞာန်တုဲ မဂွံဇၞးကေတ်သၞသတြု မအာစိုပ်ဒဒှ်ဇၞးပိုတ် မတန်တဴလၟိုန် မဍိုက်ပေၚ်တဴကေုာံရတ်ထပှ်ပြကာဂှ် ကတဵုဒှ်ရသၟိၚ်စက္ကဝဝ်မၞုံယၟုသင်္ခဂှ် ရတ်ထပှ်ပြကာကတဵုဒှ်ရ ညးမ္ဂးရတ်သၟိၚ်စက္ကဝဝ်ထပှ်ပြကာဂှ်ရော စက္ကရတနံ ၊ စက်ရတ်ကီု ။ ဟတ္ထိရတနံ ၊ စိၚ်ရတ်ကီု ။ အဿရတနံ ၊ချေံရတ်ကီု ။ မဏိရတနံ ၊ မၞိက်ရတ်ကီု ။ ဣတ္ထိရတနံ ၊ ဗြဴရတ်ကီု ။ ဂဟပတိရတနံ ၊ သမ္ၚေဟ်ရတ်ကီု ။ ပရိဏာယကရတနံ မၞိဟ်ဇၞော်ရတ်ကီု ဣဝွံ ဒှ်ရတ်ထပှ်ပြကာရ ကောန်သၟိၚ်စက္ကဝဝ်မၞုံယၟုသင်္ခဂှ် မဂံၚ်သကာလောန် မၞုံကဵုဇကုမတၟုဲတဴ နကဵုဝဳရိယျမသၟဟ်အစောံ တၞဟ်ပ္ဍဵုပ္ဍိုက်ကၠေံဗဵုပၞာန်ညးသ္အာၚ်ဂှ် လ္ၚီဟွံက ကတဵုဒှ်ရ သၟိၚ်စက္ကဝဝ်မၞုံယၟုသင်္ခဂှ် ဂၠးတိဇၞော်မၞုံလအိတ်ဍေံမှာသၟိတ်ဝွံ ဗွဲမဟွံဒးကဵုဒန် ဟွံဒးကဵုလွဟ်လက်နက် ဗွဲမညဳသၟဟ်ကေုာံဓရ် ဂွံဇၞးကေတ်တုဲ မဂွံသ္ပဒတဴအုပ်လဒံလဝ်ရ။

(၁၅)ဗီုပြာသာဒ်ဇၞော်ကၠတ်မံက်တိုန်ကၠုၚ်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲလ္ဒေါဝ်ဍုၚ်ဇၞော် မၞုံယၟုကေတုမတဳဂှ် ပြာသာဒ်ဇၞော်မွဲ မတၟုဲတဴနကဵုရတ်ထပှ်ပြကာ မၞုံအစံက်သၠုၚ်ဍေံ (၂၅) ယောဇနာ ဇမၞော်ဍေံဂှ်မွဲယောဇနာဘာ် သီုကဵုမၞုံကဵုဒစဵုကၟာၚ် မတၟုဲတဴနကဵုရတ်ထပှ်ပြကာ နကဵုလျးအရံၚ်ခဏ ဗစဳဖျဳဖျဳဖျဴဖျဴ ရံၚ်တဴနကဵုမတ်စိန်စိန်မ္ဂး ရံၚ်ဟွံမာန် ဂဵုတၟးတဴဗွဲမလောန်ဗၞတ် ကၠုတ်ပါ်မံက်တိုန်ရ (သၟိၚ်မဟာပါဒနလေဝ် ကေၚ်မံက်ကၠုၚ်ကိုပ်ကၠာပြကိုဟ် မဟီုတွံရ) ပ္ဍဲပြာသာဒ်ဂှ် သၟိၚ်စက္ကဝဝ်သင်္ခ ဒုၚ်စသိုၚ်တသိုက်တုဲ မံၚ်တဴရ ပ္ဍဲပွဳပွိုၚ်ဍုၚ်ကေတုမတဳဂှ် ဍာ်ကၟာတၞဟ်ဟ်သာ်ဂမၠိုၚ် သီုကဵုမထုပ်ဂြောပ်ဗ္ဒန်ဒၟံၚ် နကဵုဒကှ်မသုန်သာ်တုဲ သၟူအမြာဲပ္ကဴဒကှ်တံဂှ် ထီုဗးမောဝ်ပ္ဍးတဴရ ပ္ဍဲပွဳပွိုၚ်ဍုၚ်ဂှ် ဥဒျာန်သၟိၚ်ဂမၠိုၚ်ဂှ် သီုကဵုဂစေံစုမ်တဴ နကဵုပ္ကဴတၞဟ်ဟ်သာ် ညံၚ်ရဴမစဝ်စုတ်လဝ်ဍာ်သာ်မၞိက်ဒဝါန်ကီု ကဴရာၚ်တဴအိုတ်ရ သၟူအမြာဲပ္ကဴတၞဟ်ဟ်သာ်တံဂှ် ထီုဗးလဝ်မောဝ်ပ္ဍးတဴရ ပ္ဍဲလ္ဒေါဝ်ဍုၚ်ကေတုမတဳဂှ်ကီု ပ္ဍဲပါၚ်တြၚ်ဍုၚ်ပန်ဒိုဟ်ကီု ပ္ဍဲကဵုမစဵုကၟာၚ်ပြာသာဒ်ဂှ် တၞံကဝ်လဗဗြိုက်ဂမၠိုၚ် ကၠုတ်တိုန်ဗွဲမ္ဒးရးရ။


ပ္ဍဲတၞံကဝ်လဗဗြိုက်ဂမၠိုၚ် ကယျိုၚ်ကယျဝ်ဂ္ညိဂ္ညာတ် ယာတ်ဒိပ်မၞုံကဵုလျးခဏ မစဳဖျဳဖျဳဖျဴဖျဴ မၞုံတဴကဵုသာ်တၞဟ်ဟ်မတွံဂး သာ်ဗ္တာၚ် သာ်ဗကေတ် သာ်ဍာ်မိတ် သာ်လမ်စံက်ဍိုပ်ဍဴ သာ်ဒမျိုၚ် သာ်သၠုဲ သာ်ဒဝါန်ဂမၠိုၚ်ကီု ယာတ်မကတဵုဒှ် ပ္ဍဲကသိကရး ခေါကရး ကောဋမ္ဗရာဇ်ရးဂမၠိုၚ်ကီု မပ္တံကဵုပုၚ်စၞဘောဇိုန် ဍာ်ယာမ ပ္ဍဲဍုၚ်မၞိဟ်ဝွံ မၞုံကဵုရှ်သာ မဍာတ်ကြောံဆာဲပြဲဒးရး မဂပ်ဂဝ်ရပ်စပ်သုၚ်စောဲ စသုၚ်ပ္ဍဲဍုၚ်မၞိဟ်ဂှ်လေဝ် တၞံကဝ်လဗဗြိုက်ဂှ်ဟေၚ် လကဲလကဲတလာဲတလာဲ မၞုံတဴရ ပ္ဍဲကဵုမုက်ပါၚ်တြၚ်ပန်ဒိုဟ်ဂှ်ကီုလေဝ် ဇြပ်ထဝ်ဂမၠိုၚ် ဗွဲမသာယေန် ဇိပ်ဂၠိပ်မိပ်ဇြိပ်တဴဗွဲမလောန်ဂှ်လေဝ် ကတဵုဒှ်မံက်တိုန်ရ ယွံသာရိပိုတ် ပ္ဍဲကာလဂှ် ဥတုပိပြကာ ဟွံၜိုဟ်ဟွံကတဴ သဘဴပကတိမဒှ်ဒၟံၚ်ရ ကြုၚ်ၜဳဂမၠိုၚ်ပၠန်တုန်လေဝ် ဍာ်ကမၠိဟွံဂွံဇွောဝ်ရ ဇြုၚ်ကေဝ်သ္အးဇ္ၚးတဴရ မသက္ကုသၠိုက်သရီု ညံၚ်ရဴသာ်ဗၠဲကီု မၞုံကဵုဍာ်ဇြုၚ်ကေဝ်တဴရ။


ယွံသာရိပိုတ် ပ္ဍဲအခါကာလဂှ် တၞံသြောံမွဲမွဲတၞံ ဒကောၚ်သတ်မကတဵုဗဒှ်သတ်ဂှ်တုန် ကွဳထပှ်လ္ၚီ ထပှ်ကၠံ ထပှ်စှော်ၜါဖ္ဍိုက် ကေုာံ ၜါစှော်တြဴနကဵုၜါတုံနာဠဳ မၞုံတဴရ မသြောံမွဲမွဲမဂှ်တုန် မၞုံဗွိုက်ပိဍရ ယွံသာရိပိုတ် ပ္ဍဲကာလဂှ် မၞိဟ်ဂမၠိုၚ် ဂွံစတဴစၞမၞုံကဵုရှ်သာဍာတ်ကြောံ မကတဵုဒှ်ပ္ဍဲတၞံကဝ်လဗဗြိုက်ဂှ် ညံၚ်ရဴရှ်ဒိပ်ကီု သီုကဵုမဂွံစသုၚ်တဴတုဲ သၞေက်မၞိဟ်ဟေၚ် သီုကဵုမဂွံဝက်ပ္ဍဲကတောဝ်တုဲ မြမောဝ်ကြက်စၠန်တံဂှ် သီုကဵုမဂွံလံက်ဗဗိုဟ်တဴတုဲ ကယျိုၚ်ကယျဝ်မၞိဟ်ဂမၠိုၚ် မဂပ်ဂဝ်ကျိုၚ်ကျဝ်ဂ္ညိဂ္ညာတ် မပ္တံကဵုလစိန်လကံက် ဂွါကွက်ကံကီု သီုကဵုလကံက်ဇိုၚ် ကျိုၚ်ကျဝ်ကေတ်တုဲ ယာတ်မကတဵုဒှ် ပ္ဍဲကသိကရာဇ်ရးတံဂှ် ဗိုက်လတက်ကေတ်တုဲ စံၚ်ဒိပ်ဒေဝတဴ မၞုံကဵုရမျာၚ်ဍိုန်ဍိုန်ညှာညှာတံဂှ် သီုကဵုမတိၚ်တိုက်တဴ ဒုၚ်စသိုၚ်ဗွဲတသိုက်တုဲ ဂွံမံၚ်တဴအိုတ်ရ ယွံသာရိပိုတ် တကံဇမ္ဗုဒိပ် မၞုဲသလဲစှ်လ္ၚီယောဇနာဝွံတုဲ ညံၚ်ရဴဍုၚ်သွဝ်တာဝတိံကီု မဒှ်ရ ပ္ဍဲကာလဂှ် မၞိဟ်ဂမၠိုၚ် ကြက်ဝေၚ်တဴသ္ဘၚ်နက်သတ်အိုတ်ရ သၟးညံၚ်ရဴ သ္ဘၚ်နက်သတ်ဒေဝတဴသွဝ်ကီု မိပ်လဟိၚ်တဴရ။

(၁၆)ပရူဗောဓိသတ်အရဳယျစှ်ေတန်ပဋိသန္ဓိ[ပလေဝ်ဒါန် | ပလေဝ်ဒါန် တမ်ကၞက်]

ယွံသာရိပိုတ် ပ္ဍဲကာလဂှ် ဗောဓိသတ်အလံၚ်ကျာ်တြဲ အရဳယျမေတ္တေယျတုန် ပါရမဳစှ်တြဴအသၚ်ဃဲကဵု ပရဲမွဲမှာလက်ကဝ် ရနုက်ဗပေၚ်လဝ်တုဲ သၠးပွးဇၞော်မသုန်ဂှ် သၠးပွးဂိုၚ်ကေတ် ဂကောံပါရမဳ မဒှ်ကၞောတ်အထောတ်တုဲ တိုန်ကတဵုဒှ်ဒၟံၚ်ပ္ဍဲဍုၚ်သွဝ် တုဿိတာပူတေံရ။


ပ္ဍဲဍုၚ်သွဝ်တုဿိတာပူတေံဂှ် ပရိုၚ်ဣဒ္ဓိကြဳဇှ်ဒယှ်တှ် ဗောဓိသတ်အရဳယျမေတ္တေယျဂှ် ဒယှ်တှ်ပြာကတ်ဒၟံၚ်တုဲ ဒေဝတဴမတန်တဴ ပ္ဍဲစှ်လ္ၚီစက္ကဝါဂမၠိုၚ် တၞဟ်နသွက်ဂွံကတဵုဒှ်ကျာ် ပြာတ်ကၠုၚ်ကောံမွဲဟာန် အာတ်ပါၚ်အခေါၚ်တုဲ နကဵုပဉ္စဝိသောကန ပွမသ္ၚဳမၠာ်မွဲမသုန်သာ်ဝွံ သ္ၚဳမၠာ်တုဲ မွဲဟာန်ကေုာံ တွဳဝါရညးစှ်ဒ္စါံကိုဋ် စုတိစှ်ေကၠုၚ်နူဍုၚ်သွဝ် တုဿိတာပူတေံတုဲ စှ်ေတန်ပဋိသန္ဓိ ပ္ဍဲဂဝ်ဂၞဴမိဗမၞးဗြဴ မၞုံယၟုဗြဟ္မဏဝတဳ မဒှ်သမ္ဘာဗမၞးဇၞော် မၞုံယၟုသုဗြဟ္မ ပ္ဍဲဍုၚ်ကေတုမတဳဂှ်ရ။


မၞးဇၞော်သုဗြဟ္မဂှ် ဒှ်ဒၟံၚ်အ္စာသၟိၚ် တီညာတ်အတိက် အနာဂတ် ပစ္စုပ္ပန်တုဲ ဒှ်ဒၟံၚ်အရာသလဲလ္ၜေါ် မချပ်ဂၞန်စမွဲဟာန်ကေုာံ သၟိၚ်စက္ကဝဝ်မၞုံယၟုသင်္ခ ပ္ဍဲဍုၚ်ကေတုမတဳဂှ်ရ ပ္ဍဲကာလဂှ် စှ်လ္ၚီလောကဓါတ် ချဳသရပ်ဒလိုက်ဒလာၚ်တဴရ စှ်ဂိတုလောန်ဟေၚ် ပ္ဍဲဂြိုပ်ဒြာဲ မၞုံယၟုဣသိပတန သၠးပဋိသန္ဓိရ ယၟုမ္ဂး အဇိတခုတ်ခဴစရ။

(၁၇)ခဏ်ဗောဓိသတ်ဒုၚ်စသိုၚ်ပိုန်လောကဳ[ပလေဝ်ဒါန် | ပလေဝ်ဒါန် တမ်ကၞက်]

ညးမသၠးပဋိသန္ဓိမွဲစွံ ကရောံဗောဓိသတ်ဂှ် ညးစှ်လ္ၚီကိုဋ်ရောၚ် ညးတံဂှ် ဒှ်အမာတ်ဇၞော်ဟေၚ်ရ ကုကောန်သၟိၚ်အဇိတ တၞဟ်နသွက်ဂွံဒုၚ်စသိုၚ် ပိုန်ဘိုက်လောကတုဲ ပြာသာဒ်ပန်တၞုၚ် မရာၚ်ဆာဲတဴ နကဵုလျးအရံၚ် သီုကဵုမဂဵုလဟဵုတဴနကဵုလျးအရံၚ် မတၟုဲတဴနကဵုရတ်ထပှ်ပြကာ ရာၚ်ဆာဲကျေဝ်ဂေါဝ်တဴ ဗွဲမလောန်ဗၞတ် ကၠုတ်ပါ်တိုန်တုဲ ကတဵုဒှ်ရ ပြာသာဒ်မွဲမွဲတၞုၚ်ဂှ် ဂၠံတိုက်ထပှ်ထပှ်လ္ၚီ ပ္ဍဲမွဲမွဲလ္ပါ်ဂှ် ။ ပလ္လၚ်ထပှ်ထပှ်လ္ၚီ မတၟုဲတဴနကဵုရတ်ဒ္စိတ်ပြကာ မစဳခၞံလဝ် ဇံၚ်ဂတဵုထပှ်ထပှ်လ္ၚီ မတၟုဲတဴနကဵုသော်သတ်တၞဟ်ဟ်သာ် ၊ ပ္ဍဲပြာသာဒ်မွဲမွဲတၞုၚ်ဂှ် နုၚ်နိဓိထဝ်ဇၞော်ပန်နုၚ် မတၟုဲတဴနကဵုရတ်ထပှ်ပြကာ ကၠုတ်မံက်တိုန်ရ။


ပါၚ်နုၚ်နိဓိထဝ်မွဲမွဲမဂှ်ပၠန်တုန် ဒှ်မွဲမွဲယောဇနာရောၚ် အစံက်သၠုၚ်နုၚ်နိဓိထဝ်ဂှ် တုပ်သၟဟ်ကဵုတိဇၞော်ရောၚ် ပ္ဍဲနုၚ်နိထဝ်မွဲမွဲမဂှ် တၞံကဝ်လဗဗြိုက်တြဴတၞံ ကၠုတ်တိုန်ရ ပ္ဍဲပြာသာဒ်မွဲမွဲတၞုၚ်ဂှ် သီုကဵုမဂ္ညိဂ္ညာတ်လဝ် နကဵုရတ်ထပှ်ပြကာတုဲ သၟိၚ်စိၚ်ဆဒ္ဒန်ထပှ်လ္ၚီ မစြံက်ဗ္ဒဝ်လဝ် ဇၞောဝ်အလာံထဝ်ဂမၠိုၚ် ပွဳဗွိုၚ်တဴရ ကွဳရတ်ထပှ်ကၠံမဗ္ဂန်လဝ်ချေံ သိန္ဓဴဝလာဟကလ္ၚီ မဂ္ညိဂ္ညာတ်ကယျိုၚ်ကယျဝ်လဝ် အလုံမွဲဇကုဂှ်လေဝ် ကတဵုဒှ်ရ ပ္ဍဲမွဲမွဲဘုံဂှ် ကမၠောန်မောၚ်မစှ်တြဴလ္ၚီ (မွဲလက်ကဵုတြဴလ္ၚီ) သီုကဵုမဂ္ညိဂ္ညာတ်ကျိုၚ်ကျဝ်လဝ် နကဵုရတ်မတုပ်သၟဟ် ကေုာံ သၟတ်ဝုတ်ကောန်ဒေဝတဴဗြဴ မဍိုက်ပေၚ်တဴကေုာံသာ် မသုန်သာ်မပြဲပြဲ ဗွဲဂကူတၞောဝ်တံဂှ် ပွဳဗွိုၚ်တဴရ ပ္ဍဲမွဲမွဲဘုံဂှ် သၟာလှ်ေထပှ်လ္ၚီ မကတဵုဒှ် ပ္ဍဲဂကူမသ္အးဇ္ၚး မစိုန်သကီု ကေုာံ စၠးစရာဲ ရာၚ်ဆာဲကျေဝ်ဂေါဝ် ဗဵုဒ္ၚေါဝ်ဟွံဖဲ ဆိုက်ဗ္ဒက်စဳကၠး ပွမလှ်ေဒယှ်ေတိၚ်တိုက် အခိုက်တၞဟ်ဟ်တံဂှ် ကတဵုဒှ်ရ။

(၁၈)ခဏ်ဗောဓိသတ်ဒုၚ်စသိုၚ်ပိုန်လောက[ပလေဝ်ဒါန် | ပလေဝ်ဒါန် တမ်ကၞက်]

ယွံသာရိပိုတ် ဂၞကျာ်ပရဲကောန်သၟိၚ်အဇိတဂှ် စန္ဒမုက္ခဳရ ဂၞကျာ်စန္ဒမုက္ခဳဂှ်ပၠန်တုန် သီုကဵုမတွဳဗွိုၚ်လဝ် ဂကောံကမၠောန်မောၚ်မဂမၠိုၚ်တုဲ ဍိုက်ပေၚ်ကေုာံဓရ်သဳလရ စာ်စ္ဍးနူဒုဟ်တြဴသာ်ရ ညဳသၟဟ်ကေုာံအင်္ဂမသုန်သာ်ရ ရုပ်သာ်ကျာ်သြဳ စၠးစရာဲကျေဝ်ဂေါဝ်လောန်ရ မၞိဟ်ရောဟွံတုပ် ဒေဝတ်လေဝ်ဟွံသၟဟ် အရီုမတ်ဒးသၞောတ်ကျေဝ်ဂေါဝ် ကောန်ခၞေါဝ်ဟွံက အဆေဝ်သွဝ်မ္ဒးကျအာ ဗဵုရောဟွံဖဲသၟဟ် ကတဵုဒှ်ရ ဇကုဂၞကျာ်စန္ဒမုက္ခဳဂှ် မောဝ်ပ္ဍးတဴညံၚ်သၟူအမြာဲ ကြက်စၠန်ရ နကဵုလျးဇကုပၠန် ဒတန်ဌာန်ဗၞတ်စှ်ၜါဟတ် ဟွံဒးပ္ဍေန်ပၟတ်ပၞာၚ်သ္ဍဴ ယးတၟးတဴရ ဆဂှ်ဟွံသေၚ် ဖျုန်ဇကုပၠန်တုန်လေဝ် ညံၚ်ရဴတောဝ်ချဵုကီု ဍိုန်ဍောတ်တဴရ စရၚ်ဓရ်ကုသဵု မကေၚ်ပတုဲလဝ် နူဘဝကိုပ်ကၠာတေံဂှ် တန်ကြန်တဴပ္ဍဲဘဝ မဒှ်လအိတ်ရ ကောန်ဂၞကျာ်စန္ဒမုက္ခဳဂှ်တုန် မၞုံယၟုဗြဟ္မဝံသရ ညံၚ်ရာဟုလကီု စိုန်သကီုပ္ဍဲဘဝ မဒှ်လအိတ်ရ။


ယွံသာရိပိုတ် ဗောဓိသတ်မၞုံယၟုအဇိတဂှ်တုန် ပ္ဍဲပြာသာဒ်ဂှ် ညံၚ်သၟိၚ်ဒေဝတဴဇၞော်ကီု သီုကဵုမဂ္ညိဂ္ညာတ်ကျိုၚ်ကျဝ်လဝ် နကဵုရတ်ထပှ်ပြကာတုဲ သီုကဵုမပွဳပွိုၚ်ကေတ် ဂကောံကမၠောန်မောၚ်မ မၞုံပဓါန်ဍေံ ဂၞကျာ်စန္ဒမုက္ခဳတုဲ ညံၚ်ရဴပိုန်ဘိုက်သၟိၚ်ဒေဝတဴကီု ဂွံမံၚ်လဟိၚ်တဴစိုတ်ရ သာရိပုတ္တ။ ယွံသာရိပိုတ် ပ္ဍဲကာလဂှ် ဗောဓိသတ်အဇိတတုန် စရၚ်ပါရမဳမကေၚ်ရနုက်ဗပေၚ်ကၠုၚ် စှ်တြဴအသၚ်ဃဲကဵု ပရဲမွဲမှာလက်ကဝ် ဆဝ်မ္ၚုဟ်တုဲ ပ္ဍဲတကံဇမ္ဗုဒိပ် ဆနွံအလုံဂၠးတိဝွံ ဗရုဒယှ်တှ်လလာၚ်တမ္ညဝ် ညံၚ်ရဴဍုၚ်သွဝ်တာဝတိံကီု ကတဵုဒှ်ရ ကျာ်သြဳဆနွံအလုံလောကဓါတ် အိုဿီုပကောံဓရီုတုဲ ညံၚ်ရဴမစွံပတိုန်လဝ်ကီု ကတဵုဒှ်ရ။

(၁၉)ခဏ်ဗောဓိသတ်အရဳယျတိတ်ဂြိုပ်[ပလေဝ်ဒါန် | ပလေဝ်ဒါန် တမ်ကၞက်]

သာရိပုတ္တ။ ယွံကောန်သ္ဍိုက်သာရိပိုတ် သၟိၚ်ဒ္စါံစှော်လ္ၚီကဵုပန်လ္ၚီဂမၠိုၚ်ကီု ။ (ဒ္စါံလက်ကဵုပန်လ္ၚီသင်္ချာဂၞန်) ဒေဝတဴဂမၠိုၚ်အိုဿီုကီု မွဲဟာန်ကေုာံသၟိၚ်စက္ကဝဝ် ပြာပ်အာဇရေၚ်ဗောဓိသတ်အရဳယျတုဲ ယွံတၠနာဲပိုဲညးဂမၠိုၚ် မမိက်ဂွံယိုက်သ္ဇိုၚ်ဝန် ကၠောန်ကေၚ်ကာဇၞော်သၟတ်ရ ရဴဝွံ ရံၚ်သ္ၚဳမုက္ခဝါတုဲ မံၚ်တဴရ တြုံဗောသတ်လေဝ် ယွံသၟိၚ်ဂမၠိုၚ် ညးဂွံယိုက်သ္ဇိုၚ်ဝန် ကၠောန်ကလောန်ကေၚ်ကာမ္ဂးဂှ် သ္ပတံနူကဵုအမာတ်ဇၞော် စှ်ဒ္စါံကိုဋ်တုဲ စိၚ်ချေံသရာဲဗဵုမၞုံတဴဗွဲမဂၠိုၚ် အဲဟွံမွဲပၟိက်ရ အာအိုတ်ညိ ရဴဝွံ သ္ဂးရ။

(၂၀)ခဏ်ဗောဓိသတ်တိတ်ဂြိုပ်[ပလေဝ်ဒါန် | ပလေဝ်ဒါန် တမ်ကၞက်]

တြုံဗောဓိသတ်ကောန်သၟိၚ်အဇိတ ဗွဲအနုဘဴပါရမဳ ရနုက်ဗပေၚ်လဝ် ဗွဲမဍိုက်ပေၚ်လောန်ဗၞတ်သာ်ဂှ်တုဲ ဒုၚ်စသိုၚ်ဒၟံၚ်ပိုန်လောကဳ ပ္ဍဲပြာသာဒ်ပန်တၞုၚ်ဂှ်တုဲ မံၚ်တဴအယုက်စှ်လ္ၚီသၞာံရ ပ္ဍဲကာလဂှ် ဂၞကျာ်စန္ဒမုက္ခဳ မသၠးပဋိသန္ဓိကောန်တြုံသ္ဍိုက် မၞုံယၟုဗြဟ္မဝံသဂှ် ဗွဲသဘဴဓမ္မတာကျာ် တိတ်ဝေၚ်ဂြိုပ်ဥဒျာန်တုဲ ညာတ်နိမိတ်ဇၞော်ပန်မတွံဂး ညးဗျု ညးယဲ ညးချိုတ် ခမဳတုဲ နပြာသာဒ်မဍိုက်ပေၚ်တဴတသိုက် ပိုန်ဟာန်ဘိုက်ဘက်ဂှ် ဟွံလဟိၚ်စိုတ်ဒှ်တုဲ နပွမတိတ်ဂြိုပ်မပြဲဂှ် ကြက်အဲတိတ်ဂြိုပ်ရ ရဴဝွံ ကသပ်စိုတ်ကတဵုဒှ်ရ သၟိၚ်သင်္ခစက္ကဝဝ်တီကေတ်ကသပ်ဂှ်တုဲ တၞဟ်နသွက်ဂွံလဟိၚ်စိုတ်တုဲ နကဵုရဲသၟာလှ်ေ ညးဒ္စါံစှော်လ္ၚီကဵုပန်လ္ၚီ ဒုၚ်ဝေၚ်သ္ဘၚ် ပ္ဍဲပြာသာဒ်ဗောဓိသတ်မပဒတဴဂှ်တုဲ မံၚ်တဴရ ကောန်သၟိၚ်အဇိတဂှ် တိတ်ဂြိုပ်ဏောၚ် ရမျာၚ်ဒယှ်တှ်ပြာကတ်အာတုဲ ဂကောံမၞိဟ်ဂမၠိုၚ် မပ္တံညးဍုၚ်ဇၞော် ညးနိဂီုဇၞးပိုတ် ကောန်သၟိၚ်စဴသၟိၚ်သေဌဳ သမ္ၚေဟ်ဂမၠိုၚ် သီုကဵုမရပ်ကေတ်ပ္ကဴသြဴမြမောဝ် ပွဳဗွိုၚ်လဝ်တုဲ ဒၟံၚ်တဴအိုတ်ရ တ္ၚဲဏံကောန်သၟိၚ်အဇိတ ကြက်တိတ်ဂြိုပ်ရ ရဴဝွံ ပရုရမျာၚ်ကၞုက်ကၞာဲ ကောဠံကောဠကတဵုဒှ်ရ။


ဒေဝတဴမတန်တဴ ပ္ဍဲဂၠးအာကာသဂမၠိုၚ်ကီု မွဲဟာန်ကေုာံသ္ဘၚ် သီုကဵုမရပ်နၚ်ပ္ကဴသြဴမြမောဝ်တုဲ ကၠုၚ်သ္ပပူဇဴရ ဒေဝတဴဗြီုမတန်တဴ ပ္ဍဲစှ်လ္ၚီစက္ကဝါဂမၠိုၚ်လေဝ် နမပ္တံဗ္ကထဝ် ဗ္ကသြန် ပ္ကဴကြက်စၠန်မြမောဝ် က္ဍိုၚ်ဇၞောဝ်အလာံဒိပ်တံဂှ် အခေၚ်ခေၚ်သြံက်ဗ္ဒဝ်လဝ် ပ္ဍဲဌာန်ဇရေၚ်ပြာသာဒ်ဗောဓိသတ်မပြဲပြဲ သၟးညံၚ်ရဴဗဂူဗြဲရတ် ပေၚ်က္ဍတ်ရေၚ်တဴဗွဲမလောန်ရ ယွံသာရိပိုတ် ပ္ဍဲအခါကာလဂှ် ဒဵုဗၚ်ဇြဟ်တံဂှ် ဟွံမွဲရ ဂၠးတိဟွံသၠုၚ်ဟွံသဝ်သၟဟ်တး ညဳသာတဴညံၚ်ရဴမုက်ဖံကီုမဒှ်ရ ဗောဓိသတ်အရဳယျမေတ္တေယျတုန်လေဝ် ဗွဲလအိတ် အယုက်သီုဖ္အိုတ်ဂှ်တုန် ဒှ်အခိၚ်အယုက်သတ္တံ ကၠံလ္ၚီသၞာံတုဲ (မွဲကိုဋ်သၞာံလေဝ်ဂးရသင်္ချာဂၞန်) အယုက်ဒ္စါံစှော်လ္ၚီသၞာံ မဒှ်ရ ဂွံမံၚ်တဴရ။


(ပ္ဍဲအရာပိုၚ်ခြာအယုက်ကျာ်တြဲအရဳယျဂှ် အ္စာတံဟီုကၠုၚ်လဝ် ဂၠိုၚ်ကဵုသာ်ရ ရန်ကဵုပါဠိအတိုၚ်မကၠုၚ် ပ္ဍဲသုတ်ပါထေယျတေံတုဲ အယုက်ဒ္စါံစှော်လ္ၚီသၞာံဂှ် ဒှ်စၟတ်ဍာံပြရ)။

(၂၁)သ္ဂုတ်သွာတ်အယုက်ကျာ်တြဲအရဳယျ[ပလေဝ်ဒါန် | ပလေဝ်ဒါန် တမ်ကၞက်]

အသဳဝဿ ၊ သဟဿာယုကေသု ၊ ဘိက္ခဝေ ၊ မနုဿေသု ၊ မေတ္တေယျော ၊ နာမ ၊ ဘဂဝါ ၊ လောကေ ၊ ဥပ္ပဇ္ဇိဿတိ ။ ။ သုတ်ပါထေယျ ။


ဘိက္ခဝေ၊ ယွံခမဳဂမၠိုၚ် ။ မနုဿေသု၊ ၚ်မၞိဟ်ဂမၠိုၚ်။ အသဳတိဝဿ သဟဿာယုကေသု၊ နကြိဂွံမံၚ်ဗၞတ်အယုက်ဒ္စါံစှော်လ္ၚီသၞာံတုဲနေဝ် ။ မေတ္တေယျောနာမ၊ တၠဳလဂှ်ဒမၞုံယၟုမေတ္တေယျ ။ ဘဂဝါ၊ ၚ်ကျာ်တြဲ ။ လောကေ၊ ပ္ဍဲကဵုလိုက်ဝွံ ။ ဥပ္ပဇ္ဇိဿတိ၊ ကြက်ကတဵုဒှ်ရ။ ညာတ်ကဵုပါဠိသက်သဳသာဓက အတိုၚ်မကၠုၚ်ပ္ဍဲသုတ်ပါထေယျဝွံတုဲ အယုက်ကျာ်တြဲအရဳယျမေတ္တေယျဂှ် ဒ္စါံစှော်လ္ၚီသၞာံဂှ် ဒှ်စၟတ်ဍာံရ အတိုၚ်မကၠုၚ်ပ္ဍဲသုတ်ပါထေယျဂှ် နူအယုက်သတ္တံစှ်သၞာံဂှ် ဇၞော်မောဝ်တိုန်အာစိုပ် အယုက်သတ္တံ ဒ္စါံစှော်လ္ၚီသၞာံတုဲ ကျာ်တြဲအရဳယျမေတ္တေယျ ကတဵုဒှ်ရ ဂလာန်ဂှ် လ္ပါ်အယုက်သတ္တံမဇၞော်မောဝ်တိုန် ညံၚ်ရဴမဒှ်ဒၟံၚ်ကီုသာ်ဂှ်ဟွံသေၚ် လ္ပါ်အယုက်သတ္တံလဟုတ်စှ်ေဟေၚ် ကျာ်တြဲအရဳယျကတဵုဒှ် ဂပ်ဝ်သမ္တီညိ ဂလာန်မ္ဂး အသဳဝဿ သဟဿာယုကေသု ဘိက္ခဝေ မနုဿေသု မေတ္တေယျော နာမ ဘဂဝါ လောကေ ဥပ္ပဇ္ဇိဿတိဝွံ ဗွဲအစောံအာယုက်သတ္တံ ဇၞော်မောဝ်တိုန်ဂှ် ကျာ်တြဲဟွံတွံရ ကာလအဃောအယုက်သတ္တံ ဇၞော်မောဝ်တိုန်ဂှ် ကျာ်တြဲဟွံကတဵုဒှ်ရ ပ္ဍဲကာလလဟုတ်စှ်ေဟေၚ် ကျာ်တြဲ ကတဵုဒှ်ရ ဟိုတ်ဂှ်ရ ယြဴပ္ဍဲကာလမွဲ အယုက်သတ္တံ ဇၞော်မောဝ်တိုန်အာတုဲ အာစိုပ်မွဲအသၚ်ဃဲတုဲ မွဲလှ်ေပၠန် လဟုတ်စှ်ေကၠုၚ်တုဲ တန်တဴပ္ဍဲကာလအာယုက်သတ္တံ ဒ္စါံစှော်လ္ၚီသၞာံရ ပ္ဍဲကာလဂှ် ကျာ်တြဲအရဳယျမေတ္တေယျ ကတဵုဒှ်ရ။


  • ပသာ်ဂွံတီရော ။

အသဳတိဝဿ သဟဿာယုကေသု ဘိက္ခဝေ မနုဿေသု မေတ္တေယျောနာမ ဘဂဝါ လောကေ ဥပ္ပဇ္ဇိဿတဳတိ နဝဎ္ဍမာနကဝ သေန ဝုတ္တံ ။ နဟိ ဗုဒ္ဓါ ဝဎ္ဍမာနေအာယုမှိ နိဗ္ဗတ္တန္တိ ။ ဟာယမာနေပန နိဗ္ဗတ္တန္တိ ။ တသ္မာ ယဒါတံ အာယုဝဎ္ဍိတွာ အသင်္ချေယျတံ ပတွာ ပုန ဟာယမာနံ အသဳတိ ဝဿသဟဿကာလေ ဌဿတိ တဒါ ဥပ္ပဇ္ဇိဿတဳတိ အတ္ထော ။ ။ အဌကထာသုတ်ပါထေယျ ။ ။


အရထ ။ ။ အသဳတိဝဿ (လ) ဥပ္ပဇ္ဇိဿတဳတိဝစနံ၊ န်ဂလာန်မ္ဂး အသဳတိဝဿ (လ) ဥပ္ပဇ္ဇိဿတိဝွံဝဍ္ဎမာနေကဝသေန၊ ဗွဲအစောံအာယုက်သတ္တံ မဇၞော်မောဝ်တိုန် နဝုတ္တံစိုန်ဟဂပ်ဝ်တွံရ ။

ဗုဒ္ဓါ၊ ၚ်ကျာ်တြဲဂမၠိုၚ် ။ အာယုမှိ၊ ၚ်အယုက် ။ ဝဍ္ဎမာနေ၊ နကြဳဇၞော်မောဝ်တိုန်တုဲနေဝ် ။ ဟိယသ္မာ၊ ယြဴဟိုတ်မွဲ နနိဗ္ဗတ္တန္တိ၊ ပ္ဍံဟွံကတဵုဒှ်အိုတ်ရ ။ ဟာယမာနေပန၊ ပ္ဍဲကာလအယုက်လဟုတ်စှ်ေဟေၚ် ။ ဟိယသ္မာ၊ ယြဴဟိုတ်မွဲ ။ နိဗ္ဗတ္တန္တိ၊ ပ္ဍံကတဵုဒှ်အိုတ်ရ ။ တသ္မာ၊ ဟိုတ်ဒၟါဒှ်သာ်ဂှ်ရ ။ ယဒါ၊ ယြဴပ္ဍဲကာလမွဲ ။ အာယု၊ ၚ်အယုက် ဝဍ္ဎိတွာ။ ဇၞော်မောဝ်တိုန်အာတုဲ အသင်္ချေယျတံ၊ န်ဒဒှ်မွဲအသၚ်ဃဲ ။ ပတွာ၊ အာစိုပ်တုဲ ။ ပန၊မွဲလှ်ေပၠန် ။ ဟာယမာနံ၊ ၚ်မလဟုတ်ယုတ်စှ်ေအာဂှ်တုဲ ။ အသဳတိဝဿ သဟဿကာလေ၊ ပ္ဍဲကာလအယုက်ဒ္စါံစှော်လ္ၚီသၞာံ ။ ဌဿတိ၊ ကြက်တန်တဴရ ။ တဒါ၊ ပ္ဍဲကာလဂှ် ။ တံ၊ ၚ်ကျာ်တြဲအရဳယျမေတ္တေယျဂှ် ။ ဥပ္ပဇ္ဇိဿတိ၊ ကြက်ကတဵုဒှ်ရ ။ ဣတိအယံ၊ ၚ်ဣဝွံတုန် ။ အတ္ထော၊ မဒှ်ရထရောၚ် ။

(၂၂)ဗၞတ်ဗ္ၜတ်သၠုၚ်ဂတဴကျာ်[ပလေဝ်ဒါန် | ပလေဝ်ဒါန် တမ်ကၞက်]

သၠုၚ်ကျာ်တြဲအရဳယျဂှ် ဒ္စါံစှော်ဟတ်မဒှ်ရ ဂၞေၚ်မတ်မွဲမွဲတုန် မသုန်မသုန်ဟတ်မဒှ်ရ ဇၞော်သၟန်ပါၚ်ဂှ်လေဝ် မၞုံမသုန်ဟတ်ရ သၠကတောဝ်လေဝ် မၞုံအစံက်သၠုၚ် မသုန်ဟတ်ကီုရ အကြာကြာဇွပ်လပှော်ဇိုၚ်လပှော်တဲတံဂှ်လေဝ် ဗၞတ်မွဲမွဲက္ဍဟေၚ် မဒှ်ရ ဇမၠိၚ်ဂတာဇိုၚ်ဂှ်လေဝ် ဗၞတ်စှ်ဟတ်ဟေၚ်မဒှ်ကီုရ နူမတ်စိၚ်စဵုကဵုစိုပ်က္ၜံၚ်ဂှ် မၞုံၜါစှော်ဟတ်ရ ပ္ဍဲကာလဂှ် မၞိဟ်ပက္ကတိဂမၠိုၚ်တုန် သၠုၚ်ဍေံတံ မဒှ်ပန်စှော်ဟတ်ရ ဇမၠိၚ်ဇွပ်သၟန်ပါၚ်ဂှ် မဒှ်ၜါဟတ်ကဵုမွဲက္ဍရ ကောန်ၚာ်တံမကတဵုဒှ်မၞိဟ်မွဲတ္ၚဲမ္ဂး သၠုၚ်မသုန်ဟတ်မဒှ်ရ ဗွဲအဝယ်အိုဿီုပ္ဍဲမၞိဟ်ပက္ကတိဂှ် သၠုၚ်ဒတဴကီု ဒဳ က္ၜံၚ် တံၚ်ယျကီု မုက်မတ်ကတောဝ်ကီု ကရဵုတဲကီု ကဝက်ကဝက်ကျာ်ဟေၚ် မဒှ်ရ ပ္ဍဲကာလဂှ်တုန်လေဝ် အိုဿီုမၞိဟ်တြုံမၞိဟ်ဗြဴ မဍိုက်ပေၚ်တဴကဵုအဝယ်မသုန်ပြကာ နကဵုသၠုၚ်သဝ် ကြောံဇြာဲ သွက်ဂွံဂၠါဲဟီုဗျိရၚ်သ္ကံ ဟွံမွဲသက်သက်ရ ဆဂှ်ဟွံသေၚ် မပ္တံကဵုဒမျိုၚ်ဗ္တာၚ်ဗ္ကေတ် သမြီအးကီု သ္ဇက်ဂွံဗျိဟီုဂးရၚ်သ္ကံ ဟွံမွဲရ မပ္တံကဵုအဝယ်ကုန်ကိုက် ကွကွေန် ဂၠုသပါအသံက်ကဠာ ခါဒုတ်ပြၚ်ဏဳတံဂှ် ဟွံမွဲရ မပ္တံကဵုယဲ(၉၆)ကီု အိုဿီုပရိုက်ဥပ္ပဒြဴ ဝိဝဲသတြုသၞတံဂှ်လေဝ် ဟွံဒးညာတ် ဟွံဒးမိၚ်သက်သက်ရ


ယွံသာရိပိုတ် ပ္ဍဲကာလဂှ် ဗောဓိသတ်အရဳယျ မွဲဟာန်ကေုာံ ကောန်သမ္ဘာ အဃောမစသိုၚ်ဝေၚ်ဂြိုၚ်ဒၟံၚ် ပ္ဍဲပြာသာဒ်သီုကဵုဍိက်ကမၠောန် မကၠောန်ၜိုတ်သဳကၠဳဂၠိုၚ်ကဵုဗနဳ ကွိၚ်ကွိုက်အခိုက်နာနာသာ်ဂှ် နကြဳဇှ်ပါရမဳဗောဓိသတ် ကၠုၚ်ကောံညဳသာအိုတ်တုဲ ကတဵုဗဒှ်လောကဇျာန် သီုကဵုယာန်ပြာသာဒ်ဂှ် ညံၚ်ရဴက္ၜိုပ်ၜၚ်ထဝ်ပါတဟံသာ ပဝ်ယာန်အာပ္ဍဲလ္တူအာကာသဂှ်ကီု ကလာၚ်တိတ်အာရ ပ္ဍဲကာလဂှ် ညးမၞုံပၟိက်သၟိက်ဂွံဗက်တိတ်အာဂြိုဟ် ကရောံဗောဓိသတ်ဂှ် ဟိုတ်နူဣဒ္ဓိကြဳဇှ်ဗောဓိသတ်ကီု ဟိုတ်နူအာဏာသၟိၚ်သင်္ခစက္ကဝဝ်ကီု နကဵုအာဏာဒေဝတဴဂမၠိုၚ်ကီု နကဵုတရဴအာကာသဟေၚ် ကလာၚ်ဗက်အာအိုတ်ရ


ယွံသာရိပိုတ် ပ္ဍဲကာလဂှ် သၟိၚ်ဗြီုတုန်လေဝ် က္ဍိုၚ်ဇၞော်မွဲ မၞုံသၠဲပိယောဇနာဂှ် မဖ္ဍာန်ဗက်တိတ်အာ တြုံတၠပါရမဳရ သၟိၚ်အိန်ပၠန်တုန် နကဵုကၞသၚ်သ္ပဝ်ဒတုံဂှ် ဗၞတ်တြဴစှော်ဟတ် ရပ်ကေတ်တုဲ သာဓု သာဓု ဗဂိုဟ်ဗြုအာရ ကောန်ဒေဝတဴသုတတံတုန် ရပ်ကေတ်ပၞိက်ကၟဝ်သော်ဗ္တသတ်တုဲ မဗက်တိတ်အာဗောဓိသတ်ကီုရ ကောန်ဒေဝတဴတုဿိတာပူတုန်လေဝ် နကဵုသၠပၞိက်မၞိက်သက်က် ရပ်ကေတ်တုဲ ဗက်တိတ်အာကီုရ ကောန်ဒေဝတဴပဉ္စသိက္ခတုန်ဂှ် ရပ်ကေတ်ကွိၚ်ထဏထဝ်တုဲ ဗက်တိတ်အာကီုရ ဒေဝတဴလောကပါလသီုညးပန်ဂှ် ရပ်သၞာ်တုဲ လွိၚ်ဗက်တိတ်အာရ အိုဿီုကုမ္ဘန်ၜါလက်ကဵုဒ္စါံစှော်လ္ၚီ (ၜါကိုဋ်ကဵုဒ္စါံလက်) တံဂှ် ရပ်ကေတ်လွဟ်လက်နက်တုဲ ဗက်တိတ်အာအိုတ်ကီုရ။ ကောန်ဒေဝတဴဗြဴ မတဴပ္ဍဲဘုံဘုမ္မဇဵု ရုက္ခဇဵု အာကာသဇဵုတံဂှ် ရပ်ကေတ်ကၠေပ်ထဝ် ဗာန်ထဝ် ပ္ကဴထဝ်တံဂှ်တုဲ ဗက်တိတ်အာ ဌာန်တြုံတၠပါရမဳဂှ်ကီုရ ဆဂှ်ဟွံသေၚ် အိုတ်ကဵုကောန်ဒေဝတဴအသူတံဂှ်လေဝ် ရပ်ကေတ်က္ဍိုၚ်ဇၞောဝ်အလာံတုဲ သီုကဵုမဝေၚ်ဂြိုၚ်ကတိုၚ်ကမဟ် လှ်ေဒယှ်ေတဴနကဵုရမျာၚ်ဒိပ် မမိပ်ဇြိပ်တံဂှ် ဗက်တိတ်အာကီုရ ။


သၟိၚ်ဒေဝတဴဂမၠိုၚ်တုန်လေဝ် ရပ်ကေတ်ပၟတ်ပၞာၚ်သ္ဍဴမၞိက်တုဲ ဗက်တိတ်အာရ ဆဒေဝတဴတံဂှ် ဗက်တိတ်အာဟွံသေၚ် မပ္တံကဵုသၟိၚ်သ္ပဝ် တၠကြိက်ထဝ်တံဂှ် တိၚ်စံၚ်တုဲ ဗက်တိတ်အာကီုရ ကိန္နရဳတံဂှ်လေဝ် နကဵုကွိၚ်ရမျာၚ်ဒယှ်လှ်ေတံဂှ် ဗက်တိတ်အာပၠန်ရ။ အိုဿီုဒေဝတဴဂန္ဓဝ်တံဂှ်တုန်လေဝ် သီုကဵုဗရုကွိၚ် မတိၚ်တိုက်တဴစံၚ်ဒိပ်တုဲ နကဵုလှ်ေဒယှ်ေဒိပ် ဒေဝတဴဂမၠိုၚ်တံဂှ် လှ်ေဒယှ်ေဗက်တိတ်အာရ မပ္တံမၞိဟ်ဒေဝတဴအိုဿီုတံဂှ် ဝေၚ်ဂြိုၚ်ဒယှ်ေလှ်ေတိၚ်တိုက် ဗက်တိတ်အာဗောဓိသတ်အိုတ်ရ။ ရဴသာ်ဝွံ ပုရိသာတ်မၞိဟ်ဒေဝတဴကောံဓရီု တွဳဗွိုၚ်ကတိုၚ်ကမဟ် သီုကဵုသောဗနုဟ်စိုတ်တံဂှ် ဗဒှ်တဴကွိၚ်သ္ဘၚ်တုဲ ဗက်တိတ်အာရ သၟိၚ်ဗြီုတုန် ဂွံညာတ်ကေတ်တုဲ အိုဟ်တၟိုဟ်သီုကဵုမရှ်ေသှ်ေရဴဂဴတုဲ တက်ကၞက်ဇဵုဇာ ကဵုတဴသာဓုကာ လလောၚ်ထဥကေုာံမွဲဟာန် သီုကဵုလွဳမာန်ပြသာဒ်ဂှ် ဍိုက်ယာန်အာကာသတုဲ ဗက်တိတ်အာကရောံတၠပါရမဳအိုတ်ရ ။


တၞံဆုပလိုဟ်ဗောဓိဂှ်မတွံဂး တၞံဆုအဂၞုဌာန်ဇရေၚ်ဂှ်ဟေၚ် နူအာကာသဂှ်ယာန်စှ်ေတုဲ ပ္ဍဲဌာန်ပၞေဟ်တိ ပ္ဍဲအဃောဇကုမဂဇအ်ဂှ်ဟေၚ် ဒ္ဂေတ်ဒုက္ကရစရိယ ဗၞတ်တြဴတ္ၚဲရ တြဴတ္ၚဲပေၚ်တုဲ တိတ်ကၠုၚ်နူဂၠံတိုက် မၞုံကဵုကျာ်သြဳတုဲ သၟိၚ်ဗြီုပြာပ်နၚ်ကဵုသ္ၚာ မကတဵုဒှ်ပ္ဍဲဍောၚ်ပ္ကဴဒကှ် ကုဗောဓိသတ် တၞဟ်နသွက်ဂွံပခမဳတုဲ ကဵုသ္ၚာမှာဗြီုဂှ်ဟေၚ် ဂိုၚ်ၜးသၠာဲကေတ်တုဲ ပကၠေံခမဳရ အိုတ်ကဵုပုရိသာတ် ညးမဗက်တိတ်အာ ကရောံဗောဓိသတ်ဂှ် ဒှ်ခမဳအိုတ်တုဲ ကလိဂွံတန်တဴ ပ္ဍဲမဂ်ဖဵုအိုတ်ရ။

(၂၃)ခဏ်ဂၞကျာ်စန္ဒမုက္ခဳ ကဵုဒါန်ပုၚ်ပၟန်ဍာ်တှ်[ပလေဝ်ဒါန် | ပလေဝ်ဒါန် တမ်ကၞက်]

ယွံသာရိပိုတ် ဂၞကျာ်စန္ဒမုက္ခဳ ပ္ဍဲဌာန်ဂှ်ဟေၚ် ကဵုဒါန်ပုၚ်ပၟန်ဍာ်တှ် မစုတ်လဝ်ရှ်သြဇာဒိပ်ရ ကဵုပိုန်ဒါန်ပုၚ်ပၟန်ဒိပ် ဂၞကျာ်စန္ဒမုက္ခဳတုဲ ပ္ဍဲပယျာံသဝ်တ္ၚဲဂှ် ဗွဲဒိုဟ်သၠုၚ်ကျာပ္ၚောံအာကဵုဒိုဟ်ပလိုတ် တၞံဆုအဂၞုဂှ်တုဲ ပ္ဍဲဇရေၚ်မဟာဗောဓိ ပလိုဟ်တၞံဆုအဂၞုဂှ်ပၠန် ဟွံသ္ၚောဲဟွံညန် ပလ္လၚ်ထဝ်မွဲ (ပၞၚ်ထဝ်) မၞုံအစံက်သၠုၚ်တြဴစှော်ဟတ် မဂပ်ဝ်ဂ္ညိဂ္ညာတ်လဝ် နကဵုရတ်ထပှ်ပြကာ ကၠုတ်တိုန်တုဲ ပ္ဍဲလ္တူပၞၚ်ထဝ်ဂှ် တိုန်တက်ထွာဲဇမၞးတုဲ ဗွဲလောကဓါတ်ဒိုဟ်ဗၟံက်ဂှ် သ္ၚဳမၠာ်တုဲ ရံၚ်မွဲတဴရ။


အိုတ်ကဵုပုရိသာတ် မၞိဟ်ဒေဝတဴ မတွဳဗွိုၚ်ဒၟံၚ်တဴဂှ် ချိုန်ခဏဂှ် ဂွံဇၞးကေတ်ပၞာန်ဒေဝတဴမာတုဲ ပ္ဍဲပဌမပယျာံဂှ် ကလိဂွံဂမြၚ်ညာဏ်ဒိပ် ပုဗ္ဗေနိဝါသညာဏ်ရ ပ္ဍဲဒုတိယပယျာံသ္ဂါဗ္တံဂှ် ကလိဂွံဒိဗ္ဗစက္ခုညာဏ်ပၠန်ရ ပ္ဍဲတတိယပယျာံဖလာၚ်ယးဂှ်တုန်လေဝ် ကလိဂွံအာသွက္ခညာဏ်ပၠန် ပ္ဍဲစတုတ္ထတလကွိုန် ပယျာံတ္ၚဲမတိုန်ဂှ် နကဵုအလဵုဇကုဟေၚ် ဂြၚ်တီကေတ်ဓရ်သစ္စပန်တုဲ ကလိဂွံသဗ္ဗညုတညာဏ်ရ ဂွံဇၞးကေတ်မာမသုန်ပြကာတုဲ ကရီုဥဒါန် မပ္တံအနေကဇာတိသံသာရံဂှ် ကြီုတဴရ။

(၂၄)ခဏ်ကလိဂွံသဗ္ဗညုတဥာဏ်တုဲ ပြာပ်အာဥဒျာန်ဣသိပတန[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲဇရေၚ်ပလိုဟ်ဆုအဂၞုဂှ် ဗၞတ်(၄၉)တ္ၚဲဟေၚ် ပေၚ်ပၠန်တုဲ နလၟေၚ်ဓမ္မတာကျာ်တြဲတမၠာတံဂှ် သ္ပဟိုတ်နူကဵုမှာဗြီုတံ စှ်ေအာတ်အခေါၚ် ကဵုလလောၚ်တွံဓရ်ဓမ္မစက်တုဲ ပ္ဍဲကာလပ္ၚောံအာတွံဓရ်ဓမ္မစက် ဌာန်ဣသိပတနဥဒျာန်ဂှ် နူကဵုဂၠးတိဇၞော်ဂှ် မၞုံကဵုထာၚ်ဍောၚ်ပ္ကဴဒကှ် မတုပ်တဴညံၚ်ရဴသာ်ဇာၚ်ၚုဂှ် ကၠုတ်တိုန်ကၠုၚ် ဂွံယဵုဒုၚ်ဂၠးဇိုၚ်သဗ္ဗညုရ ထာၚ်ဍောၚ်ပ္ကဴဒကှ်မွဲမွဲတုန်လေဝ် ဇမၞော်ထာၚ်ဍေံဂှ် (၃)ဟတ်မဒှ်ရ ထာၚ်သၟတ်တံဂှ်တုန် ၜါဟတ်မဒှ်ရ ပ္ဍဲဒကှ်မွဲမွဲဍောၚ်ဂှ် ထိုက်ဒကှ်ဗၞတ်စှ်နမဒှ်ရ ရာဒနာကဵုကျာ်တြဲအရဳယျမေတ္တေယျ မဂ္ၚေၚ်အာဌာန်ဒေသစရိတ်ဂှ် ဍောၚ်ပ္ကဴဒကှ်ဂှ်ဟေၚ် ဒးသာထ္ၜဒုၚ်ဂၠးဇိုၚ်သဗ္ဗညုတညာဏ်ရ။


လျးတြဴသာ်မလောံတဴမွဲခ္ဍတ် မဂြိပ်တိတ်ကုကျာ်တြဲအရဳယျမေတ္တေယျဂှ် ခၠၚ်သမဟ်မဂြိပ်တသာတ်တိတ်အာ ဗၞတ်တၟာတၞံတာတုဲ ဟိုတ်နူကြဳဇှ်ကျာ်တြဲအရဳယျဂှ်တုဲ သီုကဵုစှ်လ္ၚီလောကဓါတ်ဂှ်ဟေၚ် လျးတၟးတိတ်အာ ညံၚ်ရဴသၟိၚ်တ္ၚဲဗၠာဲ မဆာဲဒၟံၚ်လ္ဒေါဝ်တကံပန်ကီု လၟိုန်ကာလဟေၚ် ဗ္တံလေဝ်ညံၚ်ရဴတ္ၚဲရ ပ္ဍဲကာလကျာ်တြဲမတွံဓရ်ဓမ္မစက် ပ္ဍဲဂြိုပ်မိဂဒါဝိုန်ဂှ် ဗွဲလ္တူဒဵုဘဝက် ဗွဲသၟဝ်ဒဵုအဝိက် ဗွဲလၟေၚ်ဟၟဲကဵုသၟေဟ် အိုဿီုအနန္တစက္ကဝါ ခၠၚ်တသာတ်ဗျာပ်အာအိုတ်ရ ဇန်တံဂမၠိုၚ်တုန်လေဝ် ကာလစာၚ်မတိုန်ဓနီဂှ် မဂွံတီဗ္တံရ ကာလစာၚ်စှ်ေနူဓနီပၠန်ဂှ် မဂွံတီအလန်တ္ၚဲယးရ ပ္ကဴမရာၚ်နူဂယး ပ္ကဴရာၚ်သဝ်တ္ၚဲတံဂှ် ပ္ကဴရာၚ်တုဲ မဂွံသ္ပစၟတ်သမ္တီ ဗ္တံတ္ၚဲရ။


ပ္ဍဲကာလမတွံဓရ်ဓမ္မစက်ဂှ် ဂကောံပုရိသာတ်မၞိဟ်ဂမၠိုၚ် ဗၞတ်စှ်တြဴယောဇနာကီု ပုရိသာတ်ဒေဝတဴတုန်လေဝ် ပေၚ်က္ဍတ်တဴ အလုံစက္ကဝါ စဵုကဵုစိုပ်အာဗြီုအကနိဌာတေံဂှ် ကောံဓရီုပေၚ်ဂၠက်က္ဍတ်တဴရ အဃောမကောံဓရီုမံၚ်ဂှ်ဟေၚ် ပ္ဍဲကဵုလ္ဒေါဝ်ပုရိသာတ်ဂမၠိုၚ်တံဂှ် မၞုံသၠဖ္ဍာန်ဇၞော်မွဲသလဲ(၁၂)ယောဇနာ မၞိဟ်လေဝ်ဟွံဒးရပ် ဒေဝတဴလေဝ်ဟွံဒးရပ် ပၟတ်လေဝ်ဟွံတူဗြဲလေဝ်ဟွံဍုက် ကၠိုက်လ္ၚေၚ်ဟွံစပ်ဟွံဗာန် စဵုကဵုမလုပ်နိဗ္ဗာန် ဖ္ဍာန်ဒၟံၚ်လ္တူကၞိပ်ကျာ်တြဲအရဳယျ လၟိုန်ကာလဗ္တံတ္ၚဲတုဲ ဒၟံၚ်တဴရ သၠဖ္ဍာန်ဇၞော်မၞုံသလဲ(၁၂)ယောဇနာ သီုကဵုမတန်တဴဒၟံၚ် နကဵုခရေဲထဝ် သၠဇြဲထဝ် ကမၠံထဝ် ကၞာဲထဝ် မတၟုဲတဴနကဵုရတ်ထပှ်ပြကာ ညံၚ်ရဴမကွက်လဝ် ပ္ဍဲကၞာရတ်ဂှ်ကီု သ္ပတံနူတ္ၚဲတွံဓရ်ဂှ်တုဲ ဖ္ဍာန်မံၚ်ပ္ဍဲလ္တူကၞိပ်ကျာ်တြဲအရဳယျမေတ္တေယျ ဗ္တံတ္ၚဲလၟိုန်ကာလ ဟဂွံသ္ကုတ်ခြာတုဲ မၞုံတဴရ မၞိဟ်လေဝ်ဟွံဒးရပ် ဒေဝတဴလေဝ်ဟွံဒးရပ် ပၟတ်လေဝ်ဟွံဂွံတူ ဗြဲလေဝ်ဟွံဂွံဍေက် သၠဖ္ဍာန်ရတ်ဂှ် မသက္ကုကၠိုက်လ္ၚေၚ် မခၠၚ်မံၚ်တဴ စဵုကျာ်တြဲစဴနိဗ္ဗာန် ဍေံဖ္ဍာန်မံၚ်တုဲ မၞုံတဴရ။

(၂၅)ခဏ်ကျာ်တြဲတွံဓရ်သစ္စပန်[ပလေဝ်ဒါန် | ပလေဝ်ဒါန် တမ်ကၞက်]

ကျာ်တြဲအရဳယျမေတ္တေယျ ကာလမတွံဓရ်သစ္စပန်ဂှ် မၞိဟ်ပက္ကတိလေဝ် မွဲလက်ကောဋိကိုဋ်ကီု ဒေဝတဴလေဝ် မွဲလက်ကောဋိကိုဋ်ကီု ဂွံတိတ်ဗၠးအာ နူဒဒိုက်သံသာဝဋ်အိုတ်ရ။ ယွံသာရိပိုတ် တၠအရှန်မွဲလက်ကောဋိကိုဋ် မဍိုက်ပေၚ်တဴ ကေုာံ အဘိညာဏ်မသုန်ပြကာဂှ် တွဳဗွိုၚ်တဴကျာ်အရဳယျရ။


ပ္ဍဲကာလဂှ် သၟိၚ်သင်္ခစက္ကဝဝ်တုန်လေဝ် တဴပြာသာဒ် မတၟုဲတဴနကဵုရတ်ထပှ်ပြကာ အပ်ပြာပ်ဇိုန်နှၚ်ကဵုဒါန် ကုသၚ်မၞုံပဓါန်ကျာ်တုဲ နကဵုပစ္စယ်ပန်လေဝ် တရိုပ်ကဵုဒါန်တုဲ သီုကဵုတွဳဗွိုၚ်မွဲလက်ကိုဋ်တံဂှ် မွဲဟာန်ကေုာံ သီုဂၞကျာ်မှောၚ်မဂမၠိုၚ် သ္အဳဗိုၚ်ပြာပ်ကၠုၚ်ဇရေၚ်ကျာ်တုဲ ဨဟိဘိက္ခု ကျာ်တြဲဂးတုဲ ဂွံဒှ်တဴခမဳအိုတ်ရ ကျာ်တြဲတုန်လေဝ် ရာဌာန်သတ္တံ မကြိုက်ကဵုဓရ် ညးမကြံၚ်ဍုဟ်တံဂှ် ဗက်ဟံၚ်ဗစိုပ်လၟိုန်ကာလရ။

(၂၆)စၞောန်ထ္ၜးအဆက်တၞောဝ်ကျာ်[ပလေဝ်ဒါန် | ပလေဝ်ဒါန် တမ်ကၞက်]

မိကျာ်တြဲမေတ္တေယျဂှ် ဗမၞးဗြဴမၞုံယၟုဗြဟ္မဝတဳရ မအံက်ကျာ်တြဲဂှ် မၞးပြောဟိတ် မၞုံယၟုသုဗြဟ္မာရ ဂၞကျာ်တြုံဗောဓိသတ် အလံၚ်ကျာ်တြဲဂှ်တုန်လေဝ် မၞုံယၟုစန္ဒမုက္ခဳရ ကောန်ကျာ်တုန်လေဝ်မၞုံယၟု ဗြဟ္မဝံသရောၚ် ကွးသတုံကျာ်ပၠန်တုန် အသောကမ္ဂးယၟုရ ကွးဗွဲဇွိဂှ် ဗြဟ္မဒေဝမ္ဂးယၟုရ ကွးကမၠောန်ကျာ်ဂှ် သဳဟမ္ဂးယၟုရ ကွးသတုံမိကျာ်ဂှ်ပၠန်တုန် ခမဳဗြဴသုမနမ္ဂးယၟုရ ကွးဇွိမိကျာ်တြဲဂှ် ခမဳဗြဴပဒုမမ္ဂးယၟုရ ။

(၂၇)စၞောန်ထ္ၜးဗၞတ်ဗုတ်ပလိုဟ်ဗောဓိတၞံဆုအဂၞု[ပလေဝ်ဒါန် | ပလေဝ်ဒါန် တမ်ကၞက်]

ဆုပလိုဟ်ဗောဓိဂှ် ဒှ်ဆုအဂၞုရ ဗွိုက်ဆုပလိုဟ်ဗောဓိဂှ် ထပှ်စှော်ဟတ်မဒှ်ရ ဇမၠိၚ်(ၝောံကၞာၚ်)ကၞာၚ်ဇၞော်ဒ္စိတ်ကၞာၚ်ဂှ် ဗၞတ်ဗ္ၜတ်ကၠံၜါစှော်ဟတ်ရ တၞံဆုအဂၞုပလိုဟ်ကျာ်ဂှ်တုန် ညံၚ်ရဴအမြာဲကြက်စၠန်ကီု ဒစးကျာ လမၞေၚ်ကျာ မောဝ်ပ္ဍးအာဗၞတ်စှ်ၜါယောဇနာကီုရ ခၟောံဍောၚ်ပ္ကဴမွဲမွဲဍောၚ်ဂှ် ဗွိုက်စှ်ၜါက္ဍရ တဝ်ခၟောံပ္ကဴဂှ်လေဝ် တၟာရိကွဳရ ကာလဍေံမရာၚ်သ္အးဂှ်တုန် ဗၞတ်တၟာသလာကွဳမဒှ်ရ တၞံဆုအဂၞုပလိုဟ်ကျာ်ဂှ်တုန်လေဝ် ပတွဵုနူကျာ်တြဲမတဵုဒှ်တုဲ ဍောၚ်ပ္ကဴမကဴရာၚ်ဂျဒၟံၚ်ဟေၚ် ဟွံသေၚ်ဟွံဇြ ပေၚ်ဒ္စါံစှော်လ္ၚီသၞာံတုဲ ကျာ်တြဲလုပ်နိဗ္ဗာန်မှ ကာလဂှ် ပြဟ်ဒတုံစှ်ေရ ညံၚ်ရဴပကောံဗဝ်လဝ် ပ္ဍဲလ္တူအှော်ကြက်စၠန်တုဲ မစွံပတိုန်လဝ်ကီု ပြဟ်ဒတုံစှ်ေရအိုတ်ရ ပ္ဍဲပွဳပွူတၞံဆုအဂၞု ဗၞတ်မွဲမွဲယောဇနာဂှ် ကဴတၞဟ်ဟ်သာ်ကီု သတ်ဆုတၞဟ်ဟ်သာ်ကီု သီုကဵုမဂြောပ်ဗ္ဒန်လဝ် နကဵုပ္ကဴသတ်ဂေတ်သွဝ်ဒတုဲ သီုကဵုမတန်တဴ ကဴသတ်တဴအိုတ်ရ။


ပ္ဍဲဌာန်ပွဳပွူပလိုဟ်ဗောဓိ ဗၞတ်မွဲယောဇနာဘာ်ဂှ် မၞုံတဴကဵုဗ္တဳထဝ်ရတ်ရောၚ် ပ္ဍဲဌာန်ဗ္တဳထဝ်ရတ်တံဂှ်လေဝ် မပ္တံပ္ကဴဒဵုပ္ကဴဍာ် မၞုံကဵုသာ်တၞဟ်ဟ် ကျေဝ်ဂေါဝ်မောဝ်ပ္ဍးတဴဂမၠိုၚ်ကီု မပ္တံကှ်ေ ပြာန် အနာၚ် သရဖဳ မာလဳ ဂမုၚ် ဂယာၚ်ကြုက်အသုက်မၠဵု ဇဵုမၠဵုဆုတံဂှ် ညံၚ်နဲညးမတပ်ဇန် ဇၟန်ကဴတံဂှ် မကွက်လကဲလဝ်ကီု လျောဝ်လျောဝ်လုပ်အာကဵုဗောဓိပလိုဟ်အိုတ်ရ။


ပ္ဍဲအကြာအကြာကၞာၚ်ဗောဓိပလိုဟ်ဂှ်လေဝ် မပ္တံဒကှ်ၜါသွာပိဍောၚ်ပ္ကဴတံဂှ် သီုကဵုမထုပ်လဝ်တုဲ ကတဵုဒှ်ရ ပ္ဍဲကဵုပန်ဒိုဟ်ဆုပလိုဟ်ဗောဓိဂှ်တုန် ကၞာထးရတ်ဇြပ်ထဝ်ဂမၠိုၚ် ကတဵုဒှ်ရ ပ္ဍဲလ္တူကၞာၚ်ဆုပလိုဟ်ဂှ်တုန်လေဝ် ဍောၚ်ပ္ကဴဒကှ်ဂမၠိုၚ်လေဝ် ညံၚ်ရဴကွဳသၠဖ္ဍာန်ဒကှ် မသုန်ပြကာဂှ်ကီု မၞုံတဴရ ဂစေံသတ်တၠသၞေၚ်ဂမၠိုၚ် မပဝ်အာနကဵုတရဴအာကာသတံဂှ်တုန်လေဝ် ဗွဲသွဝ်သတုံဟေၚ် မပဝ်ဂေတ်အာတဴအိုတ်ရ ပ္ဍဲဇရေၚ်ဆုပလိုဟ်ကျာ်ဂှ် မသက္ကုဂစေံကဏေမ် သတ်တၠသၞေၚ်ဂမၠိုၚ် ဟွံဂံၚ်ဍုန် ဟွံဂံၚ်ဆိုက်ညန်အိုတ်ရ ၜိုန်ကျာမပိုက်တဴကီုလေဝ် သၠဆုပလိုဟ်ဗောဓိဂှ် ဟွံဂွံချဳဂရာၚ်သက်သက်ရ အိုတ်ကဵုမၞိဟ်ဒေဝတဴ အိန်ဗြီုဂမၠိုၚ်တုန်လေဝ် ခါမသ္ၚဳရံၚ်မၠာ် မွဲပလိုဟ်ဗောဓိတၞံဆုအဂၞုဂှ်တုဲ မဗဵုတဴဟွံဖဲရ။

(၂၈)ဗီုကၞာထးထဝ် ခၞိၚ်ထဝ်ဇၞော်မံက်တိုန်[ပလေဝ်ဒါန် | ပလေဝ်ဒါန် တမ်ကၞက်]

ယွံသာရိပိုတ် နနဲသာ်ဝွံ မဍိုက်ပေၚ်တဴ သီုကဵုအရံၚ်အံၚ်သူလျးဂှ် မဒှ်တဴ ပ္ဍဲပလိုဟ်တၞံဆုအဂၞုဂှ်ရ ကျာ်တြဲအရဳယျမေတ္တေယျတုန်လေဝ် မၞုံကဵုဂုဏ်လက်သန်ဇၞော်သၟတ်တံဂှ် ညံၚ်ညးမစဳဇန်လဝ်ကီု မၞုံတဴရ ညံၚ်ရဴညးမပ္ဍဵုပ္ဍိုက်ကၠေံ ကျာ်သြဳသၟိၚ်ဗြီုကီု မၞုံတဴကဵုကျာ်သြဳရ။ ယွံသာရိပိုတ် ကျာ်တြဲအရဳယျမဇြုၚ်သ္ဍိုက်ဂှ် နူဂၠးတိဇၞော်ဒကးတိုန်တုဲ ကၞာထးထဝ် မတၟုဲတဴနကဵုရတ်ထပှ်ပြကာ မၞုံဗၞတ်(၁၂)ယောဇနာဂှ် မကၠုတ်တိုန်ကၠုၚ်ရ ပ္ဍဲလ္ဒေါဝ်ကၞာထးရတ်ဂှ် ပၞၚ်မၞိက်သက်သက် မတၟုဲတဴနကဵုရတ်ထပှ်ပြကာ မကၠုတ်ကၠုၚ်ရ။

မပ္တံကမၠံဇာထဝ် သၠဇြဲထဝ် ကရိုဏ်ကၞာဲမတလာဲတလာဲတဴဂှ်ကီု နကဵုက္ဍိုၚ်ဗ္တာၚ်ဒိပ် သက္ကုလေမာဲဟေၚ် ကတဵုဒှ်ရ ယွံသာရိပိုတ် ဒေဝတဴဂမၠိုၚ်တံဂှ် ပ္ကဴထဝ်စရှ် မဂပ်ဝ်နိမိတ်ဗဒှ်စဳဇန် နကလောန်ဒေဝတဴတၞဟ်တၞဟ်သာ်တံဂှ်တုန်လေဝ် ပ္ကဴထဝ် ပ္ကဴသြန် ပ္ကဴမၞိက် မၞုံတဴကဵုတဝ်စရှ် ကတဵုဒှ်ရ။ ဇၞောဝ်အလာံမတၟုဲတဴနကဵုရတ်တံဂှ် လွိၚ်ပိုက်သွဝ်တဴ ညံၚ်ရဴဇုက်လလဳ ဖျဳဖျဳဖျဴဖျဴရ ပၟတ်ပၞာၚ်သ္ဍဴရတ် ခေါ်ကၠေၚ်သ္ဍဴရတ်တံဂှ် မၞိဟ်လေဝ်ဟွံဒးပ္ဍေန် ဒေဝတဴလေဝ်ဟွံဒးစံၚ်ဗဂဵု အလဵုလဵုဍေံ မဂဵုတၟးတဴဒၟံၚ်ဟဴဟဴ ညံၚ်ရဴပၟတ်ဓါတ်ဂှ် ဒှ်တဴလၟိုန်ကာလရပ္ကဴဒိပ်တံဂှ်လေဝ် မောဝ်ပ္ဍးတဴဟွံတီကာလကီုရ။

ပ္ဍဲပွဳပွူကၞာထးရတ်ဂှ် (မာန်ဒါတ်ရတ်)နုၚ်နိဓိထဝ် နုၚ်နိဓိသြန် နုၚ်နိဓိမၞိက်တံဂှ် ကတဵုဒှ်ရ ပ္ဍဲပွဳပွူကၞာထးရတ်ဂှ် ယာတ်ဒိပ်မၞုံကဵုသာ်မသုန်သာ် ကတဵုဒှ်ရ မပ္တံပ္ကဴဗြဲရတ် ပ္ကဴကြကတ်ရတ်တံဂှ် ဟွံပိုတ် ဟွံပိုတ်ဟေၚ် ဗဂူဖျေံရ ပ္ဍဲပန်ဒိုဟ်ဒကဴကၞာထးရတ်ဂှ် မၞုံခဏိၚ်ဇၞော် ဗၞတ်ပိစှော်ဟတ်ဂှ် လကဲလကဲတဴရ ယဝ်ရကျာကသဳပိုက်တုန်လေဝ် ဗရုခဏိၚ်ဇၞော်ဂှ် ဗြုလလောၚ်အာ အလုံဂၠးတိစက္ကဝါဟေၚ် ဂွံမိၚ်တဴအိုတ်ရ ကျာ်တြဲပၠန်တုန်လေဝ် ပ္ဍဲလ္တူပၞၚ်မၞိက် မဂပ်ဝ်ဂ္ညိဂ္ညာတ်လဝ် နကဵုရတ်ထပှ်ပြကာ တက်ထဝါဲဇမၞးတုဲ မတွံဓရ်ကုမၞိဟ်ဒေဝတဴဂမၠိုၚ်တုဲ ကဵုဒဒှ်ခမဳရ။

(၂၉)စၞောန်ထ္ၜးဖဵုစရၚ်ဓရ်ကုသဵုဗောဓိသတ်အရဳယျ ကေၚ်ကဵုကၠုၚ်လဝ်ဒါန်ကုကျာ်တြဲ ပ္ဍဲဘဝအတိက်[ပလေဝ်ဒါန် | ပလေဝ်ဒါန် တမ်ကၞက်]

ကေၚ်ကဵုကၠုၚ်လဝ်ဒါန်ကုကျာ်တြဲ ပ္ဍဲဘဝအတိက်တေံ ဟိုတ်နူအနုဘဴပါရမဳကျာ်တြဲအရဳယျမေတ္တေယျ မရာဒနာမိက်လဝ်တုဲ ရာဒၞါဲကျာ်တြဲမဂ္ၚေၚ်အာဂှ် မပ္တံကၞာရတ် သၠဖ္ဍာန်ရတ် ပ္ကဴထဝ် က္ဍိုၚ်ထဝ် ဇၞောဝ်ထဝ် သ္ဍဴထဝ်တံဂှ် မ္ဒးကလာၚ်ဗက်အာ ရာဒၞါဲဌာန်ကျာ်တြဲမဒေါံ မဇအ်ဒတဴတံဂှ် ဍေံမကလာၚ်ဗက်အာကီုရ။


ယွံသာရိပိုတ် ကျာ်တြဲအရဳယျ ကာလမတွံဓရ် ဂဇအ်လ္တူပၞၚ်ရတ်ဂှ်တုန်လေဝ် ဗၞတ်စှ်လ္ၚီစက္ကဝါဟေၚ် ကဵုလလောၚ်မိၚ်အာမ္ဂး ဂွံမိၚ်ကေတ်အိုတ်ရ ဗောဓိသတ်အရဳယျမေတ္တေယျဂှ်တုန် အိုတ်ကဵုကျာ်တြဲဂမၠိုၚ် မလောန်စဴအာတံဂှ် မပ္တံဘာကီု ဇြပ်ကီု ပၞၚ်ကီု ပိဏ္ဍပါတ်ကီု သ္ပိုၚ်ဂၠးသ္ၚာသွဝ်ကီု မပ္တံကြက်ပၞဟ် ကြက်စၠန်ကီု က္ဍိုၚ်ကီု ဇၞောဝ်ကီု ပၞတ်ပၞာၚ်သ္ဍဴကီု နုၚ်မ္ၚဵုကီု သၠဖ္ဍာန်ကၞာရတ်တံဂှ်ကီု ဒကှ်တံဂှ်ကီု ပ္ဍဲစရၚ်ဓရ်ကုသဵု မဂွံကဵုလဝ်ဒါန်တၞဟ်ဟ်တံဂှ် ကောံဓရီုဆဝ်မ္ၚုဟ်မ္ဂးဂှ်တုန် ။ အိုတ်ကဵုကျာ်သြဳမၞုံ ပ္ဍဲလောကဓါတ်တံဂှ် သၟဟ်သၟန်မွဲဟာန်ကၠုၚ်ကောံ ပ္ဍဲကၞာထးရတ်ဂှ်တုဲ ညံၚ်ရဴမစွဴပတိုန်လဝ်ကီု ကောံသၟဟ်တုဲ မၞုံတဴရ ဆဂှ်ဟွံသေၚ် ပ္ဍဲအပ္ဍဲကၞာထးရတ်ဂှ်တုန် ပ္ကဴသြဴမြမောဝ် မပ္တံကဵုပ္ကဴပ္ၚာ ဇမ္ပါကှ်ေပြာန် အနာၚ် သာရဖဳ မလဵုစေဝ်တံဂှ် ထီုပးမောဝ်ပ္ဍးတဴရ ။ ဆဂှ်ဟွံသေၚ်ပၠန်တုန် အိုတ်ပုရိသာတ် ဒါယကာတၠဒါန်ဂမၠိုၚ်တံဂှ် ကၠုၚ်နိမန်ကျာ်နကဵုပိဏ္ဍပါတ်တုဲ ပ္ဍဲကာလကျာ်တြဲမက္ညအာဂှ် မပ္တံကၞာရတ် သၠဖ္ဍာန်ရတ်တံဂှ် ညံၚ်ရဴမတီကေတ်စိုတ်ကျာ်တြဲကီု ဍေံမကလာၚ်ဗက်အာ လ္တူအာကာသရ စိုပ်သ္ၚိဒါယကာတၠဒါန်တံဂှ်တုဲ ပ္ဍဲဌာန်ဝၚ်တြၚ်သ္ၚိတံဂှ် ဍေံမတန်တဴရ။


နကဵုဗရုခဏိၚ်ပ္ဍဲကၞာထးတံဂှ် ဍေံမဗြုပၟိၚ်ညးအိုဿီု ဍေံကွိၚ်တဴ ဒဒှ်ကျာ်မက္ညစဴကၠုၚ်ဂှ် မၞိဟ်ဒေဝတဴ နာ်သ္ပဝ် ဂန္ဓဝ်အိုဿီုတံဂှ် ကၠုၚ်ကောံမွဲဟာန် ကၠုၚ်ကဵုဒါန်ကၠောန်ၜိုတ်ကဵု ကျာ်တြဲအိုတ်ရ ကာလကျာ်တြဲတွံဓရ် အနုမောဒနာဖဵုဒါန် ပိဏ္ဍပါတ်တံဂှ်တုန်လေဝ် အိုတ်အလုံစက္ကဝါဟေၚ် ဂွံမိၚ်ကေတ်ရမျာၚ်ကျာ်တြဲ ညံၚ်တွံဓရ်ပ္ဍဲသ္ၚိကီု မဒှ်ရ။ ယဝ်ဂွံမိၚ်ကေတ်ရမျာၚ်ကျာ်တြဲကီုလေဝ် ဂွံညာတ်ကေတ်အယောၚ်အလာကျာ်တြဲဂှ် သဒှ်ရ ယဝ်ဂွံညာတ်ကေတ်သာ်ဂှ်တုဲ ပွမရှ်ေသှ်ေရဴဂဴကီု မပ္တံပဉ္စသဳလ မဂွံမၚ်မွဲ မဒှ်သလဲလ္ၜော်ကဵုကျာ်တြဲဂှ် ပ္ဍဲကဵုကမ္မဌာန် ဘာဝနာ ဂွံဂလိုၚ်ပၟဝ်အာတုဲ မအာစိုပ်ဒဒှ် အရဟတ္တဖဵုရ။


ယွံသာရိပိုတ် ပ္ဍဲကဵုသာသနာကျာ်တြဲအရဳယျဂှ် မပ္တံခမဳ ဒုဿဳလတံဂှ်ကီု အာစာဒိဌိ အာစာတဳတံဂှ်ကီု ဟွံမွဲသက်သက်ရ မၞိဟ်ဂမၠိုၚ်တုန်လေဝ် နကဵုပုညကြိယာ ဝတ္ထုစှ်သာ်ဂမၠိုၚ်ကီု အာစိုပ်ဝိဿနာတုဲကီု မဆိုက်ရာၚ်တဴတုဲ မသ္အးဇ္ၚးတဴသာသနာတုဲကီု ဟိုတ်မပလွဳဂှ် ဂၠိုၚ်လောန်အိုတ်တုဲ စုတိစဴအာသွဝ်ဗြီုအိုတ်ရ။ မၞိဟ်ဂမၠိုၚ် မကတဵုဒှ်ပ္ဍဲကာလဂှ် ဍိုက်ပေၚ်တဴကေုာံပိုန်ဟာန် ယဿပတ်ဂွံဒုၚ်စသိုၚ်တသိုက်အိုတ်ရ မဂယိုၚ်တဴလမျီုဗွဲတသိုက် ဟွံမွဲကဵုဓဝိၚ် ဟွံမွဲကဵုဓရ်စံၚ်တူသောကတုဲ ဂွံမံၚ်တဴအိုတ်ရ ညံၚ်ရဴဍုၚ်သွဝ်ကီု ဂွံဒုၚ်စသိုၚ်တဴရ။

(၃၀)ခဏ်မသ္ပပရိနိဗ္ဗာန် နကဵုနိဗ္ဗာနဓါတ်[ပလေဝ်ဒါန် | ပလေဝ်ဒါန် တမ်ကၞက်]

ကျာ်တြဲအရဳယျမေတ္တေယျတုန်လေဝ် ဗၞတ်အာယုက်ဒ္စါံစှော်လ္ၚီသၞာံ ဍိုက်ပေၚ်တုဲ တဝှ်ဍောၚ်ဓရ်မတုပ်တဴ ညံၚ်ရဴသ္ဍဴဒိပ်ကီုဂှ် စံၚ်ဗဂဵုတုဲ ပ္ဍဲကဵုတဝှ်ဓရ်မဂ္ဂၚ်မတွံဂး ဂၠုၚ်က္ၜၚ်ဂှ် တၞဟ်နသွက်မပ္ဍိုက်ဗပေၚ် ဟံၚ်စၠောံဏာသြၚ်ဇၞော်မတွံဂး နိဗ္ဗာန် ကဵုသတ္တံဗွဲကြဴတုဲ မစွံပတိုန်လဝ်သာသနာဇကု ဗၞတ်ပိဠက်ကဵုဒ္စါံလ္ၚီသၞာံ (ပိကိုဋ်ကဵုဒ္စါံလက်သင်္ချာဂၞန်)ရ။


ယွံသာရိပိုတ် ကျာ်တြဲအရဳယျဂှ် အိုတ်ကဵုကောန်ကွးတံညးဂမၠိုၚ်ဂှ် နကဵုတဝှ်ဍောၚ်ဓရ် ပၞာၚ်တိုၚ်ထဝ်သ္ဍဴဒိပ်ဂှ် ပၠေၚ်ကၠေံဒမၠုမတွံဂး ကိလေသတုဲ စဳပျးကဵုလျးတၟးမတွံဂး သဗ္ဗညုတညာဏ်တုဲ (သဗ္ဗညုတညာဏ် မစဳပျးလဝ်ကဵုသတ္တံဂမၠိုၚ် ကဵုတိတ်ဗၠးနူခရိုၚ်သံသာ ကဵုဂွံစ္ဍးအာ နူလောဘ ဒေါသ မောဟအဝိဇ္ဇာ ကဵုဂွံသာဲအာ နူကိလေသလက်ကၠိုက်ကၠိလ္ၚေၚ်ဂှ်ညိ လဝ်စိုတ်တုဲ ကျာ်တြဲပျးဒိုဟ်လဝ်ဍောၚ်ဓရ်ဂၠံၚ်တရဴ ဍုၚ်သွဝ်ဗြီု နိဗ္ဗာန် သွက်သတ္တံဂမၠိုၚ် စွံပတိုန်လဝ်အိုတ်တုဲ)နကဵုနိဗ္ဗာနဓါတ် ဟၟဲကဵုဝိပက်ကမ္မဇရုပ်မသၟိဟ်ဂှ် ကျာ်တြဲကညလုပ်အာ ဍုၚ်ဇၞော်နိဗ္ဗာန်ရ ကျာ်တြဲအရဳယျမေတ္တေယျမ္ဂးဂှ် ဗွဲလၟေၚ်ဝေါဟာရ သတ္တံဂမၠိုၚ်မဟီုဂးတဴရောၚ် ပ္ဍဲကာလဒှ်ကျာ်တုဲဂှ် ဗုဒ္ဓရာဇာ ဣၚုဟ်မကော်ခဴစယၟုရောၚ်။

(၃၁)စၞောန်ထ္ၜးညးမိက်ဂွံဗဵုလ္ၚောဝ် သၟိက်ဂွံဆဵုကျာ်တြဲအရဳယျတုဲ ဗီုဂွံဒ္ဂေတ်လ္ၚတ်[ပလေဝ်ဒါန် | ပလေဝ်ဒါန် တမ်ကၞက်]

ညးမမိက်ဂွံဗဵုလ္ၚောဝ် သၟိက်ဂွံဆဵု ကျာ်တြဲအရဳယျမေတ္တေယျဂှ် ပ္ဍဲသာသနာအဲကျာ်ဂေါတမဝွံ သ္ပခမဳဗွဲမ္ဒးရးတုဲ ညးမဒုၚ်ဒၠေါံဗ္တောန်အဲကျာ်ကီု ကောန်ဇကု ကောန်စဴဇကု ကောန်စေက်ဇကု ညးမကဵုသ္ပခမဳသာမဏဳဗွဲမ္ဒးရးကီု ကောန်ညးသ္အာၚ်တံဂှ် ညးမဂွံကဵုသ္ပခမဳသာမဏဳကီု ညးမကၠောန်ၜိုတ် ဥပ္ပကာမိမအ္စာဥပ္ပဇ္ဇျာယ် ဗွဲမရှ်ေသှ်ေရဴဂဴကီု ညးမဒ္ဂိုန်ဒ္ဂေတ်မၚ်မွဲသဳမသုန် ပဉ္စသဳလကီု ညးမဒ္ဂိုန်ဒ္ဂေတ်သှ်ပတဴလဝ်သရဏပိ မပ္တံဗုဒ္ဓံသရဏံဂစ္ဆာမိ ဟဂွံသ္ကုတ်ပိုတ်ကီု ညးမဂွံဇၞော်ပၟဝ်လဝ် ကမ္မဌာန်ဝိဿနာ ဟဂွံသ္ကုတ်ကီု တၞဟ်နသွက်သာသနာအဲကျာ် ဂွံတန်တဴအာ လုကဴကာလမလံတုဲ ညးမဂွံပဠေဝ်လဟဵု ကျာ်စေတဳဗုဒ္ဓေါ ဥမၚ်လိုဏ်ဂိုဟ်ဇြပ်တံဂှ်ကီု ညးမဂွံတဵုလွဳတၞံဇြဲဗောဓိကီု ညးမဂွံသိုၚ်ဘာစတုဒိသာ ဇြပ်စတုဒိသာကီု ညးမဂွံခါဲကမၠိုၚ်ကၟာတေဝ်ဍာ် ရုၚ်ဒါန် ကၠောန်ဒဒန်ကီု ညးမဂွံသိုၚ်လဝ်သ္ၚိဝတ်ကုဋဳ ဂွံစဳတးၚးလဝ်ဂၠံၚ်ဍာန် တရဴသဗာန်တံဂှ်ကီု ပိဏ္ဍပါတ်ဝတ် ဂွံလ္ၚတ်တဴဟွံပိုတ် ဂွံကၠေံစိုတ်လဝ်ပၟတ်သ္ဍဴ ဂွံပူဇဴလဝ်က္ဍိုၚ်ဇၞောဝ် ဂွံပြေၚ်ဖျဳလဝ်ဇဗၠုသွတ် သီုကဵုပ္ကဴဝတ်နုၚ်မ္ၚဵု ဂွံကဵုလဝ်ဒါန်ပစ္စယ်ပန် ဂွံဆန်က္ၜန်လဝ် ပရိက္ခရာအဌကဵုဘိက္ခုသၚ်တံဂှ်ကီု ညးမဂွံဖဍာ်လဝ်ဇြဲဗောဓိတံဂှ်ကီု ညးမဂွံကဵုလဝ်ဒါန်သ္ပပူဇဴလဝ်သာ်ဂှ် အတိုၚ်အမှတ်စိုတ်စေတနာ မဂွံရာဒနာမိက်လဝ်သာ်ဂှ်တုဲ အနာဂတေ ပ္ဍဲကာလအနာဂတ်ဂတတေံ အရဳယျမေတ္တေယျပါဒမူလေ ပ္ဍဲဇရေၚ်တံဇိုၚ် ကျာ်တြဲအရဳယျမေတ္တေယျဂှ် သာသနေ ပ္ဍဲသာသနာကျာ်ဂှ် ကလိဂွံဗဵုလ္ၚောဝ် ဂွံဆဵုကျာ်တြဲအရဳယျ မဆောတ်အာဟွံမွဲရ။

(၃၂)စၞောန်ထ္ၜးသာသနာကျာ်တြဲအရဳယျမေတ္တေယျအိုတ်အာတုဲ ဗီုဒှ်ကဝ်ဒမၠု သုညကဝ်[ပလေဝ်ဒါန် | ပလေဝ်ဒါန် တမ်ကၞက်]

သာသနာကျာ်တြဲအရဳယျမေတ္တေယျ ပိလက်ကဵုတြဴစှော်လ္ၚီသၞာံဂှ် (ပိကိုဋ်ကဵုတြဴလက်သၞာံကီု) ဘဒ္ဒြကဝ်ဝွံ နလၟေၚ်ဓမ္မတာဟေၚ် တူလေၚ်အာပၠန်ရ ကြဴနူဂှ် လုကဴတွဵုမွဲလက်ကဝ် (မွဲကိုဋ်ကဝ်လေဝ်ဂး) ဂှ် ဒှ်အာသုညကဝ် ကျာ်တြဲဂမၠိုၚ်တုန်လေဝ် ဂွံကတဵုဒှ်မ္ဂးဂှ် ဟၟဲသက်က်ရ ဒှ်ဒၟံၚ်ကဝ်ဒမၠု မဂၠုတဴကဵုသတ္တံဗွဲမလောန်ရ။

(၃၃)ခဏ်မပျးလဝ်ဒိုဟ် ပ္ဍဲမဏ္ဍကဝ်[ပလေဝ်ဒါန် | ပလေဝ်ဒါန် တမ်ကၞက်]

ယွံသာရိပိုတ် နူမွဲလက်ကဝ်ဂှ်လောန်အာပၠန်တုဲ ကြဴနူဂှ် မဏ္ဍကဝ် ကြက်ကတဵုဒှ်ပၠန်ရ ပ္ဍဲမဏ္ဍကဝ်ဂှ် ကျာ်တြဲၜါဇကု ကတဵုဒှ်ရ ညးမ္ဂးကျာ်တြဲၜါဇကုဂှ်ရော သၟိၚ်ဥတ္တရရာမဂှ် ကြက်ဒှ်ကျာ်တြဲရာမသမ္ဗုဒ္ဓရ သၟိၚ်ပဿေနဒဳကောသလ ( သၟိၚ်ပဿိုန်လေဝ်ဂး ) ဂှ် ဒှ်ကျာ်ဓမ္မရာဇာရ ပ္ဍဲမဏ္ဍကဝ်ဂှ် ကျာ်တြဲၜါဇကု ကတဵုဒှ်ရ ပ္ဍဲကာလဂှ် တၞံကဝ်လဗဗြိုက်လေဝ် ကၠုတ်တိုန်ဗွဲမဂၠိုၚ်ရ။

(၃၄)ခဏ်မကဵုပျးဒိုဟ် ပ္ဍဲသာရကဝ်[ပလေဝ်ဒါန် | ပလေဝ်ဒါန် တမ်ကၞက်]

ယွံသာရိပိုတ် ကြဴနူဂှ် သာရကဝ် ကတဵုဒှ်ပၠန်တုဲ ပ္ဍဲသာရကဝ်ဂှ် ကျာ်တြဲအဘိဘူမွဲဇကု ကတဵုဒှ်ရ ကြဴနူဂှ်ပၠန်တုဲ ဗၞတ်မွဲလက်ကဝ် ( မွဲကိုဋ်ကဝ်သင်္ချာဂၞန် ) ဒှ်တဴသုညကဝ်ရ ဟၟဲကဵုကျာ်ဓရ်သၚ်ပၠန်ရ ပ္ဍဲကဝ်မသၟိဟ်ဗွဲမဂၠိုၚ် ကြဴနူဂှ်ပၠန်ဂှ် ဒေဝတဴအသုရိန္ဒ မၞုံယၟုဒဳဃသောနိ ဗမၞးစဏ္ဍနဳ မၚ်ဗၠာဲသုဘ ဗမၞးတောဒေယျ သၟိၚ်စိၚ်နာဠာဂိရိ သၟိၚ်စိၚ်ပလလေယ ( စိၚ်ပလိလဲ ) ဂမၠိုၚ် ဗွဲအတိုၚ်လၟေၚ်ၚ် ကြက်ကတဵုဒှ်အာပၠန်ရ။

(၃၅)ခဏ်မှာထေရ်သာရိပိုတ်အာတ်အခေါၚ် ကဵုတွံဖဵုလျးကျာ်တြဲအရဳယျ မပ္တုဲလဝ်ပ္ဍဲဘဝအတိက်[ပလေဝ်ဒါန် | ပလေဝ်ဒါန် တမ်ကၞက်]

ဖဵုလျးကျာ်တြဲအရဳယျ မပတုဲလဝ်ပ္ဍဲဘဝအတိက် ပ္ဍဲကာလဂှ် မှာထေရ်သာရိပိုတ် က္လေၚ်လ္ၚောဝ်ပ္တီကျာ်တြဲပၠန်ရ ဘန္တေဘဂဝါ ယွံတဳလမၞုံကုပိုန်ကျာ်တြဲ ပ္ဍဲလက်ထက်ကျာ်တြဲအရဳယျတေံဂှ် မၞုံကဵုအရံၚ်အံၚ်သူ လျးမတၟးတဴဟွံတီဗ္တံတ္ၚဲဂှ် မုရဴစရၚ်ဓရ်ကုသဵုမွဲမွဲ မဂွံကေၚ်ပတုဲလဝ် ပ္ဍဲဘဝအတိက်တေံတုဲ ညးမကလိဂွံသာ်ဂှ်ရောကျာ် သ္ပဟိုတ်ကဵုဓရ်ကရုဏာတုဲ သြဝ်ကညဟီုတွံကုအဲဍိက်ညိကျာ် ရဴသာ်ဝွံ မှာထေရ်သာရိပိုတ်အာတ်အခေါၚ်တုဲ ကျာ်တြဲသဗ္ဗညုလေဝ် သာ်ဝွံ က္လေၚ်တွံကဵုပၠန်ရ။


ယွံသာရိပိုတ် ကျာ်တြဲအရဳယျမ္ဂးဂှ် ပ္ဍဲကာလအတိက်မကလိလောန်ကၠုၚ်တုဲ တေံဣတေံမဒှ်သၟိၚ်စက္ကဝဝ် မၞုံယၟုသင်္ခရ ဂွံပကၚ်ရၚ်လဝ်ဍုၚ် ဣန္ဒပဌနာဂဵုရ ဇမၠိၚ်ဍုၚ်ဂှ် ပိယောဇနာရ ပါၚ်တြၚ်ဍုၚ်ပန်ဒိုဟ်ဂှ် တၞံကဝ်လဗဗြိုက်ပန်တၞံ မၞုံတဴရ ပြာသာဒ်လေဝ်ထပှ်ဘုံ မၞုံကဵုအစံက်သၠုၚ်(၂၅)ယောဇနာ ဂွံဒုၚ်စသိုၚ်တဴ ညံၚ်ရဴဘုံဍုၚ်သွဝ်ကီုဂွံမံၚ်တဴ ပ္ဍဲကာလဂှ်လေဝ် ကျာ်တြဲအရဳယျမေတ္တေယျမ္ဂးယၟုကီု မကတဵုဒှ်ရ ဒဒှ်ကျာ်မကတဵုဒှ်တုန်လေဝ် သၟိၚ်စက္ကဝဝ်ဂှ် ဟွံဂွံမိၚ်ဟွံဂွံတီတုဲ ဟိုတ်မမံၚ်သ္ၚောဲသြာဲဂှ် ဟွံဂွံမိၚ်ပရိုၚ်ရတ်ပိပြကာသက်က်ဟေၚ် ၜိုန်ဂှ်လေဝ် သၟိၚ်စက္ကဝဝ်ဂှ် သၟိက်ဂွံတီဒဒှ်ကျာ်တြဲ မကတဵုဒှ်ဂှ်တုဲ သာ်ဝွံ ရာဒနာမိက်တဴရ ယြဴပူဂဵုမွဲ ပ္ဍဲဌာန်ကျာ်တြဲမကတဵုဒှ်ဂှ် ရတ်ပိပြကာမတွံဂး ကျာ်ဓရ်သၚ် မၞုံတဴဂှ် ယဝ်ရဟီုထ္ၜးကဵုအဲမာန်မ္ဂး ပူဂဵုမဟီုထ္ၜးကဵုအဲဂှ် အဲဇိုန်ကဵုသၟိၚ်စက္ကဝဝ်စၞးအဲရ နနဲသာ်ဝွံ ရပ်နပ္ကဴထဝ်တုဲ သ္ပအဓိဌာန်ပတ္တနာတုဲ ရာဒနာမိက်တဴရ။

(၃၆)ခဏ်သၟိၚ်သၚ်္ခကေုာံသာမဏဳသၟတ် ဆဵုညာတ်ရၚ်သ္ကံ[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကာလဂှ်တုန်လေဝ် နကြဳဇှ်ပရေၚ်ဟိုတ်ဖဵုကုသဵု ကံပါရမဳအတိက်တေံဂှ် မ္ၚုဟ်ဖအောဝ်လဴကဵုတုဲ ကောန်ကွးကျာ်တြဲသာမဏဳဍောတ်မွဲဂှ် ဂ္ၚေၚ်ကၠုၚ်စိုပ်ဍုၚ်ဂှ်ရ ပ္ဍဲကာလဂှ် သၟိၚ်သင်္ခစက္ကဝဝ်ဂှ် ဂွံညာတ်ကေတ်နူကဵုဗ္တၚ်ကျာ ဂၞပ်ဇာဒိသိုၚ်ဂှ်တုဲ သာ်ဝွံ သၟိၚ်သၟာန်ရ။

ယွံမၚ်ဗၠာဲကောန်သၟိၚ် ဆဇကုမွဲဓဝ်ဟေၚ် တၟေၚ်နူညးသ္အာၚ်ဂှ် တၠအဲကၠော်လကိုဟ်ဟာ ဟွံသေၚ်ဒေဝတဴဟာ တၠအဲညးဂှ်ရော ရဴသာ်ဝွံ သၟိၚ်သၟာန်သာမဏဳရ

မဟာရာဇ ယွံမရာဇ် အဲဂှ်တၞဟ်သ္အာၚ်ဟွံသေၚ် သာမဏဳရောၚ်မရာဇ်

ယွံမၚ်ဗၠာဲ မုဟိုတ်တၠအဲဂှ် သာမဏဳညးမကော်ခဴစရော ရဴသာ်ဝွံ သၟိၚ်က္လေၚ်သၟာန်ပၠန်ရ ယွံလေဝ်မရာဇ် အဲဂှ်ဟိုတ်နူမမၚ်မွဲလဝ်သဳလစှ် မွဲဟာန်ကေုာံ သရဏဂုဏ်ပိတုဲ မစ္ဍးလသာကၠေံ နပွသရာံပါပ်ဒုစရိုတ်စှ်ဂှ်ဒှ်တုဲ သာမဏဳ မခုတ်ခဴရောၚ် (ဝါ) သာမဏဳမ္ဂးယၟုအဲရောၚ်မရာဇ်ရဴသာ်ဝွံ သ္ဂးရ

သၟိၚ်မိၚ်ဂလာန်သာမဏဳဂှ်တုဲ သာ်ဝွံသၟိၚ်ချပ်ရ သာမဏဳဝွံ ညးမပြဲရောၚ်သွံ အဲလ္ၚောဝ်ဇိုၚ်သာမဏဳဝွံ ညိဂးတုဲ အစောံပဳတိဇြဟတ်ထတ်ပြဟ်လောန်အာတုဲ ပ္ဍဲခဏမဒလိုက်ကတဵုတိတ်နူဗ္တၚ် လိုန်ဏၚ်တၞိန်ဗၠးအာတုဲ ပ္ဍဲကာလမဒတုံစှေ်တိဂှ် ပ္ကဴဒကှ်တၟာစက်ကွဳ ကၠုတ်ယဵုတိုန်ကၠုၚ်တုဲ အာထ္ၜဒုၚ်လဝ်ဇိုၚ်သၟိၚ်စက္ကဝဝ်ရ လိုန်လဝ်ပ္ကဴဒကှ်ဂှ်တုဲ လ္ၚောဝ်ဇိုၚ်သာမဏဳရ

ယွံသာမဏဳ တၠအဲမဒှ်သာမဏဳဝွံဂှ် ပြဲလောန်နူညးအိုတ်ရဟာ ညးမပြဲလ္တူသာမဏဳဝွံ နွံတဴဏီဟာ သာ်ဝွံ သၟိၚ်သၟာန်တဴရ မဟာရာဇ ယွံလေဝ်မရာဇ် ညးမပြဲလ္တူအဲဂှ် ကျာ်တြဲမဒှ်အ္စာအဲ မပြဲနူလ္တူမၞိဟ်ဒေဝတဴဂမၠိုၚ်ဂှ် နွံတဴဏီရ မရာဇ်သာ်ဝွံ သ္ဂးရ

ယွံသာမဏဳ ကျာ်တြဲမပြဲလောန်မ္ဂးဂှ် မုဒၞါဲဌာန်ဒေသမွဲမတဴရောအဴရဴသာ်ဝွံ သၟိၚ်က္လေၚ်သၟာန်ပၠန်ရ

ယွံမရာဇ် နူကဵုဍုၚ်မရာဇ်ဝွံ ခြာဗၞတ်စှ်တြဴယောဇနာ ပ္ဍဲဘာပုပ္ဖါရာံဂှ် ကျာ်တြဲမၞုံတဴရ

ယွံသာမဏဳ ဌာန်ဒေသကျာ်တြဲမၞုံတဴဂှ် အဲသၟိက်အာရဂးတုဲ တံၚ်ကေတ်ကံတဲသာမဏဳဂှ်ပၠန်တုဲ သာ်ဝွံ သၟိၚ်သ္ဂးပၠန်ရ

ယွံသာမဏဳ ပိုန်အဲစက္ကဝဝ်ဝွံ သီုကဵုပြာသာဒ်ဂှ် အဲဇိုန်ကဵုသာမဏဳရဂးတုဲ စရိုဟ်ဍာ်ကဵုဒါန်ကုသာမဏဳဂှ်ရ

သၟိၚ်စက္ကဝဝ်ဂှ်ပၠန်တုန်လေဝ် ဆဇကုညးမွဲဟၟဲကဵုသ္ကံ ပ္ၚောံအာဌာန်ဒေသဒၞါဲကျာ်တြဲမၞုံတဴဂှ် ဗၞတ်တရဴမွဲတ္ၚဲမကွာ်အာဂှ် ဂၠးဂတာဇိုၚ်ၜါဗတိုဟ်အာရ သၟိၚ်ဂှ်ဟွံဒေါံ ကွာ်အာဗၞတ်ၜါတ္ၚဲဂးကီုရ ဂတာဇိုၚ်ကလောံ ဖ္ဍူဆီဓဇူဇွောဝ်ပါ်အာရ နဂၠးဂတာဇိုၚ်ဂှ် ကွာ်ဟွံမာန်ပၠန်တုဲ နကဵုက္ၜံၚ်ၜါတဲၜါ ထံက်အာကလဵုတုဲ မအာပၠန်ရ ပ္ဍဲမရနုက်ကဵုပန်တ္ၚဲဂှ် အာဂွံပၠန်တုဲ မုရဴကာလမွဲ အဲဂွံအာစိုပ်ဇရေၚ်ကျာ်တြဲမာန်ညိရော ရဴသာ်ဝွံ ဂဗုတ်ဓရ်ဓဝိၚ် ဂွိၚ်စံၚ်တူတဴရ ပ္ဍဲမသုန်တ္ၚဲဂှ် ကၠေံစိုတ်ဇက်အာ နဂၠးသပါသြိုဟ်ပၠန်ရ ရဴသာ်ဝွံ က္လေၚ်ချပ်တိုန်ပၠန်ရ ပ္ဍဲချိုန်ခဏဂှ် ကျာ်တြဲမၠာ်သ္ၚဳတဴစှ်လ္ၚီလောကဓါတ် နကဵုဒိဗ္ဗစက္ခုညာဏ်တုဲ ညာတ်ကေတ်ဟိုတ်ဒဒှ်သၟိၚ်သင်္ခစက္ကဝဝ် မဇၞော်ကဵုဓရ်လွဳပရာဂှ်ရ သၟိၚ်စက္ကဝဝ်ဝွံ သၟိက်ဂွံဗဵုလ္ၚောဝ်အဲကျာ်ဂှ် ကတဵုဗဒှ်သဒ္ဓါစေတနာ သီုကဵုဒဒိုက်သၞာဗွဲမလောန်ရောၚ်သွံ။


ယဝ်ရအဲဟွံအာဟံၚ်ပြာ်မ္ဂး သၟိၚ်ဒးလဟုတ်ဒဲ ကၠုၚ်ဟွံစိုပ်အဲရသွံ နူကၠာဟွံဂွံကၠုၚ်စိုပ်အဲဏီဂှ် သ္ဒးပကာဂစိုတ်ဏောၚ် သာ်ဝွံဂးတုဲ ကျာ်တြဲပ္တောံရုပ်ထဴဗျုမွဲ တက်သဲကၠုၚ်ကွဳတုဲ အာစိုပ်ဇရေၚ်သၟိၚ်ဂှ်ရ သၟိၚ်စက္ကဝဝ်ဂှ်တုန်လေဝ် ခါမညာတ်ကွဳဂှ်မ္ဂး သာ်ဝွံသၟိၚ်ကော်ဟီုရ။

ယွံလဇုတၠကွဳ အဲဝွံအာကဵုကျာ်တြဲရောၚ် လဇုဆေဝ်ပါဲကဵုဂၠံၚ်ညိကၠာသာ်ဝွံသ္ဂးရ

တၠကွဳဂှ်မိၚ်တုဲသ္ဂးပၠန်ရ အဲလေဝ်ဃရေက်တဴကီု အဲဆေဝ်ပါဲဂၠံၚ်ဍာန်ဟွံဒှ်ရ သာ်ဝွံ တၠကွဳသ္ဂးရ သ္ဂးသာ်ဂှ်တုဲ တၠကွဳဂှ်သၟာန်တိုန်ပၠန်ရ ယွံမရာဇ် မုရဴဌာန်ဒေသမွဲ တၠအဲမအာဂှ်ရောသာ်ဝွံသၟာန်ရ သၟိၚ်မိၚ်တုဲ အဲအာဇရေၚ်ကျာ်တြဲရောၚ် အဲဃရေက်ဒဗက်လောန်သန် သၟိၚ်သ္ဂးရ သာ်ဝွံ တၠကွဳသ္ဂးပၠန်ရ ယွံမရာဇ်သၟိၚ် ကျာ်တြဲမ္ဂးဂှ်အ္စာအဲရောၚ် အဲလေဝ်အာဇရေၚ်ကျာ်တြဲကီု တၠအဲဗက်အာကွဳအဲတုဲ ဂွံညာတ်ကျာ်တြဲကီုရ တၠကွဳဂး ဒှ်ရသာ်ဂှ် ဒးရးသန်ရဂးတုဲ သၟိၚ်ဍိုက်ဗက်အာကွဳဂှ်ရ ပ္ဍဲကာလဂှ်တုန်လေဝ် ဒေဝတဴဗြဴဂၞကျာ်သုဇာတာ သမ္ဘာသၟိၚ်အိန်ဂှ် ညာတ်ကေတ်ဒဒိုက်လၟောၚ်လၟေတ်သၟိၚ်စက္ကဝဝ်တုဲ မပြာပ်စှ်ေကၠုၚ် ဂိုၚ်ကေတ်နၚ်နကဵုပုၚ်ဒိပ်မွဲဂွဳဂှ်တုဲ ပ္တောံလဝ်အယာၚ်အလာမၞိဟ်ဗြဴမွဲတုဲ အာစိုပ်ဇရေၚ်ကျာ်တြဲရ ယွံလဇုတၠကွဳ ယဝ်ရဍောၚ်ၜိုတ်ဗျဵုပုၚ်မ္ဂး ပုၚ်ဂွဳအဲဝွံဂိုၚ်ကေတ်ညိ ယွံသၟတ်ဗြဴ ပုၚ်ဂွဳဂှ်ဂၞပ်အဲဟၟဲရ ညးမၞုံပ္ဍဲကွဳအဲမွဲဂှ် ဍောၚ်ၜိုတ်လောန်သန် ပုၚ်ဂွဳသၟတ်ဗြဴဝွံဂှ် ကဵုလဝ်ညးပ္ဍဲကွဳဂှ်ရမိၚ်ဂလာန်ဂှ်တုဲ သၟတ်ဗြဴဂှ် ကဵုလဝ်ပုၚ်ဂွဳဂှ်ရ ချိုန်ခဏဂှ်ပၠန် သၟိၚ်အိန်တုန်လေဝ် ဂွံဍာ်မွဲလဵုတုဲ ကွာ်သဲကၠုၚ်ပၠန်ရ ယွံလဇုတၠကွဳ ယဝ်ရထၚ်ဍာ်ကံကှ် နွံပၟိက်ကဵုဍာ်လဵုမ္ဂး ဍာ်လဵုအဲဝွံ ဂိုၚ်ကေတ်လဝ်ညိ ယွံမၚ်ဗၠာဲ ဍာ်လဵုမၚ်ဗၠာဲဂှ် ဂၞပ်အဲဟၟဲရ ညးမၞုံပ္ဍဲကွဳအဲမွဲ ဍောၚ်ၜိုတ်လောန်သန်တုန် ညးသၟိက်ဂွံသုၚ်ကီုရသာ်ဝွံဂးတုဲ သၟိၚ်အိန်ကဵုလဝ်ဍာ်လဵုဂှ်ရ သၟိၚ်စက္ကဝဝ်တုန်လေဝ် ဒဒှ်သၟိၚ်အိန်မာဃ ဂၞကျာ်သုဇာတာ ညးၜါမကဵုလဝ်ပုၚ်ဒိပ်ဍာ်ဒိပ်ဂှ် သၟိၚ်ဂွံသုၚ်စဟုံလာၚ်မုက်တုဲ ယဲဒုက္ခဝေဒနာတံဂှ် လလံသွာအာတုဲ ဇြဟတ်ဒိပ်လေဝ်မြာကလိဂွံရ ကျာ်တြဲမစဝ်အာကွဳဂှ်လေဝ် ညန်ကဵုဘာကျာ်တြဲတုဲ သာ်ဝွံ ဂးကဵုသၟိၚ်ရ ယွံမရာဇ် ဌာန်ဝွံလေဝ်ညန်ကြပ်ကဵုဘာရ အဲလေဝ်ဒးအာဂၠံၚ်တၞဟ်ဏီ မရာဇ်စှ်ေဒၞါဲဌာန်ဝွံညိကၠာရ အဲအာရသ္ဂးတုဲ ဗွဲဌာန်မ္ဒးရးဂှ် ဗ္ဒန်ကၠေံအာတုဲ ကျာ်တြဲလုပ်အာဘာ မံၚ်တဴနဒဒှ်ကျာ်ရ။


သၟိၚ်စက္ကဝဝ်တုန်လေဝ် နူဂှ်ပ္ၚောံလုပ်အာဘာတုဲ ပ္ဍဲခဏဂှ်အာညာတ်ကျာ်တြဲတုဲ ကြဳဇှ်ဓရ်ပဳတိသ္ဍိုက်လောန်ဗၞတ် ချိုတ်ဍောတ်တၚ်တၚ် စိပ်သၠၚ်အာတုဲ သၟိၚ်ဇၞော်ဂှ်ပဟိုတ်နူမဂွံစသုၚ်လဝ် ပုၚ်ဒိပ်ဍာ်ဒိပ်ဂှ်တုဲ ကလိဂွံသာရဝါတ်လၟောၚ်ဒြဟတ်ဍောၚ်ၜိုတ်ဂှ် ဟဲအာပၠန်ရောၚ် ယာံဂွံသာရဝါတ်ဂးကီုရ သ္ပဝတ်ကဵုကျာ်တြဲတုဲ အာတ်ပၚ်မှိၚ်ဓရ်ကျာ်တြဲရ။


ယွံတဳလမၞုံကုပိုန်ကျာ်တြဲ ဗၞတ်ဓရ်ဂမၠိုၚ်တံဂှ်လေဝ် လ္ပတွံညိ ဆဗၞတ်ဓရ်မွဲပါၚ်ဂှ် တဳလပိုန်တွံကဵုအဲဍိက်ညိကျာ် ရဴသာ်ဝွံ အာတ်က္လၚ်ပၚ်မှိၚ်ဓရ်ရ ကျာ်တြဲတုန်လေဝ် ဟီုတွံကဵုဓရ်ကုသဵုပါရမဳရ ဗၞတ်ဓရ်ကုသဵုပါရမဳဟေၚ် ကျာ်တြဲတွံရ သၟိၚ်စက္ကဝဝ်တုန်လေဝ် ယွံတဳလမၞုံကုပိုန်ကျာ်တြဲ ဆဗၞတ်ဝွံဟေၚ်ဟီုတွံကဵုပ္ညုၚ် အေၚ်ဒုၚ်ရကျာ်မုဟိုတ်သၟိၚ်မဆေဝ်ဒဝ်ရောမ္ဂးဂှ် ဓရ်ကျာ်တြဲမဟီုတွံဝွံ ပြဲလေဝ်ပြဲလောန်သန်ရ အဲပၠန်တုန်လေဝ် အဝယ်ကၞိပ်ဝွံ မပြဲလောန်သန်ရ သာ်ဝွံချပ်တုဲ သၟိၚ်မဆေဝ်ဒဝ်ရ ယွံကောန်သ္ဍိုက်သာရိပိုတ် ပ္ဍဲကာလဂှ် သၟိၚ်စက္ကဝဝ်ဂှ် နကဵုသၞေံတဲဇကုဂှ် ရေက်သ္ကုတ်ဗပိုတ်ကၠေံကံတုဲ ကၞိပ်ဂှ်စုတ်ပ္ဍဲနပ္ကဴရတ်တုဲ ကၞိပ်မွဲဟာန်ကေုာံနပ္ကဴရတ်ဂှ် ပတိုန်စွံပတန်အပ္ဍဲဂၠးသပါတဲတုဲ ကဵုဒါန်ကုတဳလမၞုံကုပိုန်ကျာ်တြဲတုဲဟေၚ် ရဴသာ်ဝွံ ရာဒနာမိက်ရ။


ယွံတဳလပိုန်မၞုံကုပိုန်ကျာ်တြဲ ပ္ဍဲကာလကြဴအနာဂတ်ဂတ ညံၚ်ရဴတဳလမၞုံကုပိုန်ကျာ်တြဲကီု အဲဍိက်မမိက်ဂွံတွံဓရ်ဓမ္မစက်ရ လျးအရံၚ်ဇကုအဲဍိက်လေဝ် ကဵုဂွံလျးတၟးဂဵုလဟဵုဒၟံၚ် လုကဴကာလဗ္တံတ္ၚဲ လ္ပကဵုဂွံသ္ကုတ်ညိ ရဴသာ်ဝွံ ရာဒနာမိက်တုဲ သ္ပပူဇဴကျာ်တြဲရ သ္ပပူဇဴကၞိပ်ဂှ်တုဲရောၚ် သၟိၚ်စုတိအာရ (ပ္ဍဲအရာဒၞါဲဝွံ သတ္တံ သွက်စေတနာနွံရ ကအ်ပိုတ်အာတုဲရ သာ်လဵုဂွံရာဒနာမိက် ဂွံဟီုဂလာန်ရော ဂလာန်ဂှ်ဒှ်မာန်ညိဟာ သာ်ဝွံ သွက်သၠေဟ်ပၟာနွံ ၜိုန်ဂှ်လေဝ် လ္ပသၠေဟ်ပၟာညိ ကြဳဇှ်ကုသဵုပါရမဳတြုံဗောဓိသတ်မ္ဂးဂှ် ဟွံတုပ်ကဵုသတ်ပုထုဇန်သ္အာၚ်ရ ဒှ်ဂွံမာန်ရောၚ် လ္ပသၠေဟ်ပၟာမွဲအိုတ်ညိ)။

ယွံသာရိပိုတ် ရဴသာ်ဝွံ ရာဒနာမိက်တုဲ ဟိုတ်နူမကေၚ်ကဵုလဝ်ဒါန်ဂှ်ရ ကျာ်တြဲအရဳယျမေတ္တေယျဂှ် လျးအရံၚ်အံၚ်သူ မဂဵုလဟဵုတၟးတဴ လုကဴကာလဟွံတီဗ္တံတ္ၚဲ ဣၚုဟ် အဲကျာ်တွံကုသာရိပိုတ်ရ ယွံကောန်သ္ဍိုက်သာရိပိုတ် ကြဴနူဂှ် သၟိၚ်ရာမဂှ်တုန် ဒှ်ကျာ်တြဲ ရာမသမ္ဗုဒ္ဓရ သၟိၚ်ပဿိုန် ကောသလရးဂှ်တုန် ဒှ်ကျာ်တြဲဓမ္မရာဇာ ဒေဝတဴမာဂှ် ဒှ်ကျာ်တြဲ ဓမ္မသာမိရ သၟိၚ်အဘိန္ဒရမတုန် ဒှ်ကျာ်တြဲ နာရဒရ ပ္ဍဲကဝ်ဂမၠိုၚ်မသၟေဟ်ကြဴနူဂှ်လေဝ် ညးမပ္တံကဵုဗမၞးဒေါနတံဂှ် ကြက်ကတဵုဒှ်ရ ကျာ်တြဲပိုဲ တွံကဵုမှာထေရ်သာရိပိုတ်ရ ဂလာန်ဝွံ ကၠုၚ်ပ္ဍဲအကထာ ပြကိုဟ်မဟာဝၚ်တေံရ။

ပြကိုဟ်အနာဂတာဝၚ် တုဲဆဝွံရ ။ ။ ဒိပုအာ . . .

နိဿဲ[ပလေဝ်ဒါန် | ပလေဝ်ဒါန် တမ်ကၞက်]

ပြကိုဟ်သၠပတ်အဓါန်မသုန် ကေုာံ ပြကိုဟ်အနာဂတာဝၚ် လိက်ဝွံကျာ်ဇၞော်အ္စာတၠဘဒ္ဒန္တဥတ္တမာရမ္ဘထေရ်ဘာဝင်္ကဝိဝေကာရာမ ထက်တက်တြးလဝ် နကဵုနယ်ကယ်ပ္ဍဵုဗီု လိက်ခေတ်တၟိ ပ္ဍဲသက္ကရာဇ်သာသနာ ၂၅၄၂ သၞာံ သက္ကရာဇ်ဍုၚ် ၁၃၆၁ သၞာံ သက္ကရာဇ်ခရေတ် ၁၉၉၉ သၞာံဂှ်ရ ဒတုဲဖဵုသွက်ဓမ္မဒါနရောၚ် နိဗ္ဗာနပစ္စယောဟောတု