ပြံၚ်လှာဲဂံၚ်ဂံၚ်ညိ
"မိက်ဂွံပြံၚ်လှာဲ ဂၠးကဝ်မ္ဂး ဇကုဇကုဂှ် ဇကုပြံၚ်လှာဲကၠာညိ"
မဟာတ္တမဂန္ဒဳ
ညးမသ္ပပၞတိက်ဂှ် ကော်ဟတဵုဝါတ်ရ။ လ္တူနူဒးဗ္တောန်ညးဟွံတီ ပွမဒးဗ္တောန် ညးမတီလဝ်တုဲတုဲတအ်ဂှ် ပဵုတုဲဝါတ်တဴရ။ အရေဝ်ဏအ်ဂှ် ဒှ်ကၠုၚ်သၟးသၟးဟွံသေၚ်ရ။ ပိုယ်တအ်အိုဿီု တီမံၚ်ဖိုဟ် ဒိုဟ်မံၚ်ဖိုဟ်တအ်ဂှ် ဂၠိုၚ်တဴရ။ ပါသီုအဲရလေဝ်။ ပ္ဍဲအဲဏအ် ဍိုက်ပေၚ်မံၚ်အလုံအိုဿီုလေဝ် ဟွံသေၚ်ရ။ ဆဂး ၜိုတ်ဇကုသၟဟ်အစောံ ဒးပြံၚ်လှာဲကေတ်ရ။ လ္တူနူသွက်ဂွံဍိုက်ပေၚ် သွက်ရဂွံတောတက်တိုန်အာဂှ် ပဵုတုဲပၟိက်ဇၞော်တဴရ။
ပ္ဍဲဘဝအဲဏအ် ညးမကၠုၚ်အာတ်ကသပ်ဉာဏ် နွံတဴဗွဲမဂၠိုၚ်ဂၠၚ်ရ။ ကာလလဆောဝ် အဲလေဝ် ၜိုတ်သၟဟ်အစောံ ဟီုထ္ၜးကၠုၚ်ကီုရ။ ဆဂး ကာလလအ်ကၠုၚ် အဲဂွံတီကေတ်မွဲတၚ်ဂှ် မၞိဟ်ဗွဲမဂၠိုၚ်တအ် နွံပၟိက်တဴကဵုကသပ်ဉာဏ်သၟးတုဲ လ္ပာ်ဒးဒ္ဂေတ်ဗက် အတိုၚ်ကသပ်ဉာဏ်ဂှ် ဇြဟတ်အောန်တဴရ။ အလဵုဇကုအဲလေဝ် ဇၟာပ်ညးတၞဟ်ကဵုကသပ် ဗက်ကၠောန်တဴဖအိုတ်ဟွံသေၚ်ရ။ ဆဂး တၚ်မမိက်ကဵုမွဲမွဲ ပလီုပလာ်မံၚ်ဘဝအဲ ဖျေံမံၚ်စိုတ်ဓာတ်အဲယျဏောၚ်တှ်ေ ဨ-တၚ်ဂှ် အဲဒးပြံၚ်လှာဲကေတ် ညံၚ်ဂွံဂွံဏောၚ်။ ဇၟာပ်ဇၟာပ်အရာ ၜိုန်ဒ္ဂေတ်ဗက်ဟွံမာန်ကီုလေဝ် ပရေၚ်ပြံၚ်လှာဲ သွက်ဘဝဇကု ဍေံမိက်ကၠုၚ်ယျတှ်ေ ဆလအ်လေဝ် တဲအဲဟွံလဇုဲကၠုၚ်ရ။
အရာခိုဟ်ခိုဟ်အလုံအိုဿီု ပြံၚ်လှာဲ ဒ္ဂေတ်ဗက်ဟွံမာန် ကဵုဒှ်ကၠာရ၊ အရာထေက်ကဵု ဒးပြံၚ်လှာဲဂှ် မၞးဒးဂံၚ်ပြံၚ်လှာဲဏောၚ်။ ဇုက်သံယောဇိုန် မဒက်ဂြေန်လဝ်မၞးဂှ် မၞးဒးကုတ်ထပိုတ်ထောံဏောၚ်။ ထၟိက်ဟွံလုပ်အသုၚ် ပ္ဍဲကၠေၚ်က္ဍဟ်မၞးဂှ်လေဝ် မၞးဒးစံၚ်ပၠေၚ်ကၠေံဏောၚ်။ မွဲအလန်ဓဝ် စံၚ်ပၠေၚ်ကၠေံဒတုဲဟွံမာန်ဏီမ္ဂး ကေတ်အခိၚ်တုဲ စံၚ်ပၠေၚ်ကၠေံသိုက်သိုက်ညိ။ ဆဂး လ္ပစွံလဝ်အတိုၚ်ဂှ်ညိ။ ထၟိက်ပေၚ်အာ အတိုၚ်မွဲအလုံကၠေၚ်က္ဍဟ်မ္ဂး မၞးလေဝ် ဒှ်ကၠုၚ် ညးဟွံလုပ်အသုၚ် သိုက်သိုက်မာန်မံၚ်ဏောၚ်။
မၞိဟ်သအးဇ္ၚးထၟိက်ဗီုတအ်ဂှ်ဟွံမာန်လ္ၚဵုတအ်ဂှ် ကေၚ်ဆဵုကၠုၚ်နွံရ။ ဂၠုၚ်မွဲဖ္ဍိုက် ဒၞာဲမိက်ဂွံဟဳဂှ်ဟဳ ဂးတုဲ ညံၚ်ရဴကၠဟ်စွံလဝ် ပ္ဍဲၜဳအတိုၚ်ဂှ်ကီုရ။ စာ်စ္ဍးနူတၚ်ပတဝ်က္ဍိုပ်တုဲ ဒုၚ်စမံၚ်သိုၚ်ပရေၚ်အတိက်ရ။
ပၞေတ်လ္ၚဵုတအ် သ္ကာတ်မြဟ်လောန်ဂှ် အလဵုဇကုအဲလေဝ် တီကေတ်မာန်ရ။ အလဵုဇကုအဲလေဝ် ကေၚ်ဒုၚ်စသိုၚ်ကၠုၚ်လဝ် ဂၠိုၚ်ကဵုသၞာံအခါရ။ ဆဂး တၚ်မၞးဒးစွံသတိဂှ် ဘဝမၞးဂှ် ဒှ်သွက်ညးမွဲဓဝ်ဟွံသေၚ် သာ်ဏအ်ရ။ မပ္တံကဵု ဂကောံသ္ၚိကၟိန် သ္ကအ်ရဲ မဆာန်မံၚ်မၞး နွံတဴအိုတ်ရ။ သွက်ညးတအ်လေဝ် မၞးဒးဂျိုၚ်တဴလမျီု ဗွဲမနွံကဵုအဓိပ္ပါယ်ရ။ ဂကောံသ္ၚိကၟိန်ဟွံမွဲ၊ သ္ကအ်ရဲလေဝ် ဟွံမွဲဂးကီုလေဝ် သိက္ခာနွံတုဲ ညံၚ်ဂွံဒှ် ညးမၞုံကဵုၚုဟ်မးမွဲ ထေက်ကဵုဒးမံၚ်ရ။ ဒဒှ်ညးမပ္တုဲဖိုလ်ကဵုလိုက်လောကမွဲ မံၚ်ဂွံမံၚ်ရ။
ညးလ္ၚဵုတအ်ဂှ် ဟိုတ်နူပၞေတ်တြေံတုဲ ၜိုန်ဂၠံၚ်ကၠေံမံၚ်ကီုလေဝ် ညးလ္ၚဵုတအ်ဂှ်လေဝ် ဟိုတ်နူလၞုဟ်တုဲ ဂၠံၚ်ကၠေံတဴအိုတ်ရ။ လၞုဟ်ဟီုဂှ် ညံၚ်ရဴယဲမွဲသာ်ကီုရ။ သီုဟွံလွဳတုဲ စွံလဝ်ခ္ဍၚ် ပဵုတုဲ ပရေအ်ကၠုၚ်ခ္ဍၚ်ရ။ လၞုဟ်ဂၠိုၚ်ကၠုၚ်တှ်ေ ဘဝတေံ သွက်စိုတ်ဂွံထုဲ ဍေံပေၚ်က္ဍတ်ကၠုၚ်သိုက်သိုက်ရ။ လၞုဟ် ကဵု စိုတ်ဒှ်ဒဒိုက်ဂှ် ဍေံဆက်စပ်မံၚ် ဗွဲမဂၠိုၚ်ရ။ လၞုဟ်တုဲ ဟွံဂစာန်၊ ဟွံဂစာန်တုဲ လဇုဲနူညးတၞဟ်၊ လဇုဲနူညးတၞဟ်တုဲ လ္ၚုသၟးကၠုၚ်ရ။ လ္ၚုသၟးတှ်ေ စိုတ်တေံယှုက်ကၠုၚ်ရ။ စိုတ်တေံယှုက်ကၠုၚ် ဟွံမိက်ဂစာန်တုဲ လၞုဟ်ကၠုၚ်ပၠန်ရ။ သံသာလၞုဟ်ဏအ် ထေက်ကဵုဒးဖေက်ဂၟံက်ခိုဟ်ကွေံရ။ ရုန်တိတ်နူသံသာလၞုဟ်ဟွံမာန်မ္ဂး စဵုကဵုယဲစိုတ်ဓာတ်စှ်ေ ဍေံဒှ်ကၠုၚ်မာန်ရ။ မၞိဟ်ဂကူဏအ်ဂှ်လေဝ် ကေၚ်ဆဵုကၠုၚ်ကီုရ။ လၞုဟ်တုဲ စဵုကဵုအာစိုပ်အကာဲအရာမုဟွံမိက်ကၠောန်ဂှ် ဇၟာပ်မၞိဟ် ကေၚ်ဇီုကပိုက်ကၠုၚ်ဖအိုတ်ရ။ ဆဂး ညံၚ်ဂွံတိတ်ဗၠးနူအကာဲအရာဂှ်မာန််တှ်ေ ဒးရုန်ဂစာန်မံၚ်လၟိုန်ဏောၚ်။
"တၚ်ပၞုက်ဓလုက် ပွမပြံၚ်လှာဲဟီုဂှ်
သွက်ဂွံပ္တိုက်ပ္တိတ်တြေံတြေံတအ်တုဲ
ပွမသုၚ်စောဲ ဇြဟတ်မၞးဟွံသေၚ်ရ။
ဒှ်တဴ ပွမသုၚ်စောဲ ဇြဟတ်မၞး
ပ္ဍဲဒၞာဲမဒက်ပတန် တၟိတၟိတအ်ရ"
သုၚ်စောဲဇြဟတ်ဇကုဇကုတုဲ ပ္တိုက်ပ္တိတ်အတိက်ပရေံပရေံတအ်ဂှ် ဍောၚ်ၜိုတ်တဴလောန်ရ။ နဲကဲဍာံ ဂၠံၚ်ဍာံမွဲလေဝ် ဟွံသေၚ်ရ။ သြိုဟ်ထ္ကးတုဲ သၠၚ်မံၚ်ယဝ်ဒှ်မ္ဂး လ္ပလွဳ ပ္ဍဲဒၞာဲသတိက်ညိ။ အခိၚ်တအ်ဂှ် သုၚ်စောဲ ညံၚ်ဂွံနွံကဵုဖိုလ်ညိ။ ပြံၚ်လှာဲကၠေံဇကုဇကုညိ။ အနာဂတ် နွံမံၚ်ဂတမတ်ဇကုဂှ် ကဵုညာတ်မံၚ်ညိ။ လ္ပက္လေၚ်ဂတးရံၚ်ညိ။ ကေတ်ခန်လ္ၚတ် နူမမှာရာကၠုၚ်တုဲတေံတုဲမ္ဂး အနာဂတ်ညံၚ်ဂွံကျေဝ်ဂှ် ဆက်ကွာ်အာညိ။
အရာမမိက်ကဵုမွဲမွဲ ဂြဲဖျေံမံၚ်ဘဝဇကုယျဏောၚ် ယဝ်တီမ္ဂး ညံၚ်ဂွံပြံၚ်လှာဲာမာန် ဂိုတ်ဂစာန် လ္ပဇြိုၚ်စိုတ်ညိ။ ကာလလဆောဝ် တီမံၚ်ဖိုဟ် ဒိုဟ်မံၚ်ဖိုဟ်လေဝ် နွံတဴလေပ်ရ။ ဓရ်မှာမပၠေဝ်ဂွံတအ်ဂှ် ၜိုန်ရမုဍေံဟွံဒှ်ကီုလေဝ် ယဝ်ရဒှ်ဓရ်မှာ ပၠေဝ်ဟွံဂွံဏောၚ်တှ်ေ ဘဝဇကု ဒးဆက်ဂျိုၚ်အာလမျီု နကဵုဓရ်ကဟောမ်ဏောၚ်။ သ္ပပတမ်နူလၟုဟ်တုဲ အဲမုသွက်ဂွံဒးပၠေဝ် နွံရောဂှ် ဇကုမၞး မၞးက္လေၚ်သၟာန်စၟဳစၟတ်ရံၚ်ညိ။ တုဲမ္ဂး မွဲတုဲမွဲ စပ္တန်တုဲ ပၠေဝ်ပၠေတ်ရံၚ်ညိ။ သ္ပပတမ်နူလၟုဟ်တုဲ လ္ပဂ္ဇအ်မံၚ် လ္တူနထၟိက်ညိ။ ပြံၚ်လှာဲကၠေံဇကုဇကုတုဲ ဂိုၚ်ကေတ်ပွမမိပ်မြဟ်တအ်ညိ။
နိဿဲ[ပလေဝ်ဒါန် | ပလေဝ်ဒါန် တမ်ကၞက်]
ဆောၚ်းမိုးရှၚ်