ဗဝိုင်ၜိုပ် (ဍုင်မတ်မလီု)

ဗဝိုင်ၜိုပ် (ဍုင်မတ်မလီု)
ဗဝိုင်ၜိုပ် (ဍုင်မတ်မလီု)
	ယၟုဒေသ ဟင်္သာအဝိုင်း (မော်လမြိုင်)
ဒတန်	ဍုင်မတ်မလီု၊ ဗဒါဲဒဒန်မတ္တမ
ဒတန်ဗီုတိ	16°29′49″N 97°37′34″E / 16.497064°N 97.625990°Eဒတန်: 16°29′49″N 97°37′34″E / 16.497064°N 97.625990°E
စမြိုင်	၁၄ အဝ်ဂေတ် ၂၀၁၆
ဓဇဲ	နာဲစိုးသိန်း

ဗဝိုင်ၜိုပ် (ဟင်္သာအဝိုင်း) ဂှ် ဒှ်ဗဝိုင် နူဒဒန်မတ္တမ မလုပ်စိုပ် ဍုင်မတ်မလီု ဒၞာဲဂၠံင်ပန်သွာင်ကိုပ်ကၠာအိုတ် မနွံကဵု ရုပ်ၜိုပ်ဂှ်ရ။ ဗဝိုင် မနွံကဵု ရုပ်ၜိုပ်တၟိဂှ် စပံက် ပ္ဍဲကဵု ၁၄ အဝ်ဂေတ် ၂၀၁၆။ နူစသြိုင်ဒဒန်မတ္တမ-မတ်မလီုဂှ် ပ္ဍဲကဵု ဗဝိုင်ဂှ် လ္ဇံက်လဝ် ရုပ်ၜိုပ်မဖျေဟ်ဇိုင်ၜါ၊ ဗွဲကြဴ ရုပ်ၜိုပ်ဂှ် အလဵုအသဳတအ် ပ္တိတ်ထောအ်တုဲ စၞးဂှ် လ္ဇံက်စုတ် ရုပ်ဂအုပ်။ သၞာံ ၂၀၁၆ ဂှ် ကလေင်လ္ဇံက်စုတ် ရုပ်ၜိုပ် အတိုင်အလာံကောန်ဂကူမန် ၜိုပ်မယာဒၟံင်ဇိုင်မွဲဒိုဟ်ရ။

ပရူရုပ်ၜိုပ်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲသၞာံ ၂၀၀၅ အခိင်မပံက် ဒဒန်သြင်လောန် မတ္တမ-မတ်မလီုဂှ် ပ္ဍဲကဵုဒၞာဲ ဂၠံင်ပန်သွာင် အကြာဂၠံင်ဗိုလ်ဂျုပ် ကဵု ဂၠံင်မတ်မလီု မဒှ်ဒၞာဲ နူဒဒန်သြင်လောန် မတ္တမ-မတ်မလီု မလုပ်စိုပ် မတ်မလီုကိုပ်ကၠာအိုတ်ဂှ် ကၠောန်လဝ် ဗဝိုင်ၜိုပ်တုဲ ဗဝိုင်ၜိုပ်ဂှ် ကဵု ဒဒန်သြင်လောန် မတ္တမ-မတ်မလီုဂှ် ကၠောန်သဘင်ပံက်ခန်ကၞာတုပ်ပ်ရ။^[၁] ဗွဲကြဴဏအ် ပ္ဍဲသၞာံ ၂၀၀၇ ပ္ဍဲအခိင်ကသီု သ္ဂာဗ္တံ သီုဟွံကဵု သမ္တီ ကုညးဍုင်ကွာန်မွဲသာ် နူကဵု ဌာနအလဵုအသဳတွဵုရးဍုင်မန် ရုပ်ၜိုပ်ဂှ် ဂိုင်ပ္တိတ်ဏာတုဲ စၞးဂှ် လ္ဇံက်စုတ် ရုပ်ဂအုပ်ရ။^[၂]^[၃] ရုပ်ၜိုပ်ဂှ်လေဝ် ကၠေအ်ဒၟံင် ပွိုင် ၉ သၞာံတုဲ ဗွဲကြဴ နူကဵု ပေါင်မသၟိင်မွဲ မဂွံတီကေတ် ဒဒှ်ရ ရုပ်ၜိုပ်တြေံဂှ် ညးတအ် အာဂိုင်စွံလဝ် ပ္ဍဲကဵု ဍုင်မတ်မလီု အရာပ်ဒဵုထဝ် (ရွှေတောင်ရပ်ကွက်) ဒၞာဲခရိုင်ကပေါတ်ဂကောံဇၞော်မောဝ်ပွိုင်ဍုင် (မြို့နယ်စည်ပင်သာယာရေး ပစ္စည်းသိုလှောင်ရုံ (မာလာဝင်း) တုဲ ဂိတုဂျောန် ၁၈၊ ၂၀၁၆ဂှ် ဝန်ဇၞော်ထိင်ဒဝ်သံယံဇာတ ကဵု ပွဳပွူသဘာဝ တွဵုရးဍုင်မန် ဒံက်တာ ဒံက်တာနာဲဟံင်ဍုင် (ဒေါက်တာမင်းကြည်ဝင်း)၊ ဒံက်တာနာဲစောန်တၟး (ဒေါက်တာမင်းစိုးလင်း)၊ နာဲစိုးသိန်းတအ် အာကျောဝ်တုဲ ဂွံဆဵုကေတ် ရုပ်ၜိုပ်ဂှ် အိက်င္ၚာ်တိုန်ဒၟံင်ရ။^[၂]^[၁]ပ္ဍဲဂိတုဂျောန် ၂၄၊ ၂၀၁၆ ဂှ် ကောန်ဂကူမန် မၞိဟ် ၃၀၀ ပြင်င် ချပ်ဂၞန် ရေင်သကအ် ပ္ဍဲ ဇြပ်မန်ဍုင်မတ်မလီုတုဲ ညံင်သ္ဂောအ် ကလေင်လ္ဇံက်စုတ် ရုပ်ၜိုပ်ပၠန် ဂစာန်အာရောင် ဖျေဟ်သ္ဂုတ်သွာတ်ရ။ တုဲပၠန် ရုပ်ၜိုပ်တြေံဂှ် ဟွံကေတ်တုဲ စၞးဂှ် ကၠောန်ရုပ်ၜိုပ် အတိုင်ဗီု ရုပ်ၜိုပ် ပ္ဍဲအလာံကောန်ဂကူမန်တုဲ လ္ဇံက်ရောင်ဂှ် ပ္ဍဲကဵု သဘင်ကောံဓရီုဂှ် ဖျေဟ်သ္ဂုတ်သွာတ်ရ။ သွက်ဂွံ ဗၟံက်ရုပ်ရဴကမၠောန်နာနာသာ်ဂှ် ဒက်ပတန် ကမ္မတဳ မၞိဟ် (၉) တၠ - အေန်ဂျေန်နဳယျာ နာဲစိုးသိန်း၊ နာဲတၠညး၊ နာဲမန်ရာဇာ၊ နာဲမင်းမင်းနွယ်၊ မိစန္ဒာနန်၊ နာဲရာင်ဆာဲ (နာဲရဲဇော်)၊ နာဲမင်းလင်းကိုကို၊ နာဲထွန်းရှိန်၊ တုဲ မၞိဟ်စၞး နူကဵု ဗော်ဍုင်မန်တၟိ မွဲတၠ ရ။^[၄] နူကဵု ကမ္မတဳ ၉ တၠတအ် ဂိတုဂျူလာင် ၁ ဂှ် အာဆဵုဂဗ ကုဂကောံအလဵုအသဳတွဵုရးဍုင်မန်တုဲ ပ္ညဳပ္ညပ်ရေင်သကအ် ညံင်သ္ဂောအ်ကလေင်လ္ဇံက် ရုပ်ၜိုပ်ပၠန်ရ။^[၂]^[၃]

သွက်သ္ဂောအ်ကၠောန် ရုပ်ၜိုပ်တၟိဂှ် နကဵု ကမ္မတဳဂှ် ဆိင်လဝ် ဒးစကာ သြန်ဒကေဝ် ၄၀ ကိုဋ်တုဲ အာတ်မိက် သြန်အလဵုအသဳကီုလေဝ်၊ ဟိုတ်နူဗာတ်ဂျေတ်ဘဏ္ဍာ မရန်လဝ် ဟွံမဲတုဲ နကဵု အလဵုအသဳတွဵုရး ဗိုင်ကဵုဟွံမာန်။ နူကဵု ကောန်ဂကူမန်တအ် ဗက်ဒုင်ဒါန် အကြာညးတၠစေတနာတအ်တုဲ ဂျူလာင် ၇ ဂှ် စကၠောန် ရုပ်ၜိုပ်ဂှ်ရ။ အစာအေန်ဂျေန်နဳယျာ နာဲစိုးသိန်း ဒှ်မၞိဟ် မကၠောန်ရုပ်ၜိုပ်ဂှ်ရ။ ရုပ်ၜိုပ်တြေံဂှ်ကီု ရုပ်ဂအုပ်ဂှ်ကီု နာဲစိုးသိန်းရ ဒှ်မၞိဟ်မကၠောန်လဝ်။^[၂]^[၃] ရုပ်ၜိုပ်ဂှ် နွံသမၠုင် ၁၁ ပေ၊ အနာံ ၁၁ ပေ။^[၁]

ရုပ်ဂအုပ်ဂှ် အဝ်ဂေတ် ၂ ဂှ် ပ္တိတ်ဏာ နကဵု ကမြိုင်တုဲ အဝ်ဂေတ် ၉ ဂှ် လ္ဇံက်စုတ် ရုပ်ၜိုပ်ထဝ်တၟိဂှ်ရ။ အသေအဟာန်ကလေင်ကၠောန်ဗ္ဂပ်ရုပ်ၜိုပ်ထဝ်ဂှ် ကၠောန်ဗဒှ် ပ္ဍဲ ၁၄ အဝ်ဂေတ် ၂၀၁၆။ ပ္ဍဲသဘင်အသေအဟာန်ဂှ် သကိုပ်ဝန်ဇၞော်တွဵုရးဍုင် ဦးမင်းမင်းဦး တိုန်စိုပ်တုဲ ဟီုဂလာန် "သၟဝ်အလာံဂကူမန်၊ အလာံၜိုပ်ထဝ်ဂှ် ကောန်ဂကူမန်တအ် ကဵုဂွံပံင်ကောံညဳသၟဟ် ရေင်သကအ်အိုတ်ညိ"။ ပ္ဍဲကဵုအသေအဟာန်ဂှ် ဂကောံအလဵုအသဳ တွဵုရးဍုင်မန်ဂမၠိုင်၊ ညးစၞးစၠတ်ထဝ်ဂမၠိုင်၊ ညးစၞး ဗော်ဍုင်မန်တၟိဂမၠိုင်၊ ခမဳသင်မန်ဂမၠိုင် ကောန်ဂကူမန် နူဒေသနာနာတအ် သီုဖအိုတ် မၞိဟ် ၜိုတ် ၃၀၀၀ ပြင်ပြင်ဂှ် တိုန်စိုပ်တုဲ လှ်ေဒယှ်ေဒိင်သၟိင်ၜိုပ်ထဝ် ကေုာံ ဒွက်မန်ဂမၠိုင် ဒုင်တၠုင်ဏာ မၞိဟ်မကၠုင်စိုပ် အသေအဟာန်ဂှ်ရ။^[၅]^[၆]