ဗိုလ်လ္ၚီ၊ ဘာဂိုဏ်ရာမညနိကာယ ဍုင်လ္ဂုင်

ဘာဗိုလ်လ္ၚီ ဝွံ နွံပ္ဍဲဍုင်လ္ဂုင် (ဍုင်ဒဂုင်) ပွိုင်ဍုင် (ဗိုလ်တထောင်) ဗဒါဲကျာ်ဒဵုအပ်ရ၊၊ ဘာဗိုလ်လ္ၚီဝွံ ဒှ်ဘာတိုက်ပရိယတ်မန်မွဲ မၞုံကဵု ကောန်ခမဳကတ်လိက် ဗဒါဲကၠံဇကုရ၊၊ ဘာဝွံ နူတမ်တေအ် ကျာ်ဇၞော်ဂဏှာစာရ ဇာတိကွာန်ခလံက်ခပြု ပွိုင်ဍုင်ပံင် စပ္တန်လဝ် နူကဵု သက္ကရာဇ်ဍုင် ၁၃၁၀ တေအ်ရ၊၊ ကျာ်ဇၞော်ဂဏှာစာရ စုတိစဴအာသွဝ်တုဲ ကျာ်ဇၞော်ဒန္တပါလ ဆက်ထိင်ဒက် မင်မွဲအာရ၊၊ ဗွဲကြဴ ကျာ်ဇၞော်ဒန္တပါလဂှ် ပအပ်ကဵု ဘဒ္ဒန္တကေသရ၊၊

ဝင်တိုက်လိက်ပရိယတ္တိမန်

ရာမညနိကာယ ဘာဗိုလ်လ္ၚီ၊ ဍုင်ဒဂုင်

ကျာ်ဇၞော်အ္စာဂဏှာစာရ

လၟောဝ်ကျာ်ဇၞော်အ္စာဂဏှာစာရ ဇာတိကွာန်ခလံက်ခပြု (ညးဂမၠိုင် ကော် ကျာ်ဇၞော်ပါဏှိက်) သက္ကရာဇ်ဍုင် ၁၃၁၀- သၞာံဂှ် မိမၜါ ဒုင်ဒကာပရိက္ခရာဂမၠိုင်တုဲ အာစိုပ်ဘဝခမဳ ပ္ဍဲခဏ္ဍသဳ ဘာနန္ဒဝိုန် (ဘာဗၟာ) ဍုင်သထီုရ။ ဒှ်ခမဳတုဲ ကတ်ပညာလောကုတ္တဵု ပ္ဍဲဇရေင်တမ်ဇိုင်အ္စာ ကျာ်ဇၞော်အ္စာ ယောဂဳ(ဘာကျာ်၊ဍင်ပံင်) ဗၞတ်ပန်သၞာံ၊ ဇရေင်တမ်ဇိုင်အ္စာ ဥပ္ပဇ္ဇျာဲ ပ္ဍဲဘာနန္ဒဝိုန်၊ ဍုင်သထီု ဗၞတ်ထပှ်သၞာံရ။ ၁၃၁၀ သၞာံဂှ် က္ညပြာပ်တိုန်ကၠုင် ဍုင်ဒဂုင်တုဲ ပ္တန်ဘာဆု စဵုသၠသၟဝ်ကျာ ကျာ်ဗိုလ်လ္ၚီ (ကျာ်ဒဵုအပ်) ဗဒဲါဍာန်ကွဳပၟတ်မွဲမရ။ ညးမွဲဇကုဓဝ် ဒုင်ဒဒိုက်တန်တဴအာ ဗၞတ် ၂၀ သၞာံတုဲ သက္ကရာဇ်ဍုင် ၁၃၃၁ သၞာံဂှ် ပြံင်လုပ်ကၠုင် ပ္ဍဲအရှာံကျာ်ဗိုလ်လ္ၚီ လ္ပာ်သၠုင်ကျာ (ဇိုင်က္ၜဳ)တုဲ ကလေင်သြိုင်ပ္တန် ဘာတၟိ မွဲပၠန်ရ။ ပ္ဍဲဘာတၟိဂှ် ညးဂွံတန်တဴ ဗၞတ် ၁၆ သၞာံရ။ ကျာ်ဇၞော်အ္စာ ဂဏှာစာရဂှ် သက္ကရာဇ်ဍုင် ၁၃၄၇ သၞာံ၊ ဂိတုပထမဒ္ဂိုန် ၃ မံက်၊ တ္ၚဲဗြဴဗတိ အခိင်နူဂယး (၁၀:၀၀) နာဍဳကဵု (၃၀) ဗီဇနာ အဃော မကလိဂွံ အာယုက် ၇၄ သၞာံ ၄၇ ဝှ်ဂှ် စုတိစဴအာသွဝ်ရ။

ပဓာနနာယက ဘဒ္ဒန္တ ဒန္တပါလ

သက္ကရာဇ်ဍုင် ၁၃၄၇ သၞာံ၊ ဂိတုပထမဒ္ဂိုန် ၉ မံက်၊ ဂကောံသံဃနာယကအရာပ်ဂမၠိုင် ပအပ်ပြာပ်ပ္တိုန်ကျာ်ဇၞော်ကဵု နာဲဒန္တပါလ (ဇာတိကွာန်ကြေဝ်ဏာ) နဒဒှ်ပဓာနနာယကရ။ ပ္ဍဲလက်ထက်ကျာ်ဇၞော်အ္စာ ဂဏှာစာရဂှ် အလဵုဇကုညး ၜိုန်ရပံက်တိုက်လိက်ဟွံမာန်ကီုလေဝ် နကဵုဒွါပါင်ညး သွက်ဂွံပံက်တိုက်လိက်ဂှ် ညးဟီုမံင်လၟိုန်ရ။ အတိုင်နိမိတ်ပါင်ညး စိုပ်လက်ထက်ကျာ်ဇၞော်အ္စာဒန္တပါလ ဒှ်အာတိုက်လိက်မန်မွဲ ခိုဟ်ခိုဟ်ရ။ ကျာ်ဇၞော်အ္စာ ဒန္တပါလမွဲဟာန်ကေုာံ အ္စာလိက်

• ဘဒ္ဒန္တ တိက္ခ (ဇာတိကွာန် ကံဗိုတ်)
• ဘဒန္တ သိပ္ပံ (ဇာတိကွာန် ဓမ္မသ)
• ဘဒန္တ သြဘာသ (ဇာတိကွာန်လၟိုင်) တံကေတ် တာလျိုင် ဘိုင်ဖျေံကဵုလိက်တုဲ သင်ကတ်လိက်လေဝ် မွဲသၞာံကဵုမွဲသၞာံ ဂံါလုပ်ဂၠိုင်ကၠုင်မံင်ရ။ သက္ကရာဇ်ဍုင် ၁၃၅၂ သၞာံဂှ် သၟိင်အလဵုသဳ (နဝတ) ကေုာံ နာဲထောန်အုင်၊ မိပါန်ကျဳတအ် သ္ပသ္ကိုပ်သ္ကတုဲ မွဲဟာန်ကေုာံ ဒါယကာဂမၠိုင် သိုင်ခၞံပ္တန်ဘာတၟိတုဲ ပြံင်ဆုဲတိတ်ကၠုင် ပလိုတ်ဘာဂှ်ညိ ဒၞာဲလၟုဟ်ဏံရ။

ပဓာနနာယက ဘဒ္ဒန္တ ကေသရ

ဘာဗိုလ်လ္ၚီဂှ် သက္ကရာဇ်ဍုင် ၁၃၅၇ သၞာံ ဂိတုဖဝ်ရဂိုန် ၁၁ မံက်၊ ကျာ်ဇၞော်အ္စာ ဘဒ္ဒန္တ ဒန္တပါလ ပအပ်ကဵုကျာ်ဇၞော်အ္စာ ဘဒ္ဒန္တ ကေသရရ။ အသိင်တိုက်လိက်ဂှ် ညံင်ဂွံတန်ကြန်ဗိုန်ဗတ်အာ လုကဴအဓာန်မဂၠိုင်သ္ၚောဲမာန် ကျာ်ဇၞော်အ္စာ ဘဒ္ဒန္တကေသရ (ဓမ္မာစရိယ၊ ဒုတိယအကျဝ်၊ အဂ္ဂမဟာဂန္ထဝါစာကပဏ္ဍိတ) ကေုာံ

• အ္စာလိက် ဘဒ္ဒန္တ သိပ္ပံ
• အ္စာလိက် ဘဒ္ဒန္တ သြဘာသ
• အ္စာလိက် ဘဒ္ဒန္တ စန္ဒောဘာသ (ဓမ္မာစရိယ၊ ဇာတိကွာန်ကြေဝ်ဏာ)
• အ္စာလိက် ဘဒ္ဒန္တ နိပုဏ (ဓမ္မာစရိယ၊ ဇာတိကွာန်ကြေဝ်ဏာ)
• အ္စာလိက် ဘဒ္ဒန္တ နေပုည(ဓမ္မာစရိယ၊ ဇာတိကွာန် ဒဵုထောင်) တံဂစာန်လွဳပရာ ပ္တိတ်ဏာဇြဟတ် ညဳညဳသာသာတုဲဟေင် ပရေင်ပရိယတ္တိသာသနာ ဇၞော်မောဝ်ပြာထာ ညံင်သၟိင်တ္ၚဲဗၠာ ပ္ဍဲဒၞဲါဌာန်မန်တြေံအဴ ကော်ခဴစဍုင်ဒဂုင်ရ။

သ္ပပ္တံနူသက္ကရာဇ်ဍုင် ၁၃၆၄ သၞာံ ပယျာံတေံတုဲ စဵုကဵုလၟုဟ်ဏံ ရန်တၟံတိုင်ပ္ကဴ ဂၠံင်တရဴပရိယတ် ပြာကတ်ချပ်တၟော် ကျာ်ဇၞော်အ္စာ ဘဒ္ဒန္တ ကေသရ ကေုာံ အ္စာလိက် ဘဒ္ဒန္တ နိပုဏ အာဂတပၠတရဴဗိုန်ဗတ် သင်ကတ်လိက်ပၠန် တန်ဓမ္မာစရိယ ဒှ်ဌာနဇၞော်လုပ်ဗော်ညံင်တက္ကသိုလ် က္တဵုဒှ်ကၠုင်ပြဟ် ဒယှ်ဆာဲဂေါဝ် သၟူမောဝ်ဇောဝ်ပ္ဍး ဗျာပ်တရးသပ္ပါယ်စရာဲ ကောန်သင် ကလင်လုပ်က္တောဝ်ကၠုင်ကျောဝ်ဆဵုအာ သဒ္ဓါက္တဵုဒှ် ပြဟ်ကဵုဒါန် လၟိုန်ဘောဇိုန်နာနာ ဗဗေင်သ္ၚာကီု သီုကဵုဝတ္ထု ဂြုဂြုသၠးဟေင် ပရေင်ကုသဵု မဂ်ဖိုလ်ဂတ စိတ္တဟွံဗၠေင် မံက်ထေင်နညာဏ် ဒါန်ပ္ဍဲလိက်ပတ် ပြာကတ်ဂွံဆဵု ဘာဗိုလ်လ္ၚီရောင်။

လိက်ကၞပ်မတက်ပ္တိတ်တုဲဂမၠိုင် (ဂကောံအ္စာသၠပတ်မန်၊ ဘာဗိုလ်လ္ၚီ၊ ဍုင်ဒဂုင်)

တိုက်ပရိယတ္တိ ဘာဗိုလ်လ္ၚီဝွံဂှ် ကောန်ကတ်လိက်တအ်ဂမၠိုင် အကြာအဃောကတ်ဒၟံင်လိက်အိုတ်ဂှ်ဟေင် ဗွဲတၟေင်ကၠောန်ပကောံ ချူခၞံ ပြကိုဟ်သၟတ် မဆက်စပ်တန်ညးတအ်ကတ်လ္ၚတ်မံင်အိုတ်ဂှ် ဂွံဆဵုကေတ် အတိုင်လၟေင်ဗွဲသၟဝ် ဝွံကီုရ။

• ၁။ နာဲစန္ဒောဘာသ (ကြေဝ်ဏာ) ဇၟန်ယမက၊ ဇၟန်ဝိနယ်။
• ၂။ နာဲနိပုဏ (ကြေဝ်ဏာ) တိုင်ပ္ကဴအလင်္ကာ။
• ၃။ နာဲတပေါဝရ (ကအ်ဗိန်) မြမောဝ်ပါဌဝိနစ္ဆယ။
• ၄။ နာဲကောဝိဒ (ခလံက်ခပြု) ဓာတုပစ္စယဝိဘာဂပါရဂူ။ ယမကာဓိပ္ပါယပါရဂူ။
• ၅။ နာဲဓမ္မိက (ကုန်မိပ်ဇြိပ်) သ္ကံတဲနယူပစာရ။
• ၆။ နာဲခမနဳယ (တ္ကအ်သ္ကုတ်) ဓမ္မာစရိယအတ္ထယောဇနာ။
• ၇။ နာဲခေမာသာရ (ဍုင်ပံင်) ဇာတ်တန်ဒေါဝ်။
• ၈။ နာဲရာဝိန္ဒ (ကအ်ဍောတ်) နယ်ကံက်ဉာသ်၊ နေတ္တိဟာရ။ စရာဲအရထ။
• ၉။ နာဲနာဂသေန (တ္ကအ်သ္ကုတ်) နိရုတ္တိနယ။
• ၁၀။ နာဲဒါနဝန္တ (ဆင်ဂူ) ကၠေမ်ဓမ္မသင်္ဂဏဳ
• ၁၁။ နာဲစန္ဒိမာ (ကၞာလဵု) သံဝဏ္ဏနာ (ပါရာဇိကဏ်)
• ၁၂။ နာဲပညိန္ဒ (ကွာန်ပြဳ) ဇြဟတ်သီလက္ခန်
• ၁၃။ နာဲရာဝိက (ခဗုဲ) သၞံင်ပါရာဇိကဏ်
• ၁၄။ နာဲနာရဒဟံသာ (ကံဗိုတ်) ဇၞူဝါကျအဋ္ဌသာလိနဳ
• ၁၅။ နာဲစန္ဒရံသဳ (တံင်ပရင်) လျးညာဏ် အဋ္ဌသာလိနဳ
• ၁၆။ ဘဒ္ဒန္တကေသရ (ကြေဝ်ဏာ) အကြီုစေဝ်ပၞောန်ဓမ္မစရိယ

ခမဳသင်

အတိုင်စရင်လုပ်ဒဂိုန် နူရုင်ရာမညနိကာယမ္ဂး ပ္ဍဲဘာဝွံ သင်မလုပ်ဒဂိုန် သီုဖအိုတ် ပ္ဍဲသၞာံ ၂၀၂၁ ဂှ် နွံ ခမဳ ၂ ဇကု။

နိဿဲ

• လိက်အုပ်- သ္ဘင်စၟတ်သမ္တီသွဟ်လိက်မန် အလဵုအသဳပေင်(၁၀၀)သၞာံ၊ ဝင်တိုက်လိက်မန်ဂမၠိုင်။တက်တြးပ္တိတ်-ဂကောံရာမညဓမ္မာစရိယ၊ ကောဇာ - ၁၃၇၇ သၞာံ။