ဗီုကဝ်တန်

နူ ဝဳကဳပဳဒဳယာ

" ဗီုကဝ်တန် "[ပလေဝ်ဒါန် | ပလေဝ်ဒါန် တမ်ကၞက်]

  ဂၠးကဝ်ဝွံ နူကဵုဘဲ ပၟတ်၊ ဍာ်၊ ကျာ တအ် ပလီုပလာ်တဴ လုကဴကာလဗွဲမလအ်လ ဂလအ်အခိင်တုပ်ကဵု(၆၄)အန္တရကပ်၊ " သံဝဋ္ဋကပ် " မွဲအသၚ်္ချေယျကပ် ဒှ်တုဲ ဘုံဒးဘဲပလီုပလာ်တအ် စဵုကဵုညိဟွံသှေ် မ္ဒးလီုလာ်အာအိုတ်ရ။

  ကဝ်ပၟတ်ပလီုမ္ဂး - ဘုံနရက်၊ ဘုံမၞိဟ်၊ ဘုံသွဝ်၊ ဘုံဗြီုပထမဇျှာန် (၃)ဘုံ ဒးလီုလာ်အာရ။

  ကဝ်ဍာ်ပလီုမ္ဂး - ဘုံနရက်၊ ဘုံမၞိဟ်၊ ဘုံသွဝ်၊ ဘုံဗြီုပထမဇျှာန် (၃)ဘုံ၊ ဒုတိယဇျှာန်(၃)ဘုံ ဒးလီုလာ်အာရ။

  ကဝ်ကျာပလီုမ္ဂး - ဘုံနရက်၊ ဘုံမၞိဟ်၊ ဘုံသွဝ်၊ ဘုံဗြီုပထမဇျှာန် (၃)ဘုံ၊ ဒုတိယဇျှာန်(၃)ဘုံ၊ တတိယဇျှာန်(၃)ဘုံ ဒးလီုလာ်အာရ။

  ဘုံတအ်လီုလာ်အာတုဲ ဒၞါဲဘုံမလီုအာတအ်ဂှ် မုလေဝ်ဟွံမွဲ ဒှ်အာဒၞါဲသၠးမွဲ တန်တဴဒၟံင်ဗီုဂှ် စဵုကဵု မွဲအသၚ်္ချေယျကပ်ကီုရ။

__________________

   နူကဵု " ပၟတ်ကဝ်တူ " စံင်ပၠေင်ကၠေံ ဘုံမ္ဒးလီုတအ် လီုလာ်အိုတ်အာတုဲ ဒၞါဲဘုံတအ် သၠးမံင်အတိုင်ဂှ် ပေင်အာအခိင် " သံဝဋ္ဋဌာယဳကပ် " မွဲအသင်္ချေကပ်မ္ဂး ဗြဲခၞံကဝ် စဂူစှေ်ကၠုင်ရ။

      လ္တူဗလးအာကာသ အနန္တဂှ် ဗလးကျာနွံဒၟံင်သတီု ဒ္စိတ်ကိုတ် တြဴလက် (၉၆၀၀၀၀)ယောဇနာတုဲ ဗြဲဂူစှေ်ကၠုင်ဂှ် ခက်ဒၟံင်လ္တူဗလးကျာ စှေ်အာဟွံဂွံ - ကျာထ္ၜလဝ်ဍာ်ဗြဲဂှ်ရ။

    ဗြဲခၞံကဝ်ဝွံ ဂူတဴဇၞော်ကဵုဒြဟတ် ဗွဲမလအ်လကဵု သၞာံအခါဟွံဒေါံဟွံဇူ ဂူမံင်တုဲ ဍာ်နူကဵုလ္တူဗလးကျာဂှ် ဂၠိုင်တိုန်ဂၠိုင်တိုန် စဵုကဵုဒၞါဲ ဘုံဗြီုပထမဇျှာန်တအ် ဗၠိုက်တၞီအာရ။

    ကာလဂှ်မ္ဂး ဒၞါဲဘုံလီုလာ်အာလဝ်တအ်ဂှ် ဍာ်ဂွံအာဒၞါဲအိုတ်ရ။ ဗြဲဍးတုဲ ဍာ်တအ်ဂှ်လေဝ် သၞာံအခါဗွဲမလအ်လ ဟွံမွဲကဵုလျးတ္ၚဲ ဂံက်တဴဗွဲမ​လောန်ဂှ်ရ ဒိုပ်အာဒှ်အာညံင်ရဴ ဗလးဍာ်က​လောံရ။

    နူဂှ်မွဲကဆံင် သၞာံလအ်လောန်ဒၟံင်တုဲ ဍာ်တအ်ယအ်စှေ်ကၠုင်သိုက်က် ဗွဲကိုပ်ကၠာမ္ဂး ဘုံဗြီုပထမဇျှာန်(၃)ဘုံ မံက်ကၠုင်ကၠာရ။

   ဗွဲကြဴဍုင်သွဝ် လ္တူဗလးအာကာသ(၄)ဘုံ မံက်ကၠုင်သိုက်က် မွဲတုဲမွဲပၠန်ရ။ အခိင်အခါတအ်လေဝ် ဂၠိုင်ကဵုသၞာံ ရိုဟ်လၟိဟ်သၞာံဟွံမာန် ဒှ်ဒၟံင်တုဲ ဍာ်တအ်လေဝ် ယအ်စှေ်မံင်သာ်သာ် ဟဂှ်ရ။

  နူဂှ်ပၠန်  တိမံက်ဒှ်ကၠုင်မ္ဂး ကုန်ဒဵုဇၞော်ဇၞော်တအ် က္တဵုဒှ်ကၠုင်ကၠာရ၊  ဍာ်တအ်ဒိုဟ်အာသိုက်က် ဒၞါဲသွဝ်တာဝတိံ ဒဵုသိန္နရာဇ်မံက်ဒှ်ကၠုင်၊ ဒဵုယုဂန္ဓိုရ် ဒၞါဲသွဝ်စတုမဟာရာဇ်ဂှ်လေဝ် မံက်ဒှ်ကၠုင်ရ။

  ဍာ်နွံဒၟံင် နူကဵုလ္တူဗလးကျာဂှ် ယအ်စှေ်အာမံင်သိုက်က် ကာလ​သှေ်တဴ သတီုဍာ် ၜါကိုတ် ပန်လက်(၂၄၀၀၀၀)ယောဇနာဂှ် ဍာ်တအ်ဟွံဇိုတ်စှေ်တုဲ မံင်ဒၟံင်အတိုင်ဂှ်ရ။

  ဍာ်တအ်က​လောံဒိုပ် ဒိုဟ်မံင် အခိင်လအ်လောန်တုဲ လ္တူဍာ်ဂှ် ကၠေင်ခွေင်တိုန် ဗွဲကြဴဒှ်ကၠုင်တိရ။

       တိတအ် မံက်ဒှ်ကၠုင်တုဲ သၞာံအခါလအ်လောန်တုဲ တိလ္ပာ်သၟဝ် ဗၞတ်သတီု မွဲကိုတ် ၜါလက် (၁၂၀၀၀၀)ယောဇနာဂှ် ဒှ်အာတိတၟအ်တုဲ သ္ကုတ်လ္တူ (၁၂၀၀၀၀)ယောဇနာဂှ် ဒှ်တဴဖျုန်တိရ။ ပ္ဍဲဖျုင်တိ သ္ကုတ်လ္ပာ်လ္တူဂှ်ဟေင် ဘုံနရက်တအ်နွံတဴရ။

   လ္တူဗလးတိဏအ်ဂှ် ဒၞါဲတိသၠုင် တိသဝ်နွံတုဲ ဒၞဲါကုန်သၠုင်တအ်ဂှ် ကော်စဒဵု၊ ဒဵုသၠုင်အိုတ်ဂှ် ဒဵုသိန္နရာဇ် မပ္တံသာ်ဏအ် ဒဵုတအ် နွံဗွဲမဂၠိုင်ရ။  ဒၞါဲခလံက်-ဒၞက် တိသဝ်ဍာ်မံင်တအ်ဂှ် ကၟာ၊ လ္စ၊ ၜဳ၊ မှာသၟိဒ် မပ္တံသာ်ဏအ် ဒှ်ကၠုင်အိုတ်ရ။

   နူစ ဗြဲခၞံကဝ်စဂူ စဵုကဵုဘုံမံက်ဒှ်ကၠုင်အိုတ်ဏအ်ဂှ် ဒှ်အာအခိင် မွဲအသၚ်္ချေယျကပ် တုပ်ကဵုဟလအ် (၆၄)အန္တရကပ်ကီုရ။ ကပ်ခၞံကဝ်ဏအ်ဝွံ ကော်ခဴစ " သံဝဋ္ဋကပ် " မွဲအသၚ်္ချေယျကပ်ရ။

  ကာလခၞံကဝ်ဏအ်ဝွံ စက္ကဝါကဝ်တူတုဲ လီုလာ်အာ အခိင်တုပ်ပ် မွဲကိုဋ် နိလဟုတ်စက္ကဝါတအ်ဂှ်လေဝ် က​လေင်ဒှ်မွဲစွံ အခိင်တုပ်ပ်ပၠန်ရ။

__________________

တင်စၟတ်။        ။ ကဝ် ဍာ်ပလီု၊ ကဝ် ကျာပလီု တအ်လေဝ်  က​လေင်က္တဵုဒှ်ကၠုင် နနဲသာ်ဏအ်ကီုရောင်ဂှ် စၟတ်ညိ။

နိဿဲ[ပလေဝ်ဒါန် | ပလေဝ်ဒါန် တမ်ကၞက်]