ဗော်ဍုၚ်မန်တၟိကဵုဂကူသ္ကုတ်(၂)
- ဗော်ဍုၚ်မန်တၟိကဵုဂကူမန် သ္ကုတ်(၂)
✍️ဝိဉာဏ်ၜိုပ်
◼️ပ္ဍဲကဵုအကြာညးထံက်ဂလာန်ဂှ်ပၠန် ညးလ္ၚဵုဟွံဒုၚ်တဲ ဟွံထံက်ဂလာန်ဂှ် နွံတဴကီုရ။ အဲညးချူလိက်ဏံ ကေၚ်ဆဵုဂဗ ကေၚ်ဒးဒုၚ်ဟီုမံၚ်ကီုရ၊ “ဂလာန်နာဲဟီု ဂကူမန်ထံက်ဂလာန်ဂှ် အဲဟွံဒုၚ်တဲ မုပရောဟီုတှ်ေ အဲမန်ရ အဲလေဝ်ဒုၚ်တဲဟွံမာန်မံၚ်ရတှ်ေ ဗီုလဵုဂွံဟီု မန်တံထံက်ဂလာန်ရော” ဂလာန်ဒးဒုၚ်ဟီုဏံ ဍာံပြဒးမံၚ်ကီုရ။ “အဝ်.. နာဲဆအယာံမာတ်နာဲဒုၚ်တဲဟွံမာန်ဂှ် ဂကူမန်ဟွံဒုၚ်တဲဟွံထံက်ဂလာန်ပုဟ်ဂှ် နာဲဖျေံမိဂ္ဂးဟွံထေက် ပိုဲမၞိဟ်တံ ပိုဲဒးရံၚ် ဒုၚ်ယၟုဂကူမန်တှ်ေ လၟိဟ်ဂကူမန် နွံဂလိုၚ်လဵု မၞိဟ်ထံက်ဂလာန်နွံဂလိုၚ်လဵု မၞိဟ်ဟွံထံက်ဂလာန်နွံဂလိုၚ်လဵု ပိုဲဒးပါ်ဒး မၞိဟ်ဂမၠိုၚ်ဒုၚ်တဲ ဇကုမၞိဟ်မွဲဂအုမ်ဍောတ် ဟွံဒုၚ်တဲဂှ် စကာဝေါဟာ မန်တံဟွံဒုၚ်တဲတှ်ေ ဒးဟာနာဲ မွဲသာ်ပၠန်ဂှ် ဗော်ရပ်လွဟ်မန် ဇြဟတ်ဇၞော်နူကဵု ဗော်ဍုၚ်မန်တၟိဂှ်နွံဟာ ချပ်ပါ်ပါဲရံၚ်တှ်ေ သွဟ်တိတ်ရ” သာ်ဏံ အဲညးချူလိက်ဏံ မ္ဒးက္လေၚ်ဟီုသောၚ်ထ္ၜးကဵုရ။
🔸ပရေၚ်ဒုၚ်တဲထံက်ဂလာန် အလုံဂကူမွဲ ညးမွဲဟွံသှ်ေသၟေဟ်ဟီုဂှ် အရာလဵုမွဲလေဝ်ဒှ်ဟွံမာန် ပ္ဍဲမွဲသ္ၚိကောန်မွဲမိလေဝ် ဒှ်ဟွံလောဲဒၟံၚ်ရ မၞိဟ်ဗွဲမဂၠိုၚ်ထံက်ဂလာန်ဒုၚ်တဲမ္ဂး မၞိဟ်ဗွဲမဂၠိုၚ်ဒုၚ်တဲဟီုစဂွံရ၊ မၞိဟ်ဂမၠိုၚ်ဒုၚ်တဲထံက်ဂလာန်တုဲ သွက်ဂွံဒးစွံအာရီုဟၟဲ သာ်ဂှ်လေဝ်ဟွံသေၚ်ရ ဒးပစၟတ်သမ္တီတုဲ ဒးချပ်ဗ္စာဇွိတ်သပေါတ်ဗွဲမဇိပ်ဂၠိပ်ရ၊ ဟိုတ်သာ်လဵုတုဲ ညးတံဟွံဒုၚ်တဲ ဟွံထံက်ဂလာန်ဂှ် ဂပ်ဝ်သ္ဒးဂၠိုက်ဂၠာဲဇွိတ်သပေါတ်ဍေံရ၊ ကာလဂှ်မှ ဒၞါဲဟွံခိုဟ်ဂှ်တးပါဲ ဗီုခိုဟ်ဒးရးဂှ် ဂွံဆက်ပလေဝ်ပလေတ်အာရ၊ ဗော်ဍုၚ်မန်တၟိဂှ် ပ္ဍဲအရာဏံ ဟွံဒးဗ္တောန်ညးတံ ထေၚ်ကေတ်ရ၊ သာ်ဂှ်ဟွံသေၚ်တှ်ေ အာယုက်ဒဵုကဵု(၆၃)သၞာံဏံ တန်တဴဂွံဟွံသေၚ်ရောၚ် အဲစှ်ေစိုတ်ရ။
🔸ပ္ဍဲအရာဒုၚ်တဲဟွံမာန် ထံက်ဂလာန်ဟွံမာန်ဂှ်နွံၜါဗီုရ၊ ဗီုမွဲဂှ် ဟိုတ်နူလညာတ်တၞဟ်ခြာ လညာတ်ဟွံတုပ် ဟွံစှ်ေစိုတ်တုဲ ဒုၚ်တဲဟွံမာန် ထံက်ဂလာန်ဟွံမာန်ရ၊ မွဲဗီုပၠန်ဂှ် ထ္ၜေက်မတ်တုဲ ဟွံဒုၚ်တဲ ဟွံထံက်ဂလာန်ကၠးကၠးရ၊ ယဝ်သွက်မၞိဟ်တဲဂှ်မ္ဂး သွက်သ္ဂောံသ္ဒးပၠောပ်က္ဍဟ် သွက်သ္ဂောံသ္ဒးစွံအာရီုဟၟဲရ၊ မၞိဟ်လညာတ်တၞဟ်ခြာ လညာတ်ဟွံတုပ် ဟွံစှ်ေစိုတ်ဂှ် က္လေၚ်တက်ကျာ က္လေၚ်သဳကၠဳဂွံမံၚ်ညိဏီ၊ မၞိဟ်ကိတ်လဝ်တၟံတုဲ ဟွံထံက်ဂလာန် ဟွံဒုၚ်တဲဟေၚ်ဂှ်တှ်ေ မုလေဝ်သွက်သ္ဂောံဒးဂွိၚ်ဟွံသေၚ်ရောၚ်၊ လ္ပာ်ဗော်ဍုၚ်မန်တၟိလေဝ် သ္ဂံၚ်လ္ၚဵုဟီုအရေဝ် ၜက်ၜေတ်အာ ကာလနွံလေဝ်နွံမာန်ရ ဟိုတ်နူဒှ်ဒၟံၚ်ပုထုဇန်ဖအိုတ်တုဲ ကာလလ္ဆောဝ်ဒှ်အာမာန်ရ နကဵုအဲလေဝ် ကေၚ်ဆဵုဂဗမံၚ်ကီုရ၊ ဆ္ဂး ပ္ဍဲအဲဒုၚ်သ္ဇိုၚ်ကဵုလညာတ်သမ္တီအဲတုဲ ဒၟါနူလဟီုပူဂဵုဂှ်တုဲ အဲဟွံစၟတ်လဝ်နကဵုဗော်ရ၊ “အဝ်... မၞိဟ်ဟလိုၚ်တှ်ေ ဗီုဗီုဏံ ဍေံဒးနွံစမွဲၜါကီုလေဝ်” သာ်ဏံ အဲဒုၚ်ဂိုၚ်ကေတ်တုဲ အဲဟွံပတိုန်ဒုဟ်ကဵုဗော်ဍုၚ်မန်တၟိရ၊ သဘဴဓဝ်လောက ပိုဲတံဒးဆိၚ်ဆဒးညိညိကီုရောၚ်။
🔸ဗော်ဍုၚ်မန်တၟိ ဟိုတ်ဂွံတန်တဴဒၟံၚ်အာယုက်လလအ်ဏံမာန် မွဲသာ်ပၠန်ဂှ် ဟိုတ်နူဂၠံၚ်တရဴမူဝါဒဗော်ဍာံပြတုဲ တန်တဴဂွံကၠုၚ်ရ၊ မုဟိုတ်အဲဂွံစှ်ေစိုတ်သာ်ဏံရောဟီုမ္ဂး ရံၚ်ကဵုဇြဟတ်ဒပ်ပၞာန်ဗၠးၜးကောန်ဂကူမန် သၟဝ်ပၠတရဴဗော်ဍုၚ်မန်တၟိမ္ဂး ဂၠံၚ်တရဴမူဝါဒဗၠေၚ်အာနူ ဇၟောဝ်ဍာ်ပရေၚ်ဍုၚ်ကွာန်မ္ဂး ဟဳအာ ပြးဇးအာ ထ္ကးပြးအာလောဲလောဲသွာသွာရ၊ မုဟိုတ်အဲညးချူလိက်ဏံ ဂွံဂံၚ်ဟီုဂလာန်ဗီုဏံရောမ္ဂး အဲရံၚ်ကဵုဇြဟတ် ဒပ်ပၞာန်ဗၠးၜးကောန်ဂကူမန်ပိုဲတုဲ အဲဂံၚ်ဟီုရ၊ အဆံၚ်ဒပ်ပၞာန်မန်ပိုဲတ္ၚဲဏံဂှ် ဗီုကေတ်ဗီုဂွံ ဗီုသၟိက်မိက်ဂွံဂွံဂှ် ကေတ်ဂွံဟွံမာန်ဏီရ။
🔸ဟိုတ်ဂှ်ရ ဒၞါဲလ္ၚဵုဗီုကဵုဂၠံၚ်တရဴ NCA တံ ဒးဗက်အာဇၟောဝ်ဍာ်ပရေၚ်ဍုၚ်ကွာန်ရ၊
👉သ္ကုတ်(၃) ဆက်ပတိုန်ကဵုပၠန်ရောၚ်...