ဗော်ဍုၚ်မန်တၟိကဵုဂကူသ္ကုတ်(၃)

ဗော်ဍုၚ်မန်တၟိကဵုဂကူမန် သ္ကုတ်(၃)

✍️ဝိဉာဏ်ၜိုပ်

◼️ဟိုတ်ဂှ်ရ ဒၞါဲလ္ၚဵုဗီုကဵုဂၠံၚ်တရဴ NCA တံ ဒးဗက်အာဇၟောဝ်ဍာ်ပရေၚ်ဍုၚ်ကွာန်ရ၊ ဗော်ဍုၚ်မန်တၟိထ္ပက်လဝ် လိက်ကသုက်ဒေါံပန်ပှော်(NCA)ဂှ် မန်ပိုဲလ္ၚဵုဟွံပေၚ်စိုတ်တုဲ ဟီုလက်ဒၟံၚ်နွံရ၊ လ္တူဏံ ပိုဲတံထေက်ကဵုသ္ဒး ဇွိတ်သပေါတ်ဇြိုဟ်ဟ်နက်က်ညိရောၚ် မိက်ဂွံသ္ဂးရ။

🔸ပ္ဍဲကဵုသၞာံ 1995 တေံ နူကၠာဟွံစိုပ်အခိၚ် ထ္ပက်စၟတ်တဲဒေါံပန်ပှော်က္ဍၚ် ဥက္ကဌဇၞော်-နာဲယှိုဲဂျေန်တ္ၚဲအာယုက်ညးပေၚ်(၈၀)သၞာံ ကၠောန်သ္ပပေါဲမ္ၚဵုအာယုက်ပေၚ် သီုကဵုဆဵုဂဗကဵုဂကူမန်သေံ သီုဂကောံမန်နာနာနွံဍုၚ်သေံ ပ္ဍဲကဵုဟိုဝ်တေဝ်ဍုၚ်က္ၜၚ်ကံက်မွဲဒၞါဲ(ယၟုဟိုဝ်တေဝ်သမ္တီဟွံဒးရ) ကြပ်မံၚ်ကဵုတက္ကသဵုဓမ္မသာတ်ရ၊ ညးသောၚ်က္လးစပ်ကဵု ပရေၚ်တက်လဝ်ကျာကဵုအလဵုသဳဗၟာ ပရေၚ်ဒေါံပန်ပှော်ရ၊ မန်ဍုၚ်သေံလ္ၚဵု ဒုၚ်တဲဟွံမာန် ဒစဵုဒ္စးသၟာန်သှ်ညးသ္ကံရ၊ ဥက္ကဌနာဲယှိုဲဂျေန်လေဝ် သောၚ်က္လးသၠဲသၠဲလးလးရ၊ ၜိုန်ဂှ်လေဝ် မန်ဍုၚ်သေံဂှ် “နကဵုဟိုတ်လဵုဒှ်ဒှ် ကေတ်ဓဝ်ညဳသာကဵုဗၟာ သၞဒတန်ကဝ်ဂှ် ဆလအ်လေဝ် ဒုၚ်တဲဟွံမာန်ဍာံဍာံရ” သာ်ဏံကိတ်လဝ်တၟံမွဲအလန်ဓဝ် ဟီုဒစဵုဒ္စးတုဲ “သောၚ်ဗီုလဵုလေဝ် နာဲတံဒုၚ်တဲဟွံမာန်တှ်ေ ဗီုနာဲတံမိက်ဂွံကဵုပန်မံၚ်ကဵုဗၟာဂှ် အဲလေဝ်မိက်ဂွံပန်ဗၟာရ တိတ်ကၠုၚ်ဂြိုပ် မိက်ဂွံပန်မံၚ်လၟိုန်တှ်ေ ကၠုၚ်ဗက်ကၠုၚ်ကရောံပိုဲ ပန်မွဲစွံဏောၚ် ယဝ်နာဲတံကၠုၚ်တှ်ေ ပိုဲလေဝ်ဟွံတက်ရကျာကဵုဗၟာ” ဥက္ကဌနာဲယှိုဲဂျေန်ဟီုတုဲ မန်ဍုၚ်သေံဂှ်သ္ၚိတ်အာရ။

🔸လ္တူပၟိက်ဆန္ဒလ္ၚပ်စိုတ်ဟီုဂှ် ဇၟာပ်ဂကူမန် နွံပၟိက်ကဵုဂကူမန်ဗၠးၜးဖအိုတ်ရ၊ နစိုတ်ဓာတ်သၟးနွံတုဲ သွက်ဂကူမန်ဂွံဗၠးၜးဂှ် ဒၞါဲလဵုယုတ်ဒေက်ဒၟံၚ် ဟွံဂၠိုက်ဂၠာဲဇွိတ်သပေါတ် စပ်ကဵုကမၠောန်ဗၠးၜး ဘိုၚ်ဖ္ဍိုက်ဗ္ပေၚ်ရေၚ်တၠုၚ်ကဵုဟွံမာန်မ္ဂး က္လိဂွံဗၠးၜးဟွံမာန်ရ၊ မၞိဟ်ယိုက်ဂၠေၚ်တ္ၚိန်ဒၟံၚ်လွဟ်တံဂှ် မိက်ဂွံဂွံဒၟံၚ်ဗၠးၜး လောန်နူမၞိဟ်ဟွံတ္ၚိန်လဝ်လွဟ်တံဏီရ၊ ဂွံလဝ်လွဟ်တုဲ တီဆပန်ဗၟာကၠးကၠးဂှ် ဟွံရုမ်ဂပ်ရ၊ အရေဝ်ညးဟီုစနၠံမံၚ် ဒေသဉ္စ ကာလဉ္စ ညးသ္ဒးရံၚ်ဒေသကာလဍေံကီုရောၚ်၊ အခိၚ်တ္ၚဲဏံ ထ္ပက်လဝ်စၟတ်တဲ လိက်ကသုက်ဒေါံပန်ပှော် NCA ဂှ် ဗော်ဍုၚ်မန်တၟိမွဲဗော်ဓဝ်ဟွံသေၚ် ဗော်ဍုၚ်မန်တၟိဂှ် ထ္ပက်စၟတ်တဲလက္ကရဴ ဂကောံရပ်လွဟ်တၞဟ်ဟ်ဏီ ဟိုတ်နူအကာဲအရာ ပါဲဟွံဗၠးတုဲ ဗော်ဍုၚ်မန်တၟိဒးထ္ပက်စၟတ်တဲ လိက်ကသုက်ဒေါံပန်ပှော် NCA ရောၚ်ညာတ်ကေတ်ရ၊ ဟီုကၠးကၠးညိပၠန်တှ်ေ ၜိုတ်ဇြဟတ်ဒပ်ပၞာန်မန်ဇကုလၟုဟ်ဏံရတှ်ေ ပတေၚ်လဝ်ဗီုဒးစိုတ်ဟွံဂွံဏီတုဲ ဒးဗက်ဒၟံၚ်ဇၟောဝ်ဍာ်ရောၚ် နကဵုအဲ ညာတ်ကေတ်ရ။

🔸ဒးဟီုပရေၚ်လိက်ကသုက်ဒေါံပန်ပှော် NCA နကဵုလညာတ်ပူဂဵုညိပၠန်မ္ဂး လိက်ကသုက်ဒေါံပန်ပှော် NCA ဂှ် နကဵုအလဵုသဳဗၟာတံသၟး ဗီုဒးစိုတ်ချူဓဇက်လဝ်ဟွံသေၚ် ပိုဲသ္ဒးကၠးလဝ်ရောၚ်၊ လိက်ကသုက် NCA ဏံ ဂွံမံက်တိတ်ကၠုၚ် ဂွံပဒတန်မာန်ကၠုၚ်ဂှ် ဂကောံရပ်လွဟ်ကောန်ဍုၚ်အရၚ်တံ ၁၆ ဂကောံလုပ်ကၠုၚ်လဝ်ပေါဲဗတိုက် လ္တူခုၚ်တုဲဂွံကၠုၚ်လဝ်ရ၊ ပေါဲဗတိုက်လ္တူခုၚ်ဂွံက္လိဂွံ ပေါဲအံၚ်ဇၞးလိက်ကသုက်ဒေါံပန်ပှော် NCA ဏံဂှ် ဟိုတ်နူကဵုအသိၚ်လှာဲကၠုၚ်လဝ် နကဵုဆီပဠက် လုပ်ကၠုၚ်လဝ်ပေါဲဗတိုက်တုဲတုဲကၠုၚ်တေံရ၊ ဒပ်ပၞာန်ဂကူရခေၚ်အေအေဂှ် အခိၚ်တေံဇြဟတ်ဍောတ်မံၚ်ညိတုဲ ဗၟာတံဟွံပသမ္တီ ဟွံဒုၚ်တဲ ဟွံကဵုလုပ်ထ္ပက်စၟတ်တဲ လိက်ကသုက် NCA ဏောၚ် ဒပ်ပၞာန်အေအေတံ ဂွံသှ်ေအာမ္ၚးလိက်ကသုက် NCA ဂှ်ရောၚ်ဂှ် ကဵုဂွံက္လေၚ်ဂွံသတိညိ၊ ဗော်ဍုၚ်မန်တၟိလေဝ် ဟွံထ္ပက်ကၠုၚ်စၟတ်တဲလိက်ကသုက် NCA လောဲလောဲဂှ် ဟိုတ်နူကဵုဗၟာတံ ဟွံပသမ္တီကဵုဒပ်ပၞာန်ရခေၚ်အေအေလေဝ်ပါဒၟံၚ်ကီုရောၚ်။

🔸မန်ပိုဲလ္ၚဵုတံဂှ် ပရေၚ်တံဏံဝိုတ်ဒၟံၚ်တုဲ ဟီုထိုၚ်သးပရေၚ်ဒပ်ပၞာန်ရခေၚ်အေအေတံ ဟွံထ္ပက်လိက်ကသုက် NCA တုဲ ဖျေံကဝုဗော်ဍုၚ်မန်တၟိ ထ္ပက်လဝ်လိက်ကသုက် NCA ရ၊ ဍာံဍာံတေံဂှ် အေအေဂှ် ဟွံထ္ပက်လိက်ကသုက် NCA ဟွံသေၚ်.....

👉သ္ကုတ်(၄) ဆက်ပတိုန်ကဵုပၠန်ရောၚ်...