ဗော်ဍုၚ်မန်တၟိကဵုဂကူသ္ကုတ်(၅)သ္ကုတ်နိဂီု
- ဗော်ဍုၚ်မန်တၟိကဵုဂကူမန်သ္ကုတ်(၅) သ္ကုတ်နိဂီု
✍️ဝိဉာဏ်ၜိုပ်
◼️ဗော်ဍုၚ်မန်တၟိဂွံခိုဟ် ဂွံနွံကဵုစရာဲဂှ် ပိုဲညးဍုၚ်ကွာန်တံ နနဲသၟာတဵုကၠအ်ဥဒျာန်မွဲ သ္ဒးလဝ်စိုတ်တုဲ ကၠအ်ဥဒျာန်ပိုဲဂွံဍိုပ်ဍဴ ကျေဝ်ဂေါဝ်ရာၚ်ဆာဲဂှ် ပိုဲသ္ဒးလွဳပရာမၚ်မွဲ မပ္တံကဵု ထံက်ပၚ်၊ မၚ်မွဲ၊ လွဳပရာပတိုန်ဇြဟတ်ပၞာန်၊ ဇြဟတ်ဗော်၊ အဆံၚ်သဝ်အိုတ် နကဵုဇြဟတ်စိုတ် ပိုဲဒးကဵုဇြဟတ်မာန်ရောၚ်၊ ကၠုၚ်မွဲဖျေံကဝု ကၠုၚ်ၜါလက်မ္ဂး ဟွံဒှ်ဂုဏ်ဖဵုရ၊ အဓိပ္ပါဲအရေဝ်မလက် မဖျေံကဝုဂှ်ဖိုဟ် ပြံၚ်လှာဲထောံ ဗီုပြၚ်ထံက်ထ္ၜး ဗီုပြၚ်ကဵုသတိမ္ဂး က္လၚ်စသာယေန်အာ ပ္ဍဲကတောဝ်ပိုဲမၞိဟ်တံရ၊ ဆေၚ်စပ်ကဵုညးလ္ၚဵုလက်ဒၟံၚ် ဗော်ဍုၚ်မန်တၟိဂှ် နကဵုညးတာလျိုၚ် ဗော်ဍုၚ်မန်တၟိတံ က္လေၚ်လက်မံၚ်ညးမလက်မံၚ်ဗော်ဍုၚ်မန်တၟိဂှ် နွံမံၚ်ကီုဟာ နကဵုအဲဟွံက္လေၚ်ဆဵုရ က္လေၚ်ကေတ်ဒုဟ်လေဝ်ဟွံဆဵုကၠုၚ်ရ၊ နကဵုညးထံက်ဂလာန် ပူဗိုၚ်ဗော်တံရ ဒုၚ်ဟွံမာန်တုဲ က္လေၚ်သေက်လက်မံၚ်နွံရ၊ ညးတံလေဝ် ဟွံက္လေၚ်စောဲဂဗုတ် ညံၚ်ရဴအလဵုသဳဗၟာတံ က္လေၚ်ပါ်ပါဲမံၚ် အလဵုသဳဗၟာတံဂှ်ရ။
🔸အကာဲအရာ ပရေၚ်ဍုၚ်ကွာန်လၟုဟ်ဂှ်လေဝ် အတိုၚ်တုဲတုဲကၠုၚ်တေံရ ဇၟာပ်ဗၟာထ္ကး မန်တံပြးဗက်လၟိုန်ရ၊ ဗီုလဵုပြးပြး အလန်ဏံဗော်ဍုၚ်မန်တၟိ ဂွံအာသတိဇၞော်ဇၞော် နကဵုအဲညာတ်ကေတ်ရ၊ နကဵုနဲဍိုဟ်ကေက်မွဲ ဒတူလိုၚ်ဒၟံၚ်ရ၊ ဆ္ဂး မန်ပိုဲလ္ၚဵုဂှ် ဟိုတ်နူကဵု ဗော်ဍုၚ်မန်တၟိဟွံဒတူလိုၚ် လ္ပာ် အေန်ယူဂျဳပေၚ်ၚ်တုဲ ဟီုဂးပျုတ်ဗ္ဒေက်ဒၟံၚ်ဗော်ဍုၚ်မန်တၟိ ညံၚ်ကဵုဗော်ဒတူလိုၚ်ဒၟံၚ် လ္ပာ်ဒပ်ပၞာန်ဗၟာမေန်အံၚ်လှာၚ်ရ၊ ဍာံဍာံတေံ မုလေဝ်ဟွံဆေၚ်ရ၊ တၚ်ဒတူလိုၚ်ဗော်ဍုၚ်မန်တၟိဂှ် မိက်ဂွံတီကၠးကၠးတှ်ေ က္လေၚ်ကပှ်ကျောဝ် ဗှ်ရံၚ်လိက်လလောၚ်တြး တ္ၚဲကောန်ဂကူမန် မရနုက်ကဵု(၇၄)ဝါကီု တ္ၚဲပၠန်ဂတးမန်တုဲကၠုၚ်ဏံမ္ဂး တီကေတ်ကၠးကၠးမာန်ရ၊ ဗော်ဍုၚ်မန်တၟိပံၚ်ကဵုအလဵုသဳပၞာန်ဂှ် လ္ပဟီုဏီ ဗော်ပရေၚ်ဍုၚ်ကွာန်မန် ဗွိုၚ်ပ္ဍဲဍုၚ် လုပ်ပံၚ်ကဵုအလဵုသဳပၞာန်ဂှ် ဗော်ဍုၚ်မန်တၟိ သီုအာတ်မိက်လဝ် ညံၚ်ဟွံဂွံပံၚ်၊ ညံၚ်ဟွံဂွံလုပ်ကေတ်ဒၞါဲ ပ္ဍဲကဵုအလဵုသဳပၞာန်ဏီရ၊ ဆ္ဂး ဟွံအံၚ်ဇၞးကၠုၚ်ရ၊ ဟိုတ်ဂှ်ရ လ္တူညးမဟီုဂးပျုတ်ဗ္ဒေက်ဒၟံၚ် ဗော်ဍုၚ်မန်တၟိပံၚ်ကဵုအလဵုသဳပၞာန်ဂှ် မန်ပိုဲတံ ကတောဝ်လ္ပယံၚ်ဗက်ညိ မိက်ဂွံဗတိုက်ဖ္အောဝ်ဏာရ။
🔸သရုပ်ကၠေံမ္ဂး ဗော်ဍုၚ်မန်တၟိဂှ် ဒှ်ဗော်စၞးဂကူမန် မက္လိဂွံကၠုၚ်လဝ်ဓဝ်ပတှ်ေ နူကောန်ဂကူမန် အာယုက်ဂၠိၚ်အိုတ်မွဲရ၊ ပရေၚ်အပ္ဍဲဗော် ဟိုတ်နူပူဂဵုလ္ၚဵုတံတုဲ ပရေၚ်ပါ်တိတ် ပရေၚ်နုက်တိတ် သၟူအမြာဲပသပသောန်တံ ၜိုန်နွံညိညကီုလေဝ် နကဵုမူဝါဒဂၠံၚ်တရဴပရေၚ်ဍုၚ်ကွာန် အတိုၚ်ဇၟောဝ်ဍာ်ပရေၚ်ဍုၚ်ကွာန် ကွာ်ကၠုၚ်ဒးတုဲ ပွိုၚ်(၆၃)သၞာံပြၚ် တန်တဴမာန်ကၠုၚ် စဵုကဵုပွိုၚ်တ္ၚဲဏံရ၊ ဗော်ဍုၚ်မန်တၟိ အကြာအန္တရာဲနာနာသာ် တန်တဴကၠုၚ်လလအ်ဏံမာန်ကၠုၚ်လဝ်ဂှ် စိုပ်ခေတ်ပိုဲ လက်ထက်ပိုဲဏံ ဒၟါနူပိုဲလ္ပကဵုလီုလာ်အာညိ၊ သၞောတ်ဝ်ဗော်ဍုၚ်မန်တၟိ ဟွံစခေတ်ရ သုၚ်စောဲဟွံဂွံရ ဒှ်ပ္ဍဲစိုတ်ပိုဲတံမ္ဂး သၞောတ်ဝ်ညံၚ်သ္ဂောံဂတာပ်ခေတ် ညံၚ်သ္ဂောံသုၚ်စောဲဂွံဂှ် သၟတ်ကီု မၞိဟ်အဝဲလ္ဒောဝ်ကီု အဝဲဇၞော်ကီု ဘိုၚ်ကဵုကသပ် ဘိုၚ်ပါလုပ် ဘိုၚ်ကဵုဇြဟတ် ဘိုၚ်ထံက်ပၚ် အဆံၚ်သဝ်အိုတ် ဘိုၚ်ကဵုဇြဟတ်စိုတ် ဇၟာပ်ကောန်ဂကူမန်မာန်မ္ဂး ဗော်ဍုၚ်မန်တၟိဗီုပၟိက်ဆန္ဒဂကူမန်နွံပၟိက်ဂှ် ဍိုက်ပေၚ်ကၠုၚ်တုဲ ဍုၚ်မန်မၞုံကဵုအခေါၚ်အရာ ဘဝကံကုသဵုမန် မန်ဖန်ဖက်ကေတ်တ်မာန်ဗွဲစၟတ်ရောၚ်။
- တၚ်ဒုၚ်ဝန် လိက်ပရေၚ်ဏံ နူကဵုပူဂဵုမွဲမွဲ ဂကောံမွဲမွဲ ဗော်မွဲမွဲ ကဵုဇြဟတ်ဂရိုဟ် ဖ္အောဝ်ကဵုချူလဝ်ဟွံသေၚ်ရ၊ နကဵုလညာတ်ပူဂဵုအဲညးချူလိက်ဏံဟေၚ် ချူလဝ်တုဲ ဒးတှ်ေကေတ် ဗၠေတ်တှ်ေပါဲ လ္ပဂၠာဲသၞညးသ္ကံညိအဴ...
ဂကူမန်ကဵုသ္ဂောံဗၠးၜးပြဟ်ဟ်ညိ🙏🙏🙏 ✍️ #ဝိဉာဏ်ၜိုပ်
- ဗီုရုပ်👉Lin Hitke & ဝိဉာဏ်ၜိုပ်