ဗှ်လိခ်ကဵုဂၠိုၚ်ၚ်
ဗှ်လိခ် ကဵုဂၠိုၚ်ညိ
လိခ်ပတ်ဂှ်ဒှ်ဂၠံၚ်ဍာန်ဘဝရ၊ လိခ်ပတ်ဂှ် ယဝ်သ္ပသၠနှေဝ်ဘဝမ္ဂး
ဘဝဇၞော်သၠုၚ်လောဲရ၊ ကာလဆဵုဂဗတၚ်ခက်ခုဲဝါတ်ဂါတ်မ္ဂး မၞိဟ်ဗှ် လိခ်ဂှ် ဂၠဲါဂၠံၚ်တိတ်လောဲနူမၞိဟ် ဟွံဗှ်လိခ်ပတ်ရ၊ မၞိဟ်ဒးဂ္ဇံၚုၚ်ဒးဗန် က္ၜံၚ်ဒးဒုၚ်ကမျမံၚ် ကဵုလောကဓဝ်ဂှ် ဟိုတ်နူဗှ်လိခ်ပတ်အောန်ရ။
ဗှ်လိခ်အောန်မ္ဂး တီသ္ဘဴလောကအောန်န်ရ၊ ဗှ်လိခ်ဂၠိုၚ်မ္ဂး ဘဝမၞိဟ်သုညဂှ် စိုပ်ကဆံၚ်မၞိဟ်ဂၠိုၚ်ကဵု ဗဟုသုတမွဲရ၊ နဲကဲဒက်ပ္တန်ဘဝဂွံသၠုၚ် နဲကဲဂၠဲါပိုန်ဒြပ်ဂွံဒှ် သေဌဳတၠဓနဂှ် ဂၠံၚ်တြဴ ချူလဝ်ပ္ဍဲလိခ် ပတ်နွံဖ္အိုတ်ရ၊ ဗက်ဂၠဲါရံၚ်ဗှ်ပ္ဍဲလိခ်မ္ဂး ဆဵုညာတ်ရ။
သွက်ဂွံဒုၚ်ကျကဵုဘဝဂှ် ပ္ဍဲလိခ်အုပ်ထ္ၜး လဝ်နဲကဲဂၠိုၚ်ကဵုဗီုရ၊ ဒၠောံဗ္တောန်တၠပညာထ္ၜးလဝ်ဂၠံၚ်တြဴ သွက်ဘဝ ကဆံၚ်မၞိဟ်ဂွံသၠုၚ်ဂှ် ဗှ်လိခ်မ္ဂး ဆဵုညာတ်မာန်ရ၊ လၞုဟ်ဗှ်လိခ်မ္ဂး ဗဟုသုတအောန်ရ။
လိပ်ပတ်ဂှ် ဒှ်ဇြဟတ်မွဲဗီုကီုဏောၚ် အဟိန်ဗှ်မံၚ်လိခ်ဂှ် ဂွံဆဵုညာတ်ကေတ်ဂၠံၚ်ဍာန်ခိုဟ်တုဲ ဇြဟတ်ထတ် စိုတ်လုပ်စ လ္တူဂၠံၚ်ဍာန် ခိုဟ်ဒှ်မာန်ရ၊ ဗှ်လိခ်ဂၠိုၚ်မ္ဂး ညာဏ်ပညာဇၞော်သၠဲကၠုၚ်တုဲ ဟွံဒးဒုၚ်လီဠာန်ကဵုစၞာဲပြယာဲလောကရ။ ပရေၚ်ကမၠောန် နဇိုၚ်နတဲ ၜိုန်အောန်ကီု လေဝ် လညာတ်ညာဏ်ဆဵုလဝ် ပ္ဍဲလိခ်ပတ်နွံ ဂၠိုၚ်မံၚ်ရ။
လညာတ် ပ္ဍဲလိခ်ပတ်ဂၠိုၚ်မ္ဂး ဂၠံၚ်ဗၠေတ်မှာဂှ် တီလောဲသွာရ၊ “ သ္ဘဴဍိုဟ်ကေက်ဂှ် နွံပ္ဍဲလိခ်ပတ် " မၞိဟ်လၞုဟ်ကဵုဗှ်လိခ်ဂှ် ညာဏ်ဍိုဟ်ကေက်ဟွံမွဲရ၊ ဒှ်မၞိဟ်မ္ဂး လ္ပကဵုဒှ် မၞိဟ်ဓီုဓီုၜီုၜီုညိ၊ ခေတ် ၂၁-ဗွဝ် ကၠံဏံ မၞိဟ်ဗှ်လိခ်မာန် ဘဝတဴတက်ပြဟ်ရ။
ညးတမၠာတံ ဟီုဗ္ကန်လဝ် ဂလာန်နွံမွဲပိုဒ်ဂှ် “မၞိဟ်ဇၞော် လ္ပၜုၚ်ဂစိုတ်သြောံမ လ္ပစဖ္အိုတ် " ဟီုဂှ် အဓိပ္ပဲါမိက်ကဵုတီဂှ် မိက်ဂွံတီဂလာန်ဇြိုဟ်နက် မၞုံကဵုဒ္တုဲဖိုလ်ဂၠိုၚ်ဂှ် နိဿဲဗ္ဒဲါကုညးဇၞော် တၠပညာတံညိ၊ ပ္ဍဲညးတံလ္ၚတ်ဗှ်လဝ်လိခ်ပတ်ဂၠိုၚ်တုဲ စဳကၠးပ္ဍဲအရာညာဏ်ပညာရ။
ဒၞပ်ရာန်ဍိုက်ဟွံမာန်ဂှ် အာကဵုဇိုၚ်သၟးညိ၊ ဆဂးညံၚ်ဂွံရာန်လိခ်အုပ်ဗဟုသုတ ဂွံဗှ်လ္ၚတ်အာဂှ် ဂစာန်ညိ၊ သြန်သွက်ဇကုဂွံစပုၚ် မွဲဗ္ဂါပ်ဒုၚ်အေၚ်တုဲ သြန်ဂှ်ရာန်ဗှ်လိခ်အုပ်ညိ။
ဗှ်လိခ်မာန်မ္ဂး စိုတ်ညိၚ်တန်ကြန်ရ၊ ဒ္ဂေတ်စာရိတ္တလေဝ်သၠုၚ်တန်မာန်ရ၊ စတံဗှ်လိခ်နွံမ္ဂး သာတုဲ မိက်ဂွံဆက်ဗှ်ကၠုၚ်ရ၊ ဝါသနာ ဗှ်လိခ်ဂှ် ပ္ဍဲဂကူမန်အောန်မံၚ်ရောၚ်၊ ဗှ်လိခ်ပၠန်လေဝ် ပြေမံၚ်စိုတ် ပ္ဍဲလိခ်ဝတ္ထုဆာန်သာဲသၟးရ၊ လိခ်ပတ်သၠုၚ်ဘဝ ပံက်မတ်ဒဿနဂှ် ဂစာန်ဗှ်ကဵုညိ။
လိခ်ပတ်ဒှ်ဂျိ လိခ်ပတ်ပၠီုဘဝလေဝ်နွံမံၚ်ကီုတုဲ ညံၚ်ဟွံဗှ်လ္ၚတ် ဒးလိခ်ပတ်သာ်ဂှ် ဒးစွံသတိဇၞော်ဇၞော်ရ၊ လိခ်ပတ်ဒှ်ဂျိဟီုဂှ် လိခ်ပတ် ပထုဲက္ဍဟ် လိခ်ပတ်ပြံၚ်သၠာဲအာရီု လ္ပာ်တဏ္ှာကာမ၊ လိခ်ပတ်ဆဝ် ပ္ၚုဟ်စိုတ်ဓါတ် လ္ပာ်ဝိဝိၚ်ဟိုတ်မာဲ လိခ်ပတ်သာ်ဝွံ ညံၚ်ဟွံဗှ်ဒး စွံသတိညိ။
သၟတ်တၟိတံ လေပ်ပညာတုဲ ဟွံကၠောန်ကမၠောန်ကၟဳစက် ဟဳမံၚ်လ္တူဂၠံၚ်ဍာန် စောဲလာံကဵုဂဥုဲမူမာဲ ဟွံစွံၚုဟ်မးကဵုဘဝ သိက္ခာမၞိဟ်ဂှ် ဟိုတ်နူဗှ်ဒး လိခ်ပတ်ဒှ်ဂျိဏံရောၚ် ၊သုၚ်ဒးဂျိတုဲ ညံၚ်ရဴဂအံပ္တိတ်ဟွံမာန်ကီု လိခ်ပတ်ဒှ်ဂျိလုပ်စိုပ်လုပ်က္ဍဟ်တုဲမ္ဂး ဂၠံက်ပ္တိတ်ဟွံလောဲရ။
ကောန်ၚာ်သၟတ် အွဲမံၚ်ဘာ စောဲလာံကဵုဒဳဘဳဂုၚ် ဇာတ်ဗာ် ထ္ပက်ဂစိုတ်ဂယျိုၚ်ဂၠိုၚ်မ္ဂး ဓါတ်ဂှ် လုပ်ဂွံက္ဍဟ်သၟတ်တံဂှ်တုဲ စိုတ်ဓါတ်ကြံၚ်မ္ၚိုဟ်ဓဇန်ကြာန် လ္တူပွဳဗွိုၚ် ဒှ်ကၠုၚ်မာန်ရ၊ ပညာလညာတ်ဂွံနၚ်နူ ဒဳဘဳဂုၚ်ဂှ် လ္ဆောဝ်ဒှ်မံၚ် ပညာဂျိနွံရ။
သ္ဘဴလိခ်ပတ်ကဵုဂၠံစိုတ်မၞိဟ်ဂှ် ဒးပလေဝ်ပ္ညဳပ္ညပ်လေပ် လိခ်ပတ်မၞုံကဵုၚုဟ်မး ဟွံမွဲကဵုၚုဟ်မး လိခ်ပတ်ဒှ်ဒ္တုဲဖိုလ်မၞိဟ်ဟွံဒှ် ဂုဏ်ဖိုလ်မၞိဟ်ပါ် ပါဲကဵုဒးတုဲ လိခ်ပတ်ဒှ်ဂုဏ်ဖဵုသွက်မၞိဟ်ဂှ် ဗီုဂစာန်ဂၠာဲထဝ် သြန်ကီုဒးဂစာန်ဂၠဲါဗှ်လ္ၚတ်ဏောၚ်။
သွက်ဂွံဂွံသြန်လှုဲဏောၚ် ကိစ္စဇၞော် အခိၚ်ဗှ်ရံၚ်လိခ်ကိစ္စ ဟွံဇၞော်လ္တူဂလာန်သ္ဂးဏံ စိုတ်လုပ်စမ္ဂး နဲကဲဂၠဲါပကောံသြန်ဂှ် ဂွံတုဲ ပညာဂွံထိၚ်ဒဝ်သြန်ဟွံတီ ဟွံကၠိုဟ်လဝ်ဗွဲမဍာံစၟတ်မ္ဂး ဟွံလံမွဲသာ် သြန်ဂၠဲါဂွံနၚ်ဂှ် ပညာထိၚ်သြန်မၞုံပ္ဍဲလိခ်ပတ် ဒးဗှ်လ္ၚတ် လိခ်ပတ်လေဝ်စွံအဓိက။
ဂမြၚ်ညာဏ်ဂွံနၚ်နူဗှ်လိခ်ပတ်ဂှ် ထိၚ်အာဘဝမာန်ရ၊ ဘဝသၠုၚ်ကၠုၚ်နူဂမြၚ်ညာဏ်လိခ်ပတ်ဂှ် ဒှ်ကြက်ရှ်သာမွဲဂကူကီုရောၚ် စွံၚုဟ်မးလ္တူရှ်သာဏံတုဲ နဲကဲသွက်ဘဝဂွံသၠုၚ် ဘဝဂွံတဴတက်ဂှ် နွံပ္ဍဲလိခ်ပတ်ရောၚ် ပတှ်ေဒုၚ်တဲမာန်ရ။
ဒှ်ဂုဏ်ဖဵုမ္ဂး လိခ်ပတ်လောကဳလေဝ် ဒးဗှ်လ္ၚတ် လိခ်လောကုတ္တဵုလေဝ််ဒးဗှ်လ္ၚတ် ဇၟာပ်အခိၚ်ဒးဗှ်လဝ်ဖ္အိုတ်ရ၊ ညးလ္ၚဵု ဗှ်လိခ်ဂၠိုၚ်တုဲ နူဘဝယုတ်သဝ်ဂှ် ပြံၚ်သၠာဲအာဘဝမသၠုၚ်ပြဲရ၊ မၞိဟ်ခိုဟ်မၞိဟ်ဍာံ မၞိဟ်သၠုၚ်ပြဲတံဂှ် ပြံၚ်သၠာဲကၠုၚ်နူလညာတ်သမ္တီလိခ်ပတ် ဖ္အိုတ်ရ။
လိခ်ပတ်ဂှ် ဒှ်အ္စာစၞောန်ထ္ၜးဂၠံၚ်ကဵုမၞိဟ်တံရ၊ မၞိဟ်မံၚ်ကဵုဂၠံၚ် စၞောန်လိခ်ပတ်မ္ဂး ကာလဟိဏ္ဏလေဝ် စိုတ်ဓါတ်သၠုၚ်ပြဲရ၊ ဟိုတ်နူလ္ၚတ်ဗှ် လိခ်ပတ်ဘာသာပတှ်ေအဆက်က်လေဝ် ပြံၚ်သၠာဲအာမာန်ရ၊ လိခ်ပတ်ဂကူဗုဒ္ဓဘာသာဂှ် ပိဋ္ဋကတ်ပိနွံစုၚ်ၚ်လေၚ်ၚ်ရ၊ မိက်ဂွံတီ ပရေၚ်ဒဿန (အတွေးအခေါ်) ဇြိုဟ်ဟ်နက်က်မ္ဂး လ္ၚတ်ပိဋ္ဋကတ် အဘိဓရ် လညာတ်ဒဿနကျာ်တွံလဝ်ပ္ဍဲအဘိဓဝ်ဂှ်ဇြိုဟ်နက် နူလညာတ်ပညသိပ္ပံ ဂတာပ်ခေတ်ဏံဏီရောၚ်။
လ္ၚတ်ဗှ်လိခ်မ္ဂး ဂွံသမာဓိ စိုတ်တန်ကြန်မွဲဒၞဲါရ၊ တုပ်ကဵုညးဂ္ဇံပၟဝ်ဓဝ်မွဲကီုရ၊ လျးလိခ်ပတ်ဂှ် ဟွံဂမ္တဴဗီုလျးပၟတ်ရ၊ ၜိုဟ်ဂံက်သာယျေန်ရောၚ်၊တၟးလေဝ်တၟးဇြုၚ်ကေဝ်လောန်ရ။
လိခ်ပတ်ဂှ် ဒှ်မိဿဟာဲမၞိဟ်ခိုဟ်အိုတ်မွဲရ၊ ဂွံမိဿဟာဲခိုဟ်ဟေၚ် ဘဝသၠုၚ်ပြဲမာန်ရ၊ မၞိဟ်ဒိုက်ဝါတ်ဂၠိုၚ် မၞိဟ်ရိရိုၚ်ဓဇန်ကြံကြဂၠိုၚ် ဟိုတ်နူသ္ဇိုၚ်ဗှ်လိခ်ပတ်အောန် မိဿဟာဲခိုဟ်ကၠိဂွံအောန်ရ။
ဂကူဒှ်မံၚ်ဘဝဍိက်ပၠက်ဂှ် ဒှ်ဂကူလ္ၚတ်ဗှ်လိခ်အောန်ရ၊ ဂကူမန်တံဒှ်မံၚ်ဘဝဍိက်ပၠက်လၟုဟ်ဂှ် ဟိုတ်နူမန်ဗှ်လိခ်အောန်အာရ၊ ဂကူမန်သၟတ်မန်လ္ၚဵုဗှ်မံၚ်ကွေံရ၊ ဆဂး ဒှ်မံၚ်လိခ်ဝတ္ထုဆာန်ပြး ဝတ္ထုရုပ်ဗျံက်(ကာတွန်း) ဗာ်ထပက်ဂမြၚ်ညာဏ် သွက်ဘဝဂွံဖေါအ် ဗြေဝ်ဟွံဒှ်ရ။
ခေတ်တၟိဏံ သၟတ်မန်လေပ်ပညာ ဂွံတဆိပ်ကြာဂၠိုၚ်ကၠုၚ်ရ။လိခ်အုပ်ကဵုပညာဒက်ဂကောံကမ္မဏဳ လိခ်အုပ်သိုၚ်ခၞံကွတ်စက် အေန်ဂျေန်နဳယာ ပၟတ်ဇုက်လလဳ (လျှပ်စစ်) ဗှ်လ္ၚတ်တုဲဖန်ဗဒှ်ခၞံ ကၠောန်ပ္ဍဲဗွဳဗွိုၚ်ဂကူမနကတံညိ။
လိခ်အုပ်ကဵုပညာသၠုၚ်ဘဝ မပ္တံကဵုကမ်ပျူတာ၊ အေန်တာနက် အီမေ(လ်) ဗှ်လ္ၚတ်လဝ်ဂၠိုၚ်မ္ဂး ပညာတံဂှ် မန်တံလေပ်ဂၠိုၚ်တုဲ ဟွံဒးဒုၚ်ဍဵုဍိုက်ကဵု မဟာဂကူတံရ။
သၟတ်မန်တံ အထေၚ်ဟွံသောဲကဵု လိခ်ပတ်မန်မ္ဂး လၟုဟ်သွာၚ်လိခ်ပတ်မန် ပံက်မံၚ်မတ်ကောန်ဂကူ မပ္တံဂျာနေဝ် မဂ္ဂဇြေန် လိခ်အုပ်လညာတ် တၞောဝ်သၟတ်တၟိတံ ဒှ်လိခ်ပတ် ပံက်မတ်ကောန်ဂကူတံ ဍာံဍာံရောၚ်။
ယာဲအပါမန်ညးတမၠာ ဟီုဒၠေံါဗ္တောန်ကောန်တံ ဟာဲကောန် ဟာဲကောန် ကတ်ဗ္တောန်စ ဗှ်ေလ္ပလၞုဟ် ပညာနွံဒှက ဒယှ်ဂတ စပိုန်ဇကု ပညာဟွံမွဲ ဒဒိုက်ယဲသြ၊မိတ်ပသတြု တီဟာနာဲဇု ဇၟာပ်အနုကွတ်ကတ်ညိ ပလၞုဟ်" ကျာ်ဇၞော်အ္စာပါလိတဘာဓါတ်ကျာ် ကၟာဝက်ကဵုလဝ်သတိကဵု ကောန်ဂကူမန်တံနွံရ။ ✍ကျာ်ဇၞော်အ္စာမဟာထေရ်ပါလိတ