ဘဝဇကုလ္ပပတုပ်ကဵုဘဝညးတၞဟ်
( ဘဝဇကုလ္ပပတုပ်ကဵုဘဝညးတၞဟ် )
လုပ်ဗှ်ဖျုန်လိက်စိုအ် ။
နွံတဴမအရေဝ်ဗွဲမဂၠိုၚ်ပိုဲတံဂွံမိၚ်ဂွံဗ္တောန်ကေတ်မံၚ်တွဵုဟီုဂှ်တှ်ေ ဘဝဟီုမ္ဂးဂှ်လ္ပပတုပ်တဴညးသ္ကံညိ၊ ဇၟာပ်မၞိဟ်ဘဝညးကဵုညးနွံတဴကဵုၚုဟ်မးကဆံၚ်ညးကဵုညးဖအိုတ်တုဲ ဂၠံၚ်ဍာန်တိုၚ်ပ္ကဴကွာ်အာဒၟံၚ်တ္ၚဲဏံဂှ်လေဝ်နွံကဵုတိုၚ်ပ္ကဴဇၟာပ်ညးဖ္အိုတ်ကီုရ၊ ဟိုတ်ဒှ်သာ်ဂှ်တုဲ ပိုဲတံလ္ပအာကဵုဖျုန်ပ္ဍဲညးတၞဟ်ခိုဟ်အာနူကဵုပိုဲပရေံအာနူကဵုပိုဲဏံညိ၊ လ္ပပတုပ်နူတၞဟ်သိုက်လောဲအာနူကဵုပိုဲဝါတ်အာနူကဵုပိုဲဏံညိ၊ လ္ပပတုပ်ယာဲအပါညးတၞဟ်သိုက်လောဲနူယာဲအပါပိုဲ၊ သာ်ဂှ်ဟွံသေၚ်တှ်ေ ယာဲအပါညးတၞဟ်စောန်သကီုဂှ်ဗက်ယာဲအပါပိုဲဟွံဂွံပုဟ်၊ တြုံညးတၞဟ်ခိုဟ်တြုံအဲဟွံခိုဟ် ဗြဴညးတၞဟ်ခိုဟ်ဗြဴအဲဟွံခိုဟ်၊ ကောန်ညးတၞဟ်ခိုဟ်ကောန်ပိုဲဟွံခိုဟ်သာ်ဏံဗွဲတုန်၊ ယဝ်ရပိုဲတံအာပတုပ်ဒၟံၚ်အရာဆေၚ်စပ်ကဵုဘဝဟီုမ္ဂးဂှ်တှ်ေ နွံကၠုၚ်ကဵုဆပြသၞာဟွံကတုဲ ဘဝပိုဲဏံဂှ်လေဝ်သဝ်ယုတ်စှ်ေကၠုၚ်မာန်သိုက်သိုက်ရ။
မၞိဟ်လ္ၚဵုတအ်ဟွံကၠိုဟ်ဘဝကၠးကၠးသောၚ်သောၚ်တပ်တပ်တုဲ ညးတအ်အာပတုပ်ကဵုဘဝညးတၞဟ်ကဆံၚ်သဝ်နူကဵုဇကုအိုတ်တုဲ သွက်သ္ဂောံဘဝဇကုဂွံသၠုၚ်နွံဂၠိုၚ်ၚုဟ်မးသာ်ဏံလေဝ်နွံတဴဗဝ်သအဝ်ဗွဝ်ဒဵုဟဒၚ်ရ၊ ပတုပ်အာပတုပ်ကၠုၚ်ဒၟံၚ်တုဲ ပ္ဍဲကဵုအခိၚ်ဆဵုညးကဆံၚ်သၠုၚ်အာနူဇကုကီု ၚုဟ်မးဘဝတၟေၚ်အာနူကဵုဇကုဂှ်တှ်ေ အလန်ဏံဟေၚ်ကလေၚ်ဒှ်ဒဒိုက်စိုတ်စဟွံစှ်ေတိက်ဟွံလၠိၚ်ဒှ်ကၠုၚ်မာန်ပ္ဍဲဘဝလၟေၚ်လၟေၚ်တ္ၚဲရ၊ ပတုပ်အာပတုပ်ကၠုၚ်တုဲ အိုတ်ကၞောတ်ဂှ်ဟေၚ်ဂၠာဲတသိုက်တၟာဒဳရုဲလေဝ်ဟွံဆဵုပ္ဍဲဘဝမစှ်ေဒၟံၚ်စက္ကမိဏေတ်နာဍဳဏံကီုရ။
ဇၟာပ်ဇၟာပ်မၞိဟ်သီုဖ္အိုတ်လေဝ် အရာခိုဟ်ခိုဟ်ဗီုညးကဵုညးနွံမံၚ်ဖအိုတ်တုဲ ထေက်ကြိုက်ပိုဲတံဒးရံၚ်ဆဵုကေတ်ၚုဟ်မးပ္ဍဲအရာခိုဟ်ခိုဟ်ဒၞာဲညးတၞဟ်နွံမ္ဂးတှ်ေပိုဲဏံဂွံဆဵုကေတ်တသိုက်စိုတ်ဗွဲစၟတ်ဨကန်တရ၊ ဟိုတ်ဒှ်သာ်ဂှ်တုဲ ဂွံတြုံဗြဴလေဝ်ပိုဲတံလ္ပပတုပ်မံၚ်ကဵုဗြဴတြုံညးတၞဟ်တံဂှ်ညိ၊ ဂွံကောန်လေဝ်ပိုဲတံလ္ပအာပတုပ်ဒၟံၚ်ကဵုကောန်ညးတၞဟ်တံဂှ်ညိအဴ၊ သာ်ဂှ်ဟွံသေၚ်မ္ဂးတှ်ေ ပိုဲတံဟွံမွယ်ကဵုတသိုက်အတိုၚ်မွဲဘဝဏံလေဝ်ဒှ်မာန်ရ၊ လောကဏံသိုၚ်မာန်ပ္တိုန်လဝ်ဇၟာပ်အရာနာနာအိုတ်သီုဂှ် ခိုဟ်အာဖအိုတ်လေဝ်ဟွံမွယ် ပရေံအာဖအိုတ်ဂှ်ပၠန်ဟွံမွယ်တုဲ နွံဆပိုဲဏံဒးကၠိုဟ်စိုတ်ကေတ်ဍေံတုဲ ပိုဲဏံဒးနွံကဵုနဲကဲဗဂဵုဟလဵု ဒးနွံကဵုနဲကဲပြံၚ်သၠာဲ ဒးမံၚ်ကဵုဍေံနကဵုအစောံစရာဲဂံၚ်ဂံၚ်တုဲ ဒးပြိုၚ်ပ္ကာန်အာဘဝနဒဒှ်ဓဝ်ဍာံမွဲဂၠံၚ်ဍာန်တပ်တပ်ဓဝ်ဓဝ်သောၚ်သောၚ်အးအးမွဲတၞုၚ်သွက်ဘဝညိ၊ ဣဏံရပိုဲတံဆဵုကေတ်ၚုဟ်မးဘဝ ပိုဲတံဆဵုကေတ်ၚုဟ်မးအခိၚ် ပိုဲတံဆဵုကေတ်ၚုဟ်မးသ္ကံရဲမိတ်သဟာဲပြောဲဇွာဂကူဘာသာမွဲပေၚ်ပေၚ်ဍာံဍာံဇေတ်ဇေတ်ရ။ အုပ်ကၠေံနိဂီုတုဲဆဝွံကၠာရအဴ ။
နိဿဲ
ကၠုၚ်နူပရေၚ်ဆဵုဂဗဘဝလၟေၚ်လၟေၚ်တ္ၚဲ ။