မန်ရာမညဘူမိ၊ ဘာဂိုဏ်ရာမညနိကာယ ဗုဒ္ဓဂယာ

ဘာမန်ရာမညဘူမိ ဗုဒ္ဓဂယာ
တင်ဂၞင်ဂမၠိုင်
ဒတန်	Giant Buddha Rd, Bodh Gaya, Bihar 824231, India
မဆေင်စပ် ကုဘာသာ	ထေရဝါဒဗုဒ္ဓဘာသာ
ဒတန်သာသနာ	စမြိုင်သာသနာ
ဂိုဏ်	ဂိုဏ်ရာမညနိကာယ
ကၟိန်ဍုင်	India
ဗိသုကာ
ညးမပတန်	တၠဂုဏ်အစာဣန္ဒသာရ
သၞာံမစပ္တန်	ဂိတုမာတ် ၆၊ ၂၀၁၁

ဘာမန်ရာမညဘူမိ၊ ဗုဒ္ဓဂယာ အိန္ဒိယ (လဆောဝ် ချူ) ဘာမန် ရာမညဘူမိဗုဒ္ဓဝိဟာရ (အၚ်္ဂလိက်: Ramanyabuumi Buddha Vihara‚ रामान्यभूमि बुद्धा विहार) ဝွံ ဒှ်ဘာဂိုဏ်ရာမညနိကာယ မနွံဒၟံင် ပ္ဍဲဗုဒ္ဓဂယာ၊ တွဵုရးဗိဟာရ်၊ ရးအိန္ဒိယ (Giant Buddha Rd, Bodh Gaya, Bihar 824231, India)။ ဘာဝွံ သြိုင်ဗဒှ်လဝ် နကဵု ကမ္မတဳ သြိုင်ဗဒှ် ဘာမန်ရာမညဘူမိ ပ္ဍဲသၞာံ ၂၀၁၁ နကဵုသြန်ဒါန် ဒါယကာ ဗွဲတၟေင် ကောန်ဂကူမန် နူဌာန်နာနာဂမၠိုင်ရ။ အရှာမ်တိဘာဝွံ သီုဖအိုတ် နွံ ဗၞတ် ၁၀ ကတ္ထ (၁၆၂၀၀ စတုရန်ပေ) ဂအာင်ဘာသၟး သီုဖအိုတ် အိုတ်အာလဝ် သြန်ရူပဳ ထပှ်ပြကောဋိကိုဋ် ၜါကိုဋ်။ ဘာဝွံ နကဵု သၞောဝ်အိန္ဒိယမ္ဂး ဒှ်ဒြပ် ဂကောံရာမညဘူမိ (Ramanyabhumi Trust) မပိုင်ပြဳရ။

ဝင်

ပ္ဍဲကဵု ပွဳပွူ ဗုဒ္ဓဂယာ ဒၞာဲကျာ်တြဲဂေါတမ မက္လိဂွံ သဗ္ဗညုတ္တညာဏ် မအာစိုပ် ဒဒှ်ကျာ်မပြဲဂှ် နွံကဵု ဘာဂကူနာနာရ။ နကဵု ဂကူမန်လေဝ် စိုတ်မိက်ဂွံ ပ္တန်ဒၟံင် ဘာမန်မွဲ ပ္ဍဲဗုဒ္ဓဂယာဂှ် နွံကၠုင် တၟာလအ်တုဲ ဗီုညးကဵုညး ချပ်ကၠုင်လဝ် နွံကီုရ။ ဘာမန်ရာမညဘူမိဏအ် ဂွံဒှ်ကၠုင်ဂှ် ပ္ဍဲကဵု သၞာံ ၂၀၁၀ ဂိတုမေ ၂၀ အခိင်နူဂယး တၠဂုဏ်အစာ ဣန္ဒသာရ (ဂုဏ်အစာဓရ် ကျာ်ဇၞော်အစာ အမေရိကာန်) ဆက်နင်ဖုင် ကုတၠဂုဏ်အစာ နာရဒသိရဳ ညးမတိုန်ဒၟံင် ဘာတက္ကသိုလ် ပ္ဍဲဍုင်အိန္ဒိယ၊ ဒဒှ်ရ နာဲဇျာဲ (နိုင်သန်းညွန့်) ကဵု မိဝါန်ဒဳ (မိခင်နွယ်ဦး) ကေုာံ ကောန်ဇာတ်ဂမၠိုင် ညးမပဒတဴ ပ္ဍဲသဟရးအမေရိကာန် ကဵုဒါန် သြန်ဒဝ်လာ မသုန်ဠက် သွက်ဂွံရာန်တိရ။ ဒုင်သဇိုင် ကုသြန်ဒါန်ဂှ်တုဲ နကဵု တၠဂုဏ်အစာ နာရဒသိရဳ၊ ကေတ်အရီုအဗင် နူကဵု ကျာ်ဇၞော်တၞဟ် ဗီုကဵု ကျာ်ဇၞော်ယခေင်တုဲ ဗက်ဂၠာဲဂအာင်တိရ။ ဂိတုနဝ်ဝေမ္ဗာ ၁၈ ဂှ် တၠဂုဏ်အစာဣန္ဒသာရ က္ညပြာပ်အာ အိန္ဒိယ သွက်ဂွံ ပ္တန်ဘာဝွံရ။ ဂိတုဒဳဇြေမ္ဗာ ၀၃ ဂှ် တၠဂုဏ်အစာဣန္ဒသာရ ကေုာံ ခမဳသင်မန်ဂမၠိုင် မညး ကတ်ဒၟံင် ပညာပ္ဍဲဍုင်အိန္ဒိယ နွံတမ် တၠဂုဏ်အစာနာရဒသဳရိ (မှဝ်ဂျဳ၊ ဍာ်ဗု)၊ တၠဂုဏ်အစာဥတ္တမ (ဒဵုတၟအ်)၊ တၠဂုဏ်အစာသုဇန (ဂုဏ်ထောဋ် ဝါဍောတ်)၊ တၠဂုဏ်အစာကလျာဏ (တကအ်လကုတ်) ပ္ဍဲဌာနဗဒမ်မန် ဍုင်ဗာရာဏသဳရ။

ဂိတုဒဳဇြေမ္ဗာ ၆ ဂှ် တၠဂုဏ်အစာဣန္ဒသာရ၊ တၠဂုဏ်အစာသုဇန ကေုာံ တၠဂုဏ်အစာနာရဒသဳရိ နူဗာရဏသဳ ပြာပ်အာ ဇရေင်ဗုဒ္ဓဂယာ သွက်ဂွံ ဂၠာဲရာန်တိရ။ တၠဂုဏ်အစာတိလောက (ဂကူယခေင်၊ ဗွဲကြဴ ဒှ်နွံပိုန် ဘာပဌာန်၊ ဗုဒ္ဓဂယာ) ကဵုအရီုအဗင် သွက်ဂွံဂၠာဲဒၞာဲအရှာမ်ဘာရ။

တိ ပ္ဍဲပွဳပွူ တၞံဇြဲဗောဓိဂှ် င္ၚုဟ်က္ဍင်ဒၟံင်တုဲ သြန် ဗက်ဟွံစိုပ်၊ ညးတအ် ညးပိ အာချပ်စ ကုကျာ်ဇၞော်ပညာလင်္ကာရ (ဂကူယခေင်) နွံပိုန် ဘာကြုက် နာလန္ဒ)။ ဒဳဇြေမ္ဗာ ၁၂ ညးတအ် ညးပိဇကု အာဇူဒၟံင် ပ္ဍဲဘာယခေင် မဟာအောင်မြေဂှ် ဂွံဆဵုကဵု ဒါယကာ နူဍုင်မန် မိဥဥအံင် (ကၟာဝက်)၊ မိမျကျဳတအ်တုဲ နူကဵု ညးတအ် ညးၜါတၠဂှ် ဒုင်ကအ်ပါင် သွက်ဂွံ ပ္တန်ဘာမန် ပ္ဍဲဗုဒ္ဓဂယာဂှ် ညးတအ် ညးမွဲ ကဵုဒါန် သြန်ဒဝ်လာ မွဲမွဲလက်ကီုရောင်ရ။ သွက်ဂွံ ဆဝ်မ္ၚုဟ် ပရူပ္တန်ဘာမန် ပ္ဍဲဗုဒ္ဓဂယာဂှ် တၠဂုဏ်အစာဣန္ဒသာရ ပြာပ်စဴအာ ဍုင်မန်တုဲ ဇာန္နဝါရဳ ၁၈၊ ၂၀၁၁ (သက္ကရာဇ် ၁၃၇၂ ပုဟ် ၁၄ မမံက်) ဂှ် ကၠောန်ဗဒှ် သဘင်ကောံဓရီု ကိစ္စပတန်ဘာမန် ဗုဒ္ဓဂယာ ပ္ဍဲဘာသိင်္ဂုတ္တရ၊ ဍုင်ဒဂုင်ရ။ ပ္ဍဲဂှ် တုပ်စိုတ်တုဲ ဒက်ပ္တန်လဝ် ကမ္မတဳသင် သြိုင်ဗဒှ် ဘာမန် ရာမညဘူမိ မွဲရ။

ပ္ဍဲကမ္မတဳဂှ် ကျာ်ဇၞော်အစာ ဘာပြာသာဒ် (ဥက္ကဋ္ဌ)
ကျာ်ဇၞော်အစာ ဘာကၟာဂဥုဲဆီ (ဒုဥက္ကဋ္ဌ)
ကျာ်ဇၞော်အစာ ဘာပညာဇောတိက (ဒုဥက္ကဋ္ဌ)
ကျာ်ဇၞော်အစာ ဘာဗိုလ်လ္ၚီ (ညးအုပ်ကာ)
ကျာ်ဇၞော်အစာ ဘာရာမညာလင်္ကာရ (ညးအုပ်ကာ)
ကျာ်ဇၞော်အစာ ဘာသိင်္ဂုတ္တရ (ညးဂိုင်သြန်)
ကျာ်ဇၞော်အစာ ဘာရာမည (ညးဂိုင်သြန်)
ကျာ်ဇၞော်အစာ ဘာဇၞူဓမ္မသုခ (ညးစၟတ်စရင်)
ကျာ်ဇၞော်အစာ ဘာဓာတ်ပံင်ကောံ (ညးစၟတ်စရင်)
ကျာ်ဇၞော်အစာ ဘာသဳလဘဏ် (လၟိင်ပရိုင်)
ကျာ်ဇၞော်အစာ ဘာဣန္ဒာရာမ (လၟိင်ပရိုင်)
ကျာ်ဇၞော်အစာ ဘာမဏိဝဇဳရ (လၟိင်ပရိုင်)

ကြဴနူ မဂၠာဲရံင် အရှာမ်တိ ဒၞာဲနာနာတုဲ ဖေဖဝ်ဝါရဳ ၈၊ ၂၀၁၁ ဂှ် ကဵုသြန်ခရမ် ကုတၠတိတုဲ တုပ်လဝ်စိုတ် ရေင်သကအ် အပ္ဍဲမွဲဂိတု သြန်သီုဖအိုတ် ညံင်ဂွံကဵုပြေရ။ ကြဴနူ မကဵုသြန်ခရမ်တုဲ စရပ်ကမၠောန် ဗီုကဵု ခါဲဍာ်ကမၠိုင်အဝဳစိ၊ ဒက်ကၟာင်တအ်ရ။ စိုပ် ဂိတုဖေဖဝ်ဝါရဳ ၅ သၞာံ ၂၀၁၁ ဂှ် နကဵု အရီုအဗင် ကျာ်ဇၞော်ပညာလင်္ကာရ (နွံပိုန် ဘာကြုက် နာလန္ဒ)ဂှ် နကဵု ညးသကိုပ်သက ကိစ္စပတန် ဘာမန် တၠဂုဏ်အစာဣန္ဒသာရ၊ ကျာ်ဇၞော်အစာ သုန္ဒရ၊ တၠဂုဏ်အစာနာရဒသိရဳ၊ ကေုာံ ဒါယကာ ဥပတ္ထမ္တက ဒေါက်တာ ဦးအောင်းဝင် + မိဥဥအောင်၊ နာဲကျဝ်ဝေန် + မိမျကျဳတအ် ပ္သောင်ကဵု ခရိတ်င္ၚုဟ်မးပေင်ပေင် ကုတၠတိဂှ်ရ။ ဂအာင်တိဂှ် သီုဖအိုတ် နွံ ဗၞတ် ၁၀ ကတ္ထ (၁၆,၂၀၀ စတုရန်ပေ) င္ၚုဟ် သြန်ရူပဳ ၆,၀၀၀,၀၀၀ (တြဴစှ်ောကိုဋ်)။ တုဲပၠန် ခရိတ် လိက်ကသုက်၊ အကံက်အခေါန်၊ ပြံင်လှာဲယၟု သီုဖအိုတ် ကိစ္စဂအာင်ဘာ ဂွံတုဲဒှ် အိုတ်သြန်ရူပဳ ၇,၂၀၀,၀၀၀ (ထပဟ်စှ်ောၜါကိုဋ်)၊ နကဵု သြန်ကသာပ်ဗၟာမ္ဂး ဒတုမ်ဒၟံင် ၁၆၀,၀၀၀,၀၀၀ (မွဲနိလဟုတ္တံ တြဴနိလဟုတ်)ရ။

သွက်ဂွံ ဆက်မင်မဲအာ ဒတန်သာသနာဂှ်တုဲ ဂိတုမာတ် ၆၊ ၂၀၁၁ (သက္ကရာဇ် ၁၃၇၂ ဖဝ်ရဂိုန် ၂ မမံက်) တ္ၚဲအဒိုတ်ဂှ် ပပဓာန် ကုကျာ်ဇၞော်အစာ ပညာလင်္ကာရ (ဘာကြုက် နာလန္ဒ)၊ ကျာ်ဇၞော်အစာသုန္ဒရ (နွံပိုန် ဘာမန် အနုရာဓပုရ)၊ တၠဂုဏ်အစာဣန္ဒသာရ (ကျာ်ဇၞော်အမေရိကာန်)၊ တၠဂုဏ်အစာတိလောက (ဗွဲကြဴ ဒှ် နွံပိုန် ဘာပဌာန် ဗုဒ္ဓဂယာ)၊ တၠဂုဏ်အစာသုဇန၊ တၠဂုဏ်အစာနာရဒသိရဳ၊ ကေုာံ ဒါယကာဥပတ္ထမ္ဘက ဒေါက်တာ ဦးအောင်ဝင်း+ မိဥဥအောင်၊ နာဲကျဝ်ဝေန်+မိမျကျဳတအ်တုဲ စၟတ်သမ္တီ တ္ၚဲစပ္တန် ဘာမန် ရာမညဘူမိ ပ္ဍဲဌာန် ဗုဒ္ဓဂယာ ကေုာံ ဖ္ဍောတ်ပရိုတ်မ္ၚဵု ပစူအလာံသာသနာ ပ္ဍဲကဵု အရှာမ်တိဘာဂှ်ရ။

သွက်ဂွံ ဆက်မင်မဲအာ ဘာမန်ရာမညဘူမိဝွံ အတိုင်သၞောဝ်အိန္ဒိယတုဲ ဒက်ပ္တန်လဝ် ဂကောံရာမညဘူမိ (ramanyabuhumi Trust) မွဲရ။ နကဵုသၞောဝ်မ္ဂး ပ္ဍဲဂကောံဂှ် အောန်အိုတ် ကောန်ဍုင်အိန္ဒိယ ပိတၠ သ္ဒးပါလုပ်တုဲ သွက်ဂှ်ဂှ် လကျာ်ယခေင်ပိဇကု ကျာ်ဇၞော်ပညာလင်္ကာရ နွံပိုန် ဘာကြုက် နာလန္ဒ၊ တၠဂုဏ်အစာတိလောက (ဗွဲကြဴ ဒှ်နွံပိုန် ဘာပဌာန် ဗုဒ္ဓဂယာ)၊ တၠဂုဏ်အစာဓမ္မရတန (ဘာကြုက် နာလန္ဒ)တုဲ သၟေဟ်ဂှ် ဒှ်ဂကူမန်ဂမၠိုင်ရ။

1. ဂကောံရာမညဘူမိ ဂှ် ဒက်ပ္တန်လဝ် နကဵု မၞိဟ်ဗွဲသၟဝ်ဝွံရ
2. ကျာ်ဇၞော်အစာ ဘာကြုက် ဗုဒ္ဓဂယာ အိန္ဒိယ
3. တၠဂုန်အစာ ဘာပဌာန် ဗုဒ္ဓဂယာ အိန္ဒိယ
4. တၠဂုန်အစာ ဘာကြုက် နာလန္ဒ၊ အိန္ဒိယ
5. တၠဂုဏ်အစာ ဘာမန်အကြန် သဟရးအမေရိကာန်
6. ကျာ်ဇၞော်အစာ ဘာမန်ရာမညလင်္ကာရ ဍုင်ဒဂုင်
7. တၠဂုဏ်အစာနာရဒသိရဳ ဘာမန်ရာမညဘူမိ ဗုဒ္ဓဂယာ
8. တၠဂုဏ်အစာသုဇန ဘာမန်ရာမညဘူမိ ဗုဒ္ဓဂယာ
9. တၠဂုဏ်အစာဥတ္တမ ဘာမန်ရာမညဘူမိ ဗုဒ္ဓဂယာ
10. နာဲမောင်မောင်သောင်း သေဒ္ဒနဳ၊ အဝ်သတြေလျ
11. နာဲလျးထဝ် သုဝဏ္ဏဘုမ်၊ ကေန်ဗာရာ၊ အဝ်သတြေလျ
12. မိဥဥအောင် ဍုင်ဒဂုင်
13. မိမျကျဳ ဍုင်ဒဂုင်
14. မိဝါန်ဒဳ (က) မိခင်နွယ်ဦ ဂါဟေန္နာ အမေရိကာန်

ကြဴနူ မဒက်ဂကောံဏအ်တုဲ ညးမပိုင်ပြဳဘာမန် နူကဵု ယၟုပုဂ္ဂလိကဂှ် နကဵု ဗီုပြင် မကဵုဒါန် ကုဂကောံဂှ် ဘာဂှ် ဒှ်အာ ဒြပ်ဂကောံရာမညဘူမိ မပိုင်ပြဳ ပ္ဍဲကဵု အံက်တဝ်ဗာ ၂၂၊ ၂၀၁၁ ဂှ်ရ။ အတိုင်စၟတ်သမ္တီ မ္ဂး ဂကောံရာမညဘူမိ (Ramanyabhumi Trust) ဝွံ ဂွံဒုင်စၟတ်သမ္တီ ပ္ဍဲရးအိန္ဒိယ ပ္ဍဲ ၆ အဝ်ဂေတ် ၂၀၁၈။ နကဵု စၟတ်ဂၞန်ဂကောံ Reg. No 1123/2011 ရ။

သွက်ဂွံသြိုင်ဘာဂှ် ကၠောန်ဗဒှ် သဘင်ဖျေဟ်ကၞက် ပ္ဍဲဂိတုဒဳဇြေမ္ဗာ ၉၊ ၂၀၁၁ (သက္ကရာဇ် ၁၃၇၃ မြေက္ကသဵု ၁၄ မမံက်) တ္ၚဲသိုက်။ ကျာ်ဇၞော် မနွံပိုန်ဘာ နူဍုင်မန် ၂၀ ဇကု ပြာပ်ကၠုင် သဘင်ဖျေဟ်ရိုဟ်ကၞက်ဘာရ။ စမြိုင်သာသနာ မနွံ ပ္ဍဲအရှာမ်ဘာမန်ရာမညဘူမိ သီုဖအိုတ်တ်အ်ဂှ် သြိုင်လဝ် နကဵု မဒါန် ကောန်ဂကူမန်ဂမၠိုင် နူကဵု ဌာန်နာနာရ။ နကဵု အလဵုဇကု တၠဂုဏ်အစာဣန္ဒသာရ ပြာပ်အာ ဇရေင် ကောန်ဂကူမနွံ ပ္ဍဲတိုက်ဥရောပမ္ဂး ရးဖေန်လာန်၊ နဝ်ဝေ၊ ဂျာမနဳ၊ နေတာလာန်၊ ဒေန်မက်၊ သွိဒေန်၊ တိုက်အမေရိက မ္ဂး ရးခနေဒါ၊ သဟရးအမေရိကာန်၊ တိုက်အဝ်သတြေလျ မ္ဂး ရးအဝ်သတြေလျ၊ တိုက်အာရှမ္ဂး ရးသေင်္ဂပူရ်၊ ရးသေံတအ် ဗက်ဆဝ်မ္ၚုဟ်ဒါန် သွက်ဂွံ သြိုင်ဘာမန်ဝွံရ။ သဘင်စရိုဟ်ဍာ်ဘာ ကၠောန်ဗဒှ် ပ္ဍဲ ၁၂ ဖေဖဝ်ဝါရဳ ၂၀၁၅ (ဂိတုမာဃ် ၉ စွေက်)