မိဟံသာ အာဇာနဲညးဗြဴမန်

မိဟံသာ အာဇာနဲညးဗြဴမန် ❧❧❧❧❧❧❧❧❧ ပရေၚ်ချဳဒရာၚ် မိဟံသာ စပ်ကဵုပရေၚ်ပညာကောန်ဂကူမန် ပ္ဍဲဗုဒ္ဓသက္ကရာဇ် ၂၄၈၀ ဂှ်သၟိၚ်အၚ်္ဂလိက်တအ်ကဵုကသပ် ကိစ္စကောန်ဂကူမန်လပါ်ဘာသာလိက်ပတ်ဂှ် ဘာဂမဳမန်နွံလၟိဟ်မွဲစိဂလိုၚ်ကီု ဂမဳမန်နွံလၟိဟ်မွဲစိဂလိုၚ်ကီု ထ္ပိုဲမန်နွံလၟိဟ်မွဲစိဂလိုၚ်ကီု ကွးဘာမန်နွံလၟိဟ်မွဲစိဂလိုၚ် ပ္ဍဲတွဵုရးဍုၚ်မန်သီုဖအိုတ် ကေတ်ပကောံဂွံစရၚ်အိုတ်တုဲ ပတိုန်ထ္ၜးကဵုသၟိၚ်အၚ်္ဂလိက်တအ် သွက်ကောန်ဂကူမန်ဒးစကာသြန်ၜတ် ၁၀ ကိုတ်မှရုံဂပ်ရောၚ်၊ ပွိုၚ်မွဲသၞာံဆိၚ်ဆတုဲ ပတိုန်လိက်ကဵုသၟိၚ်အၚ်္ဂလိက်တအ်ညိဂှ် ညးတအ်ကဵုကသပ်ဂၞန်သာ်ဏအ်ရ။

သ္ပဟိုတ်သာ်ဂှ်တုဲ သေဋ္ဌဳကွာန်ကအ်နှာတ် ဒါယိကာဇၞော် မိဟံသာ ဂှ်မဒှ်ညးပတိတ်သြန်စရိတ်ဂၠံၚ် သွက်ဂမဳသၚ်သ္ဂေံာအာကေတ်စရၚ်ဘာမန် စရၚ်ဂမဳသၚ်မန် ထပိုဲမန် ကွးဘာမန်ဂမၠိုၚ်အိုတ်သီုအလုံတွဵုရးဍုၚ်မန်ဂမၠိုၚ် သွက်ဂွံအာကေတ်စရၚ် ပ္ဍဲပွိုၚ်ဍုၚ်မတ်မလီု ပွိုၚ်ဍုၚ်မုဟ်ဍုၚ်ဂှ် ဂမဳ ၂ ဇကု၊ ပွိုၚ်ဍုၚ်ဇြပ်ဗု ဂမဳ ၂ ဇကု၊ ပွိုၚ်ဍုၚ်ရေဝ် ဂမဳ ၂ ဇကု၊ ပွိုၚ်ဍုၚ်ကျာ်မြဟ် ဂမဳ ၂ ဇကု၊ ပွိုၚ်ဍုၚ်ကအ်ကြိက် ဂမဳ ၂ ဇကု၊ ပွိုၚ်ဍုၚ်ဖအၚ် ဂမဳ ၂ ဇကု၊ ပွိုၚ်ဍုၚ်တကအ်ခၟိုၚ် ဂမဳ ၂ ဇကု၊ ပွိုၚ်ဍုၚ်ပံၚ် ဂမဳ ၂ ဇကု၊ ပွိုၚ်ဍုၚ်သဓီု ဂမဳ ၂ ဇကု ရုဲစှ်ကေတ်တုဲ၊

ပကောံဂွံစရၚ်ဘာမန် ဂမဳသၚ်မန် ထပိုဲမန် ကွးဘာမန်တအ်ဂမၠိုၚ်တုဲ ပအပ်ဇိုန်ကဵုဒါယိကာဘာဇၞော် မိဟံသာ သီုဖအိုတ် နူဒါယိကာဇၞော် မိဟံသာ မွဲကဆံၚ်ပလံၚ်ပစိုပ်သၟိၚ်ဇၞော်ဓါတုဗေဒ ဥက္ကဌနာဲချေတ်သိုၚ်သွက်ဂွံပတိုၚ်ဗစိုပ်သၟိၚ်အၚ်္ဂလိက်တအ်မဒှ်ရ။

ဗုဒ္ဓသက္ကရာဇ် ၂၄၈၅ ပၞာန်ဂၠးကဝ်မရနုက်ကဵု ၂ ဝါဂှ် ပၞာန်ဂျပါန်တအ်လုပ်စိုပ်ကၠုၚ်ဍုၚ်မန်ဗၟာ ဂိတုပှ် ၁ စွေက်လုပ်စိုပ်အာဍုၚ်မတ်မလီုတုဲ ကၠောံစိုပ်အာလပါ်ဍုၚ်မတ်တၟ ဍုၚ်ပံၚ် ဍုၚ်သဓီု ကာလဂှ်နာဲညာဏရံသဳကီု တၠဂုဏ်ဝိသုဒ္ဓိ အာစာလိက်ကွာန်တၟအ်ကၞေၚ်ကီု တၠဂုဏ်အာစာဝိဇယ ဍုၚ်ရေဝ်ကီု သပဒတဴဒၟံၚ်ပ္ဍဲဘာတိုက်ကွာန်ခဍး ဍုၚ်ပံၚ် ပိုဲပိဇကု ဒဴပၞာန်ဂျပါန်တုဲ စှေ်အာလပါ်ကွာန် သေဲကုန် (သဲကုန်း) ဇိုၚ်ၜဳဇၞော်တေံ ၂၀ တ္ၚဲတုဲ ကၠောံအာလပါ်သၚ်တကအ်ခၟိုၚ် ကွာန်မုဟ်ဒုန်တေံတုဲ ကလေၚ်ကၠောံစဴအာဍုၚ်မတ်မလီု စိုပ်အာဘာဝါဍောတ် (ရွာလွတ်ကျောၚ်း) တုဲသပကောံဓရီုရၚ်သကအ်ရ။

ဂမဳသၚ်ဂမၠိုၚ်ညးမတိုန်စိုပ်ကောံဓရီု ☑︎ ကျာ်ဇၞော်ပဏ္ဍိတ ဘာဝါဍောတ် ဍုၚ်မတ်မလီု ☑︎ ကျာ်ဇၞော်အာစာလိက်ဝါရ ကွာန်ကြုက်ပိ ☑︎ ကျာ်ဇၞော်အာစာဝေတ် ကွာန်ကအ်ဗိန် ☑︎ ကျာ်ဇၞော်အာစာသုနန္ဒ ကာန်နဳ ☑︎ ကျာ်ဇၞော်အာစာဝါရမ္ဘ ကွာန်ကၠအ်သတ် ☑︎ တၠဂုဏ်ကေတုမာလာ ကွာန်မယာန် ☑︎ တၠဂုဏ်အာစာနန္ဒဝံသ ကွာန်ကၠအ်သတ် ☑︎ တၠဂုဏ်အာစာလိက်သဳလတေဇ ကွာန်ကအ်နှာတ် ☑︎ တၠဂုဏ်အာစာလိက်ပါလ ကွာန်တံၚ်ပရၚ် ☑︎ တ္ကဂုဏျနဲာညာဏရံသု ပါံ်ျ ၁၀ ဇကုမဒျှရ။

သပကောံဓရီု ပ္ဍဲဘာဝါဍောတ် ဗၞတ် ၄ တ္ၚဲတုဲ ဖျေံတၚ်သဂုတ်သဝါတ်ပၟိက်စိုတ် သၚ်ဂမၠိုၚ်တုပ်စိုတ်သီုညးဖအိုတ်ဂှ် - ပ္ဍဲပွိုၚ်ပၞာန်ဂျပါန်ဏအ် ဘာဗ္တောန်လိက်ဗၟာပ္ဍဲကွာန်ဍုၚ်မန်ဏအ် ကၟာတ်လဝ်ဘာဗတောန်လိက်ဗၟာတအ်တုဲ ပိုဲကလေၚ်ပံက်ဘာဗတောန်လိက်မန်ခိုဟ်ရောၚ်။ သာ်ဝွံဖျေံသဂုတ်သဝါတ်တုဲ ဖျေံဒၞာဲကုဂမဳသၚ်တအ်ရ။

ဗုဒ္ဓသက္ကရာဇ် ၂၄၈၅ (၁၃၀၃) ဂိတုမာ် ၁ မံက်၊ ❃ နာဲညာဏရံၚ်သဳ ဇာတိကွာန်ဝက်ဒါ၊ နာဲကေတုမာလာ ဇာတိကွာန်မယာန်၊ နာဲပါလ ဇာတိကွာန်တံၚ်ပရၚ်၊ ကျာ်ဇၞော်အာစာဝါရမ္ဘ ဇာတိကွာန်ကၠအ်သတ် ကေတ်တာလျိုၚ်နူဍုၚ်မတ်မလီုဒဵုစိုပ်ဍုၚ်ရေဝ်၊ ❃ တၠဂုဏ်အာစာနန္ဒဝံသ ဇာတိကွာန်ကၠအ်သတ် တၠဂုဏ်အာစာဝိသုဒ္ဓိ ဇာတိကွာန်တၟအ်ကၞေၚ် ကေတ်တာလျိုၚ်လပါ်ကွာန်ဏှေဟ်ကိုၚ်၊ ❃ ကျာ်ဇၞော်အာစာဝေတ် ဘာကွာန်ကအ်ဗိန်ကျာ်ဇၞော်အၚ်္ဂလိက် ဘာဆုသာန်ကွာန်ကအ်ဗိန် ကေတ်တာလျိုၚ်ပွိုၚ်ဍုၚ်ကအ်ကြိက်၊ ❃ တၠဂုဏ်သဲ ဂဒၚ်ဂြဳဘာကွာန်ကအ်ဏှာတ် တၠဂုဏ်အာစာလိက်သဳလတေဇ ဇာတိနူဍုၚ်သေံ ကေတ်တာလျိုၚ်ဒေသဇိုၚ်ၜဳသၚ်လောန်၊ ❃ တၠဂုဏ်အာစာဥတ္တမ ဘာဇၞော်ဍုၚ်ကျာ်မြဟ် တၠဂုဏ်အာစာလိက်သိၚ်္ဃ ဇာတိကွာန်ၚာၚ် ကေတ်တာလျိုၚ်လပါ်ၜဳကျာ်မြဟ်၊ ❃ တၠဂုဏ်အာစာလိက်ညေယျ ဇာတိကွာန်ဖလာတ် ဘာဗၟံက် တၠဂုဏ်အာစာလိက်ကျာ်ဇၞော်ဗဳကောတ် ဇာတိကွာန်ဖလာတ် ဘာမြာၚ် ကေတ်တာလျိ်ုၚ်ရးဍုၚ်သဓီု၊ ❃ တၠဂုဏ်အာစာလိက်သုမန ဇာတိဝါဍောတ် တကအ်ခၟိုၚ် တၠဂုဏ်အာစာလိက်ဝိမလ ဇာတိကွာန်မုဟ်ဒဵု ကေတ်တာလျိုၚ်တကအ်ခၟိုၚ်၊

ဗုဒ္ဓသက္ကရာဇ် ၂၄၈၈ သက္ကရာဇ်ဍုၚ် ၁၃၀၆ ဂမဳသၚ်မန်ဂမၠိုၚ်ဗက်တွံဓဝ် ပံက်ဘာဗ္တောန်လိက်မန်ပွိုၚ် ၃ သၞာံ လၟိဟ်ဘာပံက်ဗ္တောန်လိက်မန် ၂၀၀ ပြၚ်ၚ် ကွးဘာလေပ်အာလိက်မန်ဗၞတ်မွဲကိုဋ်ပြၚ်မဒှ်ရ၊ ဗုဒ္ဓသက္ကရာဇ် ၂၄၈၉ ဂိတုမြေက္ကသဵု ဘာဗ္တောန်လိက်မန်အိုတ်သီုဂှ် ဇိုန်ပအပ်ကဵုဥက္ကဌဂကောံရမညသၟိၚ်ဇၞော်ဓါတုဗေဒ နာဲချေတ်သိုၚ် ကေတ်တာလျိုၚ်ဆက်အာပၠန်ရ။

 ✍အုပ်နိဂီု (မာံဝါန်ၛာဲ)✍