မၚ်မွဲလွဳပရာလဝ်ကောန်တၟံပိုဲခိုဟ်ခိုဟ်ညိ
( မၚ်မွဲလွဳပရာလဝ်ကောန်တၟံပိုဲခိုဟ်ခိုဟ်ညိ )
လုပ်ဗှ်ဖျုန်အိုတ်စိုအ် ၊
ယဝ်ရကောန်တၟံပိုဲဏံချဳဂတဝ်(60)အလန်ပ္ဍဲမွဲမိဏေတ်၊
မွဲနာဍဳမ္ဂးတှ်ေကောန်တၟံပိုဲတံချဳဂတဝ်ဂွံ 3,600 အလန်ရ၊
မွဲတ္ၚဲမ္ဂးတှ်ေတှ်ေကောန်တၟံပိုဲတံချဳဂတဝ်ဂွံ 86,400 အလန်ရ၊
မွဲဂိတုဲမ္ဂးတှ်ေကောန်တၟံပိုဲတံချဳဂတဝ်ဂွံ 2,592,000 အလန်ရ၊
မွဲသၞာံမ္ဂးတှ်ေကောန်တၟံပိုဲတံချဳဂတဝ်ဂွံ 31,536,000 အလန်ကီုရ၊ ယဝ်ရပိုဲဂွံအာယုက်(၃၀)သၞာံမ္ဂးတှ်ေ ကောန်တၟံပိုဲဏံချဳဂတဝ်ဂွံအာသီုဖ္အိုတ် 946,080,000 အလန်ကီုရ၊ ယဝ်ရပိုဲဂွံအာအာယုက်(၈၀)သၞာံမ္ဂးတှ်ေ ကောန်တၟံပိုဲဏံချဳဂတဝ်ဂွံအာ 2,522,880,000 အလန်ကီုရ၊ ဟိုတ်ဒှ်သာ်ဂှ်တုဲ ယဝ်ရပိုဲတံဟွံမၚ်မွဲလွဳပရာလဝ်ကောန်တၟံပိုဲဏံခိုဟ်ခိုဟ်မ္ဂးတုဲ ပိုဲတံကၠောန်ဗဒှ်ကဵုကောန်တၟံပိုဲဒးဂိသကေဝ်ကၠုၚ်ဒၟံၚ်လၟိုန်လၟိုန်ရ၊ ဟိုတ်ဂှ်ရတုဲ ပိုဲဏံဒးကလေၚ်ရံၚ်မၚ်မွဲကောန်တၟံပိုဲဏံကီုညိ၊ ယဝ်ရပိုဲဏံဆာန်ညးတၞဟ်ဟွံလေပ်မ္ဂးတှ်ေ ညံၚ်ရဴကောန်တၟံဒှ်အာတၟံကလောံမွဲမဂှ်ကီု၊ ယဝ်ရပိုဲတံဆာန်ညးတၞဟ်လောဲပြဟ်အာဂှ်လေဝ် ညံၚ်ရဴမၞိဟ်စိုတ်လောဲဆာန်ပြဟ်မ္ဂးတှ်ေ ကောန်တၟံပိုဲဏံဂှ်လေဝ်ဂိပြဟ်ဂွံသံယောဇိုန်ပြဟ်ရ။
(လိုက်ဇေတ်ဇေတ်ပိုဲဏံမံၚ်ဒၟံၚ်တ္ၚဲဏံဂှ်နွံတဴၜါလိုက်ဂှ်တှ်ေ (၁)လိုက်မ္ၚးကဵုလိုက်ပ္ဍဲမဒှ်ရ)
(လိုက်မ္ၚး)ဟီုမ္ဂးဂှ်တှ်ေ လိုက်ပ္ဍဲကဵုပစ္စုပ္ပန်မိဏေတ်စက္ကနာဍဳဏံ ပိုဲတံမၠာ်ပံက်မတ်တုဲဆဵုကေတ်အရာနာနာသာ်တုဲ သိုန်မာန်ဗဒှ်ကဵုဘဝပိုဲဏံကွာ်ဍာ်ဗၠေတ်သတိလီုသမာဓိကၠေံတုဲ လုပ်အာဒၞက်နကဵုအရီုနာနာတံၚ်ဂြဲကေတ်ဏာပိုဲဏံကီု၊ နကဵုပရေၚ်ပရောဍာံဟွံဍာံ၊ ဂၠိက်ပဠောံဂတာပ်အခေတ်ကပေါတ်သုၚ်စောဲစကာနာနာသာ်ဏံအိုတ်တုဲ သီုဖအိုတ်ဏံဂှ်တှ်ေ ဍေံတံကၠောန်ဗဒှ်ကဵုဘဝပိုဲဏံသွက်သ္ဂောံကဵုအခိၚ်ပ္ဍဲဘဝပိုဲဏံဇေတ်ဇေတ်ဂှ်ဝိုတ်ကၠေံကၠုၚ်အိုတ်ဂှ်ကီု၊ ပရေၚ်ပရောခိုဟ်ခိုဟ်နာနာမလောန်ကၠုၚ်တံဂှ်လေဝ်ပိုဲတံဝိုတ်တၠိၚ်ကၠုၚ်အခိၚ်ကူချပ်ဟွံမွယ်၊ လဆောဝ်တှ်ေသ္ကံရဲမိတ်သဟာဲမလုပ်ကၠုၚ်ပ္ဍဲဘဝပိုဲလၟေၚ်လၟေၚ်တ္ၚဲဂှ်လေဝ်ပိုဲဏံဝိုတ်ကၠုၚ်သိုက်သိုက်မာန်ဂှ် ဣဏံကော်စလိုက်ပိုဲမၠာ်မံၚ်မတ်တ္ၚဲဏံကီုရ။
(လိုက်ပ္ဍဲ)ဟီုဂှ်ပၠန်တှ်ေလေဝ် လိုက်နွံဒၟံၚ်ပ္ဍဲစိုတ်ပိုဲဏံ လိုက်ရံၚ်နကဵုအရီုမတ်ၜါဟွံဆဵုကေတ်တုဲ ဆဂး လိုက်ဏံဒးသုၚ်စောဲစိုတ်မှရံၚ်ဆဵုကီုရ၊ လိုက်ဏံမွဲဟေၚ်ဆဵုကေတ်ဘဝပိုဲဏံကၠးကၠးပ္ဍဲအခိၚ်ပိုဲဗ္ၜေက်ဖျေံမတ်ၜါ၊ လိုက်ဏံမွဲဟေၚ်နွံဆညိၚ်ဝတ်သ္ၚိတ်ဇြမွဲတုဲ လိုက်ဏံမွဲဟေၚ်ကၠောန်ဗဒှ်ကဵုပိုဲဏံဆဵုကေတ်ကောန်တၟံပိုဲဏံဇေတ်ဇေတ်ရ၊ ကောန်တၟံဏံမွဲမဂှ် ရီုဗၚ်မၚ်မွဲလွဳပရာလဝ်ဘဝပိုဲဏံအတိုၚ်မွဲဘဝ၊ ကောန်တၟံဏံကၠောန်ဗဒှ်ကဵုပိုဲဂွံမ္ၚိုဟ်ကြံၚ်ဂွံဂံၚ်ပြိုၚ်ပ္ကာန်ကဵုပြသၞာနာနာပ္ဍဲဘဝလၟေၚ်လၟေၚ်တ္ၚဲဏံ၊ ကောန်တၟံဏံဟွံမွယ်ကဵုအခိၚ်ဆုတ်ကလေၚ်ၜိုန်ရပြသၞာနွံဆဵုဂလိုၚ်လဵုကီုလေဝ်ဆက်ကွာ်အာမာန်ကီုတုဲ ထေက်ကြိုက်ပိုဲတံဒးတၚ်ဂုဏ်ကဵုကောန်တၟံကလောံဏံမွဲမ ဂွံကၠောန်ရီုဗၚ်ကၠုၚ်ကဵုဘဝပိုဲဂွံဆဵုတသိုက်သွက်ဘဝပ္ဍဲကဵုတ္ၚဲဏံညိအဴ။
ကောန်တၟံပိုဲဏံနွံဆတၟာသတ်တဲပိုဲ၊ နွံအရံၚ်ဍာဲလပါ်တဲပါဲပိုဲဏံဂှ် ပိုဲတံဒးမၚ်မွဲလွဳပရာဍေံညံၚ်သ္ဂောံဒှ်ဖဵုခိုဟ်ဂၠိုၚ်အိုတ်ညိ၊ စကာကောန်တၟံပိုဲဆာန်ညးတၞဟ်လ္ပကဵုၜက်အာတုဲ ဒးဆာန်ဘဝဇကုသီုကဵုဂကောံအိန်ထံၚ်ဇကုဂၠိုၚ်တိုန် ဆာန်သ္ကံရဲမိတ်သဟာဲပြောဲဇွာဂကူဘာသာတုဲ ပရေၚ်ထတ်ယုက်ဇကုဂှ်လေဝ်ဒးစွံလဝ်လၟေၚ်မွဲတွဵုညိအဴ။ အုပ်နိဂီုတုဲဆဝွံကၠာရ ။
နိဿဲ
ကၠုၚ်နူပရေၚ်ဆဵုဂဗလၟေၚ်လၟေၚ်တ္ၚဲ ။