ယေလ္ဂူတပ်တးလျးတၟးသွက်ဘဝ
(ယေလ္ဂူတပ်တးလျးတၟးသွက်ဘဝ)
ပရေၚ်ယေလ္ဂူတပ်တးဟီုမ္ဂးဂှ်တှ်ေဒှ်ၚုဟ်မးသွက်ဘဝမွဲဇၞော်အိုတ်ဟီုဂွံတုဲ ဇၟာပ်ညးအဲလေဝ်ပရေၚ်ယေလ္ဂူတပ်တးဟီုဂှ်ထေက်ကဵုဒးဒ္ဂေတ်ဗက်သီုညးဖ္အိုတ်တုဲ ဣဏံလေဝ်ဒှ်တဴနဲကဲဗုဒ္ဓဘာသာမွဲတုဲ ညံၚ်ရဴပိုဲတံကွာ်ဗက်ဗီုကဵုဂၠံၚ်ဍာန်အပါပိုဲလးလဝ်သွက်ပိုဲကောန်တံမွဲတၞုၚ်ကီုတုဲ ညးလဵုမွဲယဝ်လွဳခိုၚ်ဗိုန်လဝ်ပရေၚ်ယေလ္ဂူဏံဏောၚ်တှ်ေ ပူဂဵုဂှ်လေဝ်ဂွံဒုၚ်ကေတ်လာပ်ဗဇဴမာန်သက်ဟီုဟွံမွယ်ရ၊ ယဝ်ရပူဂဵုလဵုမွဲစိုတ်တ္ၚံက်စၞာဲကၠတ်ဂၠံက်နွံဏောၚ်တှ်ေ ကုသဵုပရေံဂွံဟီုစလၟိုန်တုဲ ဂုဏ်ဖဵုနာနာထေက်ကဵုလုပ်စိုပ်ပ္ဍဲဘဝပိုဲတ္ၚဲဏံဂှ်လေဝ်သ္ၚောဲအာမာန်ရ။
ပရေၚ်ယေလ္ဂူတပ်တးဏံဂှ်ဒှ်ပဠေဝ်စိုတ်ပိုဲဂွံတီဇကုဂှ်ဒှ်မၞိဟ်နွံကဵုၚုဟ်မးၜိုတ်လဵုကီုတုဲ ကၠောန်ဗဒှ်ကဵုပိုဲဏံကၠောန်ကမၠောန်လၟေၚ်လၟေၚ်တ္ၚဲလေဝ်စိုတ်ပိုဲဟွံယှုက်ထုဲဟဳဇွောဝ်အာကၠုၚ်မွဲသာ်တုဲ ဂံၚ်ဟီုဂံၚ်ကၠောန်ဂံၚ်စၞောန်ဂံၚ်လဴထ္ၜးလဒေါဝ်မၞိဟ်ဂမၠိုၚ်မာန်ရ၊ ပရေၚ်ယေလ္ဂူတပ်တးဏံလေဝ် ဇၟာပ်ဇၟာပ်သာသနာလေဝ်ဗ္တောန်ကဵုကောန်ဂကူညးညံၚ်ဂွံနွံကဵုၚုဟ်မးမၞိဟ်ပရေၚ်ယေလ္ဂူတပ်တးဏံကီုအိုတ်ရ။
ပရေၚ်ယေလ္ဂူတပ်တးဏံဂှ် ၜိုန်ရညးဂမၠိုၚ်ဟွံဆဵုဟွံတီကေတ်ကီုလေဝ် စိုတ်ပိုဲဏံလေဝ်တီလဝ်ကၠးကၠးရဟွံသေၚ်ဟာ၊ လဆောဝ်တှ်ေ ပရေၚ်ယေလ္ဂူပိုဲဏံမကၠောန်ဏာအရာနာနာတံဂှ် သဘာဝမွဲဟေၚ်ကဵုသွဟ်ကီုရ၊ လဆောဝ်တှ်ေဂတမတ်လေဝ်ပိုဲတံဂွံဒုၚ်ထိုၚ်သးလ္တူညးဂမၠိုၚ်ဟိုတ်နူပိုဲဏံဒှ်မၞိဟ်ယေလ္ဂူမွဲရ။
တ္ၚဲဏံပိုဲကောန်ဂကူမန်တံသီုညးဖ္အိုတ်လေဝ်နွံမံၚ်ပ္ဍဲဍုၚ်မ္ၚးလေဝ်ပေၚ်ပြးဇၟာပ်အလုံမွဲဂၠးတိတုဲ ဒၞာဲပိုဲကောန်ဂကူတအ်မနွံမံၚ်တေံဂှ်လေဝ် ပရေၚ်ယေလ္ဂူတပ်တးဏံမွဲလေဝ် ဇၟာပ်မၞိဟ်နွံဒၟံၚ်ပ္ဍဲဗဒါဲသ္ကဲပိုဲဏံဂှ်လေဝ်ညးတံမၞုံဗၟိက်ကဵုမၞိဟ်စိုတ်ယေလ္ဂူတပ်တးဖအိုတ်ရ၊ ညံၚ်ရဴသေဋ္ဌဳပိုဲတံကီုလေဝ် ညးမၞုံဗၟိက်ကဵုမၞိဟ်စိုတ်ယေလ္ဂူတပ်တးမွဲပေၚ်ပေၚ်ရ၊ ယဝ်ရပိုဲဒှ်ကောန်ကမၠောန်သွံဖျာဏောၚ်တှ်ေ ပဵုတုဲသေဋ္ဌဳနွံဗၟိက်ကောန်ကမၠောန်ညးဒးဒှ်မၞိဟ်စိုတ်အးယေလ္ဂူတပ်တးမွဲမှသေဋ္ဌဳဖျေံစိုတ်ပရေၚ်သြန်မာန်ရ၊ သာ်ဂှ်ဟွံသေၚ်တှ်ေ သေဋ္ဌဳဂှ်ဒှ်ဒၟံၚ်သံသယလ္တူပိုဲတွဵုဏောၚ်တှ်ေ ဇကုကဵုသေဋ္ဌဳဂှ်လေဝ် ကၠောန်အာကမၠောန်မွဲစွံဟွံမိပ်စကွေံကွေံရ၊ ဗီုသေဋ္ဌဳဂွံပတေဟ်ပိုဲဒှ်မၞိဟ်ယေလ္ဂူတပ်တးမွဲဂှ် ဂွံအခေါၚ်ဟေၚ်ပိုဲဏံဒးကၠောန်ထ္ၜးကဵုညးမာန်ဂှ်လေဝ်ပ္တန်စွံလဝ်ပ္ဍဲစိုတ်လ္ပဝိုတ်တွဵုအိုတ်ညိ။
ဥပမာတုန်ဂှ်တှ်ေ−သေဋ္ဌဳကဵုပိုဲဏံအာရာန်ဍာ်မွဲပဠၚ်တုဲမသြန်သှ်ေမွဲၜါဒ္ကေဝ်ဂှ်လေဝ်ထေက်ကဵုပိုဲဒးကလေၚ်ကဵုသေဋ္ဌဳဂှ်ညိ လ္ပတော်လဝ်တွဵုညးသေဋ္ဌဳရမသြန်မွဲၜါဒ္ကေဝ်ဂှ်ညးဟွံစွံၚုဟ်မးဂှ်ညိ မသြန်မွဲၜါဒ္ကေဝ်ၜိုန်ညးဟွံစွံၚုဟ်မးကီုလေဝ် လဆောဝ်တှ်ေညးဟွံဒးစစိုတ်ပိုဲဏံလေဝ်ဒှ်မာန်ရ၊ ဣဏံဗွဲတုန်။
ညံၚ်ရဴကောန်ကမၠောန်နွံသ္ၚိသေဋ္ဌဳဗြဴဗြဴသၟးဂၠိုၚ်တုဲ ပ္ဍဲသ္ၚိသေဋ္ဌဳသြန်ညးပြးနွံမံၚ်အကြာခုၚ်ပ္ဍဲသ္ၚိတံဂှ်လေဝ် ကောန်ကမၠောန်ညးမကပှ်ဂိုၚ်သ္အးသ္ၚိသေဋ္ဌဳတံဂှ်ဒးဆဵုမံၚ်တွဵုတွဵုကီုရ၊ ဣဏံလေဝ်ဒှ်သွက်သဘာဝစမ်မံၚ်စိုတ်ပိုဲဏံယေလ္ဂူတပ်တးၜိုတ်လဵုမွဲကီုတုဲလ္ပဝိုတ်ထောံအိုတ်ညိ၊ လ္ၚဵုဂှ်ဟီုမံၚ်အဲဆဵုမံၚ်တွဵုလှုဲသေဋ္ဌဳနွံမံၚ်လ္တူခုၚ်အခိၚ်အဲကပှ်ဂိုၚ်သ္အးဇ္ၚးသ္ၚိဂှ်ဆဂးအဲဟွံကပှ်ကေတ်မွဲလှ်ေဏီရ၊ လဆောဝ်တှ်ေမသြန်ပိုဲဆဵုမံၚ်မွဲၜါကၠံအောန်အာတုဲပိုဲဏံဟွံကေတ်ဟာ ယဝ်ဒှ်မွဲၜါလ္ၚီဏောၚ်တှ်ေကေတ်တုဲမံၚ်ထောံသ္ၚိတ်သ္ၚိတ်ဟာဂှ်လေဝ်လ္ပကဵုဒှ်အိုတ်ညိ၊ သွက်ရဲညးမံၚ်သ္ၚိသေဋ္ဌဳတံဂှ်လေဝ် ပရေၚ်ယေလ္ဂူတပ်တးဏံမွဲနွံဗၟိက်ဇၞော်ကဵုဒြဟတ်တုဲ ဒှ်သွက်သေဋ္ဌဳညးဂွံပတေဟ်ပိုဲတုဲဓဝိၚ်သေဋ္ဌဳလေဝ်ဂွံၜိုဟ်အခိၚ်ညးတိတ်အာမ္ၚးသ္ၚိအာဗၟိက်ကိစ္စညးဂှ်ကီုတုဲ ဣဏံဂှ်ပိုဲဂွံကၠုၚ်သီုဓဝ်ပတေဟ်လ္တူသေဋ္ဌဳသၟးဟွံကတုဲ လာပ်ဗဇဴသြန်ဂိတုလေဝ်ပဵုတိုန်ပြဟ် သြန်ရေၚ်တၠုၚ်ဖဵုနာနာသီုကဵုစၞစအရာပွမအီကဵုပိုဲလေဝ်ဂွံဒုၚ်ကေတ်နူသေဋ္ဌဳသီုကဵုကောန်သေဋ္ဌဳလေဝ်နွံဟွံပိုတ်သ္ကုတ်ရ၊ ဣဏံဂှ်ကၠုၚ်နူပိုဲဏံဒှ်မၞိဟ်စိုတ်ယေလ္ဂူတပ်တးမွဲညးကော်ခဴစရ။
( အုပ်နိဂီု) ။
နိဿဲလဝ်ပရေၚ်ဆဵုဂဇလၟေၚ်လၟေၚ်တ္ၚဲ