ယဲမန်ပိုဲဂၠာဲအ္စာသဝ်လွဳဟွံမွယ်
ယဲမန်ပိုဲဂၠာဲအာသဝ်လွဳဟွံမွယ်
မန်ပိုဲလ္ၚဵုတအ်ဂှ် နူစချူလိက်မန်ဟီုအရေဝ်မန်လ္တူလာၚ်လအ်လအာတုဲ ဟွံလအ်ပြံၚ်အာစချူမလိက်ဗၟာဟီုအရေဝ်ဗၟာအိုတ်လေဝ်နွံဗဝ်သအဝ်ရ၊ ချူလိက်ဗၟာတုဲဟီုအရေဝ်ဗၟာတုဲတှ်ေ တုပ်တဴညံၚ်ရဴဒးလဝ်ဒၞက်စိုတ်အိုတ်တုဲ ဆက်ချူအာလိက်ဗၟာသၟး ဆက်ဟီုအာအရေဝ်ဗၟာသၟးမန်ဟွံကဵုပါပထုဲကၠုၚ်သိုက်သိုက်ရ၊ လအ်အာက္ဍၚ် ဒၞက်အစောဲကဵုမအရေဝ်ဍေံလိက်ဍေံဂှ် ဒှ်ကၠုၚ်ညံၚ်ဒးလဝ်ဂဥုဲဝိဝိၚ်ဇၞော်ကဵုဒြဟတ်တုဲ ဒၞက်ထိုၚ်သးကဵုလိက်ညးတၞဟ်အရေဝ်ညးတၞဟ်ဂှ် ဒှ်ကၠုၚ်ဖျုန်ဇုတ်လတေၚ်စၞာံဆီပတိုပ်အိုတ်တုဲ လပါ်လိက်မန်အရေဝ်မန်ဇကုဂှ်လေဝ် ဟွံဂံၚ်ချူဟွံဂံၚ်ဟီုကဵုညးတၞဟ်တီကၠုၚ်သိုက်သိုက်ရ၊ လအ်အာက္ဍၚ်ဏောၚ်တှ်ေ ညးတံလေဝ် မုချူချူမုဟီုဟီုဆေၚ်စပ်ကဵုဗဟုသုတသွက်ကောန်ဂကူမန်ဇကုကီုလေဝ် ညးတံချူအာလိက်ဗၟာ ညးတံဟီုအာအရေဝ်ဗၟာအိုတ်ရ။
အရေဝ်ဗၟာလိက်ဗၟာလေဝ်ဒးသုၚ်စောဲဂှ်ဒးဍာံစၟတ်မံၚ်ရတုဲ ဆဂး ပိုဲဒးသုၚ်စောဲအရာဖဵုဍေံနွံဏောၚ်တှ်ေဒှ်ဂုဏ်ဖဵုရ၊ ယဝ်ရၜိုတ်ဆပိုဲပါ်ပရအ်ဗဟုသုတသွက်သၟတ်ပိုဲသွက်ကောန်ဂကူမန်ပိုဲရတှ်ေ သုၚ်စောဲလိက်မန်အရေဝ်ရမျှာၚ်မန်တှ်ေ သောၚ်တပ်အးအိုတ်ရ။
မန်ပိုဲလေဝ် နူစလိက်မန်အရေဝ်မန်ဂှ် လအ်အာညိဒှ်ကၠုၚ်လိက်ဗၟာအရေဝ်ဗၟာတုဲ ဟွံလအ်ဟေၚ် ဒှ်အာလိက်ဗၟာအရေဝ်ဗၟာသၟးရဂၠိုၚ်တုဲ လအ်အာက္ဍၚ်ဂှ်ဟေၚ် လိက်မန်အရေဝ်မန်လေဝ် ညးတံဟွံမိက်ဟီုဟွံမိက်ချူကၠုၚ်လ္တူလပှ်ကျာရ၊ ယဲဏံလေဝ်လွဳဝါတ်ဂၠာဲအာစာသဝ်ဟွံမွယ်တုဲ ဒှ်မံၚ်ယဲစိုတ်ပ္ဍဲပူဂဵုတအ်ဂှ်ဒးလဝ်ဒၞက်စိုတ်ထိုၚ်သးကဵုအရေဝ်ဗၟာလိက်ဗၟာတုဲ အတ္တလေဝ်ပေၚ်ကၠုၚ်ပ္ဍဲဘဝညးတအ်ရ။
ယဝ်ဒးချူလိက်ဗၟာ ဒးဟီုအရေဝ်ဗၟာမ္ဂးတှ်ေ ဆေၚ်စပ်ကဵုပရေၚ်ဍုၚ်ကွာန်ကီုနဒဒှ်ဓဝ်ဍာံမွဲဒးဟီုအရေဝ်ဗၟာထေက်ရ၊ ယဝ်ရပိုဲဟီုအရေဝ်မန်တုဲ ဗၟာတအ်မုဍေံဟွံတီတှ်ေဒှ်အာမးမးရ၊ လိက်ဗၟာလေဝ် ပရေၚ်ဒစဵုဒစး ဆေၚ်စပ်ကဵုမွဲလပါ်တေံဏောၚ်တှ်ေ ထေက်ကဵုဒးချူဘာသာဗၟာမှဍေံဂွံဗှ်ဒးရ၊ ယဝ်ပိုဲချူမံၚ်နကဵုဘာသာမန်သၟးတှ်ေ ဗၟာတအ်ဗှ်ဟွံကၠိုဟ်မွဲၜါပၠန်ရ၊ လိက်ဒးချူဆေၚ်စပ်ကဵုဖဵုသွက်ဂကူမန်ပိုဲရတှ်ေ ချူလိက်မန်ဟီုအရေဝ်မန်လေဝ်ပြေပြံၚ်မံၚ်ရ၊ အဵုယဝ်ရဇကုဟွံချူလိက်ဗၟာဟွံဂွံဏောၚ်တှ်ေ ချူဏာသီုၜါဘာသာလေဝ်မုဟွံဒှ်ပုဟ်ဟွံသေၚ်ဟာ၊ လ္ၚဵုဂှ်ညးတအ်ဟွံဂံၚ်ချူလိက်မန်ဂၠိုၚ်တုဲ ဖေက်ၚုဟ်မးဇကုသဝ်စှ်ေအာဟာ၊ သာ်ဂှ်ဟွံသေၚ်တှ်ေ ဇကုဂွံလဝ်ဘာကဆံၚ်သၠုၚ်တုဲ ရဲဗၟာဇကုလေဝ်နွံမံၚ်တုဲ ချူစလိက်မန်ဟီုအရေဝ်မန်တှ်ေဖေက်ဍေံသ္ပစပရေံဟာ၊ ဣဏံဂှ်တှ်ေပြသၞာပ္ဍဲပူဂဵုညးတအ်ရ၊ ဇေတ်ဇေတ်ဂှ်တှ်ေ ညးတအ်ဒးကၠုၚ်လဝ်ဒၞက်ပးအစောဲဗၟာယျဂှ် ညးတအ်ဝိုတ်ကၠုၚ်သတိအိက်ကၞမ်မွဲၜါဟွံတီရတုဲ ပညာဇကုသွက်ဂွံဒှ်ဖဵုသွက်မန်အးအးဂှ်ကၠိခန်ကၠုၚ်တုဲဒှ်အာကၠဵုၜါဘာရ၊ ဟွံလအ်ဟေၚ်ဒှ်အာကောန်ရဲတဝ်ဝှာဂၠဴဗၟာတံအိုတ်သိုက်သိုက်ရ။
အခိၚ်မန်ဇကုကဵုဟီုဗၠေတ်ကၠောန်ဗၠေတ်တှ်ေ မန်လ္ၚဵုတအ်ဗက်ဝေတ်ဂစာန်လက်ကဵုလက်ကိုဋ်ရ၊ ယဝ်ဗၟာဍေံဟီုလပါ်မန်ပရေံတှ်ေ မၞိဟ်ဂွံကလေၚ်လက်ဍေံကီု နကဵုရမျှာၚ်ဗၟာကလေၚ်လက်ဍေံဂှ်နွံအောန်တဴရ၊ ဒၞာဲဏံဂှ်ဒးသုၚ်စောဲအရေဝ်ဗၟာလိက်ဗၟာထေက်ရ၊ သာ်ဏံဟွံသေၚ်တုဲ ပ္ဍဲကဵုပရေၚ်ဘဝဇကုလၟေၚ်တ္ၚဲလေဝ် ပ္တိုန်စဗီုရုပ်ကီု ပွမချဳဒရာၚ်လၟေၚ်တ္ၚဲကီုတံဂှ် ချူလိက်ဗၟာဟီုအရေဝ်ဗၟာတုဲ ကဵုညးဂှ်ဗှ်ကလၚ်အိုတ်ရော၊ ကမၠောန်ဟွံဆေၚ်စပ်ကဵုဗၟာတံဂှ် ပိုဲစကာလိက်မန်အရေဝ်မန်ပိုဲသၟးလေဝ်ဗဵုစကျေဝ်ဂေါဝ်ဆာန်လာန်ဗွဲမလောန်ရ။
(တၚ်သမ္တီ) မိပ်မံၚ်ကဵုအရေဝ်ဗၟာလိက်ဗၟာဂၠိုၚ်အာတုဲ လိက်မန်အရေဝ်မန်ဂှ် ဗှ်ေတအ်နာဲတအ်ဟွံဂံၚ်ဟီုဟွံဂံၚ်ချူဗွဲစၟတ်ဟေၚ်ရ၊ ဣဏံရဒၞက်စိုတ်ထိုၚ်သးဂကူဗၟာလွဳဟွံဗၠးပ္ဍဲစိုတ်မန်ပိုဲ။
(ဣဏံဝွံဒှ်ဗဟုသုတမွဲပိုဒ်ဍောတ်တုဲ ဟီုပတဝ်ဇီုကပိုက်သွက်ညးလဵုဂကောံလဵုမွဲဟွံသေၚ်တုဲ ချူလဝ်နကဵုစေတနာဗုဗုအးအးသွက်ဂွံဒှ်ဗဟုသုတပ္ဍဲကောန်ဂကူမန်ပိုဲသက်သက်ရ) ။
နိဿဲ[ပလေဝ်ဒါန် | ပလေဝ်ဒါန် တမ်ကၞက်]
ပရေၚ်ဆဵုဂဗလၟေၚ်တ္ၚဲ