ရုဲဍာန်ကွာ်သွက်ဘဝညိ
ရုဲဍာန်ကွာ်သွက်ဘဝညိ
လုပ်ဗှ်ဖျုန်လိက်အိုတ်စိုအ်၊
ယဝ်အခါရပိုဲတံဒးတိတ်ကွာ်တရအဴအာဒၞာဲလဵုဏောၚ်တှ်ေ ပိုဲတံထေက်ကဵုဒးတီလဝ်တိုန်ပ္ကဴဗွဲကၠာတုဲမှ ပိုဲတံဂွံတီကၠးအာစိုပ်တိုၚ်ပ္ကဴဗွဲစၟတ်ဨကန်တမာန်ရ၊ ခိုဟ်နူကဵုသွက်ညးကွာ်တရဴလ္ၚဵုတံဟွံမွယ်ကဵုတိုၚ်ပ္ကဴဗွဲဂတတေံတုဲ အိုတ်ကၞောတ်ဂှ်ဟေၚ်ၜိုတ်ဆဍောၚ်ဝေၚ်ကာယဖအိုတ်ဝေၚ်အခိၚ်ကီုရ၊ ဟိုတ်ဒှ်သာ်ဂှ်တုဲ မၞိဟ်ကွာ်တရဴတံလေဝ်ညးတံဒးနွံကဵုတိုၚ်ပ္ကဴညးတံကၠာဟေၚ်မှ တရဴကွာ်ညးတံဂှ်ဂွံတီဂွံဆဵုတိုၚ်ပ္ကဴတုဲ ဂဥုဲဒြဟတ်သွက်ညးတံဂှ်လေဝ်ညံၚ်ဟွံယအ်စှ်ေအာကီုရ။
ညံၚ်ရဴကောန်ကွးဘာတက္ကသဵုဗွဲမဂၠိုၚ်တံဂှ်လေဝ် လုပ်ကၠုၚ်ပ္ဍဲတိဘာတက္ကသဵုအိုတ်တုဲ ဇေတ်ဇေတ်ဂှ်တှ်ေ ဍေံတံဟွံဒးစိုတ်စကွေံအဃောဍေံတံဒးဗ္တောန်မံၚ်ပညာပ္ဍဲဘာတက္ကသဵုဂှ်ကီု၊ ကွးဘာလ္ၚဵုတံဂှ်လေဝ် မွဲရောဟွံတီမွဲသာ်ဟီုဂှ် ပိုဲတိုန်မံၚ်ဘာတက္ကသဵုလၟုဟ်ဏံဂှ်မူဂွံပစရောမူဂွံကၠောန်ရောဘာဏံတုဲတှ်ေ၊ တ္ၚဲဏံဒးတိုန်မံၚ်ဘာတက္ကသဵုဂှ်ဟိုတ်နူမိမၜါစကာကျညးတံတုဲဒးတိုန်အာလေဝ်နွံ၊ လ္ၚဵုဂှ်ဗက်ရဲတုဲညးတၞဟ်တိုန်တှ်ေတိုန်ကီုသီုဏံလေဝ်နွံတဴရ၊ အိုတ်ကၞောတ်သရောပ်ထောံမ္ဂးတှ်ေဘာတုဲမုဂွံကၠောန်ရောဟွံတီအိုတ်ရ။
အဃောကွဳစက်တိတ်ဂှ် ပိုဲဏံဂစာန်ဂြိပ်တိုန်အာလ္တူကွဳစက်ဂှ်တုဲ တရဴတိုၚ်ပ္ကဴဂတတေံပိုဲဟွံစွံလဝ်မွဲသာ်မ္ဂးတှ်ေ ပိုဲဏံဂှ်ဒှ်အာမၞိဟ်ကွာ်တရဴဗၠေတ်အာဍာန်မွဲတၞုၚ်ကီုရ၊ ညံၚ်ရဴပိုဲဆာ်စှ်ေအာဍာ်စောဝ်နူလ္တူဒဵုသၠုၚ်တေံကီုတုဲ ယဝ်ပိုဲဟွံမွယ်ကဵုတိုၚ်အာစိုပ်မွဲဒၞာဲမ္ဂးတှ်ေ ပိုဲဏံဟဳဇွောဝ်အာပေၚ်ပြးပ္ဍဲလဒေါဝ်စောဝ်ဂှ်တုဲ အိုတ်ကၞောတ်ဟေၚ် တၞုၚ်စောဝ်အိုတ်ဒတုံဗၚ်ဒးချိုတ်အာဒှ်မာန်ရ၊ ဘဝပိုဲဏံဂှ်လေဝ်ညံၚ်ရဴသာ်ဏံကီုရတုဲ တိုၚ်ပ္ကဴလၟေၚ်တ္ၚဲလၟေၚ်ဂိတုလၟေၚ်သၞာံထေက်ကဵုဒးနွံဒးစွံလဝ်ဗွဲကၠာမှ ပွမပိုဲစချပ်စချပ်ဟီုစကၠောန်ဂှ်ဂွံကြပ်အာတိုၚ်ပ္ကဴပိုဲသ္ဂုတ်သွာတ်လဝ်ဗွဲကၠာဂှ်ဟေၚ်ရ။
သွက်မၞိဟ်ဟွံမွယ်ကဵုတိုၚ်ပ္ကဴဘဝဟီုဂှ်တှ်ေ တုပ်တဴညံၚ်ရဴမၞိဟ်မတ်ကၠက်ကၠက်တုဲ ဂေတ်အာဂေတ်ကၠုၚ်အိုတ်ကၞောတ်ဟေၚ်သီုအခိၚ်အိုတ်အာဒၞာဲဂှ်ရ၊ ညံၚ်ရဴမၞိဟ်ကွာ်လဒေါဝ်ဍာန်ဟွံမွယ်ကဵုလျးဂိတုသီုကဵုပၟတ်ဍာန်မ္ဂးတှ်ေ လဆောဝ်လေဝ်ပိုဲဏံဒတုံစှ်ေကတိုၚ်အကြာဍာန်ဂှ်လေဝ်ဒှ်မာန်ရ၊ သာ်ဂှ်ဟွံသေၚ်မ္ဂးတှ်ေ ဇီုတၞံဆုသ္ကဲဍာန်ဂှ်ကီု သီုကဵုဇီုဒးတိုၚ်ပၟတ်တံဂှ်အိုတ်ရ၊ ဟိုတ်ဒှ်သာ်ဂှ်တုဲ မၞိဟ်နွံတဴဗွဲမဂၠိုၚ်လေဝ်မုဟွံတီဇကုဒးစိုပ်မုကမၠောန်ရော? လဆောဝ်တှ်ေ အခိၚ်ဂှ်ကၠုၚ်ကွက်အာယုက်ပိုဲယျလေဝ်မူတိုၚ်ကၠးကၠးသွက်ဘဝဇကုဂှ်လေဝ်ဟွံဆဵုဏီအိုတ်ရ၊ ယဝ်ဒှ်သာ်ဏံမ္ဂးတှ်ေ အနာဂတ်ပိုဲဏံဂှ်ဒှ်ညံၚ်ညးဟွံမွယ်ကဵုတိုၚ်ပ္ကဴမွဲတုဲ အခိၚ်အိုတ်ချိုတ်အာၜိုတ်ဏံကီုတုဲ သွက်သ္ဂောံညးဂမၠိုၚ်ဂွံသမ္တီလဝ်ဇကုဂှ်လေဝ်မုဟွံမွယ်လ္တူလောကဏံရ။
ၜိုတ်ဆပိုဲဏံဒိုအ်ဇူမွဲလစုတ်တုဲ ကူချပ်တိုၚ်ပ္ကဴပိုဲဏံဒးစိုတ်ဆာန်ဇေတ်ဇေတ်ဂှ်တုဲ ပ္ဍဲအခိၚ်ပိုဲဏံဆဵုကေတ်တိုၚ်ပ္ကဴဇကုကၠးကၠးယျတုဲတှ်ေ ဣဏံဟေၚ်ရပိုဲဏံဆဵုကေတ်လျးဍောတ်ဍောတ်မွဲသွက်ဂွံဆက်ကွာ်အာကြာဍာန်ဒမၠုဂၠုဂၠုအခိၚ်လျးဂိတုဟွံမွယ်ဂှ်လောဲလောဲသွာသွာမာန်ရ၊ ယဝ်ရပိုဲတံစချူလဝ်တိုၚ်ပ္ကဴသွက်ဘဝပိုဲဏံဏောၚ်တှ်ေ နူစပိုဲဏံစကွာ်ဂံါယာဇိုၚ်ပိုဲဗက်ဂှ်ဆဵုအာယျတိုၚ်ပ္ကဴဂတတေံကီုရ၊ တိုၚ်ပ္ကဴဘဝဇေတ်ဇေတ်ဂှ်လေဝ်နွံဆသြန်မွဲသာ်ဟွံသေၚ်တုဲ တိုၚ်ပ္ကဴဘဝဟီုဂှ်ဒးနွံကဵုပရေၚ်ကတ်လ္ၚတ်ပညာ၊ ဒးနွံကဵုပရေၚ်ထတ်ယုက်၊ တာလျိုၚ်ဂကောံအိန်ထံၚ်ကေုာံမၞိဟ်ဗွဳဗွိုၚ်ဇကုညံၚ်သ္ဂောံပါ်ပရအ်ဂုဏ်ဖဵုဍောတ်တ်သောဲသောဲမာန်ဂှ်ဒှ်အဓိကရ၊ အိုတ်ကၞောတ်သရောပ်ထောံမ္ဂးတှ်ေ ယဝ်ပိုဲတံချူစွံလဝ်တိုၚ်ပ္ကဴတသိုက်စိုတ်မ္ဂးတှ်ေဟွံလအ်ဂွံဆဵုကေတ်မာန်ရ၊
အုပ်နိဂီု ။