လာပ်ဗဇဴသွက်ခန္ဓကာယကေုာံသွက်ဘဝ
လာပ်ဗဇဴသွက်ခန္ဓကာယကေုာံသွက်ဘဝ
ဇၟာပ်ညးအဲလေဝ်တ္ၚဲတၟးဂစာန်ကၠောန်သြန်သွက်ဘဝဂွံသိုက်သၠိၚ်ဗွဲကြဴ တိုၚ်ပ္ကဴညးကဵုညးနွံမံၚ်ဖအိုတ်တုဲ ဒးရုန်ဂ္စါန်ပြိုၚ်ပ္ကာန်အာဘဝလၟေၚ်တ္ၚဲသီုညးဖ္အိုတ်ကီုရ၊ ဟိုတ်ဒှ်သာ်ဂှ်တုဲ တိုၚ်ပ္ကဴမွဲမွဲဂွံစိုပ်အာကီု ကမၠောန်မွဲမွဲဂွံပြေပြံၚ်အာကီုဂှ် ညးမရေၚ်တၠုၚ်ကဵုဖဵုတံဂှ်ဒှ်ပူဂဵုပိုဲဏံမွဲဟေၚ်ရ၊ ယဝ်ရသာ်ဂှ်ဏောၚ်တှ်ေ ထေက်ကဵုပိုဲကောန်ဂကူတအ်ဒးကဵုလာပ်ဗဇဴသွက်ခန္ဓကာယကေုာံသွက်ဘဝပိုဲဏံထေက်ဏောၚ်တုဲ ဗီုလဵုဂွံကဵုလာပ်ဗဇဴတံဂှ်ပၠန်လေဝ်ဆက်ဗှ်အာပိုဒ်ဗွဲသၟဝ်တေံအိုတ်ညိအဴ။
တ္ၚဲဏံပိုဲကၠောန်ဂွံသြန်(၁၀၀၀၀)ဒ္ကေဝ်တုဲ ပိုဲဒးမိပ်စိုတ်ဒးတၚ်ဂုဏ်ကဵုခန္ဓကာယပိုဲဏံဗွဲမလောန်ရ၊ ခန္ဓကာယပိုဲဏံဂွံဆက်ကၠောန်အာကမၠောန်သွက်တ္ၚဲယးတေံမာန်ပၠန်ဂှ်လေဝ် ထေက်ကဵုဒးနွံဂဥုဲဒြဟတ် ဒးနွံကဵုလာပ်ဗဇဴမှ တိုၚ်ပ္ကဴပိုဲကောန်ဂကူတအ်ရန်တၟအ်လဝ်ဂှ်ဂွံစိုပ်အာမာန်လောဲလောဲရ၊ ဟိုတ်ဒှ်သာ်ဂှ်တုဲ မသြန်လၟေၚ်လၟေၚ်တ္ၚဲမကၠောန်နၚ်ကဵုဘဝပိုဲဏံဂှ်လေဝ် ကၠုၚ်နူခန္ဓကာယပိုဲဏံတုဲ လာပ်ဗဇဴဍောတ်ဍောတ်သောဲသောဲထေက်ကဵုဒးပအပ်မာန်မှ ခန္ဓကာယပိုဲဏံလေဝ်ဂွံကၠုၚ်ဂဥုဲဒြဟတ်သွက်ဂွံဆက်ကၠောန်အာကမၠောန်တ္ၚဲယးတေံမာန်သွက်ပိုဲဂွံဂွံသြန်ပၠန်ရဟွံသေၚ်ဟာ။
ယဝ်ရဟီုစိုပ်အာလာပ်ဗဇဴသွက်ခန္ဓကာယကေုာံသွက်ဘဝပိုဲဏံဟီုဂှ်မုရော? ၊ (တၚ်မွဲ)ဂှ်တှ်ေ လာပ်ဗဇဴသွက်ခန္ဓကာယပိုဲဏံဂွံထတ်စောန်ဂွံမ္ၚိုဟ်ကြံၚ် ဂွံနွံကဵုပရေၚ်ထက်ယုက်ခိုဟ်မာန်ဂှ် လာပ်ဗဇဴဟီုဂှ်စၞစအဟာရနွံကဵုရှ်သာနွံကဵုဓါတ်တံဂှ်ထေက်ကဵုပိုဲဏံဒးဖအိုတ်သြန်ဒးဂံၚ်ရာန်စမာန်ရ၊ ဣဏံဟေၚ်ရပိုဲကဵုလာပ်ဗဇဴသွက်ခန္ဓကာယပိုဲဏံဂွံဆက်ဂၠာဲနၚ်သြန်ကဵုပိုဲဏံရ၊ ယဝ်ရပိုဲကဵုလာပ်ဗဇဴဗၠေတ်အာဏောၚ်တှ်ေ ဇီုကပိုက်ကဵုပရေၚ်ထက်ယုက်ပိုဲဏံတုဲ ခန္ဓကာယလေဝ်အိုတ်ကၠုၚ်ဂဥုဲဒြဟတ် ပရေၚ်ထက်ယုက်ဟွံခိုဟ်တုဲ သြန်သွက်ဂွံလုပ်ကၠုၚ်ဂှ်ဟွံမွယ်မဒှ်ရ။
လ္ၚဵုတံဂှ်ကဵုမံၚ်လာပ်ဗဇဴသွက်ခန္ဓကာယကီုတုဲ မပ္တံကဵုသုၚ်ၜံက်သုၚ်အရက်သုရာဂဥုဲၜူမာဲနာနာတံဂွံမံၚ်ဖအိုတ်တုဲ ဣဏံဂှ်ဒှ်သွက်ပရေၚ်ထက်ယုက်ခန္ဓကာယပိုဲဏံဟာဂှ်တီမံၚ်သွဟ်သီုညးဖအိုတ်ရတုဲ လာပ်ဗဇဴသာ်ဏံဂှ်ဒှ်ကဵုဒုဟ်သွက်ပရေၚ်ထက်ယုက်ခန္ဓကာယပိုဲဏံပၠန်ရတုဲ ပရေၚ်ထက်ယုက်ပိုဲဏံလေဝ်လီုကၠုၚ် ခြာဟွံလအ်ဟေၚ် ခန္ဓကာယပိုဲဏံကၠောန်ကမၠောန်ဟွံမာန် သြန်သွက်ဂွံလုပ်ကၠုၚ်ဂှ်ဟွံမွယ်တုဲ သြန်သွက်ဂွံတိတ်အာဂှ်နွံဂၠိုၚ်ရ၊ ယဝ်ဒှ်သာ်ဏံတှ်ေ ပိုဲဏံကဵုဒးလာပ်ဗဇဴသွက်ခန္ဓကာယပိုဲဏံဗၠေတ်အာဇၞော်ကဵုဒြဟတ်တုဲ ပြသၞာနာနာမံက်တိတ်ကၠုၚ်ပ္ဍဲဘဝလၟေၚ်လၟေၚ်တ္ၚဲပိုဲကောန်ဂကူတအ်မာန်လောဲလောဲသွာသွာရ။
ဟိုတ်ဒှ်သာ်ဂှ်တုဲ လာပ်ဗဇဴသွက်ခန္ဓကာပိုဲဏံတှ်ေ စၞနွံကဵုဓါတ်တံဂှ်ဒးရုဲစမာန်တုဲ စၞလဵုဟွံခိုဟ်ကဵုပရေၚ်ထတ်ယုက်တံဂှ်ဒးဝေၚ်ပါဲမာန်ရ၊ ဣဏံရပိုဲဏံကဵုတဴလာပ်ဗဇဴသွက်ခန္ဓကာယပိုဲဂတာပ်အခေတ်ဟီုစဂွံတုဲ ခန္ဓကာယပိုဲဏံလေဝ်ပရေၚ်ထက်ယုက်ခိုဟ်ဏောၚ်တှ်ေ ကၠောန်ကမၠောန်လေဝ်အခက်ခုဲဟွံမွယ်မွဲသာ်တုဲ ဂွံကၠုၚ်ထဝ်သြန်လောဲလောဲသွာသွာသွက်ဘဝပိုဏံရ။
ယဝ်ရလာပ်ဗဇဴဂတာပ်အခေတ်တ္ၚဲဏံဗီုညးတံဒးကဵုမပ္တံကဵုဒးသုၚ်ဂဥုဲၜူမာဲမှဂတာပ်အခေတ်ဍေံတံဟီုဂးတုဲ ဣဏံဂှ်ဂတာပ်အခေတ်ဟွံသေၚ်တုဲ ဒှ်မၞိဟ်သာသ္ပအ်မွဲ ဒှ်မၞိဟ်သတိလီုသွက်ဘဝအနာဂတ်ဂကောံအိန်ထံၚ်ဇကုအိုတ်တုဲ အာယုက်ဇၞော်တိုန်ညိဂှ်ဟေၚ် ပရေၚ်ထက်ယုက်ဟွံခိုဟ်ဍေံကဵုကၠုၚ်ဖဵုပွမဗက်မိပ်လဝ်မွဲအခိၚ်တေံတုဲ မသြန်ပ္ကောံလဝ်ဇၟာပ်ဒ္ကေဝ်တံဂှ် ဟွံလအ်စိုပ်အာပ္ဍဲတဲအာစာဂဥုဲတအ်အိုတ်ရ၊ ဟိုတ်ဒှ်သာ်ဂှ်တုဲ လာပ်ဗဇဴသွက်ခန္ဓကာယပိုဲဏံလေဝ်နွံၜါသာ်တုဲ ဍေံကဵုဖဵုခိုဟ်သွက်ပရေၚ်ထက်ယုက်၊ ဍေံဟွံဒုဟ်သွက်ပရေၚ်ထက်ယုက်မဒှ်တုဲ တိုန်တဴကဵုပိုဲဏံဟေၚ်ရရုဲစှ်ကေတ်မာန်ရ၊ အိုတ်ကၞောတ်ဟေၚ် ကံကုသဵုခိုဟ်ပရေံဂှ်ဂွံတိတ်ကၠုၚ်နူသၟန်ပါၚ်ပိုဲဏံကီုရ။
လၟေၚ်ၜါ − လာပ်ဗဇဴသွက်ဘဝဟီုဂှ်တှ်ေ? − တ္ၚဲဏံစိုပ်ကၠုၚ်အခေတ်အာဲထဳ(IT)လပှ်ကျာကီုတုဲ ၜိုန်ရပိုဲဏံဒှ်မၞိဟ်ဓမ္မတာပညာအောန်မွဲကီုလေဝ် သာ်ဂှ်ဟွံသေၚ် ဒှ်မၞိဟ်နွံကဵုပညာမွဲကီုတုဲ အရာသွက်ဂွံဗဂဵုလဟဵုပ္ဍဲဘဝပိုဲလၟေၚ်လၟေၚ်ပိုဲဏံဂှ်လေဝ် ဗဟုသုတလ္တူလပှ်ကျာနွံတဴဗဝ်သအဝ်တုဲ ဂွံအခိၚ်ဟေၚ်ထေက်ကဵုဒးလ္ၚတ်ဗှ်ဗဵုကလၚ်ချူဂွံဒှ်ၚုဟ်မးသွက်ဘဝဇကုမာန်ရ၊ အခေတ်တ္ၚဲဏံပၠန်လေဝ် မပ္တံကဵုစက်ကောန်ပျူတာမွဲမဍောတ်ဇၟာပ်မၞိဟ်ထေက်ကဵုဒးရာန်မာန်ဖအိုတ်တုဲ မပ္တံကဵုချူလိက်ဗှ်လိက်လ္တူလပှ်ကျာဟွံဒးကျအခေတ်တုဲ ဗဂဵုလဟဵုအာဘဝဇကုပ္ဍဲအခေတ်တ္ၚဲဏံရ။
ပိုဲတံလ္ပဖျေံထောံစိုတ်ညိဟီုဂှ် ဘဝဇကုပညာသဝ်မွဲတုဲ ဇကုညံၚ်ရဴၚုဟ်မးမၞိဟ်ဟွံမွယ်သာ်ဏံလ္ပကၠိုဟ်စိုတ်ညိ၊ ယဝ်ပိုဲဏံတော်သာ်ဏံတှ်ေ ဒြဟတ်သွက်ပိုဲဏံဂွံဆက်ဗဂဵုလဟဵုအာနာနာသွက်ဘဝပိုဲဏံဂှ်လေဝ်အိုတ်ပိုတ်ကၠုၚ်တုဲ စိုတ်ဏံလေဝ်ဟွံမွယ်ကဵုဂဥုဲဒြဟတ်သွက်ဂွံဆက်ပြိုၚ်ပ္ကာန်အာဘဝလၟေၚ်လၟေၚ်တ္ၚဲဏံရ၊ ဘဝဟီုမ္ဂးဂှ်ညးမွဲကေုာံညးမွဲဟွံတုပ်တဴတုဲ နဲကဲသုၚ်စောဲဘဝလေဝ်ဟွံတုပ်တၞဟ်ခြာဒၟံၚ်အိုတ်တုဲ ဘဝပိုဲဏံဂှ်ဟွံထေက်ကဵုဒးအာပတုပ်ကဵုညးတၞဟ်အိုတ်ရ၊ ပိုဲဏံထေက်ကဵုဒးပေၚ်စိုတ် အရာလဵုဍေံနွံဒှ်ဒၟံၚ်ပ္ဍဲဘဝပိုဲတ္ၚဲဏံဂှ်အိုတ်ညိ၊ ပညာပိုဲနွံၜိုတ်ဏံ အစောံစရာဲပိုဲကၠောန်ဂွံအာစိုပ်ၜိုတ်ဏံတှ်ေ ဣဏံဂှ်ဘဝပိုဲဇေတ်ဇေတ်ရ၊ ၜိုတ်ဍေံနွံမံၚ်ပ္ဍဲဘဝပိုဲတ္ၚဲဏံဖအိုတ်ဂှ် ယဝ်ပိုဲသုၚ်စောဲသွက်ဘဝကၠိုဟ်စိုတ်ဘဝမ္ဂးတှ်ေ ၚုဟ်မးဍေံကဵုဍေံဂှ်နွံမံၚ်ဖအိုတ်ရ၊ ၚုဟ်မးညးတၞဟ်လေဝ်ကဆံၚ်ဍေံကဵုဍေံနွံတုဲ ၚုဟ်မးပိုဲဏံဂှ်လေဝ် ၜိုတ်အစောံပိုဲနွံဂှ်ဟွံကျအာညးတၞဟ်ကီုတုဲ ထေက်ကဵုဒးမိပ်စိုတ်ပေၚ်စိုတ်ကဵုဘဝဇကုနွံဒှ်ဒၟံၚ်စက္ကဏံအိုတ်ညိ။
ဇၟာပ်မၞိဟ်က္တဵုဒှ်ကၠုၚ်မၞိဟ်ဋ္ဌာန်ဒၞာဲမိမဂကူဟွံတုပ်တဴညးသ္ကံအိုတ်တုဲ ၚုဟ်မးညးကဵုညးနွံမံၚ်တုပ်တုပ်ဖအိုတ်ရ၊ ယဝ်ရပိုဲဏံအာပတုပ်မံၚ်ကဵုဘဝညးတၞဟ်တွဵုဏောၚ်တှ်ေ အရာလဵုဒးဗဂဵုလဟဵုပ္ဍဲဘဝပိုဲဏံဂှ်ဟွံတီတဴမွဲသာ်တုဲ ကုသဵုပရေံသာ်တေံဗီုဏံဟီုအာပေၚ်ပြးတုဲ အခိၚ်ဂှ်အိုတ်ကၠုၚ်သိုက်သိုက်ရ၊ နဲကဲခိုဟ်အိုတ်ဒးကဵုလာပ်ဗဇဴသွက်ဘဝပိုဲဏံဂှ်တှ်ေ ဘဝဂှ်လ္ပပတုပ်ကဵုညးတၞဟ်တုဲ ပေၚ်စိုတ်အရာဍေံနွံမံၚ်ပ္ဍဲပိုဲဏံညိ၊ ၜိုတ်အစောံစရာဲပိုဲနွံဗဂဵုဟလဵုဂွံဂှ်တှ်ေကၠောန်အာညိ၊ အိုတ်ကၞောတ်ၚုဟ်မးညးကဵုညးဍေံကဵုကၠုၚ်ဖဵုအတိုၚ်သဘာဝအိုတ်ရ။
အိုတ်ကၞောဝ်ကၠာဟွံအုပ်ကၠေံနိဂီုဏံဂှ်တှ်ေ ဇၟာပ်ညးအဲလာပ်ဗဇဴသွက်ခန္ဓကာယကေုာံသွက်ဘဝပိုဲဏံဂှ်လ္ပဝိုတ်ထောံအိုတ်တုဲ လာပ်ဗဇဴဍောတ်ဍောတ်သောဲသောဲဒးကဵုမာန်သွက်ပိုဲဏံအိုတ်ညိ၊ သြန်ပိုဲဒတုံစှ်ေအာတုဲ ညးတၞဟ်ကပှ်ဂွံကၠုၚ်ကဵုပိုဲတှ်ေ ပိုဲဏံမိပ်စိုတ်တၚ်ဂုဏ်သၟးဟွံကတုဲ စရိတ်စေတနာညးဂှ်ပိုဲဏံကလေၚ်ကဵုလာပ်ဗဇဴသွက်ညးကပှ်ဂွံမသြန်ပိုဲဏံၜိုတ်ထေက်ကြိုက်မာန်ရ၊ ဟိုတ်သာ်ဂှ်တှ်ေ မွဲမွဲတ္ၚဲ မွဲမွဲသၞာံပိုဲဏံကၠောန်ပကောံဂွံထဝ်သြန်ရာန်သ္ၚိကၠအ်တံနွံကဵုၚုဟ်မးဂှ် ထေက်ကဵုပိုဲဏံဒးမိပ်စိုတ်တၚ်ဂုဏ်ကဵုခန္ဓကာယပိုဲဏံကၠောန်ကၠုၚ်လဝ်ကမၠောန်ကဵုဘဝပိုဲဏံဟွံပိုတ်သ္ကုတ်အာတုဲ လာပ်ဗဇဴသွက်ခန္ဓကာယကေုာံသွက်ဘဝပိုဲဏံဂှ်လေဝ် ညးညးအဲအဲလ္ပဝိုတ်ထောံအိုတ်ညိ၊ သာ်ဂှ်ဟွံသေၚ်တှ်ေ ယဝ်ပိုဲဏံဟွံကဵုလာပ်ဗဇဴ ကဵုလာပ်ဗဇဴလေဝ်ဗၠေတ်မံၚ်ဏောၚ်တှ်ေ ဟွံလအ်ခန္ဓကာယပိုဲဏံဍေံလၞုဟ်ဟွံကၠောန်ကဵုပိုဲဏံကမၠောန်မ္ဂးတှ်ေ မသြန်သွက်ပိုဲဏံဂွံလုပ်ကၠုၚ်ဂှ်လေဝ် ပိုဲဏံအေၚ်ရ။