လိက်ပတိုန်လညာတ်

လိက်ပတိုန်လညာတ် (Argumentative/argumenterende)

တင်ရန်တၟအ်၊ ပတိုန်ထ္ၜးကဵု ညးမဗှ်လိက်တအ် လညာတ်ဇကု ပရူမွဲမွဲ၊၊

မပတိုန်ဂလာန် (ဝါ) မပတိုန်လညာတ် ဟီုမ္ဂးဂှ် ဒှ်အရာ မပတိုန်ထ္ၜး လညာတ်ဇကု ကေုာံ မဖန်ဂစာန် ပသောင်ကလး ကုညးဗှ်လိက်တအ် ဂွံတီ ဂွံကၠိုဟ် ဂွံစှေ်စိုတ် လတူလညာတ်ဇကုရ၊၊ မပတိုန်လညာတ်ဝွံ နကဵုအရေဝ်ကီု နကဵုလိက်ဝွံ ပိုယ်တအ် ဖန်ဟီုဒၟံင် ရိုဟ်ဒဒှ်တ္ၚဲ ဟီုမာန်ရ၊၊ မကြီုဟီု ပရူကပေါတ်ဇကု ညံင်ညးတၞဟ်ဂွံရာန်၊ ပ္ဍဲပရေင်ဍုင်ကွာန် ညံင်ညးတၞဟ် ဂွံစှေ်စိုတ် ဒုင်တဲ ဂၠံင်တရဴ ပရေင်ဍုင်ကွာန်ဇကု ဒှ်တမ် ပိုယ်ဂွံဆဵုကေတ်ရ၊၊

ပ္ဍဲသၞောတ်ဒဳမဝ်ကရေသဳဂှ် အရာမပတိုန်လညာတ် အရာမပြိုင်ဂလာန်ဏအ် ဒှ်အရာကိစ္စဇၞော်မွဲဟီုဂွံရ၊၊ ဟီုမွဲသာ်ပၠန် အရာမပတိုန်လညာတ် အရာမပြိုင်ဂလာန်ဝွံ ဒှ်ကတေင်လမျီု ဒဳမဝ်ကရေသဳမွဲလေဝ် ဟီုမာန်ရ၊၊ လညာတ်ၜါ ပြိုင်ပကာန်ကၠုင် ရေင်သကအ်မ္ဂး ပရေင်မကဵုကေတ် ပရေင်တင်လတုပ်စိုတ်တအ် ကတဵုဒှ်ကၠုင်မာန်ရ၊၊ ဇၟာပ်အရာဂှ် ၜိုန်ရ ပိုယ်ဟွံတုပ်စိုတ် ရေင်သကအ် ဒှ်ကီုလေဝ်၊ ပိုယ်တအ် ဂၠာဲသွဟ် သွက်ဂွံပသောင်ကလး ပြသၞာ မာန်ဏီကီုရ၊၊

စပ်ကဵု ဂကူလိက်ဏအ်တုဲ ဂွံဆဵုကေတ် ဗွဲမဂၠိုင် ပ္ဍဲလိက်ပရိုင် လိက်နူညးမဗှ်လိက် læserbreve ၊ လညာတ်အေဝ်ဒဳတာ ledere၊ လိက်ခၠေဝ်သှ် kommentarer ကဝ်လာံ column ကေုာံ လိက်မပတိုန်လညာတ်တၞဟ်ဟ်ဂမၠိုင်ရ၊၊ လိက်ပတိုန်လညာတ်ဏအ်ဂှ် လဆောဝ်မ္ဂး ဍန်န်ဂၠေအ်အ် မပတိုန်ထ္ၜး လညာတ်မွဲမွဲ၊ လဆောဝ်မ္ဂး လိက်ဂၠိင်င် လှဲလှဲလးလး မြဴသာ်ဝွံ ဂွံဆဵုကေတ်မာန်ရ၊၊ ဗီုကဵု လညာတ်အေဝ်ဒဳတာ၊ လိက်ခၠေဝ်သှ်တအ်ဂှ် ဗွဲမဂၠိုင် မပတိုန်ထ္ၜးလညာတ်မွဲမွဲ၊ ပ္ဍဲလိက်ပါ်ပဲါလညာတ် discussion တအ်ဂှ် ဒုင်သဇိုင် ကုလညာတ်တၞဟ်ခြာ ၜါ၊ ပိတုဲ ပတိုန်ထ္ၜး တုဲမ္ဂး အစာချူလိက်ဂှ် ထံက်ဂလာန် ကုလတူမွဲဂှ် ဗီုဏအ်လေဝ် ဂွံဆဵုကီုရ၊၊

ဗီုပြင် မထ္ၜးဟိုတ်ဂမၠိုင် Appeal forms

နဲကဲ ဗီုပြင် မပတိုန်ထ္ၜး လညာတ်ဇကု နွံမဂၠိုင်ကဵုနဲရ၊၊ နဲသီုဖအိုတ်ဂှ် ဟွံတုပ် ရေင်သကအ်ရ၊၊ ဟိုတ်ဂှ်ရ ညံင်ဂွံပါ်ပဲါ နဲတအ်မာန်ဂှ် ကိစ္စဇၞော်ကွေဟ်ကီုရ၊၊ ဇကုတီလဝ် နဲကဲနာနာတအ်တုဲမ္ဂး ဇကုလေဝ် ပတိုန်ထ္ၜးလညာတ်ဇကု နကဵုလိက်ကဵုဒှ် နကဵုအရေဝ်ကဵုဒှ် ညံင်ဂွံကိတ်ညဳ ကုမၞိဟ်မဒုင်တဲ မၞိဟ်မဗှ်လိက်ဇကု ကေုာံ အကာဲအရာ လေပ်ကီုရ၊၊ ပါယ်နူဂှ်တုဲ နကဵုနဲလဵုဂှ် ပ္ဍဲအခိင်အခါ အကာဲအရာလဵု ဇကုမသုင်စောဲထေက်ဂှ် ဇကုဖန်ဒးကၠုင်မာန်ရ၊၊

သရောပ်တုဲ တၠပညာဒဿနဂရိတ် အာရ်သတောလ်လေတ် (Aristotle) ပါ်လဝ် စပ်ကဵု မထ္ၜးဟိုတ်တုဲ ပတိုန်လညာတ် နွံပိအဇာရ၊၊

ထ္ၜးဟိုတ် နကဵုအစောမ်စရာဲဂုဏ် (Ethos-appeal)

ထ္ၜးဟိုတ် နကဵုအစောမ်စရာဲဂုဏ်ဂှ် ဒက်ပတန်လဝ် တင်ပတိုန်ထ္ၜး နကဵုမၞိဟ်မပလံင် (ဝါ) မၞိဟ်မဟီု၊၊ ဒုင်သဇိုင် ကုအစောမ်စရာဲဂုဏ် ညးမပလံင်တုဲ ပတိုန်ထ္ၜးရ၊၊ ဗီုပြင် မပတိုန်ထ္ၜးဏအ်ဂှ် ပ္ဍဲပရေင်ဍုင်ကွာန် ကိစ္စဇၞော် ဗွဲမလောန်ရ၊၊ မၞိဟ်မပတိုန်ထ္ၜး မၞုံကဵုအစောမ်စရာဲဂုဏ်မ္ဂး ညးဍုင်ကွာန်တအ် နွံဓဝ်ပတှ်ေ၊ ကလိဂွံအထံက်ဂလာန် မမာဲ နူညးတအ်ရ၊၊

ပါယ်နူဂှ်တုဲ စပ်ကဵု ပရေင်ထတ်ယုက်မ္ဂး အစာသဝ်ဒံက်တာလဵု မဟီု မြဴသာ်ဝွံဒှ်တမ်ရ၊၊

ထ္ၜးဟိုတ် နကဵုပရေင်ဒုင်စသိုင် (Pathos-appeal)

ထ္ၜးဟိုတ် နကဵုပရေင်ဒုင်စသိုင်ဂှ် ဒက်ပတန်လဝ် နကဵုပရေင်ဒုင်စသိုင် မၞိဟ်မဒုင်တဲတအ် ညံင်ဂွံကၠောန်မွဲမွဲ (ဝါ) ညံင်ဂွံဒုင်ကေတ် လညာတ်မွဲမွဲတုဲ ပတိုန်ထ္ၜးရ၊၊ ဥပမာ ဂကောံအရီုအဗင်ပရေင်မၞိဟ်တအ် ထ္ၜးရုပ် ဗီုကောန်ၚာ် မဒးဘဲဍာ်၊ ဘဲကသဳတိ ပ္ဍဲတဳဗဳတုဲ ပကဵုညံင် ညးမဗဵုတအ် ဂွံဆာန်ဍူတုဲ ဂွံစုတ်ကဵုဒါန်၊၊

ထ္ၜးဟိုတ် နကဵုဟိုတ်ကဵုဖဵု (Logos-appeal)

ထ္ၜးဟိုတ် နကဵုဟိုတ်ကဵုဖဵုဂှ် ဒက်ပတန်လဝ် နကဵုညးမဒုင်တဲတအ် ဂွံစင်ခြင် ဗစာရဏာရ၊၊ လညာတ်နကဵုဟိုတ်ကဵုဖဵုဂှ် ဒုင်သဇိုင် ကု (ကတ္တာ) အစောမ်စရာဲဂုဏ် ညးမပလံင်လေဝ် ဟွံသေင်၊ ဒုင်သဇိုင် ကု (ကမ်) ပရေင်ဒုင်စသိုင် မၞိဟ်မဒုင်တဲဂှ်လေဝ် ဟွံသေင်၊ ဒုင်သဇိုင် ကုမလ္ၚတ်အရာမွဲမွဲတုဲ ကလိဂွံနင်သွဟ်၊၊ နကဵုတၠပညာဒဿနအာရ်သတောလ်လေတ် ညးမိက်ဂွံကဵု ဒြဟတ် ကုပရေင်ပတိုန်ထ္ၜးဏအ်ရ၊၊ ဗီုပြင်မပတိုန်ထ္ၜးဏအ်ဂှ် ဒှ်ဗီုပြင် နကဵုပရေင်ပညာမွဲရ၊၊

နကဵုဥပမာမ္ဂး ဂကောံဗတိုက်သရိုဟ်ယဲဂေန်သာတအ် ပၞောဝ်ကဵု မၞိဟ်မကတဵုဒှ် ယဲဂေန်သာတအ်ဂှ် မၞိဟ်မူစိတၟအ်ကၠံဂှ် သုင်ၜံက် ဂလိုင်လဵု၊ ဗၟံက်ထ္ၜးကဵု လၟိဟ်ချိုတ်တ်ပၠိုတ်တ်၊ တုဲပၠန် ဓါတ်နူၜံက် မဗဒှ် ကဵုယဲဂေန်သာဂှ်လေဝ် ဗၟံက်ကဵု ဟိုတ်ဍေဟ်တုဲ ဖ္တိုက်ဖ္အောဝ် ညံင်မၞိဟ်တအ် ဂွံဒေါအ်ၜံက် ညံင်ဟွံကလိဂွံ(ဖဵု) ယဲဂေန်သာရ၊၊

ဂကူ မပတိုန်လညာတ် Argument types

၁၊ စၞောန်ပညုင် ကုလညာတ်ညာဏ် (Henvisning til fornuft)

မၞိဟ်မပလံင်တအ် (ဝါ) မၞိဟ်မဟီုတအ် စၞောန်ပညုင် ကုလညာတ်ညာဏ်၊ တင်နင် နူတၠပညာ သွက်ဂွံထံက်ပခိုင်ကဵု လညာတ်ဇကုရ၊၊ ဥပမာ တၠပညာတအ်ဟီု . . . ၊၊ မပတိုန်လညာတ် နကဵုဂကူ ဗီုဏအ်ဂှ် စပ်ကဵု မၞိဟ်တအ် ဂွံဝေင်ပါယ်မွဲမွဲမ္ဂး စိုပ်တရဴဂၠိုင်ရ၊၊ မုဟိုတ်ရောမ္ဂး မၞိဟ်ဗွဲမဂၠိုင်ဂှ် မိက်ဂွံညာတ်ဇကုဇကု နဒဒှ်မၞိဟ်မစဳကၠးမွဲ ဖအိုတ်ရ၊၊

၂၊ စၞောန်ပညုင် နကဵုအာဏာ (magtargumentet)

မၞိဟ်မပလံင်တအ် (ဝါ) မၞိဟ်မဟီုတအ် စကာ အဝဵု (ဟွံသေင်မ္ဂး) ကဆံင်အလံင်ဇကုတုဲ ထံက်ပခိုင် ကုလညာတ်ဇကုရ၊၊ ဥမာ မၞးဒးပဗီုဏအ် ဒးကၠောန်ဗီုဏအ် ပ္ဍဲအရာဏအ် အဲရ ဒှ်မၞိဟ် မဖျေဟ်သ္ဂုတ်သွာတ်၊၊ မပတိုန်လညာတ် နဲဏအ်ဂှ် (အခိင်ကၠာတေအ်) ဂွံဆဵုကေတ် ပ္ဍဲအရာ မဝေတ်ဗ္တောန် ကောန်ၚာ်တအ်၊ ပ္ဍဲဘာဗတောန်လိက်တအ် ဂၠိုင်ရ၊၊

၃၊ စၞောန်ပညုင် နကဵုဥပဓိ (Idol arguments)

မၞိဟ်မပလံင်တအ် (ဝါ) မၞိဟ်မဟီုတအ် စကာ မၞိဟ်ယၟုဒမြဟ်မွဲမွဲ ဥပမာ ကောန်မှိင်ဇာတ်၊ မၞိဟ်တေအ်ဗဝ်ဒမြဟ်တအ် သွက်ဂွံကြီုကဵု ကပေါတ်မွဲမွဲ လညာတ်မွဲမွဲရ၊၊ ရာန် Hugo Boss ညိ Justin Timberlake လေဝ် စကာဒၟံင်ကီု၊၊

၄၊ စၞောန်ပညုင် နကဵုလၟိဟ် (quanity argument)

မၞိဟ်မပလံင်တအ် (ဝါ) မၞိဟ်မဟီုတအ် စၞောန်ပညုင်ဏာ ဒဒှ်ရ မၞိဟ်ဗွဲမဂၠိုင် စှ်ေစိုတ် လတူလညာတ်ဂှ်၊၊ ဥပမာ ပိုယ်မၞိဟ်ဗွဲမဂၠိုင် ညာတ်တီကေတ် ဒဒှ်ရ စဖျုန်ဂၠိုင်မ္ဂး ဟွံကိတ်ညဳ ကုပရေင်ထတ်ယုက်၊၊ မၞိဟ်ဗွဲမဂၠိုင်ဂၠေင်ဂှ် ညာတ် လတူအရာဂှ် တုပ်ပ်၊၊

၅၊ စၞောန်ပညုင် နကဵုတၠပညာ (expert argument)

မၞိဟ်မပလံင်တအ် (ဝါ) မၞိဟ်မဟီုတအ် စၞောန်ပညုင်ဏာ လညာတ်တၠပညာ နဒဒှ်သက်သဳသာဓက သွက်မဒုင်တဲ (ဝါ) မၞိဟ်မဗှ်လိက်တအ်၊၊ ဥပမာ - တၠပညာသုတေသနတအ် မဂွံဆဵုကေတ် ပ္ဍဲသုတေသနညးတအ်တၟိဂှ် ဒဒှ်ရ ပ္ဍဲဖျုန်ဂှ် ဓါတ် toxins ပါလုပ်ဒၟံင် ဗွဲမဂၠိုင်ဂှ်ရ မၞိဟ်တအ် ဒးဖအောန်ဖျေဟ် မစဖျုန် ထေက်ရ၊၊

၆၊ စၞောန်ပညုင် နကဵုဗဟေက် (ဟွံ) ဘပဠ (fear or threat argument)

ပ္ဍဲဒၞာဲဏအ် စကာ နဒဒှ်ဒုဟ်ဒဏ်မွဲ ပတိုန်ထ္ၜးလညာတ်ဇကု၊ ပညံင် ညးတၞဟ် ဂွံဒုင်တဲ ပ္ဍဲလညာတ်ဇကုရ၊၊ မၞိဟ်မပလံင် (ဝါ) မၞိဟ်မချူလိက်ဂှ် ဟီု ယဝ်ရ မၞးဟွံဒုင်ကေတ်/ ဟွံဒ္ဂေတ်ဗက် အတိုင်လညာတ် စဳပၞောန်ဂှ်မ္ဂး မုမွဲကတဵုဒှ်မာန် ပ္ဍဲမၞိဟ်ဂှ်၊၊ ဥပမာ - ယဝ်ရဟွံပလေဝ်စလဝ် နူလၟုဟ်မ္ဂး ဂတဏအ် ၜိုတ် ၅၀ သၞာံပၠန် မုမွဲ ကတဵုဒှ်ကၠုင်မာန်ရော၊၊

စၞောန်ပညုင် နကဵုတသိုက်လဟိင် (Happiness argument)

မၞိဟ်မပလံင်တအ် (ဝါ) မၞိဟ်မဟီုတအ် ပၠောပ်စိုတ်၊ ယဝ်ရကၠောန်ဗက်/ ပဗက်ဗီုဏအ်မ္ဂး တသိုက်ဗီုလဵု ကလိဂွံမာန်၊၊ ဥပမာ - ယဝ်ရ မိက်ဂွံသိုက်လှိင် ပ္ဍဲအခိင်ဗျုတေအ်မ္ဂး ပကောံလဝ်သြန် ဗွဝ်သြန်ပေန်ဇြေန် ပ္ဍဲဘာဏ်ပိုယ်ညိ၊၊

စၞောန်ပညုင် နကဵုမၞိဟ်ပူဂိုလ်မွဲမွဲ (Person argument)

မၞိဟ်ပလံင်တအ် (ဝါ) မၞိဟ်မဟီုတအ် ပညုင်ထ္ၜး ဒဒှ်ရ မၞိဟ်တေအ် ညးဒုင်တဲတုဲရ၊ မၞးလေဝ် ထေက်ကဵု ဒးဒုင်တဲကီုရ၊၊

လဒက်ပတန်

လိက်မပတိုန်လညာတ်ဂှ် ဒက်ပ္တန်လဝ် နကဵုဗီုပြင် မွဲဗီုဓဝ်ရ၊၊ ပတိုန်ထ္ၜး လညာတ်မွဲ တုဲ စၞောန်ပညုင် မွဲ၊ ၜါ၊ ပိ၊ ဗက်ကၠုင်လက္ကရဴ၊၊

လညာတ် - မွဲတ္ၚဲ အောန်အိုတ် ၜါအလန် ဒးပေါတ်ၚေက်ထေက်၊၊

စၞောန်ပညုင် (၁) - မုဟိုတ်ရောမ္ဂး ဟွံပေါတ်ၚေက်တှ်ေ ၚေက်ဒှ်စၟ၊၊

စၞောန်ပညုင် (၂) တုဲပၠန် ၚေက် ဟွံအးဇ္ၚးတုဲ အာကၠုင် အကြာညးတၞဟ် ရံင်စ ကျာ်သြဳအောန်၊၊

လိက်မပတိုန်လညာတ်တအ် ဗွဲမဂၠိုင် နွံကဵု လညာတ်မွဲ သွက်ဂွံပသောင်ပြသၞာမွဲမွဲ၊၊ တုဲမ္ဂး စၞောန်ပညုင် မုဟိုတ်ပြသၞာဂှ် ဒးသှ် ဒးပသောင်ရော၊၊ ဟိုတ်ဂှ်ရ လိက်ဂှ် ဒးဒက်ပ္တန် ဗွဲသၟဝ်ဝွံရ၊၊

(၁) နိဒါန် မဆက်မိတ်/ဗမံက်ထ္ၜး ပြသၞာ၊၊

(၂) လညာတ် မပတိုန်ထ္ၜး ဗီုလဵုဂွံပသောင် ပြသၞာဂှ်၊၊

(၃) စၞောန်ပညုင် မွဲတုဲမွဲပၠန် ပတိုန်ကဵု ဗွဲလၟေင်လၟေင်၊၊

(၄) ကလေင်စ လညာတ်တၟိမွဲ (ပၠန် လေဝ်ဂွံ)၊၊

အရေဝ်မသုင်စောဲ

လိက်မပတိုန်လညာတ် ဗွဲမဂၠိုင် စကာစ အရေဝ်ဗွဲသၟဝ်ဏအ်ဂၠိုင်ရ၊၊

ဟိုတ်ဖဵု (causal)၊ မအရေဝ်သမ္ဗန် ကေုာံ ကြိယာဝိသေသန မဆက်စၠောအ်ကဵု ဝါကျ ဗီုကဵု မုဟိုတ်ရောမ္ဂး၊ ဟိုတ်တုန်၊ နကဵုလညာတ်ဏအ်မ္ဂး၊ ဟိုတ်နူ၊ ဟိုတ်နူဂှ်တုဲ အက္ခရ် မဆက်စၠောအ် ဟိုတ်ကဵုဖဵု မပ္တံမြဴသာ်ဝွံ စကာဂွံဂၠိုင်ရ၊၊

[လညာတ်] - သုင်ၜံက်ဂှ် ဒှ်အန္တရာဲ ကုပရေင်ထတ်ယုက်

[စၞောန်ပညုင်] - မုဟိုတ်ရောမ္ဂး ပ္ဍဲၜံက်ဂှ် နွံကဵု ဓါတ်ဂျိနာနာသာ်၊၊

နကဵုဂၠံင်ဂတး ထ္ၜးဟိုတ်ကၠာ တုဲဟီုဖဵုဍေဟ်၊၊

[စၞောန်ပညုင်] - ပ္ဍဲၜံက်ဂှ် နွံကဵု ကုဓါတ်ဂျိနာနာသာ်

[လညာတ်] - ဟိုတ်ဂှ်ရ သုင်ၜံက်ဂှ် ဒှ်အန္တရာယ် ကုပရေင်ထတ်ယုက်၊၊

မအရေဝ် additive text bindings ဂမၠိုင် မပ္တံကဵု၊ ပါယ်နူဂှ်တုဲ၊ ဟိုတ်နူဂှ်တုဲ ကတဵုဒှ်ကၠုင်၊ ဆဂှ်သၟးဟွံက၊ ဒှ်ကၠုင် ဗီုဏအ်ကီု သီုကဵု ….. ၊ ဗွဲကိုပ်ကၠာ၊ တုဲမ္ဂး၊ လက္ကရဴအိုတ်၊ မအရေဝ်တအ်ဂှ် ဒှ်မအရေဝ် မဆက်စၠောအ် ဗဗိုန်ကဵု စၞောန်ပညုင်မွဲမွဲရ၊၊ မအရေဝ် contrast bindings ဂမၠိုင် မပ္တံကဵု၊ စၞးဂှ် ဒှ်အာ … ၊ ဆဂး၊ ပြဟ်ဟ်ဏအ်၊ ၜိုန်ဂှ်လေဝ် တအ်ဂှ် ဒှ် မအရေဝ် မဗၟံက်ထ္ၜး အရာမတၞဟ်ခြာ အရာမဒစဵုဒစးဂမၠိုင်ရ၊၊ ဗၟံက်ထ္ၜးအရာမဒစဵုဒစး သွက်ဂွံလညာတ်ဇကု မပတိုန်ဂှ် ညးတအ် ဂွံညာတ်အးရ၊၊

တၠုင်လအာသြဝါဒ (rhetorical figures) စကာနနဲတၠုင်လအာသြဝါဒတုဲ မပတိုန်လညာတ်လေဝ် စိုပ်တရဴကီုရ၊၊ တၠုင်လအာသြဝါဒဟီုဂှ် နဲကဲမဟီုတွံ ညံင်သၟာပရေင်ဍုင်ကွာန်၊ က္ဍိုပ်သကိုပ်မွဲမွဲ မဟီုတွံသြဝါဒရ၊၊ ပ္ဍဲလိက်ဏအ် ဒှ်လိက်နဲကဲဟီုတွံသြဝါဒဟွံသေင်တုဲ ဆအယာံမာတ် တင်ဂၞင်အဓိကညိညဟေင် ဗၟံက်ထ္ၜးဏာ အတိုင်ဗွဲသၟဝ်ဝွံရ၊၊

• ကဆီု - အရာမဒှ်အဓိက တၞဟ်နညးမဗှ်လိက်တအ် ဂွံစွံသတိတုဲ ကဆီု/ ကလေင်ဗၟံက်ထ္ၜးပၠန်၊၊
• Anaphora - မတုပ်ညံင် ကဆီုကီု၊၊ ဝါကျတၟိ စကဵု မအရေဝ် ကၠာအိုတ် နူဝါကျဂတဂှ်၊၊ ဗွဲမဂၠိုင် ကဆီုပိဝါ၊၊ ဥပမာ၊ ဒၞာဲလဵု အာအာ၊ ဒၞာဲလဵု မံင်မံင်၊ ဒၞာဲလဵု စိုပ်ပ် အဲဆလအ် ဟွံဝိုတ်ဗှ်ေ၊၊ ကတဵုနူသတိက်လေဝ် ချပ်ဂၠံင် ဗှ်ေရ၊၊ ညာတ်ကပေါတ််ကျေဝ်လေဝ် မိက်ဂွံရာန်ကဵု သွက် ဗှ်ေရ၊၊ ဟီုကဵုဍေဟ်ညိ မိက်ဂွံတီတှ်ေ ကၠုင်ဒၞာဲဏအ်၊ ၜိုတ်လဵု ပလက်ပလက် ပိုယ်ဟွံကၠက်၊ ၜိုတ်လဵု ဘဘ ပိုယ်ဟွံဖေက်၊ ၜိုတ်လဵု လှေဟ်လှေဟ် ပိုယ်ဟွံဗက်စ၊၊
• ဂလာန်သၟာန် သြဝါဒ (Rhetorical question) - ဂလာန်သၟာန် မပတိုန်ဏာ သွက်မၞိဟ်မဒုင်တဲတအ် သှ်ဟွံသေင်၊ အလဵုဇကုညးသၟာန် သှ်ကေတ်တ်၊၊
• တးပါယ် (refutation) - ဟီုအရာမဒစဵုဒစး ကုလညာတ်ဇကုတုဲ အလဵုဇကု ကလေင်တးပါယ် လညာတ်ဂှ်ပၠန်၊၊ ဥပမာ မၞိဟ်ကလိလောန် ဒုဟ်ရာဇာဝတ်မွဲမွဲဂှ် ဖျေဟ်ထောအ်ထံင် သၞာံလအ်လအ်တှ်ေ မၞိဟ်ဂှ် ဒ္ဂေတ်အာတုဲ ဟွံကၠောန်ဒုဟ်ရာဇာဝတ် ဗီုဏအ် ပိုယ်တအ် ထေင်ကေတ်မာန်ရ၊၊ ဆဂး ဗီုဂှ်ဟွံသေင် သုတေသနဗၟံက်ထ္ၜး အယုက်ထံင်လအ်ဂှ် ပကဵု ညံင်မၞိဟ်ဂွံဒ္ဂေတ် ဟွံသေင်၊ နကဵုပရေင် မလွဳစိုတ်စရိုတ်မၞိဟ် ဇရေင်တၠပညာစိုတ်၊ တၠပညာပရေင်မၞိဟ်တအ်ဟေင် မၞိဟ်တအ် ဒ္ဂေတ်တပ်တးကၠုင်မာန်ရ၊၊ ယဝ်ရ ဟွံကဵုလွဳ မွဲသာ် ဟိုတ်နူဂွဵုစိုတ် မဒးကြိုင်လဝ် ပ္ဍဲထံင်လအ်လအ်တုဲ တိတ်ကၠုင် စိုတ်စရိုတ်ကြမ်ကြ ဂၠိုင်တိုန်ဏီရ၊၊
• ဖနော်ဍာ် (Exaggeration) - ဟီုဓလိုင်ပတိုန် ညံင်ညးတၞဟ် စိုတ်ဂွံလုပ်စ၊၊