လိက်ဗြရတ်ဣဏၚ်ကၚ်ရဳ

ဂလာန်ဗစန်

ပ္ဍဲပုံဗြရတ်ဣဏင်ကင်ရဳဝွံ ဗီုမအခဝ်လ္ၚဵု ကဝိမင်ရောဂေါမချူကှ်ေလဝ်တံဂှ် တၞဟ်ခြာနူကဵုမအခဝ်လၟုဟ်ဏံညိည နွံတဴရ၊၊ ပမာတုန် - ( သြ ) အခဝ်ဝွံ ပ္ဍဲလိက်ပတ်ပိုဲမချူကှ်ေဒၟံင်လၟုဟ်ဏံ သွဵုလေဝ်ဒှ်မာန်၊ သဗျဉ်လေဝ်ဒှ်မာန်၊ သကၟက်ရ ( ပ္တိတ်ရမျာင်-သရ) လေဝ် ဒှ်မာန်၊၊ ( သြ ) အခဝ်ဝွံ ယဝ်ဒှ်သွဵုမ္ဂး ကဝိမင်ရောဂေါ ချူကှ်ေလဝ်ဗီုပြင်တၞဟ်ခြာဒၟံင်ညိကီုရ၊၊ စၞး( သြ ) သွဵုဂှ် ညးချူ ( အြ ) သွဵု မဖှ်သာ်ဝွံ၊၊ ဟိုတ်ဂှ်ရ ပ္ဍဲပုံဏံ တၠဝါသနာလိက်ပတ်မည်ပိုဲတံ ဆက်ဗှ်အာဂတတေံပၠန်မ္ဂး သ္ဂောံဆဵုညာတ်ကေတ် ( အြ ) သွဵု မဖှ်သာ်ဂှ်ရောင် အဲ မိက်ဂွံစွံဂလာန်ဗစန်၊၊

နိဒါန်

တိလောကနာထ အဂ္ဂသမ္ဗုဒ္ဓါ၊ ကျာ်တြဲဇမၞးမာ ဂုန်ဇၞော်ပပြာကတ်၊ ပိစှော်မွဲဘုံအဴ၊ ဂွံပိုင်တဴအဆတ်၊ ဝိနဲသုတ်ပြမတ် သီုပိတကတ်ပိ၊ လျးတရဴခၠင်သွဝ်၊ ဂြင်ဓဝ်သၟဝ်ဗောဓိရုက္ခာ၊ ဒက်ထွာဲဇမၞးဟာန် ဂြင်ဓဝ်ဇၞးပၞာန်မာ၊ ဂွံဇၞးမာတုဲမာ၊ နာဲသာကျမူဏိ၊ ဗရုဲပတိတ်လျးတြဴ ခၠင်တဴဒိုဟ်သ္တုံဇွိ၊ ဂှ်ကျာ်မစိုန်ဒှ်၊ တဝ်စရှ်ညးဘုံပိ၊ အဟံဝန္ဒာမိ ကြိလောကနာထ၊ နဝလောကုတ္တရ နာမဍောင်ဓမ္မာ၊ အဲဍိက်လ္ၚောဝ်ကွာဲ ဓဝ်ကျာ်တြဲနာဲသာ၊ သမုတ္တိအရဳယ အဂ္ဂသာဝကာ၊ သ္ဂုတ်ကၠေံကိလေသာ၊ ဓဝ်တဏှာသီုရာဂ၊ သၟတ်ဍုင်အမတံင် ဟံင်သတ်ပ္ဍဲလောက၊ နူကဵုဂင်သံင်သာ၊ ကၠောံအာနိဗှုတ၊ ဂိုန်သင်အရဳယျ ထေက်ပပူဇဴပၠန်၊ သမုတ္တိသင်ပ္ညဳ၊ ဂၠိုင်လွဳပရာလောန်၊ မပ္ကင်ရင်လဝ်ပၠန် သီုဒွန်ပိတကတ်ပိ၊ ဝိဓုရသီုၜါ၊ လ္ၚတ်ကျာ်နာဲသာစိ၊ ဂုန်သင်ၜါပြကာ အဟံဝန္ဒာမိ။ ။

သက်သၟီတုဲကီု လ္ၚောဝ်သီုရတ်ပိ၊ မာတာသီုပိတု ဂုရုပဇ္ဇျာဂ္ညိ၊ ပၟင်လိုက်သီုညးပန် ပြဲသန်ဇၞော်ဣဓိ၊ စတုမရှာတ်စိ သီုဝိနာယကာ၊ ဗဳသၞုမှာရာဇာ သီုမှာပြမေသွဝ်၊ ပြမေသြဳပြမေသြာန် မာဲလိုဝ်ပြမာန်ကျဝ်၊ မိစဏ္ဍဳဗြဴသွဝ် ဟီုလဝ်သီုစဏ္ဍာ၊ မိစဏ္ဍဳဗြဴသွဝ် ဟီုလဝ်သီုစဏ္ဍာ၊ ဒေဝတဴမိနိန္ဒြာ သီုကိုဝ်မှာဗဳနာဲ၊ သရဿဝတဳကၠာ ဝိနာယကဆာဲ၊ တဲစှ်ပပၞာင်ထဝ် အဲဍိက်လ္ၚောဝ်တွာဲ၊ အိန်ဗြီုယီုမာဆာဲ ဂၠိုင်ဒၞါဲမှာဒေဝါ၊ မနဳမေခလာ စက္ကဝါသုန္ဓရော၊ ပၟင်ဟေမဝန် ဂင်ဇၞော်ပဉ္စမော၊ ဒေဝတဴဂြိုဟ်ဒ္စိတ် ဒသမှာဒိဿာ၊ စန္ဒောသူရိယျော မေဃောသမိန္ဒြာ၊ မင်သန္တပ်ပြဘန် မင်ဟေမဝဏ္ဏာ၊ ဘုမ္မဇိုဝ်ရုက္ခဇိုဝ် အကာသဇိုဝ်ဒေဝါ၊ ဂဟပ္ပတိဒေဝဳရော မေဃောသၟီဝါတာ၊ ဖိုဝ်အဲဍိက်ယိုက်တုန် အိုတ်ဇၟာပ်ဂုန်ဒေဝါ၊ ညာန်အဲညံင်ဍာ်ဆင် ဇၟောဝ်ဂင်ဇမ္မုနာ၊ ဇွောဝ်တဍိင်သောဝ်တိတ် ဂင်ဇၞော်သမိန္ဒြာ၊ ညာန်အဲညံင်သၞာ်ရတ် တတ်ကြေဝ်ဒကှ်သွာ၊ သ္ဂုတ်အာလှင်လှင် ညံင်ဗီုလင်ဂတာ၊ ညံင်ပရှ်ချေံသိန္ဓဴ ညာန်အဲကိုဝ်စဴမြာ၊ ညာန်အဲကိုဝ်ဂွံဒှ် နဲဂှ်ဥပ္ပမာ၊ ဒၞါဲဒၞါဲအဲၜိုတ်ဆန် ပိုတ်ဗျန်အက္ခရာ၊ ညိပကိုဝ်တဍိင် ဝိဝိင်လီုမှာရာ၊ ယိုက်ဂုန်ညးတမၠာ မဟာသၟီကဝိ၊ စိန္တာကဝိမွဲ သုတညာန်လှဲဂၠိ၊ မွဲအတှကဝိ သီုပတိဘာန၊ ပ္ဋဲဒေါဝ်ရးမညှ ပတၠညာန်ဂမြင်၊ ကဝိပန်ဇၞော်နူဘဴ ဒယှ်တှ်ကၠဴထင်၊ ညာန်ညံင်အတှ်ရတ် ပြာကတ်ဇၟာပ်ဒိုဟ်ကၠင်၊ ဂုန်ကဝိမပြဲက္ဋင် ပင်ယိုဝ်လဝ်တူသိသ။ ကဝိဇၞော်နူတမၠာ စဴအာသွဝ်တုဲရ၊ ကဝိဗွဲကြဴဂတ ဗြကြာဲတလညာန်၊ ပ္ကင်ရင်လဝ်ဂုန္နိ ကဝိဇၞော်လောန်လာန်၊ ကျာ်အသွောံတိက္ခညာန် တဴထာန်ရးဟံင်သာ၊ နူဂှ်ဆက်တိုန်ဂတ ပ္ဍဲဍုင်မတ်တၟကၠာ၊ ကဝိမင်ဍိက်လ မင်ဒေံဍောတ်ရသေင်ဟာ၊ ဒေါဝ်မြုမတ်တၟကၠာ ကဝိၜါညာန်ဂဵုမြဟ်၊ ပ္ဍဲကဵုဍုင်လိုင်ဗၠဲ ကဝိမွဲတၟေင်တဏှ်၊ ကောအံင်ဇုညးကော် ကဝိဇၞော်နူအဓာန်၊ မင်ဍိက်ဓဝ်တုန်စိ ဇၞော်ကဵုပတိဘာန်၊ မထဝ်စိုပ်တိက္ခညာန် တဴထာန်ဟင်ဂါံတွံ၊ ကဝိဇၞော်နူအဓာန် နွံညာန်ဇၞော်ကြဳဇှ်၊ လတူသိသအဵု အဲဍိက်ယဵုစရဟ်၊ ဖဵုအဲဍိက်ယဵုတုန် အိုတ်ဂုန်ညးတံဂှ်၊ ညာန်အဲကဵုဂွံဒှ် ညံင်နဲသာ်ဂှ်ကၠာ၊ ဒၞါဲဒၞါဲအဲၜိုတ်ဟီု ဝိဝ်င်လီုမှာရာ၊ လ္ပကဵုဆိတ်လှောဲ တင်နဲဗီုပမာ၊ ဖျုင်ရဟ်သာဲက္တောဝ်ညး လုံရးစက္ကဝါ၊ ဖဍောင်ဝေင်ညာန်ဂ္ညိ နဲကဝိလင်ကာ၊ နဲကဝိမဒှ်ကြက် ဆက်ကၠုင်နူတမၠာ၊ ဗဒှ်လဝ်ဝါသၞာ ကဝိမှာတလလွဳ၊ နဲကဲမဂၠိုင်သ္တီု ညံင်ဗီုအိန်တက္ခဳ၊ အလုံဍုင်ရးကၠံင် ကဵုဒှ်ဒၟံင်သက်သဳ၊ စိုပ်ဂုန်မိဗြဴရတ် သရဿဝတဳ၊ ကဝိဗၠာဲတမိဟေင် ပယျတ်ဟွံကေင်လွဳ၊ ပညာလၜေတ်ဗေဝ် ညာန်ဘာန်အပၠေဝ်က္ဍင်၊ သၟိက်စံဝေင်ညာန်ညိ ဒမၠိဂၠါဲချပ်ဂြင်၊ ယွံဒေဝတဴသၞင် မင်မွဲသာသၞာ၊ ဗိုင်ရီုက္ဍံင်သွာညိ ကဝိဝွံဆန်ပညာ၊ မာံမံက်တိုန်ညးကော် နူကၠာဟွံဇၞော်မာ၊ ကြဴဝွံဇၞော်တိုန်အာ အစာခုတ်ယၟုတၞဟ်၊ ယၟုတြေံကၠေံဗဒန် တၟိပၠန်ဒုင်ဒယှ်၊ မင်ရောဂေါတုန်ဂှ် အ္စာခုတ်ဗ္ဒဟ်နာမ၊ ယမုမိခုတ်ကီု ကၠေံလီုအာတုဲရ၊ မာံရောဂေါဒုင်နာမ ကာလလၟုဟ်ဝွံ၊ ညးကော်မံင်ဂြုဂြု သာ်ဝွံရသေင်ဟာ၊ လောဘသီုဒေါသ မောဟဓဝ်ပိကၠာ၊ စဳပျးကိုဝ်ယးတၟး ညံင်သၟီတ္ၚဲဇၞးအန္ဓာ၊ နာဲယာန်စိင်ဆဒ္ဒန် လျးသာ်သြန်အပၠာ၊ ဒးဃောဂွံါသန္ၛာ နာံသာရဒဥတု၊ ဃောဗပေင်ပုဏ္ဏမဳ လျးဗ္စဳခၠင်တသု၊ သၟန်နက်သတ်တဝဳ ဗိုင်သအဳသၟီဂိတု၊ ပၠလျးသာ်သြန်အဴ ဗက်ဗ္ဒဴပၞာန်ဒမၠု၊ ဇက်တိုန်တ္ကံဇံမု လျးခၠင်တသုအူ၊ ပ္ဍဲဂၠံပေါက္ခရ ဂၞကျာ်ၜါဒၟံင်ဒ္ဂူ၊ မွဲသၠောံယာတ်သာ်သြန် မွဲပၠန်ယာတ်ချီုအူ၊ ပံက်မုက်ကအဳဒစး ကိုဝ်နာဲညးယာန်ဇၟူ၊ သ္ဋိုက်မၠိုက်စိုတ်လအိတ် ဂွံညာတ်မိတ်တမ္ၚူ၊ ပၞာန်ဒမၠုဒြေပ်ဗြူဗြူ ဖေက်သူဒြေပ်ကမၠေဝ်၊ ညာန်အဲကိုဝ်ခၠင်မြဟ် ပမာသာ်ဂှ်လေဝ်၊ ပ္ဍဲဒေါဝ်သဟာဲဂမၠိုင် ကိုဝ်ထိုင်သးအရေဝ်၊ ဝေါဟာမဒှ်ကြက် ပုံကၞက်သဂါပၠေဝ်၊ ကဝိနူကၠာစိ ဆန်လိက်အဒိကေ၊ ဇမောဝ်လင်ကာပၠန် ပိုတ်ဗျန်ဍေံဟွံပၠေဝ်၊ အဲတိတ်ဆန်ပလေဝ် မွဲဝါပၠန်သေင်ဟာ၊ ပုံဗြရတ်ဒှ်ကြက် ဆက်ကၠုင်နူတမၠာ၊ ဂကောံဗြဴယက္ခဳ ဣဏင်ကင်ရဳကၠာ၊ ဟိုတ်ဒါန်ဝါသနာ ကတ္တာဓိကာရ၊ ဂွံပတံလဝ်သေင်ဟာ ကိုပ်ကၠာဂၠိုင်ကိုဝ်ဘဝ၊ ဂွံသၟဟ်န်ရင်သ္ကံရ ဂွံခယျမွဲဖုန်သ္ဋဳ၊ ဟိုတ်ပတံလဝ်ပါရမဳ မွဲဒၞဳဂွံသၟဟ်န်၊ ပုံဗြရတ်ဒှ်ကြက် လဴဆက်ကၠုင်နူကဝ်တန်၊ ဂလာန်မဒှ်တင် အိုတ်ဗီုပြင်ဇၟာပ်တန်၊ အဲတိတ်တလးဆန် မွဲဝါပၠန်ရသေင်ဟာ။

ပ္ဍဲသက္ကရာတ်ဂှ် ကလင်ဟီုတွံအာ၊ လ္ၚီၜါကၠံတိတ်ဒှ် ထပှ်စှော်ပိကၠာ သွန်ပုဏ္ဏမဳ ဒိတှဳစှ်ပန်မြာ၊ ပယျာံလက်ကုံပြဲ နာံတ္ၚဲဗုဒ္ဓဝါ၊ သၟန်နက္ခတ္တ အကာသဂဵုမြဟ်၊ တွဳဗွိုင်သၟီစန္ဒြာ ၜါစှော်ၜါဟီုတွံ၊ ပယျာံတက်ပိဂှ် ဆန်ဗ္ဒဟ်လဝ်လင်ကာ၊ သဗှဥပဒ္ဒဝေ ဒုရေကဵုသ္ၚောဲခြာ၊ သတြုသီုသၞဝဲ ဘဲယဲဝေဒနာ၊ ကာယျကဵုတန်သိုက် ဇၟာပ်ပရိုက်ကဵုပါဲအာ၊ သဗှဒေဝတာ ဗိုင်ရီုသ္ဋံင်သွာညိ၊ ဒၞါဲဒၞါဲအဲၜိုတ်ဆန် ပိုတ်ဗျန်သီုယတိ၊ ပကဵုယောင်ထဍိင် ဝိဝိင်မှာရာညိ၊ ကြီုပုံဗြရတ်စိ ကိုပ်အဒိပထမ၊ ဆက်ကၠုင်နူတမၠာ ပြာကတ်ဒၟံင်ပ္ဍဲလောက၊ က္တဵုဒှ်ကောန်သၟီကၠာ ပ္ဍဲဍုင်ဗာရာန၊ ဗြရတ်ဒုင်ယၟု သာ်ဝွံနူမူလ၊ မိတ်တၞံဝါသနာ ကတ္တာဓိကာရ၊ ဒှ်ကောန်ဗြဴယက္ခ နာမဣဏင်ကင်ရဳ၊ တြဳဇှ်ပါရမဳ ပ္ကီုလွဳဇၞော်နုဘဴ၊ မိတ်ကွိုန်သီုအယော ဒှ်ဆောဂွံနှဴရဴ၊ ပုံနူတမၠာပြဲ အဲဍိက်ဂိုင်သြဟ်ပ္တဴ၊ ဗီုဥပ္ပမာအဴ ရဴရတ်ဒစိတ်ပၠ၊ ညံင်ဗီုမၞိက်ဂကူ ဇာတိဝိပူလ၊ တူဇမ္မုနတ္တ ပ္ဋုန်စုတ်အဇသ္ဋဴ၊ မၞိက်မပြဲတၞောဝ် ဗဵုဒ္ၚေါဝ်မရဴဂဴ၊ ဝုတ်ဒိုဟ်ရတ်ဂမၠိုင် ရေင်ဗိုင်ပနတ်နှဴ၊ လျးတွဳဗွိုင်အဴ ဗိုင်တဴမၞိက်တၞံ၊ ပုံနူတမၠာပြဲ အဲဍိက်ဇန်ပြေင်ပ္ကောံ၊ ရှ်ေသှ်ေရဴဂဴလဝ် ဓဝ်ကျာ်တြဲနူတၞံ၊ အတှအက္ခရရမ် ခဏံလဝ်သွက်သတ္တး၊ သ္ကဵုမိင်မန်ပိရး ဟီုပျးလဝ်ညိဟိုဲ။

နိဒါန်လိက်ဂှ် ဟီုတွံမွဲဝါ၊ လိက်ဗြရတ်သ္ကဲ ဟွံမွဲသေင်ဟာ၊ နွံဆပုံအဴ ညးလဴဂၠိုင်ဝါ၊ ဂွံမိင်တဴဟေင် ရောင်ဟွံသေင်ဟာ၊ လိက်ဝွံတုန်ရ ပထမကၠာ၊ ကျာ်ဇၞော်ကံဂဵု နွံကဵုပညာ၊ နန္ဒသာရ ဆန်ပၠလဝ်ကၠာ၊ ကံဂဵုသင်ဇၞော် လုပ်ဗော်ဇရာ၊ ထပှ်စှော်ဒ္စံါ ဂွံါအယုက်ကၠာ၊ ဟိုတ်ဇၞော်လောန်ရ မောဟဂၠိုင်အာ၊ ဟီုကၠာဒှ်ကြဴ ဟီုကြဴဒှ်ကၠာ၊ ဇမောဝ်လင်္ကာ ဂိုန်ဝေါဟာဆန်၊ ဟွံပိုင်ပြဳအိုတ် ယတိပိုတ်ဗျန်၊ ဆချပ်ဂွံဂှ် ဂိုင်လပှ်ဆန်၊ ဇမောဝ်လင်္ကာ ဟွံညဳသာပၠန်၊ ဆစိုတ်မွဲတန် ဆန်အာလောဲလောဲ၊ ထုဲကြာန်လၜက် ညံင်ပြေင်တက်ၜဲ၊ ပိုတ်ဗျန်ပၠေပၠေတ် ဂေတ်ညံင်ဍာ်ဝဲ၊ အဲဂွံညာတ်ပြဲ ပ္ဍဲစိုတ်ဂြံဂြ၊ ခါမချပ်ရံင် ဂွံသံင်ဝေဂ၊ ကဝိတမၠာ လောန်အာအိုတ်ရ၊ ပ္ဍဲထာန်ဒေသ ဋ္ဌာနရးမန်၊ လိက်ပတ်မဂး သွက်ညးဂွံဆန်၊ ဟွံမွဲသေင်ဟာ ဗတ်ဘာသာမန်၊ ဂိုင်တော်ဆမွဲ ပ္ဍဲစိုတ်အဲပၠန်၊ ဒှ်ဂကူမန် ကဝိလောန်အာ၊ သွက်ဂွံဆန်ဗ္ဒဟ် လမုဟ်ဝွံမာ၊ ဟွံမွဲလှင်လှင် အိုတ်လင်ဂတာ၊ အဲဗ္စာရဏာ နဂၠးညာဏ၊ ဂွံညာတ်ကေတ်ရ ကာလဂှ်ပၠန်၊ အဲလေဝ်ဇၞော်အာ ဇရာကၠုင်ညန်၊ တြဴစှော်တရဴ အယုက်စဴတန်၊ ဓဝ်မောဟပၠန် ဍေံဂၠုလောန်အာ၊ ဟီုကၠာဝိုတ်ကြဴ ဟီုကြဴဝိုတ်ကၠာ၊ ချပ်ဗ္စာရဏာ သိင်သာဂၠိုင်လောန်၊ ဒၟါဒှ်သာ်ဂှ် လိက်လနုဟ်ဆန်၊ ဆန္ဒလင်္ကာ ဂိုန်ဝေါဟာမန်၊ ဥပ္ပမာပြဲ ဥပ္ပမဲပၠန်၊ တီကေတ်မွဲတန် ဗိုန်က္ညန်က္ဋင်ပြ၊ ဆန္ဒလင်္ကာ ဘာသာမညှ၊ ပ္ဍဲစိုတ်အဲသွံ တီညာတ်ကၠောံသ္ဋ၊ နဲကဝိပၠ ဆန္ဒလင်္ကာ၊ ကၠုတ်တိုန်လမှ် မြဟ်ပ္ဍဲကြေဝ်ဏာ၊ လိက်ဗြရတ်ဂှ် ကၠိုက်ကၠဟ်လောန်အာ၊ နွံမင်ဗၠာဲမွဲ ဟီုကဵုအဲကၠာ၊ ဒုင်ယမုရ နာမဆာံပျာ၊ ကဵုဂဟဵုညိ တမိမွဲဝါ၊ ယတိပိုတ်ဗျန် ဆန္ဒလင်္ကာ၊ ဂလာန်တင်တှ် တဝှ်အစာ၊ ကဵုသၟဟ်ညဳသာ စကာအဲပၠန်၊ ဇမောဝ်လင်္ကာ ဂိုန်ဝေါဟာမန်၊ အဲဆန်ပ္ညဳဇန် ညံင်ဇမန်ဂွါ၊ ဟွံကဵုကၠိုက်ကၠဟ် သၟဟ်န်ညဳသာ၊ အဲဆန်ပ္ညဳဏာ ညဳသာသၟဟ်န်၊ သွက်ပတူဇန် မဆန်လဝ်ရောင်။ ။ ခမှောင်ခမှောင်ဖျးညံင်ပၞဴ၊ ဒဵုအရှန်ဗြဴ၊ ကဵုနာဲစဴဒှ်၊ ဂှ်လံအာရောင်။ ။

အကြီုဍုင်ဗာရနသဳ ပ္ဍဲပုံဗြရတ်ဣဏင်ကင်ရဳ

ဍုင်မွဲအဟံ ဒှ်တဴအံသဝ်၊ ဒဒှ်စလာဲ ပိုဲဂၠါဲဟီုလဝ်၊ ပင်မှိင်ညိရ ထံင်သောတက္တောဝ်၊ သၞာင်သာင်သၠုင် ဆေဝ်ရေဝ်ဍုင်သွဝ်၊ ဇမၠိင်လၞင် ပန်ကၠင်ဓဝ်ဓဝ်၊ အနာံစှ်ၜါ ယောဇနာက္ဋဝ်၊ ဒတ်ဂပန်ညဳ ရးတဝဳဗဝ်၊ ထၜိုင်ကၟာင် မံက်သာင်ဂတဝ်၊ ရာဲပတ်ဒၟဗ္ဂာ ထမှောင်ဇာထဝ်၊ ပြယေန်ရာင်ခၠင် ပတင်ရေင်ဗဝ်၊ ကပလောပြး ကဂရးကျဝ်၊ ကၟာင်ထပှ်ထပ် သမြပ်သဝဝ်၊ သ္တိင်ဒရိင်ဗျာင် မံက်သာင်ဂတဝ်၊ ဖျေံရောံပမင် လဗိုန်မင်လဝ်၊ အဆင်အဆင် သ္ၚိကၠတ်ဒြင်ထဝ်၊ ချေံအသာချေံ မံင်ပလှ်ေဗဝ်၊ စိင်အသာစိင် လွိင်ဒြင်စဝ်၊ ကွဳအသာကွဳ တွဳဗဝ်သအဝ်၊ ဟွံတီကဵုဗၞတ် လမိဟ်ဆတ္တဝ်၊ ထၜိုင်သ္ဇိုဟ်လှဲ နူဗစဲကဝ်၊ ကၞုဟ်ကၠဴရေင်ဗဝ် ဒြဟ်ဗွဝ်ကျာံ၊ ဍာ်သ္ဇုင်ကၠိုဟ်သၞာံ သမုင်သာံဖြာ၊ ဒကှ်ဥပ္ပဵု သီုကဵုဗၞူသွာ၊ လိုင်ပြေင်ဓရှ် ဍောင်ဒကှ်ၜါ၊ ဂုန်ဟင်ရံဒွေင် တၞံတရေင်ဗ္ဂာ၊ ဗရံက်ဒမိဟ် ရေင်စှ်ေဇိုင်လှာ၊ ပဏိဟ်ပြာင်ထိုက် တ္ၚိုက်ဂလာ၊ ဇၞော်ကဵုအဒ္ညာ ဒယှ်ပြာကတ်၊ ကတဵုဒှ်လၟိုန် ဗစဲပိုန်သတ်၊ ညိဟွံဒးဒွိင် စိင်ရတ်ချေံရတ်၊ နန်ထဝ်တုန်သၟတ် ကၠတ်ထဝ်ရေင်ဖိ၊ ပြယံက်ဂညိ ပြယေန်သ္ၚိဇာ၊ တဏာဲဗြော်သ္တေင် ကွက်ရေင်တဲလှာ၊ ကဂရးမြော ကပလောဗ္ဂာ၊ မြထ္ၜူအမၠံက် မေဖံက်အကြာ၊ သေဏာတ်ဒေါန်အံင် ဗၞုဟ်ဂဒံင်ဗ္ဂာ၊ စိင်ဇၟူစှ်ေကၠေင် ဗဂေင်ဒြင်ၜါ၊ သ္ဒိုင်ကတောဝ်သၟတ် မတ်ဗဟူရာ၊ ချေံမခိုဟ်ဇိုင် ပ္ဍဲရိုင်မံင်ဗ္ဂာ၊ သရာဲဂၠိုင်ဂၠင် ရပ်သ္ဇင်တဲၜါ၊ ဇရာံဖလူ တိုက်ထဝ်သြန်ဗ္ဂာ၊ သကိုပ်ပၞာန်ဇၞော် အမာတ်ဇၞော်ကၠာ၊ သီုဒဴဗညာ သေဏာပတိ၊ သေထဳသမ္ၚေဟ် သ္ဂေဟ်ရတ်နိဓိ၊ ပိုန်နဲဂၠးတိ ဝိသုန္ဓရာ၊ တၞောဝ်သိုက္ခမာ နွံဇာသြဲလျး၊ သ္ဂေဟ်ယဿပတ် ပိုန်ကၞတ်ညး၊ တြဳဇှ်ဇၞော်ကၠး ဍုင်ပိုန်ရးလှဲ၊ သၟီကၠံမွဲဂှ် ဒှ်သကေံတဲ၊ ဍုင်ဗိုန်ရးလှဲ ဒၟံင်တဴဗွဲလွေင်၊ ကၠံမွဲဘာသာ ဒၟံင်ဗ္ဂာတရေင်၊ သီုဝေါဟာပန် တ္ၜန်တ္ၜောဲယိုက်ဂၠေင်၊ သၟဟ်သၟန်ဇၟာပ်တန် သဗာန်ဒ္ဂူသ္တေင်၊ သရက်ရေသူ မွဲသၞူဗ္ဂာရေင်၊ ချူမတ်ဒါတ်ထဝ် ဒရိင်ဗဝ်သ္တေင်၊ သွံဗၞိက်ဗဂါ ဖျာဆက်တရေင်၊ ကျိုင်ကျဝ်အာကၠုင် သ္ဇုင်ဂွုယာတ်ဖေင်၊ ၀တ်ညးဍုင်ဇၞော် ဗော်ကၞိင်ကိုဟ်သ္တေင်၊ ဂၠါဲဟီုဟွံမာန် နဳဒါန်မတၟေင်၊ ရာင်ဆာဲသန်ဟေင် ကသူကၞေင်သတ်၊ မနွံဂုန္နာ ဂကူပြာကတ်၊ ပါန်မုတ်ပါန်ခဳ ဗဳသ္ကဝ်လေပ်သၞတ်၊ ပရန်ဒက်ပ္တုပ် ရုပ်ဗုဒ္ဓရတ်၊ ဒေါင်ပၠဳသေသာတ် ဒမာတ်လေပ်ကွတ်၊ လ္ၚဵုတာန်တပ် လ္ၚဵုဗဂပ်ဟတ်၊ လမာန်သြင်ကြုင် မာန်နုင်ဇၞော်သွတ်၊ ယန်သေဝ်ဇမိင် တၞိင်ဒးဗၞတ်၊ ကၠောန်ဗၞိက်ရေက်တင် ဇၟာပ်တလင်ကွတ်၊ သၟာတွိင်တွိုက် အခိုက်ပြာကတ်၊ သၟာမြမောဝ် မွဲတၞောဝ်လေပ်ကွတ်၊ ဇခဳစရင် တတ်အင်ရပ်ခတ်၊ ကဝိကာပ်ဗျ ဆန္ဒလောန်ဗၞတ်၊ သၟာဂနန် ကတ်ဂၞန်ပြာကတ်၊ သဝ်လေပ်ဗိန္ဒော ဟောရာကိုန်သၟတ်၊ ဗဟူသိပ္ပ ဂၠိုင်တလကွတ်၊ ဓဝ်ယာလောန်ဗၞတ် ကမၠတ်မတာ၊ လၟေင်လၟေင် ပရေင်သံင်သာ၊ လမေန်ကုန်ကွ သဗ္ဗဂၠိုင်ရာ၊ မတ်ဂၠုသ္ဋိုင်ကၠဴ နွံတဴသ္ဇိုင်သာ၊ လေဝေါင်လဗင် ကာပ်ဗျပၠင်ကျာ၊ အဘိက်ခဍန် အဘိန်ကညှာ၊ သမၠီုတမြံ မၞိဟ်သ္ပံသာ၊ ဗြဴသရာဲဍုင် သမုင်သူရာ၊ ဗျဵုစာင်ပးခတ် ကွတ်သ္ပံသာ၊ မၞိဟ်ဒွိုက်မၞိဟ်စန် မၞိဟ်ဘန်မၞိဟ်ကျာ၊ မၞိဟ်မရုန်မဵု မၞိဟ်ဗျဵုအကြာ၊ လဗင်အကြု ယမုဂၠိုင်ရာ၊ သမာကြေက်ကီု မၞိဟ်သီုသုဇာ၊ ကတ်ကြာဲဂရောတ် ၜံက်ဇြောတ်ကၠေံကျာ၊ သၟာပတ်ပကေင် ဣသိသေင်ဟာ၊ မၞိဟ်မဒှ်တၞောဝ် ဒတောဝ်ဂဟာ၊ သာံဗြဴသလောင် ဗြဴဒှ်ဒေါင်ယာ၊ ဗဵုလဗးသ္တီု အိန်သ္ဂီုသာဓာ၊ သပ္ပရိုဟ်ကီု သနာဂီုဗ္ဂာ၊ တြုံသယာထဴ ဗြဴဒှ်မိန္ဓာ၊ လေပ်သၞဲနိမိတ် ပြောဟိတ်အစာ၊ ဗြဴဒှ်ပြဘာတ် သေသာတ်မွဲသာ၊ ကပ္ပဳယျသင် ဂနင်လိုက်ဗာ၊ ဗမၞးဝေါင်သ ဘာရဒွဇာ၊ အခဝ်မသုန် ဂုန်ဒစိတ်မြာ၊ နွံသိတ်ထပှ် ဓုတင်စှ်ၜါ၊ ဗိုတ်ပိဗေဒင် ကၠောံသြင်ပြာထာ၊ သင်အရဳယ နွံဓုရၜါ၊ သဳပန်ဓဝ်ပန် ဟွံဂွံခၠန်ခြာ၊ ပ္ဍဲသတ်တြုံဗြဴ သြဟ်ပ္တဴမေတ္တာ၊ ညံင်သွဝ်တမှိင် တာဝတိင်သာ၊ ဟွံမွဲကနှောဝ် သ္ဂေဟ်သွဟ်ဓဝ်ယာ၊ ဟွံမွဲဒမၠ ကမၠတ်မတာ၊ ဒယှ်ပြာထာ ညံင်လအာသွဝ်၊ ဟိုတ်ဂွံမင်မွဲ သတ်ဗဗွဲဓဝ်၊ ဒယှ်တမ္ညဝ် ဇၞော်အံသဝ်ဆန်၊ ဖဳတဝဳတ္ၜန် ဟွံတီနန္တ၊ အိန်သ္ဂီုဂ္ညိဂ္ညာတ် ဂၠုင်က္ၜင်နာတ်တြ၊ မှာနာဂရ ဗာရနသဳ၊ သက္ကုကသဳ ပိုန်သီုတြဳဇှ်၊ အလုံဒိုဟ်စှ် ဒယှ်ကမြဴ၊ သ္ကိုပ်ဂြိုပ်ဂ္ညိဂၠဴ ရာင်ဆာဲတဴဟေင်။ ။

သၟီမပ္ကင်ရင်ဍုင်ဗာရနသဳ ပ္ဍဲပုံဗြရတ်ဣဏင်ကင်ရဳ

ဍုင်ဂှ်အဟံ ဗဗွဲဓမ္မ၊ ဂၠိုင်အဆက်ရောင် တၞောဝ်လှောဝ်ဝေါင်သ၊ ဒုင်ယမုကီု ဗြီုမဒတ္တ၊ မနိစိတြ အနက္ဃဗြဴ၊ ပ္ကင်ရင်မင်တဴ ဇၞော်နုဘဴလွဳ၊ ဗိုန်ဒၟံင်အနဳ ပဉ္စသဳလာ၊ ဒါန်ဝါသဏာ တာဓိကာရ၊ သၟီၜါတြုံဗြဴ ပ္ကင်ရင်တဴရ၊ ဗစဳခဏ ဇၞော်တေဇက္ဋင်၊ ဒယှ်ကၠဴထင် ဒေါဝ်ဂနင်ပိုန်၊ ညံင်လျးအရှိုန် ဒတိုန်စရာဲ၊ သၟီတြုံဗြဴၜါ သာဓာရာင်ဆာဲ၊ ပ္ကင်ရင်နန်ထဝ် ဗွဝ်စရာဲ၊ စသိုင်အရီု သီုၜါဂေါဝ်ဆာဲ၊ ကောံဗြဴမှောင်မှ ညိဟွံဂွံသြာဲ၊ စှ်တရဴလ္ၚီ သအဳမြီဂေါဝ်ဆာဲ၊ စသိုင်အာဲကၟာဲ သၟီနာဲနန်လွိ၊ ဒေါဝ်မၞိဟ်သွးဗော် ဇၞော်ကဵုဣဓိ၊ ပ္ကင်ရင်တဴစိ နန်ဘိသေခ၊ ဍုင်ဒတန်ကဝ် ဗွဝ်ယဿ၊ ပ္ကင်ရင်တဴရ ကာလဂှ်တုန်။ ။

ပရူသမ္ၚေဟ်ၜါတြုံကဵုဗြဴ မကလိဂွံကောန်ဗြဴဝုတ်ထပှ်

ြကိုက်သၟိက်ကဵုဒှ် တဝှ်စလာဲ၊ လၟေင်ပုံကီု ပိုဲဒးဟီုဂၠါဲ၊ ဒဒှ်စလာဲ ပိုဲဂၠါဲဟီုတွံ၊ ဇရေင်ဍုင်ဂှ် ပသာ်ဒှ်လွာ၊ နွံနဳဂီုမွဲ ပ္ဍဲထာန်ဂှ်ကၠာ၊ မိပ်သ္ၚိပ်ရာင်ဆာဲ လောန်ကာဲပြိုက်ဖာ၊ ပ္ဍဲကာလဂှ် ဗဒှ်သာ်လွာ၊ ဂဟပ္ပတိမွဲ ပ္ဍဲကွာန်ဂှ်ကၠာ၊ ညးၜါတြုံဗြဴ ဒၟံင်တဴညဳသာ၊ သ္ဋိုက်မၠိုက်သၟဟ်န် တန်မွဲသၞာ၊ သီုတြုံဗြဴၜါ ကာလဂှ်ရ၊ ဇၞတ်မဒၟံင်တဴ လကဴဟေမ၊ ဂဟပ္ပတိအဴ ဗြဴအနက္ဃ၊ ရန်ဇနစပ် တန်အာဂပ္ဘ၊ ဟွံဂွံလံကၠာ ပေင်စှ်မာသ၊ သၠးဂပ္ဘ ကာလဂှ်ကၠာ၊ ဂွံကောန်ဗြဴမွဲ ပြဲသန်ရုပ္ပါ၊ မိပ်စိုတ်စရိုတ် အဵုဇိုတ်မှောဝ်ဇာ၊ ဇၞတ်လွဳပရာ ကာလဂှ်ပၠန်၊ ဇၞော်အာဖောင်ဖောင် ညံင်ဍောင်ပ္ကဴယန်၊ ပိအခါပၠန် ပ္တန်အယုက်ကၠာ၊ ဟွံဂွံလံပြဟ် နဲဂှ်သေင်ဟာ၊ စှ်ဂိတုဒး သၠးဂပ္ဘါ၊ လၟေင်လၟေင် ပရေင်လိုက်ဗာ၊ ကောန်ဗြဴထပှ် သၟဟ်န်ညဳသာ၊ က္တဵုဒှ်မွဲဂၞဴ ဗြဴသိုက္ခမာ၊ ဇၞတ်လွဳပရာ ၜါတြုံကဵုဗြဴ၊ ဇၞော်အာဖောင်ဖောင် တုပ်ညံင်ဍောင်ပ္ကဴ၊ ရုပ်သာ်ၜတ်သြဴ ညံင်ရဴညးသောန်၊ သီုကောန်ထပှ် ညဳသာသၟဟ်န်၊ ခုတ်ယမုပၠန် ကောန်ဂၠုသေင်ဟာ၊ မိၜိုဟ်စိုတ်ကၠာ နာမယမု၊ ဒစှ်ေဂှ်ရ ယၟုဍောင်စမ္ပာ၊ မိဍောင်လင်ဟေင် မွဲရသေင်ဟာ၊ မွဲဍောင်ပုပ္ဖ ခုတ်နာမကၠာ၊ မွဲဍောင်ကသဝ် ခုတ်လဝ်သေင်ဟာ၊ ဒဒေံမွဲကၠာ နာမပ္ကဴတင်၊ ကောန်ဗြဴထပှ် စရာဲသၟဟ်ခၠင်၊ နွံကဵုအိန်ရဳ ကျာ်သြဳဇၟာပ်တင်၊ ထမှိက်မသုန် ဂုန်တရဴကၠင်၊ ဍိုက်ပေင်ဇၟာပ်တင် လၟေင်လက်သန်၊ ပေင်လက်သန်ဗြဴ တရဴစှော်ပန်၊ ဂပ်ဂေါဝ်လောန်ထောန် ကောန်ဗြဴထပှ်၊ ထပှ်မွဲဂၞဴ ကောန်ဗြဴက္တဵုဒှ်၊ ၜါတြုံဗြဴဂှ် ဗဒှ်သာ်လွာ၊ ဗဵုဒ္ၚေါဝ်တဴပၠန် ရုပ်ကောန်ဗြဴကၠာ၊ ပ္ဍဲစိုတ်ညးၜါ ပသာ်လွာသ္ဒဟ်၊ ဇြဟာန်တပိုဟ် တလိင်ဒိုဟ်စှ်၊ စိုတ်ညးၜါဂှ် ပသာ်ဒှ်ဗီု၊ လုံတ္ကံပန်ဟာန် အိုတ်ထာန်မဇ္ဇျီု၊ ညံင်ဂွံပိုင်လဝ် အသၟဝ်တဲကီု၊ ပ္ဍဲစိုတ်သ္ဋိုက်ဆာန် ဇြဟာန်ဂလီု၊ နဲဂှ်တုပ်ဗီု ပ္ကီုနင်ပမာ၊ ဒှ်ပ္ဍဲစိုတ်အဴ တြုံကဵုဗြဴၜါ၊ သီုကောန်ထပှ် သၟဟ်လက္ခဏာ၊ သၟဟ်န်ညဳသာ ကာလဂှ်တုန်။ ။

သမ္ၚေဟ်ဗြဴကလိသ္ကန်အာတုဲ သမ္ၚေဟ်တြုံကေုာံကောန်ဗြဴဝုတ်ထပှ် ဒှ်တဴကၠင်ဟဳ

လၟေင်ဒဒှ် တဝှ်ဖဵုဂုန်၊ ၜါတြုံကဵုဗြဴ ဒၟံင်တဴမွဲဖုန်၊ ဂၠိုင်သၞာံအခါ ကာလဂှ်တုန်၊ ညးၜါမွဲဖုန် တုန်ဆန်ကၠုင်အာ၊ ကြိုက်သၟိက်ကဵုဒှ် တဝှ်သံင်သာ၊ ၜါတြုံကဵုဗြဴ တဴမွဲသၞာ၊ ကံအတိက်ဟေင် ဗက်ကၠုင်သေင်ဟာ၊ က္တဵုဒှ်ယဲပၠန် ဂၠိုင်သန်ရောဂါ၊ ဗြဴမွဲဇကု မစ္စုတံင်ဏာ၊ ကာလဂှ်ကၠာ ပသာ်လွာသ္ဒဟ်၊ တြုံယာံရေဝ်ရောတ် ရမတ်က္ဋဟ်ဟ်၊ သီုကောန်ထပှ် ဒှ်တဴကၠင်ဟဳ၊ ယာံတဴရေဝ်ရောတ် ရမတ်ပြဟ်ဏှဳ၊ ထဴအိုတ်ကသပ် ဗန်တဲကၞပ်သ္ၚဳ၊ သီုကောန်ထပှ် အဝဲသၟဟ်ညဳ၊ တက်သြိုဟ်ဆာံဆာံ ဂတေဝ်ယာံဖဳ၊ စံင်တူပူဆာ လ္ၚာပ်လ္ၚာကၠင်ဟဳ၊ ယာံတဴရေဝ်ရောတ် ရမတ်ပြဟ်ဏှဳ၊ ဗှ်ဗဒေသဳ ကၠင်ဟဳတဴတုန်။ ။

ဟးလအိတ်ရုပ် တုပ်သြဳစန္ဒော၊ တူဍာန်ဝါယျော ဇက်လမောပျး၊ တဝါ်လုတ်အာ ပါရာဟုဂြး၊ သြိုဟ်ကောဒကး ၜါလွးရရော။ ။

ဟးဂွိုင်ကျာ်သြဳ ဗနဳအယော၊ ကောကဵုနာဲရော ဂဟောသၟဟ်န်၊ ကောန်ဗြဴထပှ် က္တဵုဒှ်မွဲဒွန်၊ ဂုန်ကျာ်သြဳနန် အိုတ်သ္ကန်ရရော။ ။

ဟးဇံမုနတ် တ္ၜတ်သြဴအယော၊ ဟကေင်ခြာဆော ကောကဵုနာဲအဲ၊ ထောံကောန်ထပှ် ဟွံဗှ်ညိမွဲ၊ ဂုန်မိထဝ်ရဲ အိုတ်ဒဲရရော။ ။

အဵုတလသ္ၚိ ဆဒေံကဵုကော၊ ဒဇန်ဒေံရော ထောံကောယောန်ဒဴ၊ ကဵုကၠင်ပှ်လှ် ထပှ်မွဲဂၞဴ၊ ကောဂုန်ဒေံဗြဴ သ္ကန်ဇဴရရော။ ။

ဒဇန်ဒေံဗြဴ နာဲဒဴထောံကော၊ ဗၞတ်မွဲပါင်ရော ကောသ္ဂောံခၠေဝ်သှ်၊ ဒဇန်ဒေံပ ပဝမ္ၚဟ်၊ ပသ္ဂောံခၠေဝ်သှ် မွဲပါင်သ္ဒဟ်ရော။ ။

ဟးမိတ်ဂွိုင်အဲ မပြဲအယော၊ ကလင်လဝ်ကော ကဵုကောဒေင်ဗျောံ၊ ကောသ္ဒးဇြဟိတ် ဂုန်မိတ်ထၜေါံ၊ မူခါသ္ဂောံကောံ ဗၠးဟုံဇြရော။ ။

ဟးလအိတ်ရုပ် တုပ်သြဳစန္ဒော၊ ကလင်လဝ်ကော ကဵုကောသုင်ဂျိ၊ နိဿင်သ္ဗသ္ကဟ် နာဲဟွံဗှ်ညိ၊ ကဵုကောသုင်ဂျိ ဂုန်မိရရော။ ။

အစဳရေင်စွံင်ဇွသမ္ၚေဟ်ဗြဴ

ပ္ဍဲကာလဂှ် ပဒှ်လက်သန်၊ ယထဴဂှ်ပၠန် လ္ၚုလ္ၚန်လောံလာဲ၊ သ္မမစံင်တူ ပူဆာဂုန်နာဲ၊ သ္မမဇြဟိတ် ဂုန်မိတ်စရာဲ၊ သ္မမစံင်တူ ပူဆာလောံလာဲ၊ လ္ၚစိုတ်ဂဵုဍာဲ လောံလာဲဟောံဇြ၊ ဂတးချပ်ရ ကာလဂှ်ကၠာ၊ ဆသတ်မဒၟံင် ပ္ဍဲခြိုင်သံင်သာ၊ ဒဒိုက်ထပှ် တဝှ်ဗုဒ္ဓါ၊ ပါင်ကျာ်နာဲညး ဇမၞးပၞာန်မာ၊ သုက္ခံဒုက္ခံ ဒုရေသံင်သာ၊ မွဲဂှ်ဇာတိ မွဲသ္ၚိဇရာ၊ မွဲဗျာဓိရ မာရဏကၠာ၊ ဝွံအတ်ၛှတ္တ ဒှ်ပန်ပြကာ၊ မၠေံဒးရေင်ကာန် ဆာန်ဒးသြာဲခြာ၊ ဝတှုသၟိက်ဂွံ ဟွံဂွံသေင်ဟာ၊ ဝွံဒဒိုက်ကၠာ အဘာရပိ၊ ကၠာတေံပန်ဂၠိ ကြဴဝွံပိရ၊ ဒဒိုက်ထပှ် တဝှ်ဗုဒ္ဓ၊ တမံအဲညး ဒဴဟွံဗၠးရ၊ ချပ်ဂြင်တော်ဆ ပ္ဍဲစိတ္တဇဴ၊ ညာန်ဘာန်တြုံသာင် ညံင်ဗီုပၞာင်သ္ဋဴ၊ စဳပျးကၠေံသၟတ် ပ္ဍဲအတ္တဘဴ၊ ယးတမးတဴ ညံင်ရဴပၞာင်စဳ၊ တြုံတလလွဳ တုဲစဳရေင်လဝ်၊ သွက်ဂွံစံင်ဇွ အဂ္ဂဗြဴသွဝ်၊ စဳရေင်လဝ်ကၠာ ဂဝ်တလာထဝ်၊ သ္ၚိကၞံင်ဟေင် ပြဟ်စဳရေင်လဝ်၊ သွက်ဂွံကဵုဒါန် ရာန်နင်ဗဝ်သ္အဝ်၊ ဖျေံဇွဗြဴသွဝ် စဳရေင်လဝ်ရ၊ ကဵုနိမန်နင် မဟာသင်္ဃ၊ သင်ဗျုသင်ဇာ သ္ကဵုအာဂတ၊ ညးဂမၠိုင်ကၠာ တွာ်အာကြဴရ၊ အာစိုပ်သုသာန် ထာန်မာရဏ၊ ပ္တိုန်သ္ၚိကနှံင် ဒၞါဲညးစံင်ဇွ၊ တူထာန်ဂှ်ရ ဇွပ္တိုန်စွံလဝ်၊ က္ညနင်သင်အဵု ကဵုဒါန်သဳဓဝ်၊ ပဉ္စသဳလ ဂုန်ပအံသဝ်၊ ဒဂိုန်သဳတုဲ ဟွံသၞုဲက္ဍဝ်၊ ပတိုန်ပၟတ်ကျဝ် ဂဵုသဝဝ်ဂြင်၊ တူအိုတ်လှင်လှင် ညံင်လင်ဂတာ၊ သြိုဟ်ပမတ်ကၠာ ပၠိုတ်အာဗတ်သၟ၊ လပှ်ဇုတ်မာ ကာလဂှ်ရ၊ ဇုတ်စုတ်သၠဇြဲ ကြဴကြာတ်ယဲသြ၊ ဍာ်မိတ်ကီုအဴ ဍာ်သတ်ဗြဴရ၊ အဵုတလသ္ၚိ ကောမိဟောံဇြ၊ ဇုတ်နာဲစိုပ်တိ မိဝိုတ်အဲရ၊ ကဵုကောဒေင်ဗျောံ ကဵုကောဟောံဇြ၊ ကဵုကောလ္ၚာပ်လ္ၚာ ဂၠိုင်သပါထ၊ ကဵုကောဒေင်လ္ၚုင် သုင်ဗဗောဓ၊ ကဵုကောဇြာဲသ္ကဟ် ဗှ်နာဲမှာဲယျ၊ စံင်တူဟောံဇြ ဂၠိုင်ထသပါ၊ ကဵုကောသိင်သာ လ္ၚာပ်လ္ၚာတူယဲ၊ ကဵုကောသ္ၚိတ်သ္ၚဲ တူယဲဒေင်ဗျောံ၊ ကဵုကောဇြဟိတ် ဂုန်မိတ်ထၜေါံ၊ ကဵုကောဇြဟောံ လောံလာဲသ္ၚိတ်ဇြ၊ ကဵုကောစံင်တူ ဂၠိုင်အြဂြေင်သ္မ၊ ကောအိုတ်ဂန္ဓ ဂုန်နာဲရရော။ ။

ယထဴ ဂွံမိတ်တၟိတုဲ မဒးပၠေဲကၠေံကောန်ဗြဴဝုတ်ထပှ်

ပ္ဋဲဂှ်ယထဴ ယာံတဴလောတ်လော၊ တိုပ်ဇုတ်တုဲရော ကလောဝေါင်သ၊ ကလေင်စဴရ ထာဏသ္ၚိထာန်၊ လၞီလောန်လာန် အာန်တၞာန်စိုတ်၊ ရိုဟ်ဒဒှ်တ္ၚဲ တူယဲလျးပၠိုတ်၊ စံင်နှာပ္ဋဲစိုတ် ဟိုတ်နူဗြဴယာန်၊ စိုတ်အာန်တၞာန် လောန်လာန်က္ဋင်သန်၊ ပ္တန်စိုတ်ဟတန် ဂၠိုင်သန်စံင်နှာ၊ ဂၠါဲမိတ်တၟိ လုံသ္ၚိဂၠါဲအာ၊ ဆဵုလဗြဴမွဲ ပ္ဋဲကွာန်ဂှ်ကၠာ၊ ဂလာန်စံက်ထေံ လှေံလှန်နင်ဏာ၊ ဟဂွံလံပြဟ် ကာလဂှ်ကၠာ၊ စိုတ်သၟဟ်ဒှ်မွဲ ပ္ဋဲဂှ်သေင်ဟာ၊ ဒှ်မွဲဂကောံ မွဲဂၠံညးၜါ၊ သၟဟ်သၟန်ညဳသာ သမ္ဘာတၟိ၊ စိုတ်သၟဟ်ဒှ်မွဲ ညးၜါမွဲသ္ၚိ၊ ဒုင်ဖျဴနင်စိ သ္ၚိဇကုပၠန်၊ ကသိလလဴ ဒၟံင်တဴသၟဟ်န်၊ ညဳသာလောန်ထောန် တန်မွဲသၞာ၊ ကၠောန်စဂူဗ္ၚ ပဇွောံအဟာ၊ လံလောန်ကာဖာ ကာလဂှ်ပၠန်၊ သီုကောန်ထပှ် အဝဲသၟဟ်န်၊ ဍေံဂွံညာတ်အိုတ် ပ္ဋဲစိုတ်ဍေံစောန်၊ ဗြဴသၟာ်ဒဇန် စိုတ်ပၠန်ဣိဿာ၊ ဍေံဂၠါဲချပ်ပၠေင် သၟိက်ကဵုလေင်အာ၊ ပုင်တွာင်စဏ သဗှအဟာ၊ သစ္ဆုတုန်အဴ ဗြာတ်တ္ၜဴနာနာ၊ ကောန်ဍေံတုန်ရော စဖဲဟောဒြာ၊ ကောန်ဗြဴထပှ် ပဒှ်သာ်လွာ၊ ဟီုတ္ၜေဟ်ဒေါန်လက် ပါင်ညံင်စက်ကျာ၊ စကာညံင်ဍိက် ဗြဴဒၟိက်မိစ္ဆာ၊ ကောန်ထပှ်ရ ဗဵုစညးကၠာ၊ ၚိတ်ဆဍာ်ပါင် ရမျာင်သာသာ၊ ဗှ်သၞာအဴ မိဂၞဴသေင်ဟာ၊ ရမတ်ဇွောဝ်ဍုက် ပေင်မုက္ခဝါ၊ စံင်တူပူဆာ လ္ၚာပ်လ္ၚာသုင်ဂျိ၊ ညာတ်ညးစဂှ် ဗှ်တိုန်စိုပ်မိ၊ ပ္ဋဲစိုတ်ညံင်ဂျိ ဗှ်မိကျာ်ဂန်၊ လၞီလောန်တဲ ပ္ဋဲစိုတ်လ္ၚုလ္ၚန်၊ ယာံတဴသြောန်သြောန် ကောန်ဗြဴထပှ်၊ ပ္ဋဲဂှ်လထဴ စဴစိုပ်သ္ၚိပြဟ်၊ ပ္ဋဲကာလဂှ် ပဒှ်သာ်လွာ၊ လဗြဴစုတ်ရ ပုင်သွအဟာ၊ ပရာပ်ကဵုထဴ လဗြဴပၠင်ကျာ၊ တုဲထဴဟာပ်ပုင် ကောန်ကၠုင်ဟောဒြာ၊ ဗဵုမအံက်စ ကာလဂှ်မာ၊ မအံက်ညာတ်ကောန် ကော်ပၠန်နင်ကၠာ၊ ယွံကောန်ထပှ် သၟဟ်လက္ခဏာ၊ ညံင်ကၠုင်ဟာပ်စ ကောံမညိကၠာ၊ ချိုန်ဂွံမိင်ပြဟ် ကောန်ထပှ်မာ၊ လုပ်ကၠုင်ဟာပ်စ ကောံမဟောဒြာ၊ ဂွံစဟာပ်ဖဲ ပ္ဋဲဂှ်သေင်ဟာ၊ ဍေံဂွံညာတ်ကၠာ ဗြဴခါခနှဳ၊ ဒှ်စိုတ်ဒိတှိ တုပ်မိကာကဳ၊ ညံင်နဲဂဍာ် စိုတ်သၟာ်လဇ္ဖဳ၊ ဆဵုကောန်ညးရ သြာ်စဖျုန်ဒဳ၊ ကောန်ဍေံမွဲတဲ ရိုဟ်တ္ၚဲဍေံလွဳ၊ ဗြဴခါခနှဳ စိုတ်ချဳလရု၊ ကောန်ထပှ်ကောံ ဒေင်ဗျောံလ္ၚု၊ ဍေံကဵုကောန်ဍေံ စပလှ်ေစု၊ ညးထပှ်ညာတ် သမ္ၚာတ်စိုတ်ဂၠု၊ ဗှ်ကဵုယာဲဇု ဍာ်စက္ခုဒွါ၊ ရမတ်ဒဇူ နူဂၠံမတ်ၜါ၊ ဍေံကော်စကာ ဟွံညှာတာညိ၊ လက်ညံင်ရဴဍိက် ဗြဴဒၟိက်ဒိတှိ၊ ဍေံကဵုတုက်ဍာ် ယာ်သြောံဒမၠိ၊ ဟွံဂွံဍုန်သ္ၚိ ညိဟွံဂွံဇူ၊ ပါ်အှော်တောံပုင် တၞုင်တဲတူ၊ ဍေံဒေါန်လဖှ် လက်ပျဟ်ဂကူ၊ စလေဝ်ဟွံဖဲ စိုတ်ပ္ဋဲဒတူ၊ ဍောင်တုဲတိုန်ဇူ ဍေံယူသ္ၚိထာန်၊ ဍေံတက်ပရာန် လုံကွာန်ကမၠေဝ်၊ ဍေံတက်ၜုင်ခုတ် ပၠုတ်သြန်ဒကေဝ်၊ ဂွံစမွဲဗုင် တက်ၜုင်ကမၠေဝ်၊ မအံက်စိုပ်ကၞာတ် ဖဍာတ်အရေဝ်၊ ညံင်ဍောင်ဂွံပြေ အရေဝ်မွဲမွဲ၊ ဣလုလှေံလှန် ဟွံဒေါန်မွဲတဲ၊ ဗဵုမစပုင် ရံင်ကၠုင်နူသ္ၚောဲ၊ မညာတ်ကောန်ဂှ် ရမတ်ပြဟ်ဂၠေါဲ၊ လုပ်စကောန်တံ တၟံညးအဲ၊ မိင်မကော်ပၠန် ကောန်ထပှ်ပြဲ၊ လုပ်စဖဴမ ရောင်ဂွံစဖဲ၊ ဂွံစညံင်စိုတ် ၜိုတ်စလောဲလောဲ၊ ဣလုကရောဲ တ္ၚဲဂှ်တုန်ရော၊ ဟာဲအမုက်ဗၠး ဂဗးကဵုလော၊ ဗှ်ေဆာန်ကောန်ဗှ်ေ စှ်ေအာသီုအြ၊ ပကၠုင်မံင်ပ ဓနမတ်ရော၊ စှ်ေရလေဿာ သီုဆောအာတဴ၊ ဟာဲအမုက်ဂၠဴ လထဴဗာလာ၊ အာဒၟံင်ဖဴကောန် လှန်ပသမ္ဘာ၊ အာကၠေံပြဟ်ရ ပကၠုင်ပါယျာ၊ ယဝ်ဗှ်ေဆာန်အဲ ပၠေဲထောံလောဲသွာ၊ ထာန်ဂြိုပ်တေံဟေင် ပၠေဲထောံသေင်ဟာ၊ ပြဟ်ကေတ်ဏာ ကြာဂြိုပ်အပၠဴ၊ ပၠေဲထောံတုဲအဵု ပကဵုဂွံစဴ၊ ထဴမိင်ပါင်ဗြဴ ညံင်ရဴဂျိကံ၊ သ္တိက်လေဝ်ဟွံလှိင် ထဴမိင်အသံ၊ ကောန်သပါသြိုဟ် ဖျုန်ဂြိုဟ်တၞံ၊ ဂိုဟ်အတူဂိုဟ် ဒိုဟ်ဒေင်ပ္ဋဲဂၠံ၊ လထဴကၞပ်သ္ၚံ ပ္ဋဲဂၠံဒဵုယး၊ ဖေက်လဗြဴကီု ဟဂံင်ဟီုဂး၊ အရှိုန်တိုန်ဂြင် တ္ၚဲခၠင်တၟး၊ လထဴကော်ပၠန် ကောန်ရုပ်ထဝ်ဂၠး၊ ယွံလေဝ်ကောန်တံ တၟံအဲညး၊ ဘောဇိုန်မပြဲ ဗွဲမဒးရး၊ စဳရေင်ညိမၞး တ္ၚဲယးဂတ၊ ယးပိုဲအာဝေင် ဂေၚင်ဒေသ၊ ပိုဲတိတ်လန်ဂြိုပ် က္ဋိုပ်တၟံလတ၊ ဂၠါဲစဗဳဗၠတ် ဓရေဲသတ်ချ၊ ဂၠံက်သ္တဵုဣဥူ မၚူမၚ၊ သဳလောလဳမှဴ ပၞဴဗင်ယ၊ သတ်လမုတ ပလဘဝး၊ ဟီုကဵုကောန်ဂှ် သီုထပှ်ပျး၊ ဣလုမိင်အိုတ် မိပ်စိုတ်လှဲလး၊ ပ္ဋဲဂှ်လဗြဴ ဂြိုင်တဴဟးဟး၊ ကေတ်နင်ကဵုတ္ၜဴ ထဴဗျုညာတ်ဒး၊ ထပှ်ဒကုတ် ကုတ်လဝ်သၟဟ်သ္တး၊ လထဴမုက်ဗၠး သာ်ဝွံသ္ဂးပၠန်၊ မွဲမွဲဒကုတ် ပကဵုယုတ်ခၠန်၊ တ္ၜဴဝွံတုန်ပၠန် ကေတ်ရကောန်တံ၊ ညးထပှ်အဴ ဂွံတ္ၜဴဗိုန်ဇၟံ၊ ညိဟွံကဵုလံ ယံယံတွာ်အာ၊ ထဴသီုကောန်ပြဲ ထပှ်မွဲသာ၊ ညးထပှ်အဴ ဂွံတ္ၜဲတုဲမာ၊ လက်ကရဴမ တွာ်တုဲစအာ၊ ပ္ၚောံဂြိုပ်ဖြာ တွာ်ဗက်အာရ၊ ဇၞတ်မအာတဴ ဗက်ကြဴဣတ၊ ကနှာတ်တ္ၜဴဗြော် ဇနော်ဟေမ၊ ပြးအလုံဍာန် ပဏာန်ရုက္ခ၊ ထောံဂၞိင်ဂွံဍိုင် ဂၠိုင်ကဵုဒေသ၊ ထောံဂြိုပ်ဂမြိင် ပ္ဋဲဗိုင်စိင်ကၠ၊ တွာ်အာလျလျ ထာဏဂြိုပ်ဇၞော်၊ မကဵုကောန်ပြဲ ထပှ်မွဲဗော်၊ လုပ်စိုပ်ဂြိုပ်ဇၞော် ကော်ပ္ကောံကောန်ရ၊ ယွံလေဝ်ကောန်တံ မဇၟံညာဏ၊ ဇိုင်လ္ဂောဝ်ပ္ညုင် သြင်ကြုင်မူလ၊ သှ်ပုင်ဂွဳရ ဟာပ်စမွဲဗော်၊ စပုင်ဂွဳရော ဃောဟာပ်လၟံက်၊ မဍေံလီလှေံ ပၠေံဒဴမွဲကော်၊ ယွံကောန်ထပှ် သၟဟ်န်မွဲဗော်၊ ပဒွိင်ကောန်ဂၞဴ မအာတြဴဇၞော်၊ ဇိုင်ဂၞိင်ဇိုင်ၜော် လုပ်ဗော်ကိစ္စ၊ တုဲမပၠန်ကၠုင် တလုင်ဒေသ၊ ဒၟံင်ရကောန်ဍောတ် ရုပ်ဍောင်ပဒၟ၊ ထဴဖေက်ဗြဴရ ပၠေဲထောံကောန်ဂၞဴ၊ လလဴဇကု အဗျုလထဴ၊ ဖေက်ဗြဴဣလု ဒုဒုတွာ်စဴ၊ ကၠေံလဝ်ကောန်ဗြဴ ပၠန်စဴသ္ၚိရ၊ စိုပ်သ္ၚိတုဲပၠ ခဏတိုန်ဇူ၊ ဣလုမိပ်စိုတ် စရိုတ်သ္ဖုင်ဒ္ဂူ၊ ညံင်ကၠုင်စိုပ်ရ ပုင်သွပေင်အူ၊ စပုင်တုဲဇူ ဆာန်ဍူထဴဗျု၊ ဣဗျုလှေံလှန် ဍေံဟွံဒေါန်ဗြု၊ ဍေံဟီုတုဲပျး ဂွံဗၠးဇကု၊ က္ဋာတ်ညံင်ရှ်သာဲ ကအီတွာဲထဴဗျု၊ လထဴကအီဏှု ဣလုစိုတ်မိပ်၊ ပ္ဋဲထာန်ဗနိပ် ဇိပ်ကၠိပ်သၞာ၊ သ္တင်ကာယဒွါ ကာလဂှ်တုန်။ ။

သၟတ်ဗြဴဝုတ်ထပှ် မအံက်ဂၞဴ ပၠေဲလဝ်ဒေါဝ်ဂြိုပ်တုဲ ဒှ်ဒဒိုက်ကၠင်ဟဳ

လၟေင်ဒဒှ် တဝှ်ဒေသ၊ မအံက်ဂှ်တၟုဲ စိုပ်သ္ၚိတုဲရ၊ တေံကောန်ထပှ် ပဒှ်ဒေသ၊ ပ္ဋဲထာန်ဂြိုပ်ဝါ ခန်လွာကၟီကၠ၊ ဟွံညာတ်မအံက် သမ္ၚံက်စိတ္တ၊ ကော်ဂၠါဲအာရ ကာလဂှ်ပၠန်၊ အဵုမအံက်အဲ မပြဲလက်သန်၊ ကၠုင်ပၠေဲလဝ်ကောန် သန္ထာန်ဂြိုပ်ဂျိ၊ ဒဒိုက်လ္ၚီကိုတ် ညံင်အိုတ်ဇိဝိ၊ ဒေါဝ်ဂြိုပ်ဂမျိ သ္ၚိကၟီကၠဗြန်၊ ဒဇန်အံက်ဂၞဴ ကၠုင်ဒဴထောံကောန်၊ လၞီသ္ၚဳဒိုဟ် ဖျုန်ဂြိုဟ်သောန်န်၊ အနုဒိုဟ်ဆာဲ ကောန်ဂၠါဲကောန်လန်၊ ဗၟံက်ပလိုတ် အိုတ်သီုဒိုဟ်ပန်၊ ဒိုဟ်သမၠုင်ကျာ သၟဝ်ကျာပၠန်၊ ဗာယပ်တုန်စိ နေရတိဗ္ဂန်၊ အဂၞဲဨသာန် ထာန်ဂှ်ဂၠါဲလန်၊ သီုဒိုဟ်ဒစာံ ပဏာံတန်န်၊ ကောန်ဗက်ဂၠါဲလန် မွဲတန်ဟွံညာတ်၊ ဒဇန်အံက်မ ပဝရာဲသာတ်၊ ထောံကောန်ထပှ် မူဂှ်မညာတ်၊ ဒဒိုက်ခပ်ပြာတ် ဟွံညာတ်ကောန်ဗြဴ၊ ဒဒေံဍောတ်မွဲ သီုၝဲတရဴ၊ ဒဇန်အံက်ဂၞဴ ဒဴစဴကၠေံသ္ၚိ၊ ကောန်ဒးဒေင်လ္ၚုင် ကောန်ဒးသုင်ဂျိ၊ တိုင်ဒးသ္ကန်လီု လမျီုဇိဝိ၊ တေံဒဇန်ကၠာ ပိသာ်ဇာတိ၊ ဒဇန်ပူစိ အဒိကိုပ်ကၠာ၊ ဒဇန်ပူကွက် ဆက်နူတမၠာ၊ တက်သၞေင်ကရဴ ဒဴထောံကောန်ၜါ၊ ဒဇန်ဗျက္ဃာ တမၠာမူလ၊ အဟာနာဲအန် ကောန်ကတိုင်စ၊ ဝွံဒဇန်ကၠာ ၜါသာ်မူလ၊ ဒဇန်တံင်ရက် ဗက်ကဵုဒေသ၊ ဂလက်လဝ်ကောန် ဟွံသ္ၚဳပၠန်ရ၊ ပ္ဋဲလတိုင်ကျဝ် တိုပ်လဝ်ကောန်ဂျ၊ တေံဒဇန်ပိ ယုတ္တိဂါမ၊ လၟုဟ်အံက်အဲ ဂုန်ပြဲတေဇ၊ တိရစ္ဆာဏ ပမဒဇန်၊ မအံက်မွဲပၠန် ပေင်အာပန်ရ၊ အြပဗတ်သ္ပ မအံက်ကျာ်ဂန်၊ ကၠုင်ပၠေဲလဝ်လေ ကြာဟေမဝန်၊ ဂုန်အံက်ကျာ်ဂန် အိုတ်သ္ကန်ရရော။ ။

သၟတ်ဗြဴဝုတ်ထပှ် ဗက်စဴတနှာတ်တ္ၜဴတုဲ ကလေင်စိုပ်အာသ္ၚိပၠန် ကောန်ဗြဴထပှ် သၟဟ်န်ယာံလော၊ ဒေါဝ်ဂြိုပ်ဟေမော ယာံလောကမဝ်၊ တုဲညးထပှ် ပ္ဋဲဂှ်ဆတ္တဝ်၊ ဒေါဝ်ဂြိုပ်လဂေါဝ် လောကမဝ်တဴ၊ ပ္ဋဲဂှ်ၝဲဇၞော် ချပ်တော်ဆအဴ၊ ကာလတိတ်ပ္ညုင် ပိုဲစကၠုင်တ္ၜဴ၊ ပယာံဒေံဗြဴ ပိုဲဗက်စဴရ၊ ဆဵုတနှာတ်တ္ၜဴ တရဴမဂ္ဂ၊ သီုညးထပှ် သၟဟ်န်စိတ္တ၊ ဗက်စဴအာရ ကာလဂှ်ပၠန်၊ ဗက်တနှာတ်တ္ၜဴ တွာ်စဴတန်တန်၊ ထောံဟေမဝန် ဒ္ၚဳပၠန်စဴအာ၊ တွာ်စဴဂြီုဂြီု သီုရောံပြဝါ၊ သီုညးထပှ် သၟဟ်န်ညဳသာ၊ ဗက်တနှာတ်တ္ၜဴ တွာ်စဴညှာညှာ၊ သန်ထာန်သ္ၚိကၠာ ပြဟ်အာစိုပ်တုန်။ ။

ဗြဴဣလု ဂွံညာတ်ကေတ်သၟတ်ဗြဴဝုတ်ထပှ် မပၠန်စဴကၠုင်သ္ၚိတုဲ ကဵုယထဴ အာပၠေဲကၠေံမွဲဝါပၠန်

ပ္ဋဲကာလဂှ် ပဒှ်ဖဵုဂုန်၊ ဗြဴဣလုတုန် စိုတ်ဍေံရုန်မဵု၊ ညာတ်ကောန်ထပှ် က္တဵုဒှ်ဓိကဵု၊ ဒေါသလဟဵု သီုမခဵုခါတ်၊ ခေါဲဂၞတ်ခါတ်မှာတ် ဟွံညာတ်ဒိုဟ်ကၠင်၊ ဍေံဟီုတ္ၜေဟ်တဴ လက်တဴခမၞင်၊ ဟွံညာတ်ဒိုဟ်ကၠင် ဒေါသလင်သ္ကာတ်၊ ဣလုလက်ဗ္ဂပ် ပအပ်ကဵုထဴကၞာတ်၊ ဟာဲအမုက်ဗၠး ဗှ်ေဂးရာဲသာတ်၊ ဗှ်ေပၠေဲကဵုဗၠး တမျးဂြိုပ်ဗြာတ်၊ အာပၠေဲထောံကၞာတ် ဟွံကဵုညာတ်မုက်၊ ဍေံပၠန်စိုပ်ဒၞါဲ ဟာဲဓမ္မလုက်၊ တွာ်စုက်စုက် အမုက်ဟွံညာတ်၊ ဟာဲအမုက်ဗာ် ဗှ်ေဟွံညာတ်စံ၊ ညးထပှ်ပ္ညုင် တွာ်ကၠုင်ဗျောံဗျောံ၊ မတ်ဗှ်ေကၠက်မံင် ဗှ်ေမၠာ်ရံင်စံ၊ ထဴဗြဴမိင်ဟီု က္တောဝ်ဗီုဒးကံ၊ ယွံလေဝ်လဗြဴ ပလဴအသံ၊ တ္ၚဲယးဂတ နာဲပဒွိင်စံ၊ နာဲပတဏံ ကၞပ်သ္ၚံညိယာဲ၊ လ္ပဒွိင်ဒွါဲ နာဲပဟီုဂး၊ ယးဂတအာ ကၠာဟွံတမး၊ ဖျိန်ပုင်ကဵုပြဟ် ပဒှ်ဣိဿး၊ လဗြဴဂွံမိင် တွိင်တိုန်ဖြးဖြး၊ ပဒွိင်အဲဖျိန် စိန်ကၠာဟွံယး၊ စာင်ဂြဴမွဲဝါ အာရထဴဂး၊ ပုင်ထပှ်ဂွဳ ညဳသာသၟဟ်သ္တး၊ ကၠာဟွံတမး ညးထပှ်ဂၠေါဲ၊ ဗက်ကြဴမအံက် ညံက်ညံက်တွာ်သြဲ၊ တွာ်ပ္ဋဲဗတံ ဂြံဂြံမွဲမွဲ၊ စာင်ဂြဴကြဵုကြီု ဗဂီုကရောဲ၊ လိုက်ထောဝ်စလာင် ကဵုပါင်မွဲမွဲ၊ ကၠဵုကၠိင်ဗဂဲ ဗြုနဲညးကော်၊ ကၠဇၞော်ကဵုပါင် ရမျာင်ပြာထော်၊ ကိုတ်တူအကး ပၠလျးဗြးဗြော်၊ ကလော်သြဲတဴ ပၞာင်သ္ဋဴလေံကြော်၊ လလောင်ပြာထော် ဖေက်ဂၟံက်သေင်ဟာ၊ ကောန်ထပှ်ညာတ် သမ္ၚာတ်စိတ္တာ၊ ဗၞဲက္ဋိုပ်သြဴ ပ္ဋေန်သ္ဋဴဖြာဖြာ၊ သ္ၚိသာပၠလျး တမးလုံဝါ၊ လဵုလိင်စဳပၞာင် ဗျာင်ကၠုင်ဗျာင်အာ၊ ဖျေဲဖျဴလလဳ ညံင်သ္ဋဴစဳဏာ၊ မင်ဂၠန်တလုဲ ဒကုဲဗၠးအာ၊ ပၠးသၠလးထာန် ဒၟံင်တဴဟာန်ဇာ၊ ကၠဇၞော်ကၠသၠာ လုပ်အာဇီုကၠာဲ၊ တ္ၜိုင်ပှ်မင်ဒြာဲ လုပ်ကၠာဲလဒပ်၊ အရှိုန်တိုန်ခၠင် လျးဗၜင်ထပ်၊ ပၠလျးသမြပ် ထပ်တိုန်ဂတ၊ သၟီသူရိယ တလကွဳထဝ်၊ နူဂင်ဍာ်တှ် သၟဟ်ယုဂ္ဂန္ဓဝ်၊ သီုစရိုတ်ပန် သၠုဲသၠာ်သြန်ထဝ်၊ ဗလးသံဒဝ် စဝ်တိုန်ဂတ၊ မာတ်ညာတ်တမး လျးသူရိယျ၊ ရာဇာအန္ဓ ဟဂံင်ပၠမုက်၊ လလဴကသုက် ဂၠုက်လုပ်ကြာထီု၊ မာတ်တ္ၚဲယးကီု အိုဿီုဂြိုပ်ဝါ၊ လထဴကဵုကောန် သၟဟ်န်မွဲသာ၊ ဗက်ကြဴမဂၠေါဲ မွဲမွဲညှာညှာ၊ တွာ်အာဂြီုဂြီု သီုရောံပြဝါ၊ ဒေသဂှ်ကၠာ နူတမၠာရ၊ ဆဵုလစမွဲ ပ္ဋဲထာန်ဟေမ၊ ဒကှ်ရာင်ဂဵု ဥပ္ပဵုရာင်ဂျ၊ ကြုဲကြင်ဟင်ရံ ဂၠံထဝ်နိဇ္ဖ၊ ပ္ဋဲသြင်လစ အဇပမာ၊ ညံင်နန္ဒာဝိုန် ကွိုန်ပေါက္ခရာ၊ ညံင်လစကၠာ သၟီအိန်မာဃ၊ ရာင်ဆာဲက္ဋင်ပြ ကာလဂှ်မာ၊ ဒိုအ်ရကောန်တံ ထာန်ဏံညိကၠာ၊ သှ်စပုင်ဂွဳ ညဳညဳသာသာ၊ ညးထပှ်ဟေင် ဂဇံရေင်ဗ္ဂာ၊ ဟာပ်ပုင်ဂွဳကောံ သီုရောံပြဝါ၊ ဂဇံဒၟံင်ဟေင် ဇရေင်ကၟာ၊ ပ္ဋဲကာလဂှ် ပဒှ်သာ်လွာ၊ လထဴဖေက်ဗြဴ ချပ်တဴစန်စာ၊ သၟိက်ဒဴထောံဟေင် ကောန်တံသေင်ဟာ၊ ထဴကွာ်ဂါဲအာ ဒၟံင်ကၠာကောန်တံ၊ မဍေံဗလေတ် ခရေတ်ဇိုင်တၟံ၊ ဂေတ်စဴဟံယံ ဟွံသ္ပံသာ၊ ဇိုင်ဂါံလလဴ လထဴဗာလာ၊ ပြဟ်စိုပ်သ္ၚိကၠာ ကာလဂှ်တုန်။ ။

ဒတိတ်ဒဒှ်သၟတ်ဗြဴဝုတ်ထပှ် မအံက် အာပၠေဲထောံပ္ဋဲအဒေါဝ်ဂြိုပ်ဂၞိင် မွဲလှ်ေပၠန်တုဲ ဒှ်လၞီတူယဲ ယာံရေဝ်ရောတ်

လၟေင်ဒဒှ် တဝှ်ဒေသ၊ ကောန်ထပှ်ရ ပဒှ်သာ်လွာ၊ ဗှ်ကဵုအံက်ဂၞဴ မဒဴစဴအာ၊ ညးထပှ်ကၠာ သိင်သာတူယဲ၊ ပ္ဋဲသြင်ကၟာ အံက်ဒဴအာပြဲ၊ လၞီတူယဲ ပ္ဋဲကာလဂှ်၊ ညံင်ကောန်စာင်ကွေံ ဒးလေံကနှ်၊ ဇတဝ်ဖြပ်ဖြပ် ဒဇပ်က္ဋဟ်က္ဋဟ်၊ ချိုန်ခဏဂှ် ရမတ်ပြဟ်ဏှဳ၊ ဒှ်တဴဇွောဝ်လင် စံင်တူကၠင်ဟဳ၊ ဗှ်မအံက်ပၠန် ဒဇန်ဒေါသဳ၊ ကဵုကောန်ကၠင်ဟဳ သ္ကန်ဏှဳရရော။ ။

ယွံလေဝ်အံက်မ တလအယော၊ ဒဴထောံကောန်ရော ဂၠိုင်ဒေါဗနဟ်၊ ကဵုကောန်ဇွောဝ်လင် ကဵုကၠင်ပှ်လှ်၊ ပရံင်ဗဵုဒှ် ကောန်ထပှ်ရော။

ယွံမအံက်အဲ မပြဲတေဇော၊ ကဵုကောန်ခြာဆော တောရောသုင်ဂျိ၊ ပ္တေဟ်ဣလုဝဲ ဗက်သ္ၚောဲနူသ္ၚိ၊ ဇိ၀ိတိနြ္ဒိ ဟွံဂၠိရရော။

ဒဇန်အံက်မ ပဝယောသော၊ ဒေါဝ်ဂြိုပ်ဟေမော ဂၠိုင်အြဝဲသၞ၊ အံက်ပၠေဲလလဴ ပ္တေဟ်ဗြဴပါပ၊ ဒဇန်အံက်မ သိက်ကောန်သ္ပရော။

ဟးအံက်ကျာ်ဂန် ဒဇန်ယောသော၊ ပၠေဲထောံကောန်ရော ဟေမောဂြိုပ်ဂျိ၊ သိက်ကောန်သ္ပဒး ယာံကြးတသိ၊ ကောန်လီုဇိဝိ ဒေါဝ်ဂြိုပ်ဂျိရော။

ကောန်ဗြဴထပှ် ရုပ်သၟဟ်သီုဆော၊ ဒေါဝ်ဂြိုပ်ဂျိရော ကလောဟွံမွဲ၊ ပ္တေဟ်ဗြဴပါပ ကၠုင်ဒှ်သၞဝဲ၊ ကြာဆုရေဝ်ရဲ သ္ကန်ဒဲရရော။

အံက်တလဂုန် မဟာပုညော၊ ဂုန်ဇၞော်ဂၠိုင်အြ ကောန်ခၠေဝ်ရောမာန်၊ ဒေါဝ်ဂြိုပ်လ္ၚု ကၠုင်ဒှ်သုသာန်၊ ပ္ဋဲဂြိုပ်ဓိထာန် သိက်ချပ်မာန်ရော။

နူဘုံနရက် ဒဵုဘဝဂ္ဂေါ၊ အိုတ်ဇန်လောကော ကောန်ရောဆာန်က္ဋင်၊ အံက်ဒေပ်ဒဇန် ဟွံပၠန်ချပ်ဂြင်၊ မအံက်ကၞပ်သၠင် ဗဵုနိဿင်ရော။

နူတၞံမက်ပန် ဖဵုပန်အဂ္ဂေါ၊ လောကုတ္တဵုရော ဒစာံအြဗျိင်၊ သွက်ဂွံမက်ဖဵု ကုသဵုဇၞော်ဂၠိင်၊ နဳဗာန်လဟိင် အံက်ဟွံဒွိင်ရော။

နဳဗာန်ထာန်ဒိပ် ဗနိပ်အယော၊ ၜိုတ်စိုတ်လောန်ရော ဇၞးဆောမစ္စု၊ လၟုဟ်အံက်ဂၞဴ ပ္တေဟ်ဗြဴဣလု၊ ကျပၞာန်မစ္စု ဒဵုဗျုရရော။ ။

ပရူဒဒှ်သၟတ်ဗြဴဝုတ်ထပှ် မကြင်ကြောဝ်ဒၟံင် ပ္ဋဲဂြိုပ်ဂၞိင်

ပ္ဋဲကာလဂှ် ပဒှ်သာ်လွာ၊ ကောန်ဗြဴထပှ် သၟဟ်န်ညဳသာ၊ အံက်ပၠေဲလလဴ ကလေင်စဴအာ၊ ဒေါဝ်ဂြိုပ်ဟေမာ ကြာဒမြီုဆု၊ လၞီသ္ၚဳသြိုတ် စိုတ်ဂၠိုက်လ္ၚု၊ ကြာဒမြီုဆု လ္ၚုစံင်ဏှာ၊ ပိုဲအိုတ်မၞးတံ တၟံလိုက်ဗာ၊ အကုသဵုကံ ခနှံလဝ်ကၠာ၊ ကံဂှ်တုန်ဟေင် စဳရေင်ကဵုမာ၊ ဒဒိုက်ဇၞော်ကၠး ဒးဒုင်သေင်ဟာ၊ ကုသဵုကံသွံ ယဝ်ဂွံပတုဲကၠာ၊ ကုသဵုကံဟေင် မပြုပြေင်ဏာ၊ ဇိုန်ကဵုတသိုက် ဇၟာပ်ဇန်လိုက်ဗာ၊ အိုတ်ပိုဲမဒၟံင် ပ္ဋဲခြိုင်သံင်သာ၊ ချပ်ဗ္စာရဏာ နပညာညိ၊ တေံကောန်ဗြဴပြဲ ထပှ်မွဲမိ၊ ပ္ဋဲဒေါဝ်ဂြိုပ်ဂျိ သ္ၚိကၟီကၠဗြန်၊ ဂတးချပ်ပၠန် နညာန်ပညာ၊ ကံဘဝပိုဲ ဒှ်ကဵုပိုဲကၠာ၊ ပဒွိင်ပူဆာ အေင်ကၠာဒေံတံ၊ မအံက်ဒဇန် ထောံကောန်သကံ၊ ဒဴစဴသ္ၚိလံ ထာန်ဏံစွံလဝ်၊ ကဵုကောန်ဒးကၠင် တူယဲလင်ဇွောဝ်၊ ကဵုကောန်ကြံသ္ဒိုဟ် ဖျုန်ဂြိုပ်သ္ဗသအဝ်၊ ကဵုကောန်လင်ဇွောဝ် ဇဝေါဝ်ရမတ်၊ ကဵုကောန်ကြိုင်ကြင် လၞီကင်ဇတ်၊ ကဵုကောန်ကြင်ကြောဝ် ဇွော်ဍာ်ရမတ်၊ လၞီကင်ဇတ် ထတ်သောသၞာ၊ ၝဲဒေံထပှ် ပ္ဋဲဂှ်သေင်ဟာ၊ ဗျဵုပုင်သွဟေင် ဂဇံရေင်ဗ္ဂာ၊ သီုညးထပှ် ကာလဂှ်ကၠာ၊ ယောန်စှ်ေကၟာ ဂၠံက်လွာလကိုန်၊ ၝဲဂၠံက်ဂွံအဴ ညးတရဴဗိုန်၊ တုဲဒေံတရဴ ကြဴတုဲယိုက်ပ္တိုန်၊ ဂွံပအဟာ ရိုဟ်လွာလကိုန်၊ သီုသတ်ဒကှ် ဒှ်စၞသွိုန်၊ ရိုဟ်လွာလကိုန် ဂွံပတိုန်ဒြဟတ်၊ သီုညးထပှ် ကာလဂှ်သၟတ်၊ ယိုက်ဂုန်ဒေဝတဴ နုဘဴပြာကတ်၊ ဘုမ္မဇဵုရ ရုက္ခဇဵုသၟတ်၊ လ္ၚောဝ်ပဝတ် တဲၜတ်တသု၊ သီုညးထပှ် သၟဟ်န်မံင်စု၊ တဲပ္ဋဵုသိသ ဒေဝတၞံဆု၊ ပ္ဋဲထာန်ဂြိုပ်ဏံ ပ္ဋဲတ္ကံဇံမု၊ ဗိုင်ရီုဆောံမ ဒေဝတၞံဆု၊ ပိုဲညးထပှ် သၟဟ်န်ဒၞါဲဝွံ၊ ပကဵုမံဘဲ ပါ၀ဲသတြု၊ ဗိုင်ရီုဂြုဂြု တ္ၚဲဝွံညိအဴ၊ ပ္ကဴဒကှ်ၜါ ပ္ကဴသွာပူဇဴ၊ လပုဟ်တဲခၠံ ကလံရဴဂဴ၊ ကလံဂြိုပ်ယာန် ပနာန်ဗဳသြဴ၊ ဘုမ္မိရုက္ခ အိုတ်ဒေဝတဴ၊ ပိုဲစိုပ်ဒဒိုက် ဗိုင်ဖျိုက်ညိအဴ၊ လကိုဟ်ဓနဴ ဗဳသြဴသီုဖအိုတ်၊ ပကဵုဆိုက်မွဲ ရဲသတ်အဟိုတ်၊ ညးထပှ်ကၠာ ပတ္တဏာအိုတ်၊ တဲပ္ဋဵုသိသ သ္ပလဝ်ၝောံကိုတ်၊ ယဵုဂုန်သီုဖအိုတ် ဟွံဝိုတ်ညိဟေင်၊ တဲပ္ဋဵုသိသ ထပတူကၞေင်၊ ညးထပှ်ကၠာ တွာ်အာရေင်ရေင်၊ တွာ်အာဗဵုအာ ကြာဝါထံင်ထေင်၊ ကြာဂြိုပ်လ္ၚု အရှာံဆုကြေင်၊ ဆုဂၠိုင်ကဵုသာ် ကြိက်ပြာ်ဗပေင်၊ မိတွာ်အာဟေင် စိုပ်ဂြိုပ်ကြေင်အဴ၊ မတ်ဗြဲကြေင်ပိုင် အိက်တ္ၜိုင်နှဴရဴ၊ ဂိုင်လပှ်စ ပအဟာဂၞဴ၊ လဆောဝ်ဂၞဴပေင် လဆောဝ်အေင်တဴ။

လညာတ်ကသဳကၞာင်ပ္ကဴတံဂှ် အဇညံင်မကော်ဘိက်ကဵုဂၠေါင်စရှ်ဝေင်ကီု မဒှ်တဴပ္ဋဲစိုတ်သၟတ်ဗြဴဝုတ်ထပှ်

ထပှ်မွဲဂၞဴ တရဴဂြိုပ်ဂျိ၊ ဍောင်တုဲမိဇူ သၟဝ်တၞံရုက္ခိ၊ ဍောင်တုဲတွာ်အာ ပ္ကဴသအဳဗ္ဂာထိ၊ ဍောင်ပ္ကဴပၠိုဟ်ထာင် လွိင်ကၞာင်ဂၠိ၊ ကၞာင်လယှ်ဗြော် ညံင်ကော်တသိ၊ ယွံကညှာသၟဟ် ထပှ်မွဲမိ၊ ပ္ကဴပိုဲမောဝ်လှောင် ဂၠေါင်စရှ်ညိ၊ ဂွံၜိုဟ်စိုတ်သအး ဂွံဗၠးစိုတ်ကၠိ၊ လၜိုဟ်ကာယျ က္ညဒေါံကၠာမိ၊ ညးထပှ်အဴ ညာတ်ဍောင်ပ္ကဴစိ၊ ညံင်ကော်ဟီုအိုတ် ဒှ်ပ္ဋဲစိုတ်မိ၊ ကၞင်ပ္ကဴလယှ် ပ္ကဴပြဟ်ပေင်ထိ၊ ပ္ကဴပြဟ်ပေင်တိ ထိမြိပေင်သူ၊ ညံင်တခါဲကော် ပြးဗြော်လတူ၊ လပှ်ကေတ်ပ္ညုင် မိဒုင်သမူ၊ ဖျိုက်ဃနဟေင် တွာ်ရေင်ဟွံဇူ၊ ဍောင်ပ္ကဲရာင်အူ ဇနူဂြိုပ်ဇၞော်။

လညာတ်ကသဳကၞာင်ဆုဒုန်တံဂှ်လေဝ် အဇညံင်မကော်ဘိက်ကဵုဂၠေါင်ၜှ်ပလှ်လပှ်စသစ္ဆုကီု မဒှ်တဴပ္ဋဲစိုတ်သၟတ်ဗြဴဝုတ်ထပှ်ပၠန်

စိုပ်ဂြိုပ်ဆုဒုန် ဂစေံဍုန်ဗြော်၊ ပဏှ်ပဏး ပေင်သ္ၚးဂြိုပ်ဇၞော်၊ ပၞဟ်မွဲဗော် ကလုက်ကော်ဂး၊ ယွံညးထပှ် အဝဲသၟဟ်သ္တး၊ မိတွာ်တရဴ ဍောင်တဴမဂး၊ သတ်ပၞဟ်သအး ဂွံနွံရသ၊ ဖျေံလဝ်စရိုင် စဵုဗိုင်ဇလ၊ ခြံဇာကသာဲ နာဲအဲကၠုင်စ၊ ပြိုက်သာဲကၟဝ် ရှ်သ္ကဝ်ရောက၊ မိပဖေက်ဂၟံက် ပိုဲကော်ကဵုစ၊ ပၞဟ်ဓရိုဟ်ကသာဲ သၞာဲခလောတ်သ္ဒ၊ ဍုဟ်သရိုဟ်ကွေံ ဒတုံစှ်ေဂၠ၊ ကၟဝ်လသာတိတ် မဗကေတ်ဂျ၊ မောဝ်ပ္ဋးတမာဲ တွာဲမိရုပ္ပ၊ က္ညလုပ်စညိ မိပဒည။

သတ်ဓရေဲ ညာတ်ပၞဟ်မကော်ဘိက်မိနာဲတံဂှ်တုဲ ဟွံဒုင်ကမျ ကော်ဘိက်တဴကီု

ဓရေဲညာတ်ကီု ကော်ဟီုပၠန်ရ၊ ဟာဲပၞဟ်အရိုင် ဗှ်ေဂၠိုင်ရောဂ၊ ကၠုင်နူဇမ္ၚောဲ ဒုင်တ္ၚဲသ္ပာတ်သ္ဗ၊ ဗှ်ေကဵုဒုက္ခ ကဵုပအဟာ၊ ကဵုစပဏှ် ညိဟွံဒှ်ကာ၊ ဂၞဴပုဖဍံင် တေင်ညံင်ဖံကၠာ၊ အေင်ညိမိတံ ပသပံသာ၊ ပိုဲဓရေဲပၠန် က္ဋာတ်လောန်သေင်ဟာ၊ စညိစညိ မိသိုက္ခမာ၊ က္ဋာတ်က္ဋာတ်ဖျးဖျး ဒးကဵုယဲကျာ၊ သီုကျာဲကတိုက် ပြိုက်ထိုင်စုတ်ဗာ၊ က္ညယိုက်က္ညယိုက် သ္ဋိုက်ညးဂြိုပ်ဝါ၊ က္ညဒေါံညိကၠာ ပအဟာညိ။

သတ်မၠင်ကာ ဂွံမိင်ဓရေဲကော်တုဲ ဟွံဖျဝ်မာန ဘိက်ကော်တဴ မိဗြဴဝုတ်ထပှ်တံဂှ်ကီု

မၠင်ကာဂွံမိင် ဟီုပြိင်တသိ၊ ဟာဲဓရေဲအရိုင် တဴဍိုင်ဂြိုပ်ဂျိ၊ ဓရေဲအဟိုတ် ဒေပ်စိုတ်ဒိတှိ၊ တွာ်ပ္ဋဲဂမ္တဴ စဂၞဴအာစိ၊ ဗှ်ေပၠေင်ဗြဴရတ် ဒှ်သၟတ်ယုတ္တိ၊ နာဲပစညိ ယွံမိကျာ်သြဳ၊ ပိုဲသတ်မၠင်ကာ ဂၠိုင်ရှ်သာပ္ညဳ၊ ညးပပြာကတ် ဇၞော်ဍောတ်ပလွဳ၊ အမြာဲနွံရှ် မြမောဝ်သၟဟ်ညဳ၊ က္ညပပြဘိုက် သိုက်က်သဳသဳ၊ စညိဒေဝဳ ကျာ်သြဳသ္ဖုင်ဂွု၊ ပိုဲပတမာဲ တွာဲနာဲဒေံဇု၊ စညိစညိ မိၜတ်တသု။

သတ်မင်ဂုတ်လေဝ် ဟွံဒုင်ကမျကုသတ်မၠင်ကာတုဲ ကော်ဘိက်သၟတ်ဗြဴဝုတ်တံကီု

မင်ဂုတ်မိင်ကီု ကော်ဟီုဂြုဂြု၊ ဟာဲမၠင်ကာအရိုင် ဗှ်ေတသိုင်ယၟု၊ ယဝ်စဗှ်ေဂၠိုင် ဂၞဴခိုင်မတ်ဗု၊ သတ်မၠင်ကာဝွံ ဂၞဴပုဓူဓူ၊ ယွံဂဍောင်မတ် ကၞတ်ဂကူ၊ မင်ဂုတ်က္ဋာတ်ၜိုဟ် ရှ်ခိုဟ်တူရူ၊ လုပ်ပတေဝ်လၟောင် ဍောင်တုဲမိဇူ၊ က္ညစညိနာဲ တွာဲကောန်ဂကူ၊ မင်ဂုတ်သိန်လှူ နူဥတ္တရေ၊ ပတမာဲစိ စညိထဝ်လေဝ်၊ ပိုဲပလှ်ပြီု စသီုအိန်ရဳ၊ စညိထဝ်ဂွဳ ကျာ်သြဳဒးကၞာတ်၊ က္ဋာတ်အတူက္ဋာတ် ဓယာ်ဒးကျ၊ ရှ်သာလောန်ရ စညိရၝာဲ၊ သြန်မွဲအလေဝ် ဟွံပြေဏီနာဲ၊ က္ညစညိရ ပိုဲပတမာဲ။

ဒူရေန်လေဝ် ပဂရိုင်ပွေင် ပမွဲသွတ် ကုမင်ဂုတ်တုဲ ကော်ဘိက်တဴ သၟတ်ဗြဴဝုတ်တံဂှ်ကီု

ဒူရေန်မိင်ကေတ် မင်ဂုတ်တိတ်တွာဲ၊ ဍေံပအရိုင် ဂြိုင်မံင်ဟးဟာဲ၊ ထိုင်သးဇကု ထာန်လ္ၚုအောပ်ဗ္ဒာဲ၊ ဟွံပၠဇကု သစ္ဆုတိတ်တွာဲ၊ အန်သန်အမြာဲ ဟွံဆာဲစညိ၊ ပ္တိုန်အယောခုတ် မင်ဂုတ်ဒိတှိ၊ ပိုဲဒူရေန်ရ ဇလထိမြိ၊ အမြာဲမောဝ်လှောင် မုဟ်ညံင်ကဵုဂျိ၊ သမူအမြာဲ ဒၞါဲပၞုက်စိ၊ အမြာဲကၠံင်သ္ကိုပ် ဒးတုဲက္ဋိုပ်ဂိ၊ ပိုဲပတမာဲ ကေတ်နင်တွာဲမိ၊ ဇလစဵုဗိုင် စရိုင်ထိမြိ၊ ပါံလဝ်သီုကြိုဟ် ၀ုတ်ဒိုဟ်သ္တုံဇွိ၊ ပိုဲထၜိဟ်တွာဲ ပတမာဲညိ၊ စညိထဝ်စှ် ရှ်သာလောန်စိ၊ ကၟဝ်ဇၞော်လောန် စရံင်ပၠန်ညိ၊ သီုက္ဋာတ်သီုကြောံ ပ္တောံကၠေင်တၟိ၊ က္ညနာဲဒေါံညိ မိတံမွဲသာ။

ညးထပှ်မိင် တွိင်ပါင်မွဲဂှ်မာ၊ ညံင်ညးကော်ဗျာင် တွာဲပါင်ဝါစာ၊ မဒှ်ပ္ဋဲက္တောဝ် ဗြဴသွဝ်သေင်ဟာ၊ ဒှ်ဂြိုပ်ဥဒျာန် ပနာန်ရုက္ခာ၊ သဳလောလဳမှဴ ပၞဴမၠင်ကာ၊ ပၞဟ်ပဏး ဗဝးကြုက်ဖာ၊ ဓရေဲမံင်ဗ္ဂာ မွဲသာမင်ဂုတ်၊ ဒူရေန်က္ဋာတ်ကြောံ ညးသ္ဖက်ပ္တောံခုတ်၊ ညးထပှ်ကိုပ် လန်ဂြိုပ်မင်ဂုတ်၊ ပ္ကဴဂေါစမုတ် တုတ်တုတ်သ္ၚာ၊ လုပ်အရှာံပ္ကဴ ရဴညးပြေင်ဏာ၊ တၞံကဵုတၞံဆက် ရိုဟ်ၜက်ကၞာင်သ္ကာ၊ သ္ၚဴမောဝ်လှောင် ပြာင်ဍောင်ရာင်ဗ္ဂာ၊ အဂၞုဒဇေင် အံင်ရေင်မွဲသာ၊ ပ္ကဴကှ်ေပြာန်ပြီု ပ္ကဴရီုသဂါ၊ ၜုဏ္ဏရိက်အဴ ဍောင်ပ္ကဴဇဳသွာ၊ အနာင်တဝ်သွဝ် ဒလာဲထဝ်ဗ္ဂာ၊ အင်ရေင်မွဲသာ ရပ်ဏာအံင်မှုဲ၊ ဓိထာန်ပ္ကဴစက် ရပ်ဗဝက်ရုဲ၊ ပ္ကဴပၠုဲသင်ပၠုဲ ဂဟုဲဍောင်ဇဝ်၊ မၠဵုသဝ်သဝ် ပြိုက်လဝ်လဵုဍာ်၊ ဍံက်စမ္ပာကျိုင် ဇိုင်ဒပ်လံတွာ်၊ မာဲပ္ဋူမွဲသာ် တွာ်လုပ်ကာလ၊ နွံဘဲစောရာ ပ္ဋူလုံကာယျ၊ သၞာပ်ဗိုက်ယာတ်ကြာဲ စမှာဲကၞာင်သၠ၊ မေလံင်ဖုန်ရ ပၠယာသာခါ၊ လးကၟဝ်ဖုန်ဟီု ဇီုပတုန်ပအာ၊ ပ္ကဴပေါပ်ဇဳသွာ သ္ဂေဟ်ဂန္ဓာရီု၊ ကၞာင်ဗျာင်တယျောဝ် ပြာင်ဍောင်မောဝ်ထီု၊ တလာဲလၜက် ညံင်ညးဒက်ပြီု၊ လစောတ်လမောဝ် တွာဲမိတၞောဝ်ဗြီု၊ ထိုင်သာဲအဒါဲ ပဝ်ဂၠါဲဇာပ်ပြီု၊ ဒြဝ်သၞေင်လဒု ဗြုဒၟံင်သြီုသြီု၊ မတုပ်ပမာ တွိင်သဒ္ဒါရီု၊ ဥဒျာန်နန္ဒာ တုပ်ပမာဗီု။

ပရူဒဒှ်ဂြိုပ်ဂၞိင် အခိင်ပယျာံတ္ၚဲသဝ်၊ ဗ္တံဒမၠု

အကြာဂြိုပ်ဇီု ကြာဒမြီုဆု၊ သြေဲသြေဲဂမြိင် မိင်စင်ရေတ်ဗြု၊ ကွဴဂြဴလဒု တူဆုသမၠုင်၊ သဍိအဂၠေါန် ဖျီုကောန်ဇိုင်ကြုင်၊ ဗဂီုဗြုဒုင် တူဆုသၠုင်သဝ်၊ ဍေဝ်ခြီစလာင် ရမျာင်တမ္ညဝ်၊ မြာ်ထဝ်ဇဝဴ ဂြဴလဒက်သအဝ်၊ စာင်ဍာ်စာင်ကၠိုက် ဗြုရိုက်တမ္ညဝ်၊ ပယျာံတ္ၚဲသဝ် စဝ်ဒိုဟ်ပလိုတ်၊ ညးထပှ်ညဳ ကၠင်ဟဳပ္ဋဲစိုတ်၊ သီုညးဖအိုတ် ပ္ဋဲစိုတ်ကၠင်ဟဳ၊ ပ္ဋဲတံရုက္ခ ညိဟဂံင်ချဳ၊ လျးသၞံင်ဗစဳ ဖျဳဖျဳဖျာဖျာ၊ ကလော်ကဵုပါင် ရမျာင်ဟောဒြာ၊ ပြိုတ်ဗြုတသဝ် မင်ထဝ်ပသာ၊ ကိုတ်အကာသ ပၠလျးတူကျာ၊ လျးဂဵုညံင်သ္ဋဴ ရဴမစဳဏာ၊ ကလော်စရဲ ပၞာင်တဲၜါၜါ၊ မိဖေက်လ္ၚာပ်လ္ၚာ မတ်ၜါဟွံရံင်၊ ကၠဇၞော်ကၠဗြန် တုန်ဆန်လလောင်၊ ဗြုကြဵုဇာသၟတ် ကၠံင်ဂမ်အတ်ဒၟံင်၊ ကၠဗြန်ဗြုဆံင် ရမျာင်ညံင်ကံ၊ ဗၜဵုကၠသၠာ ဂၠါဲအဟာစံ၊ မင်ဂဝ်ဗဝါ ကာလဗတံ၊ ဂၠါဲအဟာသၟတ် အိုတ်သတ်လ္ၚီကၠံ၊ ဗၜဵုဍိုက်္ၚာန် ဒျာန်သၞေင်ပဝ်စံ၊ ဂၠါဲစအဟာ ပၠးယာသၞေင်ကြံ၊ ပါင်ကဵုအသံ ဗတံဒမ္ၚု၊ ဂၠါဲစအဟာ ပွါမဏ္ဍု၊ ပ္ဋဲပေါက္ခရ ဟွံပၠဇကု၊ ပွါမဏ္ဍု ဒေပ်ဇကုဇူ၊ ကၠဇၞော်တွာ်ဂါဲ ပ္ၚောံကၠာဲဂူ၊ ဗၜဵုလုပ်ဂၠုက် ပၞုက်က္ဋိုပ်စူ၊ တိတ်ဒုင်သမူ ကဝေန်ထူဒၟံင်၊ ကမၠတ်ဆင်အံင် သံင်ရာပ်တကင်၊ ပ္ဋဲခြုံဥမင် ပြင်ဇကုလ္ဒပ်၊ ကဏာဲညးရပ် ဖြပ်ဖြပ်ဂြိုက်သ္ၚု၊ ဂအဳဒးဘဲ ဂဒဲဒုဒု၊ မံင်ဒးထဏိက် ဍိက်ညးတ္ကံဝွံ၊ နတုံနသၞူ ညးသူလဒု၊ ဒုင်ကာဇကု ညးသူသ္ၚုၜဵု၊ ရဲတမ္ၚာပ္ညုင် ဍိုက်ဂၠုင်လဟဵု၊ ဗက်ဂၠါဲမစ္ဆာ ဖျေံဇာတွဵု၊ ဗြဴဖံက်သေဝ်ပါန် ရာန်ကဂဒဵု၊ ဒမာတ်ဒဇဲ ကြာင်ပသဲကြဵု၊ ဇက်ဒမုင်အဵု သဓဵုနဳဂီု၊ သၟာသောန်ဒါတ် ခါတ်မာတ်ဂဒီု၊ လ္ၚဵုဇက်သောန် ကၠောန်မံင်သြီုသြီု၊ သင်ဗျုသင်ဗၠာဲ သှ်္ၚာဲကြဵုကြီု၊ ဖ္ဋောတ်မေတ္တာ ဘာဝနာပြီု၊ သှ်္ၚာဲဂြီုဂြီု အကြီုဂါထာ၊ စာင်ဂြဴလတိုင် ဇိုင်ဂၞိင်ဇီုဖြာ၊ စာင်ကၠိုက်လိုက်ထောဝ် ဗြုတဴမှောဝ်ဇာ၊ မြာ်ထဝ်ဂြဴကြီု ဇိုင်လဂီုဖြာ၊ စာင်ဍာ်ခတ်ကြံ တက်ဖံဂလာ၊ ဖျုန်ကဂဒဵု ဖေက်ကၠဵုဂွံဏာ၊ ကွက်ထောံကွက်ထောံ ပစွံဆာဗၠာ၊ ကၠီုမွဲတီညာတ် ၜုင်ဗာတ်တလာ၊ ဗြုတဴသိုက်သိုက် အခိုက်စှ်ၜါ၊ ဖဝ်ရဂုတ်သ္ပောတ် တလောတ်ညှာညှာ။

သၟတ်ဗြဴဝုတ်ထပှ် တၞဟ်နဂွံပအဟာတုဲ ရပ်စက ပ္ဍဲကၟာ

နာဲယာန်စက်ထဝ် စဝ်သိန္ဓဴၜါ၊ မၞုံကြဳဇှ်ကၠံ ယာန်ဓမ္မတာ၊ ဗပန်လ္ၚီဆက် လျးစက္ကဝါ၊ သိန္ဓဴလ္ၚီဂၞန် ဗ္ဂန်စက်ဇရာ၊ လေံကလးထဝ် လွိင်ဆဝ်ဏာ၊ ကၠောံပျးအမ္ဗာ ခၠင်အာဂ္ညိဂညာတ်၊ လျးထဝ်အပၠာ လွဳမာန်ပြာသာတ်၊ ဂေါဝ်ဂပ်ဒးကၞာတ် ပြာသာတ်မတၟေင်၊ ပ္ၚောံဒေသ ထာဏတ္ကံကြေင်၊ သၟိက်ပျးမတ်ဇန် ဇက်ပၠန်ကလေင်၊ အရှိုန်တိုန်ပျး လျးတၟးဟေင်၊ ကၠောံပျးတ္ကံကြေင် လျးတၟေင်သာ်ဗၠဲ၊ တ္ၚဲယးတၟး ညာတ်ဇၟာပ်ညးအဲ၊ ညးထပှ်ကောံ ဒၟံင်ပ္ဋဲတၞံဇြဲ၊ မိဂွံလှဲလး တမးစိုတ်ပ္ဋဲ၊ မိဒကောင်ဗၠဲ ယဵုတဲပူဇဴ၊ ကလံတၞံဇြဲ အဲပရဲတဴ၊ သီုညးထပှ် သၟဟ်န်မွဲဂၞဴ၊ တုဲဂါံတိတ်အဴ မိဗြဴကညှာ၊ ဂါံတွာ်မွဲမွဲ ၝဲဒေံမွဲသာ၊ တွာ်သီုလၟောင် ဍောင်ဇူဟဲအာ၊ သစ္ဆုစၞ ဂၠါဲပအဟာ၊ ကြုက်ပၞဟ်သၟတ် သီုသတ်မၠင်ကာ၊ ဓယာဲဓရေဲ လဳမှဴဗြဴတာ၊ လပှ်စအာ ဗြဴသောတာပန်၊ ဇၞတ်မကြိုင်အာ ဇိုင်ဝါဇခန်၊ ဃောဂိမှန္တ ကာလဂှ်ပၠန်၊ ဆဵုကၟာမွဲ ပ္ဋဲဝါဂှ်ပၠန်၊ ဍာ်ကွိက်ဇတ်သ္ကဟ် ကပနှ်တ္ၜန်၊ ကက္ဋတ်လေဝ်ကီု သီုကအနန်၊ က္ဋတ်ပနှ် က္ဋိုပ်ဒှ်ညံင်သြန်၊ သီုညးထပှ် ပြဟ်စှ်ေရပ်ပၠန်၊ တဲဂၠါံရပ်ဂန် ဗိုန်က္ညန်သဘဴ၊ ပြဟ်ရပ်ဂွံနင် တုဲစင်ခတဴ၊ ၝဲတရဴဂှ် ပဒှ်သဘဴ၊ စင်သီုမတ်ၜါ ကၠိုဟ်အာဆဴဆဴ၊ စင်တလိုဟ်သၟတ် မတ်ကက္ဋတ်အဴ၊ ဒဒေံဍောတ်မွဲ မပြဲနုဘဴ၊ မိစင်မွဲတဲ မတ်မွဲကၠိုဟ်တဴ၊ ဂွံကတုဲအဴ ပေင်ခတဴအိုတ်၊ ဂွံပေင်ခတဴ ဂိုင်ဖျဴသီုစိုတ်၊ သီုညးထပှ် ပြဟ်ဂၠေင်ယိုက်ဂိုတ်၊ ဂွံတုဲစံင်စ ပအဟာအိုတ်၊ ထပှ်မွဲဂၞဴ စတဴညံင်စိုတ်၊ စကတုဲအိုတ် စိုတ်ဂွံတန်အာ၊ ဒလာဲစှ်ေစိ တိပသၞာ၊ ဒဒိုက်နာထ ကာလဂှ်ကၠာ၊ ရိုဟ်ဆုပဒၞဳ ဒ္ၚဳမိလှိင်အာ၊ လၟောင်ဟဲသွာ ဂွံသမာဓိ၊ ညးထပှ်ကောံ သၟဝ်တၞံရုက္ခိ၊ ဒလာဲစှ်ေတိ မိညးထပှ်၊ ပ္ဋဲကာလဂှ် ပြဟ်လှိင်အာတုန်။ ။

==ဍုင်ကလော် သၟီယက္ခကန္တာကေုာံဂၞကျာ်မိသဳနန္ဒာ မပ္ကင်ရင်။ ကလိဂွံကောန်ဝုတ်မွဲ ခုတ်ယၟု မိဏင်ကင်ရဳ== ဂလာန်ဝွံပၠန် တန်လဝ်ကၠာရ၊ လၟေင်ပုံကၠာ ဟီုအာဂတ၊ တိုင်ဒဒှ်ရ ယက္ခဗြဴကၟာဲ၊ လၟေင်ဒဒှ် တဝှ်စလာဲ၊ ယက္ခဗြဴကၟာဲ တိုင်ဒၞါဲမူလ၊ နွံဍုင်ဇၞော်မွဲ ပ္ဍဲဂြိုပ်ရည၊ ယၟုဍုင်သၟတ် ဟွံပြာကတ်ရ၊ ဒှ်ဍုင်ကလော် ဇၞော်သန်တေဇ၊ သၟီမပ္ကင်ရင် နန်မင်ဂလ၊ မဒုင်နာမ ယက္ခကန္တာ၊ ဂွံပကင်ရင်ဟေင် ဍုင်ဂှ်သေင်ဟာ၊ အဂ္ဂဒေဝဳ ဂးသဳနန္ဒာ၊ ဒၟံင်တဴသၟဟ်န် တန်မွဲသၞာ၊ ဇၞော်သန်နုဘဴ သၟီတြုံဗြဴၜါ၊ ဂွံပိုင်ဂြိုပ်ရော စှ်ယောဇနာ၊ ဂၠိုင်သၞာံအခါ ကာလဂှ်ရ၊ ညးၜါသၟဟ်န် တန်မွဲဘာဂ၊ ဒှ်သၟီကလော် မဇၞော်တေဇ၊ မိသဳနန္ဒာ ဗြဴမှာယက္ခ၊ ရန်ဇနစပ် တန်အာဂပ္ဘ၊ ဟွံဂွံလံပြဟ် ပေင်စှ်မာသ၊ သၠးဂပ္ဘ ကာလဂှ်ကၠာ၊ ရုပ်သာ်အဝဲ ပြဲလက္ခဏာ၊ မက္တဵုဒှ်ပၠန် ကောန်သိုက္ခမာ၊ ခုတ်ယၟုရ နာမကောန်ကၠာ၊ မိဏင်ကင်ရဳ ကျာ်သြဳပြဲဖာ၊ က္တဵုဒှ်ပ္ဍဲနန် ကောန်ဗြဴယက္ခာ၊ ကံအတိက်ဂှ် သ္ကဵုပှ်လှ်ခြာ၊ ယက္ခကန္တာ ပ္ဍဲကာလဂှ်၊ က္တဵုဒှ်ယဲပၠန် ဇၞော်သန်ကြဳဇှ်၊ လှာဲနာံရုပ်အဴ သ္ကန်ဇဴကလှ်၊ စုတိအာသၟဟ် ကာလဂှ်ရ၊ မိသဳနန္ဒာ ဗြဴမှာယက္ခာ၊ ကော်အမာတ်စာ သေဏာတံရ၊ စဳရေင်ယိုက်ဇွ သၟီယက္ခဗၠာဲ၊ သဳနန္ဒာဂှ် ဒှ်ဒၟံင်ဗြဴကၟာဲ၊ ဂွံပိုင်ကလော် ဍုင်ဇၞော်လောန်ကာဲ၊ သဳနန္ဒာဆာဲ ဗြဴကၟာဲယက္ခဳ၊ ကောန်ဗြဴဂှ်စိ မိဏင်ကင်ရဳ၊ ယက္ခိဏဳဗြဴ ပဒၟံင်တဴလွဳ၊ ဂၠါဲစရိုဟ်တ္ၚဲ ပ္ဍဲဂြိုပ်ပ္ဍဲၜဳ၊ တ္ၜိုင်ပှ်ဒြာဲမင် ဍေံဂၠါဲနင်ဇဳ၊ ပန်ဒိုဟ်သ္ၚိပ္ညဳ နွံဇဳရာဲသာတ်၊ မၞိဟ်သီုဒြာဲတ္ၜိုင် ကြိုင်လဝ်ပေင်ထာတ်၊ သီုပန်ဒိုဟ်ကျဝ် ကြိုင်လဝ်ပေင်စာတ်၊ ဝးကၠေံဂၞိင်ဇိုင် သတ်ဂၠိုင်ကဵုသာ်၊ သတ်ဒဵုသတ်ဍာ် ဝးသီုပါ်စဲ၊ ရိုဟ်တ္ၚဲဟွံပိုတ် စအိုတ်မွဲမွဲ၊ ယက္ခိဏဳဗြဴ ဂၠါဲတဴရိုဟ်တ္ၚဲ၊ ပ္ဍဲစာတ်ပေင်ချံ ဟွံယံမွဲတဲ၊ ယက္ခဳဗြဴဝဲ စပ္ဍဲနန်ကၠတ်၊ ကရောံကောန်ဍောတ် ပ္ဍဲနန်ကၠတ်တုန်။ ။

ကလော်ဗြဴမိသဳနန္ဒာ ဂွံညာတ်ကေတ် သၟတ်ဗြဴဝုတ်ထပှ် ပ္ဍဲအဒေါဝ်ဂြိုပ်ဂၞိင်။

လၟေင်ဒဒှ် တဝှ်ဖဵုဂုန်၊ လၟေင်ပုံတုန် ပိုဲဟီုပ္ဍုန်ဏာ၊ ကညှာထပှ် ပဒှ်သာ်လွာ၊ ပ္ဍဲမလှိင်သ္ၚံ သၟဝ်တၞံရုက္ခာ၊ လကိုတ်ၚုဟ်အာ ကာလဂှ်သၟတ်၊ စကဖဲဂှ် ဂွံဒှ်ဒြဟတ်၊ တုဲဂါံတွာ်အာ ကာလဂှ်သၟတ်၊ စမဳရံင်ကၠာ ညာတ်အာပ္ဍဲမတ်၊ ခၠင်တၟးအာ ဒေါဝ်ဝါဂှ်သၟတ်၊ ခံက်ဗ္ၚဍေံသ္တး ဒးရးပြာကတ်၊ နဲကၞင်သ္ၚာ ရံင်အာဒးသၞတ်၊ ပ္ဍဲဇုက်ဗၞင်ပေင် ကမၠေင်ဗိုန်ဗတ်၊ ကမၠေင်ဖုဲလ္ၚဴ တဴပ္ဍဲပုက်သၟတ်၊ တုဲခၜိဟ်ဟေင် ခပေင်ရောင်ဒေံဍောတ်၊ ညးထပှ်ပၠန် စမိပ်လောန်ဗၞတ်၊ တုဲညးထပှ် ကာလဂှ်သၟတ်၊ ပ္ဍဲဂှ်ဗြဴရတ် ပထတ်ကာယျ၊ ဇူတဴဟေင်ရ ထာဏဝါဂှ်၊ ကာလသၟိက်ဒှ် တဝှ်ဒေသ၊ သဳနန္ဒာအဴ ဗြဴမှာယက္ခ၊ သၟိက်ဂေတ်ဂေင်ထာန် ဥဒျန်လစ၊ ကျိုင်ကျဝ်တဴရ ကာလဂှ်သၟတ်၊ မြမောဝ်လၜိုဟ် ဗဗိုဟ်ကြကောတ်၊ ရပ်ဒ္ၚေါဝ်ထံင် ဖျေင်ရံင်မုက်မတ်၊ ပၠေင်ရုပ်မၞိဟ်ရ မနုဿသၟတ်၊ ရံင်ကျောဝ်စမဳ ဓဇဳဂွံၜတ်၊ သ္ၚဳတုဲသ္ၚဳပၠန် ကလေဲကောန်မတ်၊ ဂိုဟ်ကောတြုံရတ် ဃောၜတ်ဒးသြာဲ၊ ၀ါဃောဒိပ်ဒါဲ ဃောတွာဲလမျီု၊ ထောံလဝ်ဗြဴရတ် ကောန်ဍောတ်မွဲကီု၊ ဗှ်ကောလမျီု စိုတ်လီုကွေံအဲ၊ ဂးတုဲဒေၚာဝ် သောဝ်ကၠေံနူတဲ၊ ယက္ခဏဳဝဲ တွာ်သြဲတိတ်ဂြိုပ်၊ ဂါံတွာ်မွဲမွဲ သ္ၚောဲနူဗဒိုပ်၊ စမဳရံင်အာ ဇိုင်ဝါဇိုင်ဂြိုပ်၊ ဂွံညာတ်ကေတ်ပြဟ် ထပှ်မွဲက္ဍိုပ်၊ ပဒတဴကိုပ် ဇိုင်ဂြိုပ်အသဝ်၊ ရုပ်သာ်အဝဲ နဲအဆေဝ်သွဝ်၊ သီုညးထပှ် သၟဟ်န်ရုပ်ဂေါဝ်၊ ယက္ခိဏဳဗြဴ ညာတ်တဴရံင်ကျောဝ်၊ ညံင်ကောန်ကနှောဝ် အဆေဝ်သွဝ်ကျ၊ ဍေံကၠုင်စိုပ်ရ ထာဏပိုဲကိုပ်၊ ဗြဴသီုထပှ် ပြဟ်ဍေံကၠုင်စိုပ်၊ ယွံကောန်သော်က္ဍိုပ် ကၠုင်စိုပ်ထာန်ဏံ၊ မူဍုင်မူကွာန် သန်ထာန်နာဲတံ၊ ဟီုကဵုယာဲညိ မိသီုသကံ၊ ညးထပှ်မိင် သွိင်တဲယဵုခၠံ၊ ယွံမွဲတမံ ဍိက်ကလံတွာဲ၊ ပိုဲဒှ်ကောန်ကၠင် ဒှ်ကမၠင်ယာဲ၊ မိသွီုပယျဲ ရိုဟ်တ္ၚဲဇြေဟ်ဇြာဲ၊ မအံက်ပၠေဲထောံ ပ္ၚောံဗိုင်လာဲ၊ ယာဲသွီုစဏာဲ ဂၠါဲလက်ဒေါန်ဗြု၊ အံက်ပၠေဲလလဴ အပၠဴဂြိုပ်ဆု၊ အာကၠုင်ဟွံဒး တဟးမတ်ဂၠု၊ တွာ်ပ္ဍဲကန္တာ ဂြိုပ်ၜါဂိတု၊ ၝဲဒေံကောံစု စိုပ်ထာန်ဝွံရောင်။ ။

သဳနန္ဒာမိင် ဝိဝိင်မွဲတောင်၊ သၟာန်ဂွံတီအိုတ် ပ္ဍဲစိုတ်သလှောင်၊ ယွံကောန်ထပှ် မဒှ်မွဲဂၠေါင်၊ ရုပ်သာ်စရာဲ ဂေါဝ်ဆာဲၜတ်သောင်၊ ဒၟံင်ဖဴယာဲရ ပဒှ်လၟောင်၊ ယာဲပစကောန် ဟွံကဵုကၠောန်ဍောင်၊ ဒၟံင်ပ္ဍဲနန်ဂၠေါင် ကဵုရံင်သ္တုံဇွိ၊ ပစဏးယာဲ နာဲပိုင်နန်သ္ၚိ၊ ပစကောန်အဲ ထပှ်မွဲမိ၊ ကဵုနာဲစဳစတ် အပေါတ်ပ္ဍဲသ္ၚိ၊ ကောန်တှ်မွဲစိ မိဂွံဗိုင်ရံင်၊ ညံင်စဴနန်ဂၠေါင် အာဒၟံင်ဖဴအဲ၊ ညးထပှ်မိင် လဟိင်စိုတ်ပ္ဍဲ၊ ညံင်သာဲပြိုက်က္တောဝ် ဇွောဝ်လုပ်လောဲလောဲ၊ ဟွံတီညိည ဒှ်ယက္ခဝဲ၊ ဗှ်ဒုင်ဒဒိုက် ပရိုက်တ္ၚဲဗြဲ၊ ဂွံစိုပ်နန်ဗၠဲ ပ္ဍဲစိုတ်လှဲလး၊ မံင်နတသိုက် ဒဒိုက်ဂွံဗၠး၊ ညးထပှ်ဂး ဗက်စဴဍေံရ။

စဴစိုပ်နန်ကၠတ် သုဒဿဏ၊ ကောံဗြဴယက္ခ တလနန်ထဝ်၊ ညးထပှ်အဵု ဍေံကဵုကျိုင်ကျဝ်၊ ဥုပ်တဴပၠးဂၠး ညံင်ဗီုညးသွဝ်၊ ပက်ခါန်ခါသာ သီုယာတ်ကြာထဝ်၊ ညံင်အဆေဝ်သွဝ် ဗဝဝ်ဟိရိ၊ ဒဒေံဍောတ်စိ မိမွဲပြဲအိုတ်၊ ယွံကောန်ယာဲ နာဲဗပေင်စိုတ်၊ မိဆာန်တုပ်သၟဟ် ဒှ်ပ္ဍဲစရိုတ်၊ ညံင်ကောန်ပ္ဍဲသြိုဟ် ဖျုန်ဂြိုဟ်သီုဖအိုတ်၊ ယဝ်ရမိချိုတ် အိုတ်သီုဂွံပိုင်၊ ဂးတုဲယက္ခ ဗြဴတလက္ဍိုင်၊ ဂွံဗြဴထပှ် မိပ်စိုတ်မြဟ်ကျိုင်၊ ယွံလေဝ်ကောန်တံ တ္ၚဲဏံဒဝိုင်၊ မိသၟိက်တိတ်ဝေင် ဂေၚင်ဂြိုပ်ဍိုင်၊ စိုတ်နာဲပဂၠိုင် ဂပဝ်ဇိုင်တဲ၊ ထပှ်တ္ၚဲကိုပ် မိစိုပ်နန်ဗၠဲ၊ ယာဲအာဟွံလံ မိတံမင်မွဲ၊ မံင်ပ္ဍဲဗဒိုပ် ပကြိုပ်တူယဲ၊ နာဲပကၠုင်အာ ခန်လွာထာန်သ္ၚောဲ၊ ရိုဟ်ဒဒှ်တ္ၚဲ ကောန်အဲထပှ်၊ ဗမံက်ပလိုတ် အိုတ်ဒိုဟ်တံဂှ်၊ ဒိုဟ်သမၠုင်ကျာ သၟဝ်ကျာတွံ၊ သီုဒိုဟ်ဒစာံ တိုင်ဂွါံဒဒှ်၊ ပအာကၠုင်သၟဟ် ဒိုဟ်တံဂှ်ညိ၊ ယဝ်ပ္ဍုန်ပုင်ရ နာဲပသတိ၊ ဟေန်ဍာ်ပုင်စိ ပ္ဍဲတိပပ၊ တိုင်ဂကန်မိ ယုတ္တိဂါမ၊ တိုင်ဂကန်ရ နာဲပပညိ၊ ပစဏာဲတုန် ထမုန်ကဵုမိ၊ မံင်ရကောန်ဂၞဴ ဗြဴကျာ်သြဳသ္ၚိ၊ ဂကန်ဖျန်တုဲ ဗြဴလွုဲယက္ခိ၊ စှ်ေနူနန်ရ ယက္ခဒိတှိ၊ လုပ်အာဂြိုပ်ပၠန် ဟေမဝန်စိ၊ ဒှ်ဗြဴကလော် ဇၞော်ကဵုဣဓိ၊ ဂၠါဲရပ်စကၠာ ဒြာဲဝါဂြိုပ်ဂျိ၊ ဝးကံသုင်ဆီ သမ္တီရှ်ဂ္ညိ၊ ဂေၚန်ကိတ်ပြက် တၚက်ကိုဟ်ဂၠိ၊ ထပှ်မွဲသ္ၚိ မိဖျန်စွံလဝ်၊ ဟွံကဵုဂေတ်ဂါဲ ဂၠါဲရေတ်ဂပဝ်၊ ဟွံကဵုဂေၚင် ဂေင်ဝေင်ရံင်ကျောဝ်၊ သင်ကာပ္ဍဲစိုတ် စရိုတ်ဗြဴသွဝ်၊ မိရုပ်ညံင်ထဝ် ဂေတ်ဂပဝ်ဝေင်၊ သီုညးထပှ် ကောံသၟဟ်ဂေတ်ဂေင်၊ တွာ်အာဗဵုအာ သီုပွါဂေၚင်၊ ထောံမတ်သ္တုံဇွိ ပ္ဍဲသ္ၚိစာတ်ပေင်၊ ဇိုင်ကဝ်ဂၞိင်ကဝ် ၀းလဝ်ညံင်ပၠေင်၊ ဍေံဝးလဝ်ပေင် ဂေၚင်ညာတ်သၟတ်၊ ညးထပှ်အဴ ညာတ်တဴကင်ဇတ်၊ ဍေံတံညာတ်ပြဟ် ညးထပှ်သၟတ်၊ ဓဝ်မေတ္တာကၞာတ် စိုတ်ပါတ်လျတ်၊ တုဲကော်ဟီုပၠန် ယွံကောန်ဍောတ်ဍောတ်၊ ဍုင်ကလော်သၟတ် အ္ၚတ္တိက၊ မူနာဲမံင်ပ ယက္ခကန္တာ၊ ဍုင်ကလော်ရောင် ဂဍောင်မတ်ၜါ၊ ရံင်ပိုဲညိပၠန် ယွံကောန်ထဝ်ဏှာ၊ ဍေံဝးဇိုင်တဲ ဂၞိင်ကဝ်မွဲသာ၊ ဒဳကဝ်တဲဗၠတ် ဇၞော်သွတ်ဂၠိုင်ရာ၊ မွဲတ္ၚဲညးမွဲ စနဲတ္ၜိုင်မြာ၊ ပိုဲဝွံမ္ဂး ယးတ္ၚဲဏံဟာ၊ ဍေံဝးစကၠာ ပအဟာဂၞဴ၊ ဖျုန်ဇုတ်ၜတ်ၜတ် ညံင်စသတ်ဗြဴ၊ နာဲပဘိင်ဘင် ဒေင်သၠင်ကောန်ဗြဴ၊ ညာတ်တုဲပဗြု ဇကုမှတ်လလဴ၊ ညံင်ဂွံဗၠးစဴ လလဴဇကု၊ နာဲတံပဗြု ဗလးဇကုညိ။

ညးထပှ်မိင် တွိင်ပါင်ဂှ်စိ၊ ရံင်အာနုဒိုဟ် ဇုတ်ကိုဟ်ပေင်တိ၊ ဇုတ်တ္ၜိုင်ဇုတ်ဒြာဲ ဂၠိုင်ဒၞါဲညာတ်စိ၊ ဒဇပ်ပ္ဍဲစိုတ် ညံင်အိုတ်ဇိဝိ၊ တုဲတွာ်ကလေင် ဇရေင်နန်လွိ၊ ပအုဲသရေင်သၟတ် ကောန်ဍောတ်ယက္ခိ၊ ညးထပှ်ပ္ညုင် ဖျိန်ပုင်သွက်မိ၊ ဟေန်ဍာ်က္ဍဵုစိ စိုပ်တိဟွံလံ၊ သၟတ်ပ္ဍဲသရေင် ညာတ်ဟေင်ဆံလံ၊ ဂွံသမူပုင် လတာ်ဒုင်ခၠံ၊ ကၠာန်စပ္ဍဲတိ မိညာတ်ဂြိုဟ်ချံ၊ ဍေံဖဲဟွံလံ ဗုင်ချံပေင်တေင်၊ သ္တိက်ပ္ဍဲသရေင် ဗုင်တေင်လှိင်ကၞပ်၊ ဟွံချဳဒဇပ် လှိင်ကၞပ်တဴရ၊ လတေံဗြဴဂျ ယက္ခနန္ဒာ၊ ဂေၚင်အာကိုပ် ထာန်ဂြိုပ်ဟေမာ၊ ဂၠါဲစဒြာဲတ္ၜိုင် ဂွံဂၠိုင်ကဵုရာ၊ အဟာပေင်ဂၞဴ ကလေင်စဴအာ၊ တွာ်စဴဖြာဖြာ ကြာဂြိုပ်လ္ၚု၊ ဗြဴကလော်လွပ် ချပ်ပၠေင်ဇကု၊ ချပ်ပၠေင်ကၠေံရ မနုဿဝွံ၊ တွာ်စဴယောန်ယောန် ပ္ၚောံနန်မြု၊ မုက်ၜတ်တသု စိုပ်နန်မြုထဝ်၊ ကောန်ထပှ်ကၠုင် ၀ါင်ဒုင်တမ္ညဝ်၊ ဗန်ဇိုင်ဗန်တဲ ဂြဲတှ်တံင်လဝ်၊ လ္ၚဵုဂှ်ပၠန် တံင်ပ္တိုန်နန်ထဝ်၊ စိုပ်ဒေန်ဂဇံ မိန်မံဗဵုဒ္ၚေါဝ်၊ လ္ၚဵုဖုံဍာ် ဂၞိန်ယာတ်စဲလဝ်၊ လ္ၚဵုဂိုင်ထပ် သီုကွပ်စွံလဝ်၊ စွံပ္ဍဲနန်ထဝ် ဒေပ်လဝ်ကဵုယာဲ၊ လုပ်ဝေင်ဂကောံ ညေံညံဟွံသြာဲ၊ ယက္ခဆာန်လောန် ကောန်ထပှ်ဆာဲ၊ ဆုင်ဗန်စံက်ထေံ မိလှေံစိုတ်နာဲ၊ ယက္ခဗြဴကၟာဲ ဆာန်နာဲရုပ်ထဝ်၊ ယွံကောန်ဂၠုယာဲ စရာံညးသွဝ်၊ တ္ၚဲယးဂတ နာဲပလင်ဇွောဝ်၊ ယာဲတိတ်ဝေင်ဂြိုပ် စိုပ်ဝင်ဂပဝ်၊ ပြဟ်မိကလေင် ကၠာဟွံစေင်သဝ်၊ ကၠာတ္ၚဲဟွံဓဝ် မိစဝ်စိုပ်နန်၊ မံင်ကဵုခိုဟ်ညိ မိဂၞဴဂကန်၊ ယက္ခကျိုင်ကျဝ် ဗဂေါဝ်ရုပ်ပၠန်၊ နာဲတံမကြင် ဇၟာပ်ကၠင်ဂေင်လန်၊ ယိုက်ဒေံဍောတ်မွဲ ဝေင်ဒၟံင်ပ္ဍဲနန်၊ ဝေင်ပ္ဍဲကၠတ်ထဝ် ဒေါဝ်ဗော်ကမၠောန်၊ မိသဳနန္ဒာ ယက္ခာဒဇန်၊ မိဂကန်ဖျန် လန်တိတ်ဂြိုပ်ဝါ၊ လုပ်စိုပ်ဂြိုပ်ဇၞော် ဒှ်ဗော်ယက္ခာ၊ ထဍေင်ဒြာဲတ္ၜိုင် ဗတာဲဂၠိုင်ရာ၊ ရပ်ဂွံသြာ်ပြက် ၚေက်တၚက်သ္ကာ၊ သ္ၚာဲစကြောပ်ကြောပ် ရပ်ဇိုင်တဲၜါ၊ သုင်ဆီဂၚတ် ဇြောတ်ဖျေံသာသာ၊ စတဴသေင်ဟာ ဗြဴမှာယက္ခ၊ ဒေါဝ်ဂြိုပ်ဟေမ ကာလဂှ်တုန်။ ။

သၟတ်ဗြဴဝုတ်ထပှ် ဒဴတိတ်နူနန်ကလော်ဗြဴမိသဳနန္ဒာ

လၟေင်ဒဒှ် တဝှ်လက်သန်၊ အဏံပ္ဍဲနန် တန်ပ္ဍဲဂေဟ၊ ညးထပှ်ကၠာ စန်စာတဴရ၊ ယွံလေဝ်ဒေံတံ မဇၟံရုပ္ပ၊ ၝဲရောင်ဇၞော်အိုတ် စိုတ်ၝဲဒည၊ သိက်စိုတ်ဒေံတံ ၝဲချံဂန္ဓ၊ မိပိုဲဝွံဂှ် ဒှ်ဗြဴယက္ခ၊ စမၞိဟ်ရိုဟ်တ္ၚဲ ပ္ဍဲစာတ်ပေင်သ္ဒ၊ ရိုဟ်တ္ၚဲမွဲမွဲ ဝးကံနဲက၊ ဖေက်စပိုဲပၠန် ဒးသ္ကန်ဇိဝိ၊ လမုဟ်မွဲတဲ စိုတ်ပြဲဏီရ၊ ကြဴပိုဲဒးဘဲ တဝဲသြာ်စ၊ ပိုဲဒၟံင်လံလ တီရနဲကဲ၊ အာရဒေံတံ တမံညးအဲ၊ လဟီုမိဂှ် ကၠုင်ပြဟ်မွဲတဲ၊ ဒဵုထပှ်တ္ၚဲ နဲဂှ်စိုပ်သ္ၚိ၊ ထပှ်တ္ၚဲကၠာ အာဂးဒမၠိ၊ ဗွဲပြဟ်တုန်အဵု စိုပ်ဂတဵုလွိ၊ အာလမုဟ်ရ မွဲသတ္တစိ၊ ပိုဲဒဴကဵုပြဟ် ထပှ်မွဲမိ၊ တီထမုန်စိ မိယက္ခဗြဴ၊ ဂၞိန်ယာတ်ပၠးဂၠး ဒၞါဲဒးမတ်အဴ၊ လဗိုန်ဇကု ၝဲဂၠုစိုတ်က္တဴ၊ စှ်ေနူသ္ၚိကၠတ် မှတ်ဂြိုပ်အပၠဴ၊ ဇိုင်တဲပရှ် ဒြေပ်ထအှ်ဒဴ၊ တွာ်အာဆဴဆဴ တရဴသ္ၚောဲလောန်၊ ထပှ်တ္ၚဲဖျာ် တဝါ်မၞိဟ်ပၠန်၊ တွာ်အာမွဲမွဲ ပ္ဍဲဟေမဝန်၊ ညိဟွံထၜိုပ် အာစိုပ်ပြဟ်သန်၊ စိုပ်ဂြိုပ်မွဲပၠန် မိပ်သ္ၚိပ်လောန်အာ၊ စိုပ်ဂြိုပ်ဓိဝါန် ဗၠးထာန်ယက္ခာ၊ ဂွံပိုက်လမောင် ထောင်ပ္ဍဲခန္ဓာ၊ ဗၠးတဝဵုကၠာ ဗြဴယက္ခာတုန်။ ။

လၟေင်ဒဒှ် တဝှ်ဖဵုဂုန်၊ လၟေင်ပုံတုန် ပိုဲဟီုပ္ဍုန်ဏာ၊ အကြီုယက္ခာ သဳနန္ဒာဆာဲ၊ မိသ္တိက်ပ္ဍဲဂြိုပ် ဖျေံက္ဍိုပ်ဒလာဲ၊ ဒ္ၚဳမိလှိင်အာ ယက္ခာဗြဴကၟာဲ၊ ညာတ်နိမတ်သွပ် ဒဇပ်လောန်ကာဲ၊ ဒန္တာဗြဴရတ် ခလောတ်ပြဟ်ချာဲ၊ ထပှ်တၞုင် ကၠုင်ပြဟ်ဂစာဲ၊ ညံင်ၚေက်သအုဲလာဲ ပြဟ်ချာဲဒုဒု၊ ဂၠါဲလေဝ်ဟွံဂွံ ဂိုဟ်ၚေက်ကိုဟ်ဗု၊ မိၚုဟ်တိုန်အဵု က္တဵုမွဲဗရု၊ ဒွိင်ကဵုကောန်ဂှ် ထပှ်ဇကု၊ ပ္ဍဲစိုတ်သမ္ၚု ဇကုဒြဴဒြဴ၊ တွာ်စဴယံယံ ဟွံပၠံတရဴ၊ ပရှ်ဇိုင်ဂါံ လာံပါံတွာ်စဴ၊ မိတွာ်ဆဴဆဴ ပ္ၚောံစဴသ္ၚိ၊ ဂါံဇိုင်သ္တုံကၠာ ကၠောံအာဇိုင်ဇွိ၊ စမဳညာတ်စိ နန်လွိဂေါဝ်ဆာဲ၊ ယက္ခလီၜန် ပ္ဍဲနန်ဗက်ဂၠါဲ၊ သဳနန္ဒာဆာဲ နာဲစိုပ်နန်လွိ၊ ညးထပှ်အဴ ဒြေပ်ဒဴထောံမိ၊ ယက္ခဂိုဟ်သၟတ် ညံင်မတ်သ္တုံဇွိ၊ ဒေင်ဗျောံလ္ၚုင်လ္ၚ စိုတ်ၜါဆဂျိ၊ ဒှ်အဲလွဳတဴ တရဴသၞာံစိ၊ ဟွံလက်ဟွံဒေါန် စိုတ်ဟွံစောန်ကၠိ၊ ဂြိုပ်စှ်သၞာံညဳ လွဳမံင်ပ္ဍဲသ္ၚိ၊ ယာဲဟွံပျဲပျာံ ဟွံကဵုယာံညိ၊ လေံလဂုင်စး ဟွံကဵုဒးညိ၊ ညံင်သပါသြိုဟ် ကောန်ဖျုန်ဂြိုဟ်မိ၊ ညံင်ဗီုကောန်ဂၞဴ လလဴတသိ၊ စှ်တရဴသၞာံ ဂွါံအယုက်စိ၊ နာဲဟွံဗှ်ညိ ကဵုမိဨကော၊ ယက္ခသ္ၚဳကၞပ် ဖြပ်ဖြပ်ယာံလော၊ ၀ိုတ်သတိဗၠေင် ပ္ဍီုသြေင်စိတ္တော၊ တက်သြိုဟ်ဆာံဆာံ ဂတေဝ်ယာံလော၊ သဳနန္ဒာရော လောတ်လောပ္ဍဲသ္ၚိ၊ သမ္ၚဟ်တိုန်သွံ မိဂွံသတိ၊ ဟဝ်ဒမုင်ဍုင် ကၠုင်နူအဒိ၊ သၠုင်ပိတာ နူတမၠာစိ၊ ဒှ်တိုန်ဘုံထိ ပိဘုံသေင်ဟာ၊ မွဲဘုံဖံမွဲ စွံပ္ဍဲဟဝ်ကၠာ၊ ဘုံဒေါဝ်တုန်သၟဟ် ဘုံကၞတ်မာ၊ စွံဖံမွဲမွဲ ပ္ဍဲဘုံအကြာ၊ မိသဳနန္ဒာ ဒြေပ်ဇၟာတိုန်ဂျ၊ စိုပ်ဘုံကၞတ် ဖျေင်မတ်သ္ၚဳရ၊ သ္ၚဳပန်ဒိုဟ်သ္ဍာံ ဒစာံဒိုဟ်ပၠ၊ ဒိုဟ်ဗမံက်ဆက် ဗွဲဒက္ခိဏ၊ ဒိုဟ်ပလိုတ်ခုတ် ကၠောံဥတ္တရ၊ ဍေံညာတ်ကေတ်ကၠာ မွဲသာဘာဂ၊ လောန်ပွိုင်ဍေံကွေံ ဍေံဖေက်ဒည၊ ညာတ်တွာ်အာကောံ ကြာတၞံရုက္ခ၊ ဍေံစှ်ေနူဟဝ် ဟွံလဝ်မန၊ ပၠဣဓိရ ယက္ခထဍေင်၊ နဣဓိကၠာ ညန်အာဗွဲလွေင်၊ ယက္ခစိုတ်ဗၠေင် ထဍေင်ဗက်တုန်။ ။

ဒေဝတဴၜါ ပၞုက်သၟတ်ဗြဴဝုတ်ထပှ် တၞဟ်နသ္ဂောံဗၠးပရိုက်လွပ်ကလော်ဗြဴမိသဳနန္ဒာ

ပ္ဍဲကာလဂှ် ပဒှ်သာ်လွာ၊ နွံတၞံဇြဲမွဲ ပ္ဍဲထာန်ဂှ်ကၠာ၊ ဒေဝတဴမာ ၜါမွဲလၟေင်၊ ဂွံအဝဵုပြဲ ပ္ဍဲဇြဲဇရေင်၊ ညာတ်ယက္ခဟေင် ထဍေင်ညးထပှ်၊ က္တဵုဒှ်မေတ္တာ ဒေဝၜါဂှ်၊ ပိုဲဒးသ္ဍံင်သွာ အာပြာ်လမှ်၊ ပၠေင်ဗ္ဒဟ်ရုပ်ၜါ ပိုဲအာကဵုသၟဟ်၊ မွဲရုပ်စာင်ဗြဴ ရဴဝွံက္တဵုဒှ်၊ မွဲရုပ်စိင်အဵု ဇၞော်ကဵုကြဳဇှ်၊ ပၠေင်ဗ္ဒဟ်ရုပ်ဟာန် နာဲယာန်သၞေဟ်ပြဟ်၊ ဗ္ဒဟ်ရုပ်စာင်ဗြဴ ရဴနွံကောန်တှ်၊ ဇကုဇၞော်လောန် ဒေါန်ဗြုက္ဍဟ်ဟ်၊ ခရာသၞေင်ဂှ် ဒှ်တၟာစက်ကွဳ၊ မွဲရုပ်စိင်ဗိုန် သီုကွိုန်အိန်ရဳ၊ ဟတှိစိင်ဗြဴ တဴဇိုင်ဂၠံင်ပ္ညဳ၊ ပ္ဍဲဍာန်ဒၟံင်ကၞပ် ဂဒပ်သ္ၚဳ၊ ထပှ်မွဲဂၞဴ ညာတ်ဗြဴယက္ခဳ၊ ပရှ်ဇိုင်အဴ ဒြေပ်ဒဴတဝဳ၊ ညာတ်ဍေံစိုတ်ချဳ ဒ္ၚဳညာတ်စာင်ဗြဴ၊ ဒြေပ်လုပ်သီုသ္ကံ တဲခၠံပူဇဴ၊ ..... ယွံမိစာင်ဟိုဲ ပြာ်ပိုဲညိအဴ၊ ကလော်ဗြဴဟေင် ထဍေင်ညံင်ဂၠဴ၊ ပြာ်လဝ်ကောန်ဂၞဴ စာင်ဗြဴယွံမိ၊ စာင်ဗြဴမိင်ဟေင် ပြဟ်ကေတ်နင်စိ၊ ယွံလေဝ်ကောန်အဲ ထပှ်မွဲမိ၊ လုပ်ဗ္ဒသြိုဟ်ယာဲ ပဒွိင်ဒွါဲစိ၊ ပြဟ်လုပ်ကၠုင်ညိ မိဂဒပ်နာဲ၊ ညးထပှ်ကောံ ပ္ဍဲဂၠံသၞေင်ယာဲ၊ ညံင်စာင်ဂ္ဒပ်ကောန် ဃောဟန်ခမှာဲ၊ လရိုအ်ကံက်ကံက် ၜံက်ချောဲဂစာဲ၊ ဂဒပ်လဝ်နာဲ ကောန်ယာဲထပှ်၊ ယက္ခဗြဴဟေင် ထဍေင်ဗက်ပြဟ်၊ မတ်ဍေံဟွံပေင် ဒြေပ်ဟေင်တဆှ်၊ ကၠေံအာပ္ဍဲမတ် ကောန်ဍောတ်ထပှ်၊ ယက္ခသ္ၚဳမွဲ ပ္ဍဲထာဏဂှ်၊ ဟွံညာတ်ကောန်သၟဟ် ထပှ်မွဲမ၊ ညာတ်ဆစာင်ဗြဴ ဗြုတဴကြံကြ၊ ဓဂြလဝ်သၞေင် တၟာပြေင်ဟွံက၊ လရိုအ်ကံက်ကံက် ညံင်ဗီုၜံက်စ၊ နန္ဒာယက္ခ ဖေက်ရစာင်ၜံက်၊ ဒတဴတုဲသၟာန် စာင်ထမှဴတ္ၚံက်၊ ယွံစာင်ၝောံဇၞော် ဗော်စာင်ပစံက်၊ ညံင်ဂဒပ်ကောန် ဇၞော်လောန်ဖေက်ဂၟံက်၊ စမှဴခြးၜံက် ဒညံက်ဒၟံင်တဴ၊ ကောန်အဲထပှ် ဒြေပ်တဆှ်ဒဴ၊ ညာတ်ညိကီုဟာ ကုက္ကတာဗြဴ၊ ဟီုစညိအဴ နာဲတဴဇိုင်ဂၠံင်၊ စာင်ၝောံတေံမိင် ဟွံဂွံသွိင်ရံင်၊ ဟာဲဗြဴယက္ခ ပကၠုင်သၟာန်စံ၊ ဟွံဆဵုဟွံညာတ် ဒတဴနှာတ်မံင်၊ ဒးကဵုတင်က္ၜံင် ထပက်သြံင်ဂြိုဟ်၊ ဟွံတီတဲဟာ က္လေင်အာဗြိုဟ်ဟ်၊ တက်ကဵုဓရဟ် က္ဍဟ်ကဵုတလိုဟ်၊ စဴအာဗြိုဟ်ဟ် ယဝ်ဂိုဟ်လမျီု၊ ဗှ်ေပကၠုင်သၟာန် ဂလာန်အိုဿီု၊ စဴအာကဵုပြဟ် က္ဍဟ်လသာလီု၊ ကောန်မဣဓီု ပဟီုကရောတ်၊ သဳနန္ဒာမိင် တွိင်စာင်ဗြဴသၟတ်၊ လီုတဴမုက်မတ် ဗြဴရတ်ယက္ခာ၊ ရမတ်ဒဇူ နူစက္ခုဒွါ၊ မူညံင်မတုပ် ဗီုဥပ္ပမာ၊ စာင်ဗြဴတုပ်ရ သဳဟရာဇာ၊ ဟွံစမုက်အဵု ကဵုသုနက္ခာ၊ မိသဳနန္ဒာ ဖေက်အာစာင်ဂှ်၊ ညံင်သုနက္ခ ဖေက်သဳဟသၟဟ်၊ ပမာသာ်ဂှ် တုပ်သၟဟ်ညဳသာ၊ မိကလော်အဴ ဖေက်စာင်ဗြဴကၠာ၊ ကလေင်စဴအာ၊ ပ္ဍဲကာလဂှ်၊ ဗွဲပရှ်သ္ဍာံ ဇိုင်ဂါံတဆှ်၊ သဳနန္ဒာဂှ် ပြဟ်စိုပ်နန်ကၠတ်၊ တိုန်တူဟဝ်သၠုင် ရံင်ကၠုင်အိုတ်မတ်၊ ဍေံဟွံညာတ်သၟတ် ပၠောတ်ဇကုဂၠဝ်၊ လတူဒေန်ထဝ် သ္တိက်ဂၠဝ်တဴတုန်။ ။

စာင်ဗြဴမဒှ်ဒေဝတဴ ထဍေင်ကၠေံကလော်ဗြဴတုဲ သၟတ်ဗြဴဝုတ်ထပှ် မဂွံဗၠးပရိုက်ဘဲလွပ်။ ကလော်ဗြဴမိသဳနန္ဒာ ဆံင်ဗက်ရပ် သၟတ်ဗြဴဝုတ်ထပှ်ပၠန်တုဲ ဆဵုဂဗဒး စိင်ဒေဝတဴ။

တေံကလော်ဗြဴ စဴအာတုဲရ၊ အဏံတုန်အဴ စာင်ဗြဴဒေဝ၊ ပၠးကၠေံသၞေင်ရ ကာလဂှ်ကျဝ်၊ ညာတ်ညးထပှ် ရုပ်သၟဟ်ထဝ်၊ အာရရုပ်ထဝ် မိတဝ်စရှ်၊ နာဲညးထပှ် ခါဂှ်ဂွံမိင်၊ လပှ်ဨရာ သပါတဲဗျိင်၊ တူဒလာင်ကၞေင် စွံပြေင်လဝ်သွိင်၊ ကလံမိဂၞဴ ကောန်ဗြဴဗၠးဒွိင်၊ ကောန်ဂွံသိုက်လှိင် ဗၠးဒွိင်ရမိ၊ ဂးသာ်ဂှ်ဟေင် ပ္ဍဵုကၞေင်ဒဵုတိ၊ သာဓုသာဓု သတြုပါဲညိ၊ အန္တရာဲယေ ၀ိနာသေတိ၊ ဇၟာပ်သတြုကၠာ ပကဵုပါမြိ၊ တိုင်ဂနပ်စိုတ် ကဵုဒှ်အိုတ်ညိ၊ သတြုသ္တုံဇွိ ကဵုပါဲညိကောန်၊ ဗြဴကုက္ကတာ မောဒနာပၠန်၊ မောဒနာတုဲ ဟွံသဏုဲခၠန်၊ ညးထပှ်မာ တွာ်အာယောန်ယောန်၊ မိစာင်ဗြဴပၠန် ကၠေံဗဒန်အာ၊ ..... ညးထပှ်ကၠာ ကြာဟေမဝန်၊ ကြိုင်ဂနိင်အာ ကာလဂှ်ပၠန်၊ ဆဵုအင်ဆဵုလှာ ဆဵုဝါဇခန်၊ ဆဵုဂြိုပ်ဆဵုဂၞိင် ဂမြိင်တန်တန်၊ ဆဵုတၟံသမၠုင် ဒဵုလဂုင်ညန်၊ ဆဵုဇီုလဂေါဝ် ကြင်ကြောဝ်အာပၠန်၊ ဇခန်ဇခန် ဂၠိုင်သန်ပြကာ၊ ဇၞတ်အာတဴသၟဟ် ညးထပှ်ကၠာ၊ ထပှ်တ္ၚဲမာ ခြာနူစာင်ဗြဴ၊ အာတဴဒေါဝ်ဂြိုပ် ဗဒိုပ်တရဴ၊ ဍောင်ၜိုတ်ဇူတဴ တရဴဂှ်ပၠန်၊ ဇူဖဲက္တဵုအာ ကြာဟေမဝန်၊ ဂါံတွာ်မွဲတဲ နဲကောန်ၜိုပ်ၜင်၊ တွာ်အာသိုက်က် ဒဒိုက်ရိင်က္တင်၊ လဆောဝ်ပေင်ဂၞဴ လဆောဝ်လဴကြင်၊ လဆောဝ်အေင်အောတ် သစ္ဆုဂွံနင်၊ ဂွံပပြဘိုက် ဒဒိုက်ကောန်ကၠင်၊ ဆဒးဂေင်ကြင် ကောန်ကမၠင်ယာဲ၊ တွာ်ဍောင်တုဲဇူ ဇနူဗိုင်လာဲ၊ သၟဝ်တၞံဆုရ ရုက္ခမိဗ္ဒာဲ၊ လပုဟ်တဲယဵု တူကၞေင်ယဵုကွာဲ၊ သီုထပှ်ဗ္ဒာဲ တံဒၞါဲရုက္ခ၊ ညံင်က္ၜင်မအာ ဂင်ဗာလဝ၊ ဟွံတီဒိုဟ်ကၠင် ဒေါဝ်ဂင်ဟေမ၊ ညးထပှ်ရ ဂတအာတဴ၊ ... သဳနန္ဒာဂှ် သမ္ၚဟ်တိုန်အဴ၊ တူဟဝ်တိုန်မံင် ဍေံရံင်ဗက်တဴ၊ သီုပန်ဒိုဟ်သ္ဍာံ ဒစာံဒိုဟ်နှဴ၊ တုဲဍေံညာတ်အာ မိကညာဗြဴ၊ သဳနန္ဒာအဴ စှ်ေတဴနူဟဝ်၊ ပၠဣဓိသာင် ညံင်ကလာင်ပဝ်၊ ပရှ်ညံင်စက် ဍေံဗက်ကြတ်သ္ဂဝ်၊ စောန်စောန်ညာတ်တဴ ဗြဴထပှ်ကျဝ်၊ ညးထပှ်ဟေင် ကလေင်ရံင်ကျောဝ်၊ ညာတ်ဍေံဒြေပ်ဗက် ပလက်ဍေင်ဇွောဝ်၊ ဗြဴထပှ်ကျဝ် လင်ဇွောဝ်ဒြေပ်ပြး၊ ဂွံညာတ်စိင်ဗြဴ ဒဴလုပ်အောပ်ဗ္ဒး၊ ရီုဍိက်ညိအဴ စိင်ဗြဴယွံမၞး၊ ယွံမိဟတှိ သိဒ္ဓိပြဲသအး၊ ပြာ်ပိုဲမွဲဝါ ယက္ခာဗက်ပြး၊ ယဝ်မိဟွံရီု လမျီုဂတး၊ လမျီုပိုဲပြဲ ဟွံမွဲလှာဲၜး၊ ဍောင်လပဂး ပြာ်ဗလးညိ၊ စိင်မိင်ပါင်ပြဲ ထပှ်မွဲမိ၊ ပြာ်ညးထပှ် ဗ္ဒဟ်ကြုတ်ဏာညိ၊ ဟွံပြာ်မဂး သ္ဒးလီုဇိဝိ၊ ဒှ်အရှန်မွဲ ဂွံဇြဲဗောဓိ၊ ပစၞးမိ ပြာ်ညိမွဲဝါ၊ ဒေဝစိင်ဗြဴ မိင်တဴသေင်ဟာ၊ ယွံမိကောန်ဂၞဴ ဗြဴသိုက္ခမာ၊ လပဒွိင်ဒွါဲ ယာဲဟီုဆေဝ်တာ၊ လုပ်မံင်ဂၠံသာင် ပ္ဍဲပါင်ပြဲဖာ၊ မိခၜံလဝ် ကောန်ဗြဴထဝ်ဏှာ၊ ပ္ဍဲပါင်လုပ်သ္တိက် စဵုဇနိက်ဇာ၊ ညံင်လုပ်ရကောန် ဍေံညန်စိုပ်ကၠုင်၊ စိင်ဗြဴပံက်ဟာ ပါင်တၟာန၊ ညးထပှ်ပ္ညပ် ဒြေပ်လုပ်အောပ်ဗ္ဒ၊ ပ္ဍဲဂၞဴစိင်အဴ ဒၟံင်တဴသ္ၚိတ်ဇြ၊ ... ဒေံဒဒေံမွဲ ယာတ်ဍောတ်ပြဲဂၠ၊ လကဲတိတ်ဒၟံင် ရံင်ဒှ်မွဲသ္ဍ၊ ကလော်ဗြဴပၠန် နန္ဒာယက္ခ၊ ဍေံညာတ်ရ ကာလဂှ်ကၠာ၊ ဒၞါဲ၀ွံတုန်ကွေံ ကောန်ဍေံကၠေံအာ၊ သီုထပှ်မာ ကၠေံအာပ္ဍဲမတ်၊ ဗက်ဂၠါဲအဆတ် ကောန်ဍောတ်ရုပ္ပ၊ ဗြဴမှာယက္ခ မိညာတ်ဆစိင်င်၊ ကၠေံအာမွဲတဲ ပ္ဍဲဒၞါဲဝွံအိင်၊ သ္ၚဳရံင်နမတ် မုဟ်ယာတ်ဍောတ်ဂၠိင်၊ တိတ်ဂၠိင်လကဲ အပ္ဍဲပါင်စိင်၊ ဂါံတွာ်လုပ်သၟာန် နာဲယာန်ဂြိုပ်ဂၞိင်၊ နာဲတဴဇိုင်ဂၠံင် ဒှ်ဒၟံင်လဟိင်၊ နာဲတံဒှ်သၟီ စိင်ဗြဴဆဒ္ဒန်၊ အဲညာတ်ညိရ နာဲပထလန်၊ ကောန်အဲထပှ် ရုပ်သာ်သၟဟ်န်၊ ဆဵုညာတ်ကီုဟာ ဗြဴမှာဆဒ္ဒန်၊ ဟီုစညိပၠန် မိဆဒ္ဒန်ဗြဴ၊ စိင်ဗြဴဂွံမိင် သွိင်လက္ကရဴ၊ ကတောဝ်ခ္ဍေါပ်ကၠေံ ဇိုင်ထေံတိအဴ၊ ပါင်လပှ်ဂၠံက် တဲထံက်လက္ကရဴ၊ မုက်ပလှ်ေတဴ စိင်ဗြဴဟတှိ၊ လပှ်ဂၠါံဂါဲ ဂၠါဲရပ်တၟံတိ၊ အဇဗိုတ်ကၠဟ် လေံတနှ်ဂ္ညိ၊ အုဲတိလယှ် က္ဍိုပ်က္ဍဟ်ကၠိုက်ကၠိ၊ ကရေဲရမျာင် ကဵုပါင်ညံင်ဂျိ၊ ဟိုဲဗြဴယက္ခိ ညိဟွံတီဟေင်၊ ဂၠံင်အဲဝွံအဵု သီုကဵုဂၠဴပြေင်၊ မၞိဟ်ကဵုဒှ်ပြဲ ဆဵုအဲထဍေင်၊ အဲဟွံဆဵုဟေင် ပကလေင်သၟာန်၊ ဗှ်ေပကၠုင်ဒြဟ် ပဗ္ဒဟ်ဂလာန်၊ ဗှ်ေပကၠုင်ပၠေဝ် အရေဝ်ဟီုကြာန်၊ ပဗ္ဒဟ်ဂလာန် ဗှ်ေပသၟာန်ညိ၊ ဟာဲဣပါပ ယက္ခဗြဴဂျိ၊ ကလေင်ကၠေံပၠန် ဗှ်ေသ္ကန်ဇိဝိ၊ အဲသြာ်ဒဳၜါ ချိုတ်ဗၠိုက်ကြာတိ၊ စိင်ဗြဴထဍေင် ဝးကၞာင်ကြေင်စိ၊ ကလော်ယက္ခိ ဖေက်ညိဟသေင်၊ ဟာဲမိစိင်ဗြဴ တဴပ္ဍဲဂြိုပ်ကြေင်၊ မုသာစဏာဲ ဂၠါဲဟီုတၟေင်တၟေင်၊ ဗှ်ေမုသာဟေင် ပါင်ညံင်ပြေင်ဂၠဴ၊ ယာတ်ဍောတ်လကဲ ဗှ်ေလဝ်ပ္ဍဲဂၞဴ၊ ယာတ်လကဲဒၟံင် ရံင်ရစိင်ဗြဴ၊ ဗှ်ေဟီုဟွံဓဝ် ဒေပ်လဝ်ဝဴပဴ၊ နူဝွံဆတ္တဝ် အဲလဝ်ကသဴ၊ ပါင်ကဵုလကဲ ဂတဗွဲကြဴ၊ ကလော်ဗြဴချဴ ညံင်ရဴသာ်ဂှ်၊ ကဵုပါင်လကဲ နဲဂှ်ကဵုဒှ်၊ ဇၟာပ်ဘဝဂှ် ကဵုဗှ်ေဒှ်ညိ၊ ကဵုလဝ်ကသဴ ဗြဴမှာယက္ခိ၊ ဒဵုလၟုဟ်စိ ညိဟွံမှာဆာဲ၊ ဒးကသဴဗျိင် ပါင်စိင်တလာဲ၊ တိတ်လကဲဒၟံင် ညံင်ကဵုသ္ၚိသာဲ၊ ကောန်ဗြဴထပှ် ဒဒှ်ပျဲယာဲ၊ ဒဒှ်အဲလွဳ ကျာ်သြဳဂေါဝ်ဆာဲ၊ အဲကဵုကောန်ဂှ် ဒှ်ဝဲရနာဲ၊ ဍေံဒတောဝ်ဝဲ ပ္ဍဲစိင်ဂှ်ဆာဲ၊ ဒဒှ်လွဳနာဲ ယာဲဒးကင်ဇတ်၊ ကဵုဂွံဂၠံက်သၟတ် မတ်ညးထပှ်၊ ကဵုဂွံဂၠံက်ပြဟ် ဘဴလၟုဟ်ညိ၊ တုဲကလေင်စဴ ဗြဴမှာယက္ခိ၊ ဍေံတ္ၜေဟ်ဟီုဗျိ ဟတှိစိင်ဂှ်၊ အဲကလေင်စဴ ရဗြဴတင်စှ်၊ မုဟ်ယာတ်ဍောတ်ဂှ် ကဵုဒှ်ပါင်စိင်၊ အဲစဴရၝာဲ ဟာဲမုဟ်ပါင်ဂၠိင်၊ စိင်ဗြဴမိင်ဟေင် ထဍေင်ဂြိင်င်၊ ဍေံဒြေပ်တဆှ် ပြဟ်လောန်နူစိင်၊ နန္ဒာဟိင်ဟိုပ် စိုပ်နန်ဇမၠိင်၊ ဒေါဝ်ကမၠောန်ဍိက် ပိုက်ပၞိက်လွိင်၊ တူနန်ဒြင်စိင် သိုက်လှိင်တဴတုန်။ ။

သၟတ်ဗြဴဝုတ်ထပှ် ကြိုင်ကြင်အာစိုပ် ဇရေင်ဍုင်ဗြၜင်တုဲ သတိက်ဗတံ ပ္ဍဲဂွိုင်ဇြဲမွဲတၞံ။

လၟေင်ဒဒှ် တဝှ်သဘဴ၊ အဏံစိင်ဗြဴ ဒၟံင်တဴဇိုင်ဂၞိင်၊ ကလော်ဒြေပ်ဒဴ ကမြဴဂမြိင်၊ ကၠာတ်ပ္တိတ်ဗွဲပြဟ် ကာလဂှ်ဗျိင်၊ ဗြဴရတ်ထပှ် ဂွံဒှ်လဟိင်၊ ၜိုဟ်စိုတ်လှဲလး ညိဟွံဒးဂွိင်၊ ကြင်ပ္ဍဲဂြိုပ်ဂၞိင် ဗၠးဒဝိင်ဇၞော်၊ ဗွဲဒိုဟ်ပုဗ္ဗ ဂတဗမံက်၊ နွံဍုင်မွဲရ ဗြၜင်ညးကော်၊ ဗဒေသရး ဂၠိုင်ကဵုသွးဗော်၊ စိုပ်ထာန်ဂှ်ပၠန် တန်ဂွံဒှ်ဇၞော်၊ ထပှ်မွဲဗော် ဍောတ်ဇၞော်ညဳသာ၊ အာရပဒွိင် ယာဲစိင်ပ္ညုင်ဏာ၊ ဗက်ပါင်ယာဲစိင် ပဒွိင်ဒွါဲကၠာ၊ ပင်တဲယဵုပ္ကောံ ညံင်ခမှောံသွာ၊ ယွံမိကျာ်ဂန် ဂုန်အနန္တာ၊ ကောန်ကလံရ ပါင်ပဍောင်သွာ၊ လပုဟ်တဲစှ် နဲဒကှ်ၜါ၊ ကလံရမိ ဖျေံက္ဍိုပ်ပိ၀ါ၊ ယာဲစိင်မိင်ဗိုန် ဟီုတိုန်ဟွံညှာ၊ သာဓုသာဓု နုမောဒနာ၊ တိုင်ပၟိက်သွံ ကဵုနာဲဂွံမြာ၊ တိုင်ပတ္တဏာ ကဵုဂွံမြာညိ၊..... ညးထပှ်ဟေင် ဖျေင်ရံင်ဟတှိ၊ ကၠေံဗဒန်အာ သင်ကာစိုတ်မိ၊ စိင်ဟွံသေင်မာ ဒေဝါရုက္ခိ၊ ဒေဝတဴဂှ် တန်ဒှ်ဒမၠိ၊ ကၠုင်ပြာ်ပိုဲစိ ယွံလေဝ်ဒေံတံ၊ ပင်တဲတယျောဝ် လ္ၚောဝ်တမံ၊ တဲၜါယဵုခၠံ ကလံတုဲအာ၊ ပ္ဍဲဒေါဝ်ဂြိုပ်ဂၞိင် ဗရိင်ဇိုင်ဝါ၊ ဗဵုဆုဒုန်အဴ ဗဵုပ္ကဴနာနာ၊ ဂမုင်ဓိတာန် ပ္ကဴပြာန်စမ္ၚာ၊ မိဂါံတွာ်အာ အကြာဂြိုပ်ဆု၊ ဍောင်ပ္ကဴရာင်ဗွဝ် တဝ်သွဝ်ဇုက်ဂၞု၊ ဒဇေင်ဍိုက်္ၚာန် ထာန်ဂြိုပ်လမ္ၚု၊ ပ္ကဴကြေင်ဇမ္မု အဂၞုရာင်ဗ္ဂာ၊ အနာင်ရာင်ပြီု ပ္ကဴရီုမွဲသာ၊ အင်ရေင်သ္ဇင်ထောဲ လပေါဲစမ္ပာ၊ ညးထပှ်ကၠာ တွာ်အာဟွံဇူ၊ ပ္ဍးတမှာဲပိုဟ် ဖျုန်ဂြိုဟ်ဒတူ၊ ပ္ကဴကလံနန် ခၠန်ထောံဇနူ၊ ပ္ကဴသ္ဍိုက်အိန် ကမိန်လတူ၊ ဗပေင်ဇာတ်ကၠံင် ရာင်ညံင်သိန်လှူ၊ ပ္ကဴညးပုဗှ လှောင်ပၠရာင်အူ၊ ပ္ကဴညးဇံမု ရာင်ဂၠုသရူ၊ ထိုင်သာဲဇၟာပ်ဖူ ဂၠိုင်အြဇရေင်၊ ပ္ကဴညးအမ္ဗာ ရာင်ဗ္ဂာတရေင်၊ ညးဥတ္တရ စိတ္တကၠိုက်လ္ၚေင်၊ ဍောင်ပ္ကဴဂှ်အဵု ဟွံကၠုင်တဵုပြေင်၊ ညးထပှ်ဟေင် ရေင်ရေင်တွာ်တဴ၊ ဂွံအရီုကျဝ် မြမောဝ်ဍောင်ပ္ကဴ၊ သီုစိုတ်လိုက်လဴ တွာ်တရဴပၠန်၊..... တုဲမိအာစိုပ် ဂြိုပ်ဟေမဝန်၊ ဗဵုသတ်ဇိုင်ပန်လီၜန်သီုဆော၊ တ္ၜိုင်ဒြာဲကလိင် စိင်သြိတ်လမော၊ ဇက်ဂၠေါဲခမၞင် စိင်ဒြင်သီုဆော၊ ဂြဲစဗိုင်လာဲ ပယာဲဟေမော၊ ညးထပှ်ရော ဂၠိုင်အြစိုတ်က္တဴ၊ ပြေင်ပြဝါအဴ ဂၠဴဥဿဘ၊ ဗဵုသြိတ်ကလိင် ဗဵုစိင်ဗဵုကၠ၊ ဗၜေံဒြာဲဝါ ဒြာဲသာရဒ၊ ဗဝါမင်ဂဝ် ဗက်ကျောဝ်သတ်ချ၊ ဒြာဲဨဒြာဲကျာ လုံဝါသလ၊ ဒေါဝ်ဂြိုပ်စိင်ကၠ တွာ်ဂတအာ၊ သီုညးထပှ် သၟဟ်န်ညဳသာ၊ သတ်တလသၞေင် ဍုန်တဴရေင်ဗ္ဂာ၊ တ္ၚေက်ထဝ်တ္ၚေက်ဒြင် ဂနင်ဂြိုပ်ဖြာ၊ စာင်ကၠိုက်လိုက်ထောဝ် ဗြုတဴမှောဝ်ဇာ၊ တက်သၞေင်ဂြဴကြီု ပ္ဍဲလဂီုဖြာ၊ လလောင်ထဥ ဗော်သကုဏာ၊ ညးထပှ်ကၠာ ဗဵုအာလဟိင်၊ တွာ်အာဗဵုအာ ခန်လွာဂြိုပ်ဂၞိင်၊ စိုပ်အရှာံတုန် ဆုဒုန်ဂမြိင်၊ သၟဟ်ကဵုဥဒျာန် ဂြိုပ်ထာန်လဟိင်၊ သတ်ဆုရေင်သ္တိင် ဍုဟ်ဗျိင်သီုတၞံ၊ ပၞဟ်မိန်ကျာဲ တမာဲလဝ်ဗံ၊ ဓရေဲဍုဟ်ဆက် သတ်ကွက်ကမၠံ၊ ဒူရေန်ဍုဟ်ဂျ ဇလဗိုင်ခြံ၊ ကွိတ်သီုဗဳဗၠတ် သတ်ညံင်မကံ၊ သဳလောလဳမှဴ ပၞဴဍုဟ်ဗြံ၊ ဗဗုင်ဒဟာ် ပဏာ်ပေင်တၞံ၊ လကီုလကံ ကသံဗဝး၊ ပၞဟ်ပဏး ဗဝးကြုက်ဖာ၊ မေံကၞုဲဗဗုင် သတ်ပ္ဍုင်မွဲသာ၊ သတ်ဇူဟွံဖဲ သတ်ပသဲမာ၊...... သတ်မွဲပါင်ဂၠုင် သရုင်ဂင်ဂါ၊ သတ်ဒးနရက် သတ်ပၠက်ညးကၠာ၊ သတ်ၜိုဟ်လောန်ပ္ညုင် သတ်သၠုင်လောန်အာ၊ သတ်မွဲတုန်သၟတ် ထတ်သန်ရဟ်သာ၊ ကြံင်ဖျိုတ်ဍုဟ်ဖျး ညးညာတ်ဟောဒြာ၊ သုက်ဍာ်က္ဍာတ်ကျဝ် တုပ်နဲသ္ကဝ်တာ၊ သစ္ဆုနာနာ ထာဏအဟံ၊ သစ္ဆုဂၠိုင်တၞံ ဍုဟ်ဗြံဖလ၊ ကၞုဲဂင်ဟောဝ်ၜှ် ပြဟ်နူသာခ၊ ညးထပှ်ရ လပှ်စအာ၊ ၚးကၞုဲဂင်သွံ ဂွံပအဟာ၊ ဍောင်တုဲဇူကောံ သီုရောံပြဝါ၊ ပပြဘိုက်ဖဲ ဍောင်ဟဲတုဲအာ၊ ညးထပှ်ကၠာ ကာလဂှ်ရ၊..... စက်တ္ၚဲထဲစှ်ေ ဒိုဟ်တ္ကံအမ္ဗ၊ ကၠေံလဝ်တ္ကံဝွံ ဇမ္မုဒိပ္ပ၊ ပါန်ခဳချူဗ္ဂောဝ် ပယျောဝ်ကာသ၊ ဂစေံပဝ်သၟတ် နန်ကၠတ်ရုက္ခ၊ ကဝှပဝ်တိတ် ဂမိတ်ဂၠါဲစ၊ ဗြဴဖံက်သေဝ်ပန် ပၠန်စဴသ္ၚိရ၊ ဂၠဴသ္ကံဂမၠိုင် လုပ်ခြိုင်တလ၊ သရက်ဒက်ထိုင် ဂိုင်စုတ်ဗံန၊ ရေသူသီပၠန် ထဝ်သြန်ကာပ်သ၊ ဒေါင်ပၠဳဟွံၜုင် ဃောဟာပ်ပုင်သွ၊ ဒမာတ်ဟွံကေပ် ဂိုင်ဒေပ်ကာယ၊ ဒဇဲဂၞိင်ကွိုင် ဂိုင်ဝါစဳမြ၊ ပါန်ပုတ်တပ်ပၞုတ် ဟွံပုတ်ပ္ကဴသၠ၊ ပါန်ခဳဒေပ်ဂၞါ ဍာ်ဒွါဒသ၊ သၟာခတ်ပး ဗၠးနူဒွက်ရ၊ သမုင်ထောံပေန် အေန်ဇာကြံကြ၊ လဗင်ကမၠတ် ဗ္ဂံင်မတ်သုင်စ၊ မံင်ဗၠးထဏိက် ဆုဍိက်တလ၊ ဂအဳသလး ဗၠးနူဘဲလ္ၚ၊ တဏာဲဟွံဂုံ တုံဟွံသူစ၊ ဂြောဝ်ဒေပ်ထမှာဲ အမာဲဖျုန်က၊ စာင်တိုန်သ္ၚိဒၞါဲ ဟွံအာဂၠါဲစ၊ မင်ဂၠန်တလုဲ ဒကုဲလှိင်သ္ဒ၊ လပေါဝ်ထအာပ် သၟိက်တိက်လ္ၚာပ်ထ၊ ဇိုန်ဗဳတခါတ် ဂလီုယာတ်သၠ၊ မာတ်ဒးကာလ ဂၞကျာ်ထပှ်၊ ဂါံတွာ်ညှာညှာ ပ္ဍဲကာလဂှ်၊ သီုညးထပှ် ဒှ်တဴဒေင်ဗျောံ၊ စမဳရံင်မွဲ ညာတ်ဇြဲသဓောံ၊ ညးထပှ်ကောံ လောံလာဲဟောံဇြ၊ ဗွဲပြဟ်လုပ်အာ သၟဝ်ဇြဲသာခ၊..... ဇရေင်ဇြဲဂှ် ပဒှ်ဒေသ၊ နွံလစမွဲ ပြဲသန်တေဇ၊ ဍာ်သ္ဇုင်တဴပၠန် ကၠေင်ကၠန်ဟွံက၊ ပ္ဍဲဍာ်လစ ပဥ္စမာလဳ၊ ဒကှ်ဥပ္ပဵု ရာင်ဂဵုတဝဳ၊ သ္ကံက်ဟင်ရံဒွေင် ဗၞူရေင်ဖဳ၊ လစံင်ရာင်ဂဵု ဥပ္ပဵုတဝဳ၊ ဇိုင်ပေါက္ခရ လစကျာ်သြဳ၊ ပ္ကဴဍာ်ပ္ကဴကၞဳ ရာင်တဝဳစု၊ ညးထပှ်ကၠာ ကြာသမၞိင်ဆု၊ ပ္ဍဲသၟဝ်တၞံဇြဲ တူယဲလမ္ၚု၊ သီုၝဲဒေံဝွံ လ္ၚုဂၠိုင်အြ၊ ပ္ဍဲပဉ္စမာ လၜိုဟ်ကာယော၊ သီုၝဲဒေံပြဲ ထပှ်မွဲအြ၊ တုဲဂါံစှ်ေအာ ပ္ဍဲကမာရော၊ မိပက်ပ္တိုန်ဍာ် ဂၠိုင်သာ်အယော၊ လာင်မုက္ခဝါ ဗရဲကာယျော၊ ပ္တိုန်ကျာသြဳရော အယောသ္ဇုင်ဂွု၊ တိုန်ၜးလှာဲကၠာ ကြိယာဇကု၊ ဗၠးနူကၠိကၠိုက် ဒှ်သ္ဍိုက်ဇံမု၊ သီုညးထပှ် တွံသၟဝ်တၞံဆု၊ သၟဝ်တၞံဇြဲဂှ် ထပှ်ဇကု၊ သ္တိက်ဒီုတဴသၟတ် ဖေက်ဘဲသတြု၊ သီုထပှ်စု သာ်ဝွံဟီုပါန်၊ သီုဖအိုတ်ရ ပအဒိထာန်၊ ယွံဒေဝပြဲ ပၟင်ဇြဲယာန်၊ ပိုဲညးထပှ် ကၠိုက်ကၠဟ်ဂျိက္တာန်၊ မပိုဲပၠေဲထောံ ကၠောံဂြိုပ်ဓိဝါန်၊ စဴသ္ၚိဟွံစိုပ် ဗဒိုပ်သန္ထာန်၊ ဆဵုကလော်ဗြဴ နုဘဴလောန်လာန်၊ ပိုဲဒၟံင်ဖဴဍေံ ညံင်ကောန်ကွေံကြာန်၊ ပိုဲတီကလော် ဗော်ယက္ခပ္ကာန်၊ ဖေက်တုဲဒြေပ်ဒဴ လဴဇိုင်ဂစာန်၊ ဒြေပ်ကၠုင်ဒေါဝ်ဂြိုပ် ဂၠိုပ်ဗဒိုပ်ထာန်၊ ဍေံဗက်ဂစာန် မွဲဟာန်စိုပ်ကၠုင်၊ ပိုဲဆဵုစာင်ဗြဴ မိဂၞဴပြာ်ဒုင်၊ ဗၠးဘဲယက္ခ မွဲဝါရပ္ညုင်၊ ကြဴပိုဲတွာ်ကၠုင် သရုင်ကန္တာ၊ ကလော်ဗြဴဆံင် ဗက်ညံင်နဲကၠာ၊ ဆဵုစိင်ဗြဴမွဲ သကဲဂြိုပ်ဖြာ၊ ပိုဲအာလွဵု ကဵုစိင်သေင်ဟာ၊ လုပ်ပ္ဍဲပါင်အဴ စိင်ဗြဴဂှ်ကၠာ၊ ဂွံဗၠးဘဲဟေင် ကလော်သေင်ဟာ၊ လမုဟ်ပိုဲစိုပ် ဗဒိုပ်ဝွံမာ၊ ဒေဝတဴဇြဲ ပိုင်ဇြဲသာခါ၊ ကျာ်ဖျေံမေတ္တာ ရီုမွဲဝါညိ၊ ဂးတုဲဗြဴရတ် ပတ္တဏာစိ၊ သတြုဝဲသၞ ပကဵုပါမြိ၊ ဗိုင်ရီုဗင်စိ ပိုဲဍိက်ညိအဴ၊ တုဲဒေဝဇြဲ ပ္ဍဲဂှ်သဘဴ၊ မိင်ညးထပှ် ပါန်ဒြဟ်ဇဝဴ၊ ဒေဝတဴဇြဲ မပြဲနုဘဴ၊ ပ္ဍဲဂွိုင်ဇြဲအဴ ဖျဴစွံလဝ်ရ၊ ဗၠးပရိုက်ဘဲ သတြုဝဲသၞ၊ မင်မွဲတဴရ ကာလဂှ်တုန်။

သၟတ်ဗြဴဝုတ်ထပှ် သ္တိက်ဒီုဒၟံင် ပ္ဍဲဂွိုင်တၞံဇြဲမွဲတၞံ ဇရေင်ဍုင်ဗြၜင်။

ပ္ဍဲကာလဂှ် ပဒှ်သဘဴ၊ တ္ၚဲလေဝ်ပၠိုတ်အာ လောန်ကာလသွဴ၊ ပ္ဍဲဂွိုင်ဇြဲရ လုပ်ပဒတဴ၊ ပ္ဍဲစိုတ်ဒမြဴ သီုဗြဴထပှ်၊ ကၠင်ဟဳပှ်လှ် ရမတ်ပြဟ်တိတ်၊ လ္ၚစိုတ်ဂဵုဍာဲ လောံလာဲဇြဟိတ်၊ ပယာံပန်ဂၠု လ္ၚုဆိတ်ဆိတ်၊ ဂစေံတူဆု ဗရုဟွံတိတ်၊ သ္ၚဳဒဝ်တရင် သ္ဍဴခၠင်ဖမၠိတ်၊ ကၟာဲဖလှိင်ကောန် သြောန်န်ဍိတ်တ်၊ တံင်ဇုက်သရေင် ဒွက်ရိုဟ်ရေင်ပ္တိတ်၊ ဟတ်ဂေတ်ဍိတ်တ် ပတိတ်တောဝ်တွဵု၊ ဂမှဳဂြီုဂြီု ဂၠါဲဟီုမ္ၚဵု၊ သြဟ်ပ္တဴမေတ္တာ ရာဒနာကဵု၊ ဗမၞးချပ်ဂြင် ဓုတင်ဂုန်ဖဵု၊ ထယာထဴအဵု ခပဵုကၞု၊ ဖဍောတ်ကြာကွာန် ဒုင်ဒါန်သၠာ်သ္ၚု၊ ထဴဗော်ဇရာ မိန္ဓာညးဗျု၊ ဂၠါဲဒွတ္တိံသ ဇွပ္ဍဲဇကု၊ ဒေါင်ပၠဳဇိုင်ဍုင် ၜုင်မံင်ဒုဒု၊ မာတ်တ္ၚဲမဂၠု မလ္ၚုက္ဍင်၊ စင်ရိတ်စလာင် တာင်ပ္တိတ်အခြင်၊..... ကၟာဲယာံရေဝ်ရောတ် အပေါတ်မကၠင်၊ ထောံသ္ၚိဂၠါဲသၟတ် ကမၠတ်လဗင်၊ ဗဂဲဗက်ဇၟာ ကၞိကြာဗဒင်၊ ဒမြံသ္ကာတ်သြာဲ ဗၜဵုဂၠါဲကြင်၊ တတ္တောဗြုဂါင် ကလေတ်ပါင်က္ဍင်၊ ဒဳဒုတ်ပမိင် တွိင်ပါင်ဂမြင်၊ သတြုဂဍာ် သအဵုသအာ်ပဝ်ကြင်၊ ဇြုံဂၠါဲကၞိကြိုင် ကၠေံဂွိုင်ဥမင်၊ သ္ၚိသလျးဂဵု ကလဵုလိင်ခၠင်၊ ရုဲကၞပ်ကလင် မင်မွဲရပ်ဗ္ဂာ၊..... တက်မွဲသရုင် ညန်ကၠုင်တက်ၜါ၊ လှိင်လ္ၚုသ္ၚိတ် ဒသဒိသာ၊ ဘုတ်ဒေဝတဳ ဂၠါဲသ္ၚဳအဟာ၊ ပြိုတ်ဗြုတသဝ် မင်ထဝ်ပသာ၊ ပ္ဍဲသုသာန်ဇၞော် ကလော်စန်စာ၊ လ္ၚဵုဒက်ဒေါန် ပအုဲကောန်ညှာညှာ၊ တလကွာန်ဍာဲ ဂၠါဲစဂုဓာ၊ ဘုမ္မဒေဝါ ဂၠါဲအဟာလွဵု၊ မဇၞော်ဇျှာသြဲ ပ္ဍဲကာသဇဵု၊ ကလော်ဒရေပ်ပၞာင် တဲလဗာင်ဂဵု၊ ကိုဟ်ဒတုံဗြော် လျးဇၞော်တင်ဃဵု၊ မာတ်စိုပ်သန်ဇျှာ သဂါပယဵု၊ သၞံင်သၟန်ဂဵု လျးလဟဵုဟော၊ ပင်လာဲဍိတ်တ် ပိုက်ပ္တိတ်ဝါယျော၊ လမၠာင်က္ဍဟ်က္ဍဟ် လမှ်အပေါ၊ ပ္ကဴထာင်သၟိက်ပံက် ကအီဗရံက်မြော၊ သၟီစှ်မြဟ်ကျိုင် ပၠလျးဂၠိုင်အြ၊ ဗၞဲက္ဍိုပ်သြဴ ပ္ဍေန်သ္ဍဴတေဇော၊ ပ္ဍဲပထဝဳ ကြေတ်ယာယဳဟော၊ ကောန်ကောန်ၝောံၝောံ ကလောံသီုဆော၊ စတုဒိသော ဃောမလှိင်ကၞပ်၊ ကောန်ဗြဴထပှ် ပ္ဍဲဂှ်ဂြင်ချပ်၊ ဂွံဗၠးဘဲလ္ၚ ဗြဴယက္ခလွပ်၊ ပိုဲအိုတ်ကသပ် ချပ်တုဲဒဴကၠုင်၊ ဒေဝဇြဲကၠာ စိတ္တာသ္ဍိုက်သ္ဇုင်၊ ဗၠးဒဒိုက်ပ္ညုင် ဗၠးဒုင်တ္ၚဲဗြဲ၊ မိပ်သ္ၚိပ်လောန်တဲ ဂွိုင်ဇြဲဒွေတဴ၊ ရာင်ဆာဲဂ္ညိဂၠဴ ယာန်ဒွေတဴဂှ်၊ သီုညးထပှ် တန်ဒၟံင်သၟဟ်တုန်။

ပရူဒဒှ်သၟီနန္ဒကိတ္တိ

နွံဍုင်မွဲပၠန် ဇၞော်သန်အံသဝ်၊ ပဒေသရး ညးဟီုခုတ်လဝ်၊ ထပှ်ထပ်ကျဝ် ကၟာင်ဗဝ်သအဳ၊ ပြာသာတ်သ္ၚိရတ် နန်ကၠတ်တဝဳ၊ ဂၠိုင်ကဵုဘာသာ ဝေါဟာပန်ဇဳ၊ ပန်သာ်ဗရု စတုဓနဳ၊ ဗဵုကၠံင်တမဳ ရးတဝဳဗဝ်၊ ပဒေသရး ညးဟီုခုတ်လဝ်၊ ဂၠိုင်ရတ်ဗွဝ် အံသဝ်ဘောဂ၊ သၟီမပ္ကင်ရင် နန်မင်္ဂလ၊ နန္ဒကိတ္တိ မဂ္ညိနာမ၊ ဂၞကျာ်ဇၞော်ရ အဂ္ဂဟေသဳ၊ ဓဝ်စှ်ပ္ကင်ရင် မင်မွဲအနဳ၊ ရိုဟ်တ္ၚဲလမိုန် သွိုန်ပဉ္စသဳ၊ စှ်တရဴလ္ၚီ မှောင်မှမြီသအဳ၊ သၟီတလလွဳ သြဳအတူလ၊ ပ္ကင်ရင်မင်မွဲ ဗဗွဲဓမ္မ၊ တူပြာသာတ်ပိ သ္ၚိဘိသေခ၊ ပ္ကင်ရင်တဴရ ကာလဂှ်ပၠန်၊ သၟီဇၞော်ကိတ္တိ ပ္ကင်ရင်သ္ၚိနန်၊ ဂၠိုင်သၞာံအခါ ကာလဂှ်ပၠန်၊... ပ္ဍဲကာလဂှ် ပဒှ်လက်သန်၊ ဂၞကျာ်ကဵုသၟီ ပ္ဍဲသမၞိင်နန်၊ ကံနူတမၠာ သၟိက်ကဵုခြာခၠန်၊ က္တဵုဒှ်ယဲပၠန် ပ္ဍဲနန်ဂေဟာ၊ ဇၞော်ကဵုဒြဟတ် ထတ်သောသၞာ၊ သဝ်လေပ်ဗိန္ဒော နဳဒါန်ရောဂါ၊ ကဵုကော်နင်ကၠာ ပ္ဍဲကာလဂှ်၊ ကဵုလွဳပရာ နာဲသာဒိုဟ်စှ်၊ ဂၠိုင်တ္ၚဲစမှ် ယဲဂှ်ဟွံသာ၊ ဂၞကျာ်ဇၞော်ဝွံ မစ္စုတံင်ဏာ၊ သၟီဒးဒေင်ဗျောံ ဟောံဇြလ္ၚာပ်လ္ၚာ၊ သ္တိက်ရောဟွံလှိင် စံင်တူသိင်သာ၊ ဗှ်မိတ်ဇြဟာန် ဆာန်တုဲသြာဲအာ၊ ဒေင်ဗျောံတူယဲ ပ္ဍဲမနောဒွါ၊ ဂၠိုင်သောသၞာ သၟီဇၞော်ရာဇာန်၊ မှောင်မှကမၠောန် အိုတ်ပ္ဍဲသန္ထာန်၊ ညံင်ဇွမတဴ လကဴသုသာန်၊ က္ဍုဟ်ဇအိုန်သန် ပ္ဍဲဂၠံသန္ထာန်၊ သၟီတလဒါန် အာန်တၞာန်စိုတ်၊ ဗှ်မိတ်အလေင် ဟွံကေင်ခြာဂိုတ်၊ ရိုဟ်ဒဒှ်တ္ၚဲ မွဲတ္ၚဲဟွံပိုတ်၊ ဇြဟောံဂၠိုင်ဂိုတ် ပ္ဍဲစိုတ်သၟီဗၠာဲ၊ ရိုဟ်ဒဒှ်တ္ၚဲ တူယဲဇြေဟ်ဇြာဲ၊ ဗှ်မိတ်ဇြဟာတ် ဆာန်တုဲဒးသြာဲ၊ ဗှ်ဒးခြာဒိုဟ် ဖျုန်ဂြိုဟ်ညံင်လာဲ၊ လ္ၚစိုတ်ဂဵုဍာဲ နာဲညးနန်ထဝ်၊ သက္ကုလဟိင် ပ္ဍဲဂှ်သၟီဓဝ်၊ ဒဒိုက်လောံလာဲ လၞီကာဲကဝ်၊ ပဝိုတ်ဟွံဝိုတ် ပ္ဍဲစိုတ်သၟီဓဝ်၊ သီုမလင်ဇွောဝ် တူနန်ထဝ်တုန်။

လၟေင်ဒဒှ် တဝှ်လက်သန်၊ ဒေဝတဴၜါ နူကၠာတေံဂှ်၊ ဗ္ဒဟ်ရုပ်စာင်ပြဲ ရုပ်စိင်မွဲတန်၊ ဒေဝတဴၜါ ညဳသာသၟဟ်န်၊ ဗှ်သဏာပၠန် ကောန်ဗြဴထပှ်၊ ဒဒှ်ပြာ်လဝ် ရုပ်ထဝ်စရှ်၊ ဒိုက်သိုက်ခပ်သီ ဟွံတီဒဒှ်၊ ဒေဝၜါဂှ် ပြဟ်ဗ္စာရဏာ၊ ဂွံညာတ်ကေတ်သၟဟ် ကောန်ထပှ်ကၠာ၊ ကောံဒေဝဇြဲ ပ္ဍဲသြင်ကမာ၊ ဂွံညာတ်ကေတ်ကၠာ ပ္ဍဲကာလဂှ်၊ ကၠုင်ပၠောပ်စိုတ်ဆာဲ သၟီနာဲဒိုဟ်စှ်၊ နန္ဒကိတ္တိ ဣဓိတြဳဇှ်၊ ကၠုင်ပၠောပ်စိုတ်ပြဟ် ခါဂှ်ဒွေတဴ၊ ပၠောပ်စိုတ်တုဲဟေင် ပြဟ်ကလေင်စဴ၊ သန်ထာန်ဒွေတဴ ပၠန်စဴအာတုန်။

ဍိက်ဗြဴမွဲမၞုံယၟုဣလု သၟီနန္ဒကိတ္တိ စကာကဵုတုက်ဍာ်လ္စတုဲ မဂွံဆဵုအာသၟတ်ဗြဴဝုတ်ထပှ် ပ္ဍဲလ္တူကၞာင်ဇြဲ

အဏံသၟီဗၠာဲ နာဲညးမညှ၊ ဒေဝတဴၜါ ပၠောပ်စိုတ်ရာဇ၊ ချိုန်ပၠောပ်စိုတ်တုဲ တြုံလွုဲအဂ္ဂ၊ ကြံသလှောင်ဖူ ဥူမတ်စိတ္တ၊ ပ္ဍဲစိုတ်ပူဆာ စံင်နှာဂြံဂြ၊ သၟီဓဝ်ရာဇ ကာလဂှ်ကၠာ၊ ညံင်မဒးပ္ညဳ ရာဲသဳကၠေင်ဖာ၊ ပ္တန်စိုတ်ဟွံမာန် ဍာန်မနောဒွါ၊ စံင်တူပူဆာ မဟာရာဇ၊ နွံဍိက်ဗြဴမွဲ ပ္ဍဲနန်ဂေဟ၊ မဒုင်ယမု ဣလုနာမ၊ ကဵုတုက်ဍာ်ရ ပြဟ်သၟီစကာ၊ ကဵုတုက်ဍာ်ဟေင် လစသေင်ဟာ၊ လေင်နုင်ကၠဟ်ထဝ် ဒ္ၚဳတွာ်စဝ်အာ၊... ပ္ဍဲကာလဂှ် ပဒှ်သာ်လွာ၊ တေံဗြဴထပှ် သၟဟ်န်ညဳသာ၊ တိတ်နူဂွိုင်ဇြဲ သကဲကမာ၊ လတူကၞာင်ဇြဲ ပ္ဍဲဘုံသာခါ၊ ဂဇံတဴကၠာ ညဳသာသၟဟ်န်၊ ကၞပ်သ္ၚဳတဴရ ကာလဂှ်ပၠန်၊ ဗြဴဣလုမာ တွာ်အာယောန်န်၊ စိုပ်လစပၠန် ယောန်စှ်ေတုက်ဍာ်၊ ဂွံညာတ်ရုပ်သၟဟ် ညးထပှ်ဖျာ်၊ ဍေံမစဳရံင် ရုပ်ညံင်ကျာ်သၠာ်၊ စိုတ်ဣလုရောင် သလှောင်လံက်လာ်၊ သလှ်ေရုပ်ဍေံ ညာတ်ကွေံပ္ဍဲဍာ်၊ ရုပ်ညံင်ကျာ်သၠာ် တုက်ဍာ်ကဵုနုင်၊ ဟွံကြိုက်ကဵုအဲ ဒှ်ပ္ဍဲစိုတ်ပ္ညုင်၊ ဣလုသအဵုသအာ် ဇီုထောံဍာ်နုင်၊ ကလေင်စဴကၠုင် ပညုင်သန်ထာန်၊ ဟွံညာတ်ဍာ်နုင် တွာ်ကၠုင်ဒေါဝ်ဍာန်၊ တၟေင်ပ္ဍဲစိုတ်ပၠန် ကမၠောန်တံသၟာန်၊ ယွံလေဝ်ဣလု တ္ၚဲဝွံကွေံကြာန်၊ ကဵုတုက်ဍာ်သွံ ဟွံဂွံသာန်သာန်၊ တဲသၟးပကာန် ဗှ်ေတွာ်ဟာန်စဴ၊ ဟွံဖေက်ဘဲဒန် သၟီနာဲနန်ပ္ကဴ၊ ဣလုမိင်အဴ စိုတ်ကမြဴသန်၊ ဂွံဍာ်နုင်ပြဲ အာမွဲဝါပၠန်၊ ဂွံညာတ်ရုပ်မာ နဲကၠာမွဲတန်၊ ပ္ဍဲစိုတ်လ္ၚုလ္ၚန် ကလေင်ပၠန်ရ၊ ဗွဲပရှ်ကၠာ စိုပ်ပါသာဒ၊ ဂွံနုင်မွဲတန် ဍေံအာပၠန်ရ၊ ညံင်ကြဴတေံကီု ဍေံဇီုထောံဂၠ၊ နုင်ပါ်ပၠန်ရ ဒေသကမာ၊ ဣလုဂှ်ဟေင် ကလေင်စဴအာ၊ ကမၠောန်တံအဵု ကဵုဍေင်မွဲကၠာ၊ ဍေံပ္ၚောံအာ ဍာ်ကမာပၠန်၊ ရုပ်ညံင်ကျာ်သၠာ် ဍေံဂွံညာတ်ပၠန်၊ ဇီုထောံဍာ်ဍေင် တွာ်တရေင်လန်၊ ဍေင်ဒကးဂၠိုင် ဟွံခိုင်မွဲတန်၊ ကဵုထိုင်သၞာံပၠန် မွဲတန်တွာ်အာ၊ ကၠဵုဍေံနွံမွဲ ဣတံင်လောဲကၠာ၊ စှ်ေဍာ်ကမာ ဇၟာလာဂဗက်၊ ဍေံညာတ်ရုပ်ပၠန် မွဲတန်သက်လက်၊ သလှ်ေရုပ်ဍေံ စိုတ်ဍေံဒှ်ဗက်၊ ဍေံတံင်ဒဇက် ဗြက်ထိုင်ဒကး၊ ဍေံကဵုကၠဵုသွံ တံင်ဟွံဗလး၊ တေံတူကၞာင်ဇြဲ အဝဲပၠေဝ်သအး၊ ညးထပှ်အဴ ဂြိုင်တဴဟးဟး၊ ဣလုဂွံမိင် လွိင်မုက်ဂတး၊ ဍေံမၠာ်ရံင်မွဲ တူဇြဲသာခး၊ ညးထပှ်ပြဲ အဝဲပၠေဝ်သအး၊ ဣလုညာတ်ဒး ပြဟ်ဂတးစဴ၊ စဴပ္တီရာဇ တလနန်ပ္ကဴ၊ ယွံနာဲနန်သ္ဍဴ ဒကဴလစ၊ ဍိက်ဂွံညာတ်ကၠာ တူဇြဲသာခ၊ ရုပ်အဆေဝ်သွဝ် ကောန်ခနှောဝ်ကျ၊ ဂစိုတ်ဒးချိုတ် ဒးအိုတ်ဇိ၀ိ၊ ဍိက်ဟွံတလန် ကဵုနာဲနန်မြ၊ မဟာရာဇ တလနန်ထဝ်၊ ရုပ်သာ်အဝဲ နဲကောန်ခနှောဝ်၊ သီုထပှ်ဟေင် ဂဇံရေင်ကျဝ်၊ ဇိုင်လစဗျာင် ပ္ဍဲကၞာင်ဇြဲထဝ်၊ ဍိက်စဴပ္တီလဝ် နာဲနန်ထဝ်ရောင်။ ။

သၟီနန္ဒကိတ္တိ သီုပၞာန်ပန်ကၞိပ် အာဒုင်ဖျဴသၟတ်ဗြဴဝုတ်ထပှ်

နန္ဒကိတ္တိ နာဲသ္ၚိနန်ထဝ်၊ မိင်ဣလုဟီု အကြီုရုပ်ထဝ်၊ ပ္ဍဲစိုတ်သၟီဓဝ် ချဳလၟောဝ်အာ၊ မိင်ဣလုဟီု သီုကရုတ်ဏာ၊ ပ္ဍဲစိုတ်သၟီကၠာ မူပမာဗီု၊ ညံင်ရဴဒိုက်ဂတ် မြာဂွံရတ်ကီု၊ သီုတ္ကံပန်ဟာန် အိုတ်ထာန်မဇျှီု၊ ညံင်ဂွံပိုင်အာ စက္ကဝါကီု၊ သၟီဓဝ်တၞောဝ်ဗြီု ပ္ကီုနင်ပမာ၊ သၟီကဵုကော်ကၠာ သေဏာဒိပ္ပ၊ ဒကိုပ်ပၞာန်ဇၞော် အမာတ်ဇၞော်ရ၊ သၟီကဵုစဳရေင် ပၞာန်ပန်အင်္ဂ၊ အမာတ်တိက္ခ တလပညာ၊ တဲစှ်ပင်ပ္ကောံ ညံင်ခမှောံသွာ၊ ဗွဲပြဟ်စှ်ေအာ လသာနန်မ္ၚဵု၊ ပၞာန်ပန်ကၞိပ် မွဲဒမြိပ်အဵု၊ ပၞာန်ပန်တွဵု ဂၠိုင်ဗဵုထိတ္ၜန်၊ ပၞာန်စိင်ဗျိင်ဒၟံင် ညံင်သၞံင်သမန်၊ သီုမဒက်လဝ် ဂဟးထဝ်သြန်၊ ပၞာန်ချေံမွဲဗော် အံသဝ်ဇၞော်လောန်၊ ညံင်လလဳဇုက် တူက္ဍိုပ်ယုဂ္ဂန်၊ မဒက်လဝ်ဂၠိ ဂဒံင်သြန်ထဝ်၊... ပၞာန်ကွဳမွဲသာ သအဳဗ္ဂာရေင်ဗဝ်၊ အလာံဍုတ်မြာ် ယာတ်ဗြေဝ်ကြာထဝ်၊ သီုမဗ္ဂန်လဝ် ချေံတၞောဝ်သိန္ဓဴ၊ ပၞာန်တိုက်တုပ်တဴ ရဴသၟန်ဒြုန်၊ သအဳဂၠက်တသုန် ဇိုင်နန်ပုည၊ အမာတ်တိက္ခ တလပညာ၊ ဗွဲပြဟ်တိုန်အာ နန်ပါသာဒ၊ ပ္တီဨကရာတ် နာဲပြာသာတ်မြ၊ ယွံတလတိ ဘုမ္မိပါလ၊ ပၞာန်ပန်ပြကာ မှာသေဏင်္ဂ၊ တုဲဒှ်အိုတ်ရ ယွံတလနန်၊ သၟီကော်ဟောရာ ကာလဂှ်ပၠန်၊ ဟောရာမိင်ဗိုန် ပြဟ်တိုန်စိုပ်နန်၊ ပင်တဲယဵုတွာဲ ကဵုသၟီနာဲမန်၊ ယွံတလနန် အဂ္ဂပညာ၊ မူနွံပၟိက် ကော်ပိုဲဍိက်ကၠာ၊ သၟီဇၞော်ဂွံမိင် တွိင်ပါင်ဟောရာ၊ ယွံဟောရာအဲ မပြဲသာ်လွာ၊ အဲသၟိက်ဂေတ်ဂေင် ဂေၚင်ဂြိုပ်ဝါ၊ တိတ်ဝေင်ဥဒျာန် ထာန်ပဥ္စမာ၊ လၟေင်ဒဒှ် တွံညိဟောရာ၊ ပ္ဍဲဂှ်အစာ ဟောရာကိုန်စက်၊ တုဲဖျေံဂနန် တန်လဝ်က္ဍက်က္ဍက်၊ ဥတ်သြိုဟ်ဂိုတ်နး စ္ဍးစန်လက်၊ ဂွံညာတ်ကေတ်ဗက် ပ္ဍဲစက်ဇာတာ၊ အဒိုတ်မိဟ်တန် စန်ပ္ဍဲဗြိုဟ်ကၠာ၊ အ္ၚာသိင်သၟတ် ကန်ဗုဒ္ဓဝါ၊ ရာဟုနာံစိင် ကုံပသၟီကၠာ၊ ဂုရုမကဝ် သ္ၚိသဝ်ဗိစ္ဆာ၊ ကြကတ်သိုက်ကြာ တိုင်လအာဗျိင်၊ ကိုန်လအာဇိုက် ညးဒိုက်ဒှ်သၟီ၊ ကြိကုန်ကိုန်ဒြ ညိလပဒွိင်၊ တဝါ်ယာကြာ တိုင်လအာသၟီ၊ မရှာတ်ပဒွိင် လဟိင်လာဘ၊ ဂွံသတ်ဇိုင်ၜါ နာဲသာနန်မြ၊ က္ညအာပြဟ်ရ လပသင်ကာ၊ နန္ဒကိတ္တိ ဣဓိရာဇာ၊ မိင်ပါင်ဟောရာ ပ္ဍဲကာလဂှ်၊ ညံင်ဂွံလမုဟ် ဒှ်ပ္ဍဲစိုတ်မ၊ တုဲသၟီကျိုင်ကျဝ် ဗွဝ်ယဿ၊ သၠိုက်ၝောံကိုတ်သၟတ် ရတ်အနက္ဃ၊ သၞာဲခဏံင်ဟေင် ဗြကၞေင်ထဝ်ဂျ၊ ဂၞပ်ရေင်မတ် သၞာ်ရတ်အဂ္ဂ၊ ကၠေံပါသာဒ သၟီဂါံက္ညအာ၊ ဂါံဍိုက်ကွိုတ်ဇၟူ တြုံအတူလာ၊ ပ္ၚောံဥဒျာန် ထာန်ပဥ္စမာ၊ မြီမြီညှာညှာ ပၞာန်ဇက်အာရ၊ အမာတ်သေဏာ သအဳဗ္ဂာရေင်ဂျ၊ ပၞာန်ပန်ကၞိပ် မွဲဒမြိပ်ပၠ၊ ဗဵုဂမၠိုင်အဴ ဗွဲကြဴဂတ၊ ၜါလ္ပာ်လဂူ သ္တုံဇွိမူလ၊ ဍိုန်ဍိုန်လျလျ ဇက်ဂတအာ၊ ပါင်အသံဗဵု ဗရုကြဵုဇာ၊ ညံင်ရဴလအိတ် မှာသၟိတ်ဒြာ၊ ဖံစိတ်ဖံဟဝ် ဖံထဝ်ဂလာ၊ ဖံပုက်ကလုက် မန်ဒိုင်မုက်ၜါ၊ ဖံကၠေဝ်မုက်ပန် ဇရန်ဇရာ၊ ဖံကြေဝ်ဇတိုင် မန်ဒိုင်မုက်ၜါ၊ ဖံပဏံင်ခၠင် အခြင်နာနာ၊ ဖံဒုတြဘိ တိညံင်ကယျာ၊ ထၜးကြာဇဵု ခပဵုခရာ၊ မြီမြီညှာညှာ ဝေင်အာသဘင်၊ သြဳသြဳဂြိင်ဂြိင် ဒဗိုန်ပိင်မင်၊ လလောင်ကမြဴ အသံဂၞဴဂင်၊ သၟီရာဇာဝင် သဘင်နာနာ၊ ဗရုဂမြံ အသံကြဵုဇာ၊ မြီမြီဇက်အာ အကြာဂြိုပ်က္ဍိုင်၊ ဂြီုဂြီုကာန်ကာန် ဗဵုပၞာန်ဂမၠိုင်၊ အကြာဂြိုပ်ဆု ဖံဗြုလတိုင်၊ ဟုပ်ဟုပ်ရိုင်ရိုင် ဒ္ၚဳဇက်ကြိုင်အာ၊ စမဳညာတ်ပၠန် ဥဒျာန်နန္ဒာ၊ ဗဵုဂမၠိုင်ကၠာ ဇက်အာကမြဴ၊ ဗရုဖံမံင် ဗဵုဇက်ကၠံင်တဴ၊ ဗြုကၠံင်တမှဴ အပၠဴဟေမ၊ အာစိုပ်ဥဒျာန် သန်ထာန်လစ၊ သၟီဇၞော်ဂေတ်ဂေင် ဂေၚင်ဒေသ၊ စမဳညာတ်အာ တၞံဇြဲသာခ၊ ထောံမတ်ညာတ်ရ ပ္ဍဲခဏဂှ်၊ သီုစုံပြဝါ ကညာထပှ်၊ သၟဝ်တၞံဇြဲဂှ် သၟဟ်န်တဴရ၊ ရုပ်သာ်အဝဲ ပြဲလက္ခဏ၊ သီုထပှ်ဂေါဝ် အဆေဝ်သွဝ်ကျ၊ မဟာရာဇ သၟီတလနန်၊ ဗ္ဒောံလဝ်ဗဵုပၞာန် ထာန်လစသြန်၊ သၟိက်တီမွဲတန် သၟီနာဲနန်မြ၊ ပြဟ်ဂါံလုပ်အာ ထာန်ကညှာဏ၊ စိုပ်ဗွဲပရှ် ကာလဂှ်ရ၊ သၟာန်ဂွံတီစိ ယုတ္တိဂါမ၊ ယွံမိအဂ္ဂ ရုပ္ပဂေါဝ်လောန်၊ ဟးအဆေဝ်သွဝ် ဗွဝ်လက်သန်၊ သီုထပှ်ပၠန် သၟဟ်န်ရုပ္ပါ၊ ဟွံသေင်ကောန်အိန် နာဲဒေဝိန္ဒာ၊ ဟသေင်ခနဴ တဴလတူကျာ၊ ဟသေင်ခနှောဝ် ဂန္ဓဝ်ကေလာ၊ ဟသေင်ကောန်နာ် လတာ်ဒှ်ၜါ၊ ဟီုကဵုအဲညိ ယွံမိကညာ၊ မူဍုင်မူကွာန် သန်ထာတ်အရာ၊ မိမနာဲရောင် တၞောဝ်လှောင်ဝေါင်သာ၊ ဟီုမိင်ညိကၠာ ယွံကညှာဍောတ်၊ ဂွံမိင်ကေတ်အဴ ပ္ဍဲဂှ်ဗြဴရတ်၊ မိင်သၟီမသၟာန် ဂလာန်မစၟတ်၊ ဟီုတိုန်အဆတ် ဗွဲသၟတ်ယုတ္တိ၊ ယွံဨကရာတ် နာဲပြာသာတ်ပိ၊ ဂးကောန်အိန်စိ ညိပိုဲဟွံဒှ်၊ ဂးကောန်ဓနဴ ဝေင်တဴဒိုဟ်စှ်၊ ဂးသာ်ဂှ်ဟေင် ဟွံသေင်ဒဒှ်၊ ဂန္ဓဝ်တံဂှ် ပိုဲဟွံဒှ်ပၠန်၊ ကောန်ခနှောဝ်ဗြဴ တဴပ္ဍဲတၟံသြန်၊ နာဲဂးကောန်နာ် လတာ်ပိပန်၊ သ္ၚောဲသ္ဍးခြာခၠန် လဂ္ဂန်ကောမိ၊ ပိုဲဍိက်တုန်ပၠန် ကောန်မၞိဟ်ဇာတိ၊ မိပိုဲဍိက်ဂှ် ခြာပှ်လှ်စိ၊ ယီုတံင်ဂြဲဏာ ဒးမှာဇိ၀ိ၊ မပိုဲပၠေဲထောံ စွံပ္ဍဲဂြိုပ်ဂျိ၊ ထပှ်မွဲမိ သုင်ဂျိလောတ်လော၊ ဇၞတ်မကြင်ကၠုင် ဒေါဝ်ဓုင်ဟေမှော၊ ညးထပှ်ပ္ညုင် တွာ်ကၠုင်သီုဆော၊ စိုပ်လစဝွံ လ္ၚုစိတ္တော၊ ကၠုင်ဂဇံကောံ သၟဝ်တၞံရုက္ခော၊ ဟွံမွဲကလော ကၠင်ဨကောဝ၊ သီုမဒေင်ဗျောံ စံင်တူဟောံဇြ၊ ဟိုတ်ဂှ်ပိုဲကောံ သၟဝ်တၞံရုက္ခ၊ သီုမဒေင်ဗျောံ စံင်တူဟောံဇြ၊ ဂဇံဒေင်သၠင် ဇိုင်သြင်လစ၊ ကၠင်ဨကောဝ ရကောရာဇာ၊ နန္ဒကိတ္တိ ရာဇာဓိရာ၊ မိင်လဟီုမိ မိသိုက္ခမာ၊ သၟီစိုတ်စပ်အာ ကာလဂှ်ဗိုန်၊ မိင်လဟီုမိ ပါင်သိဒ္ဓိကွိုန်၊ ပ္ဍဲစိုတ်က္တဵုဒှ် လပှ်အလိုန်၊ ဘဝင်ပိတန် အဝဇ္ဇန်တိုန်၊ သက္ကုသ္ဍဝ် ၀ိညာန်တဝ်ဇြိုန်၊ သမ္ပတိတ်ဆိုန် တိုန်ဒုင်လဝ်ရဟ်၊ သန္တဳဝတှဴ နွံသဘဴသၟဟ်၊ ဇဴတဒါရီု သီုစှ်ထပှ်၊ လဟီုသ္ဇိုင်မိင် ဂွံမိင်တုဲဂှ်၊ ဓဝ်သောမနုဟ် မူဂှ်တုပ်ဗီု၊ ညံင်ၚဴတညင် ပ္ဍဲဥမင်ထီု၊ ကဵုရမျာင်ကီု ဗြုတဴကြဵုဇာ၊ သၟီနာဲဒိုဟ်စှ် နဲဂှ်ပမာ၊ ပ္ဍဲစိုတ်သၟီအဴ သၟိက်ဒုင်ဖျဴဏာ၊ တုဲဟီုတိုန်ရ ခဏဂှ်ကၠာ၊ ယွံမိကညာ သာ်လွာဂဵုမြဟ်၊ မိတ်ဂွိုင်ထဝ်စှ် ထပှ်မွဲမိ၊ ကောသၟိက်ဒုင်ဖျဴ ဒကဴနန်လွိ၊ သီုထပှ်ညဳ ပကျာ်သြဳသ္ၚိ၊ ကဵုပိုင်ကမၠောန် ပ္ဍဲဒေါဝ်နန်လွိ၊ ကောကဵုဒှ်ဇၞော် ပိုင်ဗော်သ္တုံဇွိ၊ ကဵုစဳရေင်စိ သ္ၚိဘိသေခ၊ တူဂတဵုလွိ ဒမၠိကာလ၊ ပသာ်စိုတ်နာဲ မိတ်သဟာဲယျ၊ တုပ်စိုတ်ညိဟာ မိကညာဏ၊ ပသာ်စိုတ်ရ နာဲမှာဲယျရော။ ။

သၟတ်ဗြဴဝုတ်ထပှ် စဴစိုပ်နန်၊ သ္ဂောံဒှ်ဂၞကျာ်ဇမၞော်

ဗြဴရတ်မိပါင် ရမျာင်ရာဇ၊ ပၞာန်သၟီဟောံဇြ ကာကပမာ၊ ညံင်ပၞာန်ဂဍာ် လမာ်တူကျာ၊ ဆမိင်အသံ ပၞောတ်ကံမာံလာ၊ ဗြူပေက်ဒဴအာ ဗွဲမသွာရ၊ ဗြဴရတ်အဂ္ဂ တော်ဆဗစာ၊ ပ္ဍဲမဗစာ သဒင်ဂြာဒါန်၊ ပၠောပ်ရာဇာဒုတ် ကလုတ်ဇြဟာန်၊ ပဳတိမှောင်မှဴ လိုက်လဴဂစာန်၊ မိင်ရာဇာသာန် ဂလာန်ဍိုန်ညံ၊ မယိရုပ်မ ဂၠိုင်ပဝနွံ၊ ဒိုက်စိုတ်အဝိက် ဂမ်အိက်ဂမြံ၊ သၟီဗညာသ္ၚံ လဒံသဝါ၊ ပိယေဟိဒၞါဲ မိက်ဆာန်သြာဲခြာ၊ ဒဒိုက်ဇၞော်ဟေင် ကျာ်တွံသေင်ဟာ၊ ကၠုင်မိင်ကလုတ် သၟုတ်ဒါန်စကာ၊ မယိရုပ်မ ဍုန်ကာယဒွါ၊ ဘဝင်ဟွံသွာ ဖအောဝ်ဏာဝဇ္ဇန်၊ ပညာလေမန် တီလက်သန်ဗိုန်၊ သမ္ပတိတ်ဆိုန် လဗိုန်ပညပ်၊ ပဳတိအလိုန် ဇိုန်တိုန်ထပ်ထပ်၊ သန္တဳဝတှဴ ဇဴတိုန်သမြပ်၊ ဥူမတ်ပညပ် ကသပ်ပိုင်ခြာ၊ သောဗနုဟ်ဗျာပ် သၠောံဂွံလ္ၚာပ်လ္ၚာ၊... မောဟသၠာန်န် ဆဳလဗာန်ဏာ၊ လှန်ပၠောပ်ခပ်ပၠုတ် နန်ထဝ်ကြုတ်ဏာ၊ တံင်လေဝ်ဇွောဝ်လင် သၠဗတင်ဇာ၊ လောဘဒမြိုဟ် ခြံတလိုဟ်အာ၊ ဒလူသၞောဝ်ခိုင် စဵုဗိုင်ဒနာ၊ လောံလာဲမှဝ်ဒွက် ဂြေန်ဒက်ကယာ၊ ဒွက်မသုန်တန် အရီုဗန္ဓာ၊ လ္ၚီမသုန်ကၠံ တၞံကိလေသာ၊ ကၠံဒစာံတန် ဇရှ်ေတဏှာ၊ ဒေါသစိင်ဒွက် မဆိုက်ဗ္ဒက်ကၠာ၊ ဂြေန်ပၠောပ်ပလံင် ရိုင်ဇၞော်သံင်သာ၊ မူညံင်မတုပ် ဗီုဥပ္ပမာ၊ တလယာန်ဒြိင် သၟီဘိမ္မရာ၊ သၟဳသြဳစနြ္ဒ ကောန်ဝုတ်ညးလှာ၊ ပံက်ထာင်တရင် သၟုက်ဗတင်ဇာ၊ သ္ဂေဟ်ထိုက်စရန် မောဝ်သ္တိုဟ်ဂန္ဓာ၊ ၀ါယောဗတုန် ကၠတ်ပၠံပ္တုန်ပအာ၊ ထာင်ဗတာင်ဂြောပ် တလိုဟ်လောပ်အာ၊ တိတ်ဟမာန်ဟေင် ယာန်သြိုဟ်သၞေင်ၜါ၊ ဒဒိုက်ဇၞော်ဟေင် က္တဵုဒှ်သေင်ဟာ၊ သိရိအဂ္ဂ ရုပ္ပဓရာ၊ ဂုန်ရုပ်သၟီဗၠာဲ နာဲယာန်ပါသာ၊ ဒွံဒးထဏီ မတ်ဘိမ္မရာ၊ တိတ်ဟွံဂတာပ် တူယဲလ္ၚာပ်လ္ၚာ၊ မူတုပ်ပမာ နဲဝိကာရ၊ သၟီနာဲသာင်ဒြင် ဇၟူမှာတင်ဂ၊ ဂုန်ရုပ်ဒေင်ဗျောံ သ္ၚိတ်သ္ၚဲဟောံဇြ၊ ဂုန်မပလွဳ သ္ဂုတ်ဓဝ်သဳလ၊ မိသိုက္ခမာ ရုပ္ပါဓရ၊ ဘက်သွက်နာဲကၠာ မဟာရာဇ၊ နန္ဒကိတ္တိ ဣဓိမူလ၊ ဗိုတ်ပးသ္ဍာံပြ ဟွံပၠဇကု၊ သၟဝ်တၞံအသုက် ကှ်ေပြာန်ဇုက်အဂၞု၊ ဒးမွဲဗရု စိင်စက္ခုဒွါ၊ ဂြေန်လဝ်ဗိုန်က္ညန် ပဥ္စဗန္ဓာ၊ စိင်ဓဝ်ပဳတိ ဇၞော်သိဒ္ဓိကာ၊ တူဗိုင်လာဲတုန် တိုန်ပ္ဍုန်သၞာ၊ လွောင်စန်စရာင် ဂၟါ်လဗာင်တာ၊ သတိသရီု ဗတဲလီုမှာ၊ ဓဝ်ဟိရိရောင် ဟွံလီုယောင်ယာ၊ အကုသလာ စိုတ်စှ်ၜါသြပ်၊ ပၞာန်စိင်မွဲဒပ် ဇက်တိုန်ထပ်ပ္ဍဵု၊ အဟိုတ်စိုတ်ကၠုင် ဒုင်လဝ်ဒစဵု၊ ပၞာန်ချေံသီုဗဵု ဇက်တသဵုလန်၊ ကာမစိုတ်ရ စမြဒညန်၊ ပၞာန်စိင်မွဲဒွန် ဇက်ဗ္ဂန်တသဵု၊ အရုပ္ပါ၀ စှ်ၜါသ္ဍဗဵု၊ ပၞာန်ကွဳထပ်ပ္ဍဵု ဇၞော်တင်ဃဵုသန်၊ စတုရင်ဂ သေဏင်ဂဗ္ဂန်၊ သရုပ်စိုတ်ပၠန် စှ်သုန်လန်ဂၠါဲ၊ ကၠဂြိုပ်တွာ်သြာဲ ဂၠါဲတွာ်စနုတ်၊ ပန်စှော်ခပ်ပၠုတ် စိုတ်လောကုတ္တဵု၊ ဒပ်ဇၞော်သီုဗဵု ဇက်တသဵုဂၠေါဲ၊ ကၠံၜါစှော်မွဲ စိုတ်မွဲဒမြိပ်၊ မှတ်ဟုပ်ဒွါန်သိပ် မွဲသမြိပ်မတ်၊ စမြေံဖဍတ် တူလှေက်ဗတ်သ္မာ၊ ဗတိုက်ဗစိုတ် ဗြူလကိုတ်အာ၊ သၟီဍုင်ပညာ ယာံပေက်အာတုဲ၊ လဇုဲတလုဲ ဒှ်ဂၠုဲလၞီ၊ ကၠုင်လကိုတ်တီ စိုတ်သီဟဇဴ၊ ဇကၠိုက်လမော ဂြိုပ်မနောဇဴ၊ ဂဇံသ္တိက်သ္တင် စင်ကြံဒတဴ၊ ဂုန်သၟီကောဂၞဴ ဒှ်တဴနရာတ်၊ ရုပ်မသ္ဇက်တောံ နူမဂွံညာတ်၊ ဒွိင်ဘင်သၠင်ဒြာတ် ဂြိုဟ်ညံင်ခွါတ်ထောံ၊ ဗြဴထပှ်ကောံ သၠင်ဗျောံထၜေါံ၊ အိန်ယာပန်စွံ ဂၠါဲဟွံဂွံမွဲ၊ ပဟဲဟွံဟဲ ဂၠေါဲသက္ခဏ၊ ဒ္ၚဳသၞာန်အာ အလုံကာယျ၊ ဗြဴရတ်အဂ္ဂ တလစရာဲ၊ ပ္ဍဲစိုတ်လဟိင် ဂွံညာတ်သၟီဗၠာဲ၊ စံင်တူလောံလာဲ ဂွံဗၠးသြာဲအာ၊ ပဳတိသ္ဍိုက်ဆာန် ဇြဟာန်မေတ္တာ၊ ထပှ်မွဲသာ ရုပ်သာပြာကတ်၊ ဂကောံသၟီဇၞော် ဗော်ရာဇာဝတ်၊ သ္ဍိုက်ဆာန်တဴသၟတ် ဗြဴရတ်သေင်ဟာ၊... သၟီဇၞော်ရာဇာ ကာလဂှ်ပၠန်၊ ကော်အမာတ်ပန် သၟီနာဲနန်ဒြင်၊ ကဵုစဳရေင်လဝ် ၀ဝ်ထဝ်သြန်ဟေင်၊ တုဲကဵုစွံပြေင် လမေင်အတာ၊ ကွဳကဵုကွဳဟေင် ဒၟံင်တရေင်ဗ္ဂာ၊ စိင်ကဵုစိင်ဂၠေါဲ စဳရေင်မွဲသာ၊ ချေံအသာချေံ ပလှ်ေကၠုင်အာ၊ ပၞာန်တိုက်မွဲသာ သ္အဳဗ္ဂာရေင်ဗဝ်၊ အလာံဍုတ်မြာ် ယာတ်ဗြေဝ်သာ်ထဝ်၊ လွိင်သၞာ်ရတ် ဂမ်အတ်တမ္ညဝ်၊ ပၞာန်ပန်ပြကာ သအဳဗ္ဂာရေင်ဗဝ်၊ ဗၞုဟ်ဒေါန်ဇမၠိင် လွိင်သဝဝ်၊ ကံတ္ၚသွက်လဝ် အၚဝ်ပန်ဖျာ်၊ ဝဝ်ထဝ်ပက်ဍာ် သာ်သူရိယျ၊ သီုထပှ်ဟေင် စွံပြေင်လဝ်ရ၊ ဗြဴရတ်ထပှ် သၟဟ်လက္ခ၊ ပ္တိုန်ပ္ဍိုက်ဝဝ်ရ ခဏဂှ်ကၠာ၊ သၟီဇၞော်မဟာ ရာဇာကိတ္တိ၊ ဂိုင်မိန်ယိုက်အဴ ဗြဴမမြီဂၠိ၊ ပ္တိုန်ပ္ဍိုက်ဝဝ်ထဝ် အံသဝ်ဣဓိ၊ သၟီတလတိ မဂ္ညိစရာဲ၊ တိုန်ဍိုက်ဝဝ်ကောံ ဖဴကရောံနာဲ၊ ဒေါဝ်ဗဵုဗနဳ ကျာ်သြဳစရာဲ၊ မွဲဝဝ်ဖဴနာဲ သၟီဗၠာဲဍိုက်အာ၊ ပိုက်ဒပ်ဇက်စဴ တရဴခန်လွာ၊ အခေင်ပၞာန်ပန် ကြာဂြိုပ်ရညာ၊ မြီမြီညှာညှာ ဝေင်အာသဘင်၊ သီုဗဵုကၠံင်သ္ကိုပ် ကြာဂြိုပ်ဂၞိင်ဂင်၊ ဗဵုကၠံင်ထဥ သဏးတုရင်၊ ခရာလဒု သြေဲကၞုသင်၊ သြဳသြဳဂြိင်ဂြိင် ဒဗိုန်ပိင်မင်၊ လလောင်ကမြဴ အသံဂၞဴဂင်၊ ဂၠိုင်ကဵုအဆင် အခြင်နာနာ၊ တဆိင်စဴမေ ဒွက်ဨသဒ္ဒါ၊ ပေဝ်သဏောဲဗြု လဒုဟောဒြာ၊ မြီမြီညှာညှာ ဗဵုဗက်အာတဴ၊ ကြာဂြိုပ်ဂၞိင်ဇီု ဒမြီုဂြိုပ်ပ္ကဴ၊ အင်ရေင်အသုက် ဇုက်ဂၞုပြာန်ပြဴ၊ ဓိတာန်ကၞဴ ပ္ကဴရီုဓနဳ၊ ပ္ကဴနန်ထေဝ်ဝဝ် တဝ်သွဝ်ရာင်ဖဳ၊ ပ္ကဴကြက်စလန် ပ္ကဴဗန္ဓဇဳ၊ ဍောင်ပ္ကဴမာလဳ ပ္ကဴပေါပ်ဇဳသွာ၊ အသုက်ပ္ကဴချီု ပ္ကဴရီုသဂါ၊ ဒဇေင်အင်ရေင် ပ္ကဴကြေင်စမ္ၚာ၊ ဍောင်ပ္ကဴစမ္ပာ ပြာင်ဍောင်ကြာဇီု၊ ကၞာင်ဗျာင်တယျောဝ် ပြာင်ဍောင်မောဝ်ထီု၊ တလာဲလၜက် ညံင်ညးဒက်ပြီု၊ လစောတ်လမောဝ် တွာဲမိတၞောဝ်ဗြီု၊ အကြာဂြိုပ်ဇီု ကြာဒမြီုဆု၊ ကြာအရှာံပ္ကဴ ဇက်စဴထဥ၊ သံင်သံင်ရုရု ထဥဟောဒြာ၊ ညန်တဝဵုရ ဗော်သွးရာဇာ၊ ဒ္ၚဳအာစိုပ်ကၠာ ကာလဂှ်ရ၊... သၟီဇၞော်မဟာ နာဲသာလောက၊ ကော်အမာတ်ရ ကာလဂှ်ကၠာ၊ ကဵုသတးတုန် တိသုန္ဓရာ၊ ဍာ်လဗာင်ထဲ ပက်ဗရဲဏာ၊ တက်ရာဲဇမာတ် စဵုသွာတ်ဒနာ၊ တၞံဗြာတ်တၞံက္ၜဴ သတ်ဗြဴသတ်တာ၊ ဍောင်ပ္ကဴမဂေါဝ် မြမောဝ်ပုပ္ဖါ၊ ကဵုဂညိဏာ ပ္ကဴနာနာစိ၊ ဒၞါဲပ္ကဴမဂေါဝ် မြမောဝ်ဂန္ဓိ၊ တလာဲလၜက် ကဵုကွက်ဂညိ၊ ဍာ်မြမောဝ်ပၠန် ဒသဂန္ဓိ၊ ကဵုရေင်လဝ်စိ ညိပကဵုခြာ၊ ၜါလပါ်ဍာန် သဗာန်သေင်ဟာ၊ ကဵုပြေင်လဝ်ကၠာ ကာလဂှ်ပၠန်၊ တက်ကၞာရတ် ဇၞော်ဒြဟတ်သန်၊ ဗဳသ္ကဝ်မဇၞော် ကောန်တွးကော်ပ္ညန်၊ ကၞာရတ်ဂှ် ပြဟ်ခဏံကၠောန်၊ ဗွဲပရဟ်ကၠာ ပြဟ်တုဲအာပၠန်၊ အမာတ်တံမာ ပညှာပြဲလောန်၊ သၞာတုန်ပၠန် တန်ကဵုအမာတ်၊ ဒ္ဂူဨကရာတ် ဆအမာတ်တံ၊ စဳရေင်လဝ်ကၠာ ဟွံသာသပံ၊ ဆဗမၞးတံ ဂဇံမွဲသာ၊ ဆသေထဳဟေင် မွဲစွံသေင်ဟာ၊ ဂတဂှ်ကၠာ ဗြဴကုမ္မာရဳ၊ မွဲသာဍေံတံ ဂဇံရေင်ဖဳ၊ သၟာဒွက်ကီု ရုပ်သီုကျာ်သြဳ၊ မွဲသာဍေံပ္ညဳ ဒ္ၚဳဂဇံတန်၊ သမာတွိင်တွိုက် အခိုက်ဂၠိုင်သန်၊ ဗာတ်သၠာ်ဗာတ်သၞာံ သြေဲကျာံသဂြန်၊ စံင်ဒြဝ်လဒု ဗြုတဴသြောန်န်၊ လုံကၞာပၠန် တသောန်တသဝ်၊ မွဲစွံတန်ဒၟံင် တွိင်တွိုက်စံင်ဒြဝ်၊ အခိုက်ဇၟာပ်တင် အခြင်တမ္ညဝ်၊ သဘင်သၟီဓဝ် တမ္ညဝ်တဴရ၊ ဘောဇိုန်ပုင်သွ သဗှနာနာ၊ ဗြာတ်တ္ၜဴကဝ်ဗ္ဒဝ် ဗွဝ်ရသာ၊ စဳရေင်လဝ်ကၠာ သအဳဗ္ဂာသလ၊ ဗဵုဂမၠိုင်သွံ သွက်ဂွံဟာပ်စ၊ စဳရေင်လဝ်ရ ကာလဂှ်ကၠာ၊ ခေါဇဴကၟဝ် လးလဝ်ပေင်ဗ္ဂာ၊ အမာတ်တိက္ခ တလပညာ၊ ကလေင်စှ်ေအာ ကဵုမှာရာဇ၊ လပုဟ်တဲစှ် သၟဟ်ဍောင်ပတ်ဒၟ၊ လ္ၚောဝ်ပတီတွာဲ နာဲက္ဍိုင်သေတ၊ တုဲဒှ်ရအဴ ယွံသ္ဍဴနန်မြ၊ တိုင်အသံနာဲ ဍိက်ကၠောန်တွာဲရ၊ က္ညဇက်စဴအာ ခန်လွာနန်မြ၊ နန္ဒကိတ္တိ ဣဓိက္ဍင်ပြ၊ မိင်ပါင်အမာတ် နာဲပြာသာတ်မြ၊ ရိုက်ဖံဒုတြ ဇက်ဂတစဴ၊ မြီမြီညှာညှာ ဗဵုဇက်အာတဴ၊ သၟီတလတိ မဂ္ညိနုဘဴ၊ ကောံဗြဴထပှ် သၟဟ်န်နှဴရဴ၊ လတူဝဝ်ထဝ် သ္ဍိုက်ဗဵုဒ္ၚေါဝ်တဴ၊ ညံင်ထာင်ကဵုထိုက် ကြိုက်လ္ၚောဝ်ဂ္ညိဂၠဴ၊ မြီမြီဇက်စဴ တရဴနန်မြ၊ သီုဗဵုဂမၠိုင် ရိုင်ရိုင်လျလျ၊ သန်ထာန်ဒေသ စဴစိုပ်ရတုန်။ ။

သဘင်မဒုင်ဖျဴသၟတ်ဗြဴဝုတ်ထပှ်

ပ္ဍဲကာလဂှ် ပဒှ်သာ်လွာ၊ ညးဍုင်ဂမၠိုင် ရိုင်ရိုင်သအဳဗ္ဂာ၊ ဂွံမိင်ပရိုင် သၟီနာဲက္ဍိုင်သွာ၊ ဂွံနင်ဗြဴရတ် တြုံကၞတ်သာ၊ ထပှ်မွဲရဲ ၝဲကဵုဒေံကၠာ၊ ရုပ်သာ်အဝဲ ပြဲလက္ခဏာ၊ ညးဂမၠိုင်ကၠာ ကာလဂှ်ပၠန်၊ သၟဟ်န်ရင်သ္ကံ ဗွဲမလံသန်၊ ကာလဂှ်ပၠန် ဒတဲကောန်စဴ၊ ဇက်တိုန်ရိုင်ရိုင် ဒဵုဇိုင်နန်ပ္ကဴ၊ သဗှတမာဲ တိုန်တွာဲပူဇဴ၊ ဗဒှ်သ္ဘင်ပေါဲ ဂၠိုင်နဲသဘဴ၊ ဂွံညာတ်ဂၞကျာ် ရုပ်ညံင်သာ်ပ္ကဴ၊ ရုပ်သာ်အဝဲ နဲဒေဝတဴ၊ ဗဵုဟွံတီဖဲ အဲညးတြုံဗြဴ၊ လုံကၞာအဴ ဒၟံင်တဴပေင်က္ဍတ်၊ ကျာ်သြဳဂေါဝ်သ္ဇုင် ညံင်စမုင်ရတ်၊ ထိုက်ကဵုပ္ကင်ရင် နန်ဒြင်သ္ၚိကၠတ်၊ ထိုက်ကဵုပိုင်တုန် ကုန်ကွဇၞော်သွတ်၊ ထိုက်ပိုင်ကမၠောန် ပ္ဍဲဒေါဝ်နန်ရတ်၊ ဇန်တံတုန်သၟတ် ဂမ်အတ်ကမြဴ၊ ပင်တဲကလဵု ယဵုတဲပူဇဴ၊ ဇၟာပ်ဇန်တြုံဗြဴ ပတဴအံသဝ်၊ ကဵုသာဓုကာ သအဳဗ္ဂာတမ္ညဝ်၊ သီုဖအိုတ်ဟေင် ဂဇံရေင်ဗဝ်၊ ... ပ္ဍဲကာလဂှ် ပဒှ်အသဝ်၊ ကိတ္တိရာဇာ မှာစက္ကဝဝ်၊ ကညှာထပှ် လေင်နုင်ကၠဟ်ထဝ်၊ ဒေါဝ်ကၞာဟေင် ကဵုစွံပြေင်လဝ်၊ ဍာ်ဒိပ်မြမောဝ် ဗဝဝ်ဂန္ဓ၊ စဳရေင်လဝ်ရ ခဏဂှ်ကၠာ၊ ချောဝ်စလန်ၜါ သီုကလှာမှက်၊ ဂေါရာဲဇိုန်ကျဝ် ထီုလဝ်သက်လက်၊ ဒေဝဒါသ္ၚဴ အဂၠဴချူဖက်၊ သီုမြမောဝ်စှ် သၟဟ်ပ္ကောံဆက်၊ ကြကောတ်သက်သက် ပေင်မှင်ဏက်ဗ္ဂာ၊ ဗမၞးမပ ဘာရဒွဇာ၊ အခဝ်မသုန် ဂုန်ဒစိတ်မြာ၊ နွံသိတ်ထပှ် ဓုတင်စှ်ၜါ၊ သီုတြဒစာံ ပြဲဗာံသဳလာ၊ ကဵုဖဍောတ်ကၠာ မှာမင်္ဂလာံ၊ ကိတ္တိရာဇာ မဟာရာဇာံ၊ သတ္တဒေဝဳ သြဳပဝရာံ၊ သဗှလာဘာ မဟာသုခါံ၊ ဘဝန္တုတေ မေမင်္ဂလာံ၊ အယုဒိဃာ သုခလာဘာံ၊ သဗှဒိဿာ မဟာဇဲယာံ၊ သိဒ္ဓိသိဒ္ဓါံ ဇဲယာံဟောတု၊ ဖဍောတ်ဟောဒြာ ဒုင်ပါင်သာဓု၊ သတုံရပ်ကၞု သင်ဂွုသဝဝ်၊ လတူတဲကၠာ နာဲသာနန်ထဝ်၊ ဇာထဝ်ဂေါဝ်မြီ ထမှောင်လ္ၚီဓဝ်၊ ကၞုသင်ခ ဒက္ခိဏဝဝ်၊ လတူဇာထဝ် သ္ကိုဟ်ဇဝေါဝ်ဏာ၊ ဒွံထမှောင်ဇာ ပြိုဟ်အာသြီုသြီု၊ ဒုင်ဍာ်မ္ၚဵု တွဵုတဲမှာဗြီု၊ ဖဍောတ်သြီုသြီု ဂြီုဂြီုဂါထာ၊ ဗလိုပ်ဖုံတုဲ ဗြဴလွုဲနာဲသာ၊ သဘင်သၟီဇၞော် ဗော်ဇန်တံကၠာ၊ ပေင်ထပှ်တ္ၚဲ သဘင်ဟဲအာ၊ ညးဂမၠိုင်အဴ တြုံဗြဴသေင်ဟာ၊ သဘင်ဟဲဗြဟ် ကာလဂှ်ကၠာ၊ တုဲပၠန်စဴအာ ခန်လွာဒေသ၊ သန်ထာန်ဒေသ အာစိုပ်ရတုန်။ ။

သၟတ်ဗြဴဝုတ်ထပှ် ဒှ်ဂၞကျာ်သၟီဇၞော်နန္ဒကိတ္တိ

လတေံမှာဇန် ပၠန်စဴတုဲရ၊ အဏံတုန်စိ ကိတ္တိရာဇာ၊ ထပှ်မွဲဂၞဴ ဗြဴအနက္ဃ၊ ကောံသၟီရာဇ တလက္ဍိုင်သွာ၊ တိုန်စိုပ်နန်ကၠတ် သုဒဿဏာ၊ တူဒေန်ဒြင်စိင် သၟီဇၞော်ရာဇာ၊ သၟဟ်န်ညဳသာ သၟီကဵုမှာယျ၊ သီုညးထပှ် သၟဟ်န်စိတ္တ၊ စသိုင်သုခ ကာလဂှ်ကၠာ၊ ညံင်အိန်နာဲမြု ကဵုသုဇာတာ၊ မဂွံဒ္ၚေါဝ်လှိင် သမၞိင်သွဝ်ၜါ၊ ညံင်ကုသကၠာ ပြဘာဝတဳ၊ သီုညးထပှ် သၟဟ်န်မွဲဒၞဳ၊ စသိုင်အရီု သီုထပှ်ညဳ၊ တူနန်ကျာ်သြဳ ညံင်ဗနဳသွဝ်၊ ဗြဴကမၠောန်ဍိက် ပိုက်ပၞိက်ကမဝ်၊ သၟီဇၞော်ကိတ္တိ နာဲသ္ၚိနန်ထဝ်၊ ကောံဗြဴထပှ် သၟဟ်န်တဝ်ဂၠဝ်၊ လတူဒေန်ထဝ် တဝ်ဂၠဝ်တဴတုန်၊၊

လၟေင်ဒဒှ် တဝှ်ဖဵုဂုန်၊ ပိုဲဟီုပျးတုန် တိုင်ဂုန်သံင်သာ၊ ကုသဵုကံတၟုဲ ပ္တုဲလဝ်ကိုပ်ကၠာ၊ ကုသဵုကံဟေင် စဳရေင်ကဵုမှာ၊ ဒဵုဂွံဒှ်ဟေင် ဂၞကျာ်သေင်ဟာ၊ ကံဂှ်ဇိုန်ကဵု ဖဵုဇၞော်ဂွံမြာ၊ တူဒေန်ဒြင်စိင် သမၞိင်က္ဍိုင်သွာ၊ ဂွံစသိုင်ဟေင် ရောင်ဟသေင်ဟာ၊ သမ္တီမၞးတံ တမံလိုက်ဗာ၊ ဂၞကျာ်ကဵုသၟီ သမၞိင်ပါသာ၊ စသိုင်အရီု ဍီုဍီုဟာန်ဇာ၊ သၟဟ်န်တဴကၠာ ကာလဂှ်ပၠန်၊ ပ္ဍဲနန်အတှ် မံင်တဴသၟဟ်န်၊ ဇၞတ်မမံင်တဴ ပ္ဍဲလကဴနန်၊ ပိဂိတုပၠန် စိုပ်ပ္ဍဲနန်ထဝ်၊ ဆာန်ကၟိန်ရေင်ကာန် မွဲဟာန်တဝ်ဂၠဝ်၊ မိညးထပှ် သၟဟ်အဆေဝ်သွဝ်၊ ဂွံသဇိုင်ဂဝ် ဗြဴတဝ်ပဏာဲ၊ တန်ဂပ္ဘယဲ ပ္ဍဲနန်ထဝ်ဆာဲ၊ ရုပ်ထဝ်ပဏာဲ နာဲညးထပှ်၊ ဗြဴတဝ်စရှ် သၟဟ်သၟန်သက်လက်၊ ဒေါဝ်ကမၠောန်တံ သ္ကံသွးမၞုံဘက်၊ ဒဒှ်ဂွံလဝ် သဇိုင်ဂဝ်ဗက်၊ လ္ၚောဝ်ပတီကွာဲ သၟီနာဲက္ဍိုင်စက်၊ တြုံကၞတ်ဘက် ပြမလက်သန်၊ ကော်ပ္ကောံနင်သအး ဗော်သွးကမၠောန်၊ ကဵုကၠုင်လွဳလွတ် ကဵုဗိုင်ပတ်ပေါန်၊ အိုတ်ဗော်ကမၠောန် ပ္ဍဲဒေါဝ်နန်မြ၊ သဝ်ဗြဴနွံလွဳ နွံညာန်စဳခၠ၊ ကဵုကၠုင်လွဳလွတ် သိရိဒဇ္ဇ၊ ညးလေပ်ဟီုရ မင်္ဂလဇိုက်၊ ကမြဴတဴရ နကဵုတသိုက်၊ ပုံကၞက်အဂီု ဟီုဝေင်ဗြိုက်ဗြိုက်၊ နကဵုတသိုက် သ္ဍိုက်စိုတ်ဗြဴသွဝ်၊ မွဲစွံတန်မံင် တွိင်တွိုက်စံင်ဒြဝ်၊ လှ်ေဒယှ်ေကီု ဗီုကောန်ခနှောဝ်၊ လဟိင်ကဵုစိုတ် ဗြဴၝောံကိုတ်ထဝ်၊ လတူနန်လွိ သ္ၚိရတ်အသဝ်၊ သၟုက်ဗတင်ထဝ် ရာင်ဆာဲမှောဝ်ဇာ၊ ဂကောံသၟီဗၠာဲ နာဲက္ဍိုင်ထာင်သွာ၊ စသိုင်အရီု သီုထပှ်ကၠာ၊ ရာင်ဆာဲပြာထာ ကာလဂှ်တုန်၊၊

ဂွံမိင်ကေတ်ပရိုင်သၟတ်ဗြဴဝုတ်ထပှ် ဒှ်ဂၞကျာ်သၟီနန္ဒကိတ္တိတုဲ ကလော်ဗြဴမိသဳနန္ဒာ လ္ၚုင်လ္ၚသြေင်ဇှ်၊ ပၠေင်ဗဒှ်ရုပ်သၟတ်ဝုတ်ကညာတုဲ အာတန်ဒၟံင် ပ္ဍဲတၞံဇြဲ

လၟေင်ဒဒှ် တဝှ်လက်သန်၊ ဂၞကျာ်ထပှ် သီုမသၟဟ်သၟန်၊ ဂကောံသၟီဗၠာဲ နာဲညးက္ဍိုင်သြန်၊ ဝဳပက်ဗက်ဂြဲ ပ္ဍဲပစ္စုပ္ပန်၊ အကုသဵုကံ ခနှံလဝ်ပၠန်၊ ဝဳဝဲမသုန် ဗက်ကၠုင်တုန်ဆန်၊ ကံပြုပြေင်ပၠန် ဇၟာပ်ဇန်လိုက်ဗာ၊ ကဵုဒးပရိုက် ဒဒိုက်သနာ၊ ပါင်ကျာ်နာဲညး ဇမၞးပၞာန်မာ၊ ဂြင်တွံလဝ်ဟေင် ရောင်ဟသေင်ဟာ၊ ဟိုတ်ဂှ်မၞးတံ တမံလိုက်ဗာ၊ ပ္ဍဲဝဳဝဲတုန် မသုန်ပြကာ၊ မှတ်ဝေင်အိုတ်ကၠာ ပမှာသတိ၊ ဂွံဗၠးဝဳဝဲ ဗွဲကြဴဒမၠိ၊ သမ္တီအိုတ်ညိ ယုတ္တိဂါမ၊.....

ပိုဲဟီုထၜး ပျးဏာဂတ၊ တေံကလော်ဝဲ ပ္ဍဲဂြိုပ်ဟေမ၊ မိသဳနန္ဒာ ချပ်အာလ္ၚုင်လ္ၚ၊ ညးထပှ်သ္ကဲ ကဵုအဲမူလ၊ ဍေံတံကဵုအဲ ဒက်လဝ်ဝဲသၞ၊ ဍေံမိင်ပရိုင် ဂၠိုင်ကဵုဘောဂ၊ ဂွံဒှ်ဂၞကျာ် တူနန်သာ်မြ၊ သီုညးထပှ် သၟဟ်န်ခယျ၊ အဲသအာခၠေဝ်တုန် ဂုန်ဣပါပ၊ ဍေံပျဲလဝ်အဲ ဂျိက္တာန်ယဲသြ၊ အဲခၠေဝ်ဂုန်အဴ မိဗြဴဣတ၊ တုဲဍေံချပ်ရ မိယက္ခဗြဴ၊ တုဲဍေံဂကန် ကဵုမိကောန်ဂၞဴ၊ ယွံလေဝ်ကောန်ဍောတ် ထတ်သန်နုဘဴ၊ မိအာဗက်အဴ ဣဗြဴထပှ်၊ မိဏင်ကင်ရဳ ကျာ်သြဳဒိုဟ်စှ်၊ တုဲသၟာန်မိဟေင် လမေင်ဒဒှ်၊ မိအာတုဲအဵု ကလေင်ကဵုပြဟ်၊ မိပမံင်လံ ကောန်ဏံဗနှ်၊ ကလေင်ကဵုပြဟ် ကောန်ဒးဗှ်ဒွိင်၊ သဳနန္ဒာပၠန် ဂကန်လဝ်အိင်၊ ယွံသေဏာတံ မၞးတံပင်မှိင်၊ ကောန်ဗြဴအဲရ ဒ္ၚဳကဵုပသၟီ၊ ကဵုပိုင်နန်ကၠတ် သ္ၚိရတ်ဒြင်စိင်၊ ဒှ်ဨကရာတ် ပိုင်ပြာတ်နန်သွိင်၊ ပိုင်နန်ဇမၠိင် ဂွံဒှ်သၟီအဴ၊ ဒှ်ဨကဗြဴ ပိုင်တဴသေဏာ၊ အမာတ်ပန်စိ သ္တုံဇွိသေင်ဟာ၊ သီုအမာတ်ဒ္စါံ ဗိန္ဒောသ္ဍာံကာ၊ သရာဲဂံင်က္ဍင် ရပ်သ္ဇင်တဲၜါ၊ အပ္ဍဲမ္ၚးကီု သီုရုင်ဗစာ၊ ကောန်အဲဟီုဝေတ် ကဵုကေစ္စကၠာ၊ ယဝ်စးပါင်သ္ကဲ ပ္ကီုဘဲနာနာ၊ ပအပ်စုတ်တဲကၞာတ် ဗာဇ္ဇခါတ်ကၠာ၊ စးပါင်ကောန်သွံ ဗာ်ထောံပညှာ၊ မိင်ဟာသေဏာ သီုၜါသ္တုံဇွိ၊ သေဏာမိင်ကီု လဟီုနာဲစိ၊ ပဒွိင်ရအဴ ဗြဴတလတိ၊ လယိုင်ပိုဲရ လပဒွိင်ညိ၊ ပိုဲဍိက်မင်မွဲ ရိုဟ်တ္ၚဲဒမၠိ၊ လပဒွိင်ညိ ယွံမိကျာ်သြဳ၊ ပိုဲမင်မွဲက္ဍင် ဣဏင်ကင်ရဳ၊ တဝဳဗဝိုင် ပိုဲဍိက်ဗိုင်သအဳ၊ ဣဏင်ကင်ရဳ ကျာ်သြဳနန်လွိ၊ လပဒွိင်ညိ မိသဳနန္ဒာ၊ ပအပ်ဍုင်တုဲကၠာ ကာလဂှ်ရ၊ တုဲမိကျိုင်ကျဝ် ဗဝဝ်ယဿ၊ ပက္ခာန်ခါသာ နာနာသဗှ၊ စှ်ေနူနန်ကၠတ် သုဒဿဏ၊ တွာ်ပ္ၚောံရ ပုဗှဒိေဿ၊ မွဲသတ္တဟ ထာဏဝနေ၊ ညန်ထာန်ဝွံလေ ပဒေသရး၊ စိုပ်ထာန်ဂှ်သအး တ္ၚဲယးဗၜင်၊ အရှိုန်ထမး အကးလျးခၠင်၊ စိုပ်ဒေသက္ဍင် သြင်လစဗၠဲ၊ ဒကှ်သီုၜါ သွာမသုန်ဂၠေါဲ၊ မစ္ဆဂၠိုင်နဲ ၜိင်ဂၠေါဲတက်ဆော၊ ဍာ်သ္ဇုင်ညံင်ကၠေင် ကၜိင်ဝေင်ဟော၊ ယက္ခိဏဳရော ဒွိယောဘာဝ၊ တုဲဍေံပၠေင်ပ္တုပ် ရုပ်မနုဿ၊ ခနှောဝ်ဒေဝ ကျရုပ်ဍေံအဴ၊ တမိက်မသုန် နွံဂုန်တရဴ၊ ပေင်လက်သန်ဗြဴ တရဴစှော်ပန်၊ ရုပ်မဒးကၞာတ် ညံင်ပြာသာတ်သြန်၊ ကလိရုပ်ညး လုံရးတ္ကံပန်၊ ဗစဳသရန် လက်သန်ပြာထာ၊ ဃောစှ်သုန်သၞာံ ဒးဂွါံအခါ၊ သ္ဍိုက်မၠိုက်သာဓာ သ္ဂေဟ်ရုပ္ပါရီု၊ လျးရုပ်အိုတ်သီု ခၠင်ပ္ဍီုခဏ၊ တောဝ်ချဵုသာ်လွာ ဂၠးဇိုင်ပါဒ၊ သၞေံဂွုခၠင် ကၞုသင်ခ၊ ဂဒံဗြာတ်ရ အဇအၚဝ်၊ ညံင်ညးတက်ဒါတ် ဂဒံဗြာတ်ထဝ်၊ တင်က္ၜံင်ဨရာ သာ်လွာသောန်လဝ်၊ ဒဳက္ၜံင်တံင်ယျ ကဒလိထဝ်၊ ဂၞိင်ဂတ်သၞာင် ခၠင်သာင်ဂပဝ်၊ ဒကှ်ၜါဍောင် ရာင်ပေါင်ကသဝ်၊ ညံင်ခဍေဝ်ထဝ် ဂပ်ဝ်ဒးရး၊ ကၞင်ကံၜါကီု ခၠင်ပ္ဍီုလစး၊ ညံင်ဇဵုတ္ၚရာံ ၀ိုင်သ္ဍာံဒးရး၊ သြိုဟ်ဂတဵုပး စၞိန်စးဒဂူ၊ သပါတဲဂှ် ညံင်လပှ်ဇၟူ၊ သၟန်ပါင်အူ ဇာင်ၚုချူပြီု၊ ထမိပ်ထမင် လျးခၠင်သာ်ပ္ဍီု၊ ကောန်မတ်ဗစဳ ဒြာဲဨကၠုင်ပြီု၊ သၟန်ပါင်ကီု ညံင်ဗီုကြောတ်ထဝ်၊ က္တောဝ်ဝိုင်ဒးရး သၟးအၚဝ်၊ ကၞေင်ဂၠးဥပ္ပဵု လျးဂဵုသဝဝ်၊ ရုပ်ညံင်ကောန်ဗြီု ကုသဵုပြီုလဝ်၊ လျးဂဵုသဝဝ် အၚဝ်ပမာ၊ မွဲသာ်ဂ္ညိလဝ် အၚဝ်နဳလာ၊ မွဲသာ်အဇ သာ်မြသာံဖြာ၊ ဗၜင်ခဏ လုံကာယဒွါ၊ ဒျိုင်ညံင်သာ်ယန် ဗ္တာင်ကဏ္ဏကာ၊ သမြီသာ်ထဝ် လျးဆက်ၜဝ်အာ၊ နူဇိုင်ဒဵုသော် ဗော်လက္ခဏာ၊ ဒုဟ်ကဵုဂၠါဲအာ အလုံကာယ၊ သ္ကဵုဒှ်ဗယိ ဟွံမွဲညိည၊ ဍေံပၠေင်ဗ္ဒဟ်ရ ယက္ခနန္ဒာ၊ ပဒတဴပၠန် သြင်ပဉ္စမာ၊ ပ္ဍဲနိဂြောဓ ထာဏသာခါ၊ တိုန်တန်ဒၟံင်ကၠာ ဗြဴယက္ခာတုန်၊၊ ၊၊

သၟီနန္ဒကိတ္တိ ဒုင်ဖျဴနင်မိသဳနန္ဒာ

လၟေင်ဒဒှ် တဝှ်စလာဲ၊ ကြီုဒဒှ်ရ ယက္ခဗြဴကၟာဲ၊ ပၠေင်ပ္တုပ်သက်သၟိဟ် ရုပ်မၞိဟ်ဂေါဝ်ဆာဲ၊ ပ္ဍဲဇမ္မုဒိတ် လအိတ်ကဵုဂၠါဲ၊ ကဵုတုပ်ရုပ်ညဳ ယက္ခဳဗြဴကၟာဲ၊ ကၠံဍုင်ကဵုဂၠါဲ ရုပ်စရာဲတ္ၚဲ၊ ကေတ်နင်ဂိုင်ပ္တုပ် ရုပ်ဟွံတုပ်မွဲ၊ ပဒတဴပြဲ ပ္ဍဲဇြဲသာခ၊ ဂဇံဒၟံင်သၠင် ဇိုင်သြင်လစ၊ ထာန်ပေါက္ခရ ဒေသကမာ၊ ကာလသၟိက်ဒှ် တဝှ်သံင်သာ၊ ပဒေသရး ပ္ဍဲဍုင်ဂးမာ၊ နန္ဒကိတ္တိ သိဒ္ဓိရာဇာ၊ ဂွံဗြဴထပှ် ဒှ်သြင်ကမာ၊ ရေင်ကာန်သၟဟ်န် တန်မွဲသၞာ၊ ဃောမစသိုင် ကၟိန်က္ဍိုင်သွာ၊ စိုပ်ဃောသန်ဇျှာ ကာလစဏု၊ ဂဟောဂွါံရ ဂိမှဥတု၊ ဂမ္တဴလောန်တဲ ပ္ဍဲတ္ကံဇံမု၊ ဗြဴထပှ်ခိုဟ် မိက်လၜိုဟ်ဇကု၊ ကော်ဗြဴဣလု ဍိက်ဇကုဂှ်၊ ကဵုတုက်ဍာ်ကၠာ ကမာဒကှ်၊ ဗြဴဣလုဂှ် လေင်နုင်ကၠဟ်ထဝ်၊ ဇကုမွဲကၠာ တွာ်အာဆတ္တဝ်၊ ဃောသန်ဇျှာဟေင် ပယာံစေင်သဝ်၊ ဣလုဗြဴသွဝ် တွာ်စဝ်စှ်ေအာ၊ တွာ်စှ်ေရိုင်ရိုင် စိုပ်ဇိုင်ကမာ၊ ဟောဝ်နုင်ဍာ်ဆက် ညာတ်ရုပ်ယက္ခာ၊ သၟဝ်ဍာ်တေံဟေင် ဂွံညာတ်သေင်ဟာ၊ ဣလုအိက်အာ် စိုတ်သၟာ်ဣိဿာ၊ သလှ်ေရုပ်ဍေံ စှ်ေပ္ဍဲကၟာ၊ ရုပ်ညံင်ကျာ်သၠာ် ဒးတုက်ဍာ်ကၠာ၊ ဇီုထောံနုင်ဟေင် ကလေင်စဴအာ၊ နူမွဲဝါပၠန် စိုပ်ပိပန်ဝါ၊ ဇီုနုင်ဇီုဍေင် တရေင်စဴအာ၊ ဂွံထိုင်သၞာံအဴ ကြဴဝွံမွဲဝါ၊ ရုပ်သာ်အဲကၠာ ဂေါဝ်ဂါက္ဍင်ပြ၊ ကဵုထိုင်သၞာံအဵု ကဵုတုက်ဍာ်ရ၊ ဟွံကြိုက်ကဵုအဲ တ္ၚဲဝွံမူလ၊ ဟွံထေက်ကဵုအဲ ကော်တံင်လှောဲရ၊ အဵုဣတံင်လှောဲ ဗှ်ေကၠုင်ဂြဲစ၊ ဗြဴဣလုပြဲ ဣတံင်လှောဲပၠ၊ ညးဂြဲအဲဂြဲ ပ္ဍဲသြင်လစ၊ သဳနန္ဒာရ ယက္ခဗြဴကၟာဲ၊ ဍေံဂွံညာတ်အဴ ဂြိုင်တဴဟးဟာဲ၊ ဗြဴဣလုဆံင် လ္ၚာ်ရံင်နာဲ၊ ဂွံညာတ်ရ ကာလဂှ်ဆာဲ၊ ရုပ်ဂေါဝ်လောန်တဲ အဝဲစရာဲ၊ နူတိဒဵုသွဝ် ကဵုအာဒ္ၚေါဝ်ဂၠါဲ၊ ညံင်ကဵုရုပ်နာဲ ဂၠါဲဟွံတိတ်ရ၊ ဣလုဗြဴလွုဲ သုဲစဴထာဏ၊ တွာ်စဴတရေင် ဗိုတ်ထောံဍေင်ဒြ၊ ပြဟ်စဴစိုပ်ရ ဒေသနန်ထဝ်၊ ပ္တီသၟီမဟာ နာဲသာသၟီဓဝ်၊ ယွံတလတိ ဣဓိဇၞော်မောဝ်၊ ဍိက်ဗြဴတိတ်အာ ဇိုင်ကမာထဝ်၊ ဂွံညာတ်ကေတ်သၟတ် ဗြဴရတ်အသဝ်၊ ရုပ်သာ်ဂေါဝ်ပၠေဝ် ညံင်အဆေဝ်သွဝ်၊ စရာဲသ္ဇက်ပ္တုပ် ရုပ်ကောန်ခနှောဝ်၊ ထိုက်ကဵုပ္ကင်ရင် နန်ဗတင်ထဝ်၊ ဍိက်ဗြဴပ္တီလဝ် နာဲနန်ထဝ်ရောင်၊၊ ၊၊

ခဏဂွံမိင် သၟီနာဲနန်ဂၠေါင်၊ ပ္ဍဲစိုတ်သလှောင် အသောင်ပမာ၊ ညံင်စက္ကဝဝ် ဂေင်တ္ကံသၟဝ်ကျာ၊ တြဳဇှ်ဂုန်ရတ် စက္ကရတ္တာ၊ ဂေၚင်လန်အာ ဇၟာပ်ရာဒေသ၊ တုဲအာစိုပ်ခုတ် တ္ကံဥတ္တရ၊ ဂွံနင်ဗြဴရတ် သၟတ်ဨကန္တ၊ ရေင်ကာန်လုံလ ခယသာဓာ၊ နဲဂှ်ဂိုင်ပ္တုပ် ဗီုဥပ္ပမာ၊ မိင်ဣလုဟီု သီုကရုတ်ဏာ၊ စရိုတ်သၟီဓဝ် ဟဳဂပဝ်အာ၊ ချိုန်ခဏဂှ် ဗဒှ်သာ်လွာ၊ ကော်အမာတ်စာ သေဏာပတိ၊ မကမွဲလ္ၚီ ဗဵုပၞာန်မြီဂၠိ၊ မၞးတိတ်ဒုင်ညိ မိသုက္ခမာ၊ အခေင်ပၞာန်ပန် စဳရေင်ဖန်ဏာ၊ အမာတ်တိက္ခ တလပညာ၊ ယဵုအသံနာဲ သၟီဗၠာဲဗညာ၊ ပၞာန်ပန်ပြကာ ညံင်လအာသွဝ်၊ တိုက်ကွဳချေံစိင် ဂမြိင်တမ္ညဝ်၊ အလာံဍုတ်မြာ် ယာတ်ဗြေဝ်သာ်ထဝ်၊ ဗၞုဟ်ဒေါန်ဇမၠိင် လွိင်ဗဝ်သအဝ်၊ သေဏာတ်ဒေါန်အံင် တ္ၚဂဒံင်ထဝ်၊ ဇၞော်သန်အံသဝ် သအဳဗဝ်တၞင်၊ သရာဲဒြိုဟ်စာ တဲၜါရပ်သ္ဇင်၊ အေန်ဇာလဒု သဏးတုရင်၊ ဂြိင်ဂြိင်ဂြံဂြံ အသံၜဳဂင်၊ ပၞာန်ပန်ပြကာ ဇက်အာခမၞင်၊ ဖံစိန်ဖံဟဝ် ဖံထဝ်ခမြင်၊ ဖံကၠေဝ်ဖံမန် ဗြုဇရန်က္ဍင်၊ ဖံကြေပ်ဇတိုင် မန်ဒိုင်ခမၞင်၊ ဖံဒုတြဘိ တိတမ္ညတ်က္ဍင်၊ ခရာလဒု သြေဲကၞုသင်၊ သြဳသြဳဂြိင်ဂြိင် ဒဗိုန်ပိင်မင်၊ ဂၠိုင်ကဵုအဆင် အခြင်နာနာ၊ ပ္ၚောံဥဒျာန် ထာန်ပဉ္စမာ၊ မြီမြီညှာညှာ ဇက်အာလျလျ၊ ပ္ၚောံဥဒျာန် သန်ထာန်လစ၊ ပြဟ်အာစိုပ်ရ ကာလဂှ်ကၠာ၊ ဗဵုပၞာန်တဝဳ သၟဟ်န်ညဳသာ၊ ဗ္ဒောံဗဵုပၞာန် ထာန်ပဥ္စမာ၊ သအဳဂၠက်တဴကၠာ ကာလဂှ်တုန်၊၊

သၟီနန္ဒကိတ္တိ အာဒုင်ဖျဴနင်မိသဳနန္ဒာဲ

ကာလသၟိက်ဒှ် တိုင်တဝှ်ဂုန်၊ အမာတ်သေဏာ သအဳဗ္ဂါတသုန်၊ သအဳဂၠက်ဗြုန်န် တသုန်ဗဝ်သအဝ်၊ အာစိုပ်လစ ဒေသဇြဲထဝ်၊ ဂမြိင်ဂမြံ ဖံဗြုတမ္ညဝ်၊ သီုအမာတ်စာ သေဏာရေင်ဗဝ်၊ တုဲအာစိုပ်ရ ဒေသဇြဲထဝ်၊ သီုဗဵုဂမၠိုင် ရိုင်ရိုင်သအဳဗဝ်၊ ဇရေင်ဇြဲထဝ် အံသဝ်ပြာကတ်၊ မူညံင်တုပ်ကီု ဗီုပမာသၟတ်၊ ပ္ဍဲတံဇြဲအဴ ဆဵုဒးဗြဴရတ်၊ ညံင်မၞိက်သၟတ် ရတ်ဝိပူလ၊ မှာကုမ္ဘဏ္ဍ ယက္ခမင်လဝ်၊ မၞိက်ဂကူ ဝိပူလပဝ်၊ နွံပၟိက်သွံ သၟိက်ဂွံဗဵုဒ္ၚေါဝ်၊ ဒှ်ရတ်မာဃ ဝိပူလပဝ်၊ ညးမၞုံစိ ဣဒ္ဓိဇၞော်မောဝ်၊ ၀ိပူလပဝ် သ္ဂောံဗဵုဒ္ၚေါဝ်ရောင်၊ အမာတ်သေဏာ သအဳဗ္ဂါဂၠိုင်တောင်၊ ကၠုင်ဆဵုဗြဴရတ် ကၞတ်အသောင်၊ ဟဂံင်ဗဵုဒ္ၚေါဝ် ရုပ်ထဝ်ဒကောင်၊ ပင်တဲပ္တိုန်ယဵု ပ္ဍဵုတူသိသံင်၊ ဖျေံက္ဍိုပ်ဖျဝ်က္ၜံင် ယဵုပလံင်ကွာဲ၊ ယွံမိဗြဴရတ် ကၞတ်စရာဲ၊ ထာဏဍုင်ကွာန် သန်ထာန်ဒၞါဲဝါဲ၊ မိကြင်ကၠုင်စိုပ် ဗဒိုပ်ဝွံဆာဲ၊ သၟဝ်နိဂြောဓ မိပသဟာဲ၊ ဟီုညိစရာဲ နာဲကညှာဍောတ်၊ မိင်အမာတ်သၟာန် ဂလာန်စဳစတ်၊ ယွံသေဏာတံ တမံဘူဝတ်၊ အဲဒှ်ကောန်သၟတ် အန်ဒြဟတ်ရ၊ ဇာတိအဲဂှ် ဒှ်ပ္ဍဲပဒၟ၊ ပ္ဍဲဒကှ်ရောင် သံင်သေတဇ၊ ဟိုတ်ဂှ်ကြင်ကၠုင် ဒေါဝ်ဓုင်ဝါဗ္ၚ၊ လမုဟ်ဝွံအဲ ဟွံမွဲမိမ၊ ဒှ်ပ္ဍဲပုပ္ဖ ပ္ကဴပဒၟရောင်၊ ဒးကၠင်ဨကော ကလောခြာယောင်၊ မွဲဇကုရောင် ဍောင်အနာထ၊ ယွံအမာတ်စာ မဟာတိက္ခ၊ မူကိစ္စမွဲ ဇက်ဂၠေါဲဟောထ၊ ကၠုင်စိုပ်ထာဏ ဒေသကၟာ၊ နာဲတံလအိတ် သတြုမိတ်ဟာ၊ အဲညာတ်ဖေက်ဂၟံက် သမ္ၚံက်စိတ္တာ၊ ဟီုညိသေဏာ နာဲသာသ္တုံဇွိ၊ လုပ်ကၠုင်စိုပ်အဲ သၟဝ်ဇြဲဗောဓိ၊ ကိစ္စမွဲမွဲ အဲသၟိက်တီညိ၊ ဟီုဗွဲစၟတ်စိ စိုတ်မိဂွံဟဲ၊၊

အမာတ်မိင်ပ္ညုင် ယဵုတလုင်တဲ၊ ဒှ်မိတ်ဇာတိ သ္တုံဇွိနာဲအဲ၊ နန္ဒကိတ္တိ နာဲသ္ၚိနန်ဗၠဲ၊ သၟိက်ကဵုဒုင်ဖျဴ ဗြဴရတ်မပြဲ၊ ကဵုပိုင်ပ္ဍဲနန် ကမၠောန်ကၠံမွဲ၊ သ္ကဵုမိခံခေတ် ဝေတ်ဗတောန်ပြဲ၊ စွံပ္ဍဲနန်ဗၠဲ ကဵုမင်မွဲပ္ညဳ၊ ကဵုတိုန်ဒှ်ရ အဂ္ဂဟေသဳ၊ ကဵုပိုင်ကုန်ကွ မှောင်မှတဝဳ၊ စွံပ္တန်အနဳ ပိုင်ပြဳနန်ဒြင်၊ သီုဗဵုသေဏင် သီုအင်ဂပေါဲ၊ ဒုင်ဖျဴဏာမိ တူသ္ၚိနန်ဗၠဲ၊ က္ညမိထဝ်ဂွဳ ကျာ်သြဳအဝဲ၊ တိုန်ဍိုက်ဝဝ်ထဝ် ဗဵုဇက်သအဝ်ဂၠေါဲ၊ ဨကရာဇ တလနန်ဗၠဲ၊ ကဵုကၠုင်ဒုင်နာဲ စရာဲအဝဲ၊ နွံအသံစိ တိတ်ဒုင်မိအဲ၊ ရုပ်ဒကောင်ဗၠဲ ပ္ဍဲဂှ်ဂွံမိင်၊ ယက္ခိဏဳဗြဴ စိုတ်ရဴကျာနိင်၊ ဂွံမိင်တုဲအိုတ် ပ္ဍဲစိုတ်လဟိင်၊ ညံင်ကသပ်အဲ ဟွံယောင်မွဲအိင်၊ ပ္ဍဲစိုတ်လဟိင် ဂွံမိင်တုဲအိုတ်၊ ယက္ခဗြဴလွုဲ မိင်တုဲမိပ်စိုတ်၊ ဗြဴထပှ်ကောံ နွံပ္ဍဲစရိုတ်၊ ချပ်ပ္ဍဲစိုတ်ရောင် မွဲတောင်ဟွံဝိုတ်၊ ကသပ်အဲဂှ် ဂွံဒှ်ညံင်စိုတ်၊ သဳနန္ဒာရ ယက္ခအဟိုတ်၊ ဂါံတိုန်ဍိုက်ဝဝ် ထဝ်ဥူရကိုတ်၊ အမာတ်တံစိ သ္တုံဇွိသီုဖအိုတ်၊ ဍေံတံမိပ်စိုတ် အဵုဇိုတ်မှောဝ်ဇာ၊ ယက္ခိဏဳဗြဴ ဍေံဂွံဖျဴဏာ၊ ဂွံတိုန်ဆက်ကွာဲ နာဲက္ဍိုင်သေတာ၊ အမာတ်တံအိုတ် မိပ်စိုတ်မှောဝ်ဇာ၊ စဴစိုပ်နန်ကၠတ် ဗြဴရတ်ယက္ခာ၊ ဂွံဒုင်စသၟတ် လာပ်ပဿကာ၊ ဂးတုဲအမာတ် ဇန်ကၞာတ်သေဏာ၊ မိပ်စိုတ်ဟောဒြာ ကာလဂှ်ဟေင်၊ အသံသဓဵု ခပဵုဒြင်ပြေင်၊ ခပဵုဒြင်စိင် ဗြုလွိင်ရေင်၊ ဖံမံင်ပိင်မှင် ကၞုသင်ဟေင်၊ ဇက်စဴတရေင် ကွဳပြေင်ကွဳဂၠဴ၊ ကြာဇဵုလလောင် မံင်ဗြုကမြဴ၊ ဖံမုက်ပန်နှဴ ကမြဴသဂြန်၊ မုက်ၜါဂမြံ သီုဖံမုက်ပန်၊ မန်ဒိုင်မန်ဒ လှ်ေပၠတဆန်၊ တမံဘာသာ ဗမာသေံမန်၊ လှ်ေဗက်ကြဴဝဝ် ကောံမိထဝ်သောန်၊ ဗဵုတသဵုဂၠေါဲ တွာ်သြဲလီတ္ၜန်၊ ဒပ်ဥူဒပ်ညန် ပၠန်လုပ်ပ္ဍဲဍုင်၊ ပေင်ဂၠက်သဗာန် ဗဵုပၞာန်ဇက်ကၠုင်၊ ညံင်ပၞာန်အသူ ဇက်ဟောလုပ်ဍုင်၊ ၀ဝ်ထဝ်ဇက်ရေင် မၞိဟ်ဟေင်ဂၠေါဲကၠုင်၊ ၜါလပါ်ဍာန် ရုင်ဒါန်ဍာ်နုင်၊ စွံသွက်စဴကၠုင် သ္ဂောံသုင်ဟုံဗၠိုပ်၊ စွံတမံသွာင် ပနာင်ဗဒိုပ်၊ ရာဒၞါဲကၠုင်စိုပ် ဂွံဗၠိုပ်ဟုံလဳ၊ ဗၠိုပ်ပ္တိုန်ကျာ်သြဳ၊ အနဳနူကိုပ်၊ တမံဍာန်ဂၠံင် ဒမံင်ဗဒိုပ်၊ သြိုင်လဝ်တမၞက် သွက်ကညှာဂြိုပ်၊ တမံဗဒိုပ် စဵုစိုပ်အပ္ဍဲ၊ ခေါဇာသၞာ ယာတ်ကြာထဝ်ပြဲ၊ ဝုဏ္ဏင်ဖုန်ဒၞဳ သ္ဍဳရေင်ဂၠေါဲ၊ အပေါတ်ကယျိုင် မဂၠိုင်ကဵုနဲ၊ ကမၠောန်ဟောကၠံင် မှောင်မှမံင်ဂၠေါဲ၊ မိင်မိကညှာ ရုပ်သာ်လွာဗၠဲ၊ ဗြဴမှောင်မှကၠံင် မင်ရံင်ညးအဲ၊ အမာတ်သေဏာ ခွါမ္ၚးအပ္ဍဲ၊ ဂဇံရေင်ပြး မင်ညးမပြဲ၊ ၀ဝ်ဇက်ကၠုင်သြဲ စိုပ်ပ္ဍဲထမၞက်၊ ကမၠောန်သအဳဂၠက် တမၞက်ပေင်ထာတ်၊ ဒြေပ်စှ်ေဒုင်မိ သ္တုံဇွိအမာတ်၊ ပြာင်က္ဍိုင်ကၟု ဇကုဟကဵုညာတ်၊ မိစှ်ေနူဝဝ် ဒေါဝ်ပူရိသာတ်၊ ဂါံစှ်ေသီုကွိုန် ဍိုန်ဗိုန်လံညာတ်၊ ဇကုတတ်တတ် တ္ၜတ်ညံင်ကောန်ဗြာတ်၊ ကၞိင်စက်ဂိတု သ္ဇုင်ဂွုသေသာတ်၊ လဂါံဇိုင်ကၞာတ် ညာတ်ဒးဥူမတ်၊ ယက္ခဳနဳအဴ ပၠေင်ရုပ်ဗြဴရတ်၊ ထဴညာတ်ဂြိုဟ်ချံ ဗၠာဲတံဥူမတ်၊ ကြံသလှောင်အိုတ် စိုတ်ညံင်လ္ၚယတ်၊ ဂစေံဂစောတ် ဍောတ်ဇၞော်ထိုင်သး၊ ဇန်တြုံဗြဴတံ တမံအဲညး၊ ဗၜေက်လေဝ်ညာတ် မၠာ်စိုတ်ကြုပ်ကြး၊ တန်ပ္ဍဲတမၞက် ညံင်စက်စနြ္ဒး၊ တုပ်နဲစက်သြန် တန်ပ္ဍဲအကး၊ လျးခၠင်တမး ပျးကဵုမတ်ဇန်၊ တုပ်နဲပမာ ရုပ်ယက္ခာပၠန်၊ ကလိရုပ်ညး လုံရးတ္ကံပန်၊ ဂၠိုင်ဖာပ်ဗစ အဟာရဗျန်၊ သစ္ဆုနွံရှ် တနှ်သာ်ပၠန်၊ ဆကြိုက်တန်ရ ယက္ခကြဳဝန်၊ ကမၠောန်အုဲၚး ဒးရးသီသန်၊ ဇဗၠုလက်ဖက် သွက်လဝ်တန်တန်၊ ဇာင်ၚုပါင်ရ ၚေက်မပညောန်၊ တွိင်လဝ်ကြိယာ ယက္ခာဗြဴပၠန်၊ ပလောံရတ်ရ သီုကာယဗန်၊ ဒက်လဝ်ဗိုန်သၟတ် ဂၞိင်ဗၞတ်မွဲဂန်၊ မာလေကမက် ဒွက်ရတ်စိစောန်၊ ၀က်သၞေက်ရေင်မတ် မၞိက်ရတ်ပၠန်၊ သော်ကေသာသၟတ် ထပှ်ဟတ်ပ္တန်၊ ဒကတ်လဝ်ပၠန် ပ္ကဴသြန်ချတ်ပြီု၊ ပ္ကဴထဝ်ဂဵုမြဟ် လဝှ်သြီုသြီု၊ ကျိုင်ကျဝ်တုဲအဴ ဗြဴသဏာဂီု၊ ဂါံစှ်ေဍိုက်ဝဝ် ဗြဴသွဝ်စိုန်သ္ကီု၊ ဒေါဝ်ကမၠောန်အဴ ဗက်ကြဴဂြီုဂြီု၊ ကြဴဝဝ်ထဝ်ကီု ဒွက်ပြီုလဒု၊ တွိင်ပဉ္စင်္ဂ နာမဗရု၊ လှ်ေဒယှ်ေကီု ကြဵုကြီုလဒု၊ ဗက်ကြဴဝဝ်ထဝ် ဒြဝ်တလောတ်ဗြု၊ ပိင်မင်ဒဗိုန် တလိုန်ထဥ၊ ဗာတ်သၠာ်ဗာတ်သၞာံ ဒြဝ်ကျာံဗရု၊ ဇက်အာဂြုဂြု ထဥဝေင်ပေါဲ၊ ၀ဝ်ဇက်အာကိုပ် စိုပ်ဝင်အပ္ဍဲ၊ အာစိုပ်သောပါန် ဗြဴယာန်မပြဲ၊ ပြာင်က္ဍိုင်ကၟု ဂွုညံင်သာ်ဗၠဲ၊ ယက္ခဂါံအာ ရုပ်သာ်လွာ်တ္ၚဲ၊ ညးဟွံတုပ်မွဲ ပ္ဍဲတ္ကံဇံမု၊ ကဵုဂၠါဲလန်ဂြး ပ္ဍဲရးတ္ကံဝွံ၊ ဟွံတုပ်ဇကု ပ္ဍဲဇံမုဏံ၊ ကျဗြဴယက္ခာ ကညာသိပ်ဇၟံ၊ အလုံရးတ္ကံ တမံဍုင်ဟေင်၊ ကဵုအာလန်ဂြး လုံရးတ္ကံကြေင်၊ ဂၠါဲဟွံတိတ်ဟေင် ရုပ်တၟေင်နူဂှ်၊ ရုပ်ထဝ်စရှ် ဒှ်ယက္ခသၟတ်၊ ဒေါဝ်ကမၠောန်အဴ ယက္ခဗြဴရတ်၊ နန္ဒကိတ္တိ ကျိုင်ဂ္ညိလၜတ်၊ တုဲတိတ်အာဟေင် ဇရေင်ဗြဴရတ်၊ ပြာပ်ညန်လုပ်အာ စရာဲပြာကတ်၊ လုပ်စိုပ်ဒေန်ရတ် မတ်ညာတ်နာဲဇု၊ ဇြဟာန်တမိုဟ် ဖျုန်ဂြိုဟ်သမ္ၚု၊ လုပ်ဂဇံကောံ ပ္ဍဲဒေန်ဂၠံမြု၊ နာဲက္ဍိုင်ကမု သာ်ဝွံပမာ၊ ညံင်စက်ရံင်သြဳ ပုဏ္ဏဳိပြဘာ၊ ကြိုက်စန္ဒဒြး တွာ်ဒစးအာ၊ မွဲသၞာံၜါဝါ ကာလစဏု၊ နာဲစိင်ထာင်ကိုန် လျးဍိုန်တသု၊ မလုပ်သမၞိင် တဲသၟီရာဟု၊ သၟီသူရိယျ တလက္ဍိုင်မြု၊ ပိသၞာံမွဲဝါ လုပ်တဲရာဟု၊ သီုယာတ်ကမု ဇကုဒဇပ်၊ တေံဂိတုကၠာ ရာဟုမရပ်၊ လေပ်ဟဲလေပ်ဗၠး နူမဂြးစပ်၊ ရာဟုရုပ်နာဲ အကာဲဂနပ်၊ ဇြဟာန်ဒါန်စပ် ဂနပ်ဇကု၊ မသ္ဂောံဗၠးဘဲ နူတဲရာဟု၊ ရာဟုရုပ်နာဲ အကာဲသ္ဇုင်ဂွု၊ ဍုန်ဒးစက္ခု ဇကုသမြပ်၊ ရာဟုဂနပ် ဇြဟာန်စပ်ဒး၊ သှ်ကၠေံဟွံဗၠး ကသးရုပ္ပါ၊ ဒွက်ပးတဏှာ ပမာရာဟု၊ စပ်ဒးစက္ခု ဂၠုသီုဒိုဟ်ပန်၊ သၟီနာဲနန်ဂွိုင် တလက္ဍိုင်သြန်၊ တုပ်ပမာပၠန် ဟွံဂွံညတ်သြာဲ၊ လုပ်ဂဇံကောံ ဖဴကရောံနာဲ၊ ယွံထဝ်ကမု ဒေံဇုကောဗၠာဲ၊ မူဒေသကီု ဟီုညိကျေဝ်လာဲ၊ မူဍုင်မူကွာန် သန်ထာန်ဒၞါဲ၀ါဲ၊ ဟီုညိကျေဝ်လာဲ အကာဲနန်လွိ၊ ယက္ခိဏဳမိင် သၟာန်သၟီစိ၊ သၟီတလတိ ဘုမ္မိပါလ၊ ဍိက်ကောန်ကၠင်ရ မိမဟွံမွဲ၊ ဒှ်ပ္ဍဲပုပ္ဖ ဍောင်ပဒၟပြဲ၊ က္တဵုဒှ်မွဲတဲ ပ္ဍဲဍောင်ပဒၟ၊ ပဍိက်တံဇိုင် မိတ်ဂွိုင်မှာယျ၊ လမျီုဇိုန်ကွာဲ နာဲက္ဍိုင်သေတ၊ ဒဵုလအိတ်ကီု လမျီုဂန္ဓ၊ နန္ဒကိတ္တိ ဘုမ္မိပါလ၊ ဂွံမိင်ရမျှာင် ပါင်ဗြဴယက္ခ၊ ညံင်သာဲတင်လာဲ ပၠာဲစုတ်သောတ၊ ဂၠံင်ဗြဴထပှ် ဟွံဗှ်ညိည၊ ညာတ်ရုပ်ယက္ခ ၜါဆညးသွဝ်၊ ရေင်ကာန်သၟဟ်န် ၜါမွဲနန်ထဝ်၊ လအိတ်ဇြဟာန် ဆာန်ကၟိန်တဝ်ဂၠဝ်၊ ရှ်သုဘာသိုတ် ပေင်စိုတ်သၟီဓဝ်၊ ဇြဟာန်သမြပ် ဒဇပ်ဇတဝ်၊ သၟီဗၠာဲမိန်လဝ် ရုပ်ထဝ်စရာဲ၊ ၜါမွဲနန်ဗၠဲ မွဲတ္ၚဲဟွံသြာဲ၊ ဇြဟာန်တမိုဟ် ဖျုန်ဂြိုဟ်ညံင်လာဲ၊ ဖဴညးထပှ် ညိဟွံဗှ်ဂၠါဲ၊ ၀ိုတ်ထောံကၠေံနာဲ မိတ်သဟာဲယျ၊ ညိရောဟွံဗှ် စိုတ်ဒှ်ညံင်ဇွ၊ ဒၟံင်ဖဴယက္ခာ ၀ိုတ်အာတုဲရ၊ ထောံကၠေံမှာယျ ဟွံပသဟာဲ၊ ဗြဴထပှ်ဆာဲ ဖရာဲထောံကၠေံ၊ ဟွံကသီုကသေံ ၀ိုတ်ထောံကၠေံနာဲ၊ သ္ဍိုက်ဗြဴယက္ခိ ညိဟွံမိက်သြာဲ၊ ဂၠိုင်ဂိတုတ္ၚဲ အဲၜါကဵုနာဲ၊ ဒလိန်ဒလာဲ နာဲသၟုဲလေင်၊ ဒိပ်ဒါဲဆံလံ သၟီနာဲတ္ကံကြေင်၊ ကၞိင်ကဵုကၞိင်ဖျေင် ရေင်ကာန်ဒိပ်ဒါဲ၊ သၟီဓဝ်ကဵုနာဲ ပယျာဲနန်မြ၊ ကောံဗြဴယက္ခ ခယျသာဓာ၊ တူနန်ထဝ်ကၠာ သာဓာတဴတုန်၊၊ ။

ဂၞကျာ်ဇၞော်သဳနန္ဒာ ပစဏာဲဥပ္ပါဲဗ္ဒဟ်ယဲ

လၟေင်ဒဒှ် တဝှ်လက်သန်၊ သၟီဇၞော်ကိတ္တိ တလသ္ၚိနန်၊ ကောံဗြဴယက္ခာ ညးၜါသၟဟ်န်၊ ၜါမွဲဒေန်သြန် လီၜန်ခယျ၊ ယက္ခစဏာဲ ဥပ္ပါဲဍေံပ၊ ဍေံဗ္ဒဟ်ယဲရော ဂၠိုင်ကဵုရောဂ၊ ဒှ်ဝေဒနာ ရောဂါဒုက္ခ၊ ဂၠို်င်ဂိတုတ္ၚဲ ပ္ဍဲပါသာဒ၊ ယဲပ္ဍဲခန္ဓ လံလက္ဍင်အာ၊ တုဲဍေံကော်ရော ဗိန္ဒောဟောရာ၊ ဗေဒင်ဇၞော်အိုတ် ဗိုတ်ပိအစာ၊ ကဵုကော်နင်ဟေင် ဟဂွံဝေင်ခြာ၊ ယွံၝဲခုဇ္ဇာ စှ်ေအာလမုဟ်၊ ခုဇ္ဇာမိင်ပြဟ် လမှ်ဆဴဆဴ၊ ဒြေပ်စှ်ေအာပၠန် နူကဵုနန်ပ္ကဴ၊ ဂၞကျာ်ဇၞော်အဴ ယဲတဴပ္ဍဲနန်၊ ဂၞကျာ်မွဲတဲ မပြဲလက်သန်၊ က္တဵုဒှ်ယဲစိ မိကသဝ်နန်၊ ကဵုကော်တိုန်ပြဟ် လမုဟ်ဝွံပၠန်၊ ဗွဲမပြဟ်သန် ပကဵုခၠန်လံ၊၊

ဗိန္ဒောဂွံမိင် ဝိဝိင်ဂြိုဟ်ချံ၊ မူဟိုတ်ဒှ်ပၠန် အသဝ်နန်ဏံ၊ ဂးတုဲဟောရာ ကွာ်အာယံယံ၊ တိုန်စိုပ်နန်ပြဟ် ပင်တဲယဵုခၠံ၊ မူပမိက်မိ ဟီုညိပလံ၊ ဍိက်ဂွံတီဆာဲ သၟီဗြဴနာဲတ္ကံ၊ သ္ဇိုင်ကီုသာကီု ဟီုကဵုဗိုန်ဇၟံ၊ ဂၞကျာ်မိင်အဵု ညိဟွံကဵုလံ၊ ယွံဗိန္ဒောတံ သိပ်ဇၟံပညာ၊ ညံင်ပါင်အဲကၠာ ဟောရာအမာတ်၊ နွံဂလာန်ဆာဲ ဥပါဲဟွံဝါတ်၊ ယဝ်ပ္တေဟ်ပါင်အဲ ဒိုက်ဟွံမွဲကၞာတ်၊ နာဲဂွံတသိုက် ပိုန်ဘိုက်ရာဲသာတ်၊ မွဲအယုက်ကၞာတ် ဟွံဝါတ်ရရော၊ စှ်ကသာပ်ဂေါဝ် ထဝ်သုဝဏ္ဏော၊ လာပ်မပြဲ အဲကဵုဗိန္ဒော၊ စှ်ကသာပ်ထဝ် လျးသဝဝ်ဟော၊ ကဵုလမုဟ်ရော ဗိန္ဒောပဒွိင်၊၊

ဟောရာအမာတ် ညာတ်လာပ်လဟိင်၊ ညာတ်ကဵုလာဘ စိုတ်ဝင်ကဗျိင်၊ ဟီုဗစညိ ယွံမိဗြဴသၟီ၊ ဟီုရပဒွိင် သၟီဗြဴအဂ္ဂ၊ ယက္ခိဏဳမိင် လဟိင်စိတ္တ၊ အဲဟီုတိုန်ရော ဗိန္ဒောယွံလ၊ အဲပဒိုက်ယဲ ဒှ်ပ္ဍဲခန္ဓ၊ မတ်ဗြဴထပှ် ဒှ်ဗြဴအဂ္ဂ၊ ဂၞကျာ်သၟီရေင် တရေံဟေင်ရ၊ ဗိန္ဒောတြုံလွုဲ ပၠာဲဂဥုဲဂျ၊ ဂွံခဍောင်မတ် ထတ်သန်တေဇ၊ သီုညးထပှ် ယဲဂှ်ဗၠးရ၊ ဂွံဒှ်သုခ စအယုက်ကၠာ၊ ဗိန္ဒောဂွံမိင် လဟိင်သောတ၊ ဂွံရကြုတ်ဏာ ပသင်ကာညိ၊ လယိုင်ဍိက်ရ လပဒွိင်စိ၊ ဍိက်ဟောရာဇၞော် ဒှ်ဗော်နန်လွိ၊ ဍိက်ဟီုပ္တီပြဟ် ဆပိုန်ဒှ်စိ၊ နာဲပဒွိင်ညိ ယွံမိကျာ်သြဳ၊ မိကၠောန်ရံက်ရက် ထဏက်ဍိုတ်ညဳ၊ ဂတှ်ေလဝ်ပြဟ် စဲတ္ၚဲကှ်ဇဳ၊ ဖအင်ကဵုပရောံ ပ္ဍဲဂၠံကျာ်သြဳ၊ သၟဝ်သၞာပ္ညဳ ဖုန်ဒၞဳမိသ္တိက်၊ ပၠောဇကုပြဟ် ဇုတ်ကှ်ခနှိက်၊ ညံင်ဇုတ်မကဝ် တသဝ်ဂမ်အိက်၊ ကာလမိသ္တိက် ဇနိက်စဵုဗ္ဒး၊ ညံင်ဇုတ်ကဝ်အိုတ် စိုတ်သၟီကြုပ်ကြး၊ ဗွဲမလောဲသွာ ပညာဍိက်ပျး၊ ကေတ်ဂွံလောဲသၟတ် စက္ခုမတ်ညး၊ ဍိက်ချပ်ညံင်ဒး ထၜးကဵုမိ၊ သဳနန္ဒာမိင် လဟိင်စိုတ်စိ၊ ညံင်မဂွံသၟတ် နုင်ရတ်နိဓိ၊ ညံင်ကသပ်အဲ ဂွံရဲသ္တုံဇွိ၊ ဂွံဍိုက်ပေင်အိုတ် ပမိက်စိုတ်မိ၊ ညးထပှ်သ္ကဲ ၀ဲနူအဒိ၊ ဒှ်ညံင်စိုတ်မိ ဗြဴယက္ခိဏဳ၊ တုဲကဵုလာပ်ကၠာ သဝ်ဟောရာပ္ညဳ၊ ထဝ်စှ်ကသာပ် ကဵုလာပ်အနဳ၊ အစာနာဒဳ ကျာ်သြဳသ္ဇုင်ဂွု၊ ဒုင်ကေတ်ကသာပ် ဒှ်လာပ်ဇကု၊ တုဲကလေင်စဴ လထဴကအီနှု၊ ထဴတေင်ဗင်ကၞပ် ကသပ်ထဴဗျု၊ လထဴကအီနှု ရတ်ဝွံပျးအူ၊ ပညာပြဲသအး ဂွံပျးဂကူ၊ တြဳဇှ်ပညာ ဒၞါဲအာပေင်သၞူ၊ စိုပ်သ္ၚိတုဲဇူ ထဝ်အူဒကေဝ်၊ ဂွံလာပ်ဂၞကျာ် ဂၠိုင်သာ်ဂေါဝ်ပၠေဝ်၊ ဟောရာမလေဝ် ဟီုပၠေဝ်နင်ဏာ၊ ဂလာန်ဝွံမာ တန်လဝ်ကၠာတုန်၊၊

မတ်ဂၞကျာ်ထပှ် ဂၠံက်ကေတ်တုဲ ကလော်ဗြဴသဳနန္ဒာ ပြင်ဏာကဵုဣဏင်ကင်ရဳ

လၟေင်ဒဒှ် တဝှ်ဖဵုဂုန်၊ ပိုဲဟီုပျးတုန် တိုင်ဂုန်သံင်သာ၊ ယက္ခိဏဳအဴ ဗြဴသၟာ်ဗဒါ၊ ဒတောဝ်ဝဲသၟဟ် ညးထပှ်ကၠာ၊ ဍေံဗ္ဒဟ်ဥပ္ပါဲ စၞာဲဂၠိုင်ရာ၊ ညံင်ဒှ်ယဲရော ဂၠိုင်သန်ရောဂါ၊ ဗြဴသၟာ်ဗဒါ ယက္ခဳပါပ၊ ဍေံချပ်ပၠေင်ပြဟ် ဗြဴထပှ်ရ၊ ညံင်ဒှ်ရောဂ ဍေံပမာယာ၊ ဍေံကဵုကော်ရော ဗိန္ဒောဟောရာ၊ ပြဟ်တိုန်စိုပ်အာ ကာလဂှ်ရ၊ တော်ဂၞန်ရံင်မွဲ ပ္ဍဲကဵုယုဂ္ဂ၊ အယုက်ဍေံစုံ ဒတုံပါပ၊ ရာဟုဍိုက်လာပ် ဂြိုဟ်လုပ်ပြက်စ၊ အစာသဝ်ရ ဆကဵုဂဥုဲ၊ အယုက်သုန်အာ ဇာတာလီုသ္ဂုဲ၊ စန်လက်ဟွံခိုဟ် ဂြိုဟ်လီုသဏုဲ၊ သဝ်ကဵုဂဥုဲ စတုဲဟွံဒး၊ ယဲလေဥပ္ပါဲ သဝ်စၞာဲပြး၊ ဓာတ်ကျာလီုချာဲ ဖေက်လှာဲဂတး၊ မိဗြဴယက္ခ ရောဂဇၞော်ကၠး၊ အစာသဝ်ဗ္ဂန် ချပ်ပၠန်ဂတး၊ ကဵုဓာတ်မဂး ဒးညိပၠန်ဟာ၊ ဖျုန်ကၠိက်ဖျုန်ဂၠဴ နှဴမဆာလာ၊ သဳလောလဳမှဴ ဗြာတ်တ္ၜဴဗြဴတာ၊ ဆနွံပ္ဍဲဓာတ် ညာတ်ပ္ဍဲပရာ၊ ကဵုစတုဲသွံ ယဲဟွံသက်သာ၊ ယဲဂှ်တူအာ နူကၠာရိုဟ်တ္ၚဲ၊ ရံက်ရက်လးလဝ် သၟဝ်သၞာပြဲ၊ ယက္ခိသ္တိက်လော ပၠောဇကုအပ္ဍဲ၊ ဗြုတဴကြောပ်ကြောပ် ဒဇပ်လောန်တဲ၊ ဇုတ်ဇၞော်ခလှောတ် ၜေါတ်ဇုတ်သကဲ၊ ချိုတ်ကွေံရအဲ တ္ၚဲဝွံရကော၊

နန္ဒကိတ္တိ ညာတ်မိသ္တင်လော၊ ဇုတ်ဗြုကြောပ်ကြောပ် ဒဇပ်စိတ္တော၊ ဖေက်စုတိရော ဇြဟာန်ကောဂၞဴ၊ သၟီဇွိတ်သပေါတ် မတ်ရံင်ကြက်လှဴ၊ ညာတ်စိုတ်ဒဇောတ် မတ်ညံင်ကကၠဴ၊ လရိုအ်ကမြဴ ညံင်ဂၠဴဒးကံ၊ သၟီညာတ်သ္ၚိတ်သ္ၚဲ ယဲဍေံဒှ်ကြံ၊ ယွံလေအမာတ် ၀ါတ်ကွေံယဲကံ၊ အာကော်ဟောရာ အစာသဝ်စံ၊ ကဵုတိုန်ပြဟ်ကွေံ အဲဖျေံအသံ၊ သေဏာတဆှ် ညံင်ပရှ်ကံ၊ စိုပ်သ္ၚိဗိန္ဒော ဟောရာအဟံ၊ ယွံလေအစာ မဟာသင်ဃံ၊ နွံတဴအသံ ဂၠံပါင်နာဲညး၊ ကဵုတိုန်အာပြဟ် လမုဟ်ညိမၞး၊ သဝ်လေပ်ဗိန္ဒော ဟောရာစဳကၠး၊ မိင်တုဲမဂး မၞးဒြေပ်တိုန်ရ၊ တိုန်စိုပ်နန်ကၠတ် သုဒဿဏ၊ လပုဟ်တဲယဵု ပ္ဍဵုတူသိသ၊ ယွံတလတိ ဘုမ္မိပါလ၊ မူနွံပမိက် ကော်ပိုဲဍိက်ရ၊ နန္ဒကိတ္တိ က္ဍိုင်ဂ္ညိသေတ၊ ယွံဗမၞးတြ တုလဝေါင်သာ၊ ဂၞကျာ်ဇၞော်ရ ရောဂကၠုင်ပါ၊ ဟိုတ်ဂှ်ဒးကော် ဗော်သဝ်ဟောရာ၊ နာဲဗိန္ဒောဇၞော် လုပ်ဗော်မဟာ၊ က္ညသြဟ်ပ္တဴစိ ရံင်ညိအစာ၊

ဟောရာသ္ၚဳမွဲ ပ္ဍဲစက်ဇာတာ၊ ပြကိုဟ်ကၞပ် ပညပ်သင်ချာ၊ ပ္ဍဲပြကိုဟ်ရ တဗ္ဗျဂုန္နာ၊ စာရကတ္တ သာရသင်ဃာ၊ ဓုဝေါင်ကိန်ဆာန် မှေန်ထဝ်ပ္ကာန်ဏာ၊ တိတ်ပ္ဍဲမန်တပ် ကၞပ်တမၠာ၊ ပြက္ကဒိန်ကၠာ ဗျာကရဏဳ၊ စက္ခုပါလ တာပဿညဳ၊ ဝေတ်ဒျကုလာ သာဒိပ္ပဏဳ၊ ဇောတရတ်ဆက် ညံင်အိန်တက္ခဳ၊ မတုပ်အနဳ သဝ်ဇဳဝက၊ ဥတုပိဒွန် ဓာတ်ပန်ကာလ၊ တဝါ်ယာကြာ နက်သတ်ကာလ၊ တီအိုတ်ကၞောတ် သ္ဇက်တောံၜတ်စ၊ ဟောရာမပ တလတြဳဇှ်၊ ကဵုဂဥုဲပြဟ် ယဲဂှ်ဟွံသာ၊ နွံမွဲနဲပၠန် ဂြန်ညးတမၠာ၊ ဂွံစမဂး ဗၠးရလောဲသွာ၊ ဂြန်အိန်တက္ခဳ ပ္ညဳယမုကၠာ၊ ဂွံလေဝါတ်လောန် နွံပ္ဍဲနန္ဒာ၊ အိုတ်စိုတ်ဍိက်ကၠာ ဂြန်အစာဝွံ၊ ကေတ်လေဝါတ်လောန် တန်ပ္ဍဲဇကု၊ နွံပ္ဍဲနန်မြု ယမုဂကူ၊ ဂွံတုဲမဂး ဟွံဒးစံင်တူ၊ ဂွံညိဟာအဴ ရဴဍောင်ဝိဇူ၊ ဂဥုဲဝွံဂှ် ဒှ်နူဂကူ၊

နန္ဒကိတ္တိ ညာတ်မိလောတ်လော၊ တုဲဟီုတိုန်ပြဟ် ပ္ဍဲဂှ်ထောထော၊ ယွံလေဟောရာ အစာဗိန္ဒော၊ ဇကုလဝ်ကၠာ စိတ္တာအဲရော၊ စိုတ်ဂၠံက်ကဵုမာန် ဗြဴယာန်ဟေမော၊ မိတ်သ္ဍိုက်အဲ ယဲသ္တင်လောတ်လော၊ ဟီုမူဒှ်ရော ဗိန္ဒောယွံမ၊ ဟီုညိဗိန္ဒော ပ္ဍဲပယောဂ၊

ယွံကြက်ဂကူ တၞောဝ်မှာရာဇ၊ ယဲဝွံထတ်လောန် ဒးသ္ကန်ဇိ၀၊ ဂွံပြဟ်ဗၠးလောဲ မွဲသတ္တဟ၊ ဍိက်ဗိန္ဒောတၞံ တမ်ပထမ၊ ယဝ်ပ္တေဟ်ဍိက်ရ တၠဂွံလမျီု၊ ယဝ်ဟွံပ္တေဟ်အဲ အိုတ်သ္ကန်ဒဲလီု၊ ယဝ်ရပ္တေဟ်ဂှ် ဗၠးပြဟ်စိုန်သ္ကီု၊ ဂဍောင်မတ်ဂှ် ညးထပှ်ကီု၊ ယဝ်ဂွံမဂး ဂွံဗၠးဘဲကီု၊ ယဝ်သ္ဂောံညံင်ဟီု လမျီုဂွံဗၠး၊ နန္ဒကိတ္တိ ဣဓိဇၞော်ကၠး၊ မတ်ညးထပှ် ဂွံပြဟ်ရမၞး၊ ဂွံရပဒွိင် သာ်ဝွံသၟီဂး၊ ဂဥုဲဝွံသအး ဗၠးရအစာ၊ ဂွံလမုဟ်ရ ပဒွိင်ပူဆာ၊

သၟီကဵုကော်ဗၠာဲ သရာဲတံကၠာ၊ ယွံသရာဲအဲ ဗၠာဲမွဲအသာ၊ မၞးတိုန်နန်သၟတ် ဂၠံက်သီုမတ်ၜါ၊ ဒေံဒဒေံပြဲ မွဲဒိုဟ်ဂၠံက်ဏာ၊ ဂၠံက်ဆမွဲဒိုဟ် မွဲကဵုခိုဟ်ကၠာ၊ ညးတရဴဂှ် ဂၠဟ်ကေတ်သီုၜါ၊ ပဒညညှာ အာသီုၜါပိ၊ တေံဗြဴထပှ် ပဒှ်ယုတ္တိ၊ ဟိုတ်ဝဳဝဲပၠန် ပစ္စုပန်စိ၊ ပါဏာတိပါ ပ္တုဲကၠာအဒိ၊ ၀ဳဝဲဆေဝ်ကြတ် ညးဂၠံက်မတ်မိ၊ ဟိုတ်စင်ကက္ဍတ် မတ်ၜါသ္တုံဇွိ၊ ဟိုတ်စင်ကလိုဟ် သီုၜါဒိုဟ်ဂၠိ၊ ၀ဳဝဲဗက်စိ မိဒးဒုင်ရောင်၊ ဟိုတ်ဂှ်ညးဂၠံက် ခေါ်မတ်မွဲတောင်၊ သီုဂၠံမတ်ၜါ ညံင်စမ္ပာဍောင်၊ ညးဂၠံက်ဏာရောင် မွဲတောင်သေင်ဟာ၊ ၀ဳပက်စိုတ်ရောင် မိဍောင်စမ္ပာ၊ ဟိုတ်ဒးပ္တုဲလဝ် ပ္ဍဲဓဝ်ပါဏာ၊ ၀ဳဝဲဗက်ကၠုင် မိဒးဒုင်ကၠာ၊ ကြဴမိဗၠးဘဲ နူဝဲသေင်ဟာ၊ ကြဴဂွံတန်သိုက် ဟွံဒိုက်ၜါဝါ၊ ဗၠးဝဳဝဲပၠန် တန်မွဲသၞာ၊ ကြဴမိမြာ တူပြာသာတ်နန်၊ ဟိုတ်ဝဲဂှ်သၟတ် အဇျှတ်ဗိုန်က္ညန်၊ ညးဂၠံက်မတ်နာဲ အကာဲလက်ဂန်၊ ဒးဒုင်တဴပၠန် လဂ္ဂန်ကြုတ်ဏာ၊ သရာဲသၟီဇၞော် ဍေံဂၠံက်ဟွံညှာ၊ ညးတရဴစိ သ္တုံဇွိသီုၜါ၊ ဒေံဒဒေံပြဲ မွဲဒိုဟ်ဂၠံက်ဏာ၊ တုဲလုပ်ကွာဲရ ဓမ္မရာဇာ၊ မတ်ညးထပှ် သၟဟ်န်သေင်ဟာ၊ သီုထပှ်သွံ ဂွံရအစာ၊ ဗိန္ဒောရာဇာ သဝ်ဟောရာစိ၊ ဍေံဂွံတုဲမာ ပၠောပ်ဏာတွာဲမိ၊ သဳနန္ဒာသွံ ဂွံမတ်သ္တုံဇွိ၊ ဍေံဗနုဟ်ကၠာ သၟီကျာလဲမိ၊ ၀ါယျောစိုပ်ပြဟ် ပ္ဍဲဂှ်ဟဂၠိ၊ ယွံသဟာဲအဲ ထပှ်မွဲမိ၊ ဂဍောင်မတ်ဍေံ ဂွံကွေံဒမၠိ၊ အဲပြင်ဏာညိ ကဵုမိကင်ရဳ၊ ဍေံစုတ်ရဴပြဲ ပအပ်တဲကျာပ္ညဳ၊ ဝါယောဂွံမွဲ ခဍတ်တဲချဳ၊ ပြဟ်အာစိုပ်က္ဍင် ဣဏင်ကင်ရဳ၊ ကောန်ဗြဴယက္ခဳ ဒေဝဳအဂ္ဂ၊ ပြဟ်အာစိုပ်ရ ကောန်ယက္ခတုန်။ ။

မိသဳနန္ဒာ ဗြဴယက္ခာပ္ဍုန်၊ ဂွံမတ်ညးဂှ် သီုထပှ်တုန်၊ ယက္ခမဵုရုန် ဂုန်ယဲဥပ္ပါဲ၊ ဂွံဗၠးဗွဲပြဟ် ဒှ်ယဲစၞာဲ၊ သၟီဓဝ်ကဵုနာဲ ဟွံသြာဲသဝ်ဂၠု၊ တူဒေန်ဒြင်စိင် သၟီကဵုနာဲဇု၊ စသိုင်တဴစု တူနန်မြုထဝ်၊ လီၜန်တဝ်ဂၠဝ် မွဲနန်ထဝ်ဂျ၊ စသိုင်သုခ ကာလဂှ်ပၠန်။ ။

သၟတ်ဗြဴထပှ် မတ်ကၠက်အာတုဲ ညးအာစွံလဝ် ပ္ဍဲဥမင်

ကြီုဗြဴထပှ် ဟီုတွံမွဲတန်၊ လၟေင်လက်သန် ဟီုပၠန်မွဲဝါ၊ ညးဂၠံက်မတ်တုဲ ဟွံသဏုဲခြာ၊ ညးတရဴသၟတ် ဂၠံက်သီုမတ်ၜါ၊ ဒေံဒဒေံပြဲ မွဲဒိုဟ်သေင်ဟာ၊ သၟီကဵုအသံ နူဂၠံဖျေံဏာ၊ ပ္ဍဲဥမင်စု မတ်ဂၠုသပါ၊ ပကဵုအင်အောတ် သၟတ်လွဳပရာ၊ နွံသီုဂပ္ဘ မိထသပါ၊ ညးထပှ်ဂၠေါဲ ဒတဲဖျေံဏာ၊ ညးပၠောပ်ဥမင် ဒေင်သၠင်လ္ၚာပ်လ္ၚာ၊ ရမတ်ဒဇူ နူစက္ခုဒွါ၊ သီုမကင်ဇတ် ဗြဲမတ်ဖြာဖြာ၊ ကင်ဇတ်လ္ၚာပ်လ္ၚာ ပူဆာလောံလာဲ၊ ဗှ်ဨကရာတ် စိုတ်နာဲသ္ကာတ်သြာဲ၊ ပ္တေဟ်ဣဝဴပဴ ပတဴစနာဲ၊ ကောဟးကောဗၠာဲ နာဲက္ဍိုင်မာလဳ၊ နာဲကဵုဂၠံက်မတ် ပ္တေဟ်ဗြဴလဇ္ဇဳ၊ အဒိနာဲဆာန် ပ္ကာန်က္ဍိုပ်မွဲဒၞဳ၊ လမုဟ်ဟဲဗြဟ် ညိဟွံဗှ်သ္ၚဳ၊ မိဒးကၠင်ဟဳ ဗနဳဥမင်၊.....

ကောဟးကောမင် မိကၠင်ဨကော၊ ကံဘဝရော ပ္ဍဲကောနာဲသ္ၚိ၊ နိဿင်စံင်တူ တ္ၜူမာဲသုင်ဂျိ၊ ဗှ်သၟီကောမိ ဟွံဗှ်ညိရော၊၊

ဂဂဵုဂဟီ အကးသ္ၚီဒေါံ၊ သတ်ကြုက်မြာင်သွံ ဍုင်ဒေါံညံင်ထဝ်၊ စဵုထနှေင်ဂွါင် ဗြုတာင်တမ္ညဝ်၊ ဗှ်ဒးလင်ဇွောဝ် ကာဲကဝ်သန်သွံ၊၊

ရံင်တူအမှဲ မတ်ဗြဲကလောံ၊ ဗဳကွိတ်ဂတောံ ထောံပ္တုံဗဳသ္တဳ၊ စောန်လောန်သေဝ်ဂြေဝ် သြိုဟ်ပဒေသြဳ၊ ဗှ်ဒးကၠင်ဟဳ သ္ကန်နှဳရသွံ၊၊

သၟီနာဲက္ဍိုင်စက် အံသဝ်သ္ဇက်ပ္တောံ၊ မတုဲတေံသွံ ဂွံမံင်မွဲနန်၊ သၟီဗၠာဲဇိုန်လဝ် လွဵုသီုထဝ်သြန်၊ ဗှ်ကောဒဇန် စံင်တူသန်သွံ၊၊

တလက္ဍိုင်ဗၠဲ မပြဲသ္ဇက်ပ္တောံ၊ မတုဲတေံသွံ စွံတူနန်ဒြင်၊ လမုဟ်ဒေင်ဗျောံ ပ္ဍဲဂၠံဥမင်၊ ဒဒိုက်ရိင်က္တင် လင်ဇွောဝ်သန်သွံ၊၊

နာဲက္ဍိုင်သေတ တေဇဂၠိုင်စွံ၊ မတုဲတေံသွံ ပ္တိုန်စွံတူနန်၊ လမုဟ်ကၠုင်ဒး ဒွက်ပးလွောင်စန်၊ ဗှ်ကျာ်သြဳနန် လောံလာဲသန်သွံ၊၊

တလက္ဍိုင်ထဝ် အံသဝ်သ္ဇက်ပ္တောံ၊ မတုဲတေံသွံ စွံပ္ဍဲနန်ထဝ်၊ လမုဟ်ဒးကၠင် တူယဲလင်ဇွောဝ်၊ ဂုန်စက္ကဝဝ် လင်ဇွောဝ်သန်သွံ၊၊

ဟးစက္ကဝဝ် အံသဝ်သ္ဇက်ပ္တောံ၊ မတုဲတေံသွံ စွံပ္ဍဲနန်လွိ၊ လမုဟ်ကၠုင်ဒး ဒွက်ပးသုင်ဂျိ၊ ဂုန်သၟီကောမိ သုင်ဂျိသန်သွံ၊၊

နန္ဒကိတ္တိ ဣဓိဂၠိုင်စွံ၊ မတုဲတေံသွံ သ္ဂောံဒ္ၚေါဝ်လးလေင်၊ လမုဟ်ကၠုင်ဒှ် ရမတ်ပြဟ်ဍေင်၊ ဟးကသူကၞေင် လေင်ကွေံဟေင်သွံ၊၊

သၟီတလနန် ဂၠိုင်သန်သ္ဇက်ပ္တောံ၊ မတုဲတေံသွံ ကေင်ဂွံသာဓာ၊ ပ္တေဟ်ဣလုဝဲ ကောအဲဗညာ၊ ဝေင်ပၞာန်လ္ၚာပ်လ္ၚာ စံင်နှာသန်သွံ၊၊

သၟီတလဒါန် နွံညာန်သ္ဇက်ပ္တောံ၊ မတုဲတေံသွံ စွံတူနန်ကၠတ်၊ ပ္တေဟ်ဗြဴဒဇန် ဂၠံက်ထောံကွောန်မတ်၊ ဒဇဳဒဇောတ် ကင်ဇတ်သန်သွံ၊၊

ဗြရတ်ကုမ္မာ က္တဵုဒှ်မၞိဟ်

ဂၞကျာ်ထပှ် ပဒှ်သာ်လွာ၊ ဒၟံင်ပ္ဍဲဥမင် လိင်လင်လောတ်ဇၟာ၊ သ္မမစံင်တူ သ္မမပူဆာ၊ လၞီဂၠိုင်အြ ဂၠိုင်သောသၞာ၊ သ္မမဇွောဝ်လင် ဘိင်ဘင်လ္ၚာပ်လ္ၚာ၊ သ္မမဇြဟိတ် လအိတ်ပူဆာ၊ သ္မမလ္ၚာပ်လ္ၚာ ထသပါအဴ၊ သ္မမဇြဟိတ် လအိတ်ဂၠက်သ္ၚဴ၊ ညးထပှ်အဴ တဴပ္ဍဲဥမင်၊ သီုမဒေင်သၠင် ကၠင်ကာဲကနာဲ၊ ဗှ်ကဵုသၟီဗၠာဲ ဒဇန်ရာဲသာတ်၊ သီုမသ္ဗသ္ပာတ် ဟွံညာတ်ဒိုဟ်ကၠင်၊ ဒဒိုက်လောန်တဲ တဴပ္ဍဲဥမင်၊ သၠးကောန်ကၠာ ဗြဴရာဇာဝင်၊ ကောန်လရိုအ်အဴ ကဴကဴယာံကြင်၊ ဒေံတရဴမိင် မုက်မတ်လိင်လင်၊ သြာ်စၝဲဂၠု ဗရုဝင်ဝင်၊ သြာ်ဒဳၜါဗြက် သွက်ထပှ်အရင်၊ ပရံညဳသာ ပအဟာက္ဍင်၊ သီုၝဲတရဴ သၟဟ်တဴဗီုပြင်၊ စဖျုန်ကောန်အိုတ် ၜိုဟ်စိုတ်ခမၞင်၊ .....

ဒေံဒဒေံပြဲ မတ်မွဲယးခၠင်၊ ညးပရံသွံ စွံလဝ်သောဒင်၊ ဂိုင်ဒေပ်စွံလဝ် ပ္ဍဲဒေါဝ်ဥမင်၊ ညးတရဴရ ပအဟာက္ဍင်၊ ဒေံဍောတ်ဘိင်ဘင် ဗျဵုထင်လောန်အာ၊ ဒေံညာတ်ညးစ မိထသပါ၊ ဗြဲမတ်ဒဇူ နူစက္ခုဒွါ၊ ပ္ဍဲပုဏ္ဏမဳ နာဍဳပြဲဖာ၊ မြိုတ်ဒဇိုက်ခိုဟ် ပ္ဍဲဗြိုဟ်ပြာထာ၊ ဗေသာခသၟတ် ကွိုန်နက္ခတ္တာ၊ ဗၠးဒုဟ်နာထ ပ္ဍဲစက်ဇတာ၊ လက်သန်ဇၞော်စိ သီုပိစှော်ၜါ၊ တ္ၚဲဗြဴဗတိ နွံသိဒ္ဓိကာ၊ သၠးဂဝ်စိ မိသုက္ခမာ၊ ဂွံကောန်တြုံမွဲ နဲဍောင်ပုပ္ဖါ၊ ရုပ်သာ်အဝဲ ပြဲလက္ခဏာ၊ ကောန်သုက္ခမာ ဒှ်ကြာဒဒိုက်၊ ကၠုင်က္တဵုဒှ်ပြဲ ပ္ဍဲဥမင်တိုက်၊ ညးတရဴမိင် တွိင်ပါင်ဗြိုက်က်၊ ယွံလေဝ်ဒေံဍောတ် ကၞတ်ဒဒိုက်၊ ကောန်ဒေံသြာ်စ သ္ဂောံပပြဘိုက်၊ ဂၠေါဲကၠုင်ဂြုဂြု မတ်ဂၠုနရိုက်၊ နင်ကောန်ဒေံဍောတ် ဇုတ်ၜတ်ပိုဲသ္ဍိုက်၊ သ္ၚာဲစဗြိုက်က် သ္ဍိုက်ကာယဒွါ၊ ဗျဵုဂၞဴသမၠာန် လောန်လာန်သေင်ဟာ၊ ဒေံဒဒေံပြဲ မတ်မွဲညာတ်ကၠာ၊ ကောန်ဇကုသွံ ဗလေတ်ထောံမာ၊ ဖျုန်ကောန်ညးအဴ တရဴသေင်ဟာ၊ ဖျုန်ကောန်ညးအဵု ပရံကဵုဏာ၊ ဂွံတုဲစကၠာ ပအဟာဂၞဴ၊ ကိတ်စဟွံညှာ ပ္ဍုင်အာဒေံဗြဴ၊ မံင်သံင်မသ ဗှ်ေကဵုစတဴ၊ စတုဲဒှ်ပၠန် ခၠန်ဗၠေင်ကရဴ၊ ကိတ်စဟွံညှာ ပ္ဍုင်အာဒေံဗြဴ၊ ဒၞါဲညးညးမံင် သ္တိက်ထရံင်တဴ၊ ဒေံဒဒေံအဴ လွဳတဴကောန်ဍောတ်၊ ဟဂွံဗြုဗြန် သောန်သောန်ကရောတ်၊ ဖျီုဖအံဗမဴ လွဳတဴကောန်ဍောတ်၊ ခုတ်ယမုအဴ ကောန်ဂၞဴအဆတ်၊ ဗြရတ်ကုမ္မာ ခုတ်နာမသၟတ်၊ ယမုကောန်ဍောတ် ဗြရတ်ကောန်သၟီ၊ ပ္ဍဲဥမင်ဂၠု သက္ကုလဟိင်၊ မတုဲတေံမိ ပ္ဍဲသ္ၚိဒြင်စိင်၊ ပိုန်ဟာန်ဇၞော်ကၠး ညိဟွံဒးဒွိင်၊ တူပြာသာတ်ရတ် နန်ကၠတ်ဒြင်စိင်၊ မိဂွံလဟိင် သိုက်လှိင်ရကောန်၊၊

မိပ္ကဴတင် ရိုဟ်ရေင်တဴကဵုကောန်ဂၠုဗြရတ်

ဟးဣတဇု ဂၠုမဂေါဝ်လောန်၊ ဝဳပက်ယာဲပၠန် ဒးခြာခၠန်သ္ဍး၊ ကလိဂွံနာဲ ဝါယာဲခြုပ်ခြး၊ သြိုဟ်မိဒကး ၜါလွးရကောန်၊၊ * အဵုဣတယာဲ နာဲမွဲဂေါဝ်လောန်၊ အံက်နာဲဒဇန် မွဲတန်ဂၠံက်မတ်၊ ပ္ဍဲဂၠံင်ဥမင် ကဵုယာဲကင်ဇတ်၊ လၞီလောန်ဗၞတ် ကင်ဇတ်သန်ကောန်၊၊ * အဵုထဝ်ကမု ဂၠုမဂေါဝ်လောန်၊ ဝဳပက်ယာဲပၠန် ဂၠိုင်လောန်ပြာကတ်၊ ဝဳဝဲဇၞော်ကၠး ကၠုင်ဒးဖတ်ဖတ်၊ ဗှ်တိုန်စိုတ်ဍောတ် ချိုတ်သၟတ်ရကောန်၊၊ * အဵုထဝ်ပဏာဲ နာဲမွဲဂေါဝ်လောန်၊ ကလိဂွံပၠန် ကောန်ထဝ်ကမု၊ ဗှ်မိဒးကၠင် ပ္ဍဲဥမင်ဂၠု၊ စိုတ်ယာဲလ္ၚု စုတိရကောန်၊၊ * ဗှ်သၟီအံက်မ ပဝဒဇန်၊ ပ္တေဟ်ဣလုပၠန် ပ္ကီုဒန်ဂၠံက်မတ်၊ သီုၝဲတရဴ ဒှ်တဴကင်ဇတ်၊ ဇဝေါဝ်ရမတ် ချိုတ်သၟတ်ရကောန်၊၊ * ဟးကောန်ဗြရတ် ရုပ်ဗတ်ညးသောန်၊ နူညာတ်မုက်ကောန် မိပ်စိုတ်လောန်ကာဲ၊ ဗှ်အံက်နာဲပ ပဝစဏာဲ၊ ဒဒိုက်လောံလာဲ ယာဲချိုတ်ရကောန်၊၊ * ဟးသမ္ပာန်ထဝ် ရုပ်မဂေါဝ်လောန်၊ ဗှ်အံက်သၟီမန် ဒဇန်ယဲသြ၊ ထောံလဝ်ယာဲဇု ပ္ဍဲဥမင်ဂ၊ မိဒးလ္ၚုင်လ္ၚ ယာဲချိုတ်ရကောန်၊၊ * ကလိဂွံနာဲ စိုတ်ယာဲမိပ်လောန်၊ ဗှ်မိစောန်လောန် ကၠုင်ညာတ်ကောန်ဂၠု၊ ဒမာအံက်နာဲ ယာဲဗျောံလ္ၚု၊ အိုတ်သ္ကန်ဒၞါဲဝွံ စုတိရကောန်၊၊ *

ဒေံဍောတ်ပ္ကဴတင် လၞီက္ဍင်လောန်၊ ကလိဂွံပၠန် ကောန်ဂၠုသာ်ဗၠဲ၊ ဟးထဝ်ဒကောင် ဂဍောင်မတ်အဲ၊ တလအဝဲ ပ္ဍဲဂၠံဥမင်၊ ဗှ်ဂတဵုလွိ သ္ၚိရတ်ဒေန်ဒြင်၊ ဟးရာဇာဝင် မိဒးကင်ဇတ်၊ ဟးကောန်အသဝ် ရုပ်ထဝ်ထမၞတ်၊ ဟးဒကောင်ရတ် ရုပ်ဗတ်ညးသောန်၊ ဟးဂၠုလစောန် ကောန်ရာဇာဝင်၊ ဟးထဝ်ကမု မဂၠုနန်ဒြင်၊ ပ္ဍဲဂၠံဥမင် ဂၠုကမၠင်ယာဲ၊ ဟးမဂေါဝ်လောန် ကောန်ထဝ်ပဏာဲ၊ ဟးကြက်စလန် မဂၠုကောန်ဗၠာဲ၊ ဟးထဝ်ပဏာဲ နာဲတလဒါန်၊ မိအာန်တၞာန် လောန်လာန်သန်ကောန်၊၊

ဗြဴဒဒေံဍောတ် ရေဝ်ရောတ်ကဵုကောန်၊ ယဝါံသြောန်န် စောန်လောန်ရိင်က္တင်၊ ဗှ်ကောဗညာ မိဒးခြာဒင်၊ ကောအဲဘာတ်ထောံ စွံပ္ဍဲဥမင်၊ ဗှ်ဒးဟဳကၠင် ပ္ဍဲဥမင်ဟေင်၊ သီုၝဲတရဴ ယာံတဴရိုဟ်ရေင်၊ မိကဵုကောန်ဍောတ် ရမတ်ပြဟ်ဍေင်၊ ပ္ဍဲဥမင်အဴ ယာံတဴရိုဟ်ရေင်၊ မိလွဳလွတ်လဝ် ကောန်ထဝ်အလေင်၊ ပ္ဍဲဥမင်ဟေင် ရိုဟ်ရေင်တဴတုန်၊၊ ၊၊

စလာဲဒဒှ်ဗြရတ်

လၟေင်ဒဒှ် ဟီုတွံမွဲဝါ၊ ဗြဴဒဒေံဍောတ် ထတ်သောသၞာ၊ လွဳတဴကောန်ရ ကာလဂှ်ကၠာ၊ ဇၞော်အာဖောင်ဖောင် ညံင်ဍောင်ပ္ကဴသွာ၊ အယုက်စိုပ်တုန် မသုန်အခါ၊ ဇၞတ်လွဳပရာ ဂေါဝ်ဂါစရာဲ၊ ရုပ်ညံင်ပ္ကဴဍောင် ဒၟံင်ကရောံယာဲ၊ ဇၞော်အာညိညိ အဒိဒှ်ဗၠာဲ၊ ကောံကောန်ညးဍုင် ဝေင်ကၠုင်ကွဳဆာဲ၊ ဓနေံကရောဲ ဂၠိုင်နဲဥပ္ပါဲ၊ ဗၠာဲညးဍုင်ကောံ ဝေင်ကရောံနာဲ၊ ရိုဟ်ရိုဟ်တ္ၚဲဆာဲ ဒၞါဲဝေင်ဂွံဇၞး၊ ဓနေံကရောဲ ဂွံပေါဲဇမၞး၊ ရိုဟ်တ္ၚဲမဂး ညးဒးကဵုနာဲ၊ ဇၞးတုဲကေတ်နင် ပပရင်ယာဲ၊ ပုင်ထပှ်စွံ ဟဂွံချဳဒၞါဲ၊ ဍာ်လဵုမွဲတုန် တီဂုန်နံက်နာဲ၊ ရိုဟ်ရိုဟ်တ္ၚဲဆာဲ နာဲဗတာင်ဗော်၊ ပ္ဍဲဍုင်ဝေင်သၟတ် ဟွံဂၠါဲဍောတ်ဇၞော်၊ ပ္ဍဲဍုင်လန်ဇဳ ဂၠါဲၚဳဇၟာပ်သြော်၊ ဇၟာပ်ညးဝေင်ရ ကျဗတာင်ဗော်၊ ရုပ်ဂေါဝ်သော်ရော် ဇၟာပ်ဗော်ဒေဝါန်၊ ...

ဒေဝတဴၜါ ကိုပ်ကၠာကွေံကြာန်၊ ဂွံညာတ်ကေတ်ရ တြုံတလဒါန်၊ ညာတ်ညးထပှ် က္တဵုဒှ်ဇြဟာန်၊ ယက္ခဒက်ဝဲ ပ္ဍဲဂြိုပ်ဓိ၀ါန်၊ ပိုဲပြာ်ဗလး ပိုဲဒးသ္ဍိုက်ဆာန်၊ ပ္ဍဲဥမင်ဂှ် ဗြဴထပှ်ပ္ကာန်၊ ဝဳဝဲဗက်ကၠုင် ဒးဒုင်ကွေံကြာန်၊ ဂွံစသီုဝါတ် မတ်ဟွံညာတ်ပ္ကာန်၊ ဒေဝရာဇာန် တဴထာန်ရညှာ၊ ပၠေင်ရုပ်လနေင် တလသၞေင်ၜါ၊ တုဲဂိုင်နင်ဟေင် ကောန်စာင်သေင်ဟာ၊ ဒျာန်ပဝ်ကၠုင်ဟေင် လလးသၞေင်ၜါ၊ ကောန်စာင်ဍောတ်မွဲ ဂိုင်နင်ဗွဲသွာ၊ ပဝ်ကၠုင်ပြာပ်ညန် မွဲတန်သေင်ဟာ၊ ဍောတ်ဗၠာဲရံင်သ္ၚဳ တူဝိတှဳကျာ၊ ဒှ်ကောန်စာင်ဟေင် လနေင်ဂိုင်ဏာ၊ ဗကိုတ်ကဵုပါင် ရမျှာင်ကြဵုဇာ၊ လနေင်လကိုတ် ဗိုတ်ထောံဖျေံကၠာ၊ လနေင်ပဝ်ဒဴ လလဴသၞေင်ၜါ၊ ထောံကၠေံကောန်စာင် ပဝ်ကလာင်အာ၊ တုဲနာဲဒြေပ်ပြဟ် လပှ်ဂိုင်ဏာ၊ ဗစလဝ်သၟတ် လွဳလွတ်လဝ်ကၠာ၊ ဒှ်ကောန်စာင်ကၟက် ထတ်စောံမြက်စာ၊ ဂွံမသုန်ဂိတု ဗရုသၞေင်ၜါ၊ တက်သၞေင်သဓဵု ရမျှာင်ကြဵုဇာ၊ ဗရုသၞေင်ၜါ ကြဵုဇာလဒု၊ ဗြရတ်လွဳတဴ ဗစတဴသ္ၚု၊ ဖျုင်ဍာ်ဗစ စိုပ်ရသဝ်ဂၠု၊ ...

ဗြရတ်ဍောတ်ဗၠာဲ နာဲကြက်ဇံမု၊ လီလေဝ်မိရ ဂြိုင်ခယာဲဇု၊ မိမိန်စွံဗ္ဒာဲ တူထဝါဲဝွံ၊ ဗလိမဴတှ် ဍာ်ရှ်ကမု၊ ဂြိုင်မံင်ပအာဲပအာဲ ကဵုယာဲမတ်ဂၠု၊ ဗြဴတရဴဆာဲ နော်နာဲဇကု၊ မိင်ဂြိုင်ဗရု သာ်ဝွံသၟာန်ပၠန်၊ ယွံဒေံဍောတ်ဗြဴ ရဴတောဝ်ပဝန်၊ မူညးမွဲဆာဲ ဂြိုင်ကဵုနာဲပၠန်၊ ဟီုတီညိအဴ ဒေံဗြဴလဂ္ဂန်၊ မိပတလန် လဂ္ဂန်ဒေံဍောတ်၊ ဒေံဒဒေံမိင် တွိင်ပါင်ၝဲသၟတ်၊ ယွံၝဲတရဴ ကောန်ဂၞဴဒေံဍောတ်၊ ကောန်ဖျုန်ဂြိုဟ်ရောင် ယွံဂဍောင်မတ်၊ ကောန်အဲအဆတ် သၟတ်ရၝဲဂၠု၊ ညးတရဴအိုတ် မိင်စိုတ်လ္ၚု၊ မိင်ဒေံဟီုဂှ် ဗှ်ကောန်ဇကု၊ ယောန်ကၠုင်ဂြုဂြု စိုပ်ဒေံဇုပၠန်၊ တဲဗက်ဂၠါဲနာဲ ဂါဲဝါဲလီၜန်၊ ဆဵုဒေံဗျောံမံင် ကမၠံတှ်ဂန်၊ ဆဵုဒးကၟိန်ဗၠာဲ ဂၠါံဂၠါဲဆုင်ဗန်၊ ဗြရတ်က္ညဟ်ထောံ လရိုအ်သြောန်သြောန်၊ ယာဲဇုဟီုပၠာဲ နော်နာဲရောင်ကောန်၊ နာဲပဖေက်ပၠန် ၝဲရောင်ကောန်ဗၠာဲ၊ ဗြရတ်တုန်ကီု မိင်လဟီုယာဲ၊ ဒုင်ယိုက်နော်နာဲ ၝဲယာဲသေင်ဟာ၊ သီုနော်တရဴ ယိုက်တဴနာဲကၠာ၊ စွံတူထဝါဲ ဂၠါံဂၠါဲတဲၜါ၊ ဇွိတ်ဂၠါဲမုက်မတ် စံၜတ်သာသာ၊ ဒုင်ဗန်မိန်မံ ဆံလံဇွိတ်အာ၊ ညးတရဴဂၠိန် ဆုင်ကၟိန်ကၞိင်ၜါ၊ ယွံသိုက္ခမာ ယာဲမြာရကောန်၊ ဇၞော်တိုန်ဒှ်ဗၠာဲ ယာဲဟွံကၠင်ကၠောန်၊ ဒါနပိုဲသွံ ကၠုင်ဂွံနာဲပၠန်၊ မိဆုင်သီုဗန် စွံပ္တန်မူဏိ၊ မိယဵုထၜ ကောန်တလတိ၊ နော်နာဲဂးကၠာ ဒါနပိုဲစိ၊ နော်နာဲတရဴ ဟွံညာတ်တဴညိ၊ ဟွံညာတ်ရုပ်ပၠန် ကၟိန်ကျာ်ဂန်မိ၊ ဆုင်တဲသ္တုံဇွိ ကောန်မိစရာဲ၊ ဗစနော်ညိ ကောန်ဣတယာဲ၊ ဂၠုမတ်သီုၜါ စက္ခာနော်နာဲ၊ ကၠုင်အာဟွံညာတ် ဆတွာ်ဂါဲဝါဲ၊ ဗစနော်နာဲ သီုယာဲဇြဟာန်၊ ကၠေံစိုတ်ညိကောန် ရန်ကဵုနဳဗာန်၊ ဗ္စမိထပှ် သၟဟ်ကဵုဂွံဇျှာန်၊ ဒှ်အရှန်ကၠာ မြာမဂ္ဂညာန်၊ ဂွံဒှ်ကျာ်သၟတ် ဟံင်သတ်ဇၟာပ်ထာန်၊ ဂွံစိုပ်နဳဗာန် ဓာန်ဂတဝွံ၊ ဗြရတ်ဂွံမိင် ပဒွိင်မိဇု၊ မိညးထပှ် ဒှ်မတ်ဒမၠု၊ ကောန်ဗစယာဲ နော်နာဲမတ်ဂၠု၊ ကောန်ဂၠါဲကဵုစိ သီုနော်မိဇု၊ ဒဵုစိုပ်မစ္စု ယာဲဇုပဒွိင်၊ လယိုင်ကောန်ဗၠာဲ ယာဲသ္တိက်ကဵုလှိင်၊ ဒဵုလမျီုအိုတ် ဖျေံစိုတ်ပဒွိင်၊ ကောန်နွံဒၟံင်စိ ဒဵုမြုသ္ၚိသၟီ၊ မိတံပဒွိင် လှိင်စိုတ်ညိနာဲ၊ ...

ပ္ဍဲဂှ်ဗြရတ် ကၞတ်စရာဲ၊ ဟီုတုဲယာကြာ တွာ်အာဂေတ်ဂါဲ၊ မိန်ကေတ်စာင်မွဲ နဲကောန်အိန်ဗၠာဲ၊ ညးဍုင်တံညာတ် ရုပ်သာ်ဂေါဝ်ဆာဲ၊ မိန်စာင်ဂြဴကၠုင် လုံဍုင်တွာ်ဂါဲ၊ ကော်ဒိုဟ်ဂြုဂြု အနုအိန်ဗၠာဲ၊ ဗၠာဲညးဍုင်တံ ကော်ယမုနာဲ၊ မိန်စာင်မွဲမွဲ ရဲဍုင်တွာ်ဂါဲ၊ ကၠုင်ကောံအိုတ်သၟတ် ကောံဗြရတ်ဗၠာဲ၊ ကၠုင်လံင်ဗဇဵု စာင်ပယျဵုနာဲ၊ ယွံလေဝ်ဗြရတ် လံင်သၟတ်ဟာၝာဲ၊ ယွံလေဝ်ကောတံ တ္ၚဲဏံလံင်ဆာဲ၊ လံင်ကဵုနာဲရ သွက်ဗစယာဲ၊ ဗစနော်နာဲ လံင်နာဲပဒွိင်၊ ယဝ်ရအဲကျ ပဍိက်ကောန်သၟီ၊ ယဝ်ကောကျအဲ ပ္ဍဲဒေါဝ်ပေါဲဗျိင်၊ ပုင်ထပှ်ဂွဳ ကဵုအဲညဳသွိင်၊ နာဲပဒညိင် သွိင်နင်ကဵုအဲ၊ ဒါတ်တဲညးၜါ ဒေါဝ်ကၞာပေါဲ၊ ညးဂမၠိုင်ကၠာ ပဝါကၠံမွဲ၊ လံင်ကျဇၞးမာ ပေင်ကၞာပေါဲ၊ ကၠုင်ဗဵုပေါဲစာင် တမံသွာင်ဂၠေါဲ၊ ဗြရတ်ဒါတ်တဲ နဲခေသရာ၊ တုပ်ညံင်သၟီရ သဳဟရာဇာ၊ ဟွံဇမိုက်အဵု ကဵုသုနက္ခာ၊ ဗလးစာင်တုပ် ခြေံလုပ်သီုၜါ၊ စာင်ညးစာင်အဲ အဒေါဝ်ပေါဲကၠာ၊ စာင်ဗောဓိသတ် ဇြဟတ်လောန်အာ၊ ဂွံမွဲဍာ်ဟေင် တက်သၞေင်ကြဵုဇာ၊ လုပ်မွဲဝါပၠန် ဒွံဒန်ဇိုင်ၜါ၊ ဇိုင်တေတ်လွိင် တိင်ဒးလောတ်ဇၟာ၊ ဟွံချဳဂရာင် သၟန်ပါင်ဟာ၊ ညးဍုင်ကျအာ ကာလဂှ်စိ၊ မုက်ၜါလပုဟ် သ္ကဟ်တဴညံင်ဂျိ၊ ဒးကဵုပုင်ပ္ညဳ ထပှ်ဂွဳဂ္ညိ၊ ရဲဍုင်ဂးရ ယးဂတစိ၊ လဳယးပေါဲဇၞော် မုက်ထော်နန်လွိ၊ ယးဂတပြဲ အဲရထောံသ္ၚိ၊ ပဒွိင်ကောမိ ဒိုက်စိုတ်ညိနာဲ၊ ဂွံပုင်ဂွဳတုဲ တြုံလွုဲစရာဲ၊ ထပှ်ဂွဳရ ပပရင်ယာဲ၊ လုပ်စိုပ်ဥမင် ပုင်ဂွဳနင်တွာဲ၊ ဗစနော်နာဲ သီုယာဲကျာ်သြဳ၊ ပ္ဍဲပုင်ဂွဳရ သဗှနွံဇဳ၊ သီုဖျုန်ကပြဲ ညးမွဲမွဲဂွဳ၊ မိဇကုကီု သီုနော်နာဲဇဳ၊ စဟာပ်ဖဲညဳ တြဳဇှ်ကောန်ဗၠာဲ၊ ညးထပှ်ကၠာ မောဒနာတွာဲ၊ သာဓုသာဓု အနုဒိုဟ်ဆာဲ၊ သတြုစှ်ဒိုဟ် ဂြိုဟ်ကၠုင်ကဵုနာဲ၊ ကဵုဒးပေက်ချာဲ ဇၟာပ်ဒၞါဲအိုတ်သီု၊ ကဵုနာဲဂွံဇၞး လုံရးနဳဂီု၊ ဗ္စယာဲထပှ် နူဒှ်မၞိဟ်ကီု၊ ဟဂွံအေင်အောတ် မုက်မတ်ဟွံလီု၊ တြုံသဏာဂီု စိုန်သ္ကီုပညာ၊ ပ္ဍဲဂၠံဥမင် ပ္ဍေန်သ္ဍဴခၠင်အာ၊ ညံင်လျးအရှိုန် တွိုန်သူရိယျာ၊ သ္ဇုင်ခၠင်တမး ပျးစက္ကဝါ၊ ဗကေတ်ဍီုဍံက် အပြံက်နဳလာ၊ ညံင်သာ်ကၠေင်ၚုဲ သၠုဲသၠာ်ဗဒါ၊ စက်ဒတန်ကဝ် ကွဳထဝ်ဇရာ၊ ကၠောံပျးလဒံ ညးတ္ကံအမ္ဗာ၊ ထောံအမ္ဗာဟေင် ထဍေင်အန္ဓာ၊ ကၠောံပျးဇံမု ဒမၠုဒဴအာ၊ အနုဒိုဟ်ဂှ် ခၠင်မြဟ်တူကျာ၊ ယးတမးအာ စက္ကဝါအိုတ်၊ ...

မာတ်တ္ၚဲယးအာ စန်စာပ္ဍဲစိုတ်၊ တုဲဟီုပ္တီယာဲ နော်နာဲသီုဖအိုတ်၊ ကောန်အာဂၠါဲၚဳ ပုင်ဂွဳအမြိုတ်၊ ဟီုတုဲတွာ်အာ ပ္ၚောံဖျာပလိုတ်၊ ဇန်တံဗဵုကၠံင် ဂၠိက်က္ၜံင်ပိုတ်၊ ရုပ်ညံင်ညးချူ ထဝ်ဥူရကိုတ်၊ မိန်နင်စာင်မွဲ ရုပ်နဲကြက်ဗိုတ်၊ ညးညာတ်မေတ္တာ သ္ဍိုက်အာဖအိုတ်၊ လ္ၚဵုကဵုတွာင် ပါင်သုဘာသိုတ်၊ လ္ၚဵုကမၠေင် စဒဵုပေင်စိုတ်၊ လ္ၚဵုစိုက်ဂွဳ ကဵုညဳသာအိုတ်၊ ပပရင်ယာဲ နော်နာဲပ္ဍဲစိုတ်၊ တုဲတွာ်လုပ်ပေါဲ ဂၠါဲရဲဖအိုတ်၊ ညာတ်ဍေံကၠုင်သ္တိုတ် မိပ်စိုတ်ကအီတွာဲ၊ လမုဟ်ပိုဲကျ စာင်ဗှ်ေရနာဲ၊ ဍေံ(တံ)စၞာဲ ဂါဲလုပ်နန်ထဝ်၊ ပိုဲအာဝေင်က္ဍင် မုက်ရင်သၟီဓဝ်၊ နာဲအာကီုဟာ ပဝါသအဳဗဝ်၊ ညံင်ခေသရာ ဇာဒိသိုင်ကျဝ်၊ ဟွံဇမိုက်သတ် ပ္ဍဲဂြိုပ်ဆတ္တဝ်၊ ဗြရတ်ဍောတ်ဗၠာဲ စရာဲညးသွဝ်၊ လုပ်စိုပ်ခမၞင် ပ္ဍဲဝင်သၟီဓဝ်၊ စာင်ဂြဴလတိုင် ပ္ဍဲဇိုင်နန်ထဝ်၊ လုပ်အာစိုပ်ပ္ညဳ ဗၠာဲသၟီသအဳဗဝ်၊ ဇရေင်နန်ထဝ် မၞိဟ်သအဳဗဝ်အုံ၊ ဍေံသၟာန်တိုန်နာဲ ဗၠာဲသၟီအလုံ၊ ယွံလေဝ်ဒေံအဲ ညံင်ဇြဲသဓုံ၊ စာင်မလံင်ဟာ ပ္ဍဲပြဝါစုံ၊ ယဝ်လံင်ကေတ်နင် ဒေါဝ်သဘင်အုံ၊ လံင်ရသီုစုံ ဆနွံပ္ဍဲဂၠိက်၊ ခိုဟ်ရလေဝ်ယ ဆနွံပၟိက်၊ ယဝ်ကောကျအဲ ဒေါဝ်ပေါဲဂမ်အိက်၊ ယဝ်ရဒေံကျ ကေတ်ဏာပဍိက်၊ ယဝ်ကောကျအဲ ပုင်မွဲထိုင်ဂၠိက်၊ ထပှ်ဂွဳဗျာင် ဖျုန်စာင်ခရိက်၊ ဒေံကျပဍိက် ပဇမိက်ဇိုင်၊ ယဝ်ကောကျအဲ ပုင်ဂွဳအဲဂိုင်၊ ဒါတ်တဲညးၜါ ကြာဗဵုဂမၠိုင်၊ ဒါတ်တဲပိဝါ ညးၜါလံင်ပြိုင်၊ တက်ကၞက်ဖိုင် ခြိုင်ဇုက်ကၠောံဒိုဟ်၊ ဇန်တံကၠုင်ကိုဟ် နုဒိုဟ်ပေင်ဂၠု၊ မ္ၚးဇုက်ဝွံ ဗြုမံင်တမ္ညဝ်၊ ဝေင်ပေါဲလက်ဖျာ သအဳဗ္ဂာရေင်ဗဝ်၊ အမာတ်မုက်သၠုင် တွာ်ကၠုင်ရံင်ကျောဝ်၊ အိုတ်အလုံဍုင် ဂၠေါဲကၠုင်ဗဵုဒ္ၚေါဝ်၊ ပေါဲစာင်ဇၞော်ရ ညးပအံသဝ်၊ ကောန်ၚာ်ဍောတ်မွဲ ရုပ်ပြဲညံင်ထဝ်၊ လံင်ပဍိက်ရ သိက်စိုတ်မလဝ်၊ ညာတ်မုက်ရုပ်ထဝ် ဗဵုကျောဝ်ဓမဳ၊ ...

နန္ဒကိတ္တိ သီုမိကျာ်သြဳ၊ တိတ်ဗဵုဝေင်ပ္ညုင် သမုင်စိုတ်ချဳ၊ တိတ်ဗဵုပေါဲစာင် ဗၠာဲဗတာင်ကြဳ၊ သၟီဂွံညာတ်အဵု နွံကဵုကျာ်သြဳ၊ ရံင်လက်သန်ဇဳ ကျာ်သြဳပြဲဖာ၊ ဗြရတ်ကုမ္မာ လုပ်အာပ္ဍဲဝိုင်၊ ဗလးစာင်ကၠာ ဖျေံဏာဇဵုပြိုင်၊ ညးဖျေံအဲဖျေံ ဗလးဒေါဝ်ဝိုင်၊ စာင်ၜါဇဵုပြိုင် တသိုင်ကျဇၞး၊ စာင်ဍောတ်ဗၠာဲကီု ဒြဟတ်တီုသအး၊ ဒြဟတ်ဂၠိုင်လောန် တက်ပၠန်ဖြးဖြး၊ ဇိုင်ၜါလီင် တိင်ဒးလောတ်နး၊ ဒန်ဇိုင်ဗလး ဒးသြိုဟ်ပါ်ချိုတ်၊ တလစာင်ရပ် ဖြပ်ဖြပ်ဂဖိုတ်၊ ပြဟ်ရပ်ဂိုင်ဏာ ကၠာလမျီုဟအိုတ်၊ ဗြရတ်ဂွံဇၞး ညးထိုင်သးသ္တိုတ်၊ ပုင်ထပှ်ဂွဳ ဂွံညဳသာအိုတ်၊ သွက်မိတုန်ကီု သီုနော်နာဲသ္တိုတ်၊ မိပ်ပ္ဍဲကောန်စိုတ် သူစရိုတ်သ္ဇုင်၊ ပုင်ဂွဳဂိုင်စိုက် ယိုက်ဏာဒေါဝ်ဍုင်၊ ပင်တဲယဵုဒုင် ကဵုသၟီဍုင်စိ၊ နန္ဒကိတ္တိ နာဲသ္ၚိမန္ဓာတ်၊ သၟီဇၞော်ရံင်ကျောဝ် ဒေါဝ်ပူရိသာတ်၊ သၟီဂွံညာတ်သအး ရုပ်မဒးကၞာတ်၊ ဒစင်ဗၜင် ရုပ်ခၠင်သေသာတ်၊ သၟီဇၞော်ဂွံညာတ် ညံင်တ္ၚဲပါတ်တိုန်၊ ညာတ်မုက်ဗြရတ် မုက်မတ်နွံကွိုန်၊ သီုကော်ဒိုဟ်အာ ကာလဂှ်ဗိုန်၊ တ္ၚဲယးဂတ ဆတ္ၚဲမတိုန်၊ ညိလပဇြိုန် တိုန်ကၠုင်ညိနာဲ၊ ဗဇဵုစာင်စိ မွဲဟာန်ညိၝာဲ၊ စာင်အဲနွံမွဲ အဝဲဂေါဝ်ဆာဲ၊ ဂွံဆောလောဲသွာ ဃောကာလဗၠာဲ၊ စာင်အဲစာင်နာဲ ဂၠါဲဝေင်တက်ဆော၊ မူနာဲသ္ဂောံလံင် ပွံင်နွံရော၊ ဍောတ်ဗၠာဲဂွံမိင် တွိင်ပါင်ရာဇော၊ လပုဟ်တဲယဵု ပ္ဍဵုလ္တူသိသော၊ ယွံတလတိ ပင်မှိင်ညိရော၊ ထဝ်သြန်ၜဲမး ဂၠးသြိုဟ်ဨကော၊ ဟမွဲဂၠးသြိုဟ် ရိုဟ်တ္ၚဲတွာ်ဟော၊ ကျတုဲပဍိက် ပမိက်ရာဇာ၊ ပဍိက်တုန်ရော ဨကောရကျာ်၊ ယဝ်ဍိက်ဇၞးပ္ညဳ ပုင်ဂွဳဍိက်အာတ်၊ ပုင်ထပှ်ဂွဳ နွံဇဳရာဲသာတ်၊ ယဝ်ဍိက်ဇၞးကၞာတ် အာတ်ကဵုဒါန်ညိ၊ ယဝ်အဲဍိက်ကျ ပဍိက်ပ္ဍဲသ္ၚိ၊ ဍိက်ဂးလဝ်ကီု အိုတ်သီုဒမၠိ၊ ဍိက်ကလံစိ ယးညိတိုန်ကၠုင်၊ လ္ၚောဝ်ရာဇ သၟီတလဍုင်၊ တဲဇွိစာင်ပ္ညုင် သ္တုံရပ်ပုင်ဂွဳ၊ တြုံတလလွဳ ဒ္ၚဳဒ္ၚဳတွာ်ကၠုင်၊ ပ္ၚောံဥမင် ရုပ်ဗၜင်သ္ဇုင်၊ စိုပ်နော်တရဴ သီုမိဂၞဴပ္ညုင်၊ ပင်တဲတယျောဝ် ကောန်လ္ၚောဝ်ဒုင်၊ သီုထပှ်ညဳ ပအပ်ကဵုဂွဳပုင်၊ နော်နာဲတရဴ သီုမိဂၞဴပ္ညုင်၊ မိသီုနော်ကၠုင် ဂွံပုင်လှဲလး၊ အိုတ်တမံညး ဒေါံစှ်ေဒလာဲ၊ ဂွံစဖဲညဳ ပုင်ဂွဳကောန်ဗၠာဲ၊ သ္တိက်ပ္ဍဲဥမင် ဗှ်ဒးကၠင်ကၟာဲ၊ ကြဳဇှ်ကောန်မွဲ ဖဲဟွံဒးဂၠါဲ၊ စမှ်ကာလ ဂၠါဲဗစယာဲ၊ တုဲဖျေံမေတ္တာ ရာဒနာတွာဲ၊ ယွံလေဝ်ကောန်ဗၠာဲ စရာဲၜတ်သောင်၊ ဖဵုဗစယာဲ နော်နာဲမွဲတောင်၊ ဒၞါဲအာကဵုညး ဂွံဇနးရောင်၊ သတြုကဵုပါဲ ဒၞါဲအာဟွံယောင်၊ ဍောတ်ဗၠာဲယဵုရောင် အခေါင်သေင်ဟာ၊ ...

နာဲညးစက်ထဝ် ဂပဝ်အမ္ဗာ၊ ပ္ၚောံတကံကြေင် ဇက်ကလေင်အာ၊ အရှိုတ်တိုန်ပျး လျးသြန်အပၠာ၊ နာဲယာန်စက်ထဝ် စဝ်သိန္ဓဴၜါ၊ ဗပန်လ္ၚီဆက် ပျးစက္ကဝါ၊ ဗ္ဂန်ချေံသိန္ဓဴ ဗက်ဗ္ဒဴအန္ဓာ၊ ကၠောံပျးတ္ကံဝွံ ဇမ္မုဒိပ္ပါ၊ မာတ်ညးတမး လျးဓမ္မတာ၊ အိုတ်သတ်ကၠံမွဲ တဴပ္ဍဲဂြိုပ်ဝါ၊ ကဴဝဴဗြုကြီု ဗဂီုပူပါ၊ တေဝ်တောတ်ဇင်မှံင် သံင်စှ်ေဍာ်လှာ၊ စာင်ကၠိုက်လိုက်ထောဝ် ကဵုပါင်မှောဝ်ဇာ၊ စာင်ဂြဴလဒု ဗရုသၞေင်ၜါ၊ တတ္တောကလုက် အဟုက်စန်စာ၊ ကဝှကလဲ တူဇြဲသာခါ၊ ဂဍာ်သၞသၞောဲ ရှောဲဂၠါဲအဟာ၊ မြာ်ထဝ်ကြဵုဇာ ဂြဴအာလဒု၊ ပ္ဍဲဂြိုပ်ဆုကြိက် သ္တိက်ဒီုထဥ၊ သၟီသူရိယျ လျးခၠင်တသု၊ ဂပဝ်သိန္နရာ ကွဳဇရာဗြု၊ ဗက်ဗ္ဒဴဒမၠု ဇံမုတ္ကံကြေင်၊ လိုန်ယုဂ္ဂန္ဓဝ် ကွဳထဝ်ခဏေင်၊ ကၠေံယုဂ္ဂန္ဓဝ် ပျးလဝ်တ္ကံကြေင်၊ ယးတမးဟေင် တ္ကံကြေင်ခၠင်အာ၊ ဍောတ်ဗၠာဲဗြရတ် တြုံကၞတ်သာ၊ ယဵုတဲလၜေါ် နော်သီုမာတာ၊ ရပ်ဂွံစာင်မွဲ တွာ်ဂါံသြဲအာ၊ ပ္ၚောံရာဇာ ဂါံတွာ်အာတုန်၊၊ ၊၊

ဗြရတ် လံင်ဗဇဵုစာင်ကဵုသၟီနန္ဒကိတ္တိ

လၟေင်ဒဒှ် ပိုဲဟီုတွံပ္ဍုန်၊ ဗြရတ်ဂှ်တုန် တိုင်ဂုန်ပြဲဖာ၊ တွာ်ဒေါဝ်သဗာန် နယာန်ပါဒါ၊ ယိုက်ကေတ်စာင်မွဲ ဍောဲဍောဲတွာ်အာ၊ ပ္ၚောံနန်ထဝ် သၟီဓဝ်ရာဇာ၊ ကောန်ဍုင်ဗက်ဂၠေါဲ စာင်မွဲမွဲကၠာ၊ တမံတဲဟေင် ယိုက်ကေတ်သေင်ဟာ၊ ဗက်ကြဴဗြရတ် တြုံကၞတ်သာ၊ ညံင်သၟီသဳဟ လျလျဂါံအာ၊ ဇန်တံဗဵုကၠံင် ညံင်ခေသရာ၊ မတ်ဟွံလၜဲ စာင်မွဲမိန်ဏာ၊ လုပ်စိုပ်မုက်ရင် သ္ၚိဗတင်ဇာ၊ အမာတ်တံသၟာန် ဂလာန်သ္ဇိုင်သာ၊ ယွံသၟတ်ဗၠာဲ စာင်နာဲလံင်ဟာ၊ လုပ်ကၠုင်စိုပ်ကၠာင် စာင်ပြဝါဂမၠိုင်၊ ယွံညးမဆာဲ နာဲတလက္ဍိုင်၊ နွံအသံပၠန် သၟီနာဲနန်ဂွိုင်၊ သၟိက်ဗဇဵုစာင် လံင်ပကာန်ပြိုင်၊ နွံအသံနာဲ ဍိက်ဗၠာဲဟွံပိုင်၊ ဒးကၠုင်ပ္ကာန်ပြိုင် ဟွံပိုင်ရောင်နာဲ၊ အမာတ်မိင်ပြဟ် ဂလာန်ဂှ်ဆာဲ၊ အရေဝ်ဍိုန်ၜတ် ဍောတ်နွံစရာဲ၊ လဇကၠာနာဲ ဍောတ်ဗၠာဲဍိုန်ဒ္ၚဳ၊ မင်ဨကရာတ် မန္ဓာတ်ကျာ်သြဳ၊ ညးဟွံတိတ်ဏီ ခပ်သီပိုင်ပြဳ၊ လဇညိကၠာ ဗၞတ်ၜါဗဟဳ၊ နန္ဒကိတ္တိ နွံဣဓိလွဳ၊ တိတ်ဂဇံရုင် ဒုင်တဴသဳကၠဳ၊ ထောံမတ်ညာတ်အာ တြုံပါရမဳ၊ သီုဗော်ပြဝါ တုပ်ရာဇာသဳ၊ သၟီရံင်စမဳ အိန်ရဳသ္တပ်သ္တး၊ ယွံလေဝ်ဍောတ်ဗၠာဲ နာဲမစဳကၠး၊ စာင်နာဲစာင်အဲ လံင်မွဲဗလး၊ ဒေါဝ်သဘင်ပေါဲ စာင်အဲကဵုမၞး၊ ညံင်ကၠုင်ဒါတ်တဲ ဒေါဝ်ပေါဲဇနး၊ . . .

ဗြရတ်မိင်အဵု ပင်တဲယဵုပၠး၊ သၟီဒါတ်တဲခုတ် ပိလစုတ်ဒး၊ စာင်သၟီဗလး ကၠာညးဂြဴမံင်၊ စာင်ဍောတ်ဗၠာဲဂး ခြးသုန္ဓရံင်၊ တက်သၞေင်လဒု ညံင်ဗရုမံင်၊ တက်သၞေင်ပိ၀ါ ကြဵုဇာသလံင်၊ စာင်သၟီဒြေပ်ကၠုင် စာင်ဏံဒုင်ဒၟံင်၊ စာင်သၟီပြဟ်ပြေဟ် သလာ်ပှ်ေဒံင်၊ စာင်ဗြရတ်ဗၠာဲ ဂၠါဲဆောဒန်ဍံင်၊ ဒးလေံဇိုင်ၜါ လောတ်လ္ၚာထရံင်၊ ခြုဟ်ဒလိုက်က္တဵု ခဵုလုပ်ပ္ဍဵုပၠံင်၊ စာင်ဍောတ်ဗၠာဲဗၠေတ် တက်ဂေတ်ပလံင်၊ လေံဇိုင်ဒဏ္ဍံင် တက်ပလံင်ဏာ၊ စာင်သၟီဇုဲဇာဲ ဂါဲကၠုင်ဂါဲအာ၊ စာင်ဗြရတ်ကွေံ ပှ်ေဒးပါင်ဟာ၊ စာင်သၟီဍောင်လောန် ရပ်ပၠန်မွဲဝါ၊ စာင်ညးညးရပ် ချပ်ကဵုဍာ်ကၠာ၊ ကဵုတုဲပညုင် သ္ၚုဗ္ဒုင်ကဵုကၠာ၊ စာင်ဗြရတ်ဆက် ထတ်စောံမြက်စာ၊ ဂြဴလတိုင်ဒၟံင် ညံင်ခေသရာ၊ ဨကရာတ်သၟတ် ကဵုဗြရတ်ကၠာ၊ ဗလးပၠန်ဟေင် တက်ပြီုသၞေင်ၜါ၊ ညးခြေံအဲခြေံ ဗလေံဇိုင်ၜါ၊ လုပ်ဇဵုဖြးဖြး ဒးဒန်လောတ်ဇၟာ၊ ဒးဒန်ဇိုင်ၜါ လောတ်လ္ၚာသ္ဒ၊ စာင်သၟီဂေတ်ဂါဲ ဂၠါဲပဏံက်ထ၊ စာင်ဗြရတ်တက် လောတ်ဗတက်သ္ဒ၊ စာင်ဨကရာတ် ၚံက်ၚာ်ဒးကျ၊ စာင်ဗြရတ်ဇၞး ညးဒးဂြိုင်ခ၊ . . .

သၟီတိတ်ဒေါဝ်ပေါဲ ဒတဲတဲမ၊ တံင်ပၠောပ်ဏာကျဝ် ဒေါဝ်အမာတ်ရ၊ တိုန်တူဒေန်မြ သၟီတလဍုင်၊ စိုက်လဝ်ပုင်ဂွဳ ညဳသာသၟဟ်ပ္ညုင်၊ အမာဲဂၠိုင်သာ် ဍာ်လဵုမသ္ဇုင်၊ ပအပ်စုတ်တဲနာဲ ဍောတ်ဗၠာဲယဵုဒုင်၊ ရုပ်သာ်ဂေါဝ်သ္ဇုင် သၟုင်နာဲမန္ဓာတ်၊ ဟဂံင်ဒိုဟ်ဟေင် ဂဇံရေင်ကၞာတ်၊ တုဲရံင်ဗဵုဒ္ၚေါဝ် ဒေါဝ်ပူရိသာတ်၊ သၟီဨကရာတ် ပါတ်ပ္ဍဲစိုတ်ဟေင်၊ ညာတ်ထသပါ ဖဳဒွါပ္ဍီုသြေင်၊ ညံင်သပါသြိုဟ် ဖျိုန်ဂြိုဟ်ဟွံဝေင်၊ တုဲသၟီဖျန်ဟေင် သမုဲလေင်ဗၠာဲ၊ နာဲပအာပၠန် ဂေင်လန်ဂေတ်ဂါဲ၊ မပဂေင်လန် မံင်ပ္ဍဲနန်ဆာဲ၊ မအံက်စွံပၠန် ပစကောန်ဗၠာဲ၊ ပကောန်ကဵုနာဲ ပဗၠာဲပ္ဍဲသ္ၚိ၊ ကဵုပဗၠာဲကောံ ဇရေင်သ္တုံဇွိ၊ ပုင်ထပှ်ဂွဳ စဳရေင်ကဵုစိ၊ ဗြရတ်ကုမ္မာ နာဲသာဗောဓိ၊ လ္ၚောဝ်ပတီရ ယွံတလတိ၊ ယွံမရှာတ်သၟီ ပင်မှိင်ဍိက်ညိ၊ ဍိက်ဒိုက်ဂတ်ပၠန် ကၠောန်ဗစမိ၊ ရိုဟ်တ္ၚဲဂေတ်ဂါဲ ဂၠါဲလံင်စစိ၊ ဂွံဇၞးဖဲညိ ဘုမ္မိစရာဲ၊ ယဝ်အဲဍိက်ကျ ဒးပဍိက်နာဲ၊ မိဒးကၠင်ကၠောန် ဒှ်ပၠန်ဗြဴကၟာဲ၊ ဟိုတ်ဂှ်ဍိက်အဴ ဗစတဴယာဲ၊ . . .

သၟီမိင်ပါင်နာဲ ညံင်သာဲသဂြာ၊ ယွံလေဝ်ဍောတ်ဗၠာဲ မဆာဲရုပ္ပါ၊ ပဒွိင်ပုင်သွ စဏအဟာ၊ ကေတ်ဏာပ္ဍဲနန် ဖာပ်ပၠန်မာတာ၊ ကေတ်ဏာရိုဟ်တ္ၚဲ မွဲတ္ၚဲၜါဝါ၊ ဇကုနာဲစိ ပသ္တုံဇွိၜါ၊ ဗြရတ်ကုမ္မာ မိင်ရာဇာဟီု၊ ယွံမရှာတ်သၟီ လပဒွိင်ကီု၊ ယးဂတဆာဲ ဍိက်တိုန်ကွာဲပြီု၊ တိုန်တွာဲဇကု ပ္ဍဲနန်မြုကီု၊ တြုံသဏာဂီု ဟီုကဵုသၟီစိ၊ ခိုဟ်သန်ရနာဲ ပဗၠာဲပ္ဍဲသ္ၚိ၊ ပဒွိင်ကဵုမိ ပ္ဍဲသ္ၚိနွံဗဝ်၊ ပုင်သွနွံတုန် ကဖျုန်ဗဝ်သအဝ်၊ ကေတ်ဏာရုပ်ထဝ် ဂၠိုင်ဗဝ်တသုန်၊ အာဖာပ်ဗစ မိတလဂုန်၊ အဟာရတုန် ကဖျုန်ပုင်သွ၊ ပဒိုက်စိုတ်ပၠန် ကောန်ဂၠုဣတ၊ ဗြရတ်တုန်ရ တိက္ခပညာ၊ ပင်တဲတယျောဝ် လ္ၚောဝ်ရာဇာ၊ ကလံသၟီကၠာ ဘုမ္မိပါလ၊ ပုင်ဂွဳဍာ်လဵု ဂၠိုင်ကဵုရသ၊ နူနန်ထဝ်ဟေင် ဂၠေင်ဏာလျလျ၊ ဗစမိကီု သီုနော်နာဲရ၊ စာင်မိန်ပ္ဍဲဂၞိင် ကောန်သၟီရာဇာ၊ စှ်ေစိုပ်ခမၞင် ထာန်ဥမင်ဂ၊ . . .

ညးတရဴအဵု တရိုပ်ကဵုစ၊ ညးမွဲမွဲဂွဳ ညဳသာအိုတ်ရ၊ ဍာ်မွဲမွဲလဵု ကဵုဇဳသဗ္ဗ၊ မိနော်စဖဲ ရိုဟ်တ္ၚဲဖျုန်က၊ ကြဳဇှ်ကောန်မွဲ ဂွံဖဲစဏ၊ ဂုန်နာဲရုပ္ပ ကောန်တလဂုန်၊ မောဒနာအိုတ် ပ္ဍဲကဵုစိုတ်တုန်၊ ပ္ဍဲဂှ်ဗြရတ် တောတ်သၟာန်မိပ္ဍုန်၊ ယွံလေဝ်မိဂၞဴ မူရဴဟိုတ်တုန်၊ ညးစွံဥမင် ဒေင်သၠင်ဂြာံသြုန်၊ မတ်စက္ခုဒွါ ညးဂၠံက်ဏာတုန်၊ မိပထမုန် ဂုန်ဒုဟ်ဂှ်ညိ၊ ညးထပှ်ပ္ကာန် မိင်ကောန်သၟာန်မိ၊ လၟာဂၞဴယာဲ ဟွံစၞာဲညိ၊ ဨကရာဇ နန္ဒကိတ္တိ၊ ဒှ်မအံက်နာဲ ရကောန်ဗၠာဲမိ၊ ဨကရာတ်ဂှ် ဒှ်မနာဲစိ၊ ဂွံဗြဴတမိ မိဒးမဇျှဟ်၊ ပ္တေဟ်ဣဝဴပဴ ယက္ခဳဗြဴဂှ်၊ ဍေံပစဏာဲ ဥပ္ပါဲယဲဒှ်၊ ဂွံမတ်ပိုဲကီု သီုညးထပှ်၊ ဂွံတုဲဗၠးပြဟ် ဗိန္ဒောတွံဟေင်၊ သီုညးထပှ် ထဍဟ်ဏာရေင်၊ နော်နာဲဖျုန်ဂြိုဟ် ၜါဒိုဟ်ကၠက်ဟေင်၊ ယာဲမတ်မွဲဒိုဟ် ကဵု်လကိုဟ်ဍေင်၊ ဂၠံက်အနိင်ဟေင် ညံင်ဗီုပြေင်ဂၠဴ၊ ကောန်တဴဒၟံင်ရ ပ္ဍဲဂဗ္ဘဂၞဴ၊ စွံပ္ဍဲဥမင် ဒးဒေင်သၠင်တဴ၊ ကၠင်ကၠောန်ယဲသြ အဟာရဂၞဴ၊ ဂြိုပ်ထပှ်ဂိတု ပ္ဍဲဥမင်အဴ၊ လမုဟ်ဖဲတဴ ဂုန်ကောန်ဂၞဴသၟတ်၊ . . .

ဗြရတ်မိင်ကၠာ ထသပါထတ်၊ လၞီသ္ၚီသြိုတ် ဇိုတ်ဍာ်ရမတ်၊ ကာလဂှ်ပၠန် ပ္တန်ကၠေံစိုတ်သၟတ်၊ ချပ်ဗ္စာရဏာ မှာဗောဓိသတ်၊ အဲခစကၠာ ဂွံတီပြာကတ်၊ ယွံမိဍာ်တှ် သီုထပှ်သၟတ်၊ ကောန်တိုန်ခကၠာ ပ္ဍဲရာဇာဝတ်၊ တိုန်ခစနာဲ တွာဲသကုသၟတ်၊ အာတ်အခေါင်မိ ယုတ္တိကောန်ဍောတ်၊ ပဆေဝ်တာညိ မိဂဍောင်မတ်၊ ခရာဇာဝတ် သၟတ်ကေတ်ဍုင်ခွါ၊ ဍုင်ဝွံမွဲတဲ ဒဵုအဲဂွံမြာ၊ ဒှ်မအဲဟေင် ညိဟွံဝေင်ခြာ၊ တူအဲမွဲတဲ ညးဟွံမွဲၜါ၊ မိဂွံသိုက်လှိင် သမၞိင်ပါသာ၊ သီုနော်နာဲဂှ် ထပှ်သေင်ဟာ၊ ကဵုအခေါင်ကၠာ မာတာယွံမိ၊ ညးထပှ်မိင် တွိင်ပါင်ကောန်စိ၊ တက်သြိုဟ်ဆာံဆာံ ယာံတဴတသိ၊

ဟးမဂၠုယာဲ နာဲသ္ဍိုက်မိ၊ နာဲထောံပိုဲစိ မိဒးကၠင်ကၠောန်၊ သိက်စိုတ်နာဲရော အြဣတကောန်၊ ပနာဲဒဇန် ကဵုမိပၠန်ရော၊၊ ၊၊

ဟးကောန်ဇြဟာန် ဟွံဆာန်မိရော၊ ကဵုပိုဲဨကော ရောဂဍောင်မတ်၊ စက္ခုလီုသၟဟ် သီုထပှ်သၟတ်၊ ကဵုပိုဲကင်ဇတ် ထပှ်မတ်မွဲ၊ ကဵုပိုဲဒေါံသ္ၚီ လၞီတူယဲ၊ တြဳဇှ်ကောန်အဲ ဂွံဖဲဖအိုတ်၊ လသာထောံယာဲ နာဲတလင်ဗိုတ်၊ ပသာ်လဝ်စိုတ် ဗိုတ်ထောံမိဂၞဴ၊ နာဲကဵုမိဂၞဴ ဂၠက်သ္ၚဴပၠန်ရော၊၊ ၊၊

ဟးထဝ်ဒကောင် ဍောင်စန္ဒိမော၊ ထောံလဝ်ယာဲရော ဂၠိုင်အြသုင်ဂျိ၊ ချိုတ်ထောံရောင်ပြဲ နာဲပျဲစိုတ်မိ၊ တက်သြိုဟ်တသိ မိယာံလောတ်လော၊ ပ္ဍဲဂၠံဥမင် ဘိင်ဘင်စိတ္တော၊ ဒှ်မိယိုက်လဝ် ဂၠံဂဝ်နာဲရော၊ နာဲတီမဇျှဟ် မတ်ဂၠုသီုဆော၊ သီုထပှ်ရော မွဲအြဍောတ်ဇၞော်၊ မိဒးကၠင်ဗော် ဂရော်ဥမင်၊ ကဵုမိကြံဒိုဟ် ဖျုန်ဂြိုဟ်ဒေင်သၠင်၊ ဟးရာဇာဝင် မိဒးကၠင်လော၊ မိဒှ်ဨကော လောတ်လောရကောန်၊၊ ၊၊

ဗြရတ်ကုမ္မာ သၟီနန္ဒကိတ္တိ ပစကောန်ဗၠာဲ

ဍောတ်ဗၠာဲမိင်စိ မိယာံဒက်ဒေါန်၊ ပင်တဲတိုန်ယဵု ဟီုကဵုမိပၠန်၊ *ယွံမိသော်က္ဍိုပ် ကောန်စိုပ်ပ္ဍဲနန်၊ မိနော်လေဝ်ဖဲ ကောန်မွဲပြဲလောန်၊ ကောန်ဂွံသိုက်ဘိုက် ဒဒိုက်မိအန်၊ ဍုင်ဝွံမွဲတဲ ဟဂွံေၚာဲခၠန်၊ သီုနန်မြခိုင် *ဒှ်ပွိုင်ကောန်၊ ဟိုတ်ဂှ်မွဲတန် ကောန်တိုန်ခစ၊ ပုင်သွတုန်ပၠန် လယိုင်ကောန်ရ၊ ကောန်ဖျေံနင်ရော သီုဘောဇန၊ ကောန်ထောံမိဟေင် ဟွံသေင်မူလ၊ ရိုဟ်တ္ၚဲဟွံသ္ဂုတ် ဖလုတ်ဒေသ၊ ကောန်ပလံင်စိ မိပဒွိင်ထ၊ သဗှစဏ အဟာရဗျန်၊ ကောန်ဟွံကဵုအေင် ဂေၚင်ဂၠါဲလန်၊ ညံင်ဂွံစပၠန် လယိုင်ကောန်ကၠာ၊ သီုညးထပှ် သၟဟ်သၟန်မွဲသာ၊ မိင်လဟီုကောန် ဇွိတ်ပၠန်တဲၜါ၊ ဗက်မိန်ကောန်ဍောတ် ဇွိတ်မုက်မတ်ကၠာ၊ ဗန်ဆုင်ကၟိန်ဗၠာဲ ဂၠါံဂၠါဲမတ်ၜါ၊ ယွံလေဝ်ကောန်ဗၠာဲ နော်နာ်သေင်ဟာ၊ ညးထပှ်စု မတ်ဂၠုသပါ၊ သၟိက်ညာတ်မုက်နာဲ ကောန်ဗၠာဲထဝ်ဏှာ၊ ဟိုတ်ဂှ်တဲဂါဲ ဂၠါံဂၠါဲကၞိင်ၜါ၊ သၟိက်ညာတ်ရုပ်ကၠာ *ရောင်ကြုတ်ဏာမိ၊ ယာဲဗဵုဟွံဖဲ ပ္ဍဲနာဲဂေါဝ်ဂၠိ၊ နော်နာဲတုန်ပၠန် စိုတ်ဟွံတန်ညိ၊ အာရကောန်မိ သတိပလွဳ၊ နာဲပသတိ ပ္ဍဲသ္ၚိယက္ခဳ၊ ဍေံစနာဲအဵု ကဵုနာဲဍိုန်ဒ္ၚဳ၊ ဍေံလှေံလှန်ကီု ဟီုနင်ဏာဇဳ၊ ပညံင်ဆာန်ပ္ညဳ ဟီုပၠဳဇကု၊ နာဲပပ္တေဟ်ပၠန် ယွံမကောန်ဂၠု၊ ဍေံပစေံနေံ လှေံလှန်နာဲဇု၊ ပပ္တေဟ်ဇကု ပ္ဍဲကဵုမြုနန်၊ ဍေံဟီုနင်ဏာ ဝေါဟာလှေံလှန်၊ လ္ပပတှ်ေပြဟ် ဂှ်ဗြဴကုမ္ဘန်၊ အာရဂၠုယာဲ နာဲကၠုင်ညိပၠန်၊ ကၠုင်ရံင်ပိုဲသၟတ် ပယျတ်ကၠုင်ညန်၊ ကၠုင်ကဵုပုင်သွ အဟာရဗျန်၊ ပဝိုတ်ညိပၠန် ကောန်သမုဲလေင်၊ . . .

ဗြရတ်ကုမ္မာ *ကၠေံမာတာဟေင်၊ ကလံမိအဵု တဲပ္ဍဵုတူကၞေင်၊ တုဲမိန်ဏာဟေင် စာင်မွဲသေင်ဟာ၊ တွာ်အာယောန်ယောန် ကောန်တြုံထဝ်ဏှာ၊ ညံင်လအာရ သဳဟရာဇာ၊ ဒဝုဲတဲပၠန် ယောန်ယောန်ဂါံအာ၊ ဇန်တံဗဵုကၠံင် မတ်ရံင်ဟောဒြာ၊ တွာ်လုပ်ပ္ဍဲဝင် မုက်ရင်ရာဇာ၊ လပုဟ်တဲယဵု ပ္ဍဵုတူသိသာ၊ ပ္ဍဲဒေါဝ်အမာတ် ပူရိသာတ်ဗ္ဂာ၊ ဂါံလောပ်ထောံထောံ ဟွံဂွံရောံညှာ၊ သၟီထောံမတ်ညာတ် ပါတ်ဓဝ်မေတ္တာ၊ ယွံသၟတ်ဗၠာဲ စရာဲရုပ္ပါ၊ စိုပ်ကၠုင်နန်ရတ် ဂဍောင်မတ်ၜါ၊ သၟီကော်ဟီုရ ကာလဂှ်ကၠာ၊ သဳနန္ဒာညာတ် ရုပ်သာ်ပြဲဖာ၊ ပ္ဍဲစိုတ်ဍေံဟေင် တီကေတ်သေင်ဟာ၊ ကောန်ဗြဴထပှ် ဒှ်စၟတ်ဟွံမှာ၊ သတြုအဲဟေင် ဍောတ်ဝွံသေင်ဟာ၊ ချပ်ပ္ဍဲစိုတ်ရ သ္ၚာဲစသာသာ၊ ဒၟံင်ပ္ဍဲနန်လွိ ပိတ္ၚဲဟွံခြာ၊ စညံင်ဂွံကၠာ ပအဟာဂၞဴ၊ ဍေံချပ်တုဲပ္ညဳ ယက္ခိဏဳဗြဴ၊ ဍေံဖ္ဍာတ်အရေဝ် ယွံလေဝ်ကောန်ဂၞဴ၊ ပိုဲပစကောန် ပ္ဍဲဒေါဝ်နန်ပ္ကဴ၊ ဍောတ်မွဲဟွံမွဲ ကောန်အဲတြုံဗြဴ၊ ပစကောန်အဲ ညံင်နဲကောန်ဂၞဴ၊ မနာဲမွဲအဴ ကောန်ဂၞဴဟွံမွဲ၊ ဍေံပဆာန်လောန် ဒၟံင်ပ္ဍဲခန်ဗၠဲ၊ *ဍေံတုတ်ယာတ်ဂ မတောဝ်ရေင်ဂၠေါဲ၊ ယာတ်လတက်ရ *ဗၜင်ပၠပြဲ၊ ဍေံကဵုဗြရတ် ဟေံကောန်ဍောတ်အဲ၊ လတက်ရိုဟ်တ္ၚဲ မိဗဵုဖဲမတ်၊ မသ္တိက်ပ္ဍဲနန် ဒမံင်ကောန်ဍောတ်၊ ကောန်သ္တိက်ဒၞါဲလဵု ဟီုကဵုယာဲသၟတ်၊ ပအာသ္တိက်ၚာဲ နာဲကောန်ၚာ်သၟတ်၊ ကောံဗၠာဲဂမၠိုင် ဝေင်ဂြိုင်တဴသၟတ်၊ ယာတ်မတောဝ်ယာဲ သွက်နာဲဗြရတ်၊ နာဲလတက်သၟတ် ကောန်ဍောတ်မိဂၞဴ၊ လတက်ရိုဟ်တ္ၚဲ သၠိင်ပ္ဍဲနန်ပ္ကဴ၊ ရိုဟ်တ္ၚဲပဝိုတ် ဖျေံစိုတ်ကောန်ဂၞဴ၊ ယာတ်ဂဂေါဝ်လောန် ကောန်အဲသြဟ်ပ္တဴ၊ တွဵုတဲမိဂၞဴ လ္တက်တဴပဝိုတ်၊ ...

သဝ်တ္ၚဲဂှ်ကၠာ ကောံပဝါအိုတ်၊ ဗၠာဲတံတုန်ပၠန် သ္တိက်ပ္ဍဲနန်ဗိုတ်၊ သ္တိက်မံင်ပေင်ဗဝ် ပ္ဍဲဒေါဝ်နန်သ္တိုတ်၊ ညာတ်ညးလှိင်အိုတ် ဟွံဝိုတ်သတိ၊ ယာတ်ညးလတက် လှာဲဆက်ဏာစိ၊ ယာတ်ဇကုသအး လှာဲကဵုညးညိ၊ သ္တိက်လှိင်အိုတ်စိ ပ္ဍဲသ္ၚိနန်ပ္ကဴ၊ ယောန်တိတ်ကၠုင်ညိ ယက္ခိဏဳဗြဴ၊ ညာတ်ယာတ်မတောဝ် မဂေါဝ်ခၠင်တဴ၊ ရပ်ဝးကံကြောပ် ပၠောပ်အပ္ဍဲအဴ၊ ဝးကံသုင်ဆီ ဂဟီကမြဴ၊ ရိုဟ်တ္ၚဲမွဲမွဲ စပ္ဍဲနန်ပ္ကဴ၊ ဇုတ်ဍေံစွံလဝ် သၟဝ်ဒေန်ထဝ်အဴ၊ ယက္ခိဏဳဗြဴ စဖဲတဲဟေင်၊ တ္ၚဲယးတုဲညာတ် သမ္ၚာတ်ပ္ဍီုသြေင်၊ စဟွံဒးသၟတ် သတြုအဲဟေင်၊ ယက္ခလ္ၚုင်လ္ၚ စဒးညးတၟေင်၊ စဒးညးသအာင် မဒါန်စဳရေင်၊ ဒါနဍေံဟေင် ဒးညးတၟေင်ကၠာ၊ သဝ်တ္ၚဲညံင်ဂွံ ပဇွောံအဟာ၊ တုဲဍေံကော်ဟီု ဗီုနွံမေတ္တာ၊ ယွံကောန်ဗြရတ် ဍောတ်ဗၠာဲကုမ္မာ၊ ဖာဲလဵုနာဲသ္တိက် ဂၠိက်ယာတ်ကဵုဏာ၊ ယာတ်မတောဝ်ပြဲ ကၞင်သောဲဗဂါ၊ အဲကဵုလဝ်ဟေင် ပကဵုဝေင်ခြာ၊ လတက်ရိုဟ်တ္ၚဲ အဲကဵုသေင်ဟာ၊ ဍောတ်ဗၠာဲဗြရတ် ဗောဓိသတ္တာ၊ ဟီုပလန်ဏာ ယွံမာတာမိ၊ ဂလီုလတက် ယာတ်စက်တမိ၊ မွဲတ္ၚဲဟွံဝေင် ပရေင်တဲမိ၊ ညးဟွံမွဲဆက် ဂွံလတက်ညိ၊ ဒှ်တွဵုတဲမိ ညိဟွံကဵုချဳ၊ လတက်ရိုဟ်တ္ၚဲ အဲမှတ်ပလွဳ၊ တ္ၚဲယးတုဲသွံ လၜက်စွံပ္ညဳ၊ အဲဍိက်ပလွဳ ကျာ်သြဳမိဇု၊ ယက္ခိအိုတ်စိုတ် ဍေံဟွံချိုတ်ဝွံ၊ စလေဝ်ဟွံဒး ဗၠးအာဇကု၊ ကသပ်ဍေံအိုတ် ပ္ဍဲအိုတ်လ္ၚု၊ ပသ္ဂောံစပၠန် ကောန်ဣသတြု၊ ယက္ခိဏဳဗျု စိုတ်နုဒတူ၊ ပ္ဍဲနန်ထဝ်အူ စံင်တူတဴတုန်၊၊ ။

ဂၞကျာ်သဳနန္ဒာ ပဥပ္ပါဲယဲတုဲ ဍေံသၟိက်ကဵုဗြရတ် အာကေတ် သတ်ပရိုက်လေပ်ဂြဴ ပၞဴလေပ်ဂြိုင် ပ္ဍဲဂြိုပ်ဟေမဝန် မဒှ်ဒတန်ဣဏင်ကင်ရဳတေံ

လၟေင်ဒဒှ် တဝှ်ဖဵုဂုန်၊ ယက္ခဗြဴတုန် ရုန်မဵုစရာဲ၊ ဗြရတ်ကောန်ဗၠာဲ ဂၠါဲစဟွံဒး၊ ဍေံပဥပ္ပါဲ စနာဲဂၠိုင်ဒွး၊ ပဝဗၠးဒး ဍေံဂၠါဲချပ်တဴ၊ ဍေံပယဲပၠန် ကောန်လီုပ္ဍဲဂၞဴ၊ သၠးဟွံဂွံ လရိုအ်ညံင်ဂၠဴ၊ ညံင်အမိဿ ဍေံဂၠါဲပတဴ၊ မိတ်ခပဵုအဴ ဍာဲတဴသေသာတ်၊ ဍေံလေတ်စုတ်အဴ ပေင်တဴဂၞိန်ယာတ်၊ ကဵုကော်ဟောရာ စကာအမာတ်၊ နာဲအာပြဟ် ဒၟံင်လံဒှ်ဝါတ်၊ အမာတ်သေဏာ ဒြေပ်အာဆာတ်ဆာတ်၊ အဲဒှ်ယဲပၠန် ဇၞော်သန်ဝါတ်ဂါတ်၊ သေဏာအမာတ် ဆာတ်ဆာတ်ဒြေပ်အာ၊ ဗွဲပရဟ်စိ စိုပ်သ္ၚိဟောရာ၊ ဟီုဗစရ ကာလဂှ်ကၠာ၊ ယွံလေဝ်ဟောရာ ဒှ်အစာသၟီ၊ နွံအသံပၠန် နာဲနန်ဇမၠိင်၊ ဂၞကျာ်ယဲက္ဍင် လိင်လင်ဘိင်တ္ၜိင်၊ လပဒညိင် ယဲဂှ်ဒွိင်က္ဍင်၊ ဟောရာဂွံမိင် မုက်မတ်လိင်လှင်၊ ပြဟ်တိုန်စိုပ်ပြဲ မိယဲဘိင်ဘင်၊ ဖျေံက္ဍိုပ်တုဲက္ဍင် ရံင်ဗီုပြင်ဂှ်၊ တုဲသၟာန်တိုန်စိ မိတဝ်စရဟ်၊ မူကိစ္စကီု ဟီုညိထဝ်စှ်၊ ယက္ခဳဗြဴမိင် ဟီုပမိင်ပြဟ်၊ ယွံလေဝ်ဟောရာ ကၠာတေံယဲဒှ်၊ ဂွံဂဥုဲပြဟ် ဟွံဒှ်လမောင်၊ လမုဟ်မွဲတန် ပ္ဍဲကဵုနန်ဂၠေါင်၊ သတြုအဲပၠန် ဟွံဂွံခၠန်ယောင်၊ ကဵုအာမွဲတောင် ဂၠံင်ဍုင်ယက္ခာ၊ ကဵုကေတ်သစ္ဆု ပ္ဍဲမြုဂြိုပ်ဝါ၊ ပရိုက်လေပ်ဂြဴ တဴပ္ဍဲဂြိုပ်ဖာ၊ ပၞဴလေပ်ဂြိုင် မဂၠိုင်အဒ္ညာ၊ ဂွံဂဥုဲဂှ် ပြဟ်ဂွံဗၠးအာ၊ လပဘိင်ဘင် ညိပသင်ကာ၊ ဗြရတ်တြုံလွုဲ စကာတုဲကၠာ၊ ဂဥုဲဂှ်သွံ ကေတ်ဂွံလောဲသွာ၊ ညးတနှ်ဂး ဟွံဂးဝေါဟာ၊ ပ္ဍဲဍုင်ဝွံဂှ် ဟွံတုပ်သၟဟ်ၜါ၊ ဗြရတ်မွဲကၠာ ပညာပြဲလောန်၊ အာဂွံလောဲလောဲ ပ္ဍဲဟေမဝန်၊ သာ်ဝွံဒိုဟ်ညိ ပါင်သိဒ္ဓိမန်၊ ပရိုက်လေပ်ဂြဴ တဴဟေမဝန်၊ ပၞဴလေပ်ဂြိုင် နွံတဴဂၠိုင်သန်၊ သာ်ဝွံနာဲဒိုဟ် ဒးရးခိုဟ်သန်၊ . . .

ဟောရာဒဇန် ဒိုဟ်ကဵုပၠန်ပ္ညဳ၊ ထဝ်စှ်ကသာပ် ကဵုလာပ်အနဳ၊ ဂွံကသာပ်ရော ဗိန္ဒောလဇ္ဇဳ၊ ဒုင်ကသာပ်နာဲ စရာဲဍိုန်ဒ္ၚဳ၊ ပဒွိင်ဒေဝဳ ကျာ်သြဳနန်ထဝ်၊ အဲဍိက်ဆတ္တဝ် လဝ်ဟောရာဇၞော်၊ ဍိက်ဟီုမဂး ဟွံဒးဖေက်ဂၟံက်၊ ဇရေင်နန်ထော် ဍိက်ဒှ်ဇၞော်အိုတ်၊ ပင်တဲယဵုခၠံ ကလံမိသ္တိုတ်၊ ဟောရာဂွံဟေင် ယိုက်ဂၠေင်မွဲဂိုတ်၊ ဟောရာအဟိုတ် ယိုက်ဂိုတ်ဖျေံနင်၊ စိုပ်သ္ၚိကောန်ဗြဴ မုက်ညံင်ပ္ကဴတင်၊ ကအီကအဳဂြိုင်ဂြိုင် ဒြပ်ဂၠိုင်ဂွံနင်၊ ဗြဴဂိုင်ဒေပ်ရင် ဂၠိုင်ဂၠင်ကသာပ်၊ . . .

ယက္ခယဲက္ဍင် ဒေင်သၠင်မံင်လ္ၚာပ်၊ နန္ဒကိတ္တိ ညာတ်မိယဲသၠာပ်၊ သၟီသၟာန်ပ္တုန်ပအာ သိုက္ခမာလ္ၚာပ်၊ လတက်ယာတ်လှာပ် လ္ၚာပ်လ္ၚာဂြိုဟ်ချဳ၊ ဂၠါံဇွိတ်သပေါတ် လယတ်ခဍဳ၊ ရံက်ရက်လးလဝ် သၟဝ်သၞာပညဳ၊ ဂတးဇကု ဗီုဆုအနဳ၊ လောမံင်ကြောပ်ကြောပ် ပ္ၚပ်ဇုတ်ချဳ၊ ဇုတ်ကဝ်အိုတ်ရ ပမရံင်ၚဳ၊ ကောဟွံဆာန်ဒေံ မိယဲကၠင်ဟဳ၊ အစာနာဒဳ ကဵုၚဳရံင်စံ၊ ယဲအဲဍိက်ဗြဴ ဍေံလဴတိုန်ကြံ၊ အာဒုင်ဟောရာ အစာနူတၞံ၊ သၟီကဵုကော်ပြဟ် အစာဒှ်တံ၊ အစာမိင်ကၠာ ဒြေပ်အာညံင်ကံ၊ တိုန်စိုပ်ဒေန်ဂၠံ ဒှ်တၞံအဒိ၊ လုပ်စိုပ်မုက်ရင် ညးဝင်ပေင်ထိ၊ ယိုင်သမိပ်တဲ တဴပ္ဍဲမူဏိ၊ တလကျာ်သြဳ ပိုင်ပြဳဘုမ္မိ၊ မူနွံပမိက် ကော်ပိုဲဍိက်စိ၊ ကိစ္စသ္ဇိုင်သာ ကာပ္ဍဲနန်လွိ၊ ဒေဝဟီုညိ ပ္ဍဲသ္ၚိဒှ်ကၠုင်၊ . . .

ဨကရာဇ သၟီတလဍုင်၊ မိင်ပါင်ဟောရာ နာဒဳဟီုပ္ညုင်၊ ယွံအစာအဲ ဗၠဲဗိုတ်တၞုင်၊ ဂၞကျာ်ဒှ်ယဲ ပ္ဍဲနန်သမၠုင်၊ ဂပ္ဘဂေါဝ်သ္ဇုင် ကၠုင်မံင်သဏုဲ၊ ဇုတ်ညံင်ကဝ်အိုတ် ချိုတ်ယီုဒှ်ဂၠုဲ၊ ယဲဍေံကၠုင်ပြိုက် ဒဒိုက်စိုတ်ဂဂုဲ၊ ဇုတ်ကဝ်ကြိုဟ်ကြိုဟ် သွိုဟ်စိုပ်ဒတုဲ၊ သၟတ်ကဵုဂဥုဲ ညံင်ယဲဂွံဗၠး၊ ဟောရာဂွံမိင် တွိင်ပါင်နာဲညး၊ သ္ၚဳရံင်ဇၟာပ်ဒိုဟ် ပ္ဍဲပြကိုဟ်သအး၊ ပ္ဍဲကဵုဝိဘင် ပြကိုဟ်ခၠင်လျး၊ လောကပါဒါ ဘာသာဟွံဒး၊ လောကဝိဒူ မွဲသၞူတိတ်ပျး၊ ပ္ဍဲပြကိုဟ်ပ္ညပ် ပန်ကၞပ်ဂး၊ မွဲဍေံဟွံဒး ဗၠးမံင်ရအဴ၊ ယဲဝွံကြံလောန် ကောန်လီုပ္ဍဲဂၞဴ၊ ဂြိုဟ်ဒစာံဂှ် သၟီကၞုဲသြဟ်ပ္တဴ၊ ကၞုဲကၠတ်လလဴ ဂွံဖျဴကောန်စိုတ်၊ ဖျဴတွာဲရာံပ္ညဳ ဒဿဂြဳချိုတ်၊ ဂွံနင်မဂး ဗၠးညံင်ညးဇိုတ်၊ ဟွံဂွံမဂး လမျီုသ္ဒးအိုတ်၊ ပရိုက်လေပ်ဂြဴ တရဴသ္ၚောဲသ္တိုတ်၊ ပၞဴလေပ်ဂြိုင် ဂွံနင်ဂၠိုင်ဂိုတ်၊ ဂွံတုဲဗၠးချိုတ် ပြဲသ္တိုတ်ရသၟီ၊ ဗက်ရံင်ပၠန်ဗျိင် ကိုန်စိင်မွဲသာ၊ ဒတုံပ္ဍဲသၞ ဒးရဒြင်ၜါ၊ ယဲဟွံလောန်ဏီ တီဂဥုဲကၠာ၊ နာဒဳရံင်ကာ ရောဂါဂၠိုင်ဟေင်၊ ယဝ်ဂွံဖျုန်ကၠေင် ပရိုက်ပြေင်မွဲ၊ ရောဂပေက်ပြး ဂွံဗၠးနူယဲ၊ ပ္ဍဲဍုင်ယက္ခာ ဗော်ကန္တာဝဲ၊ ပ္ဍဲမြုခမၞင် လှောံဗြၜင်ပြဲ၊ ယဝ်စိုပ်မွဲတဲ ပ္ဍဲဍုင်ဂှ်ပ္ညဳ၊ နန်ထဝ်ဂဵုဂြင် ဣဏင်ကင်ရဳ၊ ကေတ်ဂွံလောဲသွာ ပ္ဍဲယက္ခာပ္ညဳ၊ ကဵုအာကဵုပြဟ် ပလှ်နင်ဇဳ၊ ယမုပြဲက္ဍင် ဣဏင်ကင်ရဳ၊ အစာနာဒဳ ဂွံဝဳဗၠးရောင်၊၊ ၊၊

သၟီနန္ဒကိတ္တိ စကာဗြရတ် ကဵုအာကေတ်သတ်ပရိုက်လေပ်ဂြဴ ပၞဴလေပ်ဂြိုင် ပ္ဍဲဂြိုပ်ဟေမဝန်တေံ

ဨကရာတ်မိင် ဒှ်တဴလှိင်လှောင်၊ ဒဝိင်ဂၠိုင်ဂိုတ် ပ္ဍဲစိုတ်သၟီဍောင်၊ ၚဳဂၞကျာ်ပ္ညဳ ဒေဝဳမွဲတောင်၊ ဇုတ်ဗြုကြောပ်ကြောပ် ဒဇပ်ရဴဒေါင်၊ သိက်ပရောအ္စာ ဂွံစကာရောင်၊ အာကေတ်မွဲတောင် ဂၠံင်ဍုင်ယက္ခဳ၊ ညးဂှ်သ္ဂောံအာ အစာနာဒဳ၊ ပ္ဍဲဍုင်ဝွံသၟဟ် ညးဂှ်မွဲညဳ၊ ဂွံအာကေတ်ပ္ညဳ မကျာ်သြဳရော၊ ညးဂှ်တြုံမွဲ ပ္ဍဲဟေဝဏ္ဏော၊ ယဝ်အာကေတ်ရော မွဲအြဂွံနင်၊ အဲဖျေံလာပ်ပၠန် ထဝ်သြန်စိင်ဒြင်၊ ပ္ဍိုက်ကဵုဂၠုင်က္ၜင် ဟွံဂၠင်ယောသော၊ ယဝ်ညးမွဲရော ယောသောကဵုဒှ်၊ ဂဥုဲပြဲက္ဍင် ကေတ်နင်ကဵုပြဟ်၊ တက်မံင်ဟုင်ဟုင် လုံဍုင်ဒိုဟ်စှ်၊ မွဲဟဂံင်ဒုင် အလုံဍုင်ဂှ်၊ သီုပန်ဒိုဟ်ဍုင် သမုင်ညံင်လွဟ်၊ တုဲကလေင်ပြဟ် နဲဂှ်ပ္တီသၟီ၊ ယွံတလတိ ဣဓိဇၞော်ဂၠိင်၊ အိုတ်လုံဍုင်ရ ဆဍိက်ပၟိင်၊ ညးသ္ဂံင်ဒုင်တဲ ဗၞတ်မွဲဟွံမိင်၊ ကၠုင်လ္ၚောဝ်ပ္တီသွိင် ကဵုသၟီရာဇာ၊ နန္ဒကိတ္တိ ဣဓိပြဲဖာ၊ တုဲသၟာန်ပၠန်ကၠာ အစာနာဒဳ၊ ယွံအစာအဲ မပြဲအိန်ရဳ၊ သိက်ချပ်ဒးရော ဟောရာနာဒဳ၊ ဗၠာဲတံနွံပ္ညဳ ပေင်သအဳနန်မြ၊ ရုဲစှ်ကေတ်မွဲ ပ္ဍဲပါသာဒ၊ ယဝ်အာဂွံပၠန် ပ္ဍဲဂြိုပ်ရည၊ ပရိုက်လေပ်ဂြဴ ပ္ဍဲဂၞဴဟေမ၊ ပၞဴလေပ်ဂြိုင် ဇိုင်ဂၞိင်ဒေသ၊ သီုၜါသာ်အဴ ဂွံဖျဴနင်ရ၊ ဇိုန်ကဵုဍုင်ဝွံ သီုနန်မြုပြ၊ ကဵုစဍုင်ရ မြုပြအတာ၊ . . .

ဟောရာဂွံမိင် ယွံသၟီရာဇာ၊ ဆရဲဝင်ပ္ဍဲ နွံမွဲပြာထာ၊ ဂွံအာမွဲတဲ နဲပရှ်ကျာ၊ ကေတ်ဂွံလောဲလောဲ ပ္ဍဲဍုင်ယက္ခာ၊ ပ္ဍဲဍုင်ဝွံဂှ် ညးဟွံသၟဟ်ၜါ၊ ဗြရတ်ကုမ္မာ ဗၠာဲမှာရာဇ၊ ဆဝွံမွဲရ တလဣဓိ၊ အာကေတ်ဂွံရ ယွံတလတိ၊ ပရိုက်လေပ်ဂြဴ ပၞဴဂြိုင်ဂျိ၊ အာဂွံလောဲရ လ္ပဒွိင်ညိ၊ ဂွံသီုၜါစိ ဗွဲယုတ္တိပ္ညဳ၊ သၟီမိင်ပါင်ကၠာ အစာနာဒဳ၊ ဒးဂနပ်မ ဗၠးရဒေဝဳ၊ တုဲကော်ဟီုပ္ညဳ ကျာ်သြဳနန်မြု၊ ယွံလေဝ်ဗြရတ် မုက်မတ်တသု၊ မိနာဲယဲက္ဍင် ဘိင်ဘင်မတ်ဂၠု၊ အံက်သၟိက်ဂွံကၠာ ၜါသာ်သစ္ဆု၊ ပရိုက်ပၞဴ ဂြဴဂြိုင်ဂြုဂြု၊ ပရိုက်လေပ်ဂြဴ ပၞဴဂြိုင်လဒု၊ ယွံထဝ်ကမု ဂၠုကောန်ဂကူ၊ ကဵုအာထာန်ဗော် ကလော်အသူ၊ ယဝ်ကေတ်ဂွံကၠာ သီုၜါဂကူ၊ ယွံလေဝ်ထဝ်အူ ဂကူရာဇေ၊ မိနာဲယဲက္ဍင် သ္တင်တူဒေန်လေဝ်၊ အာညိကောန်ဗၠာဲ နာဲပဗၠေတ်ဆေဝ်၊ ဟီုညိထဝ်လေဝ် ပပၠေဝ်ဇမ္ၚောဲ၊ ယဝ်ဂွံနင်ကီု ဍုင်သီုနန်ဗၠဲ၊ မဇိုန်ကဵုနာဲ စရာဲအဝဲ၊ ဆနာဲမွဲကီု စိုန်သ္ကီုညာန်လှဲ၊ လောန်နူနာဲသအး ဟၟဲညးမွဲမွဲ၊ ကောန်အဲညာန်ပြဲ နွံပ္ဍဲနန်ယာန်၊ . . .

ဗြရတ်မိင်ကၠာ ပါင်သၟီရာဇာန်၊ ယွံအံက်သၟီမ တလနန်ယာန်၊ ကောန်ဗၠာဲမဂး ဟွံစးဂလာန်၊ မအံက်စကာ အာဂြိုပ်ဓိ၀ါန်၊ ကောန်ဟွံဒည ကမၠသာန်သာန်၊ ဆဝွံဒှ်ညိ ယုတ္တိဍိက်ပါန်၊ မိကျာ်ဂန်အဲ တဴပ္ဍဲသန္ထာန်၊ ဒမၠုမတ်ကၠာ ဒၟံင်ကြာညးကွာန်၊ ဂွံပုင်မွဲဂၞဴ မိဇုဗြဴယာန်၊ ၀ါတ်တဴကွေံကြာန် လောန်လာန်ယောသော၊ ဗှ်မိဂၞဴအဴ ဟွံမွဲကလော၊ ဖေက်မိကၠင်ကၠောန် ကောန်ဟွံမွဲရော၊ မိမွဲဨကော ကလောဟွံမွဲ၊ ညးထပှ်ကၞာတ် ညာတ်ဆမတ်မွဲ၊ နူဂယးပြဟ် မိတှ်မင်အဲ၊ စမဳတဴကောန် ရံင်ပၠန်ရိုဟ်တ္ၚဲ၊ ယဝ်ကောန်ဟွံမွဲ ညံင်နဲကောန်ဂၠဴ၊ စမဳတဴၝောံ ကီုသွံလေဝ်အဴ၊ ဍိက်ဥပ္ပကာ မိမာတာဗြဴ၊ ဗစမိမာန် အဓာန်ဗွဲကြဴ၊ လံအဲဍိက်စိုပ် နူဂြိုပ်သဘဴ၊ ဗစမာန်အဵု ဍိက်ကေတ်ကဵုအဴ၊ ညံင်ကဵုဂွံဖျဴ တဴလယိုင်အဲ၊ . . .

ဨကရာတ်မိင် တွိင်ပါင်မွဲတဲ၊ လ္ပဒွိင်ရ တလအဝဲ၊ အဲဥပ္ပကာ သီုမေတ္တာပြဲ၊ ပုင်သွတွာင်ၜဲ အဲကဵုခဏံ၊ ဟဵုဂၞိန်ဂိုင်အိက် သ္ဂောံတိက်ဗတံ၊ ဒတဲဏာနင် ပ္ဍဲဥမင်ဂၠံ၊ လယိုင်အဲရ နာဲပဒွိင်စံ၊ ဗြရတ်ကောန်သၟီ ဂွံမိင်အသံ၊ ဟီုစကဵုမိ ယုတ္တိနူတံ၊ ပရာပရံ အတိုင်အသံနာဲ၊ ကဵုအာဍုင်ဗော် ကလော်တာဲဗြာဲ၊ ပ္ဍဲဂြိုပ်ဇၞော်ဆာဲ ဒမံင်ဒြာဲတ္ၜိုင်၊ ပရိုက်လေပ်ဂြဴ ပၞဴလေပ်ဂြိုင်၊ ယဝ်ဂွံနင်ဖျိုင် ကဵုပိုင်နန်မြ၊ ညးထပှ်မိင် ၀ိ၀ိင်သၠင်သ္ဒ၊ နာဲအာဍုင်ဇၞော် ကလော်ယက္ခ၊ မူကွတ်တဲနွံ ကုံရုံပ္ဍဲမ၊ နာဲဂွံပြိုင်စံ ဓမ္မယုဒ္ဓ၊ နာဲဟွံမွဲစိ ဣဓိဗလ၊ ဟွံမွဲညိည အက္ခရဟွံတီ၊ လိက်ဟွံလေပ်ညိ သိဒ္ဓိမန်ဏီ၊ ယာဲလေဝ်ဂၠုမတ် ကောန်ဍောတ်ဂေါဝ်မြီ၊ နာဲနွံရိုဟ်တ္ၚဲ ဂွံစဖဲကအီ၊ ကောန်အာတုဲသၟတ် အေင်အောတ်ချိုတ်လီ၊ ကောန်ဂၠုဟွံတီ ညံင်လၞီယာဲ၊ . . .

ဗြရတ်ဂွံမိင် တွိင်ပါင်မိအာဲ၊ ယွံမိဍာ်တှ် ပဗှ်ဒွိင်ဒွါဲ၊ နွံအသံဒဝ် သၟီဓဝ်စရာဲ၊ တမှောံပုင်ပိ မိဟွံဒးဂၠါဲ၊ တောံဗစယာဲ ပဒွိင်ဒွါဲညိ၊ ပအပ်လဝ်ကဵုယာဲ ဗြဴစရာဲပိ၊ သ္ၚုၜဵုနာထ အဟာရစိ၊ သီုဇွောံမတုန် ပ္ဍုန်ဗစမိ၊ ညးထပှ်မိင် ဒွိင်ဗၠးအာညိ၊ သာဓုကောန်မိ သိဒ္ဓိနာဲလွဳ၊ အာကဵုမြာညိ ထာန်ယက္ခိဏဳ၊ ဖဵုဗစယာဲ ကဵုနာဲဂွံဇဳ၊ ဂွံလောဲလောဲပ္ညဳ ကဵုဇဳကၠုင်ဟေင်၊ ကလံယာဲအဵု တဲပ္ဍဵုတူကၞေင်၊ ပဝတ်ကဵုမိ ဒဵုပိဝါဟေင်၊ ပင်ယဵုဇိုင်မိ ပသိဒ္ဓိတၟေင်၊ နော်နာဲဟွံဝေင် ပြေင်ဗၠဲဇမန်၊ ကလံနော်ကၠာ သီုမာတာပၠန်၊ တုဲတွာ်တိုန်အာ ကဵုရာဇာမန်၊ . . .

နန္ဒသၟီဗၠာဲ ညာတ်နာဲတြဳဝန်၊ ယွံလေဝ်ကောန်ဗၠာဲ အကာဲဒိုဟ်ပန်၊ မူဒၞါဲကေတ်ဏာ ဟီုညိကၠာကောန်၊ ယွံတလနန် ဂွံပိုင်ခန်လွာ၊ ချေံဒၞါဲမထတ် ဇြဟတ်မြက်စာ၊ သီုကဵုသၞာ်လွပ် စုတ်ကၞပ်ကၠာ၊ ချေံဒၞါဲဒြိုဟ်သ္ကာတ် ဍိက်အာတ်ကေတ်ဏာ၊ သီုကဵုသၞာ်မွဲ ဒၞါဲမပြဲဖာ၊ ဂွံရပ်နင်ဏာ အကြာသတြု၊ သၟီဂွံမိင်ပါင် ရမျှာင်နာဲဇု၊ ယွံလေဝ်ကောန်ဗၠာဲ နာဲထဝ်ကမု၊ နာဲရုဲကေတ်ပ္ညုင် ပ္ဍဲဍုင်ဝေလု၊ ရုဲညံင်ဒးစိုတ် စရိုတ်ကောန်ဂၠု၊ မ္ၚးပ္ဍဲဝင် တၞင်ပေင်စု၊ ဆစိုတ်ကောန်ဂၠု နွံအနုဒိုဟ်၊ ဗြရတ်ဂွံမိင် ပါင်သၟီဇၞော်ခိုဟ်၊ ဂၠါဲရုဲဇၟာပ်ရိုင် ဇိုင်ဗတသွိုဟ်၊ ဇိုင်ဇၞော်တဲဇၞော် လုပ်ဗော်ချေံဒြိုဟ်၊ ဍေံပၠေင်တလ မုက်ကၠလကိုဟ်၊ ဂၠါဲရုဲပိတ္ၚဲ မွဲချေံဟွံခိုဟ်၊ ဆဵုဆဍေံဒြိုဟ် ဟွံခိုဟ်ဆမွဲ၊ ဂၠါဲချေံခိုဟ်ပြဲ မွဲကေတ်ဟွံဂွံ၊ တြုံထဝ်ကလောံ ဇူဒေါံဒၟံင်တုန်၊၊

ဗြရတ်ကုမ္မာ ဍိုက်ချေဟ်ဟဇ္ဇနဲတုဲ တိတ်အာဍုင်ယက္ခ မဒှ်ဒမံင်မိဣဏင်ကင်ရဳတေံ

လၟေင်ဒဒှ် တဝှ်လက်သန်၊ ပရူချေဟ်ပၠန် တန်လဝ်ကၠာရ၊ လၟေင်ပုံဒှ် တဝှ်ဒေသ၊ ပိုဲဟီုပၠန်ရ ဖဴဒေဝဇြဲ၊ ညာတ်ကေတ်ဗြရတ် ဍေံမှတ်ပဝဲ၊ ပိုဲပြာ်နူတၞံ တမ်အဒိဝဲ၊ နူအဒိဂှ် ထပှ်ဒေံၝဲ၊ ဝါကၞတ်တဲ ဍေံပဝဲသၞ၊ ပိုဲဒးပြာ်ပၠန် ပ္ဍဲဟေဝဏ္ဏ၊ ရပ်နင်ချေဟ်မွဲ ဟဇ္ဇနဲယျ၊ ချေဟ်ရတ်မ္ၚဵု တွဵုတဲဒေဝ၊ နွံဣဓိကၠာ ကလာင်ကာသ၊ ဒေဝဟီုဖျန် ယွံဂန္ဓက၊ ပသတိသၟတ် လွဳလွတ်ညိမ၊ စိုပ်ဍုင်ယက္ခာ ဗြဴကညှာဏ၊ ဍောတ်ဗၠာဲဝွံသၟတ် နာဂတ်ဂတ၊ ညးဂွံဒှ်ကျာ် ပြာ်သတ်လောက၊ နာဂတ်မွဲတဲ သီုအဲသီုမ၊ ၜးဘဴမူလ ဂတဝွံမာ၊ ပိုဲဂွံဆဵုသၟတ် ညိဟွံဆောတ်ကၠာ၊ မၞးပသတိ ညိသန္ဓဴဝါ၊ ချေဟ်ရတ်ဂွံမိင် ပဒွိင်ပူဆာ၊ လျိုင်ဍိက်ရ ကျာ်ပသင်ကာ၊ သၠုင်ပန်ဟတ် ချေဟ်ရတ်ပြာထာ၊ ဇမၠိင်ဒှ်တဴ တရဴဟတ်ကၠာ၊ နွံပရှ်သၟတ် ထတ်စောံမြက်စာ၊ ဒေဝစွံလဝ် စတဴဒေါဝ်ဖျာ၊ . . .

ပ္ဍဲကာလဂှ် ပဒှ်သာ်လွာ၊ ဗြရတ်ကုမ္မာ ထောံဏာမတ်စိ၊ တွာ်ရေတ်လုပ်ဗဵု နွံကဵုသိဒ္ဓိ၊ သီုကဵုဇိုင်ၜါ သပါသ္တုံဇွိ၊ သော်ကှ်ေဓရံင် စးညံင်ဂတဵုလွိ၊ ဗတကိုဟ်ဂွု ဗုကိုဟ်ဂေါဝ်ဂၠိ၊ သၠဇြဲပ္ဍဲကၞေင် သင်ရေင်သ္တုံဇွိ၊ ကံဓရံင်ပၠန် လက်သန်ပေင်ထိ၊ လက်သန်ချေဟ်စိ ပေင်ထိတဝဳ၊ သင်သီုပုင်ပါဲ စရာဲကျာ်သြဳ၊ ဂွံချေဟ်တုဲရ ဂန္ဓကပ္ညဳ၊ ဒတဲဏာပ္ညုင် မုက်ရုင်ပေင်သအဳ၊ အမာတ်သဳကၠဳ သအဳဂၠက်ပေင်ဂၠု၊ သၟီထောံမတ်ညာတ် ရုပ်သာ်သ္ဇုင်ဂွု၊ ဒုင်ကဵုသၞာ်မွဲ ရတ်ပြဲယမု၊ ပင်ယဵုတဲပ္ညုင် ဗ္ဒုင်ကေတ်သၞာ်ဝွံ၊ အပေါတ်နာဲဇု ၀ွံရတ်ဂကူ၊ ၝောံကိုတ်ရတ်ဟေင် ရေင်မတ်ဒဇူ၊ ဗြကၞေင်ရတ်ဂှ် တဝ်စရှ်အူ၊ ကယျိုင်ဗြရတ် ကၞတ်ဂကူ၊ ဒနပ်ရေင်မတ် မၞိက်ရတ်ဒဂူ၊ ပသေက်မသုန် နွံဂုန်တူရူ၊ ရုပ်ညံင်ထဝ်အူ ဂကူမပၠေဝ်၊ . . .

ယက္ခဗြဴညာတ် ဖဍာတ်အရေဝ်၊ ကှ်ေလိက်ဇမန် ဂကန်ကြာဇေဝ်၊ ကှ်ေပ္ဍဲသၠတာ ကေတ်ဏာကဵုပၠေဝ်၊ ကွက်ပ္ဍဲကံချေဟ် ထောံဖျေဟ်ပြဟ်လေဝ်၊ ဍေံဂွံလိက်ဒွက် ဟွံဆက်အရေဝ်၊ ဍိက်မွဲဟွံဆေဝ် ကေတ်ကဵုဨကော၊ ဍုင်ဏင်ကင်ရဳ ဗနဳယက္ခော၊ ကှ်ေလိက်တုဲကွေံ သီုလွေဟ်နန္ဒော၊ နန္ဒာဒေဝဳ စိုတ်ချဳလမော၊ သာ်ဝွံဗစန် ဂကန်ယက္ခော၊ လိက်အဲနန္ဒာ စကာယောသော၊ ပ္ဍဲကောန်ဗြဴရော ယက္ခောအနဳ၊ ဍေံဝွံမေခု သတြုယာဲပ္ညဳ၊ ဍေံအာစိုပ်ပၠန် ကောန်ဗြဴကျာ်သြဳ၊ မိဏင်ကင်ရဳ ကောန်ကျာ်သြဳသ္ၚိ၊ ဍေံစိုပ်တၚဲ ပ္ဍဲဂၠံနန်မိ၊ နာဲစကၠေံဍေံ ပကဵုသှ်ေညိ၊ ဍေံစိုပ်ဗတံ ပ္ဍဲဂၠံနန်လွိ၊ နာဲစကၠေံညိ မိဂကန်ဏာ၊ ဂွံလိက်ဗစန် ဂကန်မာတာ၊ နာဲပကဵုမှာ သမ္တီကၠာညိ၊ ကောန်ကျာ်သြဳမိ ပဝိုတ်ညိကောန်၊ သဳနန္ဒာပၠန် ဂကန်ယောသော၊ ကှ်ေလိက်တုဲရော ယောသောသေင်ဟာ၊ ကွက်ကံချေဟ်ကၠာ ကာလဂှ်အဴ၊ . . .

အာရကောန်ဂၞဴ အပၠဴဟေမော၊ ဂွံလောဲလောဲရော ဃောဂွါံဍေံဂြဴ၊ ဃောဍေံဝေင်ဂြိုင် ဃောတသိုင်ကဴ၊ ပ္ဍဲကဵုဥဒျာန် ထာန်ဂြိုပ်အပၠဴ၊ လ္ပဒွိင်ဒွါဲ နာဂွံပၞဴ၊ နွံကောံဒၟံင်တဴ ဃောဂြဴအသံ၊ လမုဟ်ဂွံလောဲ ဃောဍုဟ်ပ္ဍဲတၞံ၊ ဥတုဝွံဂှ် ဍေံပြဟ်ပေင်တံ၊ ဃောဍေံပလှ်ေ ဂရိုင်ဍေံကြံ၊ ဃောကဵုအသံ ညံင်ကံဂတး၊ ဥတုလၟုဟ် ဃောံဍေံပြဟ်ပြး၊ ဥတုဝွံဂြဴ ဂြိုင်တဴဟးဟး၊ လ္ၚဵုဍေံဂြဴ အြအဴအံအး၊ လွိင်ကၞာင်ဂၠု ဗြုညံင်ထၜး၊ လ္ၚဵုက္ဍာတ်ဖျး ဟးသုန္ဓရ၊ ဗြရတ်ကုမ္မာ ကလံရာဇ၊ ပင်တဲပ္တိုန်ယဵု ပ္ဍဵုတူသိသ၊ ဖျေံက္ဍိုပ်ပိဝါ ကဵုမှာရာဇ၊ သၠိုက်ၝောံကိုတ်သၟတ် သၞာ်ရတ်ခဂ္ဂ၊ ဂါံတိုန်ဍိုက်ချေဟ် လွေဟ်ပုဏ္ဏက၊ အယောင်အလာ ညံင်အိန်မာဃ၊ ချေဟ်တဆှ်အာ ညံင်လာဝက၊ ညံင်ပရှ်ကျာ အာတဴလျလျ၊ ဒိုဟ်ဥတ္တရ ဂတအာတုန်၊၊ ၊၊

တရဴဂြိုပ်ဇမၞော်

လၟေင်ဒဒှ် တဝှ်ဖဵုဂုန်၊ လၟေင်ပုံတုန် ပိုဲဟီုပ္ဍုန်ဏာ၊ တိုန်ဍိုက်ချေဟ်ဂါဲ ဗြရတ်နာဲသာ၊ ညံင်နာဲဒေဝိန် ကၟိန်သွဝ်ၜါ၊ ချေဟ်နွံဒြဟတ် ထတ်စောံမြက်စာ၊ ပၠဣဓိပြဲ သလာ်သြဲအာ၊ ဒျာန်တိုန်မွဲမွဲ တူအမှဲကၠာ၊ နဣဓိဟာန် လှောင်သဗာန်ကျာ၊ ညံင်ပဝန်ကံ ဒြေပ်ဂမြံအာ၊ ဍောတ်ဗၠာဲချပ်စိ လေပ်ခၠေဝ်ညိဟာ၊ သလှ်ေပမာ တုဲသၟာန်အာရ၊ သၟာန်ဂွံတီရော ယွံကောအဿ၊ ယွံကောချေဟ်ယာန် ဒေံသၟာန်ညိမ၊ လိုန်သဗာန်ကျာ ကလာင်ကာသ၊ ဍုင်မှာယက္ခ တလဣဓိ၊ သ္ၚောဲဆိုက်တုန်ဂှ် ကောသှ်ကဵုညိ၊ ဂၠုစိုပ်မဂး ညံင်တမးစိ၊ သ္ၚောဲဆိုက်တုန်ကီု ဟီုကဵုသတိ၊ ဟီုကဵုဒေံညိ ဗွဲယုတ္တိရော၊ . . .

ချေဟ်ရတ်ဂွံမိင် တွိင်ပါင်ထောထော၊ ယွံလေဝ်ဒေံမ ပဒွိင်စံင်တူ၊ ယွံဗောဓိသတ် ကၞတ်အယော၊ ၜါသတ္တဟ ဆတဝါ်ကော၊ ယဝ်ညးအာရော ပ္ဍဲပယောဂှ်၊ ပိဂိတုပၠန် တဝါ်ဇန်သ္ဒဟ်၊ ဒေံလ္ပဒွိင် လှိင်စိုတ်ပူမှ်၊ ဍိုက်ပ္ဍဲစးကီု ပဟီုသၟာန်သှ်၊ ကောဂါံတဆှ် ဒှ်ၜါသတ္တ၊ စိုပ်ဍုင်ယက္ခ ရဒေံကျာ်သြဳ၊ စှ်ေလိုန်တိရ ဘုံပထဝဳ၊ ဗဵုဂြိုပ်ဆုဒုန် ဂၠးသုန္ဓရဳ၊ ဗဵုဝေင်ဂြိုပ်ဇဳ ဗနဳဟေမန်၊ ချေဟ်ဗောဓိသတ် မှတ်စှ်ေတဝန်၊ ဒျာန်စှ်ေညှာညှာ ချေဟ်နာဲသာဇန်၊ လိုန်ပထဝဳ ညဳသာညံင်ပၞောန်၊ တွာ်ဟွံခဍဳ ညဳသာသၟဟ်န်၊ . . .

ပ္ဍဲဟေမဝန် ဂၠိုင်သန်တၞံပ္ကဴ၊ တၞံဆုဍိုပ်ဍဴ ပ္ကဴသြဴရာင်ဂွု၊ ဗဵုရဒေံဗၠာဲ နာဲထဝ်ကမု၊ ကောဟီုပျးအဵု သီုကဵုယမု၊ တေံပ္ကဴသဘိက် ပၞိက်အံင်မှုဲဂွု၊ ပိုက်ပၞိက်ဂမြိင် လွိင်ကၞာင်ဂၠု၊ သဘိက်ယမု ဒေါဝ်မြုဟေမော၊ ဗဵုရဒေံဗၠာဲ ရာင်တွာဲထိမြော၊ တေတေံထုဲတ္ၜန် ပ္ကဴယန်သီုဆော၊ ဇုက်လီပူဂေတ် ဍောင်ဗကေတ်မြော၊ သၠကၞာင်ဓဝုဲ ဂဟုဲကြီုဟော၊ လ္ၚဵုခမှောံရာင် ပြာင်ဍောင်သီုဆော၊ ပ္ကဴယန်ဟေမော ကောပျးကဵုနာဲ၊ ပ္ကဴယန်ညးကော် ဇၞော်သန်စရာဲ၊ **ဖျိုက်စက္ခုမတ် ဗဵုရဍောတ်ဗၠာဲ၊ ကောဟီုပျးကဵု ဗဵုစိုတ်ပဂါဲ၊ မတ်ပလၜဲ ဒက်ခပေါဲနာဲ၊ ဇုက်ပူလီဗိုင် ခြိုင်ပ္ဍဲဂြိုပ်ချာဲ၊ ဇုက်ဂေတ်ဒှ်ဘုံ အုံဒၟံင်ဂါဲဝါဲ၊ သၠကမဳတ္ၜန် လွိင်ပၠန်ဂါဲ၊ ပံက်ထာင်ရာင်ဆာဲ ဒလာဲလ္ပောဲရတ်၊ ပၠးထာင်ပြာင်ဍောင် မောဝ်လှောင်စိုတ်ၜတ်၊ ပ္ကဴလပေါဲသၟတ် အဇ္ၛတ္တိက၊ လပေါဲမောဝ်လောန် ယွံကောန်တလ၊ လပေါဲညးကော် လုပ်ဗော်ရညှ၊ သမ္တီဒေံမ ကောရသှ်ကဵု၊ . . .

ဗြရတ်မိင်ကွေံ ပါင်ချေဟ်မ္ၚဵု၊ ပ္ကဴပ္ဍဲဂြိုပ်ဇၞော် ရာင်ဗြော်ဍာဲဂဵု၊ ရာင်ပၠးခမှောံ ပ္ဍဲဂၠံဥပ္ပဵု၊ ချေဟ်ပျးဗဗဵု ရာင်ဂဵုလကတ်၊ သာရဖဳအနာင် ဍောင်ပေါင်ရာင်ထတ်၊ ပၠးထာင်ရာင်ဂၠု ဂွုၜတ်တကတ်၊ အနာင်မောဝ်ၜိုဟ် ဖျုန်ဂြိုဟ်တမ္ညတ်၊ ဂဟုဲရမျှာင် ပ္ဍဲကၞာင်ကၞတ်၊ ကၞာင်ဓဝုဲပြီု ဗီုညးလှ်ေသၟတ်၊ သၠပလှ်ေဂါဲ လှ်ေတွာဲမုက်မတ်၊ ဍောင်ကသဝ်လျတ် လှ်ေဗတ်တဆိင်၊ ဒယှ်ေဒွက်ဇမၠိင် သွိင်ကၞာင်ကၞတ်၊ သၠကၞာင်ဂၠေါဲဂြီု ပြီုနာဲဗြရတ်၊ ပ္ဍဲကဵုကၞတ် တၞုင်ၜတ်ဂမြံ၊ အနာင်ဓရီု ကြီုကဵုအသံ၊ ပ္ဍဲကၞတ်ကၞာင် ကဵုရမျှာင်ကြံ၊ ဍိုက်ချေဟ်ဂေတ်ဂါဲ ယွံဗၠာဲအသံ၊ ပ္ဍဲကၞတ်တၞံ ရံင်စမ်ညိနာဲ၊ ဗြရတ်ဂွံမိင် တွိင်ပါင်ချေဟ်ဗၠာဲ၊ သ္ၚဳရံင်တူဆု ကၞာင်လရုဂါဲ၊ ကၞာင်လယှ်ဆာဲ ဂေတ်ဂါဲဂဟုဲ၊ စမ္ပာသ္ဇင်ထောဲ လပေါဲကြာန်ထုဲ၊ ပြဴပြာန်သဘိက် ၜုန္နရိက်မှုဲ၊ ပၠိုဟ်မြမောဝ်ဗျာင် ထိုက်ထာင်ဗရုဲ၊ ပိုက်ပၞိက်အံင်မှုဲ ကၞာင်ဒဝုဲဂေတ်၊ ထိုင်သာဲဇာပ်ဖူ တ္ၜူမာဲပဝ်ရေတ်၊ ခဏေင်စက်စာန် တာန်ဆံင်ခရေတ်၊ ထိုင်ထဝ်ပဝ်ဂေတ် ဍိတ်ဍိတ်ညှာညှာ၊ ဇာပ်ကသဝ်ပ္ကဴ ဒျာန်တဴသၞေင်ၜါ၊ ဒြဝ်သၞေင်လလောင် ညံင်ဖံခရာ၊ ဒြဝ်သၞေင်ဂဟုဲ မှုဲတာင်သဒ္ဒါ၊ သီုသာဲအဒါဲ ဂၠါဲဇာပ်မောဝ်ဇာ၊ ချေဟ်ရတ်ကဵုနာဲ ပယျာံဂြိုပ်ဖြာ၊ ဗဵုဂြိုပ်ဗဵုဂၞိင် လဟိင်စိတ္တာ၊ . . .

လုပ်စိုပ်ဂြိုပ်မွဲ နဲဂြိုပ်နန္ဒာ၊ ရုက္ခပေင်သူ တၞံအူရေင်ဗ္ဂာ၊ သစ္ဆုဂၠိုင်တဴ ကၞာင်ရဴကၞာ၊ သဳလောလဳိမှဴ သီုသတ်ဗြဴတာ၊ ပၞဟ်ဗဳဗၠတ် သီုသတ်မၠင်ကာ၊ ဗဗုင်ဒယာ် ပဏာ်သဂါ၊ မတ်ဗြဲကြေင်ပိုင် ဂၠိုင်ကဵုဘာသာ၊ တလုဲတလတ် ဗၠတ်သတ်ဝိကာ၊ ဒယာ်ဗဝး ပဏးမွဲသာ၊ ဗဳကွိတ်မင်ဂၠန် လကံလန်ဇာ၊ ဇၟာပ်သစ္ဆုကၠာ သအဳဗ္ဂာပေင်ထိ၊ လ္ၚဵုၜတ်ကြံင် ရံင်တိုန်နူတိ၊ ကၞုဲဂင်ဟောဝ်ၜှ် ပလှ်စစိ၊ ကၞာင်လယှ်ထုဲ ကၞုဲၜှ်ဖျဴသ္ၚိ၊ ပြဟ်စှ်ေပေင်ဂၠိ တိပထဝဳ၊ လ္ၚဵုက္ဍာတ်ဖျး ဟးသုန္ဓရဳ၊ ဗၜဵုဗဝါ ပအဟာဇဳ၊ ကၠဵုက္ၜင်ကၠဵုဂြိုပ် ကၠုင်စိုပ်တဝဳ၊ ဇၟာပ်သတ်ဂၠါဲၚဳ ဗနဳတၞံဆု၊ လ္ၚဵုစလ္ၚဵုဂၠါဲ သ္ၚာဲစေၚက်ဗု၊ လ္ၚဵုဂိုင်ဏာ အာတူကၞာင်ဆု၊ ကိတ်စပြက်ပြက် ၚေက်တၚက်ဗု၊ စဒၟံင်သစ္ဆု ဗရုရူရူ၊ ဗဗုင်သတ်စိုက် ခတိုက်ပေင်အူ၊ လတက်ယာတ်ချီု ဗကေတ်ဍီုဒ္ဂူ၊ ကၞာင်သၠသဓုံ ပ္ဍဲဘုံလတူ၊ ဗဗုင်ဂကူ လတူညးပၠေဝ်၊ ၜါကောချေဟ်လေဝ် ဗင်ဗေဝ်ကြာဂြိုပ်၊ သတြုသၞဝဲ မွဲဟွံထၜိုပ်၊ ဟဂံင်ကြတ်ဆေဝ် ညံင်ဒေဝကိုပ်၊ အာပ္ဍဲထာန်ဂြိုပ် ဟွံထၜိုပ်မွဲ၊ မှာဗောဓိသတ် ဍိုက်ဟဇ္ဇနဲ၊ ညံင်နာဲဗြဴပန် ကောန်နာဲက္ဍိုင်ဗၠဲ၊ ယးအာသဝ်ဒီု ဒမြီုတၞံဇြဲ၊ ချေဟ်ဟဇ္ဇနဲ ဇၞော်္ၚှာသြဲယျော၊ မတ်ဗဵုပါင်သှ် တင်တှ်သီုအြ၊ ဟီုအာဂြိုင်အာ ၜါဒေံကဵုကော၊ ပ္ဍဲဂြိုပ်လ္ၚု ထာန်မြုဟေမော၊ နာဲယာန်ချေဟ်ရော ဒျာန်လတူကျာ၊ တ္ၚဲသဝ်ယောန်ယောန် မွဲတန်ညးၜါ၊ ဇူပ္တန်ကာယျ ကာလဂှ်ကၠာ၊ . . .

သ္တိက်ဗတံဗြရတ်ကဵုချေံ ပ္ဍဲဂြိုပ်ဇမၞော်

ပ္ဍဲတံဆုအဵု ချေံကဵုဗညာ၊ ယွံကောချေံရတ် ဂၠါဲကၟတ်လှာ၊ ဂၠါဲစကၟတ် ပထတ်ကာယျဒွါ၊ ဟဇ္ဇနဲကၠာ ကောအာဂၠါဲၚဳ၊ အာရချေံရတ် ကောသၟတ်ပလွဳ၊ ဂၠါဲစချောဲရ ပထတ်ကာယျဇဳ၊ စဖဲတုဲပ္ညဳ ချေံကျာ်သြဳဗၠာဲ၊ ဒၟံင်ဒၞါဲ၀ွံဟေင် တၟေင်ပအာဂၠါဲ၊ ဂေတ်မံင်ဇိုင်လှာ ကြာလစဆာဲ၊ အဏံဗြရတ် ဗောဓိသတ်ဗၠာဲ၊ တ္ၚဲသဝ်စှ်ေဆာဲ ဒလာဲက္ဍိုပ်ဒဵု၊ ဗၠန်ထောံတ္ကံကြေင် ဇက်ဗၠေင်တသဵု၊ ဒရေပ်ကွဳရတ် ချေံအဿတဵု၊ ထဍဟ်လေံသၟေတ် စက်ဂေတ်သဓဵု၊ သိန္ဓဴတဆှ် ပရှ်ဇိုင်အဵု၊ ကၠောံပျးအမ္ဗာ စက်ၜါဗြုကြဵု၊ ထောံလဝ်တ္ကံကြေင် ကလေင်က္ဍိုပ်ဒဵု၊ စက်တ္ၚဲဍာဲဂဵု ဗၠန်ဒဵုသိန္န၊ လျးသၟီစနြ္ဒာ ဍိုန်အာသ္ၚိတ်ဇြ၊ ဂဍာ်ပဝ်စဴ ကွဴသီုကဝှ၊ မှတ်ဒၞါဲဓနီ ဟွံတီနန္တ၊ ဒိုင်ပံက်ပဝ်ဂၠေါဲ မှတ်ခပေါဲဂျ၊ အကၠဟ်အဘဴ စဴတိတ်သ္ၚိဇြ၊ လနေင်ထောံဇွောံ ကမံထောံက၊ ပဝ်ပ္ၚောံဟေင် ဇရေင်ရုက္ခ၊ တေဝ်တောတ်ဇိုင်ကွိုင် သ္တိက်ဇိုင်ပ္တဴသ္ဒ၊ ဇင်မှံင်သမုင် ကၠုင်သီုမသ၊ ပဝ်ပ္ၚောံဂၠေါဲ ဒက်ခပေါဲသၠ၊ ဒမြီုရုက္ခ ဍုန်ဂြကြဵုဇာ၊ အလိင်ကလင် ဇိုင်သြင်အောပ်မာ၊ ပ္ဍဲရာပ်ပ္ဍဲဗိုင် ဂၠိုင်ကဵုပြဝါ၊ သေက်ဇဵုကြံကြ ၜါဆမတာ၊ ကရေဲရမျှာင် ကဵုပါင်ဟောဒြာ၊ ပ္ဍဲဗိုင်ကြဵုဇာ ကြာတၞံကလိ၊ လျးတ္ၚဲလေဝ်အိုတ် ပၠိုတ်ဒတုံတိ၊ မင်ဂၠန်တလုဲ လဗုဲလှိင်ထိ၊ လပေါဝ်ခဍောပ် သၠဂြောပ်ပသ္ၚိ၊ ဓိတာန်ကလိ သြိုင်သ္ၚိဇိုင်လှာ၊ သီုစုံပြဝါ ဇိုင်လှာနာဒဳ၊ သ္တိက်သၠခဍောပ် ဂြောပ်ပကမှဳ၊ ပ္ကဴပြာင်ဍောင်ညဳ ဟွံကသဳဇကု၊ သြိုဟ်သြေင်သ္တိက်လှိင် ဟွံမိင်ဗရု၊ သြိုင်နန်သမၠုင် ဒုင်ကျာတူဆု၊ လှိင်ထာန်လ္ၚု တူဆုတိုန်ဇူ၊ တလုဲမိန်ကောန် ဒကုဲပၠန်တဆူ၊ ကောန်ကောံဒၟံင်ရေင် သၠဟေင်ဂြောပ်ဖူ၊ မိယာန်ထဝ်အူ တူကၞတ်ဆု၊ ကရင်နွံယၟု ဒက်မြုဇိုင်ဂၠံင်၊ ထကုဲဇိုင်သြင် သၠဂြောပ်အင်မံင်၊ လံဂွခမှက် လီၜက်လှိင်ခြံင်၊ တက်ဆောပ္ဍဲလှာ ပတ်ဒၟသ္ကာမံင်၊ တက်ဆောပ္ဍဲဂၠံင် ဒၟံင်တဴဟွံခြာ၊ စာင်တိုန်ဓနီ ဂြဴပတီအခါ၊ မြာ်ဍုန်တူဆု နန်မြုဟေမာ၊ သှ်ဒက်ဂၠိုက်ဂၠါဲ ပြယျာဲဂါထာ၊ ကလော်ကဵုပါင် ရမျှာင်ဟောဒြာ၊ ရဲဂြိုပ်ဂၠါဲဇြောတ် ဇိုင်မနုဿာ၊ တလကွာန်ပံက် ခြပ်လွံက်စှ်ၜါ၊ ကောံလုပ်ဂြင်ဍာဲ ဂၠါဲဇာပ်ဓုမာ၊ နွံကဵုရှ်သာ ပအဟာဂၞဴ၊ ဍိုက်္ၚှာန်ဝါတး တၟးညံင်သ္ဍဴ၊ ကိုတ်အကာသ ပၠလျးဂဵုတဴ၊ ဒေဝဒရေပ် ပၞာင်ဒြေပ်ညံင်သ္ဍဴ၊ ဒြေပ်ညံင်လလဳ ဖျဳဖျဳဖျဴဖျဴ၊ ဗၞဲက္ဍိုပ်သြဴ ပ္ဍေန်သ္ဍဴစဳပျး၊ ကြေဟ်ဇက်ယာယဳ ပထဝဳပြး၊ တ္ၚဲယးညာတ်ဍာန် ဂၠံင်ထာန်လဗး၊ ဂၠါဲစအဟာ ဇက်အာသၞး၊ ပေင်လုံဍာန်ပြး သဏးဂြိုပ်ယာန်၊ ကၠဗြန်ကၠသၠာ ဂၠါဲအဟာကြာန်၊ ဂၠါဲစအဟာ ၜါမွဲဆောဟာန်၊ ကၠဇၞော်သဓဵု ဗြုကြဵုဒေါဝ်ဍာန်၊ ဗၜဵုလဇ္ဇဳ ဂၠါဲသ္ၚဳဇိုင်ကွာန်၊ ဂၠါဲရပ်စစာင် ဒွါန်တိုန်ကၟဳ၊ . . .

• • • ဂိတုပၠလျး ပျးမတ်ဗစဳ၊ နက်သတ်တွာ်ဂၠေါဲ အမှဲဝိတှဳ၊ ဗိုင်သၟီစန္ဒြာ ဖျာဖျာဖျဳဖျဳ၊ တူဍာန်ဝိတှဳ ဗစဳခဏ၊ တေံရာသဳမိဟ် သၞေဟ်ပထမ၊ ရုပ်ဗၜေံထဝ် ဒြင်စဝ်ဓဂြ၊ တေံရာသဳဗြိုဟ် ဒိုဟ်အကာသ၊ ရုပ်ဂၠဴမူလ ဥဿဘထဝ်၊ တေံပ္ဍဲမေထုန် ရာသဳပ္ဍုန်လဝ်၊ ရုပ်ဗြဴဒမၠိ သီုသန္ဓိဂဝ်၊ တေံပ္ဍဲကြကတ် နက်သတ်နူကဝ်၊ ရုပ်ဂတာံထဝ် ဒေါဝ်သာဂရ၊ တေံရာသဳသိင် ရုပ်သၟီသဳဟ၊ တေတေံမွဲပၠန် ရာသဳကန်ရ၊ ရုပ်ကညာဏ ခၠင်ခဏတဴ၊ တေံရာသဳတူ ရုပ်ကြာဇူပ္ကဴ၊ တေံပ္ဍဲဗိစ္ဆာ ရာသဳဂ္ညိဂၠဴ၊ ပ္တုပ်ရုပ်အယဴ ခၠင်တဴခဏှ်၊ တေံပ္ဍဲဓနု ရာသဳဝွံဂှ်၊ ခၠင်ခဏပ္ဍီု တ္ၚဒြင်သီုလွဟ်၊ တေံပ္ဍဲမကဝ် ကမင်ဂဝ်မြဟ်၊ ဒွါကုံခါဂှ် ဒှ်နုင်ဂရဲ၊ တေံရာသဳမိန် သုဇ္ဇဒိန်တ္ၚဲ၊ ရုပ်ကကြင်ထဝ် ၜိင်သဝဝ်ဂၠေါဲ၊ သီုရုပ်စှ်ၜါ ဇၞော်သန်ၛာသြဲ၊ ပျးတဴမတ်ညး ရးဍုင်ကၠံမွဲ၊ ဇက်တဝဳဂၠေါဲ ရှောဲဒိုဟ်ပလိုတ်၊ . . .

မာတ်တ္ၚဲမဂၠု ဒမၠုဂၠိုင်ဂိုတ်၊ ပၞာန်သၟီဒမၠု သြံက်မြုဗိုင်သ္တိုတ်၊ အကြာဂြိုပ်ဇၞော် ဗော်သတ်အဟိုတ်၊ ပယျာံပန်သြိုတ် အိုတ်ဂွါံတဝဵု၊ သၟန်လျးဂဵု တွဵုဍာန်အမှဲ၊ လောန်ကၠုင်ပိယျာံ တိုင်ဂွါံမွဲတဲ၊ သၟန်လျးဂဵု တဝဵုအမှဲ၊ ဗၜေံကဵုပါင် စာင်လုပ်ခပေါဲ၊ ကောန်စာင်မွဲစွံ ဗက်ၝောံတွာ်ဂၠေါဲ၊ သၞံင်ရိဗလောဲ ကရောဲကဵုဇိုင်၊ သဳဟစဴပၠိုဟ် ဂိုဟ်တၟံထဝ်ဂွိုင်၊ မိကညာသ္တိက် စဵုဇနိက်ကျိုင်၊ သၠဒကေဝ်ဂွိုင် လုပ်ထိုင်ကၞပ်၊ အယဴလုပ်ခြပ် ကၞပ်လဒံသ္ၚဳ၊ တူတလိုဟ်ဗၞာ် ပၠံဇုက်ကျာ်သြဳ၊ ကၠမင်ဂဝ်သ္ဍောန် ယောန်အာဒ္ၚဳဒ္ၚဳ၊ နုင်ဂရဲဗၠေင် ဗြံဒစေင်နှဳ၊ ကကြင်စှ်ေအာ ဂင်ဂတာၜဳ၊ နက်သတ်ကၠံလ္ၚီ ဇက်ဂၠေါဲမြီဖဳ၊ တူကာသဍာန် သဗာန်ဝိတှဳ၊ အရှိုန်တိုန်ပျး အကးယာယဳ၊ နူတက်မွဲကၠာ စိုပ်ၜါဗဟဳ၊ လောန်တက်ၜါစိ တက်ပိအနဳ၊ လောန်တက်ပိပၠန် တက်ပန်ယာယဳ၊ အရှိုန်တိုန်ခၠင် ဗၜင်ဗစဳ၊ တူဍာန်ဝိတှဳ ဗစဳခဏ၊ . . .

သၟီသူရိယ တလကွဳထဝ်၊ သၟဟ်ကဵုက္ဍိုပ်ပၠန် တၟံယုဂ္ဂန္ဓဝ်၊ သီုစရိတ်ပန် သြန်သၠာ်သၠုဲထဝ်၊ ဗလးသံဒဝ် ဇက်စဝ်တိုန်ဟေင်၊ မှတ်ပျးတ္ကံကြေင် ထဍေင်အန္ဓာ၊ ဗၠန်သိန္နေရု ကၠောံဇံမုနာ၊ ထောံကၠေံအမ္ဗာ ဇက်အာတ္ကံကြေင်၊ စာင်ဗြဴဓဗက် ဗရုတက်သၞေင်၊ လိုက်ထောဝ်တေဝ်တောတ် ဂမ်အတ်ရိုဟ်ရေင်၊ ဖဝ်ရဂုတ်လ္ဗာင် စာင်ဍာ်ဂြဴဟေင်၊ ဍုန်ဆုတက်သၞေင် ဖျေင်ကံလတိုင်၊ ကွဴဗြုကြဵုဇာ ဇြုံဇၟာလုပ်သိုင်၊ ဒုတ်ဒူအဟုက် အောပ်ဂၠုက်ပ္ဍဲဗိုင်၊ သတြုဂဍာ် သအဵုသအာ်ပဝ်ကြိုင်၊ တတ္တောဟွံကော် လုပ်ခမှံက်ဂွိုင်၊ ဗော်ကွဴဂမၠိုင် လုပ်ဂွိုင်ဥမင်၊ သၞဂဍာ်အုံ လုပ်ဘုံလကင်၊ အောပ်ဗ္ဒးမံင်ကၞပ် ဂဒပ်မတ်ဂင်၊ ပ္ဍဲရာပ်လကင် ဍုန်ပင်မုက်ကၞပ်၊ ကမၠတ်အင်ဂဒပ် သမြပ်ဂမ်အတ်၊ ဂဍာ်ကွဴကီု ကော်ဟီုကောန်ဍောတ်၊ အက်အဴအက်အဴ ဂၠါဲစတဴသၟတ်၊ ဒၟံင်ကၠာကောန်ဍောတ် ဂွံသတ်ကလေင်၊ ကၠဗြုသဓဵု ခဵုကဵုဂၠဴပြေင်၊ ကၠသၠာကၠဗြန် ကော်ကောန်ဇရေင်၊ ကမံဂေတ်ဂါဲ ပဝ်ဂၠါဲကွိက်ဟေင်၊ သတ်တလသၞေင် ပဝ်ရေင်ဂြီုဂြီု၊ ဗရုသၞေင်ကီု ဗီုဟဝ်ကၠိုင်ဗြု၊ ကဝှပဝ်ကြင် မှတ်ဥမင်ဂၠု၊ လတူအမှဲ ပဝ်ဂၠေါဲရုရု၊ လျးခၠင်တသု သၟီသုရိယျ၊ . . .

ဗြရတ်ကုမ္မာ ပညာစဳခၠ၊ ထောံမတ်ညာတ်အာ နူအကာသ၊ နူတ္ၚဲပၠိုတ်ဗိုန် အရှိုန်တိုန်ပၠ၊ ဂွံတီကေတ်ဟေင် လၟေင်နာမ၊ ပ္ဍဲစိုတ်သ္ဇုင်ခၠင် ဗၜင်စိတ္တ၊ တ္ၚဲတိုန်တမး ပျးဇံမုန၊ ဂွံညာတ်ခိုဟ် ဒိုဟ်ကၠင်မူလ၊ ခၠင်စိုပ်လအိတ် ပ္ဍဲဂၠံစိတ္တ၊ ချိုန်ခဏဂှ် ပဒှ်ဒေသ၊ ချေံသိန္ဓဴဟေင် ကလေင်ကဵုမ၊ လုပ်ကၠုင်ကဵုနာဲ စရာဲရုပ္ပ၊ အဟာနာဍူ ပုင်မူစဏ၊ ဂိုင်ပပြဘိုက် ဆကြိုက်တန်ရ၊ သုင်ဍာ်ကြဴတဲ မွဲသက္ခဏ၊ တုဲဒးကာလ ကောန်ရာဇမင်၊ ဟီုကဵုချေံရတ် ဇြဟတ်ပြဲက္ဍင်၊ အာရအာရ က္ညညိကောမင်၊ က္ညရဒေံအဲ မွဲသတ္တပြင်၊ ယးဂတကိုပ် ဂွံစိုပ်နန်ဒြင်၊ ဂါံဍိုက်ချေံပြဲ သြဲတိုန်လၞင်၊ ကလာင်တိုန်အာ တူကာသဝင်၊၊ . . .

ဗြရတ် မဂွံဆဵုညာတ်ကေတ် ရသိမကေင်ဒှ်လဝ်လဲဇွာနူဘဴတမၠာ ပ္ဍဲဂြိုပ်ဟေမဝန်

ဗြရတ်ကုမ္မာ ကောန်ရာဇာဝင်၊ ညံင်မှာလီဗၠာဲ ချေံနာဲတုပ်က္ၜင်၊ ပ္ဍိုက်ဗၞိက်လွဳ ပဳတိအရင်၊ နုဘဴအဒ္ညာ တုပ်သၠယာက္ၜင်၊ ရပ်သၠသၞေဝ်စိုတ် ဟွံဖိုတ်ဘဝင်၊ ထာင်ပ္ကဴပညာ ဗ္ကေတ်ဏာဇၟာပ်ကၠင်၊ ဇက်တဝန်ရှောဲ ပ္ဍဲကာသဂင်၊ ဇက်တဝန်ခိုဟ် ဒိုဟ်မိတ်အရင်၊ တ္ကံတၟံတရင် ဟွံလၞင်ဂၠိန်၊ ညံင်တြဳဇှ်အိန် နာဲသိန္နရာတ်၊ သတြုတမ ဟဂံင်ပဝါတ်၊ ကောန်ဨကရာတ် နာဲပြာသာတ်ထဝ်၊ လျးရတ်ပြီုရုပ် လျးရုပ်ဆက်တ္ၜဝ်၊ ညံင်တ္ၚဲတိုန်သၟုက် က္ဍိုပ်ယုဂ္ဂန္ဓဝ်၊ ချေံကဵုသၟီဓဝ် အံသဝ်လောန်သန်၊ ဒေါဝ်ဟေမဝန် ကလာင်လန်ဂြး၊ မဒါန်အတိက် သၟိက်ပ္ညုင်ထၜး၊ ဒါန်အတိက်သၟတ် ပြာကတ်ဇၟာပ်ညး၊ မိတ်တၞံတမၠာ ကဵုခြာသ္ၚောဲသ္ဍး၊ ကဵုသ္ၚောဲတဝဵု တိကဵုအကး၊ ဂွံဒ္ၚေါဝ်လေင်လး သ္တးလးသာဓာ၊ ယဝ်ဒါန်ဟွံမွဲ ပ္ဍဲဘဴတမၠာ၊ စးကဵုစးဗ္ဒာဲ ဒလာဲလဝ်ကၠာ၊ ဟဂွံလးလေင် ရောင်ဟသေင်ဟာ၊ တဝှ်ကျာ်တြဲ နာဲဇြဲသာခါ၊ ဟီုတွံလဝ်ဟေင် ရောင်ဟသေင်ဟာ၊ နာဲက္ဍိုင်ထာင်သွာ ကောန်ရာဇာဝင်၊ ဍိုက်ချေံပြဲက္ဍင် ဒေါဝ်ဂင်ဟေမန်၊ သ္ၚဳမၠာ်ရံင်အာ ကြာဟေမဝန်၊ နွံဣသိမွဲ သဳလပြဲလောန်၊ အသၟာပိုတ် ဂွံညာတ်အိုတ်ပၠန်၊ ဒ္ၚဳဒျာန်စှ်ေအာ ခါဂှ်မွဲတန်၊ ချေံဂါံဟွံပြဟ် ဂါံတဆှ်အန်၊ ဒ္ၚဳလုပ်စိုပ်ပၠန် ထာန်ပဏ္ဏသာ၊ ***ဗျူပတန်လၟောင် ဒၟံင်ဇိုင်ကၟာ၊ . . .

ချေံအာဂၠါဲစ ဒေသဇိုင်လှာ၊ ဗြရတ်ရာဇ ဒါနတမၠာ၊ ဘဝနူတၞံ ပတံဝါသၞာ၊ ဗြရတ်တုန်စိ ကဵုဣသိကၠာ၊ ညးၜါဂှ်ပြဲ ဒှ်ဒၟံင်လဲဇွာ၊ ညးဗၠာဲအဲဗၠာဲ ကြဴတဲသြာဲအာ၊ နာမဣသိ အဒိကိုပ်ကၠာ၊ မင်ဗၠာဲသောတ နာမတမၠာ၊ တိတ်လန်ဝေင်ဂြိုပ် စိုပ်ဇြဲသာခါ၊ သမၞိင်ၜိုဟ်လောန် ပ္တန်ကာယဒွါ၊ သ္တိက်ဒလာဲပၠန် မွဲတန်လှိင်အာ၊ နွံကလော်မွဲ သစ္စပြဲဖာ၊ ခစဗဳသြဴ တရဴအခါ၊ ဂွံအဝဵုကၠာ ကန္တာကလော်၊ ဂွံပိုင်တံဇြဲ ပ္ဍဲဂှ်မွဲဗော်၊ ယြဴညးမွဲ လုပ်ဇူဇြဲဇၞော်၊ ဒးဒုင်စဏ ယက္ခမွဲဗော်၊ ယဝ်တီဓဝ်ဇၞော် ကလော်ဒေဝ၊ ဒေဝဓဝ်အဵု တွံကဵုဒးရ၊ ဂွံဗၠးဘဲကၠာ ကန္တာယက္ခ၊ ကလော်လုပ်ပြဲ ဇြဲနိဂြောဓ၊ ဂွံညာတ်ကေတ်ပၠန် ကောန်မနုဿ၊ နာဲလုပ်သ္တိက်လှိင် သမၞိင်ရုက္ခ၊ ဒှ်စဏပိုဲ ဟိုဲမနုဿ၊ ဒးဒုင်စဏ ရသၟုဲလေင်၊ ယဝ်နာဲတီရ ဒေဝဓဝ်ဟေင်၊ ပါင်ကျာ်တွံလဝ် ဒေဝဓဝ်တၟေင်၊ ယဝ်မတွံဒး ဂွံဗၠးဗွဲလွေင်၊ မသောတမိင် ဒွိင်တဴပ္ဍီုသြေင်၊ တုဲဟီုကလေင် ဒုင်ဂုန်သေင်ဟာ၊ ယွံသၟီကလော် မဇၞော်အဒ္ညာ၊ တွံဟွံဒးရ ဆနာဲမေတ္တာ၊ အာတ်အခေါင်စိ ကဵုညိမွဲဝါ၊ ဗၞတ်ထပှ်တ္ၚဲ အဲဂၠါဲအစာ၊ ယဝ်ဟွံဂွံရ အဲဒုင်စကၠာ၊ မဖျေံမေတ္တာ မွဲဝါညိနာဲ၊ ယက္ခဂွံမိင် တွိင်ပါင်မင်ဗၠာဲ၊ ကဵုအခေါင်ကၠာ ဗလးဏာဆာဲ၊ . . .

ကာလသၟိက်ဒှ် တဝှ်စလာဲ၊ ဗြရတ်ဝွံဂှ် က္တဵုဒှ်မင်ဗၠာဲ၊ မပဏ္ဍိတ နာမစရာဲ၊ ဂေၚင်တိတ်ကွေံ ဆဵုဒးသဟာဲ၊ ညာတ်မုက်သဟာဲ ဟွံဆာဲဂြိုင်ကအီ၊ မူဒှ်သဟာဲ နာဲဒှ်လၞီ၊ မူဒှ်ဇြသ္ကဟ် တွံညိသ္ဂောံတီ၊ ဟွံဂြိုင်ဟွံကအီ ဂွံတီညိဇွာ၊ မသောတမိင် ဟီုပၟိင်ကၠာ၊ ယွံလေဝ်သဟာဲ အဲဂၠါဲအစာ၊ ဒေဝဓဝ်ပြဲ နွံပ္ဍဲဂါထာ၊ ပဂုန်မွဲဝါ ညိရဇွာလဲ၊ မတီညိဟာ ယွံလေဝ်ဇွာအဲ၊ ယဝ်မတီဂုန် ဂုန်ဓဝ်မပြဲ၊ ပ္ကတ်ကဵုညိလဲ အဲဂွံဗၠးချိုတ်၊ တၞံဇြဲကလော် ဒှ်ဗော်အဟိုတ်၊ အဲလုပ်ဒးသ္ကဲ တံဇြဲဍေံသ္တိုတ်၊ ဍေံရပ်စပြဲ အဲပါန်သီုစိုတ်၊ မွဲသတ္တဟ တလစရိုတ်၊ ဗလးနင်အဲ ဂၠါဲဓဝ်ပြဲသ္တိုတ်၊ ယဝ်ဇွာတီသၟတ် ပ္ကတ်အဲဒဵုအိုတ်၊ အဲဂွံဗၠးချိုတ် ကၠေံစိုတ်ညိဇွာ၊ ပဏ္ဍိတမိင် တွိင်ပါင်ဂှ်မာ၊ အဲပ္ကတ်ကဵုဏာ ဒေဝါဓဝ်ဆာဲ၊ တုဲပကတ်ကဵုပၠန် လက်သန်ပြယျာဲ၊ သီုကဵုပါလိ သီုအဓိပါဲ၊ ဂွံဓဝ်ဂေါဝ်ဆာဲ ပၠန်ဒၞါဲကလော်၊ ယက္ခညာတ်ကီု သၟာန်သီုခဏော်၊ ဂွံဓဝ်ဟာနာဲ သီုပြယျာဲဗော်၊ ဂွံနင်ရအဴ သ္ဍဴသၟီကလော်၊ ယက္ခမိင်အိုတ် မိပ်စိုတ်သော်ရော်၊ ပ္ဍဲဂှ်ကလော် ဗော်သၟီယက္ခာ၊ ဍေံသြိုင်ပၞင် ဂေါဝ်က္ဍင်ပြဲဖာ၊ ဂညိလလဴ ပ္ကဴသြဴနာနာ၊ မင်ဗၠာဲသောတ ပဒှ်သာ်လွာ၊ ဂါံတိုန်ပၞင် ဂေါဝ်ခၠင်ရုပ္ပါ၊ ဒေဝဓဝ်ကၠာ လအာယောသော၊ အဲတွံကဵုစိ ပင်မှိင်ညိကော၊ ဟိရိအြတ္တပ္ပ သမ္ပန္နော၊ သုက္ကဓမ္မာ သမာဟိတော၊ သန္တောသပ္ပေါ ရိသောလောကေ၊ ဒေဝဓမ္မာ တိ၀ုစ္စရေ၊ ယွံကောယက္ခ ဒေဝဓဝ်ပၠေ၊ အဲတွံကဵုလေ သုတေပင်မှိင်၊ ကလော်ဂွံမိင် လဟိင်သောတ၊ ဒေဝဓဝ်ဂှ် ကြဳဇှ်ပြာထာ၊ ကလော်ဇြဲကွေံ စိုတ်ဍေံမေတ္တာ၊ ဖျုန်မနုဿ ဟဂံင်စကၠာ၊ တုဲဗလးဏာ ယက္ခာဂွံဓဝ်၊ တုဲဂွံဗၠးချိုတ် မိပ်စိုတ်မုက်ဂေါဝ်၊ ဂွံဗၠးဂစိုတ် ၜိုတ်ဂွံတိုန်သွဝ်၊ ဟိုတ်ဇွာပြာ်လဝ် ဂွံဓဝ်ဗၠးချိုတ်၊ ညးၜါဂှ်ပြဲ လသာဒဲအိုတ်၊ ဟိုတ်ဝါသနာ တမၠာဂၠိုင်ဂိုတ်၊ ကေင်ဂွံပတုဲလဝ် ဓဝ်သူစရိုတ်၊ မသောတချိုတ် အိုတ်ဇိဝိတာ၊ ဒှ်ဣသိဟေင် လမုဟ်သေင်ဟာ၊ နာဲပဏ္ဍိတ ဘဝတမၠာ၊ ကၠုင်ဒှ်ဗြရတ် သၟတ်ဨကန္တာ၊ . . .

ကၠုင်စိုပ်ဇရေင် ဣသိသေင်ဟာ၊ ကၠာတေံမွဲတဲ ဟိုတ်ဒှ်လဲဇွာ၊ ဣသိညာတ်ပြဟ် က္တဵုဒှ်မေတ္တာ၊ ဘဴလမုဟ်ဟေင် လှာဲလိက်သေင်ဟာ၊ ဣသိဂေၚင် ဂေင်အရှာံဘာ၊ ရပ်ဂွံကမှ် တုဲဂၠါဲတွံအာ၊ ထောံမတ်ရံင်ကၠာ ညာတ်အဿာဂ္ညိ၊ လိက်ကွက်ကံချေံ ညာတ်ဒးတၟေင်စိ၊ လုပ်သှ်ရံင်ပၠန် လိက်နန္ဒာမိ၊ ကဵုပလံင်ဏာ ပုတ္တာယက္ခိ၊ ဗစိုပ်ကောန်ပ္ညဳ ဏင်ကင်ရဳညိ၊ စိုပ်ရဗတံ ပ္ဍဲဂၠံနန်လွိ၊ စဗတံကွေံ ပကဵုသှ်ေညိ၊ စိုပ်ရတၚဲ ကောန်ပ္ဍဲစိုတ်မိ၊ စသီုဇုတ်ကၞာတ် ပကဵုညာတ်ညိ၊ သီုချေံဍေံမွဲ စဖဲကောန်မိ၊ ဒီုဗတံဂှ် ပကဵုဒှ်ညိ၊ ညံင်ကဵုအိုတ်စိ စညိကောန်အဲ၊ သာ်ဝွံဗစန် ဂကန်မိပြဲ၊ စညိကောန်အဲ မွဲပကဵုဗၠး၊ သာ်ဝွံဍေံဂး ပ္ဍဲဂၠးသၠတာ၊ . . .

ရသိဗှ်ကၠာ ပ္ဍဲသၠတာအဴ၊ က္တဵုဒှ်မေတ္တာ ကရုဏာဇဴ၊ လိက်တရေံဂှ် ကၠဟ်ထောံဆဴဆဴ၊ လိက်တမိအဴ ထဴကှ်ေစုတ်ရ၊ သာ်ဝွံလိက်ခုတ် အဲပ္တီပုတ္တ၊ အဲသဳနန္ဒာ မဒုင်နာမ၊ ဒှ်မိနာဲရ နာမအနဳ၊ ပ္တီကောန်ဗြဴအဲ ပ္ဍဲနန်ကျာ်သြဳ၊ ဒုင်ယမုက္ဍင် ဣဏင်ကင်ရဳ၊ ***စိုပ်ကုံပရေင် မိဒးပြေင်ဖျဳ၊ ဍောတ်ဗၠာဲဗြရတ် ကၞတ်ကျာ်သြဳ၊ တၞောဝ်ရာဇာဝင် မိပြင်နင်ပ္ညဳ၊ ကဵုကၠုင်စိုပ်ကောန် ပ္ဍဲနန်ကျာ်သြဳ၊ ဍေံစိုပ်တၚဲ ဗွဲမဍိုန်ဒ္ၚဳ၊ ဝါင်ဒုင်တလုင် အမာတ်ဍုင်ဇဳ၊ မိထပ်နင်တဲ ကောန်ပြဲကျာ်သြဳ၊ ပဗ္ဒေက်ဖျဝ်ညိ မိကၠေံစိုတ်လွဳ၊ ဍေံစိုပ်ဗတံ ပ္ဍဲဂၠံကျာ်သြဳ၊ မိလွဳပရာ မွဲသၞာဒၞဳ၊ မိကၠေံစိုတ်လွဳ ကျာ်သြဳနန်လွိ၊ ကဵုပိုင်နန်ဒြင် ပ္ကင်ရင်ဖဴမိ၊ တြုံနွံဣဓိ မိတုပ်စိုတ်လောန်၊ ပြင်နင်ကဵုကောန် အသဝ်နန်ဗြဴ၊ တိုင်ဂလာန်ယာဲ မိပပါဲဒဴ၊ မိဂိုင်သြဟ်ပ္တဴ တြုံသ္ဍဴဘုမ္မိ၊ တိုင်ဂကန်မိ ဂိုင်လဝ်ညိကောန်၊ သာ်ဝွံလိက်ဒွက် အက္ခရဗျန်၊ ဣသိတုန်ပၠန် ခဏံကၠောန်ကဵု၊ ကွက်စုတ်ကံသၟတ် ချေံရတ်မ္ၚဵု၊ ကွက်စုတ်တုဲအဵု ဣသိက္တဵုစဴ၊ သန်ထာန်ဘာအဴ ပၠန်စဴအာတုန်၊၊

ဗြရတ် စိုပ်အာ ထာန်ဒမံင်ကလော်ဗြဴမိဣဏင်ကင်ရဳ

ကာလသၟိက်ဒှ် တဝှ်သံင်သာ၊ သၟီတာပဿ တလပညာ၊ ကွက်လိက်တုဲပၠန် စဴပန္နသာ၊ ဗြရတ်ကုမ္မာ ပြဟ်ၚုဟ်အာရ၊ လာင်မုက္ခဝါ လၜိုဟ်ကာယျ၊ မြဳသာဲနာဍူ ပုင်မူသဗ္ဗ၊ တုဲကလံကၠာ ပန္နသာရ၊ ဗောဓိသတ္တ တလစရာဲ၊ ကျိုင်ကျဝ်ဂ္ညိဂ္ညာတ် ဨကရာတ်ဗၠာဲ၊ သၞာ်ရတ်ချတ်ဂၞိင် တွိင်ပ္တိုန်စရာဲ၊ ဂါံဍိုက်ချေံပြဲ ဟဇ္ဇနဲဗၠာဲ၊ လိုန်သဗာန်ကျာ မူပမာဗ္ဒာဲ၊ ညံင်ၜိုပ်ၜင်ဗၠာဲ ဆာဲတူကာသ၊ ပဝ်ပ္ၚောံခုတ် စိတ္တကုတ်ရ၊ ညံင်အိန်မာဃ တလသွဝ်ၜါ၊ မဍိုက်ယာန်ကၠာ ဨရာဝဏ္ဏ၊ မတိတ်ဝေင်ထာန် ဥဒျာန်လစ၊ ညံင်သူရိယျ ဍိုပ်ၜိုပ်ဒျအာ၊ ပ္ၚောံဍုင်ကၠာ ဒွါရဝတဳ၊ ကောံမိတ်လဂ္ဂန် ဂွံညန်မွဲဒ္ၚဳ၊ ပမာသာ်ဂှ် တုပ်အိုတ်သၟဟ်ညဳ၊ ဗြရတ်ဍောတ်ဗၠာဲ စရာဲကျာ်သြဳ၊ ဍိုက်ယာန်အဿ သၟီပယာယဳ၊ ပ္ၚောံနန်ဒြင် ဣဏင်ကင်ရဳ၊ ဒေါဝ်ဂြိုပ်ကျာ်သြဳ ဗနဳပုပ္ဖ၊ ဍိုက်ယာန်အဿ သၟီပယာကြာ၊ ကလာင်သာင်ဟာန် လိုန်သဗာန်ကျာ၊ ချေံကဵုဗညာ အာတဴလျလျ၊ ကြာဟေမဝန် ထာန်အရညှ၊ အာတဴလျလျ ကာလဂှ်ပၠန်၊ သၟီရာဇာမန် ညံင်ကောန်ၜိုပ်ၜင်၊ ပရှ်ညံင်ကျာ နဲပါကဟင်၊ ပရှ်လောန်က္ဍင် ဒေါဝ်ဂင်ၜိင်ဒၟံင်၊ တူဂၠံအမှဲ ရံင်ညာတ်နဲသၞံင်၊ ကြာဂၠံမတ်ဗြဲ ပ္ဍဲစးအဿံင်၊ ညာတ်ညံင်ရဴသၞံင် အရံင်ဖျေဲဖျဴ၊ ညာတ်အာစောန်စောန် ပြာသာတ်နန်ပ္ကဴ၊ ဓုပ်ပြကာအဵု လျးဂဵုညံင်သ္ဍဴ၊ ကရိုန်တဏာဲ ဂဵုဍာဲဖျေဲဖျဴ၊ သ္ၚိကၠတ်နန်ဒြင် ဂဵုခၠင်ညံင်သ္ဍဴ၊ ဗတင်ဇာထဝ် ရုပ်သပဝ်နှဴ၊ သပဝ်ဗိုတ်နာ် ဂၠိုင်သာ်တ္ၜတ်သြဴ၊ ညးၜါရံင်ဗဵု ခၠင်လဟဵုတဴ၊ ပြာသာတ်ဒေံဗြဴ ရဴဒမင်ဍာ်၊ ဂေင်တဴပြာသာတ် ဂွံညာတ်ရုပ်ရဴ၊ ပ္ဍဲမုက်ရုင်ပ္ကဴ ယက္ခဗြဴအုံ၊ ပၠဣဓိပၠန် ရပ်ဒန်တဲသ္တုံ၊ ယက္ခဟောကၠံင် ဒတဴဒၟံင်အုံ၊ ကဵုပါင်ဟဟ ပၠရမျှာင်ကောံ၊ ထောံဇိုင်တဲစုံ သီုသ္တုံသီုဇွိ၊ တၚက်ေၚက်ဂွု ကိုဟ်တသုစိ၊ သလာ်ရံင်လ္ၚာ် တက်ဍာ်ယူတိ၊ ကလော်ဒိတှိ ပၠဣဓိလောန်၊ ဂွံညာတ်တဴကၠာ သီုညးၜါပၠန်၊ ချေံဟီုဂၠိုက်ဂၠါဲ ကဵုနာဲသာဇန်၊ လိက်ပ္ဍဲကံချေံ ထောံကဵုဍေံပၠန်၊ ဍေံဂွံညာတ်ကၠာ အက္ခရာဗျန်၊ ဂွံတီသ္ဇိုင်သာ တူကျာပိုဲတန်၊ ဂွံမိင်ရမျှာင် ပါင်ချေံပြဲလောန်၊ ဗြရတ်ထောံပၠန် လိက်ဇမန်ဗၠဲ၊ ယက္ခဂွံညာတ် ပါတ်တိုန်စိုတ်ပ္ဍဲ၊ ပံက်ညာတ်လိက်ကၠာ အက္ခရာနဲ၊ ဇၟန်ညဳသတပ် ပၠောပ်ဏာအပ္ဍဲ၊ ပင်ခၠံယဵုတဲ ပ္ဍဲကောန်ကျာ်သြဳ၊ ဣဏင်ကင်ရဳ ကျာ်သြဳနန်မြ၊ ဂွံမိင်လိက်ရ ယက္ခဒေဝဳ၊ တီပ္ဍဲလိက်ကိုပ် မိတ်အဲစိုပ်ပ္ညဳ၊ တွာ်တိတ်မုက်ရုင် တိတ်ဒုင်သဳကၠဳ၊ ယက္ခဒေဝဳ ကျာ်သြဳဗြဴရတ်၊ မိင်လိက်တုဲကၠာ သ္ၚဳအာမုက်မတ်၊ တုဲကော်ဗိန္ဒော ဟောရာကိုန်ဗတ်၊ ဟောရာကၠုင်စိုပ် ဖျေံက္ဍိုပ်ပဝတ်၊ ယွံနာဲနန်သ္ဍဴ ပိုင်တဴနန်ကၠတ်၊ မူပမိက်စိ ဟီုညိဗ္တာင်ၜတ်၊ ဂွံတီဗွဲစၟတ် အဇ္ၛတ်ညိနာဲ၊ . . .

ဏင်ကင်ရဳမိင် ဟီုပမိင်ဆာဲ၊ ယွံလေဝ်အစာ ဟောရာစရာဲ၊ လိက်မိအဲပ္ညုင် ကဵုကၠုင်ဆက်ကွာဲ၊ လိက်တွဵုတဲယာဲ လိက်နာဲဗှ်ရံင်၊ စုတ်တဲဍောတ်ဗၠာဲ ယာဲကဵုပလံင်၊ ယမုဗြရတ် ပြာကတ်ဒါန်ကြံင်၊ ထပ်တဲပ္ဍဲလိက် အဲသၟိက်ကဵုရံင်၊ ဂွံတီညိကွေံ ကော်ဖျေံဒမံင်၊ က္ညဗိန္ဒောရံင် ညံင်ဗၠးသင်ကာ၊ ဟောရာမိင်ဗက် ဖန်စက်ဇာတာ၊ ပိပန်ဒစာံ သက်ဖဍာံကာ၊ လိက်ဝွံအဒိ လှာဲတမိကၠာ၊ ခယျဝိဒ္ဒဳ ပ္ညဳယၟုအစာ၊ တုဲသ္ၚဳပၠန်မွဲ ပ္ဍဲစက်ဇာတာ၊ တန်အယုက်ဆံင် ဂြိုဟ်ပံင်ဟုဲဏာ၊ ပၟဝ်တရဴ ကြဴစစှ်ၜါ၊ ကိုန်ဇိုက်ဟွံတိတ် လအိတ်ဇာတာ၊ ပ္ဍဲမိဟ်သောရာ ပ္ဍဲဗြိုဟ်ရာဟု၊ ကြကတ်အၚာ သိုက်ကြာကန်စု၊ အဒိုတ်တူဝွံ စန်မြုဗိစ္ဆာ၊ ဂုရုမကဝ် ကုံလဝ်ဗုဒ္ဓါ၊ ဝွံသ္ၚိကၞေပ်ရ ဒစာံပြကာ၊ ဂြိုဟ်ဒစာံတုဲ ဒးကၞုဲရာဇာ၊ ကၞုဲအနုမာန် နွံညာန်သ္ကေက်သ္ကာ၊ ရသိဆက်ကွာဲ ပသရာဲကၠာ၊ ကြဴဝွံကၞုဲဝါ ဂွံဏာကောန်စိုတ်၊ ခိုင်ကဵုဇာတာ တိတ်နူကာဗိုတ်၊ လိက်ဝွံလှာဲအဴ ဘာ်တရဴအိုတ်၊ လိက်တၞံဟသေင် ဒးဟေင်ဂၞဲရိုတ်၊ ကာကာပ်မြိတ္တျု အမှုဂစိုတ်၊ လိက်ဝွံလှာဲအိုတ် ပ္ဍဲစိုတ်ဍိက်အဴ၊ လိက်ဝွံဟသေင် တၟေင်ရောင်နာဲဗြဴ၊ ပိုတ်ဗျန်ဟွံဆာဲ လွာ်ဘာ်တရဴ၊ ထာန်ဇိုင်လှာအဴ နာဲဗြဴယွံမိ၊ ညးလှာဲတုဲရ ဗြဴတလတိ၊ ဟွံစှ်ေပိုတ်ဗျန် ချူကၠောန်တမိ၊ ပပ္တေဟ်ညိယာဲ စရာဲနန်လွိ၊ လိက်လှာဲတမိ ယုတ္တိဟွံဝေင်၊ . . .

ဏင်ကင်ရဳမိင် သွိင်မုက်ကလေင်၊ မိဟီုတ္ၜေဟ်ကၠာ ဟောရာဂှ်ဟေင်၊ ဟာဲအဒိတှိ ဗှ်ေညိဟွံသေင်၊ ဗှ်ေပလီလှေံ ညံင်ပြေံကျာဟေင်၊ ဗှ်ေဗ္ဂေတ်တံင်ဂြဲ နဲညးဍိုက်ပြေင်၊ ဗှ်ေတံင်ကလေင် တုပ်ညံင်ပြေင်ဂၠဴ၊ ဟာဲအမုက်ဗၠး အဲဂဗးတဴ၊ ဟာဲအမုက်ဗာ် သ္ၚိဍာ်ပသြဴ၊ အဲဒလုက်ပၠန် ဇပန်ဍေံက္တဴ၊ အာကၠေံအဂၠဴ လထဴလုတ်ဝတ်၊ မံင်လံမဂး ဒးဂွမုက်မတ်၊ အာထောံကဵုပြဟ် ဗြံက်က္ဍဟ်ခလောတ်၊ ဟောရာခညောတ် သၟတ်ပၠန်စဴသ္ၚိ၊ . . .

ဣဏင်ကင်ရဳ ဒေဝဳယက္ခိ၊ တိတ်အာမုက်ရုင် ကၠုင်ဗိုင်သ္တုံဇွိ၊ ကမၠောန်ဗိုင်ဂၠေါဲ ပ္ဍဲတံဇိုင်မိ၊ သဘာ်တဲၜါ နာဲသာနန်လွိ၊ တုဲသ္ၚေဝ်တိုန်အာ တူအကာသိ၊ ညံင်မှာတလိ မိညာတ်ဒဇပ်၊ အတိက်ပ္တုဲလဝ် ဇတဝ်ဖြပ်ဖြပ်၊ ပ္ဍဲစိုတ်သမြပ် ဖြပ်ပ်ဇတဝ်၊ ရုပ်ညံင်မာဃ အိန်တလသွဝ်၊ ဍိုက်ယာန်ချေံပၠန် တဲသၞာ်သ္ဂန်လဝ်၊ စိုတ်မိဖြပ်ဖြပ် ဇတပ်ဇတဝ်၊ ဇြဟာန်တမိုဟ် ဖျုန်ဂြိုဟ်သ္ဗသအဝ်၊ ယက္ခဗြဴသွဝ် စိုတ်လၟောဝ်အာ၊ ပ္ဍဲဂွိုင်ကြုတ်ဏာ ဗျာပ်အာဇြဟာန်၊ ဘဝင်ပိတန် အဝဇ္ဇန်ထာန်၊ သမ္ပတိစ္ဆိုန် လဴတိုန်ဂစာန်၊ ဍောင်ဓဝ်ဝိညာန် ထုဲကြာန်ဗနှ်၊ သန္တဳဝတှဴ ဇၞော်တဴက္တဵုဒှ်၊ ဇဴတဒါရီု သီုစှ်ထပှ်၊ လညာတ်သ္ဇိုင်ညာတ် ဂွံညာတ်တုဲဂှ်၊ ဇဴသောဗနှ် မူဂှ်ပမာ၊ တမ္ၚာမွဲကၠာ ပ္ဍဲခန်လွာၜဳ၊ သဏန်ဒက်ဗျာင် ပ္ဍဲသၞေင်စာင်ဖဳ၊ ဍိုက်ဂၠုင်ဂၠါဲၚဳ ပလွဳပရာ၊ ဂရော်နာံထံင် ဒၞါဲခဏံင်ကၠာ၊ ကညာတ်သၞေင်စာင် သာင်တိုန်ညှာညှာ၊ ထမက်ကိတ်ပၠန် ဒးသဏန်ကၠာ၊ ကၠာတ်ပၠန်ဟွံတိတ် ၚိတ်ဗိုန်က္ဍင်အာ၊ တုဲဒးမံင်ဘဲ လုပ်တဲညးဖျာ၊ သၞေင်စာင်တုပ်ရုပ် ဂင်တုပ်သံင်သာ၊ သဏန်တုပ်ကီု အရီုတဏှာ၊ ကယျိုင်ဂညိ အပေါတ်ကြိယျာ၊ အကုသဵုဂှ် တွံဂးတမ္ၚာ၊ ဗြဴရတ်ယက္ခာ တုပ်ပမာပၠန်၊ . . .

နူမိညာတ်ဒး ပးရုပ်လဂ္ဂန်၊ ဇာပ်ပ္ဍဲသန္ထာန် ဇြဟာန်တန်တန်၊ လ္ၚာ်ရံင်ပၠန် လတူနန်လွိ၊ မိကော်တိုန်အာ ဖဳဒွါတသိ၊ အဵုသ္ဍိုက်မိ စှ်ေညိမူဒှ်၊ စှ်ေရကောဗၠာဲ နာဲယာန်ချေံပြဟ်၊ ဒေံတိတ်ဝါင်ဒုင် စှ်ေကၠုင်ထဝ်စှ်၊ က္ညစှ်ေကဵုပြဟ် လမုဟ်ညိနာဲ၊ မိကော်ကဴကဴ ရံင်တဴကောဗၠာဲ၊ ညာတ်ရုပ်စိုတ်ချဳ ဏင်ကင်ရဳဆာဲ၊ မတ်ကသဳစိုတ် စိုတ်ဒြေပ်ဂေတ်ဂါဲ၊ စှ်ေရကောဗၠာဲ နာဲဂဍောင်မတ်၊ ဗြရတ်ဂွံမိင် တွိင်ပါင်ဗြဴရတ်၊ ဟီုပ္တီချေံရော ယွံကောဗ္တာင်ၜတ်၊ ကောရံင်စှ်ေအဴ တေံမိဗြဴရတ်၊ ကော်ဒၟံင်ကောဂၞဴ ဒကဴနန်ကၠတ်၊ စှ်ေရဟာနာဲ ကောဗၠာဲချေံရတ်၊ ချေံဟီုတိုန်သၟတ် ယွံဒေံဍောတ်အဲ၊ ကောဒျာန်စှ်ေရ မတ်ပလၜဲ၊ ဒျာန်စှ်ေလျလျ ဒေသနန်ဗၠဲ၊ ဗ္ဒက်သိုန်ပိဝါ တူကျာအမှဲ၊ ဂေတ်ဍုင်မိအဵု ဗဵုဝေင်နန်ဗၠဲ၊ စိုပ်မုက်ရင်ကၞာတ် အမာတ်ရေင်ဂၠေါဲ၊ ဏင်ကင်ရဳပၠန် တလနန်ဗၠဲ၊ မိဗက်ထၜ တလအဝဲ၊ သဘာ်ဖျေံပြဲ နူချေံမွဲတန်၊ ဗြရတ်ညာတ်စိ ရုပ်မိတြဳဝန်၊ ညးၜါစိုပ်စပ် သ္တပ်သ္တးမွဲပၞောန်၊ ဂဇံမုက်ရုင် ဒုင်စမုက်ပၠန်၊ ချေံရတ်ဒးရး ဗလးမွဲတန်၊ အဟာရဗျန် ဂၠိုင်သန်ပြာကတ်၊ တရိုပ်ဗစ သၟီဗၠာဲဗြရတ်၊ တူနန်ထဝ်သၟတ် ကောံဗြဴတ္ၜတ်သြဴ၊ ဣဏင်ကင်ရဳ ကျာ်သြဳနန်ပ္ကဴ၊ ညးၜါမွဲဖုန် စိန်ဝုန်နှဴရဴ၊ ပ္ဍဲနန်ဇမၠိင် သၟီကဵုဒေံဗြဴ၊ တူနန်ထဝ်ပ္ကဴ ရေင်ကာန်တဴတုန်၊၊

ဗြရတ်ကဵုကလော်ဗြဴမိဣဏင်ကင်ရဳ ရေင်ကာန်တဝ်ဂၠဝ် ပ္ဍဲကဵုနန်ထဝ်

ကြိုက်သၟိက်ကဵုဒှ် ကာလဂှ်အဴ၊ ရေင်ကာန်တုန်ဆန် ၜါမွဲနန်ပ္ကဴ၊ ဇြဟာန်တမိုဟ် ဖျုန်ဂြိုဟ်ဒမြဴ၊ စက်ရံင်သြဳလျး ခၠင်တမးတဴ၊ ဃောပုဏ္ဏမဳ လျးညံင်စဳသ္ဍဴ၊ တွာဲထိုင်ဃာန မိအဂ္ဂဗြဴ၊ ကောကနုဒ ပတ်ဒၟၜါအဴ၊ ပ္ဍဲလစသြိုဟ် ရာင်တမိုဟ်တဴ၊ ဗြရတ်ကုမ္မာ ကာလဂှ်အဴ၊ လပုဟ်တုပ်တဴ ရဴလပှ်ဇၟူ၊ ပ္ဍဲလစသြိုဟ် ရာင်တမိုဟ်အူ၊ တဲလပှ်ဇၟူ လၜက်ပူလဝ်၊ ပ္ဍဲဒင်ပၞးရော လောတ်ပဝူထဝ်၊ ညံင်ရဴပူလဝ် ပ္ဍဲဗြဴသွဝ်ကီု၊ သၟီကဵုမှာယျ ပမာဏဗီု၊ သၟဟ်သၟန်တဴကီု သီုၜါတြုံဗြဴ၊ ဇၟူကဵုစမၠံင် ၜတ်ညံင်ဍောင်ပ္ကဴ၊ မိစမၠံင်ဗြဴ လဟိင်တဴစိုတ်၊ တဲၜါမိန်လဝ် ဗဵုဒ္ၚေါဝ်လျးပၠိုတ်၊ မိတ်တူထဝှါဲ ကၞိင်နာဲကြက်ဗိုတ်၊ သၟီထိုင်ဃာန ဇာပ်ထသီုဖအိုတ်၊ ညးၜါပေင်စိုတ် အိုတ်ပ္ဍဲနန်ထဝ်၊ ကမၠောန်ပေင်က္ဍတ် လွဳလွတ်သၟီဓဝ်၊ ပိုက်ပၞိက်လွိင် ဖလှိင်ဗြဴသွဝ်၊ ကမၠောန်ယက္ခ အဇဂန္ဓဝ်၊ သီုလှ်ေဒယှ်ေ ပလှ်ေမုက်ဂေါဝ်၊ ညံင်ညးကေလှာ ၜါမွဲလ္ၚောဝ်၊ လှ်ေသီုကျာ်သြဳ ဗနဳနန်ထဝ်၊ ဗဗဵုဗြဴသွဝ် စက္ကဝဝ်ဗၠာဲ၊ ဒြဝ်ကျာံသပေါတ် တလောတ်လေၚာဲ၊ ဒြဝ်ဗြုလလောင် ဖံမံင်တလာဲ၊ ခဍေဝ်ကဵုကျာံ ရာဂါံဂၠိုင်ဒၞါဲ၊ သဏောဲကဵုဆေင် ဗပေင်စိုတ်နာဲ၊ ရမျှာင်ဂမ်အတ် စိုတ်လျတ်ဆာဲ၊ ဗာတ်ဗြုဂြိုဟ်လာဲ ညံင်သာဲလလောင်၊ ဒဗိုန်ဒိင်ဒိင် ပိင်မှင်ပေါင်ပေါင်၊ ဗာတ်တလာဗြု ဗရုဏောင်ဏောင်၊ ကမၠောန်လှ်ေဒျာန် ရမျှာင်ၜတ်သောင်၊ ပ္ဍဲဒေါဝ်နန်ဂၠေါင် ညံင်သဘင်ပေါဲ၊ လဟိင်သောတ တလနန်ဗၠဲ၊ မိင်ပေဝ်သဏောဲ ဝေင်ပေါဲသဘင်၊ ပ္ဍဲဒေါဝ်နန်ဒြင် ညံင်သဘင်သွဝ်၊ စသိုင်လဟိင် သၟီကဵုရုပ်ထဝ်၊ ရေင်ကာန်တဝ်ဂၠဝ် မွဲနန်ထဝ်တုန်၊၊

ဗြရတ် ဂွံဆဵုညာတ်ကေတ် ဂဍောင်မတ်နော်မိယာဲ မစုတ်လဝ်ပ္ဍဲရဴတုဲ ဒှ်လၞီစံင်တူဂၠိုင်သောသၞာ

ကြိုက်သၟိက်ကဵုဒှ် တဝှ်စလာဲ၊ တိုင်ဒဒှ်ကီု ပိုဲဒးဟီုဂၠါဲ၊ လၟေင်စလာဲ ပိုဲဂၠါဲတွံနင်၊ ဗြရတ်တုန်စိ ကောံမိနန်ဒြင်၊ ၜါမွဲနန်ဗၠဲ ပ္ဍဲမပ္ကင်ရင်၊ ကောံဗြဴယက္ခဳ ဏင်ကင်ရဳက္ဍင်၊ ပ္ဍဲမဒၟံင်တဴ ဒကဴနန်ဒြင်၊ ဗြရတ်သၟီဗၠာဲ ဂေတ်ဂါဲပ္ဍဲဝင်၊ ဂေၚင်ဝေင်ပၠန် ၀ုတ်ဒိုဟ်ပန်ကၠင်၊ ဂေၚင်အာကိုပ် စိုပ်ပါင်တရင်၊ သၟီဒတဴသၠင် ပ္ဍဲတရင်ဗၠဲ၊ ထောံဏာမတ်ကွေံ ဆဵုဒးရဴမွဲ၊ ဍေံကွက်လဝ်က္ဍင် ပါင်တရင်ပြဲ၊ ဗြရတ်ညာတ်သ္ကဲ ပ္ဍဲစိုတ်သင်ကာ၊ သၟာန်တိုန်အနဳ ဏင်ကင်ရဳကၠာ၊ မူရဴဂှ်မွဲ ပ္ဍဲတရင်ဒွါ၊ ဟီုညိဒေံမ နာဲပမုသာ၊ ရဴစွံလဝ်ကၠာ ပ္ဍဲဒွါတရင်၊ ဟီုကဵုကောညိ ယွံမိပ္ကဴတင်၊ ဏင်ကင်ရဳမိင် မုက်မတ်လှိင်လှင်၊ နာဲယာန်ချေံရတ် ကောသၟတ်ကလင်၊ မတ်ညးထပှ် ဒှ်ရာဇာဝင်၊ မိပပရင် ပြင်နင်ကဵုအဲ၊ တေံဗြဴထပှ် ဒှ်ဒၟံင်ဝဳဝဲ၊ ပြင်နင်ကဵုကျာ ယွံကြုတ်ဏာအဲ၊ ဟိုတ်ဂှ်မိသ္ကဲ စွံပ္ဍဲတရင်၊ မိအံက်ဗြဴက္ဍင် ပြင်နင်ကဵုကျာ၊ ဗြရတ်ဂွံမိင် သွိင်မုက္ခဝါ၊ မုက်မတ်ဇြသ္ကဟ် မိင်ဒှ်ပူဆာ၊ ပ္ဍဲရဴဝွံဟေင် မတ်မိသေင်ဟာ၊ ချပ်တုဲဗြရတ် တြုံကၞတ်သာ၊ ဗြဲမတ်ဒတုံ ဘုံစက္ခုဒွါ၊ ဗှ်သၞာယာဲ လောံလာဲပူဆာ၊ လၞီစံင်တူ ဂၠိုင်သောသၞာ၊ ဗြရတ်ကုမ္မာ ကာလဂှ်သၟတ်၊ . . .

ဏင်ကင်ရဳဆာဲ ညာတ်နာဲဗြရတ်၊ မိသၟာန်တိုန်ရောင် ယွံဂဍောင်မတ်၊ မူဒှ်ကောဗၠာဲ ယွံနာဲဗြရတ်၊ ဍာ်ရမတ်နာဲ ဇွောဝ်ချာဲလယတ်၊ ပေင်ဂၠးသြိုဟ်နာဲ နူဗလာဲမတ်၊ မူဒှ်ပြဟ်သၟတ် ဍောတ်စိုတ်ကဵုမိ၊ ဟသေင်မိပ ပဝဒိတှိ၊ ဟွံရှ်ေသှ်ေသအး အိုတ်ညးသ္တုံဇွိ၊ ဟသေင်မိဟီု လီုစိုတ်ကောမိ၊ ဍိက်သ္ကံဆတ္တဝ် သၠုင်သဝ်ဍေံဗျိ၊ ဒေံဟွံလးလေင် တၟေင်စိုတ်နာဲသ္ၚိ၊ မိကြိုင်ဂၠါဲအာ သမ္ဘာတမိ၊ ဒေပ်ဗၠာဲအဟံ ပၠံစှ်ေပ္ဍဲတိ၊ ကောညာတ်ဒုဟ်မိ နာဲသ္ၚိယာံဟာ၊ ဟသေင်မိကီု ဓရီုစန်စာ၊ မိဟွံပ္တေက်ပုင် ဟွံပ္ဍုင်သွကၠာ၊ ဟသေင်မိဟီု ပလီုက္တောဝ်ၜါ၊ ဟိုတ်ဗညာ ကောယာံဟာနာဲ၊ သၟာန်လေဝ်ဟွံဗြု ဒဒုသြိုဟ်နာဲ၊ ဟသေင်ဥပ္ပါဲ မိစနာဲဟာ၊ ဟီုတ္ၜေဟ်ရာဲသာတ် ကဵုအမာတ်စာ၊ နာဲညာတ်ပဝ စိုတ်မသင်ကာ၊ ဟိုတ်ဂှ်ကြုတ်ဏာ မယာံဟာနာဲ၊ ဟသေင်မိပ ပဝစဏာဲ၊ ဟွံမွဲပ္ဍဲဂၠံ ဗတံကြေဝ်ဂါဲ၊ နာဲညာတ်ခါတ်မှာတ် ဂၞိန်ယာတ်ပြးချာဲ၊ ညာတ်ပတိပတ် ၀တ်ဗြဴသရာဲ၊ ဗြဴဝွံဟွံဆာဲ ဝေင်ကဵုဗၠာဲဘာ၊ ညာတ်သာ်ဂှ်ကၠာ နာဲသင်ကာစိ၊ ဟီုညိနာဲသ္ၚိ စိုတ်မိဟွံတန်၊ ဟီုကဵုညိကော အြနာဲလဂ္ဂန်၊ ဣဏင်ကင်ရဳ ဒ္ၚဳသၟာန်ဒက်ဒေါန်၊ လၞီဂၠိုင်တန် ၀န်စဝ်ဂၠိုင်အြ၊ တဲညံင်လောတ်ထဝ် မိဗန်လဝ်ကော၊ ယက္ခစံင်တူ လတူသြိုဟ်လော၊ ယီုမံင်ဟူဟူ လတူသြိုဟ်နာဲ၊ . . .

တုဲဗြရတ်ဂၠိန် ဗက်မိန်စရာဲ၊ ယွံမိကင်ရဳ ကျာ်သြဳကောဗၠာဲ၊ စိုတ်ပ္ဍဲမိဂှ် ဟွံဒှ်မာရာဲ၊ စိုတ်ဟွံစောန်ကၠိ ပ္ဍဲမိကျေဝ်လာဲ၊ ကောသ္ဍိုက်လအိတ် မိတ်ပရေင်ယာဲ၊ လာံသာစိုတ်နာဲ သၟီဗၠာဲဂၠါံဇွိတ်၊ ပဒဇပ်ညိ မိထဝ်ကလိတ်၊ လမၠံလုပ်မတ် ဍာ်ရမတ်တိတ်၊ နူစက္ခုဒွါ သီုၜါရမိတ်၊ ဒးလမၠံလအိတ် ဇွောဝ်တိတ်ရောင်နာဲ၊ ဏင်ကင်ရဳမိင် ကဵုသၟီကအီတွာဲ၊ မိပ်ပ္ဍဲစရိုတ် စိုတ်မိမြံမြာဲ၊ ကော်ကမၠောန်နာဲ ယာဲထေဲဂမ်အတ်၊ ဟာဲအကြဳဝန် ကမၠောန်ဍောတ်ဍောတ်၊ ဟွံပမၞိဟ်ကွေံ ပလှ်ေမုက်မတ်၊ စတုဲဆဝေင် ဗ္ဂေင်ဍုတ်လျတ်၊ ဗှ်ေဟွံမန လေပ်ဆကြကောတ်၊ စတုဲပလှ်ေ ညံင်ဗီုချေံသၟတ်၊ ဒးကဵုလေံဗတ် ဍောတ်ဍောတ်တံဏံ၊ ရပ်ဂွံလေံဒန် တက်ကမၠောန်တံ၊ ထဍေင်ကမၠောန် ဒေါဝ်နန်ထော်ဏံ၊ ကမၠောန်ဒြေပ်ဂါဲ ဂၞိန်လာဲဂြိုဟ်ချံ၊ ဗက်တက်ကမြဴ ဒြေပ်ဒဴဆံလံ၊ ဂၞိန်လာဲဂြိုဟ်ချံ ဍေံတံဒုင်ဂုန်၊ တလပိုန်ဗြဴ ကြဴယဝ်ဒှ်တုန်၊ လမျီုပိုဲဆာဲ တွာဲနာဲသီုဖျုန်၊ ဖေက်ၜိုင်ဖရံက် ညံင်ပံက်စးကုန်၊ ဒိုအ်တလဂုန် လ္တုန်ဝွံမွဲဝါ၊ ဏင်ကင်ရဳမိင် သွိင်ပါင်ဟီုအာ၊ ဗှ်ေတံတွံၚး ညံင်သအးညဳသာ၊ ကမၠောန်တွံၚး လးသီုသၞာ၊ တွံသီုပြာသာတ် ကြဴကြာတ်နာနာ၊ မိကဵုဗညာ မွဲသၞာထဝ်၊ ဆာန်လီဗတဲ မွဲဖုန်ကၟဝ်၊ ရေင်ကာန်နှဴရဴ တဴပ္ဍဲနန်ထဝ်၊ သၟီဗၠာဲဂိုင်ၜှ် ဍောင်ဒကှ်ကျဝ်၊ ကၞိင်ကဵုဃာန အဇထိုင်ထဝ်၊ ၜါမွဲသဝါန် ရေင်ကာန်တဝ်ဂၠဝ်၊ ဇြဟာန်တမိုဟ် ဖျုန်ဂြိုဟ်ဇတဝ်၊ သၟီကဵုဗြဴသွဝ် တဝ်ဂၠဝ်တဴတုန်၊၊

ဗြရတ် လှေံလှန်မိဣဏင်ကင်ရဳ သၟိက်ဂွံအာဗဵုဝေင်ဂြိုပ်ဥဒျာန်

ဂလာန်ဝွံပၠန် တန်လဝ်ကၠာရ၊ လၟေင်ပုံကီု ဟီုအာဂတ၊ ဗြရတ်ရာဇ ဒေသနန်ဗၠဲ၊ မိကဵုသၟီဓဝ် ဒေါဝ်ကမၠောန်ဂၠေါဲ၊ ဗြရတ်ဂၠိုက်ဂၠါဲ ပြယျာဲနဲကဲ၊ ဗြရတ်စေံဏေံ လှေံလှန်မွဲတဲ၊ ယွံနာဲသၞောဝ်ဒါန် ပၞာန်ဂြိုပ်ဇမ္ၚောဲ၊ ဍုင်ပိုဲဝွံဗျိင် ဂြိုပ်ဂၞိင်တ္ၜန်တ္ၜောဲ၊ ဃောဂွါံဟေမန် မိပ်လောန်မွဲတဲ၊ ပ္ဍဲဂြိုပ်လလောင် ဆာင်မံင်သဏောဲ၊ ဝေင်ဂြိုပ်ထဥ ဗရုညံင်ပေါဲ၊ အခါဝွံပြဲ ဂၠေါဲတိတ်ဥဒျာန်၊ ဏင်ကင်ရဳဗျိင် ဂွံမိင်ဂလာန်၊ မိမိင်တြုံရတ် ရေဝ်ရောတ်ဟီုပါန်၊ ပဒွိင်စရာဲ ယွံနာဲကြက်ဒါန်၊ ဂြိုပ်ပိုဲမိပ်သန် ဒတန်ဥဒျာန်၊ ဃောဍေံဍိုပ်ဍဴ ဍောင်ပ္ကဴရေင်ကာန်၊ ဃောပ္ကဴဃောရာင် ဃောပြာင်ဍောင်ဇဝ်၊ ဃောဂြိုင်ကမြဴ ဃောဂြဴတမ္ညဝ်၊ အခိင်ဍေံကြံင် ဂြဴညံင်မြာ်ထဝ်၊ တ္ၚဲယးဗဵုဒ္ၚေါဝ် ဥဒျာန်ဒေါဝ်ဂြိုပ်၊ ဗြရတ်မိင်ဆာဲ ဟီုတွာဲသော်က္ဍိုပ်၊ ဂၠိုင်ကဵုဗဒိုပ် ညံင်ဂြိုပ်ညးသွဝ်၊ လှေံလှန်ယက္ခာ ကညှာရုပ်ထဝ်၊ ပ္ဍဲဂြိုပ်အသဝ် ဗွဝ်ဥဒျာန်၊ ယးမိင်ကလာင် ရမျှာင်ကြဵုဇာ၊ ညးၜါစင်ခြင် တေင်ဗင်စန်စာ၊ ကော်အမာတ်ပန် ဖန်ဖက်သေဏာ၊ ကဵုစဳရေင်ပၞာန် ယာန်သေဏင်ဂါ၊ စိင်ချေံတဝဳ တိုက်ကွဳမွဲသာ၊ သီုသ္တုံဇွိပၠန် ပၞာန်ပန်ပြကာ၊ ဗၞုဟ်မိင်သ္ဇင်ဝပ် သီုခြပ်မဟာ၊ သေဏာတ်ဒေါန်အံင် သၞာ်ဂဒံင်သ္ကာ၊ ပၞာန်ချေံမွဲသာ သအဳဗ္ဂာရေင်ဗဝ်၊ ကောံမံင်သက်လက် သီုဂဟက်ထဝ်၊ ပၞာန်စိင်သအဳဗဝ် ဇၞော်အံသဝ်လောန်၊ သီုမဒက်လဝ် ဂဟးထဝ်သြန်၊ သအဳဗ္ဂာရေင်တဴ ရဴသၞံင်သၟန်၊ ပၞာန်တိုက်တုပ်တဴ ရဴသၟတ်ဒြုန်၊ သအဳဂၠက်တသုန် ဇိုင်နန်ပုည၊ ဗဵုပၞာန်ယက္ခ အဇပၞာန်မာ၊ စိင်ဖ္ဍိုက်ကၠာ ကောန်ရာဇာဝင်၊ ဇိုင်ပန်လပှ် ဗတမြဟ်ခၠင်၊ ကၟံင်ကတောဝ်ဒြင် လျးရတ်ခၠင်ဂဵု၊ ပၞာန်ပန်ပြကာ သအဳဗ္ဂာတသဵု၊ လုံဗနဳဗဵု ဂၠိုင်ကဵုတေဇ၊ ဗဵုပၞာန်ယက္ခ ကာလဂှ်ကၠာ၊ . . . . .

လတူစးစိင် ကောန်သၟီရာဇာ၊ ကယျိုင်လဝ်ခုတ် သၞာံဂြောပ်စုတ်ကၠာ၊ တုဲဂြောပ်စုတ်ပြဲ ပုံစက်မွဲသာ၊ ဒက်ဇုက်စရိုတ် ဗိုတ်မြသာံဖြာ၊ ကမၠံသၠဇြဲ ကွက်ပ္ဍဲက္တောဝ်ၜါ၊ ပ္ဍဲကၟံင်ဂေါဝ်ဂပ် ဂြောပ်လဝ်ဓဇာ၊ သီုဂတေဝ်ပး လးပြက်စုတ်ဏာ၊ ကမၠံဇာထဝ် ကွက်လဝ်က္တောဝ်ၜါ၊ က္ဍိုင်ဗ္တာင်သြံက် လဇံက်တဵုဏာ၊ သီုပေဝ်သဏောဲ တလောတ်မွဲသာ၊ ဒြဝ်ကျာံလဒု ကၞုသင်ခါ၊ ခပဵုခရာ သီုၜါမွဲရဲ၊ ပိင်မှင်ဒဗိုန် တလိုန်ဗက်ဂၠေါဲ၊ လေၚာဲတဆာံ ဗာတ်သၞာံသဏောဲ၊ ခပဵုဗြုထဲ ဒြင်စိင်မွဲသာ၊ ခပဵုဒြင်ပြေင် ဗြုတရေင်အာ၊ လလောင်ပြာထာ သအဳဗ္ဂာဂၠိုင်ဗော်၊ လလောင်ပြာထော် ဖံဇၞော်ဗြုမှုဲ၊ ထၜးကြာဇဵု ဗြုကြဵုဂဟုဲ၊ ဖံကြေပ်ဇတိုင် မန်ဒိုင်ဖံကၞုဲ၊ ဖံကၠေဝ်ဖံကြုက် မုက်ပန်ဂဟုဲ၊ မိင်ဗရုရောင် သလှောင်စိုတ်တုဲ၊ မံင်ဗြုဂဟုဲ ရမျှာင်မှုဲကၠုင်၊ ပြေင်လဝ်ဒးရး လဗးပေင်ဍုင်၊ ဝုတ်ဝုတ်ဗၠာဲဗၠာဲ တွာ်ဆာဲလ္ဂုင်၊ အမာတ်သေဏာ ဗညာမုက်သၠုင်၊ သေထဳသမ္ၚေဟ် တွာ်ပလှ်ေကၠုင်၊ ပေင်ပ္ဍဲမုက်ရုင် ဒုင်ဨကရာတ်၊ စိင်ဖဍိုက်နာဲ လုပ်ဗ္ဒာဲလဝ်ကၞာတ်၊ ဗဒါဲဟဝ်သၠုင် တွာ်ကၠုင်ဟွံညာတ်၊ ဂွံဍိုက်စိင်လောဲ စိင်ပြဲဂၞကျာ်၊ အမာတ်ပ္တီကၠာ သီုၜါလပါ်၊ ယွံလေဝ်ဂၞကျာ် ဨကရာတ်ဗြဴ၊ စဳရေင်တုဲသွံ က္ညဂွံရအဴ၊ ဂၞကျာ်မိင်ကၞာတ် ပါင်အမာတ်ဒဴ၊ ဂၞကျာ်မပၠေ ဨကရာတ်ဗြဴ၊ ဟီုပ္တီဗြရတ် တြုံကၞတ်ဘဴ၊ ယွံကောသ္ဍိုက်မိ က္ညညိရအဴ၊ . . . . .

ဗြရတ်မိင်ပါင် တွိင်ရမျှာင်ဗြဴ၊ ကြိယာတ္ၜတ်သြဴ တွိင်ဗိုက်တဴဟေင်၊ သၠိုက်ၝောံကိုတ်အဵု သီုကဵုဗြကၞေင်၊ သီုကဵုသၞာ်လွပ် ဒနပ်ထဝ်ဟေင်၊ တုပ်ညံင်အိန်ဗၠာဲ နာဲသမုဲလေင်၊ တူစးစိင်ရတ် ကၞတ်အိန်ခေင်၊ တုဲမိဟီုပြဟ် ကာလဂှ်ဟေင်၊ ကောယိုက်ဏာနာဲ ဗၠာဲသမုဲလေင်၊ ဏင်ကင်ရဳဟေင် ဇရေင်သၟီဗၠာဲ၊ တဲညံင်လောတ်ထဝ် ဟောဝ်မိန်ကေတ်နာဲ၊ ဒကှ်ၜါဍောင် မောဝ်လှောင်အမြာဲ၊ စက်ရံင်သြဳကၠာ ယက္ခာဗြဴဆာဲ၊ သၟီထိုင်ဃာန ဇိုန်ပတမှာဲ၊ သၟီဓဝ်ကဵုနာဲ မှတ်ပြယျာဲဂၞိင်၊ ယိုက်ဏာဂၞကျာ် ဃာနညာတ်ကၞိင်၊ ဃာနသၟီဗၠာဲ ဗ္ဒာဲမုက်ဍိုတ်ဆိင်၊ ကင်ရဳလဟိင် ဗန်ဂၞိင်ကောဇု၊ ကမၠောန်ဗက်ဂၠေါဲ ရှောဲဂြိုပ်လ္ၚု၊ တွာ်စှ်ေုမုက်ရင် ပင်ယဵုတဲဗု၊ ဂိုင်ဖျေံနူဂၞိင် လဟိင်ဒေံဇု၊ ဂါံတိုန်ဟဝ်သၠုင် အမာတ်ဍုင်စု၊ သေဏာသွတ်ဗျု စုသီုသ္တုံဇွိ၊ ပ္ဍဲတမၞက်သၠုင် စးစိင်ဒုင်မိ၊ စးစိင်ကဵုဟဝ် ကဵုတဝ်ဒၟံင်စိ၊ သၟီဗၠာဲဍိုက်ကၠာ စးမှာဟတ္ထိ၊ ကင်ရဳဍိုက်ကံ ဗၠာဲတံတွာ်တိ၊ ကမၠောန်ဗက်ဂၠေါဲ သီုရဲသ္တုံဇွိ၊ အမာတ်ပေင်တိ ဇက်ထိတမ္ညဝ်၊ ဗဵုပၞာန်ဇက်ဂၠေါဲ တဴမွဲသန်တဝ်၊ ဇက်ဂၠေါဲတသဵု ကြဵုဇာဖံထဝ်၊ ဗရုတမ္ညဝ် အံသဝ်ဂၞဴဂင်၊ ပိင်မှင်တလိုန် ဒဗိုန်ဒင်ဒင်၊ လုံအသံဗဵု သဓဵုခမၞင်၊ လလောင်ဂြိုပ်က္ဍင် ဒိင်ဒင်အသံ၊ လေၚာဲတလောတ် ဗြုတောတ်တဆံ၊ ပေဝ်ဒြဝ်လဒု ခဏောဲဗြုကြံ၊ ဖံဗြုဂြိင်ဂြိင် ဂမြိင်ညံင်ကံ၊ လလောင်ဂြိုပ်ဇၞော် ပြာထော်ဂမြံ၊ ဗြုကြဵုအသံ ညံင်ကံဂတး၊ ညးၜါတြုံဗြဴ တဴတူဂဟး၊ ဗဵုဂြိုပ်ဗဵုဂၞိင် သြိတ်စိင်ဒြေပ်ပြး၊ မိကဵုသၟီဗၠာဲ ဗ္ဒာဲစးကဵုစး၊ ကောသၟာန်မိသှ် ဟီုလဖှ်ပျး၊ ဗ္ဒာဲပၞးဆဒး ပၠန်ဂတးသွိင်၊ သၟီထိုင်ဃာန ဇာပ်ပၠလွိင်၊ ဂၞကျာ်ကဵုသၟီ ဇက်လဗိင်အာ၊ . . . . .

ဗြရတ်ကဵုမိဣဏင်ကင်ရဳ အာဝေင်ဂြိုပ်ဥဒျာန်

လတူစးစိင် သၟီကဵုဗညာ၊ ကင်ရဳလဟိင် ဆာန်သၟီက္ဍင်အာ၊ စိင်ဂါံမွဲမွဲ နဲခေသရာ၊ ဂမြိင်သဓဵု ဗြုကြီုကြဵုဇာ၊ လလောင်တမ္ညဝ် ဒေါဝ်ဂြိုပ်ဒေါဝ်ဝါ၊ ပ္ၚောံထာန်အဟံ ဂြိုပ်တၞံတမၠာ၊ ညန်ဆိုက်ဥဒျာန် ပၞာန်ယက္ခာ၊ ရံင်ဆုဍိုပ်ဍဴ ဇဝ်ပ္ကဴပေင်ဗ္ဂာ၊ ပၞဴခတိုက် သတ်ပရိုက်ကၠာ၊ တၞးကဵုတၞး လဗးရေင်ဗ္ဂာ၊ ဗကေတ်စောန်ပြံက် လစံက်မွဲသာ၊ ဍေံဒညံက်ဒညာ် ညံင်တွာ်ကၠုင်အာ၊ လ္ၚဵုကော်မာ ဒေါံကၠာရုပ်ထဝ်၊ လ္ၚဵုဂြိုင်ပလှ်ေ ခအှ်ေသီုဇဝ်၊ လ္ၚဵုဇက်ကံ ပၠံရမျှာင်ကျဝ်၊ လ္ၚဵုဂြဴကြဵု သဓဵုတမ္ညဝ်၊ ဥဒျာန်လလောင် ဂြဴညံင်မြာ်ထဝ်၊ ညံင်ညးဇက်ဒြဝ် တမ္ညဝ်ဂမြိင်၊ လ္ၚဵုဇက်ဂၠိင် တွိင်ကၞာင်တၞး၊ လ္ၚဵုကြဵုကြီု သီုဂြိုင်တဟး၊ ကၞာင်ဂဟုဲဗျာင် တွာဲပါင်ဟးဟး၊ ပၞဴဂြိုင်သဓဵု ညံင်ကဵုထၜး၊ ဂြိုင်ကြီုကဵုညး ဟးဟာဲသဓဵု၊ ပရိုက်ဂြဴလ္တိုင် ပြိုင်ကံလဟဵု၊ ညံင်မြာ်ထဝ်ဂြဴ ၚဴဝှံက်ဗြုကြဵု၊ ကလာင်လဟိင် မိင်ဍေံသေက်ဇဵု၊ လုံဥဒျာန်ဇၞော် ဗြုကော်သဓဵု၊ ဂြဴတိုန်သြေဲသြေဲ ညံင်ရဴဝုတ်အဵု၊ သီုဥဒျာန်မွဲ ကရောဲလက်ကြဵု၊ မိင်ဍေံသေက်ဇဵု ကြဵုဇာမှောင်မှဴ၊ ဗဵုတွာ်ဂတ ပၠဍာန်တရဴ၊ ကမၠောန်ကြဴစိင် ဂမြိင်တွာ်တဴ၊ သၟီၜါတြုံဗြဴ လဇကြဴအိုတ်၊ သၟီဗၠာဲဍိုက်စး ဗၠးဒုဟ်ပေင်စိုတ်၊ မိဍိုက်ကံစိင် လွိင်ကရာင်ဗိုတ်၊ ညံင်အဆေဝ်သွဝ် ဒလဝ်ၝောံကိုတ်၊ စိင်ဂါံတွာ်ဍိုတ် ဗိုတ်ဒြင်လဝိင်၊ ဂါံအာမွဲမွဲ ညံင်နဲတဆိင်၊ လပှ်ဂၠါံလာဲ ဒၞါဲဗိုင်မဂၠိင်၊ ဗော်ဆုသၠသၠိင် လဝိင်ပိ၀ါ၊ ပ္တုံဖျေံကၞာင်ထိ တံဇိုင်မိကၠာ၊ . . . . .

သၟီသၟာန်ယက္ခိ ယွံမိကြုတ်ဏာ၊ မူဆုညးကော် ဇၞော်သန်အဒ္ညာ၊ ၚံက်ၚာ်ဒညံက် ညံင်မကော်ကၠာ၊ ဆူဆုကြုတ်ဏာ တီနာမညိ၊ ဏင်ကင်ရဳမိင် ဟီုပၟိင်စိ၊ ယွံသၟီကောဗၠာဲ နာဲတလသ္ၚိ၊ ဆုမင်ဂလ နာမကောမိ၊ ယဝ်နာဲထောံပ္တုံ စှ်ေပ္ဍဲဘုံတိ၊ ဒှ်ၜဝ်လာံထာ ကြာန်အာထိမြိ၊ အာကၠုင်ဟွံမာန် ထုဲကြာန်ပေင်ထိ၊ ရုက္ခဝွံစိ နွံဣဒ္ဓိက္ဍင်၊ မိဍိုက်ကံစိင် သၟီဍေက်ကေတ်နင်၊ လရိုအ်တိုန်ရော အြကျာ်ဓဝ်သင်၊ သၟီပြိုက်ထိုင်အဵု ပလောံဂဵုခၠင်၊ ဏင်ကင်ရဳမိင် သွိင်မုက်လိင်လှင်၊ ယွံလေဝ်ကောမင် လက်ကၠင်လရိုအ်၊ မူဍေံဒှ်အဵု ဟီုကဵုညိသွံ၊ တဲအဲလုက်ဒး ဟးထဝ်ကလောံ၊ ကောလုတ်ရမိ ညးဂိမံင်သွံ၊ သလှ်ေလုက်ဂွံ ယွံမိကောန်သၟီ၊ ကင်ရဳလက်ဆေတ် ၝိုဲကေတ်ညးဂၞိင်၊ သၟီလုက်ဒးညိ စံက်ဂးဂိသွိင်၊ မိဒေါန်ဂမြိင် ဍိုက်စိင်လဴအာ၊ . . . . .

ဆဵုဆုမွဲပၠန် ရုက္ခကညှာ၊ ကၞာင်ဂဟုဲဒၟံင် ညံင်ပံက်ဝါစာ၊ ညံင်ကော်ဒိုဟ်မိ ဂဟုဲကၞာင်ပိ၀ါ၊ တုဲသၟာန်တိုန်စိ ယွံမိကညှာ၊ တၞံဆုဂှ်မွဲ အဝဲဂေါဝ်ဂါ၊ နာမဍေံဂှ် တွံညိကြုတ်ဏာ၊ ဟီုဗွဲယုတ္တိ မိပမုသာ၊ ဂၞကျာ်ဂွံမိင် သွိင်မုက်တွံအာ၊ ယွံသၟီဗညာ နာဲသာကောမိ၊ နာမညးကော် ဆုဇၞော်ဣဒ္ဓိ၊ ရုက္ခဝွံက္ဍင် ထောံဒှ်ဗင်စိ၊ ဆုမင်ဂလ မူလအဒိ၊ နာမတုန်စိ အဒိညးကော်၊ ဍောတ်ဗၠာဲပလှ် ၜှ်ကေတ်သၠဇၞော်၊ ကြဵုဇာစလာင် ရမျှာင်ပြာထော်၊ မိကလေင်သ္ၚဳ ပၠေဝ်ရမျှာင်ဗော်၊ အြမူဒှ်ကွေံ ဍေံလရိုအ်ကော်၊ အြဗတာင်ဗော် လုက်ဒးစံက်ဂိ၊ တဲဒိဒးသွိင် စိင်အာဗၠးစိ၊ မိဍိုက်ဗလေတ် ကဵုဗၠေတ်တိတ်ိ၊ ကင်ရဳလက်တ္ၜေဟ် ဟာဲဗှ်ေဒိတှိ၊ လုက်ဒးဟွံဂွံ ဒေါံကောပဒိ၊ ဆုညံင်ကဵုဂျိ ဂိဒၟံင်တတ်တတ်၊ . . . . .

မိဗ္ဂေတ်က္ဍိုပ်စိင် ဗ္ဂေတ်ဂၞိင်ဗယောတ်၊ စိင်ဂါံမွဲမွဲ ပ္ဍဲဥဒျာန်ရတ်၊ ဆုနွံတဴကၠေတ် ဒးၜေတ်အာသၟတ်၊ ဆုဂြိုပ်ဂရာင် ရမျှာင်ဂမ်အတ်၊ ဂေတ်ဓဝုဲဒၟံင် ဍာဲညံင်ပၟတ်၊ လွိင်ကၞာင်သၠ ပိ၀ါပဝတ်၊ သၟီဗၠာဲညာတ်သၟတ် သၟာန်မိဍောတ်ဗြဴ၊ သ္ဍိုက်ကောမိ နာဲသ္ၚိၜတ်သြဴ၊ တၞံဆုဂှ်မွဲ အဝဲဍိုပ်ဍဴ၊ ဟီုကဵုကောညိ မိပဝဴပဴ၊ ဟီုညိဒေံဗြဴ ဍိုပ်ဍဴဂေါဝ်သ္ဇုင်၊ ဏင်ကင်ရဳမိင် မုက်လွိင်ကၠုင်၊ ယွံသော်က္ဍိုပ်မိ နွံဣဓိသၠုင်၊ ရုက္ခဝွံရ ပထမပ္ညုင်၊ နာမမူလ သုဝဏ္ဏဒၟုင်၊ မူလကော်ကၠုင် နူဍုင်တန်ရ၊ ဣဓိဇၞော်လောန် ၜှ်ကေတ်ပၠန်သၠ၊ ထောံပ္တုံပ္ဍဲတိ စံညိမွဲရ၊ ဒှ်ဗင်သီုဇြဟ် သၠဂှ်မူလ၊ ဂးသုဝဏ္ဏ နာမဍောင်မ္ၚဵု၊ နွံဆရးဏံ နာဲတံဂွံဆဵု၊ မိဆာန်နာဲလောန် ဟီုပျးပၠန်အဵု၊ ဗြရတ်ဍောင်မၠဵု က္တဵုတုဲၜှ်ကေတ်၊ ဂွံတုဲပြိုက်ထိုင် သၟီဂိုင်ဗလေတ်၊ အြယာဲဂိလောန် ကၞာင်ဗၠန်သၠဂေတ်၊ ဍောတ်ဗြဴသ္ၚဳမံင် ရံင်ဟွံညာတ်ပၠေတ်၊ လရိုအ်သွေတ်တ် ကၞာင်ဂေတ်ဗြုကြဵု၊ မူဍေံဒှ်ရော အြနာဲဍောင်မၠဵု၊ ဗြရတ်မိင်ကီု တုဲဟီုခၠေဝ်ကဵု၊ ယွံလေဝ်နာဲသ္ၚိ တဲဒိဒးအဵု၊ တဲအဲလုက်ဒး ဍေံဗြုသဓဵု၊ သၟီဗၠာဲဟီုအဵု ကဵုဗတာင်ဗော်၊ ကင်ရဳမိင်ကၠာ ဟွံထေဲမာသော်၊ ဟာဲဣၜတ်ၜတ် ခလောတ်ထောံသၞော်၊ ၝိုဲတံၜတ်လောန် ကောန်ဣဂြိုပ်ဇၞော်၊ သၟီလုက်ဒးညိ ဂိလရိုအ်ကော်၊ ဒးကဵုမုဲဇၞော် သၞော်ခလောတ်အိုတ်၊ . . . . .

တုဲဍိုက်အာဗျိင် စိင်မိတွာ်ဍိုတ်၊ စိုပ်ဥဒျာန်မွဲ လှဲလးပေင်စိုတ်၊ တၞံဆုဒှ်ဘုံ သီုစုံပြဲသ္တိုတ်၊ မိပ်သ္ၚိပ်လောန်တဲ ၜိုဟ်သြိုဟ်ပ္ဍဲစိုတ်၊ မိပ်ပ္ဍဲစရိုတ် အဵုဇိုတ်မှောဝ်ဇဴ၊ ညာတ်ဆုၜါသၞူ ဂကူဗၠးတဴ၊ မွဲဍေံဂွုသအး လစံက်လျးသ္ဍဴ၊ လစံက်ညံင်ချး လျးညံင်ပါင်ဂၠဴ၊ ဍေံဂရိုက်ဂရာင် ကဵုပါင်ကမြဴ၊ ကၞာင်ၜါဒညံက် ညံင်ညးကော်ခဴ၊ လရိုအ်ညံင်ကွဴ ကံဂြဴလတိုင်၊ လ္ၚဵုဍေံတအး ဟးဟာဲဍေံဂြိုင်၊ လ္ၚဵုဍေံထအှ်ေ ပလှ်ေကံလတိုင်၊ ဍေံလကဲဆက် ထညက်ကံဂြိုင်၊ လရိုအ်ညံင်က္ၜိုင် ပြိုင်ပါင်လဒု၊ ယမုဍေံအဵု ဟီုညိနာဲဇု၊ ကောမိင်စိုတ်သ္ဍိုက် ခတိုက်သစ္ဆု၊ နာမဍေံဝွံ ကောဇုသၟိက်တီ၊ ဟီုညိကျေဝ်လာဲ ယွံနာဲဂေါဝ်မြီ၊ ဟီုကဵုကောနာဲ ပြယျာဲခပ်သီ၊ ကောဂွံသမ္တီ ဂေါဝ်မြီစရာဲ၊ ဂၞကျာ်ဂွံမိင် ဟီုပၟိင်ကွာဲ၊ ဆုမွဲဒှ်ဂြိုပ် လတိုပ်ဂၠုဆာဲ၊ ဒဵုထပှ်ထပ် ကွပ်ကွပ်ဒၟံင်ဗ္ဒာဲ၊ အာကၠုင်ဟွံမာန် ဂၠံင်ဍာန်မဂၠါဲ၊ ဆုဝွံလေဝ်နာဲ လောန်ကာဲဂုန်တၟေင်၊ ကိတ္တိင်သၟီဆု ယမုဍေံဟေင်၊ ဆုဒယှ်ပၠန် တန်ပ္ဍဲတ္ကံကြေင်၊ ဆုမွဲဂးရ နာမဍေံတၟေင်၊ ဒိပ္ဗစက္ခု ယမုတွံပြေင်၊ မတ်ဂၠုယးဟေင် ကလေင်မွဲတဲ၊ ကၠက်ဗၠးညံင်ဇိုတ် အိုတ်ညးအိုတ်အဲ၊ ဗၠးဂၠိုင်တုဲရ ကၠံလ္ၚီဆပြဲ၊ စက္ခုဒိပ္ဗ ရုက္ခဝွံမွဲ၊ သမ္တီကောအဲ ဆုပြဲနွံဂုန်၊ သၟီဗၠာဲၜှ်ထေတ် ကေတ်ချံထိုင်တုန်၊ ဂွံသီုၜါဗော် ဆုဇၞော်နွံဂုန်၊ ဍေံလရိုအ်ကရေဲ သြေဲသြေဲဗြုန်ဗြုန်၊ ကင်ရဳမိင်တုန် သၟာန်ပ္ဍုန်သၟီဗၠာဲ၊ ယွံလေဝ်ကောအဲ မပြဲစရာဲ၊ မူကောပကီု ဟီုညိကောဗၠာဲ၊ သၟီဓဝ်စရာဲ ဒၞါဲဂှ်ခၠေဝ်ဏာ၊ ကောဗၠာဲဇွိတ်ဝေင် ဗဂေင်တဲၜါ၊ သၟိက်တီမွဲတဲ နဲဂှ်ဝေင်ကၠာ၊ မိလက်ဟီုဆေတ် ကွေတ်ညးဂြိုပ်ဝါ၊ သၟီဗၠာဲကမှ်ေ ဟွံကြိုက်ဗှ်ေဟာ၊ ဨကရာတ်ဗမက် ဂြဲဂြက်သာသာ၊ ဗှ်ေလရိုအ်ကြဵု ညံင်ကၠဵုဒေါဝ်ဖျာ၊ . . . .

ဍိုက်စိင်ဂေတ်အာ ကြာတၞံပရိုက်၊ ပၞဴမံင်ဗျောံ ကောံမွဲခတိုက်၊ သီုဂြဴသီုဂြိုင် ပြိုင်ရင်သ္ကံစိုက်၊ လ္ၚဵုဍေံထအး ဗၠးမံင်အခိုက်၊ လ္ၚဵုဍေံဂြဴ ညံင်ကွဴဂြဴရိုက်၊ ဂြဴညံင်ကဵုစာင် ရမျှာင်စလိုက်၊ နွံသီုဖအိုက် ဒှ်သ္ဍိုက်ယက္ခ၊ တုဲသၟာန်မိကၠာ ကင်ရဳမှာယျ၊ မူသတ်ဍုဟ်စိုက် ဂတိုက်သလှ၊ ဂေါဝ်ဂပ်က္ဍင်သန် ယွံနာဲနန်မြ၊ ဟီုကဵုကောရ ပကနှိက်မ၊ မိသ္ဍိုက်ဗြရတ် ဂဍောင်မတ်ကျ၊ ဒှ်တြုံသ္ဍိုက်ညး မိပျးကဵုရ၊ ဟွံတီဂးဘဴ ဗြဴစနာဲပၠ၊ ဒှ်ဗြဴဟိဏ္ဏ ပ္ဍဲလောကအဵု၊ ချပ်ပ္ဍဲစိုတ်ရောင် ကင်ရဳဍောင်မၠဵု၊ နာဲဒှ်တြုံသ္ၚိ သၟာန်မိသှ်ကဵု၊ နွံနာမကွေံ ယမုဍေံအဵု၊ ပၞဴဍောင်မၠဵု သီုကဵုပရိုက်၊ ဍေံသတ်ဗတိုက် ပရိုက်ဇိုင်ကြုင်၊ ဒှ်လမျီုဇၞော် ကလော်သီုဍုင်၊ ပရိုက်ဂြဴပြိုင် ပၞဴဂြိုင်သၠုင်၊ ပၞဴဂြိုင်သမုင် ဗော်ဍုင်ယက္ခ၊ ပ္ဍဲဍုင်ပိုဲပၠန် ထာန်ဂြိုပ်ရညှ၊ ညးဍုင်ဝွံရ ယက္ခသီုဖအိုတ်၊ ညးဂွံသစ္ဆု ကလော်ဂွံချိုတ်၊ ဒးလီုဇိဝ ဟဒးဍောင်စိုတ်၊ မိဟီုပျးသၟတ် ဗြဴရတ်ကြက်ဗိုတ်၊ ဗဵုကဵုဖဲမတ် ကောကၞတ်စိုတ်၊ မိပျးကဵုဇဳ ဗနဳဂြိုပ်အိုတ်၊ . . . .

ဂၟါ်စိင်ကလေင် သမုဲလေင်ဗိုတ်၊ ညးၜါမွဲစိင် လဗိင်စဴသ္တိုတ်၊ ဟီုအာဂြိုင်အာ ၜါမိကြက်ဗိုတ်၊ ညးၜါမိပ်စိုတ် ၜိုတ်ဂွံလွဳမာန်၊ ညးၜါမွဲစိင် သၟီကဵုသၞောဝ်ဒါန်၊ ကောသၟာန်လဖှ် မိသှ်ဂလာန်၊ လတူစးဇၟူ ပရူဥဒျာန်၊ မိသှ်ကောသၟာန် နဳဒါန်ပြယျာဲ၊ ပၞးကဵုပၞးဗ္ဒာဲ နာဲညးယာန်ဇၟူ၊ တေတ်တဲပလှ် ဒကှ်ရာင်အူ၊ မိတးဖရာဲ နာဲကောန်ဂကူ၊ မိတုပ်စမၠံင် အရံင်ဝိဇူ၊ စမၠံင်ထဝ်အူ ဇၟူတုပ်သၟီဗၠာဲ၊ သၟဟ်န်တူစး ဒလာဲပၞးနာဲ၊ ဂဍုတ်ဗမက် ဂြဲဂြက်ဒလာဲ၊ ကအီဂြိုင်စေံဏေံ လှေံစိုတ်သၟီဗၠာဲ၊ ဒလိန်ဒလာဲ နာဲကဵုမှာယျ၊ ဖံမံင်လဒု ဗရုကြံကြ၊ ပုက်တလုက်မံင် တက်ညံင်ဒေါင်ဗ္ၚ၊ ဂဟုဲသမုင် ဇက်စဴဍုင်ရ၊ စိင်တွာ်ယောန်ယောန် ဗၠန်တိုန်ဂတ၊ ကောကဵုမှာယျ စိုပ်ရမုက်ရုင်၊ ဗ္ဒေံစိင်ဗက် ပ္ဍဲတမၞက်သၠုင်၊ ညးၜါဂါံကၞာတ် ဒေါဝ်အမာတ်ဍုင်၊ ဒေါဝ်သေဏာသအဳ သဳကၠဳဒၟံင်ပ္ညုင်၊ သၟီကဵုဗြဴသွဝ် စိုပ်နန်ထဝ်သၠုင်၊ မိကဵုသၟီဍုင် သ္ဍိုက်သ္ဇုင်တဝ်ဂၠဝ်၊ တူဒေန်မၞိက် ပိုက်ပၞိက်ကၟဝ်၊ ရေင်ကာန်တဝ်ဂၠဝ် မွဲနန်ထဝ်တုန်၊၊ ၊၊

ဗြရတ်ကဵုချေံ ဂြိပ်ဒဴတိတ်အာနူဍုင်ကလော်မိဣဏင်ကင်ရဳ

လၟေင်ဒဒှ် တဝှ်ဒေသ၊ သၟီဗြရတ်အဴ ကောံဗြဴယက္ခ၊ စဴနူဥဒျာန် သန်ထာန်လစ၊ တိုင်ပၟိက်စိုတ် ဂွံအိုတ်တုဲရ၊ သၟီဒက်စၞာဲ ဥပ္ပါဲ၀င်က၊ သၟိက်ဒဴစဴရ နူယက္ခဗြဴ၊ ချပ်ပ္ဍဲစိုတ်ပြဲ ရိုဟ်တ္ၚဲသြဟ်ပ္တဴ၊ ပ္ဍဲစိုတ်ဒမြဴ သၟိက်ဒဴစဴကၠုင်၊ ကလေင်နူဂြိုပ် ဃောမစိုပ်ဍုင်၊ သၟီဒက်စဏာဲ ဥပ္ပါဲသမုင်၊ ယွံနာဲဒေဝဳ မိကျာ်သြဳဍုင်၊ နူဂြိုပ်စဴကၠုင် စိုပ်ဍုင်သဘဴ၊ သုင်စဒြုဒြု ဗျုသီုလထဴ၊ အရက်သိဇာ ဍာ်တာသတ်ဗြဴ၊ သူရာလအိတ် သုင်ပ္တိတ်ဂမ္တဴ၊ အဟာရတုန် ဖျုန်တ္ၜိုင်ဖျုန်ဂၠဴ၊ *ကုက္ကတပၠန် ဖျုန်ကၠိက်ဖုဲနှဴ၊ သုင်ပ္တိတ်ဂမ္တဴ စဴနူဂြိုပ်ဝါ၊ ဣဏင်ကင်ရဳ ဒေဝဳယက္ခာ၊ ဂွံမိင်လဟီု အကြီုသိဇာ၊ ကော်သဏာဲဒဴ စကာတဴကၠာ၊ မၞးတံဂၠါဲနင် ဒြာဲမင်ဂၠဴဝါ၊ ဖျုန်စာင်တုန်ကီု သီုကဵုအဒါ၊ အရက်သိဟေင် စဳရေင်နင်ကၠာ၊ မၞးအာကေတ်နင် သီုပလင်ကာ၊ အရက်တုန်ပ္ညဳ ဓရဳဍာ်တာ၊ အမာတ်သေဏာ အာဂၠါဲနင်ဇဳ၊ စှ်ေကဵုစှ်ေကီု သီုနုင်ဓရဳ၊ စွံလဝ်မုက်ရုင် နုင်ကဵုနုင်ဖဳ၊ ကၠိက်သီုထၜေါံ ဂၠဴတောံပြေင်ဖျဳ၊ စာင်အဒါအြဝ် မြမောဝ်တဝဳ၊ ဗၠာဲတံသက်က် ဆန်အရက်ပ္ညဳ၊ အမာတ်သေဏာ *ညးမွဲၜါဗဳ၊ ညးစှ်အနဳ ဒဳကၠိက်မွဲဟေင်၊ ဖျုန်ဂၠဴသီုပြေင် ကဵုဂွံနင်ဇဳ၊ ပိသၞောဝ်ပြေင်ဖျဳ ညဳသာသၟဟ်သ္တး၊ ပြေင်လဝ်ညဳညပ် ပိထပ်ဆဒး၊ ကမၠောန်တံပၠန် ပိပန်မွဲထး၊ ဍာ်တာသီုဍေင် အရက်ပေင်ဟး၊ ပြေင်လဝ်ဒးရး လးသၞာတမိ၊ ဗြရတ်ကဵုနာဲ အမာဲသ္တုံဇွိ၊ တက်မံင်သမုင် ကၠုင်ကောံပေင်သ္ၚိ၊ ဝုတ်ဗၠာဲတြုံဗြဴ သီုထဴဗျုစိ၊ ကောံမံင်ပေင်တိ ပ္ဍဲသ္ၚိနန်မြု၊ သုင်စဂမြိင် မိင်ဆဗရု၊ ဗြဴအသာဗြဴ သုင်တဴထဥ၊ လ္ၚဵုဗၜူ ဒလူတိတ်ဂၠု၊ ကိတ်ဖျုန်ပြက်ပြက် ၚေက်တၚက်ဗု၊ သီုသုင်သီုသြောတ် မတ်ညံင်ကၞု၊ မတ်ညံင်မတ်ဂၠဴ ဗၜူတဴဂၠု၊ သ္တိက်လှိင်ညံင်ဆု ဇကုဟွံချဳ၊ လ္ၚာဗကပ် သ္တိက်တပ်သဍဳ၊ ကိတ်ေၚက်ကြေတ်ကြေတ် ပၠေတ်ဍေံဂအဳ၊ လ္ၚဵုကံချဳ ဟွံကသဳသက်က်၊ မိကဵုတြုံရတ် မှတ်သုင်အရက်၊ ဗြရတ်စဝ်ပ္ညုင် ဗ္ဒုင်ကဵုဗြဴဘက်၊ ဗ္ဒုင်ကဵုမိပ္ညုင် မိသုင်ဆက်ဆက်၊ မိဗၜူအရက် မတ်ဂၠက်သ္တင်လောတ်၊ သုင်ဗၜူဂၠိုင် ပခိုင်ဟွံမာန်သၟတ်၊ ညးဂမၠိုင်ကီု ယီုမံင်ဂမ်အတ်၊ လ္ၚဵုဂဟီ ဟွံတီမၞိဟ်သၟတ်၊ လ္ၚဵုဂှ်လောတ် မတ်ဒလန်သ္ဒ၊ လောတ်ဗၜူကြံ သီုထအံတ၊ ဗၜူသ္တိက်ခၠေါတ် လောတ်ညံင်ကဵုဇွ၊ .....

ဗြရတ်သၟီဗၠာဲ နာဲချေံအဿ၊ ညာတ်ကလော်ဒ္ဂူ သုင်ဗၜူသ္ဒ၊ ချေံတဆံင်ဇိုင် ပ္ဍဲရိုင်တလ၊ ပကိုင်ဗတ သၠောင်ပၠလတိုင်၊ လလောင်ကမြဴ ဒေါဝ်စးပ္တဴကိုင်၊ ရမျှာင်ဂဟှ်ေ ချေံနာဲနန်ဂွိုင်၊ ကဆံင်ဇိုင်ပြဲ ဂြိင်ဂြိင်ပ္ဍဲရိုင်၊ သလာ်လတိုင် ချေံနာဲက္ဍိုင်ဗၠဲ၊ သၟီလေဝ်စိုတ်က္တဴ ရဴမတ်တံင်ဂြဲ၊ ရဴမတ်ဂွဳစိုက် သီုပရိုက်ပြဲ၊ ပၞဴလေဝ်ကီု သီုသၠဆုသ္ကဲ၊ ယက္ခကၠံမွဲ လှိင်တဴနဲဇွ၊ ညာတ်မိကျာ်သြဳ ဏင်ကင်ရဳပၠ၊ ဗၜူသူရာ သ္တိက်လ္ၚာသ္ဒ၊ ပၠးလဝ်ဇိုင်တဲ နဲအိုတ်ဇိဝ၊ တုဲယောန်တိတ်အာ ကြာပုရိသ၊ တွာ်လုပ်ပ္ဍဲရိုင် ဂိုင်ဂဟက်ဂျ၊ ဗြရတ်သၟာန်ရ ယွံမချေံယာန်၊ အာရကောဗၠာဲ နာဲတလဇျှာန်၊ အာဟာကောအဲ ဟဇ္ဇနဲယာန်၊ ချေံမိင်နာဲသၟာန် ဂလာန်ပြဲဟေင်၊ ယွံညးမပြဲ ရုပ်နဲအိန်ခေင်၊ ပလီုစိုတ်ညိ မိသမုဲလေင်၊ ဒေံပတ္ၜူမာဲ နာဲမှတ်စဳရေင်၊ ပ္ဍဲထာန်ဒေသ ပိုဲရကလေင်၊ ဍုင်ကလော်ဟေင် ကလေင်ရာဇာ၊ ဗြရတ်ဂွံမိင် တွိင်ပါင်အဿာ၊ ချေံဂွံမိင်ကၠာ အာကလေင်ပြဟ်၊ နာဲယောန်လုပ်အာ မုက္ခဝါမြဟ်၊ ညာတ်မိသ္တိက်ဂၠဝ် ဒေါဝ်နန်မိဂှ်၊ သၟိက်လုပ်ဟောဝ်ၜှ် ဍောင်ဒကှ်ရတ်၊ ၜှ်ဖေက်ၚုဟ်အာ ဆေဝ်တာစိုတ်သၟတ်၊ ယဝ်နာဲၚုဟ်အဴ ညာတ်စုတ်ရဴမတ်၊ ဒှ်တြုံစနာဲ ဥပ္ပါဲဒဇောတ်၊ ဂွကဵုစိုတ်သၟတ် ဗြရတ်အလေင်၊ ဇိုင်ဂါံအာဟေင် မတ်ကလေင်သ္ၚဳ၊ တြုံပါရမဳ ဒ္ၚဳဂါံကလေင်၊ တွာ်စှ်ေအာဟေင် ဇရေင်ချေံယာန်၊ သၟီဂါံဍိုက်ယာန် ချေံယာန်နဳလာ၊ ချေံရတ်ကလာင် သာင်သောဝ်တူကျာ၊ တူဂၠံမတ်ဗြဲ ကလာင်သြဲအာ၊ ပိသလာ်အဵု ရမျှာင်ကြဵုဇာ၊ လလောင်ကမြဴ ကလာင်ဒဴအာ၊ သၟီကဵုချေံကၠာ ကလာင်အာတုန်၊၊ ၊၊

မိဣဏင်ကင်ရဳ ဟွံဆဵုညာတ်ကေတ် ဗြရတ် ပ္ဍဲနန်ပြာသာတ်တုဲ ယာံကရေဝ်ကရောတ် ဒှ်လၞီစံင်တူသောသၞာ ယာံထသပါ သြိုဟ်သ္ပာတ်သ္ဗ

လၟေင်ဒဒှ် တဝှ်ဒေသ၊ ဆပုံမဒှ် ပိုဲတွံဂတ၊ လတေံဗြရတ် ကၞတ်တေဇ၊ ဍိုက်ယာန်အဿာ ဒဴအာတုဲရ၊ အဏံတုန်သၟတ် ဗြဴရတ်ယက္ခ၊ ဗၜူဟဲပၠန် ပ္ဍဲဒေါဝ်နန်မြ၊ သူရာဇးရ ယက္ခဗြဴရတ်၊ သူရာဇးညိ မိခြုပ်ခြးမတ်၊ ဘင်ဘင်ယာယာ တွာ်အာမိလောတ်၊ ညာတ်ကမၠောန်တံ လ္ၚဵုကံဝတ်၊ ထအံတိတ်အာ ကြိယျာခလှောတ်၊ ခရံင်ခရဴ ညံင်ရဴဒေါံလောတ်၊ ဗၜူလုတ်ဝတ် မတ်တမာခေါ်၊ မိကော်ပ္ၚုဟ်ပၠန် ကမၠောန်ဍောတ်ဇၞော်၊ က္တဵုရၝိုဲတံ တမံညးအဲ၊ ကမၠောန်ၚုဟ်အိုတ် ဂိုတ်က္တဵုၚံက်ၚံက်၊ ကမၠောန်ဍောတ်ဇၞော် ၚံက်ၚာ်ၚုဟ်အိုတ်၊ ဣဏင်ကင်ရဳ ကျာ်သြဳကြက်ဗိုတ်၊ လုပ်ဂၠါဲပ္ဍဲဒေန် နာဲကဝေန်ဝိုတ်၊ သလှ်ေကြက်ဗိုတ် ဗၜူဝိုတ်အာ၊ မိလုပ်ဂၠါဲပၠန် ပ္ဍဲကၠတ်နန်ကၠာ၊ မိပံက်ဂၠါဲရော သၟီကောဗညာ၊ ဂေတ်ဂၠါဲဂဥုပ် သမ္ၚေဟ်ရုပ္ပါ၊ ပ္ဍဲနန်ဒြေပ်ဂၠေါဲ သြဲကၠုင်သြဲအာ၊ မိဂၠါဲလှိင်လှောင် ဂၠံင်ပါသာဒါ၊ ဗၟံက်ဂၠါဲအိုတ် ပလိုတ်ဂၠါဲအာ၊ ဒြေပ်စှ်ေရိုင်ကွေံ ချေံဟွံမွဲကၠာ၊ မိလီုစိတ္တာ ထသပါသၟတ်၊ ဇတဝ်ဖြပ်ဖြပ် ဒဇပ်တတ်တတ်၊ မိလောတ်သ္ၚဳအာ ၜါဗဟဳသၟတ်၊ ကမၠောန်တံညာတ် တူပြာသာတ်ရတ်၊ ကၠုင်ဗိုင်ပတ်ပေါန် ကၠောန်ၜိုတ်အဆတ်၊ ဍာ်မြမောဝ်ၜိုဟ် လဗိုဟ်ကြကောတ်၊ မိဂွံအမြာဲ နာဲဂဍောင်မတ်၊ သမ္ၚဟ်တိုန်စိ မိဗတာင်ၜတ်၊ မိယာံရေဝ်ရောတ် ဍောတ်ဗြဴခြုပ်ခြး၊ . . .

အဵုသမ္ပာန်ထဝ် ရုပ်ဗဝဝ်လျး၊ လမျီုဇိုန်တွာဲ ကဵုနာဲထဝ်ဂၠး၊ ပလဝ်ပၞာင်တိုင် ဒဝိုင်မိဂး၊ အဵုကောထဝ်ဂၠး သိက်သ္ပဒးရော၊၊ ဟးကောဟးကော ထောံရောဒေံဍောတ်၊ ယွံဂဍောင်မတ် ကၞတ်ဇြဟာန်၊ ပကောဟွံဆာန် ဂစာန်ထောံမိ၊ ထောံလဝ်ဒေံမွဲ ပ္ဍဲဒေါဝ်နန်လွိ၊ သိက်စိုတ်ကောမိ ဒဴထောံဒေံရော၊၊ အဵုသမ္ပာန်ရတ် ကၞတ်အယော၊ နာဲဒဴထောံရော ဟးကောသော်က္ဍိုပ်၊ ကောကၠုင်ထောံလဝ် ပြာသာတ်ဒေါဝ်ဂြိုပ်၊ ကဵုမိဟိင်ဟိုပ် ကြိုပ်သောသၞာ၊ ကဵုမိစံင်တူ ကဵုမိပူဆာ၊ ဗှ်နာဲဒဴအာ လသာလဝ်အဲ၊ ကဵုမိဟိင်ဟိုပ် ဗဒိုပ်နန်ဗၠဲ၊ ကဵုမိဇြေဟ်ဇြာဲ လောံလာဲရိုဟ်တ္ၚဲ၊ ကဵုမိတူယဲ ပ္ဍဲသြိုဟ်သ္ပာတ်သ္ဗ၊ ကဵုမိသ္ၚောံ ကဵုမိဟောံဇြ၊ ကဵုမိစံင်တူ ဂၠိုင်ဗဗောဓ၊ ကဵုမိဇြဟိတ် လအိတ်ဟောံဇြ၊ အိုတ်သ္ကန်ဂုန်မ တ္ၚဲဝွံရရော၊၊ . . .

အဵုကောဗြရတ် ကၞတ်အယော၊ ဟွံဆာန်မိရော ကောယိုက်ဇိုင်ဒဴ၊ ထောံလဝ်မိမွဲ ပ္ဍဲဒေါဝ်နန်ပ္ကဴ၊ စံင်တူဂၠက်သ္ၚဴ သ္ကန်ဇဴရရော၊၊

ဟးလအိတ်ရုပ် တုပ်သြဳစန္ဒော၊ ဍိုက်ယာန်အေဿာ ကောဒဴထောံမိ၊ လၞီတူယဲ ပ္ဍဲဒေါဝ်နန်လွိ၊ ဂုန်သၟီကောမိ သုင်ဂျိရရော၊၊

တလအဝဲ မပြဲတေဇော၊ နိဿင်စံင်တူ တ္ၜူမှာဲလျးပၠိုတ်၊ လၞီတူယဲ စဳလံဟဲအိုတ်၊ ဂုန်ကောကြက်ဗိုတ် သ္ဒးချိုတ်ရရော၊၊

အဵုကျာ်သြဳနန် ညံင်သြဳစန္ဒော၊ ဒဴထောံမိရော ဟးကောသော်က္ဍိုပ်၊ ကောလသာလဝ် ပြာသာတ်ဒေါဝ်ဂြိုပ်၊ ဂုန်ကောသော်က္ဍိုပ် ချိုတ်ကြိုပ်ရရော၊၊

အဵုကောဗြရတ် ထတ်သန်တေဇော၊ ထောံလဝ်မိရော ကလောဟွံမွဲ၊ နိဿင်ဒေံမ ဟောံဇြတူယဲ၊ ဂုန်သၟီကောအဲ သ္ကန်ဒဲရရော၊၊

အဵုကောယွံကော ကောဟးကောသၟီ၊ ဒဴထောံအနိင် ဟးသၟီကောဗၠာဲ၊ မိဒးဇွောဝ်လင် ကဵုမိကၠင်ကၟာဲ၊ ဂုန်သၟီကောဗၠာဲ သ္ကန်သြာဲရသၟီ၊၊

ပန်သၞူမှာဇန် စှ်သဳဒန်သ္တိင်၊ တရဴသၞူဗျိင် ဇိုင်ဂၞိင်ဟေမ၊ ပ္ဍဲတၟံထပှ် သၞူဒှ်မူလ၊ ဗြဲမတ်ဒေံမ ဟွံဟဲရသၟီ၊၊

ပ္ဍဲဂင်ဇၞော်ဂှ် လပှ်ဂြိင်ဂြိင်၊ ကျာဟွံပိုက်လွိင် ဂမြိင်လေပ်ဟဲ၊ ဂမြိင်ဟောံဇြ ဟဒယပ္ဍဲ၊ ဂုန်သၟီကောအဲ သ္ကန်ဒဲရသၟီ၊၊

ဒစာံစှော်လ္ၚီ ကဵုပန်လ္ၚီဗျိင်၊ သိန္နရာတ်သ္တိင် ဇၞော်ဂၠိင်လောန်တဲ၊ ဂှ်ဇမၞော်ဂှ် ပ္တောံဒဒှ်အဲ၊ လၞီတူယဲ သ္တုပ်အဲရောသၟီ၊၊

ဒစာံစှော်လ္ၚီ ကဵုပန်လ္ၚီမံင်သ္တိင်၊ မှာသၟိတ်ဗျိင် ဂမြိင်သ္ဇိုဟ်လှဲ၊ ဂှ်လယိုဟ်ဂှ် ပ္တောံဒဒှ်အဲ၊ စံင်တူသ္ၚိတ်သ္ၚဲ တုပ်အဲရောသၟီ၊၊

မိဣဏင်ကင်ရဳ ဍိုက်ယာန်ကၠိက်ကၞတ်တုဲ သီုဗဵုလဗး ထဍေင်ဗက်ဗြရတ်

ဣဏင်ကင်ရဳ ဒေဝဳယက္ခ၊ ဗြရတ်ဒဴအာ လသာနန်မြ၊ ဒေဝဳယက္ခ ဟောံဇြစံင်တူ၊ သီုမရေဝ်ရောတ် ရမတ်ဒဇူ၊ လၞီဂၠိုင်အြ ဂၠိုင်သောသၞာ၊ သီုမလ္ၚာပ်လ္ၚာ လတူပြာသာတ်၊ လရိုအ်ယာံဂၠါဲ သၟီနာဲမန္ဓာတ်၊ ကောန်ဨကရာတ် မန္ဓာတ်ပန်တ္ကံ၊ လရိုအ်ယာံကော် ပ္ဍဲနန်ထော်ဏံ၊ ဟွံဒးပြဝ ပသာသ္ပံ၊ ကော်အမာတ်ကၠာ ဒဴဗညာတံ၊ အမာတ်တံကီု အိုတ်သီုသကံ၊ ပၞာန်ပန်ပြကာ ပကဵုခြာလံ၊ ပ္ဍဲကဵုတ္ၚဲဏံ ပလံဗက်အာ၊ ကၠိက်ဖဍိုက်အဲ အဝဲဂေါဝ်ဂါ၊ သလုင်ပန်ဟတ် ဒြဟတ်မြက်စာ၊ တၞာဲမွဲရ စဳမြသာံဖြာ၊ စဳရေင်ပၞာန်ကွေံ ပြဟ်ပြေဟ်တုဲအာ၊ ကၠိက်ဗတာင်ကွေံ ဂၞေဟ်ဍေံတိတ်သ္ကာ၊ ဗဵုလကိုဟ်ဂၠေါဲ သီုရဲဇက်အာ၊ ဣဏင်ကင်ရဳ ဒေဝဳယက္ခာ၊ ဍိုက်ယာန်ကၠိက်ကၞတ် မိသၟတ်ရံင်အာ၊ တၞာဲဒလဝ် ဒဝ်မုက္ခဝါ၊ သၟတ်ဗက်ရာဇာ ယက္ခာဗြဴရတ်၊ ဂွကဵုညးဍုင် ဂစိုင်မုက်မတ်၊ မှတ်ဗက်တြုံယာန် မိဗတာင်ၜတ်၊ ဂမြိင်ဂမြံ အသံဂမ်အတ်၊ ညံင်ပဝန်ကံ ဂမြံလယတ်၊ ဗက်ကြာဓိဝါန် ဂၠံင်ဍာန်အိုတ်သၟတ်၊ ကၠိက်ယာန်ဗြဴရတ် ဒြဟတ်ညံင်ပြေင်၊ တွာ်ဟွံဒည သုက္ကရဟေင်၊ ပထမပၠန် ပ္ဍဲနန်ဇရေင်၊ မဍေံလွဳလဝ် ဂေါဝ်ညိဟွံသေင်၊ ဍေံပြဟ်ဇိုင်ဟေင် လောန်နူပြေင်ဂၠဴ၊ ဣဏင်ကင်ရဳ ဒေဝဳနာဲဗြဴ၊ စမှဳရံင်မွဲ တူအမှဲအဴ၊ လတေံဗြရတ် တြုံကၞတ်ဘဴ၊ ကြာဂၠံမတ်ဗြဲ ကလာင်သြဲဒဴ၊ ရံင်ညာတ်စောန်စောန် ဍိုက်ချေဟ်ပၠန်စဴ၊ ဟီုကဵုကၠိက်မိ ဂိုတ်ညိဆဴဆဴ၊ ကၠိက်ဒြေပ်ကမြဴ ညံင်ရဴစက်ကျာ၊ ကၠိက်ဒြေပ်တဆဟ် ပြဟ်ညန်လုပ်အာ၊ မိစမဳညာတ် မန္ဓာတ်ရာဇာ၊ မိညာတ်နာဲသၟတ် သၞာ်ရတ်သ္ကေံဏာ၊ ပရှ်ချေဟ်ယာန် လတူဍာန်ကျာ၊ ပ္ဍဲဂှ်ယက္ခ ရုပ္ပကညာ၊ ကော်ဟီုကဵုဗဵု ဆဵုရရာဇာ၊ လတူအမှဲ မၞးရံင်မွဲကၠာ၊ ဗဵုဂမၠိုင်ညာတ် ခါတ်မာတ်ဗက်အာ၊ ဗက်ညန်လုပ်ကၠာ ရံင်ပ္ဍဲကာသ၊ မိကော်ကဴကဴ ကောဂၞဴယွံမ၊ ပၠန်ကၠုင်ကဵုမိ မွဲဝါညိရ၊ အဵုကောဗြရတ် ကၞတ်ရုပ္ပ၊ ပၠန်မွဲဝါရ ရုပ္ပလဂ္ဂန်၊ ဒဴထောံမိပၠန် လဂ္ဂန်ကောသၟီ၊ မိကော်ကဴကဴ ကောဂၞဴဟွံမိင်၊ ဒဇန်ကောသၟီ ဟွံပမိင်ညိ၊ ဂုန်သၟီကောမိ စုတိရရော၊၊

ချေဟ်ရံင်စှ်ေပ္ညုင် ဗက်ကၠုင်ဂၠေါဲဟော၊ ချေဟ်ဟီုတိုန်ပြဟ် ကာလဂှ်ရော၊ ယွံနာဲဗောဓိ ပ္ဍဲတိပေင်မြော၊ နာဲသ္ၚေဝ်စှ်ေရော ဗက်ဟောရေင်ဂၠု၊ သၟီဂွံညာတ်အိုတ် ပ္ဍဲစိုတ်သမ္ၚု၊ ရပ်ကေတ်သၠဆု ဇကုဒဇပ်၊ သၟီထောံဖျေံရ နတဲသမြပ်၊ ဒှ်ၜဝ်လာံထာ ကြာန်အာထပ်ထပ်၊ ဇလသ္ကေက်သ္ကာ သအဳဗ္ဂာသမြပ်၊ မွဲယောဇနာ လီၜက်အာကြပ်၊ လီၜန်ထပ်ထပ် သီုကွပ်ထုဲကြာန်၊ ဇလကြာန်ထိ လုံဂြိုပ်ဓိ၀ါန်၊ အိုတ်သီုဗဵုပၞာန် ဂစာန်ၚးဟေင်၊ ဗဂုပ်ဗက်စိ မိသမုဲလေင်၊ လောန်အာဂြိုပ်ၜဝ် ဗြဴသွဝ်အလေင်၊ ကၠိက်ဒြေပ်ပြဟ်ပြေဟ် တုပ်နဲချေဟ်ဟေင်၊ ကဵုပါင်ထဥ ဗရုထဍေင်၊ ဗဵုယက္ခကၠံင် ရံင်ပြဟ်ပြေဟ်ဟေင်၊ အသံထဍေင် ညံင်ပြေင်ညံင်စိင်၊ ဗဵုဂမၠိုင်ကၠာ ဒြေပ်အာဂြိင်ဂြိင်၊ သၟဝ်ဂၠံမတ်ဗြဲ ချေဟ်ရဲကောသၟီ၊ ဟဇ္ဇနဲချေဟ် ပလှ်ေမုက်သွိင်၊ ဟွံဖေက်မွဲတဲ ဒြဟတ်နဲစိင်၊ ဗပါ်ကျာမာန် ဂစာန်တိင်တိင်၊ ဗဵုပၞာန်ယက္ခ ဟွံလဇဗျိင်၊ ပ္ဍဲပထဝဳ ဇက်သအဳဂမြိင်၊ ညာတ်ဍိုက်ကၠိက်ဗျိင် ဂမြိင်ကမြဴ၊ ချေဟ်ဟီုတိုန်ပၠန် ဍေံဗက်ညန်အဴ၊ တၞးရုက္ခ ထောံရဆဴဆဴ၊ ထောံဖျေံဒေံဂၞဴ ဍေံဗက်တဴညန်၊ ဗြရတ်ရံင်ပ္ညုင် ဆိုက်ကၠုင်မွဲတန်၊ ဗက်ကၠုင်ရံင်ဂၠု အနုဒိုဟ်ပန်၊ မိဍိုက်ကၠိက်ကၞတ် မှတ်ဗက်တဝန်၊ ဂိုင်ရပ်ရဆု ယမုမွဲတန်၊ သၟီလတိုပ်ပၠန် ခုတ်ပ္တန်ယမု၊ မွဲထောံဒှ်ဗင် စင်ခြင်သာ်ဝု၊ ထောံဖျေဟ်မွဲတန် ကောန်နာဲနန်မြု၊ ဒှ်ဗင်လတိုပ် စိုပ်တိရံင်ဂၠု၊ ဟွံညာတ်ညးအဲ နဲထီုဒမၠု၊ ဗက်ဂၠေါဲသီုစုံ ဒတုံဂြုဂြု၊ ကင်ရဳညာတ်ဂၠု သမ္ၚုပ္ဍဲစိုတ်၊ ဗြရတ်ထောံအဵု ဒှ်ဒဵုဇြဟ်အိုတ်၊ ဇြဟ်လေဝ်သ္ဇိုဟ်က္ဍင် ဒဵုလၞင်သတိုတ်၊ တုဲသၟီမိပ်စိုတ် ချေဟ်ဂိုတ်ကလာင်၊ . . .

အဏံဗြဴရတ် မှတ်ဗက်တြုံယာန်၊ ကၠိက်သီုဒြဟတ် မှတ်ဗက်ဂစာန်၊ ဗဵုပၞာန်ညာတ်ဒဵု စဵုလၞင်ထာန်၊ လ္ၚဵုဒှ်ဗင် လၞင်ဂၠံင်ဍာန်၊ ဒဵုဇၞော်လဂုင် အာကၠုင်ဟွံမာန်၊ ပြးဇးလုံဍာန် သန်ထာန်တရဴ၊ ကမၠောန်တံဟေင် ပၠန်ကလေင်စဴ၊ ကင်ရဳဗြဴရတ် မတ်ညံင်ကောန်ဂၠဴ၊ ရံင်သ္တုံဒှ်တိ ဇွိဟွံမွဲတဴ၊ စိုတ်မိဂြဴဒြဴ ရဴသ္ကန်ကလိ၊ ချိုတ်လဝ်ကဵုချိုတ် ဗတ်အိုတ်ဇိဝိ၊ သၟတ်ဗက်အာကောံ လဂ္ဂန်ပဳတိ၊ ရံင်အာသ္တုံဇွိ ညိဟွံညာတ်မွဲ၊ ဣဏင်ကင်ရဳ ဒေဝဳနန်ဗၠဲ၊ တိုန်ဒဵုစှ်ေဇြဟ် ဗှ်ဇကုမွဲ၊ ဗှ်ကဵုတြုံယာန် ဂစာန်ဒဴသ္ၚောဲ၊ ဍာ်ရမတ်ဂၠေါဲ ညံင်ဗြဲတံသၞာံ၊ ထောံမတ်ရံင်ညာတ် ဟွံညာတ်ကောမာံ၊ ဂုန်နာဲၝောံကိုတ် စိုတ်ပၠာံဟွံလာံ၊ သၟတ်ဗက်တြုံရတ် မတ်ရံင်ဖဍာံ၊ တက်သြိုဟ်ဆာံဆာံ မိယာံရေဝ်ရောတ်၊ အဵုကောဗြရတ် ကၞတ်စရာဲ၊ ကောဟးကောဗၠာဲ နာဲကလေင်ညိ၊ ပၠန်ကၠုင်ကဵုမိ ညိနာဲဍောင်မၠဵု၊ မိဒြေပ်ဂစာန် စှ်ေဇြဟ်ဒွါန်ဒဵု၊ စမဳရံင်အာ တူကျာမိဆဵု၊ ဍိုက်ယာန်ချေဟ်ရတ် ဟဇ္ဇနဲအဵု၊ မိရံင်ညာတ်အာ တူကျာသဓဵု၊ ဍိုက်ယာန်ကၠိက်အဵု သဓဵုဂမ်အတ်၊ ကော်ကောကဴကဴ ကင်ရဳဗြဴရတ်၊ ရမျှာင်သြောန်သြောန် ကညန်ဗက်သၟတ်၊ ဗြရတ်သၟီဗၠာဲ မိင်နာဲရေဝ်ရောတ်၊ ရံင်သ္ၚဳစှ်ေကၠုင် မုက်သ္ဇုင်လကတ်၊ ရံင်ညာတ်စှ်ေသၟတ် ဍိုက်ကၠိက်ကၞတ်ဗၠာဲ၊ ဆိုက်ညန်မွဲတန် လဂ္ဂန်စရာဲ၊ ဗဵုလဗးပြး ဒးဇြဟ်ဒဵုလာဲ၊ ခါဂှ်သၟီဗၠာဲ နာဲဂိုင်သၠဆု၊ ထောံပ္တုံဒၞါဲ၀ွံ သၠဆုဂှ်စိ၊ ယဝ်ဒွံတိကၠာ ဒှ်အာဂင်ဂျိ၊ သလဲဍေံပၠန် ပိပန်ဂါစိ၊ ဍာ်သ္ဇုင်တဴပၠန် ကၠေင်ကၠန်အဒိ၊ ချေဟ်နာဲဗြရတ် မှတ်စှ်ေလိုန်တိ၊ ဗျူပတန်လၟောင် ဍောင်ဟဲအာညိ၊ ရုက္ခမူဏိ ဗောဓိဇြဲသုံ၊ ဇရေင်နာဒဳ သြင်ၜဳအလုံ၊ ချေဟ်ကဵုနာဲပၠန် ဂွံတန်ဒၟံင်အုံ၊ သၟဝ်တၞံဇြဲသုံ ဒၟံင်စုံသီုၜါ၊ ပ္တန်ကာယဒွါ ထာဏဂှ်တုန်၊၊ ၊၊

မိဣဏင်ကင်ရဳ လရိုအ်ယာံကရေဝ်ကရောတ်တဴကဵုဗြရတ် ပ္ဍဲဇိုင်သြင်ၜဳ

အဏံသၟီဗၠာဲ နာဲယာန်အဿ၊ သၟဝ်တၞံဇြဲထဝ် ပ္တန်လဝ်ကာယျ၊ သြင်ဂင်ဂျိရ ကာလဂှ်ကၠာ၊ ဣဏင်ကင်ရဳ ဒေဝဳယက္ခာ၊ ဇၞတ်မဗက်အာ ပူဆာကင်ဇတ်၊ ထောံဒဵုဆဵုဗင် ကြင်ဗက်ဗြရတ်၊ စိုပ်ဂြိုပ်ဇီုဒွး မိတ်တမးမတ်၊ ထောံမတ်ညာတ်အာ ကြာဂြိုပ်ဗိုန်ဗတ်၊ ထသပါသၟတ် ဗြဲမတ်ပြဟ်ဏှဳ၊ လနီလောန်ဗၞတ် ဗြဴရတ်ဒေဝဳ၊ ညးၜါကၠိက်ကၞတ် *မှတ်စှ်ေဒ္ၚဳဒ္ၚဳ၊ သီုညးၜါကွေံ မှတ်စှ်ေဇိုင်ၜဳ၊ စိုပ်ပ္ဍဲသြင်ဂင် ဇိုင်ပြင်ဗတဳ၊ နာဲဂွံသတိ မိဗြဴယက္ခဳ၊ တဲသ္တုံဂိုင်ၜှ် သၠဆုဂှ်ပ္ညဳ၊ တဲဇွိထောံပ္တုံ ပ္ဍဲဘုံဍာ်ၜဳ၊ သၠဆုလာဲပ္ညဳ *ဒ္ၚဳဒှ်ဗတ်သၟ၊ တဲဂတီုသြိုဟ် ဗြိုဟ်ဟ်ယာံထ၊ စမဳရံင်အာ ညာတ်ကောရာဇ၊ ဂဇံဒၟံင်ဗျောံ သၟဝ်တၞံရုက္ခ၊ ညာတ်ရုပ်အရံင် တုပ်ညံင်ဒေဝ၊ စိတ္တသမြပ် စိုတ်စပ်ပ္ဍဲမ၊ ပၠရမျှာင်ကၠာ သုဘာသိတ၊ ယွံကောရာဇ မကဵုကၠင်ကၟာဲ၊ ကၠောံကၠုင်ညိနာဲ က္ညသှ်ဇျှာဲညိ၊ မူဂှ်မိကီု ဒက်ဒေါန်ဟီုဗျိ၊ မူဂှ်မိပ ပဝဒိတှိ၊ ဟသေင်မိဟီု ပလီုက္တောဝ်ဂျိ၊ ပလန်ကဵုမိ ညိမူဒှ်ရော၊၊

တလအယော ကောကၠုင်ပညး၊ မိသြိုဟ်မွဲဂၠး ခြုပ်ခြးလောတ်လော၊ ဇိုင်ဂင်ဂျိရော ဨကောဝစိ၊ ထောံကၠေံမိသွံ ကောဟွံဗှ်ညိ၊ နိဿင်စံင်တူ တ္ၜူမာဲသုင်ဂျိ၊ နာဲဟွံဂိုဟ်ညိ ကောမိဗြရတ်၊ ဟးအတူလံင် ကောဂဍောင်မတ်၊ ယွံကောဗြရတ် ကၞတ်ဇြဟာန်၊ ဗှ်မိဗက်ကၠုင် ထောံဍုင်ထောံကွာန်၊ ဗဵုလနီမိ ပ္ဍဲဂြိုပ်ဓိ၀ါန်၊ ပ္ဍဲသြင်ဂင်ဂျိ မိမွဲမွဲဟာန်၊ ပဟွံဗှ်ဆာန် ဂစာန်ထောံသၟတ်၊ ကော်မံင်ကဴကဴ ကောဂၞဴဗြရတ်၊ တက်သြိုဟ်ယာံလော ဗှ်ကောသၞောဝ်မတ်၊ ဒဇဳဒဇောတ် ကင်ဇတ်ရရော၊၊

ပ္ဍဲဂှ်ဗြရတ် ကၞတ်အယော၊ မိင်ပါင်မိရော ဂၠိုင်အြကင်ဇတ်၊ မုက်နာဲဇြသ္ကဟ် က္ဍဟ်က္ဍဟ်ဗြဲမတ်၊ ရမျှာင်ကဴကဴ ပါင်မိဗြဴရတ်၊ တုဲကော်ဟီုသၟတ် ကၞတ်ကျာ်သြဳ၊ ယွံထဝ်ဂဥပ် ရုပ်ညံင်ညးစဳ၊ က္ညကလေင်စဴ ရဗြဴကျာ်သြဳ၊ စဴပ္တန်ကာယျ ညိရဒေဝဳ၊ ပ္ဍဲဂတဵုလွိ မိစဴသ္တိက်သ္ၚဳ၊ ပဒှ်လနီ ဒေါံသ္ၚီကၠင်ဟဳ၊ ပ္ဍဲသြင်နာဒဳ ဟုံလွဳရောင်နာဲ၊၊

ဏင်ကင်ရဳမိင် တွိင်ပါင်ကောဗၠာဲ၊ ယွံကောဗြရတ် ကၞတ်စရာဲ၊ ပ္ဍဲစိုတ်ကောသၟတ် နူဍောတ်ကဵုကၟာဲ၊ ဒေံဟွံစဴရ ခန္ဓဇိုန်တွာဲ၊ ကၠောံညိကောဗၠာဲ ဗဵုနာဲမွဲမတ်၊ ဒဒှ်မိဆာန် ဇြဟာန်ကၞတ်၊ က္ညဂဍောင်မတ် ကောကၞတ်စိုတ်၊ ပၠန်ကၠုင်ကဵုမိ ညိရကြက်ဗိုတ်၊ ယွံကၞတ်စိုတ် မိဟဝိုတ်သၟတ်၊ ဟွံဗှ်ကဵုမိ ညိဟာဗြရတ်၊ ဒဒှ်ဂၠိန်နှဴ တဴမွဲနန်ကၠတ်၊ ကေင်ကောဂွံဗ္ဒာဲ မိတွာဲမုက်မတ်၊ ကေင်ဂွံစေံဏေံ စံက်ထေံလီၜတ်၊ သြိုဟ်မိသ္ကဟ်ဇတ် ဒှ်သၟတ်ရရော၊၊

ဟးလအိတ်ရုပ် တုပ်သြဳစန္ဒော၊ မိပ္တေဟ်ပါင်ရော ကောဒေပ်ဥပ္ပါဲ၊ ကဵုမိဇွောဝ်လင် ကဵုမိကၠင်ကၟာဲ၊ ဟွံဗှ်ဂၠိုက်ဂၠါဲ သိက်စိုတ်နာဲရော၊၊

အဵုကောဗြရတ် ကၞတ်တဲအယော၊ မိပ္တေဟ်ပါင်ရော ယွံကောထဝ်စှ်၊ ကၠာတေံဆာန်တဴ ကြဴကၠုင်မဇျှဟ်၊ သိက်ဒဇန်ဒှ် ဟွံချပ်ဗှ်ရော၊၊

ဟးထဝ်ဒကောင် ဍောင်စန္ဒိမော၊ နိဿင်ခြာဆော ကောကဵုသြုန်ဂြာံ၊ ကဵုခြာပှ်လှ် ကဵုဒှ်အဒါံ၊ ကဵုကၟာဲၜက်သၞာံ သြုန်ဂြာံရရော၊၊

ပုဗ္ဗဇာဒိ ဂၠဴဒက္ခိဏော၊ ပလိုတ်အေဿာ စိင်ရောသၟဝ်ကျာ၊ ဍာ်ပါင်သတ်ပန် လေပ်သြာဲခၠန်က္ဍာ၊ ဂၠံစက္ခုဒွါ လေပ်ခၠန်က္ဍာရော၊၊

အနုတတ်ဂင် မက္ဍင်အယော၊ တသီုဂူရော တညင်ဃောဇတ်၊ ဗြဲစက္ခုဒွါ ဂၠံနာဝတတ်၊ အနုတတ်မတ် ရာသ္တီဇတ်ရော၊၊

ပန်သၞူမှာဇန် စှ်သဳဒန္တော၊ ဟေမဝဏ္ဏော တရဴအြသၟတ်၊ ပ္ဍဲတၟံထပှ် သၞူဗြဲဒှ်ဗၞတ်၊ ဗြဲစက္ခုမတ် ရာသ္တီဇတ်ရော၊၊

မွဲမနုေဿ ဆမှာဒေဝေါ၊ ၜါစှော်ဗြဟ္မော ပန်အြအပါဲ၊ ပိစှော်မွဲစွံ ကဵုညးပ္တောံဂၠါဲ၊ ဗဝဝ်လောံလာဲ သ္တုပ်ဍိက်နာဲရော၊၊

ယွံတြုံအသဝ် အံသဝ်ဂၠိုင်စွံ၊ နာဲလသာထောံ စွံလဝ်ပ္ဍဲနန်၊ ကဵုမိဘိင်ဘင် ကဵုမိကၠင်ကၠောန်၊ ကောန်တလနန် ဒဇန်သန်သွံ၊၊

ဗြရတ်ကောမိ ဣဓိဂၠိုင်စွံ၊ အဲကဵုနာဲသွံ ကေင်ဂွံသၟဟ်န်၊ ကေင်ဟီုသှ်ဒက် ဖဴနာဲလဂ္ဂန်၊ ဗှ်ကောဒဇန် စံင်တူသန်သွံ၊၊

တလအဝဲ မပြဲသ္ဇက်ပ္တောံ၊ အဲကဵုကောသွံ ကေင်ဂွံဗဵုဒ္ၚေါဝ်၊ လမုဟ်ကောဂး ဇြဟာန်ဝးပ္ကဝ်၊ ဗှ်ကောသၟီဓဝ် လင်ဇွောဝ်သန်သွံ၊၊

ယွံကောသၟီဓဝ် ရုပ်ထဝ်ကလောံ၊ ကောလသာထောံ စွံလဝ်ဒေံမွဲ၊ ကဵုဒးဇွောဝ်လင် ကဵုကၠင်တူယဲ၊ အဲဂုန်ကောအဲ တူယဲသန်သွံ၊၊

တလက္ဍိုင်စက် အံသဝ်သ္ဇက်ပ္တောံ၊ ကောကၠုင်ဒဴထောံ စွံစိုတ်ဝိသှ်ေ၊ အဲကဵုကောအဲ ဟွံခြာမွဲလှ်ေ၊ ကောအဲဒေပ်လွေဟ် ကွေံကွေံရသွံ၊၊

ကမၠောန်တံဗျိင် ဒၟံင်ဂမြိင်ကၠောံ၊ ဟွံပေင်စိုတ်သွံ နာဲဒဴထောံနန်၊

• ကလင်လဝ်မိ ကဵုမိလွောင်စန်၊ ကောအဲဒဇန် ကွေံကွေံသန်သွံ၊၊

တလချေံရတ် ဂေါဝ်ၜတ်သ္ဇက်ပ္တောံ၊ နာဲဥပ္ပါဲသွံ ပ္ၚောံဥဒျာန်၊ ကောသၟာန်မိသှ် တၞံဆုဂှ်ပ္ကာန်၊ ၀င်္ကဂလာန် ဟွံဆာန်မိသွံ၊၊

ယက္ခဗြဴရတ် ရေဝ်ရောတ်ဂၠိုင်စွံ၊ မိဟီုပျးသွံ ထောံပ္တုံပ္ဍဲတိ၊ လမုဟ်ဝွံဂှ် ကၠုင်ဒှ်ဂင်ဂျိ၊ ဇိ၀ိတိနြ္ဒိ ဟွံဂၠိရသွံ၊၊

အဵုကောဗြရတ် ... သၞောဝ်မတ်ကြုတ်ဏာ ... မိဗက်အာကီု၊ ကောံကောလမျီု ... ဂွံဟီုသှ်ဇျှာဲ ... ဖဴနာဲပဳတိ၊ ဒိုက်သၟဟ်သိုက်သၟဟ် ... ဒှ်မွဲဂကောံ ... ကရောံနာဲသ္ၚိ၊ ဗြရတ်ကောမိ ... ကလေင်ညိကၠာ ... မိဗက်အာကီု၊၊

ယွံဏင်ကင်ရဳ ... ကျာ်သြဳဂေါဝ်ၜတ် ... ကၞတ်စရာဲ၊ ပဗှ်ကောဗၠာဲ ... လောံလာဲဇွောဝ်လင် ... ဇိုင်သြင်ဂင်ဂျိ၊ ပဗှ်ဂၠိုက်ဂၠါဲ ... နာဲကျာ်သြဳဗြဴ ... ပၠန်စဴနန်လွိ၊ ပဗက်ကောမိ ... ထာန်သ္ၚိဒေန်ပ္ကဴ ... ပၠန်စဴညိနာဲ၊၊

အဵုကောဗြရတ် ... ကၞတ်ပဳတိ ... မိဗက်အာကီု၊ ကောံမိတ်လမျီု ... ဂွံဟီုသှ်ဇျှာဲ ... ကောံနာဲကြက်ဒါန်၊ ဟိုတ်ဆာန်ကောစိ ... မိဗက်ကၠုင်သွံ ... ထောံလဝ်နန်ယာန်၊ ကောကြက်ဇြဟာန် ... သန်ထာန်ကြုတ်ဏာ ... မိဗက်အာကီု၊၊

ကင်ရဳဗြဴရတ် ... ကၞတ်ကျာ်သြဳ ... အိန်ရဳစရာဲ၊ ပဗက်ကောဗၠာဲ ... ဒၞါဲထာန်ဒတန် ... ဒေသနန်ထဝ်၊ ပဗ္ဒေက်ကာယျ ... လ္ၚုင်လ္ၚဇြဟောံ ... လောံလာဲလင်ဇွောဝ်၊ ဒေသနူကဝ် ... တူဒေန်ထဝ်မြ ... ပၠန်စဴရနာဲ၊၊

အဵုကောဗြရတ် ... ကၞတ်အဝဲ ... မပြဲဣဓိ၊ သန္ထာန်ကင်ဂျိ ... ကဵုမိအိုတ်သ္ကန် ... လမျီုခန္ဓ၊ ကောဟွံကၠောံအဴ ... ဒေံဟွံစဴပၠန် ... က္ဍိုင်ကိုန်နန်မြ၊ ဟွံဂွံနာဲရ ... မိလီုခန္ဓ ... ဒေသဂင်ဂျိ၊၊

မိဣဏင်ကင်ရဳ အိုတ်သ္ကန် ချိုတ်အာ ဇိုင်သြင်ၜဳ

မိကလော်ဗြဴ တဴဇိုင်သြင်ၜဳ၊ ဣဏင်ကင်ရဳ ဒ္ၚဳမိင်ပါင်နာဲ၊ စံင်တူဘင်တ္ၜိင် ဂုန်သၟီကောဗၠာဲ၊ ယွံကောဗြရတ် ကၞတ်စရာဲ၊ ပ္ဍဲစိုတ်ကောသၟတ် နူဍောတ်ကဵုကၟာဲ၊ ဒေံဟွံစဴရ ခန္ဓဇိုန်တွာဲ၊ ကၠောံညိကောဗၠာဲ ဗဵုရုပ်နာဲသၟတ်၊ ဒဒှ်မိဆာန် ဇြဟာန်ကၞတ်၊ ယွံဂဍောင်မတ် ကောကၞတ်စိုတ်၊ ကလေင်ညိအဴ ယွံသ္ဍဴကြက်ဗိုတ်၊ ဒဵုလမျီုအိုတ် မိဟွံဝိုတ်သၟတ်၊ ယွံဂိုဟ်သြိုဟ်မိ ညိကောဗြရတ်၊ ဒဒှ်ဂၠိန်နှဴ တဴမွဲနန်ကၠတ်၊ ကေင်လှိင်မွဲဒၞဳ ကေင်ကောလွဳလွတ်၊ ကေင်ကောဂိုင်ၜှ် ဍောင်ဒကှ်ရတ်၊ ဟွံဝိုတ်ညိသၟတ် ဗြရတ်ကောအဲ၊ ဒဇန်နာဲသ္ၚိ မွဲတိဟွံမွဲ၊ ဒဇန်တုပ်တဴ ကွဴထောံခပေါဲ၊ ဒဇန်ကၠဗြန် စကောန်မွဲတဲ၊ ဒဇန်တံင်ရက် ဂလက်ကောန်ပြဲ၊ တိုပ်ပ္ဍဲတိပၠန် ကောန်ဟွံရံင်မွဲ၊ ဒဴထောံဗြဴရော သၞောဝ်ဒါန်ကောအဲ၊ ဒဇန်ပန်ပြဲ နာဲမွဲပေင်အိုတ်၊ မူသ္ဂောံစွံစိုတ် ချိုတ်ကွေံရကော၊ ကင်ရဳယက္ခ ယာံထလောတ်လော၊ တက်သြိုဟ်ဆာံဆာံ ယာံတဴဂၠိုင်အြ၊ မိယာံလောတ်လော ပၠောပ္ဍဲသြင်ၜဳ၊ ...

ဗြရတ်ကောမိ နွံသိဒ္ဓိလွဳ၊ ညာတ်မိဗြဴရတ် မိလောတ်စှ်ေသ္ၚဳ၊ ဒြေပ်အာဒြေပ်ကၠုင် သြင်ကြုင်နာဒဳ၊ ရမတ်ဒဇူ ညံင်ဇမောဝ်ၜဳ၊ ယာံကၠုင်ယာံအာ ကဵုမှာဒေဝဳ၊ ဟီုကဵုချေံပ္ညဳ အရံင်နဳလာ၊ ယွံဟဇ္ဇနဲ ကၠောံညိမွဲဝါ၊ မိလောတ်တဴပ္ညဳ သြင်ၜဳဂင်ဝါ၊ ကၠောံမွဲဝါကွေံ ကောဖျေံမေတ္တာ၊ ဟဇ္ဇနဲမိင် တွိင်ပါင်ဒေံကၠာ၊ ဟဇ္ဇနဲမှာ တုဲဟီုအာပြဟ်၊ ယွံဒေံဍောတ်အဲ နဲတဝ်စရှ်၊ နာဲပသိင်သာ ပူဆာဇြာဲသ္ကဟ်၊ ဂကူမၞိဟ်ဟေင် ဟွံသေင်ထဝ်စှ်၊ ဂကူကလော် ဗော်စမၞိဟ်ဂှ်၊ ယဝ်ကၠောံအာရ ရပ်စလမုဟ်၊ သီုနာဲသီုအဲ ကဝဲကံသၠဟ်၊ နာဲလပဒှ် ဇြသ္ကဟ်ညိနာဲ၊ ဍေံအလေက ဍေံပစနာဲ၊ ဂၠိုင်နဲဍေံပ ပဝဥပ္ပါဲ၊ ပပ္တေဟ်ညိနာဲ ဒေံဗၠာဲဗြရတ်၊ မိဍေံမွဲတဲ တဴပ္ဍဲနန်ကၠတ်၊ စမဳဒေံအဲ ရိုဟ်တ္ၚဲအဆတ်၊ ယဝ်ဍေံဂွံကွေံ ဝးကံဆီဇြောတ်၊ မူပကလော် ဗော်ရပ်စသတ်၊ အေင်ညိဗြရတ် ဍောတ်သမုဲလေင်၊ ဆတုဲလဝ်ဒှ် *ဟုဲဟှ်ဂှ်ဟေင်၊ ကောဟီုနာဲပ္တေဟ် ပသလှ်ေတၟေင်၊ ဗော်စစိင်ပြေင် ဝေင်ညိမှာဲဒေံ၊ ...

ဗြရတ်ဂွံမိင် ချေဟ်ပၟိင်လှေံ၊ စိုတ်နာဲဒေင်ဗျောံ ကၞပ်လဒံကၠေံ၊ ထောံမတ်သ္ၚဳမံင် ရံင်မိဍောတ်ဆေံ၊ မတ်ဟွံလၜဲ ပ္ဍဲနာဲညိည၊ ညာတ်မိဍောတ်ဆေံ ဟီုလှေံဒေံဗြဴ၊ ယွံမိကင်ရဳ ကျာ်သြဳနန်ပ္ကဴ၊ နာဲပစမဳ သြင်ၜဳရအဴ၊ ကောဟွံကၠောံရ က္ညမိပၠန်စဴ၊ ဇြဟာန်ကောဂၞဴ စဴကၠာဗြဴရတ်၊ ကြဴကောကလေင် ဇရေင်နန်ကၠတ်၊ စဴပတန်သွာ ပ္ဍဲပြာသာတ်ရတ်၊ စဴတိက်သ္ၚဳဒၟံင် ပဍောင်ဇြဟတ်၊ စဴရဗြဴရတ် ကၞတ်ကျာ်သြဳ၊ ...

ဏင်ကင်ရဳမိင် တွိင်ပါင်ဂှ်ပ္ညဳ၊ ညံင်ရှ်အမြိုတ် မိင်စိုတ်ဒးချဳ၊ မိတီကေတ်ဟေင် ရိုဟ်ရေင်ကဵုဇဳ၊ ဒဒှ်ပလွဳ တွံကဵုဇဳအိုတ်၊ ယွံလေဝ်ကောဗၠာဲ နာဲဗပေင်စိုတ်၊ မိတီစနာဲ ကောဗၠာဲကြက်ဗိုတ်၊ နူတိတ်ဝေင်ယာန် ဥဒျာန်တေံသ္တိုတ်၊ ကောလဖှ်ဂၠါဲ မိသှ်ပၠာဲအိုတ်၊ ပ္ဍဲဂြိုပ်ပ္ဍဲစိုတ် နာဲဂွံအိုတ်ဆာဲ၊ ဂလာန်ဟုဲဟှ် မိသှ်ဂစာဲ၊ ကောဒေပ်ဥပ္ပါဲ စနာဲကဵုမိ၊ သုင်အရက်ဂျိ လမုဟ်မိတီ၊ ခြင်စိုတ်အလီ လမုဟ်တီဟေင်၊ ညိဟွံဒစေင် ညိဟွံဝေင်စိ၊ ကသူကၞေင်မိ သ္ဇက်ဗျိဟမွဲ၊ တက်သြိုဟ်ဆာံဆာံ မိယာံတူယဲ၊ ပ္ဍဲဂှ်အနဳ ကင်ရဳဒက်ဝဲ၊ ဘဝဝွံမွဲ အဲယာံဗက်ကော၊ ဘဴဂတရော ကောယာံဗက်အဲ၊ ယွံဒေဝဇြဲ အဲပတ္တဏာ၊ တိုင်ရာဒနာ ပကဵုမှာညိ၊ ပ္ဍဲဘဴဂတ ဂၠိုင်ဘဝစိ၊ ကဵုဗြရတ်ဒှ် ညံင်အဲဒှ်ညိ၊ ပကဵုမှာသ္ၚောဲ ဒက်ဝဲကောမိ၊ အဲဒးအိုတ်ဒဲ ပ္ဍဲသြင်ဂင်ဂျိ၊ ကဵုလၞီဇိဝိ ပ္ဍဲဂင်ဂျိကီု၊ ဒှ်ဂဂိတ်စဲ အဲနွံလမျီု၊ ဇြောတ်ဆီညံင်ဂွံ ပဇွောံအဲကီု၊ ပကောတ်သီုကၠံ မပ္တံအိုတ်သီု၊ ကဵုအဲဂွံဇြောတ် ဆီဗြရတ်ကီု၊ ယွံဒေဝတံ တမံအိုတ်သီု၊ ဍိက်ဗိုန်သစ္စ ညိညဟွံလီု၊ ဝဲအဲအိုတ်သီု ကဵုစိုန်သ္ကီုညိ၊ ကဵုဂွံမြာ ပမှာသတိ၊ ကဵုဂွံစိုန်သ္ကီု ဗိုင်ရီုဍိက်ညိ၊ မိယာံတသိ ယူတိဇီုကၞေင်၊ ယွံကောတိက္ခ က္ညနာဲကလေင်၊ ကၠုင်ရံင်မုက်ညိ မိစုတိဟေင်၊ တက်သြိုဟ်ယူတိ မတ်ညိဟွံဗၠေင်၊ ပ္ဍဲဇိုင်ဂင်ဟေင် ရိုဟ်ရေင်လဖှ်၊ ကောဟးကောဇု ဂၠုဒဇန်ဒှ်၊ မိတဝ်စရှ် သ္ဗသ္ကဟ်ဂြိုဟ်ချံ၊ စံင်တူဆံလံ ဂြိုဟ်ချံဒကး၊ ဇတဝ်ဖြပ်ဖြပ် ဒဇပ်ဂတး၊ မိတလုင်တွာဲ သၟီဓဝ်နာဲညး၊ ပ္ဍဲသြင်ဂင်ဂျိ မိသ္ကန်ဂတး၊ ဗြက်သြိုဟ်ဒကး ၜါလွးသေင်ဟာ၊ ယက္ခဗြဴကၠာ အိုတ်သ္ကန်မှာတုန်၊၊

ဗြရတ် စံင်ဇွဂြဇုတ်မိဣဏင်ကင်ရဳတုဲ စဴအာဍုင်

လၟေင်ဒဒှ် တဝှ်အနဳ၊ ဣဏင်ကင်ရဳ ကျာ်သြဳယက္ခ၊ တြဳဇှ်သစ္စ ယက္ခကညာ၊ ဂုန်ပါရမဳ ကင်ရဳယက္ခာ၊ ဒါနတံင်ဂြဲ ဒတဲပ္တိုန်ဏာ၊ ဒှ်ကောန်ဒုမ္မ ဂၞကျာ်ကေလာ၊ မနောဟာရဳ ကျာ်သြဳပြဲဖာ၊ သၟီသုဓနု နာဲမြုပဉ္စာ၊ ဒဵုလမုဟ်ကၠာ ဂွံပြာကတ်ဒၟံင်၊ ဗြရတ်သ္ၚဳရံင် မံင်သြင်နာဒဳ၊ မုက်နာဲဟွံသ္ဇုင် ရံင်ကၠုင်ဟွံချဳ၊ ဒတဴရံင်သၠင် ဇိုင်ပြင်ဗတဳ၊ မုက်မတ်နာဲဗၠး မိဒးဟုံလွဳ၊ ဇိုင်တဲသ္တပ်ညဳ ဟွံကသဳဇကု၊ ဗြရတ်ဂွံညာတ် သ္ၚာတ်ဒှ်မတ်ဂၠု၊ ရမတ်ဒဇူ သ္ၚေဝ်လတူဆု၊ ညိဟွံမိင်ပါင် ရမျှာင်နာဲဇု၊ ကော်ဟဇ္ဇနဲ စိုပ်မွဲဗရု၊ ယွံချေဟ်ကောဇု မိစုတိကၠာ၊ က္ညညိချေဟ်ယာန် တလဍာန်ကျာ၊ ချေဟ်နာဲဂွံမိင် တွိင်ပါင်ဗညာ၊ က္ညကၠောံရနာဲ စရာဲရုပ္ပါ၊ တိုန်ဍိုက်စးရ နာဲပဖဳဒွါ၊ ဂါံဍိုက်ချေဟ်ယာန် ကလာင်ကၠောံအာ၊ စှ်ေနူချေဟ်ပြဲ သြဲလုပ်ဟွံညှာ၊ ညာတ်မိသ္တိက်တဴ ညံင်ရဴရုက္ခာ၊ တုပ်မိလှိင်သ္ၚဳ ဒ္ၚဳပံက်ပါင်ကၠာ၊ ကသဳရံင်စိ မိဂွိုင်ကြုတ်ဏာ၊ မိဟွံချဳကၠာ ထသပါသၟတ်၊ တက်သြိုဟ်ဆာံဆာံ ဂၠါံဇွိတ်သပေါတ်၊ မိန်တူထဝှါဲ ဗ္ဒာဲကဵုသြိုဟ်သၟတ်၊ ဂိုင်ဇွိတ်သပေါတ် ရမတ်ပြဟ်ဍေင်၊ ကံအတိက်ရော ကောကဵုနာဲဟေင်၊ ဍေံသ္ဍံင်ဗက်ကၠုင် ဒးဒုင်စဳရေင်၊ ကံဗက်တံင်ဂြဲ ပ္ဍဲသမုဲလေင်၊ ဗက်ကၠုင်ပြုပြေင် ဟွံဂွံဝေင်ခြာ၊ ဂုန်ဗက်ကောမိ မိလီုခန္ဓာ၊ အဵုမိဗြဴရတ် ကၞတ်ရုပ္ပါ၊ နာဲဒးစုတိ လီုဇိ၀ိတာ၊ ယွံနာဲကညႇာ ခြာနူကောမိ၊ နာဲကော်ကဴကဴ ကောဂၞဴစိုပ်မိ၊ ညံင်က္တဵုသှ်ဇျှာဲ ကဵုကောဗၠာဲညိ၊ ဏင်ကင်ရဳမိ က္ညက္တဵုညိနာဲ၊ မၠာ်မတ်ရံင်ညိ ယွံမိကျေဝ်လာဲ၊ ဟးဂွိုင်စရာဲ နာဲတလသ္ၚိ၊ မူပသ္တိက်ကၞပ် ဟွံက္တဵုချပ်ညိ၊ နာဲဗက်ကောဗၠာဲ သရာဲသ္တုံဇွိ၊ ညးကလေင်ဟာန် ဂစာန်ထောံမိ၊ နာဲသ္ၚိနာဲသ္ၚိ ဇိ၀ိကၠုင်သ္ကန်၊ နာဲမွဲချိုတ်သ္တင် ဇိုင်သြင်သဳဒန်၊ ဆာန်ဗက်ကၠုင်ကော အြမိလဂ္ဂန်၊ ဒးကၠုင်အိုတ်သ္ကန် ပ္ဍဲဟေဝဏ္ဏ၊ ဟးသ္ဍိုက်မ ပချပ်မာန်ရော၊ တက်သြိုဟ်ဆာံဆာံ ဂတေဝ်ယာံလော၊ မိန်လဝ်ဇွရော ယက္ခောဗြဴသွဝ်၊ စိုတ်ဟဳဂပဝ် ဗွဝ်ဒုက္ခော၊ ရမတ်သြီုသြီု ညံင်ဗီုမေဃော၊ မိန်လဝ်ဇွရော လောလိန်ပ္ဍဲတိ၊ »

ဟဇ္ဇနဲညာတ် မန္ဓာတ်လိုက်ပိ၊ ယွံဗောဓိသတ် ကၞတ်ဣဓိ၊ ပသောသၞာ လလံသွာညိ၊ နာဲဒဴထောံရုပ် တုပ်ဆုသအုဲစိ၊ တုပ်ညံင်မတ်ဗြဲ ပ္ဍဲကာသဂၠိ၊ နူကၠာဂေါဝ်ဆာဲ ကြဴသၟာဲသၟစိ၊ ဒှ်တုဲလီုပၠန် ခန္ဓဟွံဂၠိ၊ လှာဲရုပ်တမိ လီုဂတိပန်၊ သတိကဵုဗိုန် ဒှ်ကွိုန်လက်သန်၊ ဒေံယာံကေတ်ဂှ် ဟွံဒှ်ဖဵုပၠန်၊ ရုပ်ရောင်လေဝ်နာဲ ဆဂေတ်ဂါဲလန်၊ ကဵုဗ္စာရဏာ သင်္ခရာပၠန်၊ ဇွပိစှော်ၜါ ကာယျမွဲတန်၊ ကျာ်တွံလဝ်ပၠန် ညံင်ပၞောန်သေင်ဟာ၊ ဒေံလမုဟ်ရ ကၠုင်ထသပါ၊ အေင်ညိရနာဲ ပ္တေဟ်ကောဗၠာဲဟာ၊ ဒးဆာန်အိုတ်သၟဟ် နူဒှ်သမ္ဘာ၊ သတ်တိရစ္ဆာန် သီုစာင်အဒါ၊ အဲလေဝ်နဲဂှ် တုပ်သၟဟ်ပိုဲၜါ၊ ကဵုဗ္စာရဏာ သင်္ခရာညိ၊ »

ဗြရတ်မိင်ပါင် ရမျှာင်ချေဟ်စိ၊ ဖျေဟ်နူထဝှါဲ ဇွနာဲစိုပ်တိ၊ ဂၠါဲအှော်တုဲစံင် ဝေါင်သယက္ခိ၊ စံင်ဇွကင်ရဳ ယက္ခိဏဳမိ၊ စံင်တုဲဒှ်စိ ဇွမိရုပ္ပ၊ တုဲတွံတးပ္ကောံ ချောံဇုတ်မှာယျ၊ တၟံဗဝ်စုတ်ပ္ညဳ ဗီုစေတဳရ၊ သလုင်ပန်ဟတ် ဒးသၞတ်မူလ၊ ရုပ်စေတဳဟေင် စဳရေင်လဝ်ရ၊ ယမုခုတ်ပ္ညဳ စေတဳဂှ်ပၠ၊ စေတဳသြင်ဂင် သြင်သာဂရ၊ ဖဍိုက်နာဲဂှ် ဒှ်ကၠိက်ဂြိုပ်ရ၊ ဒဵုလမုဟ်ပၠန် တဴဂြိုပ်ရညႇ၊ ကၠိက်ဂြိုပ်နာမ မူလတမၠာ၊ ဒဵုလမုဟ်ဟေင် ကော်တဴသေင်ဟာ၊ ဗြရတ်သၟီဗၠာဲ ဂကူနာဲသာ၊ ဗျူပတန်ကာယျ ဇြမုက္ခဝါ၊ ဗန်က္ၜံင်ဒေင်လ္ၚုင် ရံင်ကၠုင်ရံင်အာ၊ ဇြေဟ်ဇြာဲမံင်တုန် ဂုန်မိကြုတ်ဏာ၊ ဍာ်ဟွံဒှ်သုင် ပုင်ဟွံပကာ၊ ချေဟ်ဟီုလာံသာ ယွံမှာဗောဓိ၊ ကောတွံကဵုနာဲ ပြယျာဲဘုမ္ပိ၊ စိုပ်ပကြုပ်ကြး ပ္တန်ကဵုဒးညိ၊ ပ္တန်စိုတ်ကဵုတန် ကောန်တလတိ၊ ပ္ဍဲဂြိုပ်သၞဝဲ ပ္ဍဲသြင်ဂင်ဂျိ၊ သွာလၞီညိ တလတိမန်၊ က္ညစဴဍုင်ရ နာဲပလွောင်စန်၊ မံင်လံမဂး ဟွံဒးပ္ဍဲဂြန်၊ »

ဗြရတ်မိင်ပၠန် ချေဟ်ဝန်စဝ်စိ၊ အာရချေဟ်ရတ် ဟဇ္ဇနဲဂၠိ၊ ဍိုက်ဟဇ္ဇနဲ တြုံပြဲဣဓိ၊ သၞာ်ရတ်ချတ်ဂၞိင် သၟီနာဲဘုမ္ပိ၊ လိုန်သဗာန်ကျာ တူဍာန်ကာသိ၊ တ္ၚဲသဝ်ယောန်န် ဗၠန်အမ္ဗာစိ၊ လွဳမာန်စက်ထဝ် ဂေတ်ဂပဝ်ဂၠိ၊ ထောံတ္ကံကြေင်စိ ဂေတ်ဂၠိဂစာန်၊ တက်ပရဟ်ဗ္ဒဴ သိန္ဓဴလ္ၚီဟာန်၊ ဗၠန်သိန္နေရု ပျးဇံမုပ္ကာန်၊ ကၠောံပျးတ္ကံသအာင် ကၠေံထာန်တ္ကံကြေင်၊ မာတ်သၟီတ္ၚဲဟေင် ဗၠေင်အာတုဲရ၊ ပါန်ခဳချူဗ္ဂောဝ် ပယျောဝ်ကာယ၊ လ္ၚဵုလွံက်ချီု ခၠင်ပ္ဍီုခဏ၊ လ္ၚဵုသၠုဲ သာ်ကၠေင်ၚုဲက၊ လျးခၠင်ခဏ တူကာသဂင်၊ လ္ၚဵုဖလီု ညံင်ဍီုမာဲက္ၜင်၊ လ္ၚဵုလျးဂွု ညံင်ကၞုသင်၊ မွဲသာ်လျးအာ ညံင်နဳလာက္ၜင်၊ ညံင်သာ်ဗဒါ ဂၠံကာသဂင်၊ လ္ၚဵုတုပ်က္ဍင် ဂၠုင်က္ၜင်နာတ်တြ၊ လ္ၚဵုတုပ်တဴ ရဴသၟီသဳဟ၊ ကလိင်စိင်ရော ဥေဿာဗျက္ဃ၊ အမှဳကၟီဗြန် ဟွံတီနန္တ၊ မာတ်တ္ၚဲမပၠိုတ် အိုတ်လျးဟေင်ရ၊ သ္ၚဳတူကာသ လျးခဏရေင်၊ ညံင်ညးစဳပြေင် ဒၟံင်ရေင်တဝဳ၊ သၞံင်ပြေင်ဂဵုဍာဲ ကမတ်ဂၠါဲသ္ၚဳ၊ ကောန်စာင်မွဲစွံ ဗက်ၝောံတဝဳ၊ သၞံင်ကၞုဟ်လၞင် ပ္ဍဲဂင်ဝိတှဳ၊ ဂၠဴကၟက်ဂၠဴဗြဴ လျးတဴဖျဳဖျဳ၊ ဇြုံကၠန်သေထဳ ဖျဳဖျာညံင်သ္ဍဴ၊ ယိုက်ဂၞံက်သဓဵု သိင်ဃဵုဇက်စဴ၊ လျးညံင်ပ္ဍေန် ကၠဵုကဝေန်တဴ၊ သၞံင်ၜါရေင်ဆက် သီုကဵုကၟက်ဗြဴ၊ သဳဟရာဇာ သီုၜါဂၠိန်နှဴ၊ ယောဂဳဓနဴ သမ္ၚေဟ်ဗြဴမာ၊ ယက္ခဂှ်သၟတ် ရပ်လေံဗတ်သ္ကာ၊ မတ်ဂဵုသလံင် ဒှ်တဴသၞံင်ၜါ၊ ဗၜေံမြာ်ထဝ် က္ဍဝ်ဂၠုင်လှဴဂါ၊ ဂတာံမဂ္ဂ ပါံၚာင်ပၠသ္ကာ၊ သၞံင်ချေဟ်တုန်ကၠာ အဿာယမု၊ စိင်လပှ်ဂါဲ ဂၠါဲဗိုင်သစ္ဆု၊ ကျာံဂၠါဲနာံထံင် ဗ္ဒဟ်မံင်အမှု၊ ကၞုဲဂင်သီုၜါ သ္ဍောန်ရုက္ခာဂၠု၊ သၟီကဵုချေဟ်အဵု ဗဵုစိုတ်လ္ၚု၊ တူဍာန်အမှဲ ဇက်ဂၠေါဲထဥ၊ ရာသဳစှ်ၜါ ဇက်အာဂြုဂြု၊ ပ္ဍဲပထဝဳ ဇက်တဝဳဂၠု၊ ဗဵုအာနကျတ် မှတ်ဍုင်ဇကု၊ ဂၠေါဲစှ်ေရုရု ဇံမုဂကူ၊ သူရိယျဟေင် ဗၠေင်ထာန်ဇနူ၊ ကၠောံပျးတ္ကံကြေင် ပၠလျးတၟေင်အူ၊ လေံကလးလျတ် မှတ်ဇက်ဟွံဇူ၊ ချေဟ်ရတ်ဇနူ ဂကူအမ္ဗာ၊ လိုန်ယုဂ္ဂန္ဓဝ် ဇက်ဂၠိန်စဝ်အာ၊ ကၠောံပျးတ္ကံကြေင် ထဍေင်အန္ဓာ၊ အရှိုန်တမး အကးဖျဳဖျာ၊ ဇန်တံကမၠေဝ် အရေဝ်ဟောဒြာ၊ သင်ဗျုသင်ဗၠာဲ သှ်ဇျှာဲဂါထာ၊ ပ္ဍဲဖဴသမုင် သ္ဇုင်တွာင်သူရာ၊ ရေသူတံကၠာ ကၠောန်ရာမွဲတဲ၊ ဒဇဲဒမာတ် ပုတ်ဒါတ်ပသဲ၊ ဒေါင်ပၠဳဇိုင်ဍုင် ၜုင်မံင်ရိုဟ်တ္ၚဲ၊ ဗော်သောန်ရပ်မိဟ် စဝ်ဖျေဟ်ဂွံမွဲ၊ ပါန်မုတ်ဃောပုတ် ဗရုပၞုတ်သောဲ၊ ရေသူဃောတောတ် ချူမတ်ဗိုတ်ဗၠဲ၊ ဗြဴဖျာတွာ်ဂၠေါဲ လုပ်ပ္ဍဲဒမံင်၊ ဂဍာ်ဟောဒြာ အာဂၠါဲမံင်သံင်၊ ကမံဂၠါဲကျောဝ် ပ္ဍဲဒေါဝ်နာံထံင်၊ စာင်ပဝ်စှ်ေဂၠေါဲ ခြးစပ္ဍဲဂၠံင်၊ အဒါသမုင် တိတ်ကၠုင်ဒမံင်၊ ရုရုသံင်သံင် ဗြုမံင်ကမြဴ၊ ကွဳပြေင်တဆှ် ကြဴဂှ်ကွဳဂၠဴ၊ ဗရုသမုင် ကၠုင်င်စဴစဴ၊ လလောင်ကမြဴ အလုံဂၞဴဍုင်၊ တ္ၚဲယးတမး အကးခၠင်သ္ဇုင်၊ ဗြရတ်စိုပ်ဍုင် အကးသ္ဇုင်ခၠင်၊ ဒျာန်စှ်ေညှာညှာ စိုပ်အာဥမင်၊ ချေဟ်ဒတဴဒၟံင် ဂွုကိုဟ်ညံင်တင်၊ တုဲဆင်စှ်ေကွေံ နူချေဟ်ပြဲက္ဍင်၊ »

မိဂွံညာတ်ကောန် ညန်ပါင်ဥမင်၊ ညံင်ကောန်အိန်ဗၠာဲ နာဲရာဇာဝင်၊ လျးတမးခၠင် ဗၜင်တဴလျး၊ ဒြေပ်လုပ်ယိုက်ကောန် ဗန်ဆုင်ဒေါဝ်စး၊ ဟီုပ္တီၝဲသအး ယွံညးမပြဲ၊ လၟာဂၞဴပ္ညုင် စိုပ်ကၠုင်ရၝဲ၊ ညးတရဴမိင် လွိင်ကၠုင်တဲ၊ ဂၠါဲဂၠါံခြုပ်ခြး ဒးညးဒးအဲ၊ ကံယာဲရောင်ကောန် ဒဒိုက်လောန်တဲ၊ ဗြရတ်ဗလဲ ဂၠေါဲသီုသကံ၊ စိုပ်ကၠုင်ကၟိန်ဗၠာဲ နာဲမွဲတမံ၊ ညးတရဴပ္ညုင် ဆုင်က္ဍိုပ်ဆုင်ကံ၊ မိစမဳကိုပ် ဒဵုစိုပ်တ္ၚဲဏံ၊ ဒွိင်ဒၟံင်ဂြိုဟ်ချံ ဒဵုတ္ၚဲဏံပၠန်၊ ကၠုင်စိုပ်မွဲတဲ ဒွိင်ဟဲရကောန်၊ ဇဝေါဝ်ရမတ် ညံင်ဗြဲဝဿန်၊ လမုဟ်ကောန်ဗၠာဲ စိုပ်ကၠုင်ယာဲပၠန်၊ စိုတ်ယာဲသ္ဂောံတန် ဗၠးပၠန်သ္ၚောံ၊ ဟွံဒးနုစတ် ဟွံဒးဇတ်ဇောံ၊ ဟွံဒးစံင်တူ တ္ၜူမာဲဒေင်ဗျောံ၊ ဟွံဒးသ္ၚောံ ဟွံဒးဟောံဇြ၊ ဟွံဒးစံင်တူ တ္ၜူမာဲစိတ္တ၊ ယာဲဗၠးဟောံဇြ ရလေဝ်ကောန်ဗၠာဲ၊ ဍာ်ရမတ်စိ ဒမၠိလောန်ကာဲ၊ သ္ကဟ်ဇတ်ရကောန် ယွံထဝ်သောန်ယာဲ၊ မိသ္ဂောံသိုက်လှိင် ဟွံဒးဒွိင်ဒွါဲ၊ ဂၠုမိစိုပ်မိ ၜိုဟ်စိုတ်ညိနာဲ၊ ဂုန်မကောန်ဗၠာဲ ယာဲသ္ဂောံသိုက်တန်၊ မတ်မိကၠုင်ဂၠု မိင်ဗရုကောန်၊ ဆရမျှာင်ပၠန် ပါင်ကောန်စရာဲ၊ ရုပ်ဂၠုကောဗၠာဲ ညိနာဲရောညာတ်၊ ဝဲရောင်ကောန်ဗၠာဲ သြိုဟ်ယာဲညံင်ပါ်၊ ကြုပ်ကြးဒေါံသ္ၚီ လနီလနာ်၊ မိင်ရမျှာင်ဆာဲ ရုပ်နာဲရောညာတ်၊ သြိုဟ်မိညံင်သ္ပာ် ဂွံညာတ်ညိရော၊ ညးတရဴသ္ပောတ် မုက်မတ်သီုသော၊ »

ဗြရတ်ဂွံမိင် ပဒွိင်စိတ္တော၊ နော်နာဲတရဴ ပက္တဴစံင်တူ၊ နော်တရဴရော အြပဒွိင်ညိ၊ ကောန်ဝဳဗလး ညံင်ဂွံဗၠးစိ၊ လျိုင်ကောန်ရ လ္ပဒွိင်ညိ၊ တုဲတုင်မတ်ပြဟ် ကဵုဍာ်တှ်စိ၊ မတ်တေင်ပေင်တိ ရံင်ညာတ်စိစောန်၊ ဒိဗ္ဗစက္ခု ဂဥုဲဝွံပၠန်၊ ဖုဲနှဴကုမတ် ဍောတ်ဗၠာဲစုတ်ပၠန်၊ စုတ်မတ်နော်နာဲ သီုယာဲမွဲတန်၊ သီုထပှ်ပၠန် မွဲတန်ညာတ်အိုတ်၊ နော်တရဴဂၠိန် အဵုကၟိန်ပြဲသ္တိုတ်၊ ဂဍောင်မတ်ယာဲ နော်နာဲပေင်စိုတ်၊ နော်ဂွံညာတ်အိုတ် ပေင်စိုတ်ယာဲဇု၊ ရုပ်သာ်ၜတ်သောင် မုက်ညံင်ဂိတု၊ ဂွံပြာ်လဝ်ယာဲ နော်နာဲမိဇု၊ နူတ္ၚဲဝွံအဵု ဒဵုလီုမစ္စု၊ ကဵုဂွံသိုက်လှိင် သမၞိင်နန်မြု၊ အယုက်သီုပိုန် ကဵုမောဝ်တိုန်ဂၠု၊ ဖဵုဂွံလွဳရ ဗၠိုင်ဗၠဇကု၊ ကဵုနိဗ္ဗု မြုတာဝတိင်၊ ကဵုဂွံစသိုင် ဂွံပိုင်လဟိင်၊ ကဵုဂွံပိုင်ပၠန် ထာန်နန်ဇမၠိင်၊ ကဵုဂွံပိုင်က္ဍင် တူနန်ဒြင်စိင်၊ ကဵုဂွံသိုက်လှိင် တာဝတိင်ညိ၊ ကြဳဇှ်ကောန်ဍောတ် မတ်ဂၠုသ္တုံဇွိ၊ ဂွံယးအာပၠန် ဂွံညာတ်ကောန်မိ၊ ဂွံညာတ်ကောန်ယာဲ နာဲတၠဣဓိ၊ ကဵုဂွံသိုက်ဂၠိ ညိရကောန်အဲ၊ ဗြရတ်ဂေါဝ်သ္ဇုင် ယဵုတလုင်တဲ၊ ဒုင်မောဒနာ နာဲသာနန်ဗၠဲ၊ ကလံနော်ကၠာ သီုမာတာမွဲ၊ ဟီုပ္တီမိအဴ နော်တရဴပြဲ၊ ကောန်တိုန်နန်ဗၠဲ ပ္ဍဲပါသာဒ၊ ပရိုက်ပၞဴ ဂွံဖျဴနင်ရ၊ ကောန်တိုန်တွာဲပၠန် ပ္ဍဲကၠတ်နန်မြ၊၊ . . .

ဗြရတ်ကဵုချေဟ် တဝ်စၞေဟ်ကဵုကလော်ဗြဴမိသဳနန္ဒာ

ဗြရတ်တေဇ ကောန်တလဍုင်၊ ဂါံတွာ်တိုန်ပၠန် ကောန်ဗၠာဲဂေါဝ်သ္ဇုင်၊ ဖျန်ကဵုချေဟ်ဗၠာဲ နာဲသတိပ္ညုင်၊ တ္ၚဲဏံဒှ်အိုတ် လကိုတ်သီုဍုင်၊ အဲၜါကောသွံ ဍေံညာတ်တိတ်ကၠုင်၊ ချေဟ်ရတ်မိင်ပ္ညုင် ယဵုဒုင်လဝ်ကၠာ၊ ပဒွိင်မွဲတဲ လယိုင်အဲမာ၊ လယိုင်ဍိက်ပြဲ အဲကဵုယက္ခာ၊ စံဒြဟတ်မွဲ အဲကဵုနန္ဒာ၊ ဍေံကလော်ကွေံ အဲချေဟ်သေင်ဟာ၊ စံဂွံတီသၟတ် ဒြဟတ်ဍေံကၠာ၊ က္ညရရာဇာ နာဲသာဘုံပိ၊ ပၠဒြဟတ်ကီု သီုကဵုဣဓိ၊ ကဵုဗြုသမုင် ဒဵုဍုင်နာ်ဂျိ၊ ဗြရတ်ဍိုက်ကွေံ ချေဟ်နွံဣဓိ၊ ချေဟ်ဒြေပ်ဇိုင်ပှ်ေ ပလှ်ေမုက်ဂၠိ၊ ဇိုင်ပန်တဆှ် ထဍဟ်အာစိ၊ ဗတလွိင်ဆာဲ မုက်ဂါဲသ္တုံဇွိ၊ ကြဵုကြီုလဒု ဗြုသမုင်တိ၊ ချေဟ်ဇၞော်ဣဓိ သ္တုံဇွိဍာဲဂဵု၊ ရမျှာင်ဂဟှ်ေ ဇိုင်ပှ်ေတဲပ္ဍဵု၊ ဇိုင်ဂၠံင်ပေင်က္ဍတ် ဗဵုဗြရတ်အဵု၊ ချေဟ်တဆှ်အာ ၜါလပါ်ဗဵု၊ သမုင်သဓဵု ကြဵုကြီုဂမ်အတ်၊ ဍေံဗြုဂဟှ်ေ ပလှ်ေမုက်မတ်၊ လုပ်စိုပ်မုက်ရိုင် ကဆံင်ဇိုင်လျတ်၊ တိဗြုသဓဵု ဓိကဵုလောန်ဗၞတ်၊ အမာတ်ပေင်ဍုင် မုက်ရုင်ဂမ်အတ်၊ ကဆံင်လျတ် ဂမ်အတ်ဂဟီ၊ ဣသဳနန္ဒာ မတ်ၜါညံင်ဆီ၊ မိင်ဗရုလျတ် စိုပ်သၟတ်ဍေံတီ၊ အဲစကာကွေံ ဍေံကၠုင်စိုပ်ဏီ၊ လမျီုလၞီ ခပ်သီဂွံအိုတ်၊ အဲဒးတိတ်ရ ပၠဣဓိသ္တိုတ်၊ ဗြရတ်ကဵုအဲ တဝဲကောန်စိုတ်၊ ဟီုတုဲမဂး ထၜးရုပ်အိုတ်၊ ဒှ်ကလော်အဟိုတ် လကိုတ်သီုဍုင်၊ ဒှ်လကိုဟ်ဗြဴ ဒတဴဒၟံင်သၠုင်၊ ေၚက်ကိုဟ်တ္ၚက် က္ဍက်က်သမုင်၊ ဂၞေဟ်တိတ်သ္ကေက်သ္ကာ ဇကုတၟာဂၠုင်၊ မတ်တၟာသတ်တာ ရံင်အာရံင်ကၠုင်၊ ရမျှာင်သမုင် သၠုင်ဗၞတ်မွဲတာ၊ ဇကုတၟာစိင် လွိင်မုက္ခဝါ၊ ခဵုတိတ်ကၠုင်သၟတ် မၠာ်ရံင်မတ်ၜါ၊ သ္ၚေဝ်ဒိုဟ်သ္တုံဇွိ ယက္ခိနန္ဒာ၊ ညာတ်ကေတ်ဗြရတ် ဂမ်အတ်ကြဵုဇာ၊ ကဵုပါင်သမုင် ရုင်ညံင်ကယျာ၊ ... »

ကမၠောန်ဍောတ်ဇၞော် ဗော်သၟီစကာ၊ လကိုတ်ယက္ခ ဒြေပ်ထသပါ၊ လ္ၚဵုဂၞိန်လာဲ ဒြေပ်ပါဲတိတ်အာ၊ လ္ၚဵုဂၞိန်လလုဲ ထုဲကြာန်ဇာနာ၊ ယာတ်ညိဟွံမွဲ တဲသၟးကၠာ၊ ဂၞိန်လာဲဒဴဒြေပ် ထဍေပ်ကၠုင်အာ၊ လ္ၚဵုဂှ်ဆင် ပါင်တရင်ဒွါ၊ ဒြေပ်ပြးဂစာန် လ္ၚဵုဒွါန်တာ၊ ဒြေပ်ထုဲဓရုဲ ညံင်ကၞုဲဒးဇာ၊ ကမၠောန်ကမြဴ ရဴတ္ၜိုင်ပြဝါ၊ ဂၞိန်ယာတ်ဟွံမွဲ တုပ်နဲတ္ၜိုင်မြာ၊ ယာတ်ပြးဇးအာ ဒြေပ်ဇၟာညံင်ပြေင်၊ သလာ်လောတ်နး ညံင်ညးထဍေင်၊ ဒဝုဲလယှ် ညံင်ပၞောဟ်ဒြေပ်ရေင်၊ ကမၠောန်လကိုတ် ၀ိုတ်ကြိယာဟေင်၊ ၀ိုတ်သတိဗၠေင် ဖျေင်ရံင်ယက္ခိ၊ သၟီအမာတ်ဇၞော် သီုဗော်သ္တုံဇွိ၊ ဇတဝ်ဖြပ်ဖြပ် ညံင်လွပ်ဒိတှိ၊ ဒြေပ်ဒဴလုံဍုင် ထောံရုင်ဆင်တိ၊ ဒြေပ်လုပ်အောပ်ဗ္ဒာဲ ကဵုနာဲဘုမ္ပိ၊ ဇကုဇတဝ်လောန် ဗန်ဂၞိင်ကောစိ၊ စှ်ေနူချေဟ်ဂၠိ မတ်ညိဟွံဝေင်၊ ကောပသတိ ညိပကဵုဗၠေင်၊ ချေဟ်မိင်ပါင်ဟေင် သမုဲလေင်ဗၠာဲ၊ ဂဟက်ပ္တိတ်ထောံ ပစွံညိနာဲ၊ ဍေံရပ်တံင်ဂြဲ အဲသ္ပဂါဲ၀ါဲ၊ ပ္ဍဲထာန်စၞေဟ် ပပ္တေဟ်ဒေံဗၠာဲ၊ သှ်ထောံညိနာဲ ကောဗၠာဲဃောထတ်၊ ဒေံသှ်ဂဟက် တံင်ဗက်ခလောတ်၊ ချေဟ်ဗၠာဲဒၟံင်ဂျ ဂတဗြရတ်၊ ချေဟ်ကြီုဂမ်အတ် ပ္ဍဲလှောတ်မုက်ရုင်၊ ဗြရတ်ရပ်တဴ ပၞဴဂေါဝ်သ္ဇုင်၊ ပလှ်ေဓရိုက် သတ်ပရိုက်ပ္ညုင်၊ သဳနန္ဒာညာတ် ဒြေပ်သလာ်ကၠုင်၊ ဂွုလစာတ်သ္ကာ ဂၞေဟ်ၜါတၞုင်၊ ဟာပါင်ဍာဲဂြောတ် မတ်ဒလန်သ္ဇုင်၊ မတ်ဍေံရံင်ကၠုင် သ္ဇုင်ခၠင်သီုၜါ၊ ပရိုက်ပၞဴ ဂွံညာတ်တဴကၠာ၊ ယက္ခသ္ၚဳရံင် ညံင်အိုတ်ဇိ၀ါ၊ ဍေံဒြေပ်ကၠုင်ကွေံ ဂၞေဟ်တိတ်သ္ကေက်သ္ကာ၊ လုပ်ဟွံဒည ဍေံဘနင်ဏာ၊ ချေဟ်ဓနာဂၠံင် ဗက်ပၠံင်ဇိုင်ၜါ၊ ယက္ခဗလေတ် ဃံက်ကေတ်လ္ၚာ၊ ခြုဟ်ဒလိုက်က္တဵု ခဵုလုပ်မွဲဝါ၊ ချေဟ်လေဝ်သဓဵု ကလော်ကြဵုဇာ၊ လလောင်သမုင် ညးဍုင်အောပ်မာ၊ အသံညးၜါ ကြဵုဇာဒိင်ဒင်၊ ကလော်ဗလေတ် တေတ်ဒးမတ်ဂင်၊ ဇိုင်ပှ်ေတဲၜံက် ဃံက်က္ဍဟ်ဆီဂြင်၊ ဆီဒဇူပြး ပှ်ေဒးထမှင်၊ ဗြရတ်လတိုင် ပၞဴဂြိုင်က္ဍင်၊ ပရိုက်ဂြဴဂှ် ပြဟ်ပါ်ကဵုသ္ဇင်၊ ပၞဴပါ်သၟတ် ကလော်လောတ်လၞင်၊ က္တိုင်ပရိုက် ပြိုက်ကဵုမတ်သ္ဇင်၊ ပရိုက်ပၞဴပါ် ချိုတ်လ္ၚာ်သတင်၊ ချိုတ်လ္ၚာထရံင် ညံင်ဇွစိင်ဒြင်၊ နန္ဒာချိုတ်သ္တင် ဂၞေဟ်ညံင်ဒြင်စိင် ...

ညးဍုင်တံရော ဟောကၠံင်ဂမြိင်၊ ဂၠေါဲကၠုင်ဗဵုကၠာ ယက္ခာဗြဴသၟီ၊ မုက်ရုင်ပေင်က္ဍတ် ဇၞော်သွတ်ဂမြိင်၊ တြုံထဴဗြဴဗျု သက္ကုလဟိင်၊ ဒစုန်တဲၜါ ဂၠေါဲအာသ္ၚိသၟီ၊ ကလော်ချိုတ်လှိင် တမာစိင်ဂး၊ ဟိုတ်ဂှ်လုပ်ဗဵု သၟိက်ဆဵုညိမၞး၊ အာအိုတ်စဴတံ တမံအဲညး၊ လုပ်ဗဵုပေင်ရုင် ၀ုတ်ဗၠာဲကၠုင်နး၊ ဂၠေါဲလုပ်ဆက်ဆက် ကောန်စဴဗက်ပြး၊ ပေင်ပ္ဍဲမုက်ရုင် ဂၠေါဲကၠုင်ပြးဇး၊ ဟွံဆဵုမွဲလှ်ေ ပလှ်ေမုက်ကြး၊ ၀ုတ်ဗၠာဲခြးမး တရးကၠုင်ဍုတ်၊ ဗၠာဲဗၠာဲခဍုတ် ၀ုတ်တံသီုဖအိုတ်၊ လုပ်ဗဵုညာတ်ရ ကမၠပ္ဍဲစိုတ်၊ ညာတ်ကလော်အိုတ် ပ္ဍဲစိုတ်သိင်သာ၊ ...

သၟီဇၞော်နန္ဒကိတ္တိ အာဒုင်ဖျဴနင် ဂၞကျာ်ထပှ် ပ္ဍဲထီုဥမင်တေံ

သၟိင်ဇၞော်ညာတ်ရ ဇွဗြဴယက္ခာ၊ ညံင်ဇွစိင်ဗြဴ တဴလက်လ္ၚာ၊ ညာတ်ဖေက်လောန်က္ဍင် ဇွလၞင်ဇာ၊ သၟာန်ဗြရတ်ကၠာ ယွံကုမ္မာဍောတ်၊ ယွံလေဝ်ကောန်ဗၠာဲ နာဲဂဍောင်မတ်၊ အဲဖေက်လောန်တဲ ကလော်ဝဲသၟတ်၊ သိက်ပိုဲသ္ပပၠန် ဇၞော်လောန်ခေါ်မတ်၊ ဟီုညိကောန်ဍောတ် ဗွဲသၟတ်ဂွံတီ၊ ဗြရတ်ဂွံမိင် သွိင်မုက်တုဲကအီ၊ ယွံအံက်မရှာတ် ပိုင်ပြာသာတ်လ္ၚီ၊ ဂၞကျာ်ဝွံပၠန် ဆာန်လောန်ခပ်သီ၊ ရုပ်မဂေါဝ်မြီ ဖေက်ဒၟံင်ဏီဟာ၊ ပဖေက်ညိအဴ ဆာန်ရဴမတ်ၜါ၊ ညံင်ဂဍောင်မတ် ဗြဴရတ်ဝွံမာ၊ လမုဟ်ဖေက်ရ ယက္ခကန္တာ၊ မတ်ညးထပှ် ထဍဟ်ကဵုဏာ၊ ဆာန်ဍေံသေင်ဟာ ဂၠံက်ကဵုဏာရေင်၊ ညးထပှ်ကောံ ဒေင်ဗျောံဒၟံင်ဟေင်၊ ပ္ဍဲဥမင်စု ဂၠုညိဟွံသေင်၊ စက္ခုဟွံညာတ် ကျာ်စွံလဝ်ဟေင်၊ ဂၠိုင်သၞာံအခါ လ္ၚာပ်လ္ၚာပ္ဍီုသြေင်၊ ထပှ်မွဲလၟေင် ဇရေင်ဥမင်၊ ဨကရာတ်မိင် မုက်မတ်လိင်လှင်၊ တုဲသၟာန်တိုန်ကၠာ မှာရာဇာဝင်၊ ယွံလေဝ်ဍောတ်ဗၠာဲ စရာဲပြဲက္ဍင်၊ နာဲတီမံင်ဟာ အရာဥမင်၊ ညးထပှ်သၠင် ပ္ဍဲဥမင်ကၠာ၊ ၀ိုတ်ရထဝ်စှ် ထပှ်မွဲသာ၊ နာဲအာမံင်ကီု မိင်ညးဟီုဟာ၊ နာဲတွာ်အာဝေင် ဂေင်ကၠုင်ဂေင်အာ၊ နာဲတီမံင်ဟာ ယွံအပါမိ၊ ဟီုစမွဲတဲ အဲသ္ဂောံတီညိ၊ လံလကာဖာ သပါသ္တုံဇွိ၊ နွံဒၞါဲဂှ်ဟာ ကၠေံအာသအာင်စိ၊ ဟီုဗစညိ သ္ဂောံတီညိကောန်၊... »

ယွံမရှာတ်သၟီ ပဒွိင်မွဲတန်၊ ညးထပှ်အဴ မိဂၞဴအဲပၠန်၊ ဒှ်မိဂၞဴအဲ အဝဲကၠုင်အန်၊ ညးဂၠံက်ထောံမတ် ပ္ဍဲကဵုကၠတ်နန်၊ အဲဍိက်ဒှ်ကောန် ဒှ်ပၠန်ဒမၠိ၊ ဒေံဒဒေံစိ ဒှ်မိအဲဍိက်၊ ဨကရာတ်မိင် အြသိင်ဃနိက်၊ မိန်ကေတ်ကောန်ဗၠာဲ စိုတ်နာဲဂမ်အိက်၊ တူထဝှါဲမၞိက် ပၠောတ်သ္တိက်သာသာ၊ ဇကုဖြပ်ဖြပ် ဒဇပ်သီုၜါ၊ အမာတ်တံညာတ် ရာတ်သြိုဟ်သပါ၊ ဒြေပ်အာဒြေပ်ကၠုင် ပ္ဍဲရုင်ဟောဒြာ၊ ကမၠောန်သဓဵု ယာံမံင်ကြဵုဇာ၊ ဍာ်မြမောဝ်ၜိုဟ် စရိုဟ်စုတ်ကၠာ၊ သမ္ၚုဟ်တိုန်ဟေင် ချိုန်ဂှ်သေင်ဟာ၊ မိန်လဝ်ကောန်ဗၠာဲ ဆုင်က္ဍိုပ်နာဲကၠာ၊ ယွံသိုက္ခမာ ကောန်လမာဂၞဴ၊ အဲဟွံတီညိ ၀ိုတ်သတိတဴ၊ ဘိုင်ဘုဲဒၟံင်ကၠာ ကောံယက္ခာဗြဴ၊ လမုဟ်သၟီမ တီရဗွဲကြဴ၊ မိနာဲတံဂှ် ထပှ်မွဲဂၞဴ၊ တလညးဗြဴ နွံတဴဟာဂၠု၊ မတ်ညာတ်မံင်ဟာ ကၠုင်အာဒမၠု၊ ဂၠါံအာကၠုင်ဒး ဆဗၠးဇကု၊ နာဲဒးဒတဲ ပ္ဍဲဂၠံဒမၠု၊ ဟီုညိကောန်ဂၠု မိဇုနာဲဂှ်၊ ဗြရတ်ဂွံမိင် ဟီုပၟိင်ပြဟ်၊ ယွံမအံက်အဲ နဲတဝ်စရှ်၊ မိဍိက်တဴပၠန် ပ္ဍဲနန်ထီုဂှ်၊ အေင်အောတ်ဂြိုဟ်သ္ကဟ် ဒးဒှ်ရအဴ၊ ဍိက်အာဍုင်ကလော် မတ်နော်မိဂၞဴ၊ ဣသဳနန္ဒာ ပြင်ဏာသီုရဴ၊ ပြင်ကဵုကျာပၠန် ဗစိုပ်ကောန်ဗြဴ၊ ကွက်လဝ်ကဵုရဴ ကောန်ဂၞဴဂွံနင်၊ ဂွံနင်ဇိပ်ကၠိပ် ဂဥုဲဒိပ်ခၠင်၊ ဒိဗ္ဗစက္ခု ခုတ်ယမုက္ဍင်၊ လမုဟ်ဂွံနင် ဂုန်ကျာ်ဓဝ်သင်၊ ဂုန်ကင်ရဳက္ဍင် ဂွံနင်ဖအိုတ်၊ လမုဟ်ညာတ်ကၠာ ကၠုင်အာညံင်စိုတ်၊ ဒဒိုက်ရိင်က္တင် ကၠင်ကၠောန်ညံင်ချိုတ်၊ အာဍုင်ကလော် နော်နာဲဗၠးအိုတ်၊ ဂွံနင်ညံင်စိုတ် ဗၠးအိုတ်ရအဴ၊... »

သၟီဇၞော်မိင်ရ ဖျဖျယာံတဴ၊ ယွံလေဝ်ကောန်ဗၠာဲ စရာဲဍိုပ်ဍဴ၊ ဥမင်မွဲတဲ သ္ၚောဲဟာတရဴ၊ အာရံင်မိနာဲ ကောန်ဗၠာဲကြက်သ္ဍဴ၊ သ္ၚောဲဟာတရဴ ကောန်လဴကဵုညိ၊ ဗြရတ်ဂွံမိင် ဟီုပမိင်စိ၊ ဆိုက်မံင်ကီုအဴ တရဴထာန်မိ၊ ယိုက်လဝ်ကောန်ဗၠာဲ ဟွံမိက်သြာဲညိ၊ ကော်အမာတ်ပန် သၟဟ်န်သ္တုံဇွိ၊ ချေံယာန်အဲဂှ် ပြဟ်ကေတ်နင်ညိ၊ အမာတ်မိင်ရ ပါင်တလတိ၊ ကယျိုင်ဂေါဝ်လောန် ချေံနာဲနန်လွိ၊ ယွံအမာတ်တံ တမံညးစိ၊ ၀ဝ်ထဝ်ဒြင်စိင် ဒလိင်သ္တုံဇွိ၊ တွိင်ပဉ္စင်ဂ သဗ္ဗပြေင်ညိ၊ သီုဗဵုသ္တုံဇွိ ထိမြိဂမြိင်၊ ပ္ဍဲထာန်ဥမင် သီုဝဝ်ဒြင်စိင်၊ ဂကန်တုဲကွေံ သၟီဍိုက်ချေံဗျိင်၊ ဗြရတ်ဍိုက်သြဲ ဟဇ္ဇနဲသွိင်၊ တုဲအာဂတ ပၠတရဴသၟီ၊ ညးမွဲမွဲချေံ ပြဟ်ပြေဟ်ဍိုတ်ဆိင်၊ ချေံပလှ်ေဂါဲ ဇိုင်ပါဲလွိင်၊ ဂါံဇိုင်ပုင်သွိင် ထမၠိင်မုက်မတ်၊ ချေံဍောတ်ဗၠာဲပြဟ် တဆှ်လျတ်၊ ချေံသၟီနာဲသာ ဒြေပ်ဗက်အာသၟတ်၊ ကြဴချေံဗြရတ် မှတ်တဆှ်အာ၊ မှတ်ပ္ၚောံက္ဍင် ဥမင်မိကၠာ၊... »

ညးထပှ်သၠင် ပ္ဍဲဥမင်ဒွါ၊ မင်တဴကောန်ဗၠာဲ စရာဲရုပ္ပါ၊ ထောံမတ်ညာတ်ဟေင် ကောန်စိုပ်သေင်ဟာ၊ ဗြရတ်ဒေါံကွေံ စှ်ေနူချေံကၠာ၊ ဨကရာတ်မာ ဗ္ဒောံချေံခါဂှ်၊ ညးထပှ်ညာတ် သမ္ၚာတ်ဒိုဟ်စှ်၊ လုပ်ဥမင်ကီု သီုညးထပှ်၊ လုပ်အာထီုပြဟ် သီုထပှ်ဟေင်၊ သၟီဇၞော်ညာတ်စိ မိသမုဲလေင်၊ ဗက်လုပ်ထီုဝွံ ဂၠုညိဟွံသေင်၊ တုဲကော်ကောန်ဟေင် သမုဲလေင်ဍောတ်၊ ဥမင်ဂၠုလောန် ယွံကောန်ဗြရတ်၊ ဟွံညာတ်မိနာဲ ဟာဲဂဍောင်တ်၊ တဴအပ္ဍဲဟာ မာတာနာဲသၟတ်၊ ဟီုညိကောန်ဍောတ် ဂွံညာတ်သၟတ်ညိ၊ ဗြရတ်ဂွံမိင် ဟီုပမိင်စိ၊ နွံအပ္ဍဲပၠန် ဂၞကျာ်ဂၞဴမိ၊ သၟီဇၞော်ကော်ရ ယွံတလသ္ၚိ၊ ဂၞကျာ်အဲသၟဟ် ထပှ်မွဲမိ၊ နွံဟာစရာဲ နာဲကျာ်သြဳသ္ၚိ၊ ယွံဂၞကျာ်အဲ ထပှ်မွဲမိ၊ နွံဟာနာဲသ္ၚိ ယွံမိကြက်ဗိုတ်၊ ညးထပှ်မိင် တွိင်ပါင်ၝောံကိုတ်၊ ပါင်ဨကရာတ် နာဲမန္ဓာတ်အိုတ်၊ တုဲမိဟီုအာ နသုဘာသိုတ်၊ မူပရောအဴ ယွံသ္ဍဴကြက်ဗိုတ်၊ ပိုဲမၞိဟ်ဂၠုမတ် ညးသၟတ်ကေတ်အိုတ်၊ မတ်ကၠက်သီုဖအိုတ် ညံင်ချိုတ်အာဟေင်၊ မူကော်ပအဴ ယွံသ္ဍဴတ္ကံကြေင်၊ ဖဴဂၞကျာ်ပၠန် ပ္ဍဲနန်အိန်ခေင်၊ ပိုဲဍိက်အန်ရုပ် ဟွံတုပ်ညးဟေင်၊ က္ညသၟီကလေင် ဇရေင်ဗြဴနာဲ၊ ပိုဲမတ်ကမၠက် ဗက်ရုပ်ဟွံဆာဲ၊ ဂၞကျာ်ဇၞော်ပၠန် ကြဳဝန်စရာဲ၊ က္ညစဴဒိပ်ဒါဲ ကောံနာဲဒေဝဳ၊ ပိုဲမၞိဟ်ဒုဟ်ပ္ညုင် ဒးဒုင်ဒၟံင်ပ္ညဳ၊ မံင်ပ္ဍဲဥမင် ဆဒးကၠင်ဟဳ၊ ညံင်သုနက္ခာ ကြာသုန္ဓရဳ၊ သ္တိက်ဒၟံင်ပ္ဍဲတိ ညိဟွံဗှ်သ္ၚဳ၊ ဗြဴဂှ်ဒှ်ပ္ညဳ ယက္ခဳကလော်၊ ကလံက်ပကော် ဗော်ဗြဴဟိဏ္ဏ၊ ဒေါံရရာဇ မိဖေက်ရကော၊...

နန္ဒကိတ္တိ မိင်မိဟီုရော၊ ဟီုတိုန်ပၠန်ရ တလအယော၊ ယွံဂၞကျာ်အဲ ထပှ်မွဲဆော၊ ၀ဲနာဲရောင်မိ သ္ဇက်ဗျိနွံရော၊ မိပဒက်ဝဲ မပြဲအယော၊ တုဲလုပ်အာရော ဨကောပြဲက္ဍင်၊ သၟီရံင်လုပ်အဴ သ္ဍဴတမးခၠင်၊ ညာတ်ညးထပှ် သြဟ်ဒှ်ဘိင်ဘင်၊ ရမတ်ဒဇူ ညံင်ဇမောဝ်ဂင်၊ မိန်ကေတ်ညးထပှ် ဗြဲမတ်ပြဟ်က္ဍင်၊ လောတ်သ္ၚဳစှ်ေအာ မှာရာဇာဝင်၊ ဇတဝ်ခြံခြံ ပ္ဍဲဂၠံဥမင်၊ ဖြပ်ဖြပ်ဒဇပ် ညံင်လွပ်မှာတင်၊ ဗြရတ်ညာတ်က္ဍင် မိမသၠင်အာ၊ . . . စ လမုဟ်သာသာ၊ သီုဒစာံကၠာ ဂွံသာရဝါတ်၊ သမ္ၚုဟ်တိုန်ပၠန် သၟီနာဲမန္ဓာတ်၊ သေဏာအမာတ် ဂွံညာတ်သေင်ဟာ၊ ပြဟ်ကၠုင်စိုပ်က္ဍင် ထာန်ဥမင်ဂါ၊ ဗရုတမ္ညဝ် ၀ဝ်စက်ဇရာ၊ စိုပ်ပ္ဍဲဥမင် ပါင်တရင်ဒွါ၊ အမာတ်တံကီု သီုဒဴဗညာ၊ ဟီုပၠာံသဝါ သိုက္ခမာဗြဴ၊ က္ညစဴစသိုင် ဇရေင်က္ဍိုင်ပ္ကဴ၊ သီုညးထပှ် ပြဟ်မိတံစဴ၊ ဗြရတ်ဝန်စဝ် လ္ၚောဝ်မိဂၞဴ၊ ယွံမိမပြဲ နဲဒေဝတဴ၊ ပဒှ်လနီ ဒေါံသ္ၚီဂၠက်သ္ၚဴ၊ မအံက်ဝန်စဝ် အံသဝ်စိုတ်ဇဴ၊ သီုနော်တရဴ မိဂၞဴကောန်ကီု၊ ညးထပှ်မိင် တွိင်ပါင်ကောန်ဟီု၊ တွိင်ပါင်ကောန်သွံ ဂွံမိင်အိုတ်သီု၊ ပဒွိင်ကောန်ဗၠာဲ နာဲသဏာဂီု၊ ညံင်လဟီုနာဲ ယာဲဗက်အိုတ်သီု၊ နော်နာဲမိကီု သီုထပှ်ပ္တန်၊ ဗြရတ်ဂွံမိင် တွိင်ပါင်မိပၠန်၊ တုဲပ္တီသၟီမ တလကၠတ်နန်၊ ယွံမအံက်အဲ တရဴပြဲလောန်၊ က္ညစဴနန်ထဝ် ဗ္ဒဝ်ကၞက်ဂဒန်၊... »

နန္ဒကိတ္တိ တလသ္ၚိနန်၊ မိင်ကောန်မဟီု ကြီုမိစဴပၠန်၊ မိပ်စိုတ်လောန်တဲ ပ္ဍဲစိုတ်သၟီမန်၊ ညံင်ဒိုက်ဂတ်စိ ဂွံနိဓိပၠန်၊ ဟီုတိုန်မွဲတန် လဂ္ဂန်ကြုတ်ဏာ၊ ယွံတဝ်စရှ် ထပှ်မွဲသာ၊ က္ညစဴရမိ နာဲသ္ၚိကေလာ၊ ညးထပှ်မိင် တွိင်ဗိုက်ကြိယျာ၊ ဂၞိန်ယာတ်ပုံစက် ပက်ခါန်ခါသာ၊ တွာ်တိတ်အာပၠန် မွဲတန်ဟွံခြာ၊ နန္ဒကိတ္တိ ဣဓိရာဇာ၊ ထပှ်မွဲဝဝ် ရုပ်ညံင်ထဝ်ဏှာ၊ ၀ဝ်ဇက်ဂမြိင် စိင်ချေံမွဲသာ၊ မကဵုကောန်ကွေံ ဍိုက်ချေံရေင်အာ၊ အမာတ်ဇက်ဂၠေါဲ သီုရဲသေဏာ၊ ကမၠောန်ဂၠေါဲအာ ကြာဝဝ်ဒေဝဳ၊ ဂမြိင်ထဥ ဗရုစက်ကွဳ၊ သဗာန်ပေင်က္ဍတ် ကွဳရတ်တဝဳ၊ မံင်ဆာင်သမုင် တက်ၜုင်အာပ္ညဳ၊ သမ္ၚေဟ်သေထဳ ဇက်သအဳဗက်ဂၠေါဲ၊ ဇက်လုပ်ပ္ဍဲဍုင် သမုင်ညံင်ပေါဲ၊ စိုပ်ပ္ဍဲမုက်ရုင် ကောန်ဍုင်ကၠံမွဲ၊ စှ်ေနူချေံပၠန် တလနန်ဗၠဲ၊ ယွံအမာတ်အဲ မပြဲကြဳဇှ်၊ ဇွယက္ခဳဗြဴ ရဴစိင်မွဲဒှ်၊ ဇက်ဏာထောံညိ ယက္ခိဗြဴဂှ်၊ ပ္ဍဲထီုဂှ်ကၠာ ဇက်ဏာကဵုပြဟ်၊ စွံပ္ဍဲထီုကွေံ ကဵုဍေံသအုဲကှ်၊ ဇွကလော်ဂှ် ပြဟ်မၞးဇက်ဏာ၊ ပကဵုၜက်တ္ၚဲ ဗြဴဝဲယက္ခာ၊ အမာတ်ဂွံမိင် ပမိင်သေဏာ၊ တက်မံင်ဒုင်ဒုင် ဇက်ကၠုင်ဟောဒြာ၊ ဇက်ဇွယက္ခာ ကြဵုဇာသဓဵု၊ ဇက်ညံင်ဇက်ဆု ဗရုကွဳကြဵု၊ ဇက်ညံင်ဇက်တၟံ ဇန်တံလဟဵု၊ စိုပ်အာဇိုင်ဒဵု ကၠဵုဗက်ဂြဲတံင်၊ ပၠောပ်စွံလဝ်ကီု ပ္ဍဲထီုဒမံင်၊ ဇန်ဂမၠိုင်ဟေင် ကလေင်တာန်ဆံင်၊ ဂၠေါဲစဴကၠုင်မာ ၜါလပါ်ဂၠံင်၊ လုပ်စိုပ်ဒၟံင် ဍောတ်ဇၞော်ကၠဵု၊ လုပ်စွံတုဲရ ယက္ခဂှ်အဵု၊ နန္ဒာယက္ခာ ပမာညံင်ကၠဵု၊ ပ္ဍဲထီုဂှ်ပၠန် ဂွံတန်တွဵု၊ ဒှ်မယိအဵု ဒဵုကဵုလမုဟ်၊ ပ္ဍဲလှောံဗြၜင် ဂနင်ဍုင်ဂှ်၊ ဗဴဂနင်ဍုင် ပ္ဍဲဒဵုသၠုင်မြဟ်၊ ပိသၞာံမွဲဝါ မဟိင်သာသၟဟ်၊ ပိသၞာံဍေံစဴ ကလော်ဗြဴဂှ်၊ ဒဵုကဵုလမှ် ဒှ်ဟဝေင်ခြာ၊... »

နန္ဒကိတ္တိ ဘုမ္မိပါလာ၊ ညးထပှ်ပ္ညုင် ဒုင်နင်တုဲကၠာ၊ သီုထပှ်ပၠန် သၟဟ်န်ညဳသာ၊ အဂ္ဂမဟေ ဒေဝဳကညႇာ၊ ဂွံပိုင်ကမၠောန် ပ္ဍဲနန်သေင်ဟာ၊ ဒှ်ဂၞကျာ်ရ အဂ္ဂမဟာ၊ ၀ဳပက်ဝဲတၟုဲ ဒးဒုင်တုဲကၠာ၊ လမုဟ်ဂွံသိုက် ဟွံဒိုက်ၜါ၀ါ၊ ဒါန်နူတမၠာ မိဂွံမြာဟေင်၊ ဨကရာတ်ဗၠာဲ နာဲသမုဲလေင်၊ တုဲကော်အမာတ် မန္ဓာတ်တ္ကံကြေင်၊ ယွံအမာတ်အဲ ပ္ဍဲနန်ဇရေင်၊ ဒၞါဲသဳနန္ဒာ ပြာသာတ်ဂှ်ဟေင်၊ မၞးတံပဝေင် ရံင်စဳရေင်ညိ၊ အုဲၚးသီသန် နန်ပြာသာတ်မိ၊ သေဏာပတိ တဲဂ္ညိပင်ယဵု၊ ကော်ရင်သ္ကံအဵု ခဵုလုပ်နန်လွိ၊ စိုပ်တုဲတွံစိ ပ္ဍဲသ္ၚိနန်ကၠတ်၊ ပံက်ရံင်ပ္ဍဲဒေန် ပ္ဍေန်စဳပၟတ်၊ ဇုတ်သၟဝ်ဒေန်ယာန် ချေံကြာန်ပေင်က္ဍတ်၊ ဇုတ်မၞိဟ်ပေင်ဗဝ် အသၟဝ်ဒေန်ရတ်၊ ဇန်တံဍေံညာတ် သမ္ၚာတ်စိုတ်သၟတ်၊ အုဲၚးထောံပၠန် ပန်ကွဳပေင်က္ဍတ်၊ ဏာထောံပ္ဍဲထီု သီုပန်ကွဳသၟတ်၊ နန္ဒကိတ္တိ သ္တုံဇွိပေင်က္ဍတ်၊ တုဲသၟာန်တိုန်သၟတ် အမာတ်ဍောတ်ဇၞော်၊ ကောန်သေထဳမွဲ ရုပ်ပြဲသော်ရော်၊ တရဴစှော်ပန် လက်သန်ပေင်ဗော်၊ ပိုဲဒုင်နင်ပၠန် လတူနန်ထော်၊ ထပ်ကဵုတဲသၟတ် ဒှ်ဂၞကျာ်ဇၞော်၊ လတူနန်ထော် ပိုင်ဗော်ကမၠောန်၊ ခုတ်ယၟုရ နာမမွဲတန်၊ မဒုင်နာမ ပဒုမ္မပၠန်၊ ဒှ်ဂကူအဲ ကောန်ဒေံမွဲတန်၊ မအာဒုင်ပၠန် ဖျန်ကဵုဒေံအဲ၊ နွံအသံကၠာ အာဟီုမွဲတဲ၊ အမာတ်သေဏာ ဘာသာကၠံမွဲ၊ လ္ၚဵုသြိုင်သၟတ် နန်ကၠတ်မိပြဲ၊ လ္ၚဵုကြကတ် ကၞတ်က္ဍိုင်ဗၠဲ၊ လ္ၚဵုတွာ်ဂၠေါဲ တိုန်ပ္ဍဲသေထဳ၊ တြုံကဵုဗြဴညာတ် အမာတ်ဍုင်ပ္ညဳ၊ ဂိုင်လးသၞာ ခေါဇာပၠးညဳ၊ ဗာန်ထဝ်ဗာန်သြန် ဟွံခၠန်နွံဇဳ၊ သၞာကျာ်သြဳ သေထဳသၟာန်တိုန်၊ ယွံသေဏာတံ သီုတ္ကံကွိုန်၊ လံဆဵုညာတ်စိ စိုပ်သ္ၚိပိုဲဗိုန်၊ မူဟိုတ်သံင်သိုန် ဟီုတိုန်အမာတ်၊ ဟီုပညႇာတာ ပ္ဍဲကာမန္ဓာတ်၊ သေဏာမိင်ပ္ညဳ ပါင်သေထဳကၞာတ်၊ တုဲဟီုသှ်အာ ပ္ဍဲကဵုပြာသာတ်၊ နွံအသံကၞာတ် နာဲပြာသာတ်နန်၊ ကဵုစှ်ေပ္တီပ္ညဳ သေထဳဒေံပၠန်၊ ပိုဲသၟဟ်မွဲဂၞဴ တုပ်တဴမွဲတန်၊ သီုရုပ်သီုပိုန် ဍိုက်ပေင်ဗိုန်က္ညန်၊ ကောန်တြုံအဲဆာဲ ကောန်ဗြဴနာဲပၠန်၊ ကဵုသၞက်ကရောဲ ကဵုမင်မွဲနန်၊ သိက်စိုတ်ဒေံပၠန် ဟီုပလန်ညိ၊ ထပ်တဲဇိုန်ကဵု တွဵုနန်လွိ၊ ကဵုပိုင်ဍုင်ရး အလုံဂၠးတိ၊ နွံအသံစိ တလတိရောင်၊၊

ဗြရတ်ကဵုဂၞကျာ်ပဒုမ္မဝတဳ

သေထဳဂွံမိင် ပဒွိင်မွဲတောင်၊ အသံသၟီဂး ဟွံစးအခေါင်၊ ဒေံဟွံစးရောင် မွဲတောင်ဟီုကဵု၊ ဆစိုတ်ကောရ ဂွံပမ္ၚဵု၊ ထပှ်တ္ၚဲဂတ သၞက်ကြကတ်အဵု၊ အမာတ်စဴပၠန် စိုပ်ထာန်နန်မ္ၚဵု၊ ဆစိုတ်ကောအဵု ယဵုဒုင်ထၜ၊ ဨကရာတ်မိင် တွိင်ပါင်ဒေံရ၊ ကော်အမာတ်ပန် လတူနန်မြ၊ နန်ပြာသာတ်ဂှ် ထပှ်ဘုံရ၊ ကၠောန်တုဲဒှ်ပၠန် ကမၠောန်ကုန်ကွ၊ ဗဵုတဴလဟိင် တာဝတိင်သ၊ ဗြဴကမၠောန်သၟတ် တိင်တိုက်သဒ္ဒ၊ သေဏာပန်ရ စဳခၠပညာ၊ သြိုင်သ္ၚိကြကတ် ပြဟ်သၟတ်တုဲအာ၊ ထပှ်ဘုံပ္ညဳ လျးရတ်ဗဳသ္တာ၊ ပါန်မုတ်ပါန်ခဳ ချူပ္ညဳလဝ်ကၠာ၊ ပ္ကဴကမတ်ဂျ ရာဲပတ်ဒၟဗ္ဂာ၊ ပံင်လုံဘုံဟာန် သီုရာဲတာန်ဆာ၊ အဆဝ်ဗလှ် တဝ်စရှ်ဗ္ဂာ၊ စလံင်ဂဥုပ် သီုဓုပ်ပြကာ၊ ရုပ်သပဝ်ကၞာတ် ဗိုတ်နာ်ဂိုင်ဏာ၊ ဟဝ်ကၠိုင်ဒျာန်သၞေင် မံင်တရေင်ဗ္ဂာ၊ တ္ၚေက်ဒြင်တ္ၚေက်လဵု သီုကဵုပူပါ၊ ချူပြေင်လဝ်က္ဍင် ပါင်တရင်ဒွါ၊ ရုပ်ကၠမင်ဂဝ် သပဝ်ဟာန်ဇာ၊ ကၠဇၞော်ကၠဗြန် ဗၜဵုယောန်အာ၊ ပဏုတ်ကသူ ချူလဝ်ဂၠိုင်ရာ၊ ရာဇာဒမာတ် စဵုသွာတ်ဒနာ၊ သပဝ်ဗိုတ်နာ် ပ္ဍဲဍာ်ဂင်ဂါ၊ ရုပ်စိင်ဆဒ္ဒန် ဨရာဝဏ္ဏာ၊ ဗၜေံဂၠဴဝါ သအဳဗ္ဂာပေင်ဟး၊ တဵုတၞံဗြာတ်တ္ၜဴ သတ်ဗြဴတၞး၊ သတ်ဗြဴသီုသၞိင် သတ်ဓရိင်ပျး၊ ဗြာတ်သီုသၞိင်ဗ္ဂာ တာသီုသၞိင်ပြး၊ ဗြော်ဗြးပေင်ဟး သဏးပေင်တိ၊ က္ဍိုင်ဇၞောဝ်အလာံ ကာဲဝရာံဂ္ညိ၊ ပ္ကဴဒၞါဲမဂေါဝ် မြမောဝ်ဂန္ဓိ၊ တလာဲလၜက် ကဵုကွက်ဂညိ၊ အလာံထိမြိ ဂ္ညိဂ္ညာတ်စိစီု၊ ပၞာင်တိုင်စဳပျး တမးညံင်ဂီု၊ ဂၠိက်ယာတ်ထဝ်သြန် စွံပ္တန်လဝ်ကီု၊ ဓုပ်သ္ၚဴလစး စဳပျးအိုဿီု၊ လျးဂဵုခၠင်ပ္ဍီု သီုကဵုလျးသ္ဍဴ၊ ဂီုကဵုဂီုဆက် ကွက်တလာဲတဴ၊ ကြက်စလန်အဵု သီုကဵုအဂၠဴ၊ စံင်ဂဂုဲလဝ် မြမောဝ်လောန်တဴ၊ မြမောဝ်ပြာထာ ဒေဝဒါသ္ၚဴ၊ မြမောဝ်ကမြဴ မောဝ်ပ္ဍးတဴဟေင်၊ နန္ဒကိတ္တိ နွံဣဓိတၟေင်၊ ဖျန်ကဵုအမာတ် မန္ဓာတ်တ္ကံကြေင်၊ ယွံအမာတ်တံ နာဲတံစဳရေင်၊ လိက်တရးဏာ ရာဇာသာန်ဟေင်၊ ဆတိုန်ကဵုဍုင် ပရဲ - တၟေင်၊ ပိစှော်ၜါပ္ညုင် က္ဍိုပ်ဍုင်ပဝေင်၊ လိက်ရာဇာသာန် တမံကွာန်ဟေင်၊ တခဳစဳရေင် ပြေင်အက္ခရာ၊ တခဳချူလဝ် အခဝ်ညံင်ဂွါ၊ ဍေံကေင်စဳရေင် ပြေင်လိက်သၠတာ၊ ပ္ဍဲလိက်ဂှ်ဗျိင် ဟီုပၟိင်ဏာ၊ လိက်အဲတုန်စိ ကိတ္တိရာဇာ၊ ဟိုတ်ဒှ်မွဲဗဵု နူကဵုတမၠာ၊ ပိစှော်ၜါဍုင် ဒးဒုင်ဒၟံင်ကာ၊ အဲသၟီဇၞော်စိ ကိတ္တိရာဇာ၊ သၞက်ဖရောဲ ကောန်တြုံပြဲဖာ၊ ဒုင်ဘိသေခ ပ္ဍဲနန်မြကၠာ၊ ပ္ဍဲဖဝ်ရဂိုန် ကွိုန်တ္ၚဲအ္ၚာ၊ ဃောပုဏ္ဏမဳ ဒိတှဳပေင်ကၠာ၊ ကၠုင်ကောံအိုတ်မာ ပကာအမှု၊ ကှ်ေလိက်တုဲကၠာ စုတ်ဏာယမု၊ တုဲဗ္ဒုင်ကဵုကၠာ သေဏာဇကု၊ ဗတံတၚဲ လိက်အဲတ္ၚဲဝွံ၊ ကဵုကၠုင်ဂြုဂြု ပေါဲအမှုပ္ညုင်၊ ကလုတ်အာစိုပ် တမံက္ဍိုပ်ဍုင်၊ ပိစှော်ၜါအိုတ် ဇက်တသိုတ်ကၠုင်၊ ပိစှော်ၜါရ သၟီတလဍုင်၊ ဇက်ကၠုင်သဓဵု ကြဵုဇာသမုင်၊ သီုကွဳသီုတိုက် လ္ၚဵုဍိုက်ဂၠုင်၊ မုက်ပၞာန်ဒွံနး ပြးပေင်ဝါဓုင်၊ စိင်ချေံပြေင်ဂၠဴ ပေင်တဴဝါဍုင်၊ လလောင်သမုင် ဍုင်ညံင်ဗြံပါ်၊ သီုဍုင်ဂမၠိုင် ကျိုင်ဗ္ဂောဝ်ရုပ်သာ်၊ ...

တိုန်သဳကၠဳနာဲ ပုင်ပါဲဂါံတွာ်၊ တိုန်စိုပ်ပြာသာတ် ဨကရာတ်ဂမၠိုင်၊ ပိစှော်ၝောံကိုတ် အိုတ်တမံက္ဍိုင်၊ ဖျေံက္ဍိုပ်ဂြီုဂြီု သီုညးဂမၠိုင်၊ ညံင်ဓုပ်ပြကာ သၟီနာဲသာဂွိုင်၊ သဳကၠဳနာဲက္ဍိုင် ညးဂမၠိုင်စု၊ တုဲသၟာန်ပရိုင် သ္ဇိုင်သာအမှု၊ သွာမံင်ညိဟာ ခန်လွာနန်မြု၊ ရးပးဂြိုပ်ဝါ ပ္ဍဲခန်လွာဝွံ၊ မိပ်သ္ၚိပ်ညိဟာ ဟွံပါသတြု၊ ပ္ဍဲရးပးဝွံ အနုဍုင်ကွာန်၊ ကဵုလိက်သမာန် ရာဇာသာန်တြ၊ မၞးတံပြီုရ ပ္ဍဲအဲပကာ၊ ဗဒှ်ပေါဲသ္ဘင် အခြင်နာနာ၊ ဗိုင်ရီုမွဲဝါ ကောန်သာဂမၠိုင်၊ သီုပိစှော်က္ဍိုင် ကရိုင်ညိနာဲ၊ ဟီုကဵုအမာတ် ပူရိသာတ်ဆာဲ၊ ပေါဲနာနာသာ် ခပ်ပြာတ်ကဵုဂၠါဲ၊ စှ်ၜါဘာသာ ဗမာဒဝါဲ၊ ပသူပသေဝ် ကၠေဝ်သီုဇင်မှာဲ၊ မန်ဒိုင်မန္ဒ ဝသီုၜင်သာဲ၊ ယျောန်ကြုက်ဒှ်မွဲ သီုရဲဓဝါဲ၊ ကသှ်ေကျိုင်ဗြော် ဗော်ရဲၜင်သာဲ၊ မန်ကဵုကရေင် ဖျေင်မုက်ပၞးဗ္ဒာဲ၊ ဒလိန်ဒလာဲ လှ်ေပဂါဲဍုတ်၊ ဗမာသီုဓဝါဲ ၜင်သာဲပြက်စုတ်၊ ခမှေန်ကဵုယျောန် ဒက်ဒေါန်ခဍုတ်၊ လှ်ေပ္တိုန်တဲဒျာန် ဗၠာဲပ္ကာန်ကဵုဝုတ်၊ လှ်ေပလှ်ေဍုတ် ဗြဴဝုတ်တဆိင်၊ ပုင်တိုင်ပရှ် ပေါဟ်ပ္တိုန်ဒြင်ဂၞိင်၊ ပလှ်ေမုက်မတ် လျတ်သီုဂၞိင်၊ ပလှ်ေမုက်ဂါဲ လှ်ေတွာဲကောန်သၟီ၊ မုက်မတ်လွိင် လျးကၞိင်ဖြာဖြာ၊ ပေါဲသၟီရာဇာ နာနာသာ်ပၠန်၊ ပေါဲမန်ဂၠိုင်နဲ ပြိုင်ကဵုပေါဲယျောန်၊ သီုကြုက်ဒှ်မွဲ ပြိုင်ကဵုပေါဲမန်၊ ဇန်တံတွာ်ဂၠေါဲ ရဲရးတံပၠန်၊ ကဵုကွဳကဵုစောတ် မှတ်ကၠုင်မွဲတန်၊ ညးဗ္ၚညးဂြိုပ် စိုပ်ကၠုင်လီၜန်၊ က္ဍိုပ်ဍုင်မုဟ်ရး လဗးလုပ်ပၠန်၊ သီုသေံသီုမန် ဇက်ပၠန်လုပ်ဍုင်၊ ဗဵုပေါဲမန္ဓာတ် တွာ်တိုက်ဍိုက်ဂၠုင်၊ ရးကးဒယှ် ပရဟ်တွာ်ကၠုင်၊ တိုက်တိုက်ဂၠုင်ဂၠုင် ဇက်ကၠုင်ရုရု၊ ဂၠေါန်ပးၚိတ်သ္ဇင် လက်ၚင်ထဥ၊ သ္ဍောန်ဇုက်သၞာံ လေံပေန်သ္ဍာံစု၊ ဗတက်ဆေဝ်လုန် ဂဇုန်ကၞတ်ဆု၊ ပတဴဇိုင်ဂါဲ လှ်ေတွာဲထဥ၊ ထာင်လကေတ်ဗု တူဆုဂဇုန်၊ တုပ်ပမာတုန် ဂစေံဍုန်ဆု၊ ဍုတ်မြာ်တဲၜါ တွာ်ဂါံအာဂၠု၊ စ္ဍောန်ဇုက်သၞာံစု တူဆုသမၠုင်၊ နွံကွတ်လအိတ် လ္ၚဵုၚိတ်ဂၠုင်၊ လ္ၚဵုအေန်သၞာ် ညးဗာ်အဲဒုင်၊ လ္ၚဵုတက်လေံ ပၠေံအာပၠေံကၠုင်၊ လက်ဗန်လက်ပၠုဲ တွာ်ဂဟုဲဒုင်၊ တက်ကၞက်ကြုင် သၠုင်သၠုင်သဝ်သဝ်၊ အေန်သ္ဇင်တဲၜါ ရေင်ဗ္ဂာသဝဝ်၊ ညးဗာ်အဲဒုင် ဒုင်ဒးသ္ဇင်ကဝ်၊ ညးဗာ်အဲဗာ် ဆာတ်ဒးတံက္တောဝ်၊ ဆီပြးဍေင်ဇွောဝ် က္တောဝ်စာ်အာ၊ လက်ပၠုဲလုပ်ဗ္ဂပ် သ္တပ်သ္တးညဳသာ၊ တုပ်တုဲအေန်ပၠေံ ခြေံကၠုင်ခြေံအာ၊ ညးတေံအဲစာဲ ဂါဲတိတ်သီုၜါ၊ လုပ်မွဲဗလး ပြဟ်ဗၠးတိတ်အာ၊ ညးစာဲအဲစာဲ သြာဲတိတ်သာသာ၊ ထုဲဓရုဲအာ ဒေင်ၜါပြာ်တံင်၊ ဇန်တံတုန်ရော ဗဵုကၠောံဟောကၠံင်၊ ဂမှဳသင်ကီု အိုတ်သီုပဝံင်၊ ဗဵုပေါဲလက်ပၠုဲ ထုဲဓရုဲမံင်၊ ထပိုဲလကေဝ် တွာ်ကြေဝ်လုံဂၠံင်၊ လုပ်ဗဵုပေါဲဍုင် တွာ်ကၠုင်ဗြံင်ဗြံင်၊ ဂၠေါဲကၠုင်ဂြုဂြု ရုရုသံင်သံင်၊ ဇက်လုပ်ဟောကၠံင် ဍုင်ညံင်ဗြံပါ်၊ ဂၠိုင်ကဵုဘာသာ ပေါဲစှ်ၜါသာ်၊ သီုပေါဲဂလာ ပေါဲသေံၜါသွာ်၊ သေံဂတိုပ်တာ ဂလာဂၠိုင်ဒွါ်၊ သီုဗြဴသေံသၟာ် ခါတ်ဂၠိက်တွာ်ဂါဲ၊ ဂၠေါဲဗဵုပေါဲဍုင် တွာ်ကၠုင်ဇြာဲဇြာဲ၊ တမံအဲညး ဂြိုင်ဒၟံင်ဟးဟာဲ၊ ရဲဝုတ်တံဆာဲ ဂၠါဲဗက်ခရေတ်၊ ...

သေထဳတြုံဗြဴ ရံင်တဴဖေက်ဗၠေတ်၊ ဖေက်လောန်အခိင် စိင်ချေံဂၠဴဂေတ်၊ ကယိုင်ကောန်ဗြဴ ဂေါဝ်တဴပၠေဝ်ပၠေတ်၊ လျးထဝ်ဂဵုရေတ် ဗ္ဂေတ်လုံဇကု၊ ဝက်သၞေက်ယျင် လျးခၠင်တသု၊ မာလေဝ်ကမက် ကွက်ရတ်ဇံမု၊ ကၞတ်သော်ထဝ် သီုပ္ကဴထဝ်ဂၠု၊ သၞေက်မၞိက်သ္ကဲ ရေင်ဗၠဲကၞု၊ သၠဇြဲလယှ် ပှော်မံင်ရုရု၊ ကၞိင်ၜတ်တသု ဇံမုဂကူ၊ ဒၞေင်မတ်ဝိုင်သာ် ဒမင်ဍာ်အူ၊ မတ်လစံက်သ္ဇုင် သမုင်ဝိဇူ၊ ကၞေင်ဂၠးဥပ္ပဵု လျးဂဵုသရူ၊ ဂၞိင်ဝန်သြိုဟ်လး စၞိန်စးဒ္ဂူ၊ ဒဳက္ၜံင်တံင်ယျ ကဒလိအူ၊ တဲညံင်လောတ်ဗၠဲ နဲလပှ်ဇၟူ၊ ၚေက်ကိုဟ်ရေင်စု မြုဗိုတ်ဂေါဝ်ပၠေဝ်၊ ရမျှာင်ခိုဟ်လောန် ဟီုပၠန်အရေဝ်၊ ကြဝိတ်ကျဟေင် ခဏေင်ဆေဝ်ရေဝ်၊ မိင်ဒးဥူမတ် သၟိက်ဂွံကြတ်ဆေဝ်၊ ပံက်ဝါစာလေဝ် အရေဝ်မွဲမွဲ၊ ကောန်ဂကူပ္ညဳ သေထဳမပြဲ၊ ဂါံစှ်ေဍိုက်ဝဝ် မိကသဝ်ဗၠဲ၊ ကမၠောန်တံအဴ ဗက်တဴဝဝ်ဂၠေါဲ၊ တြုံဗြဴသေထဳ ဍိုက်ကွဳမွဲတဲ၊ ပၠတရဴပၠန် ဟွံညန်ဟွံသ္ၚောဲ၊ ကမၠောန်ဗက်ဂၠေါဲ ၝဲဒေံဗိုင်ဟော၊ စိုပ်ထာန်ကြကတ် ဇၞော်သွတ်ဂၠိုင်အြ၊ ဒုမ္မဝတဳ ကျာ်သြဳအယော၊ တွာ်ဗက်အာမ လဇအာရော၊ ဂါံတွာ်ယောသော ကမၠောန်ဟောတဴ၊ လုပ်ကၞာရတ် ဒုမ္မဍောတ်ဗြဴ၊ တူဗဝဝ်ရတ် မုက်မတ်တ္ၜတ်သြဴ၊ ကမၠောန်ကမြဴ မံင်ဖဴမိသၟတ်၊ နန္ဒကိတ္တိ သီုမိဗြဴရတ်၊ ကယျိုင်ကောန်ဗၠာဲ စရာဲပြာကတ်၊ သၠိုက်ၝောံကိုတ်ပၠန် ဒက်ခါဲဗန်သၟတ်၊ လက်ကြာပ်ကနှ်ေ ကၠေဟ်လဝ်ဗိုန်ဗတ်၊ သၞေက်ထဝ်စဳရေင် မၞိက်ရေင်မတ်၊ မာလေကမက် ကွက်ကံလယတ်၊ ပ္ကဴထဝ်လယှ် လတှ်ပြာကတ်၊ ပ္ကဴဗၠဲသီုစုံ ပ္ဍဲဘုံကၞတ်၊ သြီုသြီုလယတ် မတ်ဂဵုဖျဴဖျဴ၊ ဂါံတွာ်လုပ်အာ ပ္ဍဲသၞာပ္ကဴ၊ သၠောံယာတ်ကၟဝ် ကြာထဝ်ဍိုပ်ဍဴ၊ ဗၠာဲတံဗက်ဂၠေါဲ ဗွဲလက္ကရဴ၊ ပ္ဍဲသၞာထဝ် ဗွဝ်ရတ်အဴ၊ တိုန်ဂဇံတဴ ဗြဴထဝ်အလေင်၊ ဗော်ဗၠာဲဗြရတ် ဍောတ်ဇၞော်ဒၟံင်ရေင်၊ ဖဴကမၠောန်ဟေင် ဂဇံရေင်ဒၟံင်၊ ရဲဗြဴကမၠောန် သၟဟ်န်ဟောကၠံင်၊ ဗၠာဲတံကျောဝ်ရံင် ဂၠံင်ပ္ကဴပတ်ဒၟ၊ တဲဍေံဂၠါန်လောန် လီၜန်ဂၠါဲခြ၊ ဂၠါဲဂၠါံချတ်ဂၞိင် လဟိင်ဂြိုင်ခ၊ တဲဍေံတံင်ရ ညံင်ကဵုမတာ၊ အမာတ်တံအဴ သီုဒဴဗညာ၊ ဗော်သ္ဇင်ဝင်တံ တမံညးကၠာ၊ သေထဳသမ္ၚေဟ် ညးလွေဟ်ညးဝါ၊ ကောံပ္ဍဲကၞာ ဗညာမုက်သ္ဇုင်၊ သေထဳရးကး ဒၟံင်မ္ၚးဍုင်၊ သေဏာအမာတ် ဗိုက်ယာတ်ဂေါဝ်သ္ဇုင်၊ ပိစှော်က္ဍိုင်ဗ္တာင် ဂစာန်လုပ်ကၠုင်၊ ညးရးညးကး ညးလွေဟ်စိင်ဂၠုင်၊ နဳဂီုညးဍုင် လုပ်ကၠုင်ပေင်က္ဍတ်၊ ပေင်ပ္ဍဲရိုင်ကၠာ ခန်လွာနန်ကၠတ်၊ ဨကရာတ်စိ ပိစှော်ၜါသၟတ်၊ ဂဇံရေင်စူ လၟေင်ဘူဝတ်၊ နန္ဒကိတ္တိ ဒှ်မိမသၟတ်၊ စန်လက်အဆတ် ပြဲသၟတ်ဇၟာပ်တင်၊ ကညာထပှ် နုက်ကၠဟ်ထဝ်ဒြင်၊ ဍာ်လစအဵု ကဵုအာတုက်နင်၊ ကဵုအာတုက်ကၠာ မှာရာဇာဝင်၊ ကညာထပှ် ကၠဟ်ထဝ်ဂဵုခၠင်၊ ထပ်တဲကောန်က္ဍင် ပ္ကင်ရင်နန်မြု၊ ကဵုဒှ်သၟီသၟတ် ဗြရတ်ကောန်ဂၠု၊ ပ္ဍဲရာဇာဝင် မင်ဂလဝွံ၊ သၟဝ်ဇာထဝ်ပ္ကာန် သၟဝ်ဖ္ဍာန်ကၟု၊ သီုတြဒစာံ မန္ဒြာံလဒု၊ ဒက္ခိဏဝဝ် စဝ်ဍာ်ကၞု၊ မန္ဒြာံလဒု ဗရုဖဍောတ်၊ ဨကမေတ္တာ မန္ဒြာပြာကတ်၊ သဗှမန္ဒြာ ရာဇာဗြရတ်၊ သတြုမန္ဒြာံ ဇဲယာံပြာကတ်၊ ဗြဟ္မဏသၟတ် ဖဍောတ်မန္ဒြာံ၊ ဒသဒိသာ မဟာဇဲယာံ၊ သဗှသတြု ဥပဒ္ဒဝါံ၊ သီုတြဒစာံ မန္ဒြာံဖ္ဍောတ်၊ ခုတ်ယၟုသၟတ် ဗြရတ်ရာဇ၊ ပဒုမ္မပ္ညဳ ဒေဝဳရုပ္ပ၊ ထပ်တဲညးၜါ ကြာပုရိသ၊ တဲသ္တုံတြုံပြဲ ဗြဴတဲဇွိရ၊ သီုၜါထပ်လဝ် ညံင်လောတ်ထဝ်ဂျ၊ ဒက်တောဝ်ကၟု ကောန်ဂၠုၜါရ၊ ကဵုပ္ကင်ရင်ဍုင် ဒုင်ဘိသေခ၊ ပိစှော်ၜါက္ဍိုင် ဗိုင်ပြီုရာဇာ၊ တရိုပ်ကဵုရ ရတ်ၜါပြကာ၊ တရိုပ်ကဵုဇဳ ဗၠဲဂွါနဳလာ၊ ညံင်ဗြဲရတ်ဂူ သြူသြူဖြာဖြာ၊ သေထဳသမ္ၚေဟ် ဖျေံကဵုလာပ်ကၠာ၊ ဒၞါဲနွံပိုန်ဘိုက် ဍိုက်ပေင်ဘောဂါ၊ သ္ကိုဟ်ဖျေံဖြာဖြာ ဂၠိုင်ဘာသာဟေင်၊ သေထဳရးကး သၠးကဵုဟွံဝေင်၊ ညံင်ဗြဲရတ်သၟဟ် ပယျာံဂှ်ဟေင်၊ ဗြုမံင်ခြေင်ခြေင် သီုပြေင်စိင်ကွဳ၊ လလောင်သဓဵု ဗြုကြဵုတဝဳ၊ ဖံမံင်လဒု ဗြုကၠံင်တမဳ၊ ခပဵုခရာ ဗြုအာတဝဳ၊ ဗြုမှုဲလလောင် တက်မံင်ဇိုင်ၜဳ၊ ဗရုဂဟဳ ဇိုင်ၜဳသဳဒန်၊ ခပဵုဒြင်စိင် လဟိင်စိုတ်ဇန်၊ ခပဵုဒြင်ပြေင် ဗြုခဏေင်လောန်၊ ဒြင်တလိင်ပၠန် ဒက်ဒေါန်ညံင်တွိင်၊ ကောန်သၟီစဴသၟီ ဍိုက်စိင်စဴဍုင်၊ ပိစှော်ၜါက္ဍိုင် ရိုင်င်ဇက်ကၠုင်၊ ကလေင်စဴဟာန် ထာန်ဇကုပ္ညုင်၊ ဗြရတ်ဂေါဝ်သ္ဇုင် ဂွံပိုင်ဍုင်သၟတ်၊ ကောံဂၞကျာ်ကၠာ ၜါမွဲနန်ကၠတ်၊ ဒေါဝ်ဗြဴကမၠောန် တန်တူဒေန်ရတ်၊ ကောံဂၞကျာ်ရ ပဒုမ္မသၟတ်၊ ပပိုန်ကဵုဒါန် ထာန်ဗုဒ္ဓရတ်၊ ပ္ဍဲပန်ဒိုဟ်ဍုင် ဇန်ကၠုင်အာထတ်၊ ဗစဲပန်သၟတ် ပုင်ဝတ်ရိုဟ်တ္ၚဲ၊ ကမၠင်လအာတ် ပိဏ္ဍပါတ်ပြဲ၊ ရုင်ဒါန်ပန်က္ဍင် ပၟင်ပမွဲ၊ ဖေင်ယာတ်ထဝ်သြန် ဟွံခၠန်ရိုဟ်တ္ၚဲ၊ ညးၜါစုတ်တဲ မွဲတ္ၚဲဟွံသ္ဂုတ်၊ ဖန်တံတ္ၜန်ထိ ညိဟွံဖလုတ်၊ ဇရာဗျုထဴ ၜတ်သြဴသီုဝုတ်၊ ဒါန်မပြဲပြဲ ရိုဟ်တ္ၚဲသေင်ဟာ၊ သဳဒစာံပ္ညဳ သဳဗပေင်ကၠာ၊ သဳမသုန်ဒ္ဂိုန် သွိုန်ဘာဝနာ၊ သီုဝဳဝဲတုန် မသုန်ပြကာ၊ သီုမိမၜါ ဟွံခြာဖလုတ်၊ ဒယှ်ပြာထာ ဇၟာပ်ဘာသာခုတ်၊ ဇန်တံကၠုင်အာ ဗော်ရာဇာဒုတ်၊ ဗော်ဝါနိဇ္ဇ ဗၞိက်ဟသ္ဂုတ်၊ ဇန်ဟွံဖလုတ် ဟွံသ္ဂုတ်ကၠုင်အာ၊ ဒယှ်တမ္ညဝ် အံသဝ်ပြာထာ၊ ဗြရတ်ပ္ကင်ရင် နန်ဗတင်ဇာ၊ ဒယှ်ပြာထာ သၟီနာဲသာဇန်၊ သာဓုဟောဒြာ ဗမာသေံမန်၊ ဒယှ်လောန်လာန် ဒါန်မဇၞော်သန်၊ ဂၞကျာ်ကဵုသၟီ ပ္ဍဲသမၞိင်နန်၊ ညံင်ထာင်ကဵုထိုက် သ္ဍိုက်ပ္ဍဲမတ်ဇန်၊ ပ္ကင်ရင်ဍုင်ပၠန် တန်တဴဒၟံင်လံ၊ မွဲအယုက်အဴ ဒၟံင်တဴဗိုန်ဇၟံ၊ .. » စုတိလောန်အာ ၜါမွဲတမံ၊ ကၞတ်အယုက်ဆာဲ ကံနာဲဟွံလံ၊ ဗြရတ်မွဲတၟံ နာဲတံကလင်၊ ရုပ်မွဲမံင်သၠင် နာံဆင်ဒဴအာ၊ အာက္တဵုဒှ်ပၠန် ကောန်သၟီပဉ္စာ၊ ဒှ်သုဓနု ယမုပြာထာ၊ ဣဏင်ကင်ရဳ ဒေဝဳယက္ခာ၊ ကောန်သၟီဒုမ္မ ကာလဂှ်ကၠာ၊ မနောဟာရဳ ဒေဝဳကညာ၊ အာက္တဵုဒှ်ကၠာ ပ္ဍဲကေလာသ၊ လၟေင်ဒဒှ် တဝှ်ဂါမ၊ ပုံဗြရတ်ရ အိုတ်ဆဝွံတုန်၊၊ ... ၊၊ ... ၊၊ ... ၊၊

• ပ္ဍဲသက္ကရာတ်လ္ၚီၜါကၠံထပှ်စှော်တရဴ ဂိတုခ္ဍဲသဳမွဲစွေက် တ္ၚဲဗြဴဗတိ ပယျာံဂယးစှ်နာဍဳ ဇိုင်ကၞေဟ်ကှ်ေတုဲရအဴ၊၊

ကှ်ေပ္ဍဲကွာန်ကြေဝ်ဏာ၊၊

ဖဵုအဲကှ်ေလဝ် အ္ခဝ်ပိတကတ် လိက်ဗြရတ်ဂ္ညိ၊ ဂတဝွံစိ တ္ၚဲစုတိအဴ စဴဘဝပလိုက်၊ ပိုန်မၞိဟ်ပိုန်သွဝ် ဗဝဝ်ဘောဂ စနတသိုက်၊ ဖဵုဒုင်ဒဒိုက် တသိုက်နဳဗာန် ပ္ကာန်ကြဴတဲညိ၊၊

မင်ဗၠာဲဆာံပျာ ပဒကာသၟတ် လိက်ဗြရတ်ဂ္ညိ၊ ဘဴဂတစိ ညိပကဵုသ္ၚောဲ ပ္ဍဲသမၞိင်က္ဍိုင်၊ ပိုန်မၞိဟ်ပိုန်သွဝ် ဗဝဝ်ယဿ ကဵုဂွံစသိုင်၊ ဍုင်နိဗှာန်ဂွိုင် ကဵုဂွံကျိုင်စဴ ဖဴကျာ်တြဲညိ၊၊

ဒကာလိက်ဝွံ ရဲကွာန်ကြေဝ်ဏာရောင်၊၊