လိက်မဒကောၚ်ပိုန်

လိက်မဒကောၚ်ပိုန်

သွက်ကောန်ဂကူဘာသာမန်ဂမၠိုၚ်တံ သ္ဂောံတီကေတ်ပရူသၟိၚ်သာဲလေဲ, မပ္တိုန်ကဵုကွိုန်စရာဲဍုၚ်ဟံသာဝတဳ မပိုၚ်ပြဳလဝ်ဂြိုပ်, က္ၜဳ မဂွံအလဵုအသဳ − ပ္ဍဲအလုံတွဵုရးရာမညညးဂမၠိုၚ်မ္ဒးရှ်ေသှ်ေရဴဂဴလိက်ဗွဟ်မွဲ − မၞုံယၟု မဒကောၚ်ပိုန်ပြာကတ်လလောၚ်တမ်ညဝ်အလုံရးဍုၚ်ရောၚ်။

ကျာ်ဇၞော် ကုသလ ဘာကျာ်သြဳမည်−ပါဠိတက္ကသိုလ် (ဍုၚ်လ္ဂုၚ်)

နိဒါန်

    	လိက်ဝွံအဲဆန် ဟီုပၠန်မွဲတောၚ်။ လၚ်္ကာကဝိ ညိဟွံကဵုယောၚ်။ ဍိုက်ပေၚ်ကဵုရှ် ဗှ်စိုရောဍောၚ်။ ဆမိပ်ဒးဂြဴ မှောဝ်ဇဴစိုတ်သၠောၚ်။ ချူကှ်ေဇွိတ်ၜိုတ် ပိုတ်ဖျုန်ရောၚ်ယောၚ်။ ပိုဲမည်ဘာသာ ကၠာတေံမွဲတောၚ်။ ဂွံဒုၚ်စသိုၚ် ဂၠိုၚ်ကဵုအခေါၚ်။ မုက်မတ်ရာၚ်ဆာဲ စရာဲဂေါဝ်ရောၚ်။ ဆဂးဟီုဂှ် ဗှ်ကံမွဲတောၚ်။ လောန်ကၠုၚ်လံလ ဘဝပိုဲရောၚ်။ ဂၠိုၚ်ကဵုဒြပ်ရတ်ပြာကတ်လလောၚ်။ ပိုန်ဨကရာဇ် ဟွံဝါတ်ဆောတ်ယောၚ်။ ဂကူမည်အဵု နွံဝဵုဂွံအခေါၚ်။ ပိုၚ်တိဍာ်ရောၚ် မွဲ

တောၚ်ဂးလဝ်။ ။

ဂၠိုၚ်ကဵုပယျာံ သၞာံသံဝစ္ဆဝ်။ အုပ်ဓုပ်ပိုၚ်ပြဳ လဵုသဳတမ်ညဝ်။ ဂကူမည ဝံသသၟိၚ်ဓဝ်။ မၚ်မွဲဘာသာ ပညာတိုၚ်ထဝ်။ သာသနာအဵု စံၚ်ဗဂဵုလဝ်။ ဖေက်တိမဇကၠေံ သၠေံဟေန်သပဝ်။ ဖေက်တၞုက်ပိုတ် အိုတ်ပ္ကဴဇဝ်။ ဖေက်တၞံဒေါမ်ဗြောံလီုကာဲကဝ်။ မၚ်မွဲကၠုၚ်ရ တၠသၟိၚ်ဓဝ်။ ပိုၚ်ပြဳအုပ်လဒံယၟုတမ်ညဝ်။ ဖါသီမုဟ်တၟံ သဓီုတၟံထဝ်။ ဟံသာဝတဳ ကျာ်သြဳအံသဝ်။ မၚ်မွဲပိုၚ်လဝ် အသဝ်လောန်ကာဲ။ ။

    	ဗှ်ကံအတိက် သိက်ပရေနာဲ။ ကၠာတေံပိုဲမန် ပိုၚ်နန်ဂဵုဍာဲ။ ဂွံအဝဵုခြိုၚ် ဂၠိုၚ်ကဵုအာဲကၟာဲ။ ပိုၚ်ရးဍုၚ်ကွာန် ထာန်တၠနာဲ။ မိပ်သိပ်လဟိၚ် ဇူသၞိၚ်သြိုဟ်ယာဲ။ မုတ်မတ်ရာၚ်မံၚ် ညံၚ်ထဝ်ဂဵုဍာဲ။ နူဂှ်အဆက် ကြက်ဒးပြးဆာဲ။ လီုလာ်ဇဳဂၠံၚ် ရံၚ်အာဂၠိုၚ်ဒၞာဲ။ သၟိၚ်ပြးနူနန် လန်ထောံအာဲကၟာဲ။ ဒးကၠၚ်တဟး ကောန်ပြးနူယာဲ။ သမ္ဘာကဵုတၠ ဝံသကဵုနာဲ။ ကွးကဵုအ္စာ ဒးကာဗက်ဂၠာဲ။ ပြးနူဒမံၚ် ညံၚ်ဂြုန်ဟိုၚ်သာဲ။ လီုလာ်ပြးဆာဲ သာဲချိုတ်ဂယိုၚ်။ 	။

ပိုန်လောကဳရ ဆညိရောပိုၚ်။ ကၠာတေံမန်တံ ဗိုန်ညံၚ်တၟံတိုၚ်။ နွံကဵုဨကရာဇ် ပြသာတ်နန်ထ္ၜိုၚ်။ လ္တူပၞၚ်ထဝ်ဗွဲသၟဝ်က္ဍိုၚ်။ သံက်စရှ်လဝ် နွံအသဝ်ဂၠိုၚ်။ ဍိုၚ်ပေၚ်ကဵုမ္ၚဵု နွံအဝဵုပိုၚ်ပိုၚ်။ လၟုဟ်ဟွံမွဲသွံ ထောံလဝ်ပွိုၚ်။ ဒဴကၠေံဝံသ ဟွံပသဇိုၚ်။ သာ်လဵုဂွံပ တော်ဆကဵုဂၠိုၚ်။ ဍုၚ်မည်ဂးရ ဂွံဆမိၚ်ပရိုၚ်။ ဗွဲစၟတ်သွံ ပိုဲရောဟွံပိုၚ်။ နွံဒၟံၚ်ကွေံရ သှ်ေဆပွိုၚ်။ ဗှ်ကံအတိက် ဒှ်ဍိက်ပိုၚ်ပိုၚ်။ ချပ်အာအိုတ်ဇိုၚ် ဂၠိုၚ်သၞာံကာလ။ ။

    	ယွံကလောပိုဲ ဟိုဲဗော်မည။ ဂၠိုၚ်ကဵုအခါ ကၠာတေံဒှ်တၠ။ လၟုဟ်ဒှ်ဍိက်ဂၠုဲ ဒုဲအိုတ်ဝံသ။ ဟွံမွဲသၞေဟ်သၚ် ကၠၚ်ဟဳဒၟံၚ်ရ။ ဗှ်ချပ်စံၚ်တူ မူဝိပါက။ အရေဝ်လိခ်ပတ် ဒ္ဂေတ်ဝတ်လောက။ ဂကူဘာသာ သာသနာပၠ။ ဍုၚ်နန်ပြာသာတ် ဓါတ်အတုလ။ ပိုန်ဂၠိုၚ်ကဵုသာ် လီုလာ်မှာဲမှ။ထုဲကြာန်လီုတ္ၜန် ကၠေံဗ္ဒန်အိုတ်ရ။ ဟိုတ်မာဲဝိဝိၚ် တၠိၚ်ကၠေံဝံသ။ ဟွံမၚ်မွဲလဝ် ဓရ်ကျာ်သာကျ။ ကတညူဂုန် ဟွံဖ္ဍုန်သဳသ။ လီုလာ်ပြးဆာဲ ဂကူမှာဲမှ။ မူဝဳပါက ဝံသတၞောဝ်မည်။ 	။

အတိဒုက္ခံ ချပ်ရံၚ်ဂိလောန်။ ဗီုပိုဲဒှ်ကၠုၚ် ဒုၚ်ဘဲရောအောန်။ နူဘဝနာဲ စရာဲစိစောန်။ ဟုတ်ဗ္ဒန်စှ်ေ သှ်ေဆယၟုမည်။ ဘဝဍိက်ပၠက် ဆက်ကၠုၚ်လံလောန်။ ဒးဒုၚ်ပျဲပျာံစၞာံညံၚ်စးကြောန်။ ဒဒိုခ်သာ်ဏံ လံလသ္ၚောဲလောန်။ ဗှ်ရံၚ်စိုတ်က္ဍန် ချပ်ပၠန်သိၚ်သာ။ ။

        တၠအလဵုသဳ ပိုၚ်ပြဳပိုဲကၠာ။ သီဒက်ကောပ်ကာဲ ပြယျာဲဘာသာ။ ဇြောတ်ကေတ်ဆီစိ ညိညိအိုတ်အာ။ ပိုဲမည်တံကီု ဗီုမကၠေံအာ။ ညးကလိၚ်အဲ အဲကလိၚ်ညးကၠာ။ ဂကူပိုဲဗျိုၚ် ပိုဲဒးကလိၚ်အာ။ ဟိုတ်မကလိၚ်ဟေၚ် ဂကူသေၚ်ဟာ။ သ္ပမၞိဟ်မွဲစွံ ဟွံတုပ်လအာ။ ဟိုတ်ကုသဵုအောန် ဒးကၠောန်ထွက်ကာ။ ဂကူပိုဲဝွံ ဍိုန်လ္ၚုစှ်ေအာ။ ဟိုတ်မကလိၚ်ကၠာ ဘာသာဇြဟာန်။ 	။

ယွံကလောပိုဲ ဟိုဲသၞောဝ်ဒါန်။ မိၚ်ဟာဍောၚ်ဓဝ် အသဝ်ပိုန်ဟာန်။ နွံကဵုဨကရာဇ် ပြာသာတ်နန်ယာန်။ ဍုၚ်ပိုဲတိပိုဲ ဟိုယ်ဗော်သၞောဝ်ဒါန်။ ပိုၚ်ပြဳလဝ်ရ လံလအဓာန်။ မၚ်မွဲဂကူ လတူနန်ယာန်။ ကိုပ်ကၠာတေံဂး ဇၟာပ်ဍုၚ်ရးကွာန်။မန်တံဇၞော်မောဝ် ဂေါဝ်ဆာဲလောန်လောန်။ လၟုဟ်သုန်ဂြာံ ညံၚ်နာံဒဴပ္ကာန်။ နာံထောံဒဴရုပ် ရုပ်စိုတ်သုသာန်။ ညံၚ်ဗီုသာ်ဂှ် တုပ်သၟဟ်မွဲဟာန်။ မုက်ဍောတ်မတ်သဝ် လဝ်ပ္ဍဲဝိညာန်။ သာ်လဵုမဂး ညးမွဲရောသၟာန်။ ဗှ်ကံအတိက် ဒှ်ဍိက်ညးကွာန်။ ဂွကွေံရဏး ဟးဂိကတာန်။ ပိုန်ဨကရာဇ် ပြာသာတ်နန်ယာန်။ သှ်ေဆယၟု လ္ၚုနူပိုန်ဟာန်။ ၜိုန်ဒးပြးဆာဲသာဲသဏ္ဌာန်။ ၜိုန်မံၚ်တဴသ္ၚောဲ ညးမွဲမွဲကွာန်။ ညံၚ်ကောဒေံပၠန် ကောန်မွဲမိပ္ကာန်။ ပိုဲမန်ကဵုမန် ကဵုနွံဇြဟာန်။ သာ်ဂှ်ဟွံသေၚ် တၟေၚ်မွဲဂလာန်။ ညံၚ်ဝုတ်ကဵုဗၠာဲ ဂၠာဲဆက်မိတ်ဒါန်။ကာလကောံသၟဟ် ဒှ်ဓဝ်ဇြဟာန်။ မေတ္တာဗျဳဗျာပ် ဇၟာပ်အရာဒါန်။ တုပ်သၟဟ်သာ်ဂှ် ကဵုဒှ်ကွေံကြာန်။ ဍုၚ်မိတိမ လံလအဓာန်။ မိပ်စိုတ်မွဲဟာန် နိဒါန်မန်ရောၚ်။ ။

လိက်ဗွဟ်မဒကောၚ်ပိုန်

နမောတဿ ဘဂတော အရဟတော သမ္မာ သမ္ဗုဒ္ဓဿ နမတှုဟေၚ် ပြေၚ်သူစရိုတ်။ ဒွါပိတၠုၚ် လယုၚ်ဏာစိုတ်။ ဂုန်ကျာ်ဂမျိုၚ် ပၞာၚ်တိုၚ်ၝောံကိုတ်။ အဲလ္ၚောဝ်ကၠာဟွံခြာတသိုက်။ ဂုန်ဓဝ်စှ်သွံ ပလဝ်ၝောံကိုတ်။ တူကၞေၚ်စွံပ္ဍုန် တိုၚ်ဂုန်ပြဲသတိုၚ်။ အဲဍိက်လ္ၚောဝ် လျုၚ်လဝ်စိုတ်။ အရဳယျသၚ် ညံၚ်တၠၚ်ဗိုတ်။ စ္ဍးနူရာဂ ကိလေသအိုတ်။ အဲဍိက်လ္ၚောဝ် ပြေၚ်လဝ်စရိုတ်။ ဖဵုအဲလ္ၚောဝ် ရတ်ပိပြဲသ္တိုတ်။အန္တရာဲဆက် စှ်လက်လ္ၚီကိုတ်။ ကဵုလာဲလေၚ်အိုတ် ကဵုပၠိုတ်ဟောံညိ။ ။

ပြဲလောန်အဆတ် တိုၚ်ဂုန်ရတ်ပိ။ လ္ၚောဝ်တုဲအဴ ဗွဲကြဴဒမၠိ။ အဲပြေၚ်လဝ်ညိ သိရိဝါကျ။ တိုၚ်လၚ်္ကာပၠန် လၟေၚ်ဆန္ဒ။ ဟီုလဝ်လိခ်မွဲ ပ္ဍဲရးမည။ ပ္ဍဲရးဟံသာ ကဵုမြာဂတ။လိက်သၟိၚ်ဓဝ်ကၠာ သာဲလေဲနာမ။ လိခ်ဝွံကၠာတဲ ဆန်မွဲဝါရ။ညးဆန်တမၠာ လံလောန်ကာလ။ ဟိုတ်လံအာရ ဆန္ဒလီုအာ။ ပိုတ်ဗျုန်ယုတ္တိ ယတိယောၚ်ယာ။ ဒကုတ်ဖလုတ် ဇမောဝ်သ္ဂုတ်အာ။ သၟိက်လဟဵုညိ တၟိမွဲဝါ။ အဲဆန်ပ္ညဳကၠာ မွဲဝါပၠန်ရောၚ်။ ။ ပ္တန်သူစရိုတ် စိုတ်ပကဵုယောၚ်။ မၚ်မွဲစိုတ်ရောၚ် ပကဵုယောၚ်ချဳ။ နွံဍုၚ်ဇၞော်မွဲ ပြဲသန်ကျာ်သြဳ။ ယၟုဍုၚ်ကၠာ ဟံသာဝတဳ။ ကရိုဏ်တဏာဲ ဗတၚ်လာဲဇဳ။ နန်ဂ္ညိရတ် သ္ၚိကၠတ်ကျာ်သြဳ။ ဂိုဟ်သုံမထိုက် သလိုက်ဗစဳ။ ဆာန်ဆံၚ်ဒၟံၚ်ဂျာန်ထဝ်အာန်ဇနဳ။ ရုၚ်စိၚ်ဒၟံၚ်ထပ် ဗိုၚ်သရပ်ပ္ညဳ။ ချေံပြဟ်ဇိုၚ်သာ ဒၟံၚ်ဗ္ဂာတဝဳ။ ညးဒေါန်ညးဇြၚ် ဒၟံၚ်ထဏၚ်ဗဳ။ ဝုတ်ဒိုဟ်ဇိုၚ်မြု ထဥတဝဳ။ ဂၠိုၚ်ကဵုဝေါဟာ ဇၟာပ်ဘာသာဇဳ။ သေံဗၟာပၠန် ကၠေဝ်မည်ပသီ။ ကမၠိုၚ်ဍာ်ကၟာ ဇၟာပ်ခန်လွာဇဳ။ ပ္ဍဲဒေါဝ်ဍုၚ်ဂှ် ဗဒှ်လဝ်စေတဳ။ ကျာ်မံၚ်တဴရ နာမဂးပ္ညဳ။ ထဝ်ဗိုၚ်တဝဳကျာ်သဳလောန်ကာဲ။ ။

ပရူဒဒှ် လဖဟ်ဟီုဂၠာဲ။ ရးဟံသာပ္ကာန် ဂးကွာန်ဒမာဲ။ မူဒၞာဲကွာန်ကီု တူရူဟီုဂၠာဲ။ တဴပလလိုတ်ကၠာ ရးဟံသာဆာဲ။သၟိၚ်ဓဝသၟိၚ်ဓဝ်အကာဲ သာဲလေဲညးဟီု။ ပသာ်ဒဒှ် တိုၚ်တဝှ်ဗီု။ ပၚ်မှိၚ်ပိုဲဟီု ကြီုပထမ။ ကွာန်ဒၚ်မာဲဂှ် ဒှ်ကွာန်ဝါဗ္ၚ။ ဗြဴမွဲဂှ်ရ တ္ၚဲဗုဒ္ဓဝါ။ ယၟုခုတ်ပ္တန် မိသုကညာ။ တြုံမွဲဆတ္တဝ် တ္ၚဲသ္ၚိသဝ်မာ။ ယၟုခုတ်လဝ် နာဲဍိက်ထဝ်ကၠာ။ ဒၟံၚ်ပ္ဍြကွာန်ဆာဲ ဒၚ်မာဲသီုၜါ။ ညးၜါဂှ်ပၠန် ဆန်မွဲသၞာ။ ဂွံကောန်တြုံမွဲ နဲလိုက်စမ္ၚာ။နာဲဒကောၚ်ပိုန် ဖျိုန်ယၟုကၠာ။ မိကဵုမၜါ လွဳပရာတဴ။ ။

နာဲဒကောၚ်ပိုန် ဖျိုန်ယၟုတုဲအဴ။ ဇၞော်အာဖေါၚ်ဖေါၚ်ညံၚ်ဗီုဍောၚ်ပ္ကဴ။ စရာဲရုပ်သၟတ် ဂပ်ဝ်တ္ၜတ်သြဴ။ မိမသ္ဍိုက်လောန် ကောန်လၟာဂၞဴ။ ကြဴဝွံတုန်မာ မချိုတ်အာတဴ။ မိဂှ်ဗြဴကၟာဲ နာဲကညာဗြဴ။ နာဲဒကောၚ်ပိုန် ဒတိုန်ကြဴလှဴ။ ဒေါဝ်ဗနဳရောၚ် ကောန်နာဲဍောၚ်ပ္ကဴ။ ဂၠိုၚ်ကဵုကၠၚ်ဗော် သဳနော်လဗဴ။ ညာန်ဘာန်ကြဴလှဴ ကြဴဝွံဇၞော်အာ။ အာဒှ်ဗၠာဲဟေၚ် သမုဲလေၚ်ကၠာ။ ကျိုၚ်ကျဝ်ဂ္ညိဂ္ညိာတ် ဒးကၞာတ်ဗဳသ္တာ။ ညံၚ်ထဝ်ဒကောၚ် ညံၚ်ဍောၚ်စမ္ပာ။ ဂပ်ဝ်လောန်ထာန် ဗီုစန္ဒိမာ။ ဗြဴသုကညာ ညာတ်ကောန်ခါဂှ်။ ဒၚောဝ်ဗဵုရုပ်ကောန် ညံၚ်ညးသောန်ဗဒှ်။ ညာတ်ရုပ်ကောန်အဴ ချပ်တဴလၚဟ်။ ကောန်အဲဝွံဂှ် ရုပ်တၟေၚ်တၟဟ်တဴ။ ။

    	ကသပ်စိုတ်စိ မိကညာဗြဴ။ ကောန်တြုံအဲဝွံ အနုထာၚ်ပ္ကဴ။ စရာဲကျာ်သဳ ညဳသာက္ၜတ်သြဴ။ တောံပၞာဲဇိက်ဗ္ၚ ဟွံကြိုက်သဘဴ။ ကဵုမံၚ်ဘာအဴ ဒှ်တဴစရာဲ။ ချူကှ်ေဂၞန်ကတ် ပုတ်ဂၠတ်ဇၟာပ်ဒၞာဲ။ ပါန်မုက်ပါန်ခဳ ဗဳသ္ကဝ်မဆာဲ။ ပုံကၞာတ်အိုဿီု အဂီုစလာဲ။ လိခ်ဂွက်မၚ်ဇေန် ဗှ်ဒးပ္ဍေန်ချာဲ။ ကွတ်ပါၚ်ဇၟာပ်ဒၞာဲ ကွတ်တဲဂၠာဲဇဳ။ အာယုက်ပေၚ်သၟဟ် ကဵုဒှ်ခမဳ။သာ်ဝွံရောၚ်ဒး ဂွံစဳကၠးဇဳ။ ကဵုဂွံလေပ်သၟတ် ကွတ်ဇဳခရဳ။သာ်ဝွံပလွဳ ခမဳပြဲရောၚ်။ 	။

မိဗြဴကၟာဲအဴ ချပ်တဴမွဲတောၚ်။ ချပ်ဂွံအခေါၚ် မွဲတောၚ်တုဲမာ။ ကောန်သ္ဍိုက်လ္အိတ် ကေတ်ပ္တိတ်ဏာဘာ။ စိုပ်ဘာတုဲအဵု ဇိုန်ကဵုအစာ။ ကၞိပ်ဇံသဝ် ယဵုလဝ်တဲၜါ။ ယွံတဳလအဲမပြဲပညာ။ ကောန်အဲဍိက်မွဲ ဟွံမွဲပြတ်ညာ။ ဍေံဟွံလေပ်သၟတ် ပြတ်ညာသေၚ်ဟာ။ ညံၚ်ဂွံလေပ်ကွတ် ပြတ်ညာသကာ။ ကဵုကတ်ဗ္တောန်ဟေၚ် ဇရေၚ်အ္စာ။ ဟိုတ်ဂှ်တုန်ကၠာစိုပ်ကၠာဘာရ။ ကောန်အဲဍိက်မွဲ နဲကောန်တဳလ။ သွက်ဂွံလေပ်သၟတ် ဇၟာပ်ကွတ်သဗ္ဗ။ အပ်ဇိုန်နှၚ်ရ ကဵုတဳလရောၚ်။မိသကညာ ညိဟွံခြာယောၚ်။ သာ်ဝွံမွဲတောၚ် ဂွံအခေါၚ်ပြဟ်။ သုကညာပၠန် ဖျိုန်ကောန်ဒှ်။ ဖကန်ဖျန်ကၠာ ကဵုကောန်ခါဂှ်။ ယွံခဍောၚ်မတ် ကၞတ်ကြဳဇှ်။ ပ္ဍဲကဵုမိဂှ် နာဲပဗှ်သၞာ။ ဆဂွံဆစ ဇၟာပ်စၞကၠာ။ နာဲကၠေံစိုတ်ကတ် ဇၟာပ်ကွတ်မွဲမွဲ။ ပ္ဍဲဇရေၚ်အ္စာ နာဲပအာသ္ၚောဲ။ အ္စာမၠာ်မွဲ ယိုက်တဲလ္ၚောဝ်။လစောတ်လမောဝ် သၞောဝ်ဂၠံၚ်ကဵုတီ။ ဒၟံၚ်ကဵုသီရဳ လ္ပအီဂြိုၚ်။ ပကၠိုၚ်ကၟိုၚ် ပဂြိုၚ်စမြေဟ်။ ဗဒှ်လုဲလက် ဗမက်ပလှ်ေ။ ဂရိုၚ်ပဝေၚ် ဍေံနၚ်လေၚ်ကွေံ။ ဗမက်ပလှ်ေ ဍေံကဵုဒ ဒဒိုခ်။ သၟတ်ကတ်ဗ္တောန် ကောန်ဗၠာဲဂွံသိုက်။ မိမသ္ဍိုက်ယိုက်ပ္တိတ်လဝ်ဘာ။ ဖကန်ဖျန်တုဲအဴ မိက္တဵုစဴအာ။ ။

နာဲဒကောၚ်ပိုန် ဒတိုန်ရုပ္ပါ။ သီုမကြဴလှဴ ဒၟံၚ်ဖဴအ္စာ။ဟိုတ်ကုသဵုကံ နူတၞံတမၠာ။ ခဍံက်ညာန်လှဲ ဗွဲပြဟ်လေပ်အာ။ ချူဒှ်ကှ်ေဒှ် ဗှ်ဒးမြက်စာ။ ဍောတ်ဗၠာဲတုန်ဟေၚ် ပ္တီမိသေၚ်ဟာ။ သၟိက်က္ၜဂတဵု ဟီုကဵုမိကၠာ။ မိဂွံမိၚ်အိုတ် မိပ်စိုတ်မှောဝ်ဇဴ။ အတိုၚ်လၟေတ်ကွေတ်နူတမၠာ။ က္ၜဂတဵုဟေၚ်ရဴဝွံသေၚ်ဟာ။ ဓုပ်ပၞာၚ်ပ္ကဴပၠ ဇဗၠုသၠကၠာ။ ကွာၚ်တောဝ်တၞးပၠန် ကောန်ကသေၚ်ဟာ။ ကွာၚ်မပၞဟ် ကၠောန်ဗဒှ်ဏာ။ကွာၚ်ၚုဲဂတာံ လကံက်နာံဒွါ။ ဗြာတ်သီုသတ်ဗြဴ နှဴရဴကဝ်ၜါ။ ကွာၚ်ၜဲယိုဟ်က္ၜန် ဂၠိုၚ်သန်မွဲသာ။ ပြုပြေၚ်လဝ်ကၠာ တုဲအာဇၟာပ်တၚ်။ ။

ကော်ကယိုၚ်ကောန် ယာတ်ယန်ယာတ်က္ၜၚ်။ လစိန်စရံၚ် ဒြၚ်ဗံက်ပယၚ်။ ဗြေဝ်ဂတေဝ်ပး တၟးဂဵုခၠၚ်။ မာဲလိတ်လာၚ်ဇၚ် ဖေၚ်ကသူကၠာ။ စုတ်ကၠေၚ်ဂြးသော် ဗော်တၚ်ကတောဝ်ၜါ။ ကျိုၚ်ကောန်တုဲကၠာ တော်ဆယာယဳ။ ကၠောဂမၠိုၚ် ရိုၚ်ရိုၚ်သ္အဳသ္အဳ။ ဒၚဳဇက်တိတ်အာ စိုပ်အာတွဳ၊ အာနိမန်နၚ် သၟိၚ်သၚ်အရဳ။ ဖါပ်ကဵုဒါန်ကၠာ ဆန်အာဒၚဳဒၚဳ။ ကောန်ကွးဘာတံ ကဵုဂဇံသဳကၠဳ။ ဂတဵုကျာ်သြဳ ဒၚဳကေတ်နၚ်ကၠာ။တူဂတဵုအ္အးသၠဗြာတ်လးသာ။ တူသၠဗြာတ်သ္ကဲ စုတ်ကွာၚ်ၜဲကၠာ။ ဗၞတ်ပန်စွံဟေၚ် စုတ်ပြေၚ်လဝ်ကၠာ။ တုဲနိမန်ရ ကော်ဗ္စသေၚ်ဟာ။ ။

ပပြတ္တိက မဟာဗြဟ္မာ။ နိဒ္ဓိကာစ ဂးစန္ဒိမာ။ အၚ်္ဂုလိမာ မဟာဗဳသၞု။ အက္ခရဉ္စ ပြမေသွာရာ။ နိမန်ဒေဝတဴ ရဴဝွံဂါထာ။ အဓိပါဲသၟတ် ဂါထာဂှ်မာ။ ယဝ်သၟိၚ်တီကီု ပိုဲပျးဟီုကၠာ။ ပြပြတ္တိက မဟာဗြဟ္မာ။ ဒေဝတဴကီု မှာဗြီုဂးမာ။မဂွံအဝဵု ပိုၚ်ဂတဵုကၠာ။ နိဒ္ဓိကာဟေၚ် ဂတဵုသေၚ်ဟာ။ ပိုၚ်ဗကောဟ်ဂ္ညိ ဂးစန္ဒိမာ။ အၚ်္ဂုလိမာ မဟာဗဳသၞု။ ပိုၚ်လပှ်တဲဟီုသ္ကဲယၟု။ ဂးမှာဗဳသၞု ခုတ်ယၟုကၠာ။ အက္ခရဥ္စ ပြမေသွာရာ။ပိုၚ်အက္ခဝ်ကၠာ မှာပြမေသွဝ်။ ဒေဝတဴပန် နူဒတန်ကဝ်။ပိုၚ်ပန်စွံဓဝ် နူကဝ်မူလ။ ။ ဒေဝတဴပန် တန်ဖါပ်ဗ္စ။ သာ်ဝွံတုန်ရ က္ၜရာဒနာ။ယွံမၞးဗြီု သီုစန္ဒိမာ။ မှာပြမောဝ် ပြမေသွဝ်ကၠာ။ ဒေဝတဴပန်ပိုၚ်ပန်ပြကာ။ မၚ်ဂတဵုမြဟ် ပိုၚ်ဗကောဟ်ကၠာ။ လပုဟ်တဲဓဝ် ပိုၚ်အခဝ်ကၠာ။ သီုညးပန်ကၠာ ပိုၚ်ပန်ဋ္ဌာန။ ပိုဲသ္ပပူဇဴဗြာတ်က္ၜဴပုၚ်သွ။ အမာဲယိုဟ်ပြဲ ကွာၚ်ၜဲစၞး။ သ္ပပူဇဴဂ္ညိ ဒမၠိကာလ။ ဂးတုဲဍာ်သၠိုၚ် ဂိုၚ်စရိုဟ်ပၠ။ ယွံမၞးမပ တၠနုဘဴ။ ဖဵုအဲဍိက်က္ၜ ဂွံပပူဇဴ။ ကောန်အဲဍိက်အဴ ပ္ဍေန်တဴညာန်လှာဲ။ ပြကိုဟ်ပုံကၞက် လိက်ဂွက်နဲကဲ။ ကဵုတိုန်ပါၚ်စိုတ် အိုတ်စမဟ်တ္ၚဲ။ ပညာညာဏ်လှဲ နဲကာသဂၚ်။ လောကဳဗဟဳ ဇဳဇာပ်ကလၚ်။ ကဵုတိုၚ်ပါၚ်စိုတ် အိုတ်တၟံတၚ်။ မၞးတံထံက်ပၚ် ရီုဗၚ်ညိအဴ။ ။

သာ်ဝွံတုန်ရ ရာဒနာတဴ။ က္ၜဂတဵုအဴ တုဲဒှ်တဴကၠာ။ ဒရီုသကအ် ဂပ်လံကာဖါ။ တုဲကလံဂ္ညဳ သၚ်အရဳမာ။ ဒၚဳက္တဵုစဴဒၟံၚ်ထာဏ။ ဍောတ်ဗၠာဲဂေါဝ်ဇြုၚ် ဂိုၚ်ဒေပ်ပုၚ်သွ။ တုဲဂၠာဲကတ်အာ ဇရေၚ်အ္စာပၠ။ ဟိုတ်ဝါသၞာ တမၠာမူလ။ ကတ်တိုန်ပါၚ်တဲ ပ္ဍေန်မွဲခဏ။ လိက်ဂွက်မၚ်ဇေန် ပဍေန်တိုန်ပါၚ်ဂျ။ ပုံကၞက်အဂီု ဒၞာဲဟီုစဳခၠ။ ရမျာၚ်ညံၚ်က္ၜိၚ် မိၚ်ဒးသ္အဳရ။ ကွတ်ပါၚ်ကွတ်တဲ လေပ်မွဲခဏ။ စံၚ်ဂြဝ်သြေဲကျာံ ရာဂါံသဗ္ဗ။ လေပ်ပြဟ်လ္အိတ် ခၠၚ်ပ္ဍဲစိတ္တ။ ချူကှ်ေဂၞန်ရ အိုတ်သဗ္ဗကာ။ ပုံကၞက်ဇၟာပ်တၚ် ဆန္ဒလၚ်္ကာ။ တိုန်စိုတ်ညာန်လှဲ ပ္ဍဲလၚ်္ကာတာ။ တၟံကွတ်ကၠာ ကတ်အာဇၟာပ်တၚ်။ ။

စှ်ေစိုတ်နာံဗျာပ် ဇၟာပ်ကွတ်ကၠိုဟ်ခၠ။ ဇၟာပ်ကွိၚ်ကွိုက်အခိုက်ပြဲက္ဍၚ်။ တိုန်စိုတ်ပြာထာ နဲကာသဂၚ်။ အယုက်လ္အိတ် စှ်ဒ္စိတ်ပြၚ်။ တံဇိုၚ်သၟိၚ်သၚ် မက္ဍၚ်အိန်ရဳ။ နာဲဒကောၚ်ပိုန် ဒတိုန်ကျာ်သြဳ။ ဒုၚ်ပယျၚ်ရ ပကၠေံခမဳ။ ဝိနဲသဒ္ဒါ ကတ်အာဒၚဳဒၚဳ။ ပဍေန်ပဍဟ်ညာန်ထတ် တၟံကွတ်ဇဳဗီုဇုက်လလဳ ညာန်ဘာန်စဳခၠ။ ဂွံပိဝသ်ပၠန် ဟွံတန်ထာဏ။စိုတ်ဂၠုက်သလံၚ် တူလှောံညံၚ်လ္ၚ။ ပိဝါခပ်သီ ပ္တီအ္စာရ။အ္စာကဵုရောၚ် အခေါၚ်တုဲပၠ။ ၜးသ္ၚာရ မဂေါဝ်ဆာဲ။ ဗိုၚ်ယာတ်သၠိုၚ်ဖေၚ် ဝတ်အကေၚ်ဗၠာဲ။ တုက်ဍာ်ဇိုၚ်တဲ မွဲတ္ၚဲဟွံသာဲ။ တွံၚးလွဳလွတ် ဂိုၚ်ကၟတ်ၚာဲ။ စှ်ၜါတ္ၚဲဆာဲ ဟွံသာဲနူဘာကၠောန်လွဳဟွံပိုတ် ကေတ်စိုတ်အ္စာ။ အ္စာသ္ဍိုက်အိုတ် တီစိုတ်တုဲမာ။ သၟိက်ဂွံစဴသ္ၚိ ကဵုမိသေၚ်ဟာ။ ပ္တီအ္စာသၟတ် ပဝတ်ပိဝါ။ ကလံအ္စာတုဲအဴ စဴအာသ္ၚိတုန်။ ။

    	မဒေကာၚ်ပိုန် နာဲဒတိုန်ဂုန်။ စဴသ္ၚိတုဲတုန် သၟိက်ခၠေဝ်ဂုန်ယာဲ။ ကေၚ်ကာပ္ဍဲသ္ၚိ ဒမၠိကၠောန်ကွာဲ။ ကာလသၟိက်ဒှ်တဝဟ်စလာဲ။ အဒိသၞာံဗလာဲ ကျာပၚ်လာဲချဳ။ ကျာပိုက်ဗလဲ မတ်ဗြဲယာယဳ။ တေံမတ်ဗြဲချဳ လလဳတန်တန်။ ညးဂမၠိုၚ်သ္ကဲ ညာတ်မတ်ဗြဲပၠန်။ ညးကွာန်ဒၚ်မာဲ ဂၠာဲချပ်ဂၞန်။ ကၠာဗြဲဟွံဂၠိုၚ် သိုၚ်သ္ၚိခိုဟ်သန်။ ပိုဲသိုၚ်သ္ၚိကၞာတ် ဆုဒုန်ဝါတ်လောန်။ ပိုဲအာဂြိုပ်ပၠန် သန္ထာန်သာလေဲ။ ဆုဒုန်တီုကၠီု တုပ်ဗီုညံၚ်သြေဲ။ ဟွံဂွံဍုတ်ဍေဲ ညံၚ်သြေဲသၟဟ်န်။ ပိုဲအာဗာ်နၚ် ခိုဟ်ဂးက္ဍၚ်သန်။ ယာံစိုတ်သၟန်န် ကြိုက်စိုတ်သန်ရ။ လဣနၚ်ဒဴ ထဴမွဲစဳခၠ။ ဟီုဇီုတော်ဆ ပဇမၞော်ကၠာ။ ညးဂမၠိုၚ်ပ္ညဳ စိုတ်သၟဟ်ညဳသာ။ လိၚ်ဂၠုၚ်မွဲကၠာ ချပ်ယာယဳပၠန်။

ဂွံဂၠုၚ်ဖါမွဲ သာက္ဍာယဲသ။ ကောန်ဂၠိုၚ်ထတ်မြက် ဖန်ဖက်ဇွောံမ။ ညာတ်ညးစဳရေၚ် အာဂြိုပ်ဟေၚ်ရ။ မဒကောၚ်ပိုန်ဒတိုန်ရုပ္ပ။ ဟိုတ်ဒါန်တမၠာ မပ္ညုၚ်ဏာမ။ ဂကောံညးရသၟိက်ပယာယဳ။ ပတန်စိုတ်ဟွံတန် ပၠန်ဂတးချဳ။ တိုန်ပ္တီမိပ္ညဳဒၚဳဟီုတိုန်ရ။ ယွံမိကျာ်ဂန် ပြဲသန်ရုပ္ပ။ ညးဂမၠိုၚ်ရ ပတဴယာယဳ။ ဗာ်ဆုဒုန်ကိုပ် လုပ်ဂြိုပ်အနဳ။ အဲသၟိက်အာကောံကရောံညးပ္ညဳ။ ဟီုပ္တီမိရ တၠကျာ်သဳ။ မိၚ်ပါၚ်ကောန်ပ္ညဳ ကၞပ်သ္ၚဳဒၟံၚ်တဴ။ ။

မိဗြဴကၟာဲသ္တိုတ် လကိုတ်ဆဴဆဴ။ ကတောဝ်က္ဍိုၚ်မတ်ဂၠု ဇကုဒမြဴ။ အဵုဣတယာဲ နာဲလၟာဂၞဴ။ နာဲဍိုန်ၜတ် လောန် ယွံကောန်သာ်ပ္ကဴ။ ဗာ်ဆုဒုန်အဴ ဟွံထေက်တဴကၠာ။နူနာဲသွတ်ပၠန် မိချပ်စောန်စာ။ တောံပၞာဲဇိက်ဗ္ၚ ယာဲဟွံစကာ။ ကဵုမမံၚ်ဘာ ဂၠာဲအာကတ်ဗ္တောန်။ ကလောန်ပ္ဍဲသ္ၚိ မိဟွံကဵုကၠောန်။ တြဴဂြိုပ်ဂၞိန် ဓဝိၚ်ယာဲလောန်။ ပအာညိကောန် ဂၠုထဝ်သောန်ယာဲ။ ကောန်မိၚ်ပါၚ်မိ ဒမၠိအီကွာဲ။သီုကဵုစရာ ဟီုပ္တီယာဲပၠန်။ ။

ဂုန်ပြဲဂၠိုၚ်သာ် ယွံမိကျာ်ဂန်။ တၟံသတ်တံပၠန် တန်ပ္ဍဲသံသာ။ ဗၞတ်ကံကုသဵု အကုသဵုကၠာ။ ဒှ်ဗၞတ်သေၚ်ဟာ မိပိုၚ်ခြာညိ။ အဲဍိက်တုန်ကီု အာသီုသတိ။ အာစိုပ်ဂြိုပ်စိ ဒမၠိဇၟာပ်ဒၞာဲ။ ဒးဗာ်ဆုန်ဟေၚ် ဟွံသေၚ်ရယာဲ။ အဲအာဂြိုပ်မာအာမၚ်စတာဲ မိပတ္ၜူမာဲ ယာဲပလ္ၚာပ်လ္ၚာ။ နူအဲဒှ်တြုံ ဇၟာပ်ကွတ်လုပ်စာ။ ပါန်မုက်ပါန်ခဳ ဗဳသ္ကဝ်ဇၟာပ်ကာ။ ပုတ်ဂၞတ်သောန်ဒါတ် ဒၞာဲညာတ်ကၠောန်အာ။ ကွိၚ်ကွိုက်ဂးကၠာ ကျာံခရာဂြဝ်။ ဇၟာပ်ကွတ်ဟွံဖိုတ် လေပ်အိုတ်ကာဲကဝ်။ စရာဲစတ္တဝ် ယာဲလွဳလဝ်အဲ။ ကဵုယာဲဒးဒိုက် ဟွံကြိုက်မွဲတဲ။ ပဂွိၚ်ကဵုအဲ မွဲတဲညိအဴ။ ။

မိမိၚ်ပါၚ်ကောန် ဟီုဝေါန်စဝ်တဴ။ မံၚ်ဍိုန်စိုတ်ကၠာအာရကောန်ဂၞဴ။ မိစဳရေၚ်အဴ ဇွောံမတံကၠာ။ ပလံၚ်ဖျေံပ္ညုၚ်စဵုစိုပ်ဂၠုၚ်ကၠာ။ ယွံနာဲဂၠုၚ်အဲ မပြဲသာ်လွာ။ ကောန်အဲမအာနာဲဍံၚ်သွာညိ။ ကြုၚ်ဇြိုဟ်ကျာံဂြဟ် ဂြိုပ်ဒှ်ဂြိုပ်ဂျိ။ အာကဵုခိုဟ်ညိ ဂၠုမိသာ်ပ္ကဴ။ အဵုဣတမိ မဂ္ညိနုဘဴ။ ပဝိုတ်ပါၚ်ယာဲနာဲလၟာဂၞဴ။ မိဖကန်တဴ ကဵုကောန်ဂၞဴကၠာ။ နာဲဂၠုၚ်ကောန်ဂၠုၚ် ကၠုၚ်အိုတ်တုဲမာ။ တိုန်ဍိုက်ဂၠုၚ်ပၠန် သၟဟ်န်ညဳသာ။တုဲလ္ၚောဝ်ရတ်ပိ မိမအ္စာ။ ဒေဝတဴကီု အိန်ဗြီုယီုယာ။ ဘုမ္မဇဵုရ ရုက္ခဇဵုကၠာ။ အကာသဇဳု ဒေဝဒေဝါ။ ဒေဝတဴက္ၜဳ မနဳခလာ။ မၞးတံဍံၚ်သွာ ပိုဲမအာရ။ ။

ဟီုဇီုတုဲဒှ် သၟဟ်န်စိတ္တ။ ဒကက္ဍိုပ်ဂၠုၚ် ဒေါဝ်ကြုၚ်တိတ်ဂျ။ ဂၠုၚ်ဖါသာသန် ပါၚ်ပန်မွဲက္ဍ။ ၜါစှော်တ္ၚိုက်။ တိုက်အာလျလျ။ နူဂှ်အာစိုပ် ဗဒိုပ်ဖျာက။ အာနူဂှ်ရ ဒဵုမကဴကၠာ။တိုန်လ္ၚောဝ်ရ ဗုဒ္ဓကေသာ။ မွဲဗတံပၠ ဒီုမကဴကၠာ။ တ္ၚဲယးဖလာၚ် စာၚ်ဂြဴညှာညှာ။ ဖဝ်ရဂုတ်ဗြု လဒုကြဵုဇာ။ အရှိုန်တၟးတ္ၚဲယးခၠၚ်အာ၊ တဲရပ်တ္ၚိုက် တိုက်အာညှာညှာ။ အာစိုပ်မုဟ်သၞာ် ဍာ်ညံၚ်ဗဒါ။ နူကဵုမုဟ်သၞာ် စာၚ်စ္ဍးတိတ်အာ။ စိုပ်အာဗၠာဲကျာံ။ ပယျာံသန်ၛာ။ နူဗၠာဲကျာံကၠာ တိုက်အာလၟေၚ်လၟေၚ်။ တ္ၚဲသဝ်ဗလဗလ စိုပ်ဒေသသြေၚ်။ စိုပ်ဗ္ဒိုပ်ကၞာတ်ၜးယာတ်သၠိုက်ဖေၚ်။ အိုတ်ညးဂမၠိုၚ် ကျိုၚ်ကျဝ်သေၚ်လေၚ်။ ကျိုၚ်ဗြံက်ဗြဟေၚ် ဂဇံရေၚ်တဴ။ စက်တ္ၚဲဗဒန်သၟန်ပၠေဲပၠဴ။ ဂစေံဒျာန်သၞေၚ် ပဝ်ကလေၚ်စဴ။ ခဍိမြာကွဴ ပဝ်စဴဒနဳ။ ဘုတ်ပြိုက်စာဂြိုဟ် လကိုဟ်ဂဟီ။ လိုက်ထောဝ်ဂတေဝ် ဍေဝ်စလာၚ်ခြီ။ သွိုဟ်ဂြိုပ်က္ဍိုပ်ဒဵု တံဝဵုဓနီ။ သတ်ကၠံလ္ၚီ ဓနဳစဴအိုတ်။ မာတ်တ္ၚဲသဝ်ပၠိုတ် ညန်အိုတ်ကာလ။ ။

နာဲဂၠုၚ်တော်ဆ သ္ၚိဇြချပ်မံၚ်။ ကောန်ဂၠုၚ်တံကွေံ၊ ဍေံဒယှ်ေကၠံၚ်၊ ရမျာၚ်ဍိုန်ဍိုန်၊ တိၚ်တတိုန်စံၚ်။ ဒြဝ်ကျာံလဒု၊ တိၚ်ဗရုဆံၚ်။ တ္ၚဲယးအာရံၚ်၊ အထံၚ်သၞေဟ်သြေၚ်။ ဍာ်တိုန်ပေၚ်ဂျ၊ ဒးကာလဟေၚ်။ ဟာပ်ပုၚ်သွတုဲ၊ သုဲအာဗွဲလၟေၚ်။ ဒျာန်တ္ၚိုက်ပ္ညုၚ်၊ ထောံလဝ်ဍုၚ်သြေၚ်။ တိုက်အာဗွဲလၟေၚ်၊ နူသြေၚ်ဟွံသ္ၚောဲ။ ဍာံတိုန်ကျာတိုန်၊ အလိုန်တိုန်သဲ။ ဍာ်စှ်ေကျာစှ်ေ၊ သွးစှ်ေဗလဲ။ ဇမောဝ်ဇွောဝ်ဍိုက်၊ တ္ၚိုက်ဇၟာပ်တဲ။ ဍာ်စှ်ေသိုက်သိုက်၊ ဆိုက်ပါၚ်အလဲ။ ညာတ်ကျာ်လဂုၚ်၊ ယဵုတၠုၚ်တဲ။ ပၚ်ပ္တိုန်က္ဍိုပ်-ဗစိုပ်ကၞေၚ်ပြဲ။ ယဵုသမိပ်တဲ-အဲပရဲကၠာ။ ညံၚ်အာစိုပ်ဟေၚ်- ဍုၚ်သွဝ်သေၚ်ဟာ။ ရပ်တၚိုက်ပၠန် တိုတ်ဗ္ဂန်ညှာညှာ။ ကျာမှာသမိတ် ဍိတ်တ်ပိုတ်အာ။ ဂၠိုၚ်ကဵုအလိုန် ဇွိုန်ဇၟးဖက်ဖါ။ လပှ်လမဴ ညံၚ်ဗီုပ္ကဴသွာ။ မွဲဒှ်မွဲပၠိုတ် မွဲကၠေံအိုတ်အာ။ လပှ်သဲသဲ အနုဗလဲဒွါ။ ဆုၜါလပါ် ဂၠိုၚ်သာ်နာနာ။ လမုလမေဝ် တေၚ်ကၞာၚ်မံၚ်ဗ္ဂါ။ နူဂှ်စှ်ေနာၚ် ဂွံပါၚ်ဂၚ်္ဂါ။ စမဳညာတ်အာ ခလွာသာဲလေဲ။ ဂြိုပ်သ္တဵုသလံၚ် ဆုဒုန်ညံၚ်သဲ။ ကဵုပါၚ်စမြေဲ သေဲသေဲဟောကၠံၚ်။ ပလှ်တၚိုက် တိုက်လုပ်နာံထံၚ်။ ကဵုပါၚ်ဟောကၠံၚ် ဗလးခဏံၚ်ဟေၚ်။ ။

ပလှ်တၚိုက် တိုက်လုပ်ဗွဲလၟေၚ်။ စိုပ်ဗဒိုပ်ဟေၚ် ဗဒိုအ်ဂၠုၚ်ဟော။ ဗ္ဒိုအ်ဂၠုတုဲပၠန်-ချပ်တိုန်စန်စာ။ ဂြိုပ်ဝွံတုန်ဂှ်- ပဒှ်သာ်လဝါ။ နာဲဂၠုၚ်တိုန်ရံၚ် ဒမံၚ်အရာ။ ဆုဒုန်အိုဿီု သိၚ်သာတီုညဳသာ။ ညာတ်ဆုဒုန်ပၠန် တ္ၜန်တ္ၜောန်သ္အဳဗ္ဂါ။ တပ်တးတရေၚ် တပ်သတေၚ်ညဳသာ။ လ္ၚဵုဂှ်သၠုၚ်ဗြိုၚ် ရိုၚ်ရိုၚ်ဒၟံၚ်ကၠာ။ ဝိကဝ်ဝိကာ သဂါပြဴပြာန်။ ဗြီုပြာ်ကှ်ေကြုၚ် ဂမုၚ်ဓိတာန်။ ရီုဓနဳကာန် ဍေံတၞာန်မံၚ်ပၠ။ လစောတ်လမောဝ် လယောဝ်ကၞာၚ်သၠ။ ဂမောဝ်ဂစွံ ဂကောံဗၚ်ယ။ ဟွံတီနန္တ သတ်ဂျိတလာဲ။ ဒၞာဲသတ်သတ်တဴ ဒၞာဲကဴကဴၚာဲ။ လ္ၚဵုကြံၚ်သၟတ် လ္ၚဵုၜတ်ဆာဲ။ ဒၞာဲပြဟ်ပြဟ်မှုဲ ဒၞာဲအုဲသ္အုဲလာဲ။ လ္ၚဵုကြံၚ်သာဲ ဒၞာဲယောၚ်လာဲအာ။ ဍေံမဂၠိုၚ်တဴ ပ္ကဴသြဴနာနာ။ ညာတ်ဆုဒုန်အိုတ် မိပ်စိုတ်မှောဝ်ဇာ။ လဣနၚ်ဒဴ ထဴကြီုကြဵုဇာ။ လတုန်ဝွံသွံ ဂှ်ပိုဲဂွံမြာ။ ဆုဒုန်ဝွံပၠန် ခိုဟ်သန်မြိုတ်ဖါ။ မိပ်စိုတ်မှောဝ်ဇဴ နာဲသာလထဴ။

ကော်ကောန်ဂၠုၚ်ပၠန် ဝေတ်ဗတောန်ဟီုတဴ။ ယွံလေဝ်မၞးတံ စိုပ်ဂြိုပ်ဏံအဴ။ ဂြိုပ်ဝွံဂြိုပ်ဂျိ ဆုဒုန်ဂ္ညိဂၠဴ။ ဇြုံသေၚ်ကၠဗြန် ကုမ္ဘန်ဓနဴ။ လကိုဟ်ဘုတ်ဇၞော် ကလော်တြုံဗြဴ။ နွံကီုဟွံတီ ခပ်သီသဘဴ။ မၞးတံတုန်စိ သ္တိသှ်ပတဴ။ လုပ်ဂြိုပ်စှ်ေဍာ် ဂၠိုၚ်သာ်ပဒြာ။ ပဟိုတ်မာဲညိ သတိကြက်လှဴ။ ပိုဲမၞးတံအဴ မကၠုၚ်တဴလၟုဟ်။ စိုတ်ပကဵုထစေၚ် ဗွဲလၟေၚ်ဒုဟ်။ မၞးတံကၠေံစိုတ် ကၠောန်ၜိုတ်ပလုတ်။ ပလွဳကၠောန်ၜိုတ် စိုတ်ပကဵုလၞုဟ်။ ဂလာန်ဣၚုဟ် ထဴကဵုကဵုပ္ၚုဟ်ဆာဲ။ ဟီုဝေတ်ဗ္တောန်တုဲ ရုဲဒၟံၚ်ဒၞာဲတာ။ ဗာ်ဆုဒုန်ဗဝ် စွံလဝ်ဟွံသာဲ။ ညးလ္ၚဵုဂှ်ယိုက် လ္ၚဵုဂှ်တိုက်တာဲ။ ကၠောန်တာဲညံၚ်သိပ် မိပ်ဇြိပ်လောန်ကာဲ။ မဒကောန်ပိုန် ဒတိုန်စရာဲ။ ဗတာၚ်လာဲဆေဝ် ကျေဝ်ဂေါဝ်လောန်ကာဲ။ ကၠောန်လဝ်ဇပ်ကၠိပ် သေပ်သိပ်ဇၟာပ်ဒၞာဲ။ ဇိပ်ကၠိပ်ကျေဝ်လာဲ ကၠောန်တာဲတုဲဒှ်။ ကပေါတ်ဒယိုန် ပ္တိုန်စွံလဝ်သၟဟ်။ တောံပုၚ်တောံသွ စဟာပ်တုဲဒှ်။ ကပေါတ်တံဂှ် ဂိုၚ်လပှ်အိုတ်။ ။

နာဲဂၠုၚ်ကောန်ဂၠုၚ် ကောန်ကၠုၚ်ဖအိုတ်။ ဂဇံသၟဟ်န် ပ္တန်သူစရိုတ်။ သၟိၚ်တ္ၚဲတုန်ပၠ တၠက္ဍိုပ်ဗိုတ်။ ဗ္ဂန်သိန္ဓဴလ္ၚီ မြီမြီဟွံပိုတ်။ လိုန်ယုဂန္ဓဝ် စဝ်ဒိုဟ်ပလိုတ်။ ဂမဝ်တၟံသိန် ဂၠိန်စဴတၟံဗိုတ်။ မှတ်တကံအမ္ဗါ ယာယဳစရိုတ်။ တူဍာန်အမှဲ မာတ်တ္ၚဲသဝ်ပၠိုတ်။ လျးညံၚ်လလဳ ဗစဳလက်ကိုတ်။ လျးညံၚ်အမြိုတ် ခၠၚ်ဂိုတ်သလုဲ။ လ္ၚဵုသ္ၚဳမၠာ ညံၚ်သာ်ကၠေၚ်ၚုဲ။ လျးညံၚ်မတ်မၞိက် ထမှိက်သာ်လှုဲ။ ကၠေၚ်ကကၠေၚ်ၚုဲ ဒေါံသၠုဲခၠၚ်။ ညံၚ်ဍီုညံၚ်ဗြေဝ် ညံၚ်ပစ္စေပ်က္ၜၚ်။ လ္ၚဵုသာ်ပ္ဍီု ညံၚ်ဗီုကယၚ်။ လ္ၚဵုသာ်လွာ ညံၚ်နဳလာက္ၜၚ်။ လ္ၚဵုသာ်မြ လျးခၞဗ္ၜၚ်။ ညံၚ်သာ်မဒါ ဂၠံမိကာသဂၚ်။ ဆုဇဝ်တဝ်သၠ လျးခဏခၠၚ်။ မာတ်တ္ၚဲကၠောံပျး အမ္ဗာဒဳပၚ်။ မာတ်သၟိၚ်ဒမၠု သံက်မြုဝၚ်။ သတ်ဇၟာပ်ကလၚ် ဖန်ဆၚ်ဒၞာဲဝါဲ။ ။

သတ်ဂြိုပ်ကၠံလ္ၚီ စဴဓနဳဒၞာဲ။ ဆဒ္ဒန်ဗၠန်ရိုၚ် ဇြဲသုံဗၠိုၚ်ဆာဲ။ သ္ပဝ်စဴသတိက် ဂြိုပ်ကြိက်ထဝ်ဗၠာဲ။ ဟဝ်ကၠိုၚ်ဒျာန်သၞေၚ် ပဝ်ကလေၚ်ဒၞာဲ။ သဳဟာဗၠန်ဒၚာ် ဂိုဟ်ထဝ်စရာဲ။ ကြဝိတ်ကြဵုသာၚ် မှတ်ပနာၚ်ဒၞာဲ။ က္ၜိုၚ်ကၠိၚ်ကွေံ ပှ်ပှ်ေမၚ်ဂြာဲ။ မှတ်ဓနဳဆာဲ ဂၠာဲတၞံမူလ။ လဟေဝ်အယုက် မှတ်တၞံရုက္ခ။ မြာ်မှတ်တၞံဆု ဗြုကြဵုသဒ္ဒ။ စိၚ်ဗ္တာၚ်ဂျ လဇထာၚ်သွာ။ ဗလန်ဒၟံၚ်ရော ဇြဲနိဂြောဓ။ သတ်ဂြိုပ်ကၠံလ္ၚီ တီဒၞာဲအရာ။ ဗလန်စဴခမ်သီ ဓနီခန်လွာ။ သၟိၚ်တ္ၚဲပၠိုတ်ကၠာ မဗ္ဒန်အာတုန်။ ။

ခနေၚ်ဇီုဗြု လဒုသောန်န်။ ဂစေံဝုတ်အဵု ဗြုကြဵုဒက်ဒေါန်။ အကြာဂြိုပ်ဇၞော် ဗၜဵုကော်ကောန်။ ကၞုဲဒြေပ်လဆောန် ကော်ကောန်ဂမြံ။ ပြေပ်ဂမာသောန် ယောန်အာဗတံ။ ပှ်ဗြုစလာၚ် ကဵုပါၚ်သ္ၚံသ္ၚံ။ ကၠကဵုအသံ ကၞုဲစှ်ေစံတိ။ က္ၜိုၚ်ပှ်စိၚ်သိတ် တိတ်တွဳဖိ။ သတ်ဂြိုပ်လုပ်တိ လဗိလမန်။ အသံဂြိုပ်ဇၞော် ဗော်ဟေမဝန်။ ညံၚ်ဗီုအမြိုတ် လှိၚ်စိုတ်လောန်သန်။ တ္ၚဲသဝ်ပၠိုတ်ဂၠု ပ္ဍဲစိုတ်လ္ၚုလ္ၚန်။ မဒကောန်ပိုန် သာၚ်တိုန်စံၚ်ပၠန်။ တိၚ်ကြဵုလဒု ဗြုကြဵုသဂြန်။ ညးလ္ၚဵုဂှ်ပၠန် သောန်န်သဒ္ဒ။ လ္ၚဵုဇက်ဒြဝ် ဒယှ်ေအၚ်ဇ။ တလောတ်ကျာံကီု တိၚ်ပြီုစိုတ်ရ။ ဝေၚ်ဂြိုပ်အဵုဇိုတ် မိပ်စိုတ်ယဲသ။ ဂၠုလောန်တုဲရ ကာလသန်ၛာ။ ကွိၚ်သ္ၚိတ်ဇြကၠာ ဒၚဳလှိၚ်အာတုန်။ ။

သၟိၚ်တ္ၚဲတုန်ပၠ ပြမနွံဂုန်။ ဂပဝ်တၟံတန် ဇက်ကလုန်ရ။ ပ္ၚောံတကံလ္အိတ် ဇမ္ဗုဒိပ္ပ။ ဇမ္ဗုဒိပ်ကၠံၚ် အရံၚ်သာ်မြ။ ညံၚ်သာ်သၠုဲကၠာ ဗီုပမာဏ။ ညံၚ်သာ်ဍာ်တှ် ခၠၚ်မြဟ်ကာသ။ ဗဂန်သိန္ဓဴလ္ၚီ မြီလျလျ။ လဝိၚ်ဇုက်ဗလဲ လီဒတဲရ။ ရပ်ကလးထဝ် ဗ္ဒဝ်က္ဍိုပ်သေတ။ ဂိုၚ်စမြိုၚ်လျး သလးဗျူဟ။ ဗပေက်ကၠေံကၠာ ပၞာန်အန္ဓာတ။ ဒမၠုပၠိုတ်သ္အး တၟးတိုန်ဗလဗလ။ ညာတ်ဇိုၚ်အရှိုန် ကွိုန်သူရိယျ။ ဍေၚ်ဂြဴလဒု ဗရုသဒ္ဒ။ ဖဝ်ရဂုတ်တြး ကော်ဂးတိုန်ရ။ ကမာတ်အိုၚ်ဇၞော် ဂၠာဲကော်မသ။ ကွဴဂြဴပြာထော် မြာ်ကော်ကောန်ပၠန်။ ဒိုၚ်ဗျုုဒိုၚ်ဗြောန် ယောန်ဂၠာဲစဏ။ ကၠိုဟ်ဗလိုပ်ဍာ်တုန် အဘဴဍုန်ရ။ ထိုၚ်သာဲပဝ်သၠောၚ် ဇာပ်ဍောၚ်ပုပ္ဖ။ ဒြဝ်သၞေၚ်လဒု ဗြုတိုန်သဒ္ဒ။ ညံၚ်ဗရုပၠန် ကွိၚ်ပန်စၚ်္ဂ။ တ္ၚဲတိုန်တၟး လျးခၠၚ်ခဏ။ လဣနၚ်ဒဴ ထဴချၚ်တော်ဆ။ ဗယိဗရာန် ထာန်ဝွံမူလ။ ပိုဲသကဵုစၞ ပိုဲသ္ပရဴဂဴ။ ။

နာဲဂၠုၚ်ဇၞော်စိ လဣနၚ်ဒဴ။ သာ်ဝွံရောၚ်ဒး ဟီုတြးကမြဴ။ ဟီုဇီုတုဲဟေၚ် စဳရေၚ်ဆဴဆဴ။ ပြုပြေၚ်ပုၚ်သွ ဖျုန်ကဗြာတ်က္ၜဴ။ နာဍူယိုဟ်သကဝ် ပြေၚ်လဝ်ပ္ကဴသြဴ။ သီုမဗိုန်ဇၟံ ဂဇံရေၚ်တဴ။ ယဵုသၟိပ်တဲ အဲပရဲအဴ။ တုဲကော်ဗစအဴ ဒေဝတဴဂြိုပ်။ ။

ယွံဒေဝဴ မၞးတဴပ္ဍဲဂြိုပ်။ မပိုၚ်ဂြိုပ်ယာန် ထာန်ဝွံနူကိုပ်။ ပိုဲမကၠုၚ်စိုပ် ဗဒိုပ်ဝွံအဴ။ ပုၚ်သွအမာဲ ပိုဲဂၠာဲကွာဲတဴ။ ယိုဟ်က္ၜန်ကွာၚ်ရ ပိုဲပပူဇဴ။ ယွံဒေဝတဴ နုဘဴဇၞော်ပြဲ။ ပိုဲဗလိဗဇဴ ပူဇဴအဲပရဲ။ ကွာၚ်ၜဲယိုဟ်က္ၜန် စပၠန်ကဵုဘဲ။ ဖဵုပိုဲယိုက်ဒိုက် ပရိုက်ကဵုသ္ၚောဲ။ က္ဍိုပ်ဂိသေၚ်ဇှ် လ္ပကဵုဒှ်ညိ။ သတြုနာနာ ပကဵုပါမြိ။ မၚ်မွဲပိုဲညိ ဒမြိဍံၚ်သွာ။ ။

သာ်ဝွံတုန်အဴ ထဴရာဒနာ။ တုဲစရိုတ်ဟေၚ် ဍာ်သၠိုၚ်သေၚ်ဟာ။ ဗလိဂပဝ် တုဲဒှ်မှောဝ်ဇာ။ ညးဂမၠိုၚ်ကၠာ စဴအာတာဲရ။ စိုပ်တာဲတုဲပ္ညုၚ် စုတ်ဟာပ်ပုၚ်သွ။ စဟာပ်တုဲအဴ ရပ်တဴၜုန်မြ။ ကေတ်မုဲကွာန်ရ ဟဂွံဟိုတ်မာဲ။ မဒကောၚ်ပိုန် ဇိုန်ကဵုမၚ်တာဲ။ ညးလ္ၚဵုသၟပ် ရပ်မြတရာဲ။ လဣနၚ်ဒဴ ထဴတတ်ညံၚ်ဗၠာဲ။ ထောံဒမံၚ်တာဲ ကွာ်သာဲလုပ်ဂြိုပ်။ ကလောန်နူကိုပ် ဗာ်ဆုဂြိုပ်ဂၞိၚ်။ ကၞံၚ်ဒမၚ်ပၠ ခဏဝိုန်စိၚ်။ မုဟ်ဇံၚ်ဇမၠိၚ် မုက်ကျာသွိၚ်ရ။ ကောန်ပဠောပ္ညဳ ဒရေပ်ကၞဳပၠ။ ဆဒယိုၚ်ကီု လဝ်သီုကဓ။ ဖန်ဖက်တုဲအိုတ် ကၠေံစိုတ်ဗာ်ရ။ တုၚ်တုၚ်တိၚ်ၚ် ဗာ်ဂမြိၚ်ပၠ။ ဂမြိၚ်ဂမြံၚ် အာကွာန်မြ။ ဂြိၚ်ၚ်ဂြံဂြံ စှ်ေဂမြံၚ်သ္ဒး။ တုၚ်ၚ်ဗာ်ဆံၚ် စှ်ေညံၚ်ဗတ်သၟ။ ဂမြိၚ်ထဥ ဗရုသဒ္ဒ။ လလောၚ်တမ်ညဝ် လုမ်ဂြိုပ်အဝ်ဇ။ သီုညးဖအိုတ် သၟဟ်တဴစိုတ်ရ။ ကၠောန်ၜိုတ်ထဒၟ ဟဂွံဟိုတ်မာဲ။ ။

မဒကောၚ်ပိုန် လမိုန်မၚ်တာဲ။ ဇကုမွဲဒၟံၚ် ညံၚ်ညးဖရာဲ။ ဗှ်ဇကုမွဲ လ္ၚုလောန်ကာဲ။ စံၚ်ခရာကီု တိၚ်ဓဂီုတာဲ။ တိၚ်ကြဵုလဒု စံၚ်ကျာံဗြုၚာဲ။ ဒွက်ဂိုန်ဂၠိုၚ်ဒၞာဲ ဂၠာဲနာဲအခိုက်။ ရမျာၚ်ကြဵုတိုန် တလိုန်သိုက်က်။ မိၚ်ရမျာၚ်ကၠာ ဒၞာဲအာဒးသ္ဍိုက်။ ညိဟွံဟိုတ်မာဲ ဇၟာပ်ဒၞာဲအခိုက်။ ညံၚ်ရှ်အမြိုတ် မိပ်စိုတ်ဒးသ္ဍိုက်။ တိၚ်သီုအခိုက် သော်ဂရိုက်ဆာဲ။ ရမျာၚ်ကဵုကွိၚ် မိၚ်ဂြိုဟ်ညံၚ်လာဲ။ စိုတ်သၠောၚ်ပူမဟ် ညံၚ်ကြံတ္ၜူမာဲ။ ကာလသၟိက်ဒှ် တဝှ်စလာဲ။ ဒါန်အတိက်အဵု ပ္ညုၚ်နၚ်ကဵုနာဲ။ သၟိက်ဒှ်စလာဲ နာဲဒကောၚ်ပိုန်။

မၞးတံကလၚ် ပၚ်မှိၚ်ကဵုဗိုန်။ တၞမ်ဆုအသဝ် ဂြိုပ်ဗဝဝ်ပိုန်။ ပ္ဍဲဂြိုပ်ဂှ်သွိုန် ဒှ်ကွိုန်ရုက္ခ။ နွံဇြဲသုံမွဲ သဂီုကၠီုယဲဆ။ ဘုံသဓုံဗျာၚ် မဂၠိုၚ်ကၞာၚ်သၠ။ ဒှ်လွဳမာန်အဴ ဒေဝတဴပၠ။ ဒေံဝတဴဂှ် ကြဳဇှ်က္ဍၚ်ပြ။ ဒှ်သၟိၚ်ကလော် မဇၞော်တေဇ။ ပိုၚ်ကလော်ဂၞိၚ် ဒှ်သၟိၚ်ယက္ခ။ တြုံကဵုဗြဴရ သၟိၚ်ဒေဝၜါ။ ဂွံကောန်ဗြဴပန် ရုပ်သာ်ကညာ။ ညံၚ်ထဝ်ဒကောၚ် ညံၚ်ဍောၚ်စမ္ၚာ။ အရံၚ်ဇကု အနုထာၚ်သွာ။ ကောန်ဗြဴပန်မာ နာမခုတ်လဝ်။ ။

မွဲဂှ်မြိုတ်တၚ် မွဲတယျၚ်ထဝ်။ ကောန်ၜါဆတ္တဝ် ညံၚ်သွဝ်ကေလာ။ မွဲထဝ်ဒကောၚ် မွဲဍောၚ်စမ္ပာ။ ယၟုခုတ်ကၠာ နာမဗြဴပန်။ သီုညးပန်ဂှ် ရုပ်ဂေါဝ်သၟဟ်သၟန်။ ကျိုၚ်ဒၟံၚ်ပၠန် သၟဟ်န်ညဳသာ။ မွဲလွဳမာန်ဘုံ ဇြဲသုံသေၚ်ဟာ။ ဇြဲဂှ်ဟွံသာဲ နူတာဲဂှ်ကၠာ။ ကောန်ဒေဝတဴ ဗြဴပန်ဂှ်မာ။ ဟိုတ်ဒါန်တမၠာ ဝါသၞာပ္ညုၚ်။ ညန်ကဵုတာဲပ္ညဳ ဒ္ၚဳဂါံကွာ်ကၠုၚ်။ သီုဗြဴပန်ပ္ညုၚ် ကွာ်ကၠုၚ်ညဳသာ။ ဒကောၚ်ပိုန်သွံ ထောံမတ်ညာတ်အာ။ ကျာံစံၚ်ခရာ ခါဂှ်ဂိုၚ်တိၚ်။ ဇိုၚ်ၜါသက်လက် တက်ခဍေဝ်သွိၚ်။ ပါၚ်ကြီုလဒု သီုဗရုကွိၚ်။ နာဲဒကောၚ်ပိုန် ဍိုန်န်ဂိုၚ်တိၚ်။ ဒေဝတဴပန် ရုပ်ကညာဂၞိၚ်။ ယာံမဂွံမိၚ် ကွိၚ်ပါၚ်ကွိၚ်တဲ။ စိုတ်ချဳလရု ညံၚ်ဆုရေရဲ။ ပၟတ်ရာဂ စံၚ်ပၠန်စိုတ်ပ္ဍဲ။ ပလိုတ်ဟွံမာန် တူသၠာန်ဟွံဟဲ။ ဂုဏ်ကိလေသ ကာမစိုတ်ပ္ဍဲ။ ညာတ်ရုပ်ဒးဂၞပ် ပ္ဍဲမတ်စပ်လဲ။ ဗရုပ်မိပ်ကၠာ ကတောဝ်ၜါမိၚ်သ္ကဲ။ သ္ဍိုက်သန်လောန်တဲ ပ္ဍဲဂှ်ညးပန်။ ဒါန်တမၠာသွံ သၟိက်ဂွံဆိုက်ညန်။ မွဲသၞာသတိက် သၟိက်ဂွံလီတ္ၜန်။ စဴအာပ္ညဳပၠန် ကျာ်ဂန်မဟာ။ ။

ယွံမိကဵု တၠဂုဏ်ၜါ။ ပ္ဍဲဂြိုပ်တေံဂှ် ကြဳဇှ်ပြာထာ။ မၚ်ဗၠာဲမွဲပၠန် နွံကဵုပညာ။ မၞုံလက်သန် ပြဲသန်သာ်လွာ။ နွံကဵုကျာ်သြဳ အိန်ရဳတပ္ပါ။ ရုပ်သာ်အဝဲ နဲညးကေလာ။ က္ၜိၚ်ပါၚ်ကွိၚ်တဲ ညးဟွံမွဲၜါ။ ပိုဲညာတ်မံၚ်ကၠာ စိတ္တာဟွံတန်။ ထုဲကြာန်ဓမာန် အာန်တၞာန်စိုတ်ပၠန်။ သၟိက်ဂွံဟုဲဟဟ် မွဲဟာန်သၟဟ်န်။ ဂကောံမၚ်ဗၠာဲ သၟိက်ဒိပ်ဒါယ်သန်။ ပိုဲဍိက်ညးပန် ပ္တီပၠန်မာတာ။ မိမၜါမိၚ် ချပ်တိုန်သိၚ်သာ။ ဟွံဒးပွ ဂွကဵုညးကၠာ။ မိကဵုမၜါ ဟီုဆေဝ်တာပၠန်။ ယွံလေဝ်ကောန်တံ မၞးတံညးပန်။ တေံကောန်ညးဟေၚ် ဇာတိတၟေၚ်သန်။ ညးဒှ်သက်သၟိၚ် ဇာတိမၞိဟ်ပၠန်။ ပိုဲဒှ်ကလော် လုပ်ဗော်ဓဇန်။ ကောန်ညးဇာတ်ညး ညးဂိုဟ်လောန်သန်။ လ္ပပြာပ်ညန် ပ္တန်လဝ်စိုတ်ညိ။ မိမၜါပၠန် ဝေတ်ဗ္တောန်စိ။ ဂၠိုၚ်ကဵုဝါရ ပ္တီမကဵုမိ။ ယွံမိကဵုမ တၠဣဒ္ဓိ။ ယာံဟွံဂွံညန် ပိုဲသ္ကန်ကလိ။ တ္ၚဲဏံဟာယး ပိုဲဒးစုတိ။ ကဵုအခေါၚ်ညိ ယွံမိကျာ်ဂန်။ မိကဵုမပၠန် သ္ဍိုက်ပ္ဍဲကောန်ဂၞဴ။ သီုညးပန်ကၠာ ချပ်ပိုၚ်ခြာတဴ။ ယာံဟွံဂွံရောၚ် အခေါၚ်ဆဴဆဴ။ စံၚ်တူလျးပၠိုတ် ဒးချိုတ်အာတဴ။ ပိုဲဒးဒှ်ကောံ သ္ၚောံဗွဲကြဴ။ ဟိုတ်ဒါန်ဍေံကၠာ တမၠာတေံအဴ။ ဇြဟာန်ဖ္အောဝ်လဴ ဒးဒှ်တဴရောၚ်။ ။

မိမၜါသ္ကဲ ချပ်တိုန်မွဲတောၚ်။ ဒးကဵုအခေါၚ် ခိုဟ်ရောၚ်သဘဴ။ ကောန်ဒေဝတဴပန် ရုပ်ကညာဗြဴ။ ဂွံအခေါၚ်အဴ ရဴဝွံစောန်စာ။ သီုပိုဲညးပန် သၟဟ်န်တဴကၠာ။ တြုံဝွံဂေါဝ်လောန် ညံၚ်ကောန်ကလေလာ။ ညံၚ်ကောန်သၟိၚ်အိန် ကၟိန်သွဝ်ၜါ။ ရမျာၚ်ညံၚ်ကွိၚ် ဟွံမိၚ်မွဲဝါ။ အခိုက်လေပ်သန် သန္ဒလၚ်္ကာ။ ကွတ်ပါၚ်ကွတ်တဲ ညးဟွံမွဲၜါ။ စံၚ်ဒြဝ်ကျာံရ ထဏခရာ။ ကွိၚ်သီုက်အခိုက် ရိုက်တိုန်ညှာညှာ။ ဂးရုပ်ဂေါဝ်သန် စဳကၠးပညာ။ ညံၚ်ပိုဲဂွံညန် ဂွံတန်မွဲသၞာ။ ပိုဲညးပန်ရ သ္ပလွဳပရာ။ ဟီုဇီုသၟဟ်န် တုဲချပ်စောန်စာ။ ပၠေၚ်ကၠေံရုပ်ကၠာ အခါဂှ်ပၠန်။ ။

ပၠေၚ်ကၠေံရုပ်ဗော် ကလော်ဓဇန်။ ပတုပ်မၞိဟ်ကီု ညဳသာသီုပန်။ ဒက်သော်ကျိုၚ်ကျဝ် မြမောဝ်တန်န်။ ဂစေံစလန် ဟုံဗော်ဂန္ဓာ။ မြမောဝ်ထီုဗး ပ္ဍးတၟာဲအာ။ ဂၞိန်ပုံဂၞိန်စက် ဖက်ခါန်ခါသာ။ လစိန်စရံက် သီုလကံက်ဂွါ။ ကျိုၚ်ကျဝ်တုဲပ္ညဳ ကျာ်သြဳဂေါဝ်ဂါ။ အရံၚ်ဇကု အနုထဝ်နှာ။ ဍောၚ်ပ္ကဴဇမ္ပာ ခါဂိုၚ်စရှ်။ ညံၚ်ညးချူပြေၚ် ဂေါပ်ဝ်တၟေၚ်တၟဟ်။ သီုညးပန်ဓဝ် ကျိုၚ်ကျဝ်တုဲဒှ်။ ပ္ဍဲကာလဂှ် ပြဟ်စဳရေၚ်ဖျာ။ ။

ယိုဟ်က္ၜန်ကွာၚ်ၜဲ စၞဖါပ်ပြဲဖါ။ စုတ်ဗပေၚ်ဟေၚ် မွဲနသေၚ်ဟာ။ ဇဗၠုသတ်ဆက် လက်ဖက်ပ္ကဴကၠာ။ ဂပဵုသၠဇေဝ် မွဲနတေဝ်ဏာ။ မြေက်လသိုန်ကၠေၚ် ကမၠေၚ်ကဝ်တာ။ ဂှ်မွဲနဟေၚ် စုတ်စဳရေၚ်ဗ္ဂါ။ ဖျုန်ဂမၠိုၚ်ကီု အိုဿီုနာနာ။ ပအၚောဝ်ပၠေဝ် ဖံက်သေဝ်ညးဖျာ။ ယဵုကေတ်နပၠန် သီုညးပန်ကၠာ။ သီုကဵုအိန်ရဳ ဒ္ၚဳဒ္ၚဳကွာ်အာ။ ညန်ကြပ်ကဵုတာဲ ကော်ကွာ်တိုန်ကၠာ။ ယွံညးမတိၚ် ကွိၚ်စံၚ်ခရာ။ ပိုဲကၠုၚ်သွံဖျာ ရာန်ဟာဂွံတိုန်။ ။

မမဂေါဝ်ဆာဲ နာဲဒကောၚ်ပိုန်။ ဟိုတ်ဒှ်ဒါန်ကၠာ တမၠာတေံဗိုန်။ မိၚ်ပါၚ်ဗြဴရတ် ရုပ်ကၞောတ်ကွိုန်။ ညံၚ်ကြဝိတ်ထဝ် အဝ်ဇဂြဴတိုန်။ ဒြာဲမဝိုတ်ရ ဘဲကၠလၟိုန်။ ညံၚ်က္ၜိၚ်အိန်ရ ထဏဥဒိုန်။ ဗရုတိုန်ကၠာ စိၚ်ဨကဝိုန်။ ညံၚ်ရမျာၚ်အဴ ဗြဴခၞောဝ်ကွိုန်။ လလောၚ်ပြာထော် ရမျာၚ်ကော်တိုန်။ မမဂေါဝ်ဆာဲ နာဲဒကောၚ်ပိုန်။ မိတ်တမၠာဆက် ဗက်ကၠုၚ်လၟိုန်။ ဆညိဟွံဇြိုန် လၟိုန်န်အဆက်။ သီုကဵုဗြဴပန် သၟဟ်န်သက်လက်။ ယာံဂွံမိၚ်ပါၚ် ရမျာၚ်ဗြဴဗက်။ ညံၚ်တၚ်လာဲကဝ် ပ္ဍဲကတောဝ်သက်လက်။ ရုပ်လှေံလှန်မတ် စိုတ်လယတ်ဗက်။ ထပိုတ်ဟွံမာန် အာန်ထနာန်ဆက်။ နူညာတ်ရုပ်ဗက် သက်စိုတ်စပ်အာ။ ။

နာဲဒကောၚ်ပိုန် ဒ္ၚဳဟီုတိုန်ကၠာ။ ယွံမိဗြဴပန် ဂေါဝ်သန်သာ်လွာ။ တိုန်ဒၟံၚ်ပ္ဍဲတာဲ နာဲတံပအာ။ ယာံဒးစိုတ်ရ အဲရာန်စမာ။ မိၚ်ပါၚ်ညးပၠန် သီုညးပန်ကၠာ။ ဒ္ၚဳတိုန်ကၠုၚ်ဟေၚ် တာဲနာဲသေၚ်ဟာ။ တုဲနာဲသၟာန်တိုန် ဟွံဂွံဇြိုၚ်ညှာ။ မူထာန်မကၠုၚ် ဍုၚ်ကွာန်အရာ။ ဒၟံၚ်ဍုၚ်ကွာန် မူထာန်နာဲသ္အာ။ တဝှ်မေခု ယၟုယမာ။ ဟီုညိခပ်သီ ပိုဲဂွံတီကၠာ။ မိၚ်လဟီုဗျာံ နာမ်ဗျာပ်လွောၚ်ဟာ။ ညးပန်တုန်ကၠာ သီုမယာဗြဴ။ ။

ယွံညးဇမ္ၚောဲ ညာန်ပြဲညက်လှဴ။ ညာတ်မုက်ဍိုန်ညံၚ် ညံၚ်ဗီုဍောၚ်ပ္ကဴ။ လဟီုကောဂၞဴ ဂၠာဲသၟာန်တဴကွာန်။ ယၟုယမာ နာနာဂၠာဲသၟာန်။ လဟီုကောဂှ် ဒှ်တဴဂလာန်။ လၟေၚ်ဒးသၟာန် သွံရာန်စကၠာ။ သာ်ဂှ်ဒးသၟာန် နိဒါန်ညးဖျာ။ သၟိက်ရာန်ရာန်ရ လပပၠံကာ။ ဟီုဂတဟေၚ် ဋ္ဌာန်တၟေၚ်ဂွံအာ။ ဒမံၚ်ပိုဲကၠာ ခန်လွာပိုဲဟေၚ်။ ပိုဲသ္ဂောံစဴအာ အရာထာန်တၟေၚ်။ ကောပဂၠာဲသၟာန် ဂလာန်ဟွံသေၚ်။ ညးမိၚ်ဂလာန် ကောသၟာန်ရိုဟ်ရေၚ်။ ညးပအရိုၚ် ဂြိုၚ်ဝေၚ်ကောဟေၚ်။ ပသၟာန်ရိုဟ်ရေၚ် တၟေၚ်ဂၠိုၚ်ကဵုဒၞာဲ။ မၞိဟ်တမြံအဵု ဓလဵုလောန်ကာဲ။ သာ်ဝွံတုန်ကီု ဟီုစရီုနာဲ။ ကောပဂၠိုၚ်ဂၠာဲ ဒၞာဲဝါဲဒေသ။ အိုတ်တၟံညး ဇၟာပ်ဍုၚ်ရးဗ္ၚ။ ဗာ်ဆုဒုန်ရ ဒေသဝွံသၟတ်။ အာကၠုၚ်တဝဵု ဟွံတီကဵုဗၞတ်။ ကေၚ်သွံကေၚ်ရာန် ထာန်ဝွံပယတ်။ ဟိုတ်ဂှ်အဆတ် မှတ်ကၠုၚ်သေၚ်ဟာ။ ။

ဗြဴပန်ဂှ်ကီု သီုကဵုမာယာ။ နာဲမိၚ်ပါၚ်ကၠာ သိုက္ခမာဗြဴ။ ဒ္ၚဳဟီုတိုန်ပၠန် ကဵုဗြဴပန်အဴ။ ယွံမိဗြဴပန် လက်သန်တ္ၜတ်သဴ။ အဲဟွံပ္တေံကီု လဟီုမိအဴ။ ကလော်တံကီု နဲကဲသတီုတဴ။ ပၠေၚ်ရုပ်ကလော် ဗော်ဒေဝတဴ။ ပရုပ်မၞိဟ်ဟေၚ် အတိုၚ်လၟေၚ်ဗြဴ။ ယဵုသွံဗြာတ်က္ၜဴ ပရဴညးဖျာ။ သကဲတာဲပ္ညုၚ် ကွာ်ကၠုၚ်ကွာ်အာ။ လေပ်ဒှ်ကီုဟေၚ် သာ်ဂှ်သေၚ်ဟာ။ ဟိုတ်ဂှ်ဒးသၟာန် ဂလာန်မေတ္တာ။ နူကောညာတ်ပၠန် မိညးပန်ကၠာ။ ဟိုတ်ဂှ်ကွေံကြာန် ဒါန်တၞံတမၠာ။ ညာတ်ဒးစိုတ်ဆာန် ဇြဟာန်စပ်အာ။ သၟိက်ဂွံရေၚ်ကာန် မွဲဟာန်မွဲသၞာ။ သၟိၚ်ဂွံပူဗန် သၟဟ်န်သာဓာ။ စိုတ်အဲဒှ်ဟေၚ် ဗွဲသၟတ်သေၚ်ဟာ။ ဟိုတ်ဂှ်အဲကၠာ အၚ်္ကာယုတ္တိ။ ဗွဲမသၟဟ်ကီု မိဟီုကဵုညိ။ ဗွဲစၟတ်ယုတ္တိ မိညးပန်ကၠာ။ ဟွံသေၚ်ကောန်နာ် ပ္ဍဲဍာ်ဂၚ်္ဂါ။ ပရုပ်ဖံက်သေဝ် ပၠေဝ်သွံစဖျာ။ အဲသၚ်္ကာအဴ သၠေဟ်တဴစၟာ။ မူဟိုတ်မ္ဂး အဲဒးသၚ်္ကာ။ ထာန်ဝွံဂြိုပ်ဂျိ ဇာတိတမၠာ။ ဋ္ဌာန်ကၠာထာန်ဗြန် ဇြုံကၠန်နာနာ။ ကၟီသြိုတ်လကိုဟ် ကလော်ဂြိုဟ်စာ။ ဟွံမွဲဒမံၚ် သၞေဟ်အံၚ်သၞေဟ်ဖျာ။ ဟွံမွဲဍုၚ်ကွာန် ဋ္ဌာန်ရညးဝါ။ ဇြဴဖံက်သေဝ်ကွေံ နွံမွဲလှ်ေဟာ။ ဟိုတ်ဂှ်အဲဂး အဒးသၚ်္ကာ။ သၟာန်အဲဝွံကၠာ သီုမေတ္တာရောၚ်။ ။

ယွံတြုံအသဝ် ရုပ်ထဝ်ဒကောၚ်။ နာဲစဳကၠးရောၚ်မွဲတောၚ်ဂးမာ။ နာဲတီညာတ်သၟတ် လိက်ပတ်ဝေါဟာ။ နာဲနွံတဴကၠာ ပညာဂှ်သၟတ် လဟီုအဵု ဟွံဒးကဵုဝတ်။ မသၠေဟ်ပၟာ နာဲပပြာကတ်။ နာဲဂၠာဲစဳစတ် သၟာန်စံၜတ်ကၠာ။ ဟွံသေၚ်ယောဂဳ ကောန်မှာဗဳသြဴ။ နာဲဂၠာဲဟီုဂှ် ဟွံဒှ်သဘဴ။ ဗတ်ပိုဲဒှ်ကၠာ ကောန်မှာဓနဴ။ ပၠေၚ်ကၠေံရုပ်အဴ တရဴကၠေံအာ။ ခဍေၚ်ရပ်ညး ကွေံဒဴဗၠးဟာ။ ဗတ်ဒှ်လကိုဟ် သ္ကာတ်ဂြိုဟ်စာ။ တာဲဟွံကဵုမံၚ် တံၚ်ဓဇက်ဏာ။ ဗတ်ပိုဲဒှ်ပၠန် ဗြဴကုံဘန်ကၠာ။ မတ်ဓလန်ဒ ညာတ်ဒညညှာ။ ဗတ်ဒှ်ကလော် သော်ညံၚ်ရိုဟ်တာ။ ဇကုကောအဲ ဓဇက်ဂြဲဏာ။ စဖျုန်သဂုတ် ဇုတ်ထောံလသာ။ ဗတ်ဒှ်ဗြဴနာ် ပ္ဍဲဍာ်ဂၚ်္ဂါ။ ဇကုကောအဲ ၜံက်ဂြဲလသာ။ ဟိုတ်ဒှ်မၞိဟ်သၟတ် ဗွဲအဆတ်ကၠာ။ လၟေၚ်သွံရာန် ပိုဲသၟာန်သၟုက်အာ။ ကောဟွံပိုၚ်ခြာ ဂတကၠာကြဴ။ ရာန်ပိုဲဂွံသွံ ဟွံရာန်ဂွံစဴ။ ထာန်တၟေၚ်သ္အာၚ်သွံ ပိုဲဂွံအာတဴ။ သီုဗြဴပန်အဴ ဟီုတဴမာယာ။ ။

နာဲဒကောၚ်ပိုန် သီုကွိုန်ပညာ။ မိၚ်ပါၚ်ဗြဴပန် ပ္ဍဲစိုတ်စန်စာ။ ထာန်ဝွံထာန်ဂျိ ဇာတိတမၠာ။ မၞိဟ်ဂးဟီုကွေံ နွံမွဲလှ်ေဟာ။ မၞိဟ်ဟွံဒှ်အဴ ဒေဝတဴမာ။ မတန်ဒှ်ရ ချပ်နပညာ။ နာဲတီကေတ်သၟတ် ဗွဲအဆတ်ကၠာ။ ဒဒှ်ကလောၚ် ဗြဴဗော်ယက္ခာ။ ၜိုန်တီကွေံကြာန် ဟိုတ်ဒါန်တမၠာ။ ဒှ်မၞိဟ်တၞံဂျ ဂၠိုၚ်ဘဝကၠာ။ ဟိုတ်ဒှ်မိတ်ဒါန် ညာတ်တုဲဆာန်အာ။ သ္ဍိုက်မၠိုက်ဖဳဒွါ သာဓာသၟိက်ညန်။ မိက်ဂွံသ္ဍိုက်ဆာန် ရေၚ်ကာန်သၟဟ်န်။ တံၚ်စိုတ်ဟွံမာန် မွဲဟာန်သၟိက်ညန်။ မဟီုတိုန်ပၠန် ကဵုဗြဴပန်ကၠာ။ ယွံမိညးပန် ရုပ်ညံၚ်ကညာ။ မိတံမဂး မၞိဟ်ကွေံရဟာ။ ပိုဲမိတံကၠာ သာဓာဒးရး။ ဇရေၚ်မိတံ ဆံလံလေၚ်လး။ ကောသမိက်ဇူကောံ ကရောံမိသ္အး။ ပသာ်သၟး စိုတ်ထဝ်ဂၠးရော။ ။

ယွံတြုံမပ တၠအယော။ ရာန်ပါၚ်စရော ကောဟွံဂးကၠာ။ ပိုဲတိုန်ကၠုၚ်ဟေၚ် တာဲကောသေၚ်ဟာ။ ရာန်လေဝ်ဟွံရာန် တၟေၚ်ဟီုကြာန်အာ။ သၟိက်ဂွံသၟဟ်န် မိက်ညန်သာဓာ။ သၟိက်ဂွံလီၜန် မိတ်တန်မွဲသၞာ။ ဟီုပကျာဗာ လီုအာဂလာန်။ ကောတံမတဴ တြဴသ္ၚောဲထာန်။ ပိုဲပ္တောဟ်ဂလာန် ဆာန်တုဲဗွဲကြဴ။ ထာန်တၞဟ်ဟေၚ် ညးကလေၚ်စဴ။ ပိုဲဒးဒှ်ကောံ သ္ၚောံဗွဲကြဴ။ ပါၚ်တြုံတံအဴ ပ္တေဟ်တဴဂွံဟာ။ ။

ယွံမိဗြဴပန် ရုပ်ပကညာ။ နူကောညာတ်ကၠာ ရုပ်သာ်လွာနာဲ။ ဂကောံမိတံ မဇၟံစရာဲ။ မိက်ဂွံမံၚ်ရ သၟိက်ပဒိပ်ဒါယ်။ ထာန်မိကဵုမ ဟွံစဴရနာဲ။ ကောံဟွံမိက်သာဲ နူနာဲတံဟေၚ်။ ကောဟီုဗိုန်ဇၟံ ဟွံသ္ပံတၟေၚ်။ ညံၚ်ဗီုဂြၚ်စိၚ် ဂၠိၚ်တိတ်ဗွဲလွေၚ်။ ဟွံဂၠံကလေၚ် လုပ်ပၠန်သေၚ်ဟာ။ ညံၚ်ဗီုသာ်ဂှ် တန်ဒှ်ဟွံခြာ။ ပ္တိတ်ပါၚ်တုဲမာ ဟွံမုသာကွေံ။ ဒှ်ဗိုန်စၟတ်ရ မိပသလှ်ေ။ လဟီုကောကွေံ မိဟွံပ္တေဟ်ဟာ။ ။

ယွံကောမပ တလပညာ။ ကောကလၚ်ကၠာ ပုံတမၠာအဴ။ ညးဟီုသေၚ်ဟာ က္ၜဴၜါတြုံဗြဴ။ သီုၜါသၟဟ်န် သ္ဍိုက်မၠိုက်တန်တဴ။ ဂစေံကွဴဗြဴ ကြဴတန်ဂဗ္ဘ။ အၚပ်လအိတ် သတ်ကွိတ်သၟိက်စ။ ကွဴဗြဴတုန်ရ စကာတြုံအဴ။ တြုံအာတုဲဟေၚ် ဟွံကလေၚ်စဴ။ ဟွံဆာန်ဗြဴပၠန် တြုံဓဇန်တဴ။ မာတ်တြုံဟွံစိုပ် ဗဒိုပ်ကွဴဗြဴ။ အလုမ်ဂြိုပ်ဇၞော် ကွဴဗြဴကော်တဴ။ ကောပိုဲကောပိုဲ ဟိုဲကောညံၚ်စဴ။ စဵုလၟုဟ်အဴ ဗြုကော်တဴကၠာ။ ညံၚ်ဗိုကွဴဂှ် ဒှ်တဴပၟာ။ ပါၚ်တြုံတံရ ပတံသာဓာ။ စိုတ်တြုံတံကွေံ ပ္တေဟ်စဂွံဟာ။ ကောဒကောၚ်ဗိုတ် ဒေပ်လဝ်စိုတ်ၜါ။ သၟိက်ပကျာဗာ ပအာတံစၞာဲ။ ပါၚ်ဂစေံနေံ သၟိက်လှေံဒိပ်ဒါယ်။ ဇိုန်ဖျိုန်လမျီု ဟိုဇီုဂၠိုက်ဂၠာဲ။ ပိုဲတီဥပါဲ စိုတ်ကောဗၠာဲဟာ။ ။

ယွံမိဗြဴပန် ရုပ္ပကညာ။ မိဇက်နၚ်ကၠာ ပုံပၟာကွဴ။ ကွဴကၟက်ဓဇန် ဟွံတန်ဒှ်တဴ။ ကွဴကၟက်ဟွံစဴ ဒေံဗြဴတီဟာ။ ကွဴကၟက်သဘဴ ဟိုတ်ဆာန်ဗြဴကၠာ။ ဗြဴစကာဗက် ကွဴကၟက်ဒးအာ။ ဂၠာဲသတ်ကွိတ်ကိုပ် အလုမ်ဂြိုပ်ဝါ။ သတ်ကွိတ်ဂှ်ဟေၚ် ဟွံဂွံသေၚ်ဟာ။ ကွဴကၟက်ပဝ်အာ ကြာဥဒျာန်သၟိၚ်။ သတ်ကွိတ်မွဲတၞံ ဍုဟ်ဗြံသဝိၚ်။ ဥဒျာန်ဗျိၚ် သၟိၚ်ကဵုမၚ်တဴ။ သၟာပၞောဟ်ရ သၟာတ္ၚတံအဴ။ ပၟၚ်ဥဒျာန် ဟီုပါန်ကမြဴ။ မၚ်မွဲဗိုန်တဴ ကွဴကၟက်အာညာတ်။ သၟိက်သ္ဂောံသတ်ကွိတ် လအိတ်သေသာတ်။ သ္ၚဳရံၚ်ကွိတ်ကၞောတ် ညာတ်သၟာတ္ၚ။ လုပ်ကေတ်ကွိတ်ပၠန် ဖေက်အိုတ်ခန္ဓ။ စဴသၟးသွံ ဗြဴဟွံဂွံစ။ ဗှ်သမ္ဘာဆာန် ဇြဟာန်မူလ။ ဟွံရိုဟ်စကီု ကဵုလမျီုရ။ ကွဴကၟက်ဂှ်သွံ ဟွံရောံဒည။ ပဝ်လုပ်လအိတ် စိုပ်တၞံကွိတ်ရ။ သၟာတ္ၚပၠန် ပန်စုတ်ချိုတ်ဒး။ ကွဴကၟက်ဆာန်ဗြဴ ချိုတ်တဴဘဲလၟ။ ဟွံဂွံကလေၚ် ကဵုဗြဴဟေၚ်ရ။ ဗြဴဟွံတီကီု တြုံလီုခန္ဓ တြုံအောန်သစ္စ ဟီုဗျံက်ဗျတဴ။ ။ မာတ်တြုံဟွံစိုပ် ဗဒိုပ်ကွဴဗြဴ။ အလုမ်ဂြိုပ်ဇၞော် ဗြုံကော်ဓဝဴ။ ကောပိုဲကောပိုဲ ဟိုဲကောစဴပြဟ်။ စဵုကဵုလၟုဟ်ဝွံ ဗြုကော်တဴကၠာ။ စလာဲပုံကွဴ နွံတဴသေၚ်ဟာ။ ဒေံဗြဴတုပ်ကၠာ ပၟာကွဴဗြဴ။ ကောတုပ်သက်လက် ကွဴကၟက်သဘဴ။ ကွဴကၟက်ဒးချိုတ် ဟိုတ်နူဆာန်ဗြဴ။ ကောမတုပ်တဴ ကွဴကၟက်သေၚ်ဟာ။ ညာတ်ညးတံဂှ် သၟဟ်န်ညဳသာ။ သၟိက်ဂွံရေၚ်ကာန် ဆာန်ကၟိန်သာဓါ။ သၟိက်ဂွံလီၜန် တန်မွဲသၞာ။ လမျီုကောကၠာ ၜိုန်ဂိုဟ်ခါဂှ်။ ကောဇိုန်ကွာဲဟေၚ် စိုတ်ဟွံတၟေၚ်တၟဟ်။ ဗွဲကွဴဂှ်ရော စိုတ်ကောမဒှ်။ ကောဟွံလဖှ် ဒဒှ်စရာဲ။ ဂကောံနာဲရော ကောသၟိက်ဒိပ်ဒါယ်။ ပသာ်စိုတ်နာဲ ဂွိုၚ်စရာဲရော။ ။

ယွံညးမပ တၠအဃော။ ပါၚ်တြုံတံရော ယောသောတၟေၚ်အာ။ ပါၚ်ဟီုတၞဟ် စိုတ်တဏဟ်ခြာ။ ဗီုဥပ္ပမာ သာ်လွာ်ထိုၚ်အဴ။ သၟိၚ်ထိုၚ်ပဝ်လှောၚ် ဂၠာဲဇာပ်ဍောၚ်ပ္ကဴ။ ဂွံရှ်ပ္ကဴဟေၚ် ပဝ်ကလေၚ်စဴ။ ရှ်ပ္ကဴအိုတ်သွံ ဟွံမိက်ဇာပ်တဴ။ ဟွံဗၠန်သ္ၚဳအဴ ဍောၚ်ပ္ကဴဂှ်ကၠာ။ ဍောၚ်ပ္ကဴသ္အာၚ်ဟေၚ် ဂၠာဲဇာပ်သေၚ်ဟာ။ နဲသၟိၚ်ထိုၚ်ကီု တုပ်ဗီုပၟာ။ တြုံတံတုန်ကၠာ ဝါစာဂလာန်။ လဟီုဍာတ်ကြောံ သၟိက်သ္ဂောံရေၚ်ကာန်။ ကၠုၚ်ဖျိုန်ဂလာန် နိဒါန်ဟုဲဟဟ်။ ရေၚ်ကာန်ဖဲအဴ ကြဴပမတ်ၛဟ်။ ထာန်တၟေၚ်တၞဟ် ဂၠာဲလဖှ်အာ။ ပါၚ်တြုံတံကွေံ ပ္တောံစဂွံဟာ။ ကောဒကောၚ်ဗိုတ် ဒေပ်လဝ်စိုတ်ၜါ။ သၟိက်ပကျာဗာ ပအာစိုတ်စၞာ။ ဟီုဇီုစေံနေဴ လှေံပဒိပ်ဒါယ်။ သၟိက်ဖျိုန်လမျီု ဟီုဇီုဂၠိုက်ဂၠာဲ။ မိတီဥပါဲ စိုတ်ကောဗၠာဲဟာ။ ။

ယွံမိဗြဴရတ် ကၞောတ်ရုပ္ပါ။ မိဇက်နၚ်ကၠာ ဗိုပမာဏ။ မိဖျောပ်ပိုဲတြုံ နၚ်ဒုဟ်သဗ္ဗ။ မိကလၚ်ကၠာ ပၟာထာဏ။ စရိုတ်ကောဂၞဴ ရစၟခြ။ စၟခြဂှ် ပဒှ်ဒေသ။ ဍေံညာတ်ကေတ်သၟတ် လျးပၟတ်ရ။ သာ်လျးဝွံပၠန် ဂေါဝ်သန်ယဲသ။ အာကေတ်ဗိုန်ဇၟံ လျးဝွံမးလ။ လျးဝွံကဵုအြ ကဵုဒှ်မွဲရ။ ဍေံဂးတုဲကွေံ ဆၚ်စှ်ေဒေါဝ်လ္ၚ။ လမျီုခန္ဓ ဟွံရိုဟ်စကၠာ။ စၟခြဟေၚ် သာ်ဂှ်ဟေၚ်ဟာ။ အဲနဲဂှ်ကီု တုပ်ဗီုပၟာ။ ညာတ်ရုပ်မိတံ သိပ်ဇၟံပြာထာ။ သၟိက်ဂွံရေၚ်ကာန် ဆာန်ကၟိန်သာဓာ။ သၟိက်ဂွံသၟဟ်န် ညန်မွဲသၞာ။ လမျီုကောကၠာ ၜိုန်ဂိုဟ်ခါဂှ်။ ကောဇိုန်ကွာဲဟေၚ် စိုတ်ဟွံတၟေဟ်တၟဟ်။ ဗီုစၟခြ စိုတ်ကောမဒှ်။ ကောဟီုလဖှ် တိုၚ်လွဟ်စလာဲ။ ပသာ်စိုတ်နာဲ ဂွိုၚ်စရာဲရော။ ။

နာဲဒကောၚ်ပိုန် ဒတိုန်အဃော။ ကဵုဗြဴပန်ရော ဟီုထောပဏာ။ သၟတ်ဗြဴပန် ရုပ္ပကညာ။ ၜိုန်သ္ဍိုက်နာဲလောန် သၟိက်ညန်သာဓာ။ ဟီုပ္တိုန်ဖအာ ဟွံဂွံခြာဒၚ်။ ဗြဴပန်ဂှ်မာ ညာဏ်ညံၚ်မှာဂၚ်။ နာဲနွံပညာ ညံၚ်သာ်လွာသြၚ်။ ပုံကၞက်အဂီု ဗီုမိဂၠာဲနၚ်။ နာဲဟီုခၠေဝ်ဇိုတ် အိုတ်အာလၚ်ၚ်။ ညံၚ်လပှ်ကၠာ အိုတ်အာပ္ဍဲသြၚ်။ ဗြဴပန်သွဳသွပ် မိၚ်ဒးကၞပ်သၠၚ်။ သွက်ဂွံခၠေဝ်ဒၚ် ဗီုပြၚ်ကဵုမ။ ပုံကၞက်တုန်ရ ညိညအိုတ်အာ။ နာဲဒကောၚ်ပိုန် ဒဵုဟီုတိုန်ကၠာ။ ယွံမိဗြဴရတ် ကၞောတ်ရုပ္ပါ။ နာဲဖျေံမေတ္တာ ညံၚ်ဟွံခြာသာဲ။ လမျီုခန္ဓ ကောပတၟာဲ။ ကဵုဂွံဇူကောံ ကရောံဒဴနာဲ။ ကဵုဂွံဒိပ်ဒါယ် ကရောံနာဲညိ။ ။ ဗြဴပန်ဂွံမိၚ် ကွိၚ်ပါၚ်ကောမိ။ စံၚ်တူစိတ ဒမၠိတ္ၜူမှာဲ။ ပါၚ်တြုံအသဝ် ဗီုဂတဝ်သာဲ။ ရမျာၚ်အမြိုတ် မိပ်စိုတ်ဒးလာဲ။ ကြုတ်ဏာဗဇဴ ဂမ္ဘဴတ္ၜူမှာဲ။ ညာတ်ဗ္ၜူမတ် သြိုဟ်လယတ်ချာဲ။ ဝေၚ်ဗီုတ်ဟွံမာန် ဇြဟာန်လောန်ကာဲ။ ဗြဴပန်ဟွံဇြိုန် အီတိုန်ဖျာဲဖျာဲ။ ဗီုဇုက်လလဳ ကၞိၚ်ဗစဳချာဲ။ သီုဗြဴပန်ဂှ် သၟဟ်န်စရာဲ။ ဂလာန်စံက်ထေံ စေံနေံဂၠိုၚ်ဂၠာဲ။ မပဂေါဝ်ဆာဲ သီုနာဲဗြဴပန်။ သ္ဍိုက်မၠိုက်သာဓာ ညဳသာသၟဟ်န်။ ဆာန်ကၟိန်ပူဗန် လီၜန်တဴမံၚ်။ ။ မူညံၚ်မတုပ် ဥပ္ပမာဆံၚ်။ ပၟာတုပ်သၟဟ် ဒကှ်တမြံၚ်။ ဒေါဝ်လစဂွိုၚ် ကြာလိုၚ်လစံၚ်။ ယာံညာတ်အရံၚ် အံသဝ်တ္ၚဲဗၠာဲ။ ပၠိုဟ်ထာၚ်လပၠာၚ် ပံက်ထာၚ်ရာၚ်ဆာဲ။ ထိုက်ဍောၚ်အသဝ် မြမောဝ်တၟာဲ။ ရဴမရာဲကွာဲ သၟိၚ်တ္ၚဲဗၠာဲကီု။ မိတုပ်ဒကှ် တိုၚ်ထဝှ်ဗီု။ နာဲမတုပ်ကီု ဗီုသၟိၚ်တ္ၚဲဗၠာဲ။ မိတ်ဂွိုၚ်စရာဲ ကောန်ဗၠာဲလးလေၚ်။ မိၚ်ပါၚ်တြုံတုဲ စိုတ်သုဲကလေၚ်။ စိုတ်ဟွံဂွံဗၠေၚ် ဟွံဒစေၚ်အာ။ ပၠိုဟ်ထာၚ်ရာၚ်ဆာဲ ကွာဲစန္ဒိမာ။ ဗၠိုပ်လစသာၚ် ရမျာၚ်မေတ္တာ။ ပၠိုဟ်ထာၚ်ကြုတ်ဏာ ကွာဲထာၚ်ဃာန။ ။

ဒေဝပန်ပ္ညဳ ပဳတိက္ဍၚ်ပြ။ ညံၚ်ဇုက်လလဳ ကၞိၚ်ၜါစဳခၠ။ မဒကောၚ်ပိုန် ဒတိုန်ရုပ္ပ။ ဂကောံဗြဴပန် ပူဗန်လံလ။ တိက်မွဲဖုန်ဒၞဳ သ္ၚဳလဝ်ကာယျ။ တဲသွိၚ်လဗာၚ် ထာၚ်ဍောၚ်ပဒၟ။ မူညံၚ်မတုပ် ဥပ္ပပၟာဏ။ ညံၚ်ဇၞးဇၞူစှ်ေအာ ပ္ဍဲကြာလစ။ ဍောၚ်ဒကှ်ဗျိၚ် ဂိုၚ်ၜှ်သွိၚ်ပၠ။ ဇၟူဗၠာဲဂေၚ်က္ဍၚ် ဍာဲသြၚ်လစ။ ဇၟူလှိၚ်တဴစိုတ် ညံၚ်အမြိုတ္တ။ နာဲမတုပ်ဇၟူ တ္ၜူမာဲရုပ္ပ။ ဒကှ်တုပ်ရောၚ် သြိုဟ်ဍောၚ်ပဒၟ။ လပုဟ်တဲသၟိၚ် ကွိၚ်လုမ်ကာယျ။ ဂိုၚ်ၜှ်ပလှ် ဒကှ်မဒၟ။ နာဲမဟုဲဟဟ် သၟဟ်အမြိုတ္တ။ ဗြဴပန်ကျာ်သြဳ ဒ္ၚဳဇိုန်ကဵုမ။ နာဲဒကောၚ်ပိုန် ဒေါဝ်ကွိုန်ဘောဂ။ ဂကောံဗြဴပန် သၟဟ်န်စိတ္တ။ သ္ဍိုက်မၠိုက်လံလ ခယျသာဓာ။ ။ ဒကောၚ်ပိုန်အဵု ကဵုဗြဴပန်ကၠာ။ ဝေၚ်ဂြိုၚ်စံက်ထေံ။ စေံနေံစန်စာ။ သ္ဍိုက်မၠိုက်သၟဟ်န် တန်မွဲသၞာ။ ညံၚ်ဒကှ်ဗျိၚ် ကဵုသၟိၚ်တ္ၚဲကၠာ။ ညံၚ်ဂိတုဗျာၚ် ညံၚ်ဍောၚ်ထာၚ်သွာ။ ညံၚ်အိန်နာဲဗြီု ကဵုသုဇာတာ။ ဝတ်ပရေၚ်လိုက် သ္ဍိုက်မၠိုက်ညဳသာ။ ဟီုပ္တိုန်ဖအာ သာဓာလဗိၚ်။ စလောံကံဖဵု မုက်ကၞိၚ်ကဵုကၞိၚ်။ ပ္ဍဲတာဲဇမၠိၚ် ဒ္ၚဳလှိၚ်အာရောၚ်။ ။ ညးမသုန်ဂှ် သၟဟ်န်မွဲတောၚ်။ သီုဗြဴပန်ရောၚ် ဂွံအခေါၚ်တုဲ။ မိပ်စိုတ်လောန်သန် သီုပန်အီပြုဲ။ လွဳစိုပ်ဒတုဲ ဟိုတ်ဒါန်ပတုဲလဝ်။ မိနာံသာအိုတ် စိုတ်တြုံအသဝ်။ ဍေံလှေံလှန်စိုတ် ပၠာံစိုတ်ဆတ္တဝ်။ ဂမုၚ်စမ္ပါ စမ္ၚာမြမောဝ်။ ဂဇေၚ်ဇြၚ်ထောဲ လပေါဲဒၞာဲဂေါဝ်။ စလန်အဂၠဴ ရဴဍောၚ်ပ္ကဴထဝ်။ စုတ်ပ္ဍဲက္တောဝ်ၜါ နာဲသာဇံသဝ်။ စလန်မောဝ်ဟုံ ဖုံလဗိုဟ်လဝ်။ ကၠေၚ်သီုမြမောဝ် ပၠာံလဝ်သော်နာဲ။ ကွာၚ်ၜဲယိုဟ်က္ၜန် ဆန်ၜန်စုတ်ကွာဲ။ ဇၟၠုလက်ဖက် သွက်ကောဗၠာဲ။ သာ်ဝွံဇိုန်ကွာဲ ကဵုနာဲရောၚ်အဴ။ ။ နာဲဒကောၚ်ပိုန် ဒတိုန်ကြက်လှဴ။ ဒ္ၚဳဒ္ၚဳဍိုန်န် ဒယှ်ေတိုန်အဴ။ ရမျာၚ်ညံၚ်ကွိၚ် မိၚ်စိုတ်ဒမြဴ။ စံၚ်ဒြဝ်လဒု တိၚ်ဗရုတဴ။ ကွိၚ်ကဵုရမျာၚ် စလာၚ်နှဴရဴ။ ဗြဴဂွံမိၚ်အိုတ် မိပ်စိုတ်ထိုက်လဴ။ ဒေဝတဴဗြဴ ရဴစိုတ်ဟွံတန်။ သ္ဍိုက်မၠိုက်လောန်ကာဲ သီုနာဲဗြဴပန်။ ဝေၚ်ဂြိုၚ်အဵုဇိုတ် မိပ်စိုတ်လောန်သန်။ သ္ဍိုက်မၠိုက်ပူဗန် ညန်တ္ၚဲမသဝ်။ သွက်ညးအာဂြိုပ် ကၠုၚ်စိုတ်ဆတ္တဝ်။ ဍာ်အောဟ်ပုၚ်ကောံ ဒးတုက်ကောံလဝ်။ နာဲဂးတုဲကၠာ က္တဵုအာဆတ္တဝ်။ လာၚ်မုက်နာဲပၠန် ဗြဴပန်အသဝ်။ သာ်ဝွံဆတ္တဝ် ဟီုလ္ၚောဝ်ကွာဲ။ ။

ယွံကောန်သၟိၚ်ဓဝ် စက္ကဝဝ်ဗၠာဲ။ ပိုဲဍိက်ညးပန် ကၠောန်ပၠန်သၞးနာဲ။ ကောဂဇံရ လပဒွိၚ်ဒွာဲ။ ဂးတုဲဗြဴပန် သၟဟ်န်စရာဲ။ ဂၠာဲအောဟ်တုက်ဍာ် တောံပုၚ်ကွာ်ၚာဲ။ ပုၚ်စိန်တောံသွ ကပေၚ်ထၟာဲ။ စာၚ်အဒါအောဝ် မောဝ်ပ္ဍးဆာဲ။ ကွာၚ်သီုအမာဲ စဳရေၚ်ကွာဲလဝ်။ ဒးစဝ်ပၠန် ညန်တ္ၚဲမသဝ်။ ဂကန်ဖျုန်သၟတ် ကဵုတြုံဆတ္တဝ်။ ယွံကောသၟိၚ်ဓဝ် တြုံအသဝ်နန်။ ပိုဲစဴကၠာရ ကောပဝေါန်စန်။ ကောမစံၚ်တူ ပူဆာလ္ၚုလ္ၚန်။ စိုတ်ကောကဵုတန် ပချပ်တ္ၜန်တ္ၜုဲ။ နူပိုဲဍိက်ဗြဴ ဆာန်ကောဂၞဴတၟုဲ။ စိုတ်ဟွံတၟေၚ်တၞံ တံဇိုၚ်တြုံလွုဲ။ ဖျိုန်လမျီုတုဲ ဟီုဇီုဟုဲဟဟ်။ ပ္ဍဲကောနာဲသ္ၚိ စိုတ်ဟွံတၟေၚ်တၟဟ်။ ယးဂတပ္ညုၚ် ပိုဲစိုပ်ကၠုၚ်ပြဟ်။ သတ်ဗြဴဗြာတ်က္ၜဴ သိဠဴပဏဟ်။ မြာၚ်မ္ၚောဝ် ကြုက်ထဝ်နွံရှ်။ ဒရေဲဂၠံက်က္တဵု ဍုဟ်ဂဵုလတှ်။ သစ္ဆုမၞုံရှ် ပိုဲဂၠာဲၜှ်တဴ။ ပိုဲၜှ်နၚ်ရော သွက်နာဲကောဂၞဴ။ လ္ပဒွိၚ်ဒွာဲ နာဲဍောၚ်ပ္ကဴ။ ဗကန်တုဲအဴ ဒ္ၚဳက္တဵုစဴတုန်။ ။

လဣနၚ်ဒဴ လထဴနွံဂုဏ်။ သၟတ်ဗာ်ဆုဒုန် တမ်ညဝ်တုန်သ္အး။ တုၚ်ၚ်တိၚ်ၚ် ဂြိၚ်ၚ်ဒေါံနး။ ဂြံဂြံဒေါံနး နူယးဒဵုသဝ်။ လ္ၚဵုဗာက်ဖ္ဍိုက် လ္ၚဵုဂှ်ယိုက်ဗဝ်။ လ္ၚဵုဂှ်ကုတ်ဒုန် ဖန်ဖက်ၜတ်လဝ်။ လထဴၜတ်လဝ် စွံဗွဝ်တရေၚ်။ သဏကဵုစိၚ် ဂၠိၚ်ဂၠေံဗွဲလၟေၚ်။ ဒယိုၚ်တဝ ၜတ်ပၠလဝ်ဟေၚ်။ ဒမၚ်ကၞံၚ်ရေၚ် လၟေၚ်ရတ်မူလ။ လဣနၚ်ဒဴ ထဴပြေၚ်စွံပၠ။ မာတ်တ္ၚဲသဝ်အာ ညန်ကၠုၚ်ကာလ။ မြာ်ဂြဴလဓဵု ဍေၚ်ကြဵုအဝ်ဇ။ တ္ၚေက်ပဝ်စဴရ ဒေသပနာၚ်။ စာၚ်ဍာ်ဗြုကြဵု ကွက်ကွက်ကဵုပါၚ်။ လိုက်ထောဝ်စလာၚ် ကဵုပါၚ်ရုရု။ ကွဴဂြဴဂဍုတ် ဖဝ်ရဂုတ်ဗြု။ ခနှေၚ်စက်စာန် ထာန်ကံလဒု။ ဗၜဵုကော်ကောန် ယောန်သၟဝ်တၞံဆု။ စိုပ်ဂွာံဥတု စနူသန်ၛာ။ ။

သၟိၚ်တ္ၚဲဆတ္တဝ် မညန်သဝ်အာ။ လဣနၚ်ဒဴ လထဴနာဲသာ။ ကော်ကောန်ရဲတုဲ ဒ္ၚဳသုဲစဴအာ။ စိုပ်တာဲတုဲဒှ် ဟုံဍာ်အောဟ်ကၠာ။ ဟုံဍာ်တုဲကိုပ် စိုပ်တာဲဒၟံၚ်ဗ္ဂါ။ ကောန်ရဲကောန်သာ လုပ်အာဖဴပ္ညုၚ်။ ပံက်ကၠာၚ်ညာတ်က ပံက်နညာတ်ပုၚ်။ ညာတ်အမာဲပၠန် လပန်ဓလုၚ်။ နာဲစဳရေၚ်အဵု ကဵုညးဟာပ်ပုၚ်။ စာၚ်အဒါအောဝ် မောဝ်ပ္ဍးတလုၚ်။ သွက်နာဲရဲကၠာ စုတ်ဏာသွပုၚ်။ ထဴဂဇံၚုၚ် ညာတ်ပုၚ်အမာဲ။ သၠေဟ်တဴပၟာ ဗ္စါရဏာဂၠာဲ။ ဗၠာဲဂမြိုဟ်ကံ ဂဇံစၚာဲ။ ထိုၚ်သးနာဲကၠံၚ် ထေက်ကဵုမၚ်တာဲ။ ပုၚ်ကွာၚ်စၞ ဖျုန်ကဇၟာပ်ဒၞာဲ။ စဳရေၚ်ခိုဟ်က္ဍၚ် ကြိုက်ကဵုမၚ်တာဲ။ ခိုဟ်ဂးလောန်ကာဲ ထေက်မၚ်တာဲရောၚ်။ ညးဂမၠိုၚ်ဂး ထိုၚ်သးဂၠိုၚ်တောၚ်။ မူဒၞာဲမဂွံ ဇၟာပ်စၞဟွံယောၚ်။ ဂွံစဳရေၚ်လဝ် ဂွိုၚ်ထဝ်ဏှာသောၚ်။ သၟာန်အာစအာ ထိုၚ်သးဂြိုၚ်သၠောၚ်။ စဖဲတုဲရောၚ် ဍောၚ်ၜိုတ်သၠိၚ်အာ။ ။

တ္ၚဲဂှ်ယးကၠာ တၟာအာဒိုဟ်ပန်။ စဟာပ်တုဲကၠာ လုပ်အာဂြိုပ်ပၠန်။ ကောန်ဒေဝတဴ သီုကဵုဗြဴပန်။ ကျိုၚ်ကျဝ်တုဲဓဝ် ရုပ်ဂေါဝ်ဂါသန်။ ဒေဝတဴအဴ ပ္ကဴကြက်စလန်။ ကၠုၚ်ကယျိုၚ်ကၠာ တြုံသာရဲဇန်။ ၚဳစဲဂြးသော် ဟုံဗော်စလန်။ ဇဗၠုစုတ်လဝ် သၠိုၚ်ထဝ်သၠိုၚ်သြန်။ လီၜန်စံက်ထေံ စေံနေံသၟဟ်န်။ ရိုဟ်ဟ်တ္ၚဲဟေၚ် လၟေၚ်အလန်။ စဳရေၚ်ပုၚ်သွ အမာဲကဗျန်။ တ္ၚဲသဝ်သၟိက်စဴ နဲကြဴဂကန်။ နာဲနွံပညာ ခါဂှ်သၟာန်ပၠန်။ ရုပ်ညံၚ်ဍောၚ်ပ္ကဴ ယွံမိဗြဴပန်။ ကၠုၚ်တုဲစဴအာ ပသာ်လွာပၠန်။ နူကဵုဍုၚ်ကွာန် ထာန်မသ္ၚောဲညန်။ မိတံဟီုဂှ် ဒှ်ဟွံဒှ်ပၠန်။ အဲသၟိက်ညာတ်ညိ ယွံမိဗြဴပန်။ ဗြဴပန်တုန်ကီု မိလဟီုပၠန်။ ညးပန်ဟွံဇြိုန် ဟီုတိုန်ဟွံခၠန်။ ယဝ်သၟိက်ညာတ်ကၠာ ဖျာလွာဂၠိုၚ်တန်။ ပိုဲအာထ္ၜး ဍုၚ်ရးဂၠိုၚ်သန်။ လပဝေါန်စန် နာဲနွံပညာ။ ဒ္ၚဳဗက်အာပၠန် ဗြဴဒေဝပန် ဒ္ၚဳဗၠန်စဴအာ။ ။

ဍေံက္တဵုဗဒှ်ဟေၚ် လၟေၚ်သ္ၚိဖျာ။ ဖျာကွာၚ်ၜဲရ ဇဗၠုသၠကၠာ။ သ္ၚိဖျာဗြာတ်က္ၜဴ သတ်ဗြဴသတ်တာ။ မြာၚ်သတ်ကြုက် မုက်ဗဳလၚ်္ကာ။ ဂၠံၚ်တဵုပၞဟ် ဖျာဂှ်မွဲသာ။ ဖျာဂၠိက်ယာတ်ပၠန် ဂၠိုၚ်သန်နာနာ။ မဝါၚ်မအဳ မဇဳပေၚ်ဖျာ။ မုဲကွာန်ၜုန်မြ ဂတေက်ပၞုတ်ကၠာ။ ခဍောၚ်ကဝေဝ် တေဝ်လဝ်ပေၚ်ဖျာ။ ခပဳထဝ်ကီု သီုဝုန်ဂလာ။ ပညန်ဟအဳ ခပဳသွံကၠာ။ လမေၚ်လမေဝ် တရေၚ်ဏာဖျာ။ သ္ၚိထာန်အရာ ဘုတ်ဘာပေၚ်က္ဍတ်။ ဍေံက္တဵုဗဒှ်ဆာဲ နာဲဂွံညာတ်သၟတ်။ ဗဵုဒ္ၚောဝ်တုဲအိုတ် မိပ်စိုတ်လောန်ဗၞတ်။ နူဂှ်တုဲသၟတ် ပယျဝ်ရိုဟ်တ္ၚဲ။ ကွာ်ကၠုၚ်ဂၠောဲဂၠောဲ တ္ၚဲသဝ်စဴအာ။ ။

ဒေဝတဴဗြဴ စဴအာတုဲကၠာ။ ညးမအာဂြိုပ် စဴကၠုၚ်စိုပ်မာ။ နာဲစဳရေၚ်ရ ဗစညးကၠာ။ ပုၚ်သွအမာဲ ကွာၚ်သာဲသဂြာ။ ဖျုန်ဒြာဲဖျုန်ကၠိက် ခရိက်သီုခၞာ။ စာၚ်အဒါအောဝ် မောဝ်တၟာဲအာ။ စဳရေၚ်ကဵုကၠာ နာနာသာ်ပၠန်။ ဗဒုၚ်ကဵုသၟုတ် စုတ်နၚ်ပုၚ်သွ။ ညးပိညးပန် ဖန်ဖက်ကဵုရ။ ဇၟာပ်သွအမာဲ ဂၠာဲဆန်ကဵုစ။ စဟာပ်တုဲဂှ် ဒှ်သံဝေဂ။ လဣနၚ်ဒဴ ထဴဟီုတိုန်ပၠ။ ယွံလေဝ်မၞးတံ လၟုဟ်ဏံရ။ ပိုဲမကၠုၚ်စိုပ် ပ္ဍဲဂြိုပ်ဟေမ။ လၟုဟ်ဝွံသွံ ဟွံသ္ဍာံကံတ္ၚ။ ဟွံဒှ်ဒတောဝ် တၞောဝ်ဖျာက။ က္ၜိုၚ်,ပှ်,ဒြာဲအဵု စဳရေၚ်ကဵုစ။ ဖျုန်စာၚ်ဖျုန်ကၠိက် ခရိက်ဖျုန်က။ မောဝ်ပ္ဍးတၟာဲ အမာဲသဗ္ဗ။ ဖျာလွာသကဲ ဟွံမွဲညိည။ နိဂီုဍုၚ်ကွာန် သန္ထာန်ဒေသ။ အံသာဲကွာၚ်ကၠေၚ် ဂွံပေၚ်သီုန။ တၟေၚ်သန်ပြဝ ထဴတော်ဆကၠာ။ ။

ယွံမၞးတံအိုတ် ဟိုတ်နူဝွံမာ။ ညံၚ်သ္ဂောံတီကၠာ သာ်လွာဂွံပ။ ညးဂမၠိုၚ်ဂှ် ချပ်တုဲဒှ်ရ။ ယးကလဳလုပ်ဂြိုပ် ကိုၚ်အဒိရ။ အာတုဲကၠုၚ်ပၠန် အောပ်ဗ္ဒန်မံၚ်ပၠ။ ညန်တာဲအောပ်ဒၟဴၚ် ညံၚ်သ္ဂောံတီရ။ မမဂေါဝ်ဆာဲ ဒၟံၚ်ပ္ဍဲတာဲဂျ။ တိၚ်စံၚ်လဒု ဗရုထဏ။ ဒယှ်ေစလာၚ် ကဵုထာၚ်ဝါကျ။ ရမျာၚ်ကဵုကွိၚ် ယာံဂွံမိၚ်ပၠ။ ညံၚ်ဂတဝ်သာဲ တၚ်လာဲဒးကျ။ ညံၚ်အၚောဝ်သၟိၚ် ကွိၚ်ဥဒိုန်ရ။ ဂြေန်လဝ်စိုတ်ဇၟူ ဗၜူစိတ္တ။ ဗီုသာ်ဂှ်ကၠာ ဥပမာဏာ။ ဒေဝတဴပန် ဝုတ်ကညာဏ။ မိၚ်ဗရုကၠာ ကွိၚ်ဥဒါဟ။ စိုတ်ချဳဂတဝ် ကျိုၚ်ကျဝ်ဗြံက်ဗြ။ ကၠုၚ်စိုပ်တာဲကၠာ ဗြဴမှာဒေဝ။ လီၜန်ပူဗန် ဗၠန်ဝေၚ်ကာယျ။ လဗိၚ်သဍံက် ၜံက်ထေံလမ်လ။ ညးဂမၠိုၚ်ရ ခဏဂှ်အဴ။ ညာတ်ဗြဴပန်ပၠေ ကောန်ဒေဝတဴ။ ညံၚ်အဆေဝ်သွဝ် ဂပ်ဝ်က္ၜတ်သဴ။ လထဴညာတ်အဴ ရဴဝွံဂးကၠာ။ ။

ယွံကောန်ရြတံ မၞးတံညာတ်ဟာ။ မမဂေါဝ်က္ဍၚ် မၚ်တာဲဂှ်ကၠာ။ ကောန်ဗြဴကလော် လုပ်ဗော်ယက္ခာ။ ဟိုတ်ဂှ်ဖျုန်က ပေၚ်နသ္အဳဗ္ဂါ။ ဇၟာပ်အမာဲဟေၚ် ရိုဟ်တ္ၚဲသေၚ်ဟာ။ ပိုဲဝါတ်တုဲရ သိက်သ္ပရောမာ။ ကောန်ရဲတံမိၚ် ဇွိတ်သြိုဟ်သိၚ်သာ။ ဖံက်က်သ္ၚာတ်တ် ဂွံညာတ်တုဲမာ။ ကလော်ဗြဴပန် တ္ၚဲသဝ်ဗၠန်စဴ။ ညးဂမၠိုၚ်အဴ ညာတ်ဍေံစဴအာ။ ညးဂမၠိုၚ်ဟေၚ် စဴတာဲသေၚ်ဟာ။ စဴစိုပ်တာဲပၠန် ဒ္ၚဳချပ်စေါန်စာ။ ပိုဲဒၟံၚ်လံမ္ဂး ဟွံဒးသေၚ်ဟာ။ စဴပြဟ်ရောၚ်ဒး ဂးတုဲပိဒွါ။ ဆဗာ်ဂွံတုန် ဆုဒုန်ဇြိုၚ်သာ။ ဂိုၚ်ဖ္ဍိုက်ဂၠုၚ်ရ ခဏဂှ်ကၠာ။ ညးလ္ၚဵုဂှ်ယိုက် ညးလ္ၚဵုဖ္ဍိုက်အာ။ ဒုတ်တ်ဒီုဒီု ဟီုဇီုစောန်စာ။ ဖ္ဍိုက်တုဲဒှ်ပၠန် ကၟန်တိတ်အာ။ ။

ယာံဂၠုၚ်ဂကး ကၠေံသၞေဟ်ဂးကၠာ။ ဒေဝတဴပန် ရုပ္ပကညာ။ ဟိုတ်သ္ဍိုက်နာဲအဵု ဟွံမိက်ကဵုအာ။ ဍေံက္တဵုဗဒှ်ဟိုတ် ဗြဲလဗိုတ်ကျာ။ အလုမ်ဒိုဟ်ပန် ဂၠုဗဒန်အာ။ ဗြဲလဗိုတ်ကျာ ပိုက်အာသဴသဴ။ ကျာဗြုသဓီု လလောၚ်ကြဵုတဴ။ စံက်စေက်က္တဵုဒှ် လပှ်ကမြဴ။ လပှ်ဇီုဖျာ် ဍာ်လုပ်သဴသဴ။ ညံၚ်ဍောၚ်ပ္ကဴသွာ ဗြုကြဵုဇာတဴ။ ကျာရိုက်ထၟဴ ပိုၚ်ဖျဴဖက်ဖါ။ လပှ်ဇၞော်ကၠုၚ် ဇီုဂၠုၚ်ဖြာဖြာ။ ဂြိၚ်ၚ်ဂြံဂြံ ကၠံထပ်လ္ၚီဝါ။ ပၠဳဒတုံသ္ကာတ် ဒြာတ်စှ်ေညံၚ်ဂွါ။ ဗြဴကျာလဒု ဒိုဟ်စှ်ဂၠုအာ။ ဂၠုၚ်ဟွံဂွံချဳ ဒှ်တဴဖဳဒွါ။ ဖံက်က်သ္ၚာတ်တ် ညာတ်လပှ်ကျာ။ ဒဝိၚ်လောန်ဗၞတ် ကၚ်ဇတ်ဇြဟာ။ ကောန်ဂၠုၚ်နာဲသာ ချပ်ဗစာရ။ လဣနၚ်ဒဴ ထဴမစဳခၠ။ ဟီုကဵုနာဲရ ခဏဂှ်အဴ။ ။

ယွံမဒယှ်တဴ စဴဒကောၚ်ပိုန်။ နာဲဟွံချပ်ဂိုတ် ပိုဲဒးချိုတ်ဗိုန်။ ဒးချိုတ်မွဲတဲ လၟုဟ်မွဲချိုန်။ ဂုဏ်နာဲပိုဲချိုတ် လမျီုအိုတ်ဗိုန်။ စဴလပဇြိုန် ဟီုတိုန်ညိကၠာ။ ပ္ဍဲဂှ်နာဲကီု ဟီုတိုန်ဟွံခြာ။ ယွံလဇုအဲ မပြဲပညာ။ ဟိုတ်နူအဲဟေၚ် ဒှ်ကွေံသေၚ်ဟာ။ အဲမွဲဟွံအာ တုဲအာမာန်ရ။ ဗွဲယုတ္တိပြဲ အဲတိတ်ဟီုပၠ။ လဣနၚ်ဒဴ ထဴညာဏ်စဳခၠ။ ဟီုတိုန်ကဵုစဴ ထဴနော်တြ။ နာဲမံၚ်ကၠာရ ပအာရစဴ။ ပြာ်လမျီုတုန် ပိုဲခၠေဝ်ဂုဏ်ကြဴ။ နာဲဟွံပြာ်အိုတ် ပိုဲချိုတ်ဆဴဆဴ။ ဒၟံၚ်ကၠာရစဴ ထဴဟီုတိုန်ရ။ ။

နာဲဒကောၚ်ပိုန် သီုကွိုန်တေဇ။ ကလေၚ်လုပ်ဒၞာဲ စိုပ်တာဲပၠန်ရ။ ကလော်ဗြဴပန် ရုပ်ကညာဏ။ ကေတ်နၚ်ပုၚ်သွ သဗ္ဗအမာဲ။ ဖျုန်က္ၜိုန်ပှ်ကီု သီုကဵုဖျုန်ဒြာဲ။ စာၚ်အဒါအောဝ် မောဝ်ပ္ဍးတၟာဲ။ ကွာၚ်ၜဲယိုဟ်သာဲ အမာဲသဗ္ဗ။ က္ၜဴသတ်ဗြဴကဝ် ဗဒဝ်ပေၚ်န။ နာဲဒကောၚ်ပိုန် ဒတိုန်ရုပ္ပ။ စဳရေၚ်ဗျဳဗျာပ် ဆန်ဖါပ်ဗစ။ စဟာပ်တုဲပ္ညဳ ချပ်ယာယဳရ။ ဂကန်ကဵုစဴ ထဴဂှ်မူလ။ ယွံစဴတက ဒၟံၚ်ရစဴဂၞဴ။ နာဲပလ္ၚာပ်လ္ၚာ ပိုဲအာရစဴ။ လပစံၚ်တူ ပူဆာမှောဝ်မှဴ။ ပိုဲအာရစဴ နာဲဒၟံၚ်တဴရ။ နာဲဒကောၚ်ပိုန် ဒတိုန်ရုပ္ပ။ ဒ္ၚဳဟီုတိုန်ရ ခဏဂှ်ကၠာ။ ။

ယွံလဇုအဲ မပြဲပညာ။ လဇုစိုပ်အာ ခန်လွာမိဂၞဴ။ တဝှ်ခပ်သီ လဇုပ္တီတဴ။ အ္စာအဲပ္ညဳ သဳနော်လဗဴ။ လဇုပ္တီပၠန် ကျာ်ဂန်မိဂၞဴ။ ဒဒှ်ကောန်အဴ ဟွံဂွံစဴပၠန်။ ဒဒှ်ဟွံချိုတ် ကောန်ဟွံအိုတ်သ္ကန်။ ဒဒှ်ဒၟံၚ်တဴ ဂကောံဗြဴပန်။ ဟွံဒှ်ပရိုက် ဟွံယဲဒိုက်ပၠန်။ ဟီုမိကျာ်ဂန် အဲဂကန်ပြၚ်။ မိလပဒှ်ပၠန် လ္ၚုလ္ၚန်ဇွောဝ်လၚ်။ မိပစံၚ်တူ ပူဆာယာံကြၚ်။ မိပဇွောဝ်လၚ် ပဒွိၚ်ဘၚ်တဴ။ ဒဒှ်ဂကန် ပရိုၚ်ကောန်ဂၞဴ။ လဇုစဴစိုပ် ဗဒိုပ်မိဂၞဴ။ ဟီုလဴညိအဴ ကဵုမိဂၞဴအဲ။ ဂကန်ဖျန်တုဲ တြုံလွုဲမပြဲ။ ဒ္ၚဳပၚ်ပ္တိုန်တဲ အဲပရဲတဴ။ လ္ၚောဝ်ကၠုၚ်ဖိဖျ ဒၟံၚ်ဒၞာဲမိဂၞဴ။ ဖျေံက္ဍိုပ်ပိဝါ သီုဖဳဒွါတဴ။ ဟိုဇီုထုဲအဴ ထဴက္တဵုအာရ။ ။

ထဴကော်ဂကန် ဗၠန်ဂတးပၠ။ ယွံမသ္ဍိုက်လ ဒၟံၚ်ရစဴဂၞဴ။ မသ္ပလ္ၚာပ်လ္ၚာ ပိုဲအာရစဴ။ ညးဂမၠိုၚ်ပၠန် ကော်ဂကန်တဴ။ လ္ၚဵုဂှ်ဟီု၇ော ဒၟံၚ်ရကောဂၞဴ။ လ္ပဘိၚ်ဘၚ် လ္ၚာပ်လ္ၚာသၠၚ်တဴ။ လ္ၚဵုဂှ်ကော်လှေံ ယွံဒေံဍောၚ်ပ္ကဴ။ ပစံၚ်တူအဴ ကောဂၞဴအာရ။ လ္ၚဵုဂှ်ကော်ဂၠိန် ယွံကၟိန်တလ။ ဒၟံၚ်ကဵုခိုဟ်ကၠာ ပိုဲစဴအာရ။ သေဲသေဲဂၠိုၚ်သန် ကောန်ဂကန်ပၠ။ ဂကန်ကဵုဗျာံ နာဲသာစိတ္တ။ စှ်ေက္ဍိုပ်ဂၠုၚ်ပြဟ် ခဏဂှ်ရ။ ဗ္ဂန်တ္ၚိုက်တုဲဂျ တိုက်ဂမြံအာ။ ။

နာဲဒကောၚ်ပိုန် ဒတိုန်ရုပ္ပ။ ညာတ်ညးမစဴ တြဴခန်လွာ။ ဗှ်ကလောပၠန် ဗှ်သန္ထာန်ကၠာ။ ဗှ်သဳမူအဴ ဗဴလမွဲၜါ။ ဗှ်မိကျာ်ဂန် မဒးခၠန်ခြာ။ မုက်ချိုတ်စရိုတ် သြိုဟ်ညံၚ်သွာ်အာ။ ရမတ်ဇွောဝ်ဍုက် ပေၚ်မုက္ခဝါ။ ဂိုၚ်ကေတ်ယာတ်ပၠန် တြုံနွံပညာ။ ဇိုတ်ဍာ်ရမတ် ပ္ဍဲဂၠံမတ်ၜါ။ ဗှ်သၟာဟေၚ် မိဂၞဴသေၚ်ဟာ။ ဒဒှ်မိဆာန် ဇြဟာန်မေတ္တာ။ ဒဒှ်လွဳလဝ် ကောန်ဂၠုထဝ်နှာ။ ဒဒှ်ဖုံပၠဳ မိလွဳပရာ။ ဖရာဲမိသ္ဍိုက် ယိုက်ဒိုက်ဖဳဒွါ။ မိဖုံပၠဳဟေၚ် ရိုဟ်တ္ၚဲသေၚ်ဟာ။ မိအုဲအိက်သၟတ် ပတ်သမောဝ်ကၠာ။ တူထဝါဲတုန် ဒှ်ဖုန်သၞာ။ သော်မိသလဲ ဂေက်ဂြဲဟွံညှာ။ ကျာ်ဂန်လွဳလဝ် စဵုဇၞော်မောဝ်အာ။ ဟးဂန္ဓအဲ ဂုဏ်ဇၞော်ပြဲဖါ။ ဟွံဂွံရော်တုန် ဂုဏ်မိသေၚ်ဟာ။ ဗှ်မဒးကၠၚ် ခြာဒၚ်စာ်မြာ။ ဗှ်ဇကုမွဲ ပ္ဍဲရညဝါ။ ဗှ်တိုန်မိဂၞဴ သြိုဟ်ရဴသ္ပာ်အာ။ ဇွောဝ်လၚ်ကၠၚ်ဟဳ လၞီဖဳဒွါ။ ဇၟောဝ်ဍာ်ရမတ် ဇွောဝ်ပေၚ်မတ်ၜါ။ ယာံလၚ်ဇွောဝ်ဟေၚ် ဒၞာဲဂှ်သေၚ်ဟာ။ ဗြဴသိုက္ခမာ ဂွံညာတ်အာပၠန်။ ညာတ်တြုံမုက်ချိုတ် ပ္ဍဲစိုတ်လ္ၚုလ္ၚန်။ ညာတ်တြုံယာံတဴ ကညာဗြဴပန်။ ပခိုၚ်စိုတ်ဟွံမာန် ဟိုတ်ဆာန်တြုံလောန်။ ဗန်ကံတြုံအဴ ယာံတဴသောန်န်။ ဟးတၠသ္ၚိ ကောမိကျာ်ဂန်။ ကောပယာံရ ကောပဝေါန်စန်။ ကောပလ္ၚုလ္ၚန် ကောပ္တန်စိုတ်ညိ။ လ္ပဒွိၚ်ဒွာဲ နာဲသ္ၚိကောမိ။ ကောပလ္ၚုလ္ၚန် ပူဗန်ဖိဖိ။ ကောလပဒှ် ယဲပူမှ်ညိ။ ပတ္ၜူမာဲစိ ဒမၠိပူမှဟ်။ ပိုဲညးပန်ကၠာ နွံတဴခါဂှ်။ ဒၞာဲနွံပၟိက်ရော စိုတ်ကောမဒှ်။ စိၚ်ဂၠုၚ်ဍုၚ်ခွာ ရာစိုတ်ကောသၟဟ်။ စိၚ်ချေံဇၟာပ်စွံ သၟိက်ဂွံလ္ၚဟ်။ ကောပဒိုက်စိုတ် ဂွံအိုတ်ဗွဲပြဟ်။ ထဝ်သြန်မတ်ဗၠဲ ယာတ်ပြဲတံဂှ်။ ကဵုကျိုၚ်အဵုဇိုတ် ဆစိုတ်ကောဒှ်။ ပိုဲဇိုန်ကဵုအိုတ် ပၟိက်စိုတ်ကောသၟဟ်။ ကောပပူမှဟ် ကောပဒှ်ဒဝိၚ်။ ။

ကောပစံၚ်တူ ပူဆာဘၚ်ဘိၚ်။ မိမပိုဲဂှ် ညးမဒှ်သၟိၚ်။ ပိုၚ်ကလော်ကိုပ် အလုမ်ဂြိုပ်ဂၞိၚ်။ ကောဂွံပသၟိၚ် ဂွံဒှ်သၟိၚ်ရ။ ကော်ဗြဴပန် ယာံပူဗန်ထ။ လှေံလှန်စရိုတ် ဟီုပၠောၚ်စိုတ်မ။ မိၚ်ပါၚ်ဗြဴရတ် ကၞောတ်ရုပ္ပ။ ညံၚ်ဇၟူဂွံမိၚ် က္ၜိၚ်ဥဒိုန်ရ။ ဇၟူသၠိၚ်စိုတ် သၟဟ်အမြိုတ္တ။ ကလေၚ်ဟွံမာန် ဋ္ဌာန်တၞံမူလ။ ဒးဇၟူပၚ်မှိၚ် ရှ်ကွိၚ်သဒ္ဒ။ နဲဗိုဂှ်ကၠာ ဥပ္ပမာဏ။ ဂကောံဇၟူဗြဴ တ္ၜူမာဲတဴရ။ ရမျာၚ်ဒေံဗြဴ တုပ်ရဴထဏ။ ဟီုပၠာံဗဇးပၠန် လှေံလှန်စိုတ်မ။ ရှ်ရမျာၚ်ကွိၚ် နာဲဂွံမိၚ်ပၠ။ သ္ဍိုက်မၠိုက်ဗြဴပန် စိုတ်တန်အာရ။ တုဲကလော်ဗြဴ လှေံလှန်စိုတ်မ။ နာဲဒကောၚ်ပိုန် ဒတိုန်ရုပ္ပ။ ဂကောံဗြဴပန် သၟဟ်န်စိတ္တ။ ဒ္ၚဳစဴအာရ ခဏဂှ်ကၠာ။ ။

အာစိုပ်လွဳမာန် ထာန်ကလော်ဗြဴကၠာ။ ကလော်ဂမၠိုၚ် ကၠုၚ်ဗိုၚ်သ္အဳဗ္ဂါ။ ဝေၚ်ဒုၚ်စေံဏေံ လှေံလှန်နာဲသာ။ သၟိၚ်ကလော်ပ္ညဳ ခါံသဳနာဲၜါ။ ခါံသဳတြုံဗြဴ ညာတ်တဴနာဲကၠာ။ ညံၚ်ကောန်အိိန်ဗၠာဲ စရာဲရုပ္ပါ။ သ္ဍိုက်မၠိုက်လောန်ထောန် ညံၚ်ကောန်ဂၞဴကၠာ။ သၞေံသၞဴ ကော်တဴဖဳဒွါ။ ပၠာံဗဇးအိုတ် စိုတ်နာဲတုဲမာ။ တုဲသၟိၚ်ကလော် မဇၞော်အညာ။ ကော်ဍိက်သ္ကံကၠာ သီုတွဳဝါရ။ ဗလိုပ်ဖုံနာဲ နာဲစဳရေၚ်ပၠ။ ကလော်ဗြဴဂှ် ဝုတ်ထပှ်ဂျ။ လေၚ်နုၚ်ဂၠဟ်ထဝ် ကျိုၚ်ကျဝ်ဗြံက်ဗြ။ ကဵုတုက်ဍာ်သၟတ် အနုတတ်တ။ အာတုက်ဍာ်တုဲ သၟုဲစဴလျလျ။ ကော်လ္ၚီပ္ညုၚ် ကၠုၚ်သဳကၠဳဂျ။ ဗလပ်ဖုံရ ခဏဂှ်ကၠာ။ ။

ကဵုနာဲကျိုၚ်စိ ဂ္ညိဂ္ညာတ်ကြိယျာ။ ကဵုနာဲကျိုၚ်ကျဝ် ဂ္ညိဂ္ညာတ်မှောဝ်ဇာ။ ယာတ်ဒိပ်လၟေၚ် ဖေၚ်ဒိပ်နာနာ။ လစိန်စရံက် ဂြၚ်ဗြံက်တဲၜါ။ ၝောံကိုတ်ကီုဟေၚ် သီုဗြကၞေၚ်ကၠာ။ ကၞေဟ်လက်ကြာပ် နာံဗျာပ်ညဳသာ။ နာဲဝက်သၞေက်ဆာဲ စလာဲက္တောဝ်ၜါ။ စလန်အဂၠဴ ဟုံဗော်တဴကၠာ။ ပ္ကဴဒၞာဲမဂေါဝ် ဂညိက္တောဝ်ၜါ။ ကျိုၚ်ကျဝ်တုဲအိုတ် ဟွံတသိုဟ်ခြာ။ လျးရုပ်ကဵုရတ် က္ၜတ်သြဴညဳသာ။ ညံၚ်ကောန်အိန်ဗၠာဲ စရာဲရုပ္ပါ။ ကောန်ဗြဴသၟိၚ်ပန် ရုပ္ပကညာ။ ဗၠိုၚ်ဖုံကျိုၚ်ကျဝ် ထဝ်သြန်နာနာ။ လစိန်စရံက် သီုလကံက်ဂွါ။ သၞေက်ထဝ်ဖေၚ်ထဝ် ယာတ်ထဝ်သခါ။ စလန်အဂၠဴ ဟုံဗော်တဴကၠာ။ ရုပ်သာ်ဗြဴပန် သၟဟ်န်သာဓာ။ ညံၚ်ကောန်ခၞောဝ် ညးသွဝ်ကေလာ။ ဂေါပ်ဂဝ်လောန်သန် ကောန်ဗြဴယက္ခာ။ သၟိၚ်ကလော်ရ ယက္ခရာဇာ။ ထပ်တဲကောန်ဟေၚ် ကဵုနာဲသေၚ်ဟာ။ ။

နာဲဒကောၚ်ပိုန် ဒတိုန်ရုပ္ပါ။ ဇိုန်ကဵုပသၟိၚ် သၞိၚ်ခန်လွာ။ ကောန်ကဵုဓမာန် ရေၚ်ကာန်သာဓာ။ တူဒေန်ထဝ်ဒြၚ် သၟဝ်ဗတၚ်ဇာ။ ကောံဂၞကျာ်ပန် သၟဟ်န်ညဳသာ။ ကမၠောန်သ္အဳဂၠက် မသက္ကုခြာ။ သ္ဍိုက်ဗြဴပန်သၟတ် သ္အဳဂၠက်တဴကၠာ။ ညံၚ်အိန်နာဲမြု ကဵုသုဇာတာ။ ညံၚ်သၟိၚ်ရာံဖျာ် ဂၞကျာ်သဳဒါ။ ညံၚ်ကုသကၠာ ပြဘာဝတဳ။ ရေၚ်ကာန်သၟဟ်န် ဂွံတန်မွဲဒၞဳ။ ဒေါဝ်ဂၠံၚ်ကျာ်သြဳ ဃောဗနဳက္ၜိုန်။ ကောန်ညးဒၚ်မာဲ နာဲဒကောၚ်ပိုန်။ ဒါန်တၞံဆတ္တဝ် ဟိုတ်ပ္တုဲလဝ်ဗိုန်။ ဗြဴပန်ညံၚ်ထဝ် ဂွံဒ္ၚောဝ်လၟိုန်။ ဂွံဒှ်သၟိၚ်ဓဝ် ဒေါဝ်ကသဝ်ပိုန်။ ကုသဵုတၞံဗိုန် မဇိုန်ကဵုကၠာ။ ဂွံဒှ်သၟိၚ်ဟေၚ် ရောၚ်ဟွံသေၚ်ဟာ။ ဂြိုပ်သာဲလေဲဂှ် ဟိုတ်ဒှ်ခန်လွာ။ သၟိၚ်ဓဝ်သာဲလေဲ သေဲသေဲဟီုအာ။ ဒယှ်လအိတ် ဇမ္ဗုဒိပ္ပါ။ စဵုကဵုလၟုဟ်ဂှ် ဒယှ်ပြာထာ။ ဟိုတ်ဒါန်တမၠာ ဂွံမြာလွာရောၚ်။ ။

သၟိၚ်ဓဝ်ဗြဴပန် ဂွံညန်မွဲတောၚ်။ မၞိဟ်ဂမၠိုၚ်ရောၚ် အခေါၚ်စဴအာ။ လဣနၚ်ဒဴ ထဴသီုရဲသာ။ ကၠေံလဝ်တာဲတုဲ ဍိုက်ဂၠုၚ်သၞုဲအာ။ ဂတးက္ဍိုပ်ဂၠုၚ် သရုၚ်ဂၚ်္ဂါ။ ကာလကၠုၚ်သၟတ် ဗၞတ်စှ်တ္ၚဲကၠာ။ ကာလမစဴ နုဘဴယက္ခာ။ ဂၠုၚ်ဂြိုပ်ဂမြိၚ် ဟွံသဍိၚ်ခြာ။ ညံၚ်ပဝန်ကံ ဒြိပ်ဂမြံအာ။ စိုပ်သၞေဟ်ကွာန်ကၠာ ခန်လွာဒၚ်မာဲ။ ညးဂမၠိုၚ်စိုပ် ဗဒိုပ်ဒၞာဲဝါဲ။ အိုဟ်တၟိုဟ်ဆာဲ နာဲဂၠုၚ်ကောန်ဂၠုၚ်။ ကောန်သမ္ဘာညး စှ်ေဒစးဒုၚ်။ မိပ်စိုတ်မှောဝ်ဇာ စှ်ေအာဒဵုဂၠုၚ်။ ညာတ်ညးစှ်ေဂၠုၚ် ဝေၚ်ဒုၚ်လၟိုန်။ မိနာဲဂေါဝ်ဇြုၚ် စှ်ေကၠုၚ်ဟွံဇြိုန်။ ရံၚ်ကောန်ဟွံညာတ် သမ္ၚာတ်သုံသိုန်။ ပရိုၚ်ကောန်ဗၠာဲ ယာဲဇုသၟာန်တိုန်။ ညိဟွံဂွံသွိုန် ကောန်သၟာန်တိုန်ကၠာ။ ။

ယွံနာဲဂၠုၚ်အဲ မပြဲပညာ။ ကောန်သ္ဍိုက်ယာဲ မူဒၞာဲမအာ။ မူဟိုတ်မွဲကၠာ ဒှ်အာရောမ။ ဟွံသေၚ်ဗြံဂၠုၚ် ဒေါဝ်ကြုၚ်စာ်ခၠ။ ဟွံသေၚ်အိုတ်ဒဲ ဒးဘဲကျာံက။ ဟွံသေၚ်လုပ်ဒွီု ဒီုပ္ဍဲဟေမ။ ဒးဘဲသ္ဂးဟာ ဇာဒိသိုၚ်ကၠ။ ဟွံသေၚ်တိုန်ဆု ဒတုံဒုဒ။ ယဝ်ချိုတ်အာကီု နာဲဟီုညိရ။ ညးမအာဂြိုပ်ဂျိ စိုပ်သ္ၚိအိုတ်ပၠ။ ကောန်အဲမွဲဂှ် သာ်ဒှ်ရောမ။ ဥပ္ပတိကီု ဟီုပြဟ်ညိရ။ သီုမနရာတ် သွါတ်ဟဒယ။ ထဴမိၚ်ပါၚ်ရ ပ္ဍဲခၞဂှ်ကၠာ။ ပရိုၚ်ဂှ်သွံ ဟီုတိုန်ဟွံညှာ။ ။

ယွံမိနာမ ပယျာံပိုဲသ္အာ။ ကောန်တၠအဲ မပြဲသာ်လွာ။ ဗာ်ဆုဒုန်ကိုၚ် လုပ်ဂြိုပ်တိတ်ဝါ။ ဟွံဒှ်ကာဆာဲ ကဵုမၚ်တာဲကၞာ။ လံပိုဲစဴစိုပ် နူဂြိုပ်ဂှ်မှာ။ ဗရုလလံၚ် စံၚ်ဒြဝ်ဓရာ။ ဇုက်စံၚ်ဇက်တိုန် တလိုန်ညှာညှာ။ ဒယှ်ေရဴဂါံ တိၚ်ကျာံသာယျာ။ နဇိုၚ်တက်ခဍေဝ် ရမျာၚ်တေဝ်ဏာ။ မိပ်ဇြိပ်လောန်အဴ နွံတဴရှ်သာ။ ဒေဝတဴကိုပ် ထာန်ဂြိုပ်ဇီုဖြာ။ မိၚ်ရမျာၚ်နာဲ အကာဲကြုတ်ဏာ။ ဟီုဇိုန်ရိုဟ်ထာန် ဆာန်ကၟိန်သာဓာ။ ပုၚ်သွအမာဲ ဍာ်သာဲသဂြာ။ ပေၚ်ထးပေၚ်သၠိုၚ် ဂၠိုၚ်သန်နာနာ။ ဂကောံဗြဴပန် သၟဟ်န်သာဓာ။ ဆာန်ကၟိန်ဗိုန်က္ညန် တန်မွဲသၞာ။ ပိုဲစဴနူဂြိုပ် ညန်ပိုဲစိုပ်ကၠာ။ ဒေဝတဴဗြဴပန် ဍေံကၠေံဗ္ဒန်အာ။ ပိုဲစိုပ်တာဲရော စဟာပ်ဟောဒြာ။ ညာတ်အမာဲဂှ် က္တဵုဒှ်သၚ်္ကာ။ ပ္ဍဲဂှ်ပိုဲပၠန် ချပ်တိုန်စောန်စာ။ ယးလုပ်ဂြိုပ်အဵု ညံၚ်ကဵုမအာ။ ပိုဲကလေၚ်ကၠုၚ်ကၠာ အောပ်မာဗ္ဒမံၚ်။ ။

ပိုဲဂွံညာတ်ကၠာ သိၚ်သာတိုန်ကၠံၚ်။ ပိုဲဟွံဂံၚ်မံၚ် ဖေက်ဒမံၚ်တဴ။ ဒၟံၚ်ဟွံဒးပ္ညုၚ် ဍိုက်ဂၠုၚ်ဒဴစဴ။ စိုပ်ဒေါဝ်က္ၜဳအဴ ဒှ်တဴဗြဲကျာ။ လဗိုတ်လဒု ဒိုဟ်ပန်ဂၠုအာ။ လပှ်ဖက်ဖါ ညံၚ်သာ်လွာပ္ကဴ။ ဂၠုၚ်ချဳသမြုပ် ဍာ်လုပ်သဴသဴ။ ဂၠုၚ်ဟွံအာဟေၚ် ကာလကလေၚ်စဴ။ ဇကုနာဲဆာဲ ကွာဲဒေဝတဴ။ တုဲပိုဲဂွံစဴ စိုပ်ကောန်ဗြဴရောၚ်။ ။

တဝှ်အိုတ်သီု ထဴဟီုညံၚ်စောၚ်။ ယာဲမမိၚ်ရောၚ် အခေါၚ်ကောန်ဗၠာဲ။ တိၚ်ၚ်တက်သြိုဟ် ဟးဖျုန်ဂြိုဟ်ယာဲ။ အဵုဒကောၚ်ပိုန် ဒတိုန်စရာဲ။ အဵုထဝ်ကမု မဂၠုကောန်ဗၠာဲ။ အဵုထဝ်ပၞာဲ မဂေါဝ်ဆာဲလောန်။ အဵုဂၠုလစောန် နာဲကောန်ကမၠၚ်။ အဵုထိုက်သမ္ၚာ ဂၠုရာဇာဝၚ်။ အဵုကောန်ကမၠၚ် မိဒးကၚ်ဇတ်။ အဵုကောန်အသဝ် ရုပ်ထတ်ထမၞတ်။ အဵုဂဍောၚ်မတ် ကၞောတ်ဇြဟာန်။ အဵုထဝ်ပဏာဲ နာဲတလဒါန်။ မိအာန်တၞာန် လောန်လာန်သန်ကောန်။ တက်သြိုဟ်တိၚ်ၚ် ဒဝိၚ်လောန်ထောန်။ ဣဝီုဖ္အောန်န် တမောဝ်လောန်ဗၞတ်။ တမ်ကံဗတိုဟ် ဖျုန်ဂြိုဟ်တတ်တတ်။ တိၚ်လောတ်စှ်ေဂွိုၚ် ဇိုၚ်က္ၜဳဂှ်သၟတ်။ ယဝီုတတ်တ် ဖတ်တ်ဝိုတ်သ္တၚ်။ ။

မိဇြဟာန်လောန် ဟိုတ်ဆာန်ကောန်က္ဍၚ်။ သီုမဇွောဝ်လၚ် ဝိုတ်သ္ၚဳသတၚ်အာ။ ညးဂမၠိုၚ်ပ္ညုၚ် ဒြေပ်ကၠုၚ်ဟောဒြာ။ ညးလ္ၚဵုဂှ်ပၚ် ကေတ်နၚ်ဍာ်ကၠာ။ ပၠဳစုတ်မုက်ဂှ် သမ္ၚုဟ်တိုန်အာ။ ဂွံတိုန်သတိကၠာ ဗၞုဟ်ဗှ်သၞာကောန်။ အဵုဣတယာဲ မဂေါဝ်ဆာဲလောန်။ ဂြိုဟ်ယာဲသောန်န် ယွံကောန်ကမၠၚ်။ အဵုထဝ်ကမု ဂၠုကွးသၟိၚ်သၚ်။ အဵုကောန်ကမၠၚ် ရုပ်ခၠၚ်စရိုတ်။ အဵုဂဍောၚ်မတ် ရုပ်ကၞောတ်စိုတ်။ အဵုထဝ်ပဏာဲ နာဲက္ဍိုၚ်ၝောံကိုတ်။ အဵုဒကောၚ်ဗိုတ် ရုပ်ၝောံကိုတ်ယာဲ။ မိဂၠိုၚ်လောမ်လာဲ ဂုဏ်နာဲရောၚ်ကောန်။ ။

အဵုဒကောၚ်ရတ် ရုပ်ဗတ်ညးသောန်။ မိမွဲစောန်လောန် ကောန်ုးစာ်ခၠ။ ဂလာန်ထဴကွေံ မိဟွံပ္တေဟ်စ။ မိဟွံညာတ်မ ယာဲချိုတ်ရကောန်။ ။

အဵုထဝ်ကမု ဂၠုမဂေါဝ်လောန်။ ဟွံစိုပ်ယာဲပၠန် ကောန်မှာရုပ္ပ။ မၞိဟ်ဂွံဒၟံၚ်ကောံ ကရောံဒေဝ။ ဂလာန်ထဴရ ညးပ္တေဟ်စဟာ။ ။

လဣနၚ်ဒဴ ယွံထဴနာသာ။ ဗတ်ဒှ်ကၠစ ဗက်ဇွဟောဒြာ။ ညးတီညာတ်သၟတ် ဒုဟ်ပြာကတ်အာ။ သာ်ဂှ်ဒးဟေၚ် ဗၠးဒုဟ်သေၚ်ဟာ။ ယဝ်ရညးမွဲ ယဲဒိုက်ချိုတ်အာ။ ဂွံယိုက်ဇွပၠန် စံၚ်ဒန်ဟောဒြာ။ ဂွံတီညာတ်ဟေၚ် ဗၠးဒုဟ်သေၚ်ဟာ။ ဗက်ဒးဒှ်ရ ဒမၠမတာ။ ညးၜုၚ်တက်ချိုတ် ဟိုတ်ကံတမၠာ။ ယိုက်ဇွစံၚ်ဒန် တီဇၟာပ်ခန်လွာ။ ဒှ်သာ်ဂှ်ဟေၚ် ဗၠးဒုဟ်သေၚ်ဟာ။ ကောန်အဲတုန်မာ အာဂကောံထဴ။ ညးဂမၠိုၚ်သ္အဳ သီုဖ္အိုတ်ဗၠးစ။ ကောန်အဲမွဲအဴ ဟွံစဴစိုပ်အဲ။ ပွထဴဂှ်ကီု ဟီုကဵုနဲကဲ။ ကၠုၚ်ဟီုကဵုအဲ အဲပ္တေဟ်ကီုဟာ။ ။

လဣနၚ်ဒဴ ယွံထဴနာဲသာ။ ကလော်ဂွံဏာ သာဓါလုမ်လ။ ဟွံချိုတ်သဘဴ ဂျိုၚ်နွံတဴရ။ နာဲပိုဲဟီုဂှ် ဟွံဒှ်စၟတ်ပၠ။ ညာတ်နမတ်ကွေံ အဲပ္တေဟ်ကီုရ။ ဂလာန်ဂှ်ကီု မိနာဲဟီုပၠ။ မိၚ်ဂလာန်ရ လဣနၚ်ဒဴ။ သာ်ဝွံတုန်ကီု ဟီုတိုန်ဆဴဆဴ။ ။

ယွံလေဝ်နာဲဗြဴ ဒှ်တဴသၚ်္ကာ။ အဲအာထ္ၜး ယးလဳပိုဲအာ။ ယာဲနာဲမိၚ်အဴ ဂလာန်ထဴကၠာ။ စဳရေၚ်ဇွောံမ သီုကသပါ။ နာဲဂၠုၚ်ကောန်ဂၠုၚ် ပ္ညုၚ်ကဵုဟွံခြာ။ ယးစှ်ေက္ဍိုက်ဂၠုၚ် တုၚ်ၚ်တိတ်အာ။ ဒျာန်တ္ၚိုက်ကၠာ ဂိုၚ်အာဂြုုဂြု။ တ္ၚဲဗတံ ဂမြံထဥ။ တ္ၚိုက်စလဝၚ် ကဵုပါၚ်လဒု။ ပၚောံစနု အနုဂၚ်္ဂါ။ ထောံနူဂှ်ကၠာ အာဒၟံၚ်သေဲသေဲ။ တုဲဂွံအာစိုပ် ထာန်ဂြိုပ်သာဲလေဲ။ ဆုဒုန်သ္တပ်သ္တေၚ် ဟွံဗၠေၚ်ဍုတ်ဍေဲ။ ဆုဒုန်သာဲလေဲ နဲဗီုသေဲပၠ။ စိုပ်သၞေဟ်တုဲကၠာ တိုန်အာတာဲရ။ လဣနၚ်ဒဴ ထဴညာဏ်စဳခၠ။ ဟီုထ္ၜးရ ဒေသအရာ။ ။

ယွံမိနာဲမွဲ မပြဲသာ်လွာ။ မမဂေါဝ်ဆာဲ ကောန်နာဲဂှ်မာ။ ကဵုမၚ်တာဲဟေၚ် ဒၞာဲဝွံသေၚ်ဟာ။ ကာလပိုဲအဴ မစဴဂှ်မာ။ ဒၞာဲဏံမံၚ်တဴ တုဲပိုဲစဴအာ။ နာဲဗြဴကော်စံ သ္ၚံသ္ၚံညိကၠာ။ မိၚ်ရမျာၚ်မိ ကလုက်ညိဟာ။ မိနာဲတုန်မာ ခါညာတ်ဒၞာဲကောန်။ လ္ၚုလ္ၚန်လောန်ကာဲ ပ္ဍဲစိုတ်ယာဲလောန်။ မိဒးအိုတ်ဒဲ တ္ၚဲဝွံရကောန်။ လၞီယာဲလောန် သွံမကောန်ဗၠဲ။ တိၚ်တၚ်တက်သြိုဟ် သြဖျုန်ဂြိုဟ်ယာဲ။ အဵုထဝ်ပဏာဲ နာဲမဂေါဝ်လောန်။ အဵုဂၠုလစောန် ဟးကောန်ကမၠၚ်။ အဵုထိုက်စမ္ၚာ ဂၠုရာဇဝၚ်။ အဵုကောန်ကမၠၚ် မိဒးကၚ်ဇတ်။ အဵုကောန်အသဝ် ရုပ်ထဝ်ထမၞတ်။ အဵုဂဍောၚ်မတ် ကၞောတ်ရုပ္ပ။ မိကၠုၚ်စိုတ်တာဲ ဒမံၚ်နာဲရ။ ယာဲသၟိက်ညာတ်မ ကၠုၚ်ညိရကောန်။ ။ အဵုဣတယာဲ ရုပ်နာဲထဝ်သောန်။ ကေၚ်ဂွံမိၚ်ပၠန် ရမျာၚ်ကောန်ဗၠာဲ။ ဗှ်ယာဲမိၚ်ကၠာ ကျာ်ခရာနာဲ။ ဒွက်ဂိုန်ဂၠိုၚ်ဒၞာဲ ယာဲမိၚ်ဒမၠိ။ လၟုဟ်ယာဲကၠုၚ်စိုပ် သန္ထာန်ဂြိုပ်ဂျိ။ တိၚ်ကွာဲကဵုမိ ယာဲမိၚ်ညိကောန်။ ။

အဵုဣတဇု ဂၠုမဂေါဝ်လောန်။ ကွိၚ်ကွိုက်လစောန် ကောန်ဂၠုတိၚ်တ္ၜာဲ။ မိၚ်ကွိၚ်နာဲပၠန် စိုတ်ၜိုဟ်လောန်လာဲ။ လၟုဟ်ယာဲပၠန် ဂၠိုၚ်သန်လောံလာဲ။ ကၠုၚ်တိၚ်ကွာဲမိ ညိရကောန်ဗၠာဲ။ ။

အဵုဣတဇု မဂၠုထဝ်ပနာဲ။ ဟွံဂွံညာတ်နာဲ ယာဲဒးဟောံဇြ။ ဒဒိုက်ယာဲလောန် ကၠၚ်ကၠောန်ယဲသ။ မူမတုပ်ကၠာ ဥပ္ပမာဏ။ ညံၚ်သွးဒေါဝ်က္ၜဳ ဟဳဒၟံၚ်လျလျ။ ဟွံမွဲသၞေဟ်သြၚ် တံပြၚ်ညိည။ ဗီုက္ၜၚ်ထဝ်ရ ဟွံမွဲသၠယာ။ မဒးဟဳကြၚ် ပ္ဍဲဒေါဝ်ဂၚ်္ဂါ။ မိနဲဂှ်ကီု တုပ်ဗီုပမာ။ ညံၚ်ဂစေံမွဲ ဟွံမွဲသၞေၚ်ၜါ။ ဒးသ္ကုတ်အဟာ ညန်မာရဏ။ နာဲခြာနူမိ မိအိုတ်ခန္ဓ။ နဲဂစေံရ ဂိုၚ်ပပမာ။ ။

အဵုဣတယာဲ နာဲဍောၚ်စမ္ပာ။ ဒဒိုက်ယာဲလောန် သွံကောန်ထဝ်နှာ။ ညံၚ်လၟမွဲ လွပ်တဲအိုတ်အာ။ ဒေၚ်သၠၚ်လ္ၚာပ်လ္ၚာ ပူဆာလောံလာဲ။ ညံၚ်သၟိၚ်နာဲမွဲ လုပ်တဲလၟာဲ။ စံၚ်တူဇြေဟ်ဇြာဲ လၟာဲဂွံဏာမိနဲဂှ်ကီု တုပ်ဗီုပမာ။ ညံၚ်သရာဲကၠာ လွဟ်ဟွံဏာရ။ ညာတ်သတြုကွေံ ဒးဖျေံက္ဍိုပ်ဂျ။ ညံၚ်ဒိုက်ဂတ်သၟတ် ဒမၠုမတ်ၜါ။ အာကၠုၚ်ဟွံဒး ယာံကြးဖဳဒွါ။ ညံၚ်ရဲညးက္ၜၚ် ဗြံဒေါဝ်ဂၚ်္ဂါ။ ညံၚ်ဗီုတၞံတာ မပိုတ်အာတၞုၚ်။ ညံၚ်ဗီုကျာံကျာ အိုတ်အာဝၚ်ကြုၚ်။ ဆုအိုတ်တၞုၚ် ကြုၚ်အိုတ်ကၞောတ်။ ညံၚ်နဲဂှ်ကီု တုပ်ဗီုအဆတ်။ ဝေၚ်အာနူနာဲ ကောန်တြုံယာဲသၟတ်။ ညိဟွံပဗၞတ် ကောန်ပၞတ်ကဵုယာဲ။ ။

အဵုကောန်ဗၠာဲဗၠာဲဗိုတ် ဂၠု​ၝောံကိုတ်ယာဲ။ ဓဇန်လောန်ကာဲ ထောံယာဲရောကောန်။ အဵုဒကောၚ်ထဝ် ရုပ်အၚောဝ်လောန်။ အဵုဒကောၚ်ဗၠဲ နာဲမွဲလောန်စောန်။ အဵုဂၠုလစောန် ကောန်သ္ဍိုက်ယာဲ။ အဵုထဝ်ပနာဲ နာဲလမာဂၞဴ။ မိဖံၚ်ဖနံၚ် ကော်မံၚ်ကဴကဴ။ ပနာဲကၞပ်တဴ ရောကောန်ဂၞဴယာဲ။ ၜိုန်မိကော်ဂၠာဲ နာဲဟွံမိၚ်ပါၚ်။ ပသာ်နာဲဒှ် တဝှ်တြုံသာၚ်။ ဟွံမိၚ်ရမျာၚ် ပါၚ်ဣတယာဲ။ မိကၠုၚ်ကော်ဂၠာဲ ပနာဲကၞပ်စု။ ဟွံသေၚ်တိက်သၠိၚ် သမၞိၚ်တၞံဆု။ ဒွံဘဲသတြု သ္ဂးဟာဂၠုယာဲ။ ။

အဵုကြက်စလန် မဂၠုကောန်ဗၠာြ။ မပၞက်ကဵုယာဲ ဗ္ဒာဲကဵုတၞံဆု။ အာအောပ်တဴရ ဟွံပၠဇကု။ ဝေၚ်ကၠေံနူနာဲ ယာဲသုန်ဂြာံလ္ၚု။ ကလောဟွံမွဲ ယာဲမွဲဇကု။ ထေဲကဵုယာဲဇု သ္ဂးဟာဂၠုယာဲ။ ။

အဵုထိုက်စမ္ၚာ လၟဴဂၞဴယာဲ။ တ္ၚဲသဝ်လောန်ကာဲ မိဂၠာဲကော်တဴ။ ဂစေံကၠံမွဲ ပဝ်ဂၠောဲကမြဴ။ ပမကောန်ဂၞဴ ဟွံစဴကဵုယာဲ။ အဵုပၞာၚ်တိုၚ်ထဝ် လၟောဝ်ဂြိုဟ်ယာဲ။ စၞဇၟာပ်ဒၞာဲ ပယျတ်ဂၠာဲနၚ်။ နာဲဟွံမွဲရ စၞဇၟာပ်တၚ်။ ညးဂှ်ဂၠာဲနၚ် ရောကမၠံၚ်ယာဲ။ ကောန်ခြာနူယာဲ ယာဲဒးကၠၚ်ပြဵု။ စဴကၠုၚ်ကဵုယာဲ ရနာဲဍောၚ်မ္ၚဵု။ လၞီကၠၚ်ပြဵု ဟွံဟဲကဵုယာဲ။ အဵုစမ္ပာထဝ် ရုပ်မဂေါဝ်ဆာဲ။ ချိုတ်အာကဵုယာဲ ဟာကောန်ဗၠာဲမိ။ မိကော်စလာၚ် ဟွံမိၚ်ပါၚ်ညိ။ ချိုတ်အာကဵုမိ ဟာပဳတိယာဲ။ ။

အဵုထဝ်ကမု မဂၠုကောန်ဗၠာဲ။ ဂျိုၚ်ကဵုကဵုယာဲ ပနာဲဟွံစဴ။ မဂၠုဒၟံၚ်တဴ ဟွံစဴကဵုယာဲ။ စှ်ဂိတုဓဝ် မိတန်ဂဝ်နာဲ။ ဖေက်ကောန်လီုပ္ဍြ မိမၚ်မွဲဂၠာဲ။ မရိၚ်ကတၚ်ဆာဲ မိနာဲဟွံစ။ ဍာ်ၜိုဟ်လောန်အဴ ဍာ်ဂမ္တဴပၠ။ ဖနုၚ်ဗစး ပါဲၜးစဗ္ဗ။ ဗတံတ္ၚဲ မၚ်မွဲတဴရ။ မိဟွံဂံၚ်သ္ပ ဂၠဣတယာဲ။ ။

အဵုဍောၚ်ကသဝ် ပၞာၚ်တိုၚ်ထဝ်ယာဲ။ မိသၠးဂဝ်နာဲ ယာဲဒးသ္ဍိုက်ဂွ။ ဒေါဝ်ကလောဂမၠိုၚ် နာံရိုၚ်မသ။ မိဒုၚ်သ္ဍိုက်ဂွ ဂုဏ်မသေၚ်ဟာ။ စဲကဵုဒဂိတ် ဟွံကဵုကိတ်ကၠာ။ ဟုံဍာ်ဟုံမိတ် လအိတ်ဟွံခြာ။ မိဖျီုဖအအ် လဴလကာဖါ။ ဂုဏ်ဟွံဗှ်သၞာ တီဟာကောန်ဗၠာဲ။ တှ်အမြိုတ်သာဲ ယာဲဖျုၚ်ဗမဴ။ ဂိုၚ်သ္ၚိဍာ်သၟတ် ကၞေံပဿဴ။ ဖုံပၠဳလွဳနာဲ ယာဲကၠောန်ၜိုတ်တဴ။ တူဒဳမိတုန် ဒှ်ဖုန်ခေါဇါ တီဟာကောန်ဂၞဴ။ ဟွံစဴကဵုယာဲ အဵုဒကောၚ်ပိုန် ဒတိုန်စရာဲ။ တိသတီလောန်ကာဲ ဗ္ဒာဲကဵုဂုဏ်မိ။ တိဒးကြဳအာ ဟွံဂံၚ်ပါမြိ။ ဟွံစဴရော်ညိ ဂုဏ်မိရောနာဲ။ ။

မှာသမိတ်ဂၚ် ဇြိုဟ်က္ဍၚ်လောန်ဗၞတ်။ ဗ္ဒာဲကဵုဂုဏ်သၟတ် ပ္တောံၜတ်ဂုဏ်မိ။ မှာသၟိတ်ကၠာ ကျအာဒမၠိ။ ဗှ်ခၠေဝ်ဂုဏ်မိ စဴကၠုၚ်ညိနာဲ။ သိန္နရာတ်ပ္ညုၚ် ဇၞော်သၠုၚ်လောန်ကာဲ။ ပ္တောံၜတ်ဇၟာပ်ဒၞာဲ ဗ္ဒာဲကဵုဂုဏ်မိ။ သိန္နရာတ်ကၠာ ကျအာဒမၠိ။ ပဟွံခၠေဝ်ညိ ဂုဏ်မိရောနာဲ။ အဵုဂၠုဂေါဝ်လောန် ကောန်သ္ဍိုက်ယာဲ။ ဗတဳဂၚ်ဆာဲ ဗ္ဒာဲကဵုဂုဏ်မိ။ ဗတဳဂၚ်္ဂါ ကျာအာဒမၠိ။ ဟွံစဴခၠေဝ်ညိ ဂုဏ်မိရောနာဲ။ ။

အဵုဒကောၚ်ပိုန် ထဝ်ဖ္ဍိုက်ယာဲ။ ဂစေံဇၟာပ်နာဲ ဟွံသာဲနူကောန်။ မိကဵုကောန်ဗၠာဲ ဒးသာဲလောန်စောန်။ မူဘဝကောန် ရောထဝ်သောန်ယာဲ။ အဵုဒကောၚ်ပိုန် ဒတိုန်စရာဲ။ ဆဵုဂၠုဂေါဝ်ဆာဲ နာဲထိုက်စမ္ၚာ။ ဂစေံပြဝါ ညိဟွံခြာသာဲ။ မူဘဝတၞံ ကံမိဂၠိုၚ်ဒၞာဲ။ ကောန်ဒးခြာယာဲ ကံယာဲသ္ဂးဟာ။ ။

ကြဝိတ်ဟွံဂြဴ ကွဴသာရိကာ။ ရိုဟ်တ္ၚဲဂြဴကၠာ သန်ၛာသဝ်တ္ၚဲ။ တ္ၚဲဂွံသ္ၚိတ်သ္ၚဲ မွဲဟွံဂြဴကၠာ။ မူကံတူယဲ ညံၚ်အဲကီုဟာ။ ဟးတ္ၚေက်ထဝ်ဗၠာဲ နာဲယာန်သၞေၚ်ၜါ။ စိုပ်ဃောသန်ၛာ ဟွံဂွံခြာဒွီု။ သဝ်တ္ၚဲဒှ်ဝွံ မွဲဟွံဗြုရ။ မၞးတံစိုတ်လီု ဗီုအဲကီုဟာ။ ။

ဟးစာၚ်ဍေဝ်ဂြိုပ် စိုပ်ဃောသန်ၛာ။ လရိုက်သၞေၚ်ၜါ ကြာထောက်စလာၚ်။ ထောံကၠေံပဏာၚ် အာဂြိုပ်သ္အာၚ်ဟာ။ ။

ဟးမြာ်ထဝ်ဗၠာဲ နာဲသတ်ဇိုၚ်ၜါ။ စိုပ်ဃောသန်ၛာ ပြာထော်စလာၚ်။ တ္ၚဲဝွံကၞပ်သၠိၚ် မွဲဟွံမိၚ်ပါၚ်။ ထောံကၠေံပဏာၚ် အာဂြိုသ္အာၚ်ဟ။ ။

ဂစေံလိုက်ထောဝ် ဗြုကြဵုမှောဝ်ဇာ၊ မာတ်အဲဗြဴကၠာ ကောန်ဒးခြာဒွီ၊ နာဲတံနွံရော ကလောစိုန်သ္ကီု၊ မိပ်စိုတ်ဂြီုဂြီု ကော်ကြီုသ္ဂးဟာ။ ။

တြုံဂေါဝ်ဗြဴဂံက် နာဲဗြုချံက်ချာ၊ မာတ်အဲဗြဴကၠာ ကောန်ခြာအာတွဵု၊ အဲကၠုၚ်ယာဲဂၠာဲ စိုပ်နာဲတံအဵု၊ နာဲပစရဵု ဗြုကြဵုဂြိုၚ်ဟာ။ ။

ခနေၚ်စံက်စာၚ် ထာက်ကံကြဵုဇာ၊ မာတ်အဲဗြဴကၠာ ကောန်ခြာတၟံ၊ အဲကၠုၚ်ယာံကော် ထာန်ဗော်နာဲတံ၊ မိပ်စိုတ်ဆံလံ တုဲတာန်ကံဟာ။ ။

အဵုထိုၚ်စမ္ၚာ မိဖဳဒွါကောန်၊ ယာဲတြုံဂုဏ်ကောန် ကၠၚ်ကၠောန်ဖိဖိ၊ ဍာ်ရမတ်ယာဲ ဇွောဝ်ဆာဲဒမၠိ၊ စဴကၠုၚ်ကဵုမိ ညိရလေဝ်ကောန်၊ ဟသေၚ်တမၠာ မိဂြိုဟ်စာလောန်၊ မတူဖျာ်ပၠန် ကောန်တ္ၚေက်သ္ဂးဟာ၊ ဗွဲတၟေၚ်သာ် ဖျာ်သာရိကာ၊ ဘဝတမ္ၚာ ဒးယာဲဟာကောန်။ ။

မိကြၚ်ကၠုၚ်စိုပ် ဒေါဝ်ဂြိုပ်စောန်လောန်၊ သၟိက်ဂွံညာတ်ကောန် ယာံဒက်ဒေါန်ကွာဲ၊ နာဲဟွံပၠမုက် ပနုက်ဟီုယာဲ၊ မိဟွံညာတ်နာဲ ယာဲချိုတ်ရောၚ်ကောန်။ ။

အဵုဂၠုသာ်ပ္ကဴ ညံၚ်စဴရကောန်၊ မိမွဲစောန်လောန် ကောန်ဒးခြာသာဲ၊ မိကၠုၚ်ဂၠာဲသွံ ဟွံဂွံညာတ်နာဲ၊ ဂၠုထဝ်ပဏာဲ ယာဲချိုတ်ရောၚ်ကောန်။ ။

ဒေါဝ်ဂြိုပ်ဒမျိ မိကၠုၚ်ဂၠာဲကောန်၊ မိယာဲဒက်ဒေါန် ကဵုကောန်တြုံမွဲ၊ မိဒးခြာဒၚ် ကြၚ်ဒၟံၚ်တူယဲ၊ ယာဲချိုတ်မွဲတဲ တ္ၚဲဝွံရကောန်။ ။

အဵုဂၠုဂေါဝ်ဇြုၚ် စဴကၠုၚ်ရကောန်၊ ဒေဝတဴပန် လှေံလှန်လဝ်နာဲ၊ ဂွံမိတ်မဆာန် ဇြဟာန်တ္ၜူမာဲ၊ မဂၠုကောန်ဗၠာဲ ဝိုတ်ယာဲဟာကောန်။ ။

အဵုဒကောၚ်ဗၠဲ မိမွဲစောန်လောန်၊ သ္ဍိုက်ယာဲလောန် ဗှ်ကောန်ဂၠုမွဲ၊ မဂၠုဟွံတီ ညံၚ်လၞီအဲ၊ မိချိုတ်အိုတ်ဒဲ ပြဲသန်ရကောန်။ ။

အဵုဒကောၚ်ဗိုတ် ရုပ်ၝောံကိုတ်လောန်၊ လေပ်ကွတ်စိစောန် လောန်ဋ္ဌာန်ယဲသ၊ ဗှ်ကောန်ဒးသာဲ မူယာဲမံၚ်ပ၊ ယာဲအိုတ်ဂန္ဓ ပြဲသန်ရောၚ်ကောန်။ ။

ပၟတ်လၚ်ကဝ် ဇၞော်မောဝ်လောန်ကာဲ၊ ဗြဲဇၞော်ဂူဆာဲ လၚ်ကဝ်ဆာဲပၠိုတ်၊ ဗှ်ကောန်ဒးသာဲ စိုတ်ယာဲဟွံဝိုတ်၊ လေၚ်ကဝ်စရိုတ် တီပၠိုတ်ရောကောန်။ ။

အဵုက္ၜၚ်ထဝ်ယာဲ ရုပ်ဂေါဝ်ဆာဲလောန်၊ က္ၜၚ်လီုမွဲတန် သာံပါန်ပၠန်စိုပ်၊ နာဲဒကောၚ်ဗၠာဲ သာဲနူဗဒိုပ်၊ က္ၜၚ်ထတ်ယာဲကိုပ် ဟွံစိုပ်ရကောန်။ ။

ဂိမှန်ဗဒိုပ် ဂြိုပ်တူလောန်ထောန်၊ ဇွဂၞိၚ်အိုတ်ပၠန် ပၟတ်ခၠန်ပၠိုတ်။ ဗှ်ကောန်အသဝ် ရုပ်ထဝ်လကိုတ်၊ လ္ၚပၟတ်စိုတ် တီပၠိုတ်ရောကောန်။ ။

အဵုဒကောၚ်ပိုန် ရုပ်ကွိုန်လစောန်၊ လၞီယာဲလောန် ဗှ်ကောန်သော်က္ဍိုပ်၊ ဗှ်ကောန်ခြာသာဲ လၞီယာဲကြိုၚ်၊ မူကာလကိုပ် စိုပ်ယာဲရောကောန်။ ။

သုကညာဗြဴ ကော်တဴသောန်န်၊ လစောန်လၞောန် အဵုဂၠုကောန်ဗၠာဲ၊ မိကော်စလာၚ် ဟွံမိၚ်ပါၚ်နာဲ၊ ဓဇန်ကဵုယာဲ လောန်ကာဲသွံကောန်။ ။

အဵုလၟာဂၞဴ ညံၚ်စဴရကောန်၊ ဒိုဟ်ဒးကၠဗြန် ဗြုပၠန်ကဵုယာဲ၊ မိကော်စလာၚ် ဟွံမိၚ်ပါၚ်နာဲ၊ ဓဇန်လောန်ကာဲ ကဵုယာဲသွံကောန်။ ။

အဵုဂၠုဍောၚ်ပ္ကဴ ညံၚ်စဴရကောန်၊ မိမွဲစောန်လောန် ကၠၚ်ကၠောန်ယဲသ၊ နာဲလသာလဝ် လၚ်ဇွောဝ်ဟောံဇြ၊ မိအိုတ်ဂန္ဓ ဂုဏ်နာဲရကောန်။ ။

အဵုဒကောၚ်ထဝ် ရုပ်အၚောဝ်သောန်၊ သိက်နာဲဓဇန် ဟွံပၠန်ကဵုမိ၊ မိကော်စလာၚ် ရမျာၚ်ဖိဖိ၊ ဟွံကလုက်ညိ ကဵုမိရောကောန်။ ။

သုကညာဗြဴ ယာံတဴသောန်န်၊ ယာံကြၚ်အာပၠန် ဗက်ကော်ကောန်ဗၠာဲ၊ ကွာ်အာသ္ၚံက်က် ဒိုဟ်ဗၟံက်တာဲ၊ ကြၚ်အာကော်ဂၠာဲ ယာံဂၠာဲကောန်ဂၞဴ၊ ဇၞတ်မကြၚ်အာ ကော်အာကဴကဴ၊ ဒဵုဆိုက်တၞံဇြဲ သကဲဂှ်အဴ၊ လစောန်လၞောန် ယာံဒက်ဒေါန်တဴ၊ သၟိၚ်ဓဝ်နာဲမည် တၠနန်ပ္ကဴ၊ မိၚ်ပါၚ်မိဂၞဴ ရဴဂတဝ်သာဲ၊ မိၚ်ပါၚ်မိသွံ ဟွံဂွံဟိုတ်မာဲ၊ ဒၚဳကလုက်ကွာဲ အဴအဴယာဲဇု၊ အဲဍိက်နွံသ္ကဲ ပ္ဍဲလွဳမာန်ဆု၊ ဒုၚ်ပါၚ်လဒု ဇကုဟွံညာတ်၊ မိမိၚ်ပါၚ်ကောန် လၞီသောန်ကၞာတ်၊ မိဟွံဂွံညာတ် သမ္ၚာတ်စိုတ်ယာဲ၊ အဵုထဝ်ပဏာဲ ကောန်ဗၠာဲဇြဟာန်၊ မိကၠုၚ်စိုပ်မ ဒုက္ခဂိက္တာန်၊ ဒေါဝ်က္ၜဳကထံၚ် ဂၚ်ခဏံၚ်ဟာန်၊ ဒေါဝ်ဂြိုပ်ဂမျိ ဒေါဝ်ဗယိဗြာန်။ ဒဒိုက်ဂိကတာန် ဟိုတ်မိဆာန်နာဲ။ ။

မိကၠုၚ်စိုပ်ရ ယွံဣတယာဲ၊ စှ်ေမိကၠုၚ်မိ ညိရကောန်ဗၠာဲ၊ မိဝွံညာတ်နာဲ လၞီယာဲမဟဲ၊ လၟုဟ်ဝွံသၟတ် ဝါကၞောတ်တဲ၊ ယာဲဗဵုနာဲမွဲ ဒဵုဖဲညိကေါန်။ ။

အဵုဣတဇု ဂၠုမဂေါဝ်လောန်၊ ညံၚ်စဴညိကောန် ဖဴမိပၠန်ရ၊ ဒေါဝ်ဂြိုပ်လ္ၚု စဏုကၟီကၠ၊ မူနာဲမံၚ်ပ စဴကၠုၚ်ရကောန်။ ။

သၟိၚ်ဗၠာဲမိၚ်ကီု ဟီုကဵုမိပၠန်၊ ယွံမိဇြဟာန် ကောန်ဆာဲယာဲလောန်၊ သၟိက်စဴလောန်ထောန် ကောန်ဗၠာဲဇြဟာန်၊ ဂွံသ္ဍိုက်ရေၚ်ကာန် ဆာန်ကၟိန်လေၚ်လ၊ ဒေါဝ်ကသဝ်နန် ဂွံညန်ဒးရး၊ ဆဂှ်ဟွံသေၚ် တၟေၚ်မူရဴဂး၊ သၟိၚ်ဣန်နာဲညး ဇၞော်ကၠးအညာ၊ ပ္တုဲလဝ်ဒါန်အဵု ကဵုသုဇာတာ၊ ဒ္စါံလက်ဗၠန် ကဵုပန်ကိုတ်ကၠာ၊ ဇမ္ၚောဲဂှ်ရော ဗၞတ်ယောဇနာ၊ ၜိုန်တဴသ္ၚောဲထာန် ဂွံဆာန်သာဓာ၊ ဂွံသ္ဍိုက်ရေၚ်ကာန် မွဲဟာန်မွဲသၞာ၊ ညံၚ်သုဓနု နာဲမြုပန်စာ၊ ကောန်ခၞောဝ်ကၠာ မိဏံၚ်ခရဳ၊ မသုန်ကၠံမှာ ယောဇနာပ္ညဳ၊ ဟိုတ်နူဒါန်ပၠန် ဂွံညန်မွဲဒၞဳ၊ စန္ဒဝတဳ ပ္ညဳကလော်ဗြဴ၊ သတ္တဓနု နာဲမြုဍောၚ်ပ္ကဴ၊ ကောံကလော်ဗြဴ နှဴရဴရေၚ်ကာန်၊ ညးမဟီုဂၠာဲ စလာဲနိဒါန်၊ ဟိုတ်ပ္တုဲလဝ်ဒါန် ဒါန်ဂှ်စဳရေၚ်၊ ပိုဲဍိက်တုန်ကီု တုပ်ဗီုဂှ်ဟေၚ်၊ ဒါန်တမၠာပြေၚ် စဳရေၚ်ပိုဲအဴ။ ။

ဒါန်ဒှ်ယုတ္တိ စၟတ်ရောၚ်မိဂၞဴ၊ ပ္ဍဲမိဂှ်ဗျိၚ် မိၚ်ပါၚ်ကောန်အဴ၊ ညံၚ်ရမျာၚ်ကွဴ ရဴရှ်အမြိုတ်၊ စိုတ်ဍိုန်အာဟေၚ် ဟွံဗၠေၚ်တသိုက်၊ ရမျာၚ်ကေါန်လွုဲ မိၚ်တုဲလုပ်စိုတ်၊ ညံၚ်ရှ်အမြိုတ် မိၚ်စိုတ်ဍိုန်အာ၊ မိမဂေါဝ်ဆာဲ နာဲသုကညာ၊ ဒၚဳဟီုတိုန်ဟေၚ် ကဵုနာဲသေၚ်ဟာ။ ။

ယွံဣတယာဲ ကောန်ဗၠာဲထၚ်ဏှာ၊ ရမျာၚ်နာဲကၠာ ခါမိၚ်ပါၚ်က္ညန်၊ ဒဒှ်ဟွံချိုတ် နာဲဟွံအိုတ်သ္ကန်၊ ယာဲဂွံပ္တေဟ်ပၠန် ဗိုန်က္ညန်တုဲရ၊ ဇကုနာဲမ ပၠညိကောန်ဗၠာဲ၊ မိသၟိက်ဗဵုဒၚောဝ် ရုပ်ထဝ်ပဏာဲ၊ စိုတ်မိဟဲရ လေဣတယာဲ။ ။

မိၚ်ရမျာၚ်မိ မဂ္ညိစရာဲ၊ တုဲသၟိၚ်ဓဝ်ဗၠာဲ ဟီုကဵုယာဲပၠန်၊ ဂုဏ်ဇၞော်ပြဲဂၠိ ယွံမိကျာ်ဂန်၊ ဇကုအဲပၠန် ဇြိုၚ်သန်ဂွံညာတ်၊ ညးဟွံကဵုညာတ် ဂွံညာတ်ဇြိုၚ်လောန်။ ။

မိၚ်ရမျာၚ်ကောန် ဟီုပၠန်မွဲတန်၊ ယွံမကောန်ဂၠု ဣတဇုအဲ၊ ဇကုနာဲကၞာတ် ဟွံညာတ်မွဲတဲ၊ တၞးဇိုၚ်ကီု သီုတၞးတဲ၊ မိဂွံညာတ်ညိ ရောၚ်စိုတ်မိဟဲ။ ။

မိၚ်ရမျာၚ်ယာဲ နာဲဒကောၚ်ဗၠဲ၊ တၞးဇိုၚ်တၞးတဲ ညံၚ်နဲဂၠးထဝ်၊ ထ္ၜးကဵုယာဲ နာဲဍောၚ်အသဝ်၊ ဇိုၚ်တဲသၟိၚ်ဓဝ် မိညာတ်လဝ်ရ၊ ယွံဣတယာဲ နာဲကောန်တၠ၊ ဂအဟ်အဲကီု သီုကဵုဗြဴပန်၊ ယာဲသ္ဂောံညာတ်ညိ ရောၚ်မိစိုတ်တန်၊ ဂအဟ်ဗြဴပန် ဟီုပၠန်မွဲတဲ။ ။

ယွံခါံသဳဗြဴ မိဂၞဴမပြဲ၊ ဇကုဇိုၚ်တဲ မိအဲဟွံညာတ်၊ ဆသော်ပိုဲသ္အး ပိုဲထ္ၜးကၞာတ်၊ ပိုဲကဵုမိညာတ် ခပ်ပြာတ်ဒဒှ်၊ ဒေဝဗြဴပန် သီုပန်ဟီုတွံ၊ သော်ဗီုကၠေၚ်သွဟ် ဗစဳမြဟ်ဆာဲ၊ တၠာဲဖျေံသၟတ် ဗၞတ်ပန်ဟတ်ဆာဲ၊ ဗြဴပန်မ္ဂး သှ်ထ္ၜးပၠာဲ၊ မောဝ်ပ္ဍးတၟာဲ အမြာဲဂန္ဓာ၊ မုဟ်သော်ဗစဳ သၟဟ်န်ညဳသာ၊ ခါံသဳဗြဴကၠာ ဂွံညာတ်ခါဂှ်၊ အိုဟ်တၟိုဟ်စိုတ် စရိုတ်ဟဲပြဟ်၊ မိကဵုကောန်ဂှ် ဟီုဇီုသှ်ၛာဲ၊ ဂအဟ်ပန်ကီု သၟဟ်န်ဟီုဂၠာဲ၊ အရေဝ်ဝတ်လိုက် သၟာန်သၟုက်ဂၠိုက်ဂၠာဲ၊ ဟီုဇီုသှ်ၛာဲ သၟိၚ်ဗၠာဲကျာ်သြဳ။ ။

ဂအဟ်ဗြဴပန် သၟဟ်န်အိန်ရဳ၊ စဳရေၚ်ဗိုန်ဇၟံ ကလံခါံသဳ၊ ကလံသာဲရ ဇၟာပ်သဗ္ဗဇဳ၊ သၠိုၚ်ထဝ်သၠိုၚ်သြန် တ္ၜန်တ္ၜောဲတဝဳ၊ ဖေဝ်ထဝ်ယာတ်ထဝ် ကေတ်နၚ်ဗဝ်သ္အဳ၊ ပ္ကဴဇဗၠုရ ပၞာၚ်ဗကဇဳ၊ ကလံခါံသဳ ဒ္ၚဳဒ္ၚဳဟီုတဴ။ ။ ယွံညးပြဲညိ မိခါံသဳဗြဴ၊ ဒုဟ်အတိက်အဴ တဴအနာဂတ်၊ ပစ္စုပန်ကၠာ ဒုဟ်နွံပြာကတ်၊ ပိုဲဍိက်ညးပန် သီုပန်အဆတ်၊ ဒုဟ်ဇၞော်ဒုဟ်သွတ် အဆတ်သဘဴ၊ ပိုဲဍိက်မံၚ်ဂြံ ကလံရအဴ၊ ဝွံဂအဟ်ဗြဴ ဒေဝတဴပန်၊ ကလံခါံသဳ ဖဳဒွါတဴပၠန်၊ မမဂေါဝ်ဆာဲ သၟိၚ်ဓဝ်နာဲမညိ၊ ကလံမိပၠန် သီုဂန္ဓနာ။ ။

ယွံမိကျာ်ဂန် ဒုဟ်ပၠန်ဇၟာပ်ရာ၊ အတိက်နာဂတ် ပစ္စုပန္နာ၊ ကာယဒွါကီု သီုဝါစဳဒွါ၊ မနောဒွါဂ္ညိ သီုပိပြကာ၊ ကေါန်ကလံကွာဲ ဒုဟ်ကဵုပါဲအာ၊ ဂုဏ်မိဂၠိုၚ်စွံ ကဵုကောန်ဂွံမြာ၊ သာ်ဝွံသၟိၚ်ဗၠာဲ ကလံယာဲကၠာ၊ ကလံတုဲမာ ခါဂှ်သၟိၚ်ဗၠာဲ၊ ဂၠိက်ယာတ်ဂၠိုၚ်သန် ထဝ်သြန်ဇၟာပ်ဒၞာဲ၊ ဗဝ်သ္အဝ်ကဵုယာဲ သ္ပတၟာဲဟေၚ်၊ ဇိုန်ကဵုယာဲရ သဗ္ဗတၟေၚ်ၚ်၊ ကဵုတုဲဒှ်ဟေၚ် ပရေၚ်လိုက်ဗာ၊ ဂကန်ဖျန်ကီု ဟီုဇီုတုဲကၠာ၊ ကေါန်ဂကန်ပ္ညဳ ကဵုမိဖဳဒွါ၊ မိၚ်ဂကန်ကောန် ဂၠိုၚ်သန်အရာ၊ ဂကန်ဖျန်သၟဟ် တုဲဒှ်အိုတ်မာ၊ မိသၟိၚ်ဓဝ်ကၠာ က္တဵုစဴအာရ။ ။

ကွာ်ကလေၚ်ကၠုၚ် စှ်ေက္ဍိုက်ဂၠုၚ်ပၠ၊ ပ္ဍဲဂၠုၚ်တေံဂှ် မဒှ်ဒေသ၊ ကြဳဇှ်ကလော် မဇၞော်တေဇ၊ အမာဲပေၚ်ဂၠုၚ် ပုၚ်သွပေၚ်န၊ ကဖျုန်ဗြာတ်က္ၜဴ ပေၚ်တဴဗဝ်ရ၊ ဇဗၠုပေၚ်ဂၠက် လက်ဖက်ပေၚ်န၊ စလန်အဂၠဴ ပ္ကဴသဴသဗ္ဗ၊ တ္ၜန်တ္ၜောဲတဴရ ဇၟာပ်သဗ္ဗဇဳ။ ။

ကလော်ဂမၠိုၚ် ရိုၚ်ၚ်သ္အဳသ္အဳ၊ ကၠုၚ်ကောံဒၟံၚ်ပၠန် တ္ၜန်တ္ၜောဲတဝဳ၊ ပလံၚ်ဖျေံရ ပေၚ်ဂျဇိုၚ်က္ၜဳ၊ မိၚ်သၟိၚ်ဓဝ်ရ တၠကျာ်သြဳ၊ နာဲဂၠုၚ်ကောန်ဂၠုၚ် က္ဍိုက်ဂၠုၚ်တဝဳ၊ လ္ၚောဝ်ရတ်ပိ မိမခါံသဳ၊ ဒေဝတဴဂြိုပ် က္ဍိုပ်တၟံကျာ်သြဳ၊ ကလံဗဇဴ ဒေဝတဴက္ၜဳ၊ ဂဇံတပ်သ္တေၚ် ဒၟံၚ်ရေၚ်တဝဳ၊ ချူသၞေဝ်ဟွံရပ် ဒၟံၚ်ကၞပ်သ္ၚဳ၊ ကြဳဇှ်ကလော် မဇၞော်ကျာ်သြဳ၊ ဂၠုၚ်ဂြိုပ်သဲဟာန် ထာန်အဒေါဝ်က္ၜဳ၊ ညးဂမၠိုၚ်ကၞောတ် ညာတ်ဂၠုၚ်ဒြိပ်ပ္ညဳ၊ မိပ်စိုတ်စရိုတ် အဵုဇိုတ်ကၠၚ်ဟဳ၊ လ္ၚဵုဂှ်လှ်ေ ဒယှ်ေသဳသဳ၊ လ္ၚဵုတက်တဲ ဂြီုဂြီုပ္ဍဲက္ၜဳ၊ သၟိၚ်ဓဝ်နာဲမည် ကော်ဂကန်ပ္ညဳ၊ အာရမိအဲ မပြဲကျာ်သြဳ၊ မိသၟိၚ်ဓဝ်ပ္ညဳ ဒ္ၚဳကော်ဂကန်၊ မံၚ်ရကောန်ဗၠာဲ အဵုနာဲဂေါဝ်လောန်၊ အဵုရုပ်လစောန် ကောန်သ္ဍိုက်ယာဲ၊ အဵုဣတဇု ဂၠုထဝ်ပဏာဲ၊ ဒးခြာနူနာဲ ယာဲအာရကောန်။ ။

မိၚ်ရမျာၚ်ယာဲ သၟိၚ်ဓဝ်နာဲမည်၊ စၟဳတဴပၠန် သၟန်သြန်က္ၜဳ၊ မိသၟိၚ်ဓဝ်ဗၠာဲ သာဲအာဒ္ၚဳဒ္ၚဳ၊ ညာတ်မိသ္ၚောဲက္ဍၚ် စိုတ်မကၠၚ်ဟဳ၊ လၞီလောန်ဗၞတ် ဍာ်ရမတ်နှဳ၊ နူဂၠံမတ်ၜါ ပြဟ်အာပြဳပြဳ၊ လံအာသ္ၚောဲအာ အကြာဇၟောပ်က္ၜဳ၊ သၟိၚ်ဓဝ်အဏံ ဂဇံစမဳ၊ ထာန်ဂှ်မေခုံ ဒုၚ်ယၟုက္ၜဳ၊ ပါၚ်ဂၠံစမဳ ခုတ်ပ္ညဳလဝ်။ ။

လၟုဟ်ဟီုမံၚ် ပါၚ်လံၚ်ဆတ္တဝ်၊ ဒဵုကဵုလၟုဟ်အဴ ဒှ်တဴအသဝ်၊ မာတ်သၟိၚ်ဓဝ်ဗၠာဲ ဆာန်မိကာကဝိ၊ သၟိၚ်စၟဳတဴ မိဂၞဴဆတ္တဝ်၊ စၟဳဟွံညာတ် သြိုဟ်သဗာတ်သ္အဝ်၊ လၞီကာဲကဝ် လၚ်ဇွောဝ်ဟောံဇြ၊ သမ်အိက်သမ်အဝ် ရမတ်ဇွောဝ်ပၠ၊ ဗှ်တိုန်မိရ သီုထသပါ၊ ဒဒှ်မိဆာန် ဇြဟာန်မေတ္တာ၊ ဒဒှ်လွဳလဝ် ကောန်ဂၠုထဝ်နှာ၊ဒဒှ်ဖုံပၠဳ မိလွဳပရာ၊ ဖရာဲမိသ္ဍိုက် ယိုက်ဒိုက်ဖဳဒွါ၊ ထွာဲမိတုန် ဒှ်ဖုန်သၞာ၊ သေၚ်မိဗလဲ ဂေက်ဂြဲဟွံညာ၊ ကျာ်ဂန်လွဳလဝ် စဵုဇၞော်မောဝ်အာ၊ မိကျာ်ဂန်အဲ ဂုဏ်ဇၞော်ပြဲဖါ၊ ဟွံဂွံရော်တုန် ဂုဏ်မိသေၚ်ဟာ၊ ဗှ်မဒးကၠၚ် ခြာဒၚ်စာ်ခြာ၊ ဗှ်ဇကုမွဲ ပ္ဍဲရညဝါ၊ ဗှ်တိုန်မိဂၞဴ သြိုဟ်ရဴပါ်အာ၊ ဇွောဝ်လၚ်ကၠၚ်ဟဳ လၞီဖဳဒွါ၊ ရမတ်ဇွောဝ်ဍေၚ် ပေၚ်သြိုဟ်သပါ၊ ယာံဇွောဝ်တဴဟေၚ် ဒၞာဲဂှ်သေၚ်ဟာ။ ။

ဗြဴသိုက္ခမာ ဝုတ်ကညာပန်၊ ညာတ်မုက်တြုံချိုတ် ပ္ဍဲစိုတ်လ္ၚုလ္ၚန်၊ ညာတ်တြုံယာံတဴ ကညာဗြဴပန်၊ ပခိုၚ်ဟွံမာန် ဟိုတ်ဆာန်တြုံလောန်၊ ဗန်ကံတြုံအဴ ယာံတဴသောန်န်၊ ဟးတၠသ္ၚိ ကောမိကျာ်ဂန်၊ ကောပယာံရ ကောပဝေါန်စန်၊ ကောန်ပလ္ၚုလ္ၚန် ပ္တန်စိုတ်ညိကၠာ၊ ယွံကောသၟိၚ်ဓဝ် ဒကောၚ်ထဝ်နှာ၊ ယွံတၠသ္ၚိ မဂ္ညိပညာ၊ ကောပစံၚ်တူ ကောပပူဆာ၊ ညံၚ်ပိုဲစဴအာ လွဳမာန်ကၠာရ၊ ဗြဴပန်ကော်ဖျဴ တြုံသ္ဍဴတေဇ၊ ကလော်ဂမၠိုၚ် ရိုၚ်ၚ်လျလျ၊ ဗက်စဴအာရ တြုံတၠလွဳ၊ စဴစိုပ်ဒေန်ဟာန် လွဳမာန်ကျာ်သြဳ၊ ဂကောံဗြဴပန် သၟဟ်န်မွဲဒၞဳ၊ ပ္ဍဲဒေန်ကျာ်သြဳ သၟဟ်န်ညဳသာ၊ ခဍံက်လဗိၚ် သၠိၚ်မွဲသၞာ၊ စဵုလၟုဟ်ကၠာ ပြာကတ်ကၠုၚ်ကၠေဲ၊ ဟီုတဴဆတ္တဝ် သၟိၚ်ဓဝ်သာဲလေဲ၊ ဒယှ်ေသေဲသေဲ သၟိၚ်သာဲလေဲတုန်။ ။

သၟိၚ်ဓဝ်စဴကၞာတ် ပြာသာတ်နွံဂုဏ်၊ မိသၟိၚ်ဓဝ်တုန် ဂုဏ်ဒေဝတဴ၊ ဂၠုၚ်ဒြိပ်သွိၚ် ဟွံထဍိၚ်တဴ၊ ညံၚ်ပဝန်ကံ ဒြိပ်ဂမြံစဴ၊ ဇြဳဇှ်ဒေဝတဴ ရဴပရှ်ကျာ၊ တုဲစိုပ်သၞေဟ်ဟေၚ် ဗဒိုပ်သေၚ်ဟာ၊ စိုပ်ကွာန်ဒၚ်မာဲ ယာဲသၟိၚ်ဓဝ်မှာ၊ တိုန်စိုပ်သ္ၚိရ ခဏဂှ်ကၠာ၊ ကလောန်ဂမၠိုၚ် ကၠုၚ်ဗိုၚ်သ္အဳဗ္ဂါ၊ ဟီုဇီုရိုဟ်ထာန် သၟာန်သၟုက်ဖဳဒွါ၊ ပရိုၚ်ကောန်ဂှ် ဗီုဒဒှ်ကၠာ၊ ညံၚ်နာဲရဲဟီု ဒှ်ကွေံကီုဟာ။ ။

ယွံကလောတံ မဇၟံပညာ၊ ဒှ်ကွေံသေၚ်ဟာ လအာပါၚ်ထဴ၊ ညံၚ်ထဴဟီုဂှ် ဒှ်စၟတ်ကွေံအဴ၊ ကေါန်ဂၠုသာ်ပ္ကဴ ဒှ်တဴသၟိၚ်ဓဝ်၊ ဒှ်သၟိၚ်ကလော် မဇၞော်အသဝ်၊ ဂကောံဗြဴပန် သၟဟ်န်ဆတ္တဝ်၊ သမၞိၚ်လွဳမာန် ယာန်ဒိပ်အသဝ်၊ သ္ဍိုက်မၠိုက်တၚ်ဂၠဝ် ဂွံဒၚောဝ်တဴဟေၚ်၊ အဲစိုပ်ဇရေၚ် ထာန်ဂှ်ဟေၚ်ဟာ၊ မိၚ်ပါၚ်အဲတၟေၚ် ဟွံဗၠေၚ်တရဴ၊ ညံၚ်မိကျာ်ဂန် ကောန်စၟဳတဴ၊ ညံၚ်အဴညံၚ်အဴ မိဂၞဴကၠုၚ်စိုပ်၊ ဒၟံၚ်လွဳမာန်အဴ မိဂၞဴသော်က္ဍိုပ်၊ ယာဲပိုဲကၠုၚ်စိုပ် ဗဒိုပ်ပိုဲအဴ။ ။

ဂအဟ်အဲအဴ ဗြဴပန်ဆတ္တဝ်၊ ဝေၚ်ဒုၚ်ကော်ခဴ ပတဴအသဝ်၊ သီုညးပန်ဓဝ် ကော်ဇံသဝ်အဲ၊ ယွံခါံသဳဗြဴ မိဂၞဴမပြဲ၊ ဒၟံၚ်လွဳမာန်သ္တဲ ပ္ဍဲရုက္ခဇဵု၊ ညံၚ်အဴညံၚ်အဴ မိသ္ဍဴဍောၚ်မ္ၚဵု၊ မိကၠုၚ်စိုပ်အဵု တွဵုပိုဲကၠာ၊ ခိုဟ်သန်ခိုဟ်သန် ပူဗန်ဖဳဒွါ၊ ရမျာၚ်ညံၚ်ကွိၚ် မိၚ်ဖဲလဲအာ၊ ကလံအဲပၠန် ဂၠိုၚ်သန်ပြကာ၊ သၠိုၚ်ထဝ်သၠိုၚ်သြန် တ္ၜန်တ္ၜောဲနာနာ၊ ယာတ်မပြဲကၠာ ခါသာဖုံက်၊ ယာတ်ဒိပ်အသဝ် ၚုဟ်ထဝ်မွဲလက်၊ တယောဝ်လၜက် ဒုၚ်ကဵုသွက်အဲ၊ ထဝ်သြန်မတ်ဗၠဲ ကဵုအဲဂၠိုၚ်သန်၊ ပုၚ်သွကွာၚ်ဆာဲ အမာဲယိုဟ်က္ၜန်၊ ကဖျုန်ဗြာတ်က္ၜဴ သတ်ဗြဴပညောန်၊ ဇၟာပ်စၞပၠန် တ္ၜန်တ္ၜောဲဗစ၊ မွဲတ္ၚဲပိဝါ ဟွံခၠန်ကာလ၊ ရိုဟ်ဟ်တ္ၚဲရ စဟာပ်ဟွံမာန်။   ။

ဂလာန်လဖှ် ဂၠာဲပှ်ဂၠဟ်သၟာန်၊ ဟီုဇီုရိုဟ်ထာန် သၟာန်သၟုက်ဝေၚ်ဂြိုၚ်၊ မံၚ်ဂပ်လံကီု သီုညးဂမၠိုၚ်၊ မိပ်စိုတ်ဝေၚ်ဂြိုၚ် ကျိုၚ်ကျဝ်စတဴ၊ ကလေၚ်စဴပ္ညုၚ် စှ်ေက္ဍိုက်ဂၠုၚ်အဲ၊ ကြဳဇှ်ကလော် မဇၞော်နုဘဴ၊ ဂၠုၚ်ဒိုပ်သွိၚ် ဟွံသဍိၚ်တဴ၊ ညံၚ်ပဝန်ကံ ဒြိပ်ဂမြံစဴ၊ ကြဳဇှ်ဒေဝတဴ ရဴပရှ်ကျာ၊ တုဲဂွံကၠုၚ်ဟေၚ် စိုပ်သ္ၚိသေၚ်ဟာ၊ မိသၟိၚ်ဓဝ်ကၠာ ဗြဴမှာအသဝ်၊ ဟီုထ္ၜးကဵုရော ကလောဆတ္တဝ်၊ ကလောသၟိၚ်ဓဝ် မိၚ်အံသဝ်တဴ၊ မိပ်စိုတ်မပူမှ် လ္ၚတ်က္တဵုစဴ၊ ကလော်ဂမၠိုၚ် ဟီုထိုၚ်သးတဴ၊ နာဲဒကောၚ်ပိုန် ဒတိုန်ကြက်လှဴ၊ ကလောပိုဲဂှ် ဒှ်ဝေဝတဴ။ ။

ယွံနာဲသၟိၚ်ဓဝ် အသဝ်နုဘဴ၊ ပါရမဳသ္တိုတ် ဟိုတ်ကြံၚ်ဍုဟ်တဴ၊ ဂွံဒှ်သၟိၚ်ဆာဲ နာဲဒေဝတဴ၊ ဒေါဝ်ဗွဝ်ပိုန် ဒတိုန်ကြက်လှဴ၊ ဂွံစသိုၚ်တဴ နုဘဴပြာကတ်၊ ကလောဂမၠိုၚ် ထိုၚ်သးဂမ်အတ်၊ နာဲဒကောၚ်ပိုန် ရုပ်က္ၜိုန်ကၞတ်၊ ဂွံဒှ်သၟိၚ်ဓဝ် အံသဝ်ပြာကတ်၊ ဒေါဝ်ဗွဝ်ရတ် ကၞောတ်ဘောဂါ၊ ဂွံစသိုၚ်ဟေၚ် တသိုက်သေၚ်ဟာ။ ။

သမ္တီမၞးတံ တၟံညးလိုက်ဗာ၊ ဟိုတ်ဒါန်တၞံဟေၚ် ဟီုလဝ်သေၚ်ဟာ၊ ဂွံဒှ်သၟိၚ်ဓဝ် အံသဝ်ပြာထာ၊ ကမၠောန်သ္အဳဂၠက် မသက္ကုခြာ၊ ဍိက်တြုံဍိက်ဗြဴ တ္ၜန်တ္ၜောဲတဴကၠာ၊ ဂကောံဗြဴပန် ရုပ္ပကညာ၊ သၟဟ်န်မွဲဟာန် ရေၚ်ကာန်ညဳသာ၊ ညံၚ်အိန်နာဲမြု ကဵုသုဇာတာ၊ သုဓမ္မာကီု သီုသုန္ဒာ၊ သုစိတ္တပၠန် သီုပန်ပြကာ၊ ရေၚ်ကာန်သာဓာ ညဳသာသၟဟ်န်၊ သီုဂၞကျာ်ပန် ဂွံညန်မွဲဒၞဳ၊ ညံၚ်သာ်ဂှ်ကၠာ ဥပ္ပမာပ္ညဳ၊ ဒေါဝ်ဂၠံကျာ်သြဳ ဒေါဝ်ဗနဳကွိုန်၊ ကောန်ညးဒၚ်မာဲ နာဲဒကောၚ်ပိုန်၊ ဒါန်တၞံဆတ္တဝ် ဟိုတ်ပ္တုဲလဝ်ဗိုန်၊ ဗြဴပန်ညံၚ်ထဝ် ဂွံဒ္ၚောဝ်လၟိုန်၊ ဂွံဒှ်သၟိၚ်ဓဝ် ဒေါဝ်ကသဝ်ပိုန်၊ ကုသဵုတၞံဗိုန် ဇိုန်ကဵုသေၚ်ဟာ။ ။

တီတုဲမၞးတံ လ္ပသ္ပံသာ၊ ဂကောံမိတ်ဆာန် ဒါန်တၞံတမၠာ၊ ဟွံဒးသာဲအာ ဟွံဒးခြာသ္ၚောဲ၊ ကုသဵုဒါန်ရ ဂွံပနိဿဲ၊ ဒါန်ဒှ်ဒစုန် ဂွံဒုန်သလဲ၊ ဒါန်ဂှ်တုပ်နဲ ကောၝဲဂးမာ၊ ဒါန်ဂှ်သ္ၚဳရံၚ် ဒါန်ဂှ်ဍံၚ်သွာ၊ ဒဒိုခ်မွဲဂှ် ယာံက္တဵုဒှ်ကၠာ၊ ဒါန်ဂွံဆေတာ ဒၞါကဵုပယတ်၊ ဒါန်ဂွံဇိုန်ကဵု အိန်သွဵုဒြပ်ရတ်၊ နူပြိုတ်နရက် ဗၠးသက္ကုသၟတ်၊ ဒါန်ဂွံဗလး ဒါန်ပျးမုက်မတ်၊ ဒါန်တရံၚ်ပ္ညဳ ပါရမဳသၟတ်၊ ပိုန်ရုပ်ပညာ ကြဳဇှ်ပြာကတ်၊ ဂကောံမိဆာန် ပိုန်ဟာန်ဒြပ်ရတ်၊ ဒါန်ဇိုန်ကဵုဇၟံ အိုတ်တၟံသတ်၊ ကြဳဇှ်ဒါန်သၟတ် ပယတ်သိုက်လှိၚ်။ ။

သေဋ္ဌဳသမ္ၚေဟ် သ္ဂေဟ်သွဟ်ဒှ်သၟိၚ်၊ ဒါန်ပၚ်ပ္တိုန်အဵု ဇိုန်ကဵုအနိၚ်၊ ဒါန်ဇိုန်ကဵုကၠာ သွဝ်တာဝတိံ၊ ပြာသတ်ထဝ်တတ် ဒေန်ရတ်ဇမၠိၚ်၊ ဒေန်ထဝ်ဒၟံၚ်ဗ္ဂါ သၞာထဝ်ဗျိၚ်၊ ကဝ်လဗပြိုက် သတ်သဘိုက်တွိၚ်၊ ၜှ်ကေတ်ဟွံအိုတ် ဟွံတသိုက်သြိၚ်၊ ပုၚ်ဒိပ်ဍာ်ဒိပ် မိပ်ဟွံဒးဂွိၚ်၊ ယာတ်ဒိပ်ဖေၚ်ထဝ် ကျိုၚ်ကျဝ်လဗိၚ်၊ ဂကောဴမိတ်ဆာန် မဂွံဒျာန်က္ၜိၚ်၊ ဟိုတ်ဒါန်ပ္တုဲလဝ် သွဝ်တာဝတိၚ်၊ ချိုတ်ဟွံဒးဂွိၚ် သိုက်လှိၚ်တဴတုန်။ ။

ဂလာန်နိဂိုမ်

သတ်ပ္ဍဲလိုက်ဂှ် တိုၚ်ထဝှ်ဂုဏ်၊ ပသာ်ဒဒှ် ပိုဲဟီုတွံပ္ဍုန်၊ ဒးဂေတ်ဂၚေၚ်တုန် တိုၚ်ဂုဏ်သံသာ၊ လံစိုပ်နိဗ္ဗာန် ထာန်ကျာ်တမၠာ၊ ဟိုတ်နူအာရီု စိုန်သ္ကီုတဏှာ၊ ၜိုန်စဳကၠးသန် နွံကဵုပညာ၊ သ္ဍိုဟ်သ္ကေတ်ထတ်မြက် စဳကၠးမြက်စာ၊ ဟိုတ်မဒးလုပ် အကုပ်တဏှာ၊ ရုန်ဒဴဟွံဗၠး နူပးသံသာ၊ ဂရှ်တံဂှ် လဝ်ကဵုဒှ်ကၠာ၊ သၠောံသ္ၚာပ္ညဳ ခမဳပ္ဍဲဘာ၊ ပကၚ်ရၚ်သမတ် ပိဋကတ်မြာ၊ လအေၚ်ခန္တဳ သဳလပြဲဖါ၊ ဒေပ်စိုတ်ဗိုန်ကၠာ ပညာၜိုန်ချပ်၊ ရုပ်ဂေါဝ်ဒးဂၞၚ် ပ္ဍဲမတ်စပ်အာ။ ။

ယာံညာတ်ရုပ်ဗက် ဒွက်ပးသံသာ၊ အာရီုလိုက်လဴ စိုတ်စပ်တဴကၠာ၊ ရုပ်လှေံလှန်မတ် စိုတ်လယတ်အာ၊ ပညာၜိုန်ထတ် ဆေကြတ်ဓနာ၊ ဆေတာကွေံကြာန် ဟွံမာန်တုဲမာ၊ ဒးလသာလဝ် ဓဝ်သာသၞာ၊ ဒဒှ်ဟိန်ဗိန် သ္ၚိကၟိန်သေၚ်ဟာ၊ အိုတ်ဇၟာပ်ဘူဝတ် သတ်ပ္ဍဲသံသာ၊ ၜိုန်တိရစ္ဆာန် ဒဴဗၠးမာန်ဟာ၊ ဆဂှ်ဟွံသေၚ် တၟေၚ်ဥပ္ပမာ၊ သိက္ခာမုနိ ဣသိတမၠာ၊ ဒၟံၚ်ဂြိုပ်ပၠ ဟေမဝန်ဏာ၊ ရပ်ခန္တဳဗိုန် သွိုန်ဘာဝနာ၊ နစိုတ်ဗိုန်ဇၟံ ဟွံသပံသာ၊ ပ္ကၚ်ရၚ်လဝ်ကၠာ ဇၟာပ်သမာပတ်၊ ပ္ဍဲတိဟွံအာ ၛာန်ကာယျသၟတ်၊ လိုန်သၠဗာန်ကျာ ကလာၚ်ပြာကတ်၊ မိၚ်ရမျာၚ်ဗြဴ ရုပ်ထဝ်သ္ဍဴမတ်၊ အာရီုဗတိုက် စိုတ်ဂၠိုၚ်လျတ်၊ ၛာန်သရိုဟ်ကွေံ ဒတုံစှ်ေသၟတ်၊ ဣသိတံဂှ် ဒယှ်ပြာကတ်၊ ၜိုန်သဳလသ္ကီု ဒးလီုပယတ်၊ အိုတ်တၟံသတ် ပ္ဍဲသၟတ်သံသာ။ ။

ယာံရုပ်ဒွံဒး ပးစက္ခုဒွါ၊ အာရီုဓဇပ် သရပ်စိတ္တာ၊ ညံၚ်လွပ်ကလော် မဇၞော်အညာ၊ ထၞီမှဲတ္ၜိၚ် စိုတ်ဝိဝိၚ်အာ၊ ညံၚ်သၟိၚ်ဂိတ နာဲမြုထာၚ်သွာ၊ ကျိုၚ်ကျဝ်ဒးရး ကွာ်ဒးစးကျာ၊ ဒွံစုတ်မတ်ၜါ စိတ္တာစိုတ်နု၊ ညံၚ်ဍောၚ်ထာၚ်ကိုန် လျးဍိုန်လသု၊ မလုပ်သမၞိၚ် တဲသၟိၚ်ရာဟု၊ သၟိၚ်လျးကၟု ဇကုဓဇပ်၊ တေံသၟိၚ်တ္ၚဲကၠာ ရာဟုမရပ်၊ လေၚ်ဟွံလေပ်ဗၠး နူမဂးစပ်၊ ရာဟုစိုတ်ကီု ရုပ္ပရီုသၟပ်၊ ရုပ်သၞေဟ်ဒးဂၞပ် ယာံစပ်ဒးစိုတ်၊ သှ်ကွေံဟွံဗၠး ပးသုဘာသိုတ်၊ လောံလာဲတ္ၜးဘိုၚ် ဒဝိုၚ်လျးပၠိုတ်၊ ရုပ်ဒွံဒးမတ် မတ်ကသဳစိုတ်၊ ဂုဏ်မတ်ဒှ်ဟိုတ် စိုတ်တူသဏာန်၊ ပဳတိလဴဗ္ဂံၚ် စံၚ်ဗ္ဂဵုဝိညာန်၊ ညံၚ်ပၟတ်ကဝ် ဇၞော်မောဝ်လောန်လာန်၊ ဂၠံဟဒယ ဒုက္ခဝိညာဏ်၊ ပၟတ်ရာဂ စံပၠသန္ထာန်၊ ယက်ဗဂုဲသ္ဍိုက် တူဂၠိုက်သဏာ၊ နူဒွက်သံၚ်သာ ရုန်အာဟွံမာန်၊ ဒှ်သ္ဍိုက်ပၠန် တဏှာကွေံကြာန်၊ ဟွံဂွံစဴထာန် နိဗ္ဗာန်သေၚ်ဟာ။ ။

ဟိုတ်ဂှ်မၞးတံ တၟံလိုက်ဗာ၊ လံစိုပ်နိဗ္ဗာန် ထာန်ကျာ်တမၠာ၊ သမဇူဒၟံၚ် ပ္ဍဲခြိုၚ်သံသာ၊ ဒါန်ဂှ်ဒှ်ဗၞတ် မှတ်သလဲကၠာ၊ ရိုဟ်ဟ်တ္ၚဲသၟတ် ဒါန်မှတ်ပ္တုဲအာ၊ ရုပ်ကျာ်စေတဳ မှတ်လွဳပရာ၊ ဒဒန်ဇၞောဝ်က္ဍိုၚ် ကမၠိုၚ်ဍာ်ကၟာ၊ ရုၚ်ဒါန်ထၜုတ် ဇြပ်ကျာ်ဘုတ်ဘာ၊ ပုၚ်ဝတ်ရိုဟ်တ္ၚဲ ဒါန်ဍာ်ပြဲဖါ၊ ဂၞိၚ်-ကၞိၚ်ဟေၚ် ဗဗေၚ်သ္ၚာ၊ ဒါန်ကွာၚ်ယာဂု သတ်ဆုနာနာ၊ ဒါန်သတ္တာဖျာ် ဍာ်ယာမကၠာ၊ ဒါန်တောံသွဖျန် ဇဟန်သကာ၊ ဒါန်ဇဗၠုသတ် ဒါန်ဝတ်နာနာ၊ အိုတ်ဇၟာပ်ဒါန်ကၠာ ခါဂွံနိဿဲ။ ။

ဒါန်ဂှ်ဒစုန် ဒါန်ဒုန်သလဲ၊ ဒါန်ဂှ်ရောၚ်ပြဲ ညံၚ်တ္ၚဲမယး၊ ဒါန်ဂှ်သ္ၚဳရံၚ် ဒါန်ဂှ်ဍံၚ်ပျး၊ ဒဒိုက်ဇၞော်ကၠး ယာံဒးဒှ်ကၠာ၊ ဒါန်ဂွံဆေတာ ဒနာဂပဝ်၊ ဒါန်ရောၚ်ဇိုန်ကဵု အိန်သွဵုဍုၚ်သွဝ်၊ နူအပါဲကၠာ ဂွံဗၠးအာဓဝ်၊ ဒါန်မိန်ဂပဝ် ဆေဒဝ်အဆတ်၊ ဂုဏ်ဒါန်ဂွံဗၠး ဒါန်ပျးကဵုမတ်၊ ဒါန်တရံၚ်ပ္ညဳ ပါရမဳသၟတ်၊ ပိုန်ရုပ်ကညာ ကြဳဇှ်ပြာကတ်၊ ဒါန်ရောၚ်ဗိုန်ဇၟံ အိုတ်တၟံသတ်၊ ကြဳဇှ်ဒါန်ဒှ် ဒယှ်တှ်ကၞောတ်၊ ၜိုန်ကျာ်နာဲညး ကဵုဇၞးမာတ်သၟတ်၊ သက်သဳပဒး ဂွံဇၞးအဆတ်၊ ကြဳဇှ်ဒါန်ကၠာ မာဖေက်အာသၟတ်၊ ကျာ်ဇၞးမာသွံ ဂွံပပြာကတ်၊ ဒါန်ဇိုန်ကဵုပိုန် စိုန်သ္ကီုဒြပ်ရတ်၊ ကြဳဇှ်ဒါန်သၟတ် ပယတ်ဂွံလှိၚ်၊ သေဋ္ဌဳသမ္ၚေဟ် သ္ဂေဟ်သွဟ်ဒှ်သၟိၚ်၊ ဒါန်ဇိုန်ကဵုကၠာ သွဝ်တာဝတိၚ်၊ တူဖုန်ဝုန်ဏၚ် တူဒေန်ဂြၚ်စိၚ်၊ ဒါန်ရောၚ်ပၚ်ပ္တိုန် ဇိုန််ကဵုပသၟိၚ်၊ မိတ်မပြဲသွံ ဂွံဒ္ၚောဝ်သိုက်လှိၚ်။ ။

နာဲဒကောၚ်ပိုန် တြုံဒတိုန်သွိၚ်၊ ဂကောံဗြဴပန် ဝုတ်ကညာဂၞိၚ်၊ ရုပ်ညံၚ်ထဝ်ဂၠး ဇၟာပ်ညးတုပ်သြိၚ်၊ မဂွံသၟဟ်န် ဂွံညန်ဖလှိၚ်၊ ဒါန်ဏာဗစိုပ် ဒေါဝ်ဂြိုပ်ဇမၠိၚ်၊ ဒါန်သ္ဂန်ကံတဲ ဂြဲဏာအခိၚ်၊ ဂကောံမိသ္ဍိုက် ဂွံညန်သိုက်လှိၚ်၊ နာဲဒကောၚ်ပိုန် ဂွံတိုန်ဒှ်သၟိၚ်၊ ဒေါဝ်ဂြိုပ်ဇမၠိၚ် ဒှ်သၟိၚ်ဒေဝတဴ။ ။

သၟိၚ်ဓဝ်သာဲလေဲ သေဲသေဲဟီုတဴ၊ စဵုကဵုလၟုဟ်ဂှ် ဒယှ်ကမြဴ၊ ဇၟာပ်ဇန်တြုံဗြဴ မိပ်စိုတ်တဴကၠာ၊ ဒါန်ဇိုန်ကဵုဟေၚ် ရောၚ်ဟွံသေၚ်ဟာ၊ ဟိုတ်ဂှ်မၞးတံ တၟံလိုက်ဗာ၊ ဒါန်ရောၚ်ဒှ်ကြက် မသက္ကုခြာ၊ ဒါန်သၟတ်ပ္တုဲအာ ဂွံမြာသွာရောၚ်။ ။

(ကျာ်ဇၞော်ကုသလ-ဘာကျာ်သြဳမည်-ပါဠိတက္ကသိုလ် ဍုၚ်လ္ဂုၚ်)

သွက်ဖါပ်ပူဇဴ သၟိၚ်မဒကောၚ်ပိုန်

(၁) ပၞာၚ် ဍာ်မြမောဝ်- ပ္ကဴသဴ၊ ဇဗၠု-သတ်-ကလေၚ်၊ သဂြာ၊ သတ်ဗြာတ်၊ သတ်ဗြဴ၊ ကွာၚ်က္ၜဲ၊ လက်ဖက်၊ မပ္တံသတ်ဆု-သတ်ဒုန် ဗွဲမ္ဒးရးတံဂှ် ကြဴကြာတ်မသ္အးဇ္ၚးတုဲ၊ (ပိပ္ၚာန်) ဝါ- ပိပေါဲ၊ ပဳခဝ်၊ ပေၚ်သွက်သၟိၚ်မဒကောၚ်ပိုန်၊ ဒေသကၠောန်ကေၚ်ကာဂှ်- ပၟၚ်ဍုၚ်၊ ပၟၚ်ကွာန်၊ ပၟၚ်က္ၜဳ၊ မစပ်ကဵုဒေသပၟၚ်မွဲမွဲမၞုံမ္ဂး- မွဲမွဲ-(ပ္ၚာန်) ဒးကဵုရောၚ်။ ။

သွက်ဂွံစွံသတိ။ (၂) ပ္ဍဲအခိၚ်မကၠောန်ကေၚ်ကာဂှ် မပ္တံအဟာရဟွံသ္အးဇၚး၊ မစပ်ကဵုအဟာရသတ်လမျီုတံဂှ်ကီု ၜဵုကီု သ္ပသတိတုဲ ဝေၚ်အိုတ်ညိ။ ။

အခိၚ်။ (၃) နူကဵုဂိတုဒ္ဂိုန်ပေၚ် စဵုကဵုစိုပ်ဝှ်ပေၚ်တေံ- ပွိုၚ် {၄} ဂိတုတံဂှ် အခိၚ် (ဝိကာလ) လောန်အာတုဲ သွက်သ္ဂောံဖါပ်ပူဇဴတံဂှ် ဝေၚ်အိုတ်ညိ။ ။

နိဿဲ

နူလိက်အုပ်မၞုံယၟု မဒကောၚ်ပိုန် (ကျာ်ဇၞော်ကုသလ-ဘာကျာ်သြဳမည်-ပါဠိတက္ကသိုလ် ဍုၚ်လ္ဂုၚ်) လိက်ဗွဟ် မဒကောၚ်ပိုန်