လိက်မန်ပိုဲညးတံချူစအောန်ကွေံ
လိက်ညးတၞဟ်ညးတံတ္ၚအ်ချူတုဲ လိက်မန်ပိုဲညးတံချူစအောန်ကွေံရ'
လိက်မန်ဟွံမိက်ချူတှ်ေ လအ်အာက္ဍၚ်ဟွံဂံၚ်ချူကဵုညးတၞဟ်ဗဵုဗှ်အာဏောၚ်၊ ယဝ်ချူသီုဘာသာမန်မ္ဂးတှ်ေဒှ်ထံက်ပၚ်သွက်ညးလေပ်လဝ်လိက်မန်တံသၟးတုဲ ဒှ်ဒ္တုဲဖဵုသွက်ညးတံဗွဲမလောန်ရ၊ ယဝ်ရဒးချူလိက်ညးတၞဟ်သၟးဂှ်လေဝ် ရံၚ်ကဵုဟိုတ်ဖဵုပရေၚ်ပရောမွဲမွဲဂှ်တုဲချူထေက်မံၚ်ရလိက်ညးတၞဟ်၊ မုချူချူဒးချူမံၚ်လိက်ညးတၞဟ်သၟးဂၠိုၚ်ဂှ်လေဝ် ညံၚ်ကဵုမိပ်အာကဵုလိက်ဍေံတုဲ ဟွံလအ်သတိပ္ဍဲပူဂဵုဂှ်လီုကၠုၚ်တုဲ ဟွံမိက်ချူစလိက်မန်ဇကုအိုတ်ရ၊ သွက်ညးချူလိက်မန်ဟွံလေပ်ဂှ်ဟွံဆဵုဒုဟ်တုဲ သွက်ညးလုပ်လဝ်လိက်မန်ကေၚ်ချူလဝ်လိက်မန်တံဂှ်ဟေၚ်ရမုညးတံဒှ်အာအိုတ်ရော။
စေတနာကမၠောန်ဇကုဒှ်ဖဵုခိုဟ်သွက်ဂကူသွက်ညးလောကတုဲ သီုကဵုမလိက်မန်ပိုဲဂွံချူဂွံဗှ်ဂွံကၠိုဟ်အာညးသ္ကံကီုဂှ် ဒှ်နဲကဲသၠုၚ်ပ္တိုန်ၚုဟ်မးလိက်ပတ်ဂကူဇကုမွဲကဏ္ဏဍောတ်ဍောတ်ကီုရတုဲလ္ပဂါံထၜက်ထောံညိအဴ၊ မုညးတံကၠောန်မုညးတံသ္ဂးမံၚ်လၟေၚ်လၟေၚ်တ္ၚဲဏံဂှ်လေဝ် မၞိဟ်လ္ၚဵုတံမိက်သ္ဂောံတီမိက်သ္ဂောံကၠိုဟ်နကဵုဘာသာမန်တံဂှ်လေဝ်နွံတဴဗဝ်သအဝ်ဂှ်လ္ပဝိုတ်ညိ၊ လိက်ညးတၞဟ်ချူဂှ်ဟွံဗၠေတ်ပုဟ်တုဲ ယဝ်ထပ်ချူလိက်ဘာသာဂကူမန်ဇကုမွဲဘာသာပၠန်တှ်ေ ဣဏံရၚုဟ်မးလိက်ပတ်ပိုဲနွံကၠုၚ်ရတုဲ သွက်ညးလေပ်လဝ်လိက်မန်တံသၟးဂှ်လေဝ် ဒှ်ကၠုၚ်ဗဟုသုတမာန်ရ။
ဇကုဂကူမန်ရတှ်ေ ဒးချူလိက်မန်ဇကုဂှ်ဒးဂွကဵုညးလဵုနွံရော၊ ထေက်ကဵုဒးပေၚ်စိုတ်မိပ်စိုတ်တုဲ ဒးဂစာန်ချူဇၟာပ်စက္ကမိဏေတ်နာဍဳဟေၚ်ရ၊ သာ်ဂှ်ဟွံသေၚ်တှ်ေ ဖေက်ညးတၞဟ်တီကၠးဇကုဂှ်ဒှ်ဂကူမန်တုဲဟွံဂံၚ်ချူစလိက်မန်ကွေံကွေံဟာဂှ် ဟိုတ်ဖဵုညးတအ်တီကေတ်ဟွံမာန်ရ၊ ယဝ်ရစိုတ်အဲပူဂဵုညးချူလိက်ဏံတှ်ေ အရာလဵုဒှ်ဗဟုသုတကဵုမန် ဆေၚ်စပ်မံၚ်ကဵုဘဝကောန်ဂကူမန်ဏောၚ်တှ်ေ မလိက်မန်ဒးချူပၞောန်ကၠာအိုတ်ဗွဲလ္တူတေံဟေၚ်ရ။
ဟီုအရေဝ်ညးတၞဟ်တုဲကအ်ကၠေၚ်ဒိုအ်ဟွံဂွံဒးဆက်ဟီုအာ၊ ချူလိက်ညးတၞဟ်တုဲဆီတူဒိုအ်ဟွံဂွံဒးဆက်ချူအာဂှ်လေဝ်လ္ပကဵုဒှ်ညိ၊ ယဝ်ဟွံဒိုအ်ဆက်ဟီုဆက်ချူအာဂၠိုၚ်ဂၠိုၚ်ဏောၚ်တှ်ေ စိုတ်ထိုၚ်သးလ္တူလိက်အရေဝ်ညးတၞဟ်ဂၠိုၚ်ကၠုၚ်တုဲ ဟွံလအ်ဇကုဂကူမန်ရဂှ်ဟွံမိက်ကဵုညးတၞဟ်တီကေတ်ဒှ်မာန်ရ။
သုၚ်စောဲမလိက်မန် တက်ကျာရမျှာၚ်ဝေါဟာမန်ဇကုတှ်ေ တီကၠိုဟ်ကၠးအး သောၚ်တပ်ဓဝ်အိုတ်သက်ဟီုဟွံမွယ်စှ်ေကေတ်စိုတ်သာ်ဏံကီုရမိက်သ္ဂး ။ ( လ္ပဝိုတ်ဒုၚ်သာဓုညိ)
(ဒးတှ်ေဆက်ဗဂဵုလဟဵု − ညာတ်ဗၠေတ်တှ်ေသၠးအခေါၚ် ) ။
ကောန်ဍေၚ်လုပ်သၞောဝ်ဂၠးတိ Unicode ဂှ်သုၚ်စောဲစကာအိုတ်ညိအဴ။