သဒ္ဒါအေၚ်္ဂလိက်၊လိက်အုပ်

သဒ္ဒါအေၚ်္ဂလိက်

ဝၚ်လိက်အုပ်ဗွဲခ္ဍန်

လိက်အုပ် သဒ္ဒါအေၚ်္ဂလိက် ဝွံ နာဲသက်လောန် ချူပကောံလဝ်တုဲ ညးတၠဒါန်လိခ်အုပ် ဂကောံတဵုတၞံဆု ဘာမန်ရာမညနိကာယ ဍုၚ်ဝှတ်ဝုၚ်၊ကၟိန်ဍုၚ်အမေရိကာန် တက်တြးပတိတ်လဝ် ပ္ဍဲစၟတ်တ္ၚဲ ၀၉ သေတ်တေန်ဗာ သၞာံ ၂၀၂၂ ရ။ လိက်အုပ်ဝွံဂှ် ညးချူလိက် (နာဲသက်လောန်) ကေုာံ ဂြေဝ်ဂတာညးတအ် ပိုၚ်ပြဳ ဒှ်တဴတၠမူရ။ လိက်အုပ်ဝွံဂှ် အလန်ပထမ လၟိုဟ် ၅၀၀ အုပ်ဂှ် တက်တြးပ္တိတ် ပ္ဍဲစၟတ်တ္ၚဲ သၞာံ ၂၀၂၂ ဂိတု သြဂုတ် ဂှ်ရ။ ၚ္ၚုဟ်မး လိက်အုပ်ဝွံဂှ် သြန်ဗမာ ၃၅၀၀၀ ဒကေဝ် မဒှ်ရ။

ဒက်ပ္တန်လိက်အုပ်

လိက်အုပ် "သဒ္ဒါအေၚ်္ဂလိက်" မန်ဝွံ နကဵု ကဏ္ဍ(အခန်) ၂၀ ပါလုပ်ရ။ နူ ၁ စဵုကဵု ၆၈၂ မုက်ပါလုပ်ရ။ လိက်အုပ်ဝွံ ဗွဲဘာသာမန် ဗမာ အေၚ်္ဂလိက် (၃) ဘာသာ ပါလုပ်ရ။ လက္ကရဴနူ အခန် (၂၀) တအ်မ္ဂး ကဏ္ဍသွဟ် ကေုာံ စရၚ်နိဿဲတအ်ပါလုပ်ရ။

ကဆံၚ်ညးကတ်လ္ၚတ်ထေက်

လိက်အုပ်ဝွံ နူကဵုကဆံၚ်် ညးစကတ်လ္ၚတ် ဘာသာ အေၚ်္ဂလိက်မ္ဂး စဵုကဵု ကဆံၚ်တန်တက္ကသဵု ကတ်လ္ၚတ်မာန်ရ။ ရံၚ်ကဵု ဂလာန််ဂတာပ်လိက်မ္ဂး " သဒ္ဒါအေၚ်္ဂလိက် ၊ နာဲသက်လောန် ကလးလဝ် နဘာသာမန်ကေုာံဗၟာ သွက်အဆံၚ်တန်သၠုၚ် ကေုာံ တက္ကသဵု" တုဲ ညးစပ္တမ်ကတ်လ္ၚတ်သၟးဟွံက ညးမစိုပ်မံၚ် ကဆံၚ်ပညာသၠုၚ် မပ္တံ တန်ကဝ်လိက် တက္ကသဵုလေဝ် ကတ်လ္ၚတ်မာန်ရ။ ပ္ဍဲလိက်အုပ်ဝွံဂှ် ကဏ္ဍ (အခန်) ၂၀ မှ ပါလုပ်တုဲ ဟိုတ်နူ သောၚ်ကလးလဝ် သဒ္ဒါအေၚ်္ဂလိက်တအ် ဗွဲသောဲသောဲဗၠောဲဗၠောဲရ။

ဂလာန်နူညးမခၞံလိက် (ကံက်နုက်)

"ပြကိုဟ်သဒ္ဒါအေၚ်္ဂလိက်ဝွံ မကလးလဝ်နဘာသာမန်ဂှ် အဲ(ညးခၞံလိက်) တက်တရးပ္တိတ်ကၠုၚ်လဝ် ပ္ဍဲသၞာံခရေတ် (၂၀၁၃) တေံတုဲ လၟုဟ်ပ္ဍဲမတက်တရးပ္တိတ်ပၠန်ဂှ် တၚ်သောၚ်ကလး ဂမၠိုၚ်ကီု သီုတၚ်မကၠာဲစၠောအ်လဝ် အဓိပ္ပါယ်ဂမၠိုၚ် ဗွဲဘာသာမန်ဂှ်လေဝ် အဲဂွံကလေၚ်စၟတ်ဒါန်ပ္ညဳပ္ညပ်ပလေဝ်ပလေတ်လဝ်တုဲ လိက်ဝွံ ဍေံခိုဟ်ဂၠိုၚ်တိုန်ရောၚ် အဲပ္တေဟ်စှ်ေစိုတ်ရ။ ပ္ဍဲမထပ်တက်တရးပတိတ် ပြကိုဟ်သဒ္ဒါအေၚ်္ဂလိက်ဝွံ အလန်ဏအ်ဂှ် သွက်ကောန်မန်ပိုဲဂမၠိုၚ် ညးမဟွံဆိုက်ဗ္ဒက်ခံက်တဴ ပ္ဍဲလိက်ပတ်ဘာသာမန်တုဲ မလေပ်ဆိုက်ဗ္ဒက်ခံၚ်တဴ ဆဘာသာဗၟာတအ်ဂှ်လေဝ် တၞဟ်နဂွံဒှ်အထံက်အပၚ်မာန်ကီု ရန်တၟအ်သာ်ဏအ်တုဲ အဲထပ်ဗပေၚ်စုတ်လဝ် သီုဘာသာဗၟာမွဲပၠန်ရ။ ဟိုတ်ဂှ်ရ ပြကိုဟ်သဒ္ဒါအေၚ်္ဂလိက်ဝွံဂှ် သောၚ်ကလးလဝ် နကဵုၜါဘာသာ သီုမန်သီုဗၟာမဒှ်ရ။ ကောန်မန်ပိုဲဂမၠိုၚ် ညးမလေပ်ခံၚ်တဴ သီုမန်သီုဗၟာ သီုၜါဘာသာတအ်ဂှ် ဂွံပ္တောအ်ၜတ်ကတ်လ္ၚတ်အာ သီုၜါဘာသာမာန်ရောၚ်တုဲ ခိုဟ်လတူခိုဟ် ခိုၚ်ဂၠိုၚ်က္ဍၚ်ဟေၚ်ရ" (နာဲသက်လောန်) ။