သမလ၊သၟိၚ်
ပရောပရောသၟိၚ်သမလဗွဲခ္ဍန်
ပ္ဍဲဗုဒ္ဓသာသနာ အာစိုပ်(၁၁၁၆)သၞာံ ဂိတုမာ်မွဲစွေက် တ္ၚဲစန်ဂှ် ကောန်သၟိၚ်သမလနကဵုအရီုဗၚ်သၟိၚ်အိန် ဂွံပ္ကၚ်ရၚ်ပိုၚ်ပြဲလဝ် ကၟိန်ဍုၚ်ဟံသာဝတဳရ ဍုၚ်ဟံသာဝတဳဂှ် ပ္ဍဲခေတ်အခါလၟုဟ် ကောန်မန်တအ်ကော်ခဴစ ဍုၚ်ဗဂေါရ ဒေံသၟိၚ်သမလ မၞုံယၟုဝိမလဂှ်လေဝ် ဒှ်ဥပရာဇာ(သၟိၚ်ဗၠာဲကော်ခဴစ)ရ။
ဨကရာဇ်မန် ဍုၚ်ဟံသာဝတဳ သၟိၚ်သမလကေုာံဥပရာဇာ ဝိမလ ကောကဵုဒေံညးတအ်ညးၜါဂှ် စိုတ်လ္ဂောဝ်တပ်တး ဍိုန်ဍောတ် ပ္ကၚ်ရၚ်အုပ်ဓုပ်လဝ် ကၟိန်ဍုၚ်ဟံသာဝတဳ နကဵုဓရ်ရာဇဓမ္မ စှ်ပြကာရ ပ္ဍဲဍုၚ်ဟံသာဝတဳ ပွိုၚ်ဍုၚ်ကဝဂှ် သၟတ်ဗြဴမွဲ မၞုံကဵုရုပ်သာ်ကျာ်ဩဳကျေဝ်ဂေါဝ် ဝယအဝယ်(၁၆)သၞာံ ပဒတဴဒၟံၚ်ရ သၟတ်ဗြဴဂှ် ယၟုဍေံ မိခပဳထဝ်ရ မိခပဳထဝ်ဂှ် ဍိုက်ပေၚ်တဴကေုာံ ထၟိက်မသုန် ဂုဏ်တြဴရ။
ထၟိက်မသုန်မ္ဂးဂှ်
(၁)ပွမက္တဵုနူသတိက်ကၠာ
(၂)ပွမတိက်ကြဴ
(၃)ပွမဒုၚ်ကေတ်ကသပ်
(၄)ပွမဟီုအရေဝ်ဍာတ်
(၅)ပွမဒ္ဂေတ်ခိုဟ် ဣဝွံ ထၟိက်မသုန်ရ။
ဂုဏ်တြဴမ္ဂးဂှ်
(၁)သၠုၚ်ဒတဴ ဟွံသၠုၚ်
(၂)ဟွံသဝ်
(၃)ဇကုဇကောဝ် ဟွံကြောံ
(၄)ဟွံဇြာဲ
(၅)ဟွံဒမျိုၚ်
(၆)ဟွံဗ္တာၚ် ဣဝွံ ဂုဏ်တြဴပြကာရ။
ဨကရာဇ်မန် သၟိၚ်သမလဂှ် သ္ဂောံမိၚ်ကေတ်ပရိုၚ်သၟတ်ဗြဴ မိခပဳထဝ်တုဲ ဗလးဏာအမာတ်သေနာပတိတအ် ဗလးစကာဏာကဵု အာတ်မိမမိခပဳထဝ်တုဲ မိမၜါတုပ်စိုတ် ဒုၚ်ပ္တိုန်နၚ် သၟတ်ဗြဴမိခပဳထဝ်ရ သၟတ်ဗြဴမိခပဳထဝ်ဂှ် စိုပ်ကၠုၚ်ဝၚ်နန်တုဲ ခၞံပြသာဒ်မွဲ သီုကြိယာပသေက်ဗွဲမဒးရး ဗလိုပ်ဖုံပၠဳ ဍာ်မြမောဝ်ရ တုဲဒှ်မ္ဂးစွံပတိုန်လဝ် ဌာန်ဌာနန္တရ ကၠေဝ်မက် အဂ္ဂမဟေသဳ နဒဒှ်ဂၞကျာ်ဇၞော်ရောၚ်။
ပ္ဍဲမွဲဗ္တံ အခိၚ်ပယျာံ ဖလာၚ်ယးဂှ် ဨကရာဇ်မန် သၟိၚ်သမလ ဂွံသွဝ်လ္ပအ်မွဲရ၊ သွဝ်လ္ပအ်ညးဂှ် ပ္ဍဲဝုတ်ဒိုဟ်ဍုၚ် ဟံသာဝတဳဂှ် စေတဳထပှ်သီုကဵုက္ဍိုၚ်ဗ္တာၚ်သ္ဂောံညာတ်ကေတ်ရ ဟိုတ်ဂှ်ရ ခါတ္ၚဲတၟးဂှ်မ္ဂး သၟိၚ်သမလ စကာကဵုအာကော်အ္စာ တွံနိမိတ်ရ အ္စာတွံနိမိတ်လေဝ် စိုပ်ကၠုၚ်တုဲ သၟိၚ်နွံအသံရ။
'ယွံအ္စာတွံနိမိတ် နူဗ္တံဏအ် ပ္ဍဲအခိၚ်ဖလာၚ်ယးဂှ် အဲဂွံသွပ် လ္ပအ်မွဲရ သွပ်လ္ပအ်ဂှ် သာ်လဵုရောဟီုမ္ဂး ပ္ဍဲဇိုၚ်ဝုတ်ဒိုဟ်ဍုၚ်ဟံသာဝတဳဏအ် ေစေတဳထပှ်တၞုၚ် သီုကဵုက္ဍိုၚ်ဗ္တာၚ် သ္ဂောံညာတ်သွပ်လ္ပအ်ရ သ္ဝပ်လ္ပအ်ဝွံတၟေၚ်ဍေံသာ်လဵုရော။'
ယွံမရာဇ် သွပ်လ္ပအ်ဂှ် တၞဟ်သ္အာၚ်ဟွံသေၚ်ရ၊ ပ္ဍဲကၟိန်ဍုၚ်ဟံသာဝတဳဂွံ အာဂတနူဏအ် ဨကရာဇ်သၟိၚ်ထပှ်က္ဍိုၚ်ဗ္တာၚ်ဟေၚ် ဂွံဆက်ပ္ကၚ်ရၚ်ရ၊ သၟိၚ်တအ်ဂှ် သ္ဇုၚ်သ္ဍိုက်ယိုက်ဒိုက်ဗုဒ္ဓသာသနာတုဲ ကျာ်စေတဳ ကျာ်ပဋိမာရုပ်ကီု ဘာဇၞော် ဘာသၟတ်ကီု သိုၚ်ခၞံဗဒှ် ပ္ဍဲဌာန်ဒေသဝွံတုဲ ဗုဒ္ဓသာသနာ ညံၚ်ဂွံဂဵုလဟဵုဇၞော်မောဝ်ဂှ် သၟိၚ်တအ် ညးတအ်ရေၚ်တၠုၚ်ရောၚ် ရဴသာ်ဝွံ အ္စာတွံနိမိတ်ဂှ် သှ်ဏာကဵု ကုဨကရာဇ် သၟိၚ်သမလရ သၟိၚ်သမလဝွံ ဂွံမိၚ်ကေတ်ကာလဂှ် မိပ်မြဟ်စိုတ် က္တဵုဒှ်ပဳတိ ဗွဲမလောန်တုဲ သ္ပပူဇဴအ္စာ တွံနိမိတ်သွပ်လ္ပအ် လာပ်သကာဗွဲမဂၠိုၚ်ရ။
ဒးကာလမွဲတ္ၚဲ ဨကရာဇ်မန်သၟိၚ်သမလ မွဲဟာန်ကေုာံ မိခပဳထဝ် သီုကဵုအမာတ်ဒကိုပ်ပၞာန် ညးတၠပညာတအ် ကောံဓရီုချပ်ဂၞန်စ သွက်ဂွံယိုက်ဒိုက်ထံက်ပၚ် ရေၚ်တၠုၚ်ကိစ္စပရေၚ်သာသနာရ သၟိၚ်သမလကီု သီုကဵုအမာတ်ဒကိုပ်ပၞာန်တအ်ကီု တုပ်စိုတ်မွဲကသပ်တုဲ တၞဟ်နသ္ဂောံဒှ်ကုသိုလ် ခၞံဗ္ဒဟ်ကျာ်စေတဳ ကျာ်ပဋိမာရုပ်ရ ဟိုတ်ဂှ်ရ ဨကရာဇ်မန် သၟိၚ်သမလ ကေုာံ အဂ္ဂမဟေသဳ ဂၞကျာ်မိခပဳထဝ် သီုကဵုကောန်ဍုၚ် ကောန်ကွာန်ဂမၠိုၚ် ဒက်ခၞံစေတဳမွဲတၞုၚ် ပ္ဍဲလ္တူက္ဍိုပ်တၟအ် သုဒဿနမြၚ်သိတ တၟအ်မံက်တဴရ ဒက်ပ္တန်စေတဳအာစိုပ်ဒတုဲ တုဲ က္ဍိုၚ်ထဝ်မွဲ နကဵုရတ်ဒ္စိတ်သာ် မၞုံကဵုလျးဒ္စၚ်ဗ္ၜၚ် ပူဇဴလဝ်ရ။
ဟိုတ်နူမဒက်ပတန်လဝ်စေတဳ ပ္ဍဲလ္တူက္ဍိုပ်တၟအ် သုဒဿန မြၚ်သိတ တၟအ်မံက်တဴဂှ်ရ ကျာ်မံက်တဴ ရဴသာ်ဝွံကောန်မန်တအ် ကော်ခဴစအိုတ်ရ ပူဂဵုကောန်မန်ဟွံသေၚ်တအ်ဂှ် ညးတအ်ကော်စ ထဝ်မုဟ်တဴရောၚ် ဂွံမိၚ်ကေတ်ရ၊သၟိၚ်သမလ ဂွံပ္ကၚ်ရၚ်ကၟိန်ဍုၚ်ဟံသာဝတဳ ဗၞတ်(၁၂)သၞာံပြၚ်အာတုဲ ဂၞကျာ်မိခပဳထဝ်ဂှ် ကလိဂွံကောန်တြုံမွဲ မဍိုက်ပေၚ်ရုပ်သာ် စၠးစရာဲကျာ်ဩဳရ၊ ပေၚ်ပိဂိတုတုဲ ဨကရာဇ်မန်သၟိၚ်သမလ စုတိစဴအာသွဝ်ရ သၟိၚ်သမလ ဂွံပ္ကၚ်ရၚ် ကၟိန်ဍုၚ်ဟံသာဝတဳဗၞတ်(၁၃)သၞာံရ။
နိဿဲ။ ။ လိက်လျးဝၚ်အာဲကၟာဲမန်