သုတကဵု ဂျဵုကာ

နူ ဝဳကဳပဳဒဳယာ

မဆေၚ်စပ်ကဵုပရာဟိုတ်ပုံအဂီုသုတကဵု ဂျဵုကာ

  1. မိ ပဠေဝ်မံၚ်ပလောံယာတ် ပြိုက်စုတ်ဒၟံၚ် ပ္ဍဲထိုၚ်သၠာ ဂွံပြံၚ်ဒၞာဲ၊ အပါလေဝ် ကပှ်ဒၟံၚ်ကပေါတ်စုၚ်လေၚ် ဂဥုဲတပ်ဗျ၊ ဂဥုဲအၚ်္ဂလိက် ကၞိက်ဂၞဳသ္ကဝ်၊ ယိုက်ကပှ်စုတ်မံၚ် ပ္ဍဲကွဳစက်ရ။ “မိနာဲတံဟွံတုဲဏီပုဟ်ဟာ” ဗ္ဒာဲသ္ၚိရိပိုယ် မာံအဆာန် ကၠုၚ်သၟာန်ဂွံၜါဝါတုဲယျ။ ပ္ဍဲကဵု ဝေၚ်ပြိုၚ်မခ္ဍံကျာမ္ဂး ပိုယ်ဒးထ္ၜး ကဒ် ဍာ်မိတ် ၜါအလန်ဟီုစဂွံရ။ “ပိုယ်ဂစာန်မံၚ်ဖိုဟ် အဆာန် ၜိုတ် (၁၅)မိနေတ်ပၠန်တှ်ေ ပိုယ်တုဲရ” အပါဂှ်ကလေၚ်ဟီုတုဲ ပ္ဍဲမုက်ညးတေံဟွံပေၚ်စိုတ်မွဲသာ် စ္ဍးတိတ် အာနူဇရေၚ် သ္ၚိပိုယ်မွဲဝါပၠန်ရ။ အဲဘိုၚ်ယိုၚ်ဖျေံနၚ် ထိုၚ်ဇၞော်မိပိုယ်တုဲ စုတ်ဏာပ္ဍဲကွဳစက်။ မိဂှ် ကော်ကဝါ်ဖျေံနၚ်မိနော်တုဲ ဖျေံဒၞာဲကဵုက္ဍိုက်ပ်ကာတုဲ တိတ်အာနူဇရေၚ်သ္ၚိပိုယ်ရ။ သ္ၚိဏံဂှ်ဒှ်မံၚ်သ္ၚိမိနော်တုဲ သိုၚ်လဝ်နကဵုဆုတုဲ မံၚ်စံၚ် ကံက်ကတဴ ဒးရးဗွဲမလောန်ရ။ အခိၚ်လၟုဟ်မ္ဂးပ္ဍဲကွာန်သၞေဟ်ဗ္ဒဝ်ပိုယ်ဂှ် ဟွံသိုၚ်သ္ၚိဆု၊ သိုၚ်သ္ၚိတိုက်သၟးရဂၠိုၚ်။ မိနော်ပိုယ်ဂှ် ဂွံအယုက် (၈၅)သၞာံတုဲ ပ္ဍဲသၞာံဂှ် ပရေၚ်ထတ်ယိုက်ခိုဟ်မွဲလ္စုတ် ပရေအ်မွဲလ္စုတ်တုဲ ရဲသ္ၚိပိုယ်တံညးဂမၠိုၚ်စွံသတိဇၞော် ကဵုဇြဟတ်ရ။ မိမပိုယ်တံညးၜါ သွက်မိနော် ဂွံဒၟံၚ် ကတောဝ်ၜိုဟ်ဟ်ဂးသာ်ဂှ်တုဲ အာပလံၚ်စွံ သ္ၚိဣစဳပိုယ်မွဲလ္စုတ်ရ။ “မိနော် အာလအ်ဟာ “သုတ” ပ္ဍဲအရာပ်ဏံ အယုက်ဇၞော်အိုတ်ရဏောၚ်၊ ဒးစွံဂရု” ဗ္ဒာဲသ္ၚိပိုယ် နာဲမန်ထဝ် (ကော်) ဂျဵုကာ ဟီုပလုၚ်နၚ်နူသ္ၚိညးရ။ ပ္ဍဲအခိၚ်ဂှ်ဟေၚ် ဂွံမိၚ်ကေတ် ရမျှာၚ်ဗြု ဟိုတ်မိနော်ပိုယ် ဒးစှ်ေပြံၚ်အာနူသ္ၚိ “ယှအ် ---- ယှအ် ---- အတ်---အတ်” ရမျှာၚ် ဗြုတိုန်မွဲလစုတ်တုဲ ဒေါံအာရ။ ဍေံစမ်မံၚ်ကပေါတ်ဍေံတံ သွက်ဂွံပံက်။ “ဗီု ဍေံဖျာန်လဝ် အလံက်ရမျှာၚ် Song Box၊ ကဵု အသာၚ်ချဲ (စက်သၠဲရမျှာၚ်ကတာ်ဇၞော်) (၁၀)မဏံ ကိုပ်ကၠာနူ မ္ၚဵုထပ်တဲဏံ ဟွံတုဲ၊ မိနော် ယဝ်နွံပ္ဍဲသ္ၚိ ဒးဖျေံကမ္မဌာန်ကၠာရၝ” ဗီုအနာဲ မန်ထဝ်ဟီုလေဝ် ဒးဟီုထေက်မံၚ်ရ။ “ဂလိုၚ်လိုၚ်ဏံ ဗီုလဵုဂွံကလၚ်ရော? ရမျှာၚ်ဒွက်ပၠန်လေဝ် မုဟွံတီ၊ “ဒု ဒု အတ် အတ် တေၚ် တေၚ်” ယျဵုယျဵု၊ ရဲလှ်ေမံၚ်တံလေဝ် စုတ်လဝ်ကတောဝ်ချဵုပ္ဍဲကတောဝ်အိုတ်တုဲ လှ်ေမံၚ်၊ ကတောဝ် သၟတ်ၝတံ ဟပ် ဒးစိုတ် ကတဴကတာၚ်ညာန်ညဳဏး” ဇၟာပ်ဒၞာဲပါဒၟံၚ်တွဵု၊ ဒးဟီုတွဵုတုဲ ရဲအရာပ်တံ ခုတ်စုတ်ကဵုလဝ်ယၟု တၟိမွဲ ဂျဵုကာရ။ လကြဴညးမွဲလေဝ် ဟွံကော်ယၟုနာဲမန်ထဝ်တုဲ ဂွံဒုၚ်ကၠုၚ်ယၟု ဂျဵုကာရ။ “အနာဲဂျဵုကာတံဂှ် ဒွက်(ထွေးညို - တွံတေံသိန်းတန်)ရ ကလၚ်လေပ်တှ်ေ DJ remix တံ အလဵုဂွံကၠိုဟ်ရော” အဲကလၚ်ဟီုကညာၚ်ကဵု အနာဲဂျဵုရ။ တ္ၚဲဏံဂှ် ဒးစးဒုၚ်ဍေံညိကီု တ္ၚဲယးမှ တ္ၚဲဍေံဏး။ ဂဳတမ္ဂးဂှ် ဒှ်သွက် စိုတ်ဂွံမိပ်၊ ဂွံလှ်ေဒယှ်ေဒှ်ကီုလေဝ် အခိၚ်ကာလ ရမျှာၚ်ပံက်ထတ်ၜက်ကၠုၚ် နူသၞောတ်ဗ္ၜတ်ကလၚ်မ္ဂး ဒှ်ဟိုတ်ကဵုဒဒိုက်ကဵု ညးအရာပ်၊ ညးကွာန်တံရောၚ်။ ရမျှာၚ်တံဝွံ ပ္ဍဲကတောဝ်သၟတ်တံ ခိုဟ်သာယေန်ဗွဲမလောန်၊ ပ္ဍဲကတောဝ် မၞိဟ်ဇၞော်ဇၞော်တံဂှ် ညံၚ်ရဴရမျှာၚ် ဂဂဵုဓရိုၚ် ကတးပန်မံၚ်ရ။ ကတောဝ်သၟတ်ကဵု လထဴတံဂှ် ၜိုန်မိၚ်တုပ်မံၚ်ညးသ္ကံကီုလေဝ် ဒုၚ်စသိုၚ်ဟွံတုပ်၊ ညာတ်တုပ်မံၚ်ကီုလေဝ် ဒုၚ်စသိုၚ်ဟွံတုပ် မုဟိုတ်ရောဟီုမ္ဂး အကြာၜါဏံ နွံပၟိက်မံၚ် ဒဒန်မွဲတၞုၚ်ရ။

ဂျဵု - “ဗီုလဵုမှအဲဒုၚ်စသိုၚ်ဟွံမာန်ပုဟ် စိုပ်ကဵုဒွက်သၟတ် ၝတံပံက်လဝ်ဏံ” နူသ္ၚိညးတေံစှ်ေကၠုၚ်တုဲ ကၠုၚ်ဟီုပ္ဍဲသ္ၚိပိုယ်ရ။

“ကတောဝ် အယုက် (၄၅) ဗီုလဵုဂွံကိတ်ညဳ ကတောဝ် အယုက် (၁၈)တံရော?” အဲကလေၚ်ဟီုကဵု နာဲဂျဵုကာ ရ။

ညးဂှ် ဒှ်မံၚ် အနာဲပိုယ်အရၚ်ကီုတုဲ တက်ကျာကဵုအဲမ္ဂး ဒှ်မံၚ်ညံၚ်ရဴ ရဲ၊ အခိၚ်ကာလ ကၠောန်ကမၠောန်ဂကောံပၠန်လေဝ် ပံၚ်တောဲကၠောန် မံၚ်ညးသ္ကံမွဲစွံလၟိုန်တုဲ တက်ကျာလေဝ် ဗၠးၜး၊ အရေဝ်ဒးဟီုလေဝ် ဟီုဟွံဒးညှာညးသ္ကံရ။ ညးဂှ် ဒှ်ညးမကတ်လ္ၚတ်မွဲတုဲ နူကဵုရာံတိတ်နူ လကျာ် အံၚ်လဝ်တန်ဒေါဝ်တုဲ ကၠောန်ချဳဒရာၚ်မံၚ် ပရေၚ်ဂကောံ၊ ပရဟိတ နာနာ ဂကောံပ္ဍဲကွာန်ၜိုတ်နွံ ညးကြပ်ပါမံၚ် ဖအိုတ်ရ။

ဒှ်ညးမတီတာလျိုၚ်မွဲတုဲ တာလျိုၚ်ညးဂၠိုၚ်ကွေံကွေံ သွက်ဂွံပတုဲဖဵုကၠောန် အရၚ်ကွာန်ရ။

အဲကဵု နာဲဂျဵုကာ ဝါသနာတုပ်မွဲဂှ် ဗှ်လိက်ရ။ “အဲ တက်ကျာခိုဟ်အိုတ်ဂှ် ကဵုၝမွဲရ” ညးကေၚ်ဟီုလဝ်ကဵုအဲနွံ။

ဟိုတ်ဍေံဂှ် လညာတ်ညးအာဂတးနူဏံ မုဒှ်မာန်ဂှ် ညမပြိုၚ်ဟီုကဵုညး၊ ညးမပၠန်ကဵုညးလေဝ် မၞိဟ်အောန်မံၚ်၊ ဒုၚ် ဂညိက်ကအ်သၟးရ။ လ္ပာ်အဲပၠန်လေဝ် ကေၚ်တိုန်လဝ်တိုန်ဗ္တောန်သၠုၚ်ဍာ်ဒကေဝ်ဂၠိုၚ်မံၚ်ကီု၊ လညာတ်ဗှ်လိက်လေဝ် နွံမံၚ်ကီုတုဲ ၜိုတ်မာန်ကဵု မာန် ပြိုၚ်ဟီုမံၚ် နာဲဂျဵုကာကီုရ။ ဟိုတ်ဂှ်ဟေၚ် ညးဒးဂၞပ်စိုတ်ကွေံကွေံ ကုအဲရ။

“ၝဏံစှ်ေဒၞာဲကဵု ဗၟာၝောံ ညိမှအဲဟွံဒးစိုတ်လးလး၊ သၟတ်ဝုတ်မန်ဇကု နွံဂလိုၚ်လိုၚ်ဏံ ဟွံဒးစိုတ် ဂွံဒးကေတ်၊ အဲဒးစဵုဒးစးပေၚ်ပေၚ်ရ” “စိုပ်အဝဲသွက်ဂွံသ္ပအိန်ထံၚ်မ္ဂး ညးဗြဴ၊ညးတြုံ ဟွံရုဲ ပၟိက်ဆန္ဒဇကု ကေတ်ဂွံမံၚ် ပ္ဍဲအခေါၚ်အရာမၞိဟ် ပိုဒ် -၁၆ ညးတံဟီုလဝ်နွံမံၚ် နာဲဂျဵု” “အခေါၚ်အရာမၞိဟ်ဂှ် စွံလဝ်ကၠာၝ အခေါၚ်အရာကောန်ဂကူ ဒးကေတ်ကၠာ၊ ညးတြုံဏံ ဍေံစှ်ေဒၞာဲကဵု ဂကူတၞဟ်မွဲမ္ဂး မဗဳဇဍေံဂှ် ဟွံဒှ်ဂကူမန်ဇေတ်တ်ရ၊ ကောန်ဂကူပိုယ်တၟော်ရံၚ်အာ အတိုၚ်မွဲကၟိုန်ဍုၚ်မ္ဂး နွံမံၚ် ၂ က္ဍိုပ်ကၠံဓဝ်ရ၊ သၟတ်ပိုယ်နွံမံၚ် ပိကိုဋ်ဘာ် အတိုၚ် စရၚ် ၂၀၁၄ ဂွံဆဵုကၠုၚ်။ ဟိုတ်ဂှ်ရ သၟတ်ဗှ်ေတံ တာလျိုၚ်နွံဇၞော်ဇၞော်ဏောၚ် သုတ” ပ္ဍဲဍုၚ် ကုလသမ္မဂ္ဂ သ္ပလဝ်စၟတ်သမ္တီ အယုက်သၟတ်ဂှ် အယုက် ၁၅-၂၄ သၞာံ။ အမေရိကဂှ် အယုက် ၁၅-၂၅သၞာံ။ ၀-၃၀သၞာံ ဍုၚ်ဂျပေါန်၊ ဍုၚ်ကဳုရဳယာဂှ် အယုက် ၁၅-၂၉ သၞာံ။ ပ္ဍဲကၟိုန်ဍုၚ်ပိုယ် အဝဲအယုက်သၟတ်ဂှ် ၁၆-၃၅ သၞာံမဒှ်ရ။ စိုပ်ကဵု အယုက်သၟတ်တံတုဲ မွဲဍုၚ်ကဵုမွဲဍုၚ် သ္ပစၟတ်လဝ်အယုက် ဟွံတုပ်၊ တၞဟ်ခြာမံၚ်ရ။ ပ္ဍဲကဵု လိက်ဘာသာ ညးသ္ပလဝ် နွံမံၚ်ပိအဝဲဟေၚ်ရ။ နူအယုက်ၜံၚ်စဵုစိုပ် အယုက် (၃၁)သၞာံ အဝဲပထမ ညးတံကော် သၟတ်တြုံ၊ သၟတ်ဗြဴ၊ နူ ပိစှော်မွဲစဵုစိုပ် အယုက်(၆၀) အဝဲဒုတိယညးကော် လထဴ၊ လဗြဴ။ နူအယုက်(၆၁) စိုပ်အယုက်(၉၀) ပစ္ဆိမအဝဲ ညးကော်စ ယထဴ၊ယဗြဴ မဒှ်ရ။ “ဂဳတကဵု ဆာန်ဏံဂှ် ဟွံဒးကေတ်အရေဝ်ဘာသာအကြာမွဲပုဟ် နာဲဂျဵု၊ အခိၚ်ဆာန်မ္ဂး ညံၚ်ရဴကၠေၚ်ဓါတ်ဒးပၟတ် ဂဵုတိုန်ကၠုၚ်မ္ဂး ထိၚ်ဟွံမာန်ရ၊ ဆာန်ဏံဂှ် ညံၚ်ရဴကလော်ရ ညးမွဲလေဝ်ဟွံဆဵုပုဟ်၊ ဆ္ဂး ပတှ်ေမံၚ်” “ပၟတ်ဂၠုတုဲတှ်ေ တုပ်တုပ်ရ၊ အတိုၚ်တုပ်တုပ်ရတှ်ေ အဲဂျဵု နွံပၟိက်ကဵု ဂၠုပ္ဍဲဂကူသၟတ်ဝုတ်မန်ပိုယ်ရ”

နာဲဂျဵုၜိုန်ရဒးစဵုဟစးကဵုပွကမၠောန် ညးမထပ်တဲကဵု သၟတ်ဝုတ်ဗၟာဂှ်ကီုလေဝ် ပရေၚ်မၞိဟ်ညးညိမှဟွံကဵုလီု ရာန်ကေတ်ပရၚ်တဲ နွံကဵုၚ္ၚုဟ်မးမွဲတုဲ ညးကော်ဂွံအဲ အာပေါဲမ္ၚဵုထပ်တဲကဵုပရၚ်တဲညးမထပ်တဲဂှ်ရ။သီုရာဒနာမိက်ကဵု ညးမထပ်တဲဂှ်ရ။နာဲဂျဵု အခိုက်ကၞာမန် စိုပ်ကဵုသ္ပမ္ၚဵုထပ်တဲတုဲ ထပ်တဲနွံမံၚ်မူစိနဲၜိုန်ရ ကညာၚ်သောၚ်ကလးမံၚ်ကဵုအဲကီုလေဝ် ဟိုတ်နူ (DJ remix) တံတုဲ မုလေဝ်ဟွံမိၚ်ရ။စတုဲဒှ်အာတုဲ အဲဒးပါဲထောံနူသ္ၚိမွဲလစုတ်တွဵု အခိၚ်ကာပေါဲမ္ၚဵုတုဲမှ စဴသ္ၚိ။ အဲလေဝ်ဗက်အာကီု ဟိုတ်ဍေံဂှ်မံၚ် ဟွံမာန်ပ္ဍဲသ္ၚိ။Song box ဗြုတိုန်မ္ဂး ပ္ဍဲသ္ၚိဂှ်ပလိုက်က္တဵု၊ သ္ၚိမွဲမဗြုမံၚ် ပြာပ်ပ်၊ ဒ္ၚေါဝ်ထ္ကးအာ ၜါကရေက်တုဲယျ။ကတောဝ်လေဝ် ကျာတိတ်မံၚ်တုဲ အဲလေဝ် ဒးပါဲထောံမွဲလစုတ်ခိုဟ်ရချပ်တုဲ အာဇူဒၟံၚ် ပ္ဍဲသ္ၚိ ဣစဳဍောတ်ရ။

“ရဲကၠုၚ်မ္ၚဵုထပ်တဲ (မၚ်္ဂလာဆောၚ်)တံ ပါဲနူ သော်ယံၚ်မွဲမတုဲ ဟုံလဝ်ဂစေအ်တုပ်မံၚ် ညးထပ်တဲဂှ်ဟဂှ်ရ” “ဝုတ်တံဍေံကျိုၚ်ညံၚ်ဂွံကျေဝ်လေဝ် မုဒှ်ပၠန်ရော နာဲဂျဵုကာ” “ဝုတ်တ်တံ ပလောံဍေံတံတၟေၚ် ညးလ္ၚဵု ထ္ကးလဝ်ပ္ဍဲပၞး၊ လ္ၚဵုလဒေါဝ်စး၊ သြိုဟ်ၜါဓအုပ်တေၚ် တၟေၚ်ကြပ်ညာတ်ဂြၚ်၊ ဂၞိန်ထ္ကးလဝ်စဵုစိုပ်ၜံၚ်၊ တံၚ်လဝ်သော်တပ်၊ လ္ၚဵုသီုဓလာတ်လဝ် စၞာံဗုၚ်ညိည။ ယဝ်အဲဒှ်ဗၠာဲ သီုဒးကွက်ထၟာဲတဲ” “အကာဲအရာဏံဂှ် အ္စာဇိၚ်ပဠောံ fashion တံကၠောန်လဝ်သုတေံသနတုဲ ဒၞာဲမၞိဟ်တြုံတံ ဗဵုမၞိဟ်ဗြဴဂၠိုၚ်ဂှ် ကၠောန်လဝ်သုတေသနတုဲ ဍေံတံဖန်ဗဒှ်ဗီုပလောံတံ ကေၚ်ဗှ်လဝ်နွံမံၚ်ရ။ အဲမိက်ဂွံသၟာန်မွဲလေဝ် “တၟေၚ်ကြပ်ညာတ်ဂြၚ်ဂှ် မုရော နာဲဂျဵု” “အဲဗှ်ထ္ၜးကဵုၝကဗျဏံမွဲပိုဒ် ကလၚ်ချိုတ်တ်ပၠိုတ်ပၠိုတ်၊ ဓရှ်စာၚ် နွံပ္ဍဲဇိုၚ်၊ ဓရှ်ဟိုၚ် နွံပ္ဍဲဍုတ်၊ ဓရှ်ဝုတ် နွံပ္ဍဲသြိုဟ်လေဝ်။ အာဂတံနူဏံ မန်ပိုယ်လစံက်ဗီု “သုတ”တံရဂွံမာန်၊ သၠုၚ်ဒတဴ သဝ်သဝ်ရဂွံမာန်။ ဂွံဂွံရုပ်သာ်ကျေဝ်ကျေဝ် ဗီု နာဲဂျဵုတံ သၠုၚ်ဟတဴခိုဟ်၊ ဗုကျေဝ် ဗီုဏံဟွံလောဲရ” “မုဟီုမံၚ်ရော နာဲဂျဵု ပလောံဝုတ်တံ ဂွံကောန်လစံက်၊ ပရေအ် မုလေဝ်ဟွံဆေၚ်ပုဟ်” “နူကၠာၝရဟီု ဒၞာဲမၞိဟ်တြုံတံဗဵုဂၠိုၚ်ဂှ် အ္စာဇိၚ်ပလောံတံကၠောန်ခၞံပတိုန်ပလောံဂး၊ ဗွဲတၟေၚ်ပ္ဍဲဍုၚ်ပိုယ် (တၚ်ဇာဝင်ကျော်) သီုလိၚ်ဖျေံနၚ်ဍေံ ပ္ဍဲပေါဲသ္ဘၚ်ကျာ် ဂွံဍေံထ္ၜး ဇကုဇဂေါဝ်ဍေံဟွံသေၚ်ဟာ။ “သုတ”တံ ဗဵုတံမုဒှ်မာန်ထေၚ်ရောၚ်။ စိုတ်တဏှာ ဒဳကရဳတိုန်ထိၚ် ကောန်ဗၠာဲဇကုဟွံမာန်မ္ဂး မဗဳဇ သွက်ဂွံဒှ်မၞိဟ်လေၚ်အာအိုတ် (ဗွဲတၟေၚ် ဗဳဇခိုဟ်ဟ်) ကိုဟ်ဆာဲထောံအိုတ် အလဵုဂွံဂွံမံၚ်ဏီရော? ကျေဝ်ကျေဝ်အိုတ်အာလေဝ်” “သီုဖအိုတ်ဟွံသေၚ်လေဝ် နာဲဂျဵု” “ဖအိုတ်ဂှ် ဟွံသေၚ်လေဝ် ဗွဲမဂၠိုၚ်” “အနာဲ ပံက်ပတိုန်ပါၚ်မ္ဂး ဗျိ သၟတ်ပိုယ်တံတွဵုရ၊ ဒၞာဲခိုဟ် မွဲအလန်လေဝ်ဟွံဟီု” “ မိက်ဂွံကဵုအဲဟီု ခိုဟ်ဟ်တှ်ေ သၟတ်ဗှ်ေတံ ကၠောန်လေဝ်ခိုဟ်ဟ်၊ တၞဟ်ဟ် ဟွံမိက်ဟီု စိုပ်ကဵုဍိုက်ကွဳလိုန်ဓါတ် မိက်ဂွံဟီုညိ။ သၟတ် ၝတံ အာဝေၚ်ပ္ဍဲစက်စာဲ၊ ကျာ်ခၟဳတံမ္ဂး စက်ကွဳလိုန်ဓါတ်ညးကဵုညး ပတေၚ်မံၚ်ဂွံဆဵု။ ပ္ဍဲဖုၚ်တှ်ေ စုတ်လဝ် Password ကဆံၚ်ၚ်၊ ၝောံတဲဂှ်ကေတ်ဟာ၊ မဂၞန်ဂှ်ကေတ်ဟာ? စုမ်လေၚ်ရ။ ကိစ္စဇၞော်နူဖုၚ် ကၠေၚ်က္ဍဟ်တံဂှ် မၞိဟ်ဗွဲမအောန်တံရ စုတ်လဝ် Password ” “ဍိုက် ကွဳလိုန်ဓါတ် ဗီုလဵု ဂွံစုတ် Password ပ္ဍဲက္ဍဟ်ပိုယ်ရော နာဲဂျဵု” ကၠေၚ်က္ဍဟ်မ္ဂးဒှ် ခန္ဓကာယပိုယ် အရာကိစ္စဇၞော်အိုတ်မွဲရ။ ဇၟာပ်ပ်အရာ စကဵုဒှ်၊ ကၠောန်ကီုကဵုဒှ် ကဵုမံၚ်အမိၚ်သီုဖအိုတ် ဒှ်ကၠေၚ်က္ဍဟ်မၞိဟ်ပိုယ်ရ။ ဇိုၚ်တဲမွဲပိုယ်တၞုၚ်ဂွံပချဳဂွံမ္ဂးဂှ် ပ္ဍဲကဵုကၠေၚ်က္ဍဟ် ဍေံဒးစုတ်တၚ်ဏှၚ်ဇဳရ။ ယဝ်ရဒးထံက်ထ္ၜး ဥပမာမွဲမ္ဂး ပ္ဍဲအရာပိုယ်ကၠောန်ကောန်ရုပ်စက်(စက်ရုပ်)မွဲမ္ဂး တဲကောန်ရုပ်စက် ဂွံချဳမွဲတၞုၚ်ဂွံဂှ် တၚ်နၚ်လုပ်ကဵုလက်ကိုဋ် ဒးစုတ်မှ တဲကောန်ရုပ်စက်တဲ ဂွံဆၜိုတ်သၠုၚ်ဖျဝ်ညိဓဝ်ရ။ အကာဲအရာၜိုတ်ဏံဂှ် ပ္ဍဲက္ဍဟ်ပိုယ် ဟီုအရေဝ်ကောန်ၚာ်မ္ဂး ခေက်ကေတ်လေဝ် ဂွံဆၜိုတ်ဂွံစကၠောန်ညိဓဝ်ရ။ အ္စာဂဥုဲသဝ်ဝန်တံ စမ်မၞိဟ်ယဲချိုတ်ဂျိုၚ်မ္ဂး ညးတံသ္ပစၟတ်သ္တီကဵု က္ဍုဟ်ကၠောန်ကမၠောန်၊ ဟွံကၠောန် ကမၠောန်ရ။ ပ္ဍဲဗုဒ္စဘာသာမ္ဂးစိုတ်ရ ဒှ်အဓိကတုဲ စိုတ်နွံမံၚ်မ္ဂး မၞိဟ်ဂှ်ကျိုၚ်တဴမံၚ်ရောၚ်။ စိုတ်ပၠန်နွံမံၚ်စုတ်အိုတ်ဂှ် ဂြိုဟ်က္တာန် ဟဒယပိုယ်ရ။ အကာဲအရာ ပ္ဍဲဍုၚ်လိုက်ပိုယ် ယဲတၟေၚ် လ္ၚဵုတံဂှ် ကၠေၚ်က္ဍုဟ် ဟွံကျိုၚ်မံၚ်ကီုလေဝ် မၞိဟ်တံကျိုၚ်မံၚ်ဂွံဆဵုကေတ်၊ ဂွံမိၚ်ကေတ်ပ္ဍဲပရိုၚ်လေဝ်နွံ။ “ဂွံဒးဝါတ်မံၚ် ၚုဟ်မးတန် ၜါလက်ဘာ် ခမံက် ကွဳလိုန်ဓါတ် ခလဝ်ရ” “တ္ရဲ အဒိုတ်ကဵုသ္ရိသဝ် သတ္တဟဏံ နာဲဂျဵု ဂွံအခိၚ်သၠးမံၚ်ဟာ ပိုယ်တံ မိက်ဂွံအာလ္ရောဝ်ကျာ် လ္ပာ်ဒဵုတၟံဗြာတ်တေံ” “ရဲကၠောန်ဝါ၊ကၠအ်ဂှ် တ္ၚဲတိၚ်၊ တ္ၚဲသဳရ ကြက္ကဒိန်မန်ပိုယ်ရ ပိုယ်သုၚ်စောဲ သုတ” “ဟီုကဵုအနာဲတှ်ေ မွဲဗီုဟွံသေၚ်မွဲဗီု ပခက်ညးသ္ကံတွဵုရ” “သ္ၚိသဝ်အဒိုတ်တံဂှ် ဘာသာတၞဟ်ခြာတံ တ္ၚဲညးတံ ဒးအာဘာသာသနာဍေံတံ ဍေံဇူတှ်ေ ပိုယ်လေဝ်တ္ၚဲပိုယ်ဒးစိုတ်ဇူဂွံမံၚ်ရ” “မံၚ်ကဵု မၞိဟ်ဂမၠိုၚ်တှ်ေ ဗီုညးတၞဟ်ဒှ်ဂှ် ဒးဒှ်ကီုလေဝ်၊ ပၟိက်ဆန္ဒဇကုမွဲဓဝ် ဖန်ကေတ်တ်ဟွံဂွံပုဟ်” “အဝဵုဟၟဲ တ္ၚဲရဲဇကု မိက်ဂွံဇူ ဇူဟွံဂွံ”

  1. “သုတ ဗှ်ေစုတ်ကဵုအဲ သၠဲဖုၚ်မွဲတဲၝ ဂွံကော်ဖုၚ် ဣနာဲၝတံ”

“နာဲဂျဵု ရမျှာၚ်ဒှ်အာရမျှာၚ် အဒါ လံဟာ၊ နူဂနေံတှ်ေ ပြိုၚ်ဟီုမံၚ် စက်သၠဲရမျှာၚ်စှ်မဂှ်တှ်ေ?” “လုပ်ဟွံသေၚ် ဟီုဟွံတိတ် ကအ်ဂိဒၟံၚ်ဟဂှ်ရ” စိုပ်ကဵုသုၚ်စောဲကွတ်ကတာပ်ခေတ်မ္ဂး မပ္တံကဵု ဖုၚ်၊ကောန်ပျူတာ သၟတ်တံတ္ၚဲဏံ မြက်နူကဵု ညးဇၞော်တံကီုလေဝ် ဗွဲမဂၠိုၚ်ဂှ် သုၚ်စောဲမံၚ်ဒၞာဲ ဗၠေတ်တုဲဖအိုတ်မံၚ်အခိၚ်ရ။ ဝေၚ် Game, လံၚ်ပေါဲဗေဝ် လတူလပှ်ကျာအိုတ်တုဲ ဖအိုတ်မံၚ်အခိၚ်ရ။ “အခိၚ် နာဲဂျဵုသၟာန်ကၠုၚ် မုၝသ္ပရော ညးသၟာန်ကၠုၚ်မ္ဂး” ဝေၚ်မံၚ် Game သွဟ်ဏာကဵုညးမ္ဂး ညးထေဲကွေံကွေံ။ ဟိုတ်ဍေံဂှ် မုလေဝ် ပရေၚ်တဴတက်ဟၟဲတုဲ ညိမှ ဟွံဒးစိုတ်။ ညးကေၚ်ကော်သၟာန်လဝ်အဲနွံမံၚ်မွဲဂှ် စဵုကဵုလၟုဟ်အဲသ္တီဒးမံၚ်ဏီ။ “အခိၚ်ဟီုဂှ် ဗီုလဵုဗှ်ေပံက်အဓိပ္ပာယ်ရော? သုတ” “စက္ကန်၊ နာဍဳတံရ နာဲဂျဵု” “ပံၚ်စက္ကန်၊ နာဍဳတံတှ်ေမုဒှ်ရော?” “ဒှ်အာ တ္ၚဲ၊ ဂိတု၊ သၞာံတံရ” “ၝဂွံအယုက်မူစိသၞာံရရော” “အဲဂွံအယုက် (၁၈)သၞာံ” “ အခိၚ်ဟီုဂှ် တုပ်မံၚ်အယုက်ပိုယ် သုတ၊ လ္ပသာသ္ပံကဵု အခိၚ်ညိ။ လောန်တုဲကေတ်ဟွံဂွံရ၊ ၚုဟ်မးဇၞော်ကွေံကွေံ” ညးဂှ်နွံမံၚ်ပၟိက်ကဵု သၟတ်တံမိက်ဂွံဇၞော်မောဝ်တုဲ ဟီုမံၚ်ဒၠောံဗ္တောန်မံၚ်။ လညာတ်ပိုယ်ဂှ် ဝေတ်မံၚ်ပိုယ်၊ သ္ပမံၚ်အ္စာလၟိုန် ဟွံဒးစိုတ် ဒှ်မံၚ်အနာဲဇကုတှ်ေ ကလေၚ်ဓညက်ဟီုလေဝ် ဟွံစှ်ေဗီုတုဲ ဂတးမုက်ညးတှ်ေ “ယွံ ယွံ” လကြဴညးတှ်ေ ဗီုဇကုဒးစိုတ် ဆက်ကၠောန်ပၠန်ရ။ သၟတ်ပိုယ်တ္ရဲဏံ စောဲလာံမံၚ် Game, social mediaတံဂှ် တုပ်တဴညံၚ်ရဴ စောဲမံၚ် ဂဥုဲၜူမာဲ မွဲသာ်ကီုရ။ ဖုၚ် တံဟၟဲမ္ဂး ဓဝ်ပတှ်ေလတူဇကုလေဝ်ဟၟဲ၊ အာကၠုၚ်မ္ဂးလေဝ် ညံၚ်ကဵုဟွံဂီုကၠီုထေၚ်ကၠုၚ်ဗီုဏံရ။ မိမကောန်ၚာ်တံ လၟုဟ်ပၠန်လေဝ် ရံၚ်ကောန်ဇကုဂွံလောဲဂးတုဲ ပအပ်လဝ်ကဵုဖုၚ်သၟးရဂၠိုၚ်။ ကောန်ၚာ်သၟတ်တ္ၚဲဏံ မတ်လီု၊ စိုတ်ဓါတ်ဖေက်ဂၠိုၚ်၊ ဝေၚ်လဝ်ကြာန်ဓဇန်ဂၠိုၚ်တုဲ ညးလ္ၚဵုပြဲပျာံကၠုၚ် အကြာကောန်ၚာ်ကဵုနွံကၠုၚ်ဂွံဆဵုကေတ်ကဵုမတ်ကီုရ။ “စၞစမ္ဂး ဒးစညံၚ်ရဴ စဂဥုဲ။ ဟွံသေၚ်မ္ဂး ကြက်ဒးစဂဥုဲ ညံၚ်ရဴ စၞစ” အဲစုတ်သၠဲဖုၚ်တုဲ ကာ မိနော်ပိုယ် စဴကၠုၚ်သ္ရိကဵုကာ သီုမိမၜါလေဝ်စဴကၠုၚ်။ မိ အာဒုၚ်မိနော် ပ္ဍဲသ္ၚိဣစဳရ။ အဲကဵုနာဲဂျဵု ဘိုၚ်ဖျေံကပေါတ်ပတိုန်သ္ရိ စွံဒၞာဲတုဲ “တၚ်ဂုဏ်ရ နာဲဂျဵု” အဲဟီုတုဲ ညးအီတိုန်ရ။ “မုအီမံၚ်ရော နာဲဂျဵု” ညးတာတဲကဵုအဲ အဓိပ္ပာယ်ဍေံဂှ် ညးကအ်ဂိမံၚ်တုဲ မုလေဝ်ဟီုဟွံမာန်ရ ထ္ၜးအကာဲအရာဇိုၚ်တဲရ။ တၞဟ်န ဟွံဟီုအရေဝ်မွဲသာ် ထ္ၜးကေတ်ဇိုၚ်တဲ ဏံဂှ် ဒှ်မံၚ်ဘာသာ သွက်ဂွံဆက်စၠောံမွဲသာ်ကီုရ။ ပိုယ်ထ္ၜးပွမနွံယျဵုလ္ဂူယေန်သၞာၚ်မ္ဂး ဂတမုက် မၞိဟ်ဇၞော်ဇၞော်တံ ဂဇိုၚ်က္ဍိုပ်တုဲ ဒးအာ၊ ဟီုအရေဝ်မ္ဂး ဒးဗန်လဝ်တဲ၊ ကွာ်သ္ၚိသာသာ၊ စပုၚ်မ္ဂး ဒးစဝ်စုတ်ကဵု မၞိဟ်အယုက်ဇၞော်နူဇကု အခိၚ်စပုၚ် ဇန်လ္ပကဵုဗြု၊ ရမျှာၚ်လ္ပကဵုတိတ်၊ လ္ပတက်ကျာတံဂှ် ဒှ်အခိုက်ကၞာယေန်သၞာၚ်ပိုယ်ရ။ အခိုက်ကၞာပိုယ်နွံမွဲသာ်ပၠန်ဂှ် ကလအ်ပူဇဴ မၞိဟ်အယုက်ဇၞော်ဇၞော်တံ နွံမံၚ်ရ။ ဟိုတ်နူဒးဒုၚ်ဟီုလဝ်ကဵု နာဲဂျဵုတုဲ ကိစ္စဏံဂှ် ဝိုတ်ဟွံမာန်။ ဂကောံသၟတ်ပိုယ် သွက်ဂွံ ကလအ်စ မၞိဟ်ဇၞော်ဇၞော် သဘၚ်ပူဇဴဂးတုဲ တက်ပတိတ်ပလောံရ။“သုတ ကဵုအဲဗဵု ပဠောံၝတံ တက်လဝ်မွဲ၊ ကျေဝ်မံၚ်ကီုဟာ” နာဲဂျဵုဟီုတုဲ ဒုၚ်ဏာကဵုညးဗဵုဒၟံၚ်ချိုတ်တ်ပၠိုတ်တ်ရ။ “ဖျုန်ပဠောံ (ဘဲငန်း) ရ၊ မွဲဂတှ်ေ ထပှ်လ္ၚီ” “ပဠောံဏံ မွဲဗှ်ေတံလ္ပကတက်ရ “သုတ” သဘၚ်ကၞာ ကလအ်စဂှ်ရ” “မုဒှ်ရောပၠန်ရော နာဲဂျဵု ဗှ်ေတံသ္ပထောံ သဘၚ်ကလအ်စ ဟွံသေၚ်ပုဟ်။ ဒှ်ညံၚ်ရဴ လက်ဆဴမံၚ် မၞိဟ်ဇၞော်ဇၞော်တံဏောၚ်၊ ယေန်သၞာၚ်ဟွံမွဲပုဟ်” ညးထံက်ထ္ၜးကဵု ပ္ဍဲပဠောံပိုယ် မလိက်မွဲမ။ ဇေတ်တ်တေံဂှ် ဒးဒှ်မလိက် “သဘၚ် ကလအ်စ မၞိဟ်တၠအယုက်” ဆ္ဂး ပ္ဍဲပဠောအ်ပိုယ်ဂှ် မလိက်တက်လဝ်စှ်ေမံၚ် ဒၞာဲညးတၠအယုက်ဂှ် ဒှ်မံၚ် “ညးတၠ အယုတ်” ရ။ တၚ်ရန်တၟံ ပွမနွံကဵုယေန်သၞာၚ်မ္ဂးဂှ် အခိၚ်ကာ ညးလောကတံ ပံက်ဖက်၊ ဆက်စၠောံညးသ္ကံ၊ ဟီုဂးညးသ္ကံ၊ ဒှ်ကပေါတ်ကြိယာ တသိုက်စိုတ်၊ ကာယ ရ။ ယေန်သၞာၚ်မ္ဂးဂှ် ပွမနွံကဵု စိုတ်ဆာန်ဍူညှာတာ၊ ယဵုလ္ဂူတပ်တး၊ သၠးအခေါၚ်၊ စွံဓရ်သှ်ေရှ်ေ၊ ကလၚ်စ အရေဝ် မိမအ္စာ၊ ကေတ်စရာဲ မၞိဟ်လေပ်၊ စိုတ်သ္ပမာန်ညးတၞဟ်ဟၟဲ စိုတ်ဏံနွံမံၚ်လၟိုန်မ္ဂး ဒှ်ညးယေန်သၞာၚ်မွဲရ။ အခိုက်ဍုၚ်ပိုယ်ဂှ်ဗၠေတ်ကၠုၚ်မ္ဂး ပတိုန်ဒုဟ်ကိုပ်ကၠာတုဲမှ ပဠေဝ်၊ ဗွဲမဂၠိုၚ်တှ်ေ မၞိဟ်မွဲဗၠေတ်အာမ္ဂး ၜါဝါပိုယ်ဟွံကဵုအခေါၚ်ရ။ တးပါဲထောံနူဝိုၚ်တုဲ မၞိဟ်ဏံသုၚ်စောဲဟွံဂွံ၊ ၜိုန်ရပိုယ်တံဟွံလလောၚ်တြးကီုလေဝ်ညံၚ်ကဵုဟီုမံၚ် အဓိပ္ပာယ်ဂှ်ရ။ မအရေဝ်ဗၠေတ်ဏံဂှ် ကၠုၚ်နူကဵုမၞိဟ်ကၠောန်ကမၠောန်၊ မၞိဟ်ကၠောန်တံရဗၠေတ်နွံ၊ မၞိဟ်မုဟွံချဳဒရာၚ် ရေၚ်တၠုၚ်တံဂှ် မုလေဝ် ဟွံဗၠေတ်၊ မုဖိုလ်လေဝ် ဟွံဒှ်။ “သၟတ်ဗှ်ေတံဂှ် အာတ်ကေတ်မံၚ်ဒၞာဲ ကဆံၚ်အလံၚ်ဗှ်ေတံသၟး “သုတ” လညာတ်အဲဂှ် ညံၚ်မၞိဟ်ဇၞော်ဇၞော်တံဂွံစှ်ေစိုတ် ကဵုဗှ်ေတံဂှ် ထ္ၜးအစောန်ဗှ်ေတံမာန်တှ်ေ ဒၞာဲဒတုဲဖဵုရေၚ်တၠုၚ်ဏံဂှ် ပိုယ်ညိမှ ဟွံဂိုဟ်ပုဟ် အာတ်ကဵုဟဂှ်ရ”နာဲဂျဵုဟီုကဵုပိုယ်ရ။ လညာတ်ပိုယ်သၟတ်တံဂှ် ဒၞာဲပိုယ်ထ္ၜးအစောန်ဟၟဲတုဲ ပရေၚ်အာက္ဍိုပ်သဝ်မံၚ် ညာတ်မံၚ် ဗီုဏံရ။ လညာတ်တၞဟ်ခြာ ပ္ဍဲကဵုကဏ္ဍ သၟတ်ကဵု မၞိဟ်ဇၞော်ဏံ ယဝ်ရ ဆက်စၠောံ စုတ်ဒဒန်လဒေါဝ်မွဲဟွံမာန်မ္ဂး ဆက်အာ ဗီုဏံရ။ ညးဟီုညးခိုဟ်၊ အဲဟီုအဲဒးမ္ဂး ဆက်စိုပ်ညးသ္ကံလေဝ်ဟွံလောဲရ။ မရေဝ် “ကၠောန်မံၚ် အဗျုတဏံရ” အကြာမၞိဟ်ဇၞော်ဇၞော်တံ ဟီုမံၚ်ဂၠိုၚ်ၚ်ကဵုဝါရ။ ညံၚ်ကဵုသၟတ်တံဂွံလုပ်ဝိုၚ်၊ ဂွံအာဂၠံၚ်တရဴတပ်ပ် ခိုဟ်ဟ်မာန်ဂှ် အဗျုလဵုမွဲမှ ဖျေံလၟေၚ်ကမၠောန်ချိုတ်တ်ပၠိုတ်တ်ဟၟဲ။ မရေဝ်ဗျိသၟးရ။ ပ္ဍဲဒေသပိုယ် သၟတ်တံဂှ် ဒးစွံဓရ်ရှ်ေသှ်ေကဵု ညးဇၞော်တံတုဲ လညာတ်သၟတ်တံ သွက်ဂွံပြံၚ်လှာဲနွံမံၚ် ညးဇၞော်တံ ဒးဘိုၚ်ထ္ၜးလဘာ်ထံက်ပၚ်ထေက်။ ပေါဲကၞာမ္ၚဵုထပ်တဲတုဲအာမှ သွက်ရဲအရာပ်ပိုယ် ဒှ်မ္ၚဵုဇၞော်ကဵုဇြဟတ်ရ။ Song Box ကဠာတံစဴအာမှ ကတောဝ်လေဝ်ၜိုဟ်၊ စိုတ်လေဝ်ခိုဟ်တိုန်အာအိုတ်ရ။ ဆ္ဂးမွဲအရာပ်ပိုယ် ညးမွဲလေဝ် ဟီုအရေဝ်ဟွံတိတ်၊ ဒှ်အာ ကမၠဴ သီုညးဖအိုတ်၊ တက်ကျားညးသ္ကံမ္ဂး ဒးထ္ၜးကေတ်ဇိုၚ်တဲ ညးသ္ကံအိုတ်ရ။

နိဿဲ[ပလေဝ်ဒါန် | ပလေဝ်ဒါန် တမ်ကၞက်]