သ္ကံတဲသွက်ညးဗြဴဗုၚ်ဗုၚ်သီုကဵုတြုံတၠသ္ၚိ
ထေက်ကဵုဒးတီလဝ်ပ္ဍဲမၞိဟ်ဗြဴဗုၚ်ဂွံလဝ်ယဲဒိုက်
ပ္ဍဲကဵုညးဗြဴတံဗုၚ်ယိုက်ဂွံလဝ်ယဲဒိုက်ကော်စ(ဗုၚ်)ဒၟံၚ်တအ်ဂှ်တှ်ေ အဓိကဇၞော်တဴဗွဲမလောန်ကွေံကွေံရ၊ ဟိုတ်ဒှ်သာ်ဏံတုဲ တြုံတၠသ္ၚိမၞိဟ်တြုံညးမဒှ်အပါကောန်ၚာ်ပ္ဍဲဗုၚ်တံဂှ်လေဝ် ဒးကေတ်တာလျိုၚ်မွဲဇၞော်ကဵုဒြဟတ်ပ္ဍဲအဃောဗြဴဇကုဗုၚ်ဒၟံၚ်တံဂှ်ဟေၚ်ရ၊ သွက်မိယာဲကောန်ၚာ်တံဂှ်ကီု သီုကဵုအပါကောန်ၚာ်တံဂှ်လေဝ် ဒးဖျေံဗီုပြၚ်မၚ်မွဲလွဳပရာစဵုဒၞာနူစပ္တိုန်ဋိသိန္ဓိစတီဒဒှ်ရဗုၚ်ဂွံကၠုၚ်ယဲဒိုက်တံမာန်ရ။
အခိၚ်တီဗြဴဇကုဗုၚ်ဂွံကၠုၚ်ယဲဒိုက်ဟွံလအ်သွက်မၞိဟ်တြုံတအ်ဂွံကၠုၚ်ကောန်ယျဏောၚ်တုဲ ဒၞာဲဏံဟေၚ်မၞိဟ်တြုံတအ်ဒးကၠောန်တာလျိုၚ်အပါမွဲညံၚ်သ္ဂောံပြေပြံၚ်ကီု ဒှ်သွက်ဗြဴဇကုဂွံပဳတိဂွံလဝ်တြုံမွဲဟွံမှာပ္ဍဲအခိၚ်ဗုၚ်တံဂှ်ကီုတုဲ သွက်မၞိဟ်တြုံတံလေဝ်ဒးကၠိုဟ်ထေက်ကဵုဒးကၠောန်ၜိုတ်အစောံစရာဲနွံအဃောဗြဴဇကုဗုၚ်ဒၟံၚ်တံဂှ်အိုတ်ညိ။
ယဝ်ရတြုံဗြဴနွံမံၚ်မွဲစွံတုဲ ဗွဲကၠာအိုတ်မၞိဟ်တြုံတအ်ဒးကၠောန်လ္တူဗြဴဇကုတံဂှ်တှ်ေ ဂဥုဲဒြဟတ်စိုတ်သွက်ညးဗြဴဗုၚ်ဗုၚ်တံနွံဗၟိက်ဂှ်ဒှ်အဓိကလၟေၚ်မွဲရ၊ အရာလဵုညးဗုၚ်ဗုၚ်တအ်စိုတ်ဟွံမိပ်ဒးကူချပ်ဂၠိုၚ်ဂှ်ထေက်ကဵုဟွံကဵုဗြဴဇကုဒးမိၚ်ဒးဒုၚ်စသိုၚ်အဃောယိုက်လဝ်ဗုၚ်ယဲဒိုက်ဂှ်ညိ၊ ဟိုတ်ဏံဟေၚ်ရ သွက်မၞိဟ်တြုံတအ်ဂှ်လေဝ် ဒးဗက်အလိုက်အၚာပ်စိုတ်ဗြဴဇကုဗွဲမတၟေၚ်နူကဵုတြေံကၠာဟွံဂွံဗုၚ်ဂၠိုၚ်ဂၠိုၚ်ကဵုဆညိ၊ မပ္တံကဵုကပှ်ကဆံၚ်ဂၠိက်ပဠောအ်သ္အးဇ္ၚးသ္ၚိဂှ်လေဝ် ထေက်ကဵုဒးဒှ်တာလျိုၚ်မၞိဟ်တြုံတံဒးကၠောန်အာကၠာညိ၊ အခိၚ်ဗြဴဗုၚ်ဇကုဟောံဍာ်တအ်ဂှ်လေဝ် ဒးဗိုၚ်ဟောံဒးရံၚ်စံၚ်ဟွံကဵုလောတ်စှ်ေအာလောဲလောဲညိ၊ ဗွဲစၟတ်ဂှ်တှ်ေ ဂၞိန်ပဠောအ်ဗြဴဇကုတံဂှ်လေဝ် ယဝ်ရမၞိဟ်ကဆံၚ်ဟွံမွယ်တှ်ေ ဇကုဒှ်တြုံတုဲထေက်ကဵုဒးကပိုက်ကဆံၚ်ဒးရေၚ်တၠုၚ်အာအဃောဗြဴဇကုဗုၚ်မံၚ်ဂှ်ထေက်ရ။
ကမၠောန်လ္ၚဵုလ္ၚဵုတအ်ဂှ်လေဝ် ဒၞာဲဗြဴဇကုဒးကၠောန်ကၠာဟွံဂွံဗုၚ်ဏီတံဖအိုတ်ဂှ် သွက်မၞိဟ်တြုံတအ်ဒးကၠောန်အာကၠာညိ၊ မုဟိုတ်ရောဟီုတှ်ေ အခိၚ်ဗြဴဇကုဗုၚ်ယိုက်လဝ်ယဲဒိုက်ကောန်ၚာ်ပ္ဍဲဗုၚ်တေံဂှ် ဟွံမိက်ကဵုဒှ်အာမွဲသာ်တုဲ ကမၠောန်ဇြိုၚ်သာတံဂှ်လေဝ် ဟွံထေက်ကဵုညးဗြဴဗုၚ်ဗုၚ်တံဒးကၠောန်အိုတ်ရ၊ ဒၞာဲဏံဟေၚ်ရသွက်မၞိဟ်တြုံတအ်ဂွံထ္ၜးအစောံစရာဲဆာန်ဗြဴစွံၚုဟ်မးဂွိၚ်ကဵုဗြဴဇကုၜိုတ်လဵုဂှ် အခိၚ်ဗြဴဇကုဗုၚ်ဂှ်ဟေၚ်ရဂွံထ္ၜးသတ္တိကောန်တြုံမွဲလ္တူကောန်ညးပေၚ်ပေၚ်ရ၊ ဆဂး ကၠာဟွံဗုၚ်သုၚ်စောဲဘဝလၟေၚ်လၟေၚ်တ္ၚဲတအ်ဂှ်လေဝ် ၜိုတ်ကၠောန်ဂွံဂှ်လေဝ်ဒးကၠောန်ဒးစွံအာၚုဟ်မးလ္တူညးသ္ကံဂှ်လေဝ်ဒှ်ပရေၚ်သဘာဝမွဲထေက်ကဵုတြုံဗြဴဂကောံအိန်ထံၚ်တအ်ဒးကၠောန်ဒးရေၚ်တၠုၚ်အာမာန်ရ။
သွက်ညးဗြဴဗုၚ်ဗုၚ်တအ်ဂှ်ပၠန်လေဝ် တရဴသ္ၚောဲသ္ၚောဲဗဵုပေါဲအာသ္ဘၚ်တအ်ဂှ်လေဝ် ဗီုကဵုမၞိဟ်ဓမ္မတာဂှ်လေဝ်ကၠောန်သ္ပဟွံထေက်အိုတ်တုဲ ဖေက်ဇီုကပိုက်ကဵုကောန်ၚာ်ပ္ဍဲဗုၚ်အရာနာနာသာ်ရ၊ မၞိဟ်ဗြဴဗုၚ်ဗုၚ်တံဂှ်လေဝ် ဒးမံၚ်စိုတ်ဒးမိပ်မံၚ်တွဵုတွဵုတုဲ သွက်အရီုလတေၚ်ခိုဟ်ခိုဟ်တံဂှ်ဂွံဆက်တောဲကဵုပ္ဍဲကောန်ၚာ်နွံပ္ဍဲဗုၚ်တေံဂှ်တုဲ ဣဏံလေဝ်တြုံဗြဴတအ်ထေက်ကဵုဒးတီလဝ်အိုတ်ညိ၊ စၞစအဟာသွက်မၞိဟ်ဗြဴဗုၚ်ဗုၚ်တံဂှ်ပၠန် စၞစနွံကဵုဓါတ်ခိုဟ်ခိုဟ်သွက်ပရေၚ်ထတ်ယုက်တံဂှ်ဒးစမာန်တုဲ ဟွံကၠိုဟ်ဏောၚ်တှ်ေ အာကေတ်ကသပ်သပ်ဂၞန်ကဵုအာစာဂဥုဲတအ်လေဝ်တ္ၚဲဏံဂတာပ်အခေတ်ကွေံကွေံသွက်ပိုဲတြုံဗြဴတအ်သ္ဂောံဂွံနၚ်ဗဟုသုတပရေၚ်စၞစသွက်မၞိဟ်ဗုၚ်ဗုၚ်တအ်ကီုတုဲ ဂွံဒှ်ဖဵုခိုဟ်သွက်မိယာဲကောန်ၚာ်ကီုသီုကဵုကောန်ၚာ်နွံပ္ဍဲဗုၚ်တေံဂှ်သီုယာဲသီုကောန်ညးၜါရ။
အခိၚ်တိက်တအ်တံဂှ်ဒးတိက်ဖဲဖဲသွက်ညးဗုၚ်ဗုၚ်တံရ၊ ဍာ်တှ်ဟွံမွယ်ကဵုသဂြာတၚ်လာဲတံဂှ်လေဝ် ညးဗုၚ်ဗုၚ်တအ်ဒးသုၚ်ဖျေံကဵုမွဲတ္ၚဲအောန်အိုတ်ၜါအခိၚ်နူဂယးကဵုကၠာဟွံဂွံတိက်ဂှ်မာန်တှ်ေ ဒှ်ဖဵုခိုဟ်ကဵုသွက်ကောန်ၚာ်နွံပ္ဍဲဗုၚ်တေံဂှ်ရ၊ အခိၚ်လုပ်ဒၞာဲသတိက်ကၠာဟွံတိက်ဏီဂှ်လေဝ် တြုံဗြဴညးၜါတက်ဝေၚ်ကျာသွက်အနာဂတ်ကောန်ဇကုဗီုလဵုနာနာသာ်ဂှ်ကီု သီုကဵုမၞိဟ်တြုံတအ်ဒးမောဝ်စုတ်ပ္ဍဲဗုၚ်ဗြဴဇကုဟမက်ဝေၚ်အီဂြိုၚ်ညးသ္ကံအိုတ်တုဲ ဓဝ်ဆာန်သာ်ဏံလေဝ် ပလံၚ်ဗစိုပ်ကဵုကောန်ၚာ်နွံပ္ဍဲဗုၚ်ဂၞဴတေဴဂွံတီကေတ်အရီုနူမိယာဲကောန်ၚာ်ဏံပလံၚ်ဗစိုပ်ဏာသွက်ကောန်ပ္ဍဲဗုၚ်တေံကီုရ၊ ပွမပံက်ဒွက်အၚာပ်စိုတ်မၞိဟ်ဗုၚ်ဗုၚ်ဂှ်ဒးစိုတ်တံဂှ်ကီု ဒှ်သွက်အရီုမိယာဲကောန်ၚာ်တံဂွံညိၚ်ပဳတိတုဲ ကောန်ၚာ်ပ္ဍဲတေံဂှ်လေဝ်ဂွံဒုၚ်စသိုၚ်ဗီုမိယာဲဍေံမ္ၚးဏံတုပ်တုပ်ဣဏံအာစာဂဥုဲတံဟီုလဝ်နွံရ၊ အောန်အိုတ်သွက်မိယာဲကောန်ၚာ်တံဂှ်လေဝ်ဂွံဒုၚ်စသိုၚ်ဗွဲစၟတ်ဨကန်တမာန်ရ။
အခိၚ်ညးဗြဴတအ်ဗုၚ်တေၚ်တိုန်ကြပ်ၜံၚ်ဂှ်ကီုလေဝ် ပဵုတုဲဒးမၚ်မွဲရံၚ်စံၚ်ဂၠိုၚ်တိုန်တုဲ ပွမကတဵုအာကၠုၚ်လုပ်သ္ၚိဍာ်ဟောံဍာ်တအ်ဂှ်လေဝ် ဟွံထောံလသာလဝ်ကၠောန်အာသ္ပညးမွဲဂှ်တုဲ ဒၞာဲဏံလေဝ်မၞိဟ်တြုံတအ်သၠးမံၚ်ဏောၚ်တှ်ေဒးရံၚ်စံၚ်ဗြဴဇကုပေၚ်ပေၚ်အိုတ်ညိ၊ လဆောဝ်တှ်ေ ယဝ်ရဗြဴဇကုလောတ်စှ်ေအာကီုမ္ဂး ဇီုကပိုက်ကောန်ၚာ်ပ္ဍဲဗုၚ်တေံတုဲ သီုဒှ်အန္တရာယ်ကဵုသီုမိယာဲဍေံသီုကောန်ၚာ်ပ္ဍဲဗုၚ်တေံရ၊ ပိုဲကေၚ်မိၚ်ကေၚ်ဆဵုမံၚ်ရသေၚ်ဟာဂှ် ညးဗြဴဗုၚ်ဗုၚ်လောတ်စှ်ေကီု လ္ၚဵုဂှ်ဒှ်သၞတြုံတက်ၜုၚ်ညးသ္ကံဂှ်တုဲ ဗြဴဗုၚ်ဗုၚ်တံလောတ်စှ်ေကပိုက်အာသၟဝ်တေံအရာမွဲမွဲတုဲ ဒှ်အာအန္တရာယ်ကောန်လီု လ္ၚဵုဒှ်အာအန္တရာယ်သီုကောန်သီုယာဲဒးချိုတ်အာဂှ်လေဝ်နွံတဴဗဝ်သအဝ်ရ၊ ဟိုတ်ဏံဟေၚ်ရ ပိုဲတအ်လ္ပသာသ္ပအ်အိုတ်တုဲ ဒးမၚ်မွဲရံၚ်စံၚ်သွက်ညးဗြဴဗုၚ်ဗုၚ်တအ်ချိုတ်တ်ပၠိုတ်တ်ညိ။
အခေတ်တ္ၚဲဏံလေဝ်ဂတာပ်ကၠုၚ်အခေတ်ယျတုဲတှ်ေ ဗဟုသုတနာနာလေဝ် အရာပိုဲတြုံဗြဴတံဟွံတီဟွံကၠိုဟ်အဃောဗုၚ်မံၚ်တံဂှ်လေဝ် အာကေတ်ကသပ်ကဵုအာစာဂဥုဲတအ်ဂွံပေၚ်ပေၚ်ရ၊ ပိုဲတအ်လ္ပကၠောန်ဗက်အရေဝ်ပရိုၚ်မုသာတက်ကျာအကြဝိုၚ်အကြာသ္ၚိကွာန်တအ်ဂှ်ဂၠိုၚ်ဂၠိုၚ်ညိ၊ ညးတၠစောန်ဆေၚ်စပ်ကဵုသွာၚ်မၞိဟ်ဗြဴဗုၚ်ဗုၚ်တအ်ဂှ်တှ်ေ ဒးဒှ်အာစာဂဥုဲတအ်တုဲ ဣဏံလေဝ်ပိုဲတအ်လ္ပဝိုတ်ထောံအိုတ်ညိ၊ ကၠာဟွံဂွံအုပ်နိဂီုဏီဏံတှ်ေ မိက်သ္ဂောံဗ္ကန်ဏာသွက်ဂကောံအိန်ထံၚ်မန်ပိုဲအဃောခၟောံကဴရာၚ်တံဂှ်တှ်ေ တ္ၚဲလဵုပိုဲတီဗုၚ်ယျဂှ် ထေက်ကဵုဒးပအပ်ဗုၚ်ပ္ဍဲကဵုရုၚ်ဂဥုဲတေံညိ၊ ဟိုတ်နူကဵုအာစာဂဥုဲတအ်ဂွံကဵုဂဥုဲဒြဟတ်သွက်မိယာဲကောန်ၚာ်သီုကဵုကောန်ၚာ်ပ္ဍဲဗုၚ်တေံညံၚ်ဂွံဂတာပ်ထေက်ကဵုဒးမၚ်မွဲညံၚ်ဂွံစှ်ေနဲကဲသိပ္ပံမာန်ဂှ်လ္ပဝိုတ်ထောံအိုတ်ညိ၊ ဣဏံလေဝ်ဒှ်မိမတံစွံၚုဟ်မးသွက်ကောန်ဇကုဂှ်တုဲ ထေက်ကဵုဒးမၚ်မွဲညးသ္ကံအိုတ်ညိ၊ သာ်ဏံဟွံသေၚ်တှ်ေ ညးလ္ၚဵုမွဲရဲတံဂှ် တီမံၚ်ဖေက်သြန်အိုတ်ဂၠိုၚ်တုဲ စွံလဝ်မသုန်တြဴဂိတုတေံတုဲအာပအပ်ဗုၚ်ကဵုရုၚ်ဂဥုဲတံရ၊ ယဝ်ရပရေၚ်ထက်ယုက်မိယာဲတံခိုဟ်မံၚ်တုဲ ကုသဵုခိုဟ်ဟီုစဂွံအာရ၊ ယဝ်ရပရေၚ်ထက်ယုက်မိယာဲလ္ၚဵုတံဂှ်ဟွံခိုဟ်တုဲ ဣဏံရပြသၞာကဵုကောန်ၚာ်နွံပ္ဍဲဗုၚ်တေံဂှ်တုဲ ပ္ဍဲအခိၚ်ၜံၚ်ပ္တိတ်နၚ်တုဲတံဂှ် ကောန်ၚာ်လ္ၚဵုဂှ်ဝဲလီုခန္ဓ(၃၂)ဟွံပေၚ်နာနာသာ်က္တဵုဒှ်တုဲ အလန်ဏံတှ်ေဖေက်ဟီုကဵုဏာဒုဟ်ကုသဵုပရေံရ၊ နဲကဲခိုဟ်အိုတ်ဂှ်တှ်ေ ယဝ်ရပိုဲတအ်အာပအပ်လဝ်ဗုၚ်ပြဟ်ပြဟ်ဏောၚ်တှ်ေ မိယာဲဍေံကဵုကောန်ၚာ်ပ္ဍဲဗုၚ်တေံဂှ်နွံပ္ဍဲတဲအာစာဂဥုဲတအ်တုဲ အရာနာနာတံဂှ်လေဝ်ပိုဲပြံၚ်သၠာဲဗဂဵုလဟဵုဂတာပ်အခိၚ်အောန်ကဵုဂၠိုၚ်ဂွံမာန်ရ။
ဟိုတ်ဒှ်သာ်ဏံတုဲ ဂကောံအိန်ထံၚ်ပိုဲဂွံနွံကၠုၚ်ကဵုၚုဟ်မးဂှ်လေဝ် ဒးစဗဂဵုလဟဵုမၚ်မွဲကေတ်နူစဗုၚ်တေံဂှ်မှကော်စဂတာပ်အခေတ်တုဲ အရာနာနာကတဵုဒှ်ကၠုၚ်တုဲ ခိုဟ်ကီုပရေံကီုတံသီုဖအိုတ်ဂှ် ပိုဲဏံမွဲဟေၚ်ရဖန်ဗဒှ်ကၠောန်ကၠုၚ်ကေတ်ကေတ်တုဲ ဒးဒုၚ်တဲမာန်ဣဏံရအစောံစရာဲအဲတုဲ ကုသဵုနူအတိက်ခိုဟ်ပရေံဗီုတေံသာ်ဏံညံၚ်ဟွံဒးဟီုစိုပ်အာအိုတ်ရ၊ အိုတ်ကၞောတ်ဏံတှ်ေ ဂကောံအိန်ထံၚ်ကောန်ဂကူမန်ပိုဲသီုညးဖအိုတ် ညံၚ်ဂွံဒှ်မၞိဟ်ခိုဟ်မွဲညးအဲမၚ်မွဲရံၚ်စံၚ်ဗဂဵုလဟဵုညံၚ်ဂွံဂတာပ်အခိၚ်အခေတ်ကာလဒေသအိုတ်ညိ။
၁ ၊ (၁၄)သာ်တြုံတၠသ္ၚိတံဒးကေတ်တာလျိုၚ်လ္တူဗြဴဇကုအခိၚ်ပ္တိုန်ဋိသိန္ဓိ၊
အလန်ဏံတှ်ေဒှ်လပါ်တာလျိုၚ်မၞိဟ်တြုံတအ်ဒးကေတ်တာလျိုၚ်အခိၚ်တီကေတ်ဗြဴဇကုဂွံယဲဒိုက်ဗုၚ်တုဲ ထေက်ကြိုက်ဒးမိပ်စိုတ်ဟွံလအ်ဇကုဒှ်ကၠုၚ်အပါညးရ၊ လ္ပထ္ၜးကဵုရုပ်ရဴကဵုဗြဴဇကုဂွံဆဵုတီဗြဴဗုၚ်တုဲဟွံမိပ်စိုတ်တုဲ လပါ်ညးဗြဴဗုၚ်တံဂှ်ဒှ်ကၠုၚ်စိုတ်ဟွံခိုဟ်ဂှ်တွဵုညိ၊ ဟိုတ်ဒှ်သာ်ဏံတုဲ သွက်မၞိဟ်တြုံတံဂှ်လေဝ် တီဗြဴဇကုဗုၚ်ယျတုဲဒးမိပ်စိုတ်ပဳတိကဵုဗြဴဇကုဂွံဆဵုတုဲ လပါ်ညးဗြဴတံဂှ်ပၠန်လေဝ်သ္ဂောံဂွံကၠုၚ်ဂဥုဲဒြဟတ်မွဲသွုၚ် ဂွံလျုၚ်ဇြုၚ်သ္ဍိုက်ဓဝ်ပတေဟ်လ္တူတြုံဇကုဂွံဂၠိုၚ်တိုန်ဂှ်ကီု သွက်ဂွံဒှ်အပါကောန်ၚာ်အနာဂတ်ဟွံလအ်တေံကီုရ။
သွက်မၞိဟ်တြုံတအ်ဂှ်လေဝ် ဒးကၠိုဟ်စိုတ် ဒးသၠးအခေါၚ် ဒးပအပ်ကဵုမေတ္တာကေုာံဓဝ်ဆာန်ဓဝ်ဂီုကၠီုသွက်ဗြဴဇကုဂၠိုၚ်ကၠုၚ်ကီုတုဲ သွက်မၞိဟ်တြုံတံဂှ်ပၠန် ဒ္ဂေတ်ပွစဳပၞောန်နာနာသာ်ဗီုလောန်ကၠုၚ်တေံဂှ်လေဝ် တ္ၚဲဏံဗြဴဇကုဗုၚ်ကၠုၚ်ယျတုဲတှ်ေဒးပြံၚ်သၠာဲဒးကေတ်တာလျိုၚ်ညံၚ်ဂွံဒှ်အပါကောန်ၚာ်မွဲညိ၊ မပ္တံဗွဲတုန်ဟီုဂှ်တှ်ေ ကမၠောန်နာနာပ္ဍဲသ္ၚိတံဂှ်ဒးကေတ်ကဵုတာလျိုန်ညိ၊ သွက်မၞိဟ်တြုံသုၚ်မံၚ်ၜံက်တံဂှ်တှ်ေ ဒးဒေါအ်ဇူထောံပွမသုၚ်ၜံက်ဂှ်ညိ၊ ယက်ၜံက်တံဂှ်ကဵုအန္တရာယ်ကဵုကောန်ၚာ်ပ္ဍဲဂဝ်ဂၞဴမိယာဲဍေံရ၊ ဒးဒေါအ်ဇူထောံနူသုၚ်အရက်သုရာစၞဗ္ၜူဓလူနာနာသာ်တံဂှ်ကီုညိ၊ စၞးတံဏံဂှ်ကၠောန်ဗဒှ်ကဵုမၞိဟ်တြုံတံအိုတ်ပိုတ်ကၠုၚ်သတိတုဲဒှ်ကၠုၚ်အန္တရာယ်သွက်မိယာဲဂွံလဝ်ယဲဒိုက်သီုကဵုကောန်ၚာ်ပ္ဍဲဂဝ်ဂၞဴတေဴကီုရ။
သွက်မၞိဟ်ဗုၚ်တံဂှ်တှ်ေ နွံဗၟိက်ကဵုဂဥုဲဒြဟတ်စိုတ် နွံဗၟိက်ဓဝ်ဆာန်လ္တူတြုံ ဒးဗက်အလိုက်အၚာပ်စိုတ်ဂၠိုၚ်နူကၠာဟွံဂွံဗုၚ်တေံဏီရ၊ သွက်ညးဗြဴဂွံလဝ်ဂဝ်ဂၞဴတံဂှ်တှ်ေ အရီုနာနာပြံၚ်သၠာဲစလောဲသွာမံၚ်တုဲ ထေဲလေဝ်လောဲသွာ စိုတ်ဂၠိၚံက်လေဝ်လောဲသွာ လ္ၚဵုဂှ်လရိုအ်ညေဟ်ကဵုတြုံဂွံသၠေဟ်လေဝ်နွံတုဲ ညးဗုၚ်ဗုၚ်တံပြံၚ်သၠာဲအာတုဲ ဖန်ဗဒှ်ကဵုညးဗြဴဗုၚ်ဗုၚ်တံထေဲစလောဲ ဍိုန်ၜတ်စလောဲရ၊ သွက်မၞိဟ်တြုံတအ်ထေက်ကဵုဒးဗ္ဍိုက်ဗပေၚ်ကဵုဂှ်တှ်ေ ဒးကၠိုဟ်စိုတ် ဒးကဵုဒြဟတ်စိုတ် တုဲတှ်ေ ဒးဟီုအရေဝ်ဍိုန်ၜတ်လ္တူဗြဴဇကုအဃောဗုၚ်မံၚ်တံဂှ်ညိ။
ဒးကဵုအခိၚ်သွက်ဗြဴဇကုဒးတိက်ဖဲဖဲညိ၊ ဒးသၟာန်စပရေၚ်ထတ်ယုက်နာနာဆေၚ်စပ်ကဵုဗုၚ်ယိုက်လဝ်ယဲဒိုက်တံစဵုကဵုစိုပ်အခိၚ်(၉)ဂိတုတေံကီုရ။
မၞိဟ်တြုံညးမဒှ်အပါကောန်ၚာ်တံဂှ်ဟေၚ်ရကၠောန်ဗဒှ်ကဵုစိုတ်သမ္ဘာဂွံလဝ်ယဲဒိုက်တံအရီုစိုတ်နာနာဂွံညိၚ်ဝတ်ပေၚ်စိုတ်လ္တူအၚာပ်ဗြဴဇကုအိုတ်တုဲ မိယာဲဍေံလေဝ်ထတ်ယုက်မံၚ်ခိုဟ် ကောန်ၚာ်နွံမံၚ်ပ္ဍဲဂဝ်ဂၞဴတေံဂှ်လေဝ်ပရေၚ်ထတ်ယုက်ခိုဟ်တုဲ နဲကဲဗဂဵုလဟဵုနာနာတံဂှ်လေဝ်ဍိုက်ပေၚ်တုဲ ဣဏံလေဝ်အပါမွဲကေတ်မံၚ်တာလျိုၚ်ညံၚ်ညးဗြဴတံယိုက်လဝ်ယဲဒိုက်တုပ်တုပ်ကီုရ၊ ပရေၚ်ပရောသာ်ဏံယဝ်ရပိုဲတံလဴဝေၚ်ကောန်တံကလေၚ်ဝေၚ်ဏောၚ်တှ်ေ အပါကဵုမိယာဲညးၜါဂှ် ကောန်တံဆာန်တုပ်တုပ်ပ္တိုန်ၚုဟ်မးဟွံမာန်ရဟွံသေၚ်ဟာ၊ ဟိုတ်ဒှ်သာ်ဏံတုဲ သွက်မၞိဟ်တြုံတအ်လေဝ် အခိၚ်ဗြဴဇကုဗုၚ်ဒၟံၚ်ဂှ် ဟွံမွယ်တာလျိုၚ်ဂှ်လ္ပကဵုဒှ်အိုတ်တုဲ အခိၚ်ကောန်ပိုဲတိတ်ကၠုၚ်ဂွံလဴစကဵုဍေံမုအပါမွဲဗိုၚ်ကေတ်မံၚ်တာလျိုၚ်အဃောကောန်နွံမံၚ်ပ္ဍဲဂဝ်ဂၞဴတေံဂှ်ရော ။
(၁၄)သာ်တြုံတၠသ္ၚိတံဒးကေတ်တာလျိုၚ်လ္တူဗြဴဇကုအခိၚ်ပ္တိုန်ဋိသိန္ဓိ၊
၁ ၊ တြုံတၠသ္ၚိတံဒးရုဲစၞစအဟာရအခိၚ်ဗြဴဇကုဗုၚ်ဂှ်ညိ၊
ၜံက်ဂှ်ဟွံကဵုသုၚ်ရ၊ အရက်သုရာစၞဗ္ၜူလေဝ်ဟွံကေတ်ကဵုညးဗြဴဂွံလဝ်ယဲဒိုက်တံရ၊ ဒးအာဂၠာဲစၞစအၚာပ်စိုတ်ဗီုမိယာဲဍေံမိက်သ္ဂောံစဂှ်တှ်ေ ဒးဂၠာဲကၠောန်ဍုန်တိုပ်ကဵုစညိ၊ ပ္ဍဲကဵုအခိၚ်အကြာမၞိဟ်ဗြဴဗုၚ်တံဂှ် နွံဗၟိက်စစၞစဂၠိုၚ်မံၚ်တုဲ ဒှ်သွက်ဂွံခိုဟ်ကဵုပရေၚ်ထတ်ယုက်ကောန်ၚာ်နွံပ္ဍဲဗုၚ်တေံဂှ်တုဲ တၠသ္ၚိတံဂှ်လေဝ် ဒးဂၠာဲကဵုစစၞနွံကဵုဓါတ်လပါ်ဒြဟတ်ဂၠိုၚ်ဂၠိုၚ်ညိ၊ စၞလဵုကတၚ်ဂၠိုၚ်အာ စၞလဵုဖၞုၚ်ဍာတ်ဂၠိုၚ်အာတံဂှ်လ္ပကဵုစဂၠိုၚ်ညိ၊ စၞနွံဓါတ်သာ်ဏံ ( Protein, Calcium, Amino acids, Omega 3, 6, 9 ) ဒးကဵုစထေက်ရ။
၂ ၊ တက်ကျာဗှ်လိက်ဒယှ်ေဒွက်ကဵုကောန်နွံပ္ဍဲဗုၚ်ကလၚ်၊
ကောန်ၚာ်နွံပ္ဍဲဂဝ်ဂၞဴတေံဂှ်ဂွံမိၚ်ကေတ်အပါဍေံမုဟီုလဴတံနာနာမာန်ရ၊ ဟိုတ်ဒှ်သာ်ဏံတုဲ အပါကောန်ၚာ်တံဂှ်လေဝ် ဒးစုက်လုက်ရပ်ပ္ဍဲဗုၚ်မိယာဲဍေံတုဲ ပွမမေါဝ်စုတ်ပ္ဍဲဗုၚ်ဂှ်ကီု ကောန်ၚာ်နွံပ္ဍဲဗုၚ်တေံဂွံစုက်လုက်ကဵုအပါနူစနွံပ္ဍဲဂဝ်ဂၞဴတေံရ၊ တုဲတှ်ေ သိုၚ်ဗဒှ်ကဵုမိယာဲကောန်ၚာ်တံမိပ်စိုတ်ပဳတိဟွံအောန်မာန်ရ။
၃ ၊ ဒှ်မၞိဟ်တက်ကျာခိုဟ်မွဲတုဲ ဒးဒှ်မၞိဟ်ဒုၚ်ကလၚ်ခိုဟ်မွဲညိ၊
ပ္ဍဲအခိၚ်သမ္ဘာဂွံယဲဒိုက်ဂှ်တှ်ေ အရီုစိုတ်မိယာဲဍေံပြံၚ်သၠာဲစလောဲသွာမံၚ်တုဲ မၞိဟ်တြုံတံလေဝ်ဒးဒှ်မၞိဟ်ကလၚ်စအရေတ်ဗြဴခိုဟ်ခိုဟ်မွဲညိ၊ ဒးဒုၚ်ကလၚ်ကေတ်ပြသၞာနာနာနူသမ္ဘာဂွံလဝ်ယဲဒိုက်မာန်ကီု ၜိုန်ဆပြသၞာဂှ်ဍောန်လောန်တၟာမဗတဳကီုလေဝ် ဒးစွံၚုဟ်မးကွေံကွေံတုဲ ကဵုသမ္ဘာဇကုဂွံကၠဟ်ပ္တိတ်အရာနွံပ္ဍဲစိုတ်တေံဂွံအိုတ်အးအာတုဲ ဇကုဒးဒှ်မၞိဟ်ယိုက်ဒုၚ်ကေတ်ဖအိုတ်ညိ၊ မၞိဟ်တြုံတံဂှ်ပၠန်လေဝ် ဒးဟီုအရေဝ်တံၚ်စိုတ်ဓါတ်သွက်မိယာဲဍေံဂွံကလၚ်ခိုဟ်ခိုဟ်ဂှ်လေဝ် ဒးဒှ်မၞိဟ်တက်ကျာခိုဟ်မွဲညိ၊ ညံၚ်ရဴသာ်ဏံကီု (မဂဳတ္ၚဲဏံဗီုလဵု မံၚ်စပြံၚ်သၠာဲအာနွံကီုဟာ ဂိဒၞာဲလဵုဓအံၚ်ဒၞာဲလဵုကီုရော ကျမံၚ်ဗုၚ်မိက်ဂွံမံၚ်ဗစးဖိုဟ်ဏီဟာ၊ မုမိက်သ္ဂောံစစၞတၟေၚ်တၟေၚ်နွံဟာအဲဂွံအာရာန်နၚ်ကဵု)သာ်ဏံဗွဲတုန်ဒးသၟာန်တက်ဝေၚ်ကျာညိ။
၄ ၊ မၞိဟ်တြုံတအ်ဒးရပ်ပတ်ကဵုဗြဴဇကုကီုညိ၊
၅ ၊ မၚ်မွဲစၞစခိုဟ်ခိုဟ်ညိ၊
၆ ၊ ယဝ်ရမၞိဟ်တြုံတံတိတ်အာမ္ၚးသ္ၚိလအ်အာဏောၚ်တှ်ေ ဒးဆက်နၚ်ဖုၚ်သၟာန်စပရေၚ်ဗြဴဇကုကီုညိ၊
၇ ၊ မၞိဟ်တြုံတအ်ဒးမၚ်မွဲဗြဴဗုၚ်ဇကုပွမဝေၚ်ဒြဟတ်နာနာ၊
၈ ၊ မၞိဟ်တြုံတအ်ဒးကဵုမံၚ်သတိအရာကိစ္စဇၞော်ဇၞော်ဟွံဂွံဒှ်အန္တရာဲနာနာ၊
၉ ၊ မၞိဟ်တြုံတအ်ဒးဗိုၚ်ကၠောန်ကမၠောန်ပ္ဍဲသ္ၚိညိ၊
၁၀ ၊ မၞိဟ်တြုံတအ်ဒးကော်အာဝေၚ်ဇူကာယကီုညိ၊
၁၁ ၊ ပွမဇူဒီု၊
၁၂ ၊ ဒးသမ္တီလဝ်အခိၚ်အာစာဂဥုဲတံချိၚ်လဝ်ဒးအာ၊
၁၃ ၊ ကြပ်ၜံၚ်တေံဏောၚ် ထေက်ကဵုဒးပဠေဝ်လဝ်ကပေါတ်သွက်ဂွံအာရုၚ်ဂဥုဲ၊
၁၄ ၊ အခိၚ်ၜံၚ်တေံဟေၚ်ဒးကဵုဂဥုဲဒြဟတ်သွက်ဗြဴဇကုညိ၊
နိဿဲလဝ်နူပရေၚ်ဆဵုဂဗလၟေၚ်လၟေၚ်တ္ၚဲ ။