သၠ​ပတ်​ပ​ထ​မ​ကဝ် ၁၂

သၠ​ပတ်​ပ​ထ​မ​ကဝ် ၁၂

^၁ကျာ်ထာဝရဂှ်လေ ကော်အာဗြာမ်တုဲ၊ နူကဵုရးမၞးနူအပ္ဍဲမိမကောဒေံကလောဝေါၚ်သဂမၠိုၚ်တိတ်တုဲမ္ဂး အာပ္ဍဲရးအဲမထၜးရ။ ^၂အဲဝွံ မကဵုမၞးဒှ် ဂကူမၞိဟ်ဇၞော်ရောၚ်။ အဲကဵုပသေက်ပသဝ်တုဲ၊ ကဵုယၟုမၞးဇၞော်ပြဲရောၚ်။ မၞးဝွံ ဒှ်ညးမဂွံဒုၚ်မၚ်္ဂလရောၚ်။ ^၃ပ္ဍဲကဵုညးမကဵုမၚ်္ဂလပ္ဍဲမၞးဂှ် အဲကဵုမၚ်္ဂလရောၚ်။ ညးမချဴလက်မ္ဂးဂှ် အဲချဴလက်ရောၚ်။ နကဵုမၞးဂှ်လေ ဂကူမၞိဟ်အိုတ်သီုတံဝွံ ဂွံဒုၚ်မ္ၚဵုမၚ်္ဂလအိုတ်ရောၚ် သာ်ဝွံ ဟီုပၟိၚ်ရ။ ^၄သာ်ဂှ် အတိုၚ်ကျာ်ထာဝရမဟီုပၟိၚ်ဂှ် အာဗြာမ်တိတ်အာတုဲ၊ လဝ်တဗက်ကီုရ။ အာဗြာမ်ဝွံ ကာလမတိတ်အာနူဍုၚ်ခါရာန်ဂှ် နွံအယုက်ထပှ်စှ်ောမသုန်သၞာံရ။ ^၅အာဗြာမ်ဝွံ သမ္ဘာညးသာရာဲ၊ ကောန်ကောညးလဝ်တကဵု ဒြပ်ဆမဂွံဂှ်လေကီု၊ မၞိဟ်မဂွံပ္ဍဲဍုၚ်ခါရာန်တံဂှ်လေကီုကေတ်တုဲ တၞဟ်နသၟိက်စိုပ်ပ္ဍဲခါနာန်ဂှ် တိတ်အာတုဲ စိုပ်အာရးဂှ်အိုတ်ရ။

^၆အာဗြာမ်ဝွံ သဍောန်အာရးဂှ်တုဲ၊ စိုပ်အာတၞံကြောတ်မောဝ်ရေပ္ဍဲဒေသသှေခေမ်ရ။ ပ္ဍဲကာလဂှ် ကောန်ဂကူခါနာန်တံဝွံ နွံပ္ဍဲရးဂှ်ရ။ ^၇ကျာ်ထာဝရဝွံ ပြာကတ်ပ္ဍဲအာဗြာမ်တုဲ၊ တေံရးဝွံဂှ် အဲကဵုပ္ဍဲဂကူဝေါၚ်သမၞးရောၚ် သာ်ဝွံ ဟီုပၟိၚ်ရ။ သွက်ကျာ်ထာဝရမပြာကတ်သာ်ဂှ်၊ ပ္ဍဲဒေသတေံဂှ် ဒက်ပၞၚ်ယတ်တဴရ။

^၈အာနူဒေသဂှ်ပၠန်တုဲ၊ ပြံၚ်ပ္ဍဲဒဵုမနွံဗၟံက်ဍုၚ်ၜေထလမ္ဂး ပ္ဍဲအကြာဍုၚ်ၜေထလလ္ပာ်ဗၟံက်၊ ဍုၚ်အာဣလ္ပာ်ပလိုတ်သြိုၚ်တာဲတုဲ၊ ဒက်ပၞၚ်ယတ်သွက်ကျာ်ထာဝရမ္ဂး ပပတ္တဏာကဵုနာမကျာ်ထာဝရရ။ ^၉အာဗြာမ်ဝွံ အာဒၟံၚ်တရဴ ပြံၚ်ဒၟံၚ်ဒၞာဲစိုပ်အာပ္ဍဲဒိုဟ်သမၠုၚ်ကျာရ။

^၁၀ကြဴဂှ် ဒှ်အာကနောဝ်ဗယဵုပ္ဍဲရးခါနာန်ရ။ ဟိုတ်စဏစမခတ်က္ဍန်ဗွဲမလောန်ပ္ဍဲရးဂှ်တုဲ၊ အာဗြာမ်ဝွံ တၞဟ်နသၟိက်ဂွံဒှ်တၟုဲပ္ဍဲရး အာဲဂုတ္တုဂှ် အာတဴရ။ ^၁၁ကာလမကြပ်ကဵုရးအာဲဂုတ္တုဂှ်၊ ကဵုသမ္ဘာညးသာရာဲ၊ မၞးမဒှ်ဗြဴမဂါဝ်ဆာဲဂှ် အဲတီရ။ ^၁၂ကာလမၞိဟ်အာဲဂုတ္တုတံမညာတ်မၞးဂှ်၊ ဗြဴဝွံ မဒှ်သမ္ဘာညးရ သာ်ဝွံ ဟီုမ္ဂး ဂစိုတ်အဲတုဲ ကဵုမၞးဂျိုၚ်လမျီုရောၚ်။ ^၁၃ဒှ်သာ်ဂှ်တုဲ ဒဒှ်မၞးမဒှ်ၝဲအဲဂှ် ဟီုညိ။ သာ်ဂှ် ဟီုမ္ဂး၊ အကွက်မၞးအဲဂွံခိုဟ်စရောၚ်။ နကဵုဂုန်မၞးဂှ် အဲဝွံ ဂျိုၚ်လမျီုရောၚ် သာ်ဝွံ ဟီုတဴရ။

^၁၄ကာလအာဗြာမ်စိုပ်ပ္ဍဲရးအာဲဂုတ္တုဂှ်၊ ဒဒှ်ဗြဴညးမဂေါဝ်ဆာဲဗွဲမလောန်ဂှ် မၞိဟ်အာဲဂုတ္တုတံဝွံ ညာတ်အိုတ်ရ။ ^၁၅အမာတ်ဒဴဗညာဨကရာတ်ဖာရောဝ်တံဝွံ ညာတ်တုဲ၊ ပ္ဍဲဂတဨကရာတ်ထိုၚ်သးတုဲမ္ဂး၊ ဂွံပၠုပ်ပ္ဍဲနန်အိုတ်ရ။ ^၁၆ဨကရာတ်ဖာရောဝ်ဝွံ အကွက်ဗြဴဂှ် ပဂုန်ကဵုအာဗြာမ်တုဲ၊ ညးဝွံ ဍိုက်ပေၚ်တဴကဵုသဵု၊ ဂၠဴ၊ မာဲကၟက်၊ မာဲၝောံ၊ ဍိက်တြုံ၊ ဍိက်ဗြဴ၊ အုတ်ဂမၠိုၚ်ရ။ ^၁၇ကျာ်ထာဝရဝွံ ဟိုတ်နူကဵုသာရာဲသမ္ဘာအာဗြာမ်ဂှ်၊ မပ္တံကဵု ဨကရာတ်ဖာရောဝ် နကဵုဒန်ဘဲဗွဲမဇၞော်ဂှ် လၟေတ်ဂကူဝေါၚ်သနန်တဴရ။ ^၁၈ဨကရာတ်ဖာရောဝ်ဂှ်လေ ကော်အာဗြာမ်တုဲ ပွမၞးမပပ္ဍဲအဲဂှ် ပသာ်ရော။ ညးဝွံ ဒဒှ်မဒှ်သမ္ဘာမၞးဂှ် မူဟိုတ်ဟွံဟီုကဵုအဲရော။ ^၁၉အဲဝွံ တၞဟ်နသၟိက်ကဵု သီကေတ်ညးတုဲ၊ ညးဝွံ ဒှ်ၝဲအဲရ သာ်ဝွံ မူဟိုတ်ဟီုကဵုအဲရော။ လၟုဟ်ဝွံ ကေတ်သမ္ဘာမၞးတုဲ အာရသာ်ဝွံ အသံမနွံရ။ ^၂၀သာ်ဂှ် ဨကရာတ်ဖာရောဝ်စဳရေၚ်အမှုအာဗြာမ်တုဲ နကဵုမဗ္ကန်လဝ်ကဵုမၞိဟ်ဇကုတံဂှ်၊ ညးတံဝွံ ကောံကုဒြပ်ဆမနွံပ္ဍဲအာဗြာမ်ဂှ် ဗလးဏာသီုကောန်ဗြဴညးအိုတ်ရ။

နိဿဲ

ဂကောံသၠပတ်သမ္မာမန်