သၠ​ပတ်​ပ​ထ​မ​ကဝ် ၁၃

သၠ​ပတ်​ပ​ထ​မ​ကဝ် ၁၃

^၁အာဗြာမ်သီုကောန်ဗြဴသမ္ဘာဝွံလေ၊ ကောံကုလဝ်တမွဲစွံဂှ် ကေတ်ဒြပ်ဆမနွံပ္ဍဲဇကုတုဲ၊ တိတ်အာနူကဵုရးအာဲဂုတ္တုတုဲ၊ စိုပ်အာပ္ဍဲရးသမၠုၚ်ကျာရ။ ^၂ပ္ဍဲကာလဂှ် အာဗြာမ်ဝွံ သဵု၊ ဂၠဴတံဂှ်လေကီု၊ ထဝ်သြန်လေကီုဂွံဗွဲမလောန်ရ။ ^၃မွဲဝါပၠန် နူရးသမၠုၚ်ကျာအာတရဴတုဲ၊ စိုပ်အာဒဵုၜေထလ၊ ပ္ဍဲဒေသမသြိုၚ်တာဲကိုပ်ကၠာဂှ် ^၄အကြာဍုၚ်ၜေထလကဵုဍုၚ်အာဣ၊ ဒေသမဒက်ပၞၚ်ယတ်ကၠာဂှ်ရ။ ပ္ဍဲဒေသဂှ် အာဗြာမ်ဂှ် ဝွံ ပပတ္တဏာကဵုနာမကျာ်ထာဝရရ။ ^၅လဝ်တမဗက်အာမွဲစွံကဵုအာဗြာမ်ဂှ်လေ နွံကဵုသဵု၊ ဂၠဴဂမၠိုၚ်ကဵုတာဲဂမၠိုၚ်ရ။ ^၆တေံမၞိဟ်ၜါတလတံဝွံ တၞဟ်နသၟိက်မံၚ်မွဲစွံဂှ် တေံတိဂှ် ဟွံသၟက်ရထ။ ဒြပ်ဂၠိုၚ်ဗွဲမလောန်တုဲ၊ ညးတံမံၚ်မွဲစွံ ဟွံမာန်အိုတ်။ ^၇ပၟၚ်ဂၠဴအာဗြာမ်ကဵုပၟၚ်ဂၠဴလဝ်တတံဂှ်လေ သေက်ဇဵုအိုတ်ရ။ ပ္ဍဲကာလဂှ် ကောန်ဂကူခါနာန်ကဵုကောန်ဂကူဖေရဇိတံဝွံ နွံပ္ဍဲရးတေံအိုတ်ရောၚ်။ ^၈အာဗြာမ်ဂှ်လေ ပိုညးဝွံ ကောကဵုဒေံဒှ်တုဲ၊ ပ္ဍဲအဲကဵုမၞးဂှ်လေကီု၊ ပ္ဍဲပၟၚ်ဂၠဴအဲကဵုပၟၚ်ဂၠဴမၞးတံဂှ်လေကီု၊ ဒဒှ်မသေက်ဇဵုလ္ပကဵုနွံ။ ^၉မွဲဂၠးတိနွံဂတမၞးဟွံသေၚ်ဟာ၊ သ္ဍးအာနူအဲတုဲ မံၚ်တဴရ။ မၞးဝွံ အာလ္ပာ်တဲဇွိမ္ဂး၊ အဲအာလ္ပာ်တဲသ္တုံရောၚ်။ မၞးဝွံ အာလ္ပာ်တဲသ္တုံမ္ဂး၊ အဲအာလ္ပာ်တဲဇွိရောၚ် သာ်ဝွံ ဟီုရ။ ^၁၀ပ္ဍဲကာလဂှ် ကၠာကျာ်ထာဝရဟွံပလီုပလာ်ဍုၚ်သောဝ်ဍောမ်ကဵုဍုၚ်ဂေါဝ်မောဝ်ရဏီဂှ်၊ ဂၠံၚ်မအာဍုၚ်ဇောဝ်ရ၊ ပ္ဍဲဇၟာပ်ဇၟာပ်ဒေသပွဳဗွိုၚ်ၜဳယဝ်ဍာန်ဍာ်ဂၠိုၚ်တုဲ၊ ညံၚ်ကဵုကၠံကျာ်ထာဝရဂှ်လေကီု၊ ညံၚ်ကဵုရးအာဲဂုတ္တုဂှ်လေကီု ဒဒှ်မဒှ်ဂှ် လဝ်တရံၚ်လၟဳတုဲ ညာတ်ရ။ ^၁၁လဝ်တဝွံ အလုံမွဲခလံက်ၜဳယဝ်ဍာန်ရုဲကေတ်တုဲ ပြံၚ်အာဒိုဟ်ဗၟံက်မ္ဂး၊ ညးမွဲကဵုညးမွဲပြးအာရၚ်သ္ကံအိုတ်ရ။ ^၁၂အာဗြာမ်ဝွံ မံၚ်ပ္ဍဲရးခါနာန်ရ။ လဝ်တမ္ဂးဂှ်၊ မံၚ်ပ္ဍဲဍုၚ်ပွဳဗွိုၚ်ၜဳဂမၠိုၚ်တုဲ၊ ဇရေၚ်ဍုၚ်သောဝ်ဍောမ်သြိုၚ်တာဲတဴရ။ ^၁၃ကောန်ဍုၚ်သောဝ်ဍောမ်တံဝွံ ဒှ်မၞိဟ်တမြံ၊ မၞိဟ်ဒုဟ်မဂၠိုၚ်ဗွဲမလောန်ပ္ဍဲဂတကျာ်ထာဝရအိုတ်ရောၚ်။

^၁၄လဝ်တဝွံ သ္ဍးအာနူအာဗြာမ်တုဲ၊ ကျာ်ထာဝရကော်အာဗြာမ်မ္ဂး၊ နူကဵုဒေသမၞးမနွံဂှ် သမၠုၚ်ကျာသၟဝ်ကျာ၊ ဗၟံက်၊ ပလိုတ်ရံၚ်လၟဳရ။ ^၁၅မွဲဂၠးတိမၞးမညာတ်ဂှ် ပ္ဍဲကဵုမၞးဂှ်လေကီု၊ ပ္ဍဲကဵုဂကူဝေါၚ်သမၞးဂှ်လေကီုအဲကဵုလမိုန်ကာလရောၚ်။ ^၁၆ဂကူဝေါၚ်သမၞးဂှ် ညံၚ်ကဵုခနိက်တိအဲကဵုဂၠိုၚ်တိုန်ရောၚ်။ ဒှ်သာ်ဂှ်တုဲ မၞိဟ်ဝွံ ရိုဟ်ခနိက်တိမာန်မ္ဂး၊ ရိုဟ်ဂကူဝေါၚ်သမၞးမာန်ရောၚ်။ ^၁၇မၞးက္တဵုတုဲ တိဂှ် လက်ဇလိၚ်ဂှ်လေကီု၊ လက်အနာံဂှ်လေကီုသဍောန်အာရ။ အဲကဵုပ္ဍဲမၞးရောၚ် သာ်ဝွံ ဟီုပၟိၚ်ရ။ ^၁၈မွဲဝါပၠန်အာဗြာမ်ပြံၚ်တာဲတုဲ၊ ကာလမစိုပ်ပ္ဍဲဂြိုပ်ကြောတ်မာမ်ရေ၊ ဍုၚ်ဟေဗြောန်စှ်ေဒၞာဲတုဲ၊ သွက်ကျာ်ထာဝရဒက်ပၞၚ်ယတ်တဴရ။

နိဿဲ

ဂကောံသၠပတ်သမ္မာမန်