သၠ​ပတ်​ပ​ထ​မ​ကဝ် ၁၅

သၠပတ်ပထမကဝ် ၁၅

ကြဴဂှ် နကဵုပယျးဒိုဟ်ဂလာန်ကျာ်ထာဝရစိုပ်ပ္ဍဲအာဗြာမ်တုဲ၊ မၞးအာဗြာမ်၊ လ္ပဂွိၚ်ဂွာဲ။ အဲဝွံ မဒှ်လ္ကံဗ္ဒးမၞးရ။ ဒတုဲကၟဝ်မၞးဝွံ ဇၞော်ဗွဲမလောန်ရ သာ်ဝွံ ဟီုပၟိၚ်မ္ဂး၊ ^၂အာဗြာမ်ဝွံ ကျာ်ထာဝရတလအဲ၊ အဲဝွံ ကောန်ဟွံမွဲဒးအာဒၟံၚ်ရ။ ဨလျာဇာကောန်ဍုၚ်ဍမာသကုဝွံ ဒးဒှ်ညးမဒုၚ်အာဲအဲရ။ ဒှ်သာ်ဂှ်တုဲ မူဂုန်တဳလပိုန်မပပ္ဍဲအဲရော သာ်ဝွံ ဟီုပ္တီရ။ ^၃မွဲဝါပၠန်အာဗြာမ်ဝွံ တဳလအဲဟွံကဵုတၞောဝ်ဒတောဝ်ပ္ဍဲအဲညးဒုၚ်သၠးဂဗ္ဘပ္ဍဲသ္ၚိအဲဝွံ ဒးဒှ်ညးမဒုၚ်အာဲအဲရ သာ်ဝွံ ဟီုပ္တီရ။ ^၄မွဲဝါပၠန်ဂလာန်ကျာ်ထာဝရမစိုပ်ကၠုၚ်မ္ဂးဂှ်၊ တေံညးဝွံ ဟွံဂွံဒှ်ညးမဒုၚ်အာဲမၞး။ ညးမတိတ်နူအပ္ဍဲဇကုမၞးဒှ်ညးမဒုၚ်အာဲမၞးရောၚ် သာ်ဝွံ ဟီုပၟိၚ်တုဲ ^၅တဳလပိုန်ဝွံ ပလံၚ်ပ္တိတ်အာဗြာမ်မ္ၚးတုဲ၊ လၟဳရံၚ်အကာသရ။ တော်ရိုဟ်သၞံၚ်ဂမၠိုၚ်မာန်မ္ဂး၊ တော်ရိုဟ်ရ။ တၞောဝ်ဒတောဝ်မၞးဝွံ ဒှ်သာ်ဂှ်ရောၚ် သာ်ဝွံ ဟီုပၟိၚ်ရ။ ^၆အာဗြာမ်ဝွံ ပ္တေဟ်ကျာ်ထာဝရဂှ်ဒှ်တုဲ၊ ဒဒှ်မပ္တေဟ်ညးဂှ် ညံၚ်နဲဒဒှ်မသ္တပ်လဂူဂှ် တဳလပိုန်သမ္တီလဝ်ရ။

^၇မွဲဝါပၠန်၊ အဲဝွံ သွက်မၞးဂွံဒုၚ်အာဲကၟာဲရးဝွံဂှ် တၞဟ်နသၟိက်ကဵုမၞးတုဲ ဒှ်ကျာ်ထာဝရမပလံၚ်ပ္တိတ်မၞးနူကဵုဍုၚ်ဥရ ကောန်ရးခါလဍာဲမမံၚ်ဂှ်ရ သာ်ဝွံ ဟီုပၟိၚ်တုဲ ^၈ကျာ်ထာဝရနာဲအဲ၊ ရးဝွံဂှ် ဒဒှ်အဲမဒးဒုၚ်အာဲကၟာဲရောၚ်ဂှ် ပသာ်ဂွံတီရော သာ်ဝွံ ဟီုပ္တီရ။ ^၉ကျာ်ထာဝရဂှ်လေ ဂၠဴၝောံမနွံအယုက်ပိသၞာံမွဲ၊ ဗၜေံၝောံမနွံအယုက်ပိသၞာံမွဲ၊ သဵုကၟက်မနွံအယုက်ပိသၞာံမွဲ၊ ဂစေံပူမွဲ၊ ဖရာပ်သၟတ်မွဲတံဂှ် သွက်အဲကေတ်ရဟီုပၟိၚ်တုဲ အတိုၚ်တဳလပိုန်မဟီုပၟိၚ်ဂှ်၊ ^၁၀တေံတိရစ္ဆာန်အိုတ်သီုတံဂှ် ကေတ်တုဲ၊ ပါ်ကရေက်အဒေါဝ်မ္ဂး မွဲကရေက်ဓဝ်ကဵုမွဲကရေက်ပရေၚ်စွံလဝ်ရ။ ဂစေံတံဂှ် ဟွံကရေက်။ ^၁၁ကာလဂစေံၜံက်စဇွတံ မစှ်ေကၠုၚ် ပ္ဍဲလတူဇွတံဂှ် အာဗြာမ်ဗက်ကၠေံရ။ ^၁၂ကာလတ္ၚဲပၠိုတ်ဂှ် အာဗြာမ်ဝွံ နကဵုဒဒှ်မတိက်ဗွဲမဇၞော်ဂှ် တိက်သၠိၚ်မ္ဂး ဆဵု ဒမၠုဗွဲမသ္တီုတုဲ စိုပ်ဒဒှ်မဖေက်လ္ကိုတ်ရ။ ^၁၃ကျာ်ထာဝရဂှ်လေ တၞောဝ်မၞးဝွံ ပ္ဍဲရးဂကူညးတၞဟ်မပိုၚ်ဂှ် ဒုၚ်တၟုဲအိုတ်တုဲ၊ ပ္ဍဲဂကူညးတၞဟ်ဂှ် ဒဒှ်မဍဵုဍိုက်လုကဴပန်ကၠံသၞာံဒးဒုၚ်အိုတ်ရောၚ်ဂှ် သမ္တီလဝ်ဨကန္တရ။ ^၁၄ဂကူမၞိဟ်မစကာညးတံဂှ် အဲစဳရေၚ်ရောၚ်။ ကြဴဂှ် ညးတံဝွံ ကဵုပိုန်ဒြပ်ဗွဲမဂၠိုၚ်ဂှ် တိတ်ကၠုၚ်ရောၚ်။ ^၁၅မၞးဝွံ ပ္ဍဲထာန်ဇုဇဗဴလတံဂှ် ဂွံအာဗွဲမသ္ၚိတ်ဇြရောၚ်။ အယုက်ဇၞော်ဂၠိၚ်တုဲ ဂွံဒုၚ်တိုပ်ရောၚ်။ ^၁၆ကာလပန်အဆက်ဂကူမၞိဟ်မလောန်ကၠုၚ်ဂှ် ညးတံဝွံ ကလေၚ်ကၠုၚ်ပ္ဍဲရးဝွံပၠန်ရောၚ်။ ဒုဟ်ဒုစရိုတ်ကောန်ဂကူအာမောဝ်ရိဝွံ ဟွံစိစုံဏီ သာ်ဝွံ ဟီုပၟိၚ်ကဵုအဗြာမ်ရ။

^၁၇မွဲဝါပၠန် တ္ၚဲပၠိုတ်တုဲ ကာလမဂၠုဂှ်၊ ပ္ဍဲအဒါဝ်ဖျုန်မကရေက်လဝ်ဂှ်၊ ဖဴပၟတ်ယက်မတိတ်၊ ပၟတ်သ္ဍဴမယးတမးဝွံ သဍောန်အာကၠးကၠးရ။ ^၁၈ပ္ဍဲတ္ၚဲဂှ် ကျာ်ထာဝရဝွံ ဒက်ကတ္တိကကဵုအာဗြာမ်မ္ဂး၊ မပ္တံကဵုၜဳဇၞော်မတွံဂးၜဳဥဖရာတ်ဂှ်၊ ရးဝွံဂှ်လေကီု ^၁၉မၞိဟ်ကေနိ၊ မၞိဟ်ကေနဇိ၊ မၞိဟ်ကာဍမောဝ်နိ ^၂၀မၞိဟ်ဟိတ္တိ၊ မၞိဟ်ဖေရဇိဂှ်၊ မၞိဟ်ရေဖိမ်၊ မၞိဟ်အာမောရိ၊ မၞိဟ်ခါနနိ၊ မၞိဟ်ဂိရဂါသှိ၊ မၞိဟ်ယေၜုသိတံဂှ်လေကီု ^၂၁ပ္ဍဲကဵုတၞောဝ်ဒတောဝ်မၞးဂှ် အဲပ္အပ်ကဵုတုဲရ သာ်ဝွံ ဟီုပၟိၚ်ရ။

နိဿဲ

ဂကောံသၠပတ်သမ္မာမန်