သၠ​ပတ်​ပ​ထ​မ​ကဝ် ၄

သၠ​ပတ်​ပ​ထ​မ​ကဝ် ၄

^၁ကြဴဂှ် မၞိဟ်အာဍာမ်ဝွံ ဆက်ဆံကဵု သမ္ဘာညးမ္ဂး၊ ဨဝကေတ်ပတိသန္ဓိတုဲ သၠးဂဗ္ဘကာဣဏမ္ဂး အဲဂွံမၞိဟ်ကျာ်ထာဝရ သာ်ဝွံ ဟီုဂးရ။ ^၂မွဲဝါပၠန်ဒေံညးအာၜေလဂှ် သလးတုဲရ။ အာၜေလမ္ဂးဂှ်၊ ဒှ်ပၟၚ်သဵုရ။ ကာဣဏမ္ဂးဂှ် ဒှ်ညးမကၠောန်ဗ္ၚရ။ ^၃-၄စိုပ်အခိၚ်တုဲ၊ ကာဣဏဝွံ သွက်ဂွံပူဇဴသကာဂတကျာ်ထာဝရဂှ် ကေတ်နၚ် သတ်တိရ။ အာၜေလဂှ်လေ၊ နူအပ္ဍဲဒကံသဵုဇကုဂှ် ကေတ်နၚ်ကောန်ဂၠုလ္ၚဵုကဵုကၠေၚ်သဵုလ္ၚဵုရ။ ကျာ်ထာဝရဝွံ ကဵုအာၜေလကဵုပူဇဴသကာညးဂှ် ပမနသက်ကာရ။ ^၅ကဵုကာဣဏကဵုပူဇဴသကာညးဂှ် ကျာ်ဟွံပမနသက်ကာရ။ ဟိုတ်ဂှ်ရ ကာဣဏဝွံ ပဏောတ်တိတ် ဗွဲမလောန်တုဲ လီုမုက်ရ။ ^၆ကျာ်ထာဝရဂှ်လေ၊ မၞးဝွံ မူဟိုတ်ပၞောတ်တိတ်ရော။ မူဟိုတ်မုက်လီုရော။ ^၇မၞးပဗွဲမခိုဟ်မ္ဂး ဟွံဂွံအခေါၚ်ဟာ။ ပဟွံခိုဟ်မ္ဂး ယတ်ပရေဒုဟ် မအောပ်ဒၟံၚ်ပ္ဍဲဇရေၚ်တရၚ်ရ။ ညးဂွံဗက်ပၟိက်မၞးတုဲ မၞးဂွံအုပ်လဒံညးရ။ သာ်ဝွံ ဟီုပၟိၚ်ကဵုကာဣဏရ။

^၈ကာဣဏဂှ်လေ အာဝါအိုတ်စိုအ် သာ်ဝွံ ကော်ဒေံညးအာၜေလတုဲ ကာလမစိုတ်ပ္ဍဲဝါဂှ် ပသတ်တြုကဵုဒေံအာၜေလတုဲ ဂစိုတ်ထောံရ။ ^၉ကျာ်ထာဝရဂှ်လေ ဒေံမၞးအာၜေလဂှ် မူဒၞာဲမနွံရော သာ်ဝွံ သၟာန်ကာဣဏဂှ်တုဲ၊ အဲဍိက်ဟွံတီ။ အဲဍိက်ဒှ်ညးမၚ်ဒေံရဟာ သာ်ဝွံ ဟီုပ္တီရ။ ^၁၀ကျာ်ဂမျိုၚ်ဂှ်လေ၊ မၞးဝွံ မူပရရော။ ရမျှာၚ်ဆီဒေံမၞးမလရိုအ်ကော်မံၚ်အဲနူပ္ဍဲတိရသွံ။ ^၁၁ဒှ်သာ်ဂှ်တုဲ ကသဴတိဇၞော်မပံက်ပါၚ်ဇကုညံၚ်ဂွံဂိုၚ်ကေတ်ဆီဒေံမၞး ဟိုတ်မၞးမဒးဒုၚ်ဂှ်၊ ^၁၂မပ္တံကဵုလၟုဟ်တုဲ ကာလမၞးမကၠောန်ပ္ဍဲတိဂှ် အတိုၚ်ပက္ကတိဂှ် ဟွံဂွံသတ်ဒကောၚ်ရ။ ညးမဒးဒြေပ်အာလတူတိဇၞော်၊ ညးမဒးလန်ဂၚေၚ်အာပ္ဍဲဇၟာပ်ဇၟာပ်ဒေသမဂွံဒှ်ရောၚ် သာ်ဝွံ ဟီုပၟိၚ်တဴရ။ ^{၁၃-၁၄}ကာဣဏဂှ်လေ၊ ဒုဟ်အဲဍိက်ဝွံ ဇၞော်ဒဵုပရေဟွံမာန်ဟာ။ ပ္ဍဲတ္ၚဲဝွံ တဳလပိုန်မဗက်ပ္တိတ်အဲဍိက် နူဂၠးတိဇၞော်တုဲရ။ မုက္ခဝါတဳလဂုန်လေ အဲဍိက်ဟွံညာတ်ရ။ ညးမဒးဒြေပ်အာပ္ဍဲလတူတိဇၞော်၊ ညးမဒးလန်ဂၚေၚ်ဇၟာပ်ဇၟာပ်ဒေသဂှ် ဒးဒှ်ရောၚ်။ ဆညးမဆဵုတံဂှ် ဂစိုတ်အဲဍိက်ရောၚ် သာ်ဝွံ ဟီုပ္တီကျာ်ထာဝရရ။ ^၁၅ကျာ်ထာဝရဂှ်လေ ဒှ်သာ်ဂှ်တုဲ ယြဴညးမွဲမဂစိုတ်ကာဣဏမ္ဂးဂှ် ဒုဟ်ဒန်ထပှ်ဆဂှ် ဒးဒုၚ်ရောၚ် သာ်ဝွံ ဟီုပၟိၚ်တုဲ ညးမဆဵုကာဣဏဆဗၞတ်ညးမွဲတၞံနဟွံမိက်ကဵုဂစိုတ်ဂှ်၊ ကျာ်ထာဝရဝွံ ကဵုလဝ်သမ္တီပ္ဍဲညးရ။

^၁၆ကာဣဏဝွံ တိတ်အာနူဇရေၚ်ကျာ်ထာဝရတုဲ၊ မံၚ်ပ္ဍဲရးနဝ်ဍ၊ ဗၟံက်ဨဍေန်ရ။ ^၁၇ပ္ဍဲကာလဂှ် ကာဣဏဝွံ ဆက်ဆံကဵုဗြဴဇကုမ္ဂး၊ ညးဝွံ ကေတ်ပတိသန္ဓိတုဲ သၠးဂဗ္ဘကောန်ဨဏောက်ရ။ ကာဣဏဝွံလေ ဒက်ဍုၚ်တုဲ၊ အတိုၚ်ယၟုကောန်ညးဍုၚ်ဂှ် ကော်ဍုၚ်ဨဏောက်ရ။ ^၁၈ကောန်ဨဏောက်မ္ဂးဂှ်၊ ဣရာဒ်၊ ကောန်ဣရာဒ်မ္ဂးဂှ်၊ မဟုယေလ၊ ကောန်မဟုယေလမ္ဂးဂှ်၊ မထုသှလ၊ ကောန်မထုသှလမ္ဂးဂှ် လာမေက်ရောၚ်။

^{၁၉-၂၀}လာမေက်ဝွံ ဂွံပံၚ်ဖက် ကဵုဗြဴၜါမနွံယၟုအာဍကဵုဇိလတုဲ၊ အာဍဝွံ သၠးဂဗ္ဘကောန်ယာၜလရ။ တေံကောန်ဝွံ မ္ဂးဂှ် ဒှ်အစာမညးမမံၚ်ပ္ဍဲတာဲကဵုညးမဝဳပြေၚ်ဂၠဴရောၚ်။ ^၂၁ဒေံညးမနွံယၟုယုၜလမ္ဂးဂှ်၊ ဒှ်အစာညးမလေပ်တိၚ်စံၚ်၊ ပဂိုဟ်ခရာအိုတ်သီုတံဂှ်ရောၚ်။ ^၂၂ဇိလဝွံလေ သၠးဂဗ္ဘကောန်တုၜလကာဣဏဂှ်ရ။ ညးဝွံ မဒှ်အစာညးမတက်ဒမာတ်ထဝ်၊ ဒမာတ်ပသဲအိုတ်သီုတံဂှ်ရ။ ၝဲတုၜလကာဣဏမ္ဂးဂှ်၊ မနွံယၟုနေမရ။ ^၂၃လာမေက်ဂှ်လေ အာဍဇိလ၊ ရမျှာၚ်အဲမဟီုဂှ် သမ္တီအိုတ်ရ၊ သမ္ဘာလာမေက်တံ၊ ကလၚ်ဂလာန်အဲအိုတ်ရ။ မၞိဟ်မွဲမၜုၚ် တက်အဲမတွံဂးမၞိဟ်ဗၠာဲမွဲပယဲခရအဲဂှ် အဲဂစိုတ်တုဲရ။ ^၂၄ကာဣဏဝွံ ဂွံဓဝ်ထပှ်ဆမ္ဂး၊ ကွေံရလာမေက်ထဝ်ထပှ်စှ်ောထပှ်ဆရောၚ် သာ်ဝွံ ဟီုကဵုသမ္ဘာဇကုညိတံဂှ်ရ။

^၂၅အာဍာမ်ဝွံ ဆက်ဆံကဵုဗြဴညးပၠန်တုဲ ဗြဴညးသလးဂဗ္ဘကောန်တုဲ ခုတ်ယၟုညးသှေထရ။ ဟိုတ်မ္ဂးဂှ်၊ စဏအာၜေလကာဣဏမဂစိုတ်ဂှ်၊ ဝေါၚ်သတၞဟ်ဂှ် ကျာ်ဂမျိုၚ်မစွံလဝ်သွက်အဲဍိက်ရသာ်ဂှ် ဟီုရ။ ^၂၆သှေထဝွံ ဂွံကောန်တုဲ ခုတ်ယၟုညးဨဏောတ်ရ။ ပ္ဍဲကာလဂှ် ပသလဲကဵုနာဲမကျာ်ထာဝရဂှ်တုဲ မပ္တံရေဟ်သေဟ်အိုတ်ရ။

နိဿဲ

ဂကောံသၠပတ်သမ္မာမန်