သၠပတ်ပထမကဝ် ၆
သၠပတ်ပထမကဝ် ၆
[ပလေဝ်ဒါန် | ပလေဝ်ဒါန် တမ်ကၞက်]၁မၞိဟ်တံဝွံ ဂၠိုၚ်တိုန် ပ္ဍဲလတူဂၠးတိဇၞော်တုဲ၊ ကာလမဂွံကောန်ဗြဴဂမၠိုၚ်ဂှ် ကီု။ ၂ကောန်တြုံကျာ်ဂမျိုၚ်တံဝွံ ဒဒှ် ကောန်ဗြဴမၞိဟ်တံဂှ် မဂေါဝ်ဆာဲဂှ် ညာတ်တုဲ အတိုၚ်စိုတ်ဇကုမနွံဂှ် ပဒှ်သ္ၚိကၟိန်အိုတ်ရ။ ၃ကျာ်ထာဝရဂှ်လေ၊ ဝိညာန်အဲဝွံ ပ္ဍဲမၞိဟ်တံဂှ် လ္အိတ်တဝဵုဟွံဂွံလၟေတ်။ မၞိဟ်တံဝွံ ဒှ်ဖျုန်ရ။ ၜိုန်ဂှ်လေ အယုက်ညးကဵုဒှ်ကၠံၜါစှ်ောသၞာံ သာ်ဝွံ ဟီုပၟိၚ်တဴရ။ ၄ပ္ဍဲကာလဂှ် လ္ၚဵုညးဇကုမဇၞော်ဂၠိုၚ်မနွံပ္ဍဲလတူတိဇၞော်အိုတ်ရ။ ကြဴဂှ်လေ ကောန်တြုံကျာ်ဂမျိုၚ်တံဝွံ ဆက်ဆံကဵုကောန်ဗြဴမၞိဟ်တံဂှ်တုဲ ကောန်မဂွံတံဝွံ၊ ညးမဇၞော်ကဵုဒြဟတ်မပ္တံကဵုကာလကၠာဂှ်တုဲ မဒှ်ညးမဒယှ်ကမြဴအိုတ်ရ။
၅ဒုဟ်မၞိဟ်ဇၞော်ပ္ဍဲလတူတိဇၞော်တုဲ၊ ဒဒှ်က္သပ်ဂနန်စိုတ်ညးဆမနွံမကြံကြသက်သက်လ္အိတ်တွဵုဂှ် ကျာ်ဂမျိုၚ်တီညာတ်မ္ဂး ၆ဒဒှ်မက္တဵုပဒှ်မၞိဟ်ပ္ဍဲလတူတိဇၞော်ဂှ် ဂွံသံၚ်ဝေဂတုဲ စိုတ်က္တဴစံၚ်တူတဴရ။ ၇ကျာ်ထာဝရဂှ်လေ မၞိဟ်အဲက္တဵုပဒှ်ဂှ်လေကီု၊ မပ္တံကဵုမၞိဟ်တုဲ တိရစ္ဆာန်၊ သတ္တံဂမၠိုၚ်မလေပ်ခမာအာ၊ ဂစေံအကာသဂမၠိုၚ်တံဂှ် အဲဇိုတ်ပါဲထောံနူအပ္ဍဲဂၠးတိဇၞော်ရောၚ်။ ဟိုတ်က္တဵုပဒှ်ညးတံဂှ် အဲဂွံသံၚ်ဝေဂရ သာ်ဝွံ ဟီုပၟိၚ်ရ။ ၈နဝ်ဨမ္ဂးဂှ် ဒှ်ညးမဆဵုဒးကဵုစိုတ်ကျာ်ထာဝရရောၚ်။
၉ဥပ္ပတိနဝ်ဨမ္ဂးဂှ်၊ နဝ်ဨမၞိဟ် သ္တပ်လ္ဂူမၞိဟ်မစိစုံ ပ္ဍဲဇကုဂှ် မဒှ်ရောၚ်။ ကောံကုကျာ်ဂမျိုၚ်မွဲစွံနဝ်ဨ မအာကၠုၚ်ရောၚ်။ ၁၀နဝ်ဨဝွံ ညာတ်မုက်ကောန်တြုံပိမနွံယၟုသှေမ၊ ဟာမ၊ ယျာဖေတ်ရ။ ၁၁ပ္ဍဲကာလဂှ် တိဇၞော်ဝွံ သ္အုဲသ္အေၚ်ပ္ဍဲဂတကျာ်ဂမျိုၚ်တိဇၞော်ဝွံ ဍိုက်ပေၚ်ကဵုပွအဓမ္မရ။ ၁၂ကာလကျာ်ဂမျိုၚ်ရံၚ်မွဲတိဇၞော်ဂှ် ဒဒှ်မဒှ်သ္အုဲသ္အေၚ်ဂှ် ညာတ်တဴရ။ ဟိုတ်မ္ဂးဂှ်၊ ပ္ဍဲလတူတိဇၞော်ဂှ် မၞိဟ်အိုတ်သီုတံဝွံ စိုပ်ဒဒှ်မပၠန်ဂတးတုဲအိုတ်ရ။
၁၃ပ္ဍဲကာလဂှ် ကျာ်ဂမျိုၚ်ဟီုပၟိၚ်ကဵုနဝ်ဨမ္ဂးဂှ်၊ ကဏောတ်လမျီုသတ္တံအိုတ်သီုတံဂှ် မံက်ကၠုၚ်ပ္ဍဲဂတမုက်အဲရ။ ဟိုတ်နူညးတံတိဇၞော်မဍိုက်ပေၚ်ကဵုပွအဓမ္မတဴရ။ ကွေံရကဵုတိဇၞော်မွဲစွံအဲပလီုပလာ်ညးတံရောၚ်။ ၁၄နကဵုဆုဂဝ်ပရဂှ် ဒက်က္ၜၚ်သွက်ဇကုရ။ အပ္ဍဲဂှ်လေ ကၠောန်ဂဒံဂမၠိုၚ်ရ။ အပ္ဍဲမ္ၚးပန်ကၠၚ်လံက်ထၜိုတ်ပၞာၚ်သေံရ။ ၁၅ဗီုမဒးကၠာန်မ္ဂးဂှ်၊ ဇမၠိၚ်က္ၜၚ်ပိကၠံဟတ်အနာံမသုန်စှ်ောဟတ်၊ သမၠုၚ်ပိစှ်ောဟတ်ဒးကဵုဒှ်ရောၚ်။ ၁၆ပ္ဍဲက္ၜၚ်ဂှ်လေ ဒးကၠောန်ဗ္တၚ်မွဲ၊ နူလတူမွဲဟတ်ဒးပ္တုဲကၠေံရောၚ်။ ပ္ဍဲထကဲက္ၜၚ်မွဲလ္ပာ်ဒးကၠောန်တရၚ်ရောၚ်။ ထပ်အသၟဝ်ထပ်အဒေါဝ်၊ ထပ်လတူပိထပ်ဒးကဵုနွံရောၚ်။ ၁၇အဲဇကုအဲတၞဟ်နသၟိက်ပါဲ စလးကၠေံသတ္တံမဂျိုၚ်လမျီုအိုတ်သီုတံနကဵုအသၟဝ်အကာသဂှ်၊ ပ္ဍဲတိဇၞော်ကဵုဍာ်ဇၞော်ဟးပရးတုဲ ဆမနွံပ္ဍဲလတူတိဂှ် ချိုတ်အိုတ်ရောၚ်။ ၁၈ပ္ဍဲမၞးမ္ဂးဂှ် ကတ္တိကအဲဂှ် အဲကဵုတန်ရောၚ်။ မၞးဝွံ ကောံကုကောန်၊ သမ္ဘာ၊ ဂအဟ်မွဲစွံဒးလုပ်ပ္ဍဲက္ၜၚ်ရောၚ်။ ၁၉နူအပ္ဍဲတိရစ္ဆာန်မဂျိုၚ်လမျီုဇၟာပ်ဇၟာပ်ဂကူဂှ် ၝောံ၊ ကၟက်၊ သီုစုံတံဂှ် ကေတ်တုဲ၊ တၞဟ်နသၟိက်ကဵုဂျိုၚ်လမျီုကဵုမၞးမွဲစွံဂှ် ဒးပၠုပ်ပ္ဍဲက္ၜၚ်ရောၚ်။ ၂၀အလိုက်ဂကူဍေံသတ်ဇိုၚ်ပန်ကဵု၊ အလိုက်ဂကူဍေံတိရစ္ဆာန်မခမာလေပ်အိုတ်သီုတံကီု ၝောံ၊ ကၟက်၊ သီုစုံတံဝွံ တၞဟ်နသၟိက်ကဵုဂျိုၚ်လမျီုဂှ်၊ ပ္ဍဲထာန်မၞးဂှ် ကၠုၚ်အိုတ်ရောၚ်။ ၂၁သွက်ဇကုဂွံစ၊ သွက်တိရစ္ဆာန်တံဂွံစ၊ စဏမဂပ်ဂေါဝ်စဇၟာပ်ဇၟာပ်ဂကူဂှ် ကေတ်တုဲ၊ ပ္ကောံလဝ်ရ သာ်ဝွံ ကျာ်ဂမျိုၚ်ဗ္ကန်လဝ်ရ။ ၂၂အတိုၚ်ကျာ်ဗ္ကန်လဝ်ဂှ်လေ နဝ်ဨပတဴရ။