သၠ​ပတ်​ပ​ထ​မ​ကဝ် ၉

သၠ​ပတ်​ပ​ထ​မ​ကဝ် ၉

^၁ကျာ်ဂမျိုၚ်ဝွံလေ၊ ကဵုပသေက်ပသဝ်ပ္ဍဲနဝ်ဨကဵုကောန်ညးတံဂှ်တုဲ၊ မၞးတံဝွံ က္ဍတ်ကောန်ဂၠိုၚ်မ္ဂး၊ ကဵုတိဇၞော်ဍိုက်ပေၚ်အိုတ်ရ။ ^၂မပ္တံကဵုသတ်တိရစ္ဆာန်ပ္ဍဲတိ၊ ဂစေံပ္ဍဲအကာသ၊ ဆအရာမချဳဒရာၚ်ပ္ဍဲလတူတိ၊ ကဵုက ပ္ဍဲ ၜဳအိုတ်သီုတံဂှ်၊ ပ္ဍဲဂတမၞးတံဂှ် ကဵုဂွံနွံစိုတ်ဖေက်ဂွဒဇပ်ဇတဝ်အိုတ်ရောၚ်။ အဲပ္အပ်ကဵုတေံသတ်တိရစ္ဆာန်တံဂှ် ပ္ဍဲတဲမၞးတံဂှ်ရ။ ^၃ဂျိုၚ်လမျီုတုဲ ဆမချဳဒရာၚ်လေပ်၊ ညံၚ်နဲသဏေဝ်ဂှ် သွက်မၞးတံဂွံစဒးဒှ်ရောၚ်၊ ဇၟာပ်အရာအိုတ်သီုတံဂှ် အဲပ္အပ်ကဵုရ။ ^၄-၅ၜိုန်ဂှ်လေ၊ ကောံကုဆီမတွံဂးလမျီုမွဲစွံဖျုန်ဟွံဂွံစ။ ဒှ်ကွေံသ္ဍာံသၟတ်ဆီမၞးတံမတွံဂးလမျီုမၞးတံဂှ် အဲမိက်ရောၚ်။ ပ္ဍဲမၞိဟ်၊ တိရစ္ဆာန်သီုဖအိုတ်တံဂှ် အဲမိက်ရောၚ်၊ ပ္ဍဲကောဒေံဇၟာပ်ဇၟာပ်အိုတ်သီုတံဂှ် အဲမိက်လမျီုမၞိဟ်ရောၚ်။ ^၆ယြဴညးမွဲစရိုဟ်ဆီမၞိဟ်ရ၊ ဆီညးဂှ် ဒးစရိုဟ်ကဵုတဲမၞိဟ်ရောၚ်။ ဟိုတ်မ္ဂးဂှ်၊ ကျာ်ဂမျိုၚ်ဝွံ တုပ်သၟဟ်ကဵုအယောၚ်အလာဇကုဂှ် က္တဵုပဒှ်လဝ်မၞိဟ်ရ။ ^၇မၞးတံဝွံ က္ဍတ်ကောန်တုဲ ဂၠိုၚ်တိုန်အိုတ်ရ။ က္ဍတ်ပါ်ပ္ဍဲလတူတိဗွဲမလောန်တုဲ၊ ဂၠိုၚ်တိုန်အိုတ်ရ သာ်ဝွံ ဟီုပၟိၚ်ရ။

^၈မွဲဝါပၠန်ကျာ်ဂမျိုၚ်ဝွံ ဟီုပၟိၚ်ကဵုနဝ်ဨကဵု ကောန်ညးမ္ဂးဂှ်၊ ^၉-၁၀ကဵုမၞးတံဂှ်လေကီု၊ ကဵုတၞောဝ်ဒတောဝ်မဒှ်ကၠုၚ်လက်ကရဴဂှ်လေကီု၊ ပ္ဍဲဇရေၚ်မၞးတံဂှ်၊ မပ္တံကဵုဂစေံ၊ ပြေၚ်ဂၠဴ၊ ကၟီကၠဆမနွံမတွံဂးသတ် တိရစ္ဆာန်မဂျိုၚ်လမျီုဆမတိတ်ကၠုၚ်နူအာပ္ဍဲက္ၜၚ်တံဂှ်တုဲ၊ ကဵုတိရစ္ဆာန်ပ္ဍဲတိအိုတ်သီုတံဂှ်လေကီု၊ အဲဇကုအဲဒက်ကတ္တိကရ။ ^၁၁ကတ္တိကအဲဒက်ကဵုမၞးတံမ္ဂးဂှ်၊ ဇၟာပ်သတ္တံအိုတ်သီုတံဝွံ နကဵုဍာ်ဇၞော်ဂှ် ကြဴမွဲဝါဍာ်ဇၞော်ဟးပရးဟွံဂွံမွဲ။ ^၁၂ဝေၚ်နူဂှ်၊ ပ္ဍဲအဲမွဲလ္ပာ်၊ ပ္ဍဲမၞးတံကဵုတိရစ္ဆာန်ဆမဂျိုၚ်လမျီုပ္ဍဲဇရေၚ်မၞးတံမွဲလ္ပာ်၊ သက်သဳလက်သန် ကတ္တိက အဲမဒက်အဆက်အကောန်အဆက်စဴဟွံသ္ဂုတ်မ္ဂးဂှ်၊ ^၁၃ဒမၚ်ဍာ်အဲဂှ် အဲစွံလဝ် ပ္ဍဲမတ်ဗြဲရ။ တေံဒမၚ်ဍာ်ဝွံ ဒှ်သက်သဳကတ္တိကအဲမဒက်ကဵုတိဇၞော်ရောၚ်။ ^၁၄ကာလအဲမကဵုမတ်ဗြဲဒလီုဂှ်၊ ဒမၚ်ဍာ်မပြာကတ်ပ္ဍဲမတ်ဗြဲရောၚ်။ ^၁၅ပ္ဍဲကာလဂှ် ပ္ဍဲအဲမွဲလ္ပာ်မပ္တံကဵုမမၞးတံတုဲ သတ္တံမဂျိုၚ်လမျီုတိရစ္ဆာန်မနွံတံမွဲလ္ပာ်၊ ကတ္တိကအဲဗှ်သၞာတုဲ၊ တၞဟ်နသၟိက်ပလီုပလာ်ဇၟာပ်သတ္တံအိုတ်သီုတံဂှ် ကြဴမွဲဝါဍာ်ဇၞော်ဟးပရးဟွံဂွံမွဲ။ ^၁၆ဒမၚ်ဍာ်မနွံပ္ဍဲမတ်ဗြဲအဲရံၚ်တုဲ၊ ကတ္တိကထာဝရမနွံပ္ဍဲအကြာကျာ်ဂမျိုၚ်ကဵုသတ္တံမဂျိုၚ်လမျီုသီုကီုကဵုဇၟာပ်တိရစ္ဆာန်ပ္ဍဲလတူတိဇၞော်အိုတ်သီုတံဂှ် အဲဗှ်သၞာရောၚ်။ ^၁၇ဣဝွံ မ္ဂးဂှ်၊ ဒှ်သက်သဳလက်သန် ကတ္တိကအဲဒက်ဗိုန်ဗိုန်ပ္ဍဲအကြာအဲကဵု သတ္တံမနွံလတူမနွံလတူတိဇၞော်အိုတ်သီုရောၚ် သာ်ဝွံ ကျာ်မဟီုပၟိၚ်ကဵုနဝ်ဨရ။

^၁၈ယၟုကောန်နဝ်ဨမတိတ်ကၠုၚ်နူအပ္ဍဲက္ၜၚ်မ္ဂးဂှ်၊ သှေမ၊ ဟာမ၊ ယျာဖေတ်ရောၚ်။ ဟာမဝွံ ဒှ်မခါနာန်ရ။ ^၁၉ညးတံဝွံ မဒှ်ကောန်နဝ်ဨပိတလတုဲ၊ အလုံမွဲဂၠးတိဇၞော်ပြးဇးအိုတ်ရ။

^{၂၀-၂၁}နဝ်ဨဝွံ ပြုပြေၚ်ကွက်ကၠောန်ဗ္ၚတုဲ တဵုကၠံဇဗျေတ်ရ။ သုၚ်ဍာ်ဇဗျေတ်တုဲ ဗၜူမ္ဂး၊ ယာတ်လတက်ဟွံမွဲမံၚ်ပ္ဍဲတာဲဇကုရ။ ^၂၂မခါနာန်ဟာမဝွံ မဇကုဟွံမွဲကဵုယာတ်တုဲ၊ ဟီုကဵုကောညးၜါမနွံမ္ၚးရ။ ^၂၃သှေမကဵုယျာဖေတ်တံဝွံ ကေတ်ယာတ်တုဲ ပ္တိုန်လတူပၞးမ္ဂး၊ ဆုတ်အာလက်ကရဴတုဲ ဒဒှ်မဇကုဟွံမွဲကဵုယာတ်ဂှ် ဂြောပ်အိုတ်ရ။ ညးတံဝွံ ဟိုတ်မဂတမုက်လ္ပာ်မ္ၚးဂှ် ဒဒှ်ဇကုဟွံမွဲကဵုယာတ်တုဲ ဟွံဂွံညာတ်။ ^၂၄နဝ်ဨဝွံ ဗၠးဗၜူတုဲ ကာလမၚုဟ်ဂှ်၊ ဒဒှ်ကောန်ဍောတ်မပပ္ဍဲဇကုဂှ် တီတုဲ ^၂၅ခါနာန်ဝွံ ကဵုဒးဒုၚ်လက်ချဴရ။ ကဵုဒှ်ဍိက်ပ္ဍဲဍိက်ကောတံဂမၠိုၚ်ရ သာ်ဝွံ ဟီုရ။ ^၂၆မွဲဝါပၠန်ကျာ်ထာဝရ ကျာ်သှေမဂှ် ကဵုနွံမၚ်္ဂလရောၚ်။ ခါနာန်ဝွံ ကဵုဒှ်ဍိက်သှေမရ။ ^၂၇ကျာ်ဂမျိုၚ်ဝွံ ကဵုယျာဖေတ်ဒှ်လှဲတုဲ ကဵုဂွံမၚ်ပ္ဍဲတာဲသှေမမတံရ။ ခါနာန်မ္ဂးဂှ် ကဵုဒှ်ဍိက်ညးရ သာ်ဝွံ ဟီုတဴရ။

^၂၈နဝ်ဨဝွံ ကြဴဍာ်ဇၞော်ဟးပရးဂှ် ဂျိုၚ်လမျီု ပိကၠံမသုန်စှ်ောသၞာံတုဲ ^၂၉ပေၚ်အယုက်ဒစိတ်ကၠံမသုန်စှ်ောသၞာံမ္ဂး စိုပ်အနိစ္စရ။

နိဿဲ

ဂကောံသၠပတ်သမ္မာမန်