ဟီုဂလာန်တၚ်ဂုဏ်ညိ

နူ ဝဳကဳပဳဒဳယာ

တၚ်ရန်တၟံ ဂွံချပ်ချူတိုန်လိက်လညာတ်ဏအ် မွဲပိုဒ်ကီု ဂွံပတိုန်ထ္ၜးသီကၠဳကဵု ညးဗှ်လိက်တအ် လိက်ဏအ်ကီုဂှ် နကဵုပရေၚ်ဒုၚ်စသိုၚ်အဲ ညးချူလိက် ဆဵုဂဗကၠုၚ်ကဵု ပ္ဍဲပရေၚ်စွံသတိ လ္ၚတ်ကေတ်ကၠုၚ်မံၚ်တအ်တုဲ ချူပတိုန်ထ္ၜးကဵု ညးဗှ်လိက်တအ်ရ။

ပ္ဍဲပွဳပွိုၚ် ညးဗှ်လိက်တအ်ကီု ပ္ဍဲကောန်ဂကူညးဗှ်လိက်တအ်ကီုဂှ် ဂလာန်"တၚ်ဂုဏ်ရ" မွဲပါၚ် ဂွံဟီုကဵုညးသ္ကအ်ဂှ် အောန်ကွေံကွေံကီုရ။ သ္ပဟိုတ်ကဵု ဂလာန်မ္ၚဵုမွဲပါၚ်တုဲ ပရေၚ်ယေန်သၞာၚ်ပိုယ်ကီု ပရေၚ်ဆက်ဆောံကဆံၚ်ကောန်ဂကူပိုယ်ကီု ပရေၚ်ကဆံၚ်မံၚ်စံၚ်မၞိဟ်တအ်ဂှ် ၜတ်ကၞာတ်ကေတ်ဂွံကီုရ။

သ္ပဟိုတ်ကဵု ဂလာန်မ္ၚဵုဏအ်မွဲပါၚ်တုဲ ပရေၚ်ကမၠောန် ပရေၚ်ဆက်ဆောံ ညးသွံဖျာကဵု ညးရာန်ဖျာ၊ ပရေၚ်ကမၠောန် ဂကောံဗီုလဵုပြေပြံၚ်အာ တအ်လေဝ် နွံဗွဲမဂၠိုၚ်ကီုရ။ ဗွဲမယုတ်သဝ်အိုတ် ကဆံၚ်မံၚ်စံၚ်မၞိဟ် ကဆံၚ်ကောန်ဂကူဇကု ၜိုတ်လဵုသၠုၚ်တိုန် အာပ္ဍဲခေတ်သ္ၚိကၟိန် ဂၠးတိဏအ်ဂှ် ညးဗှ်လိက်တအ် ချပ်ကေတ်မာန်အိုတ်ရောၚ် စၟဳကေတ်တုဲ သဳကၠဳချပ်ပတိုန်ထ္ၜးလဝ်ရောၚ်။

ပ္ဍဲခေတ်ဂၠးတိကွာန်ဏအ် ကၟိုန်ဍုၚ်မွဲကဵုမွဲ အာကၠုၚ်ကၠောံက္ဍအာ ညံၚ်ကဵုကွာန်မွဲ ဒှ်ကၠုၚ်အိုတ်ရ။ တုဲပၠန် ကၟိုန်ဍုၚ်တဴတက်မံၚ် ဗွဲမဂၠိုၚ်တအ်လေဝ် ကၟိန်ဍုၚ်ညးတအ်ကဵုညးတအ် ဒုၚ်သဇိုၚ်ကဵုဒေသတုဲ ညံၚ်ဂွံဒှ်အာ ဗီုကဵုဍုၚ်ဓဝ်ဂှ်လေဝ် ပံၚ်ပကောံတုဲ မံၚ်ကၠုၚ်အိုတ်ကီုရ။ ဟိုတ်ဂှ်ရတုဲ ယေန်သၞာၚ်ကၟိုန်ဍုၚ်မွဲကဵု ကၟိုန်ဍုၚ်မွဲ၊ ယေန်သၞာၚ်ဒေသဗၟံက်ကဵု ဒေသပလိုတ်တအ် ဂွံအခေါၚ်ကတ်လ္ၚတ်လှာဲဂတး ၜတ်ကၞာတ်ကေတ်ဂှ် ဒှ်ကၠုၚ်မံၚ်သောဲသောဲရ။

ပ္ဍဲကဵုခေတ် ဂလိုဘယ်လိုက်ဇြေယှေန်ဏအ် ပရေၚ်ဆက်စၠောံပိုယ်မၞိဟ်တအ်ဂှ် ဂၠိုၚ်တိုန်ကၠုၚ်နူကဵု ခေတ်တုဲတုဲကၠုၚ်တေံမၞုံဗွဲမဂၠိုၚ်ဂှ် ညးညးအဲအဲ ဂွံဆဵုကၠုၚ်ရ။ တုဲ ကၟိုန်ဍုၚ်မွဲကဵုမွဲ ပံက်ကၠုၚ် ဝါဒပံက်တြၚ် ပရေၚ်အာကၠုၚ်တရဴကီု ကၟိုန်ဍုၚ်မွဲကဵုမွဲ သွက်ဂွံထ္ၜကေတ်ယေန်သၞာၚ်ဂကူဇကု ဂကောံမၞိဟ်ဇကု ကၟိုန်ဍုၚ်ဇကုကီုတုဲ ဘိက်ကၠုၚ်ကၟုဲ ဍုၚ်နာနာတအ်ရ။ ပ္ဍဲကဵုပရေၚ်ဘိက်ကၟုဲဒုၚ်တၠုၚ်ဂကောံမှာဇန် ကၟိုန်ဍုၚ်သ္အာၚ် ညးမွဲကေုာံညးမွဲတအ်ဂှ် ယေန်သၞာၚ်ညးမွဲကဵုညးမွဲတအ်လေဝ် ဒးဆက်ဆောံကၠုၚ်မံၚ်ရ။

ပ္ဍဲကဵုဂကောံပိုယ်မၞိဟ်တအ်လေဝ် ယေန်သၞာၚ်ညးကဵုညးဂှ် ဒုၚ်သဇိုၚ်ကဵုဌာန်ညး ဒေသညး ဓရ်ပတှ်ေညးတအ်တုဲ စၟတ်ကၠုၚ်သ္ပကၠုၚ်တၠမူ အခိုက်ကၞာယေန်သၞာၚ် ညးကဵုညး နွံကၠုၚ်အိုတ်ကီုရ။ ဟိုတ်ဂှ်ရ ပ္ဍဲကဵုခေတ် ဂၠးတိသ္ၚိကၟိန်ဏအ် ညးမွဲကဵုညးမွဲ ဂွံဆက်ဆောံ ဂွံဍိုက်ကေဝ်ဂှ် ယေန်သၞာၚ်ဒုတိယဟီုဟီု ယေန်သၞာၚ်ဂၠးတိဟီုဟီု ယေန်သၞာၚ်ခေတ်ဂလိုဘယ်လိုက်ဟီုဟီု မံက်ဂတဝ်ကၠုၚ် နကဵုအကာဲအရာနွံပၟိက်ရ။

ဟိုတ်ဂှ်ရ သၟတ်ကၟိန်ဍုၚ်တအ်လေဝ် ဒး ကတ်လ္ၚတ်မံၚ် အခိုက်ကၞာဘာသာဂၠးတိ ယေန်သၞာၚ်ဂၠးတိတအ် ဗွဲမဇၞော် ကဵုဇြဟတ် ဒှ်တိုန်ကၠုၚ်ပရေၚ်ကတ်လ္ၚတ် ခေတ်တၟိမွဲရ။ အခိၚ်သၟတ်ပိုယ် လ္ၚတ်ကတ်မံၚ် ဘာသာဂၠးတိကီု ယေန်သၞာၚ်ဂၠးတိကီုဂှ် သွက်ပိုယ်ဂွံကတ်လ္ၚတ်ပရေၚ်မံၚ်စံၚ် ဂကောံမၞိဟ်ညးတအ်လေဝ် ပါကၠုၚ်မွဲပရူကီုရ။ ပရေၚ်ကဆံၚ်ယေန်သၞာၚ်မွဲဍုၚ်ကဵု မွဲဍုၚ်လေဝ် ၜတ်ကၞာတ်ပြံၚ်ကၠောံ ပတောံဗက်အာမံၚ် ဂွံဆဵုကေတ်နတဲနမတ်အိုတ်ရ။

ဥပမာ ဗွဲမပြာကတ်မွဲ သၟတ်ကၟိန်ဍုၚ်ပိုယ်တအ် လ္ၚတ်ဗဵုကေတ်ရုပ်ဒမျိုၚ်ဇမၠိၚ် (Vedio) ကီုရဳယျာ တုဲ အခိုက်ကျိုၚ်ကယျိုၚ် လစွံစိုတ် ဗီုပြၚ် ဗွိုက်လတက်တအ်လေဝ် ၜေတ်လုပ်ပ္ဍဲအခိုက်ကၞာ ယေန်သၞာၚ်ကောန်ဂကူပိုယ် ကေတ်ကၠုၚ်ဒၞဲါအိုတ်ရ။ ပ္ဍဲကဵုအခိုက်အလိုက်မံၚ်စံၚ် ဂကောံမၞိဟ်မွဲမွဲ ကေတ်ကၠုၚ်ဒၞဲါပ္ဍဲကဵုအြကာယေန်သၞာၚ် ဂကူမွဲမွဲတှ်ေ ယေန်သၞာၚ်ဟွံကိတ်ညဳကဵု ကာလဒေသ အကာဲအရာအခိုက်ကၞာယေန်သၞာၚ်မိ(ဂကူ) ညးတြေံတြေံတအ်လေဝ် က္တဵုဒှ်ကၠုၚ်မံၚ်ကဵုရ။

တၚ်မွဲပၠန် ဟိုတ်နူဒးဆက်ဆောံကဵုညးဂၠးတိတအ်တုဲ ယေန်သၞာၚ်ညးဂၠးတိတအ် စၟတ်ကေတ်လဝ်၊ ကၠိုဟ်ကေတ်မံၚ် ဒုၚ်လဝ်တဲတအ်ဂှ်လေဝ် စဵုကဵုတးပဲါ ဒေါံထောံဟွံဂွံ ဒးကတ်လ္ၚတ်ကၠုၚ်အိုတ်ဏီရ။ အဃောကတ်လ္ၚတ်မံၚ် ပရေၚ်ယေန်သၞာၚ်ညးဂၠးတိ ဘာသာညးဂၠးတိကၠိုဟ် မွဲတမြိပ်ဓဝ်ဂှ်ဟေၚ် အခိုက်ကၞာညးဂၠးတိဂှ်လေဝ် ပါလုပ်ကေတ်ကၠုၚ်ဒၞာဲ အြကာလညာတ်သၟတ်ကောန်ဂကူမကတ်လ္ၚတ်ကေတ်မံၚ်ဂှ်အိုတ်ရ။ မွဲတမြိပ်ပၠန်ဂှ်လေဝ် ပရေၚ်ယေန်သၞာၚ်ဂကူဇကု ညံၚ်ဟွံဂွံကၠေံကၠက်သှေ်ၜက်အာပ္ဍဲကဵုခေတ် တြေံတအ်ဂှ်လေဝ် ညးမစဳကၠး မၚ်မွဲမံၚ်ပ္ဍဲအခိုက်ကၞာယေန်သၞာၚ်ဂကူဇကုတအ် ထိၚ်ဒဝ်မၚ်မွဲကဵုကၠုၚ်လဝ်ဓရ်သတိ ပရေၚ်မၚ်မွဲယေန်သၞာၚ်အခိုက်ကၞာ ပ္ဍဲကောန်ဂကူညးတၞဟ် ဗွဲမဇၞော်ကဵုဇြဟတ် ပ္ဍဲကဵုခေတ်ဂၠးကွာန်တံရ။

ပ္ဍဲကဵုထိၚ်ဒဝ်မၚ်မွဲဂှ် နကဵုလညာတ် ပရေၚ်ဂကူဍန်ဂြေက်ဂှ်လေဝ် ထိၚ်ဒဝ်ဟွံဂွံ။ ထိၚ်ဒဝ် နကဵုလညာတ်ပရေၚ်ဂကူ ဍန်ဂြေက်ရောၚ်တှ်ေ မူပြသၞာမံက်တိုန်ကၠုၚ်မာန်ရ။ ကၠိုဟ်ကေတ်မံၚ် အခိုက်ကၞာယေန်သၞာၚ်ဇကုသၟးတုဲ မံၚ်ကေတ် ကၟိန်ဍုၚ်ဇကုမွဲဓဝ် ပ္ဍဲဂကောံမှာဇန်ဇကု ပ္ဍဲဂကောံမၞိဟ်ဇကုဟေၚ်သၟးဂှ် ဒှ်ဟွံမာန်ကၠုၚ်ပ္ဍဲခေတ်တၟိ ပရေၚ်မံၚ်စံၚ်ဂၠးတိဏအ်ရ။ မၚ်ပ္ဍဲထိၚ်ဒဝ်မၚ်မွဲ ယေန်သၞာၚ်ဇကုဂှ်လေဝ် ပရေၚ်ဖန်ဗဒှ်ဖောအ်ဗြေဝ် ပတိုန်အလေံအခိုက်ယေန်သၞာၚ် မိ(ဂကူ) ဇကုတအ်ဂှ်လေဝ် ဒးချပ်ကေတ် ဒှ်မာန် ဟွံမာန် နကဵုယုတ္တိနွံနွံ သာ်ဏအ်မွဲ ဇၞော်ကဵုဇြဟတ် ဒးစွံအာရီုသတိ ဗွဲအဓိကဂှ် ဒးညာတ်ကေတ် ထေက်ကီုရောၚ်။

ပွထိၚ်ဒဝ်မၚ်မွဲအာ အခိုက်အလေံ ယေန်သၞာၚ်နွံကၠုၚ်တုဲတုဲဂှ် သၟးဟွံကတုဲ ပရေၚ်ဂွံညဳသၟဟ်အာကဵုအခိုက်ကၞာ အလေံအလိုက်ဒေသ ညးဂမၠိုၚ်တ္ၚဲဏအ်ဂှ်လေဝ် ဟွံဖန်ဇန်ကေတ်မာန်မ္ဂး အလေံအခိုက်ယေန်သၞာၚ် ဂကူဇကုဂှ် သှေ်ၜက်လဇုဲလဇအာ ပ္ဍဲတိုက်ထ္ၜးလက်သဏ်ကောန်ဂကူ တအ်မာန်ရ။ တုဲပၠန် ပ္ဍဲယေန်သၞာၚ်မိမဇကုတအ်ဂှ်လေဝ် ဒးစၟဳစၟတ်ပါ်ပဲါဂၠာဲသ္ၚဳရံၚ်ကေတ် တၚ်ဂွံဇြဟတ် တၚ်ဍိုန်လျးတအ်တုဲ ဒၞဲါလဵု တၚ်လဵုဂှ် ဒးထပ် ဒၞဲါလဵုဂှ် ဟွံကိတ်ညဳသၟဟ်အာကဵုပရေၚ်ဒဒှ် ကာလဒေသညးဂၠးတ္ၚဲဏအ်ဂှ်လေဝ် ဒးတီကေတ်ကီုရောၚ်။ ပ္ဍဲကဵုခေတ်ဂၠးတိ အဃောန်ဖန်ဗဒှ်မံၚ် ဂၠးသ္ၚိကွာန်ဂှ် ညးတၠးပညာထိၚ်ဒဝ်မၚ်မွဲ ယေန်သၞာၚ်ကောန်ဂကူတအ် ရပ်စပ်ပြုပြေၚ်ကေတ် ဂကောံမၞိဟ် ဂကောံသၟတ်ကောန်ဂကူဇကု ဟွံစဳကၠး ဟွံညဳသၟဟ်ကဵုဆန္ဒးညးဂမၠိုၚ်ပုဟ်တှ်ေ ဒးဂွိၚ်အာကဵု ပရေၚ်လစွံစိုတ် သၟတ်တ္ၚဲဏအ်ကဵု အကာဲအရာ ဒဒှ်အခိုက်အလေံယေန်သၞာၚ်ကောန်ဂကူဂှ်ရောၚ်။ သၟတ်တ္ၚဲဏအ်ဂှ် သွက်ဂွံပြံၚ်ကၠောံအာယေန်သၞာၚ်ဒုတိယဂှ် အခေါၚ်အရာလေဝ်ဂၠိုၚ် ဇြဟတ်ဒရိုဟ် မပ္တံကဵုမဳဒဳယာ ပရိုၚ်လညာတ်ကသပ်နာနာတအ်လေဝ် ဂၠိုၚ်ကွေံကွေံရောၚ်ဂှ် ကဵုဂွံမံၚ်သတိညိ။

ပ္ဍဲကဵု ထိၚ်ဒဝ်ဖောအ်ဗြေဝ်ပတိုန်မံၚ် ယေန်သၞာၚ်မိဇကုတအ်ဂှ် ယေန်သၞာၚ်ဒးထိၚ်ဒဝ် ယေန်သၞာၚ် ဒဖောအ်ဗြေဝ်ပတိုန်နွံကၠုၚ်ကဵုကဏ္ဍ ၜါကဏ္ဍရောၚ်ဂှ်လေဝ် ဒးတီကေတ်ကၠးကၠးကီုရ။ ပ္ဍဲကဏ္ဍၜါဏအ် မိက်ဂွံသဳကၠဳ မိက်ဂွံကဵုချပ်ဗ္စာအရာသွက်ညးဗှ်လိက်တအ်မွဲဟီုဂှ် ကဏ္ဍယေန်သၞာၚ်ဒးဖန် ဗဒှ်ဖောအ်ဗြေဝ်ပတိုန်မွဲ သာ်ဏံနွံကၠုၚ်ပ္ဍဲဂၠံစိုတ် ညးချူလိက်ဏအ်ကီုရ။

ပ္ဍဲကဏ္ဍဖောအ်ဗြေဝ်ပတိုန်မွဲမွဲဂှ်လေဝ် ပရေၚ်ဖောအ်ဗြေဝ်ရုပ် ကေုာံ ပရေၚ်ဖောအ်ဗြေဝ်နာမ် ၜါသာ်ဏအ်ဂှ် ဆက်စပ်မံၚ်ညံၚ်ကဵု မသြန်က္ဍိုပ် (ခေါၚ်း) ပ္ကဴ (ပန်း) ပါ်ခြာဟွံဂွံကီုရ။ ပ္ဍဲကဵု ပရေၚ်ဖောအ်ဗြေဝ်ရုပ်ကဵုနာမ် ဍုၚ်ပလိုတ်ကွတ်သိပ္ပံတဴတက်ဂှ်တှ်ေ ကဵုဇြဟတ်ကဵုပရေၚ်ဖောအ်ဗြေဝ်ရုပ်တုဲ ဍုၚ်ဗၟံက် ကွတ်ဘာသာတဴတက်တအ်ဂှ် ကဵုဇြဟတ်ကဵု ပရေၚ်နာမ်လစွံစိုတ်ရ။ ပ္ဍဲကဵုစွံၚုဟ်မး ၜတ်ကၞာတ်ဂှ်လေဝ် ဟွံတုပ်သၟဟ်တုဲ ဂကောံကောန်ဂကူ ကၟိန်ဍုၚ်မွဲကီုမွဲလေဝ် ဟွံတုပ်သၟဟ်ဂှ် ဂွံဆဵုကေတ်ကီုရ။

အတိုၚ်ဒၠေံဗ္တောန် ဘာသာအခိုက်ကၞာပိုယ်တုဲတုဲကၠုၚ်တေံတှ်ေ "စိုတ်ဂှ်ဒှ်အရာပၠးတရဴရုပ်" သာ်ဝွံကီု ပရေၚ်ဖောအ်ဗြေဝ်ပတိုန်မွဲမွဲနွံဂှ် စွံၚုဟ်မးၜတ်ကၞာတ်ကေတ်မံၚ် ကဵုပရေၚ်စေတနာလစွံစိုတ်ဖအိုတ်ရ။ လစွံစိုတ်စေတနာမွဲခိုဟ်ရောၚ်တှ်ေ ပရေၚ်ရုပ်ပိုယ်လေဝ် ခိုဟ်ဗက်အာ အလဵုလဵုဍေံဟေၚ်ရ။ ကၟိန်ဍုၚ်ဂကောံ တန်တဴမံၚ်ပ္ဍဲဂၠးတိဗွဲမဂၠိုၚ်ဂှ် ဖောအ်ဗြေဝ်ပတိုန် အခိုက်အလေံညးတအ် ပ္ဍဲလစွံစိုတ်နာမ်သၟးရ ဗွဲမဂၠိုၚ်။ ဟိုတ်ဂှ်ရ ပ္ဍဲသဳကၠဳပရေၚ်ဖောအ်ဗြေဝ် ပတိုန်အခိုက်အလေံ ယေန်သၞာၚ်မွဲမွဲကီုလေဝ် စွံအာရီုကဵု လစွံစိုတ်အဓိကရ ဗွဲမဂၠိုၚ်ရောၚ် ထေၚ်ကေတ်ရ။

အတိုၚ်ဂကောံကၟိန်ဍုၚ်မှာဇန်ပိုယ် စွံၚုဟ်မးဂှ်ရ ပ္ဍဲအရာပိုယ်ချပ် ပရေၚ်ဖောအ်ဗြေဝ်ပတိုန် အခိုက်ကၞာယေန်သၞာၚ် ပိုယ်မွဲမွဲတှ်ေ ပိုယ်ဒးၜတ်ကၞာတ် စွံအစာမ်ကဵု ပရေၚ်ဒၠောံဗ္တောန် အခိုက်ဘာသာပိုယ် ဗွဲကိုပ်ကၠာအိုတ်ရ။ ပရေၚ်ပိုယ်ဖန်ဒဒှ်တၟိမွဲမွဲဂှ် ညဳသၟဟ်ကဵုအခိုက်အလေံဘာသာပိုယ် ညဳသၟဟ်ဟွံညဳသၟဟ်ဂှ် ဒးဆိၚ်ဆၜတ်ကၞာတ်ကေတ်တုဲမှ ချပ်ဗဒှ်ဂွံရောၚ်။ ဟိုတ်ဒှ်သာ်ဂှ်ရ ပ္ဍဲချပ်ဗဒှ်ပရေၚ်သဳကၠဳမွဲမွဲဂှ် စွံအာရီုကဵု ပရေၚ်လစွံကၠာထေက်ရောၚ်။ ဟိုတ်နူညာတ် ကေတ်သာ်ဂှ်တုဲ ပရေၚ်လစွံစိုတ်ခိုဟ်မွဲလေဝ်ဒှ် ပရေၚ်ကိတ်ညဳသၟဟ်ကဵု အကာဲအရာခေတ်ကာလညးဂၠးကွာန်တအ်လေဝ်ဒှ် အရာမွဲသာ်ဂှ် မိက်ဂွံချပ်သဳကၠဳကဵုညးဗှ်လိက်တအ် ကသပ်ဒှ်ကၠုၚ်သာ်ဏအ် နွံကၠုၚ်မွဲကီုရ။

မုရောဟီုတှ်ေ "ဟီုဂလာန်တၚ်ဂုဏ်ညိ" မွဲရ။

မုဒှ်ဂွံသဳကၠဳတၚ်ဏအ်ရောဟီုတှ်ေ ညးဗှ်လိက်တအ်လေဝ် ချပ်ကေတ်ညိ။ ပ္ဍဲဂကောံမၞိဟ်ပိုယ် ပ္ဍဲဂကောံကောန်ဂကူပိုယ် မၞုံကၟိန်ဍုၚ်ပိုယ် မံၚ်လၟုဟ်ဂှ်တှ်ေ အရေဝ် "တၚ်ဂုဏ်ရ" မွဲပါၚ် သွက်ရဂွံဟီုဂှ် ဝါတ်ဂါတ်ကွေံကီုရ။ ညးဗှ်လိက်တအ်လေဝ် ဂွံဆဵုကေတ်လဝ် နမတ်လေဝ် နွံဗွဲမဂၠိုၚ်ရရောၚ်။ မုဟိုတ်ရော ဂွံဟီုဗီုဏအ်မာန်ရောတှ်ေ ညးချူလိက်လေဝ် ကေၚ်ဆဵုကၠုၚ်နမတ်ဂၠိုၚ်ကွေံကွေံရ။ ပ္ဍဲကဵု ပရေၚ်ပိုယ်တအ် အာကၠုၚ်တရဴကော်ကွဳလိုန်ဓာတ် ပရေၚ်ပလံၚ်ဗစိုပ်ရာမညတအ်ဂှ် ကာလပိုယ်စိုပ်ဒၞဲါအာတုဲ ပိုယ်ဒုၚ်ကဵုညးတအ်စရိတ်ၚုဟ်ဗလံၚ်ဂှ် နူကဵုညးတအ် "တၚ်ဂုဏ်ရ" မွဲပါၚ်ဂှ် မွဲလှေ်လေဝ် ညးတအ်ကလေၚ်ဟီုကဵုပိုယ်ဟွံမာန် ဗီုဏအ်ဂွံဆဵုကေတ်မံၚ်ဏီရ။

တုပ်တဴသာ်ဂှ်ကီုရ ပ္ဍဲဆေၚ်ဖျာ မန်ကဵု ဗမာကီု ကာလပိုယ်ရာန်ကပေါတ်တုဲတှ်ေ နူကဵုတၠဖျာ ဂွံဟီု "တၚ်ဂုဏ်ရ" ဂှ်လေဝ် သွက်ညးတအ်ဒှ်တၚ်အခက်အခုဲဝါတ်ဂါတ်ကွေံကီုရ။ ဇၟာပ်ဒၞဲါ ဗွဲမဂၠိုၚ် မၞိဟ်ဒးကေတ် အရီုဗၚ်ဂှ် ဂွံဟီုကဵုမၞိဟ်ကဵုလဝ် အရီုဗၚ် "တၚ်ဂုဏ်ရ" ဂှ် ဇြိုၚ်မံၚ်စိုတ်ကွေံကွေံလေဝ် ဂွံဆဵုကေတ်ဂၠိုၚ်ကွေံကွေံရ။ ယဝ်ရညးဗှ်လိက်တအ် စွံသတိရောၚ်တှ်ေ ဂွံဆဵုကေတ်ဗွဲမဂၠိုၚ်ကွေံကီုရ။ ပိုယ်တအ်ဒးဟီုဏာအရေဝ် "တၚ်ဂုဏ်ရ" ကဵုညးတၞဟ်မွဲပါၚ်ဂှ် ပ္ဍဲပိုယ်မုဒှ်ကၠုၚ်ဂှ်လေဝ် ပိုယ်တအ်ဒးတီကေတ်လဝ်ကီုရောၚ်။ ဟီုဏာဂလာန်ဏအ်တုဲ ဆက်ဖဵုကြဴဍေံ ၜိုတ်လဵုကဵုကၠုၚ်ဖိုလ်လ္တူပိုယ် ခိုဟ်ဟာ ပရေံဟာဂှ်လေဝ် ပိုယ်သၟတ်တအ် ဒးတီကေတ် ဂုဏ်ဖိုလ်ဍေံကီုရောၚ်။ တုဲပၠန် ညးဒးဒုၚ်ဟီုဏာလဝ် ၜိုတ်လဵုဒးဒုၚ်စအာသိုၚ်လ္တူ ညးဟီုဂှ်လေဝ် ပိုယ်တအ်ဒးၜတ်ကၞာတ်ကေတ်လေပ်ကီု။ ညးဗှ်လိက်လေဝ် ကေၚ်ဟီုလဝ်ကဵုညးတၞဟ် ကာလနွံလေဝ် နွံ၊ ဟွံမွဲလေဝ် ဟွံမွဲ၊ ဟွံသေၚ်သာ်ဂှ်တှ်ေ ဂွံမိၚ်လေဝ် ညးတၞဟ်ဟီုကဵုဇကုနွံလေဝ် နွံရောၚ်။ ကာလမိၚ်ဂှ် ပ္ဍဲစိုတ်ဇကု ဗီုလဵုဒးဒုၚ်စသိုၚ်လ္တူညးဟီုကဵုဇကုဂှ်တှ်ေ ပါ်ပဲါကေတ်ညိ။

ပ္ဍဲကဵု ပရေၚ်မဳဒဳယာ ဂၠးတိတဴတက်မံၚ်ဗွဲမဂၠိုၚ်သာ်ဏအ်ဂှ်တှ်ေ ပိုယ်သၟတ်တအ်လေဝ် ဒးကေတ်ခန်လ္ၚတ်ပ္ဍဲမဳဒဳယာလုပ်ညိကီု။ ပ္ဍဲကဵုမဳဒဳယာဂှ် ဒှ်ဒၞဲါပိုယ်ဂွံဒးၜတ်ကၞာတ်ကေတ် ပရေၚ်ယေန်သၞာၚ်ပိုယ်ကဵု ပရေၚ်အခိုက်ကၞာ ယေန်သၞာၚ်ကၟိန်ဍုၚ် ဂကောံမၞိဟ်ညးသ္အာၚ်မွဲမွဲ ခိုဟ်အိုတ်ရရောၚ်ဂှ် ညးချူလိက်ထေၚ်ကေတ်ကီုရ။တုဲပၠန် ညးဗှ်လိက်ကေၚ်တိတ်လဝ်ဍုၚ်သအာၚ်နွံတှ်ေ ပဵုတုဲကၠိုဟ်ကေတ် အခိုက်ကၞာယေန်သၞာၚ် ကောန်ဂကူကၟိန်ဍုၚ်သ္အာၚ်ရ။ ကြပ်အိုတ် ဒးထ္ၜးဥပမာမွဲဂှ် ဗမံက်ဍုၚ်ပိုယ် ဍုၚ်သေံဂှ် အရေဝ် "တၚ်ဂုဏ်ရအဴ" မွဲပါၚ်ဏအ်ဂှ် ဒှ်မံၚ်လွဟ်ဍေံတအ် စန်ဒက်မွဲပါၚ်ကီုရ။ ပိုယ်ရာန်ဏာကပေါတ် မွဲမွဲသာ် ပ္ဍဲဆေၚ်ဍေံတုဲတှ်ေ "တၚ်ဂုဏ်ရ ဗွဲကြဴ ကလေၚ်ကၠုၚ်ကဵုဇြဟတ် ပၠန်ဏး " သာ်ဝွံ ဟီုကဵုမံၚ်ဇၟာပ်ဆေၚ်ရ။ တုဲပၠန်ဇကုလေပ်အာဆေၚ်ဖျာဍေံဗက် "မ္ၚဵုရ မုဒးကဵု အရီုဗၚ်ရော" ဂလာန်သာ်ဏအ်ဂှ်လေဝ် နကဵုဂလာန်စန်ဒက် ညးသွံဖျာတအ် သုၚ်စောဲကေတ်ကၠုၚ်လဝ် လအ်ကဵုဗွဝ်ကၠံသၞာံအိုတ်ရ။

ၜိုန်ဂှ်လေဝ် ဍုၚ်ကြပ်ကဵုဍုၚ်သေံ ဍုၚ်ပိုယ်ဏအ်ဂှ် အခိုက်ယေန်သၞာၚ်ကဆံၚ်မွဲ ကၠောန်ကေတ်ဟွံမာန် အိုတ်ဏီဖိုဟ်ရ။ ပိုယ်သၟတ်လေဝ် ကာလရာန်ဖျာပ္ဍဲမွဲမွဲဆေၚ်ဂှ် ဂွံဒုၚ်ဟီုဂလာန် "တၚ်ဂုဏ်ရ" မွဲပါၚ်တှ်ေ ဗွဲကြဴ မိက်ဂွံကၠုၚ်ကဵုဇြဟတ်ပၠန်ရောၚ် ပ္ဍဲစိုတ်တေံဒှ်ကၠုၚ်မာန်ရ။ညးချူလိက်ထေၚ်ကေတ်ရ။ ပ္ဍဲဂကောံလေဝ် ညးသၟတ်တအ်ကၠောန်ရေၚ်တၠုၚ်ကမၠောန်မွဲမွဲ "တၚ်ဂုဏ်ရ" ရီုဗၚ်လဝ်အဲဂှ်" ယဝ်ရဟီုကဵုညးသၟတ် ကောန်ဂကောံတအ်မာန်ရောၚ်တှ်ေ ဓရ်ပတှ်ေကောန်ဂကောံသၟတ်တအ်ကဵု ညးပၠတရဴမံၚ် ဂကောံတအ်ခိုက်ကၠိုက်ဇြိုဟ်နက်ကၠုၚ်ရ။ ယဝ်ရညးဗှ်လိက်တအ် ဒှ်သၠေဟ်ပမာရောၚ်တှ်ေ သုၚ်စောဲစမ်ရံၚ် ဝေါဟာရ "တၚ်ဂုဏ်ရ" ညိ။

ညးဗှ်လိက် တအ်ဂွံဆဵုကၠုၚ်ပရေၚ်ဖိုဟ်ဟီုဂလာန် "တၚ်ဂုဏ်ရ" ဗွဲမပြဟ်ရောၚ်။ ဟီုဏာ ဂလာန် "တၚ်ဂုဏ်ရ" လ္တူညးကၠောန်ပတုဲလဝ် ဖဵုကဵုဇကုဂှ် မုရဴမွဲလေဝ် ယအ်အာပ္ဍဲဇကုဟွံသေၚ်ရ။ ပဲါနူယအ်ဂှ် ပရေၚ်ကဆံၚ် မံၚ်စံၚ်မၞိဟ်ဇကု ပရေၚ်ကဆံၚ်ဆက်ဆောံ ဇကုဂှ် ပဵုတုဲသၠုၚ်ကၠုၚ်ရောၚ်။ ဂလာန်ခိုဟ်မွဲပါၚ် ဂွံဟီုဏာကဵုညးသအာၚ်မွဲပါၚ်ဂှ် ဒှ်မံၚ်မ္ၚဵုမွဲသာ်ဏီဂှ် ဂွံဆဵုကေတ်မံၚ် ပ္ဍဲကဵုမ္ၚဵု ၃၈ ပိုယ်ရောၚ်။ ဂလာန် "တၚ်ဂုဏ်ရ" ဂလာန်ခိုဟ်ဟ်ဗီုဏအ် ဇကုဇကုဟီုကဵုသကအ် ရဲ မိဿဟာဲ ကောန်ဂကောံ ညးဇၞော်စံၚ်အ္စာဇကုမာန်ရောၚ်တှ်ေ ၜိုတ်လဵု ပရေၚ်ဆက်ဆောံဇကု ဓရ်ပတှ်ေလ္တူဇကု သၠုၚ်ပဵုတိုန်ကၠုၚ်ပ္ဍဲဇကုဂှ် ဒ္ဂေတ် စမ်ရံၚ် နဇိုၚ်နတဲဇကုမှ ဖဵုဍေံဂှ် ဇကုတီကေတ်အလဵုဇကုမာန်။

ပရေၚ်ဖိုလ် ဍေံဂှ်တှ်ေ ဟွံဟီုထ္ၜးသောဲသောဲ ဂၠိၚ်သ္ၚောဲရလေဝ်၊ ညးဗှ်လိက်တအ် ချပ် တီကေတ်မံၚ်သီုဖအိုတ်ရ။ တုဲပၠန် ဖိုလ်ဍေံဂှ် စၟတ်လဝ်ကိုန်ဂစိုတ်လေဝ် ဟွံမွဲကီု၊ ညးဗှ်လိက် သုၚ်စောဲစမ်ရံၚ် နဇိုၚ်နတဲရောၚ်တှ်ေ ပဵုတုဲ တီကၠးကေတ်ဂှ်ရ ညးချူလိက်လေဝ် ဟွံပတိုန်ထ္ၜးကဵုရ။

ပ္ဍဲဖောအ်ဗြေဝ်ပတိုန် ယေန်သၞာၚ် ကဆံၚ်ကောန်ဂကူကၟိန်ဍုၚ်မွဲ ဂွံသၠုၚ်တိုန်အာ ပရေၚ်ဒးတုဲဖိုလ် ပ္ဍဲကမၠောန်ပစ္စုပ္ပန်ပိုယ်ဏအ် ကဵုပ္ဍဲပရေၚ်ပံၚ်ကၠောံ ယေန်သၞာၚ်ဂၠးတိဂှ် ဒးဒှ်ဒတုဲဖိုလ်အဓိကရောၚ်။ ပရေၚ်ယေန်သၞာၚ်မွဲမွဲလေဝ် ဒးၜတ်ကၞာတ်ကေတ်ကဵု တၚ်နၚ်တဏအ်ကီု တၚ်နၚ်ပဵုနူတဏအ်ကီုဂှ် ဒးသ္ပအစာမ်ရ။ ယဝ်ရဂလာန် "တၚ်ဂုဏ်ရ" မွဲပါၚ်ဏအ်ဒှ်မံၚ် ဒတုဲဖိုလ်ပရေၚ်ကောန်ဂကူ ပရေၚ်ဂကောံမၞိဟ် ပရေၚ်ကဆံၚ်ယေန်သၞာၚ်ပိုယ်ရောၚ်တှ်ေ ညးဗှ်လိက်တအ်လေဝ် ဆက်တုဲဆဝ်ဗ္ၚုဟ်အာသၟတ်တအ်ညိ။ တုဲပၠန် ဂလာန်တၚ်ဂုဏ်ရ" မွဲပါၚ်ဏအ်ဂှ် ညံၚ်ဂွံစပ္တံအာ နူပိုယ်ကၠာဂှ်လေဝ် ဒးပတိတ်ဇြဟတ်ကီုရ။ ဥပမာ ဗီုလဵုဂွံပတိတ်ဇြဟတ်ရောတှ်ေ ကာလပိုယ်တအ် ရာန်ကပေါတ်မွဲတုဲ တၠဖျာဂှ် ဍေံဂွံဟီုကဵုဇကု ဍေံဝိုတ်မံၚ်ရောၚ်တှ်ေ

နိဿဲ[ပလေဝ်ဒါန် | ပလေဝ်ဒါန် တမ်ကၞက်]

လိက်အုပ် လညာတ်တၞောဝ်ပိုယ်။ တက်တြးပတိတ်နူ - MESO