အကြီုသၟိၚ်စိၚ်ဆဒ္ဒန်
အကြီုသၟိၚ်စိၚ်ဆဒ္ဒန်[၁][ပလေဝ်ဒါန် | ပလေဝ်ဒါန် တမ်ကၞက်]
ဗုဒ္ဓသီုဓမ္မ သံဃဂိုန်အရဳ၊ ဂှ်တိသရဏံ အဟံၚ်အဲဍိက်ပ္ညဳ၊ သီုဝန္ဒေတွာ လ္ၚောဝ်ပြၚ်ဏာကဵုဇဳ၊ မာတာပိတု ဂုရုသန္ဓရဳ၊ အဟံၚ်အဲဍိက်ပ္ညဳ လ္ၚောဝ်ဏာကဵုဇဳအိုတ်၊ ဖဵုအဲမလ္ၚောဝ် ဖျဝ်လဝ်သောစရိုတ်၊ ဘယဥပဒွါ ရောဂါစှ်လ္ၚီကိုဋ်၊ ကဵုဍေံလာဲလေၚ်အိုတ် ကဵုဍေံပၠိုတ်ဟုံညိ။ ထဝ်စိုပ်ဒုၚ်နာမ အဂ္ဂမှာကဝိ၊ ပ္ဍဲရးဍုၚ်ရေဝ်စိ သ္ၚိတဴပ္ဍဲဟာံဂါံ၊ တြဴစှော်အာယုက်လောန် ညောန်ကၠုၚ်ဇရာဗျာံ၊ က္တောဝ်က္ဍိုၚ်မတ်ဟွံသ္ဍာံ နွံပျာံကာလမွဲ၊ ဟိုတ်ဓဝ်သောမနုဟ် မ္ၚုဟ်လဝ်သုစြိုတ်ပ္ဍဲ၊ အကြီုတိပိုန်ကျာ်တြဲ ပ္ဍဲဘဝဆဒ္ဒန်၊ ဟိုတ်ဗြဴမဒက်ဝဲ ပ္ဍဲဂြိုပ်ဟေမဝန်၊ ဒၟာနူဗြဴပၠန် သ္ကန်ဒဲဒးလသာ၊ အကြီုတွံသုတ်ဇာတ် နိပါတ်ပ္ဍဲဂါထာ၊ ဟိုတ်နွံဝါသနာ သၟိက်ဂွံပြာကဋ်၊ ပ္ဍဲကဵုသက္ကရာဇ်တုန် ဟီုပ္ဍုန်လဝ်အဆတ်၊ လ္ၚၜီါကၠံတုန် မသုန်စှော်ဒှ်ကၞောတ်၊ ရာသဳတွံကြကတ် နက်သတ်ပုဗ္ဗသာန်၊ ဂုရုတိတ်ဒှ်တ္ၚဲ လက်မိတ်ကုံမွဲဟာန်၊ တြးပတိတ်လဝ်ညာန် ပ္ဍဲထာန်ရးမည။ ။
ဖဵုအဲမတိတ်ဆန် အကြီုသၟီဆဒ္ဒန္တ၊ ဇၟာပ်ပ်ဘဴဘဝ လ္ပကဵုဒးဝိဝိၚ်၊ ပိုန်အမာတ်သီုပိုန်သၟီ တာဝတိၚ်သွဝ်ယာမာ၊ သီုဍုၚ်သွဝ်တြဴ ဍုၚ်ဗြီုကဵုစဴအာ၊ ဂေတ်ဂေၚ်ပ္ဍဲသံသာ ကာလမဂၠိၚ်သ္ၚောဲ၊ ပိုန်ဒိပ်သီုပိုန်သွဝ် စသိုၚ်ကျိုၚ်ကျဝ်ဖဲ၊ အိုတ်ဘဝကၞောတ်တဲ ဇရေၚ်ဇြဲဗောဓိယာန်၊ ကဵုဂွံဂြၚ်ပါဠိ စသိုၚ်သီုအဘိညာန်၊ ဍုၚ်ဇၞော်တွံနိဗ္ဗာန် ကဵုဂွံဟာန်စဴညိ၊ ထာန်ဒိပ်သုဂ္ဂတိ ကဵုစိုပ်ညိတုဲ။ ။
ပ္ဍဲဇာတိခေတ် လၟေတ်ကျာ်တြဲ၊ စှ်လ္ၚီသအဳဂၠက် စက္ကဝါဂၠေါဲ၊ တွံကျာ်တြဲ ဝွံမွဲခေတ္တ၊ တူမွဲတ္ၚဲပၠန် တန်မွဲတ္ၚဲရ၊ ပၞောဝ်စှ်လ္ၚီကၠာ စက္ကဝါလ၊ စက္ကဝါဝွံ စဏုထာဏ၊ ပြဲလောန်က္ဍၚ်ပြ ဗုဒ္ဓဂကန်၊ ပဟိုတ်နွံကီု ကျာ်သီုအရှန်၊ ပဟိုတ်ဂှ်ပၠန် ပြဲလောန်သေၚ်ဟာ၊ တေံစှ်လ္ၚီဆက် အိုတ်စက္ကဝါ၊ ကျာ်အရှန်ရ ပစ္စေကကၠာ၊ ပဟိုတ်ဟွံမွဲ ပ္ဍဲပိပြကာ၊ တေံစက္ကဝါ ယုတ်မာလောန်သန်၊ ပ္ဍဲစက္ကဝါ ပိုဲဟွံခြာခၠန်၊ နွံကဵုတ္ကံပန ဒမံၚ်ဇန်တံ၊ ပုဗ္ဗဝိဒိုဟ် ဆုသြိုဟ်မွဲတ္ကံ၊ ဗမံက်ပိုဲဏံ တ္ကံဂှ်မတဴ၊ မွဲဥတ္တရ ဟီုပၠသဘဴ၊ ဒိုဟ်သၟဝ်ကျာ ပြာကဋ်ကမြဴ၊ ကဝ်လဗမြိုက် ဖျိုက်သတ်တြုံဗြဴ၊ ဒိုဟ်ပလိုတ်အဴ နုဘဴပြာထာ၊ ဆုသြဟီုတွံ ဒှ်တ္ကံအမ္ဗာ၊ ဒိုဟ်သမၠုၚ်ကျာ ဇမ္ဗုနာမ၊ ဆုကြေၚ်ပြာကဋ် သတ်ဂြၚ်ဖလ၊ အိုတ်သီုတ္ကံပန် တန်မွဲစက္က၊ ပၞောဝ်ကဵုတ္ကံပန် ဗစန်ဗုဒ္ဓ၊ တ္ကံပိုဲဝွံရ ညးသပပြဲ၊ တ္ကံပိတေံကၠာ ယုတ်မာလောန်တဲ၊ အရှန်ဟွံမွဲ ကျာ်တြဲဟွံဒှ်၊ ပစ္စေဂဗုတ် သ္ဂုတ်ပ္ဍဲတ္ကံဂှ်၊ ဗုဒ္ဓဟီုတွံ တ္ကံဂှ်ဟွံပြဲ၊ ဇမ္ဗုဒိပ္ပ နာမဟီုသ္ကဲ၊ ရတ်ပိလေတန် အရှန်ကျာ်တြဲ၊ ပစ္စေဂဗုတ် သ္ဂုတ်ကၠေံဝဳဝဲ၊ တ္ကံပိုဲဝွံမွဲ ပြဲလောန်သေၚ်ဟာ၊ ဒှ်သၞေဟ်နိဗ္ဗာန် ထာန်ကျာ်တမၠာ၊ ကလိကၠေံကၠာ တဏှာရာဂ၊ ဓဝ်နာံရုပ်ပၠိုတ် ဖအိုတ်ခန္ဓ၊ ပြဲနူတ္ကံပိ ဗွဲဝိသေသ၊ ဇမ္ဗုဒိပ္ပ ခုတ်လဝ်နာမရောၚ်။ ။
တ္ကံဇမ္ဗုဒိတ် လအိတ်ပြာထာ၊ ဇၞော်သလဲကီု ဟီုပ္ဍဲသၚ်္ချာ၊ ဗၞတ်စှ်လ္ၚီပၠန် ပ္တန်ယောဇနာ၊ ပၞောဝ်စှ်လ္ၚီကၠာ ယောဇနာဂှ်၊ ပိလ္ၚီယေက်ပၠန် ဇန်တံမံၚ်သၟဟ်၊ ပန်လ္ၚီယေန်ဂှ် ဒှ်မှာသမိတ်၊ ပိလ္ၚီလအိတ် မတိတ်ဒှ်ဂြိုပ်၊ မဒှ်ဗဒိုပ် ဂြိုဟ်ဟေမဝန်၊ ဂၚ်ဇၞော်ထပှ် တၟံထပှ်တန်၊ လစထပှ် နွံကြဳဇှ်သန်၊ ဗွဲယမုပၠန် မန္ဒကိဏ္ဏဳ၊ မွဲယမုပ္ညဳ သဳဟပါထ၊ အနုတတ်ပၠန် ကဏ္ဍမူလ၊ ရထကာရ ဆဒ္ဒန္တမွဲ၊ ကဏ္ဍလေဟေၚ် လစရေၚ်ဂၠောဲ၊ ဝွံလစတွံ ထပှ်မွဲရ၊ ဇၞော်ကဵုဇာသြဲ ပ္ဍဲဟေမဝန်၊ ပၞောဝ်လစဂှ် ထပှ်မွဲဒွန်၊ ဒယှ်ပြာကဋ် လစဆဒ္ဒန်၊ ဍာ်ညံၚ်ပ္ကဴယန် ကၠေၚ်ကၠန်သာ်လွာ၊ သက္ကုသွိသွန် ဟန်ဗန်ဇၟာပ်ရာ၊ ပ္ဍဲလအိတ်ဍာ် သာ်ဝွံမွဲသာ၊ ဂြိုပ်ဟၚ်ရံဟေၚ် နွံတဴသေၚ်ဟာ၊ မွဲယောဇနာ ပိုၚ်အာလစ၊ မ္ၚးဟၚ်ရံၚ် ဂၠံၚ်ဥဒက၊ ဥပ္ပဵုလမ္စံက် ပံက်ထာၚ်ရာၚ်ဂျ၊ သၠောံယာန်နဳလာ ရေၚ်ဗဂါသၠ၊ မွဲယောဇနာ ပ္ဍဲလှာဗြံက်ဗြ၊ မ္ၚးဂှ်ရ အဇသာ်ချီု၊ ဥပ္ပဵုဗကေတ် ပူရေတ်အာကီု၊ မွဲယောဇနာ ဂ္ညိဗ္ဂါရေၚ်ဂြီု၊ မ္ၚးဂှ်ကီု ဗီုကန္နကာ၊ ဥပ္ပဵုဗတာၚ် ရာၚ်တဴမွဲသာ၊ သီုဥပ္ပဵုပိ ပံက်ထာၚ်ဂ္ညိဗ္ဂါ၊ မွဲယောဇနာ ရေၚ်အာဗိုၚ်ကၠောံ၊ မ္ၚးဂှ်သွံ ဂွံဂြိုပ်ဒယှ်၊ မွဲသၠောံယာတ်ချီု ဗီုနဲကြဴဂှ်၊ မွဲယောဇနာ ဟွံခြာဣၚ္ၚုဟ်၊ မွဲသၠောံကရာတ် ဂ္ညိာတ်မံၚ်သၟဟ်၊ သီုသ္ဂေဟ်အမြာဲ လမာဲဒိုဟ်စှ်၊ ထိုက်ထာၚ်ကသဝ် ထိုၚ်ပဝ်ဗလှ်၊ မိတ်သူရိယျ တလကြဳဇှ်၊ ပံက်ထာၚ်မံၚ်သၟဟ် ဒှ်မွဲယေက်ရ၊ မ္ၚးဂှ်ပၠန် မိတ်စန္ဒိမ၊ ဂြိုပ်သွာမသုန် နွံဂုန်တေဇ၊ မွဲသၠောံယာတ်ချီု ဒေါံပ္ဍီုဖလ၊ မွဲသၠောံကရာတ် ဂ္ညိာတ်ဗြံက်ဗြ၊ မွဲသၠောံနဳလာ ရေၚ်ဗဂါသၠ၊ မွဲသၠောံယာတ်ဗြဳ ဗစဳခဏ၊ မွဲသၠောံယာတ်ချီု တုပ်ဗီုအဇ၊ မွဲယောဇနာ စ္ဍးထာန၊ မ္ၚးဂှ်ရ ဇိုၚ်လစသန်၊ လဒုံကံက်ဒွေၚ် ရေၚ်မံၚ်ဂၠိုၚ်တန်၊ နှဴရဴတဴပၠန် လက်သန်ကိုပ်ကၠာ၊ ဝုန်ဝေါတ်ကမတ် ပေၚ်က္ဍတ်ပ္ဍဲလှာ၊ တ္ၚိုက်ဂလာ သီုသွာဒကှ်၊ မွဲယောဇနာ သၚ်္ချာဟီုတွံ။ ။
မ္ၚးနူဂှ် ပဒှ်အနဳ၊ ဒှ်ဂြိုပ်သြောံပၠန် ဂန္ဓသာလဳ၊ မွဲယောဇနာ သတ်တၟာခပဳ၊ မ္ၚးဂှ်ပညဳ ဖဳတဝဳဂၠောဲ၊ သတ်ဗြော်ပလှ် မဒှ်ဂြိုပ်ၜဲ၊ ဂကူဂၠိုၚ်သာ် လမာ်ဂၠိုၚ်နဲ၊ ပွိုၚ်ဂြိုပ်ၜဲ မွဲယောဇနာ၊ မ္ၚးဂှ်ပညဳ ဂအဳဂၠိုၚ်ရာ၊ ဂအဳဂၠိုၚ်သာ် ပ္ဍဲဍာ်လာံအာ၊ မ္ၚးဂှ်အဴ ဂြိုပ်ၜဴသအဳဗ္ဂါ၊ တၞံက္ၜဴဂှ်ကၠာ တၟာတၟံသတ်၊ မ္ၚးဂှ်ကီု ဟီုကဵုအဆတ်၊ ဂြိုပ်ဗြာတ်ပြာကဋ် သတ်တၟာဂြၚ်စိၚ်၊ ဗြာတ်ဂၠိုၚ်ဂကူ ဍုဟ်သောပေၚ်သၞိၚ်။
ဂတဂှ်သွိၚ် ဓိတာန်ဗျိၚ်ဂၠောဲ၊ ပံက်ထာၚ်ရာၚ်နး လုပ်အာဗၠးတ္ၚဲ၊ မ္ၚးဂှ်ဂၠောဲ သတ်နဲကရာၚ်၊ ဂြိုပ်ပၞဟ်ဖာ သတ်တၟာကၠာၚ်၊ သတ်ဍာတ်ရဴကဝ် ညံၚ်ဇွောဝ်လုပ်ပါၚ်၊ ဂတဂှ်ဗျာၚ် ကၞာၚ်ညံၚ်ခယာ၊ ဒှ်ဂြိုပ်မၚ်ဂၠန် ဍာတ်လောန်ရှ်သာ၊ ဂတဂှ်ကီု ကွိတ်သီုလၚ်ကာ၊ ဍုဟ်ဂဵုပလ ကဝဂွံကျာ၊ ပြိပ်ယန်သီုသၞ ဂၠာဲပအဟာ၊ မ္ၚးဂှ်ကၠာ မွဲသာ်ဂြိပ်ဆု၊ ပရိုက်ပၞဴ ဖျဴသတ်ခပြု၊ ဓရေဲခယာ် သတ်သာ်ဇိုၚ်ၚ္ၚု၊ ဂဝးလကီု သတ်ချီုအနု၊ ဍုဟ်ဂြၚ်လအဵု၊ ဂၜဵုရုရု၊ တရးဟွံမာန် နိဒါန်ဂြိုပ်ဝွံ၊ မ္ၚးဂြိုပ်ဆု ဝွံလေမွဲသာ၊ ဂြိုပ်ဒုန်ဇၞော်သၠဲ မွဲယောဇနာ၊ ဂကူဒုန်ပၠန် ဂၠိုၚ်သန်ပြကာ၊ ပ္ဍဲလအိတ်တုန် ဂြိုပ်ဒုန်ဂှ်ကၠာ၊ တၟံထပှ်အဵု စဵုတဴအကြာ၊ မွဲယမုကၠာ စုလကာလ၊ မဟာကာလ ပဗ္ဗတဟေၚ်၊ မွဲဥတ္တရ ပဿဟီုပြေၚ်၊ ဂန္ဓပဿ ပၠမွဲလမေၚ်၊ မွဲသူရိယ ပဿဟီုပြေၚ်၊ မနိပဿ နွံံတေဇတၟေၚ်၊ သုဝဏ္ဏဟေၚ် ရေၚ်မံၚ်အပ္ဍဲ၊ သုဝဏ္ဏဂှ် ထပှ်ယေက်ပြဲ၊ တေံတၟံတရဴ နုဘဴဂၠိုၚ်နဲ၊ သတ်စှေ်လောဲလောဲ မွဲယောဇနာ၊ တၟံမ္ၚးအိုတ် ၜိုတ်ဟီုသၚ်္ချာ၊ မွဲယောဇနာ စုလကာရ၊ သီုတၟံထပှ် ခၠၚ်မြဟ်ခဏ၊ နူဒတန်ကဝ် ဗိုၚ်လဝ်လစ၊ ဒိုဟ်ဨသာန်ရ လစဆဒ္ဒန်၊ ဇြဲသုံမွဲတၞံ နွံနူကဝ်တန်၊ ဒစိတ်ယေက်ပ္ညုၚ် ဇြဲဝွံသၠုၚ်လောန်၊ ဗၠိုၚ်လမဳဂှ် ထပှ်ယေက်ပ္တန်၊ နူတိတန်ပၠန် ညန်ဒဵုကၞတ်၊ စှ်ပိယေက်ပ္ညုၚ် သၠုၚ်ပြာကဋ်၊ ကၞာၚ်ပန်အဆတ် ဗၞတ်မွဲမွဲယေက်၊ ဟွံဂွံယုတ်ဒေက် မွဲယေက်သၟဟ်ညဳ၊ သၠဗီုအဇ မြသာံဖြာဏဳ၊ ညံၚ်မၞိဟ်သၟတ် သတ်ဂြၚ်ဗစဳ၊ ဇြဲသုံကျာ်သြဳ အနဳကာလ၊ ဒှ်ဇနူပၠန် စိၚ်ဆဒ္ဒန္တ၊ ဒိုဟ်ပလိုတ်ပြဲ သကဲလစ၊ ဂိုဟ်တၟံနွံမွဲ နဲသုဝဏ္ဏ၊ သလဲဂိုဟ်ရ ဟီုပၠသၚ်္ချာ၊ ကၠံၜါစှော်ယေက် ဟွံဂွံဒေက်အာ၊ ဒှ်ဒမံၚ်ကၠာ စိၚ်မှာဆဒ္ဒန်၊ လတူဂနၚ် သြၚ်လစသန်၊ သတ်ဇိုၚ်ၜါကီု သီုသတ်ဇိုၚ်ပန်၊ နွံတဴဂၠိုၚ်နဲ ပ္ဍဲဟေမဝန်၊ လစအသဝ် ဟီုပျးလဝ်ရောၚ်။ ။
မာရဇိနော ကျာ်ဂေါတမ၊ ပ္ဍဲကဝ်ဘဒြ ဘဝတမၠာ၊ ဂေတ်ဖံၚ်ပဏံၚ် ဘုမ္မိသံၚ်သာ၊ ဟိုတ်ပလောကံ ပရံပရာ၊ ပ္ဍဲဂၠံဂဝ်စိၚ် ဒရိၚ်ဟေမာ၊ မက္တဵုဒှ်ရ ခဏဂှ်ကၠာ၊ ဗၠးနူဂဝ်မိ ဣဓိပြာထာ၊ ညံၚ်တောဝ်ပွန် ပ္ကဴကဏ္ဏကာ၊ ကရောံပြဝါ ဇၞော်အာဗွဲလွေၚ်၊ ဂကူဆဒ္ဒန် ပြဲလောန်သေၚ်လေၚ်၊ ပါရမဳပြေၚ် တၟေၚ်နူစိၚ်သအာၚ်၊ ဇၞော်သၠုၚ်လဗာၚ် နွံသာၚ်ဒြဟတ်၊ ဇမၠိၚ်ပြာကဋ် သၟီစိၚ်ဆဒ္ဒန်၊ ကၠံၜါစှော်ဟတ် တိတ်ၜတ်လဝ်ပၠန်၊ လပှ်ဆဒ္ဒန် ညံၚ်ညးသောန်လဝ်၊ ဇမၠိၚ်ဟီုပ္ညုၚ် ကၠုၚ်ပ္ဍဲအခဝ်၊ မသုန်စှော်သ္ဍာံ ဒစာံဟတ်ဓဝ်၊ ဒြၚ်တုုပ်အ္ၚဝ် ဂၠးထဝ်အပၠာ၊ ဇမၠိၚ်ပိစှော် တွံပ္ဍဲသၚ်္ချာ၊ စှ်သုန်ဟတ်ဆိုက် ဒှ်ဗဝိုက်ကၠာ၊ မတ်သာ်ဗဒါ က္တောဝ်ၜါညံၚ်ပၞိက်၊ ကၟံၚ်ၜါညံၚ်ချူ စိၚ်ဇၟူထမိက်၊ သၞေံညံၚ်မၞိက် ပၞိက်သိန်လာ၊ ဗတလဟုဲ အံၚ်မှုဲသာ်လွာ၊ စးတုပ်ဇဵုတ္ၚ အဇပမာ၊ ကာပ်ပါၚ်တုန်ကၠာ သာ်လွာဇာၚ်ၚ္ၚု၊ ခၜေါံတလၚ် ခၠၚ်လုံဇကု၊ လောမာအနု ဂွုညံၚ်ဍောၚ်ကိုန်၊ သီုလျးတရဴ နွံနုဘဴတွိုန်၊ ခါဂါံကွာ်လေ နဲဨရာဝိုန်၊ စိၚ်ဗဝဝ်ပိုန် ဒေါဝ်တွိုန်ဟေမာ၊ ဟွံဂွံလံဟေၚ် ဗွဲလွေၚ်ဇၞော်အာ၊ ဒစာံစှော်လ္ၚီ ခပ်သီပြဝါ၊ ဒှ်သကံသၟတ် တြုံကၞတ်သာ၊ လမိုန်သဳကၠဳ နွံတဴသအဳဗ္ဂါ၊ ရုပ်ဂေါဝ်ၜတ်သြဴ စိၚ်ဗြဴနွံၜါ၊ မဟာဘဒ္ဒါ ဒှ်မှာဒေဝဳ၊ တဴတဲသတုံ နွံကဵုကျာ်သြဳ၊ ဒှ်စိၚ်ဗြဴဇၞော် ဗော်မဟေသဳ၊ တဲဇွိပြာကဋ် ပယတ်ဟွံချဳ၊ စူဠဘဒ္ဒါ နာမခုတ်ပ္ညဳ၊ ဒှ်စိၚ်ဗြဴဍောတ် ရိုဟ်တ္ၚဲမှတ်လွဳ၊ သီုစိၚ်ဗြၜဴါ ဟွံခြာအနဳ၊ ရိုဟ်တ္ၚဲသဳကၠဳ ညဳသာသၟဟ်န်၊ ခါဗောဓိသတ် သၟီစိၚ်ဆဒ္ဒန်၊ ကောံစိၚ်ဗြၜဴါ ဟွံခြာမွဲဒွန်၊ ကရောံပြဝါ စိၚ်နာဲသာဇန်၊ ဒေါဝ်ဟေမဝန် ထာန်ဂြိုပ်ရည၊ ကြာဒရီုပကဴ နုဘဴက္ဍၚ်ပြ၊ ဒုၚ်ယမုကၠာ မာလာကာရ၊ နူဂြိုပ်ပ္ကဴအာ ကမာလစ၊ ဝၚ်ေဍာ်ဝၚ်ေပ္ကဴ သြဟ်ပ္တဴစိတ္တ၊ စဝါလကိုန် ပ္တိုန်ဓတ်ကာယ၊ ကၠေံကမာရ ဒေသတၞံဇြဲ၊ ဗျတ်ဍာ်ဇကုဇြဲ နဲဂှ်ပယတ်၊ ကရောံပြဝါ မှာဗောဓိသတ်၊ ကောံစိၚ်ဗြၜဴါ ဟွံခြာပယတ်၊ မှာဗောဓိသတ် သၟီစိၚ်ဆဒ္ဒန်၊ မိတ်သ္ဍိုက်ၜါ သာဓာလၜီန်၊ သၞံက်လဗိၚ် သိုၚ်သၠိၚ်တဴတုန်၊ ဒေါဝ်စိၚ်ဂမၠိုၚ် ရိုၚ်ၚ်ဟွံခၠန်၊ ပ္ဍဲဟေမဝန် တန်မံၚ်တဴတုန်။ ။
နွံမွဲကာလ တသိုက်ပြာထာ၊ စိၚ်ဗောဓိသတ် တြုံကၞတ်သာ၊ ဒစာံစှော်လ္ၚီ ခပ်သီပြဝါ၊ မွဲမွဲဍီုဍီု သီုစိၚ်ဗြၜဴါ၊ သ္ကဲသတုံဇွိ ဒမၠိဟွံခြာ၊ လဗာၚ်လုပ်အာ ဂြိုပ်မာလာရ၊ လုပ်ၜှ်ဝၚ်ေပ္ကဴ အပၠဴဟေမ၊ အပ္ဍဲဂြိုပ်ဂှ် ပဒှ်ဒေသ၊ ဓိတာန်သက်သက် လ္ၜက်ကၞာၚ်သၠ၊ မွဲယောဇနာ သၚ်္ချာဟီုပၠ၊ မ္ၚးဂှ်ရ ပ္ကဴဂၠိုၚ်ပြကာ၊ ဂမုၚ်ဓိတာန် ကှေ်ပြာန်စမ္ၚာ၊ အနာၚ်သဂါ မာလဳတဝ်သွဝ်၊ အံၚ်ရေၚ်ဂဇေၚ် ပြေၚ်ဍောၚ်ရာၚ်ဗဝ်၊ ဒလာဲသန်ထဝ် ဇဝ်ကဵုဇဝ်ဗ္ဂါ၊ မ္ၚဵုကုန်မ္ၚဵုကွ ဂန္ဓမာလာ၊ ပ္ကဴဂနေၚ်ရတ် ပစ္စေမွဲသာ၊ အဘိက်စမ္ပာ မာလဳဍံက်ဆာၚ်၊ တၞောဝ်သၟီကာက တၠသၞေၚ်ဒြဝ်၊ ဂၚ္ၚေၚ်ဇာပ်ပဝ် တမ္ညဝ်ဂမြိၚ်၊ သာဲအဒါဲကၠံၚ် ညံၚ်ဗရုတိၚ်၊ ကျာပိုက်လဝိၚ် ဒမြိၚ်ဂြိုပ်ပ္ကဴ၊ ကျာပိုက်လဟုဲ ဗြဲဗြဲပြဟ်တဴ၊ အရှာံဂြိုပ်ပ္ကဴ ရဴနန္ဒဝိုန်၊ ယဝ်ညးလုပ်စိုပ် ဂြိုပ်ဗဝဝ်ပိုန်၊ ဒဒိုက်ၜိုန်ဒှ် ယဲပူမှ်ဍိုန်၊ ဂြိုပ်ဒမြီုပကဴ နွံနုဘဴတွိုန်၊ နာဲဍောၚ်ထာၚ်ကိုန် ချိုန်ဂှ်လုပ်အာ၊ နကဵုလပှ် သၟဟ်ဇၟူဨရာ၊ ဗလဲကေတ်တုဲ တြုံလွုဲနာဲသာ၊ ဂရိုက်ပ္တုံပကဴ ကုစိၚ်ဗြၜဴါ။ ။
ချိုန်ခဏဂှ် ပဒှ်သာ်လွာ၊ ဍိုန်ဍိုန်ညှာညှာ ကုမှာဒေဝဳ၊ မဟာဒေဝဳ ဗြဴမဟေသဳ၊ ဂရိုပ်ပ္တုံကၠာ ခါဂှ်ဒ္ၚဳဒ္ၚဳ၊ ဓိတာန်အနာၚ် ပံက်ထာၚ်ရာၚ်ဖဳ၊ ပြဟ်စှေ်ဒ္ၚဳဒ္ၚဳ ဖဳတဝဳဂၠောဲ၊ ဒတုံတူစး ဗြဴညးမပြဲ၊ မောဝ်ပ္ဍးလမာဲ အမြာဲကၠံမွဲ၊ ဗောဓိသတ္တ တလဒြၚ်ဗၠဲ၊ ကာလကြဴတဲ ပ္ဍဲစိၚ်ဗြဴဍောတ်၊ စူဠဘဒ္ဒါ နာမပြာကဋ်၊ ဂရိုက်ပ္တုံသၟတ် တြုံကၞတ်ညး၊ ကလောံအချဴ ဏှဴဒတုံပြး၊ ချိုန်ဂှ်စှေ်ဒး စးစိၚ်ဗြဴဍောတ်၊ စူဠဘဒ္ဒါ ခါဂှ်အဆတ်၊ သီုဍာ်ရမတ် ဂမအတ်ကရေဲ၊ အချဴကိစ္စး ဗိုၚ်တးသြေဲသြေဲ၊ ဒြေပ်အာဒြေပ်ကၠုၚ် သုၚ်ဂျိပဟေဲ၊ စိၚ်ဗြဴစိုတ်ဍေဲ ထေဲကဵုဆဒ္ဒန်၊ အဲဟိုတ်ဟွံဆာန် နွံဒြဟာန်အန်၊ သီုသ္ၚိအချဴ နှဴထောံကဵုပၠန်၊ ဗြဴဇၞော်ဟိုတ်ဆာန် နွံဒြဟာန်လောန်၊ ပ္ကဴဟွံကၠိစောန် မြမောဝ်လောန်လာန်၊ ဂရိုက်ကဵုပ္ကဴ ဟိုတ်ဗြဴညးဆာန်၊ ပစိုတ်ဟဲမာန် ဒြဟာန်ဟွံဓဝ်၊ ဒေါဝ်စိၚ်ဂမၠိုၚ် ရိုၚ်ၚ်သအဳဗဝ်၊ အဲဗြဴဒးဂွ ဟွံကလေၚ်ခဝ်၊ ဒြဟာန်ဟွံဓဝ် အသဝ်သွံမ၊ ပိုဲစိၚ်ဗြၜဴါ မွဲသဘာဂ၊ ကၠောန်ၜိုတ်တဴကီု အာရီုကာမ၊ ဂကူလေဝ်တုပ် ရုပ်လေဝ်ဟွံကျ၊ ဟွံကြိုက်ကဵုပ ပြဝဝွံပၠန်၊ ဟွံမၚ်မွဲလဝ် ဓဝ်ဂတိပန်၊ မံၚ်ကၠာရနာဲ ဟာဲမဆဒ္ဒန်၊ ခါနာဲဟွံချိုတ် စိုတ်အဲဟွံတန်၊ ဒေါဝ်ဟေမဝန် ကဵုအိုတ်သ္ကန်ဒဲ၊ မိစိၚ်ဗြဴဍောတ် မှတ်ဒက်လဝ်ဝဲ၊ ဗောဓိသတ္တ တၠဒြၚ်ဗၠဲ၊ ဝၚ်ေဂြိုပ်ပကဴဖဲ သြဲစှေ်လစ၊ သီုပြဝါသ္ဍာံ ဒစာံလ္ၚီဂျ၊ သီုစိၚ်ဗြၜဴါ စှေ်အာလျလျ၊ ဝၚ်ေဍာ်လစ ပ္ဍဲကာလဂှ်၊ ဗရုဝၚ်ေအဴ ထိုက်ပ္ကဴဒကှ်၊ တူစိၚ်ဗြၜဴါ ဗရုဲဏာပြဟ်၊ ညံၚ်ဗြဲတသေၚ် စိၚ်ဝၚ်ေလပှ်၊ ထိုက်ပ္ကဴသၟေဟ်ဂှ် ပဒှ်အသဝ်၊ ဒုၚ်ဏာကဵုသၟဟ် မဟာဘဒ္ဒါ၊ စိၚ်ဗြဴဍောတ်ညာတ် နရာတ်သိၚ်သာ၊ ပ္ဍဲပြဝဂှ် ဒှ်ဝဲမွဲဝါ၊ စူဠဘဒ္ဒါ ခါဂှ်သ္ဂောံညာတ်၊ ပ္ဍဲစိုတ်နရာတ် သ္ပာတ်သ္ဗပူဆာ၊ ပြဝသၟီစိၚ် ပ္ဍဲစိုတ်သိၚ်သာ၊ တူဂၠိုက်တၞံ ဂၠံမနောဒွါ၊ ညံၚ်ကြက်လကံ ကၠံဗဟဳတာ၊ ဒက်လဝ်ဝဲအိုတ် ပ္ဍဲစိုတ်သေၚ်ဟာ၊ ဗောဓိသတ္တ တၠအဒ္ညာ၊ ဝၚ်ေဍာ်ပ္ကဴဖဲ ကွာ်သြဲတိုန်အာ၊ စူဠဘဒ္ဒါ ပ္ဍဲကာလဂှ်၊ ဍောၚ်ပ္ကဴဒကှ် မိန်ဂိုၚ်ၜှ်ဏာ၊ တွာ်သြဲဗက်အာ ဂြိုပ်မာလာရ၊ စိုတ်ထာန်ဇနူ ဗျူပတန်ကာယ၊ ချိုန်ဂှ်ဟေၚ်ရ စူဠဘဒ္ဒါ၊ စိၚ်ဗြဴပြာပ်အာ ခန်လွာဂိုဟ်ထဝ်၊ ထာန်ပစ္စေက တလအသဝ်၊ ပဝတ်လ္ၚောဝ် သီုဓဝ်သစ္စ၊ ပ္ကဴဒကှ်အဵု ဒ္ၚဳကဵုဒါန်ရ၊ ရာဒနာဗက် ပ္ဍဲပစ္စက္ခ၊ ယွံသော်က္ဍိုပ်မိ မိဂ္ညိသဳလ၊ ဖဵုဒါန်အဲဗြဴ ပူဇဴပဒၟ၊ နူဝွံအိုတ်သ္ကန် ဖလုတ်ခန္ဓ၊ နူစိၚ်ဝွံကၠာ ၜးအာဘဝ၊ ဒဒှ်ကောန်သၟီ သမၞိၚ်နန်မြ၊ ကဵုဂွံဒှ်ညိ ဗွဲယုတ္တိရ၊ စူဠဘဒ္ဒါ လၟေၚ်နာမ၊ ကဵုညးခုတ်ခဴ ပ္ဍဲဘဴဂတ၊ ကဵုဒြၚ်တီညိ ဇာတိဿရ၊ ဒြၚ်ဆဒ္ဒန္တ တလအဒ္ညာ၊ ဒဵုအဲဗြဴသွံ ကဵုဂွံဖျဴဏာ၊ သၟီစိၚ်ဆဒ္ဒန် သ္ကန်ကဵုလသာ၊ မိပတ္ထနာ ရာဒနာရ၊ တုဲပၠန်စဴအာ အရာဒေသ၊ စံၚ်တူပူဆာ လ္ၚာပ်လ္ၚာသ္ပာထ၊ လုံဂၠံကာယ ဇြအာရိုဟ်တ္ၚဲ၊ တူဂၠိုက်လဟဵု တုဲက္တဵုဒှ်ယဲ၊ ဟွံဂွံဗၞတ် ကၟတ်ဍာ်ချောဲ၊ တိက်ကဝန်ေတဴ ဒကဴတၞံဇြဲ၊ ရမတ်ညံၚ်ဗြဲ ရိုဟ်တ္ၚဲဇြာဲအာ၊ စူဠဘဒ္ဒါ သိၚ်သာတဴတုန်။ ။
ဟးသၟီဆဒ္ဒန် ဒဇန်ဂၠိုၚ်စွံ၊
လၟုဟ်ကောထောံ ကလောံအချဴ၊၊
ဒြဟာန်ဟွံဓဝ် မိစွံလဝ်သွဴ၊
သ္ကန်ကလိဘဴ ဂုန်ပ္ကဴရသွံ။ ။
ပိိုဲစိၚ်ဗြၜဴါ အာကၠုၚ်မွဲစွံ၊
လၟုဟ်ကောသွံ စွံစိုတ်ဟွံဓဝ်၊၊
ထောံဖျေံအချဴ အဲဗြဴလၚ်ဇွောဝ်၊
သၟီစိၚ်ဟွံဓဝ် အသဝ်ကွေံသွံ။ ။
ဟွံတီသ္ဂးပ္ကဴ အချဴရောၚ်ထောံ၊
ပဝဝွံသွံ သ္ဇိုၚ်ဂွံပတန်စိုတ်၊၊
ဟွံချပ်တော်ဆ တလဒြၚ်ဗိုတ်၊
ပဝိုတ်ဟွံဝိုတ် ဒဵုချိုတ်ရသွံ။ ။
ဂုန်သၟီစိၚ်ဗၠာဲ နာဲထဝ်ကလောံ၊
ကမတ်ဍာ်သွံ မိဟွံမိက်သ္ၚာဲ၊
ကောဆာန်ဗြဴဇၞော် မွဲဗော်ဟွံသြာဲ၊
ဂြိုဟ်မိတူလာဲ ဒၞာဲဝွံရသွံ။ ။
ကိုပ်တေံနာဲသ္ဂး လေၚ်လးမွဲစွံ၊
လၟုဟ်ဝွံသွံ ဂွံစိၚ်ဗြဴဇၞော်၊
ရာပ္ကဴမပြဲ ဗလဲလၜေါ်၊
မိမွဲမွဲဗော် ဟွံကော်ရသွံ။ ။
ဟးနာဲဒြၚ်ဗၠဲ အဲမွဲကောစွံ၊
သမၞိၚ်ဇြဲသွံ ဂွံပဒမံၚ်၊
ညာတ်ညးကဵုညး လေၚ်လးဟောကၠံၚ်၊
ဂြိုဟ်ပ္ဍဲတူစံၚ် ဗြံၚ်ဗြံၚ်ရသွံ။ ။
ဗြဴဇၞော်ဟိုတ်ဆာန် ရေၚ်ကာန်မွဲစွံ၊
ထိုက်ဒကှ်သွံ ၜှ်ဂွံဒုၚ်ကဵု၊
မိမွဲဒေါဝ်ညး ဒးဒုၚ်စရဵု၊
ဂျိုၚ်သက္ကဖဵု ပြဵုလီုရသွံ။ ။
တေံပၟတ်ကဝ် အသဝ်ဂၠိုၚ်စွံ၊
ဗြဲဇၞော်ဗ္ဂူသွံ မဂွံပၠိုတ်ကီု၊
မိဂုန်သၟီစိၚ် ဝိဝိၚ်သေၚ်ပ္ဍီု၊
ဗတ်အိုတ်လမျီု ၜိုဟ်ကီုရသွံ။ ။
စူဠဘဒ္ဒါ ပ္ဍဲကာလဂှ်၊ ဇရေၚ်တၞံဇြဲ ရိုဟ်တ္ၚဲဇြာဲကှ်၊ ထောံကွေံပြဝါ ဟွံအာတၞဟ်၊ ဆယဝီုအဴ နွံတဴသြဟ်သြဟ်၊ ပ္ဍဲခဏဂှ် ပဒှ်သာ်လွာ၊ ဗောဓိသတ်ကီု သီုကရောံပြဝါ၊ ဟွံညာတ်ဗြဴဍောတ် စူဠဘဒ္ဒါ။ မူဟိုတ်ရောသ္ဂး ဂၠာဲဂစးအာ၊ သၞိၚ်တၞံဇြဲ ဇကုမွဲကၠာ၊ ညာတ်တုဲပြာပ်အာ မှာဗောဓိသတ်၊ ဂၠာဲဇွိတ်သပေါတ် ဟီုရောတ်သြဟ်ပ္တဴ၊ ယွံသ္ဍိုက်မ အနကဣဗြဴ၊ ပမိမံၚ်တဴ ဒကဴတၞံဇြဲ၊ ပဟွံသ္ၚဳမၠာ် ကၟတ်ဍာ်ချောဲ၊ မူမိဒှ်ယဲ ပ္ဍဲဂၠံကာယ၊ ပနာဲကၞပ်လှိၚ် ဂွိၚ်သ္ပာထ၊ ဒေံဗြဴညံၚ်က္ည စကၟတ်ချောဲ၊ ဒတိတ်ဒဒှ် ဟီုတွံကဵုအဲ၊ ဝွံလဝါကိုန် ၜှ်ပ္တိုန်သာ်ဗၠဲ၊ က္တဵုစညိနာဲ ဟာဲညးမပြဲ၊ စူဠဘဒ္ဒါ လ္ၚာပ်လ္ၚာတူယဲ၊ မိၚ်တြုံမဟီု ညံၚ်ညးပ္ကီုဘဲ၊ ယွံအီဟွံဂး တဟးစိုတ်ပ္ဍဲ၊ မဟာဘဒ္ဒါ မၞုံဇာသြဲ၊ ပြာပ်ကၠုၚ်တုဲသအး ယွံညးမပြဲ၊ ဇရေၚ်တၞံဇြဲ မိဒှ်ယဲဟာ၊ မိလပထေဲ ကၠေံပဟေဲကၠာ၊ ဆပိုဲညးၜါ အာကၠုၚ်မွဲစွံ၊ ဟွံတီဒးထောံ ကလောံအချဴ၊ ကရောံဍောၚ်ပ္ကဴ အချဴကိတ်နာဲ၊ သၟီစိၚ်ဟွံတီ ဓနီစၞာဲ၊ က္တဵုညိကၠာယာဲ နာဲပပၞတ်၊ ဨဟိညံၚ်က္ည စချောဲကၟတ်၊ ပိုဲစိၚ်ဗြၜဴါ ဟွံခြာပယတ်၊ သၞိၚ်ဓိတာန် ဆာန်နူဍောတ်ဍောတ်၊ စသိုၚ်အာရီု မွဲဒွီုဟွံဆောတ်၊ မိပပၞတ် စကၟတ်ကၠာ၊ မံၚ်လံမိချိုတ် စိုတ်ပစံၚ်သၞာ၊ စူဠဘဒ္ဒါ မိၚ်တုဲခါဂှ်၊ ထောံမတ်သ္ၚဳမၠာ် ဍာ်ရမတ်ပြဟ်၊ ယွံမစိုန်ဒှ် သၟဟ်လၟာဂၞဴ၊ လဟီုမိဂှ် ဟွံဒှ်သဘဴ၊ သၟီစိၚ်ဆဒ္ဒန် ဟွံရန်အဲဗြဴ၊ ကလောံအချဴ မနှဴကဵုအဲ၊ ဒေါဝ်ညးဂမၠိုၚ် ဂျိုၚ်ဂျိုၚ်ဒွံဘဲ၊ မုက်ဍောတ်မတ်သဝ် ဓဝ်ဟွံမၚ်မွဲ၊ ကံအဲကဵုအဲ လဝ်ကဵုအဲရ၊ မသက္ကုဖဵု မူကဵုဂျိုၚ်ပ၊ မိအိုတ်ခန္ဓ ဟွံဆောတ်ရၝဲ၊ ဂးဣၚ္ၚုဟ်သၟတ် ရမတ်ညံၚ်ဗြဲ၊ ယဝီုတတ်တတ် မတ်ဟွံလၜဲ၊ မှာဗောဓိသတ် တြုံကၞတ်အဝဲ၊ မိၚ်ဗြဴဍောတ်ဟီု သီုမတူယဲ၊ ရမတ်ညံၚ်ဗြဲ ပ္ဍဲဂှ်ဟီုတိုန်၊ ဟးထိုက်ကသဝ် မိထဝ်ပ္ဍိုန်၊ ဟွံတီသ္ဒးပ တော်ဆကဵုဗိုန်၊ မိဍောၚ်ထာၚ်ကိုန် ဖ္ဍိုန်ကၠေံစိုတ်၊ ယြဴညးမွဲ ပ္ဍဲလိုက်သီုဖအိုတ်၊ လောဘဒေါသ မောဟဟွံပၠိုတ်၊ သတ္တံသ္ဒးချိုတ် ဟိုတ်ပိပြကာ၊ ပၟတ်ပိဖဴ နုဘဴပြကာ၊ စံၚ်ပ္တူကၠေံညး လုံရးခန်လွာ၊ ယြဴညးမွဲ ပ္ဍဲလိုက်ဝွံကၠာ။ သီုလောဘဟေၚ် ဒးချိုတ်သေၚ်ဟာ၊ ချိုတ်ဒးနရက် ဝဳပက်ဗက်အာ၊ လၟိုန်ဂၠိုၚ်ဝါ မအာဒှ်ပြိုတ်၊ ပူဂဵုမွဲရ နဒေါသချိုတ်၊ တ္ၚဲမဒးချိုတ် ဒှ်ဟိုတ်နာဂ၊ ဗၠးနူနရက် ဝဳပက်ဂတ၊ မဒးဒှ်နာ် ကျာ်တြဲတွံပၠ၊ ပူဂဵုမွဲရော ချိုတ်နမောဟ၊ ဗၠးနူနရက် က္တဵုဒှ်ယက္ခ၊ ပဟိုတ်ဂှ်ရ် မှာယလဂ္ဂန်၊ နာဲအေၚ်ဒုၚ်ညိ လံကလိသ္ကန်၊ ဇၞော်စိုတ်ဍောၚ်စိုတ် ဟိုတ်အပါဲပန်၊ က္တဵုကၠာလဂ္ဂန် မိပ္တန်ကာယ၊ နူဝွံဂတ ပြဝသာ်ဂှ်၊ ဗၞတ်အာယုက်ရော ကောဟွံကဵုဒှ်၊ ဂးတုဲသၟီစိၚ် လွိၚ်ဏာလပှ်၊ ထ္ၜပတိုန်ပြဟ် ခါဂှ်မွဲတဲ၊ မဟာဘဒ္ဒါ ဂိုၚ်သွာဗလဲ၊ ညးဂြဲအဲဂြဲ ၜိုန်ဗလဲတဴ၊ ဟိုတ်ဝၚ်ေအာဟာ ခါဂှ်စိၚ်ဗြဴ၊ ဇကုတတ်တတ် ဒြဟတ်အန်တဴ၊ ညံၚ်လွတ်ပတ်ဒြဴ စိၚ်ဗြဴလောတ်မာ၊ ယဝီုတဟက် ပလက်ဖြာဖြာ၊ ဟိုတ်ဒေါသဂ္ဂိ ဂျိမနောဒွါ၊ ဂြိုဟ်ပ္ဍဲဒကုတ် ကြုတ်တူလာဲအာ၊ စူဠဘဒ္ဒါ စုတိအာတုန်။ ။
ဗောဓိသတ္တ ကရောံပြဝါ၊ သမၜာဇကု မာတ်စုတိအာ၊ ရမတ်တသေၚ် ပေၚ်မံၚ်မတ်ၜါ၊ စိၚ်ဂမၠိုၚ်သၟတ် ဂအောတ်ဟောဒြာ၊ သၟီစိၚ်စကာ ပ္ဍဲကာလဂှ်၊ ဆုကြက်စလန် ဇၞော်သန်ကြဳဇှ်၊ ကဵုကေတ်နၚ်ပြဟ် ကာလဂှ်ရ၊ ကၠောန်သ္ၚိစဏံၚ် သွက်ဂွံစံၚ်ဇွ၊ နလပှ်ရ ဂိုၚ်ထ္ၜပတိုန်၊ ပြဝါဂမၠိုၚ် ဟုပ်ဗိုၚ်ဟွံဇြိုန်၊ ကေတ်နၚ်ပ္ကဴသြဴ ပူဇဴလၟိုန်၊ နာဲဍောၚ်ထာၚ်ကိုန် ပဒက်သိုန်ပိဝါ၊ စံၚ်ကၠေံဇွဟေၚ် ချိုန်ဂှ်သေၚ်ဟာ၊ ဇုတ်စိၚ်ဗြဴဂှ် လပှ်ဂိုၚ်ဏာ၊ ပ္ဍဲဂိုဟ်တၟံထဝ် စွံပ္တန်လဝ်ကၠာ၊ ဗောဓိသတ္တ တလအဒ္ညာ၊ ဂကောံပြဝါ ပၠန်အာလစ၊ ဇွစိၚ်ဗြဴလွုဲ စံၚ်ကၠေံတုဲရ၊ လတေံဒေံမ စူဠဘဒ္ဒါ၊ နူစိၚ်ဂှ်ကၠာ ၜးအာဘဝ၊ တိုၚ်ပတ္ထနာ ဗြဴမှာအဂ္ဂ၊ လတူနန်မြ သီုတေဇလျး၊ ပ္ဍဲဂၞကျာ်တုန် သၟီပန်ဒရး၊ လုပ်တန်ဂဝ်သအး ဒးစှ်ဂိတု၊ သၠးဂၠံဂဝ် တမ္ညဝ်လဒု၊ ဒေါဝ်ဍိက်ကုန်ကွ မောၚ်မတံဝွံ၊ လတူနန်မြ အနုဍောၚ်ပ္ကဴ၊ ဗွဲလွေၚ်ဇၞော်အာ ခါဂှ်ဍောတ်ဗြဴ၊ ရုပ်သာ်ၜတ်သဴ ရဴပ္ကဴဒကှ်၊ မုက်ညံၚ်ဂိတု အနုချူဗ္ဒဟ်၊ သော်လမ္စံက်သမ္ၚဟ် သၟဟ်ညံၚ်သၞေၚ်ထိုၚ်၊ ဂၞေၚ်မတ်ၜါဝိုၚ် ကိုၚ်ဖ္ဍဟ်စဝ်၊ ညံၚ်ဒမၚ်ဍာ် ဗပါ်တၟံထဝ်၊ မတ်တုပ်ကောန်ဒြာဲ စရာဲညးသွဝ်၊ သၟၚ်ပါၚ်ပ္ဍီု ဗီုညးချူလဝ်၊ ဇာၚ်ၚ္ၚုအ္ၚဝ် ကတောဝ်ကၞုသၚ်၊ ၚ္ၚေက်တုပ်ညံၚ်မြု လျးတသုခၠၚ်၊ ကံနုၚ်အဖၠူ ဗြဴဇၟူမှာတၚ်၊ ပိတန်ရေတ်ဆၚ် ကၞၚ်ကံဇဵုနာဲ၊ သြိုဟ်ဂတဵုပး ဇၞော်ကၠးစရာဲ၊ သ္ပာတဲသၟဟ် လပှ်စိၚ်ဗၠာဲ၊ သၞေံသိန်လှာ ဇိုၚ်ၜါဂေါဝ်ဆာဲ၊ ဇၞော်သန်စရာဲ ဂၠာဲဟီုဟွံမာန်၊ ထၟိက်မသုန် ဂုန်တရဴထာန်၊ ဍိုက်ပေၚ်တဴရ ဗြဴတလဒါန်၊ စူဠဘဒ္ဒါ နာမကွေံကြာန်၊ ခုတ်ယၟုအဴ ကောန်ဗြဴသၟီဆာန်၊ လတူနန်ယာန် သၟတ်ဖ္ဍာန်ပ္ကဴ၊ မသုန်ကၠံရ ဟွံကဍိက်ဗြဴ၊ သဳကၠဳဂမြိၚ် ကွိၚ်ကွိုက်ကမြဴ၊ ပရိုၚ်ကောန်ဗြဴ သၟီသ္ဍဴနန်ထဝ်၊ အလုံဒိုဟ်စှ် ဒယှ်တမ္ညဝ်၊ သၟီဗြီုမဒတ် ကၞောတ်အသဝ်၊ မိၚ်ပရိုၚ်ဗက် ဟိုတ်ဒါန်ဆက်လဝ်၊ စိုတ်ညံၚ်ဗဝ်မှောဝ် နွံဓဝ်မေတ္တာ၊ ဖအောဝ်ရာဇာဒုတ် ကလုတ်စကာ၊ ကၠုၚ်ပတၟာဲ ကုနာဲက္ဍိုၚ်သွာ၊ သၟီမိမၜါ စိုတ်ညဳသာရ၊ အခေါၚ်အဝဵု တွဵုသီုယဿ၊ ဇိုန်ကဵုတုဲအဵု ဗဵုတသဵုဂျ၊ ဝၚ်ေဒုၚ်ဖျဴဏာ ဍုၚ်ဗာရာဏ၊ ပသေက်ပြဲက္ဍၚ် ဌာန်မၚ်္ဂလ၊ ဗလိုပ်ဖုံသၟတ် ဗြဴဒါန်ပဒၟ၊ လတူနန်မြ အဂ္ဂမဟာ၊ စွံပတန်လဝ်ကၠာ မဟာဒေဝဳ၊ ဒှ်ဂၞကျာ်ဇၞော် ဗော်မဟေသဳ၊ မသုန်ကၠံရ မောၚ်မတသဳ၊ သီုဍိက်ကုန်ကွ ဇိုန်ကဵုသ္ပလွဳ၊ စံၚ်ဒြဝ်သြေဲကျာံ ဇၟာပ်ရာဂါံဇဳ၊ ရိုဟ်တ္ၚဲသ္ပလွဳ ဟွံဂွံချဳအာ၊ ဗြဟ္မဒတ္တ တလက္ဍိုၚ်သွာ၊ သ္ဍိုက်လောန်ဗၞတ် ဗြဴရတ်ကညာ၊ ဗြဴသအာၚ်ကၠေံလဝ် ဗြဴသွဝ်ရောၚ်အာ၊ သီုကဵုဂၞကျာ် မူသာ်ပမာ၊ ညံၚ်အိန်နာဲမြု ကဵုသုဇာတာ၊ သၟဟ်သၟန်ညဳသာ ပ္ဍဲတာဝတိၚ်၊ ပမာနဲဂှ် လၟုဟ်ဝွံညဳ၊ ညဳသာသၟဟ်သၟန် မွဲနန်ဂြၚ်စိၚ်၊ သ္ဍံက်လဗိၚ် သိုက်လှိၚ်တဴတုန်။ ။
စူဠဘဒ္ဒါ မဟာဒေဝဳ၊ တူဒေန်ကျာ်သြဳ ညံၚ်ဗီုအနဳတ္ၚဲ၊ ပ္ဍဲမသိုက်လှိၚ် သမၞိၚ်နန်ဗၠဲ၊ နဇာတိညာဏ် ပဋိဘာန်ပြဲ၊ လတူနန်ဗၠဲ ပ္ဍဲစိုတ်ပိုၚ်ခြာ၊ ဂဇံဒေၚ်လှၚ် ချပ်ဂြၚ်ဗစာ၊ ဂွံညာတ်ကေတ်ရ ဘဝကိုပ်ကၠာ၊ ပ္ဍဲဒေါဝ်ဟေမာ ပကာဂစိုတ်၊ ဒမာယဲစိုတ် ဟိုတ်နူဆဒ္ဒန်၊ မဒက်လဝ်ဝဲ ပ္ဍဲဟေမဝန်၊ ဂြၚ်တီကေတ်ရ ကာလဂှ်ပၠန်၊ စံၚ်တူပူဆာ ထသ္ပာလောန်၊ ဍာ်ဟွံမိက်သုၚ် ပုၚ်ဟွံမိက်ညန်၊ ဂုဏ်စိၚ်ဆဒ္ဒန် လတူနန်ဗၠဲ၊ စံၚ်တူပူဆာ ဇြာဲအာရိုဟ်တ္ၚဲ၊ သၟီဆဒ္ဒန္တ တလဂြၚ်ဗၠဲ၊ မူဂွါံကာလ သာမယမွဲ၊ ဆဒ္ဒန်သ္ဂောံချိုတ် ဗပေၚ်စိုတ်အဲ၊ သ္ဂောံသကုတ်ဝဲ မွဲတ္ၚဲညိရော။ ။