အရေဝ်မုသာကေုာံပရိုၚ်ပ္တောံ
အရေဝ်မုသာကေုာံပရိုၚ်ပ္တောံ
80% တၟံကၠံအရေဝ်မုသာပရေၚ်ပရောပရိုၚ်ပ္တောံပလံၚ်ပ္တိတ်ဗစိုပ်ဏာသွက်ညးဂမၠိုၚ်တံမာန်ရ၊
20% တၟံကၠံဏံဂှ်ဟေၚ်ပိုဲမၞိဟ်တံပလံၚ်ပ္တိတ်ဗစိုပ်ဏာအရေဝ်ဓဝ်ဍာံကေုာံပရေၚ်ပရောပရိုၚ်ဇေတ်တပ်မွဲကီုရ၊
ပိုဲမၞိဟ်တံဏံလေဝ်ဒးစိုတ်ကလၚ်ကေတ်အရေဝ်မုသာကေုာံပရေၚ်ပရေံပရေံဂၠိုၚ်ရ၊ တုဲတှ်ေ ပိုဲမၞိဟ်တံဏံဂှ်ပၠန်လေဝ် ဒးစိုတ်လဴစပရောညးတၞဟ်လပါ်ပရေံပရေံလၟိုန်အခိၚ်အခါကီုရ၊ မၞိဟ်မွဲရဲတံဂှ်လေဝ် ပရေၚ်ပရောညးတၞဟ်တီဖအိုတ်ဆဂးပရေၚ်ပရောဇကုမွဲရဟွံတီတုဲဣဏံလေဝ်ဝါတ်မံၚ်ကီုဏောၚ်၊ ဟိုတ်သာ်ဂှ်တုဲ ပရောပတောံဟွံတီဓဝ်ဍာံမွဲဂှ်စကၠုၚ်အခေတ်မြဟ်မြက်နူကဵုပရေၚ်ဒဒှ်ဍာံတံဏီရ၊ ညံၚ်ရဴပရေၚ်ပရောပရေံပရေံနူညးတၞဟ်တံဂှ် လဴထ္ၜးပ္တိတ်ဏာသွက်ညးတၞဟ်ဂွံကလၚ်ကေတ်မာန်လောဲလောဲမွဲတုဲစအခေတ်သက်ဟီုဟွံမွယ်ရ၊ ဟီုဂမိပ်စိုတ်ပါၚ်သၞော်ခိုဟ်ဂွံမွဲချိန်ခဏတုဲ ဗွဲကြဴဒှ်ကၠုၚ်ပြသၞာဟွံအောန်လေဝ်နွံတဴဗဝ်သအဝ်ရ၊ မၞိဟ်မဟီုပရေၚ်ပရောပရေံပရေံပတောံပတောံလပါ်ညးတၞဟ်တွဵုတံဂှ်တှ်ေ လအ်အာညိတုဲဒှ်ကၠုၚ်ဒ္ဂေတ်ပွဖျုန်လတေၚ်ဇုတ်စၞာံပတိုဟ်ပိုဲဏံတုဲ ဟွံလအ်မၞိဟ်ဏံမွဲဒှ်ကၠုၚ်မၞိဟ်ဇၞော်ဟွံမွယ်ကဵုအဓိပ္ပါဲလးလးမွဲတၠကီုရ။
သၞောတ်သၞောဝ်သဘာဝဟီုမ္ဂးဂှ်တှ်ေ ကသပ်လညာတ်ပိုဲဏံဂှ်ဒှ်ညံၚ်ရဴပသဲမဇြောတ်ဒၟံၚ်မွဲကလောံတုဲ တံၚ်ဂြဲထပၠုပ်ကေတ်နၚ်ပ္ဍဲပိုဲဏံနာနာသာ်အိုတ်ကီုရ၊ ယဝ်ရပိုဲတံကူချပ်ပရေၚ်ပရောခိုဟ်ခိုဟ်မ္ဂးတှ်ေလေဝ် တံၚ်ဂြဲထပၠုပ်နၚ်ပရေၚ်ပရောခိုဟ်ခိုဟ်တံဂၠိုၚ်ကၠုၚ်ရ၊ ဆဂး အခိၚ်လဵုပိုဲတံကူချပ်ပရေံဗၠေတ်တ္ၚံက်စၞာဲဏောၚ်တှ်ေ အခိၚ်ဂှ်ဟေၚ် ပိုဲတံတံၚ်ဂြဲထပၠုပ်ကေတ်နၚ်အရာနာနာလပါ်ပရေံပရေံယုတ်ယုတ်တံဂၠိုၚ်ကၠုၚ်အိုတ်တုဲ ကော်စကုသဵုပရေံလုပ်စိုပ်ကၠုၚ်ပ္ဍဲဘဝပိုဲဏံမာန်ရ၊ ဟိုတ်ဒှ်သာ်ဂှ်တုဲ ပိုဲတံလ္ပစောဗကစပရောညးတၞဟ်ဟွံခိုဟ်တံဂှ်တုဲ ပရေၚ်ပရောဟွံခိုဟ်တံဂှ်လေဝ်လုပ်စိုပ်ကၠုၚ်ပ္ဍဲဘဝပိုဲဏံလောဲလောဲသွာသွာမာန်ရ။
ပိုဲတံလ္ပဒှ်မၞိဟ်ကတောဝ်သာပတေဟ်စလောဲဂှ်ညိအဴ ညံၚ်ရဴကဵုပရောပရာသွက်ညးတၞဟ်ဒးလက်ဒေါန်တက်ၜုၚ်ညးသ္ကံဗွဲတုန်၊ ဗီုလဵုပိုဲတံဂွံပါဲဓလေတ်ထောံနူမၞိဟ်လဴစပရောညးတၞဟ်ဟွံခိုဟ်တံဂှ်တှ်ေ ပိုဲဏံဒးသ္ပမၞိဟ်ညံၚ်ရဴဟွံတီတဴမွဲသာ်တုဲမံၚ်ထောံညိၚ်ညိၚ်ညိတှ်ေသောၚ်အိုတ်ရ၊ ဣဏံဂှ်လေဝ် ညံၚ်ရဴပိုဲတံဂိုၚ်ပကောံစွံလဝ်ပ္ဍဲက္ဍဟ်ပိုဲပရေၚ်ပရောနာနာလပါ်လဵုနွံဂၠိုၚ်တှ်ေ စိုပ်မွဲတ္ၚဲဟေၚ် ပိုဲတံတံၚ်ပ္တိတ်သုၚ်စောဲစကာပရောပရောမဂိုၚ်စွံလဝ်ပ္ဍဲက္ဍဟ်ပိုဲဏံဗွဲစၟတ်ဨကန်တကီုရ၊ တ္ၚဲဏံၜိုန်ရပိုဲတံဟွံသုၚ်စောဲကီုလေဝ် ဟွံသုၚ်စောဲရလ္ပထေၚ်တုဲ တ္ၚဲလဵုနဲကဲသုၚ်စောဲဘဝပိုဲသတိလီုသမာဓိကၟိုၚ်ကယျာမ္ဂးတှ်ေ တ္ၚဲတေံရပိုဲဏံဂၠံၚ်ပိုတ်တုဲ အရာလဵုဂွံဆက်ကွာ်အာမာန်ဂှ် တ္ၚဲတေံဟေၚ်ဒှ်ရအရာစွံလဝ်ပ္ဍဲက္ဍဟ်ပိုဲတံလပါ်ပရေံပရေံယုတ်ယုတ်မ္ၚိုဟ်ကြံၚ်တံၚ်ပ္တိတ်စသုၚ်စောဲစကာအိုတ်တုဲ အိုတ်ကၞောတ်ဟေၚ်ဘဝဂှ်ဒှ်ကၠုၚ်မၞိဟ်ကုသဵုပရေံမွဲရ ။ အုပ်ကၠေံနိဂီုတုဲဆဝွံကၠာရ ။
နိဿဲ
ကၠုၚ်နူပရေၚ်ဆဵုဂဗလၟေၚ်လၟေၚ်တ္ၚဲ ။