အာဇာနဲ
[အာဇာနဲ]
ပူဂဵုကၠောန်သွက်ဂကူ ပူဂဵုဒှ်ဂုဏ်ဖဵုသွက်ဂကူ ပူဂဵုသၠးလမျီုသွက်ဂကူတံဂှ်ဟေၚ် ကော်ခဴစ ပူဂဵုအာဇာနဲထေက်ရ။ ပူဂဵုအာဇာနဲဂှ် ဒှ်သၟာပရေၚ်ဍုၚ်ကွာန်မွဲတုဲ သၠးဂုဏ်ဖဵုအတ္တမာန်လၟိုန်ရ။ ပူဂဵုတံဏံ ယဝ်ရဟွံမွဲမ္ဂး ဂကူလဵုကျေဝ်ဂေါဝ်ဟွံမာန်ရ။ ပူဂဵုအာဇာနဲဂှ် ယြဴညးလဵု ဟွံရာဒနာမိက်နွံကီုရော။ ယဝ်ရတၟော်ကဵုနဲပရေၚ်ဍုၚ်ကွာန်တ္ၚဲဏံမ္ဂး ပူဂဵုအာဇာနဲဂှ် ဒှ်ကျာ်မွဲဇကုရ။
အာဇာနဲ အလုံကောန်ဂကူပိုဲ သ္ဍိုက်ဆာန်မာန် ကဵုက္ဍိုပ်မာန် ရှ်ေသှ်ေမာန် ဒုၚ်စအသမ်ပါၚ်မာန်ဂှ် မိက်ဂွံကဵုမံက်ဂတဝ်တိတ်ကၠုၚ် ပြဟ်ဟ်ရ။ ဘဝဂကူပိုဲလၟုဟ်ဏံ ညံၚ်ရဴဂၠဴသ္ကအ် ဖေက်ကၠတုဲ ဂြိပ်ဒဴခြးဆာဲပေၚ်မံၚ်ဂြိုပ်ဂၞိၚ်ကီုရ။ အဵုဂၠဴမပြး မံၚ်တံဏံအိုဿီုဂှ် စိုပ်မွဲတ္ၚဲ ကလေၚ်ကောံကၠုၚ်မာန်ဟာ ကဠိၚ်ဒိုသ်ဌာန်တုဲ ကလေၚ်စဴသ္ၚိဌာန်ဟွံဒး ဒးဒုၚ်တဲစၞကဵုကၠ ဇာဒိသိုၚ် ကၠဵုကၠိၚ်ဟာဂှ် လၟလဵုမွဲပါ်ပဲါဒး ချိၚ်ဆမံၚ်ဟွံဒးဏီရ။ ဆဂး "ဂၠဴပြးကၠကိတ်၊ မိတ်ပြးဒးဘဲ" ညးအဲဒးပတှ်ေ ထေက်ရ။ ဘဝကောန်ဂကူပိုဲ တုပ်သၟဟ်ကဵုဂၠဴပြးပေၚ်ဂြိုပ်ဂၞိၚ်ဏံ ညံၚ်ဂွံကောံနၚ်ကုမာန်မ္ဂး ပၟၚ်ဂၠဲဂှ် ဒှ်ပၟၚ်ဂကူပိုဲ ဒှ်က္ဍိုပ်သ္ကိုပ် အာဇာနဲဂကူပိုဲရ။
စိုတ်ဓါတ်ဆာန်ဂကူပိုဲ လညာတ်ကောန်ဂကူပိုဲ အိုဟ်တြေံဗျုကှ် စံၚ်ဂြဟွံဒှ်လ္ၚဂှ် ဒးဗိုတ်ကၠဟ် ဒးပဠေဝ်ပဠေတ်ထောံရ စွံလဝ်အတိုၚ်ဏံဟွံဂွံရ။စိုတ်ဓါတ်ဏံ လညာတ်ဏံဟေၚ် ဍဵုဓလိုက်ဖျေံ ဝးပ္ကဝ်ဖျေံမံၚ် ဘဝဂကူပိုဲရ "စိုတ်သာဂကူပၠိုတ်၊ ဂၠုၚ်သာဂတာလိုက် " အရေဝ်ဏံ ကေၚ်မိၚ်မံၚ်လၟိုန်ရ။အရေဝ်ဏံယျေလ္ဂူအာ ပ္ဍဲကတောဝ်တုဲ ဟွံစွံၚုဟ်မးကဵု အရေဝ်ဏံရ။ ဟွံသ္ပဂရုကဵုယဲမ္ဂး ယဲဂှ် ဍေံကတဵုဗဒှ်ကဵု အန္တရာဲလမျီုမာန်ရ။ ဟွံသ္ပဂရုကဵုအရေဝ်ဏံမ္ဂး အရေဝ်ဏံဒှ်ကၠုၚ် အန္တရာဲဂကူပိုဲရ။ ကမၠောန်ဟွံဒှ် ဂုဏ်ဖဵုဂကူတံဂှ်လေဝ်ကၠောန် လိက်ဟွံဒှ်ဂုဏ်ဖဵု ဂကူတံဂှ်လေဝ် ချူကှ်ေကၠာဲ လညာတ်ဟွံဒှ်ဂုဏ်ဖဵုဂကူတံဂှ်လေဝ် ပ္ကောံစွံလဝ် ပ္ဍဲကၠေၚ်က္ဍဟ် ရန်တၟံကဵုဒယှ်တှ်အတ္တ ပၟိက်ပူဂဵုဇၞော်သၠဲ ဝၚ်ချူလဝ်ကဵုတဲတံဂှ် ဇိုတ်ထောံကဵုဇိုၚ် မပ္တံသာ်ဏံ ကၠောန်သ္ပ နကဵုစိုတ်ဓါတ်သာဂကူဗၠိုက်ရ။
ဂြိုဟ်ဇာတာရာဟု စိုပ်ကၠုၚ်မံၚ် ပ္ဍဲဂကူပိုဲက္ကရဟာ။ ဂကူပိုဲ မုၚုဟ်မးနွံဏီရော။ ဗီုညးကဵုညး ဟွံမၚ်မွဲမ္ဂး မုကြက်ဒှ်ကၠုၚ်မာန်ရော။ ဘဝဂကူပိုဲ မွဲတ္ၚဲကဵုမွဲတ္ၚဲ က္ဍန်ဂြက်ကၠုၚ်မံၚ်ရ။ စိုတ်ဓါတ်ဆာန်ဂကူတံဂှ်လေဝ် မွဲတ္ၚဲကဵုမွဲတ္ၚဲ ယျအ်စှ်ေကၠုၚ်မံၚ်ရ။ညံၚ်ရဴပူဂဵုမွဲ ဒှ်မံၚ်ယဲ AIDS ကီု ဖျုန်စၞာံတံ ဆီတံကှ်ဇတ်စှ်ေကၠုၚ် အရိုဟ်ဟ်တ္ၚဲရ။ ကၞောတ်တေံမုရော ဟီုမ္ဂး ကၠက်ကဵုချိုတ်ဝါဟေၚ် သှ်ေတဴရ။
"ထေၚ်ဂးကျာ်သြဳ ဒှ်တဳမွဲပၠန် ထေၚ်ဂးအာဇာနဲ ဒှ်သၟာအတ္တမွဲပၠန်" ဒှ်ကၠုၚ်မံၚ်ဗီုဏံ ဂၠိုၚ်ကဵုသၞာံရ။ သွက်ပိုဲဂွံစ္ၜုဲစ္ၜော်ဗ္ဒဗ္ဒဲါဂှ် မုဟွံမွဲရ။ အာဇာနဲဂကူတံဂှ် စဵုကဵုတ္ၚဲဏံ ဟွံမံက်ဂတဝ်ကၠုၚ်ဏီရ။အာဇာနဲဇေတ် ဟွံမံက်ဂတဝ်ကၠုၚ်မ္ဂး ဝဲခၞံၚ်ဏံ ညးလဵုမွဲဟံၚ်ပြာ်ကဵုဟွံမာန်ရ၊ ကံဝိပက်ဏံနူကျာ် မတွံဂးအာဇာနဲတုဲမၞိဟ် ဟံၚ်ပြာ်မာန်ဂှ် ဂွံဆဵုကေတ်ဏီရ။ ဟိုတ်ဂှ်ရ သ္အာၚ်နူအာဇာနဲတုဲ မုဟွံဒရာမိတ်ရ။ အာဇာနဲကဵုဂွံကတဵုဒှ်ကၠုၚ် ပြဟ်ဟ်ညိဟေၚ် အရိုဟ်တ္ၚဲအဲရာဒနာမိက်ရ။
ဥက္ကဋ္ဌ နာဲဗု အာဇာနဲဟွံသေၚ် ကလေၚ်ထ္ၜုတ်ပ္တိုန် ဥက္ကဋ္ဌနာဲလမ္စံက်ပၠန်ရ။ ဥက္ကဋ္ဌ နာဲလမ္စံက်ပၠန် သီုစသြန် သီုဓဇန် သွက်ဂွံရုဲတၞဟ်ပၠန်ဟွံမွဲရ။ မုဇြက်သ္ပဟွံမွဲရ ဝိပက်ရဲကဵုရဲရ၊ က္ဍိုၚ်ဟွံမွဲမ္ဂး ဓလဝ်ခၟံက်။ ခၟံက်ဟွံမွဲ ဓလဝ်ထာၚ်တာ၊ ထာၚ်တာလေဝ် ဟွံမွဲပၠန်မ္ဂး ဂဂဵုတးပန် သွက်ဂွံဒၞာဟွံမွဲရ ကံရဲကဵုရဲရ။ကောန်ညး တန်ကဝ်တံ အခိၚ်လျးအရံၚ်ဇကုဗၠိုတ်ဂှ် ပိုန်ရရာဒနာမိက်ကဵု အရံၚ်မွဲမွဲတုဲ က္လိဂွံမာန်ကီုလေဝ် ဘဝရဲ မုဟွံဂွံဂှ် ဂပ်ဝ်ဆာန်ဍူကွေံရ။ နာဲဗုလေဝ် အာဇာနဲဟွံသေၚ် နာဲလမ္စံက်လေဝ် အာဇာနဲဟွံသေၚ် နာဲဍာဲပၠန်လေဝ် ယဝ်ရကလေၚ်ထ္ၜုတ်ပ္တိုန်ပၠန်မ္ဂး ဖေက်ပရေံနူဏံပၠန် ညးအဲဒးဂွိၚ်တဴရ။
ကောန်ဂကူပိုဲ ကတဵုဒှ်မံၚ်ယဲ AIDS မွဲတ္ၚဲကဵုမွဲတ္ၚဲ ဒြဟတ်ဍိုန်လျစှ်ေကၠုၚ်မံၚ်ရ။ ပွဒြဟတ်မဍိုန်လျဏံဂှ် မုဍေံပ္တဝ်ဏါကဵုမုရော၊ ခြာဟွံလဝ်ချိုတ်ရ ယဲဏံညးဂှ် ဝဳကဵုမာန်ရော၊ ညးမဝဳကဵုဗၠးဂှ် ဒှ်အ္စာသဝ်အာဇာနဲ ပ္ဍဲဝၚ်ကောန်ကောန်ဂကူပိုဲရ၊ တၠပါရမဳအ္စာသဝ်ဇဳဝက ယဝ်ရဟွံၜံၚ်တိတ်ကၠုၚ်ပြဟ်ပြဟ်မ္ဂး ယဲကပ်ဏံ ဓလီုဂွံကောန်ဂကူပိုဲဏေါၚ်။ နူကၠာကောန်ဂကူပိုဲ ဟွံဒှ်အာစၞယဲဏံဏီ အာဇာနဲအ္စာသဝ် ကဵုဂွံမံက်ဂတဝ်တိတ်ကၠုၚ်ပြဟ်ဟ်ညိ။ၜိုန်ဒှ်ဇာဒိသိုၚ် ဆေဝ်ဒဝ်အန္တရာဲ ဟမိတ်ဏီ
(sanaca)
သွက်အတ္တဂျိုၚ်မံၚ်လမျီုတုဲ ၜိုန်ရကဆံၚ်သၠုၚ်စိုပ်အကးကီုလေဝ် တြုံအာဇာနဲမွဲဏေါၚ် ဟိုသၟိတ်ဟွံဂွံရ။ တြုံအာဇာနဲ ဗြဲအာဇာနဲတံဂှ် မၞုံကဵုဝဳရိယဇဲလွဳပညာတုဲ သၠးလဝ်အတ္တလၟိုန်ရ။ ပူဂဵုဂကူတံဝွံဟေၚ် ဟံၚ်ပြာ်ကဵုဘဝဂကူပိုဲ နူကြပ်ဗၠိုက်ဍာ်ၜဳမာန်ရ။ ဘဝဂကူဒးဖေက်မံၚ်ဘဲ ဗဴဇုကြမ်ကြမွဲဏှမွဲဏှစံၚ်ကွာန်ဂှ်လေဝ် ဟံၚ်ပြာ်ကဵုမာန်ရ။ ကၠေၚ်က္ဍဟ်ညးတံကီု ဝဳရိယညးတံကီု၊ ကာလလဵုဟွံဒှ်အာ လၟောဝ်အာ လပါ်ပရေၚ်ပိုန်ဒြပ်အရပ်အရာရ။ပူဂဵုတံဝွံဟေၚ် ဒှ်ဆီလတေၚ်ဂကူပိုဲ ဂွံဂျိုၚ်အာစဵုကဝ်တဴမာန်ရ၊ လ္ၚဵုတံစိုပ်တရဲမွဲ ဇူမွဲချိန်ခဏ ပြေလၟောၚ်တုဲ ဆက်ကွာ်ဟွံမာန် လဟိၚ်ကဵုရုပ်သာ် ကောန်ဝုတ်လကိုဟ်အကြာ ဂြိုပ်ဂၞိၚ်တုဲ သ္ပတဴအယောၚ်အလာ ညံၚ်ရဴက္ဍိုပ်ဂိဇကုက္တဴ ဇိုၚ်တေၚ်တဲတေၚ်ရ။ ပူဂဵုတံဏံဂှ် ဒးဒုၚ်ဖအိုတ်လမျီုအကြာဂြိုပ်ဂၞိၚ်ဏံရ။ ရန်တၟံတိုၚ်ပ္ကဴလ္အိတ်တေံဂှ် စိုပ်ဟွံမာန်ရ။ ၜိုန်ရဗောဓိသတ်ပိုဲ ကဵုမံၚ်သတိကီုလေဝ် ဟွံကလၚ်စအရေဝ်ဗောဓိသတ်တုဲ ကောန်ဝုတ်လကိုဟ်ဂှ် ထေၚ်ကောန်ဝုတ်မၞိဟ်ဇေတ်တ် ဒးအုပ်ကၠေံနိဂီုဘဝ အကြာဂြိုပ်ဂၞိၚ်ဂှ်ရ။
ကမၠောန်မွဲ ပိုတ်တ်သ္ကုတ်တ်ဒးကၠောန်ရ၊ အတိုၚ်ဍာံဂှ် ဒးကၠောန်ရ၊ နကဵုကသပ်ဥာဏ်ဇကု ချပ်ဇြိုဟ်ဟ်နက်နက်တုဲ ဒးကၠောန်ရ။ ဟိုတ်ဖဵုခိုဟ်ပရေံတုဲ ဒးကၠောန်ရ၊ စဵုကဵုစိုတ်ဂံၚ်ၚ်သ္ကာသ္ကာ ဒးကၠောန်ရ ကာလဂှ်မှ ဒှ်လက္ချဏ်ပူဂဵုအာဇာနဲရ။ အတိုၚ်ဇကုကၠောန်လဝ်ဂှ် ဗၠေတ်မံၚ်မ္ဂး ဂံၚ်ပဠေဝ်ပဠေတ်ပြဟ်ဟ်တုဲ ဍာံမ္ဂးကၠောန် ပိုတ်တ်သ္ကုတ်တ်ရ၊ က္ဍိုပ်သ္ကိုပ်ဍာံမ္ဂး
ဒးပိုတ်သ္ကုတ်ဖအိုတ်ရ။
"Southeat Asia must rethink its traditional passivity.and consider active intervention to prevent crises like the one unfolding in Cambodia" သာ်ဏံ Anwar lbrahim က္ဍိုပ်သ္ကိုပ်မလေယှာ ကေၚ်ဟီုကၠုၚ်လဝ်နွံရ။ (News week july 21.1997) ရဲဂကောံ အေသိယာန်တံ ဒးကလေၚ်ကူချပ် အခိုက်ကၞာလဇုဲလဇသှ်ေဝက်ဂှ်ထေက်ရောၚ်၊ ကောန်ဍုၚ်အာယှပိုဲဏံ ဗွဲအလေံမ္ဂး လဇုဲလဇမံၚ်လၟိုန်ရ။ ဟွံဂံၚ်ကၠောန် ဟွံဂံၚ်သ္ပမံၚ်ရ။ ပ္ဍဲကဵုကိစ္စကမ္ဘောဒဳယျာဏံ နူကၠာဟွံကတဵုဒှ်ဏီ (ပ္ဍဲ July 5-6 ဟောန်သာန်သီအဝဵု) လုပ်ပရေပရံၚ်တာဒၞာပြဟ်ဟ်ထေက်မံၚ်၊ ကာလဒှ်ကၠုၚ်ဗီုဏံတုဲမှ မုဇြက်ပဟွံမွဲရ။ လဇုဲကဇဝိဝိၚ်မ္ဂး မုဖဵုခိုဟ်မွဲလေဝ် ကတဵုဒှ်ကၠုၚ် ကုပိုဲဟွံမာန်ရ။ ချပ်ဗ္စါရဏါပြဟ်ဟ်တုဲ ဒးကၠောန်ပတုဲထောံပြဟ်ဟ်ရ။ အခိၚ်ကဵုဍာ်ဒဳဂှ်လေဝ် ဟွံမံၚ်ပိုဲရ။ ခေတ်ဂှ်လေဝ် ဟွံမၚ်ပိုဲရ။ မုမွဲကီုလေဝ် ဟွံမၚ်ပိုဲရ။ ပိုဲလေဝ်မၚ်ဟွံဂွံကီုရ။ ဒးချပ်နွံမ္ဂး ချပ်လဝ်ဇြိုဟ်ဟ်တုဲ၊ ဒးကၠောန်နွံမ္ဂး နကဵုဇဲလွဳဒးကၠောန်ပတုဲထောံပြဟ်ဟ်ရ။ ယဝ်ရဟွံကၠောန်ဗီုဏံမ္ဂး မၞိသ်တံဂှ်လေဝ် အာဇာနဲဟွံသေၚ် ဝၚ်တံဂှ်လေဝ် အာဇာနဲဟွံသေၚ်ရ။
ကၠောန်ကမၠောန်မွဲမွဲ တော်မံၚ်ဗေဒၚ်ဏီ၊ ဍေန်မံၚ်ပၞာၚ်ဏီ၊ ပၠေၚ်မံၚ်အန္တရာဲဏီ၊ မၚ်မံၚ်တ္ၚဲဗၠးပြာပ်ဗဒါဏီမ္ဂး ပေဲါအံၚ်ဇၞးဂှ် ညးတၞဟ်ၜှ်ဂွံဏါကၠာရ။မၚ်ကဵုဍာ်စှ်ေမ္ဂး နူလကြဴပိုဲ သၞသတြုဗက်ကၠုၚ်မံၚ်ဂှ် ပိုဲဂြိပ်ပဲါဟွံဗၠးရ ပြဟ်ပြေဟ်ဟ် ဗာ်ဒုန်ဖံၚ်တုဲ ဒးတတ်ကၠောံမှ ဗၠးအန္တရာဲလမျီုရောၚ်။ နကဵုနဲကဲပြဟ်အိုတ်၊ ဍာံအိုတ်ခိုဟ်အိုတ်ဆက်ကၠောန်မ္ဂး ပိုဲဟံၚ်ပြာ်ဂကူပိုဲ ဂတာပ်ခေတ်မာန်ရ။
အာဇာနဲဟီုဂှ် စိုတ်ဓါတ်ကီု လညာတ်ကီုဒးသၠုၚ်ပြဲရ၊ ဓဝ်အေၚ်ဒုၚ်လေဝ် ဒးဇၞော်လှဲလးရ။စိုတ်ဓါတ်ဟွံပြံၚ်လှုၚ်ပြဲမ္ဂး နဲလဵုဂွံဟံၚ်ပြာ်ဂကူမာန်ရော။တၚ်မွဲဂှ် ဒးဟီုအရေဝ်ကဵုစိုတ်ဓါတ်ရ ဟွံသေၚ်ဟာ။ဟိုတ်နူစှ်ေစိုတ်ဟွံပြဲ ဇၞော်သၠဲမံၚ်ကဵုအတ္တတုဲ ပ္ဍဲကဵုဝၚ်ကောန်ဂကူပိုဲ ဂၠိုၚ်ကဵုမုက်လိက် ဒးဍံက်ဍေန်မံၚ်ကဵု ဓဝ်ကျဟောံဗြံရ။ ဟိုတ်နူဓဝ်အတ္တဇၞော်လောန်တုဲ အနိဌာရီုတံဂှ် ဂၠိုၚ်ကဵုသၞာံ ဒးဆဵုဂဗကၠုၚ်ရ။ ဓဝ်အတ္တတံဂှ် ဍေံကတဵုဒှ်ကၠုၚ် နကဵုဟိုတ်နာနာသာ်ရ။ နကဵုဟိုတ်အဂတိပန်ဂှ် ဒှ်အဓိကရ။ ဟိုတ်နူဓဝ်အတ္တဟိတံ ဓလီုဂွံပ္ဍဲကောန်ဂကူပိုဲတုဲ ပွိုၚ် (၂၄၅)သၞာံပြၚ်ၚ် ဒးသ္ၚောဲခြာနူ က္ဍိုပ်သ္ကိုပ်အာဇာနဲတံရ။ အာဇာနဲသွက်ပိုဲဂွံရှ်ေသှ်ေဂှ် စဵုကဵုတ္ၚဲဏံ ဟွံမံက်ဂတဝ်ကၠုၚ်ဏီရ။ တၠညးရာဇာဓိရာဇ် စိုပ်မံၚ်ဍုၚ်သွဝ်တေံဣရဟာ။ ယဝ်ရကၠုၚ်ကတဵုဒှ်စုတ် ပ္ဍဲဂကူပိုဲမွဲဝါပၠန်မ္ဂး ဂလိုၚ်လဵုခိုဟ်ရော ဟွံတီ။ ညးဂှ်သၟာအတ္တဟွံသေၚ်ရ။ အာဇာနဲ ဂကူပိုဲရ။ ဂၞကျာ်ညး မုပညးဂွံသၠးကဵုသ္ကိုပ်ပၞာန်ညးမာန်ရော။ဟိုတ်နူဂၞကျာ်ဂၠိုၚ်တုဲ သၠးကဵုမာန်ဟာ၊ ဟွံသေၚ်ရ။ပ္ဍဲအရာသၠးဗြဴဇကုမာန်ဂှ် ဒှ်ဗောဓိသတ်မွဲရ။ သၟိၚ်လဵုမွဲ သၠးကဵုဂၞကျာ်ဆာန်ဇကုဟွံမာန်ရ။ ဗြဴဇကုသၠးကဵုကောန်ကွးဇကုမာန်ဟီုဂှ် ဟွံလောဲကွေံကွေံရ။
ကောန်ဂကူပိုဲ ဗွဲမဂၠိုၚ် ဂွံလ္ၚတ်ဗှ်ကေတ်ဝၚ်တၠညးရာဇာဓိရာဇ် ဇိပ်ပ်ဂၠိပ်ပ်အိုတ်ရ။ ကောန်ဂကူမန် မဆာန်ဂကူမွဲ ဟွံတီကေတ်ဝၚ်တၠညးရာဇာဓိရာဇ်ဟီုဂှ် ဟွံမွဲဏီရ။ တၠညးဝွံ ဒယှ်တှ်အလုံဍုၚ်ဗၟာသၟးဟွံက အလုံဂၠးတိဏံ ပြာကဋ်တဴရ။ က္ဍိုပ်သ္ကိုပ်ဂၠးတိ ဂွံတုပ်ကဵုတၠညးဟွံမွဲဏီရ။ အရေဝ်ဏံဝွံ နကဵုအလဵုညးမချူဆာဲလိက်ဏံ ချိၚ်ဆတုဲ ဟီုဟွံသေၚ် တၠပညာဗၟာကဆံၚ်သၠုၚ်ၚ်မွဲတၠ ကေၚ်ဟီုလဝ်နွံတုဲ၊ နူဂှ် မိက်ဂွံဖျေံဏါဖံက်သေဝ်ကဵုကောန်ဂကူပိုဲရ၊ ပွိုၚ် ၄၀-သၞာံဗတိုက်ပၞာန် ဟွံကျမွဲလှ်ေဟီုဂှ် သ္အာၚ်နူတၠညးတုဲ က္ဍိုပ်သ္ကိုပ်ဂၠးတိဟွံမွဲဏီရ။ တၠညးဂှ် ဒှ်သၟိၚ်မန်ပိုဲဇေတ်တ်ရ ဟွံသေၚ်ဟ။ မုပပိုဲဟွံကေတ်ဂုဏ်စရာဲရော။
(၁) ကေတ်မ္ဂးဒးဂွံဏေါၚ်။
(၂) ကၠောန်မ္ဂးဒးဒှ်ဏေါၚ်။
(၃) အာမ္ဂးဒးစိုပ်ဏေါၚ်။
ဟိုတ်နူညးပတှ်ေလဝ် အရေဝ်ပိတၚ်ဏံတုဲ မကၠောန်ဂှ်ရ အာဇာနဲပ္ဍဲဂၠးတိဏံ မွဲရောကဆံၚ်ညးဟွံမွဲရ။ ဟီုဂှ်တှ်ေ အရေဝ်ပိတၚ်ဏံ ပိုဲဒုၚ်ဂိုၚ်ကေတ်လဝ်တုဲ မၚ်မွဲအာဂကူထေက်မံၚ်။ နကဵုအရေဝ်ပိမဏံ ယဝ်ရဆက်မၚ်မွဲအာဂကူမ္ဂး အာဇာနဲသွက်ပိုဲ ဂွံရှ်ေသှ်ေဂှ် ဝၚ်သၠးတိတ်ကၠုၚ်ဣရ။ ပိုဲစၟတ်သမ္တီထေက်ရ။လကြဴအိုတ် မိက်ဂွံပ္ကန်ဂှ် ၚုဟ်ကတဵု နူဂၠမ်သတိက်ဗက် ကူချပ်အရေဝ်ပိမဏံတုဲ ရှ်ေသှ်ေဏါ တၠညးအရိုဟ်ဟ်တ္ၚဲညိ။ အာဇာနဲဝါတ်ခဲါ ညံၚ်ရဴဍာ်သာဲဇေတ်တ်ဂှ် မံက်ဂတဝ်ကၠုၚ်ဣရ အလုံကောန်ဂကူပိုဲ ကလိဂွံလျးအရံၚ်အံၚ်သူ ပ္ဍဲအခိၚ်ဗ္တံဂၠုဓီုရ။
✍ ရာမည-မာံဝါန်ၛာဲ✍
ကွာန်ကအ်သိုခ်